੩੮. ਬੋਧਿਵਨ੍ਦਨਵਗ੍ਗੋ

੧. ਬੋਧਿਵਨ੍ਦਕਤ੍ਥੇਰਅਪਦਾਨਂ

੧. ‘‘ਪਾਟਲਿਂ ਹਰਿਤਂ ਦਿਸ੍ਵਾ, ਪਾਦਪਂ ਧਰਣੀਰੁਹਂ;

ਏਕਂਸਂ ਅਞ੍ਜਲਿਂ ਕਤ੍ਵਾ, ਅਵਨ੍ਦਿਂ ਪਾਟਲਿਂ ਅਹਂ.

੨. ‘‘ਅਞ੍ਜਲਿਂ ਪਗ੍ਗਹੇਤ੍ਵਾਨ, ਗਰੁਂ ਕਤ੍ਵਾਨ ਮਾਨਸਂ;

ਅਨ੍ਤੋਸੁਦ੍ਧਂ ਬਹਿਸੁਦ੍ਧਂ, ਸੁਵਿਮੁਤ੍ਤਮਨਾਸਵਂ.

੩. ‘‘ਵਿਪਸ੍ਸਿਂ ਲੋਕਮਹਿਤਂ, ਕਰੁਣਾਞਾਣਸਾਗਰਂ;

ਸਮ੍ਮੁਖਾ ਵਿਯ ਸਮ੍ਬੁਦ੍ਧਂ, ਅਵਨ੍ਦਿਂ ਪਾਟਲਿਂ ਅਹਂ.

੪. ‘‘ਏਕਨਵੁਤਿਤੋ ਕਪ੍ਪੇ, ਯਂ ਬੋਧਿਮਭਿਵਨ੍ਦਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਵਨ੍ਦਨਾਯ ਇਦਂ ਫਲਂ.

੫. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਬੋਧਿਵਨ੍ਦਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਬੋਧਿਵਨ੍ਦਕਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਪਾਟਲਿਪੁਪ੍ਫਿਯਤ੍ਥੇਰਅਪਦਾਨਂ

੬. ‘‘ਵਿਪਸ੍ਸੀ ਨਾਮ ਭਗਵਾ, ਸਯਮ੍ਭੂ ਅਗ੍ਗਪੁਗ੍ਗਲੋ;

ਪੁਰਕ੍ਖਤੋ ਸਸਿਸ੍ਸੇਹਿ, ਪਾਵਿਸਿ ਬਨ੍ਧੁਮਂ ਜਿਨੋ.

੭. ‘‘ਤੀਣਿ ਪਾਟਲਿਪੁਪ੍ਫਾਨਿ, ਉਚ੍ਛਙ੍ਗੇ ਠਪਿਤਾਨਿ ਮੇ;

ਸੀਸਂ ਨ੍ਹਾਯਿਤੁਕਾਮੋਵ, ਨਦੀਤਿਤ੍ਥਂ ਅਗਚ੍ਛਹਂ.

੮. ‘‘ਨਿਕ੍ਖਮ੍ਮ ਬਨ੍ਧੁਮਤਿਯਾ, ਅਦ੍ਦਸਂ ਲੋਕਨਾਯਕਂ;

ਇਨ੍ਦੀਵਰਂਵ ਜਲਿਤਂ, ਆਦਿਤ੍ਤਂਵ ਹੁਤਾਸਨਂ.

੯. ‘‘ਬ੍ਯਗ੍ਘੂਸਭਂਵ ਪਵਰਂ, ਅਭਿਜਾਤਂਵ ਕੇਸਰਿਂ;

ਗਚ੍ਛਨ੍ਤਂ ਸਮਣਾਨਗ੍ਗਂ, ਭਿਕ੍ਖੁਸਙ੍ਘਪੁਰਕ੍ਖਤਂ.

੧੦. ‘‘ਤਸ੍ਮਿਂ ਪਸਨ੍ਨੋ [ਸਮਣੇ (ਕ.)] ਸੁਗਤੇ, ਕਿਲੇਸਮਲਧੋਵਨੇ;

ਗਹੇਤ੍ਵਾ ਤੀਣਿ ਪੁਪ੍ਫਾਨਿ, ਬੁਦ੍ਧਸੇਟ੍ਠਂ ਅਪੂਜਯਿਂ.

੧੧. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਾਟਲਿਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਾਟਲਿਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਤੀਣੁਪ੍ਪਲਮਾਲਿਯਤ੍ਥੇਰਅਪਦਾਨਂ

੧੩. ‘‘ਚਨ੍ਦਭਾਗਾਨਦੀਤੀਰੇ, ਅਹੋਸਿਂ ਵਾਨਰੋ ਤਦਾ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਨਿਸਿਨ੍ਨਂ ਪਬ੍ਬਤਨ੍ਤਰੇ.

੧੪. ‘‘ਓਭਾਸੇਨ੍ਤਂ ਦਿਸਾ ਸਬ੍ਬਾ, ਸਾਲਰਾਜਂਵ ਫੁਲ੍ਲਿਤਂ;

ਲਕ੍ਖਣਬ੍ਯਞ੍ਜਨੂਪੇਤਂ, ਦਿਸ੍ਵਾਨਤ੍ਤਮਨੋ ਅਹਂ.

੧੫. ‘‘ਉਦਗ੍ਗਚਿਤ੍ਤੋ ਸੁਮਨੋ, ਪੀਤਿਯਾ ਹਟ੍ਠਮਾਨਸੋ;

ਤੀਣਿ ਉਪ੍ਪਲਪੁਪ੍ਫਾਨਿ, ਮਤ੍ਥਕੇ ਅਭਿਰੋਪਯਿਂ.

੧੬. ‘‘ਪੂਜਯਿਤ੍ਵਾਨ ਪੁਪ੍ਫਾਨਿ, ਫੁਸ੍ਸਸ੍ਸਾਹਂ ਮਹੇਸਿਨੋ;

ਸਗਾਰਵੋ ਭਵਿਤ੍ਵਾਨ, ਪਕ੍ਕਾਮਿਂ ਉਤ੍ਤਰਾਮੁਖੋ.

੧੭. ‘‘ਗਚ੍ਛਨ੍ਤੋ ਪਟਿਕੁਟਿਕੋ, ਵਿਪ੍ਪਸਨ੍ਨੇਨ ਚੇਤਸਾ;

ਸੇਲਨ੍ਤਰੇ ਪਤਿਤ੍ਵਾਨ, ਪਾਪੁਣਿਂ ਜੀਵਿਤਕ੍ਖਯਂ.

੧੮. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਪੁਰਿਮਂ ਜਾਤਿਂ, ਤਾਵਤਿਂਸਮਗਚ੍ਛਹਂ.

੧੯. ‘‘ਸਤਾਨਂ ਤੀਣਿਕ੍ਖਤ੍ਤੁਞ੍ਚ, ਦੇਵਰਜ੍ਜਮਕਾਰਯਿਂ;

ਸਤਾਨਂ ਪਞ੍ਚਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ.

੨੦. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤੀਣੁਪ੍ਪਲਮਾਲਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤੀਣੁਪ੍ਪਲਮਾਲਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਪਟ੍ਟਿਪੁਪ੍ਫਿਯਤ੍ਥੇਰਅਪਦਾਨਂ

੨੨. ‘‘ਯਦਾ ਨਿਬ੍ਬਾਯਿ ਸਮ੍ਬੁਦ੍ਧੋ, ਮਹੇਸੀ ਪਦੁਮੁਤ੍ਤਰੋ;

ਸਮਾਗਮ੍ਮ ਜਨਾ ਸਬ੍ਬੇ, ਸਰੀਰਂ ਨੀਹਰਨ੍ਤਿ ਤੇ.

੨੩. ‘‘ਨੀਹਰਨ੍ਤੇ ਸਰੀਰਮ੍ਹਿ, ਵਜ੍ਜਮਾਨਾਸੁ ਭੇਰਿਸੁ;

ਪਸਨ੍ਨਚਿਤ੍ਤੋ ਸੁਮਨੋ, ਪਟ੍ਟਿਪੁਪ੍ਫਂ ਅਪੂਜਯਿਂ.

੨੪. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਸਰੀਰਪੂਜਿਤੇ ਫਲਂ.

੨੫. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੨੬. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ [ਬੁਦ੍ਧਸੇਟ੍ਠਸ੍ਸ (ਸੀ.)] ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੨੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਟ੍ਟਿਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਟ੍ਟਿਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਸਤ੍ਤਪਣ੍ਣਿਯਤ੍ਥੇਰਅਪਦਾਨਂ

੨੮. ‘‘ਸੁਮਨੋ ਨਾਮ ਸਮ੍ਬੁਦ੍ਧੋ, ਉਪ੍ਪਜ੍ਜਿ ਲੋਕਨਾਯਕੋ;

ਪਸਨ੍ਨਚਿਤ੍ਤੋ ਸੁਮਨੋ, ਸਤ੍ਤਪਣ੍ਣਿਮਪੂਜਯਿਂ.

੨੯. ‘‘ਸਤਸਹਸ੍ਸਿਤੋ ਕਪ੍ਪੇ, ਸਤ੍ਤਪਣ੍ਣਿਮਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਸਤ੍ਤਪਣ੍ਣਿਪੂਜਾਯਿਦਂ [ਸਤ੍ਤਪਣ੍ਣਿਸ੍ਸਿਦਂ (ਸੀ.)] ਫਲਂ.

੩੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੩੧. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਤ੍ਤਪਣ੍ਣਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਤ੍ਤਪਣ੍ਣਿਯਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਗਨ੍ਧਮੁਟ੍ਠਿਯਤ੍ਥੇਰਅਪਦਾਨਂ

੩੩. [ਇਧ ਗਾਥਾਦ੍ਧਂ ਊਨਂ ਵਿਯ ਦਿਸ੍ਸਤਿ] ‘‘ਚਿਤਕੇ ਕਰੀਯਮਾਨੇ, ਨਾਨਾਗਨ੍ਧੇ ਸਮਾਹਤੇ;

ਪਸਨ੍ਨਚਿਤ੍ਤੋ ਸੁਮਨੋ, ਗਨ੍ਧਮੁਟ੍ਠਿਮਪੂਜਯਿਂ.

੩੪. ‘‘ਸਤਸਹਸ੍ਸਿਤੋ ਕਪ੍ਪੇ, ਚਿਤਕਂ ਯਂ ਅਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਚਿਤਪੂਜਾਯਿਦਂ ਫਲਂ.

੩੫. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੩੬. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਗਨ੍ਧਮੁਟ੍ਠਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਗਨ੍ਧਮੁਟ੍ਠਿਯਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਚਿਤਕਪੂਜਕਤ੍ਥੇਰਅਪਦਾਨਂ

੩੮. ‘‘ਪਰਿਨਿਬ੍ਬੁਤੇ ਭਗਵਤਿ, ਜਲਜੁਤ੍ਤਮਨਾਮਕੇ;

ਆਰੋਪਿਤਮ੍ਹਿ ਚਿਤਕੇ, ਸਾਲਪੁਪ੍ਫਮਪੂਜਯਿਂ.

੩੯. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਚਿਤਪੂਜਾਯਿਦਂ ਫਲਂ.

੪੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੪੧. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਚਿਤਕਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਚਿਤਕਪੂਜਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਸੁਮਨਤਾਲਵਣ੍ਟਿਯਤ੍ਥੇਰਅਪਦਾਨਂ

੪੩. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਤਾਲਵਣ੍ਟਮਦਾਸਹਂ;

ਸੁਮਨੇਹਿ ਪਟਿਚ੍ਛਨ੍ਨਂ, ਧਾਰਯਾਮਿ ਮਹਾਰਹਂ.

੪੪. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਤਾਲਵਣ੍ਟਮਦਾਸਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਤਾਲਵਣ੍ਟਸ੍ਸਿਦਂ ਫਲਂ.

੪੫. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੪੬. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਮਨਤਾਲਵਣ੍ਟਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਮਨਤਾਲਵਣ੍ਟਿਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਸੁਮਨਦਾਮਿਯਤ੍ਥੇਰਅਪਦਾਨਂ

੪੮. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਨ੍ਹਾਤਕਸ੍ਸ ਤਪਸ੍ਸਿਨੋ;

ਕਤ੍ਵਾਨ ਸੁਮਨਦਾਮਂ, ਧਾਰਯਿਂ ਪੁਰਤੋ ਠਿਤੋ.

੪੯. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਦਾਮਂ ਧਾਰਯਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਸੁਮਨਧਾਰਣੇ ਫਲਂ.

੫੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੫੧. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੫੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਮਨਦਾਮਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਮਨਦਾਮਿਯਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਕਾਸੁਮਾਰਿਫਲਦਾਯਕਤ੍ਥੇਰਅਪਦਾਨਂ

੫੩. ‘‘ਕਣਿਕਾਰਂਵ ਜੋਤਨ੍ਤਂ, ਨਿਸਿਨ੍ਨਂ ਪਬ੍ਬਤਨ੍ਤਰੇ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਲੋਕਜੇਟ੍ਠਂ ਨਰਾਸਭਂ.

੫੪. ‘‘ਪਸਨ੍ਨਚਿਤ੍ਤੋ ਸੁਮਨੋ, ਸਿਰੇ ਕਤ੍ਵਾਨ ਅਞ੍ਜਲਿਂ;

ਕਾਸੁਮਾਰਿਫਲਂ ਗਯ੍ਹ, ਬੁਦ੍ਧਸੇਟ੍ਠਸ੍ਸਦਾਸਹਂ.

੫੫. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਫਲਮਦਦਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੫੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵੋ.

੫੭. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੫੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕਾਸੁਮਾਰਿਫਲਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕਾਸੁਮਾਰਿਫਲਦਾਯਕਤ੍ਥੇਰਸ੍ਸਾਪਦਾਨਂ ਦਸਮਂ.

ਬੋਧਿਵਨ੍ਦਨਵਗ੍ਗੋ ਅਟ੍ਠਤਿਂਸਤਿਮੋ.