੨. ਤੀਣੁਪ੍ਪਲਮਾਲਿਯਤ੍ਥੇਰਅਪਦਾਨਂ

੧੧. ‘‘ਚਨ੍ਦਭਾਗਾਨਦੀਤੀਰੇ, ਅਹੋਸਿਂ ਵਾਨਰੋ ਤਦਾ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਨਿਸਿਨ੍ਨਂ ਪਬ੍ਬਤਨ੍ਤਰੇ.

੧੨. ‘‘ਓਭਾਸੇਨ੍ਤਂ ਦਿਸਾ ਸਬ੍ਬਾ, ਸਾਲਰਾਜਂਵ ਫੁਲ੍ਲਿਤਂ;

ਲਕ੍ਖਣਬ੍ਯਞ੍ਜਨੂਪੇਤਂ, ਦਿਸ੍ਵਾ ਅਤ੍ਤਮਨੋ ਅਹੁਂ.

੧੩. ‘‘ਉਦਗ੍ਗਚਿਤ੍ਤੋ ਸੁਮਨੋ, ਪੀਤਿਯਾ ਹਟ੍ਠਮਾਨਸੋ;

ਤੀਣਿ ਉਪ੍ਪਲਪੁਪ੍ਫਾਨਿ, ਮਤ੍ਥਕੇ ਅਭਿਰੋਪਯਿਂ.

੧੪. ‘‘ਪੁਪ੍ਫਾਨਿ ਅਭਿਰੋਪੇਤ੍ਵਾ, ਵਿਪਸ੍ਸਿਸ੍ਸ ਮਹੇਸਿਨੋ;

ਸਗਾਰਵੋ ਭਵਿਤ੍ਵਾਨ [ਗਮਿਤ੍ਵਾਨ (ਸੀ.), ਨਮਿਤ੍ਵਾਨ (ਕ.)], ਪਕ੍ਕਾਮਿਂ ਉਤ੍ਤਰਾਮੁਖੋ.

੧੫. ‘‘ਗਚ੍ਛਨ੍ਤੋ ਪਟਿਕੁਟਿਕੋ, ਵਿਪ੍ਪਸਨ੍ਨੇਨ ਚੇਤਸਾ;

ਸੇਲਨ੍ਤਰੇ ਪਤਿਤ੍ਵਾਨ [ਪਪਤਿਤ੍ਵਾ (ਸ੍ਯਾ. ਕ.)], ਪਾਪੁਣਿਂ ਜੀਵਿਤਕ੍ਖਯਂ.

੧੬. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ [ਪੁਰਿਮਂ ਜਾਤਿਂ (?) ਉਪਰਿ ੩੮ ਵਗ੍ਗੇ ਤਤਿਯਾਪਦਾਨੇ ਏਵਮੇਵ ਦਿਸ੍ਸਤਿ], ਤਾਵਤਿਂਸਮਗਚ੍ਛਹਂ.

੧੭. ‘‘ਸਤਾਨਂ ਤੀਣਿਕ੍ਖਤ੍ਤੁਞ੍ਚ, ਦੇਵਰਜ੍ਜਂ ਅਕਾਰਯਿਂ;

ਸਤਾਨਂ ਪਞ੍ਚਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ.

੧੮. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤੀਣੁਪ੍ਪਲਮਾਲਿਯੋ [ਤਿਉਪ੍ਪਲਮਾਲਿਯੋ (ਸੀ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤੀਣੁਪ੍ਪਲਮਾਲਿਯਤ੍ਥੇਰਸ੍ਸਾਪਦਾਨਂ ਦੁਤਿਯਂ.