੯. ਧਮ੍ਮਸਵਨਿਯਤ੍ਥੇਰਅਪਦਾਨਂ

੧੧੧. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਚਤੁਸਚ੍ਚਂ ਪਕਾਸੇਨ੍ਤੋ, ਸਨ੍ਤਾਰੇਸਿ ਬਹੁਂ ਜਨਂ.

੧੧੨. ‘‘ਅਹਂ ਤੇਨ ਸਮਯੇਨ, ਜਟਿਲੋ ਉਗ੍ਗਤਾਪਨੋ;

ਧੁਨਨ੍ਤੋ ਵਾਕਚੀਰਾਨਿ, ਗਚ੍ਛਾਮਿ ਅਮ੍ਬਰੇ ਤਦਾ.

੧੧੩. ‘‘ਬੁਦ੍ਧਸੇਟ੍ਠਸ੍ਸ ਉਪਰਿ, ਗਨ੍ਤੁਂ ਨ ਵਿਸਹਾਮਹਂ;

ਪਕ੍ਖੀਵ ਸੇਲਮਾਸਜ੍ਜ [ਸੇਲਮਾਪਜ੍ਜ (ਸ੍ਯਾ.)], ਗਮਨਂ ਨ ਲਭਾਮਹਂ.

੧੧੪. ‘‘ਨ ਮੇ ਇਦਂ ਭੂਤਪੁਬ੍ਬਂ, ਇਰਿਯਸ੍ਸ ਵਿਕੋਪਨਂ;

ਦਕੇ ਯਥਾ ਉਮ੍ਮੁਜ੍ਜਿਤ੍ਵਾ, ਏਵਂ ਗਚ੍ਛਾਮਿ ਅਮ੍ਬਰੇ.

੧੧੫. ‘‘ਉਲ਼ਾਰਭੂਤੋ ਮਨੁਜੋ, ਹੇਟ੍ਠਾਸੀਨੋ [ਹੇਟ੍ਠਾਪਿ ਨੋ (ਕ.)] ਭਵਿਸ੍ਸਤਿ;

ਹਨ੍ਦ ਮੇਨਂ ਗਵੇਸਿਸ੍ਸਂ, ਅਪਿ ਅਤ੍ਥਂ ਲਭੇਯ੍ਯਹਂ.

੧੧੬. ‘‘ਓਰੋਹਨ੍ਤੋ ਅਨ੍ਤਲਿਕ੍ਖਾ, ਸਦ੍ਦਮਸ੍ਸੋਸਿ ਸਤ੍ਥੁਨੋ;

ਅਨਿਚ੍ਚਤਂ ਕਥੇਨ੍ਤਸ੍ਸ, ਤਮਹਂ ਉਗ੍ਗਹਿਂ ਤਦਾ.

੧੧੭. ‘‘ਅਨਿਚ੍ਚਸਞ੍ਞਮੁਗ੍ਗਯ੍ਹ, ਅਗਮਾਸਿਂ ਮਮਸ੍ਸਮਂ;

ਯਾਵਤਾਯੁਂ ਵਸਿਤ੍ਵਾਨ, ਤਤ੍ਥ ਕਾਲਙ੍ਕਤੋ ਅਹਂ.

੧੧੮. ‘‘ਚਰਿਮੇ ਵਤ੍ਤਮਾਨਮ੍ਹਿ, ਤਂ ਧਮ੍ਮਸਵਨਂ [ਧਮ੍ਮਸਵਣਂ (ਸੀ.)] ਸਰਿਂ;

ਤੇਨ ਕਮ੍ਮੇਨ ਸੁਕਤੇਨ, ਤਾਵਤਿਂਸਮਗਚ੍ਛਹਂ.

੧੧੯. ‘‘ਤਿਂਸਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਂ ਅਹਂ;

ਏਕਪਞ੍ਞਾਸਕ੍ਖਤ੍ਤੁਞ੍ਚ, ਦੇਵਰਜ੍ਜਮਕਾਰਯਿਂ.

੧੨੦. ‘‘ਏਕਸਤ੍ਤਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੧੨੧. ‘‘ਪਿਤੁਗੇਹੇ ਨਿਸੀਦਿਤ੍ਵਾ, ਸਮਣੋ ਭਾਵਿਤਿਨ੍ਦ੍ਰਿਯੋ;

ਗਾਥਾਯ ਪਰਿਦੀਪੇਨ੍ਤੋ, ਅਨਿਚ੍ਚਤਮੁਦਾਹਰਿ [ਅਨਿਚ੍ਚਵਤ੍ਥੁਦਾਹਰਿ (ਸ੍ਯਾ. ਕ.)].

੧੨੨. ‘‘ਅਨੁਸ੍ਸਰਾਮਿ ਤਂ ਸਞ੍ਞਂ, ਸਂਸਰਨ੍ਤੋ ਭਵਾਭਵੇ;

ਨ ਕੋਟਿਂ ਪਟਿਵਿਜ੍ਝਾਮਿ [ਨ ਕੋਚਿ ਪਟਿਵਜ੍ਜਾਮਿ (ਕ.)], ਨਿਬ੍ਬਾਨਂ ਅਚ੍ਚੁਤਂ ਪਦਂ [ਅਯਂ ਗਾਥਾ ਉਪਰਿ ੪੩ ਵਗ੍ਗੇ ਸਤ੍ਤਮਾਪਦਾਨੇ ਪੁਰਿਮਗਾਥਾਯ ਪੁਰੇਤਰਂ ਦਿਸ੍ਸਤਿ].

੧੨੩. ‘‘ਅਨਿਚ੍ਚਾ ਵਤ ਸਙ੍ਖਾਰਾ, ਉਪ੍ਪਾਦਵਯਧਮ੍ਮਿਨੋ;

ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਤੇਸਂ ਵੂਪਸਮੋ ਸੁਖੋ.

੧੨੪. ‘‘ਸਹ ਗਾਥਂ ਸੁਣਿਤ੍ਵਾਨ, ਪੁਬ੍ਬਕਮ੍ਮਂ ਅਨੁਸ੍ਸਰਿਂ;

ਏਕਾਸਨੇ ਨਿਸੀਦਿਤ੍ਵਾ, ਅਰਹਤ੍ਤਮਪਾਪੁਣਿਂ.

੧੨੫. ‘‘ਜਾਤਿਯਾ ਸਤ੍ਤਵਸ੍ਸੋਹਂ, ਅਰਹਤ੍ਤਮਪਾਪੁਣਿਂ;

ਉਪਸਮ੍ਪਾਦਯਿ ਬੁਦ੍ਧੋ, ਗੁਣਮਞ੍ਞਾਯ ਚਕ੍ਖੁਮਾ.

੧੨੬. ‘‘ਦਾਰਕੋਵ ਅਹਂ ਸਨ੍ਤੋ, ਕਰਣੀਯਂ ਸਮਾਪਯਿਂ;

ਕਿਂ ਮੇ ਕਰਣੀਯਂ ਅਜ੍ਜ, ਸਕ੍ਯਪੁਤ੍ਤਸ੍ਸ ਸਾਸਨੇ.

੧੨੭. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਸਦ੍ਧਮ੍ਮਸਵਨੇ ਫਲਂ.

੧੨੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਧਮ੍ਮਸਵਨਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਧਮ੍ਮਸਵਨਿਯਤ੍ਥੇਰਸ੍ਸਾਪਦਾਨਂ ਨਵਮਂ.