੧੦. ਉਕ੍ਖਿਤ੍ਤਪਦੁਮਿਯਤ੍ਥੇਰਅਪਦਾਨਂ

੧੨੯. ‘‘ਨਗਰੇ ਹਂਸਵਤਿਯਾ, ਅਹੋਸਿਂ ਮਾਲਿਕੋ ਤਦਾ;

ਓਗਾਹੇਤ੍ਵਾ ਪਦੁਮਸਰਂ, ਸਤਪਤ੍ਤਂ ਓਚਿਨਾਮਹਂ.

੧੩੦. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਸਹ ਸਤਸਹਸ੍ਸੇਹਿ [ਸਤਸਹਸ੍ਸਸਿਸ੍ਸੇਹਿ (ਕ.)], ਸਨ੍ਤਚਿਤ੍ਤੇਹਿ ਤਾਦਿਭਿ.

੧੩੧. ‘‘ਖੀਣਾਸਵੇਹਿ ਸੁਦ੍ਧੇਹਿ, ਛਲ਼ਭਿਞ੍ਞੇਹਿ ਝਾਯਿਭਿ [ਸੋ ਤਦਾ (ਸੀ.), ਸੋ ਸਹ (ਕ.)];

ਮਮ ਵੁਦ੍ਧਿਂ ਸਮਨ੍ਵੇਸਂ, ਆਗਚ੍ਛਿ ਮਮ ਸਨ੍ਤਿਕਂ [ਮਮ ਸਨ੍ਤਿਕੇ (ਸੀ.), ਪੁਰਿਸੁਤ੍ਤਮੋ (ਸ੍ਯਾ. ਕ.)].

੧੩੨. ‘‘ਦਿਸ੍ਵਾਨਹਂ ਦੇਵਦੇਵਂ, ਸਯਮ੍ਭੁਂ ਲੋਕਨਾਯਕਂ;

ਵਣ੍ਟੇ ਛੇਤ੍ਵਾ ਸਤਪਤ੍ਤਂ, ਉਕ੍ਖਿਪਿਮਮ੍ਬਰੇ ਤਦਾ.

੧੩੩. ‘‘ਯਦਿ ਬੁਦ੍ਧੋ ਤੁਵਂ ਵੀਰ, ਲੋਕਜੇਟ੍ਠੋ ਨਰਾਸਭੋ;

ਸਯਂ ਗਨ੍ਤ੍ਵਾ ਸਤਪਤ੍ਤਾ, ਮਤ੍ਥਕੇ ਧਾਰਯਨ੍ਤੁ ਤੇ.

੧੩੪. ‘‘ਅਧਿਟ੍ਠਹਿ ਮਹਾਵੀਰੋ, ਲੋਕਜੇਟ੍ਠੋ ਨਰਾਸਭੋ;

ਬੁਦ੍ਧਸ੍ਸ ਆਨੁਭਾਵੇਨ, ਮਤ੍ਥਕੇ ਧਾਰਯਿਂਸੁ ਤੇ.

੧੩੫. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੧੩੬. ‘‘ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਸਤਪਤ੍ਤਨ੍ਤਿ ਵੁਚ੍ਚਤਿ;

ਸਟ੍ਠਿਯੋਜਨਮੁਬ੍ਬਿਦ੍ਧਂ, ਤਿਂਸਯੋਜਨਵਿਤ੍ਥਤਂ.

੧੩੭. ‘‘ਸਹਸ੍ਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਮਕਾਰਯਿਂ;

ਪਞ੍ਚਸਤ੍ਤਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ.

੧੩੮. ‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਅਨੁਭੋਮਿ ਸਕਂ ਕਮ੍ਮਂ, ਪੁਬ੍ਬੇ ਸੁਕਤਮਤ੍ਤਨੋ.

੧੩੯. ‘‘ਤੇਨੇਵੇਕਪਦੁਮੇਨ, ਅਨੁਭੋਤ੍ਵਾਨ ਸਮ੍ਪਦਾ;

ਗੋਤਮਸ੍ਸ ਭਗਵਤੋ, ਧਮ੍ਮਂ ਸਚ੍ਛਿਕਰਿਂ ਅਹਂ.

੧੪੦. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੧੪੧. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਏਕਪਦੁਮਸ੍ਸਿਦਂ ਫਲਂ.

੧੪੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਕ੍ਖਿਤ੍ਤਪਦੁਮਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਉਕ੍ਖਿਤ੍ਤਪਦੁਮਿਯਤ੍ਥੇਰਸ੍ਸਾਪਦਾਨਂ ਦਸਮਂ.

ਗਨ੍ਧੋਦਕਵਗ੍ਗੋ ਚਤੁਤਿਂਸਤਿਮੋ.