੩੪. ਗਨ੍ਧੋਦਕਵਗ੍ਗੋ

੧. ਗਨ੍ਧਧੂਪਿਯਤ੍ਥੇਰਅਪਦਾਨਂ

੧. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਗਨ੍ਧਧੂਪਂ ਅਦਾਸਹਂ;

ਸੁਮਨੇਹਿ ਪਟਿਚ੍ਛਨ੍ਨਂ, ਬੁਦ੍ਧਾਨੁਚ੍ਛਵਿਕਞ੍ਚ ਤਂ.

੨. ‘‘ਕਞ੍ਚਨਗ੍ਘਿਯਸਙ੍ਕਾਸਂ, ਬੁਦ੍ਧਂ ਲੋਕਗ੍ਗਨਾਯਕਂ;

ਇਨ੍ਦੀਵਰਂਵ ਜਲਿਤਂ, ਆਦਿਤ੍ਤਂਵ ਹੁਤਾਸਨਂ.

੩. ‘‘ਬ੍ਯਗ੍ਘੁਸਭਂਵ ਪਵਰਂ, ਅਭਿਜਾਤਂਵ ਕੇਸਰਿਂ;

ਨਿਸਿਨ੍ਨਂ ਸਮਣਾਨਗ੍ਗਂ, ਭਿਕ੍ਖੁਸਙ੍ਘਪੁਰਕ੍ਖਤਂ.

੪. ‘‘ਦਿਸ੍ਵਾ ਚਿਤ੍ਤਂ ਪਸਾਦੇਤ੍ਵਾ, ਪਗ੍ਗਹੇਤ੍ਵਾਨ ਅਞ੍ਜਲਿਂ;

ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਪਕ੍ਕਾਮਿਂ ਉਤ੍ਤਰਾਮੁਖੋ.

੫. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਗਨ੍ਧਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਗਨ੍ਧਪੂਜਾਯਿਦਂ ਫਲਂ.

੬. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਗਨ੍ਧਧੂਪਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਗਨ੍ਧਧੂਪਿਯਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਉਦਕਪੂਜਕਤ੍ਥੇਰਅਪਦਾਨਂ

੭. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਗਚ੍ਛਨ੍ਤਂ ਅਨਿਲਞ੍ਜਸੇ;

ਘਤਾਸਨਂਵ ਜਲਿਤਂ, ਆਦਿਤ੍ਤਂਵ ਹੁਤਾਸਨਂ.

੮. ‘‘ਪਾਣਿਨਾ ਉਦਕਂ ਗਯ੍ਹ, ਆਕਾਸੇ ਉਕ੍ਖਿਪਿਂ ਅਹਂ;

ਸਮ੍ਪਟਿਚ੍ਛਿ ਮਹਾਵੀਰੋ, ਬੁਦ੍ਧੋ ਕਾਰੁਣਿਕੋ ਇਸਿ.

੯. ‘‘ਅਨ੍ਤਲਿਕ੍ਖੇ ਠਿਤੋ ਸਤ੍ਥਾ, ਪਦੁਮੁਤ੍ਤਰਨਾਮਕੋ;

ਮਮ ਸਙ੍ਕਪ੍ਪਮਞ੍ਞਾਯ, ਇਮਂ ਗਾਥਮਭਾਸਥ.

੧੦. ‘‘‘ਇਮਿਨਾ ਦਕਦਾਨੇਨ, ਪੀਤਿਉਪ੍ਪਾਦਨੇਨ ਚ;

ਕਪ੍ਪਸਤਸਹਸ੍ਸਮ੍ਪਿ, ਦੁਗ੍ਗਤਿਂ ਨੁਪਪਜ੍ਜਸਿ’.

੧੧. ‘‘ਤੇਨ ਕਮ੍ਮੇਨ ਦ੍ਵਿਪਦਿਨ੍ਦ, ਲੋਕਜੇਟ੍ਠ ਨਰਾਸਭ;

ਪਤ੍ਤੋਮ੍ਹਿ ਅਚਲਂ ਠਾਨਂ, ਹਿਤ੍ਵਾ ਜਯਪਰਾਜਯਂ.

੧੨. ‘‘ਸਹਸ੍ਸਰਾਜਨਾਮੇਨ, ਤਯੋ ਚ ਚਕ੍ਕਵਤ੍ਤਿਨੋ;

ਪਞ੍ਚਸਟ੍ਠਿਕਪ੍ਪਸਤੇ, ਚਾਤੁਰਨ੍ਤਾ ਜਨਾਧਿਪਾ.

੧੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਦਕਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਉਦਕਪੂਜਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਪੁਨ੍ਨਾਗਪੁਪ੍ਫਿਯਤ੍ਥੇਰਅਪਦਾਨਂ

੧੪. ‘‘ਕਾਨਨਂ ਵਨਮੋਗਯ੍ਹ, ਵਸਾਮਿ ਲੁਦ੍ਦਕੋ ਅਹਂ;

ਪੁਨ੍ਨਾਗਂ ਪੁਪ੍ਫਿਤਂ ਦਿਸ੍ਵਾ, ਬੁਦ੍ਧਸੇਟ੍ਠਂ ਅਨੁਸ੍ਸਰਿਂ.

੧੫. ‘‘ਤਂ ਪੁਪ੍ਫਂ ਓਚਿਨਿਤ੍ਵਾਨ, ਸੁਗਨ੍ਧਂ ਗਨ੍ਧਿਤਂ ਸੁਭਂ;

ਥੂਪਂ ਕਤ੍ਵਾਨ ਪੁਲਿਨੇ, ਬੁਦ੍ਧਸ੍ਸ ਅਭਿਰੋਪਯਿਂ.

੧੬. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੭. ‘‘ਏਕਮ੍ਹਿ ਨਵੁਤੇ ਕਪ੍ਪੇ, ਏਕੋ ਆਸਿਂ ਤਮੋਨੁਦੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੧੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪੁਨ੍ਨਾਗਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪੁਨ੍ਨਾਗਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਏਕਦੁਸ੍ਸਦਾਯਕਤ੍ਥੇਰਅਪਦਾਨਂ

੧੯. ‘‘ਨਗਰੇ ਹਂਸਵਤਿਯਾ, ਅਹੋਸਿਂ ਤਿਣਹਾਰਕੋ;

ਤਿਣਹਾਰੇਨ ਜੀਵਾਮਿ, ਤੇਨ ਪੋਸੇਮਿ ਦਾਰਕੇ.

੨੦. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਤਮਨ੍ਧਕਾਰਂ ਨਾਸੇਤ੍ਵਾ, ਉਪ੍ਪਜ੍ਜਿ ਲੋਕਨਾਯਕੋ.

੨੧. ‘‘ਸਕੇ ਘਰੇ ਨਿਸੀਦਿਤ੍ਵਾ, ਏਵਂ ਚਿਨ੍ਤੇਸਹਂ ਤਦਾ;

‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਦੇਯ੍ਯਧਮ੍ਮੋ ਚ ਨਤ੍ਥਿ ਮੇ.

੨੨. ‘‘‘ਇਦਂ ਮੇ ਸਾਟਕਂ ਏਕਂ, ਨਤ੍ਥਿ ਮੇ ਕੋਚਿ ਦਾਯਕੋ;

ਦੁਕ੍ਖੋ ਨਿਰਯਸਮ੍ਫਸ੍ਸੋ, ਰੋਪਯਿਸ੍ਸਾਮਿ ਦਕ੍ਖਿਣਂ’.

੨੩. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਸਕਂ ਚਿਤ੍ਤਂ ਪਸਾਦਯਿਂ;

ਏਕਂ ਦੁਸ੍ਸਂ ਗਹੇਤ੍ਵਾਨ, ਬੁਦ੍ਧਸੇਟ੍ਠਸ੍ਸਦਾਸਹਂ.

੨੪. ‘‘ਏਕਂ ਦੁਸ੍ਸਂ ਦਦਿਤ੍ਵਾਨ, ਉਕ੍ਕੁਟ੍ਠਿਂ ਸਮ੍ਪਵਤ੍ਤਯਿਂ;

ਯਦਿ ਬੁਦ੍ਧੋ ਤੁਵਂ ਵੀਰ, ਤਾਰੇਹਿ ਮਂ ਮਹਾਮੁਨਿ.

੨੫. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਮਮ ਦਾਨਂ ਪਕਿਤ੍ਤੇਨ੍ਤੋ, ਅਕਾ ਮੇ ਅਨੁਮੋਦਨਂ.

੨੬. ‘‘‘ਇਮਿਨਾ ਏਕਦੁਸ੍ਸੇਨ, ਚੇਤਨਾਪਣਿਧੀਹਿ ਚ;

ਕਪ੍ਪਸਤਸਹਸ੍ਸਾਨਿ, ਵਿਨਿਪਾਤਂ ਨ ਗਚ੍ਛਤਿ.

੨੭. ‘‘‘ਛਤ੍ਤਿਂਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ;

ਤੇਤ੍ਤਿਂਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੨੮. ‘‘‘ਦੇਵਲੋਕੇ ਮਨੁਸ੍ਸੇ ਵਾ, ਸਂਸਰਨ੍ਤੋ ਤੁਵਂ ਭਵੇ;

ਰੂਪਵਾ ਗੁਣਸਮ੍ਪਨ੍ਨੋ, ਅਨਵਕ੍ਕਨ੍ਤਦੇਹਵਾ;

ਅਕ੍ਖੋਭਂ ਅਮਿਤਂ ਦੁਸ੍ਸਂ, ਲਭਿਸ੍ਸਸਿ ਯਦਿਚ੍ਛਕਂ’.

੨੯. ‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਜਲਜੁਤ੍ਤਮਨਾਮਕੋ;

ਨਭਂ ਅਬ੍ਭੁਗ੍ਗਮੀ ਧੀਰੋ, ਹਂਸਰਾਜਾਵ ਅਮ੍ਬਰੇ.

੩੦. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਭੋਗੇ ਮੇ ਊਨਤਾ ਨਤ੍ਥਿ, ਏਕਦੁਸ੍ਸਸ੍ਸਿਦਂ ਫਲਂ.

੩੧. ‘‘ਪਦੁਦ੍ਧਾਰੇ ਪਦੁਦ੍ਧਾਰੇ, ਦੁਸ੍ਸਂ ਨਿਬ੍ਬਤ੍ਤਤੇ ਮਮਂ;

ਹੇਟ੍ਠਾ ਦੁਸ੍ਸਮ੍ਹਿ ਤਿਟ੍ਠਾਮਿ, ਉਪਰਿ ਛਦਨਂ ਮਮ.

੩੨. ‘‘ਚਕ੍ਕਵਾਲ਼ਮੁਪਾਦਾਯ, ਸਕਾਨਨਂ ਸਪਬ੍ਬਤਂ;

ਇਚ੍ਛਮਾਨੋ ਚਹਂ ਅਜ੍ਜ, ਦੁਸ੍ਸੇਹਿ ਛਾਦਯੇਯ੍ਯਹਂ.

੩੩. ‘‘ਤੇਨੇਵ ਏਕਦੁਸ੍ਸੇਨ, ਸਂਸਰਨ੍ਤੋ ਭਵਾਭਵੇ;

ਸੁਵਣ੍ਣਵਣ੍ਣੋ ਹੁਤ੍ਵਾਨ, ਸਂਸਰਾਮਿ ਭਵਾਭਵੇ.

੩੪. ‘‘ਵਿਪਾਕਂ ਏਕਦੁਸ੍ਸਸ੍ਸ, ਨਜ੍ਝਗਂ ਕਤ੍ਥਚਿਕ੍ਖਯਂ;

ਅਯਂ ਮੇ ਅਨ੍ਤਿਮਾ ਜਾਤਿ, ਵਿਪਚ੍ਚਤਿ ਇਧਾਪਿ ਮੇ.

੩੫. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਦੁਸ੍ਸਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਏਕਦੁਸ੍ਸਸ੍ਸਿਦਂ ਫਲਂ.

੩੬. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੩੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਦੁਸ੍ਸਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਦੁਸ੍ਸਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਫੁਸਿਤਕਮ੍ਪਿਯਤ੍ਥੇਰਅਪਦਾਨਂ

੩੮. ‘‘ਵਿਪਸ੍ਸੀ ਨਾਮ [ਸਬ੍ਬਤ੍ਥਪਿ ਏਵਮੇਵ ਦਿਸ੍ਸਤਿ]

ਸਮ੍ਬੁਦ੍ਧੋ, ਲੋਕਜੇਟ੍ਠੋ ਨਰਾਸਭੋ.

ਖੀਣਾਸਵੇਹਿ ਸਹਿਤੋ, ਸਙ੍ਘਾਰਾਮੇ ਵਸੀ ਤਦਾ.

੩੯. ‘‘ਆਰਾਮਦ੍ਵਾਰਾ ਨਿਕ੍ਖਮ੍ਮ, ਵਿਪਸ੍ਸੀ [ਸਬ੍ਬਤ੍ਥਪਿ ਏਵਮੇਵ ਦਿਸ੍ਸਤਿ] ਲੋਕਨਾਯਕੋ;

ਸਹ ਸਤਸਹਸ੍ਸੇਹਿ, ਅਟ੍ਠ [ਸਹਸ੍ਸਸਤਸਿਸ੍ਸੇਹਿ, ਅਟ੍ਠ (ਕ.), ਅਟ੍ਠ ਸਤਸਹਸ੍ਸੇਹਿ, ਸਹ (?)] ਖੀਣਾਸਵੇਹਿ ਸੋ.

੪੦. ‘‘ਅਜਿਨੇਨ ਨਿਵਤ੍ਥੋਹਂ, ਵਾਕਚੀਰਧਰੋਪਿ ਚ;

ਕੁਸੁਮੋਦਕਮਾਦਾਯ [ਕੁਸੁਮ੍ਭੋਦਕ… (ਸੀ. ਸ੍ਯਾ.)], ਸਮ੍ਬੁਦ੍ਧਂ ਉਪਸਙ੍ਕਮਿਂ.

੪੧. ‘‘ਸਕਂ ਚਿਤ੍ਤਂ ਪਸਾਦੇਤ੍ਵਾ, ਵੇਦਜਾਤੋ ਕਤਞ੍ਜਲੀ;

ਕੁਸੁਮੋਦਕਮਾਦਾਯ, ਬੁਦ੍ਧਮਬ੍ਭੁਕ੍ਕਿਰਿਂ ਅਹਂ.

੪੨. ‘‘ਤੇਨ ਕਮ੍ਮੇਨ ਸਮ੍ਬੁਦ੍ਧੋ, ਜਲਜੁਤ੍ਤਮਨਾਮਕੋ [ਸਬ੍ਬਤ੍ਥਪਿ ਏਵਮੇਵ ਦਿਸ੍ਸਤਿ];

ਮਮ ਕਮ੍ਮਂ ਪਕਿਤ੍ਤੇਤ੍ਵਾ, ਅਗਮਾ ਯੇਨ ਪਤ੍ਥਿਤਂ.

੪੩. ‘‘ਫੁਸਿਤਾ ਪਞ੍ਚਸਹਸ੍ਸਾ, ਯੇਹਿ ਪੂਜੇਸਹਂ ਜਿਨਂ;

ਅਡ੍ਢਤੇਯ੍ਯਸਹਸ੍ਸੇਹਿ, ਦੇਵਰਜ੍ਜਂ ਅਕਾਰਯਿਂ.

੪੪. ‘‘ਅਡ੍ਢਤੇਯ੍ਯਸਹਸ੍ਸੇਹਿ, ਚਕ੍ਕਵਤ੍ਤੀ ਅਹੋਸਹਂ;

ਅਵਸੇਸੇਨ ਕਮ੍ਮੇਨ, ਅਰਹਤ੍ਤਮਪਾਪੁਣਿਂ.

੪੫. ‘‘ਦੇਵਰਾਜਾ ਯਦਾ ਹੋਮਿ [ਅਹੋਸਿਂ (ਸ੍ਯਾ. ਕ.)], ਮਨੁਜਾਧਿਪਤੀ ਯਦਾ [ਤਦਾ (ਸ੍ਯਾ. ਕ.)];

ਤਮੇਵ ਨਾਮਧੇਯ੍ਯਂ ਮੇ, ਫੁਸਿਤੋ ਨਾਮ ਹੋਮਹਂ.

੪੬. ‘‘ਦੇਵਭੂਤਸ੍ਸ ਸਨ੍ਤਸ੍ਸ, ਅਥਾਪਿ ਮਾਨੁਸਸ੍ਸ ਵਾ;

ਸਮਨ੍ਤਾ ਬ੍ਯਾਮਤੋ ਮਯ੍ਹਂ, ਫੁਸਿਤਂਵ ਪਵਸ੍ਸਤਿ.

੪੭. ‘‘ਭਵਾ ਉਗ੍ਘਾਟਿਤਾ ਮਯ੍ਹਂ, ਕਿਲੇਸਾ ਝਾਪਿਤਾ ਮਮ;

ਸਬ੍ਬਾਸਵਪਰਿਕ੍ਖੀਣੋ, ਫੁਸਿਤਸ੍ਸ ਇਦਂ ਫਲਂ.

੪੮. ‘‘ਚਨ੍ਦਨਸ੍ਸੇਵ ਮੇ ਕਾਯਾ, ਤਥਾ ਗਨ੍ਧੋ ਪਵਾਯਤਿ;

ਸਰੀਰਤੋ ਮਮ ਗਨ੍ਧੋ, ਅਡ੍ਢਕੋਸੇ ਪਵਾਯਤਿ.

੪੯. ‘‘ਦਿਬ੍ਬਗਨ੍ਧਂ ਸਮ੍ਪਵਨ੍ਤਂ, ਪੁਞ੍ਞਕਮ੍ਮਸਮਙ੍ਗਿਨਂ;

ਗਨ੍ਧਂ ਘਤ੍ਵਾਨ ਜਾਨਨ੍ਤਿ, ਫੁਸਿਤੋ ਆਗਤੋ ਇਧ.

੫੦. ‘‘ਸਾਖਾਪਲਾਸਕਟ੍ਠਾਨਿ, ਤਿਣਾਨਿਪਿ ਚ ਸਬ੍ਬਸੋ;

ਮਮ ਸਙ੍ਕਪ੍ਪਮਞ੍ਞਾਯ, ਗਨ੍ਧੋ ਸਮ੍ਪਜ੍ਜਤੇ ਖਣੇ.

੫੧. ‘‘ਸਤਸਹਸ੍ਸਿਤੋ [ਸਬ੍ਬਤ੍ਥਪਿ ਏਵਮੇਵ ਦਿਸ੍ਸਤਿ] ਕਪ੍ਪੇ, ਚਨ੍ਦਨਂ ਅਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਫੁਸਿਤਸ੍ਸ ਇਦਂ ਫਲਂ.

੫੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਫੁਸਿਤਕਮ੍ਪਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਫੁਸਿਤਕਮ੍ਪਿਯਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਪਭਙ੍ਕਰਤ੍ਥੇਰਅਪਦਾਨਂ

੫੩. ‘‘ਪਦੁਮੁਤ੍ਤਰਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;

ਵਿਪਿਨੇ ਚੇਤਿਯਂ ਆਸਿ, ਵਾਲ਼ਮਿਗਸਮਾਕੁਲੇ.

੫੪. ‘‘ਨ ਕੋਚਿ ਵਿਸਹਿ ਗਨ੍ਤੁਂ, ਚੇਤਿਯਂ ਅਭਿਵਨ੍ਦਿਤੁਂ;

ਤਿਣਕਟ੍ਠਲਤੋਨਦ੍ਧਂ, ਪਲੁਗ੍ਗਂ ਆਸਿ ਚੇਤਿਯਂ.

੫੫. ‘‘ਵਨਕਮ੍ਮਿਕੋ ਤਦਾ ਆਸਿਂ, ਪਿਤੁਮਾਤੁਮਤੇਨਹਂ [ਪਿਤੁਪੇਤਾਮਹੇਨਹਂ (ਸੀ.), ਪਿਤਾਪੇਤਾਮਹੇਨਹਂ (ਸ੍ਯਾ.)];

ਅਦ੍ਦਸਂ ਵਿਪਿਨੇ ਥੂਪਂ, ਲੁਗ੍ਗਂ ਤਿਣਲਤਾਕੁਲਂ.

੫੬. ‘‘ਦਿਸ੍ਵਾਨਾਹਂ ਬੁਦ੍ਧਥੂਪਂ, ਗਰੁਚਿਤ੍ਤਂ ਉਪਟ੍ਠਹਿਂ;

ਬੁਦ੍ਧਸੇਟ੍ਠਸ੍ਸ ਥੂਪੋਯਂ, ਪਲੁਗ੍ਗੋ ਅਚ੍ਛਤੀ ਵਨੇ.

੫੭. ‘‘ਨਚ੍ਛਨ੍ਨਂ ਨਪ੍ਪਤਿਰੂਪਂ, ਜਾਨਨ੍ਤਸ੍ਸ ਗੁਣਾਗੁਣਂ;

ਬੁਦ੍ਧਥੂਪਂ ਅਸੋਧੇਤ੍ਵਾ, ਅਞ੍ਞਂ ਕਮ੍ਮਂ ਪਯੋਜਯੇ.

੫੮. ‘‘ਤਿਣਕਟ੍ਠਞ੍ਚ ਵਲ੍ਲਿਞ੍ਚ, ਸੋਧਯਿਤ੍ਵਾਨ ਚੇਤਿਯੇ;

ਵਨ੍ਦਿਤ੍ਵਾ ਅਟ੍ਠ ਵਾਰਾਨਿ [ਅਟ੍ਠ ਠਾਨਾਨਿ (ਕ.)], ਪਟਿਕੁਟਿਕੋ ਅਗਚ੍ਛਹਂ.

੫੯. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੬੦. ‘‘ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਸੋਵਣ੍ਣਂ ਸਪਭਸ੍ਸਰਂ;

ਸਟ੍ਠਿਯੋਜਨਮੁਬ੍ਬਿਦ੍ਧਂ, ਤਿਂਸਯੋਜਨਵਿਤ੍ਥਤਂ.

੬੧. ‘‘ਤਿਸਤਾਨਿ ਚ ਵਾਰਾਨਿ, ਦੇਵਰਜ੍ਜਮਕਾਰਯਿਂ;

ਪਞ੍ਚਵੀਸਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ.

੬੨. ‘‘ਭਵਾਭਵੇ ਸਂਸਰਨ੍ਤੋ, ਮਹਾਭੋਗਂ ਲਭਾਮਹਂ;

ਭੋਗੇ ਮੇ ਊਨਤਾ ਨਤ੍ਥਿ, ਸੋਧਨਾਯ ਇਦਂ ਫਲਂ.

੬੩. ‘‘ਸਿਵਿਕਾ ਹਤ੍ਥਿਖਨ੍ਧੇਨ, ਵਿਪਿਨੇ ਗਚ੍ਛਤੋ ਮਮ;

ਯਂ ਯਂ ਦਿਸਾਹਂ ਗਚ੍ਛਾਮਿ, ਸਰਣਂ ਸਮ੍ਪਤੇ [ਸਿਜ੍ਝਤੇ (ਕ.)] ਵਨਂ.

੬੪. ‘‘ਖਾਣੁਂ ਵਾ ਕਣ੍ਟਕਂ ਵਾਪਿ, ਨਾਹਂ ਪਸ੍ਸਾਮਿ ਚਕ੍ਖੁਨਾ;

ਪੁਞ੍ਞਕਮ੍ਮੇਨ ਸਂਯੁਤ੍ਤੋ, ਸਯਮੇਵਾਪਨੀਯਰੇ.

੬੫. ‘‘ਕੁਟ੍ਠਂ ਗਣ੍ਡੋ ਕਿਲਾਸੋ ਚ, ਅਪਮਾਰੋ ਵਿਤਚ੍ਛਿਕਾ;

ਦਦ੍ਦੁ ਕਚ੍ਛੁ [ਕਣ੍ਡੁ (ਸ੍ਯਾ.)] ਚ ਮੇ ਨਤ੍ਥਿ, ਸੋਧਨਾਯ ਇਦਂ ਫਲਂ.

੬੬. ‘‘ਅਞ੍ਞਮ੍ਪਿ ਮੇ ਅਚ੍ਛਰਿਯਂ, ਬੁਦ੍ਧਥੂਪਸ੍ਸ ਸੋਧਨੇ [ਬੁਦ੍ਧਥੂਪਮ੍ਹਿ ਸੋਧਿਤੇ (ਸ੍ਯਾ.)];

ਨਾਭਿਜਾਨਾਮਿ ਮੇ ਕਾਯੇ, ਜਾਤਂ ਪਿਲ਼ਕਬਿਨ੍ਦੁਕਂ.

੬੭. ‘‘ਅਞ੍ਞਮ੍ਪਿ ਮੇ ਅਚ੍ਛਰਿਯਂ, ਬੁਦ੍ਧਥੂਪਮ੍ਹਿ ਸੋਧਿਤੇ [ਸਬ੍ਬਤ੍ਥਪਿ ਏਵਮੇਵ ਦਿਸ੍ਸਤਿ, ਤਥਾ ਉਪਰਿਪਿ];

ਦੁਵੇ ਭਵੇ ਸਂਸਰਾਮਿ, ਦੇਵਤ੍ਤੇ ਅਥ ਮਾਨੁਸੇ.