੮. ਉਤ੍ਤਰੇਯ੍ਯਦਾਯਕਤ੍ਥੇਰਅਪਦਾਨਂ

੯੦. ‘‘ਨਗਰੇ ਹਂਸਵਤਿਯਾ, ਅਹੋਸਿਂ ਬ੍ਰਾਹ੍ਮਣੋ ਤਦਾ;

ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ ਵੇਦਾਨ ਪਾਰਗੂ.

੯੧. ‘‘ਪੁਰਕ੍ਖਤੋ ਸਸਿਸ੍ਸੇਹਿ, ਜਾਤਿਮਾ ਚ ਸੁਸਿਕ੍ਖਿਤੋ;

ਤੋਯਾਭਿਸੇਚਨਤ੍ਥਾਯ, ਨਗਰਾ ਨਿਕ੍ਖਮਿਂ ਤਦਾ.

੯੨. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਖੀਣਾਸਵਸਹਸ੍ਸੇਹਿ, ਪਾਵਿਸੀ ਨਗਰਂ ਜਿਨੋ.

੯੩. ‘‘ਸੁਚਾਰੁਰੂਪਂ ਦਿਸ੍ਵਾਨ, ਆਨੇਞ੍ਜਕਾਰਿਤਂ ਵਿਯ;

ਪਰਿਵੁਤਂ ਅਰਹਨ੍ਤੇਹਿ, ਦਿਸ੍ਵਾ ਚਿਤ੍ਤਂ ਪਸਾਦਯਿਂ.

੯੪. ‘‘ਸਿਰਸ੍ਮਿਂ ਅਞ੍ਜਲਿਂ ਕਤ੍ਵਾ, ਨਮਸ੍ਸਿਤ੍ਵਾਨ ਸੁਬ੍ਬਤਂ;

ਪਸਨ੍ਨਚਿਤ੍ਤੋ ਸੁਮਨੋ, ਉਤ੍ਤਰੀਯਮਦਾਸਹਂ.

੯੫. ‘‘ਉਭੋ ਹਤ੍ਥੇਹਿ ਪਗ੍ਗਯ੍ਹ, ਸਾਟਕਂ ਉਕ੍ਖਿਪਿਂ ਅਹਂ;

ਯਾਵਤਾ ਬੁਦ੍ਧਪਰਿਸਾ, ਤਾਵ ਛਾਦੇਸਿ ਸਾਟਕੋ.

੯੬. ‘‘ਪਿਣ੍ਡਚਾਰਂ ਚਰਨ੍ਤਸ੍ਸ, ਮਹਾਭਿਕ੍ਖੁਗਣਾਦਿਨੋ;

ਛਦਂ ਕਰੋਨ੍ਤੋ ਅਟ੍ਠਾਸਿ, ਹਾਸਯਨ੍ਤੋ ਮਮਂ ਤਦਾ.

੯੭. ‘‘ਘਰਤੋ ਨਿਕ੍ਖਮਨ੍ਤਸ੍ਸ, ਸਯਮ੍ਭੂ ਅਗ੍ਗਪੁਗ੍ਗਲੋ;

ਵੀਥਿਯਂਵ ਠਿਤੋ ਸਤ੍ਥਾ, ਅਕਾ ਮੇ [ਅਕਾਸਿ (ਸ੍ਯਾ.)] ਅਨੁਮੋਦਨਂ.

੯੮. ‘‘ਪਸਨ੍ਨਚਿਤ੍ਤੋ ਸੁਮਨੋ, ਯੋ ਮੇ ਅਦਾਸਿ ਸਾਟਕਂ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣੋਥ ਮਮ ਭਾਸਤੋ.

੯੯. ‘‘‘ਤਿਂਸਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਤਿ;

ਪਞ੍ਞਾਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ.

੧੦੦. ‘‘‘ਦੇਵਲੋਕੇ ਵਸਨ੍ਤਸ੍ਸ, ਪੁਞ੍ਞਕਮ੍ਮਸਮਙ੍ਗਿਨੋ;

ਸਮਨ੍ਤਾ ਯੋਜਨਸਤਂ, ਦੁਸ੍ਸਚ੍ਛਨ੍ਨਂ ਭਵਿਸ੍ਸਤਿ.

੧੦੧. ‘‘‘ਛਤ੍ਤਿਂਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੧੦੨. ‘‘‘ਭਵੇ ਸਂਸਰਮਾਨਸ੍ਸ, ਪੁਞ੍ਞਕਮ੍ਮਸਮਙ੍ਗਿਨੋ;

ਮਨਸਾ ਪਤ੍ਥਿਤਂ ਸਬ੍ਬਂ, ਨਿਬ੍ਬਤ੍ਤਿਸ੍ਸਤਿ ਤਾਵਦੇ.

੧੦੩. ‘‘‘ਕੋਸੇਯ੍ਯਕਮ੍ਬਲਿਯਾਨਿ [ਕੋਸੇਯ੍ਯਕਮ੍ਬਲੀਯਾਨਿ (ਸੀ.)], ਖੋਮਕਪ੍ਪਾਸਿਕਾਨਿ ਚ;

ਮਹਗ੍ਘਾਨਿ ਚ ਦੁਸ੍ਸਾਨਿ, ਪਟਿਲਚ੍ਛਤਿਯਂ ਨਰੋ.

੧੦੪. ‘‘‘ਮਨਸਾ ਪਤ੍ਥਿਤਂ ਸਬ੍ਬਂ, ਪਟਿਲਚ੍ਛਤਿਯਂ ਨਰੋ;

ਏਕਦੁਸ੍ਸਸ੍ਸ ਵਿਪਾਕਂ, ਅਨੁਭੋਸ੍ਸਤਿ ਸਬ੍ਬਦਾ.

੧੦੫. ‘‘‘ਸੋ ਪਚ੍ਛਾ ਪਬ੍ਬਜਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਗੋਤਮਸ੍ਸ ਭਗਵਤੋ, ਧਮ੍ਮਂ ਸਚ੍ਛਿਕਰਿਸ੍ਸਤਿ’.

੧੦੬. ‘‘ਅਹੋ ਮੇ ਸੁਕਤਂ ਕਮ੍ਮਂ, ਸਬ੍ਬਞ੍ਞੁਸ੍ਸ ਮਹੇਸਿਨੋ;

ਏਕਾਹਂ ਸਾਟਕਂ ਦਤ੍ਵਾ, ਪਤ੍ਤੋਮ੍ਹਿ ਅਮਤਂ ਪਦਂ.

੧੦੭. ‘‘ਮਣ੍ਡਪੇ ਰੁਕ੍ਖਮੂਲੇ ਵਾ, ਵਸਤੋ ਸੁਞ੍ਞਕੇ ਘਰੇ;

ਧਾਰੇਤਿ ਦੁਸ੍ਸਛਦਨਂ, ਸਮਨ੍ਤਾ ਬ੍ਯਾਮਤੋ ਮਮ.

੧੦੮. ‘‘ਅਵਿਞ੍ਞਤ੍ਤਂ ਨਿਵਾਸੇਮਿ [ਅਵਿਞ੍ਞਤ੍ਤਾਨਿ ਸੇਵਾਮਿ (?)], ਚੀਵਰਂ ਪਚ੍ਚਯਞ੍ਚਹਂ;

ਲਾਭੀ [ਲਾਭਿਮ੍ਹਿ (ਸ੍ਯਾ.)] ਅਨ੍ਨਸ੍ਸ ਪਾਨਸ੍ਸ, ਉਤ੍ਤਰੇਯ੍ਯਸ੍ਸਿਦਂ ਫਲਂ.

੧੦੯. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਵਤ੍ਥਦਾਨਸ੍ਸਿਦਂ ਫਲਂ.

੧੧੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਤ੍ਤਰੇਯ੍ਯਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਉਤ੍ਤਰੇਯ੍ਯਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.