੭. ਤਿਣਕੁਟਿਦਾਯਕਤ੍ਥੇਰਅਪਦਾਨਂ

੭੪. ‘‘ਨਗਰੇ ਬਨ੍ਧੁਮਤਿਯਾ, ਅਹੋਸਿਂ ਪਰਕਮ੍ਮਿਕੋ;

ਪਰਕਮ੍ਮਾਯਨੇ ਯੁਤ੍ਤੋ, ਪਰਭਤ੍ਤਂ ਅਪਸ੍ਸਿਤੋ.

੭੫. ‘‘ਰਹੋਗਤੋ ਨਿਸੀਦਿਤ੍ਵਾ, ਏਵਂ ਚਿਨ੍ਤੇਸਹਂ ਤਦਾ;

ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਅਧਿਕਾਰੋ ਚ ਨਤ੍ਥਿ ਮੇ.

੭੬. ‘‘ਕਾਲੋ ਮੇ ਗਤਿਂ [ਕਾਲੋ ਗਤਿਂ ਮੇ (ਸੀ. ਸ੍ਯਾ.)] ਸੋਧੇਤੁਂ, ਖਣੋ ਮੇ ਪਟਿਪਾਦਿਤੋ;

ਦੁਕ੍ਖੋ ਨਿਰਯਸਮ੍ਫਸ੍ਸੋ, ਅਪੁਞ੍ਞਾਨਞ੍ਹਿ ਪਾਣਿਨਂ.

੭੭. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਕਮ੍ਮਸਾਮਿਂ ਉਪਾਗਮਿਂ;

ਏਕਾਹਂ ਕਮ੍ਮਂ ਯਾਚਿਤ੍ਵਾ, ਵਿਪਿਨਂ ਪਾਵਿਸਿਂ ਅਹਂ.

੭੮. ‘‘ਤਿਣਕਟ੍ਠਞ੍ਚ ਵਲ੍ਲਿਞ੍ਚ, ਆਹਰਿਤ੍ਵਾਨਹਂ ਤਦਾ;

ਤਿਦਣ੍ਡਕੇ ਠਪੇਤ੍ਵਾਨ, ਅਕਂ ਤਿਣਕੁਟਿਂ ਅਹਂ.

੭੯. ‘‘ਸਙ੍ਘਸ੍ਸਤ੍ਥਾਯ ਕੁਟਿਕਂ, ਨਿਯ੍ਯਾਦੇਤ੍ਵਾਨ [ਨਿਯ੍ਯਾਤੇਤ੍ਵਾਨ (ਸੀ.)] ਤਂ ਅਹਂ;

ਤਦਹੇਯੇਵ ਆਗਨ੍ਤ੍ਵਾ, ਕਮ੍ਮਸਾਮਿਂ ਉਪਾਗਮਿਂ.

੮੦. ‘‘ਤੇਨ ਕਮ੍ਮੇਨ ਸੁਕਤੇਨ, ਤਾਵਤਿਂਸਮਗਚ੍ਛਹਂ;

ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਕੁਟਿਕਾਯ ਸੁਨਿਮ੍ਮਿਤਂ [ਤਿਣਕੁਟਿਕਾਯ ਨਿਮ੍ਮਿਤਂ (ਸੀ.)].

੮੧. ‘‘ਸਹਸ੍ਸਕਣ੍ਡਂ ਸਤਭੇਣ੍ਡੁ, ਧਜਾਲੁ ਹਰਿਤਾਮਯਂ;

ਸਤਸਹਸ੍ਸਨਿਯ੍ਯੂਹਾ, ਬ੍ਯਮ੍ਹੇ ਪਾਤੁਭਵਿਂਸੁ ਮੇ.

੮੨. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਮਮ ਸਙ੍ਕਪ੍ਪਮਞ੍ਞਾਯ, ਪਾਸਾਦੋ ਉਪਤਿਟ੍ਠਤਿ.

੮੩. ‘‘ਭਯਂ ਵਾ ਛਮ੍ਭਿਤਤ੍ਤਂ ਵਾ, ਲੋਮਹਂਸੋ ਨ ਵਿਜ੍ਜਤਿ;

ਤਾਸਂ ਮਮ ਨ ਜਾਨਾਮਿ, ਤਿਣਕੁਟਿਕਾਯਿਦਂ [ਤਿਣਕੁਟਿਯਿਦਂ (ਕ.)] ਫਲਂ.

੮੪. ‘‘ਸੀਹਬ੍ਯਗ੍ਘਾ ਚ ਦੀਪੀ ਚ, ਅਚ੍ਛਕੋਕਤਰਚ੍ਛਕਾ [ਤਰਚ੍ਛਯੋ (ਸ੍ਯਾ. ਕ.)];

ਸਬ੍ਬੇ ਮਂ ਪਰਿਵਜ੍ਜੇਨ੍ਤਿ, ਤਿਣਕੁਟਿਕਾਯਿਦਂ ਫਲਂ.

੮੫. ‘‘ਸਰੀਸਪਾ [ਸਿਰਿਂਸਪਾ (ਸੀ. ਸ੍ਯਾ.), ਸਰਿਂਸਪਾ (ਕ.)] ਚ ਭੂਤਾ ਚ, ਅਹੀ ਕੁਮ੍ਭਣ੍ਡਰਕ੍ਖਸਾ;

ਤੇਪਿ ਮਂ ਪਰਿਵਜ੍ਜੇਨ੍ਤਿ, ਤਿਣਕੁਟਿਕਾਯਿਦਂ ਫਲਂ.

੮੬. ‘‘ਨ ਪਾਪਸੁਪਿਨਸ੍ਸਾਪਿ, ਸਰਾਮਿ ਦਸ੍ਸਨਂ ਮਮ;

ਉਪਟ੍ਠਿਤਾ ਸਤਿ ਮਯ੍ਹਂ, ਤਿਣਕੁਟਿਕਾਯਿਦਂ ਫਲਂ.

੮੭. ‘‘ਤਾਯੇਵ ਤਿਣਕੁਟਿਕਾਯ, ਅਨੁਭੋਤ੍ਵਾਨ ਸਮ੍ਪਦਾ;

ਗੋਤਮਸ੍ਸ ਭਗਵਤੋ, ਧਮ੍ਮਂ ਸਚ੍ਛਿਕਰਿਂ ਅਹਂ.

੮੮. ‘‘ਏਕਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਤਿਣਕੁਟਿਕਾਯਿਦਂ ਫਲਂ.

੮੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਣਕੁਟਿਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਣਕੁਟਿਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.