੬. ਪਭਙ੍ਕਰਤ੍ਥੇਰਅਪਦਾਨਂ

੫੩. ‘‘ਪਦੁਮੁਤ੍ਤਰਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;

ਵਿਪਿਨੇ ਚੇਤਿਯਂ ਆਸਿ, ਵਾਲ਼ਮਿਗਸਮਾਕੁਲੇ.

੫੪. ‘‘ਨ ਕੋਚਿ ਵਿਸਹਿ ਗਨ੍ਤੁਂ, ਚੇਤਿਯਂ ਅਭਿਵਨ੍ਦਿਤੁਂ;

ਤਿਣਕਟ੍ਠਲਤੋਨਦ੍ਧਂ, ਪਲੁਗ੍ਗਂ ਆਸਿ ਚੇਤਿਯਂ.

੫੫. ‘‘ਵਨਕਮ੍ਮਿਕੋ ਤਦਾ ਆਸਿਂ, ਪਿਤੁਮਾਤੁਮਤੇਨਹਂ [ਪਿਤੁਪੇਤਾਮਹੇਨਹਂ (ਸੀ.), ਪਿਤਾਪੇਤਾਮਹੇਨਹਂ (ਸ੍ਯਾ.)];

ਅਦ੍ਦਸਂ ਵਿਪਿਨੇ ਥੂਪਂ, ਲੁਗ੍ਗਂ ਤਿਣਲਤਾਕੁਲਂ.

੫੬. ‘‘ਦਿਸ੍ਵਾਨਾਹਂ ਬੁਦ੍ਧਥੂਪਂ, ਗਰੁਚਿਤ੍ਤਂ ਉਪਟ੍ਠਹਿਂ;

ਬੁਦ੍ਧਸੇਟ੍ਠਸ੍ਸ ਥੂਪੋਯਂ, ਪਲੁਗ੍ਗੋ ਅਚ੍ਛਤੀ ਵਨੇ.

੫੭. ‘‘ਨਚ੍ਛਨ੍ਨਂ ਨਪ੍ਪਤਿਰੂਪਂ, ਜਾਨਨ੍ਤਸ੍ਸ ਗੁਣਾਗੁਣਂ;

ਬੁਦ੍ਧਥੂਪਂ ਅਸੋਧੇਤ੍ਵਾ, ਅਞ੍ਞਂ ਕਮ੍ਮਂ ਪਯੋਜਯੇ.

੫੮. ‘‘ਤਿਣਕਟ੍ਠਞ੍ਚ ਵਲ੍ਲਿਞ੍ਚ, ਸੋਧਯਿਤ੍ਵਾਨ ਚੇਤਿਯੇ;

ਵਨ੍ਦਿਤ੍ਵਾ ਅਟ੍ਠ ਵਾਰਾਨਿ [ਅਟ੍ਠ ਠਾਨਾਨਿ (ਕ.)], ਪਟਿਕੁਟਿਕੋ ਅਗਚ੍ਛਹਂ.

੫੯. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੬੦. ‘‘ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਸੋਵਣ੍ਣਂ ਸਪਭਸ੍ਸਰਂ;

ਸਟ੍ਠਿਯੋਜਨਮੁਬ੍ਬਿਦ੍ਧਂ, ਤਿਂਸਯੋਜਨਵਿਤ੍ਥਤਂ.

੬੧. ‘‘ਤਿਸਤਾਨਿ ਚ ਵਾਰਾਨਿ, ਦੇਵਰਜ੍ਜਮਕਾਰਯਿਂ;

ਪਞ੍ਚਵੀਸਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ.

੬੨. ‘‘ਭਵਾਭਵੇ ਸਂਸਰਨ੍ਤੋ, ਮਹਾਭੋਗਂ ਲਭਾਮਹਂ;

ਭੋਗੇ ਮੇ ਊਨਤਾ ਨਤ੍ਥਿ, ਸੋਧਨਾਯ ਇਦਂ ਫਲਂ.

੬੩. ‘‘ਸਿਵਿਕਾ ਹਤ੍ਥਿਖਨ੍ਧੇਨ, ਵਿਪਿਨੇ ਗਚ੍ਛਤੋ ਮਮ;

ਯਂ ਯਂ ਦਿਸਾਹਂ ਗਚ੍ਛਾਮਿ, ਸਰਣਂ ਸਮ੍ਪਤੇ [ਸਿਜ੍ਝਤੇ (ਕ.)] ਵਨਂ.

੬੪. ‘‘ਖਾਣੁਂ ਵਾ ਕਣ੍ਟਕਂ ਵਾਪਿ, ਨਾਹਂ ਪਸ੍ਸਾਮਿ ਚਕ੍ਖੁਨਾ;

ਪੁਞ੍ਞਕਮ੍ਮੇਨ ਸਂਯੁਤ੍ਤੋ, ਸਯਮੇਵਾਪਨੀਯਰੇ.

੬੫. ‘‘ਕੁਟ੍ਠਂ ਗਣ੍ਡੋ ਕਿਲਾਸੋ ਚ, ਅਪਮਾਰੋ ਵਿਤਚ੍ਛਿਕਾ;

ਦਦ੍ਦੁ ਕਚ੍ਛੁ [ਕਣ੍ਡੁ (ਸ੍ਯਾ.)] ਚ ਮੇ ਨਤ੍ਥਿ, ਸੋਧਨਾਯ ਇਦਂ ਫਲਂ.

੬੬. ‘‘ਅਞ੍ਞਮ੍ਪਿ ਮੇ ਅਚ੍ਛਰਿਯਂ, ਬੁਦ੍ਧਥੂਪਸ੍ਸ ਸੋਧਨੇ [ਬੁਦ੍ਧਥੂਪਮ੍ਹਿ ਸੋਧਿਤੇ (ਸ੍ਯਾ.)];

ਨਾਭਿਜਾਨਾਮਿ ਮੇ ਕਾਯੇ, ਜਾਤਂ ਪਿਲ਼ਕਬਿਨ੍ਦੁਕਂ.

੬੭. ‘‘ਅਞ੍ਞਮ੍ਪਿ ਮੇ ਅਚ੍ਛਰਿਯਂ, ਬੁਦ੍ਧਥੂਪਮ੍ਹਿ ਸੋਧਿਤੇ [ਸਬ੍ਬਤ੍ਥਪਿ ਏਵਮੇਵ ਦਿਸ੍ਸਤਿ, ਤਥਾ ਉਪਰਿਪਿ];

ਦੁਵੇ ਭਵੇ ਸਂਸਰਾਮਿ, ਦੇਵਤ੍ਤੇ ਅਥ ਮਾਨੁਸੇ.

੬੮. ‘‘ਅਞ੍ਞਮ੍ਪਿ ਮੇ ਅਚ੍ਛਰਿਯਂ, ਬੁਦ੍ਧਥੂਪਮ੍ਹਿ ਸੋਧਿਤੇ;

ਸੁਵਣ੍ਣਵਣ੍ਣੋ ਸਬ੍ਬਤ੍ਥ, ਸਪ੍ਪਭਾਸੋ ਭਵਾਮਹਂ.

੬੯. ‘‘ਅਞ੍ਞਮ੍ਪਿ ਮੇ ਅਚ੍ਛਰਿਯਂ, ਬੁਦ੍ਧਥੂਪਮ੍ਹਿ ਸੋਧਿਤੇ;

ਅਮਨਾਪਂ ਵਿਵਜ੍ਜਤਿ, ਮਨਾਪਂ ਉਪਤਿਟ੍ਠਤਿ.

੭੦. ‘‘ਅਞ੍ਞਮ੍ਪਿ ਮੇ ਅਚ੍ਛਰਿਯਂ, ਬੁਦ੍ਧਥੂਪਮ੍ਹਿ ਸੋਧਿਤੇ;

ਵਿਸੁਦ੍ਧਂ ਹੋਤਿ ਮੇ ਚਿਤ੍ਤਂ, ਏਕਗ੍ਗਂ ਸੁਸਮਾਹਿਤਂ.

੭੧. ‘‘ਅਞ੍ਞਮ੍ਪਿ ਮੇ ਅਚ੍ਛਰਿਯਂ, ਬੁਦ੍ਧਥੂਪਮ੍ਹਿ ਸੋਧਿਤੇ;

ਏਕਾਸਨੇ ਨਿਸੀਦਿਤ੍ਵਾ, ਅਰਹਤ੍ਤਮਪਾਪੁਣਿਂ.

੭੨. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਸੋਧਨਾਯ ਇਦਂ ਫਲਂ.

੭੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਭਙ੍ਕਰੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਭਙ੍ਕਰਤ੍ਥੇਰਸ੍ਸਾਪਦਾਨਂ ਛਟ੍ਠਂ.