੧੦. ਸਪਰਿਵਾਰਛਤ੍ਤਦਾਯਕਤ੍ਥੇਰਅਪਦਾਨਂ

੮੨. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਆਕਾਸੇ ਜਲਵੁਟ੍ਠੀਵ ਵਸ੍ਸਤੇ [ਵਸ੍ਸਤਿ (ਸੀ. ਸ੍ਯਾ.), ਵਸ੍ਸੇਤਿ (?)] ਧਮ੍ਮਵੁਟ੍ਠਿਯਾ.

੮੩. ‘‘ਤਮਦ੍ਦਸਾਸਿਂ ਸਮ੍ਬੁਦ੍ਧਂ, ਦੇਸੇਨ੍ਤਂ ਅਮਤਂ ਪਦਂ;

ਸਕਂ ਚਿਤ੍ਤਂ ਪਸਾਦੇਤ੍ਵਾ, ਅਗਮਾਸਿਂ ਸਕਂ ਘਰਂ.

੮੪. ‘‘ਛਤ੍ਤਂ ਅਲਙ੍ਕਤਂ ਗਯ੍ਹ, ਉਪਗਚ੍ਛਿਂ ਨਰੁਤ੍ਤਮਂ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਆਕਾਸੇ ਉਕ੍ਖਿਪਿਂ ਅਹਂ.

੮੫. ‘‘ਸੁਸਙ੍ਗਹਿਤਯਾਨਂਵ, ਦਨ੍ਤੋਵ ਸਾਵਕੁਤ੍ਤਮੋ;

ਉਪਗਨ੍ਤ੍ਵਾਨ ਸਮ੍ਬੁਦ੍ਧਂ, ਮਤ੍ਥਕੇ ਸਮ੍ਪਤਿਟ੍ਠਹਿ.

੮੬. ‘‘ਅਨੁਕਮ੍ਪਕੋ ਕਾਰੁਣਿਕੋ, ਬੁਦ੍ਧੋ ਲੋਕਗ੍ਗਨਾਯਕੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੮੭. ‘‘‘ਯੇਨ ਛਤ੍ਤਮਿਦਂ ਦਿਨ੍ਨਂ, ਅਲਙ੍ਕਤਂ ਮਨੋਰਮਂ;

ਤੇਨ ਚਿਤ੍ਤਪ੍ਪਸਾਦੇਨ, ਦੁਗ੍ਗਤਿਂ ਸੋ ਨ ਗਚ੍ਛਤਿ.

੮੮. ‘‘‘ਸਤ੍ਤਕ੍ਖਤ੍ਤੁਞ੍ਚ ਦੇਵੇਸੁ, ਦੇਵਰਜ੍ਜਂ ਕਰਿਸ੍ਸਤਿ;

ਬਾਤ੍ਤਿਂਸਕ੍ਖਤ੍ਤੁਞ੍ਚ ਰਾਜਾ, ਚਕ੍ਕਵਤ੍ਤੀ ਭਵਿਸ੍ਸਤਿ.

੮੯. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੯੦. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ’.

੯੧. ‘‘ਬੁਦ੍ਧਸ੍ਸ ਗਿਰਮਞ੍ਞਾਯ, ਵਾਚਾਸਭਿਮੁਦੀਰਿਤਂ;

ਪਸਨ੍ਨਚਿਤ੍ਤੋ ਸੁਮਨੋ, ਭਿਯ੍ਯੋ ਹਾਸਂ ਜਨੇਸਹਂ.

੯੨. ‘‘ਜਹਿਤ੍ਵਾ ਮਾਨੁਸਂ ਯੋਨਿਂ, ਦਿਬ੍ਬਂ ਯੋਨਿਂ [ਦੇਵਯੋਨਿਂ (ਸੀ.), ਦਿਬ੍ਬਯੋਨਿਂ (ਸ੍ਯਾ.)] ਮਜ੍ਝਗਂ;

ਵਿਮਾਨਮੁਤ੍ਤਮਂ ਮਯ੍ਹਂ, ਅਬ੍ਭੁਗ੍ਗਤਂ ਮਨੋਰਮਂ.

੯੩. ‘‘ਵਿਮਾਨਾ ਨਿਕ੍ਖਮਨ੍ਤਸ੍ਸ, ਸੇਤਚ੍ਛਤ੍ਤਂ ਧਰੀਯਤਿ;

ਤਦਾ ਸਞ੍ਞਂ ਪਟਿਲਭਿਂ, ਪੁਬ੍ਬਕਮ੍ਮਸ੍ਸਿਦਂ ਫਲਂ.

੯੪. ‘‘ਦੇਵਲੋਕਾ ਚਵਿਤ੍ਵਾਨ, ਮਨੁਸ੍ਸਤ੍ਤਞ੍ਚ ਆਗਮਿਂ;

ਛਤ੍ਤਿਂਸਕ੍ਖਤ੍ਤੁਂ ਚਕ੍ਕਵਤ੍ਤੀ, ਸਤ੍ਤਕਪ੍ਪਸਤਮ੍ਹਿਤੋ.

੯੫. ‘‘ਤਮ੍ਹਾ ਕਾਯਾ ਚਵਿਤ੍ਵਾਨ, ਆਗਚ੍ਛਿਂ [ਅਗਞ੍ਛਿਂ (?)] ਤਿਦਸਂ ਪੁਰਂ;

ਸਂਸਰਿਤ੍ਵਾਨੁਪੁਬ੍ਬੇਨ, ਮਾਨੁਸਂ ਪੁਨਰਾਗਮਿਂ.

੯੬. ‘‘ਓਕ੍ਕਨ੍ਤਂ ਮਾਤੁਕੁਚ੍ਛਿਂ ਮਂ, ਸੇਤ੍ਤਚ੍ਛਤ੍ਤਂ ਅਧਾਰਯੁਂ;

ਜਾਤਿਯਾ ਸਤ੍ਤਵਸ੍ਸੋਹਂ, ਪਬ੍ਬਜਿਂ ਅਨਗਾਰਿਯਂ.

੯੭. ‘‘ਸੁਨਨ੍ਦੋ ਨਾਮ ਨਾਮੇਨ, ਬ੍ਰਾਹ੍ਮਣੋ ਮਨ੍ਤਪਾਰਗੂ;

ਫਲਿਕਂ ਛਤ੍ਤਮਾਦਾਯ, ਸਾਵਕਗ੍ਗਸ੍ਸ ਸੋ ਤਦਾ.

੯੮. ‘‘ਅਨੁਮੋਦਿ ਮਹਾਵੀਰੋ, ਸਾਰਿਪੁਤ੍ਤੋ ਮਹਾਕਥੀ;

ਸੁਤ੍ਵਾਨੁਮੋਦਨਂ ਤਸ੍ਸ, ਪੁਬ੍ਬਕਮ੍ਮਮਨੁਸ੍ਸਰਿਂ.

੯੯. ‘‘ਅਞ੍ਜਲਿਂ ਪਗ੍ਗਹੇਤ੍ਵਾਨ, ਸਕਂ ਚਿਤ੍ਤਂ ਪਸਾਦਯਿਂ;

ਸਰਿਤ੍ਵਾ ਪੁਰਿਮਂ ਕਮ੍ਮਂ, ਅਰਹਤ੍ਤਮਪਾਪੁਣਿਂ.

੧੦੦. ‘‘ਉਟ੍ਠਾਯ ਆਸਨਾ ਤਮ੍ਹਾ, ਸਿਰੇ ਕਤ੍ਵਾਨ ਅਞ੍ਜਲਿਂ;

ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਇਮਂ ਵਾਚਂ ਉਦੀਰਿਯਿਂ.

੧੦੧. ‘‘ਸਤਸਹਸ੍ਸਿਤੋ ਕਪ੍ਪੇ, ਬੁਦ੍ਧੋ ਲੋਕੇ ਅਨੁਤ੍ਤਰੋ;

ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ.

੧੦੨. ‘‘ਤਸ੍ਸ ਛਤ੍ਤਂ ਮਯਾ ਦਿਨ੍ਨਂ, ਵਿਚਿਤ੍ਤਂ ਸਮਲਙ੍ਕਤਂ;

ਉਭੋ ਹਤ੍ਥੇਹਿ ਪਗ੍ਗਣ੍ਹਿ, ਸਯਮ੍ਭੂ ਅਗ੍ਗਪੁਗ੍ਗਲੋ.

੧੦੩. ‘‘ਅਹੋ ਬੁਦ੍ਧੋ ਅਹੋ ਧਮ੍ਮੋ, ਅਹੋ ਨੋ ਸਤ੍ਥੁਸਮ੍ਪਦਾ;

ਏਕਚ੍ਛਤ੍ਤਸ੍ਸ ਦਾਨੇਨ, ਦੁਗ੍ਗਤਿਂ ਨੁਪਪਜ੍ਜਹਂ.

੧੦੪. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੧੦੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਪਰਿਵਾਰਛਤ੍ਤਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਪਰਿਵਾਰਛਤ੍ਤਦਾਯਕਤ੍ਥੇਰਸ੍ਸਾਪਦਾਨਂ ਦਸਮਂ.

ਉਮਾਪੁਪ੍ਫਿਯਵਗ੍ਗੋ ਤੇਤ੍ਤਿਂਸਤਿਮੋ.