੩੩. ਉਮਾਪੁਪ੍ਫਿਯਵਗ੍ਗੋ
੧. ਉਮਾਪੁਪ੍ਫਿਯਤ੍ਥੇਰਅਪਦਾਨਂ
੧. ‘‘ਸਮਾਹਿਤਂ ਸਮਾਪਨ੍ਨਂ, ਸਿਦ੍ਧਤ੍ਥਮਪਰਾਜਿਤਂ;
ਸਮਾਧਿਨਾ ਉਪਵਿਟ੍ਠਂ, ਅਦ੍ਦਸਾਹਂ ਨਰੁਤ੍ਤਮਂ.
੨. ‘‘ਉਮਾਪੁਪ੍ਫਂ ਗਹੇਤ੍ਵਾਨ, ਬੁਦ੍ਧਸ੍ਸ ਅਭਿਰੋਪਯਿਂ;
ਸਬ੍ਬਪੁਪ੍ਫਾ ਏਕਸੀਸਾ, ਉਦ੍ਧਂਵਣ੍ਟਾ ਅਧੋਮੁਖਾ.
੩. ‘‘ਸੁਚਿਤ੍ਤਾ ਵਿਯ ਤਿਟ੍ਠਨ੍ਤੇ, ਆਕਾਸੇ ਪੁਪ੍ਫਸਨ੍ਥਰਾ;
ਤੇਨ ਚਿਤ੍ਤਪ੍ਪਸਾਦੇਨ, ਤੁਸਿਤਂ ਉਪਪਜ੍ਜਹਂ.
੪. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੫. ‘‘ਪਞ੍ਚਪਞ੍ਞਾਸਿਤੋ ਕਪ੍ਪੇ, ਏਕੋ ਆਸਿਂ ਮਹੀਪਤਿ;
ਸਮਨ੍ਤਛਦਨੋ ਨਾਮ, ਚਕ੍ਕਵਤ੍ਤੀ ਮਹਬ੍ਬਲੋ.
੬. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ.
ਇਤ੍ਥਂ ਸੁਦਂ ਆਯਸ੍ਮਾ ਉਮਾਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਉਮਾਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਪਠਮਂ.
੨. ਪੁਲਿਨਪੂਜਕਤ੍ਥੇਰਅਪਦਾਨਂ
੭. ‘‘ਕਕੁਧਂ ਵਿਲਸਨ੍ਤਂਵ, ਨਿਸਭਾਜਾਨਿਯਂ ਯਥਾ;
ਓਸਧਿਂਵ ਵਿਰੋਚਨ੍ਤਂ, ਓਭਾਸਨ੍ਤਂ ਨਰਾਸਭਂ.
੮. ‘‘ਅਞ੍ਜਲਿਂ ਪਗ੍ਗਹੇਤ੍ਵਾਨ, ਅਵਨ੍ਦਿਂ ਸਤ੍ਥੁਨੋ ਅਹਂ;
ਸਤ੍ਥਾਰਂ ਪਰਿਵਣ੍ਣੇਸਿਂ, ਸਕਕਮ੍ਮੇਨ ਤੋਸਯਿਂ [ਤੋਸਿਤੋ (ਸੀ.)].
੯. ‘‘ਸੁਸੁਦ੍ਧਂ ਪੁਲਿਨਂ ਗਯ੍ਹ, ਗਤਮਗ੍ਗੇ ਸਮੋਕਿਰਿਂ;
ਉਚ੍ਛਙ੍ਗੇਨ ਗਹੇਤ੍ਵਾਨ, ਵਿਪਸ੍ਸਿਸ੍ਸ ਮਹੇਸਿਨੋ.
੧੦. ‘‘ਤਤੋ ਉਪਡ੍ਢਪੁਲਿਨਂ, ਵਿਪ੍ਪਸਨ੍ਨੇਨ ਚੇਤਸਾ;
ਦਿਵਾਵਿਹਾਰੇ ਓਸਿਞ੍ਚਿਂ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ.
੧੧. ‘‘ਏਕਨਵੁਤਿਤੋ ਕਪ੍ਪੇ, ਪੁਲਿਨਂ ਯਮਸਿਞ੍ਚਹਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੁਲਿਨਸ੍ਸ ਇਦਂ ਫਲਂ.
੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਪੁਲਿਨਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਪੁਲਿਨਪੂਜਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.
੩. ਹਾਸਜਨਕਤ੍ਥੇਰਅਪਦਾਨਂ
੧੩. ‘‘ਦੁਮਗ੍ਗੇ ਪਂਸੁਕੂਲਕਂ [ਪਂਸੁਕੂਲਿਕਂ (ਸ੍ਯਾ. ਕ.)], ਲਗ੍ਗਂ ਦਿਸ੍ਵਾਨ ਸਤ੍ਥੁਨੋ;
ਅਞ੍ਜਲਿਂ ਪਗ੍ਗਹੇਤ੍ਵਾਨ, ਭਿਯ੍ਯੋ ਉਚ੍ਚਾਰਿਤਂ ਮਯਾ.
੧੪. ‘‘ਦੂਰਤੋ ਪਨ ਦਿਸ੍ਵਾਨ [ਪਤਿਦਿਸ੍ਵਾਨ (ਸੀ. ਸ੍ਯਾ.)], ਹਾਸੋ ਮੇ ਉਦਪਜ੍ਜਥ;
ਅਞ੍ਜਲਿਂ ਪਗ੍ਗਹੇਤ੍ਵਾਨ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ.
੧੫. ‘‘ਏਕਨਵੁਤਿਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਸਞ੍ਞਾਯਿਦਂ ਫਲਂ.
੧੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਹਾਸਜਨਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਹਾਸਜਨਕਤ੍ਥੇਰਸ੍ਸਾਪਦਾਨਂ ਤਤਿਯਂ.
੪. ਯਞ੍ਞਸਾਮਿਕਤ੍ਥੇਰਅਪਦਾਨਂ
੧੭. ‘‘ਜਾਤਿਯਾ ਸਤ੍ਤਵਸ੍ਸੋਹਂ, ਅਹੋਸਿਂ ਮਨ੍ਤਪਾਰਗੂ;
ਕੁਲਵਤ੍ਤਂ [ਕੁਲਵਂਸਂ (ਸੀ. ਸ੍ਯਾ.)] ਅਧਾਰੇਸਿਂ, ਯਞ੍ਞੋ ਉਸ੍ਸਾਹਿਤੋ ਮਯਾ.
੧੮. ‘‘ਚੁਲ੍ਲਾਸੀਤਿਸਹਸ੍ਸਾਨਿ, ਪਸੂ ਹਞ੍ਞਨ੍ਤਿ ਮੇ ਤਦਾ;
ਸਾਰਥਮ੍ਭੁਪਨੀਤਾਨਿ [ਤਾਰਸ੍ਮੀਹਿ ਉਪਨੀਤਾਨਿ (ਕ.), ਸਾਰਸ੍ਮਿਂਹਿ ਉਪਨੀਤਾਨਿ (ਸ੍ਯਾ.)], ਯਞ੍ਞਤ੍ਥਾਯ ਉਪਟ੍ਠਿਤਾ.
੧੯. ‘‘ਉਕ੍ਕਾਮੁਖਪਹਟ੍ਠੋਵ, ਖਦਿਰਙ੍ਗਾਰਸਨ੍ਨਿਭੋ;
ਉਦਯਨ੍ਤੋਵ ਸੂਰਿਯੋ, ਪੁਣ੍ਣਮਾਯੇਵ [ਪੁਣ੍ਣਮਾਸੇਵ (ਸੀ.)] ਚਨ੍ਦਿਮਾ.
੨੦. ‘‘ਸਿਦ੍ਧਤ੍ਥੋ ਸਬ੍ਬਸਿਦ੍ਧਤ੍ਥੋ, ਤਿਲੋਕਮਹਿਤੋ ਹਿਤੋ;
ਉਪਗਨ੍ਤ੍ਵਾਨ ਸਮ੍ਬੁਦ੍ਧੋ, ਇਦਂ ਵਚਨਮਬ੍ਰਵਿ.
੨੧. ‘‘‘ਅਹਿਂਸਾ ਸਬ੍ਬਪਾਣੀਨਂ, ਕੁਮਾਰ ਮਮ ਰੁਚ੍ਚਤਿ;
ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਤਿ.
੨੨. ‘‘‘ਰਤਿ ਚ ਸਮਚਰਿਯਾਯ, ਬਾਹੁਸਚ੍ਚਂ ਕਤਞ੍ਞੁਤਾ;
ਦਿਟ੍ਠੇ ਧਮ੍ਮੇ ਪਰਤ੍ਥ ਚ, ਧਮ੍ਮਾ ਏਤੇ ਪਸਂਸਿਯਾ.
੨੩. ‘‘‘ਏਤੇ ਧਮ੍ਮੇ ਭਾਵਯਿਤ੍ਵਾ, ਸਬ੍ਬਸਤ੍ਤਹਿਤੇ ਰਤੋ [ਹਿਤੇਸਿਤੋ (ਕ.)];
ਬੁਦ੍ਧੇ ਚਿਤ੍ਤਂ ਪਸਾਦੇਤ੍ਵਾ, ਭਾਵੇਹਿ ਮਗ੍ਗਮੁਤ੍ਤਮਂ’.
੨੪. ‘‘ਇਦਂ ਵਤ੍ਵਾਨ ਸਬ੍ਬਞ੍ਞੂ, ਲੋਕਜੇਟ੍ਠੋ ਨਰਾਸਭੋ;
ਮਮੇਵਂ ਅਨੁਸਾਸਿਤ੍ਵਾ, ਵੇਹਾਸਂ ਉਗ੍ਗਤੋ ਗਤੋ.
੨੫. ‘‘ਪੁਬ੍ਬੇ ਚਿਤ੍ਤਂ ਵਿਸੋਧੇਤ੍ਵਾ, ਪਚ੍ਛਾ ਚਿਤ੍ਤਂ ਪਸਾਦਯਿਂ;
ਤੇਨ ਚਿਤ੍ਤਪ੍ਪਸਾਦੇਨ, ਤੁਸਿਤਂ ਉਪਪਜ੍ਜਹਂ.
੨੬. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਦਾ ਚਿਤ੍ਤਂ ਪਸਾਦਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਸਞ੍ਞਾਯਿਦਂ ਫਲਂ.
੨੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਯਞ੍ਞਸਾਮਿਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਯਞ੍ਞਸਾਮਿਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.
੫. ਨਿਮਿਤ੍ਤਸਞ੍ਞਕਤ੍ਥੇਰਅਪਦਾਨਂ
੨੮. ‘‘ਚਨ੍ਦਭਾਗਾਨਦੀਤੀਰੇ, ਵਸਾਮਿ ਅਸ੍ਸਮੇ ਅਹਂ;
ਸੁਵਣ੍ਣਮਿਗਮਦ੍ਦਕ੍ਖਿਂ, ਚਰਨ੍ਤਂ ਵਿਪਿਨੇ ਅਹਂ.
੨੯. ‘‘ਮਿਗੇ ਚਿਤ੍ਤਂ ਪਸਾਦੇਤ੍ਵਾ, ਲੋਕਜੇਟ੍ਠਂ ਅਨੁਸ੍ਸਰਿਂ;
ਤੇਨ ਚਿਤ੍ਤਪ੍ਪਸਾਦੇਨ, ਅਞ੍ਞੇ ਬੁਦ੍ਧੇ ਅਨੁਸ੍ਸਰਿਂ.
੩੦. ‘‘ਅਬ੍ਭਤੀਤਾ ਚ ਯੇ ਬੁਦ੍ਧਾ, ਵਤ੍ਤਮਾਨਾ ਅਨਾਗਤਾ;
ਏਵਮੇਵਂ ਵਿਰੋਚਨ੍ਤਿ, ਮਿਗਰਾਜਾਵ ਤੇ ਤਯੋ.
੩੧. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਸਞ੍ਞਾਯਿਦਂ ਫਲਂ.
੩੨. ‘‘ਸਤ੍ਤਵੀਸੇ ਇਤੋ ਕਪ੍ਪੇ, ਏਕੋ ਆਸਿਂ ਮਹੀਪਤਿ;
ਅਰਞ੍ਞਸਤ੍ਥੋ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.
੩੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਨਿਮਿਤ੍ਤਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਨਿਮਿਤ੍ਤਸਞ੍ਞਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.
੬. ਅਨ੍ਨਸਂਸਾਵਕਤ੍ਥੇਰਅਪਦਾਨਂ
੩੪. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਗਚ੍ਛਨ੍ਤਂ ਅਨ੍ਤਰਾਪਣੇ;
ਕਞ੍ਚਨਗ੍ਘਿਯਸਙ੍ਕਾਸਂ, ਬਾਤ੍ਤਿਂਸਵਰਲਕ੍ਖਣਂ.
੩੫. ‘‘ਸਿਦ੍ਧਤ੍ਥਂ ਸਬ੍ਬਸਿਦ੍ਧਤ੍ਥਂ, ਅਨੇਜਂ ਅਪਰਾਜਿਤਂ;
ਸਮ੍ਬੁਦ੍ਧਂ ਅਤਿਨਾਮੇਤ੍ਵਾ, ਭੋਜਯਿਂ ਤਂ ਮਹਾਮੁਨਿਂ.
੩੬. ‘‘ਮੁਨਿ ਕਾਰੁਣਿਕੋ ਲੋਕੇ, ਓਭਾਸਯਿ ਮਮਂ ਤਦਾ;
ਬੁਦ੍ਧੇ ਚਿਤ੍ਤਂ ਪਸਾਦੇਤ੍ਵਾ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ.
੩੭. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਭਿਕ੍ਖਾਦਾਨਸ੍ਸਿਦਂ ਫਲਂ.
੩੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਅਨ੍ਨਸਂਸਾਵਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;
ਅਨ੍ਨਸਂਸਾਵਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.
੭. ਨਿਗ੍ਗੁਣ੍ਡਿਪੁਪ੍ਫਿਯਤ੍ਥੇਰਅਪਦਾਨਂ
੩੯. ‘‘ਯਦਾ ਦੇਵੋ ਦੇਵਕਾਯਾ, ਚਵਤੇ ਆਯੁਸਙ੍ਖਯਾ;
ਤਯੋ ਸਦ੍ਦਾ ਨਿਚ੍ਛਰਨ੍ਤਿ, ਦੇਵਾਨਂ ਅਨੁਮੋਦਤਂ.
੪੦. ‘‘‘ਇਤੋ ਭੋ ਸੁਗਤਿਂ ਗਚ੍ਛ, ਮਨੁਸ੍ਸਾਨਂ ਸਹਬ੍ਯਤਂ;
ਮਨੁਸ੍ਸਭੂਤੋ ਸਦ੍ਧਮ੍ਮੇ, ਲਭ ਸਦ੍ਧਂ ਅਨੁਤ੍ਤਰਂ.
੪੧. ‘‘‘ਸਾ ਤੇ ਸਦ੍ਧਾ ਨਿਵਿਟ੍ਠਾਸ੍ਸ, ਮੂਲਜਾਤਾ ਪਤਿਟ੍ਠਿਤਾ;
ਯਾਵਜੀਵਂ ਅਸਂਹੀਰਾ, ਸਦ੍ਧਮ੍ਮੇ ਸੁਪ੍ਪਵੇਦਿਤੇ.
੪੨. ‘‘‘ਕਾਯੇਨ ਕੁਸਲਂ ਕਤ੍ਵਾ, ਵਾਚਾਯ ਕੁਸਲਂ ਬਹੁਂ;
ਮਨਸਾ ਕੁਸਲਂ ਕਤ੍ਵਾ, ਅਬ੍ਯਾਪਜ੍ਜਂ ਨਿਰੂਪਧਿਂ.
੪੩. ‘‘‘ਤਤੋ ਓਪਧਿਕਂ ਪੁਞ੍ਞਂ, ਕਤ੍ਵਾ ਦਾਨੇਨ ਤਂ ਬਹੁਂ;
ਅਞ੍ਞੇਪਿ ਮਚ੍ਚੇ ਸਦ੍ਧਮ੍ਮੇ, ਬ੍ਰਹ੍ਮਚਰਿਯੇ ਨਿਵੇਸਯ’.
੪੪. ‘‘ਇਮਾਯ ਅਨੁਕਮ੍ਪਾਯ, ਦੇਵਾਦੇਵਂ ਯਦਾ ਵਿਦੂ;
ਚਵਨ੍ਤਂ ਅਨੁਮੋਦਨ੍ਤਿ, ਏਹਿ ਦੇਵ ਪੁਨਪ੍ਪੁਨਂ [ਦੇਵਪੁਰਂ ਪੁਨ (ਸੀ.)].
੪੫. ‘‘ਸਂਵੇਗੋ ਮੇ [ਸਂਵਿਗ੍ਗੋਹਂ (ਸ੍ਯਾ.)] ਤਦਾ ਆਸਿ, ਦੇਵਸਙ੍ਘੇ ਸਮਾਗਤੇ;
ਕਂਸੁ ਨਾਮ ਅਹਂ ਯੋਨਿਂ, ਗਮਿਸ੍ਸਾਮਿ ਇਤੋ ਚੁਤੋ.
੪੬. ‘‘ਮਮ ਸਂਵੇਗਮਞ੍ਞਾਯ, ਸਮਣੋ ਭਾਵਿਤਿਨ੍ਦ੍ਰਿਯੋ;
ਮਮੁਦ੍ਧਰਿਤੁਕਾਮੋ ਸੋ, ਆਗਚ੍ਛਿ ਮਮ ਸਨ੍ਤਿਕਂ.
੪੭. ‘‘ਸੁਮਨੋ ਨਾਮ ਨਾਮੇਨ, ਪਦੁਮੁਤ੍ਤਰਸਾਵਕੋ;
ਅਤ੍ਥਧਮ੍ਮਾਨੁਸਾਸਿਤ੍ਵਾ, ਸਂਵੇਜੇਸਿ ਮਮਂ ਤਦਾ.
ਦ੍ਵਾਦਸਮਂ ਭਾਣਵਾਰਂ.
੪੮. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਬੁਦ੍ਧੇ ਚਿਤ੍ਤਂ ਪਸਾਦਯਿਂ;
ਤਂ ਧੀਰਂ ਅਭਿਵਾਦੇਤ੍ਵਾ, ਤਤ੍ਥ ਕਾਲਂਕਤੋ ਅਹਂ.
੪੯. ‘‘ਉਪਪਜ੍ਜਿਂ ਸ [ਉਪਪਜ੍ਜਿਸ੍ਸਂ (ਸੀ.)] ਤਤ੍ਥੇਵ, ਸੁਕ੍ਕਮੂਲੇਨ ਚੋਦਿਤੋ;
ਵਸਨ੍ਤੋ ਮਾਤੁਕੁਚ੍ਛਿਮ੍ਹਿ, ਪੁਨ ਧਾਰੇਤਿ ਮਾਤੁਯਾ.
੫੦. ‘‘ਤਮ੍ਹਾ ਕਾਯਾ ਚਵਿਤ੍ਵਾਨ, ਤਿਦਸੇ ਉਪਪਜ੍ਜਹਂ;
ਏਤ੍ਥਨ੍ਤਰੇ ਨ ਪਸ੍ਸਾਮਿ, ਦੋਮਨਸ੍ਸਮਹਂ ਤਦਾ.
੫੧. ‘‘ਤਾਵਤਿਂਸਾ ਚਵਿਤ੍ਵਾਨ, ਮਾਤੁਕੁਚ੍ਛਿਂ ਸਮੋਕ੍ਕਮਿਂ;
ਨਿਕ੍ਖਮਿਤ੍ਵਾਨ ਕੁਚ੍ਛਿਮ੍ਹਾ, ਕਣ੍ਹਸੁਕ੍ਕਂ ਅਜਾਨਹਂ.
੫੨. ‘‘ਜਾਤਿਯਾ ਸਤ੍ਤਵਸ੍ਸੋਵ [ਜਾਤਿਯਾ ਸਤ੍ਤਵਸ੍ਸੇਨ (ਸ੍ਯਾ.)], ਆਰਾਮਂ ਪਾਵਿਸਿਂ ਅਹਂ;
ਗੋਤਮਸ੍ਸ ਭਗਵਤੋ, ਸਕ੍ਯਪੁਤ੍ਤਸ੍ਸ ਤਾਦਿਨੋ.
੫੩. ‘‘ਵਿਤ੍ਥਾਰਿਕੇ [ਵਿਤ੍ਥਾਰਿਤੇ (ਸੀ. ਕ.)] ਪਾਵਚਨੇ, ਬਾਹੁਜਞ੍ਞਮ੍ਹਿ ਸਾਸਨੇ;
ਅਦ੍ਦਸਂ ਸਾਸਨਕਰੇ, ਭਿਕ੍ਖਵੋ ਤਤ੍ਥ ਸਤ੍ਥੁਨੋ.
੫੪. ‘‘ਸਾਵਤ੍ਥਿ ਨਾਮ ਨਗਰਂ, ਰਾਜਾ ਤਤ੍ਥਾਸਿ ਕੋਸਲੋ;
ਰਥੇਨ ਨਾਗਯੁਤ੍ਤੇਨ, ਉਪੇਸਿ ਬੋਧਿਮੁਤ੍ਤਮਂ.
੫੫. ‘‘ਤਸ੍ਸਾਹਂ ਨਾਗਂ ਦਿਸ੍ਵਾਨ, ਪੁਬ੍ਬਕਮ੍ਮਂ ਅਨੁਸ੍ਸਰਿਂ;
ਅਞ੍ਜਲਿਂ ਪਗ੍ਗਹੇਤ੍ਵਾਨ, ਸਮਯਂ ਅਗਮਾਸਹਂ.
੫੬. ‘‘ਜਾਤਿਯਾ ਸਤ੍ਤਵਸ੍ਸੋਵ, ਪਬ੍ਬਜਿਂ ਅਨਗਾਰਿਯਂ;
ਯੋ ਸੋ ਬੁਦ੍ਧਂ ਉਪਟ੍ਠਾਸਿ, ਆਨਨ੍ਦੋ ਨਾਮ ਸਾਵਕੋ.
੫੭. ‘‘ਗਤਿਮਾ ਧਿਤਿਮਾ ਚੇਵ, ਸਤਿਮਾ ਚ ਬਹੁਸ੍ਸੁਤੋ;
ਰਞ੍ਞੋ ਚਿਤ੍ਤਂ ਪਸਾਦੇਨ੍ਤੋ, ਨਿਯ੍ਯਾਦੇਸਿ ਮਹਾਜੁਤਿ.
੫੮. ‘‘ਤਸ੍ਸਾਹਂ ਧਮ੍ਮਂ ਸੁਤ੍ਵਾਨ, ਪੁਬ੍ਬਕਮ੍ਮਂ ਅਨੁਸ੍ਸਰਿਂ;
ਤਤ੍ਥੇਵ ਠਿਤਕੋ ਸਨ੍ਤੋ, ਅਰਹਤ੍ਤਮਪਾਪੁਣਿਂ.
੫੯. ‘‘ਏਕਂਸਂ ਚੀਵਰਂ ਕਤ੍ਵਾ, ਸਿਰੇ ਕਤ੍ਵਾਨ ਅਞ੍ਜਲਿਂ;
ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਇਮਂ ਵਾਚਂ ਉਦੀਰਯਿਂ.
੬੦. ‘‘‘ਪਦੁਮੁਤ੍ਤਰਬੁਦ੍ਧਸ੍ਸ, ਦ੍ਵਿਪਦਿਨ੍ਦਸ੍ਸ ਸਤ੍ਥੁਨੋ;
ਨਿਗ੍ਗੁਣ੍ਡਿਪੁਪ੍ਫਂ ਪਗ੍ਗਯ੍ਹ, ਸੀਹਾਸਨੇ ਠਪੇਸਹਂ.
੬੧. ‘‘‘ਤੇਨ ਕਮ੍ਮੇਨ ਦ੍ਵਿਪਦਿਨ੍ਦ, ਲੋਕਜੇਟ੍ਠ ਨਰਾਸਭ;
ਪਤ੍ਤੋਮ੍ਹਿ ਅਚਲਂ ਠਾਨਂ, ਹਿਤ੍ਵਾ ਜਯਪਰਾਜਯਂ’.
੬੨. ‘‘ਪਞ੍ਚਵੀਸਸਹਸ੍ਸਮ੍ਹਿ, ਕਪ੍ਪਾਨਂ ਮਨੁਜਾਧਿਪਾ;
ਅਬ੍ਬੁਦਨਿਰਬ੍ਬੁਦਾਨਿ, ਅਟ੍ਠਟ੍ਠਾਸਿਂਸੁ ਖਤ੍ਤਿਯਾ.
੬੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਨਿਗ੍ਗੁਣ੍ਡਿਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਨਿਗ੍ਗੁਣ੍ਡਿਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.
੮. ਸੁਮਨਾਵੇਲ਼ਿਯਤ੍ਥੇਰਅਪਦਾਨਂ
੬੪. ‘‘ਵੇਸ੍ਸਭੁਸ੍ਸ ਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;
ਸਬ੍ਬੇ ਜਨਾ ਸਮਾਗਮ੍ਮ, ਮਹਾਪੂਜਂ ਕਰੋਨ੍ਤਿ ਤੇ.
੬੫. ‘‘ਸੁਧਾਯ ਪਿਣ੍ਡਂ ਕਤ੍ਵਾਨ, ਆਵੇਲ਼ਂ ਸੁਮਨਾਯਹਂ;
ਸੀਹਾਸਨਸ੍ਸ ਪੁਰਤੋ, ਅਭਿਰੋਪੇਸਹਂ ਤਦਾ.
੬੬. ‘‘ਸਬ੍ਬੇ ਜਨਾ ਸਮਾਗਮ੍ਮ, ਪੇਕ੍ਖਨ੍ਤਿ ਪੁਪ੍ਫਮੁਤ੍ਤਮਂ;
ਕੇਨਿਦਂ ਪੂਜਿਤਂ ਪੁਪ੍ਫਂ, ਬੁਦ੍ਧਸੇਟ੍ਠਸ੍ਸ ਤਾਦਿਨੋ.