੭. ਚਿਤਕਪੂਜਕਤ੍ਥੇਰਅਪਦਾਨਂ

੨੭. ‘‘ਚਨ੍ਦਭਾਗਾਨਦੀਤੀਰੇ, ਅਨੁਸੋਤਂ ਵਜਾਮਹਂ;

ਸਤ੍ਤ ਮਾਲੁਵਪੁਪ੍ਫਾਨਿ, ਚਿਤਮਾਰੋਪਯਿਂ ਅਹਂ.

੨੮. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਚਿਤਕਂ ਯਮਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਚਿਤਪੂਜਾਯਿਦਂ ਫਲਂ.

੨੯. ‘‘ਸਤ੍ਤਸਟ੍ਠਿਮ੍ਹਿਤੋ ਕਪ੍ਪੇ, ਪਟਿਜਗ੍ਗਸਨਾਮਕਾ;

ਸਤ੍ਤਰਤਨਸਮ੍ਪਨ੍ਨਾ, ਸਤ੍ਤਾਸੁਂ ਚਕ੍ਕਵਤ੍ਤਿਨੋ [ਪਟਿਜਗ੍ਗਸਨਾਮਕੋ; ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ (ਸ੍ਯਾ.)].

੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਚਿਤਕਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਚਿਤਕਪੂਜਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.