੨੮. ਸੁਵਣ੍ਣਬਿਬ੍ਬੋਹਨਵਗ੍ਗੋ
੧. ਸੁਵਣ੍ਣਬਿਬ੍ਬੋਹਨਿਯਤ੍ਥੇਰਅਪਦਾਨਂ
੧. ‘‘ਏਕਾਸਨਂ ਅਹਮਦਂ, ਪਸਨ੍ਨੋ ਸੇਹਿ ਪਾਣਿਭਿ;
ਬਿਬ੍ਬੋਹਨਞ੍ਚ [ਬਿਮ੍ਬੋਹਨਞ੍ਚ (ਸੀ. ਪੀ.)] ਪਾਦਾਸਿਂ, ਉਤ੍ਤਮਤ੍ਥਸ੍ਸ ਪਤ੍ਤਿਯਾ.
੨. ‘‘ਏਕਨਵੁਤਿਤੋ ਕਪ੍ਪੇ, ਬਿਬ੍ਬੋਹਨਮਦਾਸਹਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬਿਬ੍ਬੋਹਨਸ੍ਸਿਦਂ ਫਲਂ.
੩. ‘‘ਇਤੋ ਤੇਸਟ੍ਠਿਮੇ ਕਪ੍ਪੇ, ਅਸਮੋ ਨਾਮ ਖਤ੍ਤਿਯੋ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੪. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸੁਵਣ੍ਣਬਿਬ੍ਬੋਹਨਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਸੁਵਣ੍ਣਬਿਬ੍ਬੋਹਨਿਯਤ੍ਥੇਰਸ੍ਸਾਪਦਾਨਂ ਪਠਮਂ.
੨. ਤਿਲਮੁਟ੍ਠਿਦਾਯਕਤ੍ਥੇਰਅਪਦਾਨਂ
੫. ‘‘ਮਮ ਸਙ੍ਕਪ੍ਪਮਞ੍ਞਾਯ, ਸਤ੍ਥਾ ਲੋਕਗ੍ਗਨਾਯਕੋ;
ਮਨੋਮਯੇਨ ਕਾਯੇਨ, ਇਦ੍ਧਿਯਾ ਉਪਸਙ੍ਕਮਿ.
੬. ‘‘ਸਤ੍ਥਾਰਂ ਉਪਸਙ੍ਕਨ੍ਤਂ, ਵਨ੍ਦਿਤ੍ਵਾ ਪੁਰਿਸੁਤ੍ਤਮਂ;
ਪਸਨ੍ਨਚਿਤ੍ਤੋ ਸੁਮਨੋ, ਤਿਲਮੁਟ੍ਠਿਮਦਾਸਹਂ.
੭. ‘‘ਏਕਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਤਿਲਮੁਟ੍ਠਿਯਿਦਂ ਫਲਂ.
੮. ‘‘ਇਤੋ ਸੋਲ਼ਸਕਪ੍ਪਮ੍ਹਿ, ਤਨ੍ਤਿਸੋ [ਖਨ੍ਤਿਯੋ (ਸ੍ਯਾ.)] ਨਾਮ ਖਤ੍ਤਿਯੋ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਤਿਲਮੁਟ੍ਠਿਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਤਿਲਮੁਟ੍ਠਿਦਾਯਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.
੩. ਚਙ੍ਕੋਟਕਿਯਤ੍ਥੇਰਅਪਦਾਨਂ
੧੦. ‘‘ਮਹਾਸਮੁਦ੍ਦਂ ਨਿਸ੍ਸਾਯ, ਵਸਤੀ ਪਬ੍ਬਤਨ੍ਤਰੇ;
ਪਚ੍ਚੁਗ੍ਗਨ੍ਤ੍ਵਾਨ ਕਤ੍ਵਾਨ [ਪਚ੍ਚੁਗ੍ਗਨ੍ਤ੍ਵਾਨ’ਕਾਸਹਂ (ਅਟ੍ਠ.), ਪਚ੍ਚੁਗ੍ਗਮਨਂ ਕਤ੍ਵਾਨ (?)], ਚਙ੍ਕੋਟਕ [ਚਙ੍ਗੋਟਕ (ਸੀ.)] ਮਦਾਸਹਂ.
੧੧. ‘‘ਸਿਦ੍ਧਤ੍ਥਸ੍ਸ ਮਹੇਸਿਨੋ, ਸਬ੍ਬਸਤ੍ਤਾਨੁਕਮ੍ਪਿਨੋ [ਸਯਮ੍ਭੁਸ੍ਸਾਨੁਕਮ੍ਪਿਨੋ (ਸ੍ਯਾ.)];
ਪੁਪ੍ਫਚਙ੍ਕੋਟਕਂ ਦਤ੍ਵਾ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ.
੧੨. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਚਙ੍ਕੋਟਕਮਦਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਚਙ੍ਕੋਟਕਸ੍ਸਿਦਂ ਫਲਂ.
੧੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਚਙ੍ਕੋਟਕਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਚਙ੍ਕੋਟਕਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.
੪. ਅਬ੍ਭਞ੍ਜਨਦਾਯਕਤ੍ਥੇਰਅਪਦਾਨਂ
੧੪. ‘‘ਕੋਣ੍ਡਞ੍ਞਸ੍ਸ ਭਗਵਤੋ, ਵੀਤਰਾਗਸ੍ਸ ਤਾਦਿਨੋ;
ਆਕਾਸਸਮਚਿਤ੍ਤਸ੍ਸ [ਅਕਕ੍ਕਸਚਿਤ੍ਤਸ੍ਸਾਥ (ਅਟ੍ਠ.)], ਨਿਪ੍ਪਪਞ੍ਚਸ੍ਸ ਝਾਯਿਨੋ.
੧੫. ‘‘ਸਬ੍ਬਮੋਹਾਤਿਵਤ੍ਤਸ੍ਸ, ਸਬ੍ਬਲੋਕਹਿਤੇਸਿਨੋ;
ਅਬ੍ਭਞ੍ਜਨਂ ਮਯਾ ਦਿਨ੍ਨਂ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ.
੧੬. ‘‘ਅਪਰਿਮੇਯ੍ਯੇ ਇਤੋ ਕਪ੍ਪੇ, ਅਬ੍ਭਞ੍ਜਨਮਦਂ ਤਦਾ [ਅਮ੍ਭਞ੍ਜਨਮਦਾਸਹਂ (ਸ੍ਯਾ.)];
ਦੁਗ੍ਗਤਿਂ ਨਾਭਿਜਾਨਾਮਿ, ਅਬ੍ਭਞ੍ਜਨਸ੍ਸਿਦਂ ਫਲਂ.
੧੭. ‘‘ਇਤੋ ਪਨ੍ਨਰਸੇ ਕਪ੍ਪੇ, ਚਿਰਪ੍ਪੋ ਨਾਮ ਖਤ੍ਤਿਯੋ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੧੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਅਬ੍ਭਞ੍ਜਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਅਬ੍ਭਞ੍ਜਨਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.
੫. ਏਕਞ੍ਜਲਿਕਤ੍ਥੇਰਅਪਦਾਨਂ
੧੯. ‘‘ਉਦੁਮ੍ਬਰੇ ਵਸਨ੍ਤਸ੍ਸ, ਨਿਯਤੇ ਪਣ੍ਣਸਨ੍ਥਰੇ;
ਵੁਤ੍ਥੋਕਾਸੋ ਮਯਾ ਦਿਨ੍ਨੋ, ਸਮਣਸ੍ਸ ਮਹੇਸਿਨੋ.
੨੦. ‘‘ਤਿਸ੍ਸਸ੍ਸ ਦ੍ਵਿਪਦਿਨ੍ਦਸ੍ਸ, ਲੋਕਨਾਥਸ੍ਸ ਤਾਦਿਨੋ;
ਅਞ੍ਜਲਿਂ ਪਗ੍ਗਹੇਤ੍ਵਾਨ, ਸਨ੍ਥਰਿਂ ਪੁਪ੍ਫਸਨ੍ਥਰਂ.
੨੧. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਕਰਿਂ ਪੁਪ੍ਫਸਨ੍ਥਰਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਸਨ੍ਥਰਸ੍ਸ ਇਦਂ ਫਲਂ.
੨੨. ‘‘ਇਤੋ ਚੁਦ੍ਦਸਕਪ੍ਪਮ੍ਹਿ, ਅਹੋਸਿਂ ਮਨੁਜਾਧਿਪੋ;
ਏਕਅਞ੍ਜਲਿਕੋ ਨਾਮ, ਚਕ੍ਕਵਤ੍ਤੀ ਮਹਬ੍ਬਲੋ.
੨੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਏਕਞ੍ਜਲਿਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਏਕਞ੍ਜਲਿਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.
੬. ਪੋਤ੍ਥਕਦਾਯਕਤ੍ਥੇਰਅਪਦਾਨਂ
੨੪. ‘‘ਸਤ੍ਥਾਰਂ ਧਮ੍ਮਮਾਰਬ੍ਭ, ਸਙ੍ਘਞ੍ਚਾਪਿ ਮਹੇਸਿਨਂ;
ਪੋਤ੍ਥਦਾਨਂ ਮਯਾ ਦਿਨ੍ਨਂ, ਦਕ੍ਖਿਣੇਯ੍ਯੇ ਅਨੁਤ੍ਤਰੇ.
੨੫. ‘‘ਏਕਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੋਤ੍ਥਦਾਨਸ੍ਸਿਦਂ ਫਲਂ.
੨੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਪੋਤ੍ਥਕਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਪੋਤ੍ਥਕਦਾਯਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.
੭. ਚਿਤਕਪੂਜਕਤ੍ਥੇਰਅਪਦਾਨਂ
੨੭. ‘‘ਚਨ੍ਦਭਾਗਾਨਦੀਤੀਰੇ, ਅਨੁਸੋਤਂ ਵਜਾਮਹਂ;
ਸਤ੍ਤ ਮਾਲੁਵਪੁਪ੍ਫਾਨਿ, ਚਿਤਮਾਰੋਪਯਿਂ ਅਹਂ.
੨੮. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਚਿਤਕਂ ਯਮਪੂਜਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਚਿਤਪੂਜਾਯਿਦਂ ਫਲਂ.
੨੯. ‘‘ਸਤ੍ਤਸਟ੍ਠਿਮ੍ਹਿਤੋ ਕਪ੍ਪੇ, ਪਟਿਜਗ੍ਗਸਨਾਮਕਾ;
ਸਤ੍ਤਰਤਨਸਮ੍ਪਨ੍ਨਾ, ਸਤ੍ਤਾਸੁਂ ਚਕ੍ਕਵਤ੍ਤਿਨੋ [ਪਟਿਜਗ੍ਗਸਨਾਮਕੋ; ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ (ਸ੍ਯਾ.)].
੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਚਿਤਕਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਚਿਤਕਪੂਜਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.
੮. ਆਲੁਵਦਾਯਕਤ੍ਥੇਰਅਪਦਾਨਂ
੩੧. ‘‘ਪਬ੍ਬਤੇ ਹਿਮਵਨ੍ਤਮ੍ਹਿ, ਮਹਾਸਿਨ੍ਧੁ ਸੁਦਸ੍ਸਨਾ;
ਤਤ੍ਥਦ੍ਦਸਂ ਵੀਤਰਾਗਂ, ਸੁਪ੍ਪਭਾਸਂ ਸੁਦਸ੍ਸਨਂ.
੩੨. ‘‘ਪਰਮੋਪਸਮੇ ਯੁਤ੍ਤਂ, ਦਿਸ੍ਵਾ ਵਿਮ੍ਹਿਤਮਾਨਸੋ;
ਆਲੁਵਂ ਤਸ੍ਸ ਪਾਦਾਸਿਂ, ਪਸਨ੍ਨੋ ਸੇਹਿ ਪਾਣਿਭਿ.
੩੩. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਫਲਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਆਲੁਵਸ੍ਸ ਇਦਂ ਫਲਂ.
੩੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਆਲੁਵਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਆਲੁਵਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.
੯. ਏਕਪੁਣ੍ਡਰੀਕਤ੍ਥੇਰਅਪਦਾਨਂ
੩੫. ‘‘ਰੋਮਸੋ ਨਾਮ ਨਾਮੇਨ, ਸਯਮ੍ਭੂ ਸੁਬ੍ਬਤੋ [ਸਪ੍ਪਭੋ (ਸ੍ਯਾ.)] ਤਦਾ;
ਪੁਣ੍ਡਰੀਕਂ ਮਯਾ ਦਿਨ੍ਨਂ, ਵਿਪ੍ਪਸਨ੍ਨੇਨ ਚੇਤਸਾ.
੩੬. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਪੁਣ੍ਡਰੀਕਮਦਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੁਣ੍ਡਰੀਕਸ੍ਸਿਦਂ ਫਲਂ.
੩੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਏਕਪੁਣ੍ਡਰੀਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਏਕਪੁਣ੍ਡਰੀਕਤ੍ਥੇਰਸ੍ਸਾਪਦਾਨਂ ਨਵਮਂ.
੧੦. ਤਰਣੀਯਤ੍ਥੇਰਅਪਦਾਨਂ
੩੮. ‘‘ਮਹਾਪਥਮ੍ਹਿ ਵਿਸਮੇ, ਸੇਤੁ ਕਾਰਾਪਿਤੋ ਮਯਾ;
ਤਰਣਤ੍ਥਾਯ ਲੋਕਸ੍ਸ, ਪਸਨ੍ਨੋ ਸੇਹਿ ਪਾਣਿਭਿ.
੩੯. ‘‘ਏਕਨਵੁਤਿਤੋ ਕਪ੍ਪੇ, ਯੋ ਸੇਤੁ ਕਾਰਿਤੋ ਮਯਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਸੇਤੁਦਾਨਸ੍ਸਿਦਂ ਫਲਂ.
੪੦. ‘‘ਪਞ੍ਚਪਞ੍ਞਾਸਿਤੋ ਕਪ੍ਪੇ, ਏਕੋ ਆਸਿਂ ਸਮੋਗਧੋ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੪੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਤਰਣੀਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਤਰਣੀਯਤ੍ਥੇਰਸ੍ਸਾਪਦਾਨਂ ਦਸਮਂ.
ਸੁਵਣ੍ਣਬਿਬ੍ਬੋਹਨਵਗ੍ਗੋ ਅਟ੍ਠਵੀਸਤਿਮੋ.