੨੯. ਪਣ੍ਣਦਾਯਕਵਗ੍ਗੋ

੧. ਪਣ੍ਣਦਾਯਕਤ੍ਥੇਰਅਪਦਾਨਂ

੧. ‘‘ਪਣ੍ਣਸਾਲੇ ਨਿਸਿਨ੍ਨੋਮ੍ਹਿ, ਪਣ੍ਣਭੋਜਨਭੋਜਨੋ;

ਉਪਵਿਟ੍ਠਞ੍ਚ ਮਂ ਸਨ੍ਤਂ, ਉਪਾਗਚ੍ਛਿ ਮਹਾਇਸਿ [ਮਹਾਮੁਨਿ (ਸੀ.)].

੨. ‘‘ਸਿਦ੍ਧਤ੍ਥੋ ਲੋਕਪਜ੍ਜੋਤੋ, ਸਬ੍ਬਲੋਕਤਿਕਿਚ੍ਛਕੋ;

ਤਸ੍ਸ ਪਣ੍ਣਂ ਮਯਾ ਦਿਨ੍ਨਂ, ਨਿਸਿਨ੍ਨਂ [ਨਿਸਿਨ੍ਨਸ੍ਸ (ਸ੍ਯਾ. ਅਟ੍ਠ.)] ਪਣ੍ਣਸਨ੍ਥਰੇ.

੩. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪਣ੍ਣਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਣ੍ਣਦਾਨਸ੍ਸਿਦਂ ਫਲਂ.

੪. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਣ੍ਣਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਣ੍ਣਦਾਯਕਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਫਲਦਾਯਕਤ੍ਥੇਰਅਪਦਾਨਂ

੫. ‘‘ਸਿਨੇਰੁਸਮਸਨ੍ਤੋਸੋ, ਧਰਣੀਸਮ [ਧਰਣੀਧਰ (ਸੀ. ਸ੍ਯਾ.)] ਸਾਦਿਸੋ;

ਵੁਟ੍ਠਹਿਤ੍ਵਾ ਸਮਾਧਿਮ੍ਹਾ, ਭਿਕ੍ਖਾਯ ਮਮੁਪਟ੍ਠਿਤੋ.

੬. ‘‘ਹਰੀਤਕਂ [ਹਰੀਤਕਿਂ (ਸ੍ਯਾ.)] ਆਮਲਕਂ, ਅਮ੍ਬਜਮ੍ਬੁਵਿਭੀਤਕਂ;

ਕੋਲਂ ਭਲ੍ਲਾਤਕਂ ਬਿਲ੍ਲਂ, ਫਾਰੁਸਕਫਲਾਨਿ ਚ.

੭. ‘‘ਸਿਦ੍ਧਤ੍ਥਸ੍ਸ ਮਹੇਸਿਸ੍ਸ, ਸਬ੍ਬਲੋਕਾਨੁਕਮ੍ਪਿਨੋ;

ਤਞ੍ਚ ਸਬ੍ਬਂ ਮਯਾ ਦਿਨ੍ਨਂ, ਵਿਪ੍ਪਸਨ੍ਨੇਨ ਚੇਤਸਾ.

੮. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੯. ‘‘ਸਤ੍ਤਪਞ੍ਞਾਸਿਤੋ ਕਪ੍ਪੇ, ਏਕਜ੍ਝੋ ਨਾਮ ਖਤ੍ਤਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੧੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਫਲਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਫਲਦਾਯਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਪਚ੍ਚੁਗ੍ਗਮਨਿਯਤ੍ਥੇਰਅਪਦਾਨਂ

੧੧. ‘‘ਸੀਹਂ ਯਥਾ ਵਨਚਰਂ, ਨਿਸਭਾਜਾਨਿਯਂ ਯਥਾ;

ਕਕੁਧਂ ਵਿਲਸਨ੍ਤਂਵ, ਆਗਚ੍ਛਨ੍ਤਂ ਨਰਾਸਭਂ.

੧੨. ‘‘ਸਿਦ੍ਧਤ੍ਥਂ ਲੋਕਪਜ੍ਜੋਤਂ, ਸਬ੍ਬਲੋਕਤਿਕਿਚ੍ਛਕਂ;

ਅਕਾਸਿਂ ਪਚ੍ਚੁਗ੍ਗਮਨਂ, ਵਿਪ੍ਪਸਨ੍ਨੇਨ ਚੇਤਸਾ.

੧੩. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਪਚ੍ਚੁਗ੍ਗਚ੍ਛਿਂ ਨਰਾਸਭਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਚ੍ਚੁਗ੍ਗਮਨੇ ਇਦਂ ਫਲਂ.

੧੪. ‘‘ਸਤ੍ਤਤਿਂਸੇ [ਸਤ੍ਤਵੀਸੇ (ਸੀ. ਸ੍ਯਾ.)] ਇਤੋ ਕਪ੍ਪੇ, ਏਕੋ ਆਸਿਂ ਜਨਾਧਿਪੋ;

ਸਪਰਿਵਾਰੋਤਿ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.

੧੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਚ੍ਚੁਗ੍ਗਮਨਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਚ੍ਚੁਗ੍ਗਮਨਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਏਕਪੁਪ੍ਫਿਯਤ੍ਥੇਰਅਪਦਾਨਂ

੧੬. ‘‘ਦਕ੍ਖਿਣਮ੍ਹਿ ਦੁਵਾਰਮ੍ਹਿ, ਪਿਸਾਚੋ ਆਸਹਂ ਤਦਾ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਪੀਤਰਂਸਿਂਵ ਭਾਣੁਮਂ.

੧੭. ‘‘ਵਿਪਸ੍ਸਿਸ੍ਸ ਨਰਗ੍ਗਸ੍ਸ, ਸਬ੍ਬਲੋਕਹਿਤੇਸਿਨੋ;

ਏਕਪੁਪ੍ਫਂ ਮਯਾ ਦਿਨ੍ਨਂ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ.

੧੮. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਮਘਵਪੁਪ੍ਫਿਯਤ੍ਥੇਰਅਪਦਾਨਂ

੨੦. ‘‘ਨਮ੍ਮਦਾਨਦਿਯਾ ਤੀਰੇ, ਸਯਮ੍ਭੂ ਅਪਰਾਜਿਤੋ;

ਸਮਾਧਿਂ ਸੋ ਸਮਾਪਨ੍ਨੋ, ਵਿਪ੍ਪਸਨ੍ਨੋ ਅਨਾਵਿਲੋ.

੨੧. ‘‘ਦਿਸ੍ਵਾ ਪਸਨ੍ਨਸੁਮਨੋ, ਸਮ੍ਬੁਦ੍ਧਂ ਅਪਰਾਜਿਤਂ;

ਤਾਹਂ ਮਘਵਪੁਪ੍ਫੇਨ, ਸਯਮ੍ਭੁਂ ਪੂਜਯਿਂ ਤਦਾ.

੨੨. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮਘਵਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਮਘਵਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਉਪਟ੍ਠਾਕਦਾਯਕਤ੍ਥੇਰਅਪਦਾਨਂ

੨੪. ‘‘ਰਥਿਯਂ ਪਟਿਪਜ੍ਜਨ੍ਤਂ, ਆਹੁਤੀਨਂ ਪਟਿਗ੍ਗਹਂ;

ਦ੍ਵਿਪਦਿਨ੍ਦਂ ਮਹਾਨਾਗਂ, ਲੋਕਜੇਟ੍ਠਂ ਨਰਾਸਭਂ.

੨੫. ‘‘ਪਕ੍ਕੋਸਾਪਿਯ ਤਸ੍ਸਾਹਂ, ਸਬ੍ਬਲੋਕਹਿਤੇਸਿਨੋ;

ਉਪਟ੍ਠਾਕੋ ਮਯਾ ਦਿਨ੍ਨੋ, ਸਿਦ੍ਧਤ੍ਥਸ੍ਸ ਮਹੇਸਿਨੋ.

੨੬. ‘‘ਪਟਿਗ੍ਗਹੇਤ੍ਵਾ [ਪਟਿਗ੍ਗਹੇਸਿ (ਕ.)] ਸਮ੍ਬੁਦ੍ਧੋ, ਨਿਯ੍ਯਾਦੇਸਿ ਮਹਾਮੁਨਿ [ਮਹਾਇਸਿ (ਕ.)];

ਉਟ੍ਠਾਯ ਆਸਨਾ ਤਮ੍ਹਾ, ਪਕ੍ਕਾਮਿ ਪਾਚਿਨਾਮੁਖੋ.

੨੭. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਉਪਟ੍ਠਾਕਮਦਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਉਪਟ੍ਠਾਨਸ੍ਸਿਦਂ ਫਲਂ.

੨੮. ‘‘ਸਤ੍ਤਪਞ੍ਞਾਸਿਤੋ ਕਪ੍ਪੇ, ਬਲਸੇਨਸਨਾਮਕੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੨੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਪਟ੍ਠਾਕਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਉਪਟ੍ਠਾਕਦਾਯਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਅਪਦਾਨਿਯਤ੍ਥੇਰਅਪਦਾਨਂ

੩੦. ‘‘ਅਪਦਾਨਂ ਸੁਗਤਾਨਂ, ਕਿਤ੍ਤਯਿਂਹਂ ਮਹੇਸਿਨਂ;

ਪਾਦੇ ਚ ਸਿਰਸਾ ਵਨ੍ਦਿਂ, ਪਸਨ੍ਨੋ ਸੇਹਿ ਪਾਣਿਭਿ.

੩੧. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਅਪਦਾਨਂ ਪਕਿਤ੍ਤਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਕਿਤ੍ਤਨਾਯ ਇਦਂ ਫਲਂ.

੩੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਪਦਾਨਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਪਦਾਨਿਯਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਸਤ੍ਤਾਹਪਬ੍ਬਜਿਤਤ੍ਥੇਰਅਪਦਾਨਂ

੩੩. ‘‘ਵਿਪਸ੍ਸਿਸ੍ਸ ਭਗਵਤੋ, ਸਙ੍ਘੋ ਸਕ੍ਕਤਮਾਨਿਤੋ;

ਬ੍ਯਸਨਂ ਮੇ ਅਨੁਪ੍ਪਤ੍ਤਂ, ਞਾਤਿਭੇਦੋ ਪੁਰੇ ਅਹੁ.

੩੪. ‘‘ਪਬ੍ਬਜ੍ਜਂ ਉਪਗਨ੍ਤ੍ਵਾਨ, ਬ੍ਯਸਨੁਪਸਮਾਯਹਂ;

ਸਤ੍ਤਾਹਾਭਿਰਤੋ ਤਤ੍ਥ, ਸਤ੍ਥੁਸਾਸਨਕਮ੍ਯਤਾ.

੩੫. ‘‘ਏਕਨਵੁਤਿਤੋ ਕਪ੍ਪੇ, ਯਮਹਂ ਪਬ੍ਬਜਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਬ੍ਬਜ੍ਜਾਯ ਇਦਂ ਫਲਂ.

੩੬. ‘‘ਸਤ੍ਤਸਟ੍ਠਿਮ੍ਹਿਤੋ ਕਪ੍ਪੇ, ਸਤ੍ਤ ਆਸੁਂ ਮਹੀਪਤੀ;

ਸੁਨਿਕ੍ਖਮਾਤਿ ਞਾਯਨ੍ਤਿ, ਚਕ੍ਕਵਤ੍ਤੀ ਮਹਬ੍ਬਲਾ.

੩੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਤ੍ਤਾਹਪਬ੍ਬਜਿਤੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਤ੍ਤਾਹਪਬ੍ਬਜਿਤਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਬੁਦ੍ਧੁਪਟ੍ਠਾਯਿਕਤ੍ਥੇਰਅਪਦਾਨਂ

੩੮. ‘‘ਵੇਟਮ੍ਭਿਨੀਤਿ [ਵੇਟਮ੍ਬਰੀਤਿ (ਸੀ.), ਵੇਧਮ੍ਭਿਨੀਤਿ (ਸ੍ਯਾ.)] ਮੇ ਨਾਮਂ, ਪਿਤੁਸਨ੍ਤਂ [ਪਿਤਾ’ਸਨ੍ਤਂ (?)] ਮਮਂ ਤਦਾ;

ਮਮ ਹਤ੍ਥਂ ਗਹੇਤ੍ਵਾਨ, ਉਪਾਨਯਿ ਮਹਾਮੁਨਿਂ.

੩੯. ‘‘ਇਮੇਮਂ ਉਦ੍ਦਿਸਿਸ੍ਸਨ੍ਤਿ, ਬੁਦ੍ਧਾ ਲੋਕਗ੍ਗਨਾਯਕਾ;

ਤੇਹਂ ਉਪਟ੍ਠਿਂ ਸਕ੍ਕਚ੍ਚਂ, ਪਸਨ੍ਨੋ ਸੇਹਿ ਪਾਣਿਭਿ.

੪੦. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਬੁਦ੍ਧੇ ਉਪਟ੍ਠਹਿਂ [ਪਰਿਚਰਿਂ (ਸੀ. ਸ੍ਯਾ.)] ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਉਪਟ੍ਠਾਨਸ੍ਸਿਦਂ ਫਲਂ.

੪੧. ‘‘ਤੇਵੀਸਮ੍ਹਿ ਇਤੋ ਕਪ੍ਪੇ, ਚਤੁਰੋ ਆਸੁ ਖਤ੍ਤਿਯਾ;

ਸਮਣੁਪਟ੍ਠਾਕਾ ਨਾਮ, ਚਕ੍ਕਵਤ੍ਤੀ ਮਹਬ੍ਬਲਾ.

੪੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਬੁਦ੍ਧੁਪਟ੍ਠਾਯਿਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਬੁਦ੍ਧੁਪਟ੍ਠਾਯਿਕਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਪੁਬ੍ਬਙ੍ਗਮਿਯਤ੍ਥੇਰਅਪਦਾਨਂ

੪੩. ‘‘ਚੁਲ੍ਲਾਸੀਤਿਸਹਸ੍ਸਾਨਿ, ਪਬ੍ਬਜਿਮ੍ਹ ਅਕਿਞ੍ਚਨਾ;

ਤੇਸਂ ਪੁਬ੍ਬਙ੍ਗਮੋ ਆਸਿਂ, ਉਤ੍ਤਮਤ੍ਥਸ੍ਸ ਪਤ੍ਤਿਯਾ.

੪੪. ‘‘ਸਰਾਗਾ ਸਭਵਾ [ਸਮੋਹਾ (ਸ੍ਯਾ.)] ਚੇਤੇ, ਵਿਪ੍ਪਸਨ੍ਨਮਨਾਵਿਲਾ;

ਉਪਟ੍ਠਹਿਂਸੁ ਸਕ੍ਕਚ੍ਚਂ, ਪਸਨ੍ਨਾ ਸੇਹਿ ਪਾਣਿਭਿ.

੪੫. ‘‘ਖੀਣਾਸਵਾ ਵਨ੍ਤਦੋਸਾ, ਕਤਕਿਚ੍ਚਾ ਅਨਾਸਵਾ;

ਫਰਿਂਸੁ ਮੇਤ੍ਤਚਿਤ੍ਤੇਨ, ਸਯਮ੍ਭੂ ਅਪਰਾਜਿਤਾ.

੪੬. ‘‘ਤੇਸਂ ਉਪਟ੍ਠਹਿਤ੍ਵਾਨ, ਸਮ੍ਬੁਦ੍ਧਾਨਂ ਪਤਿਸ੍ਸਤੋ;

ਮਰਣਞ੍ਚ ਅਨੁਪ੍ਪਤ੍ਤੋ, ਦੇਵਤ੍ਤਞ੍ਚ ਅਗਮ੍ਹਸੇ.

੪੭. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਸੀਲਮਨੁਪਾਲਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਸਞ੍ਞਮਸ੍ਸ ਇਦਂ ਫਲਂ.

੪੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪੁਬ੍ਬਙ੍ਗਮਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪੁਬ੍ਬਙ੍ਗਮਿਯਤ੍ਥੇਰਸ੍ਸਾਪਦਾਨਂ ਦਸਮਂ.

ਪਣ੍ਣਦਾਯਕਵਗ੍ਗੋ ਏਕੂਨਤਿਂਸਤਿਮੋ.