੩੦. ਚਿਤਕਪੂਜਕਵਗ੍ਗੋ

੧. ਚਿਤਕਪੂਜਕਤ੍ਥੇਰਅਪਦਾਨਂ

੧. ‘‘ਅਜਿਤੋ ਨਾਮ ਨਾਮੇਨ, ਅਹੋਸਿਂ ਬ੍ਰਾਹ੍ਮਣੋ ਤਦਾ;

ਆਹੁਤਿਂ ਯਿਟ੍ਠੁਕਾਮੋਹਂ, ਨਾਨਾਪੁਪ੍ਫਂ ਸਮਾਨਯਿਂ.

੨. ‘‘ਜਲਨ੍ਤਂ ਚਿਤਕਂ ਦਿਸ੍ਵਾ, ਸਿਖਿਨੋ ਲੋਕਬਨ੍ਧੁਨੋ;

ਤਞ੍ਚ ਪੁਪ੍ਫਂ ਸਮਾਨੇਤ੍ਵਾ, ਚਿਤਕੇ ਓਕਿਰਿਂ ਅਹਂ.

੩. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੪. ‘‘ਸਤ੍ਤਵੀਸੇ [ਸਤ੍ਤਤਿਂਸੇ (ਕ.)] ਇਤੋ ਕਪ੍ਪੇ, ਸਤ੍ਤਾਸੁਂ ਮਨੁਜਾਧਿਪਾ;

ਸੁਪਜ੍ਜਲਿਤਨਾਮਾ ਤੇ, ਚਕ੍ਕਵਤ੍ਤੀ ਮਹਬ੍ਬਲਾ.

੫. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਚਿਤਕਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਚਿਤਕਪੂਜਕਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਪੁਪ੍ਫਧਾਰਕਤ੍ਥੇਰਅਪਦਾਨਂ

੬. ‘‘ਵਾਕਚੀਰਧਰੋ ਆਸਿਂ, ਅਜਿਨੁਤ੍ਤਰਵਾਸਨੋ;

ਅਭਿਞ੍ਞਾ ਪਞ੍ਚ ਨਿਬ੍ਬਤ੍ਤਾ, ਚਨ੍ਦਸ੍ਸ ਪਰਿਮਜ੍ਜਕੋ.

੭. ‘‘ਵਿਪਸ੍ਸਿਂ ਲੋਕਪਜ੍ਜੋਤਂ, ਦਿਸ੍ਵਾ ਅਭਿਗਤਂ ਮਮਂ;

ਪਾਰਿਚ੍ਛਤ੍ਤਕਪੁਪ੍ਫਾਨਿ, ਧਾਰੇਸਿਂ ਸਤ੍ਥੁਨੋ ਅਹਂ.

੮. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਧਾਰਣਾਯ ਇਦਂ ਫਲਂ.

੯. ‘‘ਸਤ੍ਤਾਸੀਤਿਮ੍ਹਿਤੋ ਕਪ੍ਪੇ, ਏਕੋ ਆਸਿਂ ਮਹੀਪਤਿ;

ਸਮਨ੍ਤਧਾਰਣੋ ਨਾਮ, ਚਕ੍ਕਵਤ੍ਤੀ ਮਹਬ੍ਬਲੋ.

੧੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪੁਪ੍ਫਧਾਰਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪੁਪ੍ਫਧਾਰਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਛਤ੍ਤਦਾਯਕਤ੍ਥੇਰਅਪਦਾਨਂ

੧੧. ‘‘ਪੁਤ੍ਤੋ ਮਮ ਪਬ੍ਬਜਿਤੋ, ਕਾਸਾਯਵਸਨੋ ਤਦਾ;

ਸੋ ਚ ਬੁਦ੍ਧਤ੍ਤਂ ਸਮ੍ਪਤ੍ਤੋ, ਨਿਬ੍ਬੁਤੋ ਲੋਕਪੂਜਿਤੋ.

੧੨. ‘‘ਵਿਚਿਨਨ੍ਤੋ ਸਕਂ ਪੁਤ੍ਤਂ, ਅਗਮਂ ਪਚ੍ਛਤੋ ਅਹਂ;

ਨਿਬ੍ਬੁਤਸ੍ਸ ਮਹਨ੍ਤਸ੍ਸ, ਚਿਤਕਂ ਅਗਮਾਸਹਂ.

੧੩. ‘‘ਪਗ੍ਗਯ੍ਹ ਅਞ੍ਜਲਿਂ ਤਤ੍ਥ, ਵਨ੍ਦਿਤ੍ਵਾ ਚਿਤਕਂ ਅਹਂ;

ਸੇਤਚ੍ਛਤ੍ਤਞ੍ਚ ਪਗ੍ਗਯ੍ਹ, ਆਰੋਪੇਸਿਂ ਅਹਂ ਤਦਾ.

੧੪. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਛਤ੍ਤਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਛਤ੍ਤਦਾਨਸ੍ਸਿਦਂ ਫਲਂ.

੧੫. ‘‘ਪਞ੍ਚਵੀਸੇ ਇਤੋ ਕਪ੍ਪੇ, ਸਤ੍ਤ ਆਸੁਂ ਜਨਾਧਿਪਾ;

ਮਹਾਰਹਸਨਾਮਾ ਤੇ, ਚਕ੍ਕਵਤ੍ਤੀ ਮਹਬ੍ਬਲਾ.

੧੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਛਤ੍ਤਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਛਤ੍ਤਦਾਯਕਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਸਦ੍ਦਸਞ੍ਞਕਤ੍ਥੇਰਅਪਦਾਨਂ

੧੭. ‘‘ਅਨੁਗ੍ਗਤਮ੍ਹਿ ਆਦਿਚ੍ਚੇ, ਪਨਾਦੋ [ਪਸਾਦੋ (ਸ੍ਯਾ. ਅਟ੍ਠ.)] ਵਿਪੁਲੋ ਅਹੁ;

ਬੁਦ੍ਧਸੇਟ੍ਠਸ੍ਸ ਲੋਕਮ੍ਹਿ, ਪਾਤੁਭਾਵੋ ਮਹੇਸਿਨੋ.

੧੮. ‘‘ਘੋਸ [ਸਦ੍ਦ (ਸੀ. ਸ੍ਯਾ.)] ਮਸ੍ਸੋਸਹਂ ਤਤ੍ਥ, ਨ ਚ ਪਸ੍ਸਾਮਿ ਤਂ ਜਿਨਂ;

ਮਰਣਞ੍ਚ ਅਨੁਪ੍ਪਤ੍ਤੋ, ਬੁਦ੍ਧਸਞ੍ਞਮਨੁਸ੍ਸਰਿਂ.

੧੯. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਦ੍ਦਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਦ੍ਦਸਞ੍ਞਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਗੋਸੀਸਨਿਕ੍ਖੇਪਕਤ੍ਥੇਰਅਪਦਾਨਂ

੨੧. ‘‘ਆਰਾਮਦ੍ਵਾਰਾ ਨਿਕ੍ਖਮ੍ਮ, ਗੋਸੀਸਂ ਸਨ੍ਥਤਂ ਮਯਾ;

ਅਨੁਭੋਮਿ ਸਕਂ ਕਮ੍ਮਂ, ਪੁਬ੍ਬਕਮ੍ਮਸ੍ਸਿਦਂ ਫਲਂ.

੨੨. ‘‘ਆਜਾਨਿਯਾ ਵਾਤਜਵਾ, ਸਿਨ੍ਧਵਾ ਸੀਘਵਾਹਨਾ;

ਅਨੁਭੋਮਿ ਸਬ੍ਬਮੇਤਂ, ਗੋਸੀਸਸ੍ਸ ਇਦਂ ਫਲਂ.

੨੩. ‘‘ਅਹੋ ਕਾਰਂ ਪਰਮਕਾਰਂ, ਸੁਖਤ੍ਤੇ ਸੁਕਤਂ ਮਯਾ;

ਸਙ੍ਘੇ ਕਤਸ੍ਸ ਕਾਰਸ੍ਸ, ਨ ਅਞ੍ਞਂ ਕਲਮਗ੍ਘਤਿ.

੨੪. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਸੀਸਂ ਸਨ੍ਥਰਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਸਨ੍ਥਰਸ੍ਸ ਇਦਂ ਫਲਂ.

੨੫. ‘‘ਪਞ੍ਚਸਤ੍ਤਤਿਕਪ੍ਪਮ੍ਹਿ, ਸੁਪ੍ਪਤਿਟ੍ਠਿਤਨਾਮਕੋ;

ਏਕੋ ਆਸਿਂ ਮਹਾਤੇਜੋ, ਚਕ੍ਕਵਤ੍ਤੀ ਮਹਬ੍ਬਲੋ.

੨੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਗੋਸੀਸਨਿਕ੍ਖੇਪਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਗੋਸੀਸਨਿਕ੍ਖੇਪਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਪਾਦਪੂਜਕਤ੍ਥੇਰਅਪਦਾਨਂ

੨੭. ‘‘ਪਬ੍ਬਤੇ ਹਿਮਵਨ੍ਤਮ੍ਹਿ, ਅਹੋਸਿਂ ਕਿਨ੍ਨਰੋ ਤਦਾ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਪੀਤਰਂਸਿਂਵ ਭਾਣੁਮਂ.

੨੮. ‘‘ਉਪੇਤਂ ਤਮਹਂ [ਉਪੇਤੋਪਿ ਤਦਾ (ਸ੍ਯਾ.), ਉਪੇਸਿਂ ਤਮਹਂ (?)] ਬੁਦ੍ਧਂ, ਵਿਪਸ੍ਸਿਂ ਲੋਕਨਾਯਕਂ;

ਚਨ੍ਦਨਂ ਤਗਰਞ੍ਚਾਪਿ, ਪਾਦੇ ਓਸਿਞ੍ਚਹਂ ਤਦਾ.

੨੯. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪਾਦਂ ਅਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਾਦਪੂਜਾਯਿਦਂ ਫਲਂ.

੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਾਦਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਾਦਪੂਜਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਦੇਸਕਿਤ੍ਤਕਤ੍ਥੇਰਅਪਦਾਨਂ

੩੧. ‘‘ਉਪਸਾਲਕਨਾਮੋਹਂ, ਅਹੋਸਿਂ ਬ੍ਰਾਹ੍ਮਣੋ ਤਦਾ;

ਕਾਨਨਂ ਵਨਮੋਗਾਲ਼੍ਹਂ, ਲੋਕਜੇਟ੍ਠਂ ਨਰਾਸਭਂ.

੩੨. ‘‘ਦਿਸ੍ਵਾਨ ਵਨ੍ਦਿਂ ਪਾਦੇਸੁ, ਲੋਕਾਹੁਤਿਪਟਿਗ੍ਗਹਂ;

ਪਸਨ੍ਨਚਿਤ੍ਤਂ ਮਂ ਞਤ੍ਵਾ, ਬੁਦ੍ਧੋ ਅਨ੍ਤਰਧਾਯਥ.

੩੩. ‘‘ਕਾਨਨਾ ਅਭਿਨਿਕ੍ਖਮ੍ਮ, ਬੁਦ੍ਧਸੇਟ੍ਠਮਨੁਸ੍ਸਰਿਂ;

ਤਂ ਦੇਸਂ ਕਿਤ੍ਤਯਿਤ੍ਵਾਨ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ.

੩੪. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਦੇਸਮਭਿਕਿਤ੍ਤਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਕਿਤ੍ਤਨਾਯ ਇਦਂ ਫਲਂ.

੩੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਦੇਸਕਿਤ੍ਤਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਦੇਸਕਿਤ੍ਤਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਸਰਣਗਮਨਿਯਤ੍ਥੇਰਅਪਦਾਨਂ

੩੬. ‘‘ਪਬ੍ਬਤੇ ਹਿਮਵਨ੍ਤਮ੍ਹਿ, ਅਹੋਸਿਂ ਲੁਦ੍ਦਕੋ ਤਦਾ;

ਵਿਪਸ੍ਸਿਂ ਅਦ੍ਦਸਂ ਬੁਦ੍ਧਂ, ਲੋਕਜੇਟ੍ਠਂ ਨਰਾਸਭਂ.

੩੭. ‘‘ਉਪਾਸਿਤ੍ਵਾਨ ਸਮ੍ਬੁਦ੍ਧਂ, ਵੇਯ੍ਯਾਵਚ੍ਚਮਕਾਸਹਂ;

ਸਰਣਞ੍ਚ ਉਪਾਗਚ੍ਛਿਂ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ.

੩੮. ‘‘ਏਕਨਵੁਤਿਤੋ ਕਪ੍ਪੇ, ਸਰਣਂ ਉਪਗਚ੍ਛਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਸਰਣਾਗਮਨਪ੍ਫਲਂ.

੩੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਰਣਗਮਨਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਰਣਗਮਨਿਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਅਮ੍ਬਪਿਣ੍ਡਿਯਤ੍ਥੇਰਅਪਦਾਨਂ

੪੦. ‘‘ਰੋਮਸੋ ਨਾਮ ਨਾਮੇਨ, ਦਾਨਵੋ ਇਤਿ ਵਿਸ੍ਸੁਤੋ;

ਅਮ੍ਬਪਿਣ੍ਡੀ ਮਯਾ ਦਿਨ੍ਨਾ [ਅਮ੍ਬਪਿਣ੍ਡੋ ਮਯਾ ਦਿਨ੍ਨੋ (ਸ੍ਯਾ.)], ਵਿਪਸ੍ਸਿਸ੍ਸ ਮਹੇਸਿਨੋ.

੪੧. ‘‘ਏਕਨਵੁਤਿਤੋ ਕਪ੍ਪੇ, ਯਮਮ੍ਬਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਅਮ੍ਬਦਾਨਸ੍ਸਿਦਂ ਫਲਂ.

੪੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਮ੍ਬਪਿਣ੍ਡਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਮ੍ਬਪਿਣ੍ਡਿਯਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਅਨੁਸਂਸਾਵਕਤ੍ਥੇਰਅਪਦਾਨਂ

੪੩. ‘‘ਪਿਣ੍ਡਾਯ ਚਰਮਾਨਾਹਂ, ਵਿਪਸ੍ਸਿਮਦ੍ਦਸਂ ਜਿਨਂ;

ਉਲ਼ੁਙ੍ਗਭਿਕ੍ਖਂ ਪਾਦਾਸਿਂ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ.

੪੪. ‘‘ਪਸਨ੍ਨਚਿਤ੍ਤੋ ਸੁਮਨੋ, ਅਭਿਵਾਦੇਸਹਂ ਤਦਾ;

ਅਨੁਸਂਸਾਵਯਿਂ ਬੁਦ੍ਧਂ, ਉਤ੍ਤਮਤ੍ਥਸ੍ਸ ਪਤ੍ਤਿਯਾ.

੪੫. ‘‘ਏਕਨਵੁਤਿਤੋ ਕਪ੍ਪੇ, ਅਨੁਸਂਸਾਵਯਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਅਨੁਸਂਸਾਵਨਾ ਫਲਂ.

੪੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਨੁਸਂਸਾਵਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਨੁਸਂਸਾਵਕਤ੍ਥੇਰਸ੍ਸਾਪਦਾਨਂ ਦਸਮਂ.

ਚਿਤਕਪੂਜਕਵਗ੍ਗੋ ਤਿਂਸਤਿਮੋ.

ਤਸ੍ਸੁਦ੍ਦਾਨਂ –

ਚਿਤਕਂ ਪਾਰਿਛਤ੍ਤੋ ਚ, ਸਦ੍ਦਗੋਸੀਸਸਨ੍ਥਰਂ;

ਪਾਦੋ ਪਦੇਸਂ ਸਰਣਂ, ਅਮ੍ਬੋ ਸਂਸਾਵਕੋਪਿ ਚ;

ਅਟ੍ਠਤਾਲੀਸ ਗਾਥਾਯੋ, ਗਣਿਤਾਯੋ ਵਿਭਾਵਿਭਿ.

ਅਥ ਵਗ੍ਗੁਦ੍ਦਾਨਂ –

ਕਣਿਕਾਰੋ ਹਤ੍ਥਿਦਦੋ, ਆਲਮ੍ਬਣੁਦਕਾਸਨਂ;

ਤੁਵਰਂ ਥੋਮਕੋ ਚੇਵ, ਉਕ੍ਖੇਪਂ ਸੀਸੁਪਧਾਨਂ.

ਪਣ੍ਣਦੋ ਚਿਤਪੂਜੀ ਚ, ਗਾਥਾਯੋ ਚੇਵ ਸਬ੍ਬਸੋ;

ਚਤ੍ਤਾਰਿ ਚ ਸਤਾਨੀਹ, ਏਕਪਞ੍ਞਾਸਮੇਵ ਚ.

ਪਞ੍ਚਵੀਸਸਤਾ ਸਬ੍ਬਾ, ਦ੍ਵਾਸਤ੍ਤਤਿ ਤਦੁਤ੍ਤਰਿ;

ਤਿਸਤਂ ਅਪਦਾਨਾਨਂ, ਗਣਿਤਾ ਅਤ੍ਥਦਸ੍ਸਿਭਿ.

ਕਣਿਕਾਰਵਗ੍ਗਦਸਕਂ.