੩੧. ਪਦੁਮਕੇਸਰਵਗ੍ਗੋ

੧. ਪਦੁਮਕੇਸਰਿਯਤ੍ਥੇਰਅਪਦਾਨਂ

੧. ‘‘ਇਸਿਸਙ੍ਘੇ ਅਹਂ ਪੁਬ੍ਬੇ, ਆਸਿਂ ਮਾਤਙ੍ਗਵਾਰਣੋ;

ਮਹੇਸੀਨਂ ਪਸਾਦੇਨ, ਪਦ੍ਮਕੇਸਰਮੋਕਿਰਿਂ.

੨. ‘‘ਪਚ੍ਚੇਕਜਿਨਸੇਟ੍ਠੇਸੁ, ਧੁਤਰਾਗੇਸੁ ਤਾਦਿਸੁ;

ਤੇਸੁ ਚਿਤ੍ਤਂ ਪਸਾਦੇਤ੍ਵਾ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ.

੩. ‘‘ਏਕਨਵੁਤਿਤੋ ਕਪ੍ਪੇ, ਕੇਸਰਂ ਓਕਿਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੪. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਦੁਮਕੇਸਰਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਦੁਮਕੇਸਰਿਯਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਸਬ੍ਬਗਨ੍ਧਿਯਤ੍ਥੇਰਅਪਦਾਨਂ

੫. ‘‘ਗਨ੍ਧਮਾਲਂ ਮਯਾ ਦਿਨ੍ਨਂ, ਵਿਪਸ੍ਸਿਸ੍ਸ ਮਹੇਸਿਨੋ;

ਅਦਾਸਿਂ ਉਜੁਭੂਤਸ੍ਸ, ਕੋਸੇਯ੍ਯਵਤ੍ਥਮੁਤ੍ਤਮਂ.

੬. ‘‘ਏਕਨਵੁਤਿਤੋ ਕਪ੍ਪੇ, ਯਂ ਵਤ੍ਥਮਦਦਿਂ [ਗਨ੍ਧਮਦਦਿਂ (ਸ੍ਯਾ.)] ਪੁਰੇ;

ਦੁਗ੍ਗਤਿਂ ਨਾਭਿਜਾਨਾਮਿ, ਗਨ੍ਧਦਾਨਸ੍ਸਿਦਂ ਫਲਂ.

੭. ‘‘ਇਤੋ ਪਨ੍ਨਰਸੇ ਕਪ੍ਪੇ, ਸੁਚੇਲ਼ੋ ਨਾਮ ਖਤ੍ਤਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਬ੍ਬਗਨ੍ਧਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਬ੍ਬਗਨ੍ਧਿਯਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਪਰਮਨ੍ਨਦਾਯਕਤ੍ਥੇਰਅਪਦਾਨਂ

੯. ‘‘ਕਣਿਕਾਰਂਵ ਜੋਤਨ੍ਤਂ, ਉਦਯਨ੍ਤਂਵ ਭਾਣੁਮਂ;

ਵਿਪਸ੍ਸਿਂ ਅਦ੍ਦਸਂ ਬੁਦ੍ਧਂ, ਲੋਕਜੇਟ੍ਠਂ ਨਰਾਸਭਂ.

੧੦. ‘‘ਅਞ੍ਜਲਿਂ ਪਗ੍ਗਹੇਤ੍ਵਾਨ, ਅਭਿਨੇਸਿਂ ਸਕਂ ਘਰਂ;

ਅਭਿਨੇਤ੍ਵਾਨ ਸਮ੍ਬੁਦ੍ਧਂ, ਪਰਮਨ੍ਨਮਦਾਸਹਂ.

੧੧. ‘‘ਏਕਨਵੁਤਿਤੋ ਕਪ੍ਪੇ, ਪਰਮਨ੍ਨਮਦਿਂ [ਪਰਮਨ੍ਨਂ ਦਦਿਂ (ਸੀ.), ਪਰਮਨ੍ਨਮਦਂ (ਸ੍ਯਾ.)] ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਰਮਨ੍ਨਸ੍ਸਿਦਂ ਫਲਂ.

੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਰਮਨ੍ਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਰਮਨ੍ਨਦਾਯਕਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਧਮ੍ਮਸਞ੍ਞਕਤ੍ਥੇਰਅਪਦਾਨਂ

੧੩. ‘‘ਵਿਪਸ੍ਸਿਨੋ ਭਗਵਤੋ, ਮਹਾਬੋਧਿਮਹੋ ਅਹੁ;

ਰੁਕ੍ਖਟ੍ਠਸ੍ਸੇਵ ਸਮ੍ਬੁਦ੍ਧੋ, [ਰੁਕ੍ਖਟ੍ਠੇਯੇਵ ਸਮ੍ਬੁਦ੍ਧੇ (ਸੀ.), ਰੁਕ੍ਖਟ੍ਠੋ ਇਵ ਸਮ੍ਬੁਦ੍ਧੋ (ਅਟ੍ਠ.) ਏਤ੍ਥ ਰੁਕ੍ਖਟ੍ਠਸ੍ਸੇਵ ਬੋਧਿਮਹਕਾਰਜਨਸ੍ਸ ਸਮ੍ਬੁਦ੍ਧੋ ਚਤੁਸਚ੍ਚਂ ਪਕਾਸੇਤੀਤਿ ਅਤ੍ਥੋਪਿ ਸਕ੍ਕਾ ਞਾਤੁਂ] ਲੋਕਜੇਟ੍ਠੋ ਨਰਾਸਭੋ [ਲੋਕਜੇਟ੍ਠੇ ਨਰਾਸਭੇ (ਸੀ.)].

੧੪. ‘‘ਭਗਵਾ ਤਮ੍ਹਿ ਸਮਯੇ, ਭਿਕ੍ਖੁਸਙ੍ਘਪੁਰਕ੍ਖਤੋ;

ਚਤੁਸਚ੍ਚਂ ਪਕਾਸੇਤਿ, ਵਾਚਾਸਭਿਮੁਦੀਰਯਂ.

੧੫. ‘‘ਸਙ੍ਖਿਤ੍ਤੇਨ ਚ ਦੇਸੇਨ੍ਤੋ, ਵਿਤ੍ਥਾਰੇਨ ਚ ਦੇਸਯਂ [ਦੇਸਯਿ (ਸ੍ਯਾ.), ਭਾਸਤਿ (ਕ.)];

ਵਿਵਟ੍ਟਚ੍ਛਦੋ ਸਮ੍ਬੁਦ੍ਧੋ, ਨਿਬ੍ਬਾਪੇਸਿ ਮਹਾਜਨਂ.

੧੬. ‘‘ਤਸ੍ਸਾਹਂ ਧਮ੍ਮਂ ਸੁਤ੍ਵਾਨ, ਲੋਕਜੇਟ੍ਠਸ੍ਸ ਤਾਦਿਨੋ;

ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਪਕ੍ਕਾਮਿਂ ਉਤ੍ਤਰਾਮੁਖੋ.

੧੭. ‘‘ਏਕਨਵੁਤਿਤੋ ਕਪ੍ਪੇ, ਯਂ ਧਮ੍ਮਮਸੁਣਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਧਮ੍ਮਸਵਸ੍ਸਿਦਂ ਫਲਂ.

੧੮. ‘‘ਤੇਤ੍ਤਿਂਸਮ੍ਹਿ ਇਤੋ ਕਪ੍ਪੇ, ਏਕੋ ਆਸਿਂ ਮਹੀਪਤਿ;

ਸੁਤਵਾ ਨਾਮ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.

੧੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਧਮ੍ਮਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਧਮ੍ਮਸਞ੍ਞਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਫਲਦਾਯਕਤ੍ਥੇਰਅਪਦਾਨਂ

੨੦. ‘‘ਭਾਗੀਰਥੀਨਦੀਤੀਰੇ, ਅਹੋਸਿ ਅਸ੍ਸਮੋ ਤਦਾ;

ਤਮਹਂ ਅਸ੍ਸਮਂ ਗਚ੍ਛਿਂ, ਫਲਹਤ੍ਥੋ ਅਪੇਕ੍ਖਵਾ.

੨੧. ‘‘ਵਿਪਸ੍ਸਿਂ ਤਤ੍ਥ ਅਦ੍ਦਕ੍ਖਿਂ, ਪੀਤਰਂਸਿਂਵ ਭਾਣੁਮਂ;

ਯਂ ਮੇ ਅਤ੍ਥਿ ਫਲਂ ਸਬ੍ਬਂ, ਅਦਾਸਿਂ ਸਤ੍ਥੁਨੋ ਅਹਂ.

੨੨. ‘‘ਏਕਨਵੁਤਿਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੨੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਫਲਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਫਲਦਾਯਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਸਮ੍ਪਸਾਦਕਤ੍ਥੇਰਅਪਦਾਨਂ

੨੪. ‘‘‘ਨਮੋ ਤੇ ਬੁਦ੍ਧ ਵੀਰਤ੍ਥੁ, ਵਿਪ੍ਪਮੁਤ੍ਤੋਸਿ ਸਬ੍ਬਧਿ;

ਬ੍ਯਸਨਮ੍ਹਿ [ਬ੍ਯਸਨਂ ਹਿ (ਸੀ.)] ਅਨੁਪ੍ਪਤ੍ਤੋ, ਤਸ੍ਸ ਮੇ ਸਰਣਂ ਭਵ’.

੨੫. ‘‘ਸਿਦ੍ਧਤ੍ਥੋ ਤਸ੍ਸ ਬ੍ਯਾਕਾਸਿ, ਲੋਕੇ ਅਪ੍ਪਟਿਪੁਗ੍ਗਲੋ;

‘ਮਹੋਦਧਿਸਮੋ ਸਙ੍ਘੋ, ਅਪ੍ਪਮੇਯ੍ਯੋ ਅਨੁਤ੍ਤਰੋ.

੨੬. ‘‘‘ਤਤ੍ਥ ਤ੍ਵਂ ਵਿਰਜੇ ਖੇਤ੍ਤੇ, ਅਨਨ੍ਤਫਲਦਾਯਕੇ;

ਸਙ੍ਘੇ ਚਿਤ੍ਤਂ ਪਸਾਦੇਤ੍ਵਾ, ਸੁਬੀਜਂ ਵਾਪ [ਚਾਪਿ (ਸੀ.), ਵਾਪਿ (ਸ੍ਯਾ.)] ਰੋਪਯ.

੨੭. ‘‘ਇਦਂ ਵਤ੍ਵਾਨ ਸਬ੍ਬਞ੍ਞੂ, ਲੋਕਜੇਟ੍ਠੋ ਨਰਾਸਭੋ;

ਮਮੇਵ ਅਨੁਸਾਸਿਤ੍ਵਾ, ਵੇਹਾਸਂ ਨਭਮੁਗ੍ਗਮਿ.

੨੮. ‘‘ਅਚਿਰਂ ਗਤਮਤ੍ਤਮ੍ਹਿ, ਸਬ੍ਬਞ੍ਞੁਮ੍ਹਿ ਨਰਾਸਭੇ;

ਮਰਣਂ ਸਮਨੁਪ੍ਪਤ੍ਤੋ, ਤੁਸਿਤਂ ਉਪਪਜ੍ਜਹਂ.

੨੯. ‘‘ਤਦਾਹਂ ਵਿਰਜੇ ਖੇਤ੍ਤੇ, ਅਨਨ੍ਤਫਲਦਾਯਕੇ;

ਸਙ੍ਘੇ ਚਿਤ੍ਤਂ ਪਸਾਦੇਤ੍ਵਾ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ.

੩੦. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਪਸਾਦਮਲਭਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਸਾਦਸ੍ਸ ਇਦਂ ਫਲਂ.

੩੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਮ੍ਪਸਾਦਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਮ੍ਪਸਾਦਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਆਰਾਮਦਾਯਕਤ੍ਥੇਰਅਪਦਾਨਂ

੩੨. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਆਰਾਮੋ ਰੋਪਿਤੋ ਮਯਾ;

ਸਨ੍ਦਚ੍ਛਾਯੇਸੁ [ਸੀਤਛਾਯੇਸੁ (ਸ੍ਯਾ.), ਸਨ੍ਤਚ੍ਛਾਯੇਸੁ (ਕ.)] ਰੁਕ੍ਖੇਸੁ, ਉਪਾਸਨ੍ਤੇਸੁ ਪਕ੍ਖਿਸੁ.

੩੩. ‘‘ਅਦ੍ਦਸਂ ਵਿਰਜਂ ਬੁਦ੍ਧਂ, ਆਹੁਤੀਨਂ ਪਟਿਗ੍ਗਹਂ;

ਆਰਾਮਂ ਅਭਿਨਾਮੇਸਿਂ, ਲੋਕਜੇਟ੍ਠਂ ਨਰਾਸਭਂ.

੩੪. ‘‘ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਫਲਂ ਪੁਪ੍ਫਮਦਾਸਹਂ;

ਤਤੋ ਜਾਤਪ੍ਪਸਾਦੋਵ, ਤਂ ਵਨਂ ਪਰਿਣਾਮਯਿਂ.

੩੫. ‘‘ਬੁਦ੍ਧਸ੍ਸ ਯਮਿਦਂ ਦਾਸਿਂ, ਵਿਪ੍ਪਸਨ੍ਨੇਨ ਚੇਤਸਾ;

ਭਵੇ ਨਿਬ੍ਬਤ੍ਤਮਾਨਮ੍ਹਿ, ਨਿਬ੍ਬਤ੍ਤਤਿ ਫਲਂ ਮਮ.

੩੬. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਆਰਾਮਮਦਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਆਰਾਮਸ੍ਸ ਇਦਂ ਫਲਂ.

੩੭. ‘‘ਸਤ੍ਤਤਿਂਸੇ ਇਤੋ ਕਪ੍ਪੇ, ਸਤ੍ਤਾਸੁਂ ਮੁਦੁਸੀਤਲਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੩੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਆਰਾਮਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਆਰਾਮਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਅਨੁਲੇਪਦਾਯਕਤ੍ਥੇਰਅਪਦਾਨਂ

੩੯. ‘‘ਅਤ੍ਥਦਸ੍ਸਿਸ੍ਸ ਮੁਨਿਨੋ, ਅਦ੍ਦਸਂ ਸਾਵਕਂ ਅਹਂ;

ਨਵਕਮ੍ਮਂ ਕਰੋਨ੍ਤਸ੍ਸ, ਸੀਮਾਯ ਉਪਗਚ੍ਛਹਂ.

੪੦. ‘‘ਨਿਟ੍ਠਿਤੇ ਨਵਕਮ੍ਮੇ ਚ, ਅਨੁਲੇਪਮਦਾਸਹਂ;

ਪਸਨ੍ਨਚਿਤ੍ਤੋ ਸੁਮਨੋ, ਪੁਞ੍ਞਕ੍ਖੇਤ੍ਤੇ ਅਨੁਤ੍ਤਰੇ.

੪੧. ‘‘ਅਟ੍ਠਾਰਸੇ ਕਪ੍ਪਸਤੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਅਨੁਲੇਪਸ੍ਸਿਦਂ ਫਲਂ.

੪੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਨੁਲੇਪਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਨੁਲੇਪਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਬੁਦ੍ਧਸਞ੍ਞਕਤ੍ਥੇਰਅਪਦਾਨਂ

੪੩. ‘‘ਉਦੇਨ੍ਤਂ ਸਤਰਂਸਿਂਵ, ਪੀਤਰਂਸਿਂਵ ਭਾਣੁਮਂ;

ਵਨਨ੍ਤਰਗਤਂ ਸਨ੍ਤਂ, ਲੋਕਜੇਟ੍ਠਂ ਨਰਾਸਭਂ.

੪੪. ‘‘ਅਦ੍ਦਸਂ ਸੁਪਿਨਨ੍ਤੇਨ, ਸਿਦ੍ਧਤ੍ਥਂ ਲੋਕਨਾਯਕਂ;

ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਸੁਗਤਿਂ ਉਪਪਜ੍ਜਹਂ.

੪੫. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਸਞ੍ਞਾਯਿਦਂ ਫਲਂ.

੪੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਬੁਦ੍ਧਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਬੁਦ੍ਧਸਞ੍ਞਕਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਪਬ੍ਭਾਰਦਾਯਕਤ੍ਥੇਰਅਪਦਾਨਂ

੪੭. ‘‘ਪਿਯਦਸ੍ਸਿਨੋ ਭਗਵਤੋ, ਪਬ੍ਭਾਰੋ ਸੋਧਿਤੋ ਮਯਾ;

ਘਟਕਞ੍ਚ ਉਪਟ੍ਠਾਸਿਂ, ਪਰਿਭੋਗਾਯ ਤਾਦਿਨੋ.

੪੮. ‘‘ਤਂ ਮੇ ਬੁਦ੍ਧੋ ਵਿਯਾਕਾਸਿ, ਪਿਯਦਸ੍ਸੀ ਮਹਾਮੁਨਿ;

ਸਹਸ੍ਸਕਣ੍ਡੋ ਸਤਭੇਣ੍ਡੁ [ਸਤਗੇਣ੍ਡੁ (ਸ੍ਯਾ. ਕ.)], ਧਜਾਲੁ ਹਰਿਤਾਮਯੋ.

੪੯. ‘‘ਨਿਬ੍ਬਤ੍ਤਿਸ੍ਸਤਿ ਸੋ ਯੂਪੋ, ਰਤਨਞ੍ਚ ਅਨਪ੍ਪਕਂ;

ਪਬ੍ਭਾਰਦਾਨਂ ਦਤ੍ਵਾਨ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ.

੫੦. ‘‘ਇਤੋ ਬਾਤ੍ਤਿਂਸਕਪ੍ਪਮ੍ਹਿ, ਸੁਸੁਦ੍ਧੋ ਨਾਮ ਖਤ੍ਤਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੫੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਬ੍ਭਾਰਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਬ੍ਭਾਰਦਾਯਕਤ੍ਥੇਰਸ੍ਸਾਪਦਾਨਂ ਦਸਮਂ.

ਪਦੁਮਕੇਸਰਵਗ੍ਗੋ ਏਕਤਿਂਸਤਿਮੋ.