੩੨. ਆਰਕ੍ਖਦਾਯਕਵਗ੍ਗੋ
੧. ਆਰਕ੍ਖਦਾਯਕਤ੍ਥੇਰਅਪਦਾਨਂ
੧. ‘‘ਧਮ੍ਮਦਸ੍ਸਿਸ੍ਸ ਮੁਨਿਨੋ, ਵਤਿ ਕਾਰਾਪਿਤਾ ਮਯਾ;
ਆਰਕ੍ਖੋ ਚ ਮਯਾ ਦਿਨ੍ਨੋ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ.
੨. ‘‘ਅਟ੍ਠਾਰਸੇ ਕਪ੍ਪਸਤੇ, ਯਂ ਕਮ੍ਮਮਕਰਿਂ ਤਦਾ;
ਤੇਨ ਕਮ੍ਮਵਿਸੇਸੇਨ, ਪਤ੍ਤੋ ਮੇ ਆਸਵਕ੍ਖਯੋ.
੩. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਆਰਕ੍ਖਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਆਰਕ੍ਖਦਾਯਕਤ੍ਥੇਰਸ੍ਸਾਪਦਾਨਂ ਪਠਮਂ.
੨. ਭੋਜਨਦਾਯਕਤ੍ਥੇਰਅਪਦਾਨਂ
੪. ‘‘ਸੁਜਾਤੋ ਸਾਲਲਟ੍ਠੀਵ, ਸੋਭਞ੍ਜਨਮਿਵੁਗ੍ਗਤੋ;
ਇਨ੍ਦਲਟ੍ਠਿਰਿਵਾਕਾਸੇ, ਵਿਰੋਚਤਿ ਸਦਾ ਜਿਨੋ.
੫. ‘‘ਤਸ੍ਸ ਦੇਵਾਤਿਦੇਵਸ੍ਸ, ਵੇਸ੍ਸਭੁਸ੍ਸ ਮਹੇਸਿਨੋ;
ਅਦਾਸਿ ਭੋਜਨਮਹਂ, ਵਿਪ੍ਪਸਨ੍ਨੇਨ ਚੇਤਸਾ.
੬. ‘‘ਤਂ ਮੇ ਬੁਦ੍ਧੋ ਅਨੁਮੋਦਿ, ਸਯਮ੍ਭੂ ਅਪਰਾਜਿਤੋ;
ਭਵੇ ਨਿਬ੍ਬਤ੍ਤਮਾਨਮ੍ਹਿ, ਫਲਂ ਨਿਬ੍ਬਤ੍ਤਤੂ ਤਵ.
੭. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਭੋਜਨਸ੍ਸ ਇਦਂ ਫਲਂ.
੮. ‘‘ਪਞ੍ਚਵੀਸੇ ਇਤੋ ਕਪ੍ਪੇ, ਏਕੋ ਆਸਿਂ ਅਮਿਤ੍ਤਕੋ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਭੋਜਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਭੋਜਨਦਾਯਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.
੩. ਗਤਸਞ੍ਞਕਤ੍ਥੇਰਅਪਦਾਨਂ
੧੦. ‘‘ਆਕਾਸੇਵ ਪਦਂ ਨਤ੍ਥਿ, ਅਮ੍ਬਰੇ ਅਨਿਲਞ੍ਜਸੇ;
ਸਿਦ੍ਧਤ੍ਥਂ ਜਿਨਮਦ੍ਦਕ੍ਖਿਂ, ਗਚ੍ਛਨ੍ਤਂ ਤਿਦਿਵਙ੍ਗਣੇ [ਤਿਦਿਵਙ੍ਗਣਂ (ਸ੍ਯਾ. ਕ.)].
੧੧. ‘‘ਅਨਿਲੇਨੇਰਿਤਂ ਦਿਸ੍ਵਾ, ਸਮ੍ਮਾਸਮ੍ਬੁਦ੍ਧਚੀਵਰਂ;
ਵਿਤ੍ਤਿ ਮਮਾਹੁ ਤਾਵਦੇ [ਵਿਤ੍ਤਿ ਮੇ ਪਾਹੁਣਾ ਤਾਵ (ਸ੍ਯਾ.), ਵਿਤ੍ਤਿ ਮੇ ਤਾਵਦੇ ਜਾਤਾ (ਸੀ.)], ਦਿਸ੍ਵਾਨ ਗਮਨਂ ਮੁਨਿਂ [ਮੁਨੇ (ਸੀ.)].
੧੨. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਸਞ੍ਞਾਯਿਦਂ ਫਲਂ.
੧੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਗਤਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਗਤਸਞ੍ਞਕਤ੍ਥੇਰਸ੍ਸਾਪਦਾਨਂ ਤਤਿਯਂ.
੪. ਸਤ੍ਤਪਦੁਮਿਯਤ੍ਥੇਰਅਪਦਾਨਂ
੧੪. ‘‘ਨਦੀਕੂਲੇ ਵਸਾਮਹਂ, ਨੇਸਾਦੋ ਨਾਮ ਬ੍ਰਾਹ੍ਮਣੋ;
ਸਤਪਤ੍ਤੇਹਿ ਪੁਪ੍ਫੇਹਿ, ਸਮ੍ਮਜ੍ਜਿਤ੍ਵਾਨ ਅਸ੍ਸਮਂ.
੧੫. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਸਿਦ੍ਧਤ੍ਥਂ ਲੋਕਨਾਯਕਂ;
ਦਿਸ੍ਵਾ ਨਭੇਨ [ਵਨੇਨ (ਸ੍ਯਾ. ਕ.)] ਗਚ੍ਛਨ੍ਤਂ, ਹਾਸੋ ਮੇ ਉਦਪਜ੍ਜਥ.
੧੬. ‘‘ਪਚ੍ਚੁਗ੍ਗਨ੍ਤ੍ਵਾਨ ਸਮ੍ਬੁਦ੍ਧਂ, ਲੋਕਜੇਟ੍ਠਂ ਨਰਾਸਭਂ;
ਅਸ੍ਸਮਂ ਅਤਿਨਾਮੇਤ੍ਵਾ, ਜਲਜਗ੍ਗੇਹਿ ਓਕਿਰਿਂ.
੧੭. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੧੮. ‘‘ਇਤੋ ਤੇ ਸਤ੍ਤਮੇ ਕਪ੍ਪੇ, ਚਤੁਰੋ ਪਾਦਪਾਵਰਾ;
ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.
੧੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸਤ੍ਤਪਦੁਮਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਸਤ੍ਤਪਦੁਮਿਯਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.
੫. ਪੁਪ੍ਫਾਸਨਦਾਯਕਤ੍ਥੇਰਅਪਦਾਨਂ
੨੦. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਪੀਤਰਂਸਿਂਵ [ਸਤਰਂਸਿਂਵ (ਸੀ. ਸ੍ਯਾ.)] ਭਾਣੁਮਂ;
ਅਵਿਦੂਰੇਨ ਗਚ੍ਛਨ੍ਤਂ, ਸਿਦ੍ਧਤ੍ਥਂ ਅਪਰਾਜਿਤਂ.
੨੧. ‘‘ਤਸ੍ਸ ਪਚ੍ਚੁਗ੍ਗਮਿਤ੍ਵਾਨ, ਪਵੇਸੇਤ੍ਵਾਨ ਅਸ੍ਸਮਂ;
ਪੁਪ੍ਫਾਸਨਂ ਮਯਾ ਦਿਨ੍ਨਂ, ਵਿਪ੍ਪਸਨ੍ਨੇਨ ਚੇਤਸਾ.
੨੨. ‘‘ਅਞ੍ਜਲਿਂ ਪਗ੍ਗਹੇਤ੍ਵਾਨ, ਵੇਦਜਾਤੋ ਤਦਾ ਅਹਂ;
ਬੁਦ੍ਧੇ ਚਿਤ੍ਤਂ ਪਸਾਦੇਤ੍ਵਾ, ਤਂ ਕਮ੍ਮਂ ਪਰਿਣਾਮਯਿਂ.
੨੩. ‘‘ਯਂ ਮੇ ਅਤ੍ਥਿ ਕਤਂ ਪੁਞ੍ਞਂ, ਸਯਮ੍ਭੁਮ੍ਹਪਰਾਜਿਤੇ;
ਸਬ੍ਬੇਨ ਤੇਨ ਕੁਸਲੇਨ, ਵਿਮਲੋ ਹੋਮਿ ਸਾਸਨੇ.
੨੪. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਪੁਪ੍ਫਾਸਨਮਦਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਾਸਨਸ੍ਸਿਦਂ ਫਲਂ.
੨੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਪੁਪ੍ਫਾਸਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਪੁਪ੍ਫਾਸਨਦਾਯਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.
੬. ਆਸਨਸਨ੍ਥਵਿਕਤ੍ਥੇਰਅਪਦਾਨਂ
੨੬. ‘‘ਚੇਤਿਯਂ ਉਤ੍ਤਮਂ ਨਾਮ, ਸਿਖਿਨੋ ਲੋਕਬਨ੍ਧੁਨੋ;
ਅਰਞ੍ਞੇ ਇਰੀਣੇ ਵਨੇ, ਅਨ੍ਧਾਹਿਣ੍ਡਾਮਹਂ ਤਦਾ.
੨੭. ‘‘ਪਵਨਾ ਨਿਕ੍ਖਮਨ੍ਤੇਨ, ਦਿਟ੍ਠਂ ਸੀਹਾਸਨਂ ਮਯਾ;
ਏਕਂਸਂ ਅਞ੍ਜਲਿਂ ਕਤ੍ਵਾ, ਸਨ੍ਥਵਿਂ [ਥਵਿਸ੍ਸਂ (ਸੀ.)] ਲੋਕਨਾਯਕਂ.
੨੮. ‘‘ਦਿਵਸਭਾਗਂ ਥਵਿਤ੍ਵਾਨ, ਬੁਦ੍ਧਂ ਲੋਕਗ੍ਗਨਾਯਕਂ;
ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਇਮਂ ਵਾਚਂ ਉਦੀਰਯਿਂ.
੨੯. ‘‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;
ਸਬ੍ਬਞ੍ਞੂਸਿ ਮਹਾਵੀਰ, ਲੋਕਜੇਟ੍ਠ ਨਰਾਸਭ’.
੩੦. ‘‘ਅਭਿਤ੍ਥਵਿਤ੍ਵਾ ਸਿਖਿਨਂ, ਨਿਮਿਤ੍ਤਕਰਣੇਨਹਂ;
ਆਸਨਂ ਅਭਿਵਾਦੇਤ੍ਵਾ, ਪਕ੍ਕਾਮਿਂ ਉਤ੍ਤਰਾਮੁਖੋ.
੩੧. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਥਵਿਂ ਵਦਤਂ ਵਰਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਥੋਮਨਾਯ ਇਦਂ ਫਲਂ.
੩੨. ‘‘ਸਤ੍ਤਵੀਸੇ ਇਤੋ ਕਪ੍ਪੇ, ਅਤੁਲਾ ਸਤ੍ਤ ਆਸੁ ਤੇ;
ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.
੩੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਆਸਨਸਨ੍ਥਵਿਕੋ [ਆਸਨਸਨ੍ਥਵਕੋ (?), ਆਸਨਥਵਿਕੋ (ਕ.), ਆਸਨਤ੍ਥਵਿਕੋ (ਸੀ. ਸ੍ਯਾ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਆਸਨਸਨ੍ਥਵਿਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.
੭. ਸਦ੍ਦਸਞ੍ਞਕਤ੍ਥੇਰਅਪਦਾਨਂ
੩੪. ‘‘ਸੁਦਸ੍ਸਨੋ ਮਹਾਵੀਰੋ, ਦੇਸੇਤਿ ਅਮਤਂ ਪਦਂ;
ਪਰਿਵੁਤੋ ਸਾਵਕੇਹਿ, ਵਸਤਿ ਘਰਮੁਤ੍ਤਮੇ.
੩੫. ‘‘ਤਾਯ ਵਾਚਾਯ ਮਧੁਰਾਯ, ਸਙ੍ਗਣ੍ਹਾਤਿ [ਸਙ੍ਗਣ੍ਹਨ੍ਤੇ (ਸੀ.)] ਮਹਾਜਨਂ;
ਘੋਸੋ ਚ ਵਿਪੁਲੋ ਆਸਿ, ਆਸੀਸੋ [ਆਸਂਸੋ (ਸੀ.)] ਦੇਵਮਾਨੁਸੇ.
੩੬. ‘‘ਨਿਗ੍ਘੋਸਸਦ੍ਦਂ ਸੁਤ੍ਵਾਨ, ਸਿਦ੍ਧਤ੍ਥਸ੍ਸ ਮਹੇਸਿਨੋ;
ਸਦ੍ਦੇ ਚਿਤ੍ਤਂ ਪਸਾਦੇਤ੍ਵਾ, ਅਵਨ੍ਦਿਂ ਲੋਕਨਾਯਕਂ.
੩੭. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਸਞ੍ਞਾਯਿਦਂ ਫਲਂ.
੩੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸਦ੍ਦਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਸਦ੍ਦਸਞ੍ਞਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.
੮. ਤਿਰਂਸਿਯਤ੍ਥੇਰਅਪਦਾਨਂ
੩੯. ‘‘ਕੇਸਰਿਂ ਅਭਿਜਾਤਂਵ, ਅਗ੍ਗਿਕ੍ਖਨ੍ਧਂਵ ਪਬ੍ਬਤੇ;
ਓਭਾਸੇਨ੍ਤਂ ਦਿਸਾ ਸਬ੍ਬਾ [ਨਿਵਾਸੇਨ੍ਤਂ (ਕ.), ਦਿਸਾਸਿਨ੍ਨਂ (ਸ੍ਯਾ.)], ਸਿਦ੍ਧਤ੍ਥਂ ਪਬ੍ਬਤਨ੍ਤਰੇ.
੪੦. ‘‘ਸੂਰਿਯਸ੍ਸ ਚ ਆਲੋਕਂ, ਚਨ੍ਦਾਲੋਕਂ ਤਥੇਵ ਚ;
ਬੁਦ੍ਧਾਲੋਕਞ੍ਚ ਦਿਸ੍ਵਾਨ, ਵਿਤ੍ਤਿ ਮੇ ਉਦਪਜ੍ਜਥ.
੪੧. ‘‘ਤਯੋ ਆਲੋਕੇ ਦਿਸ੍ਵਾਨ, ਸਮ੍ਬੁਦ੍ਧਂ [ਬੁਦ੍ਧਞ੍ਚ (ਸੀ.)] ਸਾਵਕੁਤ੍ਤਮਂ;
ਏਕਂਸਂ ਅਜਿਨਂ ਕਤ੍ਵਾ, ਸਨ੍ਥਵਿਂ ਲੋਕਨਾਯਕਂ.
੪੨. ‘‘ਤਯੋ ਹਿ ਆਲੋਕਕਰਾ, ਲੋਕੇ ਲੋਕਤਮੋਨੁਦਾ;
ਚਨ੍ਦੋ ਚ ਸੂਰਿਯੋ ਚਾਪਿ, ਬੁਦ੍ਧੋ ਚ ਲੋਕਨਾਯਕੋ.
੪੩. ‘‘ਓਪਮ੍ਮਂ ਉਪਦਸ੍ਸੇਤ੍ਵਾ, ਕਿਤ੍ਤਿਤੋ ਮੇ ਮਹਾਮੁਨਿ;
ਬੁਦ੍ਧਸ੍ਸ ਵਣ੍ਣਂ ਕਿਤ੍ਤੇਤ੍ਵਾ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ.
੪੪. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਬੁਦ੍ਧਮਭਿਕਿਤ੍ਤਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਕਿਤ੍ਤਨਾਯ ਇਦਂ ਫਲਂ.
੪੫. ‘‘ਏਕਸਟ੍ਠਿਮ੍ਹਿਤੋ ਕਪ੍ਪੇ, ਏਕੋ ਞਾਣਧਰੋ ਅਹੁ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੪੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਤਿਰਂਸਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਤਿਰਂਸਿਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.
੯. ਕਨ੍ਦਲਿਪੁਪ੍ਫਿਯਤ੍ਥੇਰਅਪਦਾਨਂ
੪੭. ‘‘ਸਿਨ੍ਧੁਯਾ ਨਦਿਯਾ ਤੀਰੇ, ਅਹੋਸਿਂ ਕਸ੍ਸਕੋ ਤਦਾ;
ਪਰਕਮ੍ਮਾਯਨੇ ਯੁਤ੍ਤੋ, ਪਰਭਤ੍ਤਂ ਅਪਸ੍ਸਿਤੋ.
੪੮. ‘‘ਸਿਨ੍ਧੁਂ ਅਨੁਚਰਨ੍ਤੋਹਂ, ਸਿਦ੍ਧਤ੍ਥਂ ਜਿਨਮਦ੍ਦਸਂ;
ਸਮਾਧਿਨਾ ਨਿਸਿਨ੍ਨਂਵ, ਸਤਪਤ੍ਤਂਵ ਪੁਪ੍ਫਿਤਂ.
੪੯. ‘‘ਸਤ੍ਤ ਕਨ੍ਦਲਿਪੁਪ੍ਫਾਨਿ, ਵਣ੍ਟੇ ਛੇਤ੍ਵਾਨਹਂ ਤਦਾ;
ਮਤ੍ਥਕੇ ਅਭਿਰੋਪੇਸਿਂ, ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ.
੫੦. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਅਨੁਕੂਲੇ ਸਮਾਹਿਤਂ;
ਤਿਧਾਪਭਿਨ੍ਨਮਾਤਙ੍ਗਂ, ਕੁਞ੍ਜਰਂਵ ਦੁਰਾਸਦਂ.
੫੧. ‘‘ਤਮਹਂ ਉਪਗਨ੍ਤ੍ਵਾਨ, ਨਿਪਕਂ ਭਾਵਿਤਿਨ੍ਦ੍ਰਿਯਂ;
ਅਞ੍ਜਲਿਂ ਪਗ੍ਗਹੇਤ੍ਵਾਨ, ਅਵਨ੍ਦਿਂ ਸਤ੍ਥੁਨੋ ਅਹਂ.
੫੨. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੫੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਕਨ੍ਦਲਿਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਕਨ੍ਦਲਿਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਨਵਮਂ.
੧੦. ਕੁਮੁਦਮਾਲਿਯਤ੍ਥੇਰਅਪਦਾਨਂ
੫੪. ‘‘ਉਸਭਂ ਪਵਰਂ ਵੀਰਂ, ਮਹੇਸਿਂ ਵਿਜਿਤਾਵਿਨਂ;
ਵਿਪਸ੍ਸਿਨਂ ਮਹਾਵੀਰਂ, ਅਭਿਜਾਤਂਵ ਕੇਸਰਿਂ.
੫੫. ‘‘ਰਥਿਯਂ ਪਟਿਪਜ੍ਜਨ੍ਤਂ, ਆਹੁਤੀਨਂ ਪਟਿਗ੍ਗਹਂ;
ਗਹੇਤ੍ਵਾ ਕੁਮੁਦਂ ਮਾਲਂ, ਬੁਦ੍ਧਸੇਟ੍ਠਂ ਸਮੋਕਿਰਿਂ.
੫੬. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੫੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਕੁਮੁਦਮਾਲਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਕੁਮੁਦਮਾਲਿਯਤ੍ਥੇਰਸ੍ਸਾਪਦਾਨਂ ਦਸਮਂ.
ਆਰਕ੍ਖਦਾਯਕਵਗ੍ਗੋ ਬਾਤ੍ਤਿਂਸਤਿਮੋ [ਬਤ੍ਤਿਂਸਤਿਮੋ (ਸੀ. ਸ੍ਯਾ.)].