੭. ਏਕਦੀਪਿਯਤ੍ਥੇਰਅਪਦਾਨਂ

੩੦. ‘‘ਪਦੁਮੁਤ੍ਤਰਸ੍ਸ ਮੁਨਿਨੋ, ਸਲ਼ਲੇ ਬੋਧਿਮੁਤ੍ਤਮੇ;

ਪਸਨ੍ਨਚਿਤ੍ਤੋ ਸੁਮਨੋ, ਏਕਦੀਪਂ ਅਦਾਸਹਂ.

੩੧. ‘‘ਭਵੇ ਨਿਬ੍ਬਤ੍ਤਮਾਨਮ੍ਹਿ, ਨਿਬ੍ਬਤ੍ਤੇ ਪੁਞ੍ਞਸਞ੍ਚਯੇ;

ਦੁਗ੍ਗਤਿਂ ਨਾਭਿਜਾਨਾਮਿ, ਦੀਪਦਾਨਸ੍ਸਿਦਂ ਫਲਂ.

੩੨. ‘‘ਸੋਲ਼ਸੇ ਕਪ੍ਪਸਹਸ੍ਸੇ, ਇਤੋ ਤੇ ਚਤੁਰੋ ਜਨਾ;

ਚਨ੍ਦਾਭਾ ਨਾਮ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲਾ.

੩੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਦੀਪਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਦੀਪਿਯਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

ਨਵਮਂ ਭਾਣਵਾਰਂ.