੧੮. ਕੁਮੁਦਵਗ੍ਗੋ
੧. ਕੁਮੁਦਮਾਲਿਯਤ੍ਥੇਰਅਪਦਾਨਂ
੧. ‘‘ਪਬ੍ਬਤੇ ਹਿਮਵਨ੍ਤਮ੍ਹਿ, ਮਹਾਜਾਤਸ੍ਸਰੋ ਅਹੁ;
ਤਤ੍ਥਜੋ ਰਕ੍ਖਸੋ ਆਸਿਂ, ਘੋਰਰੂਪੋ ਮਹਬ੍ਬਲੋ.
੨. ‘‘ਕੁਮੁਦਂ ਪੁਪ੍ਫਤੇ ਤਤ੍ਥ, ਚਕ੍ਕਮਤ੍ਤਾਨਿ ਜਾਯਰੇ;
ਓਚਿਨਾਮਿ ਚ ਤਂ ਪੁਪ੍ਫਂ, ਬਲਿਨੋ ਸਮਿਤਿਂ ਤਦਾ.
੩. ‘‘ਅਤ੍ਥਦਸ੍ਸੀ ਤੁ ਭਗਵਾ, ਦ੍ਵਿਪਦਿਨ੍ਦੋ ਨਰਾਸਭੋ;
ਪੁਪ੍ਫਸਙ੍ਕੋਚਿਤਂ [ਪੁਪ੍ਫਂ ਸਙ੍ਕੋਚਿਤਂ (ਸੀ. ਸ੍ਯਾ.), ਪੁਪ੍ਫਂ ਸਮੋਚਿਤਂ (?)] ਦਿਸ੍ਵਾ, ਆਗਚ੍ਛਿ ਮਮ ਸਨ੍ਤਿਕਂ.
੪. ‘‘ਉਪਾਗਤਞ੍ਚ ਸਮ੍ਬੁਦ੍ਧਂ, ਦੇਵਦੇਵਂ ਨਰਾਸਭਂ;
ਸਬ੍ਬਞ੍ਚ ਪੁਪ੍ਫਂ ਪਗ੍ਗਯ੍ਹ, ਬੁਦ੍ਧਸ੍ਸ ਅਭਿਰੋਪਯਿਂ.
੫. ‘‘ਯਾਵਤਾ ਹਿਮਵਨ੍ਤਨ੍ਤਾ, ਪਰਿਸਾ ਸਾ [ਹਿਮਵਨ੍ਤਸ੍ਮਿਂ, ਯਾਵ ਮਾਲਾ (ਸ੍ਯਾ.)] ਤਦਾ ਅਹੁ;
ਤਾਵਚ੍ਛਦਨਸਮ੍ਪਨ੍ਨੋ, ਅਗਮਾਸਿ ਤਥਾਗਤੋ.
੬. ‘‘ਅਟ੍ਠਾਰਸੇ ਕਪ੍ਪਸਤੇ, ਯਂ ਪੁਪ੍ਫਮਭਿਰੋਪਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੭. ‘‘ਇਤੋ ਪਨ੍ਨਰਸੇ ਕਪ੍ਪੇ, ਸਤ੍ਤਾਹੇਸੁਂ ਜਨਾਧਿਪਾ;
ਸਹਸ੍ਸਰਥਨਾਮਾ ਤੇ, ਚਕ੍ਕਵਤ੍ਤੀ ਮਹਬ੍ਬਲਾ.
੮. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਕੁਮੁਦਮਾਲਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਕੁਮੁਦਮਾਲਿਯਤ੍ਥੇਰਸ੍ਸਾਪਦਾਨਂ ਪਠਮਂ.
੨. ਨਿਸ੍ਸੇਣਿਦਾਯਕਤ੍ਥੇਰਅਪਦਾਨਂ
੯. ‘‘ਕੋਣ੍ਡਞ੍ਞਸ੍ਸ ਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;
ਆਰੋਹਤ੍ਥਾਯ ਪਾਸਾਦਂ, ਨਿਸ੍ਸੇਣੀ ਕਾਰਿਤਾ ਮਯਾ.
੧੦. ‘‘ਤੇਨ ਚਿਤ੍ਤਪ੍ਪਸਾਦੇਨ, ਅਨੁਭੋਤ੍ਵਾਨ ਸਮ੍ਪਦਾ;
ਧਾਰੇਮਿ ਅਨ੍ਤਿਮਂ ਦੇਹਂ, ਸਮ੍ਮਾਸਮ੍ਬੁਦ੍ਧਸਾਸਨੇ.
੧੧. ‘‘ਏਕਤ੍ਤਿਂਸਮ੍ਹਿ ਕਪ੍ਪਾਨਂ, ਸਹਸ੍ਸਮ੍ਹਿ ਤਯੋ ਅਹੁਂ [ਮਹਾ (ਸੀ. ਸ੍ਯਾ.)];
ਸਮ੍ਬਹੁਲਾ ਨਾਮ ਰਾਜਾਨੋ, ਚਕ੍ਕਵਤ੍ਤੀ ਮਹਬ੍ਬਲਾ.
੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਨਿਸ੍ਸੇਣਿਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਨਿਸ੍ਸੇਣਿਦਾਯਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.
੩. ਰਤ੍ਤਿਪੁਪ੍ਫਿਯਤ੍ਥੇਰਅਪਦਾਨਂ
੧੩. ‘‘ਮਿਗਲੁਦ੍ਦੋ ਪੁਰੇ ਆਸਿਂ, ਅਰਞ੍ਞੇ ਕਾਨਨੇ ਅਹਂ;
ਵਿਪਸ੍ਸਿਂ ਅਦ੍ਦਸਂ ਬੁਦ੍ਧਂ, ਦੇਵਦੇਵਂ ਨਰਾਸਭਂ.
੧੪. ‘‘ਰਤ੍ਤਿਕਂ ਪੁਪ੍ਫਿਤਂ ਦਿਸ੍ਵਾ, ਕੁਟਜਂ ਧਰਣੀਰੁਹਂ;
ਸਮੂਲਂ ਪਗ੍ਗਹੇਤ੍ਵਾਨ, ਉਪਨੇਸਿਂ ਮਹੇਸਿਨੋ.
੧੫. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਦਾਨਸ੍ਸਿਦਂ ਫਲਂ.
੧੬. ‘‘ਇਤੋ ਚ ਅਟ੍ਠਮੇ ਕਪ੍ਪੇ, ਸੁਪ੍ਪਸਨ੍ਨਸਨਾਮਕੋ;
ਸਤ੍ਤਰਤਨਸਮ੍ਪਨ੍ਨੋ, ਰਾਜਾਹੋਸਿਂ ਮਹਬ੍ਬਲੋ.
੧੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਰਤ੍ਤਿਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਰਤ੍ਤਿਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.
੪. ਉਦਪਾਨਦਾਯਕਤ੍ਥੇਰਅਪਦਾਨਂ
੧੮. ‘‘ਵਿਪਸ੍ਸਿਨੋ ਭਗਵਤੋ, ਉਦਪਾਨੋ ਕਤੋ ਮਯਾ;
ਪਿਣ੍ਡਪਾਤਞ੍ਚ ਦਤ੍ਵਾਨ [ਗਹੇਤ੍ਵਾਨ (ਸ੍ਯਾ.)], ਨਿਯ੍ਯਾਦੇਸਿਮਹਂ ਤਦਾ.
੧੯. ‘‘ਏਕਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਉਦਪਾਨਸ੍ਸਿਦਂ ਫਲਂ.
੨੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਉਦਪਾਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਉਦਪਾਨਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.
੫. ਸੀਹਾਸਨਦਾਯਕਤ੍ਥੇਰਅਪਦਾਨਂ
੨੧. ‘‘ਨਿਬ੍ਬੁਤੇ ਲੋਕਨਾਥਮ੍ਹਿ, ਪਦੁਮੁਤ੍ਤਰਨਾਯਕੇ;
ਪਸਨ੍ਨਚਿਤ੍ਤੋ ਸੁਮਨੋ, ਸੀਹਾਸਨਮਦਾਸਹਂ.
੨੨. ‘‘ਬਹੂਹਿ ਗਨ੍ਧਮਾਲੇਹਿ, ਦਿਟ੍ਠਧਮ੍ਮਸੁਖਾਵਹੇ;
ਤਤ੍ਥ ਪੂਜਞ੍ਚ ਕਤ੍ਵਾਨ, ਨਿਬ੍ਬਾਯਤਿ ਬਹੁਜ੍ਜਨੋ.
੨੩. ‘‘ਪਸਨ੍ਨਚਿਤ੍ਤੋ ਸੁਮਨੋ, ਵਨ੍ਦਿਤ੍ਵਾ ਬੋਧਿਮੁਤ੍ਤਮਂ;
ਕਪ੍ਪਾਨਂ ਸਤਸਹਸ੍ਸਂ, ਦੁਗ੍ਗਤਿਂ ਨੁਪਪਜ੍ਜਹਂ.
੨੪. ‘‘ਪਨ੍ਨਰਸਸਹਸ੍ਸਮ੍ਹਿ, ਕਪ੍ਪਾਨਂ ਅਟ੍ਠ ਆਸੁ ਤੇ [ਅਟ੍ਠ ਆਸਯੁਂ (ਕ.)];
ਸਿਲੁਚ੍ਚਯਸਨਾਮਾ ਚ, ਰਾਜਾਨੋ ਚਕ੍ਕਵਤ੍ਤਿਨੋ.
੨੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸੀਹਾਸਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;
ਸੀਹਾਸਨਦਾਯਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.
੬. ਮਗ੍ਗਦਤ੍ਤਿਕਤ੍ਥੇਰਅਪਦਾਨਂ
੨੬. ‘‘ਅਨੋਮਦਸ੍ਸੀ ਭਗਵਾ, ਦ੍ਵਿਪਦਿਨ੍ਦੋ ਨਰਾਸਭੋ;
ਦਿਟ੍ਠਧਮ੍ਮਸੁਖਤ੍ਥਾਯ, ਅਬ੍ਭੋਕਾਸਮ੍ਹਿ ਚਙ੍ਕਮਿ.
੨੭. ‘‘ਉਦ੍ਧਤੇ ਪਾਦੇ ਪੁਪ੍ਫਾਨਿ, ਸੋਭਂ ਮੁਦ੍ਧਨਿ ਤਿਟ੍ਠਰੇ;
ਪਸਨ੍ਨਚਿਤ੍ਤੋ ਸੁਮਨੋ, ਵਨ੍ਦਿਤ੍ਵਾ ਪੁਪ੍ਫਮੋਕਿਰਿਂ.
੨੮. ‘‘ਵੀਸਕਪ੍ਪਸਹਸ੍ਸਮ੍ਹਿ, ਇਤੋ ਪਞ੍ਚ ਜਨਾ ਅਹੁਂ;
ਪੁਪ੍ਫਚ੍ਛਦਨਿਯਾ ਨਾਮ, ਚਕ੍ਕਵਤ੍ਤੀ ਮਹਬ੍ਬਲਾ.
੨੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਮਗ੍ਗਦਤ੍ਤਿਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਮਗ੍ਗਦਤ੍ਤਿਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.
੭. ਏਕਦੀਪਿਯਤ੍ਥੇਰਅਪਦਾਨਂ
੩੦. ‘‘ਪਦੁਮੁਤ੍ਤਰਸ੍ਸ ਮੁਨਿਨੋ, ਸਲ਼ਲੇ ਬੋਧਿਮੁਤ੍ਤਮੇ;
ਪਸਨ੍ਨਚਿਤ੍ਤੋ ਸੁਮਨੋ, ਏਕਦੀਪਂ ਅਦਾਸਹਂ.
੩੧. ‘‘ਭਵੇ ਨਿਬ੍ਬਤ੍ਤਮਾਨਮ੍ਹਿ, ਨਿਬ੍ਬਤ੍ਤੇ ਪੁਞ੍ਞਸਞ੍ਚਯੇ;
ਦੁਗ੍ਗਤਿਂ ਨਾਭਿਜਾਨਾਮਿ, ਦੀਪਦਾਨਸ੍ਸਿਦਂ ਫਲਂ.
੩੨. ‘‘ਸੋਲ਼ਸੇ ਕਪ੍ਪਸਹਸ੍ਸੇ, ਇਤੋ ਤੇ ਚਤੁਰੋ ਜਨਾ;
ਚਨ੍ਦਾਭਾ ਨਾਮ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲਾ.
੩੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਏਕਦੀਪਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਏਕਦੀਪਿਯਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.
ਨਵਮਂ ਭਾਣਵਾਰਂ.
੮. ਮਣਿਪੂਜਕਤ੍ਥੇਰਅਪਦਾਨਂ
੩੪. ‘‘ਓਰੇਨ ਹਿਮਵਨ੍ਤਸ੍ਸ, ਨਦਿਕਾ ਸਮ੍ਪਵਤ੍ਤਥ;
ਤਸ੍ਸਾ ਚਾਨੁਪਖੇਤ੍ਤਮ੍ਹਿ, ਸਯਮ੍ਭੂ ਵਸਤੇ ਤਦਾ.
੩੫. ‘‘ਮਣਿਂ ਪਗ੍ਗਯ੍ਹ ਪਲ੍ਲਙ੍ਕਂ, ਸਾਧੁਚਿਤ੍ਤਂ ਮਨੋਰਮਂ;
ਪਸਨ੍ਨਚਿਤ੍ਤੋ ਸੁਮਨੋ, ਬੁਦ੍ਧਸ੍ਸ ਅਭਿਰੋਪਯਿਂ.
੩੬. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਮਣਿਂ ਅਭਿਰੋਪਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੩੭. ‘‘ਇਤੋ ਚ ਦ੍ਵਾਦਸੇ ਕਪ੍ਪੇ, ਸਤਰਂਸੀਸਨਾਮਕਾ;
ਅਟ੍ਠ ਤੇ ਆਸੁਂ ਰਾਜਾਨੋ, ਚਕ੍ਕਵਤ੍ਤੀ ਮਹਬ੍ਬਲਾ.
੩੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਮਣਿਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਮਣਿਪੂਜਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.
੯. ਤਿਕਿਚ੍ਛਕਤ੍ਥੇਰਅਪਦਾਨਂ
੩੯. ‘‘ਨਗਰੇ ਬਨ੍ਧੁਮਤਿਯਾ, ਵੇਜ੍ਜੋ ਆਸਿਂ ਸੁਸਿਕ੍ਖਿਤੋ;
ਆਤੁਰਾਨਂ ਸਦੁਕ੍ਖਾਨਂ, ਮਹਾਜਨਸੁਖਾਵਹੋ.
੪੦. ‘‘ਬ੍ਯਾਧਿਤਂ ਸਮਣਂ ਦਿਸ੍ਵਾ, ਸੀਲਵਨ੍ਤਂ ਮਹਾਜੁਤਿਂ;
ਪਸਨ੍ਨਚਿਤ੍ਤੋ ਸੁਮਨੋ, ਭੇਸਜ੍ਜਮਦਦਿਂ ਤਦਾ.
੪੧. ‘‘ਅਰੋਗੋ ਆਸਿ ਤੇਨੇਵ, ਸਮਣੋ ਸਂਵੁਤਿਨ੍ਦ੍ਰਿਯੋ;
ਅਸੋਕੋ ਨਾਮ ਨਾਮੇਨ, ਉਪਟ੍ਠਾਕੋ ਵਿਪਸ੍ਸਿਨੋ.
੪੨. ‘‘ਏਕਨਵੁਤਿਤੋ ਕਪ੍ਪੇ, ਯਂ ਓਸਧਮਦਾਸਹਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਭੇਸਜ੍ਜਸ੍ਸ ਇਦਂ ਫਲਂ.
੪੩. ‘‘ਇਤੋ ਚ ਅਟ੍ਠਮੇ ਕਪ੍ਪੇ, ਸਬ੍ਬੋਸਧਸਨਾਮਕੋ;
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੪੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਤਿਕਿਚ੍ਛਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਤਿਕਿਚ੍ਛਕਤ੍ਥੇਰਸ੍ਸਾਪਦਾਨਂ ਨਵਮਂ.
੧੦. ਸਙ੍ਘੁਪਟ੍ਠਾਕਤ੍ਥੇਰਅਪਦਾਨਂ
੪੫. ‘‘ਵੇਸ੍ਸਭੁਮ੍ਹਿ ਭਗਵਤਿ, ਅਹੋਸਾਰਾਮਿਕੋ ਅਹਂ;
ਪਸਨ੍ਨਚਿਤ੍ਤੋ ਸੁਮਨੋ, ਉਪਟ੍ਠਿਂ ਸਙ੍ਘਮੁਤ੍ਤਮਂ.
੪੬. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਉਪਟ੍ਠਾਨਸ੍ਸਿਦਂ ਫਲਂ.
੪੭. ‘‘ਇਤੋ ਤੇ ਸਤ੍ਤਮੇ ਕਪ੍ਪੇ, ਸਤ੍ਤੇਵਾਸੁਂ ਸਮੋਦਕਾ;
ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.
੪੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸਙ੍ਘੁਪਟ੍ਠਾਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਸਙ੍ਘੁਪਟ੍ਠਾਕਤ੍ਥੇਰਸ੍ਸਾਪਦਾਨਂ ਦਸਮਂ.
ਕੁਮੁਦਵਗ੍ਗੋ ਅਟ੍ਠਾਰਸਮੋ.