੫. ਗਨ੍ਧਮਾਲਿਯਤ੍ਥੇਰਅਪਦਾਨਂ

੨੪. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਗਨ੍ਧਥੂਪਂ ਅਕਾਸਹਂ;

ਸੁਮਨੇਹਿ ਪਟਿਚ੍ਛਨ੍ਨਂ, ਬੁਦ੍ਧਾਨੁਚ੍ਛਵਿਕਂ ਕਤਂ.

੨੫. ‘‘ਕਞ੍ਚਨਗ੍ਘਿਯਸਙ੍ਕਾਸਂ, ਬੁਦ੍ਧਂ ਲੋਕਗ੍ਗਨਾਯਕਂ;

ਇਨ੍ਦੀਵਰਂਵ ਜਲਿਤਂ, ਆਦਿਤ੍ਤਂਵ ਹੁਤਾਸਨਂ.

੨੬. ‘‘ਬ੍ਯਗ੍ਘੂਸਭਂਵ ਪਵਰਂ, ਅਭਿਜਾਤਂਵ ਕੇਸਰਿਂ;

ਨਿਸਿਨ੍ਨਂ ਸਮਣਾਨਗ੍ਗਂ, ਭਿਕ੍ਖੁਸਙ੍ਘਪੁਰਕ੍ਖਤਂ.

੨੭. ‘‘ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਪਕ੍ਕਾਮਿਂ ਉਤ੍ਤਰਾਮੁਖੋ;

ਚਤੁਨ੍ਨਵੁਤਿਤੋ ਕਪ੍ਪੇ, ਗਨ੍ਧਮਾਲਂ ਯਤੋ ਅਦਂ.

੨੮. ‘‘ਬੁਦ੍ਧੇ ਕਤਸ੍ਸ ਕਾਰਸ੍ਸ, ਫਲੇਨਾਹਂ ਵਿਸੇਸਤੋ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੯. ‘‘ਚਤ੍ਤਾਰੀਸਮ੍ਹਿ ਏਕੂਨੇ, ਕਪ੍ਪੇ ਆਸਿਂਸੁ ਸੋਲ਼ਸ;

ਦੇਵਗਨ੍ਧਸਨਾਮਾ ਤੇ, ਰਾਜਾਨੋ ਚਕ੍ਕਵਤ੍ਤਿਨੋ.

੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਗਨ੍ਧਮਾਲਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਗਨ੍ਧਮਾਲਿਯਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.