੬. ਤਿਪੁਪ੍ਫਿਯਤ੍ਥੇਰਅਪਦਾਨਂ

੩੧. ‘‘ਮਿਗਲੁਦ੍ਦੋ ਪੁਰੇ ਆਸਿਂ, ਅਰਞ੍ਞੇ ਕਾਨਨੇ ਅਹਂ [ਬ੍ਰਹਾ (ਸ੍ਯਾ.)];

ਪਾਟਲਿਂ ਹਰਿਤਂ ਦਿਸ੍ਵਾ, ਤੀਣਿ ਪੁਪ੍ਫਾਨਿ ਓਕਿਰਿਂ.

੩੨. ‘‘ਪਤਿਤਪਤ੍ਤਾਨਿ [ਸਤ੍ਤਪਤ੍ਤਾਨਿ (ਸੀ.), ਸਤਪਤ੍ਤਾਨਿ (ਕ.), ਸੁਕ੍ਖਪਣ੍ਣਾਨਿ (ਸ੍ਯਾ.)] ਗਣ੍ਹਿਤ੍ਵਾ, ਬਹਿ ਛਡ੍ਡੇਸਹਂ ਤਦਾ;

ਅਨ੍ਤੋਸੁਦ੍ਧਂ ਬਹਿਸੁਦ੍ਧਂ, ਸੁਵਿਮੁਤ੍ਤਂ ਅਨਾਸਵਂ.

੩੩. ‘‘ਸਮ੍ਮੁਖਾ ਵਿਯ ਸਮ੍ਬੁਦ੍ਧਂ, ਵਿਪਸ੍ਸਿਂ ਲੋਕਨਾਯਕਂ;

ਪਾਟਲਿਂ ਅਭਿਵਾਦੇਤ੍ਵਾ, ਤਤ੍ਥ ਕਾਲਙ੍ਕਤੋ ਅਹਂ.

੩੪. ‘‘ਏਕਨਵੁਤਿਤੋ ਕਪ੍ਪੇ, ਯਂ ਬੋਧਿਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੋਧਿਪੂਜਾਯਿਦਂ ਫਲਂ.

੩੫. ‘‘ਸਮਨ੍ਤਪਾਸਾਦਿਕਾ ਨਾਮ, ਤੇਰਸਾਸਿਂਸੁ ਰਾਜਿਨੋ;

ਇਤੋ ਤੇਤ੍ਤਿਂਸਕਪ੍ਪਮ੍ਹਿ [ਤਿਂਸਤਿਕਪ੍ਪਮ੍ਹਿ (ਸ੍ਯਾ.)], ਚਕ੍ਕਵਤ੍ਤੀ ਮਹਬ੍ਬਲਾ.

੩੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਛਟ੍ਠਂ.