(੩੦) ਸੀਹਹਨੁਲਕ੍ਖਣਂ

੨੩੮. ‘‘ਯਮ੍ਪਿ, ਭਿਕ੍ਖਵੇ, ਤਥਾਗਤੋ ਪੁਰਿਮਂ ਜਾਤਿਂ ਪੁਰਿਮਂ ਭਵਂ ਪੁਰਿਮਂ ਨਿਕੇਤਂ ਪੁਬ੍ਬੇ ਮਨੁਸ੍ਸਭੂਤੋ ਸਮਾਨੋ ਸਮ੍ਫਪ੍ਪਲਾਪਂ ਪਹਾਯ ਸਮ੍ਫਪ੍ਪਲਾਪਾ ਪਟਿਵਿਰਤੋ ਅਹੋਸਿ ਕਾਲਵਾਦੀ ਭੂਤਵਾਦੀ ਅਤ੍ਥਵਾਦੀ ਧਮ੍ਮਵਾਦੀ ਵਿਨਯਵਾਦੀ, ਨਿਧਾਨਵਤਿਂ ਵਾਚਂ ਭਾਸਿਤਾ ਅਹੋਸਿ ਕਾਲੇਨ ਸਾਪਦੇਸਂ ਪਰਿਯਨ੍ਤਵਤਿਂ ਅਤ੍ਥਸਂਹਿਤਂ. ਸੋ ਤਸ੍ਸ ਕਮ੍ਮਸ੍ਸ ਕਟਤ੍ਤਾ…ਪੇ… ਸੋ ਤਤੋ ਚੁਤੋ ਇਤ੍ਥਤ੍ਤਂ ਆਗਤੋ ਸਮਾਨੋ ਇਮਂ ਮਹਾਪੁਰਿਸਲਕ੍ਖਣਂ ਪਟਿਲਭਤਿ, ਸੀਹਹਨੁ ਹੋਤਿ.

‘‘ਸੋ ਤੇਨ ਲਕ੍ਖਣੇਨ ਸਮਨ੍ਨਾਗਤੋ ਸਚੇ ਅਗਾਰਂ ਅਜ੍ਝਾਵਸਤਿ, ਰਾਜਾ ਹੋਤਿ ਚਕ੍ਕਵਤ੍ਤੀ…ਪੇ… ਰਾਜਾ ਸਮਾਨੋ ਕਿਂ ਲਭਤਿ? ਅਪ੍ਪਧਂਸਿਯੋ ਹੋਤਿ ਕੇਨਚਿ ਮਨੁਸ੍ਸਭੂਤੇਨ ਪਚ੍ਚਤ੍ਥਿਕੇਨ ਪਚ੍ਚਾਮਿਤ੍ਤੇਨ. ਰਾਜਾ ਸਮਾਨੋ ਇਦਂ ਲਭਤਿ… ਬੁਦ੍ਧੋ ਸਮਾਨੋ ਕਿਂ ਲਭਤਿ? ਅਪ੍ਪਧਂਸਿਯੋ ਹੋਤਿ ਅਬ੍ਭਨ੍ਤਰੇਹਿ ਵਾ ਬਾਹਿਰੇਹਿ ਵਾ ਪਚ੍ਚਤ੍ਥਿਕੇਹਿ ਪਚ੍ਚਾਮਿਤ੍ਤੇਹਿ, ਰਾਗੇਨ ਵਾ ਦੋਸੇਨ ਵਾ ਮੋਹੇਨ ਵਾ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੇਨਚਿ ਵਾ ਲੋਕਸ੍ਮਿਂ. ਬੁਦ੍ਧੋ ਸਮਾਨੋ ਇਦਂ ਲਭਤਿ’’. ਏਤਮਤ੍ਥਂ ਭਗਵਾ ਅਵੋਚ.

੨੩੯. ਤਤ੍ਥੇਤਂ ਵੁਚ੍ਚਤਿ –

‘‘ਨ ਸਮ੍ਫਪ੍ਪਲਾਪਂ ਨ ਮੁਦ੍ਧਤਂ [ਬੁਦ੍ਧਤਨ੍ਤਿ (ਕ.)],

ਅਵਿਕਿਣ੍ਣਵਚਨਬ੍ਯਪ੍ਪਥੋ ਅਹੋਸਿ;

ਅਹਿਤਮਪਿ ਚ ਅਪਨੁਦਿ,

ਹਿਤਮਪਿ ਚ ਬਹੁਜਨਸੁਖਞ੍ਚ ਅਭਣਿ.

‘‘ਤਂ ਕਤ੍ਵਾ ਇਤੋ ਚੁਤੋ ਦਿਵਮੁਪਪਜ੍ਜਿ,

ਸੁਕਤਫਲਵਿਪਾਕਮਨੁਭੋਸਿ;

ਚਵਿਯ ਪੁਨਰਿਧਾਗਤੋ ਸਮਾਨੋ,

ਦ੍ਵਿਦੁਗਮਵਰਤਰਹਨੁਤ੍ਤਮਲਤ੍ਥ.

‘‘ਰਾਜਾ ਹੋਤਿ ਸੁਦੁਪ੍ਪਧਂਸਿਯੋ,

ਮਨੁਜਿਨ੍ਦੋ ਮਨੁਜਾਧਿਪਤਿ ਮਹਾਨੁਭਾਵੋ;

ਤਿਦਿਵਪੁਰਵਰਸਮੋ ਭਵਤਿ,

ਸੁਰਵਰਤਰੋਰਿਵ ਇਨ੍ਦੋ.

‘‘ਗਨ੍ਧਬ੍ਬਾਸੁਰਯਕ੍ਖਰਕ੍ਖਸੇਭਿ [ਸੁਰਸਕ੍ਕਰਕ੍ਖਸੇਭਿ (ਸ੍ਯਾ.)],

ਸੁਰੇਹਿ ਨ ਹਿ ਭਵਤਿ ਸੁਪ੍ਪਧਂਸਿਯੋ;

ਤਥਤ੍ਤੋ ਯਦਿ ਭਵਤਿ ਤਥਾਵਿਧੋ,

ਇਧ ਦਿਸਾ ਚ ਪਟਿਦਿਸਾ ਚ ਵਿਦਿਸਾ ਚਾ’’ਤਿ.