(੩੧-੩੨) ਸਮਦਨ੍ਤਸੁਸੁਕ੍ਕਦਾਠਾਲਕ੍ਖਣਾਨਿ

੨੪੦. ‘‘ਯਮ੍ਪਿ, ਭਿਕ੍ਖਵੇ, ਤਥਾਗਤੋ ਪੁਰਿਮਂ ਜਾਤਿਂ ਪੁਰਿਮਂ ਭਵਂ ਪੁਰਿਮਂ ਨਿਕੇਤਂ ਪੁਬ੍ਬੇ ਮਨੁਸ੍ਸਭੂਤੋ ਸਮਾਨੋ ਮਿਚ੍ਛਾਜੀਵਂ ਪਹਾਯ ਸਮ੍ਮਾਆਜੀਵੇਨ ਜੀਵਿਕਂ ਕਪ੍ਪੇਸਿ, ਤੁਲਾਕੂਟ ਕਂਸਕੂਟ ਮਾਨਕੂਟ ਉਕ੍ਕੋਟਨ ਵਞ੍ਚਨ ਨਿਕਤਿ ਸਾਚਿਯੋਗ ਛੇਦਨ ਵਧ ਬਨ੍ਧਨ ਵਿਪਰਾਮੋਸ ਆਲੋਪ ਸਹਸਾਕਾਰਾ [ਸਾਹਸਾਕਾਰਾ (ਸੀ. ਸ੍ਯਾ. ਪੀ.)] ਪਟਿਵਿਰਤੋ ਅਹੋਸਿ. ਸੋ ਤਸ੍ਸ ਕਮ੍ਮਸ੍ਸ ਕਟਤ੍ਤਾ ਉਪਚਿਤਤ੍ਤਾ ਉਸ੍ਸਨ੍ਨਤ੍ਤਾ ਵਿਪੁਲਤ੍ਤਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ. ਸੋ ਤਤ੍ਥ ਅਞ੍ਞੇ ਦੇਵੇ ਦਸਹਿ ਠਾਨੇਹਿ ਅਧਿਗਣ੍ਹਾਤਿ ਦਿਬ੍ਬੇਨ ਆਯੁਨਾ ਦਿਬ੍ਬੇਨ ਵਣ੍ਣੇਨ ਦਿਬ੍ਬੇਨ ਸੁਖੇਨ ਦਿਬ੍ਬੇਨ ਯਸੇਨ ਦਿਬ੍ਬੇਨ ਆਧਿਪਤੇਯ੍ਯੇਨ ਦਿਬ੍ਬੇਹਿ ਰੂਪੇਹਿ ਦਿਬ੍ਬੇਹਿ ਸਦ੍ਦੇਹਿ ਦਿਬ੍ਬੇਹਿ ਗਨ੍ਧੇਹਿ ਦਿਬ੍ਬੇਹਿ ਰਸੇਹਿ ਦਿਬ੍ਬੇਹਿ ਫੋਟ੍ਠਬ੍ਬੇਹਿ. ਸੋ ਤਤੋ ਚੁਤੋ ਇਤ੍ਥਤ੍ਤਂ ਆਗਤੋ ਸਮਾਨੋ ਇਮਾਨਿ ਦ੍ਵੇ ਮਹਾਪੁਰਿਸਲਕ੍ਖਣਾਨਿ ਪਟਿਲਭਤਿ, ਸਮਦਨ੍ਤੋ ਚ ਹੋਤਿ ਸੁਸੁਕ੍ਕਦਾਠੋ ਚ.

‘‘ਸੋ ਤੇਹਿ ਲਕ੍ਖਣੇਹਿ ਸਮਨ੍ਨਾਗਤੋ ਸਚੇ ਅਗਾਰਂ ਅਜ੍ਝਾਵਸਤਿ, ਰਾਜਾ ਹੋਤਿ ਚਕ੍ਕਵਤ੍ਤੀ ਧਮ੍ਮਿਕੋ ਧਮ੍ਮਰਾਜਾ ਚਾਤੁਰਨ੍ਤੋ ਵਿਜਿਤਾਵੀ ਜਨਪਦਤ੍ਥਾਵਰਿਯਪ੍ਪਤ੍ਤੋ ਸਤ੍ਤਰਤਨਸਮਨ੍ਨਾਗਤੋ. ਤਸ੍ਸਿਮਾਨਿ ਸਤ੍ਤ ਰਤਨਾਨਿ ਭਵਨ੍ਤਿ, ਸੇਯ੍ਯਥਿਦਂ – ਚਕ੍ਕਰਤਨਂ ਹਤ੍ਥਿਰਤਨਂ ਅਸ੍ਸਰਤਨਂ ਮਣਿਰਤਨਂ ਇਤ੍ਥਿਰਤਨਂ ਗਹਪਤਿਰਤਨਂ ਪਰਿਣਾਯਕਰਤਨਮੇਵ ਸਤ੍ਤਮਂ. ਪਰੋਸਹਸ੍ਸਂ ਖੋ ਪਨਸ੍ਸ ਪੁਤ੍ਤਾ ਭਵਨ੍ਤਿ ਸੂਰਾ ਵੀਰਙ੍ਗਰੂਪਾ ਪਰਸੇਨਪ੍ਪਮਦ੍ਦਨਾ. ਸੋ ਇਮਂ ਪਥਵਿਂ ਸਾਗਰਪਰਿਯਨ੍ਤਂ ਅਖਿਲਮਨਿਮਿਤ੍ਤਮਕਣ੍ਟਕਂ ਇਦ੍ਧਂ ਫੀਤਂ ਖੇਮਂ ਸਿਵਂ ਨਿਰਬ੍ਬੁਦਂ ਅਦਣ੍ਡੇਨ ਅਸਤ੍ਥੇਨ ਧਮ੍ਮੇਨ ਅਭਿਵਿਜਿਯ ਅਜ੍ਝਾਵਸਤਿ. ਰਾਜਾ ਸਮਾਨੋ ਕਿਂ ਲਭਤਿ? ਸੁਚਿਪਰਿਵਾਰੋ ਹੋਤਿ ਸੁਚਿਸ੍ਸ ਹੋਨ੍ਤਿ ਪਰਿਵਾਰਾ ਬ੍ਰਾਹ੍ਮਣਗਹਪਤਿਕਾ ਨੇਗਮਜਾਨਪਦਾ ਗਣਕਮਹਾਮਤ੍ਤਾ ਅਨੀਕਟ੍ਠਾ ਦੋਵਾਰਿਕਾ ਅਮਚ੍ਚਾ ਪਾਰਿਸਜ੍ਜਾ ਰਾਜਾਨੋ ਭੋਗਿਯਾ ਕੁਮਾਰਾ. ਰਾਜਾ ਸਮਾਨੋ ਇਦਂ ਲਭਤਿ.

‘‘ਸਚੇ ਖੋ ਪਨ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਤਿ, ਅਰਹਂ ਹੋਤਿ ਸਮ੍ਮਾਸਮ੍ਬੁਦ੍ਧੋ ਲੋਕੇ ਵਿਵਟ੍ਟਚ੍ਛਦੋ. ਬੁਦ੍ਧੋ ਸਮਾਨੋ ਕਿਂ ਲਭਤਿ? ਸੁਚਿਪਰਿਵਾਰੋ ਹੋਤਿ, ਸੁਚਿਸ੍ਸ ਹੋਨ੍ਤਿ ਪਰਿਵਾਰਾ, ਭਿਕ੍ਖੂ ਭਿਕ੍ਖੁਨਿਯੋ ਉਪਾਸਕਾ ਉਪਾਸਿਕਾਯੋ ਦੇਵਾ ਮਨੁਸ੍ਸਾ ਅਸੁਰਾ ਨਾਗਾ ਗਨ੍ਧਬ੍ਬਾ. ਬੁਦ੍ਧੋ ਸਮਾਨੋ ਇਦਂ ਲਭਤਿ’’. ਏਤਮਤ੍ਥਂ ਭਗਵਾ ਅਵੋਚ.

੨੪੧. ਤਤ੍ਥੇਤਂ ਵੁਚ੍ਚਤਿ –

‘‘ਮਿਚ੍ਛਾਜੀਵਞ੍ਚ ਅਵਸ੍ਸਜਿ ਸਮੇਨ ਵੁਤ੍ਤਿਂ,

ਸੁਚਿਨਾ ਸੋ ਜਨਯਿਤ੍ਥ ਧਮ੍ਮਿਕੇਨ;

ਅਹਿਤਮਪਿ ਚ ਅਪਨੁਦਿ,

ਹਿਤਮਪਿ ਚ ਬਹੁਜਨਸੁਖਞ੍ਚ ਅਚਰਿ.

‘‘ਸਗ੍ਗੇ ਵੇਦਯਤਿ ਨਰੋ ਸੁਖਪ੍ਫਲਾਨਿ,

ਕਰਿਤ੍ਵਾ ਨਿਪੁਣੇਭਿ ਵਿਦੂਹਿ ਸਬ੍ਭਿ;

ਵਣ੍ਣਿਤਾਨਿ ਤਿਦਿਵਪੁਰਵਰਸਮੋ,

ਅਭਿਰਮਤਿ ਰਤਿਖਿਡ੍ਡਾਸਮਙ੍ਗੀ.

‘‘ਲਦ੍ਧਾਨਂ ਮਾਨੁਸਕਂ ਭਵਂ ਤਤੋ,

ਚਵਿਤ੍ਵਾਨ ਸੁਕਤਫਲਵਿਪਾਕਂ;

ਸੇਸਕੇਨ ਪਟਿਲਭਤਿ ਲਪਨਜਂ,

ਸਮਮਪਿ ਸੁਚਿਸੁਸੁਕ੍ਕਂ [ਲਦ੍ਧਾਨ ਮਨੁਸ੍ਸਕਂ ਭਵਂ ਤਤੋ ਚਵਿਯ, ਪੁਨ ਸੁਕਤਫਲਵਿਪਾਕਸੇਸਕੇਨ; ਪਟਿਲਭਤਿ ਲਪਨਜਂ ਸਮਮਪਿ, ਸੁਚਿ ਚ ਸੁਵਿਸੁਦ੍ਧਸੁਸੁਕ੍ਕਂ (ਸ੍ਯਾ.)].

‘‘ਤਂ ਵੇਯ੍ਯਞ੍ਜਨਿਕਾ ਸਮਾਗਤਾ ਬਹਵੋ,

ਬ੍ਯਾਕਂਸੁ ਨਿਪੁਣਸਮ੍ਮਤਾ ਮਨੁਜਾ;

ਸੁਚਿਜਨਪਰਿਵਾਰਗਣੋ ਭਵਤਿ,

ਦਿਜਸਮਸੁਕ੍ਕਸੁਚਿਸੋਭਨਦਨ੍ਤੋ.

‘‘ਰਞ੍ਞੋ ਹੋਤਿ ਬਹੁਜਨੋ,

ਸੁਚਿਪਰਿਵਾਰੋ ਮਹਤਿਂ ਮਹਿਂ ਅਨੁਸਾਸਤੋ;

ਪਸਯ੍ਹ ਨ ਚ ਜਨਪਦਤੁਦਨਂ,

ਹਿਤਮਪਿ ਚ ਬਹੁਜਨਸੁਖਞ੍ਚ ਚਰਨ੍ਤਿ.

‘‘ਅਥ ਚੇ ਪਬ੍ਬਜਤਿ ਭਵਤਿ ਵਿਪਾਪੋ,

ਸਮਣੋ ਸਮਿਤਰਜੋ ਵਿਵਟ੍ਟਚ੍ਛਦੋ;

ਵਿਗਤਦਰਥਕਿਲਮਥੋ,

ਇਮਮਪਿ ਚ ਪਰਮਪਿ ਚ [ਇਮਮ੍ਪਿ ਚ ਪਰਮ੍ਪਿ ਚ (ਪੀ.), ਪਰਂਪਿ ਪਰਮਂਪਿ ਚ (ਸ੍ਯਾ.)] ਪਸ੍ਸਤਿ ਲੋਕਂ.

‘‘ਤਸ੍ਸੋਵਾਦਕਰਾ ਬਹੁਗਿਹੀ ਚ ਪਬ੍ਬਜਿਤਾ ਚ,

ਅਸੁਚਿਂ ਗਰਹਿਤਂ ਧੁਨਨ੍ਤਿ ਪਾਪਂ;

ਸ ਹਿ ਸੁਚਿਭਿ ਪਰਿਵੁਤੋ ਭਵਤਿ,

ਮਲਖਿਲਕਲਿਕਿਲੇਸੇ ਪਨੁਦੇਹੀ’’ਤਿ [ਤਸ੍ਸੋਵਾਦਕਰਾ ਬਹੁਗਿਹੀ ਚ, ਪਬ੍ਬਜਿਤਾ ਚ ਅਸੁਚਿਵਿਗਰਹਿਤ; ਪਨੁਦਿਪਾਪਸ੍ਸ ਹਿ ਸੁਚਿਭਿਪਰਿਵੁਤੋ, ਭਵਤਿ ਮਲਖਿਲਕਕਿਲੇਸੇ ਪਨੁਦੇਤਿ (ਸ੍ਯਾ.)].

ਇਦਮਵੋਚ ਭਗਵਾ. ਅਤ੍ਤਮਨਾ ਤੇ ਭਿਕ੍ਖੂ ਭਗਵਤੋ ਭਾਸਿਤਂ ਅਭਿਨਨ੍ਦੁਨ੍ਤਿ.

ਲਕ੍ਖਣਸੁਤ੍ਤਂ ਨਿਟ੍ਠਿਤਂ ਸਤ੍ਤਮਂ.