(੨੪-੨੫) ਏਕੇਕਲੋਮਤਾਉਣ੍ਣਾਲਕ੍ਖਣਾਨਿ

੨੩੨. ‘‘ਯਮ੍ਪਿ, ਭਿਕ੍ਖਵੇ, ਤਥਾਗਤੋ ਪੁਰਿਮਂ ਜਾਤਿਂ ਪੁਰਿਮਂ ਭਵਂ ਪੁਰਿਮਂ ਨਿਕੇਤਂ ਪੁਬ੍ਬੇ ਮਨੁਸ੍ਸਭੂਤੋ ਸਮਾਨੋ ਮੁਸਾਵਾਦਂ ਪਹਾਯ ਮੁਸਾਵਾਦਾ ਪਟਿਵਿਰਤੋ ਅਹੋਸਿ, ਸਚ੍ਚਵਾਦੀ ਸਚ੍ਚਸਨ੍ਧੋ ਥੇਤੋ ਪਚ੍ਚਯਿਕੋ ਅਵਿਸਂਵਾਦਕੋ ਲੋਕਸ੍ਸ. ਸੋ ਤਸ੍ਸ ਕਮ੍ਮਸ੍ਸ ਕਟਤ੍ਤਾ ਉਪਚਿਤਤ੍ਤਾ…ਪੇ… ਸੋ ਤਤੋ ਚੁਤੋ ਇਤ੍ਥਤ੍ਤਂ ਆਗਤੋ ਸਮਾਨੋ ਇਮਾਨਿ ਦ੍ਵੇ ਮਹਾਪੁਰਿਸਲਕ੍ਖਣਾਨਿ ਪਟਿਲਭਤਿ. ਏਕੇਕਲੋਮੋ ਚ ਹੋਤਿ, ਉਣ੍ਣਾ ਚ ਭਮੁਕਨ੍ਤਰੇ ਜਾਤਾ ਹੋਤਿ ਓਦਾਤਾ ਮੁਦੁਤੂਲਸਨ੍ਨਿਭਾ.

‘‘ਸੋ ਤੇਹਿ ਲਕ੍ਖਣੇਹਿ ਸਮਨ੍ਨਾਗਤੋ, ਸਚੇ ਅਗਾਰਂ ਅਜ੍ਝਾਵਸਤਿ, ਰਾਜਾ ਹੋਤਿ ਚਕ੍ਕਵਤ੍ਤੀ…ਪੇ… ਰਾਜਾ ਸਮਾਨੋ ਕਿਂ ਲਭਤਿ? ਮਹਾਸ੍ਸ ਜਨੋ ਉਪਵਤ੍ਤਤਿ, ਬ੍ਰਾਹ੍ਮਣਗਹਪਤਿਕਾ ਨੇਗਮਜਾਨਪਦਾ ਗਣਕਮਹਾਮਤ੍ਤਾ ਅਨੀਕਟ੍ਠਾ ਦੋਵਾਰਿਕਾ ਅਮਚ੍ਚਾ ਪਾਰਿਸਜ੍ਜਾ ਰਾਜਾਨੋ ਭੋਗਿਯਾ ਕੁਮਾਰਾ. ਰਾਜਾ ਸਮਾਨੋ ਇਦਂ ਲਭਤਿ… ਬੁਦ੍ਧੋ ਸਮਾਨੋ ਕਿਂ ਲਭਤਿ? ਮਹਾਸ੍ਸ ਜਨੋ ਉਪਵਤ੍ਤਤਿ, ਭਿਕ੍ਖੂ ਭਿਕ੍ਖੁਨਿਯੋ ਉਪਾਸਕਾ ਉਪਾਸਿਕਾਯੋ ਦੇਵਾ ਮਨੁਸ੍ਸਾ ਅਸੁਰਾ ਨਾਗਾ ਗਨ੍ਧਬ੍ਬਾ. ਬੁਦ੍ਧੋ ਸਮਾਨੋ ਇਦਂ ਲਭਤਿ’’. ਏਤਮਤ੍ਥਂ ਭਗਵਾ ਅਵੋਚ.

੨੩੩. ਤਤ੍ਥੇਤਂ ਵੁਚ੍ਚਤਿ –

‘‘ਸਚ੍ਚਪ੍ਪਟਿਞ੍ਞੋ ਪੁਰਿਮਾਸੁ ਜਾਤਿਸੁ,

ਅਦ੍ਵੇਜ੍ਝਵਾਚੋ ਅਲਿਕਂ ਵਿਵਜ੍ਜਯਿ;

ਨ ਸੋ ਵਿਸਂਵਾਦਯਿਤਾਪਿ ਕਸ੍ਸਚਿ,

ਭੂਤੇਨ ਤਚ੍ਛੇਨ ਤਥੇਨ ਭਾਸਯਿ [ਤੋਸਯਿ (ਸੀ. ਪੀ.)].

‘‘ਸੇਤਾ ਸੁਸੁਕ੍ਕਾ ਮੁਦੁਤੂਲਸਨ੍ਨਿਭਾ,

ਉਣ੍ਣਾ ਸੁਜਾਤਾ [ਉਣ੍ਣਾਸ੍ਸ ਜਾਤਾ (ਕ. ਸੀ.)] ਭਮੁਕਨ੍ਤਰੇ ਅਹੁ;

ਨ ਲੋਮਕੂਪੇਸੁ ਦੁਵੇ ਅਜਾਯਿਸੁਂ,

ਏਕੇਕਲੋਮੂਪਚਿਤਙ੍ਗਵਾ ਅਹੁ.

‘‘ਤਂ ਲਕ੍ਖਣਞ੍ਞੂ ਬਹਵੋ ਸਮਾਗਤਾ,

ਬ੍ਯਾਕਂਸੁ ਉਪ੍ਪਾਦਨਿਮਿਤ੍ਤਕੋਵਿਦਾ;

ਉਣ੍ਣਾ ਚ ਲੋਮਾ ਚ ਯਥਾ ਸੁਸਣ੍ਠਿਤਾ,

ਉਪਵਤ੍ਤਤੀ ਈਦਿਸਕਂ ਬਹੁਜ੍ਜਨੋ.

‘‘ਗਿਹਿਮ੍ਪਿ ਸਨ੍ਤਂ ਉਪਵਤ੍ਤਤੀ ਜਨੋ,

ਬਹੁ ਪੁਰਤ੍ਥਾਪਕਤੇਨ ਕਮ੍ਮੁਨਾ;

ਅਕਿਞ੍ਚਨਂ ਪਬ੍ਬਜਿਤਂ ਅਨੁਤ੍ਤਰਂ,

ਬੁਦ੍ਧਮ੍ਪਿ ਸਨ੍ਤਂ ਉਪਵਤ੍ਤਤਿ ਜਨੋ’’ਤਿ.