੧੦. ਰਾਜਸਿਕ੍ਖਾਪਦਵਣ੍ਣਨਾ

੫੩੭. ਤੇਨ ਸਮਯੇਨਾਤਿ ਰਾਜਸਿਕ੍ਖਾਪਦਂ. ਤਤ੍ਥ ਉਪਾਸਕਂ ਸਞ੍ਞਾਪੇਤ੍ਵਾਤਿ ਜਾਨਾਪੇਤ੍ਵਾ, ‘‘ਇਮਿਨਾ ਮੂਲੇਨ ਚੀਵਰਂ ਕਿਣਿਤ੍ਵਾ ਥੇਰਸ੍ਸ ਦੇਹੀ’’ਤਿ ਏਵਂ ਵਤ੍ਵਾਤਿ ਅਧਿਪ੍ਪਾਯੋ. ਪਞ੍ਞਾਸਬਨ੍ਧੋਤਿ ਪਞ੍ਞਾਸਕਹਾਪਣਦਣ੍ਡੋਤਿ ਵੁਤ੍ਤਂ ਹੋਤਿ. ਪਞ੍ਞਾਸਂ ਬਦ੍ਧੋਤਿਪਿ ਪਾਠੋ, ਪਞ੍ਞਾਸਂ ਜਿਤੋ ਪਞ੍ਞਾਸਂ ਦਾਪੇਤਬ੍ਬੋਤਿ ਅਧਿਪ੍ਪਾਯੋ. ਅਜ੍ਜਣ੍ਹੋ, ਭਨ੍ਤੇ, ਆਗਮੇਹੀਤਿ ਭਨ੍ਤੇ, ਅਜ੍ਜ ਏਕਦਿਵਸਂ ਅਮ੍ਹਾਕਂ ਤਿਟ੍ਠ, ਅਧਿਵਾਸੇਹੀਤਿ ਅਤ੍ਥੋ. ਪਰਾਮਸੀਤਿ ਗਣ੍ਹਿ. ਜੀਨੋਸੀਤਿ ਜਿਤੋਸਿ.

੫੩੮-੯. ਰਾਜਭੋਗ੍ਗੋਤਿ ਰਾਜਤੋ ਭੋਗ੍ਗਂ ਭੁਞ੍ਜਿਤਬ੍ਬਂ ਅਸ੍ਸਤ੍ਥੀਤਿ ਰਾਜਭੋਗ੍ਗੋ, ਰਾਜਭੋਗੋਤਿਪਿ ਪਾਠੋ, ਰਾਜਤੋ ਭੋਗੋ ਅਸ੍ਸ ਅਤ੍ਥੀਤਿ ਅਤ੍ਥੋ.

ਪਹਿਣੇਯ੍ਯਾਤਿ ਪੇਸੇਯ੍ਯ, ਉਤ੍ਤਾਨਤ੍ਥਤ੍ਤਾ ਪਨਸ੍ਸ ਪਦਭਾਜਨਂ ਨ ਵੁਤ੍ਤਂ. ਯਥਾ ਚ ਏਤਸ੍ਸ, ਏਵਂ ‘‘ਚੀਵਰਂ ਇਤ੍ਥਨ੍ਨਾਮਂ ਭਿਕ੍ਖੁ’’ਨ੍ਤਿਆਦੀਨਮ੍ਪਿ ਪਦਾਨਂ ਉਤ੍ਤਾਨਤ੍ਥਤ੍ਤਾਯੇਵ ਪਦਭਾਜਨਂ ਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਆਭਤਨ੍ਤਿ ਆਨੀਤਂ. ਕਾਲੇਨਕਪ੍ਪਿਯਨ੍ਤਿ ਯੁਤ੍ਤਪਤ੍ਤਕਾਲੇਨ, ਯਦਾ ਨੋ ਅਤ੍ਥੋ ਹੋਤਿ, ਤਦਾ ਕਪ੍ਪਿਯਂ ਚੀਵਰਂ ਗਣ੍ਹਾਮਾਤਿ ਅਤ੍ਥੋ.

ਵੇਯ੍ਯਾਵਚ੍ਚਕਰੋਤਿ ਕਿਚ੍ਚਕਰੋ, ਕਪ੍ਪਿਯਕਾਰਕੋਤਿ ਅਤ੍ਥੋ. ਸਞ੍ਞਤ੍ਤੋ ਸੋ ਮਯਾਤਿ ਆਣਤ੍ਤੋ ਸੋ ਮਯਾ, ਯਥਾ ਤੁਮ੍ਹਾਕਂ ਚੀਵਰੇਨ ਅਤ੍ਥੇ ਸਤਿ ਚੀਵਰਂ ਦਸ੍ਸਤਿ, ਏਵਂ ਵੁਤ੍ਤੋਤਿ ਅਤ੍ਥੋ. ਅਤ੍ਥੋ ਮੇ ਆਵੁਸੋ ਚੀਵਰੇਨਾਤਿ ਚੋਦਨਾਲਕ੍ਖਣਨਿਦਸ੍ਸਨਮੇਤਂ, ਇਦਞ੍ਹਿ ਵਚਨਂ ਵਤ੍ਤਬ੍ਬਂ, ਅਸ੍ਸ ਵਾ ਅਤ੍ਥੋ ਯਾਯ ਕਾਯਚਿ ਭਾਸਾਯ; ਇਦਂ ਚੋਦਨਾਲਕ੍ਖਣਂ. ‘‘ਦੇਹਿ ਮੇ ਚੀਵਰ’’ਨ੍ਤਿਆਦੀਨਿ ਪਨ ਨਵਤ੍ਤਬ੍ਬਾਕਾਰਦਸ੍ਸਨਤ੍ਥਂ ਵੁਤ੍ਤਾਨਿ, ਏਤਾਨਿ ਹਿ ਵਚਨਾਨਿ ਏਤੇਸਂ ਵਾ ਅਤ੍ਥੋ ਯਾਯ ਕਾਯਚਿ ਭਾਸਾਯ ਨ ਵਤ੍ਤਬ੍ਬੋ.

ਦੁਤਿਯਮ੍ਪਿ ਵਤ੍ਤਬ੍ਬੋ ਤਤਿਯਮ੍ਪਿ ਵਤ੍ਤਬ੍ਬੋਤਿ ‘‘ਅਤ੍ਥੋ ਮੇ ਆਵੁਸੋ ਚੀਵਰੇਨਾ’’ਤਿ ਇਦਮੇਵ ਯਾਵਤਤਿਯਂ ਵਤ੍ਤਬ੍ਬੋਤਿ. ਏਵਂ ‘‘ਦ੍ਵਤ੍ਤਿਕ੍ਖਤ੍ਤੁਂ ਚੋਦੇਤਬ੍ਬੋ ਸਾਰੇਤਬ੍ਬੋ’’ਤਿ ਏਤ੍ਥ ਉਦ੍ਦਿਟ੍ਠਚੋਦਨਾਪਰਿਚ੍ਛੇਦਂ ਦਸ੍ਸੇਤ੍ਵਾ ਇਦਾਨਿ ‘‘ਦ੍ਵਤ੍ਤਿਕ੍ਖਤ੍ਤੁਂ ਚੋਦਯਮਾਨੋ ਸਾਰਯਮਾਨੋ ਤਂ ਚੀਵਰਂ ਅਭਿਨਿਪ੍ਫਾਦੇਯ੍ਯ, ਇਚ੍ਚੇਤਂ ਕੁਸਲ’’ਨ੍ਤਿ ਇਮੇਸਂ ਪਦਾਨਂ ਸਙ੍ਖੇਪਤੋ ਅਤ੍ਥਂ ਦਸ੍ਸੇਨ੍ਤੋ ‘‘ਸਚੇ ਅਭਿਨਿਪ੍ਫਾਦੇਤਿ, ਇਚ੍ਚੇਤਂ ਕੁਸਲ’’ਨ੍ਤਿ ਆਹ. ਏਵਂ ਯਾਵਤਤਿਯਂ ਚੋਦੇਨ੍ਤੋ ਤਂ ਚੀਵਰਂ ਯਦਿ ਨਿਪ੍ਫਾਦੇਤਿ, ਸਕ੍ਕੋਤਿ ਅਤ੍ਤਨੋ ਪਟਿਲਾਭਵਸੇਨ ਨਿਪ੍ਫਾਦੇਤੁਂ, ਇਚ੍ਚੇਤਂ ਕੁਸਲਂ ਸਾਧੁ ਸੁਟ੍ਠੁ ਸੁਨ੍ਦਰਂ.

ਚਤੁਕ੍ਖਤ੍ਤੁਂ ਪਞ੍ਚਕ੍ਖਤ੍ਤੁਂ ਛਕ੍ਖਤ੍ਤੁਪਰਮਂ ਤੁਣ੍ਹੀਭੂਤੇਨ ਉਦ੍ਦਿਸ੍ਸ ਠਾਤਬ੍ਬਨ੍ਤਿ ਠਾਨਲਕ੍ਖਣਨਿਦਸ੍ਸਨਮੇਤਂ. ਛਕ੍ਖਤ੍ਤੁਪਰਮਨ੍ਤਿ ਚ ਭਾਵਨਪੁਂਸਕਵਚਨਮੇਤਂ, ਛਕ੍ਖਤ੍ਤੁਪਰਮਞ੍ਹਿ ਏਤੇਨ ਚੀਵਰਂ ਉਦ੍ਦਿਸ੍ਸ ਤੁਣ੍ਹੀਭੂਤੇਨ ਠਾਤਬ੍ਬਂ, ਨ ਅਞ੍ਞਂ ਕਿਞ੍ਚਿ ਕਾਤਬ੍ਬਂ, ਇਦਂ ਠਾਨਲਕ੍ਖਣਂ. ਤਤ੍ਥ ਯੋ ਸਬ੍ਬਟ੍ਠਾਨਾਨਂ ਸਾਧਾਰਣੋ ਤੁਣ੍ਹੀਭਾਵੋ, ਤਂ ਤਾਵ ਦਸ੍ਸੇਤੁਂ ਪਦਭਾਜਨੇ ‘‘ਤਤ੍ਥ ਗਨ੍ਤ੍ਵਾ ਤੁਣ੍ਹੀਭੂਤੇਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਨ ਆਸਨੇ ਨਿਸੀਦਿਤਬ੍ਬਨ੍ਤਿ ‘‘ਇਧ, ਭਨ੍ਤੇ, ਨਿਸੀਦਥਾ’’ਤਿ ਵੁਤ੍ਤੇਨਾਪਿ ਨ ਨਿਸੀਦਿਤਬ੍ਬਂ. ਨ ਆਮਿਸਂ ਪਟਿਗ੍ਗਹੇਤਬ੍ਬਨ੍ਤਿ ਯਾਗੁਖਜ੍ਜਕਾਦਿਭੇਦਂ ਕਿਞ੍ਚਿ ਆਮਿਸਂ ‘‘ਗਣ੍ਹਥ, ਭਨ੍ਤੇ’’ਤਿ ਯਾਚਿਯਮਾਨੇਨਾਪਿ ਨ ਗਣ੍ਹਿਤਬ੍ਬਂ. ਨ ਧਮ੍ਮੋ ਭਾਸਿਤਬ੍ਬੋਤਿ ਮਙ੍ਗਲਂ ਵਾ ਅਨੁਮੋਦਨਂ ਵਾ ਭਾਸਥਾਤਿ ਯਾਚਿਯਮਾਨੇਨਾਪਿ ਕਿਞ੍ਚਿ ਨ ਭਾਸਿਤਬ੍ਬਂ, ਕੇਵਲਂ ‘‘ਕਿਂ ਕਾਰਣਾ ਆਗਤੋਸੀ’’ਤਿ ਪੁਚ੍ਛਿਯਮਾਨੇਨ ‘‘ਜਾਨਾਸਿ, ਆਵੁਸੋ’’ਤਿ ਵਤ੍ਤਬ੍ਬੋ. ਪੁਚ੍ਛਿਯਮਾਨੋਤਿ ਇਦਞ੍ਹਿ ਕਰਣਤ੍ਥੇ ਪਚ੍ਚਤ੍ਤਵਚਨਂ. ਅਥ ਵਾ ਪੁਚ੍ਛਂ ਕੁਰੁਮਾਨੋ ਪੁਚ੍ਛਿਯਮਾਨੋਤਿ ਏਵਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਯੋ ਹਿ ਪੁਚ੍ਛਂ ਕਰੋਤਿ, ਸੋ ਏਤ੍ਤਕਂ ਵਤ੍ਤਬ੍ਬੋਤਿ ਠਾਨਂ ਭਞ੍ਜਤੀਤਿ ਆਗਤਕਾਰਣਂ ਭਞ੍ਜਤਿ.

ਇਦਾਨਿ ਯਾ ਤਿਸ੍ਸੋ ਚੋਦਨਾ, ਛ ਚ ਠਾਨਾਨਿ ਵੁਤ੍ਤਾਨਿ. ਤਤ੍ਥ ਵੁਡ੍ਢਿਞ੍ਚ ਹਾਨਿਞ੍ਚ ਦਸ੍ਸੇਨ੍ਤੋ ‘‘ਚਤੁਕ੍ਖਤ੍ਤੁਂ ਚੋਦੇਤ੍ਵਾ’’ਤਿਆਦਿਮਾਹ. ਯਸ੍ਮਾ ਚ ਏਤ੍ਥ ਏਕਚੋਦਨਾਵੁਡ੍ਢਿਯਾ ਦ੍ਵਿਨ੍ਨਂ ਠਾਨਾਨਂ ਹਾਨਿ ਵੁਤ੍ਤਾ, ਤਸ੍ਮਾ ‘‘ਏਕਾ ਚੋਦਨਾ ਦਿਗੁਣਂ ਠਾਨ’’ਨ੍ਤਿ ਲਕ੍ਖਣਂ ਦਸ੍ਸਿਤਂ ਹੋਤਿ. ਇਤਿ ਇਮਿਨਾ ਲਕ੍ਖਣੇਨ ਤਿਕ੍ਖਤ੍ਤੁਂ ਚੋਦੇਤ੍ਵਾ ਛਕ੍ਖਤ੍ਤੁਂ ਠਾਤਬ੍ਬਂ, ਦ੍ਵਿਕ੍ਖਤ੍ਤੁਂ ਚੋਦੇਤ੍ਵਾ ਅਟ੍ਠਕ੍ਖਤ੍ਤੁਂ ਠਾਤਬ੍ਬਂ, ਸਕਿਂ ਚੋਦੇਤ੍ਵਾ ਦਸਕ੍ਖਤ੍ਤੁਂ ਠਾਤਬ੍ਬਨ੍ਤਿ. ਯਥਾ ਚ ‘‘ਛਕ੍ਖਤ੍ਤੁਂ ਚੋਦੇਤ੍ਵਾ ਨ ਠਾਤਬ੍ਬ’’ਨ੍ਤਿ ਵੁਤ੍ਤਂ, ਏਵਂ ‘‘ਦ੍ਵਾਦਸਕ੍ਖਤ੍ਤੁਂ ਠਤ੍ਵਾ ਨ ਚੋਦੇਤਬ੍ਬ’’ਨ੍ਤਿਪਿ ਵੁਤ੍ਤਮੇਵ ਹੋਤਿ. ਤਸ੍ਮਾ ਸਚੇ ਚੋਦੇਤਿਯੇਵ ਨ ਤਿਟ੍ਠਤਿ, ਛ ਚੋਦਨਾ ਲਬ੍ਭਨ੍ਤਿ. ਸਚੇ ਤਿਟ੍ਠਤਿਯੇਵ ਨ ਚੋਦੇਤਿ, ਦ੍ਵਾਦਸ ਠਾਨਾਨਿ ਲਬ੍ਭਨ੍ਤਿ. ਸਚੇ ਚੋਦੇਤਿਪਿ ਤਿਟ੍ਠਤਿਪਿ, ਏਕਾਯ ਚੋਦਨਾਯ ਦ੍ਵੇ ਠਾਨਾਨਿ ਹਾਪੇਤਬ੍ਬਾਨਿ. ਤਤ੍ਥ ਯੋ ਏਕਦਿਵਸਮੇਵ ਪੁਨਪ੍ਪੁਨਂ ਗਨ੍ਤ੍ਵਾ ਛਕ੍ਖਤ੍ਤੁਂ ਚੋਦੇਤਿ, ਸਕਿਂਯੇਵ ਵਾ ਗਨ੍ਤ੍ਵਾ ‘‘ਅਤ੍ਥੋ ਮੇ, ਆਵੁਸੋ, ਚੀਵਰੇਨਾ’’ਤਿ ਛਕ੍ਖਤ੍ਤੁਂ ਵਦਤਿ. ਤਥਾ ਏਕਦਿਵਸਮੇਵ ਪੁਨਪ੍ਪੁਨਂ ਗਨ੍ਤ੍ਵਾ ਦ੍ਵਾਦਸਕ੍ਖਤ੍ਤੁਂ ਤਿਟ੍ਠਤਿ, ਸਕਿਂਯੇਵ ਵਾ ਗਨ੍ਤ੍ਵਾ ਤਤ੍ਰ ਤਤ੍ਰ ਠਾਨੇ ਤਿਟ੍ਠਤਿ, ਸੋਪਿ ਸਬ੍ਬਚੋਦਨਾਯੋ ਸਬ੍ਬਟ੍ਠਾਨਾਨਿ ਚ ਭਞ੍ਜਤਿ. ਕੋ ਪਨ ਵਾਦੋ ਨਾਨਾਦਿਵਸੇਸੁ ਏਵਂ ਕਰੋਨ੍ਤਸ੍ਸਾਤਿ ਏਵਮੇਤ੍ਥ ਵਿਨਿਚ੍ਛਯੋ ਵੇਦਿਤਬ੍ਬੋ.

ਯਤਸ੍ਸ ਚੀਵਰਚੇਤਾਪਨ੍ਨਂ ਆਭਤਨ੍ਤਿ ਯਤੋ ਰਾਜਤੋ ਵਾ ਰਾਜਭੋਗ੍ਗਤੋ ਵਾ ਅਸ੍ਸ ਭਿਕ੍ਖੁਨੋ ਚੀਵਰਚੇਤਾਪਨ੍ਨਂ ਆਨੀਤਂ. ਯਤ੍ਵਸ੍ਸਾਤਿਪਿ ਪਾਠੋ. ਅਯਮੇਵਤ੍ਥੋ. ‘‘ਯਤ੍ਥਸ੍ਸਾ’’ਤਿਪਿ ਪਠਨ੍ਤਿ, ਯਸ੍ਮਿਂ ਠਾਨੇ ਅਸ੍ਸ ਚੀਵਰਚੇਤਾਪਨ੍ਨਂ ਪੇਸਿਤਨ੍ਤਿ ਚ ਅਤ੍ਥਂ ਕਥੇਨ੍ਤਿ, ਬ੍ਯਞ੍ਜਨਂ ਪਨ ਨ ਸਮੇਤਿ. ਤਤ੍ਥਾਤਿ ਤਸ੍ਸ ਰਞ੍ਞੋ ਵਾ ਰਾਜਭੋਗ੍ਗਸ੍ਸ ਵਾ ਸਨ੍ਤਿਕੇ; ਸਮੀਪਤ੍ਥੇ ਹਿ ਇਦਂ ਭੁਮ੍ਮਵਚਨਂ. ਨ ਤਂ ਤਸ੍ਸ ਭਿਕ੍ਖੁਨੋ ਕਿਞ੍ਚਿ ਅਤ੍ਥਂ ਅਨੁਭੋਤੀਤਿ ਤਂ ਚੀਵਰਚੇਤਾਪਨ੍ਨਂ ਤਸ੍ਸ ਭਿਕ੍ਖੁਨੋ ਕਿਞ੍ਚਿ ਅਪ੍ਪਮਤ੍ਤਕਮ੍ਪਿ ਕਮ੍ਮਂ ਨ ਨਿਪ੍ਫਾਦੇਤਿ. ਯੁਞ੍ਜਨ੍ਤਾਯਸ੍ਮਨ੍ਤੋ ਸਕਨ੍ਤਿ ਆਯਸ੍ਮਨ੍ਤੋ ਅਤ੍ਤਨੋ ਸਨ੍ਤਕਂ ਧਨਂ ਪਾਪੁਣਨ੍ਤੁ. ਮਾ ਵੋ ਸਕਂ ਵਿਨਸ੍ਸਾਤਿ ਤੁਮ੍ਹਾਕਂ ਸਨ੍ਤਕਂ ਮਾ ਵਿਨਸ੍ਸਤੁ. ਯੋ ਪਨ ਨੇਵ ਸਾਮਂ ਗਚ੍ਛਤਿ, ਨ ਦੂਤਂ ਪਾਹੇਤਿ, ਵਤ੍ਤਭੇਦੇ ਦੁਕ੍ਕਟਂ ਆਪਜ੍ਜਤਿ.

ਕਿਂ ਪਨ ਸਬ੍ਬਕਪ੍ਪਿਯਕਾਰਕੇਸੁ ਏਵਂ ਪਟਿਪਜ੍ਜਿਤਬ੍ਬਨ੍ਤਿ? ਨ ਪਟਿਪਜ੍ਜਿਤਬ੍ਬਂ. ਅਯਞ੍ਹਿ ਕਪ੍ਪਿਯਕਾਰਕੋ ਨਾਮ ਸਙ੍ਖੇਪਤੋ ਦੁਵਿਧੋ ਨਿਦ੍ਦਿਟ੍ਠੋ ਚ ਅਨਿਦ੍ਦਿਟ੍ਠੋ ਚ. ਤਤ੍ਥ ਨਿਦ੍ਦਿਟ੍ਠੋ ਦੁਵਿਧੋ – ਭਿਕ੍ਖੁਨਾ ਨਿਦ੍ਦਿਟ੍ਠੋ, ਦੂਤੇਨ ਨਿਦ੍ਦਿਟ੍ਠੋਤਿ. ਅਨਿਦ੍ਦਿਟ੍ਠੋਪਿ ਦੁਵਿਧੋ – ਮੁਖਵੇਵਟਿਕ ਕਪ੍ਪਿਯਕਾਰਕੋ, ਪਰਮ੍ਮੁਖਕਪ੍ਪਿਯਕਾਰਕੋਤਿ. ਤੇਸੁ ਭਿਕ੍ਖੁਨਾ ਨਿਦ੍ਦਿਟ੍ਠੋ ਸਮ੍ਮੁਖਾਸਮ੍ਮੁਖਵਸੇਨ ਚਤੁਬ੍ਬਿਧੋ ਹੋਤਿ. ਤਥਾ ਦੂਤੇਨ ਨਿਦ੍ਦਿਟ੍ਠੋਪਿ.

ਕਥਂ? ਇਧੇਕਚ੍ਚੋ ਭਿਕ੍ਖੁਸ੍ਸ ਚੀਵਰਤ੍ਥਾਯ ਦੂਤੇਨ ਅਕਪ੍ਪਿਯਵਤ੍ਥੁਂ ਪਹਿਣਤਿ, ਦੂਤੋ ਤਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ‘‘ਇਦਂ, ਭਨ੍ਤੇ, ਇਤ੍ਥਨ੍ਨਾਮੇਨ ਤੁਮ੍ਹਾਕਂ ਚੀਵਰਤ੍ਥਾਯ ਪਹਿਤਂ, ਗਣ੍ਹਥ ਨ’’ਨ੍ਤਿ ਵਦਤਿ, ਭਿਕ੍ਖੁ ‘‘ਨਯਿਦਂ ਕਪ੍ਪਤੀ’’ਤਿ ਪਟਿਕ੍ਖਿਪਤਿ, ਦੂਤੋ ‘‘ਅਤ੍ਥਿ ਪਨ ਤੇ, ਭਨ੍ਤੇ, ਵੇਯ੍ਯਾਵਚ੍ਚਕਰੋ’’ਤਿ ਪੁਚ੍ਛਤਿ, ਪੁਞ੍ਞਤ੍ਥਿਕੇਹਿ ਚ ਉਪਾਸਕੇਹਿ ‘‘ਭਿਕ੍ਖੂਨਂ ਵੇਯ੍ਯਾਵਚ੍ਚਂ ਕਰੋਥਾ’’ਤਿ ਆਣਤ੍ਤਾ ਵਾ, ਭਿਕ੍ਖੂਨਂ ਵਾ ਸਨ੍ਦਿਟ੍ਠਾ ਸਮ੍ਭਤ੍ਤਾ ਕੇਚਿ ਵੇਯ੍ਯਾਵਚ੍ਚਕਰਾ ਹੋਨ੍ਤਿ, ਤੇਸਂ ਅਞ੍ਞਤਰੋ ਤਸ੍ਮਿਂ ਖਣੇ ਭਿਕ੍ਖੁਸ੍ਸ ਸਨ੍ਤਿਕੇ ਨਿਸਿਨ੍ਨੋ ਹੋਤਿ, ਭਿਕ੍ਖੁ ਤਂ ਨਿਦ੍ਦਿਸਤਿ ‘‘ਅਯਂ ਭਿਕ੍ਖੂਨਂ ਵੇਯ੍ਯਾਵਚ੍ਚਕਰੋ’’ਤਿ. ਦੂਤੋ ਤਸ੍ਸ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ‘‘ਥੇਰਸ੍ਸ ਚੀਵਰਂ ਕਿਣਿਤ੍ਵਾ ਦੇਹੀ’’ਤਿ ਗਚ੍ਛਤਿ, ਅਯਂ ਭਿਕ੍ਖੁਨਾ ਸਮ੍ਮੁਖਾਨਿਦ੍ਦਿਟ੍ਠੋ.

ਨੋ ਚੇ ਭਿਕ੍ਖੁਸ੍ਸ ਸਨ੍ਤਿਕੇ ਨਿਸਿਨ੍ਨੋ ਹੋਤਿ, ਅਪਿਚ ਖੋ ਭਿਕ੍ਖੁ ਨਿਦ੍ਦਿਸਤਿ – ‘‘ਅਸੁਕਸ੍ਮਿਂ ਨਾਮ ਗਾਮੇ ਇਤ੍ਥਨ੍ਨਾਮੋ ਭਿਕ੍ਖੂਨਂ ਵੇਯ੍ਯਾਵਚ੍ਚਕਰੋ’’ਤਿ, ਸੋ ਗਨ੍ਤ੍ਵਾ ਤਸ੍ਸ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ‘‘ਥੇਰਸ੍ਸ ਚੀਵਰਂ ਕਿਣਿਤ੍ਵਾ ਦਦੇਯ੍ਯਾਸੀ’’ਤਿ ਆਗਨ੍ਤ੍ਵਾ ਭਿਕ੍ਖੁਸ੍ਸ ਆਰੋਚੇਤ੍ਵਾ ਗਚ੍ਛਤਿ, ਅਯਮੇਕੋ ਭਿਕ੍ਖੁਨਾ ਅਸਮ੍ਮੁਖਾਨਿਦ੍ਦਿਟ੍ਠੋ.

ਨ ਹੇਵ ਖੋ ਸੋ ਦੂਤੋ ਅਤ੍ਤਨਾ ਆਗਨ੍ਤ੍ਵਾ ਆਰੋਚੇਤਿ, ਅਪਿਚ ਖੋ ਅਞ੍ਞਂ ਪਹਿਣਤਿ ‘‘ਦਿਨ੍ਨਂ ਮਯਾ, ਭਨ੍ਤੇ, ਤਸ੍ਸ ਹਤ੍ਥੇ ਚੀਵਰਚੇਤਾਪਨ੍ਨਂ, ਚੀਵਰਂ ਗਣ੍ਹੇਯ੍ਯਾਥਾ’’ਤਿ, ਅਯਂ ਦੁਤਿਯੋ ਭਿਕ੍ਖੁਨਾ ਅਸਮ੍ਮੁਖਾਨਿਦ੍ਦਿਟ੍ਠੋ.

ਨ ਹੇਵ ਖੋ ਅਞ੍ਞਂ ਪਹਿਣਤਿ, ਅਪਿਚ ਖੋ ਗਚ੍ਛਨ੍ਤੋਵ ਭਿਕ੍ਖੁਂ ਵਦਤਿ ‘‘ਅਹਂ ਤਸ੍ਸ ਹਤ੍ਥੇ ਚੀਵਰਚੇਤਾਪਨ੍ਨਂ ਦਸ੍ਸਾਮਿ, ਤੁਮ੍ਹੇ ਚੀਵਰਂ ਗਣ੍ਹੇਯ੍ਯਾਥਾ’’ਤਿ, ਅਯਂ ਤਤਿਯੋ ਭਿਕ੍ਖੁਨਾ ਅਸਮ੍ਮੁਖਾਨਿਦ੍ਦਿਟ੍ਠੋਤਿ ਏਵਂ ਏਕੋ ਸਮ੍ਮੁਖਾਨਿਦ੍ਦਿਟ੍ਠੋ ਤਯੋ ਅਸਮ੍ਮੁਖਾਨਿਦ੍ਦਿਟ੍ਠਾਤਿ ਇਮੇ ਚਤ੍ਤਾਰੋ ਭਿਕ੍ਖੁਨਾ ਨਿਦ੍ਦਿਟ੍ਠਵੇਯ੍ਯਾਵਚ੍ਚਕਰਾ ਨਾਮ. ਏਤੇਸੁ ਇਮਸ੍ਮਿਂ ਰਾਜਸਿਕ੍ਖਾਪਦੇ ਵੁਤ੍ਤਨਯੇਨੇਵ ਪਟਿਪਜ੍ਜਿਤਬ੍ਬਂ.

ਅਪਰੋ ਭਿਕ੍ਖੁ ਪੁਰਿਮਨਯੇਨੇਵ ਦੂਤੇਨ ਪੁਚ੍ਛਿਤੋ ਨਤ੍ਥਿਤਾਯ ਵਾ, ਅਵਿਚਾਰੇਤੁਕਾਮਤਾਯ ਵਾ ‘‘ਨਤ੍ਥਮ੍ਹਾਕਂ ਕਪ੍ਪਿਯਕਾਰਕੋ’’ਤਿ ਵਦਤਿ, ਤਸ੍ਮਿਞ੍ਚ ਖਣੇ ਕੋਚਿ ਮਨੁਸ੍ਸੋ ਆਗਚ੍ਛਤਿ, ਦੂਤੋ ਤਸ੍ਸ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ‘‘ਇਮਸ੍ਸ ਹਤ੍ਥਤੋ ਚੀਵਰਂ ਗਣ੍ਹੇਯ੍ਯਾਥਾ’’ਤਿ ਵਤ੍ਵਾ ਗਚ੍ਛਤਿ, ਅਯਂ ਦੂਤੇਨ ਸਮ੍ਮੁਖਾਨਿਦ੍ਦਿਟ੍ਠੋ.

ਅਪਰੋ ਦੂਤੋ ਗਾਮਂ ਪਵਿਸਿਤ੍ਵਾ ਅਤ੍ਤਨਾ ਅਭਿਰੁਚਿਤਸ੍ਸ ਕਸ੍ਸਚਿ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ਪੁਰਿਮਨਯੇਨੇਵ ਆਗਨ੍ਤ੍ਵਾ ਆਰੋਚੇਤਿ, ਅਞ੍ਞਂ ਵਾ ਪਹਿਣਤਿ, ‘‘ਅਹਂ ਅਸੁਕਸ੍ਸ ਨਾਮ ਹਤ੍ਥੇ ਚੀਵਰਚੇਤਾਪਨ੍ਨਂ ਦਸ੍ਸਾਮਿ, ਤੁਮ੍ਹੇ ਚੀਵਰਂ ਗਣ੍ਹੇਯ੍ਯਾਥਾ’’ਤਿ ਵਤ੍ਵਾ ਵਾ ਗਚ੍ਛਤਿ, ਅਯਂ ਤਤਿਯੋ ਦੂਤੇਨ ਅਸਮ੍ਮੁਖਾਨਿਦ੍ਦਿਟ੍ਠੋਤਿ ਏਵਂ ਏਕੋ ਸਮ੍ਮੁਖਾਨਿਦ੍ਦਿਟ੍ਠੋ, ਤਯੋ ਅਸਮ੍ਮੁਖਾਨਿਦ੍ਦਿਟ੍ਠਾਤਿ ਇਮੇ ਚਤ੍ਤਾਰੋ ਦੂਤੇਨ ਨਿਦ੍ਦਿਟ੍ਠਵੇਯ੍ਯਾਵਚ੍ਚਕਰਾ ਨਾਮ. ਏਤੇਸੁ ਮੇਣ੍ਡਕਸਿਕ੍ਖਾਪਦੇ ਵੁਤ੍ਤਨਯੇਨ ਪਟਿਪਜ੍ਜਿਤਬ੍ਬਂ. ਵੁਤ੍ਤਞ੍ਹੇਤਂ – ‘‘ਸਨ੍ਤਿ, ਭਿਕ੍ਖਵੇ, ਮਨੁਸ੍ਸਾ ਸਦ੍ਧਾ ਪਸਨ੍ਨਾ, ਤੇ ਕਪ੍ਪਿਯਕਾਰਕਾਨਂ ਹਤ੍ਥੇ ਹਿਰਞ੍ਞਂ ਉਪਨਿਕ੍ਖਿਪਨ੍ਤਿ – ‘ਇਮਿਨਾ ਅਯ੍ਯਸ੍ਸ ਯਂ ਕਪ੍ਪਿਯਂ ਤਂ ਦੇਥਾ’ਤਿ. ਅਨੁਜਾਨਾਮਿ, ਭਿਕ੍ਖਵੇ, ਯਂ ਤਤੋ ਕਪ੍ਪਿਯਂ ਤਂ ਸਾਦਿਤੁਂ, ਨ ਤ੍ਵੇਵਾਹਂ, ਭਿਕ੍ਖਵੇ, ਕੇਨਚਿ ਪਰਿਯਾਯੇਨ ਜਾਤਰੂਪਰਜਤਂ ਸਾਦਿਤਬ੍ਬਂ ਪਰਿਯੇਸਿਤਬ੍ਬਨ੍ਤਿ ਵਦਾਮੀ’’ਤਿ (ਮਹਾਵ. ੨੯੯). ਏਤ੍ਥ ਚ ਚੋਦਨਾਯ ਪਮਾਣਂ ਨਤ੍ਥਿ, ਮੂਲਂ ਅਸਾਦਿਯਨ੍ਤੇਨ ਸਹਸ੍ਸਕ੍ਖਤ੍ਤੁਮ੍ਪਿ ਚੋਦਨਾਯ ਵਾ ਠਾਨੇਨ ਵਾ ਕਪ੍ਪਿਯਭਣ੍ਡਂ ਸਾਦਿਤੁਂ ਵਟ੍ਟਤਿ. ਨੋ ਚੇ ਦੇਤਿ, ਅਞ੍ਞਂ ਕਪ੍ਪਿਯਕਾਰਕਂ ਠਪੇਤ੍ਵਾਪਿ ਆਹਰਾਪੇਤਬ੍ਬਂ. ਸਚੇ ਇਚ੍ਛਤਿ ਮੂਲਸਾਮਿਕਾਨਮ੍ਪਿ ਕਥੇਤਬ੍ਬਂ; ਨੋ ਚੇ ਇਚ੍ਛਤਿ ਨ ਕਥੇਤਬ੍ਬਂ.

ਅਪਰੋ ਭਿਕ੍ਖੁ ਪੁਰਿਮਨਯੇਨੇਵ ਦੂਤੇਨ ਪੁਚ੍ਛਿਤੋ ‘‘ਨਤ੍ਥਮ੍ਹਾਕਂ ਕਪ੍ਪਿਯਕਾਰਕੋ’’ਤਿ ਵਦਤਿ, ਤਦਞ੍ਞੋ ਸਮੀਪੇ ਠਿਤੋ ਸੁਤ੍ਵਾ ‘‘ਆਹਰ ਭੋ ਅਹਂ ਅਯ੍ਯਸ੍ਸ ਚੀਵਰਂ ਚੇਤਾਪੇਤ੍ਵਾ ਦਸ੍ਸਾਮੀ’’ਤਿ ਵਦਤਿ. ਦੂਤੋ ‘‘ਹਨ੍ਦ ਭੋ ਦਦੇਯ੍ਯਾਸੀ’’ਤਿ ਤਸ੍ਸ ਹਤ੍ਥੇ ਦਤ੍ਵਾ ਭਿਕ੍ਖੁਸ੍ਸ ਅਨਾਰੋਚੇਤ੍ਵਾਵ ਗਚ੍ਛਤਿ, ਅਯਂ ਮੁਖਵੇਵਟਿਕਕਪ੍ਪਿਯਕਾਰਕੋ. ਅਪਰੋ ਭਿਕ੍ਖੁਨੋ ਉਪਟ੍ਠਾਕਸ੍ਸ ਵਾ ਅਞ੍ਞਸ੍ਸ ਵਾ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ‘‘ਥੇਰਸ੍ਸ ਚੀਵਰਂ ਦਦੇਯ੍ਯਾਸੀ’’ਤਿ ਏਤ੍ਤੋਵ ਪਕ੍ਕਮਤਿ, ਅਯਂ ਪਰਮ੍ਮੁਖਕਪ੍ਪਿਯਕਾਰਕੋਤਿ ਇਮੇ ਦ੍ਵੇ ਅਨਿਦ੍ਦਿਟ੍ਠਕਪ੍ਪਿਯਕਾਰਕਾ ਨਾਮ. ਏਤੇਸੁ ਅਞ੍ਞਾਤਕਅਪ੍ਪਵਾਰਿਤੇਸੁ ਵਿਯ ਪਟਿਪਜ੍ਜਿਤਬ੍ਬਂ. ਸਚੇ ਸਯਮੇਵ ਚੀਵਰਂ ਆਨੇਤ੍ਵਾ ਦਦਨ੍ਤਿ, ਗਹੇਤਬ੍ਬਂ. ਨੋ ਚੇ, ਕਿਞ੍ਚਿ ਨ ਵਤ੍ਤਬ੍ਬਾ. ਦੇਸਨਾਮਤ੍ਤਮੇਵ ਚੇਤਂ ‘‘ਦੂਤੇਨ ਚੀਵਰਚੇਤਾਪਨ੍ਨਂ ਪਹਿਣੇਯ੍ਯਾ’’ਤਿ ਸਯਂ ਆਹਰਿਤ੍ਵਾਪਿ ਪਿਣ੍ਡਪਾਤਾਦੀਨਂ ਅਤ੍ਥਾਯ ਦਦਨ੍ਤੇਸੁਪਿ ਏਸੇਵ ਨਯੋ. ਨ ਕੇਵਲਞ੍ਚ ਅਤ੍ਤਨੋਯੇਵ ਅਤ੍ਥਾਯ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ, ਸਚੇਪਿ ਕੋਚਿ ਜਾਤਰੂਪਰਜਤਂ ਆਨੇਤ੍ਵਾ ‘‘ਇਦਂ ਸਙ੍ਘਸ੍ਸ ਦਮ੍ਮਿ, ਆਰਾਮਂ ਵਾ ਕਰੋਥ ਚੇਤਿਯਂ ਵਾ ਭੋਜਨਸਾਲਾਦੀਨਂ ਵਾ ਅਞ੍ਞਤਰ’’ਨ੍ਤਿ ਵਦਤਿ, ਇਦਮ੍ਪਿ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ. ਯਸ੍ਸ ਕਸ੍ਸਚਿ ਹਿ ਅਞ੍ਞਸ੍ਸਤ੍ਥਾਯ ਸਮ੍ਪਟਿਚ੍ਛਨ੍ਤਸ੍ਸ ਦੁਕ੍ਕਟਂ ਹੋਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ.

ਸਚੇ ਪਨ ‘‘ਨਯਿਦਂ ਭਿਕ੍ਖੂਨਂ ਸਮ੍ਪਟਿਚ੍ਛਿਤੁਂ ਵਟ੍ਟਤੀ’’ਤਿ ਪਟਿਕ੍ਖਿਤ੍ਤੇ ‘‘ਵਡ੍ਢਕੀਨਂ ਵਾ ਕਮ੍ਮਕਰਾਨਂ ਵਾ ਹਤ੍ਥੇ ਭਵਿਸ੍ਸਤਿ, ਕੇਵਲਂ ਤੁਮ੍ਹੇ ਸੁਕਤਦੁਕ੍ਕਟਂ ਜਾਨਾਥਾ’’ਤਿ ਵਤ੍ਵਾ ਤੇਸਂ ਹਤ੍ਥੇ ਦਤ੍ਵਾ ਪਕ੍ਕਮਤਿ, ਵਟ੍ਟਤਿ. ਅਥਾਪਿ ‘‘ਮਮ ਮਨੁਸ੍ਸਾਨਂ ਹਤ੍ਥੇ ਭਵਿਸ੍ਸਤਿ ਮਯ੍ਹਮੇਵ ਵਾ ਹਤ੍ਥੇ ਭਵਿਸ੍ਸਤਿ, ਕੇਵਲਂ ਤੁਮ੍ਹੇ ਯਂ ਯਸ੍ਸ ਦਾਤਬ੍ਬਂ, ਤਦਤ੍ਥਾਯ ਪੇਸੇਯ੍ਯਾਥਾ’’ਤਿ ਵਦਤਿ, ਏਵਮ੍ਪਿ ਵਟ੍ਟਤਿ.

ਸਚੇ ਪਨ ਸਙ੍ਘਂ ਵਾ ਗਣਂ ਵਾ ਪੁਗ੍ਗਲਂ ਵਾ ਅਨਾਮਸਿਤ੍ਵਾ ‘‘ਇਦਂ ਹਿਰਞ੍ਞਸੁਵਣ੍ਣਂ ਚੇਤਿਯਸ੍ਸ ਦੇਮ, ਵਿਹਾਰਸ੍ਸ ਦੇਮ, ਨਵਕਮ੍ਮਸ੍ਸ ਦੇਮਾ’’ਤਿ ਵਦਨ੍ਤਿ, ਪਟਿਕ੍ਖਿਪਿਤੁਂ ਨ ਵਟ੍ਟਤਿ. ‘‘ਇਮੇ ਇਦਂ ਭਣਨ੍ਤੀ’’ਤਿ ਕਪ੍ਪਿਯਕਾਰਕਾਨਂ ਆਚਿਕ੍ਖਿਤਬ੍ਬਂ. ‘‘ਚੇਤਿਯਾਦੀਨਂ ਅਤ੍ਥਾਯ ਤੁਮ੍ਹੇ ਗਹੇਤ੍ਵਾ ਠਪੇਥਾ’’ਤਿ ਵੁਤ੍ਤੇਨ ਪਨ ‘‘ਅਮ੍ਹਾਕਂ ਗਹੇਤੁਂ ਨ ਵਟ੍ਟਤੀ’’ਤਿ ਪਟਿਕ੍ਖਿਪਿਤਬ੍ਬਂ.

ਸਚੇ ਪਨ ਕੋਚਿ ਬਹੁਂ ਹਿਰਞ੍ਞਸੁਵਣ੍ਣਂ ਆਨੇਤ੍ਵਾ ‘‘ਇਦਂ ਸਙ੍ਘਸ੍ਸ ਦਮ੍ਮਿ, ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਥਾ’’ਤਿ ਵਦਤਿ, ਤਂ ਚੇ ਸਙ੍ਘੋ ਸਮ੍ਪਟਿਚ੍ਛਤਿ, ਪਟਿਗ੍ਗਹਣੇਪਿ ਪਰਿਭੋਗੇਪਿ ਆਪਤ੍ਤਿ. ਤਤ੍ਰ ਚੇ ਏਕੋ ਭਿਕ੍ਖੁ ‘‘ਨਯਿਦਂ ਕਪ੍ਪਤੀ’’ਤਿ ਪਟਿਕ੍ਖਿਪਤਿ, ਉਪਾਸਕੋ ਚ ‘‘ਯਦਿ ਨ ਕਪ੍ਪਤਿ, ਮਯ੍ਹਮੇਵ ਭਵਿਸ੍ਸਤੀ’’ਤਿ ਗਚ੍ਛਤਿ. ਸੋ ਭਿਕ੍ਖੁ ‘‘ਤਯਾ ਸਙ੍ਘਸ੍ਸ ਲਾਭਨ੍ਤਰਾਯੋ ਕਤੋ’’ਤਿ ਨ ਕੇਨਚਿ ਕਿਞ੍ਚਿ ਵਤ੍ਤਬ੍ਬੋ. ਯੋ ਹਿ ਤਂ ਚੋਦੇਤਿ, ਸ੍ਵੇਵ ਸਾਪਤ੍ਤਿਕੋ ਹੋਤਿ, ਤੇਨ ਪਨ ਏਕੇਨ ਬਹੂ ਅਨਾਪਤ੍ਤਿਕਾ ਕਤਾ. ਸਚੇ ਪਨ ਭਿਕ੍ਖੂਹਿ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਤ੍ਤੇ ‘‘ਕਪ੍ਪਿਯਕਾਰਕਾਨਂ ਵਾ ਹਤ੍ਥੇ ਭਵਿਸ੍ਸਤਿ, ਮਮ ਪੁਰਿਸਾਨਂ ਵਾ ਮਯ੍ਹਂ ਵਾ ਹਤ੍ਥੇ ਭਵਿਸ੍ਸਤਿ, ਕੇਵਲਂ ਤੁਮ੍ਹੇ ਪਚ੍ਚਯੇ ਪਰਿਭੁਞ੍ਜਥਾ’’ਤਿ ਵਦਤਿ, ਵਟ੍ਟਤਿ.

ਚਤੁਪਚ੍ਚਯਤ੍ਥਾਯ ਚ ਦਿਨ੍ਨਂ ਯੇਨ ਯੇਨ ਪਚ੍ਚਯੇਨ ਅਤ੍ਥੋ ਹੋਤਿ, ਤਦਤ੍ਥਂ ਉਪਨੇਤਬ੍ਬਂ, ਚੀਵਰਤ੍ਥਾਯ ਦਿਨ੍ਨਂ ਚੀਵਰੇਯੇਵ ਉਪਨੇਤਬ੍ਬਂ. ਸਚੇ ਚੀਵਰੇਨ ਤਾਦਿਸੋ ਅਤ੍ਥੋ ਨਤ੍ਥਿ, ਪਿਣ੍ਡਪਾਤਾਦੀਹਿ ਸਙ੍ਘੋ ਕਿਲਮਤਿ, ਸਙ੍ਘਸੁਟ੍ਠੁਤਾਯ ਅਪਲੋਕੇਤ੍ਵਾ ਤਦਤ੍ਥਾਯਪਿ ਉਪਨੇਤਬ੍ਬਂ. ਏਸ ਨਯੋ ਪਿਣ੍ਡਪਾਤਗਿਲਾਨਪਚ੍ਚਯਤ੍ਥਾਯ ਦਿਨ੍ਨੇਪਿ, ਸੇਨਾਸਨਤ੍ਥਾਯ ਦਿਨ੍ਨਂ ਪਨ ਸੇਨਾਸਨਸ੍ਸ ਗਰੁਭਣ੍ਡਤ੍ਤਾ ਸੇਨਾਸਨੇਯੇਵ ਉਪਨੇਤਬ੍ਬਂ. ਸਚੇ ਪਨ ਭਿਕ੍ਖੂਸੁ ਸੇਨਾਸਨਂ ਛਡ੍ਡੇਤ੍ਵਾ ਗਤੇਸੁ ਸੇਨਾਸਨਂ ਵਿਨਸ੍ਸਤਿ, ਈਦਿਸੇ ਕਾਲੇ ਸੇਨਾਸਨਂ ਵਿਸ੍ਸਜ੍ਜੇਤ੍ਵਾਪਿ ਭਿਕ੍ਖੂਨਂ ਪਰਿਭੋਗੋ ਅਨੁਞ੍ਞਾਤੋ, ਤਸ੍ਮਾ ਸੇਨਾਸਨਜਗ੍ਗਨਤ੍ਥਂ ਮੂਲਚ੍ਛੇਜ੍ਜਂ ਅਕਤ੍ਵਾ ਯਾਪਨਮਤ੍ਤਂ ਪਰਿਭੁਞ੍ਜਿਤਬ੍ਬਂ.

ਨ ਕੇਵਲਞ੍ਚ ਹਿਰਞ੍ਞਸੁਵਣ੍ਣਮੇਵ, ਅਞ੍ਞਮ੍ਪਿ ਖੇਤ੍ਤਵਤ੍ਥਾਦਿ ਅਕਪ੍ਪਿਯਂ ਨ ਸਮ੍ਪਟਿਚ੍ਛਿਤਬ੍ਬਂ. ਸਚੇ ਹਿ ਕੋਚਿ ‘‘ਮਯ੍ਹਂ ਤਿਸਸ੍ਸਸਮ੍ਪਾਦਨਕਂ ਮਹਾਤਲ਼ਾਕਂ ਅਤ੍ਥਿ, ਤਂ ਸਙ੍ਘਸ੍ਸ ਦਮ੍ਮੀ’’ਤਿ ਵਦਤਿ, ਤਂ ਚੇ ਸਙ੍ਘੋ ਸਮ੍ਪਟਿਚ੍ਛਤਿ, ਪਟਿਗ੍ਗਹਣੇਪਿ ਪਰਿਭੋਗੇਪਿ ਆਪਤ੍ਤਿਯੇਵ. ਯੋ ਪਨ ਤਂ ਪਟਿਕ੍ਖਿਪਤਿ, ਸੋ ਪੁਰਿਮਨਯੇਨੇਵ ਨ ਕੇਨਚਿ ਕਿਞ੍ਚਿ ਵਤ੍ਤਬ੍ਬੋ. ਯੋ ਹਿ ਤਂ ਚੋਦੇਤਿ, ਸ੍ਵੇਵ ਸਾਪਤ੍ਤਿਕੋ ਹੋਤਿ, ਤੇਨ ਪਨ ਏਕੇਨ ਬਹੂ ਅਨਾਪਤ੍ਤਿਕਾ ਕਤਾ.

ਯੋ ਪਨ ‘‘ਤਾਦਿਸਂਯੇਵ ਤਲ਼ਾਕਂ ਦਮ੍ਮੀ’’ਤਿ ਵਤ੍ਵਾ ਭਿਕ੍ਖੂਹਿ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਤ੍ਤੋ ਵਦਤਿ ‘‘ਅਸੁਕਞ੍ਚ ਅਸੁਕਞ੍ਚ ਸਙ੍ਘਸ੍ਸ ਤਲ਼ਾਕਂ ਅਤ੍ਥਿ, ਤਂ ਕਥਂ ਵਟ੍ਟਤੀ’’ਤਿ. ਸੋ ਵਤ੍ਤਬ੍ਬੋ – ‘‘ਕਪ੍ਪਿਯਂ ਕਤ੍ਵਾ ਦਿਨ੍ਨਂ ਭਵਿਸ੍ਸਤੀ’’ਤਿ. ਕਥਂ ਦਿਨ੍ਨਂ ਕਪ੍ਪਿਯਂ ਹੋਤੀਤਿ? ‘‘ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਥਾ’’ਤਿ ਵਤ੍ਵਾ ਦਿਨ੍ਨਨ੍ਤਿ. ਸੋ ਸਚੇ ‘‘ਸਾਧੁ, ਭਨ੍ਤੇ, ਚਤ੍ਤਾਰੋ ਪਚ੍ਚਯੇ ਸਙ੍ਘੋ ਪਰਿਭੁਞ੍ਜਤੂ’’ਤਿ ਦੇਤਿ, ਵਟ੍ਟਤਿ. ਅਥਾਪਿ ‘‘ਤਲ਼ਾਕਂ ਗਣ੍ਹਥਾ’’ਤਿ ਵਤ੍ਵਾ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਤ੍ਤੋ ‘‘ਕਪ੍ਪਿਯਕਾਰਕੋ ਅਤ੍ਥੀ’’ਤਿ ਪੁਚ੍ਛਿਤ੍ਵਾ ‘‘ਨਤ੍ਥੀ’’ਤਿ ਵੁਤ੍ਤੇ ‘‘ਇਦਂ ਅਸੁਕੋ ਨਾਮ ਵਿਚਾਰੇਸ੍ਸਤਿ, ਅਸੁਕਸ੍ਸ ਵਾ ਹਤ੍ਥੇ, ਮਯ੍ਹਂ ਵਾ ਹਤ੍ਥੇ ਭਵਿਸ੍ਸਤਿ, ਸਙ੍ਘੋ ਕਪ੍ਪਿਯਭਣ੍ਡਂ ਪਰਿਭੁਞ੍ਜਤੂ’’ਤਿ ਵਦਤਿ, ਵਟ੍ਟਤਿ. ਸਚੇਪਿ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਤ੍ਤੋ ‘‘ਉਦਕਂ ਪਰਿਭੁਞ੍ਜਿਸ੍ਸਤਿ, ਭਣ੍ਡਕਂ ਧੋਵਿਸ੍ਸਤਿ, ਮਿਗਪਕ੍ਖਿਨੋ ਪਿਵਿਸ੍ਸਨ੍ਤੀ’’ਤਿ ਵਦਤਿ, ਏਵਮ੍ਪਿ ਵਟ੍ਟਤਿ. ਅਥਾਪਿ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਤ੍ਤੋ ਵਦਤਿ ‘‘ਕਪ੍ਪਿਯਸੀਸੇਨ ਗਣ੍ਹਥਾ’’ਤਿ. ‘‘ਸਾਧੁ, ਉਪਾਸਕ, ਸਙ੍ਘੋ ਪਾਨੀਯਂ ਪਿਵਿਸ੍ਸਤਿ, ਭਣ੍ਡਕਂ ਧੋਵਿਸ੍ਸਤਿ, ਮਿਗਪਕ੍ਖਿਨੋ ਪਿਵਿਸ੍ਸਨ੍ਤੀ’’ਤਿ ਵਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ.

ਅਥਾਪਿ ‘‘ਮਮ ਤਲ਼ਾਕਂ ਵਾ ਪੋਕ੍ਖਰਣਿਂ ਵਾ ਸਙ੍ਘਸ੍ਸ ਦਮ੍ਮੀ’’ਤਿ ‘‘ਵੁਤ੍ਤੇ, ਸਾਧੁ, ਉਪਾਸਕ, ਸਙ੍ਘੋ ਪਾਨੀਯਂ ਪਿਵਿਸ੍ਸਤੀ’’ਤਿਆਦੀਨਿ ਵਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿਯੇਵ. ਯਦਿ ਪਨ ਭਿਕ੍ਖੂਹਿ ਹਤ੍ਥਕਮ੍ਮਂ ਯਾਚਿਤ੍ਵਾ ਸਹਤ੍ਥੇਨ ਚ ਕਪ੍ਪਿਯਪਥਵਿਂ ਖਨਿਤ੍ਵਾ ਉਦਕਪਰਿਭੋਗਤ੍ਥਾਯ ਤਲ਼ਾਕਂ ਕਾਰਿਤਂ ਹੋਤਿ, ਤਂ ਚੇ ਨਿਸ੍ਸਾਯ ਸਸ੍ਸਂ ਨਿਪ੍ਫਾਦੇਤ੍ਵਾ ਮਨੁਸ੍ਸਾ ਵਿਹਾਰੇ ਕਪ੍ਪਿਯਭਣ੍ਡਂ ਦੇਨ੍ਤਿ, ਵਟ੍ਟਤਿ. ਅਥ ਮਨੁਸ੍ਸਾ ਏਵ ਸਙ੍ਘਸ੍ਸ ਉਪਕਾਰਤ੍ਥਾਯ ਸਙ੍ਘਿਕਭੂਮਿਂ ਖਨਿਤ੍ਵਾ ਤਂ ਨਿਸ੍ਸਾਯ ਨਿਪ੍ਫਨ੍ਨਸਸ੍ਸਤੋ ਕਪ੍ਪਿਯਭਣ੍ਡਂ ਦੇਨ੍ਤਿ, ਏਵਮ੍ਪਿ ਵਟ੍ਟਤਿ. ‘‘ਅਮ੍ਹਾਕਂ ਏਕਂ ਕਪ੍ਪਿਯਕਾਰਕਂ ਠਪੇਥਾ’’ਤਿ ਵੁਤ੍ਤੇ ਚ ਠਪੇਤੁਮ੍ਪਿ ਲਬ੍ਭਤਿ. ਅਥ ਪਨ ਤੇ ਮਨੁਸ੍ਸਾ ਰਾਜਬਲਿਨਾ ਉਪਦ੍ਦੁਤਾ ਪਕ੍ਕਮਨ੍ਤਿ, ਅਞ੍ਞੇ ਪਟਿਪਜ੍ਜਨ੍ਤਿ, ਨ ਚ ਭਿਕ੍ਖੂਨਂ ਕਿਞ੍ਚਿ ਦੇਨ੍ਤਿ, ਉਦਕਂ ਵਾਰੇਤੁਂ ਲਬ੍ਭਤਿ. ਤਞ੍ਚ ਖੋ ਕਸਿਕਮ੍ਮਕਾਲੇਯੇਵ, ਨ ਸਸ੍ਸਕਾਲੇ. ਸਚੇ ਤੇ ਵਦਨ੍ਤਿ ‘‘ਨਨੁ, ਭਨ੍ਤੇ, ਪੁਬ੍ਬੇਪਿ ਮਨੁਸ੍ਸਾ ਇਮਂ ਨਿਸ੍ਸਾਯ ਸਸ੍ਸਂ ਅਕਂਸੂ’’ਤਿ. ਤਤੋ ਵਤ੍ਤਬ੍ਬਾ – ‘‘ਤੇ ਸਙ੍ਘਸ੍ਸ ਇਮਞ੍ਚ ਇਮਞ੍ਚ ਉਪਕਾਰਂ ਅਕਂਸੁ, ਇਦਞ੍ਚਿਦਞ੍ਚ ਕਪ੍ਪਿਯਭਣ੍ਡਂ ਅਦਂਸੂ’’ਤਿ. ਸਚੇ ਵਦਨ੍ਤਿ – ‘‘ਮਯਮ੍ਪਿ ਦਸ੍ਸਾਮਾ’’ਤਿ, ਏਵਮ੍ਪਿ ਵਟ੍ਟਤਿ.

ਸਚੇ ਪਨ ਕੋਚਿ ਅਬ੍ਯਤ੍ਤੋ ਅਕਪ੍ਪਿਯਵੋਹਾਰੇਨ ਤਲ਼ਾਕਂ ਪਟਿਗ੍ਗਣ੍ਹਾਤਿ ਵਾ ਕਾਰੇਤਿ ਵਾ, ਤਂ ਭਿਕ੍ਖੂਹਿ ਨ ਪਰਿਭੁਞ੍ਜਿਤਬ੍ਬਂ, ਤਂ ਨਿਸ੍ਸਾਯ ਲਦ੍ਧਂ ਕਪ੍ਪਿਯਭਣ੍ਡਮ੍ਪਿ ਅਕਪ੍ਪਿਯਮੇਵ. ਸਚੇ ਭਿਕ੍ਖੂਹਿ ਪਰਿਚ੍ਚਤ੍ਤਭਾਵਂ ਞਤ੍ਵਾ ਸਾਮਿਕੋ ਵਾ ਤਸ੍ਸ ਪੁਤ੍ਤਧੀਤਰੋ ਵਾ ਅਞ੍ਞੋ ਵਾ ਕੋਚਿ ਵਂਸੇ ਉਪ੍ਪਨ੍ਨੋ ਪੁਨ ਕਪ੍ਪਿਯਵੋਹਾਰੇਨ ਦੇਤਿ, ਵਟ੍ਟਤਿ. ਪਚ੍ਛਿਨ੍ਨੇ ਕੁਲਵਂਸੇ ਯੋ ਤਸ੍ਸ ਜਨਪਦਸ੍ਸ ਸਾਮਿਕੋ, ਸੋ ਅਚ੍ਛਿਨ੍ਦਿਤ੍ਵਾ ਪੁਨ ਦੇਤਿ, ਚਿਤ੍ਤਲਪਬ੍ਬਤੇ ਭਿਕ੍ਖੁਨਾ ਨੀਹਟਉਦਕਵਾਹਕਂ ਅਲ਼ਨਾਗਰਾਜਮਹੇਸੀ ਵਿਯ, ਏਵਮ੍ਪਿ ਵਟ੍ਟਤਿ.

ਕਪ੍ਪਿਯਵੋਹਾਰੇਪਿ ਉਦਕਵਸੇਨ ਪਟਿਗ੍ਗਹਿਤਤਲ਼ਾਕੇ ਸੁਦ੍ਧਚਿਤ੍ਤਾਨਂ ਮਤ੍ਤਿਕੁਦ੍ਧਰਣਪਾਲ਼ਿਬਨ੍ਧਨਾਦੀਨਿ ਚ ਕਾਤੁਂ ਵਟ੍ਟਤਿ. ਤਂ ਨਿਸ੍ਸਾਯ ਪਨ ਸਸ੍ਸਂ ਕਰੋਨ੍ਤੇ ਦਿਸ੍ਵਾ ਕਪ੍ਪਿਯਕਾਰਕਂ ਠਪੇਤੁਂ ਨ ਵਟ੍ਟਤਿ. ਯਦਿ ਤੇ ਸਯਮੇਵ ਕਪ੍ਪਿਯਭਣ੍ਡਂ ਦੇਨ੍ਤਿ, ਗਹੇਤਬ੍ਬਂ. ਨੋ ਚੇ ਦੇਨ੍ਤਿ, ਨ ਚੋਦੇਤਬ੍ਬਂ, ਨ ਸਾਰੇਤਬ੍ਬਂ. ਪਚ੍ਚਯਵਸੇਨ ਪਟਿਗ੍ਗਹਿਤਤਲ਼ਾਕੇ ਕਪ੍ਪਿਯਕਾਰਕਂ ਠਪੇਤੁਂ ਵਟ੍ਟਤਿ. ਮਤ੍ਤਿਕੁਦ੍ਧਰਣਪਾਲ਼ਿਬਨ੍ਧਨਾਦੀਨਿ ਪਨ ਕਾਤੁਂ ਨ ਵਟ੍ਟਤਿ. ਸਚੇ ਕਪ੍ਪਿਯਕਾਰਕਾ ਸਯਮੇਵ ਕਰੋਨ੍ਤਿ, ਵਟ੍ਟਤਿ. ਅਬ੍ਯਤ੍ਤੇਨ ਪਨ ਲਜ੍ਜਿਭਿਕ੍ਖੁਨਾ ਕਾਰਾਪਿਤੇਸੁ ਕਿਞ੍ਚਾਪਿ ਪਟਿਗ੍ਗਹਣੇ ਕਪ੍ਪਿਯਂ, ਭਿਕ੍ਖੁਸ੍ਸ ਪਯੋਗਪਚ੍ਚਯਾ ਉਪ੍ਪਨ੍ਨੇਨ ਮਿਸ੍ਸਕਤ੍ਤਾ ਵਿਸਗਤਪਿਣ੍ਡਪਾਤੋ ਵਿਯ ਅਕਪ੍ਪਿਯਮਂਸਰਸਮਿਸ੍ਸਕਭੋਜਨਂ ਵਿਯ ਚ ਦੁਬ੍ਬਿਨਿਬ੍ਭੋਗਂ ਹੋਤਿ, ਸਬ੍ਬੇਸਂ ਅਕਪ੍ਪਿਯਮੇਵ.

ਸਚੇ ਪਨ ‘‘ਉਦਕਸ੍ਸ ਓਕਾਸੋ ਅਤ੍ਥਿ, ਤਲ਼ਾਕਸ੍ਸ ਪਾਲ਼ਿ ਥਿਰਾ, ਯਥਾ ਬਹੁਂ ਉਦਕਂ ਗਣ੍ਹਾਤਿ, ਏਵਂ ਕਰੋਹਿ, ਤੀਰਸਮੀਪੇ ਉਦਕਂ ਕਰੋਹੀ’’ਤਿ ਏਵਂ ਉਦਕਮੇਵ ਵਿਚਾਰੇਤਿ, ਵਟ੍ਟਤਿ. ਉਦ੍ਧਨੇ ਅਗ੍ਗਿਂ ਨ ਪਾਤੇਨ੍ਤਿ, ‘‘ਉਦਕਕਮ੍ਮਂ ਲਬ੍ਭਤੁ ਉਪਾਸਕਾ’’ਤਿ ਵਤ੍ਤੁਂ ਵਟ੍ਟਤਿ. ‘‘ਸਸ੍ਸਂ ਕਤ੍ਵਾ ਆਹਰਥਾ’’ਤਿ ਵਤ੍ਤੁਂ ਪਨ ਨ ਵਟ੍ਟਤਿ. ਸਚੇ ਪਨ ਤਲ਼ਾਕੇ ਅਤਿਬਹੁਂ ਉਦਕਂ ਦਿਸ੍ਵਾ ਪਸ੍ਸਤੋ ਵਾ ਪਿਟ੍ਠਿਤੋ ਵਾ ਮਾਤਿਕਂ ਨੀਹਰਾਪੇਤਿ, ਵਨਂ ਛਿਨ੍ਦਾਪੇਤ੍ਵਾ ਕੇਦਾਰੇ ਕਾਰਾਪੇਤਿ, ਪੋਰਾਣਕੇਦਾਰੇਸੁ ਵਾ ਪਕਤਿਭਾਗਂ ਅਗ੍ਗਹੇਤ੍ਵਾ ਅਤਿਰੇਕਂ ਗਣ੍ਹਾਤਿ, ਨਵਸਸ੍ਸੇ ਵਾ ਅਕਾਲਸਸ੍ਸੇ ਵਾ ਅਪਰਿਚ੍ਛਿਨ੍ਨਭਾਗੇ ‘‘ਏਤ੍ਤਕੇ ਕਹਾਪਣੇ ਦੇਥਾ’’ਤਿ ਕਹਾਪਣੇ ਉਟ੍ਠਾਪੇਤਿ, ਸਬ੍ਬੇਸਂ ਅਕਪ੍ਪਿਯਂ.

ਯੋ ਪਨ ‘‘ਕਸ੍ਸਥ ਵਪਥਾ’’ਤਿ ਅਵਤ੍ਵਾ ‘‘ਏਤ੍ਤਕਾਯ ਭੂਮਿਯਾ, ਏਤ੍ਤਕੋ ਨਾਮ ਭਾਗੋ’’ਤਿ ਏਵਂ ਭੂਮਿਂ ਵਾ ਪਤਿਟ੍ਠਪੇਤਿ, ‘‘ਏਤ੍ਤਕੇ ਭੂਮਿਭਾਗੇ ਅਮ੍ਹੇਹਿ ਸਸ੍ਸਂ ਕਤਂ, ਏਤ੍ਤਕਂ ਨਾਮ ਭਾਗਂ ਗਣ੍ਹਥਾ’’ਤਿ ਵਦਨ੍ਤੇਸੁ ਕਸ੍ਸਕੇਸੁ ਭੂਮਿਪ੍ਪਮਾਣਗ੍ਗਹਣਤ੍ਥਂ ਰਜ੍ਜੁਯਾ ਵਾ ਦਣ੍ਡੇਨ ਵਾ ਮਿਨਾਤਿ, ਖਲੇ ਵਾ ਠਤ੍ਵਾ ਰਕ੍ਖਤਿ, ਖਲਤੋ ਵਾ ਨੀਹਰਾਪੇਤਿ, ਕੋਟ੍ਠਾਗਾਰੇ ਵਾ ਪਟਿਸਾਮੇਤਿ, ਤਸ੍ਸੇਵ ਤਂ ਅਕਪ੍ਪਿਯਂ.

ਸਚੇ ਕਸ੍ਸਕਾ ਕਹਾਪਣੇ ਆਹਰਿਤ੍ਵਾ ‘‘ਇਮੇ ਸਙ੍ਘਸ੍ਸ ਆਹਟਾ’’ਤਿ ਵਦਨ੍ਤਿ, ਅਞ੍ਞਤਰੋ ਚ ਭਿਕ੍ਖੁ ‘‘ਨ ਸਙ੍ਘੋ ਕਹਾਪਣੇ ਖਾਦਤੀ’’ਤਿ ਸਞ੍ਞਾਯ ‘‘ਏਤ੍ਤਕੇਹਿ ਕਹਾਪਣੇਹਿ ਸਾਟਕੇ ਆਹਰ, ਏਤ੍ਤਕੇਹਿ ਯਾਗੁਆਦੀਨਿ ਸਮ੍ਪਾਦੇਹੀ’’ਤਿ ਵਦਤਿ. ਯਂ ਤੇ ਆਹਰਨ੍ਤਿ, ਸਬ੍ਬੇਸਂ ਅਕਪ੍ਪਿਯਂ. ਕਸ੍ਮਾ? ਕਹਾਪਣਾਨਂ ਵਿਚਾਰਿਤਤ੍ਤਾ.

ਸਚੇ ਧਞ੍ਞਂ ਆਹਰਿਤ੍ਵਾ ਇਦਂ ਸਙ੍ਘਸ੍ਸ ਆਹਟਨ੍ਤਿ ਵਦਨ੍ਤਿ, ਅਞ੍ਞਤਰੋ ਚ ਭਿਕ੍ਖੁ ਪੁਰਿਮਨਯੇਨੇਵ ‘‘ਏਤ੍ਤਕੇਹਿ ਵੀਹੀਹਿ ਇਦਞ੍ਚਿਦਞ੍ਚ ਆਹਰਥਾ’’ਤਿ ਵਦਤਿ. ਯਂ ਤੇ ਆਹਰਨ੍ਤਿ, ਤਸ੍ਸੇਵ ਅਕਪ੍ਪਿਯਂ. ਕਸ੍ਮਾ? ਧਞ੍ਞਸ੍ਸ ਵਿਚਾਰਿਤਤ੍ਤਾ.

ਸਚੇ ਤਣ੍ਡੁਲਂ ਵਾ ਅਪਰਣ੍ਣਂ ਵਾ ਆਹਰਿਤ੍ਵਾ ‘‘ਇਦਂ ਸਙ੍ਘਸ੍ਸ ਆਹਟ’’ਨ੍ਤਿ ਵਦਨ੍ਤਿ, ਅਞ੍ਞਤਰੋ ਚ ਭਿਕ੍ਖੁ ਪੁਰਿਮਨਯੇਨੇਵ ‘‘ਏਤ੍ਤਕੇਹਿ ਤਣ੍ਡੁਲੇਹਿ ਇਦਞ੍ਚਿਦਞ੍ਚ ਆਹਰਥਾ’’ਤਿ ਵਦਤਿ. ਯਂ ਤੇ ਆਹਰਨ੍ਤਿ, ਸਬ੍ਬੇਸਂ ਕਪ੍ਪਿਯਂ. ਕਸ੍ਮਾ? ਕਪ੍ਪਿਯਾਨਂ ਤਣ੍ਡੁਲਾਦੀਨਂ ਵਿਚਾਰਿਤਤ੍ਤਾ. ਕਯਵਿਕ੍ਕਯੇਪਿ ਅਨਾਪਤ੍ਤਿ, ਕਪ੍ਪਿਯਕਾਰਕਸ੍ਸ ਆਚਿਕ੍ਖਿਤਤ੍ਤਾ.

ਪੁਬ੍ਬੇ ਪਨ ਚਿਤ੍ਤਲਪਬ੍ਬਤੇ ਏਕੋ ਭਿਕ੍ਖੁ ਚਤੁਸਾਲਦ੍ਵਾਰੇ ‘‘ਅਹੋ ਵਤ ਸ੍ਵੇ ਸਙ੍ਘਸ੍ਸ ਏਤ੍ਤਕਪ੍ਪਮਾਣੇ ਪੂਵੇ ਪਚੇਯ੍ਯੁ’’ਨ੍ਤਿ ਆਰਾਮਿਕਾਨਂ ਸਞ੍ਞਾਜਨਨਤ੍ਥਂ ਭੂਮਿਯਂ ਮਣ੍ਡਲਂ ਅਕਾਸਿ, ਤਂ ਦਿਸ੍ਵਾ ਛੇਕੋ ਆਰਾਮਿਕੋ ਤਥੇਵ ਕਤ੍ਵਾ ਦੁਤਿਯਦਿਵਸੇ ਭੇਰਿਯਾ ਆਕੋਟਿਤਾਯ ਸਨ੍ਨਿਪਤਿਤੇ ਸਙ੍ਘੇ ਪੂਵਂ ਗਹੇਤ੍ਵਾ ਸਙ੍ਘਤ੍ਥੇਰਂ ਆਹ – ‘‘ਭਨ੍ਤੇ, ਅਮ੍ਹੇਹਿ ਇਤੋ ਪੁਬ੍ਬੇ ਨੇਵ ਪਿਤੂਨਂ ਨ ਪਿਤਾਮਹਾਨਂ ਏਵਰੂਪਂ ਸੁਤਪੁਬ੍ਬਂ, ਏਕੇਨ ਅਯ੍ਯੇਨ ਚਤੁਸ੍ਸਾਲਦ੍ਵਾਰੇ ਪੂਵਤ੍ਥਾਯ ਸਞ੍ਞਾ ਕਤਾ, ਇਤੋ ਦਾਨਿ ਪਭੁਤਿ ਅਯ੍ਯਾ ਅਤ੍ਤਨੋ ਅਤ੍ਤਨੋ ਚਿਤ੍ਤਾਨੁਰੂਪਂ ਵਦਨ੍ਤੁ, ਅਮ੍ਹਾਕਮ੍ਪਿ ਫਾਸੁਵਿਹਾਰੋ ਭਵਿਸ੍ਸਤੀ’’ਤਿ. ਮਹਾਥੇਰੋ ਤਤੋਵ ਨਿਵਤ੍ਤਿ, ਏਕਭਿਕ੍ਖੁਨਾਪਿ ਪੂਵੋ ਨ ਗਹਿਤੋ. ਏਵਂ ਪੁਬ੍ਬੇ ਤਤ੍ਰੁਪ੍ਪਾਦਮ੍ਪਿ ਨ ਪਰਿਭੁਞ੍ਜਿਂਸੁ. ਤਸ੍ਮਾ –

ਸਲ੍ਲੇਖਂ ਅਚ੍ਚਜਨ੍ਤੇਨ, ਅਪ੍ਪਮਤ੍ਤੇਨ ਭਿਕ੍ਖੁਨਾ;

ਕਪ੍ਪਿਯੇਪਿ ਨ ਕਾਤਬ੍ਬਾ, ਆਮਿਸਤ੍ਥਾਯ ਲੋਲਤਾਤਿ.

ਯੋ ਚਾਯਂ ਤਲ਼ਾਕੇ ਵੁਤ੍ਤੋ, ਪੋਕ੍ਖਰਣੀ-ਉਦਕਵਾਹਕਮਾਤਿਕਾਦੀਸੁਪਿ ਏਸੇਵ ਨਯੋ.

ਪੁਬ੍ਬਣ੍ਣਾਪਰਣ੍ਣਉਚ੍ਛੁਫਲਾਫਲਾਦੀਨਂ ਵਿਰੁਹਨਟ੍ਠਾਨਂ ਯਂ ਕਿਞ੍ਚਿ ਖੇਤ੍ਤਂ ਵਾ ਵਤ੍ਥੁਂ ਵਾ ਦਮ੍ਮੀਤਿ ਵੁਤ੍ਤੇਪਿ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਪਿਤ੍ਵਾ ਤਲ਼ਾਕੇ ਵੁਤ੍ਤਨਯੇਨੇਵ ਯਦਾ ਕਪ੍ਪਿਯਵੋਹਾਰੇਨ ‘‘ਚਤੁਪਚ੍ਚਯਪਰਿਭੋਗਤ੍ਥਾਯ ਦਮ੍ਮੀ’’ਤਿ ਵਦਤਿ, ਤਦਾ ਸਮ੍ਪਟਿਚ੍ਛਿਤਬ੍ਬਂ, ‘‘ਵਨਂ ਦਮ੍ਮਿ, ਅਰਞ੍ਞਂ ਦਮ੍ਮੀ’’ਤਿ ਵੁਤ੍ਤੇ ਪਨ ਵਟ੍ਟਤਿ. ਸਚੇ ਮਨੁਸ੍ਸਾ ਭਿਕ੍ਖੂਹਿ ਅਨਾਣਤ੍ਤਾਯੇਵ ਤਤ੍ਥ ਰੁਕ੍ਖੇ ਛਿਨ੍ਦਿਤ੍ਵਾ ਅਪਰਣ੍ਣਾਦੀਨਿ ਸਮ੍ਪਾਦੇਤ੍ਵਾ ਭਿਕ੍ਖੂਨਂ ਭਾਗਂ ਦੇਨ੍ਤਿ, ਵਟ੍ਟਤਿ; ਅਦੇਨ੍ਤਾ ਨ ਚੋਦੇਤਬ੍ਬਾ. ਸਚੇ ਕੇਨਚਿਦੇਵ ਅਨ੍ਤਰਾਯੇਨ ਤੇਸੁ ਪਕ੍ਕਨ੍ਤੇਸੁ ਅਞ੍ਞੇ ਕਰੋਨ੍ਤਿ, ਨ ਚ ਭਿਕ੍ਖੂਨਂ ਕਿਞ੍ਚਿ ਦੇਨ੍ਤਿ, ਤੇ ਵਾਰੇਤਬ੍ਬਾ. ਸਚੇ ਵਦਨ੍ਤਿ – ‘‘ਨਨੁ, ਭਨ੍ਤੇ, ਪੁਬ੍ਬੇਪਿ ਮਨੁਸ੍ਸਾ ਇਧ ਸਸ੍ਸਾਨਿ ਅਕਂਸੂ’’ਤਿ, ਤਤੋ ਤੇ ਵਤ੍ਤਬ੍ਬਾ – ‘‘ਤੇ ਸਙ੍ਘਸ੍ਸ ਇਦਞ੍ਚਿਦਞ੍ਚ ਕਪ੍ਪਿਯਭਣ੍ਡਂ ਅਦਂਸੂ’’ਤਿ. ਸਚੇ ਵਦਨ੍ਤਿ – ‘‘ਮਯਮ੍ਪਿ ਦਸ੍ਸਾਮਾ’’ਤਿ ਏਵਂ ਵਟ੍ਟਤਿ.

ਕਞ੍ਚਿ ਸਸ੍ਸੁਟ੍ਠਾਨਕਂ ਭੂਮਿਪ੍ਪਦੇਸਂ ਸਨ੍ਧਾਯ ‘‘ਸੀਮਂ ਦੇਮਾ’’ਤਿ ਵਦਨ੍ਤਿ, ਵਟ੍ਟਤਿ. ਸੀਮਾ ਪਰਿਚ੍ਛੇਦਨਤ੍ਥਂ ਪਨ ਥਮ੍ਭਾ ਵਾ ਪਾਸਾਣਾ ਵਾ ਸਯਂ ਨ ਠਪੇਤਬ੍ਬਾ. ਕਸ੍ਮਾ? ਭੂਮਿ ਨਾਮ ਅਨਗ੍ਘਾ ਅਪ੍ਪਕੇਨਾਪਿ ਪਾਰਾਜਿਕੋ ਭਵੇਯ੍ਯ, ਆਰਾਮਿਕਾਨਂ ਪਨ ਵਤ੍ਤਬ੍ਬਂ – ‘‘ਇਮਿਨਾ ਠਾਨੇਨ ਅਮ੍ਹਾਕਂ ਸੀਮਾ ਗਤਾ’’ਤਿ. ਸਚੇਪਿ ਹਿ ਤੇ ਅਧਿਕਂ ਗਣ੍ਹਨ੍ਤਿ, ਪਰਿਯਾਯੇਨ ਕਥਿਤਤ੍ਤਾ ਅਨਾਪਤ੍ਤਿ. ਯਦਿ ਪਨ ਰਾਜਰਾਜਮਹਾਮਤ੍ਤਾਦਯੋ ਸਯਮੇਵ ਥਮ੍ਭੇ ਠਪਾਪੇਤ੍ਵਾ ‘‘ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਥਾ’’ਤਿ ਦੇਨ੍ਤਿ, ਵਟ੍ਟਤਿਯੇਵ.

ਸਚੇ ਕੋਚਿ ਅਨ੍ਤੋਸੀਮਾਯ ਤਲ਼ਾਕਂ ਖਨਤਿ, ਵਿਹਾਰਮਜ੍ਝੇਨ ਵਾ ਮਾਤਿਕਂ ਨੇਤਿ, ਚੇਤਿਯਙ੍ਗਣਬੋਧਿਯਙ੍ਗਣਾਦੀਨਿ ਦੁਸ੍ਸਨ੍ਤਿ, ਵਾਰੇਤਬ੍ਬੋ. ਸਚੇ ਸਙ੍ਘੋ ਕਿਞ੍ਚਿ ਲਭਿਤ੍ਵਾ ਆਮਿਸਗਰੁਕਤਾਯ ਨ ਵਾਰੇਤਿ, ਏਕੋ ਭਿਕ੍ਖੁ ਵਾਰੇਤਿ, ਸੋਵ ਭਿਕ੍ਖੁ ਇਸ੍ਸਰੋ. ਸਚੇ ਏਕੋ ਭਿਕ੍ਖੁ ਨ ਵਾਰੇਤਿ, ‘‘ਨੇਥ ਤੁਮ੍ਹੇ’’ਤਿ ਤੇਸਂਯੇਵ ਪਕ੍ਖੋ ਹੋਤਿ, ਸਙ੍ਘੋ ਵਾਰੇਤਿ, ਸਙ੍ਘੋਵ ਇਸ੍ਸਰੋ. ਸਙ੍ਘਿਕੇਸੁ ਹਿ ਕਮ੍ਮੇਸੁ ਯੋ ਧਮ੍ਮਕਮ੍ਮਂ ਕਰੋਤਿ, ਸੋਵ ਇਸ੍ਸਰੋ. ਸਚੇ ਵਾਰਿਯਮਾਨੋਪਿ ਕਰੋਤਿ, ਹੇਟ੍ਠਾ ਗਹਿਤਂ ਪਂਸੁਂ ਹੇਟ੍ਠਾ ਪਕ੍ਖਿਪਿਤ੍ਵਾ, ਉਪਰਿ ਗਹਿਤਂ ਪਂਸੁਂ ਉਪਰਿ ਪਕ੍ਖਿਪਿਤ੍ਵਾ ਪੂਰੇਤਬ੍ਬਾ.

ਸਚੇ ਕੋਚਿ ਯਥਾਜਾਤਮੇਵ ਉਚ੍ਛੁਂ ਵਾ ਅਪਰਣ੍ਣਂ ਵਾ ਅਲਾਬੁਕੁਮ੍ਭਣ੍ਡਾਦਿਕਂ ਵਾ ਵਲ੍ਲਿਫਲਂ ਦਾਤੁਕਾਮੋ ‘‘ਏਤਂ ਸਬ੍ਬਂ ਉਚ੍ਛੁਖੇਤ੍ਤਂ ਅਪਰਣ੍ਣਵਤ੍ਥੁਂ ਵਲ੍ਲਿਫਲਾਵਾਟਂ ਦਮ੍ਮੀ’’ਤਿ ਵਦਤਿ, ਸਹ ਵਤ੍ਥੁਨਾ ਪਰਾਮਟ੍ਠਤ੍ਤਾ ‘‘ਨ ਵਟ੍ਟਤੀ’’ਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨ ‘‘ਅਭਿਲਾਪਮਤ੍ਤਮੇਤਂ ਸਾਮਿਕਾਨਂਯੇਵ ਹਿ ਸੋ ਭੂਮਿਭਾਗੋ ਤਸ੍ਮਾ ਵਟ੍ਟਤੀ’’ਤਿ ਆਹ.

‘‘ਦਾਸਂ ਦਮ੍ਮੀ’’ਤਿ ਵਦਤਿ, ਨ ਵਟ੍ਟਤਿ. ‘‘ਆਰਾਮਿਕਂ ਦਮ੍ਮਿ, ਵੇਯ੍ਯਾਵਚ੍ਚਕਰਂ ਦਮ੍ਮਿ, ਕਪ੍ਪਿਯਕਾਰਕਂ ਦਮ੍ਮੀ’’ਤਿ ਵੁਤ੍ਤੇ ਵਟ੍ਟਤਿ. ਸਚੇ ਸੋ ਆਰਾਮਿਕੋ ਪੁਰੇਭਤ੍ਤਮ੍ਪਿ ਪਚ੍ਛਾਭਤ੍ਤਮ੍ਪਿ ਸਙ੍ਘਸ੍ਸੇਵ ਕਮ੍ਮਂ ਕਰੋਤਿ, ਸਾਮਣੇਰਸ੍ਸ ਵਿਯ ਸਬ੍ਬਂ ਭੇਸਜ੍ਜਪਟਿਜਗ੍ਗਨਮ੍ਪਿ ਤਸ੍ਸ ਕਾਤਬ੍ਬਂ. ਸਚੇ ਪੁਰੇਭਤ੍ਤਮੇਵ ਸਙ੍ਘਸ੍ਸ ਕਮ੍ਮਂ ਕਰੋਤਿ, ਪਚ੍ਛਾਭਤ੍ਤਂ ਅਤ੍ਤਨੋ ਕਮ੍ਮਂ ਕਰੋਤਿ, ਸਾਯਂ ਨਿਵਾਪੋ ਨ ਦਾਤਬ੍ਬੋ. ਯੇਪਿ ਪਞ੍ਚਦਿਵਸਵਾਰੇਨ ਵਾ ਪਕ੍ਖਵਾਰੇਨ ਵਾ ਸਙ੍ਘਸ੍ਸ ਕਮ੍ਮਂ ਕਤ੍ਵਾ ਸੇਸਕਾਲੇ ਅਤ੍ਤਨੋ ਕਮ੍ਮਂ ਕਰੋਨ੍ਤਿ, ਤੇਸਮ੍ਪਿ ਕਰਣਕਾਲੇਯੇਵ ਭਤ੍ਤਞ੍ਚ ਨਿਵਾਪੋ ਚ ਦਾਤਬ੍ਬੋ. ਸਚੇ ਸਙ੍ਘਸ੍ਸ ਕਮ੍ਮਂ ਨਤ੍ਥਿ, ਅਤ੍ਤਨੋਯੇਵ ਕਮ੍ਮਂ ਕਤ੍ਵਾ ਜੀਵਨ੍ਤਿ, ਤੇ ਚੇ ਹਤ੍ਥਕਮ੍ਮਮੂਲਂ ਆਨੇਤ੍ਵਾ ਦੇਨ੍ਤਿ, ਗਹੇਤਬ੍ਬਂ. ਨੋ ਚੇ ਦੇਨ੍ਤਿ, ਨ ਕਿਞ੍ਚਿ ਵਤ੍ਤਬ੍ਬਾ. ਯਂ ਕਿਞ੍ਚਿ ਰਜਕਦਾਸਮ੍ਪਿ ਪੇਸਕਾਰਦਾਸਮ੍ਪਿ ਆਰਾਮਿਕਨਾਮੇਨ ਸਮ੍ਪਟਿਚ੍ਛਿਤੁਂ ਵਟ੍ਟਤਿ.

ਸਚੇ ‘‘ਗਾਵੋ ਦੇਮਾ’’ਤਿ ਵਦਨ੍ਤਿ, ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਪਿਤਬ੍ਬਾ. ਇਮਾ ਗਾਵੋ ਕੁਤੋਤਿ ਪਣ੍ਡਿਤੇਹਿ ਪਞ੍ਚ ਗੋਰਸਪਰਿਭੋਗਤ੍ਥਾਯ ਦਿਨ੍ਨਾਤਿ, ‘‘ਮਯਮ੍ਪਿ ਪਞ੍ਚਗੋਰਸਪਰਿਭੋਗਤ੍ਥਾਯ ਦੇਮਾ’’ਤਿ ਵੁਤ੍ਤੇ ਵਟ੍ਟਤਿ. ਅਜਿਕਾਦੀਸੁਪਿ ਏਸੇਵ ਨਯੋ. ‘‘ਹਤ੍ਥਿਂ ਦੇਮ, ਅਸ੍ਸਂ ਮਹਿਸਂ ਕੁਕ੍ਕੁਟਂ ਸੂਕਰਂ ਦੇਮਾ’’ਤਿ ਵਦਨ੍ਤਿ, ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ. ਸਚੇ ਕੇਚਿ ਮਨੁਸ੍ਸਾ ‘‘ਅਪ੍ਪੋਸ੍ਸੁਕ੍ਕਾ, ਭਨ੍ਤੇ, ਤੁਮ੍ਹੇ ਹੋਥ, ਮਯਂ ਇਮੇ ਗਹੇਤ੍ਵਾ ਤੁਮ੍ਹਾਕਂ ਕਪ੍ਪਿਯਭਣ੍ਡਂ ਦਸ੍ਸਾਮਾ’’ਤਿ ਗਣ੍ਹਨ੍ਤਿ, ਵਟ੍ਟਤਿ. ‘‘ਕੁਕ੍ਕੁਟਸੂਕਰਾ ਸੁਖਂ ਜੀਵਨ੍ਤੂ’’ਤਿ ਅਰਞ੍ਞੇ ਵਿਸ੍ਸਜ੍ਜੇਤੁਂ ਵਟ੍ਟਤਿ. ‘‘ਇਮਂ ਤਲ਼ਾਕਂ, ਇਮਂ ਖੇਤ੍ਤਂ, ਇਮਂ ਵਤ੍ਥੁਂ, ਵਿਹਾਰਸ੍ਸ ਦੇਮਾ’’ਤਿ ਵੁਤ੍ਤੇ ਪਟਿਕ੍ਖਿਪਿਤੁਂ ਨ ਲਬ੍ਭਤੀਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.

ਸਮੁਟ੍ਠਾਨਾਦੀਸੁ ਇਦਮ੍ਪਿ ਛਸਮੁਟ੍ਠਾਨਂ ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਰਾਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਚੀਵਰਵਗ੍ਗੋ ਪਠਮੋ.