੨. ਕੋਸਿਯਵਗ੍ਗੋ

੧. ਕੋਸਿਯਸਿਕ੍ਖਾਪਦਵਣ੍ਣਨਾ

੫੪੨. ਤੇਨ ਸਮਯੇਨਾਤਿ ਕੋਸਿਯਸਿਕ੍ਖਾਪਦਂ. ਤਤ੍ਥ ਸਨ੍ਥਰਿਤ੍ਵਾ ਕਤਂ ਹੋਤੀਤਿ ਸਮੇ ਭੂਮਿਭਾਗੇ ਕੋਸਿਯਂਸੂਨਿ ਉਪਰੂਪਰਿ ਸਨ੍ਥਰਿਤ੍ਵਾ ਕਞ੍ਜਿਕਾਦੀਹਿ ਸਿਞ੍ਚਿਤ੍ਵਾ ਕਤਂ ਹੋਤਿ. ਏਕੇਨਪਿ ਕੋਸਿਯਂਸੁਨਾ ਮਿਸ੍ਸਿਤ੍ਵਾਤਿ ਤਿਟ੍ਠਤੁ ਅਤ੍ਤਨੋ ਰੁਚਿਵਸੇਨ ਮਿਸ੍ਸਿਤਂ, ਸਚੇਪਿ ਤਸ੍ਸ ਕਰਣਟ੍ਠਾਨੇ ਵਾਤੋ ਏਕਂ ਕੋਸਿਯਂਸੁਂ ਆਨੇਤ੍ਵਾ ਪਾਤੇਤਿ, ਏਵਮ੍ਪਿ ਮਿਸ੍ਸੇਤ੍ਵਾ ਕਤਮੇਵ ਹੋਤੀਤਿ. ਸੇਸਂ ਉਤ੍ਤਾਨਤ੍ਥਮੇਵ.

ਛਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ,

ਤਿਚਿਤ੍ਤਂ, ਤਿਵੇਦਨਨ੍ਤਿ.

ਕੋਸਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਸੁਦ੍ਧਕਾਲ਼ਕਸਿਕ੍ਖਾਪਦਵਣ੍ਣਨਾ

੫੪੭. ਤੇਨ ਸਮਯੇਨਾਤਿ ਸੁਦ੍ਧਕਾਲ਼ਕਸਿਕ੍ਖਾਪਦਂ. ਤਤ੍ਥ ਸੁਦ੍ਧਕਾਲ਼ਕਾਨਨ੍ਤਿ ਸੁਦ੍ਧਾਨਂ ਕਾਲ਼ਕਾਨਂ, ਅਞ੍ਞੇਹਿ ਅਮਿਸ੍ਸਿਤਕਾਲ਼ਕਾਨਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵ. ਸਮੁਟ੍ਠਾਨਾਦੀਨਿਪਿ ਕੋਸਿਯਸਿਕ੍ਖਾਪਦਸਦਿਸਾਨੇਵਾਤਿ.

ਸੁਦ੍ਧਕਾਲ਼ਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਦ੍ਵੇਭਾਗਸਿਕ੍ਖਾਪਦਵਣ੍ਣਨਾ

੫੫੨. ਤੇਨ ਸਮਯੇਨਾਤਿ ਦ੍ਵੇਭਾਗਸਿਕ੍ਖਾਪਦਂ. ਤਤ੍ਥ ਅਨ੍ਤੇ ਆਦਿਯਿਤ੍ਵਾਤਿ ਸਨ੍ਥਤਸ੍ਸ ਅਨ੍ਤੇ ਅਨੁਵਾਤਂ ਵਿਯ ਦਸ੍ਸੇਤ੍ਵਾ ਓਦਾਤਂ ਅਲ੍ਲਿਯਾਪੇਤ੍ਵਾ.

ਦ੍ਵੇ ਭਾਗਾਤਿ ਦ੍ਵੇ ਕੋਟ੍ਠਾਸਾ. ਆਦਾਤਬ੍ਬਾਤਿ ਗਹੇਤਬ੍ਬਾ. ਗੋਚਰਿਯਾਨਨ੍ਤਿ ਕਪਿਲਵਣ੍ਣਾਨਂ. ਦ੍ਵੇ ਤੁਲਾ ਆਦਾਤਬ੍ਬਾਤਿ ਚਤੂਹਿ ਤੁਲਾਹਿ ਕਾਰੇਤੁਕਾਮਂ ਸਨ੍ਧਾਯ ਵੁਤ੍ਤਂ. ਅਤ੍ਥਤੋ ਪਨ ਯਤ੍ਤਕੇਹਿ ਏਲ਼ਕਲੋਮੇਹਿ ਕਾਤੁਕਾਮੋ ਹੋਤਿ, ਤੇਸੁ ਦ੍ਵੇ ਕੋਟ੍ਠਾਸਾ ਕਾਲ਼ਕਾਨਂ ਏਕੋ ਓਦਾਤਾਨਂ, ਏਕੋ ਗੋਚਰਿਯਾਨਨ੍ਤਿ ਇਦਮੇਵ ਦਸ੍ਸਿਤਂ ਹੋਤੀਤਿ ਵੇਦਿਤਬ੍ਬਂ. ਸੇਸਂ ਉਤ੍ਤਾਨਤ੍ਥਮੇਵ.

ਸਮੁਟ੍ਠਾਨਾਦੀਨਿਪਿ ਕੋਸਿਯਸਿਕ੍ਖਾਪਦਸਦਿਸਾਨੇਵ. ਕੇਵਲਂ ਇਦਂ ਆਦਾਯ ਅਨਾਦਾਯ ਚ ਕਰਣਤੋ ਕਿਰਿਯਾਕਿਰਿਯਂ ਵੇਦਿਤਬ੍ਬਨ੍ਤਿ.

ਦ੍ਵੇਭਾਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਛਬ੍ਬਸ੍ਸਸਿਕ੍ਖਾਪਦਵਣ੍ਣਨਾ

੫੫੭. ਤੇਨ ਸਮਯੇਨਾਤਿ ਛਬ੍ਬਸ੍ਸਸਿਕ੍ਖਾਪਦਂ. ਤਤ੍ਥ ਊਹਦਨ੍ਤਿਪਿ ਉਮ੍ਮਿਹਨ੍ਤਿਪੀਤਿ ਸਨ੍ਥਤਾਨਂ ਉਪਰਿ ਵਚ੍ਚਮ੍ਪਿ ਪਸ੍ਸਾਵਮ੍ਪਿ ਕਰੋਨ੍ਤੀਤਿ ਵੁਤ੍ਤਂ ਹੋਤਿ.

ਦਿਨ੍ਨਾ ਸਙ੍ਘੇਨ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਸਨ੍ਥਤਸਮ੍ਮੁਤੀਤਿ ਏਵਂ ਲਦ੍ਧਸਮ੍ਮੁਤਿਕੋ ਭਿਕ੍ਖੁ ਯਾਵ ਰੋਗੋ ਨ ਵੂਪਸਮ੍ਮਤਿ, ਤਾਵ ਯਂ ਯਂ ਠਾਨਂ ਗਚ੍ਛਤਿ, ਤਤ੍ਥ ਤਤ੍ਥ ਸਨ੍ਥਤਂ ਕਾਤੁਂ ਲਭਤਿ. ਸਚੇ ਅਰੋਗੋ ਹੁਤ੍ਵਾ ਪੁਨ ਮੂਲਬ੍ਯਾਧਿਨਾਵ ਗਿਲਾਨੋ ਹੋਤਿ, ਸੋਯੇਵ ਪਰਿਹਾਰੋ, ਨਤ੍ਥਞ੍ਞਂ ਸਮ੍ਮੁਤਿਕਿਚ੍ਚਨ੍ਤਿ ਫੁਸ੍ਸਦੇਵਤ੍ਥੇਰੋ ਆਹ. ਉਪਤਿਸ੍ਸਤ੍ਥੇਰੋ ਪਨ ‘‘ਸੋ ਵਾ ਬ੍ਯਾਧਿ ਪਟਿਕੁਪ੍ਪਤੁ, ਅਞ੍ਞੋ ਵਾ, ‘ਸਕਿਂ ਗਿਲਾਨੋ’ਤਿ ਨਾਮਂ ਲਦ੍ਧਂ ਲਦ੍ਧਮੇਵ, ਪੁਨ ਸਮ੍ਮੁਤਿਕਿਚ੍ਚਂ ਨਤ੍ਥੀ’’ਤਿ ਆਹ.

ਓਰੇਨ ਚੇ ਛਨ੍ਨਂ ਵਸ੍ਸਾਨਨ੍ਤਿ ਛਨ੍ਨਂ ਵਸ੍ਸਾਨਂ ਓਰਿਮਭਾਗੇ, ਅਨ੍ਤੋਤਿ ਅਤ੍ਥੋ. ਪਦਭਾਜਨੇ ਪਨ ਸਙ੍ਖ੍ਯਾਮਤ੍ਤਦਸ੍ਸਨਤ੍ਥਂ ‘‘ਊਨਕਛਬ੍ਬਸ੍ਸਾਨੀ’’ਤਿ ਵੁਤ੍ਤਂ.

ਅਨਾਪਤ੍ਤਿ ਛਬ੍ਬਸ੍ਸਾਨਿ ਕਰੋਤੀਤਿ ਯਦਾ ਛਬ੍ਬਸ੍ਸਾਨਿ ਪਰਿਪੁਣ੍ਣਾਨਿ ਹੋਨ੍ਤਿ, ਤਦਾ ਸਨ੍ਥਤਂ ਕਰੋਤਿ. ਦੁਤਿਯਪਦੇਪਿ ‘‘ਯਦਾ ਅਤਿਰੇਕਛਬ੍ਬਸ੍ਸਾਨਿ ਹੋਨ੍ਤਿ, ਤਦਾ ਕਰੋਤੀ’’ਤਿ ਏਵਮਤ੍ਥੋ ਦਟ੍ਠਬ੍ਬੋ. ਨ ਹਿ ਸੋ ਛਬ੍ਬਸ੍ਸਾਨਿ ਕਰੋਤੀਤਿ. ਸੇਸਂ ਉਤ੍ਤਾਨਤ੍ਥਮੇਵ.

ਸਮੁਟ੍ਠਾਨਾਦੀਨਿ ਕੋਸਿਯਸਿਕ੍ਖਾਪਦਸਦਿਸਾਨੇਵਾਤਿ.

ਛਬ੍ਬਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਨਿਸੀਦਨਸਨ੍ਥਤਸਿਕ੍ਖਾਪਦਵਣ੍ਣਨਾ

੫੬੫. ਤੇਨ ਸਮਯੇਨਾਤਿ ਨਿਸੀਦਨਸਨ੍ਥਤਸਿਕ੍ਖਾਪਦਂ. ਤਤ੍ਥ ਇਚ੍ਛਾਮਹਂ ਭਿਕ੍ਖਵੇਤਿ ਭਗਵਾ ਕਿਰ ਤਂ ਤੇਮਾਸਂ ਨ ਕਿਞ੍ਚਿ ਬੋਧਨੇਯ੍ਯਸਤ੍ਤਂ ਅਦ੍ਦਸ, ਤਸ੍ਮਾ ਏਵਮਾਹ. ਏਵਂ ਸਨ੍ਤੇਪਿ ਤਨ੍ਤਿਵਸੇਨ ਧਮ੍ਮਦੇਸਨਾ ਕਤ੍ਤਬ੍ਬਾ ਸਿਯਾ. ਯਸ੍ਮਾ ਪਨਸ੍ਸ ਏਤਦਹੋਸਿ – ‘‘ਮਯਿ ਓਕਾਸਂ ਕਾਰੇਤ੍ਵਾ ਪਟਿਸਲ੍ਲੀਨੇ ਭਿਕ੍ਖੂ ਅਧਮ੍ਮਿਕਂ ਕਤਿਕਵਤ੍ਤਂ ਕਰਿਸ੍ਸਨ੍ਤਿ, ਤਂ ਉਪਸੇਨੋ ਭਿਨ੍ਦਿਸ੍ਸਤਿ. ਅਹਂ ਤਸ੍ਸ ਪਸੀਦਿਤ੍ਵਾ ਭਿਕ੍ਖੂਨਂ ਦਸ੍ਸਨਂ ਅਨੁਜਾਨਿਸ੍ਸਾਮਿ, ਤਤੋ ਮਂ ਪਸ੍ਸਿਤੁਕਾਮਾ ਬਹੂ ਭਿਕ੍ਖੂ ਧੁਤਙ੍ਗਾਨਿ ਸਮਾਦਿਯਿਸ੍ਸਨ੍ਤਿ, ਅਹਞ੍ਚ ਤੇਹਿ ਉਜ੍ਝਿਤਸਨ੍ਥਤਪਚ੍ਚਯਾ ਸਿਕ੍ਖਾਪਦਂ ਪਞ੍ਞਪੇਸ੍ਸਾਮੀ’’ਤਿ, ਤਸ੍ਮਾ ਏਵਮਾਹ. ਏਵਂ ਬਹੂਨਿ ਹਿ ਏਤ੍ਥ ਆਨਿਸਂਸਾਨੀਤਿ.

ਸਪਰਿਸੋ ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਥੇਰੋ ਕਿਰ ‘‘ਨ, ਭਿਕ੍ਖਵੇ, ਊਨਦਸਵਸ੍ਸੇਨ ਉਪਸਮ੍ਪਾਦੇਤਬ੍ਬੋ, ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੭੫) ਇਮਸ੍ਮਿਂ ਖਨ੍ਧਕਸਿਕ੍ਖਾਪਦੇ ‘‘ਕਥਞ੍ਹਿ ਨਾਮ ਤ੍ਵਂ ਮੋਘਪੁਰਿਸ ਅਞ੍ਞੇਹਿ ਓਵਦਿਯੋ ਅਨੁਸਾਸਿਯੋ ਅਞ੍ਞਂ ਓਵਦਿਤੁਂ ਅਨੁਸਾਸਿਤੁਂ ਮਞ੍ਞਿਸ੍ਸਸੀ’’ਤਿ ਏਵਮਾਦਿਨਾ ਨਯੇਨ ਗਰਹਂ ਲਭਿਤ੍ਵਾ ‘‘ਸਤ੍ਥਾ ਮਯ੍ਹਂ ਪਰਿਸਂ ਨਿਸ੍ਸਾਯ ਗਰਹਂ ਅਦਾਸਿ, ਸੋ ਦਾਨਾਹਂ ਭਗਵਨ੍ਤਂ ਤੇਨੇਵ ਪੁਣ੍ਣਚਨ੍ਦਸਸ੍ਸਿਰੀਕੇਨ ਸਬ੍ਬਾਕਾਰਪਰਿਪੁਣ੍ਣੇਨ ਮੁਖੇਨ ਬ੍ਰਹ੍ਮਘੋਸਂ ਨਿਚ੍ਛਾਰੇਤ੍ਵਾ ਪਰਿਸਂਯੇਵ ਨਿਸ੍ਸਾਯ ਸਾਧੁਕਾਰਂ ਦਾਪੇਸ੍ਸਾਮੀ’’ਤਿ ਸੁਹਦਯੋ ਕੁਲਪੁਤ੍ਤੋ ਅਤਿਰੇਕਯੋਜਨਸਤਂ ਪਟਿਕ੍ਕਮਿਤ੍ਵਾ ਪਰਿਸਂ ਚਿਨਿਤ੍ਵਾ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਪਰਿਵੁਤੋ ਪੁਨ ਭਗਵਨ੍ਤਂ ਉਪਸਙ੍ਕਮਨ੍ਤੋ. ਤੇਨ ਵੁਤ੍ਤਂ – ‘‘ਸਪਰਿਸੋ ਯੇਨ ਭਗਵਾ ਤੇਨੁਪਸਙ੍ਕਮੀ’’ਤਿ. ਨ ਹਿ ਸਕ੍ਕਾ ਬੁਦ੍ਧਾਨਂ ਅਞ੍ਞਥਾ ਆਰਾਧੇਤੁਂ ਅਞ੍ਞਤ੍ਰ ਵਤ੍ਤਸਮ੍ਪਤ੍ਤਿਯਾ.

ਭਗਵਤੋ ਅਵਿਦੂਰੇ ਨਿਸਿਨ੍ਨੋਤਿ ਵਤ੍ਤਸਮ੍ਪਤ੍ਤਿਯਾ ਪਰਿਸੁਦ੍ਧਭਾਵੇਨ ਨਿਰਾਸਙ੍ਕੋ ਸੀਹੋ ਵਿਯ ਕਞ੍ਚਨਪਬ੍ਬਤਸ੍ਸ ਭਗਵਤੋ ਅਵਿਦੂਰੇ ਨਿਸਿਨ੍ਨੋ. ਏਤਦਵੋਚਾਤਿ ਕਥਾਸਮੁਟ੍ਠਾਪਨਤ੍ਥਂ ਏਤਂ ਅਵੋਚ. ਮਨਾਪਾਨਿ ਤੇ ਭਿਕ੍ਖੁ ਪਂਸੁਕੂਲਾਨੀਤਿ ਭਿਕ੍ਖੁ ਤਵ ਇਮਾਨਿ ਪਂਸੁਕੂਲਾਨਿ ਮਨਾਪਾਨਿ, ਅਤ੍ਤਨੋ ਰੁਚਿਯਾ ਖਨ੍ਤਿਯਾ ਗਹਿਤਾਨੀਤਿ ਅਤ੍ਥੋ. ਨ ਖੋ ਮੇ, ਭਨ੍ਤੇ, ਮਨਾਪਾਨੀਤਿ, ਭਨ੍ਤੇ ਨ ਮਯਾ ਅਤ੍ਤਨੋ ਰੁਚਿਯਾ ਗਹਿਤਾਨਿ, ਗਲਗ੍ਗਾਹੇਨ ਵਿਯ ਮਤ੍ਥਕਤਾਲ਼ਨੇਨ ਵਿਯ ਚ ਗਾਹਿਤੋਮ੍ਹੀਤਿ ਦਸ੍ਸੇਤਿ.

ਪਞ੍ਞਾਯਿਸ੍ਸਤੀਤਿ ਪਞ੍ਞਾਤੋ ਅਭਿਞ੍ਞਾਤੋ ਭਵਿਸ੍ਸਤਿ, ਤਤ੍ਥ ਸਨ੍ਦਿਸ੍ਸਿਸ੍ਸਤੀਤਿ ਵੁਤ੍ਤਂ ਹੋਤਿ. ਨ ਮਯਂ ਅਪਞ੍ਞਤ੍ਤਂ ਪਞ੍ਞਪੇਸ੍ਸਾਮਾਤਿ ਮਯਂ ਸਾਵਕਾ ਨਾਮ ਅਪਞ੍ਞਤ੍ਤਂ ਨ ਪਞ੍ਞਪੇਸ੍ਸਾਮ, ਬੁਦ੍ਧਵਿਸਯੋ ਹਿ ਏਸੋ ਯਦਿਦਂ ‘‘ਪਾਚਿਤ੍ਤਿਯਂ ਦੁਕ੍ਕਟ’’ਨ੍ਤਿਆਦਿਨਾ ਨਯੇਨ ਅਪਞ੍ਞਤ੍ਤਸਿਕ੍ਖਾਪਦਪਞ੍ਞਪਨਂ ਪਞ੍ਞਤ੍ਤਸਮੁਚ੍ਛਿਨ੍ਦਨਂ ਵਾ. ਸਮਾਦਾਯਾਤਿ ਤਂ ਤਂ ਸਿਕ੍ਖਾਪਦਂ ਸਮਾਦਿਯਿਤ੍ਵਾ, ‘‘ਸਾਧੁ ਸੁਟ੍ਠੂ’’ਤਿ ਸਮ੍ਪਟਿਚ੍ਛਿਤ੍ਵਾ ਯਥਾਪਞ੍ਞਤ੍ਤੇਸੁ ਸਬ੍ਬਸਿਕ੍ਖਾਪਦੇਸੁ ਸਿਕ੍ਖਿਸ੍ਸਾਮਾਤਿ ਦਸ੍ਸੇਤਿ. ਤਸ੍ਸ ਆਰਦ੍ਧਚਿਤ੍ਤੋ ਪੁਨਪਿ ‘‘ਸਾਧੁ ਸਾਧੂ’’ਤਿ ਸਾਧੁਕਾਰਮਦਾਸਿ.

੫੬੬. ਅਨੁਞ੍ਞਾਤਾਵੁਸੋਤਿ ਅਨੁਞ੍ਞਾਤਂ, ਆਵੁਸੋ. ਪਿਹੇਨ੍ਤਾਤਿ ਪਿਹਯਨ੍ਤਾ. ਸਨ੍ਥਤਾਨਿ ਉਜ੍ਝਿਤ੍ਵਾਤਿ ਸਨ੍ਥਤੇ ਚਤੁਤ੍ਥਚੀਵਰਸਞ੍ਞਿਤਾਯ ਸਬ੍ਬਸਨ੍ਥਤਾਨਿ ਉਜ੍ਝਿਤ੍ਵਾ. ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸੀਤਿ ਭਗਵਾ ਸਨ੍ਥਤਾਨਿ ਵਿਪ੍ਪਕਿਣ੍ਣਾਨਿ ਦਿਸ੍ਵਾ ‘‘ਸਦ੍ਧਾਦੇਯ੍ਯਵਿਨਿਪਾਤਨੇ ਕਾਰਣਂ ਨਤ੍ਥਿ, ਪਰਿਭੋਗੁਪਾਯਂ ਨੇਸਂ ਦਸ੍ਸੇਸ੍ਸਾਮੀ’’ਤਿ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ.

੫੬੭. ਸਕਿਂ ਨਿਵਤ੍ਥਮ੍ਪਿ ਸਕਿਂ ਪਾਰੁਤਮ੍ਪੀਤਿ ਸਕਿਂ ਨਿਸਿਨ੍ਨਞ੍ਚੇਵ ਨਿਪਨ੍ਨਞ੍ਚ. ਸਾਮਨ੍ਤਾਤਿ ਏਕਪਸ੍ਸਤੋ ਵਟ੍ਟਂ ਵਾ ਚਤੁਰਸ੍ਸਂ ਵਾ ਛਿਨ੍ਦਿਤ੍ਵਾ ਗਹਿਤਟ੍ਠਾਨਂ ਯਥਾ ਵਿਦਤ੍ਥਿਮਤ੍ਤਂ ਹੋਤਿ, ਏਵਂ ਗਹੇਤਬ੍ਬਂ, ਸਨ੍ਥਰਨ੍ਤੇਨ ਪਨ ਪਾਲ਼ਿਯਂ ਵੁਤ੍ਤਨਯੇਨੇਵ ਏਕਦੇਸੇ ਵਾ ਸਨ੍ਥਰਿਤਬ੍ਬਂ, ਵਿਜਟੇਤ੍ਵਾ ਵਾ ਮਿਸ੍ਸਕਂ ਕਤ੍ਵਾ ਸਨ੍ਥਰਿਤਬ੍ਬਂ, ਏਵਂ ਥਿਰਤਰਂ ਹੋਤੀਤਿ. ਸੇਸਂ ਉਤ੍ਤਾਨਤ੍ਥਮੇਵ.

ਸਮੁਟ੍ਠਾਨਾਦੀਨਿ ਕਿਰਿਯਾਕਿਰਿਯਤ੍ਤਾ ਇਮਸ੍ਸ ਸਿਕ੍ਖਾਪਦਸ੍ਸ ਦ੍ਵੇਭਾਗਸਿਕ੍ਖਾਪਦਸਦਿਸਾਨੀਤਿ.

ਇਮੇਸੁ ਪਨ ਪਞ੍ਚਸੁ ਸਨ੍ਥਤੇਸੁ ਪੁਰਿਮਾਨਿ ਤੀਣਿ ਵਿਨਯਕਮ੍ਮਂ ਕਤ੍ਵਾ ਪਟਿਲਭਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਨ੍ਤਿ, ਪਚ੍ਛਿਮਾਨਿ ਦ੍ਵੇ ਵਟ੍ਟਨ੍ਤੀਤਿ ਵੇਦਿਤਬ੍ਬਾਨੀਤਿ.

ਨਿਸੀਦਨਸਨ੍ਥਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਏਲ਼ਕਲੋਮਸਿਕ੍ਖਾਪਦਵਣ੍ਣਨਾ

੫੭੧. ਤੇਨ ਸਮਯੇਨਾਤਿ ਏਲ਼ਕਲੋਮਸਿਕ੍ਖਾਪਦਂ. ਤਤ੍ਥ ਉਪ੍ਪਣ੍ਡੇਸੁਨ੍ਤਿ ‘‘ਕਿਤ੍ਤਕੇਨ, ਭਨ੍ਤੇ, ਕੀਤਾਨੀ’’ਤਿਆਦੀਨਿ ਵਦਨ੍ਤਾ ਅਵਹਸਿਂਸੁ. ਠਿਤਕੋਵ ਆਸੁਮ੍ਭੀਤਿ ਯਥਾ ਮਨੁਸ੍ਸਾ ਅਰਞ੍ਞਤੋ ਮਹਨ੍ਤਂ ਦਾਰੁਭਾਰਂ ਆਨੇਤ੍ਵਾ ਕਿਲਨ੍ਤਾ ਠਿਤਕਾਵ ਪਾਤੇਨ੍ਤਿ, ਏਵਂ ਪਾਤੇਸੀਤਿ ਅਤ੍ਥੋ.

੫੭੨. ਸਹਤ੍ਥਾਤਿ ਸਹਤ੍ਥੇਨ, ਅਤ੍ਤਨਾ ਹਰਿਤਬ੍ਬਾਨੀਤਿ ਵੁਤ੍ਤਂ ਹੋਤਿ. ਬਹਿਤਿਯੋਜਨਂ ਪਾਤੇਤੀਤਿ ਤਿਯੋਜਨਤੋ ਬਹਿ ਪਾਤੇਤਿ. ਅਨਨ੍ਤਰਾਯੇਨ ਪਤਨਕੇ ਹਤ੍ਥਤੋ ਮੁਤ੍ਤਮਤ੍ਤੇ ਲੋਮਗਣਨਾਯ ਨਿਸ੍ਸਗ੍ਗਿਯਪਾਚਿਤ੍ਤਿਯਾਨਿ. ਸਚੇ ਬਹਿਤਿਯੋਜਨੇ ਰੁਕ੍ਖੇ ਵਾ ਥਮ੍ਭੇ ਵਾ ਪਟਿਹਞ੍ਞਿਤ੍ਵਾ ਪੁਨ ਅਨ੍ਤੋ ਪਤਨ੍ਤਿ, ਅਨਾਪਤ੍ਤਿ. ਭੂਮਿਯਂ ਪਤਿਤ੍ਵਾ ਠਤ੍ਵਾ ਠਤ੍ਵਾ ਵਟ੍ਟਮਾਨਾ ਏਲ਼ਕਲੋਮਭਣ੍ਡਿਕਾ ਪੁਨ ਅਨ੍ਤੋ ਪਵਿਸਤਿ, ਆਪਤ੍ਤਿਯੇਵ. ਅਨ੍ਤੋ ਠਤ੍ਵਾ ਹਤ੍ਥੇਨ ਵਾ ਪਾਦੇਨ ਵਾ ਯਟ੍ਠਿਯਾ ਵਾ ਵਟ੍ਟੇਤਿ ਠਤ੍ਵਾ ਵਾ ਅਠਤ੍ਵਾ ਵਾ ਵਟ੍ਟਮਾਨਾ ਭਣ੍ਡਿਕਾ ਗਚ੍ਛਤੁ, ਆਪਤ੍ਤਿਯੇਵ. ‘‘ਅਞ੍ਞੋ ਹਰਿਸ੍ਸਤੀ’’ਤਿ ਠਪੇਤਿ, ਤੇਨ ਹਰਿਤੇਪਿ ਆਪਤ੍ਤਿਯੇਵ. ਸੁਦ੍ਧਚਿਤ੍ਤੇਨ ਠਪਿਤਂ ਵਾਤੋ ਵਾ ਅਞ੍ਞੋ ਵਾ ਅਤ੍ਤਨੋ ਧਮ੍ਮਤਾਯ ਬਹਿ ਪਾਤੇਤਿ, ਆਪਤ੍ਤਿਯੇਵ. ਸਉਸ੍ਸਾਹਤ੍ਤਾ ਅਚਿਤ੍ਤਕਤ੍ਤਾ ਚ ਸਿਕ੍ਖਾਪਦਸ੍ਸ. ਕੁਰੁਨ੍ਦਿਯਾਦੀਸੁ ਪਨ ‘‘ਏਤ੍ਥ ਅਨਾਪਤ੍ਤੀ’’ਤਿ ਵੁਤ੍ਤਾ, ਸਾ ਅਨਾਪਤ੍ਤਿ ਪਾਲ਼ਿਯਾ ਨ ਸਮੇਤਿ. ਉਭਤੋਭਣ੍ਡਿਕਂ ਏਕਾਬਦ੍ਧਂ ਕਤ੍ਵਾ ਏਕਂ ਭਣ੍ਡਿਕਂ ਅਨ੍ਤੋਸੀਮਾਯ ਏਕਂ ਬਹਿਸੀਮਾਯ ਕਰੋਨ੍ਤੋ ਠਪੇਤਿ, ਰਕ੍ਖਤਿ ਤਾਵ. ਏਕਾਬਦ੍ਧੇ ਕਾਜੇਪਿ ਏਸੇਵ ਨਯੋ. ਯਦਿ ਪਨ ਅਬਨ੍ਧਿਤ੍ਵਾ ਕਾਜਕੋਟਿਯਂ ਠਪਿਤਮਤ੍ਤਮੇਵ ਹੋਤਿ, ਨ ਰਕ੍ਖਤਿ. ਏਕਾਬਦ੍ਧੇਪਿ ਪਰਿਵਤ੍ਤੇਤ੍ਵਾ ਠਪਿਤੇ ਆਪਤ੍ਤਿਯੇਵ.

ਅਞ੍ਞਸ੍ਸ ਯਾਨੇ ਵਾਤਿ ਏਤ੍ਥ ਗਚ੍ਛਨ੍ਤੇ ਯਾਨੇ ਵਾ ਹਤ੍ਥਿਪਿਟ੍ਠਿਆਦੀਸੁ ਵਾ ਸਾਮਿਕਸ੍ਸ ਅਜਾਨਨ੍ਤਸ੍ਸੇਵ ਹਰਿਸ੍ਸਤੀਤਿ ਠਪੇਤਿ, ਤਸ੍ਮਿਂ ਤਿਯੋਜਨਂ ਅਤਿਕ੍ਕਨ੍ਤੇ ਆਪਤ੍ਤਿ. ਅਗਚ੍ਛਨ੍ਤੇਪਿ ਏਸੇਵ ਨਯੋ. ਸਚੇ ਪਨ ਅਗਚ੍ਛਨ੍ਤੇ ਯਾਨੇ ਵਾ ਹਤ੍ਥਿਪਿਟ੍ਠਿਯਾਦੀਸੁ ਵਾ ਠਪੇਤ੍ਵਾ ਅਭਿਰੁਹਿਤ੍ਵਾ ਸਾਰੇਤਿ, ਹੇਟ੍ਠਾ ਵਾ ਗਚ੍ਛਨ੍ਤੋ ਚੋਦੇਤਿ, ਪਕ੍ਕੋਸਨ੍ਤੋ ਵਾ ਅਨੁਬਨ੍ਧਾਪੇਤਿ, ‘‘ਅਞ੍ਞਂ ਹਰਾਪੇਤੀ’’ਤਿ ਵਚਨਤੋ ਅਨਾਪਤ੍ਤਿ. ਕੁਰੁਨ੍ਦਿਯਾਦੀਸੁ ਪਨ ‘‘ਆਪਤ੍ਤੀ’’ਤਿ ਵੁਤ੍ਤਂ, ਤਂ ‘‘ਅਞ੍ਞਂ ਹਰਾਪੇਤੀ’’ਤਿ ਇਮਿਨਾ ਨ ਸਮੇਤਿ. ਅਦਿਨ੍ਨਾਦਾਨੇ ਪਨ ਸੁਙ੍ਕਘਾਤੇ ਆਪਤ੍ਤਿ ਹੋਤਿ. ਯਾ ਹਿ ਤਤ੍ਥ ਆਪਤ੍ਤਿ, ਸਾ ਇਧ ਅਨਾਪਤ੍ਤਿ. ਯਾ ਇਧ ਆਪਤ੍ਤਿ, ਸਾ ਤਤ੍ਥ ਅਨਾਪਤ੍ਤਿ. ਤਂ ਠਾਨਂ ਪਤ੍ਵਾ ਅਞ੍ਞਵਿਹਿਤੋ ਵਾ ਚੋਰਾਦੀਹਿ ਵਾ ਉਪਦ੍ਦੁਤੋ ਗਚ੍ਛਤਿ, ਆਪਤ੍ਤਿਯੇਵ. ਸਬ੍ਬਤ੍ਥ ਲੋਮਗਣਨਾਯ ਆਪਤ੍ਤਿਪਰਿਚ੍ਛੇਦੋ ਵੇਦਿਤਬ੍ਬੋ.

੫੭੫. ਤਿਯੋਜਨਂ ਵਾਸਾਧਿਪ੍ਪਾਯੋ ਗਨ੍ਤ੍ਵਾ ਤਤੋ ਪਰਂ ਹਰਤੀਤਿ ਯਤ੍ਥ ਗਤੋ, ਤਤ੍ਥ ਉਦ੍ਦੇਸਪਰਿਪੁਚ੍ਛਾਦੀਨਂ ਵਾ ਪਚ੍ਚਯਾਦੀਨਂ ਵਾ ਅਲਾਭੇਨ ਤਤੋ ਪਰਂ ਅਞ੍ਞਤ੍ਥ ਗਚ੍ਛਤਿ, ਤਤੋਪਿ ਅਞ੍ਞਤ੍ਥਾਤਿ ਏਵਂ ਯੋਜਨਸਤਮ੍ਪਿ ਹਰਨ੍ਤਸ੍ਸ ਅਨਾਪਤ੍ਤਿ. ਅਚ੍ਛਿਨ੍ਨਂ ਪਟਿਲਭਿਤ੍ਵਾਤਿ ਚੋਰਾ ਅਚ੍ਛਿਨ੍ਦਿਤ੍ਵਾ ਨਿਰਤ੍ਥਕਭਾਵਂ ਞਤ੍ਵਾ ਪਟਿਦੇਨ੍ਤਿ, ਤਂ ਹਰਨ੍ਤਸ੍ਸ ਅਨਾਪਤ੍ਤਿ. ਨਿਸ੍ਸਟ੍ਠਂ ਪਟਿਲਭਿਤ੍ਵਾਤਿ ਵਿਨਯਕਮ੍ਮਕਤਂ ਪਟਿਲਭਿਤ੍ਵਾਤਿ ਅਤ੍ਥੋ.

ਕਤਭਣ੍ਡਨ੍ਤਿ ਕਤਂਭਣ੍ਡਂ ਕਮ੍ਬਲਕੋਜਵਸਨ੍ਥਤਾਦਿਂ ਯਂ ਕਿਞ੍ਚਿ ਅਨ੍ਤਮਸੋ ਸੁਤ੍ਤਕੇਨ ਬਦ੍ਧਮਤ੍ਤਮ੍ਪਿ. ਯੋ ਪਨ ਤਨੁਕਪਤ੍ਤਤ੍ਥਵਿਕਨ੍ਤਰੇ ਵਾ ਆਯੋਗਅਂਸਬਦ੍ਧਕਕਾਯਬਨ੍ਧਨਾਦੀਨਂ ਅਨ੍ਤਰੇਸੁ ਵਾ ਪਿਪ੍ਫਲਿਕਾਦੀਨਂ ਮਲਰਕ੍ਖਣਤ੍ਥਂ ਸਿਪਾਟਿਕਾਯ ਵਾ ਅਨ੍ਤਮਸੋ ਵਾਤਾਬਾਧਿਕੋ ਕਣ੍ਣਚ੍ਛਿਦ੍ਦੇਪਿ ਲੋਮਾਨਿ ਪਕ੍ਖਿਪਿਤ੍ਵਾ ਗਚ੍ਛਤਿ, ਆਪਤ੍ਤਿਯੇਵ. ਸੁਤ੍ਤਕੇਨ ਪਨ ਬਨ੍ਧਿਤ੍ਵਾ ਪਕ੍ਖਿਤ੍ਤਂ ਕਤਭਣ੍ਡਟ੍ਠਾਨੇ ਤਿਟ੍ਠਤਿ, ਵੇਣਿਂ ਕਤ੍ਵਾ ਹਰਤਿ, ਇਦਂ ਨਿਧਾਨਮੁਖਂ ਨਾਮ, ਆਪਤ੍ਤਿਯੇਵਾਤਿ. ਸੇਸਂ ਉਤ੍ਤਾਨਤ੍ਥਮੇਵ.

ਸਮੁਟ੍ਠਾਨਾਦੀਸੁ ਇਦਂ ਏਲ਼ਕਲੋਮਸਮੁਟ੍ਠਾਨਂ ਨਾਮ, ਕਾਯਤੋ ਚ ਕਾਯਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਏਲ਼ਕਲੋਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਏਲ਼ਕਲੋਮਧੋਵਾਪਨਸਿਕ੍ਖਾਪਦਵਣ੍ਣਨਾ

੫੭੬. ਤੇਨ ਸਮਯੇਨਾਤਿ ਏਲ਼ਕਲੋਮਧੋਵਾਪਨਸਿਕ੍ਖਾਪਦਂ. ਤਤ੍ਥ ਰਿਞ੍ਚਨ੍ਤੀਤਿ ਉਜ੍ਝਨ੍ਤਿ ਵਿਸ੍ਸਜ੍ਜੇਨ੍ਤਿ, ਨ ਸਕ੍ਕੋਨ੍ਤਿ ਅਨੁਯੁਞ੍ਜਿਤੁਨ੍ਤਿ ਵੁਤ੍ਤਂ ਹੋਤਿ. ਸੇਸਮੇਤ੍ਥ ਪੁਰਾਣਚੀਵਰਸਿਕ੍ਖਾਪਦੇ ਵੁਤ੍ਤਨਯੇਨੇਵ ਸਦ੍ਧਿਂ ਸਮੁਟ੍ਠਾਨਾਦੀਹੀਤਿ.

ਏਲ਼ਕਲੋਮਧੋਵਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਰੂਪਿਯਸਿਕ੍ਖਾਪਦਵਣ੍ਣਨਾ

੫੮੨. ਤੇਨ ਸਮਯੇਨਾਤਿ ਰੂਪਿਯਸਿਕ੍ਖਾਪਦਂ. ਤਤ੍ਥ ਪਟਿਵਿਸੋਤਿ ਕੋਟ੍ਠਾਸੋ.

੫੮੩-੪. ਜਾਤਰੂਪਰਜਤਨ੍ਤਿ ਏਤ੍ਥ ਜਾਤਰੂਪਨ੍ਤਿ ਸੁਵਣ੍ਣਸ੍ਸ ਨਾਮਂ. ਤਂ ਪਨ ਯਸ੍ਮਾ ਤਥਾਗਤਸ੍ਸ ਵਣ੍ਣਸਦਿਸਂ ਹੋਤਿ, ਤਸ੍ਮਾ ‘‘ਸਤ੍ਥੁਵਣ੍ਣੋ ਵੁਚ੍ਚਤੀ’’ਤਿ ਪਦਭਾਜਨੇ ਵੁਤ੍ਤਂ. ਤਸ੍ਸਤ੍ਥੋ – ‘‘ਯੋ ਸਤ੍ਥੁਵਣ੍ਣੋ ਲੋਹਵਿਸੇਸੋ, ਇਦਂ ਜਾਤਰੂਪਂ ਨਾਮਾ’’ਤਿ ਰਜਤਂ ਪਨ ‘‘ਸਙ੍ਖੋ, ਸਿਲਾ, ਪਵਾਲ, ਰਜਤਂ, ਜਾਤਰੂਪ’’ਨ੍ਤਿਆਦੀਸੁ (ਪਾਚਿ. ੫੦੬) ਰੂਪਿਯਂ ਵੁਤ੍ਤਂ. ਇਧ ਪਨ ਯਂ ਕਿਞ੍ਚਿ ਵੋਹਾਰਗਮਨੀਯਂ ਕਹਾਪਣਾਦਿ ਅਧਿਪ੍ਪੇਤਂ. ਤੇਨੇਵਸ੍ਸ ਪਦਭਾਜਨੇ ‘‘ਕਹਾਪਣੋ ਲੋਹਮਾਸਕੋ’’ਤਿਆਦਿ ਵੁਤ੍ਤਂ. ਤਤ੍ਥ ਕਹਾਪਣੋਤਿ ਸੋਵਣ੍ਣਮਯੋ ਵਾ ਰੂਪਿਯਮਯੋ ਵਾ ਪਾਕਤਿਕੋ ਵਾ. ਲੋਹਮਾਸਕੋਤਿ ਤਮ੍ਬਲੋਹਾਦੀਹਿ ਕਤਮਾਸਕੋ. ਦਾਰੁਮਾਸਕੋਤਿ ਸਾਰਦਾਰੁਨਾ ਵਾ ਵੇਲ਼ੁਪੇਸਿਕਾਯ ਵਾ ਅਨ੍ਤਮਸੋ ਤਾਲਪਣ੍ਣੇਨਾਪਿ ਰੂਪਂ ਛਿਨ੍ਦਿਤ੍ਵਾ ਕਤਮਾਸਕੋ. ਜਤੁਮਾਸਕੋਤਿ ਲਾਖਾਯ ਵਾ ਨਿਯ੍ਯਾਸੇਨ ਵਾ ਰੂਪਂ ਸਮੁਟ੍ਠਾਪੇਤ੍ਵਾ ਕਤਮਾਸਕੋ. ‘‘ਯੇ ਵੋਹਾਰਂ ਗਚ੍ਛਨ੍ਤੀ’’ਤਿ ਇਮਿਨਾ ਪਨ ਪਦੇਨ ਯੋ ਯੋ ਯਤ੍ਥ ਯਤ੍ਥ ਜਨਪਦੇ ਯਦਾ ਯਦਾ ਵੋਹਾਰਂ ਗਚ੍ਛਤਿ, ਅਨ੍ਤਮਸੋ ਅਟ੍ਠਿਮਯੋਪਿ ਚਮ੍ਮਮਯੋਪਿ ਰੁਕ੍ਖਫਲਬੀਜਮਯੋਪਿ ਸਮੁਟ੍ਠਾਪਿਤਰੂਪੋਪਿ ਅਸਮੁਟ੍ਠਾਪਿਤਰੂਪੋਪਿ ਸਬ੍ਬੋ ਸਙ੍ਗਹਿਤੋ.

ਇਚ੍ਚੇਤਂ ਸਬ੍ਬਮ੍ਪਿ ਰਜਤਂ ਜਾਤਰੂਪਂ ਜਾਤਰੂਪਮਾਸਕੋ, ਵੁਤ੍ਤਪ੍ਪਭੇਦੋ ਸਬ੍ਬੋਪਿ ਰਜਤਮਾਸਕੋਤਿ ਚਤੁਬ੍ਬਿਧਂ ਨਿਸ੍ਸਗ੍ਗਿਯਵਤ੍ਥੁ ਹੋਤਿ. ਮੁਤ੍ਤਾ, ਮਣਿ, ਵੇਲ਼ੁਰਿਯੋ, ਸਙ੍ਖੋ, ਸਿਲਾ, ਪਵਾਲ, ਲੋਹਿਤਙ੍ਕੋ, ਮਸਾਰਗਲ੍ਲਂ, ਸਤ੍ਤ ਧਞ੍ਞਾਨਿ, ਦਾਸਿਦਾਸਖੇਤ੍ਤਵਤ੍ਥੁਪੁਪ੍ਫਾਰਾਮਫਲਾਰਾਮਾਦਯੋਤਿ ਇਦਂ ਦੁਕ੍ਕਟਵਤ੍ਥੁ. ਸੁਤ੍ਤਂ ਫਾਲੋ ਪਟਕੋ ਕਪ੍ਪਾਸੋ ਅਨੇਕਪ੍ਪਕਾਰਂ ਅਪਰਣ੍ਣਂ ਸਪ੍ਪਿਨਵਨੀਤਤੇਲਮਧੁਫਾਣਿਤਾਦਿਭੇਸਜ੍ਜਞ੍ਚ ਇਦਂ ਕਪ੍ਪਿਯਵਤ੍ਥੁ. ਤਤ੍ਥ ਨਿਸ੍ਸਗ੍ਗਿਯਵਤ੍ਥੁਂ ਅਤ੍ਤਨੋ ਵਾ ਸਙ੍ਘਗਣਪੁਗ੍ਗਲਚੇਤਿਯਾਨਂ ਵਾ ਅਤ੍ਥਾਯ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ. ਅਤ੍ਤਨੋ ਅਤ੍ਥਾਯ ਸਮ੍ਪਟਿਚ੍ਛਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ ਹੋਤਿ, ਸੇਸਾਨਂ ਅਤ੍ਥਾਯ ਦੁਕ੍ਕਟਂ. ਦੁਕ੍ਕਟਵਤ੍ਥੁਂ ਸਬ੍ਬੇਸਮ੍ਪਿ ਅਤ੍ਥਾਯ ਸਮ੍ਪਟਿਚ੍ਛਤੋ ਦੁਕ੍ਕਟਮੇਵ. ਕਪ੍ਪਿਯਵਤ੍ਥੁਮ੍ਹਿ ਅਨਾਪਤ੍ਤਿ. ਸਬ੍ਬਮ੍ਪਿ ਨਿਕ੍ਖਿਪਨਤ੍ਥਾਯ ਭਣ੍ਡਾਗਾਰਿਕਸੀਸੇਨ ਸਮ੍ਪਟਿਚ੍ਛਤੋ ਉਪਰਿ ਰਤਨਸਿਕ੍ਖਾਪਦੇ ਆਗਤਵਸੇਨ ਪਾਚਿਤ੍ਤਿਯਂ.

ਉਗ੍ਗਣ੍ਹੇਯ੍ਯਾਤਿ ਗਣ੍ਹੇਯ੍ਯ. ਯਸ੍ਮਾ ਪਨ ਗਣ੍ਹਨ੍ਤੋ ਆਪਤ੍ਤਿਂ ਆਪਜ੍ਜਤਿ, ਤੇਨਸ੍ਸ ਪਦਭਾਜਨੇ ‘‘ਸਯਂ ਗਣ੍ਹਾਤਿ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ ਵੁਤ੍ਤਂ. ਏਸ ਨਯੋ ਸੇਸਪਦੇਸੁਪਿ.

ਤਤ੍ਥ ਜਾਤਰੂਪਰਜਤਭਣ੍ਡੇਸੁ ਕਹਾਪਣਮਾਸਕੇਸੁ ਚ ਏਕਂ ਗਣ੍ਹਤੋ ਵਾ ਗਣ੍ਹਾਪਯਤੋ ਵਾ ਏਕਾ ਆਪਤ੍ਤਿ. ਸਹਸ੍ਸਂ ਚੇਪਿ ਏਕਤੋ ਗਣ੍ਹਾਤਿ, ਗਣ੍ਹਾਪੇਤਿ, ਵਤ੍ਥੁਗਣਨਾਯ ਆਪਤ੍ਤਿਯੋ. ਮਹਾਪਚ੍ਚਰਿਯਂ ਪਨ ਕੁਰੁਨ੍ਦਿਯਞ੍ਚ ਸਿਥਿਲਬਦ੍ਧਾਯ ਥਵਿਕਾਯ ਸਿਥਿਲਪੂਰਿਤੇ ਵਾ ਭਾਜਨੇ ਰੂਪਗਣਨਾਯ ਆਪਤ੍ਤਿ. ਘਨਬਦ੍ਧੇ ਪਨ ਘਨਪੂਰਿਤੇ ਵਾ ਏਕਾਵ ਆਪਤ੍ਤੀਤਿ ਵੁਤ੍ਤਂ.

ਉਪਨਿਕ੍ਖਿਤ੍ਤਸਾਦਿਯਨੇ ਪਨ ‘‘ਇਦਂ ਅਯ੍ਯਸ੍ਸ ਹੋਤੂ’’ਤਿ ਵੁਤ੍ਤੇ ਸਚੇਪਿ ਚਿਤ੍ਤੇਨ ਸਾਦਿਯਤਿ, ਗਣ੍ਹਿਤੁਕਾਮੋ ਹੋਤਿ, ਕਾਯੇਨ ਵਾ ਵਾਚਾਯ ਵਾ ‘‘ਨਯਿਦਂ ਕਪ੍ਪਤੀ’’ਤਿ ਪਟਿਕ੍ਖਿਪਤਿ, ਅਨਾਪਤ੍ਤਿ. ਕਾਯਵਾਚਾਹਿ ਵਾ ਅਪ੍ਪਟਿਕ੍ਖਿਪਿਤ੍ਵਾਪਿ ਸੁਦ੍ਧਚਿਤ੍ਤੋ ਹੁਤ੍ਵਾ ‘‘ਨਯਿਦਂ ਅਮ੍ਹਾਕਂ ਕਪ੍ਪਤੀ’’ਤਿ ਨ ਸਾਦਿਯਤਿ, ਅਨਾਪਤ੍ਤਿਯੇਵ. ਤੀਸੁ ਦ੍ਵਾਰੇਸੁ ਹਿ ਯੇਨ ਕੇਨਚਿ ਪਟਿਕ੍ਖਿਤ੍ਤਂ ਪਟਿਕ੍ਖਿਤ੍ਤਮੇਵ ਹੋਤਿ. ਸਚੇ ਪਨ ਕਾਯਵਾਚਾਹਿ ਅਪ੍ਪਟਿਕ੍ਖਿਪਿਤ੍ਵਾ ਚਿਤ੍ਤੇਨ ਅਧਿਵਾਸੇਤਿ, ਕਾਯਵਾਚਾਹਿ ਕਤ੍ਤਬ੍ਬਸ੍ਸ ਪਟਿਕ੍ਖੇਪਸ੍ਸ ਅਕਰਣਤੋ ਅਕਿਰਿਯਸਮੁਟ੍ਠਾਨਂ ਕਾਯਦ੍ਵਾਰੇ ਚ ਵਚੀਦ੍ਵਾਰੇ ਚ ਆਪਤ੍ਤਿਂ ਆਪਜ੍ਜਤਿ, ਮਨੋਦ੍ਵਾਰੇ ਪਨ ਆਪਤ੍ਤਿ ਨਾਮ ਨਤ੍ਥਿ.

ਏਕੋ ਸਤਂ ਵਾ ਸਹਸ੍ਸਂ ਵਾ ਪਾਦਮੂਲੇ ਠਪੇਤਿ ‘‘ਤੁਯ੍ਹਿਦਂ ਹੋਤੂ’’ਤਿ, ਭਿਕ੍ਖੂ ‘‘ਨਯਿਦਂ ਕਪ੍ਪਤੀ’’ਤਿ ਪਟਿਕ੍ਖਿਪਤਿ, ਉਪਾਸਕੋ ਪਰਿਚ੍ਚਤ੍ਤਂ ਮਯਾ ਤੁਮ੍ਹਾਕਨ੍ਤਿ ਗਤੋ, ਅਞ੍ਞੋ ਤਤ੍ਥ ਆਗਨ੍ਤ੍ਵਾ ਪੁਚ੍ਛਤਿ – ‘‘ਕਿਂ, ਭਨ੍ਤੇ, ਇਦ’’ਨ੍ਤਿ? ਯਂ ਤੇਨ ਅਤ੍ਤਨਾ ਚ ਵੁਤ੍ਤਂ, ਤਂ ਆਚਿਕ੍ਖਿਤਬ੍ਬਂ. ਸੋ ਚੇ ਵਦਤਿ – ‘‘ਗੋਪਯਿਸ੍ਸਾਮਿ, ਭਨ੍ਤੇ, ਗੁਤ੍ਤਟ੍ਠਾਨਂ ਦਸ੍ਸੇਥਾ’’ਤਿ, ਸਤ੍ਤਭੂਮਿਕਮ੍ਪਿ ਪਾਸਾਦਂ ਅਭਿਰੁਹਿਤ੍ਵਾ ‘‘ਇਦਂ ਗੁਤ੍ਤਟ੍ਠਾਨ’’ਨ੍ਤਿ ਆਚਿਕ੍ਖਿਤਬ੍ਬਂ, ‘‘ਇਧ ਨਿਕ੍ਖਿਪਾਹੀ’’ਤਿ ਨ ਵਤ੍ਤਬ੍ਬਂ. ਏਤ੍ਤਾਵਤਾ ਕਪ੍ਪਿਯਞ੍ਚ ਅਕਪ੍ਪਿਯਞ੍ਚ ਨਿਸ੍ਸਾਯ ਠਿਤਂ ਹੋਤਿ. ਦ੍ਵਾਰਂ ਪਿਦਹਿਤ੍ਵਾ ਰਕ੍ਖਨ੍ਤੇਨ ਵਸਿਤਬ੍ਬਂ. ਸਚੇ ਕਿਞ੍ਚਿ ਵਿਕ੍ਕਾਯਿਕਭਣ੍ਡਂ ਪਤ੍ਤਂ ਵਾ ਚੀਵਰਂ ਵਾ ਆਗਚ੍ਛਤਿ, ‘‘ਇਦਂ ਗਹੇਸ੍ਸਥ ਭਨ੍ਤੇ’’ਤਿ ਵੁਤ੍ਤੇ ‘‘ਉਪਾਸਕ ਅਤ੍ਥਿ ਅਮ੍ਹਾਕਂ ਇਮਿਨਾ ਅਤ੍ਥੋ, ਵਤ੍ਥੁ ਚ ਏਵਰੂਪਂ ਨਾਮ ਸਂਵਿਜ੍ਜਤਿ, ਕਪ੍ਪਿਯਕਾਰਕੋ ਨਤ੍ਥੀ’’ਤਿ ਵਤ੍ਤਬ੍ਬਂ. ਸਚੇ ਸੋ ਵਦਤਿ, ‘‘ਅਹਂ ਕਪ੍ਪਿਯਕਾਰਕੋ ਭਵਿਸ੍ਸਾਮਿ, ਦ੍ਵਾਰਂ ਵਿਵਰਿਤ੍ਵਾ ਦੇਥਾ’’ਤਿ, ਦ੍ਵਾਰਂ ਵਿਵਰਿਤ੍ਵਾ ‘‘ਇਮਸ੍ਮਿਂ ਓਕਾਸੇ ਠਪਿਤ’’ਨ੍ਤਿ ਵਤ੍ਤਬ੍ਬਂ, ‘‘ਇਦਂ ਗਣ੍ਹਾ’’ਤਿ ਨ ਵਤ੍ਤਬ੍ਬਂ. ਏਵਮ੍ਪਿ ਕਪ੍ਪਿਯਞ੍ਚ ਅਕਪ੍ਪਿਯਞ੍ਚ ਨਿਸ੍ਸਾਯ ਠਿਤਮੇਵ ਹੋਤਿ, ਸੋ ਚੇ ਤਂ ਗਹੇਤ੍ਵਾ ਤਸ੍ਸ ਕਪ੍ਪਿਯਭਣ੍ਡਂ ਦੇਤਿ, ਵਟ੍ਟਤਿ. ਸਚੇ ਅਧਿਕਂ ਗਣ੍ਹਾਤਿ, ‘‘ਨ ਮਯਂ ਤਵ ਭਣ੍ਡਂ ਗਣ੍ਹਾਮ, ‘‘ਨਿਕ੍ਖਮਾਹੀ’’ਤਿ ਵਤ੍ਤਬ੍ਬੋ.

ਸਙ੍ਘਮਜ੍ਝੇ ਨਿਸ੍ਸਜ੍ਜਿਤਬ੍ਬਨ੍ਤਿ ਏਤ੍ਥ ਯਸ੍ਮਾ ਰੂਪਿਯਂ ਨਾਮ ਅਕਪ੍ਪਿਯਂ, ‘‘ਤਸ੍ਮਾ ਨਿਸ੍ਸਜ੍ਜਿਤਬ੍ਬਂ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ’’ਤਿ ਨ ਵੁਤ੍ਤਂ. ਯਸ੍ਮਾ ਪਨ ਤਂ ਪਟਿਗ੍ਗਹਿਤਮਤ੍ਤਮੇਵ ਨ ਤੇਨ ਕਿਞ੍ਚਿ ਕਪ੍ਪਿਯਭਣ੍ਡਂ ਚੇਤਾਪਿਤਂ, ਤਸ੍ਮਾ ਉਪਾਯੇਨ ਪਰਿਭੋਗਦਸ੍ਸਨਤ੍ਥਂ ‘‘ਸਙ੍ਘਮਜ੍ਝੇ ਨਿਸ੍ਸਜ੍ਜਿਤਬ੍ਬ’’ਨ੍ਤਿ ਵੁਤ੍ਤਂ. ਕਪ੍ਪਿਯਂ ਆਚਿਕ੍ਖਿਤਬ੍ਬਂ ਸਪ੍ਪਿ ਵਾਤਿ ‘‘ਪਬ੍ਬਜਿਤਾਨਂ ਸਪ੍ਪਿ ਵਾ ਤੇਲਂ ਵਾ ਵਟ੍ਟਤਿ ਉਪਾਸਕਾ’’ਤਿ ਏਵਂ ਆਚਿਕ੍ਖਿਤਬ੍ਬਂ.

ਰੂਪਿਯਪਟਿਗ੍ਗਾਹਕਂ ਠਪੇਤ੍ਵਾ ਸਬ੍ਬੇਹੇਵ ਪਰਿਭੁਞ੍ਜਿਤਬ੍ਬਨ੍ਤਿ ਸਬ੍ਬੇਹਿ ਭਾਜੇਤ੍ਵਾ ਪਰਿਭੁਞ੍ਜਿਤਬ੍ਬਂ. ਰੂਪਿਯਪਟਿਗ੍ਗਾਹਕੇਨ ਭਾਗੋ ਨ ਗਹੇਤਬ੍ਬੋ. ਅਞ੍ਞੇਸਂ ਭਿਕ੍ਖੂਨਂ ਵਾ ਆਰਾਮਿਕਾਨਂ ਵਾ ਪਤ੍ਤਭਾਗਮ੍ਪਿ ਲਭਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਤਿ, ਅਨ੍ਤਮਸੋ ਮਕ੍ਕਟਾਦੀਹਿ ਤਤੋ ਹਰਿਤ੍ਵਾ ਅਰਞ੍ਞੇ ਠਪਿਤਂ ਵਾ ਤੇਸਂ ਹਤ੍ਥਤੋ ਗਲ਼ਿਤਂ ਵਾ ਤਿਰਚ੍ਛਾਨਗਤਪਰਿਗ੍ਗਹਿਤਮ੍ਪਿ ਪਂਸੁਕੂਲਮ੍ਪਿ ਨ ਵਟ੍ਟਤਿਯੇਵ, ਤਤੋ ਆਹਟੇਨ ਫਾਣਿਤੇਨ ਸੇਨਾਸਨਧੂਪਨਮ੍ਪਿ ਨ ਵਟ੍ਟਤਿ. ਸਪ੍ਪਿਨਾ ਵਾ ਤੇਲੇਨ ਵਾ ਪਦੀਪਂ ਕਤ੍ਵਾ ਦੀਪਾਲੋਕੇ ਨਿਪਜ੍ਜਿਤੁਂ ਕਸਿਣਪਰਿਕਮ੍ਮਮ੍ਪਿ ਕਾਤੁਂ, ਪੋਤ੍ਥਕਮ੍ਪਿ ਵਾਚੇਤੁਂ ਨ ਵਟ੍ਟਤਿ. ਤੇਲਮਧੁਫਾਣਿਤੇਹਿ ਪਨ ਸਰੀਰੇ ਵਣਂ ਮਕ੍ਖੇਤੁਂ ਨ ਵਟ੍ਟਤਿਯੇਵ. ਤੇਨ ਵਤ੍ਥੁਨਾ ਮਞ੍ਚਪੀਠਾਦੀਨਿ ਵਾ ਗਣ੍ਹਨ੍ਤਿ, ਉਪੋਸਥਾਗਾਰਂ ਵਾ ਭੋਜਨਸਾਲਂ ਵਾ ਕਰੋਨ੍ਤਿ, ਪਰਿਭੁਞ੍ਜਿਤੁਂ ਨ ਵਟ੍ਟਤਿ. ਛਾਯਾਪਿ ਗੇਹਪਰਿਚ੍ਛੇਦੇਨ ਠਿਤਾ ਨ ਵਟ੍ਟਤਿ, ਪਰਿਚ੍ਛੇਦਾਤਿਕ੍ਕਨ੍ਤਾ ਆਗਨ੍ਤੁਕਤ੍ਤਾ ਵਟ੍ਟਤਿ. ਤਂ ਵਤ੍ਥੁਂ ਵਿਸ੍ਸਜ੍ਜੇਤ੍ਵਾ ਕਤੇਨ ਮਗ੍ਗੇਨਪਿ ਸੇਤੁਨਾਪਿ ਨਾਵਾਯਪਿ ਉਲ਼ੁਮ੍ਪੇਨਪਿ ਗਨ੍ਤੁਂ ਨ ਵਟ੍ਟਤਿ, ਤੇਨ ਵਤ੍ਥੁਨਾ ਖਨਾਪਿਤਾਯ ਪੋਕ੍ਖਰਣਿਯਾ ਉਬ੍ਭਿਦੋਦਕਂ ਪਾਤੁਂ ਵਾ ਪਰਿਭੁਞ੍ਜਿਤੁਂ ਵਾ ਨ ਵਟ੍ਟਤਿ. ਅਨ੍ਤੋ ਉਦਕੇ ਪਨ ਅਸਤਿ ਅਞ੍ਞਂ ਆਗਨ੍ਤੁਕਂ ਉਦਕਂ ਵਾ ਵਸ੍ਸੋਦਕਂ ਵਾ ਪਵਿਟ੍ਠਂ ਵਟ੍ਟਤਿ. ਕੀਤਾਯ ਯੇਨ ਉਦਕੇਨ ਸਦ੍ਧਿਂ ਕੀਤਾ ਤਂ ਆਗਨ੍ਤੁਕਮ੍ਪਿ ਨ ਵਟ੍ਟਤਿ, ਤਂ ਵਤ੍ਥੁਂ ਉਪਨਿਕ੍ਖੇਪਂ ਠਪੇਤ੍ਵਾ ਸਙ੍ਘੋ ਪਚ੍ਚਯੇ ਪਰਿਭੁਞ੍ਜਤਿ, ਤੇਪਿ ਪਚ੍ਚਯਾ ਤਸ੍ਸ ਨ ਵਟ੍ਟਨ੍ਤਿ. ਆਰਾਮੋ ਗਹਿਤੋ ਹੋਤਿ, ਸੋਪਿ ਪਰਿਭੁਞ੍ਜਿਤੁਂ ਨ ਵਟ੍ਟਤਿ. ਯਦਿ ਭੂਮਿਪਿ ਬੀਜਮ੍ਪਿ ਅਕਪ੍ਪਿਯਂ ਨੇਵ ਭੂਮਿਂ ਨ ਫਲਂ ਪਰਿਭੁਞ੍ਜਿਤੁਂ ਵਟ੍ਟਤਿ. ਸਚੇ ਭੂਮਿਂਯੇਵ ਕਿਣਿਤ੍ਵਾ ਅਞ੍ਞਾਨਿ ਬੀਜਾਨਿ ਰੋਪਿਤਾਨਿ ਫਲਂ ਵਟ੍ਟਤਿ, ਅਥ ਬੀਜਾਨਿ ਕਿਣਿਤ੍ਵਾ ਕਪ੍ਪਿਯਭੂਮਿਯਂ ਰੋਪਿਤਾਨਿ, ਫਲਂ ਨ ਵਟ੍ਟਤਿ, ਭੂਮਿਯਂ ਨਿਸੀਦਿਤੁਂ ਵਾ ਨਿਪਜ੍ਜਿਤੁਂ ਵਾ ਵਟ੍ਟਤਿ.

ਸਚੇ ਸੋ ਛਡ੍ਡੇਤੀਤਿ ਯਤ੍ਥ ਕਤ੍ਥਚਿ ਖਿਪਤਿ, ਅਥਾਪਿ ਨ ਛਡ੍ਡੇਤਿ, ਸਯਂ ਗਹੇਤ੍ਵਾ ਗਚ੍ਛਤਿ, ਨ ਵਾਰੇਤਬ੍ਬੋ. ਨੋ ਚੇ ਛਡ੍ਡੇਤੀਤਿ ਅਥ ਨੇਵ ਗਹੇਤ੍ਵਾ ਗਚ੍ਛਤਿ, ਨ ਛਡ੍ਡੇਤਿ, ਕਿਂ ਮਯ੍ਹਂ ਇਮਿਨਾ ਬ੍ਯਾਪਾਰੇਨਾਤਿ ਯੇਨ ਕਾਮਂ ਪਕ੍ਕਮਤਿ, ਤਤੋ ਯਥਾਵੁਤ੍ਤਲਕ੍ਖਣੋ ਰੂਪਿਯਛਡ੍ਡਕੋ ਸਮ੍ਮਨ੍ਨਿਤਬ੍ਬੋ.

ਯੋ ਨ ਛਨ੍ਦਾਗਤਿਨ੍ਤਿਆਦੀਸੁ ਲੋਭਵਸੇਨ ਤਂ ਵਤ੍ਥੁਂ ਅਤ੍ਤਨੋ ਵਾ ਕਰੋਨ੍ਤੋ ਅਤ੍ਤਾਨਂ ਵਾ ਉਕ੍ਕਂਸੇਨ੍ਤੋ ਛਨ੍ਦਾਗਤਿਂ ਨਾਮ ਗਚ੍ਛਤਿ. ਦੋਸਵਸੇਨ ‘‘ਨੇਵਾਯਂ ਮਾਤਿਕਂ ਜਾਨਾਤਿ, ਨ ਵਿਨਯ’’ਨ੍ਤਿ ਪਰਂ ਅਪਸਾਦੇਨ੍ਤੋ ਦੋਸਾਗਤਿਂ ਨਾਮ ਗਚ੍ਛਤਿ. ਮੋਹਵਸੇਨ ਮੁਟ੍ਠਪਮੁਟ੍ਠਸ੍ਸਤਿਭਾਵਂ ਆਪਜ੍ਜਨ੍ਤੋ ਮੋਹਾਗਤਿਂ ਨਾਮ ਗਚ੍ਛਤਿ. ਰੂਪਿਯਪਟਿਗ੍ਗਾਹਕਸ੍ਸ ਭਯੇਨ ਛਡ੍ਡੇਤੁਂ ਅਵਿਸਹਨ੍ਤੋ ਭਯਾਗਤਿਂ ਨਾਮ ਗਚ੍ਛਤਿ. ਏਵਂ ਅਕਰੋਨ੍ਤੋ ਨ ਛਨ੍ਦਾਗਤਿਂ ਗਚ੍ਛਤਿ, ਨ ਦੋਸਾਗਤਿਂ ਗਚ੍ਛਤਿ, ਨ ਮੋਹਾਗਤਿਂ ਗਚ੍ਛਤਿ, ਨ ਭਯਾਗਤਿਂ ਗਚ੍ਛਤੀਤਿ ਵੇਦਿਤਬ੍ਬੋ.

੫੮੫. ਅਨਿਮਿਤ੍ਤਂ ਕਤ੍ਵਾਤਿ ਨਿਮਿਤ੍ਤਂ ਅਕਤ੍ਵਾ, ਅਕ੍ਖੀਨਿ ਨਿਮ੍ਮੀਲੇਤ੍ਵਾ ਨਦਿਯਾ ਵਾ ਪਪਾਤੇ ਵਾ ਵਨਗਹਨੇ ਵਾ ਗੂਥਂ ਵਿਯ ਅਨਪੇਕ੍ਖੇਨ ਪਤਿਤੋਕਾਸਂ ਅਸਮਨ੍ਨਾਹਰਨ੍ਤੇਨ ਪਾਤੇਤਬ੍ਬਨ੍ਤਿ ਅਤ੍ਥੋ. ਏਵਂ ਜਿਗੁਚ੍ਛਿਤਬ੍ਬੇਪਿ ਰੂਪਿਯੇ ਭਗਵਾ ਪਰਿਯਾਯੇਨ ਭਿਕ੍ਖੂਨਂ ਪਰਿਭੋਗਂ ਆਚਿਕ੍ਖਿ. ਰੂਪਿਯਪਟਿਗ੍ਗਾਹਕਸ੍ਸ ਪਨ ਕੇਨਚਿ ਪਰਿਯਾਯੇਨ ਤਤੋ ਉਪ੍ਪਨ੍ਨਪਚ੍ਚਯਪਰਿਭੋਗੋ ਨ ਵਟ੍ਟਤਿ. ਯਥਾ ਚਾਯਂ ਏਤਸ੍ਸ ਨ ਵਟ੍ਟਤਿ, ਏਵਂ ਅਸਨ੍ਤਸਮ੍ਭਾਵਨਾਯ ਵਾ ਕੁਲਦੂਸਕਕਮ੍ਮੇਨ ਵਾ ਕੁਹਨਾਦੀਹਿ ਵਾ ਉਪ੍ਪਨ੍ਨਪਚ੍ਚਯਾ ਨੇਵ ਤਸ੍ਸ ਨ ਅਞ੍ਞਸ੍ਸ ਵਟ੍ਟਨ੍ਤਿ, ਧਮ੍ਮੇਨ ਸਮੇਨ ਉਪ੍ਪਨ੍ਨਾਪਿ ਅਪ੍ਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਨ੍ਤਿ.

ਚਤ੍ਤਾਰੋ ਹਿ ਪਰਿਭੋਗਾ – ਥੇਯ੍ਯਪਰਿਭੋਗੋ, ਇਣਪਰਿਭੋਗੋ, ਦਾਯਜ੍ਜਪਰਿਭੋਗੋ, ਸਾਮਿਪਰਿਭੋਗੋਤਿ. ਤਤ੍ਥ ਸਙ੍ਘਮਜ੍ਝੇਪਿ ਨਿਸੀਦਿਤ੍ਵਾ ਪਰਿਭੁਞ੍ਜਨ੍ਤਸ੍ਸ ਦੁਸ੍ਸੀਲਸ੍ਸ ਪਰਿਭੋਗੋ ‘‘ਥੇਯ੍ਯਪਰਿਭੋਗੋ’’ ਨਾਮ. ਸੀਲਵਤੋ ਅਪ੍ਪਚ੍ਚਵੇਕ੍ਖਿਤਪਰਿਭੋਗੋ ‘‘ਇਣਪਰਿਭੋਗੋ’’ ਨਾਮ. ਤਸ੍ਮਾ ਚੀਵਰਂ ਪਰਿਭੋਗੇ ਪਰਿਭੋਗੇ ਪਚ੍ਚਵੇਕ੍ਖਿਤਬ੍ਬਂ, ਪਿਣ੍ਡਪਾਤੋ ਆਲੋਪੇ ਆਲੋਪੇ. ਤਥਾ ਅਸਕ੍ਕੋਨ੍ਤੇਨ ਪੁਰੇਭਤ੍ਤਪਚ੍ਛਾਭਤ੍ਤਪੁਰਿਮਯਾਮਪਚ੍ਛਿਮਯਾਮੇਸੁ. ਸਚਸ੍ਸ ਅਪ੍ਪਚ੍ਚਵੇਕ੍ਖਤੋਵ ਅਰੁਣੋ ਉਗ੍ਗਚ੍ਛਤਿ, ਇਣਪਰਿਭੋਗਟ੍ਠਾਨੇ ਤਿਟ੍ਠਤਿ. ਸੇਨਾਸਨਮ੍ਪਿ ਪਰਿਭੋਗੇ ਪਰਿਭੋਗੇ ਪਚ੍ਚਵੇਕ੍ਖਿਤਬ੍ਬਂ, ਭੇਸਜ੍ਜਸ੍ਸ ਪਟਿਗ੍ਗਹਣੇਪਿ ਪਰਿਭੋਗੇਪਿ ਸਤਿਪਚ੍ਚਯਤਾ ਵਟ੍ਟਤਿ, ਏਵਂ ਸਨ੍ਤੇਪਿ ਪਟਿਗ੍ਗਹਣੇ ਸਤਿਂ ਕਤ੍ਵਾ ਪਰਿਭੋਗੇ ਅਕਰੋਨ੍ਤਸ੍ਸੇਵ ਆਪਤ੍ਤਿ, ਪਟਿਗ੍ਗਹਣੇ ਪਨ ਸਤਿਂ ਅਕਤ੍ਵਾ ਪਰਿਭੋਗੇ ਕਰੋਨ੍ਤਸ੍ਸ ਅਨਾਪਤ੍ਤਿ.

ਚਤੁਬ੍ਬਿਧਾ ਹਿ ਸੁਦ੍ਧਿ – ਦੇਸਨਾਸੁਦ੍ਧਿ, ਸਂਵਰਸੁਦ੍ਧਿ, ਪਰਿਯੇਟ੍ਠਿਸੁਦ੍ਧਿ, ਪਚ੍ਚਵੇਕ੍ਖਣਸੁਦ੍ਧੀਤਿ. ਤਤ੍ਥ ਦੇਸਨਾਸੁਦ੍ਧਿ ਨਾਮ ਪਾਤਿਮੋਕ੍ਖਸਂਵਰਸੀਲਂ, ਤਞ੍ਹਿ ਦੇਸਨਾਯ ਸੁਜ੍ਝਨਤੋ ‘‘ਦੇਸਨਾਸੁਦ੍ਧੀ’’ਤਿ ਵੁਚ੍ਚਤਿ. ਸਂਵਰਸੁਦ੍ਧਿ ਨਾਮ ਇਨ੍ਦ੍ਰਿਯਸਂਵਰਸੀਲਂ, ਤਞ੍ਹਿ ਨ ਪੁਨ ਏਵਂ ਕਰਿਸ੍ਸਾਮੀਤਿ ਚਿਤ੍ਤਾਧਿਟ੍ਠਾਨਸਂਵਰੇਨੇਵ ਸੁਜ੍ਝਨਤੋ ‘‘ਸਂਵਰਸੁਦ੍ਧੀ’’ਤਿ ਵੁਚ੍ਚਤਿ. ਪਰਿਯੇਟ੍ਠਿਸੁਦ੍ਧਿ ਨਾਮ ਆਜੀਵਪਾਰਿਸੁਦ੍ਧਿਸੀਲਂ, ਤਞ੍ਹਿ ਅਨੇਸਨਂ ਪਹਾਯ ਧਮ੍ਮੇਨ ਸਮੇਨ ਪਚ੍ਚਯੇ ਉਪ੍ਪਾਦੇਨ੍ਤਸ੍ਸ ਪਰਿਯੇਸਨਾਯ ਸੁਦ੍ਧਤ੍ਤਾ ‘‘ਪਰਿਯੇਟ੍ਠਿਸੁਦ੍ਧੀ’’ਤਿ ਵੁਚ੍ਚਤਿ. ਪਚ੍ਚਵੇਕ੍ਖਣਸੁਦ੍ਧਿ ਨਾਮ ਪਚ੍ਚਯਪਰਿਭੋਗਸਨ੍ਨਿਸ੍ਸਿਤਸੀਲਂ, ਤਞ੍ਹਿ ‘‘ਪਟਿਸਙ੍ਖਾ ਯੋਨਿਸੋ ਚੀਵਰਂ ਪਟਿਸੇਵਤੀ’’ਤਿਆਦਿਨਾ (ਮ. ਨਿ. ੧.੨੩; ਅ. ਨਿ. ੬.੫੮) ਨਯੇਨ ਵੁਤ੍ਤੇਨ ਪਚ੍ਚਵੇਕ੍ਖਣੇਨ ਸੁਜ੍ਝਨਤੋ ‘‘ਪਚ੍ਚਵੇਕ੍ਖਣਸੁਦ੍ਧੀ’’ਤਿ ਵੁਚ੍ਚਤਿ. ਤੇਨ ਵੁਤ੍ਤਂ – ‘‘ਪਟਿਗ੍ਗਹਣੇ ਪਨ ਸਤਿਂ ਅਕਤ੍ਵਾ ਪਰਿਭੋਗੇ ਕਰੋਨ੍ਤਸ੍ਸ ਅਨਾਪਤ੍ਤੀ’’ਤਿ.

ਸਤ੍ਤਨ੍ਨਂ ਸੇਕ੍ਖਾਨਂ ਪਚ੍ਚਯਪਰਿਭੋਗੋ ਦਾਯਜ੍ਜਪਰਿਭੋਗੋ ਨਾਮ, ਤੇ ਹਿ ਭਗਵਤੋ ਪੁਤ੍ਤਾ, ਤਸ੍ਮਾ ਪਿਤੁਸਨ੍ਤਕਾਨਂ ਪਚ੍ਚਯਾਨਂ ਦਾਯਾਦਾ ਹੁਤ੍ਵਾ ਤੇ ਪਚ੍ਚਯੇ ਪਰਿਭੁਞ੍ਜਨ੍ਤਿ. ਕਿਂ ਪਨ ਤੇ ਭਗਵਤੋ ਪਚ੍ਚਯੇ ਪਰਿਭੁਞ੍ਜਨ੍ਤਿ, ਗਿਹੀਨਂ ਪਚ੍ਚਯੇ ਪਰਿਭੁਞ੍ਜਨ੍ਤੀਤਿ? ਗਿਹੀਹਿ ਦਿਨ੍ਨਾਪਿ ਭਗਵਤਾ ਅਨੁਞ੍ਞਾਤਤ੍ਤਾ ਭਗਵਤੋ ਸਨ੍ਤਕਾ ਹੋਨ੍ਤਿ, ਤਸ੍ਮਾ ਤੇ ਭਗਵਤੋ ਪਚ੍ਚਯੇ ਪਰਿਭੁਞ੍ਜਨ੍ਤੀਤਿ (ਮ. ਨਿ. ੧.੨੯) ਵੇਦਿਤਬ੍ਬਂ, ਧਮ੍ਮਦਾਯਾਦਸੁਤ੍ਤਞ੍ਚੇਤ੍ਥ ਸਾਧਕਂ.

ਖੀਣਾਸਵਾਨਂ ਪਰਿਭੋਗੋ ਸਾਮਿਪਰਿਭੋਗੋ ਨਾਮ, ਤੇ ਹਿ ਤਣ੍ਹਾਯ ਦਾਸਬ੍ਯਂ ਅਤੀਤਤ੍ਤਾ ਸਾਮਿਨੋ ਹੁਤ੍ਵਾ ਪਰਿਭੁਞ੍ਜਨ੍ਤੀਤਿ. ਇਮੇਸੁ ਪਰਿਭੋਗੇਸੁ ਸਾਮਿਪਰਿਭੋਗੋ ਚ ਦਾਯਜ੍ਜਪਰਿਭੋਗੋ ਚ ਸਬ੍ਬੇਸਮ੍ਪਿ ਵਟ੍ਟਤਿ. ਇਣਪਰਿਭੋਗੋ ਨ ਵਟ੍ਟਤਿ, ਥੇਯ੍ਯਪਰਿਭੋਗੇ ਕਥਾਯੇਵ ਨਤ੍ਥਿ.

ਅਪਰੇਪਿ ਚਤ੍ਤਾਰੋ ਪਰਿਭੋਗਾ – ਲਜ੍ਜਿਪਰਿਭੋਗੋ, ਅਲਜ੍ਜਿਪਰਿਭੋਗੋ, ਧਮ੍ਮਿਯਪਰਿਭੋਗੋ, ਅਧਮ੍ਮਿਯਪਰਿਭੋਗੋਤਿ.

ਤਤ੍ਥ ਅਲਜ੍ਜਿਨੋ ਲਜ੍ਜਿਨਾ ਸਦ੍ਧਿਂ ਪਰਿਭੋਗੋ ਵਟ੍ਟਤਿ, ਆਪਤ੍ਤਿਯਾ ਨ ਕਾਰੇਤਬ੍ਬੋ. ਲਜ੍ਜਿਨੋ ਅਲਜ੍ਜਿਨਾ ਸਦ੍ਧਿਂ ਯਾਵ ਨ ਜਾਨਾਤਿ, ਤਾਵ ਵਟ੍ਟਤਿ. ਆਦਿਤੋ ਪਟ੍ਠਾਯ ਹਿ ਅਲਜ੍ਜੀ ਨਾਮ ਨਤ੍ਥਿ, ਤਸ੍ਮਾ ਯਦਾਸ੍ਸ ਅਲਜ੍ਜੀਭਾਵਂ ਜਾਨਾਤਿ ਤਦਾ ਵਤ੍ਤਬ੍ਬੋ ‘‘ਤੁਮ੍ਹੇ ਕਾਯਦ੍ਵਾਰੇ ਚ ਵਚੀਦ੍ਵਾਰੇ ਚ ਵੀਤਿਕ੍ਕਮਂ ਕਰੋਥ, ਤਂ ਅਪ੍ਪਤਿਰੂਪਂ ਮਾ ਏਵਮਕਤ੍ਥਾ’’ਤਿ. ਸਚੇ ਅਨਾਦਿਯਿਤ੍ਵਾ ਕਰੋਤਿਯੇਵ, ਯਦਿ ਤੇਨ ਸਦ੍ਧਿਂ ਪਰਿਭੋਗਂ ਕਰੋਤਿ, ਸੋਪਿ ਅਲਜ੍ਜੀਯੇਵ ਹੋਤਿ. ਯੋਪਿ ਅਤ੍ਤਨੋ ਭਾਰਭੂਤੇਨ ਅਲਜ੍ਜਿਨਾ ਸਦ੍ਧਿਂ ਪਰਿਭੋਗਂ ਕਰੋਤਿ, ਸੋਪਿ ਨਿਵਾਰੇਤਬ੍ਬੋ. ਸਚੇ ਨ ਓਰਮਤਿ, ਅਯਮ੍ਪਿ ਅਲਜ੍ਜੀਯੇਵ ਹੋਤਿ. ਏਵਂ ਏਕੋ ਅਲਜ੍ਜੀ ਅਲਜ੍ਜੀਸਤਮ੍ਪਿ ਕਰੋਤਿ. ਅਲਜ੍ਜਿਨੋ ਪਨ ਅਲਜ੍ਜਿਨਾਵ ਸਦ੍ਧਿਂ ਪਰਿਭੋਗੇ ਆਪਤ੍ਤਿ ਨਾਮ ਨਤ੍ਥਿ. ਲਜ੍ਜਿਨੋ ਲਜ੍ਜਿਨਾ ਸਦ੍ਧਿਂ ਪਰਿਭੋਗੋ ਦ੍ਵਿਨ੍ਨਂ ਖਤ੍ਤਿਯਕੁਮਾਰਾਨਂ ਸੁਵਣ੍ਣਪਾਤਿਯਂ ਭੋਜਨਸਦਿਸੋਤਿ.

ਧਮ੍ਮਿਯਾਧਮ੍ਮਿਯਪਰਿਭੋਗੋ ਪਚ੍ਚਯਵਸੇਨ ਵੇਦਿਤਬ੍ਬੋ. ਤਤ੍ਥ ਸਚੇ ਪੁਗ੍ਗਲੋਪਿ ਅਲਜ੍ਜੀ ਪਿਣ੍ਡਪਾਤੋਪਿ ਅਧਮ੍ਮਿਯੋ, ਉਭੋ ਜੇਗੁਚ੍ਛਾ. ਪੁਗ੍ਗਲੋ ਅਲਜ੍ਜੀ ਪਿਣ੍ਡਪਾਤੋ ਧਮ੍ਮਿਯੋ, ਪੁਗ੍ਗਲਂ ਜਿਗੁਚ੍ਛਿਤ੍ਵਾ ਪਿਣ੍ਡਪਾਤੋ ਨ ਗਹੇਤਬ੍ਬੋ. ਮਹਾਪਚ੍ਚਰਿਯਂ ਪਨ ਦੁਸ੍ਸੀਲੋ ਸਙ੍ਘਤੋ ਉਦ੍ਦੇਸਭਤ੍ਤਾਦੀਨਿ ਲਭਿਤ੍ਵਾ ਸਙ੍ਘਸ੍ਸੇਵ ਦੇਤਿ, ਏਤਾਨਿ ਯਥਾਦਾਨਮੇਵ ਗਤਤ੍ਤਾ ਵਟ੍ਟਨ੍ਤੀਤਿ ਵੁਤ੍ਤਂ. ਪੁਗ੍ਗਲੋ ਲਜ੍ਜੀ ਪਿਣ੍ਡਪਾਤੋ ਅਧਮ੍ਮਿਯੋ, ਪਿਣ੍ਡਪਾਤੋ ਜੇਗੁਚ੍ਛੋ ਨ ਗਹੇਤਬ੍ਬੋ. ਪੁਗ੍ਗਲੋ ਲਜ੍ਜੀ, ਪਿਣ੍ਡਪਾਤੋਪਿ ਧਮ੍ਮਿਯੋ, ਵਟ੍ਟਤਿ.

ਅਪਰੇ ਦ੍ਵੇ ਪਗ੍ਗਹਾ; ਦ੍ਵੇ ਚ ਪਰਿਭੋਗਾ – ਲਜ੍ਜਿਪਗ੍ਗਹੋ, ਅਲਜ੍ਜਿਪਗ੍ਗਹੋ; ਧਮ੍ਮਪਰਿਭੋਗੋ ਆਮਿਸਪਰਿਭੋਗੋਤਿ.

ਤਤ੍ਥ ਅਲਜ੍ਜਿਨੋ ਲਜ੍ਜਿਂ ਪਗ੍ਗਹੇਤੁਂ ਵਟ੍ਟਤਿ, ਨ ਸੋ ਆਪਤ੍ਤਿਯਾ ਕਾਰੇਤਬ੍ਬੋ. ਸਚੇ ਪਨ ਲਜ੍ਜੀ ਅਲਜ੍ਜਿਂ ਪਗ੍ਗਣ੍ਹਾਤਿ, ਅਨੁਮੋਦਨਾਯ ਅਜ੍ਝੇਸਤਿ, ਧਮ੍ਮਕਥਾਯ ਅਜ੍ਝੇਸਤਿ, ਕੁਲੇਸੁ ਉਪਤ੍ਥਮ੍ਭੇਤਿ. ਇਤਰੋਪਿ ‘‘ਅਮ੍ਹਾਕਂ ਆਚਰਿਯੋ ਈਦਿਸੋ ਚ ਈਦਿਸੋ ਚਾ’’ਤਿ ਤਸ੍ਸ ਪਰਿਸਤਿ ਵਣ੍ਣਂ ਭਾਸਤਿ, ਅਯਂ ਸਾਸਨਂ ਓਸਕ੍ਕਾਪੇਤਿ ਅਨ੍ਤਰਧਾਪੇਤੀਤਿ ਵੇਦਿਤਬ੍ਬੋ.

ਧਮ੍ਮਪਰਿਭੋਗ-ਆਮਿਸਪਰਿਭੋਗੇਸੁ ਪਨ ਯਤ੍ਥ ਆਮਿਸਪਰਿਭੋਗੋ ਵਟ੍ਟਤਿ, ਤਤ੍ਥ ਧਮ੍ਮਪਰਿਭੋਗੋਪਿ ਵਟ੍ਟਤਿ. ਯੋ ਪਨ ਕੋਟਿਯਂ ਠਿਤੋ ਗਨ੍ਥੋ ਤਸ੍ਸ ਪੁਗ੍ਗਲਸ੍ਸ ਅਚ੍ਚਯੇਨ ਨਸ੍ਸਿਸ੍ਸਤਿ, ਤਂ ਧਮ੍ਮਾਨੁਗ੍ਗਹੇਨ ਉਗ੍ਗਣ੍ਹਿਤੁਂ ਵਟ੍ਟਤੀਤਿ ਵੁਤ੍ਤਂ.

ਤਤ੍ਰਿਦਂ ਵਤ੍ਥੁ – ਮਹਾਭਯੇ ਕਿਰ ਏਕਸ੍ਸੇਵ ਭਿਕ੍ਖੁਨੋ ਮਹਾਨਿਦ੍ਦੇਸੋ ਪਗੁਣੋ ਅਹੋਸਿ. ਅਥ ਚਤੁਨਿਕਾਯਿਕਤਿਸ੍ਸਤ੍ਥੇਰਸ੍ਸ ਉਪਜ੍ਝਾਯੋ ਮਹਾਤਿਪਿਟਕਤ੍ਥੇਰੋ ਨਾਮ ਮਹਾਰਕ੍ਖਿਤਤ੍ਥੇਰਂ ਆਹ – ‘‘ਆਵੁਸੋ ਮਹਾਰਕ੍ਖਿਤ, ਏਤਸ੍ਸ ਸਨ੍ਤਿਕੇ ਮਹਾਨਿਦ੍ਦੇਸਂ ਗਣ੍ਹਾਹੀ’’ਤਿ. ‘‘ਪਾਪੋ ਕਿਰਾਯਂ, ਭਨ੍ਤੇ, ਨ ਗਣ੍ਹਾਮੀ’’ਤਿ. ‘‘ਗਣ੍ਹਾਵੁਸੋ, ਅਹਂ ਤੇ ਸਨ੍ਤਿਕੇ ਨਿਸੀਦਿਸ੍ਸਾਮੀ’’ਤਿ. ‘‘ਸਾਧੁ, ਭਨ੍ਤੇ, ਤੁਮ੍ਹੇਸੁ ਨਿਸਿਨ੍ਨੇਸੁ ਗਣ੍ਹਿਸ੍ਸਾਮੀ’’ਤਿ ਪਟ੍ਠਪੇਤ੍ਵਾ ਰਤ੍ਤਿਨ੍ਦਿਵਂ ਨਿਰਨ੍ਤਰਂ ਪਰਿਯਾਪੁਣਨ੍ਤੋ ਓਸਾਨਦਿਵਸੇ ਹੇਟ੍ਠਾਮਞ੍ਚੇ ਇਤ੍ਥਿਂ ਦਿਸ੍ਵਾ ‘‘ਭਨ੍ਤੇ, ਸੁਤਂਯੇਵ ਮੇ ਪੁਬ੍ਬੇ, ਸਚਾਹਂ ਏਵਂ ਜਾਨੇਯ੍ਯਂ, ਨ ਈਦਿਸਸ੍ਸ ਸਨ੍ਤਿਕੇ ਧਮ੍ਮਂ ਪਰਿਯਾਪੁਣੇਯ੍ਯ’’ਨ੍ਤਿ ਆਹ. ਤਸ੍ਸ ਪਨ ਸਨ੍ਤਿਕੇ ਬਹੂ ਮਹਾਥੇਰਾ ਉਗ੍ਗਣ੍ਹਿਤ੍ਵਾ ਮਹਾਨਿਦ੍ਦੇਸਂ ਪਤਿਟ੍ਠਾਪੇਸੁਂ.

੫੮੬. ਰੂਪਿਯੇ ਰੂਪਿਯਸਞ੍ਞੀਤਿ ਏਤ੍ਥ ਸਬ੍ਬਮ੍ਪਿ ਜਾਤਰੂਪਰਜਤਂ ਰੂਪਿਯਸਙ੍ਗਹਮੇਵ ਗਤਨ੍ਤਿ ਵੇਦਿਤਬ੍ਬਂ.

ਰੂਪਿਯੇ ਵੇਮਤਿਕੋਤਿ ‘‘ਸੁਵਣ੍ਣਂ ਨੁ ਖੋ, ਖਰਪਤ੍ਤਂ ਨੁ ਖੋ’’ਤਿਆਦਿਨਾ ਨਯੇਨ ਸਂਸਯਜਾਤੋ.

ਰੂਪਿਯੇ ਅਰੂਪਿਯਸਞ੍ਞੀਤਿ ਸੁਵਣ੍ਣਾਦੀਸੁ ਖਰਪਤ੍ਤਾਦਿਸਞ੍ਞੀ. ਅਪਿਚ ਪੁਞ੍ਞਕਾਮਾ ਰਾਜੋਰੋਧਾਦਯੋ ਭਤ੍ਤਖਜ੍ਜਕਗਨ੍ਧਪਿਣ੍ਡਾਦੀਸੁ ਪਕ੍ਖਿਪਿਤ੍ਵਾ ਹਿਰਞ੍ਞਸੁਵਣ੍ਣਂ ਦੇਨ੍ਤਿ, ਚੋਲ਼ਭਿਕ੍ਖਾਯ ਚਰਨ੍ਤਾਨਂ ਦਸ੍ਸਨ੍ਤੇ ਬਦ੍ਧਕਹਾਪਣਾਦੀਹਿਯੇਵ ਸਦ੍ਧਿਂ ਚੋਲ਼ਕਾਨਿ ਦੇਨ੍ਤਿ, ਭਿਕ੍ਖੂ ਭਤ੍ਤਾਦਿਸਞ੍ਞਾਯ ਵਾ ਚੋਲ਼ਕਸਞ੍ਞਾਯ ਵਾ ਪਟਿਗ੍ਗਣ੍ਹਨ੍ਤਿ, ਏਵਮ੍ਪਿ ਰੂਪਿਯੇ ਅਰੂਪਿਯਸਞ੍ਞੀ ਰੂਪਿਯਂ ਗਣ੍ਹਾਤੀਤਿ ਵੇਦਿਤਬ੍ਬੋ. ਪਟਿਗ੍ਗਣ੍ਹਨ੍ਤੇਨ ਪਨ ‘‘ਇਮਸ੍ਮਿਂ ਗੇਹੇ ਇਦਂ ਲਦ੍ਧ’’ਨ੍ਤਿ ਸਲ੍ਲਕ੍ਖੇਤਬ੍ਬਂ. ਯੇਨ ਹਿ ਅਸ੍ਸਤਿਯਾ ਦਿਨ੍ਨਂ ਹੋਤਿ, ਸੋ ਸਤਿਂ ਪਟਿਲਭਿਤ੍ਵਾ ਪੁਨ ਆਗਚ੍ਛਤਿ, ਅਥਸ੍ਸ ਵਤ੍ਤਬ੍ਬਂ – ‘‘ਤਵ ਚੋਲ਼ਕਂ ਪਸ੍ਸਾਹੀ’’ਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.

ਸਮੁਟ੍ਠਾਨਾਦੀਸੁ ਛਸਮੁਟ੍ਠਾਨਂ, ਸਿਯਾ ਕਿਰਿਯਂ ਗਹਣੇਨ ਆਪਜ੍ਜਨਤੋ, ਸਿਯਾ ਅਕਿਰਿਯਂ ਪਟਿਕ੍ਖੇਪਸ੍ਸ ਅਕਰਣਤੋ ਰੂਪਿਯਅਞ੍ਞਵਾਦਕਉਪਸ੍ਸੁਤਿਸਿਕ੍ਖਾਪਦਾਨਿ ਹਿ ਤੀਣਿ ਏਕਪਰਿਚ੍ਛੇਦਾਨਿ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਰੂਪਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਰੂਪਿਯਸਂਵੋਹਾਰਸਿਕ੍ਖਾਪਦਵਣ੍ਣਨਾ

੫੮੭. ਤੇਨ ਸਮਯੇਨਾਤਿ ਰੂਪਿਯਸਂਵੋਹਾਰਸਿਕ੍ਖਾਪਦਂ. ਤਤ੍ਥ ਨਾਨਪ੍ਪਕਾਰਕਨ੍ਤਿ ਕਤਾਕਤਾਦਿਵਸੇਨ ਅਨੇਕਵਿਧਂ. ਰੂਪਿਯਸਂਵੋਹਾਰਨ੍ਤਿ ਜਾਤਰੂਪਰਜਤਪਰਿਵਤ੍ਤਨਂ. ਸਮਾਪਜ੍ਜਨ੍ਤੀਤਿ ਪਟਿਗ੍ਗਹਣਸ੍ਸੇਵ ਪਟਿਕ੍ਖਿਤਤ੍ਤਾ ਪਟਿਗ੍ਗਹਿਤਪਰਿਵਤ੍ਤਨੇ ਦੋਸਂ ਅਪਸ੍ਸਨ੍ਤਾ ਕਰੋਨ੍ਤਿ.

੫੮੯. ਸੀਸੂਪਗਨ੍ਤਿਆਦੀਸੁ ਸੀਸਂ ਉਪਗਚ੍ਛਤੀਤਿ ਸੀਸੂਪਗਂ, ਪੋਤ੍ਥਕੇਸੁ ਪਨ ‘‘ਸੀਸੂਪਕ’’ਨ੍ਤਿ ਲਿਖਿਤਂ, ਯਸ੍ਸ ਕਸ੍ਸਚਿ ਸੀਸਾਲਙ੍ਕਾਰਸ੍ਸੇਤਂ ਅਧਿਵਚਨਂ. ਏਸ ਨਯੋ ਸਬ੍ਬਤ੍ਥ. ਕਤੇਨ ਕਤਨ੍ਤਿਆਦੀਸੁ ਸੁਦ੍ਧੋ ਰੂਪਿਯਸਂਵੋਹਾਰੋਯੇਵ.

ਰੂਪਿਯੇ ਰੂਪਿਯਸਞ੍ਞੀਤਿਆਦਿਮ੍ਹਿ ਪੁਰਿਮਸਿਕ੍ਖਾਪਦੇ ਵੁਤ੍ਤਵਤ੍ਥੂਸੁ ਨਿਸ੍ਸਗ੍ਗਿਯਵਤ੍ਥੁਨਾ ਨਿਸ੍ਸਗ੍ਗਿਯਵਤ੍ਥੁਂ ਚੇਤਾਪੇਨ੍ਤਸ੍ਸ ਮੂਲਗ੍ਗਹਣੇ ਪੁਰਿਮਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਅਪਰਾਪਰਪਰਿਵਤ੍ਤਨੇ ਇਮਿਨਾ ਨਿਸ੍ਸਗ੍ਗਿਯਪਾਚਿਤ੍ਤਿਯਮੇਵ. ਨਿਸ੍ਸਗ੍ਗਿਯਵਤ੍ਥੁਨਾ ਦੁਕ੍ਕਟਵਤ੍ਥੁਂ ਵਾ ਕਪ੍ਪਿਯਵਤ੍ਥੁਂ ਵਾ ਚੇਤਾਪੇਨ੍ਤਸ੍ਸਪਿ ਏਸੇਵ ਨਯੋ. ਯੋ ਹਿ ਅਯਂ ਅਰੂਪਿਯੇ ਰੂਪਿਯਸਞ੍ਞੀ ਰੂਪਿਯਂ ਚੇਤਾਪੇਤੀਤਿਆਦਿ ਦੁਤਿਯੋ ਤਿਕੋ ਵੁਤ੍ਤੋ, ਤਸ੍ਸਾਨੁਲੋਮਤ੍ਤਾ ਅਵੁਤ੍ਤੋਪਿ ਅਯਮਪਰੋਪਿ ਰੂਪਿਯੇ ਰੂਪਿਯਸਞ੍ਞੀ ਅਰੂਪਿਯਂ ਚੇਤਾਪੇਤੀਤਿਆਦਿ ਤਿਕੋ ਵੇਦਿਤਬ੍ਬੋ. ਅਤ੍ਤਨੋ ਵਾ ਹਿ ਅਰੂਪਿਯੇਨ ਪਰਸ੍ਸ ਰੂਪਿਯਂ ਚੇਤਾਪੇਯ੍ਯ ਅਤ੍ਤਨੋ ਵਾ ਰੂਪਿਯੇਨ ਪਰਸ੍ਸ ਅਰੂਪਿਯਂ, ਉਭਯਥਾਪਿ ਰੂਪਿਯਸਂਵੋਹਾਰੋ ਕਤੋਯੇਵ ਹੋਤਿ, ਤਸ੍ਮਾ ਪਾਲ਼ਿਯਂ ਏਕਨ੍ਤੇਨ ਰੂਪਿਯਪਕ੍ਖੇ ਏਕੋਯੇਵ ਤਿਕੋ ਵੁਤ੍ਤੋਤਿ.

ਦੁਕ੍ਕਟਵਤ੍ਥੁਨਾ ਪਨ ਨਿਸ੍ਸਗ੍ਗਿਯਵਤ੍ਥੁਂ ਚੇਤਾਪੇਨ੍ਤਸ੍ਸ ਮੂਲਗ੍ਗਹਣੇ ਪੁਰਿਮਸਿਕ੍ਖਾਪਦੇਨ ਦੁਕ੍ਕਟਂ, ਪਚ੍ਛਾ ਪਰਿਵਤ੍ਤਨੇ ਇਮਿਨਾ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਗਰੁਕਸ੍ਸ ਚੇਤਾਪਿਤਤ੍ਤਾ. ਦੁਕ੍ਕਟਵਤ੍ਥੁਨਾ ਦੁਕ੍ਕਟਵਤ੍ਥੁਮੇਵ, ਕਪ੍ਪਿਯਵਤ੍ਥੁਂ ਵਾ ਚੇਤਾਪੇਨ੍ਤਸ੍ਸ ਮੂਲਗ੍ਗਹਣੇ ਪੁਰਿਮਸਿਕ੍ਖਾਪਦੇਨ ਦੁਕ੍ਕਟਂ, ਪਚ੍ਛਾ ਪਰਿਵਤ੍ਤਨੇਪਿ ਇਮਿਨਾ ਦੁਕ੍ਕਟਮੇਵ. ਕਸ੍ਮਾ? ਅਕਪ੍ਪਿਯਵਤ੍ਥੁਨਾ ਚੇਤਾਪਿਤਤ੍ਤਾ. ਅਨ੍ਧਕਟ੍ਠਕਥਾਯਂ ਪਨ ‘‘ਸਚੇ ਕਯਵਿਕ੍ਕਯਂ ਸਮਾਪਜ੍ਜੇਯ੍ਯ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ ਭਾਸਿਤਂ, ਤਂ ਦੁਬ੍ਭਾਸਿਤਂ. ਕਸ੍ਮਾ? ਨ ਹਿ ਦਾਨਗ੍ਗਹਣਤੋ ਅਞ੍ਞੋ ਕਯਵਿਕ੍ਕਯੋ ਨਾਮ ਅਤ੍ਥਿ, ਕਯਵਿਕ੍ਕਯਸਿਕ੍ਖਾਪਦਞ੍ਚ ਕਪ੍ਪਿਯਵਤ੍ਥੁਨਾ ਕਪ੍ਪਿਯਵਤ੍ਥੁਪਰਿਵਤ੍ਤਨਮੇਵ ਸਨ੍ਧਾਯ ਵੁਤ੍ਤਂ, ਤਞ੍ਚ ਖੋ ਅਞ੍ਞਤ੍ਰ ਸਹਧਮ੍ਮਿਕੇਹਿ. ਇਦਂ ਸਿਕ੍ਖਾਪਦਂ ਰੂਪਿਯੇਨ ਚ ਰੂਪਿਯਾਰੂਪਿਯਚੇਤਾਪਨਂ ਅਰੂਪਿਯੇਨ ਚ ਰੂਪਿਯਚੇਤਾਪਨਂ. ਦੁਕ੍ਕਟਵਤ੍ਥੁਨਾ ਪਨ ਦੁਕ੍ਕਟਵਤ੍ਥੁਨੋ ਚੇਤਾਪਨਂ ਨੇਵ ਇਧ ਨ ਤਤ੍ਥ ਪਾਲ਼ਿਯਂ ਵੁਤ੍ਤਂ, ਨ ਚੇਤ੍ਥ ਅਨਾਪਤ੍ਤਿ ਭਵਿਤੁਂ ਅਰਹਤਿ. ਤਸ੍ਮਾ ਯਥੇਵ ਦੁਕ੍ਕਟਵਤ੍ਥੁਨੋ ਪਟਿਗ੍ਗਹਣੇ ਦੁਕ੍ਕਟਂ, ਤਥੇਵ ਤਸ੍ਸ ਵਾ ਤੇਨ ਵਾ ਚੇਤਾਪਨੇਪਿ ਦੁਕ੍ਕਟਂ ਯੁਤ੍ਤਨ੍ਤਿ ਭਗਵਤੋ ਅਧਿਪ੍ਪਾਯਞ੍ਞੂਹਿ ਵੁਤ੍ਤਂ.

ਕਪ੍ਪਿਯਵਤ੍ਥੁਨਾ ਪਨ ਨਿਸ੍ਸਗ੍ਗਿਯਵਤ੍ਥੁਂ ਚੇਤਾਪੇਨ੍ਤਸ੍ਸ ਮੂਲਗ੍ਗਹਣੇ ਪੁਰਿਮਸਿਕ੍ਖਾਪਦੇਨ ਅਨਾਪਤ੍ਤਿ, ਪਚ੍ਛਾ ਪਰਿਵਤ੍ਤਨੇ ਇਮਿਨਾ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਵੁਤ੍ਤਞ੍ਹੇਤਂ – ‘‘ਅਰੂਪਿਯੇ ਅਰੂਪਿਯਸਞ੍ਞੀ ਰੂਪਿਯਂ ਚੇਤਾਪੇਤਿ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ. ਤੇਨੇਵ ਕਪ੍ਪਿਯਵਤ੍ਥੁਨਾ ਦੁਕ੍ਕਟਵਤ੍ਥੁਂ ਚੇਤਾਪੇਨ੍ਤਸ੍ਸ ਮੂਲਪਟਿਗ੍ਗਹਣੇ ਤਥੇਵ ਅਨਾਪਤ੍ਤਿ, ਪਚ੍ਛਾ ਪਰਿਵਤ੍ਤਨੇ ਇਮਿਨਾ ਦੁਕ੍ਕਟਂ. ਕਸ੍ਮਾ? ਅਕਪ੍ਪਿਯਸ੍ਸ ਚੇਤਾਪਿਤਤ੍ਤਾ. ਕਪ੍ਪਿਯਵਤ੍ਥੁਨਾ ਪਨ ਕਪ੍ਪਿਯਵਤ੍ਥੁਂ ਅਞ੍ਞਤ੍ਰ ਸਹਧਮ੍ਮਿਕੇਹਿ ਚੇਤਾਪੇਨ੍ਤਸ੍ਸ ਮੂਲਗ੍ਗਹਣੇ ਪੁਰਿਮਸਿਕ੍ਖਾਪਦੇਨ ਅਨਾਪਤ੍ਤਿ, ਪਚ੍ਛਾ ਪਰਿਵਤ੍ਤਨੇ ਉਪਰਿ ਕਯਵਿਕ੍ਕਯਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਕਯਵਿਕ੍ਕਯਂ ਮੋਚੇਤ੍ਵਾ ਗਣ੍ਹਨ੍ਤਸ੍ਸ ਉਪਰਿਸਿਕ੍ਖਾਪਦੇਨਪਿ ਅਨਾਪਤ੍ਤਿ, ਵਡ੍ਢਿਂ ਪਯੋਜੇਨ੍ਤਸ੍ਸ ਦੁਕ੍ਕਟਂ.

ਇਮਸ੍ਸ ਚ ਰੂਪਿਯਸਂਵੋਹਾਰਸ੍ਸ ਗਰੁਕਭਾਵਦੀਪਕਂ ਇਦਂ ਪਤ੍ਤਚਤੁਕ੍ਕਂ ਵੇਦਿਤਬ੍ਬਂ. ਯੋ ਹਿ ਰੂਪਿਯਂ ਉਗ੍ਗਣ੍ਹਿਤ੍ਵਾ ਤੇਨ ਅਯਬੀਜਂ ਸਮੁਟ੍ਠਾਪੇਤਿ, ਤਂ ਕੋਟ੍ਟਾਪੇਤ੍ਵਾ ਤੇਨ ਲੋਹੇਨ ਪਤ੍ਤਂ ਕਾਰੇਤਿ, ਅਯਂ ਪਤ੍ਤੋ ਮਹਾਅਕਪ੍ਪਿਯੋ ਨਾਮ, ਨ ਸਕ੍ਕਾ ਕੇਨਚਿ ਉਪਾਯੇਨ ਕਪ੍ਪਿਯੋ ਕਾਤੁਂ. ਸਚੇ ਹਿ ਤਂ ਵਿਨਾਸੇਤ੍ਵਾ ਥਾਲਕਂ ਕਾਰੇਤਿ, ਤਮ੍ਪਿ ਅਕਪ੍ਪਿਯਂ. ਵਾਸਿਂ ਕਾਰੇਤਿ, ਤਾਯ ਛਿਨ੍ਨਂ ਦਨ੍ਤਕਟ੍ਠਮ੍ਪਿ ਅਕਪ੍ਪਿਯਂ. ਬਲ਼ਿਸਂ ਕਾਰੋਤਿ, ਤੇਨ ਮਾਰਿਤਾ ਮਚ੍ਛਾਪਿ ਅਕਪ੍ਪਿਯਾ. ਵਾਸਿਫਲਂ ਤਾਪੇਤ੍ਵਾ ਉਦਕਂ ਵਾ ਖੀਰਂ ਵਾ ਉਣ੍ਹਾਪੇਤਿ, ਤਮ੍ਪਿ ਅਕਪ੍ਪਿਯਮੇਵ.

ਯੋ ਪਨ ਰੂਪਿਯਂ ਉਗ੍ਗਣ੍ਹਿਤ੍ਵਾ ਤੇਨ ਪਤ੍ਤਂ ਕਿਣਾਤਿ, ਅਯਮ੍ਪਿ ਪਤ੍ਤੋ ਅਕਪ੍ਪਿਯੋ. ‘‘ਪਞ੍ਚਨ੍ਨਮ੍ਪਿ ਸਹਧਮ੍ਮਿਕਾਨਂ ਨ ਕਪ੍ਪਤੀ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਸਕ੍ਕਾ ਪਨ ਕਪ੍ਪਿਯੋ ਕਾਤੁਂ, ਸੋ ਹਿ ਮੂਲੇ ਮੂਲਸਾਮਿਕਾਨਂ ਪਤ੍ਤੇ ਚ ਪਤ੍ਤਸਾਮਿਕਾਨਂ ਦਿਨ੍ਨੇ ਕਪ੍ਪਿਯੋ ਹੋਤਿ. ਕਪ੍ਪਿਯਭਣ੍ਡਂ ਦਤ੍ਵਾ ਗਹੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ.

ਯੋਪਿ ਰੂਪਿਯਂ ਉਗ੍ਗਣ੍ਹਾਪੇਤ੍ਵਾ ਕਪ੍ਪਿਯਕਾਰਕੇਨ ਸਦ੍ਧਿਂ ਕਮ੍ਮਾਰਕੁਲਂ ਗਨ੍ਤ੍ਵਾ ਪਤ੍ਤਂ ਦਿਸ੍ਵਾ ‘‘ਅਯਂ ਮਯ੍ਹਂ ਰੁਚ੍ਚਤੀ’’ਤਿ ਵਦਤਿ. ਕਪ੍ਪਿਯਕਾਰਕੋ ਚ ਤਂ ਰੂਪਿਯਂ ਦਤ੍ਵਾ ਕਮ੍ਮਾਰਂ ਸਞ੍ਞਾਪੇਤਿ, ਅਯਮ੍ਪਿ ਪਤ੍ਤੋ ਕਪ੍ਪਿਯਵੋਹਾਰੇਨ ਗਹਿਤੋਪਿ ਦੁਤਿਯਪਤ੍ਤਸਦਿਸੋਯੇਵ, ਮੂਲਸ੍ਸ ਸਮ੍ਪਟਿਚ੍ਛਿਤਤ੍ਤਾ ਅਕਪ੍ਪਿਯੋ. ਕਸ੍ਮਾ ਸੇਸਾਨਂ ਨ ਕਪ੍ਪਤੀਤਿ? ਮੂਲਸ੍ਸ ਅਨਿਸ੍ਸਟ੍ਠਤ੍ਤਾ.

ਯੋ ਪਨ ਰੂਪਿਯਂ ਅਸਮ੍ਪਟਿਚ੍ਛਿਤ੍ਵਾ ‘‘ਥੇਰਸ੍ਸ ਪਤ੍ਤਂ ਕਿਣਿਤ੍ਵਾ ਦੇਹੀ’’ਤਿ ਪਹਿਤਕਪ੍ਪਿਯਕਾਰਕੇਨ ਸਦ੍ਧਿਂ ਕਮ੍ਮਾਰਕੁਲਂ ਗਨ੍ਤ੍ਵਾ ਪਤ੍ਤਂ ਦਿਸ੍ਵਾ ‘‘ਇਮੇ ਕਹਾਪਣੇ ਗਹੇਤ੍ਵਾ ਇਮਂ ਦੇਹੀ’’ਤਿ ਕਹਾਪਣੇ ਦਾਪੇਤ੍ਵਾ ਗਹਿਤੋ, ਅਯਂ ਪਤ੍ਤੋ ਏਤਸ੍ਸੇਵ ਭਿਕ੍ਖੁਨੋ ਨ ਵਟ੍ਟਤਿ ਦੁਬ੍ਬਿਚਾਰਿਤਤ੍ਤਾ, ਅਞ੍ਞੇਸਂ ਪਨ ਵਟ੍ਟਤਿ, ਮੂਲਸ੍ਸ ਅਸਮ੍ਪਟਿਚ੍ਛਿਤਤ੍ਤਾ.

ਮਹਾਸੁਮਤ੍ਥੇਰਸ੍ਸ ਕਿਰ ਉਪਜ੍ਝਾਯੋ ਅਨੁਰੁਦ੍ਧਤ੍ਥੇਰੋ ਨਾਮ ਅਹੋਸਿ. ਸੋ ਅਤ੍ਤਨੋ ਏਵਰੂਪਂ ਪਤ੍ਤਂ ਸਪ੍ਪਿਸ੍ਸ ਪੂਰੇਤ੍ਵਾ ਸਙ੍ਘਸ੍ਸ ਨਿਸ੍ਸਜ੍ਜਿ. ਤਿਪਿਟਕਚੂਲ਼ਨਾਗਤ੍ਥੇਰਸ੍ਸਪਿ ਸਦ੍ਧਿਵਿਹਾਰਿਕਾਨਂ ਏਵਰੂਪੋ ਪਤ੍ਤੋ ਅਹੋਸਿ. ਤਂ ਥੇਰੋਪਿ ਸਪ੍ਪਿਸ੍ਸ ਪੂਰਾਪੇਤ੍ਵਾ ਸਙ੍ਘਸ੍ਸ ਨਿਸ੍ਸਜ੍ਜਾਪੇਸੀਤਿ. ਇਦਂ ਅਕਪ੍ਪਿਯਪਤ੍ਤਚਤੁਕ੍ਕਂ.

ਸਚੇ ਪਨ ਰੂਪਿਯਂ ਅਸਮ੍ਪਟਿਚ੍ਛਿਤ੍ਵਾ ‘‘ਥੇਰਸ੍ਸ ਪਤ੍ਤਂ ਕਿਣਿਤ੍ਵਾ ਦੇਹੀ’’ਤਿ ਪਹਿਤਕਪ੍ਪਿਯਕਾਰਕੇਨ ਸਦ੍ਧਿਂ ਕਮ੍ਮਾਰਕੁਲਂ ਗਨ੍ਤ੍ਵਾ ਪਤ੍ਤਂ ਦਿਸ੍ਵਾ ‘‘ਅਯਂ ਮਯ੍ਹਂ ਰੁਚ੍ਚਤੀ’’ਤਿ ਵਾ ‘‘ਇਮਾਹਂ ਗਹੇਸ੍ਸਾਮੀ’’ਤਿ ਵਾ ਵਦਤਿ, ਕਪ੍ਪਿਯਕਾਰਕੋ ਚ ਤਂ ਰੂਪਿਯਂ ਦਤ੍ਵਾ ਕਮ੍ਮਾਰਂ ਸਞ੍ਞਾਪੇਤਿ, ਅਯਂ ਪਤ੍ਤੋ ਸਬ੍ਬਕਪ੍ਪਿਯੋ ਬੁਦ੍ਧਾਨਮ੍ਪਿ ਪਰਿਭੋਗਾਰਹੋਤਿ.

੫੯੧. ਅਰੂਪਿਯੇ ਰੂਪਿਯਸਞ੍ਞੀਤਿ ਖਰਪਤ੍ਤਾਦੀਸੁ ਸੁਵਣ੍ਣਾਦਿਸਞ੍ਞੀ. ਆਪਤ੍ਤਿ ਦੁਕ੍ਕਟਸ੍ਸਾਤਿ ਸਚੇ ਤੇਨ ਅਰੂਪਿਯਂ ਚੇਤਾਪੇਤਿ ਦੁਕ੍ਕਟਾਪਤ੍ਤਿ ਹੋਤਿ. ਏਸ ਨਯੋ ਵੇਮਤਿਕੇ. ਅਰੂਪਿਯਸਞ੍ਞਿਸ੍ਸ ਪਨ ਪਞ੍ਚਹਿ ਸਹਧਮ੍ਮਿਕੇਹਿ ਸਦ੍ਧਿ ‘‘ਇਦਂ ਗਹੇਤ੍ਵਾ ਇਦਂ ਦੇਥਾ’’ਤਿ ਕਯਵਿਕ੍ਕਯਂ ਕਰੋਨ੍ਤਸ੍ਸਾਪਿ ਅਨਾਪਤ੍ਤਿ. ਸੇਸਂ ਉਤ੍ਤਾਨਮੇਵ.

ਛਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਰੂਪਿਯਸਂਵੋਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਕਯਵਿਕ੍ਕਯਸਿਕ੍ਖਾਪਦਵਣ੍ਣਨਾ

੫੯੩. ਤੇਨ ਸਮਯੇਨਾਤਿ ਕਯਵਿਕ੍ਕਯਸਿਕ੍ਖਾਪਦਂ. ਤਤ੍ਥ ਕਤਿ ਹਿਪਿ ਤ੍ਯਾਯਨ੍ਤਿ ਕਤਿ ਤੇ ਅਯਂ, ਹਿਕਾਰੋ ਪਨੇਤ੍ਥ ਪਦਪੂਰਣੋ, ਪਿਕਾਰੋ ਗਰਹਾਯਂ, ਅਯਂ ਦੁਬ੍ਬਲਸਙ੍ਘਾਟਿ ਤਵ ਕਤਿ ਦਿਵਸਾਨਿ ਭਵਿਸ੍ਸਤੀਤਿ ਅਤ੍ਥੋ. ਅਥ ਵਾ ਕਤਿਹਮ੍ਪਿ ਤ੍ਯਾਯਨ੍ਤਿਪਿ ਪਾਠੋ. ਤਤ੍ਥ ਕਤਿਹਨ੍ਤਿ ਕਤਿ ਅਹਾਨਿ, ਕਤਿ ਦਿਵਸਾਨੀਤਿ ਵੁਤ੍ਤਂ ਹੋਤਿ. ਸੇਸਂ ਵੁਤ੍ਤਨਯਮੇਵ. ਕਤਿਹਿਪਿ ਮ੍ਯਾਯਨ੍ਤਿ ਇਦਮ੍ਪਿ ਏਤੇਨੇਵ ਨਯੇਨ ਵੇਦਿਤਬ੍ਬਂ. ਗਿਹੀਪਿ ਨਂ ਗਿਹਿਸ੍ਸਾਤਿ ਏਤ੍ਥ ਨਨ੍ਤਿ ਨਾਮਤ੍ਥੇ ਨਿਪਾਤੋ, ਗਿਹੀ ਨਾਮ ਗਿਹਿਸ੍ਸਾਤਿ ਵੁਤ੍ਤਂ ਹੋਤਿ.

੫੯੪. ਨਾਨਪ੍ਪਕਾਰਕਨ੍ਤਿ ਚੀਵਰਾਦੀਨਂ ਕਪ੍ਪਿਯਭਣ੍ਡਾਨਂ ਵਸੇਨ ਅਨੇਕਵਿਧਂ. ਤੇਨੇਵਸ੍ਸ ਪਦਭਾਜਨੇ ਚੀਵਰਂ ਆਦਿਂ ਕਤ੍ਵਾ ਦਸਿਕਸੁਤ੍ਤਪਰਿਯੋਸਾਨਂ ਕਪ੍ਪਿਯਭਣ੍ਡਮੇਵ ਦਸ੍ਸਿਤਂ. ਅਕਪ੍ਪਿਯਭਣ੍ਡਪਰਿਵਤ੍ਤਨਞ੍ਹਿ ਕਯਵਿਕ੍ਕਯਸਙ੍ਗਹਂ ਨ ਗਚ੍ਛਤਿ. ਕਯਵਿਕ੍ਕਯਨ੍ਤਿ ਕਯਞ੍ਚੇਵ ਵਿਕ੍ਕਯਞ੍ਚ. ‘‘ਇਮਿਨਾ ਇਮਂ ਦੇਹੀ’’ਤਿਆਦਿਨਾ ਹਿ ਨਯੇਨ ਪਰਸ੍ਸ ਕਪ੍ਪਿਯਭਣ੍ਡਂ ਗਣ੍ਹਨ੍ਤੋ ਕਯਂ ਸਮਾਪਜ੍ਜਤਿ, ਅਤ੍ਤਨੋ ਕਪ੍ਪਿਯਭਣ੍ਡਂ ਦੇਨ੍ਤੋ ਵਿਕ੍ਕਯਂ.

੫੯੫. ਅਜ੍ਝਾਚਰਤੀਤਿ ਅਭਿਭਵਿਤ੍ਵਾ ਚਰਤਿ, ਵੀਤਿਕ੍ਕਮਵਾਚਂ ਭਾਸਤੀਤਿ ਅਤ੍ਥੋ. ਯਤੋ ਕਯਿਤਞ੍ਚ ਹੋਤਿ ਵਿਕ੍ਕਯਿਤਞ੍ਚਾਤਿ ਯਦਾ ਕਯਿਤਞ੍ਚ ਹੋਤਿ ਪਰਭਣ੍ਡਂ ਅਤ੍ਤਨੋ ਹਤ੍ਥਗਤਂ ਕਰੋਨ੍ਤੇਨ, ਵਿਕ੍ਕੀਤਞ੍ਚ ਅਤ੍ਤਨੋ ਭਣ੍ਡਂ ਪਰਹਤ੍ਥਗਤਂ ਕਰੋਨ੍ਤੇਨ. ‘‘ਇਮਿਨਾ ਇਮ’’ਨ੍ਤਿਆਦਿਵਚਨਾਨੁਰੂਪਤੋ ਪਨ ਪਾਠੇ ਪਠਮਂ ਅਤ੍ਤਨੋ ਭਣ੍ਡਂ ਦਸ੍ਸਿਤਂ.

ਨਿਸ੍ਸਜ੍ਜਿਤਬ੍ਬਨ੍ਤਿ ਏਵਂ ਪਰਸ੍ਸ ਹਤ੍ਥਤੋ ਕਯਵਸੇਨ ਗਹਿਤਕਪ੍ਪਿਯਭਣ੍ਡਂ ਨਿਸ੍ਸਜ੍ਜਿਤਬ੍ਬਂ. ਅਯਞ੍ਹਿ ਕਯਵਿਕ੍ਕਯੋ ਠਪੇਤ੍ਵਾ ਪਞ੍ਚ ਸਹਧਮ੍ਮਿਕੇ ਅਵਸੇਸੇਹਿ ਗਿਹਿਪਬ੍ਬਜਿਤੇਹਿ ਅਨ੍ਤਮਸੋ ਮਾਤਾਪਿਤੂਹਿਪਿ ਸਦ੍ਧਿਂ ਨ ਵਟ੍ਟਤਿ.

ਤਤ੍ਰਾਯਂ ਵਿਨਿਚ੍ਛਯੋ – ਵਤ੍ਥੇਨ ਵਾ ਵਤ੍ਥਂ ਹੋਤੁ ਭਤ੍ਤੇਨ ਵਾ ਭਤ੍ਤਂ, ਯਂ ਕਿਞ੍ਚਿ ਕਪ੍ਪਿਯਂ ‘‘ਇਮਿਨਾ ਇਮਂ ਦੇਹੀ’’ਤਿ ਵਦਤਿ, ਦੁਕ੍ਕਟਂ. ਏਵਂ ਵਤ੍ਵਾ ਮਾਤੁਯਾਪਿ ਅਤ੍ਤਨੋ ਭਣ੍ਡਂ ਦੇਤਿ, ਦੁਕ੍ਕਟਂ. ‘‘ਇਮਿਨਾ ਇਮਂ ਦੇਹੀ’’ਤਿ ਵੁਤ੍ਤੋ ਵਾ ‘‘ਇਮਂ ਦੇਹਿ, ਇਮਂ ਤੇ ਦਸ੍ਸਾਮੀ’’ਤਿ ਵਤ੍ਵਾ ਵਾ ਮਾਤੁਯਾਪਿ ਭਣ੍ਡਂ ਅਤ੍ਤਨਾ ਗਣ੍ਹਾਤਿ, ਦੁਕ੍ਕਟਂ. ਅਤ੍ਤਨੋ ਭਣ੍ਡੇ ਪਰਹਤ੍ਥਂ ਪਰਭਣ੍ਡੇ ਚ ਅਤ੍ਤਨੋ ਹਤ੍ਥਂ ਸਮ੍ਪਤ੍ਤੇ ਨਿਸ੍ਸਗ੍ਗਿਯਂ. ਮਾਤਰਂ ਪਨ ਪਿਤਰਂ ਵਾ ‘‘ਇਮਂ ਦੇਹੀ’’ਤਿ ਵਦਤੋ ਵਿਞ੍ਞਤ੍ਤਿ ਨ ਹੋਤਿ. ‘‘ਇਮਂ ਗਣ੍ਹਾਹੀ’’ਤਿ ਵਦਤੋ ਸਦ੍ਧਾਦੇਯ੍ਯਵਿਨਿਪਾਤਨਂ ਨ ਹੋਤਿ. ਅਞ੍ਞਾਤਕਂ ‘‘ਇਮਂ ਦੇਹੀ’’ਤਿ ਵਦਤੋ ਵਿਞ੍ਞਤ੍ਤਿ ਹੋਤਿ. ‘‘ਇਮਂ ਗਣ੍ਹਾਹੀ’’ਤਿ ਵਦਤੋ ਸਦ੍ਧਾਦੇਯ੍ਯਵਿਨਿਪਾਤਨਂ ਹੋਤਿ. ‘‘ਇਮਿਨਾ ਇਮਂ ਦੇਹੀ’’ਤਿ ਕਯਵਿਕ੍ਕਯਂ ਆਪਜ੍ਜਤੋ ਨਿਸ੍ਸਗ੍ਗਿਯਂ. ਤਸ੍ਮਾ ਕਪ੍ਪਿਯਭਣ੍ਡਂ ਪਰਿਵਤ੍ਤੇਨ੍ਤੇਨ ਮਾਤਾਪਿਤੂਹਿਪਿ ਸਦ੍ਧਿਂ ਕਯਵਿਕ੍ਕਯਂ ਅਞ੍ਞਾਤਕੇਹਿ ਸਦ੍ਧਿਂ ਤਿਸ੍ਸੋ ਆਪਤ੍ਤਿਯੋ ਮੋਚੇਨ੍ਤੇਨ ਪਰਿਵਤ੍ਤੇਤਬ੍ਬਂ.

ਤਤ੍ਰਾਯਂ ਪਰਿਵਤ੍ਤਨਵਿਧਿ – ਭਿਕ੍ਖੁਸ੍ਸ ਪਾਥੇਯ੍ਯਤਣ੍ਡੁਲਾ ਹੋਨ੍ਤਿ, ਸੋ ਅਨ੍ਤਰਾਮਗ੍ਗੇ ਭਤ੍ਤਹਤ੍ਥਂ ਪੁਰਿਸਂ ਦਿਸ੍ਵਾ ‘‘ਅਮ੍ਹਾਕਂ ਤਣ੍ਡੁਲਾ ਅਤ੍ਥਿ, ਨ ਚ ਨੋ ਇਮੇਹਿ ਅਤ੍ਥੋ, ਭਤ੍ਤੇਨ ਪਨ ਅਤ੍ਥੋ’’ਤਿ ਵਦਤਿ. ਪੁਰਿਸੋ ਤਣ੍ਡੁਲੇ ਗਹੇਤ੍ਵਾ ਭਤ੍ਤਂ ਦੇਤਿ, ਵਟ੍ਟਤਿ. ਤਿਸ੍ਸੋਪਿ ਆਪਤ੍ਤਿਯੋ ਨ ਹੋਨ੍ਤਿ. ਅਨ੍ਤਮਸੋ ਨਿਮਿਤ੍ਤਕਮ੍ਮਮਤ੍ਤਮ੍ਪਿ ਨ ਹੋਤਿ. ਕਸ੍ਮਾ? ਮੂਲਸ੍ਸ ਅਤ੍ਥਿਤਾਯ. ਪਰਤੋ ਚ ਵੁਤ੍ਤਮੇਵ ‘‘ਇਦਂ ਅਮ੍ਹਾਕਂ ਅਤ੍ਥਿ, ਅਮ੍ਹਾਕਞ੍ਚ ਇਮਿਨਾ ਚ ਇਮਿਨਾ ਚ ਅਤ੍ਥੋਤਿ ਭਣਤੀ’’ਤਿ. ਯੋ ਪਨ ਏਵਂ ਅਕਤ੍ਵਾ ‘‘ਇਮਿਨਾ ਇਮਂ ਦੇਹੀ’’ਤਿ ਪਰਿਵਤ੍ਤੇਤਿ; ਯਥਾਵਤ੍ਥੁਕਮੇਵ. ਵਿਘਾਸਾਦਂ ਦਿਸ੍ਵਾ ‘‘ਇਮਂ ਓਦਨਂ ਭੁਞ੍ਜਿਤ੍ਵਾ, ਰਜਨਂ ਵਾ ਦਾਰੂਨਿ ਵਾ ਆਹਰਾ’’ਤਿ ਵਦਤਿ, ਰਜਨਛਲ੍ਲਿਗਣਨਾਯ ਦਾਰੁਗਣਨਾਯ ਚ ਨਿਸ੍ਸਗ੍ਗਿਯਾਨਿ ਹੋਨ੍ਤਿ. ‘‘ਇਮਂ ਓਦਨਂ ਭੁਞ੍ਜਿਤ੍ਵਾ ਇਦਂ ਨਾਮ ਕਰੋਥਾ’’ਤਿ ਦਨ੍ਤਕਾਰਾਦੀਹਿ ਸਿਪ੍ਪਿਕੇਹਿ ਧਮਕਰਣਾਦੀਸੁ ਤਂ ਤਂ ਪਰਿਕ੍ਖਾਰਂ ਕਾਰੇਤਿ, ਰਜਕੇਹਿ ਵਾ ਵਤ੍ਥਂ ਧੋਵਾਪੇਤਿ; ਯਥਾਵਤ੍ਥੁਕਮੇਵ. ਨ੍ਹਾਪਿਤੇਨ ਕੇਸੇ ਛਿਨ੍ਦਾਪੇਤਿ, ਕਮ੍ਮਕਾਰੇਹਿ ਨਵਕਮ੍ਮਂ ਕਾਰੇਤਿ; ਯਥਾਵਤ੍ਥੁਕਮੇਵ. ਸਚੇ ਪਨ ‘‘ਇਦਂ ਭਤ੍ਤਂ ਭੁਞ੍ਜਿਤ੍ਵਾ ਇਦਂ ਕਰੋਥਾ’’ਤਿ ਨ ਵਦਤਿ ‘‘ਇਦਂ ਭਤ੍ਤਂ ਭੁਞ੍ਜ ਭੁਤ੍ਤੋਸਿ ਭੁਞ੍ਜਿਸ੍ਸਸਿ, ਇਦਂ ਨਾਮ ਕਰੋਹੀ’’ਤਿ ਵਦਤਿ, ਵਟ੍ਟਤਿ. ਏਤ੍ਥ ਚ ਕਿਞ੍ਚਾਪਿ ਵਤ੍ਥਧੋਵਨੇ ਵਾ ਕੇਸਚ੍ਛੇਦਨੇ ਵਾ ਭੂਮਿਸੋਧਨਾਦਿਨਵਕਮ੍ਮੇ ਵਾ ਪਰਭਣ੍ਡਂ ਅਤ੍ਤਨੋ ਹਤ੍ਥਗਤਂ ਨਿਸ੍ਸਜ੍ਜਿਤਬ੍ਬਂ ਨਾਮ ਨਤ੍ਥਿ. ਮਹਾਅਟ੍ਠਕਥਾਯਂ ਪਨ ਦਲ਼੍ਹਂ ਕਤ੍ਵਾ ਵੁਤ੍ਤਤ੍ਤਾ ਨ ਸਕ੍ਕਾ ਏਤਂ ਪਟਿਕ੍ਖਿਪਿਤੁਂ, ਤਸ੍ਮਾ ਯਥਾ ਨਿਸ੍ਸਗ੍ਗਿਯਵਤ੍ਥੁਮ੍ਹਿ ਪਰਿਭੁਤ੍ਤੇ ਵਾ ਨਟ੍ਠੇ ਵਾ ਪਾਚਿਤ੍ਤਿਯਂ ਦੇਸੇਤਿ, ਏਵਮਿਧਾਪਿ ਦੇਸੇਤਬ੍ਬਂ.

੫੯੬. ਕਯਵਿਕ੍ਕਯੇ ਕਯਵਿਕ੍ਕਯਸਞ੍ਞੀਤਿਆਦਿਮ੍ਹਿ ਯੋ ਕਯਵਿਕ੍ਕਯਂ ਸਮਾਪਜ੍ਜਤਿ, ਸੋ ਤਸ੍ਮਿਂ ਕਯਵਿਕ੍ਕਯਸਞ੍ਞੀ ਵਾ ਭਵਤੁ ਵੇਮਤਿਕੋ ਵਾ, ਨ ਕਯਵਿਕ੍ਕਯਸਞ੍ਞੀ ਵਾ ਨਿਸ੍ਸਗ੍ਗਿਯਪਾਚਿਤ੍ਤਿਯਮੇਵ. ਚੂਲ਼ਤ੍ਤਿਕੇ ਦ੍ਵੀਸੁ ਪਦੇਸੁ ਦੁਕ੍ਕਟਮੇਵਾਤਿ ਏਵਮਤ੍ਥੋ ਦਟ੍ਠਬ੍ਬੋ.

੫੯੭. ਅਗ੍ਘਂ ਪੁਚ੍ਛਤੀਤਿ ‘‘ਅਯਂ ਤਵ ਪਤ੍ਤੋ ਕਿਂ ਅਗ੍ਘਤੀ’’ਤਿ ਪੁਚ੍ਛਤਿ. ‘‘ਇਦਂ ਨਾਮਾ’’ਤਿ ਵੁਤ੍ਤੇ ਪਨ ਸਚੇ ਤਸ੍ਸ ਕਪ੍ਪਿਯਭਣ੍ਡਂ ਮਹਗ੍ਘਂ ਹੋਤਿ, ਏਵਞ੍ਚ ਨਂ ਪਟਿਵਦਤਿ ‘‘ਉਪਾਸਕ, ਮਮ ਇਦਂ ਵਤ੍ਥੁ ਮਹਗ੍ਘਂ, ਤਵ ਪਤ੍ਤਂ ਅਞ੍ਞਸ੍ਸ ਦੇਹੀ’’ਤਿ. ਤਂ ਸੁਤ੍ਵਾ ਇਤਰੋ ‘‘ਅਞ੍ਞਂ ਥਾਲਕਮ੍ਪਿ ਦਸ੍ਸਾਮੀ’’ਤਿ ਵਦਤਿ ਗਣ੍ਹਿਤੁਂ ਵਟ੍ਟਤਿ, ‘‘ਇਦਂ ਅਮ੍ਹਾਕਂ ਅਤ੍ਥੀ’’ਤਿ ਵੁਤ੍ਤਲਕ੍ਖਣੇ ਪਤਤਿ. ਸਚੇ ਸੋ ਪਤ੍ਤੋ ਮਹਗ੍ਘੋ, ਭਿਕ੍ਖੁਨੋ ਵਤ੍ਥੁ ਅਪ੍ਪਗ੍ਘਂ, ਪਤ੍ਤਸਾਮਿਕੋ ਚਸ੍ਸ ਅਪ੍ਪਗ੍ਘਭਾਵਂ ਨ ਜਾਨਾਤਿ, ਪਤ੍ਤੋ ਨ ਗਹੇਤਬ੍ਬੋ, ‘‘ਮਮ ਵਤ੍ਥੁ ਅਪ੍ਪਗ੍ਘ’’ਨ੍ਤਿ ਆਚਿਕ੍ਖਿਤਬ੍ਬਂ. ਮਹਗ੍ਘਭਾਵਂ ਞਤ੍ਵਾ ਵਞ੍ਚੇਤ੍ਵਾ ਗਣ੍ਹਨ੍ਤੋ ਹਿ ਗਹਿਤਭਣ੍ਡਂ ਅਗ੍ਘਾਪੇਤ੍ਵਾ ਕਾਰੇਤਬ੍ਬਤਂ ਆਪਜ੍ਜਤਿ. ਸਚੇ ਪਤ੍ਤਸਾਮਿਕੋ ‘‘ਹੋਤੁ, ਭਨ੍ਤੇ, ਸੇਸਂ ਮਮ ਪੁਞ੍ਞਂ ਭਵਿਸ੍ਸਤੀ’’ਤਿ ਦੇਤਿ, ਵਟ੍ਟਤਿ.

ਕਪ੍ਪਿਯਕਾਰਕਸ੍ਸ ਆਚਿਕ੍ਖਤੀਤਿ ਯਸ੍ਸ ਹਤ੍ਥਤੋ ਭਣ੍ਡਂ ਗਣ੍ਹਾਤਿ, ਤਂ ਠਪੇਤ੍ਵਾ ਅਞ੍ਞਂ ਅਨ੍ਤਮਸੋ ਤਸ੍ਸ ਪੁਤ੍ਤਭਾਤਿਕਮ੍ਪਿ ਕਪ੍ਪਿਯਕਾਰਕਂ ਕਤ੍ਵਾ ‘‘ਇਮਿਨਾ ਇਮਂ ਨਾਮ ਗਹੇਤ੍ਵਾ ਦੇਹੀ’’ਤਿ ਆਚਿਕ੍ਖਤਿ. ਸੋ ਚੇ ਛੇਕੋ ਹੋਤਿ, ਪੁਨਪ੍ਪੁਨਂ ਅਪਨੇਤ੍ਵਾ ਵਿਵਦਿਤ੍ਵਾ ਗਣ੍ਹਾਤਿ, ਤੁਣ੍ਹੀਭੂਤੇਨ ਠਾਤਬ੍ਬਂ. ਨੋ ਚੇ ਛੇਕੋ ਹੋਤਿ, ਨ ਜਾਨਾਤਿ ਗਹੇਤੁਂ, ਵਾਣਿਜਕੋ ਤਂ ਵਞ੍ਚੇਤਿ, ‘‘ਮਾ ਗਣ੍ਹਾ’’ਤਿ ਵਤ੍ਤਬ੍ਬੋ.

ਇਦਂ ਅਮ੍ਹਾਕਨ੍ਤਿਆਦਿਮ੍ਹਿ ‘‘ਇਦਂ ਪਟਿਗ੍ਗਹਿਤਂ ਤੇਲਂ ਵਾ ਸਪ੍ਪਿ ਵਾ ਅਮ੍ਹਾਕਂ ਅਤ੍ਥਿ, ਅਮ੍ਹਾਕਞ੍ਚ ਅਞ੍ਞੇਨ ਅਪ੍ਪਟਿਗ੍ਗਹਿਤਕੇਨ ਅਤ੍ਥੋ’’ਤਿ ਭਣਤਿ. ਸਚੇ ਸੋ ਤਂ ਗਹੇਤ੍ਵਾ ਅਞ੍ਞਂ ਦੇਤਿ, ਪਠਮਂ ਅਤ੍ਤਨੋ ਤੇਲਂ ਨ ਮਿਨਾਪੇਤਬ੍ਬਂ. ਕਸ੍ਮਾ? ਨਾਲ਼ਿਯਞ੍ਹਿ ਅਵਸਿਟ੍ਠਤੇਲਂ ਹੋਤਿ, ਤਂ ਪਚ੍ਛਾ ਮਿਨਨ੍ਤਸ੍ਸ ਅਪ੍ਪਟਿਗ੍ਗਹਿਤਕਂ ਦੂਸੇਯ੍ਯਾਤਿ. ਸੇਸਂ ਉਤ੍ਤਾਨਮੇਵ.

ਛਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਕਯਵਿਕ੍ਕਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਕੋਸਿਯਵਗ੍ਗੋ ਦੁਤਿਯੋ.