੩. ਪਤ੍ਤਵਗ੍ਗੋ

੧. ਪਤ੍ਤਸਿਕ੍ਖਾਪਦਵਣ੍ਣਨਾ

੫੯੮. ਤੇਨ ਸਮਯੇਨਾਤਿ ਪਤ੍ਤਸਿਕ੍ਖਾਪਦਂ. ਤਤ੍ਥ ਪਤ੍ਤਵਾਣਿਜ੍ਜਨ੍ਤਿ ਗਾਮਨਿਗਮਾਦੀਸੁ ਵਿਚਰਨ੍ਤਾ ਪਤ੍ਤਵਾਣਿਜ੍ਜਂ ਵਾ ਕਰਿਸ੍ਸਨ੍ਤਿ. ਆਮਤ੍ਤਿਕਾਪਣਂ ਵਾਤਿ ਅਮਤ੍ਤਾਨਿ ਵੁਚ੍ਚਨ੍ਤਿ ਭਾਜਨਾਨਿ, ਤਾਨਿ ਯੇਸਂ ਭਣ੍ਡਂ ਤੇ ਆਮਤ੍ਤਿਕਾ, ਤੇਸਂ ਆਮਤ੍ਤਿਕਾਨਂ ਆਪਣਂ ਆਮਤ੍ਤਿਕਾਪਣਂ, ਕੁਲਾਲਭਣ੍ਡਵਾਣਿਜਕਾਪਣਨ੍ਤਿ ਅਤ੍ਥੋ.

੬੦੨. ਤਯੋ ਪਤ੍ਤਸ੍ਸ ਵਣ੍ਣਾਤਿ ਤੀਣਿ ਪਤ੍ਤਸ੍ਸ ਪਮਾਣਾਨਿ. ਅਡ੍ਢਾਲ਼੍ਹਕੋਦਨਂ ਗਣ੍ਹਾਤੀਤਿ ਮਗਧਨਾਲ਼ਿਯਾ ਦ੍ਵਿਨ੍ਨਂ ਤਣ੍ਡੁਲਨਾਲ਼ੀਨਂ ਓਦਨਂ ਗਣ੍ਹਾਤਿ. ਮਗਧਨਾਲ਼ਿ ਨਾਮ ਅਡ੍ਢਤੇਰਸਪਲਾ ਹੋਤੀਤਿ ਅਨ੍ਧਕਟ੍ਠਕਥਾਯਂ ਵੁਤ੍ਤਂ. ਸੀਹਲ਼ਦੀਪੇ ਪਕਤਿਨਾਲ਼ਿ ਮਹਨ੍ਤਾ, ਦਮਿਲ਼ਨਾਲ਼ਿ ਖੁਦ੍ਦਕਾ, ਮਗਧਨਾਲ਼ਿ ਪਮਾਣਯੁਤ੍ਤਾ, ਤਾਯ ਮਗਧਨਾਲ਼ਿਯਾ ਦਿਯਡ੍ਢਨਾਲ਼ਿ ਏਕਾ ਸੀਹਲ਼ਨਾਲ਼ਿ ਹੋਤੀਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਚਤੁਭਾਗਂ ਖਾਦਨਨ੍ਤਿ ਓਦਨਸ੍ਸ ਚਤੁਤ੍ਥਭਾਗਪ੍ਪਮਾਣਂ ਖਾਦਨਂ, ਤਂ ਹਤ੍ਥਹਾਰਿਯਸ੍ਸ ਮੁਗ੍ਗਸੂਪਸ੍ਸ ਵਸੇਨ ਵੇਦਿਤਬ੍ਬਂ. ਤਦੁਪਿਯਂ ਬ੍ਯਞ੍ਜਨਨ੍ਤਿ ਤਸ੍ਸ ਓਦਨਸ੍ਸ ਅਨੁਰੂਪਂ ਮਚ੍ਛਮਂਸਸਾਕਫਲਕਲ਼ੀਰਾਦਿਬ੍ਯਞ੍ਜਨਂ.

ਤਤ੍ਰਾਯਂ ਵਿਨਿਚ੍ਛਯੋ – ਅਨੁਪਹਤਪੁਰਾਣਸਾਲਿਤਣ੍ਡੁਲਾਨਂ ਸੁਕੋਟ੍ਟਿਤਪਰਿਸੁਦ੍ਧਾਨਂ ਦ੍ਵੇ ਮਗਧਨਾਲ਼ਿਯੋ ਗਹੇਤ੍ਵਾ ਤੇਹਿ ਤਣ੍ਡੁਲੇਹਿ ਅਨੁਤ੍ਤਣ੍ਡੁਲਂ ਅਕਿਲਿਨ੍ਨਂ ਅਪਿਣ੍ਡਿਤਂ ਸੁਵਿਸਦਂ ਕੁਨ੍ਦਮਕੁਲ਼ਰਾਸਿਸਦਿਸਂ ਅਵਸ੍ਸਾਵਿਤੋਦਨਂ ਪਚਿਤ੍ਵਾ ਨਿਰਵਸੇਸਂ ਪਤ੍ਤੇ ਪਕ੍ਖਿਪਿਤ੍ਵਾ ਤਸ੍ਸ ਓਦਨਸ੍ਸ ਚਤੁਤ੍ਥਭਾਗਪ੍ਪਮਾਣੋ ਨਾਤਿਘਨੋ ਨਾਤਿਤਨੁਕੋ ਹਤ੍ਥਹਾਰਿਯੋ ਸਬ੍ਬਸਮ੍ਭਾਰਸਙ੍ਖਤੋ ਮੁਗ੍ਗਸੂਪੋ ਪਕ੍ਖਿਪਿਤਬ੍ਬੋ. ਤਤੋ ਆਲੋਪਸ੍ਸ ਆਲੋਪਸ੍ਸ ਅਨੁਰੂਪਂ ਯਾਵਚਰਿਮਾਲੋਪਪ੍ਪਹੋਨਕਂ ਮਚ੍ਛਮਂਸਾਦਿਬ੍ਯਞ੍ਜਨਂ ਪਕ੍ਖਿਪਿਤਬ੍ਬਂ, ਸਪ੍ਪਿਤੇਲਤਕ੍ਕਰਸਕਞ੍ਜਿਕਾਦੀਨਿ ਪਨ ਗਣਨੂਪਗਾਨਿ ਨ ਹੋਨ੍ਤਿ, ਤਾਨਿ ਹਿ ਓਦਨਗਤਿਕਾਨੇਵ, ਨੇਵ ਹਾਪੇਤੁਂ ਨ ਵਡ੍ਢੇਤੁਂ ਸਕ੍ਕੋਨ੍ਤਿ. ਏਵਮੇਤਂ ਸਬ੍ਬਮ੍ਪਿ ਪਕ੍ਖਿਤ੍ਤਂ ਸਚੇ ਪਤ੍ਤਸ੍ਸ ਮੁਖਵਟ੍ਟਿਯਾ ਹੇਟ੍ਠਿਮਰਾਜਿਸਮਂ ਤਿਟ੍ਠਤਿ, ਸੁਤ੍ਤੇਨ ਵਾ ਹੀਰੇਨ ਵਾ ਛਿਨ੍ਦਨ੍ਤਸ੍ਸ ਸੁਤ੍ਤਸ੍ਸ ਵਾ ਹੀਰਸ੍ਸ ਵਾ ਹੇਟ੍ਠਿਮਨ੍ਤਂ ਫੁਸਤਿ, ਅਯਂ ਉਕ੍ਕਟ੍ਠੋ ਨਾਮ ਪਤ੍ਤੋ. ਸਚੇ ਤਂ ਰਾਜਿਂ ਅਤਿਕ੍ਕਮ੍ਮ ਥੂਪੀਕਤਂ ਤਿਟ੍ਠਤਿ, ਅਯਂ ਉਕ੍ਕਟ੍ਠੋਮਕੋ ਨਾਮ ਪਤ੍ਤੋ. ਸਚੇ ਤਂ ਰਾਜਿਂ ਨ ਸਮ੍ਪਾਪੁਣਾਤਿ, ਅਨ੍ਤੋਗਤਮੇਵ ਹੋਤਿ, ਅਯਂ ਉਕ੍ਕਟ੍ਠੁਕ੍ਕਟ੍ਠੋ ਨਾਮ ਪਤ੍ਤੋ.

ਨਾਲ਼ਿਕੋਦਨਨ੍ਤਿ ਮਗਧਨਾਲ਼ਿਯਾ ਏਕਾਯ ਤਣ੍ਡੁਲਨਾਲ਼ਿਯਾ ਓਦਨਂ. ਪਤ੍ਥੋਦਨਨ੍ਤਿ ਮਗਧਨਾਲ਼ਿਯਾ ਉਪਡ੍ਢਨਾਲ਼ਿਕੋਦਨਂ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਅਯਂ ਪਨ ਨਾਮਮਤ੍ਤੇ ਵਿਸੇਸੋ – ਸਚੇ ਨਾਲ਼ਿਕੋਦਨਾਦਿ ਸਬ੍ਬਮ੍ਪਿ ਪਕ੍ਖਿਤ੍ਤਂ ਵੁਤ੍ਤਨਯੇਨੇਵ ਹੇਟ੍ਠਿਮਰਾਜਿਸਮਂ ਤਿਟ੍ਠਤਿ, ਅਯਂ ਮਜ੍ਝਿਮੋ ਨਾਮ ਪਤ੍ਤੋ. ਸਚੇ ਤਂ ਰਾਜਿਂ ਅਤਿਕ੍ਕਮ੍ਮ ਥੂਪੀਕਤਂ ਤਿਟ੍ਠਤਿ, ਅਯਂ ਮਜ੍ਝਿਮੋਮਕੋ ਨਾਮ ਪਤ੍ਤੋ. ਸਚੇ ਤਂ ਰਾਜਿਂ ਨ ਸਮ੍ਪਾਪੁਣਾਤਿ ਅਨ੍ਤੋਗਤਮੇਵ ਹੋਤਿ, ਅਯਂ ਮਜ੍ਝਿਮੁਕ੍ਕਟ੍ਠੋ ਨਾਮ ਪਤ੍ਤੋ. ਸਚੇ ਪਤ੍ਥੋਦਨਾਦਿ ਸਬ੍ਬਮ੍ਪਿ ਪਕ੍ਖਿਤ੍ਤਂ ਹੇਟ੍ਠਿਮਰਾਜਿਸਮਂ ਤਿਟ੍ਠਤਿ, ਅਯਂ ਓਮਕੋ ਨਾਮ ਪਤ੍ਤੋ. ਸਚੇ ਤਂ ਰਾਜਿਂ ਅਤਿਕ੍ਕਮ੍ਮ ਥੂਪੀਕਤਂ ਤਿਟ੍ਠਤਿ, ਅਯਂ ਓਮਕੋਮਕੋ ਨਾਮ ਪਤ੍ਤੋ. ਸਚੇ ਤਂ ਰਾਜਿਂ ਨ ਪਾਪੁਣਾਤਿ ਅਨ੍ਤੋਗਤਮੇਵ ਹੋਤਿ, ਅਯਂ ਓਮਕੁਕ੍ਕਟ੍ਠੋ ਨਾਮ ਪਤ੍ਤੋਤਿ ਏਵਮੇਤੇ ਨਵ ਪਤ੍ਤਾ. ਤੇਸੁ ਦ੍ਵੇ ਅਪਤ੍ਤਾ ਉਕ੍ਕਟ੍ਠੁਕ੍ਕਟ੍ਠੋ ਚ ਓਮਕੋਮਕੋ ਚ. ‘‘ਤਤੋ ਉਕ੍ਕਟ੍ਠੋ ਅਪਤ੍ਤੋ ਓਮਕੋ ਅਪਤ੍ਤੋ’’ਤਿ ਇਦਞ੍ਹਿ ਏਤੇ ਸਨ੍ਧਾਯ ਵੁਤ੍ਤਂ. ਉਕ੍ਕਟ੍ਠੁਕ੍ਕਟ੍ਠੋ ਹਿ ਏਤ੍ਥ ਉਕ੍ਕਟ੍ਠਤੋ ਉਕ੍ਕਟ੍ਠਤ੍ਤਾ ‘‘ਤਤੋ ਉਕ੍ਕਟ੍ਠੋ ਅਪਤ੍ਤੋ’’ਤਿ ਵੁਤ੍ਤੋ. ਓਮਕੋਮਕੋ ਚ ਓਮਕਤੋ ਓਮਕਤ੍ਤਾ ਤਤੋ ਓਮਕੋ ਅਪਤ੍ਤੋਤਿ ਵੁਤ੍ਤੋ. ਤਸ੍ਮਾ ਏਤੇ ਭਾਜਨਪਰਿਭੋਗੇਨ ਪਰਿਭੁਞ੍ਜਿਤਬ੍ਬਾ, ਨ ਅਧਿਟ੍ਠਾਨੁਪਗਾ, ਨ ਵਿਕਪ੍ਪਨੁਪਗਾ. ਇਤਰੇ ਪਨ ਸਤ੍ਤ ਅਧਿਟ੍ਠਹਿਤ੍ਵਾ ਵਾ ਵਿਕਪ੍ਪੇਤ੍ਵਾ ਵਾ ਪਰਿਭੁਞ੍ਜਿਤਬ੍ਬਾ, ਏਵਂ ਅਕਤ੍ਵਾ ਤਂ ਦਸਾਹਂ ਅਤਿਕ੍ਕਾਮਯਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਨ੍ਤਿ ਤਂ ਸਤ੍ਤਵਿਧਮ੍ਪਿ ਪਤ੍ਤਂ ਦਸਾਹਪਰਮਂ ਕਾਲਂ ਅਤਿਕ੍ਕਾਮਯਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

੬੦੭. ਨਿਸ੍ਸਗ੍ਗਿਯਂ ਪਤ੍ਤਂ ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜਤੀਤਿ ਯਾਗੁਂ ਪਿਵਿਤ੍ਵਾ ਧੋਤੇ ਦੁਕ੍ਕਟਂ, ਖਞ੍ਜਕਂ ਖਾਦਿਤ੍ਵਾ ਭਤ੍ਤਂ ਭੁਞ੍ਜਿਤ੍ਵਾ ਧੋਤੇ ਦੁਕ੍ਕਟਨ੍ਤਿ ਏਵਂ ਪਯੋਗੇ ਪਯੋਗੇ ਦੁਕ੍ਕਟਂ.

੬੦੮. ਅਨਾਪਤ੍ਤਿ ਅਨ੍ਤੋਦਸਾਹਂ ਅਧਿਟ੍ਠੇਤਿ ਵਿਕਪ੍ਪੇਤੀਤਿ ਏਤ੍ਥ ਪਨ ਪਮਾਣਯੁਤ੍ਤਸ੍ਸਪਿ ਅਧਿਟ੍ਠਾਨਵਿਕਪ੍ਪਨੁਪਗਤ੍ਤਂ ਏਵਂ ਵੇਦਿਤਬ੍ਬਂ – ਅਯੋਪਤ੍ਤੋ ਪਞ੍ਚਹਿ ਪਾਕੇਹਿ ਮਤ੍ਤਿਕਾਪਤ੍ਤੋ ਦ੍ਵੀਹਿ ਪਾਕੇਹਿ ਪਕ੍ਕੋ ਅਧਿਟ੍ਠਾਨੁਪਗੋ, ਉਭੋਪਿ ਯਂ ਮੂਲਂ ਦਾਤਬ੍ਬਂ, ਤਸ੍ਮਿਂ ਦਿਨ੍ਨੇਯੇਵ. ਸਚੇ ਏਕੋਪਿ ਪਾਕੋ ਊਨੋ ਹੋਤਿ, ਕਾਕਣਿਕਮਤ੍ਤਮ੍ਪਿ ਵਾ ਮੂਲਂ ਅਦਿਨ੍ਨਂ, ਨ ਅਧਿਟ੍ਠਾਨੁਪਗੋ. ਸਚੇਪਿ ਪਤ੍ਤਸਾਮਿਕੋ ਵਦਤਿ ‘‘ਯਦਾ ਤੁਮ੍ਹਾਕਂ ਮੂਲਂ ਭਵਿਸ੍ਸਤਿ, ਤਦਾ ਦਸ੍ਸਥ, ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਥਾ’’ਤਿ ਨੇਵ ਅਧਿਟ੍ਠਾਨੁਪਗੋ ਹੋਤਿ, ਪਾਕਸ੍ਸ ਹਿ ਊਨਤ੍ਤਾ ਪਤ੍ਤਸਙ੍ਖਂ ਨ ਗਚ੍ਛਤਿ, ਮੂਲਸ੍ਸ ਸਕਲਸ੍ਸ ਵਾ ਏਕਦੇਸਸ੍ਸ ਵਾ ਅਦਿਨ੍ਨਤ੍ਤਾ ਸਕਭਾਵਂ ਨ ਉਪੇਤਿ, ਅਞ੍ਞਸ੍ਸੇਵ ਸਨ੍ਤਕੋ ਹੋਤਿ, ਤਸ੍ਮਾ ਪਾਕੇ ਚ ਮੂਲੇ ਚ ਨਿਟ੍ਠਿਤੇਯੇਵ ਅਧਿਟ੍ਠਾਨੁਪਗੋ ਹੋਤਿ. ਯੋ ਅਧਿਟ੍ਠਾਨੁਪਗੋ, ਸ੍ਵੇਵ ਵਿਕਪ੍ਪਨੁਪਗੋ, ਸੋ ਹਤ੍ਥਂ ਆਗਤੋਪਿ ਅਨਾਗਤੋਪਿ ਅਧਿਟ੍ਠਾਤਬ੍ਬੋ ਵਿਕਪ੍ਪੇਤਬ੍ਬੋ ਵਾ. ਯਦਿ ਹਿ ਪਤ੍ਤਕਾਰਕੋ ਮੂਲਂ ਲਭਿਤ੍ਵਾ ਸਯਂ ਵਾ ਦਾਤੁਕਾਮੋ ਹੁਤ੍ਵਾ ‘‘ਅਹਂ, ਭਨ੍ਤੇ, ਤੁਮ੍ਹਾਕਂ ਪਤ੍ਤਂ ਕਤ੍ਵਾ ਅਸੁਕਦਿਵਸੇ ਨਾਮ ਪਚਿਤ੍ਵਾ ਠਪੇਸ੍ਸਾਮੀ’’ਤਿ ਵਦਤਿ, ਭਿਕ੍ਖੁ ਚ ਤੇਨ ਪਰਿਚ੍ਛਿਨ੍ਨਦਿਵਸਤੋ ਦਸਾਹਂ ਅਤਿਕ੍ਕਾਮੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਸਚੇ ਪਨ ਪਤ੍ਤਕਾਰਕੋ ‘‘ਅਹਂ ਤੁਮ੍ਹਾਕਂ ਪਤ੍ਤਂ ਕਤ੍ਵਾ ਪਚਿਤ੍ਵਾ ਸਾਸਨਂ ਪੇਸੇਸ੍ਸਾਮੀ’’ਤਿ ਵਤ੍ਵਾ ਤਥੇਵ ਕਰੋਤਿ, ਤੇਨ ਪੇਸਿਤਭਿਕ੍ਖੁ ਪਨ ਤਸ੍ਸ ਭਿਕ੍ਖੁਨੋ ਨ ਆਰੋਚੇਤਿ, ਅਞ੍ਞੋ ਦਿਸ੍ਵਾ ਵਾ ਸੁਤ੍ਵਾ ਵਾ ‘‘ਤੁਮ੍ਹਾਕਂ, ਭਨ੍ਤੇ, ਪਤ੍ਤੋ ਨਿਟ੍ਠਿਤੋ’’ਤਿ ਆਰੋਚੇਤਿ, ਏਤਸ੍ਸ ਆਰੋਚਨਂ ਨਪਮਾਣਂ. ਯਦਾ ਪਨ ਤੇਨ ਪੇਸਿਤੋਯੇਵ ਆਰੋਚੇਤਿ, ਤਸ੍ਸ ਵਚਨਂ ਸੁਤਦਿਵਸਤੋ ਪਟ੍ਠਾਯ ਦਸਾਹਂ ਅਤਿਕ੍ਕਾਮਯਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਸਚੇ ਪਤ੍ਤਕਾਰਕੋ ‘‘ਅਹਂ ਤੁਮ੍ਹਾਕਂ ਪਤ੍ਤਂ ਕਤ੍ਵਾ ਪਚਿਤ੍ਵਾ ਕਸ੍ਸਚਿ ਹਤ੍ਥੇ ਪਹਿਣਿਸ੍ਸਾਮੀ’’ਤਿ ਵਤ੍ਵਾ ਤਥੇਵ ਕਰੋਤਿ, ਪਤ੍ਤਂ ਗਹੇਤ੍ਵਾ ਆਗਤਭਿਕ੍ਖੁ ਪਨ ਅਤ੍ਤਨੋ ਪਰਿਵੇਣੇ ਠਪੇਤ੍ਵਾ ਤਸ੍ਸ ਨ ਆਰੋਚੇਤਿ, ਅਞ੍ਞੋ ਕੋਚਿ ਭਣਤਿ ‘‘ਅਪਿ, ਭਨ੍ਤੇ, ਅਧੁਨਾ ਆਭਤੋ ਪਤ੍ਤੋ ਸੁਨ੍ਦਰੋ’’ਤਿ! ‘‘ਕੁਹਿਂ, ਆਵੁਸੋ, ਪਤ੍ਤੋ’’ਤਿ? ‘‘ਇਤ੍ਥਨ੍ਨਾਮਸ੍ਸ ਹਤ੍ਥੇ ਪੇਸਿਤੋ’’ਤਿ. ਏਤਸ੍ਸਪਿ ਵਚਨਂ ਨ ਪਮਾਣਂ. ਯਦਾ ਪਨ ਸੋ ਭਿਕ੍ਖੁ ਪਤ੍ਤਂ ਦੇਤਿ, ਲਦ੍ਧਦਿਵਸਤੋ ਪਟ੍ਠਾਯ ਦਸਾਹਂ ਅਤਿਕ੍ਕਾਮਯਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਤਸ੍ਮਾ ਦਸਾਹਂ ਅਨਤਿਕ੍ਕਾਮੇਤ੍ਵਾਵ ਅਧਿਟ੍ਠਾਤਬ੍ਬੋ ਵਿਕਪ੍ਪੇਤਬ੍ਬੋ ਵਾ.

ਤਤ੍ਥ ਦ੍ਵੇ ਪਤ੍ਤਸ੍ਸ ਅਧਿਟ੍ਠਾਨਾ – ਕਾਯੇਨ ਵਾ ਅਧਿਟ੍ਠਾਤਿ, ਵਾਚਾਯ ਵਾ ਅਧਿਟ੍ਠਾਤਿ. ਤੇਸਂ ਵਸੇਨ ਅਧਿਟ੍ਠਹਨ੍ਤੇਨ ਚ ‘‘ਇਮਂ ਪਤ੍ਤਂ ਪਚ੍ਚੁਦ੍ਧਰਾਮੀ’’ਤਿ ਵਾ ‘‘ਏਤਂ ਪਤ੍ਤਂ ਪਚ੍ਚੁਦ੍ਧਰਾਮੀ’’ਤਿ ਵਾ ਏਵਂ ਸਮ੍ਮੁਖੇ ਵਾ ਪਰਮ੍ਮੁਖੇ ਵਾ ਠਿਤਂ ਪੁਰਾਣਪਤ੍ਤਂ ਪਚ੍ਚੁਦ੍ਧਰਿਤ੍ਵਾ ਅਞ੍ਞਸ੍ਸ ਵਾ ਦਤ੍ਵਾ ਨਵਂ ਪਤ੍ਤਂ ਯਤ੍ਥ ਕਤ੍ਥਚਿ ਠਿਤਂ ਹਤ੍ਥੇਨ ਪਰਾਮਸਿਤ੍ਵਾ ‘‘ਇਮਂ ਪਤ੍ਤਂ ਅਧਿਟ੍ਠਾਮੀ’’ਤਿ ਚਿਤ੍ਤੇਨ ਆਭੋਗਂ ਕਤ੍ਵਾ ਕਾਯਵਿਕਾਰਂ ਕਰੋਨ੍ਤੇਨ ਕਾਯੇਨ ਵਾ ਅਧਿਟ੍ਠਾਤਬ੍ਬੋ, ਵਚੀਭੇਦਂ ਕਤ੍ਵਾ ਵਾਚਾਯ ਵਾ ਅਧਿਟ੍ਠਾਤਬ੍ਬੋ. ਤਤ੍ਰ ਦੁਵਿਧਂ ਅਧਿਟ੍ਠਾਨਂ – ਸਚੇ ਹਤ੍ਥਪਾਸੇ ਹੋਤਿ ‘‘ਇਮਂ ਪਤ੍ਤਂ ਅਧਿਟ੍ਠਾਮੀ’’ਤਿ ਵਾਚਾ ਭਿਨ੍ਦਿਤਬ੍ਬਾ. ਅਥ ਅਨ੍ਤੋਗਬ੍ਭੇ ਵਾ ਉਪਰਿਪਾਸਾਦੇ ਵਾ ਸਾਮਨ੍ਤਵਿਹਾਰੇ ਵਾ ਹੋਤਿ, ਠਪਿਤਟ੍ਠਾਨਂ ਸਲ੍ਲਕ੍ਖੇਤ੍ਵਾ ‘‘ਏਤਂ ਪਤ੍ਤਂ ਅਧਿਟ੍ਠਾਮੀ’’ਤਿ ਵਾਚਾ ਭਿਨ੍ਦਿਤਬ੍ਬਾ.

ਅਧਿਟ੍ਠਹਨ੍ਤੇਨ ਪਨ ਏਕਕੇਨ ਅਧਿਟ੍ਠਾਤੁਮ੍ਪਿ ਵਟ੍ਟਤਿ, ਅਞ੍ਞਸ੍ਸ ਸਨ੍ਤਿਕੇ ਅਧਿਟ੍ਠਾਤੁਮ੍ਪਿ ਵਟ੍ਟਤਿ. ਅਞ੍ਞਸ੍ਸ ਸਨ੍ਤਿਕੇ ਅਯਮਾਨਿਸਂਸੋ – ਸਚਸ੍ਸ ‘‘ਅਧਿਟ੍ਠਿਤੋ ਨੁ ਖੋ ਮੇ, ਨੋ’’ਤਿ ਵਿਮਤਿ ਉਪ੍ਪਜ੍ਜਤਿ, ਇਤਰੋ ਸਾਰੇਤ੍ਵਾ ਵਿਮਤਿਂ ਛਿਨ੍ਦਿਸ੍ਸਤੀਤਿ. ਸਚੇ ਕੋਚਿ ਦਸ ਪਤ੍ਤੇ ਲਭਿਤ੍ਵਾ ਸਬ੍ਬੇਵ ਅਤ੍ਤਨਾਵ ਪਰਿਭੁਞ੍ਜਿਤੁਕਾਮੋ ਹੋਤਿ, ਨ ਸਬ੍ਬੇ ਅਧਿਟ੍ਠਾਤਬ੍ਬਾ. ਏਕਂ ਪਤ੍ਤਂ ਅਧਿਟ੍ਠਾਯ ਪੁਨਦਿਵਸੇ ਤਂ ਪਚ੍ਚੁਦ੍ਧਰਿਤ੍ਵਾ ਅਞ੍ਞੋ ਅਧਿਟ੍ਠਾਤਬ੍ਬੋ. ਏਤੇਨੁਪਾਯੇਨ ਵਸ੍ਸਸਤਮ੍ਪਿ ਪਰਿਹਰਿਤੁਂ ਸਕ੍ਕਾ.

ਏਵਂ ਅਪ੍ਪਮਤ੍ਤਸ੍ਸ ਭਿਕ੍ਖੁਨੋ ਸਿਯਾ ਅਧਿਟ੍ਠਾਨਵਿਜਹਨਨ੍ਤਿ? ਸਿਯਾ. ਸਚੇ ਹਿ ਅਯਂ ਪਤ੍ਤਂ ਅਞ੍ਞਸ੍ਸ ਵਾ ਦੇਤਿ, ਵਿਬ੍ਭਮਤਿ ਵਾ ਸਿਕ੍ਖਂ ਵਾ ਪਚ੍ਚਕ੍ਖਾਤਿ, ਕਾਲਂ ਵਾ ਕਰੋਤਿ, ਲਿਙ੍ਗਂ ਵਾਸ੍ਸ ਪਰਿਵਤ੍ਤਤਿ, ਪਚ੍ਚੁਦ੍ਧਰਤਿ ਵਾ, ਪਤ੍ਤੇ ਵਾ ਛਿਦ੍ਦਂ ਹੋਤਿ, ਅਧਿਟ੍ਠਾਨਂ ਵਿਜਹਤਿ. ਵੁਤ੍ਤਮ੍ਪਿ ਚੇਤਂ –

‘‘ਦਿਨ੍ਨਵਿਬ੍ਭਨ੍ਤਪਚ੍ਚਕ੍ਖਾ, ਕਾਲਂਕਿਰਿਯਕਤੇਨ ਚ;

ਲਿਙ੍ਗਪਚ੍ਚੁਦ੍ਧਰਾ ਚੇਵ, ਛਿਦ੍ਦੇਨ ਭਵਤਿ ਸਤ੍ਤਮ’’ਨ੍ਤਿ.

ਚੋਰਹਰਣਵਿਸ੍ਸਾਸਗ੍ਗਾਹੇਹਿਪਿ ਵਿਜਹਤਿਯੇਵ. ਕਿਤ੍ਤਕੇਨ ਛਿਦ੍ਦੇਨ ਅਧਿਟ੍ਠਾਨਂ ਭਿਜ੍ਜਤਿ? ਯੇਨ ਕਙ੍ਗੁਸਿਤ੍ਥਂ ਨਿਕ੍ਖਮਤਿ ਚੇਵ ਪਵਿਸਤਿ ਚ. ਇਦਞ੍ਹਿ ਸਤ੍ਤਨ੍ਨਂ ਧਞ੍ਞਾਨਂ ਲਾਮਕਧਞ੍ਞਸਿਤ੍ਥਂ, ਤਸ੍ਮਿਂ ਅਯਚੁਣ੍ਣੇਨ ਵਾ ਆਣਿਯਾ ਵਾ ਪਟਿਪਾਕਤਿਕੇ ਕਤੇ ਦਸਾਹਬ੍ਭਨ੍ਤਰੇ ਪੁਨ ਅਧਿਟ੍ਠਾਤਬ੍ਬੋ. ਅਯਂ ਤਾਵ ‘‘ਅਨ੍ਤੋਦਸਾਹਂ ਅਧਿਟ੍ਠੇਤਿ ਵਿਕਪ੍ਪੇਤੀ’’ਤਿ ਏਤ੍ਥ ਅਧਿਟ੍ਠਾਨੇ ਵਿਨਿਚ੍ਛਯੋ.

ਵਿਕਪ੍ਪਨੇ ਪਨ ਦ੍ਵੇ ਵਿਕਪ੍ਪਨਾ – ਸਮ੍ਮੁਖਾਵਿਕਪ੍ਪਨਾ ਚ ਪਰਮ੍ਮੁਖਾਵਿਕਪ੍ਪਨਾ ਚ. ਕਥਂ ਸਮ੍ਮੁਖਾਵਿਕਪ੍ਪਨਾ ਹੋਤਿ? ਪਤ੍ਤਾਨਂ ਏਕਬਹੁਭਾਵਂ ਸਨ੍ਨਿਹਿਤਾਸਨ੍ਨਿਹਿਤਭਾਵਞ੍ਚ ਞਤ੍ਵਾ ‘‘ਇਮਂ ਪਤ੍ਤ’’ਨ੍ਤਿ ਵਾ ‘‘ਇਮੇ ਪਤ੍ਤੇ’’ਤਿ ਵਾ ‘‘ਏਤਂ ਪਤ੍ਤ’’ਨ੍ਤਿ ਵਾ ‘‘ਏਤੇ ਪਤ੍ਤੇ’’ਤਿ ਵਾ ਵਤ੍ਵਾ ‘‘ਤੁਯ੍ਹਂ ਵਿਕਪ੍ਪੇਮੀ’’ਤਿ ਵਤ੍ਤਬ੍ਬਂ. ਅਯਮੇਕਾ ਸਮ੍ਮੁਖਾਵਿਕਪ੍ਪਨਾ. ਏਤ੍ਤਾਵਤਾ ਨਿਧੇਤੁਂ ਵਟ੍ਟਤਿ, ਪਰਿਭੁਞ੍ਜਿਤੁਂ ਵਾ ਵਿਸ੍ਸਜ੍ਜੇਤੁਂ ਵਾ ਅਧਿਟ੍ਠਾਤੁਂ ਵਾ ਨ ਵਟ੍ਟਤਿ. ‘‘ਮਯ੍ਹਂ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਵਾ ਕਰੋਹੀ’’ਤਿ ਏਵਂ ਪਨ ਵੁਤ੍ਤੇ ਪਚ੍ਚੁਦ੍ਧਾਰੋ ਨਾਮ ਹੋਤਿ, ਤਤੋਪਭੁਤਿ ਪਰਿਭੋਗਾਦਯੋਪਿ ਵਟ੍ਟਨ੍ਤਿ.

ਅਪਰੋ ਨਯੋ – ਤਥੇਵ ਪਤ੍ਤਾਨਂ ਏਕਬਹੁਭਾਵਂ ਸਨ੍ਨਿਹਿਤਾਸਨ੍ਨਿਹਿਤਭਾਵਞ੍ਚ ਞਤ੍ਵਾ ਤਸ੍ਸੇਵ ਭਿਕ੍ਖੁਨੋ ਸਨ੍ਤਿਕੇ ‘‘ਇਮਂ ਪਤ੍ਤ’’ਨ੍ਤਿ ਵਾ ‘‘ਇਮੇ ਪਤ੍ਤੇ’’ਤਿ ਵਾ ‘‘ਏਤਂ ਪਤ੍ਤ’’ਨ੍ਤਿ ਵਾ ‘‘ਏਤੇ ਪਤ੍ਤੇ’’ਤਿ ਵਾ ਵਤ੍ਵਾ ਪਞ੍ਚਸੁ ਸਹਧਮ੍ਮਿਕੇਸੁ ਅਞ੍ਞਤਰਸ੍ਸ ਅਤ੍ਤਨਾ ਅਭਿਰੁਚਿਤਸ੍ਸ ਯਸ੍ਸ ਕਸ੍ਸਚਿ ਨਾਮਂ ਗਹੇਤ੍ਵਾ ‘‘ਤਿਸ੍ਸਸ੍ਸ ਭਿਕ੍ਖੁਨੋ ਵਿਕਪ੍ਪੇਮੀ’’ਤਿ ਵਾ ‘‘ਤਿਸ੍ਸਾਯ ਭਿਕ੍ਖੁਨਿਯਾ ਸਿਕ੍ਖਮਾਨਾਯ ਸਾਮਣੇਰਸ੍ਸ ਤਿਸ੍ਸਾਯ ਸਾਮਣੇਰਿਯਾ ਵਿਕਪ੍ਪੇਮੀ’’ਤਿ ਵਾ ਵਤ੍ਤਬ੍ਬਂ, ਅਯਂ ਅਪਰਾਪਿ ਸਮ੍ਮੁਖਾਵਿਕਪ੍ਪਨਾ. ਏਤ੍ਤਾਵਤਾ ਨਿਧੇਤੁਂ ਵਟ੍ਟਤਿ, ਪਰਿਭੋਗਾਦੀਸੁ ਪਨ ਏਕਮ੍ਪਿ ਨ ਵਟ੍ਟਤਿ. ਤੇਨ ਪਨ ਭਿਕ੍ਖੁਨਾ ‘‘ਤਿਸ੍ਸਸ੍ਸ ਭਿਕ੍ਖੁਨੋ ਸਨ੍ਤਕਂ…ਪੇ… ਤਿਸ੍ਸਾਯ ਸਾਮਣੇਰਿਯਾ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਵਾ ਕਰੋਹੀ’’ਤਿ ਵੁਤ੍ਤੇ ਪਚ੍ਚੁਦ੍ਧਾਰੋ ਨਾਮ ਹੋਤਿ. ਤਤੋਪਭੁਤਿ ਪਰਿਭੋਗਾਦਯੋਪਿ ਵਟ੍ਟਨ੍ਤਿ.

ਕਥਂ ਪਰਮ੍ਮੁਖਾਵਿਕਪ੍ਪਨਾ ਹੋਤਿ? ਪਤ੍ਤਾਨਂ ਤਥੇਵ ਏਕਬਹੁਭਾਵਂ ਸਨ੍ਨਿਹਿਤਾਸਨ੍ਨਿਹਿਤਭਾਵਞ੍ਚ ਞਤ੍ਵਾ ‘‘ਇਮਂ ਪਤ੍ਤ’’ਨ੍ਤਿ ਵਾ ‘‘ਇਮੇ ਪਤ੍ਤੇ’’ਤਿ ਵਾ ‘‘ਏਤਂ ਪਤ੍ਤ’’ਨ੍ਤਿ ਵਾ ‘‘ਏਤੇ ਪਤ੍ਤੇ’’ਤਿ ਵਾ ਵਤ੍ਵਾ ‘‘ਤੁਯ੍ਹਂ ਵਿਕਪ੍ਪਨਤ੍ਥਾਯ ਦਮ੍ਮੀ’’ਤਿ ਵਤ੍ਤਬ੍ਬਂ. ਤੇਨ ਵਤ੍ਤਬ੍ਬੋ – ‘‘ਕੋ ਤੇ ਮਿਤ੍ਤੋ ਵਾ ਸਨ੍ਦਿਟ੍ਠੋ ਵਾ’’ਤਿ? ਤਤੋ ਇਤਰੇਨ ਪੁਰਿਮਨਯੇਨੇਵ ‘‘ਤਿਸ੍ਸੋ ਭਿਕ੍ਖੂਤਿ ਵਾ…ਪੇ… ਤਿਸ੍ਸਾ ਸਾਮਣੇਰੀ’’ਤਿ ਵਾ ਵਤ੍ਤਬ੍ਬਂ. ਪੁਨ ਤੇਨ ਭਿਕ੍ਖੁਨਾ ‘‘ਅਹਂ ਤਿਸ੍ਸਸ੍ਸ ਭਿਕ੍ਖੁਨੋ ਦਮ੍ਮੀ’’ਤਿ ਵਾ…ਪੇ… ‘‘ਤਿਸ੍ਸਾਯ ਸਾਮਣੇਰਿਯਾ ਦਮ੍ਮੀ’’ਤਿ ਵਾ ਵਤ੍ਤਬ੍ਬਂ, ਅਯਂ ਪਰਮ੍ਮੁਖਾਵਿਕਪ੍ਪਨਾ. ਏਤ੍ਤਾਵਤ੍ਤਾ ਨਿਧੇਤੁਂ ਵਟ੍ਟਤਿ, ਪਰਿਭੋਗਾਦੀਸੁ ਪਨ ਏਕਮ੍ਪਿ ਨ ਵਟ੍ਟਤਿ. ਤੇਨ ਪਨ ਭਿਕ੍ਖੁਨਾ ਦੁਤਿਯਸਮ੍ਮੁਖਾਵਿਕਪ੍ਪਨਾਯਂ ਵੁਤ੍ਤਨਯੇਨੇਵ ‘‘ਇਤ੍ਥਨ੍ਨਾਮਸ੍ਸ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਵਾ ਕਰੋਹੀ’’ਤਿ ਵੁਤ੍ਤੇ ਪਚ੍ਚੁਦ੍ਧਾਰੋ ਨਾਮ ਹੋਤਿ. ਤਤੋਪਭੁਤਿ ਪਰਿਭੋਗਾਦਯੋਪਿ ਵਟ੍ਟਨ੍ਤਿ.

ਇਮਾਸਂ ਪਨ ਦ੍ਵਿਨ੍ਨਂ ਵਿਕਪ੍ਪਨਾਨਂ ਨਾਨਾਕਰਣਂ, ਅਵਸੇਸੋ ਚ ਵਚਨਕ੍ਕਮੋ ਸਬ੍ਬੋ ਪਠਮਕਥਿਨਸਿਕ੍ਖਾਪਦਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ ਸਦ੍ਧਿਂ ਸਮੁਟ੍ਠਾਨਾਦੀਹੀਤਿ.

ਪਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਊਨਪਞ੍ਚਬਨ੍ਧਨਸਿਕ੍ਖਾਪਦਵਣ੍ਣਨਾ

੬੦੯. ਤੇਨ ਸਮਯੇਨਾਤਿ ਊਨਪਞ੍ਚਬਨ੍ਧਨਸਿਕ੍ਖਾਪਦਂ. ਤਤ੍ਥ ਨ ਯਾਪੇਤੀਤਿ ਸੋ ਕਿਰ ਯਦਿ ਅਰਿਯਸਾਵਕੋ ਨਾਭਵਿਸ੍ਸਾ, ਅਞ੍ਞਥਤ੍ਤਮ੍ਪਿ ਅਗਮਿਸ੍ਸਾ, ਏਵਂ ਤੇਹਿ ਉਬ੍ਬਾਲ਼੍ਹੋ, ਸੋਤਾਪਨ੍ਨਤ੍ਤਾ ਪਨ ਕੇਵਲਂ ਸਰੀਰੇਨੇਵ ਨ ਯਾਪੇਤਿ, ਤੇਨ ਵੁਤ੍ਤਂ – ‘‘ਅਤ੍ਤਨਾਪਿ ਨ ਯਾਪੇਤਿ, ਪੁਤ੍ਤਦਾਰਾਪਿਸ੍ਸ ਕਿਲਮਨ੍ਤੀ’’ਤਿ.

੬੧੨-੩. ਊਨਪਞ੍ਚਬਨ੍ਧਨੇਨਾਤਿ ਏਤ੍ਥ ਊਨਾਨਿ ਪਞ੍ਚ ਬਨ੍ਧਨਾਨਿ ਅਸ੍ਸਾਤਿ ਊਨਪਞ੍ਚਬਨ੍ਧਨੋ, ਨਾਸ੍ਸ ਪਞ੍ਚ ਬਨ੍ਧਨਾਨਿ ਪੂਰੇਨ੍ਤੀਤਿ ਅਤ੍ਥੋ, ਤੇਨ ਊਨਪਞ੍ਚਬਨ੍ਧਨੇਨ. ਇਤ੍ਥਮ੍ਭੂਤਸ੍ਸ ਲਕ੍ਖਣੇ ਕਰਣਵਚਨਂ. ਤਤ੍ਥ ਯਸ੍ਮਾ ਅਬਨ੍ਧਨਸ੍ਸਾਪਿ ਪਞ੍ਚ ਬਨ੍ਧਨਾਨਿ ਨ ਪੂਰੇਨ੍ਤਿ, ਸਬ੍ਬਸੋ ਨਤ੍ਥਿਤਾਯ, ਤਸ੍ਮਾ ਪਦਭਾਜਨੇ ‘‘ਅਬਨ੍ਧਨੋ ਵਾ’’ਤਿਆਦਿ ਵੁਤ੍ਤਂ. ‘‘ਊਨਪਞ੍ਚਬਨ੍ਧਨੇਨਾ’’ਤਿ ਚ ਵੁਤ੍ਤਤ੍ਤਾ ਯਸ੍ਸ ਪਞ੍ਚਬਨ੍ਧਨੋ ਪਤ੍ਤੋ ਹੋਤਿ, ਤਸ੍ਸ ਸੋ ਅਪਤ੍ਤੋ, ਤਸ੍ਮਾ ਅਞ੍ਞਂ ਵਿਞ੍ਞਾਪੇਤੁਂ ਵਟ੍ਟਤਿ. ਬਨ੍ਧਨਞ੍ਚ ਨਾਮੇਤਂ ਯਸ੍ਮਾ ਬਨ੍ਧਨੋਕਾਸੇ ਸਤਿ ਹੋਤਿ, ਅਸਤਿ ਨ ਹੋਤਿ, ਤਸ੍ਮਾ ਤਸ੍ਸ ਲਕ੍ਖਣਂ ਦਸ੍ਸੇਤੁਂ ‘‘ਅਬਨ੍ਧਨੋਕਾਸੋ ਨਾਮਾ’’ਤਿਆਦਿ ਵੁਤ੍ਤਂ.

ਦ੍ਵਙ੍ਗੁਲਾ ਰਾਜਿ ਨ ਹੋਤੀਤਿ ਮੁਖਵਟ੍ਟਿਤੋ ਹੇਟ੍ਠਾ ਦ੍ਵਙ੍ਗੁਲਪ੍ਪਮਾਣਾ ਏਕਾਪਿ ਰਾਜਿ ਨ ਹੋਤਿ. ਯਸ੍ਸ ਦ੍ਵਙ੍ਗੁਲਾ ਰਾਜਿ ਹੋਤੀਤਿ ਯਸ੍ਸ ਪਨ ਤਾਦਿਸਾ ਏਕਾ ਰਾਜਿ ਹੋਤਿ, ਸੋ ਤਸ੍ਸਾ ਰਾਜਿਯਾ ਹੇਟ੍ਠਿਮਪਰਿਯਨ੍ਤੇ ਪਤ੍ਤਵੇਧਕੇਨ ਵਿਜ੍ਝਿਤ੍ਵਾ ਪਚਿਤ੍ਵਾ ਸੁਤ੍ਤਰਜ੍ਜੁਕ-ਮਕਚਿਰਜ੍ਜੁਕਾਦੀਹਿ ਵਾ ਤਿਪੁਸੁਤ੍ਤਕੇਨ ਵਾ ਬਨ੍ਧਿਤਬ੍ਬੋ, ਤਂ ਬਨ੍ਧਨਂ ਆਮਿਸਸ੍ਸ ਅਲਗ੍ਗਨਤ੍ਥਂ ਤਿਪੁਪਟ੍ਟਕੇਨ ਵਾ ਕੇਨਚਿ ਬਦ੍ਧਸਿਲੇਸੇਨ ਵਾ ਪਟਿਚ੍ਛਾਦੇਤਬ੍ਬਂ. ਸੋ ਚ ਪਤ੍ਤੋ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬੋ, ਸੁਖੁਮਂ ਵਾ ਛਿਦ੍ਦਂ ਕਤ੍ਵਾ ਬਨ੍ਧਿਤਬ੍ਬੋ. ਸੁਦ੍ਧੇਹਿ ਪਨ ਮਧੁਸਿਤ੍ਥਕਲਾਖਾਸਜ੍ਜੁਲਸਾਦੀਹਿ ਬਨ੍ਧਿਤੁਂ ਨ ਵਟ੍ਟਤਿ. ਫਾਣਿਤਂ ਝਾਪੇਤ੍ਵਾ ਪਾਸਾਣਚੁਣ੍ਣੇਨ ਬਨ੍ਧਿਤੁਂ ਵਟ੍ਟਤਿ. ਮੁਖਵਟ੍ਟਿਸਮੀਪੇ ਪਨ ਪਤ੍ਤਵੇਧਕੇਨ ਵਿਜ੍ਝਿਯਮਾਨੋ ਕਪਾਲਸ੍ਸ ਬਹਲਤ੍ਤਾ ਭਿਜ੍ਜਤਿ, ਤਸ੍ਮਾ ਹੇਟ੍ਠਾ ਵਿਜ੍ਝਿਤਬ੍ਬੋ. ਯਸ੍ਸ ਪਨ ਦ੍ਵੇ ਰਾਜਿਯੋ ਏਕਾਯੇਵ ਵਾ ਚਤੁਰਙ੍ਗੁਲਾ, ਤਸ੍ਸ ਦ੍ਵੇ ਬਨ੍ਧਨਾਨਿ ਦਾਤਬ੍ਬਾਨਿ. ਯਸ੍ਸ ਤਿਸ੍ਸੋ ਏਕਾਯੇਵ ਵਾ ਛਲ਼ਙ੍ਗੁਲਾ, ਤਸ੍ਸ ਤੀਣਿ. ਯਸ੍ਸ ਚਤਸ੍ਸੋ ਏਕਾਯੇਵ ਵਾ ਅਟ੍ਠਙ੍ਗੁਲਾ, ਤਸ੍ਸ ਚਤ੍ਤਾਰਿ. ਯਸ੍ਸ ਪਞ੍ਚ ਏਕਾਯੇਵ ਵਾ ਦਸਙ੍ਗੁਲਾ, ਸੋ ਬਦ੍ਧੋਪਿ ਅਬਦ੍ਧੋਪਿ ਅਪਤ੍ਤੋਯੇਵ, ਅਞ੍ਞੋ ਵਿਞ੍ਞਾਪੇਤਬ੍ਬੋ. ਏਸ ਤਾਵ ਮਤ੍ਤਿਕਾਪਤ੍ਤੇ ਵਿਨਿਚ੍ਛਯੋ.

ਅਯੋਪਤ੍ਤੇ ਪਨ ਸਚੇਪਿ ਪਞ੍ਚ ਵਾ ਅਤਿਰੇਕਾਨਿ ਵਾ ਛਿਦ੍ਦਾਨਿ ਹੋਨ੍ਤਿ, ਤਾਨਿ ਚੇ ਅਯਚੁਣ੍ਣੇਨ ਵਾ ਆਣਿਯਾ ਵਾ ਲੋਹਮਣ੍ਡਲਕੇਨ ਵਾ ਬਦ੍ਧਾਨਿ ਮਟ੍ਠਾਨਿ ਹੋਨ੍ਤਿ, ਸ੍ਵੇਵ ਪਤ੍ਤੋ ਪਰਿਭੁਞ੍ਜਿਤਬ੍ਬੋ, ਨ ਅਞ੍ਞੋ ਵਿਞ੍ਞਾਪੇਤਬ੍ਬੋ. ਅਥ ਪਨ ਏਕਮ੍ਪਿ ਛਿਦ੍ਦਂ ਮਹਨ੍ਤਂ ਹੋਤਿ, ਲੋਹਮਣ੍ਡਲਕੇਨ ਬਦ੍ਧਮ੍ਪਿ ਮਟ੍ਠਂ ਨ ਹੋਤਿ, ਪਤ੍ਤੇ ਆਮਿਸਂ ਲਗ੍ਗਤਿ, ਅਕਪ੍ਪਿਯੋ ਹੋਤਿ, ਅਯਂ ਅਪਤ੍ਤੋ. ਅਞ੍ਞੋ ਵਿਞ੍ਞਾਪੇਤਬ੍ਬੋ.

੬੧੫. ਥੇਰੋ ਵਤ੍ਤਬ੍ਬੋਤਿ ਪਤ੍ਤੇ ਆਨਿਸਂਸਂ ਦਸ੍ਸੇਤ੍ਵਾ ‘‘ਅਯਂ, ਭਨ੍ਤੇ, ਪਤ੍ਤੋ ਪਮਾਣਯੁਤ੍ਤੋ ਸੁਨ੍ਦਰੋ ਥੇਰਾਨੁਰੂਪੋ, ਤਂ ਗਣ੍ਹਥਾ’’ਤਿ ਵਤ੍ਤਬ੍ਬੋ. ਯੋ ਨ ਗਣ੍ਹੇਯ੍ਯਾਤਿ ਅਨੁਕਮ੍ਪਾਯ ਨ ਗਣ੍ਹਨ੍ਤਸ੍ਸ ਦੁਕ੍ਕਟਂ. ਯੋ ਪਨ ਸਨ੍ਤੁਟ੍ਠਿਯਾ ‘‘ਕਿਂ ਮੇ ਅਞ੍ਞੇਨ ਪਤ੍ਤੇਨਾ’’ਤਿ ਨ ਗਣ੍ਹਾਤਿ, ਤਸ੍ਸ ਅਨਾਪਤ੍ਤਿ. ਪਤ੍ਤਪਰਿਯਨ੍ਤੋਤਿ ਏਵਂ ਪਰਿਵਤ੍ਤੇਤ੍ਵਾ ਪਰਿਯਨ੍ਤੇ ਠਿਤਪਤ੍ਤੋ.

ਨ ਅਦੇਸੇਤਿ ਮਞ੍ਚਪੀਠਛਤ੍ਤਨਾਗਦਨ੍ਤਕਾਦਿਕੇ ਅਦੇਸੇ, ਨ ਨਿਕ੍ਖਿਪਿਤਬ੍ਬੋ. ਯਤ੍ਥ ਪੁਰਿਮਂ ਸੁਨ੍ਦਰਂ ਪਤ੍ਤਂ ਠਪੇਤਿ, ਤਤ੍ਥੇਵ ਠਪੇਤਬ੍ਬੋ. ਪਤ੍ਤਸ੍ਸ ਹਿ ਨਿਕ੍ਖਿਪਨਦੇਸੋ ‘‘ਅਨੁਜਾਨਾਮਿ, ਭਿਕ੍ਖਵੇ, ਆਧਾਰਕ’’ਨ੍ਤਿਆਦਿਨਾ ਨਯੇਨ ਖਨ੍ਧਕੇ ਵੁਤ੍ਤੋਯੇਵ.

ਨ ਅਭੋਗੇਨਾਤਿ ਯਾਗੁਰਨ੍ਧਨਰਜਨਪਚਨਾਦਿਨਾ ਅਪਰਿਭੋਗੇਨ ਨ ਪਰਿਭੁਞ੍ਜਿਤਬ੍ਬੋ. ਅਨ੍ਤਰਾਮਗ੍ਗੇ ਪਨ ਬ੍ਯਾਧਿਮ੍ਹਿ ਉਪ੍ਪਨ੍ਨੇ ਅਞ੍ਞਸ੍ਮਿਂ ਭਾਜਨੇ ਅਸਤਿ ਮਤ੍ਤਿਕਾਯ ਲਿਮ੍ਪੇਤ੍ਵਾ ਯਾਗੁਂ ਵਾ ਪਚਿਤੁਂ ਉਦਕਂ ਵਾ ਤਾਪੇਤੁਂ ਵਟ੍ਟਤਿ.

ਨ ਵਿਸ੍ਸਜ੍ਜੇਤਬ੍ਬੋਤਿ ਅਞ੍ਞਸ੍ਸ ਨ ਦਾਤਬ੍ਬੋ. ਸਚੇ ਪਨ ਸਦ੍ਧਿਵਿਹਾਰਿਕੋ ਵਾ ਅਨ੍ਤੇਵਾਸਿਕੋ ਵਾ ਅਞ੍ਞਂ ਵਰਪਤ੍ਤਂ ਠਪੇਤ੍ਵਾ ‘‘ਅਯਂ ਮਯ੍ਹਂ ਸਾਰੁਪ੍ਪੋ, ਅਯਂ ਥੇਰਸ੍ਸਾ’’ਤਿ ਗਣ੍ਹਾਤਿ, ਵਟ੍ਟਤਿ. ਅਞ੍ਞੋ ਵਾ ਤਂ ਗਹੇਤ੍ਵਾ ਅਤ੍ਤਨੋ ਪਤ੍ਤਂ ਦੇਤਿ, ਵਟ੍ਟਤਿ. ‘‘ਮਯ੍ਹਮੇਵ ਪਤ੍ਤਂ ਆਹਰਾ’’ਤਿ ਵਤ੍ਤਬ੍ਬਕਿਚ੍ਚਂ ਨਤ੍ਥਿ.

੬੧੭. ਪਵਾਰਿਤਾਨਨ੍ਤਿ ਏਤ੍ਥ ਸਙ੍ਘਵਸੇਨ ਪਵਾਰਿਤਟ੍ਠਾਨੇ ਪਞ੍ਚਬਨ੍ਧਨੇਨੇਵ ਵਟ੍ਟਤਿ. ਪੁਗ੍ਗਲਵਸੇਨ ਪਵਾਰਿਤਟ੍ਠਾਨੇ ਊਨਪਞ੍ਚਬਨ੍ਧਨੇਨਾਪਿ ਵਟ੍ਟਤੀਤਿ ਕੁਰੁਨ੍ਦਿਯਂ ਵੁਤ੍ਤਂ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.

ਛਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਊਨਪਞ੍ਚਬਨ੍ਧਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਭੇਸਜ੍ਜਸਿਕ੍ਖਾਪਦਵਣ੍ਣਨਾ

੬੧੮. ਤੇਨ ਸਮਯੇਨਾਤਿ ਭੇਸਜ੍ਜਸਿਕ੍ਖਾਪਦਂ. ਤਤ੍ਥ ਅਤ੍ਥੋ, ਭਨ੍ਤੇਤਿ ਰਾਜਾ ਭਿਕ੍ਖੂ ਉਯ੍ਯੁਤ੍ਤਪ੍ਪਯੁਤ੍ਤੇ ਥੇਰਸ੍ਸ ਲੇਣਤ੍ਥਾਯ ਪਬ੍ਭਾਰਂ ਸੋਧੇਨ੍ਤੇ ਦਿਸ੍ਵਾ ਆਰਾਮਿਕਂ ਦਾਤੁਕਾਮੋ ਪੁਚ੍ਛਿ.

੬੧੯-੨੧. ਪਾਟਿਯੇਕ੍ਕੋਤਿ ਵਿਸੁਂ ਏਕੋ. ਮਾਲਾਕਿਤੇਤਿ ਕਤਮਾਲੇ ਮਾਲਾਧਰੇ, ਕੁਸੁਮਮਾਲਾਪਟਿਮਣ੍ਡਿਤੇਤਿ ਅਤ੍ਥੋ. ਤਿਣਣ੍ਡੁਪਕਨ੍ਤਿ ਤਿਣਚੁਮ੍ਬਟਕਂ. ਪਟਿਮੁਞ੍ਚੀਤਿ ਠਪੇਸਿ. ਸਾ ਅਹੋਸਿ ਸੁਵਣ੍ਣਮਾਲਾਤਿ ਦਾਰਿਕਾਯ ਸੀਸੇ ਠਪਿਤਮਤ੍ਤਾਯੇਵ ਥੇਰਸ੍ਸ ਅਧਿਟ੍ਠਾਨਵਸੇਨ ਸੁਵਣ੍ਣਪਦੁਮਮਾਲਾ ਅਹੋਸਿ. ਤਞ੍ਹਿ ਤਿਣਣ੍ਡੁਪਕਂ ਸੀਸੇ ਠਪਿਤਮਤ੍ਤਮੇਵ ‘‘ਸੁਵਣ੍ਣਮਾਲਾ ਹੋਤੂ’’ਤਿ ਥੇਰੋ ਅਧਿਟ੍ਠਾਸਿ. ਦੁਤਿਯਮ੍ਪਿ ਖੋ…ਪੇ…. ਤੇਨੁਪਸਙ੍ਕਮੀਤਿ ਦੁਤਿਯਦਿਵਸੇਯੇਵ ਉਪਸਙ੍ਕਮਿ.

ਸੁਵਣ੍ਣਨ੍ਤਿ ਅਧਿਮੁਚ੍ਚੀਤਿ ‘‘ਸੋਵਣ੍ਣਮਯੋ ਹੋਤੂ’’ਤਿ ਅਧਿਟ੍ਠਾਸਿ. ਪਞ੍ਚਨ੍ਨਂ ਭੇਸਜ੍ਜਾਨਨ੍ਤਿ ਸਪ੍ਪਿਆਦੀਨਂ. ਬਾਹੁਲਿਕਾਤਿ ਪਚ੍ਚਯਬਾਹੁਲਿਕਤਾਯ ਪਟਿਪਨ੍ਨਾ. ਕੋਲਮ੍ਬੇਪਿ ਘਟੇਪੀਤਿਏਤ੍ਥ ਕੋਲਮ੍ਬਾ ਨਾਮ ਮਹਾਮੁਖਚਾਟਿਯੋ ਵੁਚ੍ਚਨ੍ਤਿ. ਓਲੀਨਵਿਲੀਨਾਨੀਤਿ ਹੇਟ੍ਠਾ ਚ ਉਭਤੋਪਸ੍ਸੇਸੁ ਚ ਗਲ਼ਿਤਾਨਿ. ਓਕਿਣ੍ਣਵਿਕਿਣ੍ਣਾਤਿ ਸਪ੍ਪਿਆਦੀਨਂ ਗਨ੍ਧੇਨ ਭੂਮਿਂ ਖਨਨ੍ਤੇਹਿ ਓਕਿਣ੍ਣਾ, ਭਿਤ੍ਤਿਯੋ ਖਨਨ੍ਤੇਹਿ ਉਪਰਿ ਸਞ੍ਚਰਨ੍ਤੇਹਿ ਚ ਵਿਕਿਣ੍ਣਾ. ਅਨ੍ਤੋਕੋਟ੍ਠਾਗਾਰਿਕਾਤਿ ਅਬ੍ਭਨ੍ਤਰੇ ਸਂਵਿਹਿਤਕੋਟ੍ਠਾਗਾਰਾ.

੬੨੨. ਪਟਿਸਾਯਨੀਯਾਨੀਤਿ ਪਟਿਸਾਯਿਤਬ੍ਬਾਨਿ, ਪਰਿਭੁਞ੍ਜਿਤਬ੍ਬਾਨੀਤਿ ਅਤ੍ਥੋ. ਭੇਸਜ੍ਜਾਨੀਤਿ ਭੇਸਜ੍ਜਕਿਚ੍ਚਂ ਕਰੋਨ੍ਤੁ ਵਾ ਮਾ ਵਾ, ਏਵਂ ਲਦ੍ਧਵੋਹਾਰਾਨਿ. ‘‘ਗੋਸਪ੍ਪੀ’’ਤਿਆਦੀਹਿ ਲੋਕੇ ਪਾਕਟਂ ਦਸ੍ਸੇਤ੍ਵਾ ‘‘ਯੇਸਂ ਮਂਸਂ ਕਪ੍ਪਤੀ’’ਤਿ ਇਮਿਨਾ ਅਞ੍ਞੇਸਮ੍ਪਿ ਮਿਗਰੋਹਿਤਸਸਾਦੀਨਂ ਸਪ੍ਪਿਂ ਸਙ੍ਗਹੇਤ੍ਵਾ ਦਸ੍ਸੇਸਿ. ਯੇਸਞ੍ਹਿ ਖੀਰਂ ਅਤ੍ਥਿ, ਸਪ੍ਪਿਪਿ ਤੇਸਂ ਅਤ੍ਥਿਯੇਵ, ਤਂ ਪਨ ਸੁਲਭਂ ਵਾ ਹੋਤੁ ਦੁਲ੍ਲਭਂ ਵਾ, ਅਸਮ੍ਮੋਹਤ੍ਥਂ ਵੁਤ੍ਤਂ. ਏਵਂ ਨਵਨੀਤਮ੍ਪਿ.

ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬਾਨੀਤਿ ਸਨ੍ਨਿਧਿਂ ਕਤ੍ਵਾ ਨਿਦਹਿਤ੍ਵਾ ਪਰਿਭੁਞ੍ਜਿਤਬ੍ਬਾਨਿ. ਕਥਂ? ਪਾਲ਼ਿਯਾ ਆਗਤਸਪ੍ਪਿਆਦੀਸੁ ਸਪ੍ਪਿ ਤਾਵ ਪੁਰੇਭਤ੍ਤਂ ਪਟਿਗ੍ਗਹਿਤਂ ਤਦਹੁਪੁਰੇਭਤ੍ਤਂ ਸਾਮਿਸਮ੍ਪਿ ਨਿਰਾਮਿਸਮ੍ਪਿ ਪਰਿਭੁਞ੍ਜਿਤੁਂ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਂ ਪਰਿਭੁਞ੍ਜਿਤਬ੍ਬਂ. ਸਤ੍ਤਾਹਾਤਿਕ੍ਕਮੇ ਸਚੇ ਏਕਭਾਜਨੇ ਠਪਿਤਂ, ਏਕਂ ਨਿਸ੍ਸਗ੍ਗਿਯਂ. ਸਚੇ ਬਹੂਸੁ ਵਤ੍ਥੁਗਣਨਾਯ ਨਿਸ੍ਸਗ੍ਗਿਯਾਨਿ, ਪਚ੍ਛਾਭਤ੍ਤਂ ਪਟਿਗ੍ਗਹਿਤਂ ਸਤ੍ਤਾਹਂ ਨਿਰਾਮਿਸਮੇਵ ਵਟ੍ਟਤਿ. ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਉਗ੍ਗਹਿਤਕਂ ਕਤ੍ਵਾ ਨਿਕ੍ਖਿਤ੍ਤਂ ਅਜ੍ਝੋਹਰਿਤੁਂ ਨ ਵਟ੍ਟਤਿ; ਅਬ੍ਭਞ੍ਜਨਾਦੀਸੁ ਉਪਨੇਤਬ੍ਬਂ. ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ, ਅਨਜ੍ਝੋਹਰਣੀਯਤਂ ਆਪਨ੍ਨਤ੍ਤਾ. ‘‘ਪਟਿਸਾਯਨੀਯਾਨੀ’’ਤਿ ਹਿ ਵੁਤ੍ਤਂ. ਸਚੇ ਅਨੁਪਸਮ੍ਪਨ੍ਨੋ ਪੁਰੇਭਤ੍ਤਂ ਪਟਿਗ੍ਗਹਿਤਨਵਨੀਤੇਨ ਸਪ੍ਪਿਂ ਕਤ੍ਵਾ ਦੇਤਿ, ਪੁਰੇਭਤ੍ਤਂ ਸਾਮਿਸਂ ਵਟ੍ਟਤਿ. ਸਚੇ ਸਯਂ ਕਰੋਤਿ, ਸਤ੍ਤਾਹਮ੍ਪਿ ਨਿਰਾਮਿਸਮੇਵ ਵਟ੍ਟਤਿ. ਪਚ੍ਛਾਭਤ੍ਤਂ ਪਟਿਗ੍ਗਹਿਤਨਵਨੀਤੇਨ ਪਨ ਯੇਨ ਕੇਨਚਿ ਕਤਸਪ੍ਪਿ ਸਤ੍ਤਾਹਮ੍ਪਿ ਨਿਰਾਮਿਸਮੇਵ ਵਟ੍ਟਤਿ. ਉਗ੍ਗਹਿਤਕੇਨ ਕਤੇ ਪੁਬ੍ਬੇ ਵੁਤ੍ਤਸੁਦ੍ਧਸਪ੍ਪਿਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ.

ਪੁਰੇਭਤ੍ਤਂ ਪਟਿਗ੍ਗਹਿਤਖੀਰੇਨ ਵਾ ਦਧਿਨਾ ਵਾ ਕਤਸਪ੍ਪਿ ਅਨੁਪਸਮ੍ਪਨ੍ਨੇਨ ਕਤਂ ਸਾਮਿਸਮ੍ਪਿ ਤਦਹੁਪੁਰੇਭਤ੍ਤਂ ਵਟ੍ਟਤਿ. ਸਯਂਕਤਂ ਨਿਰਾਮਿਸਮੇਵ ਵਟ੍ਟਤਿ. ਨਵਨੀਤਂ ਤਾਪੇਨ੍ਤਸ੍ਸ ਹਿ ਸਾਮਂਪਾਕੋ ਨ ਹੋਤਿ, ਸਾਮਂਪਕ੍ਕੇਨ ਪਨ ਤੇਨ ਸਦ੍ਧਿਂ ਆਮਿਸਂ ਨ ਵਟ੍ਟਤਿ. ਪਚ੍ਛਾਭਤ੍ਤਤੋ ਪਟ੍ਠਾਯ ਚ ਨ ਵਟ੍ਟਤਿਯੇਵ. ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ, ਸਵਤ੍ਥੁਕਸ੍ਸ ਪਟਿਗ੍ਗਹਿਤਤ੍ਤਾ, ‘‘ਤਾਨਿ ਪਟਿਗ੍ਗਹੇਤ੍ਵਾ’’ਤਿ ਹਿ ਵੁਤ੍ਤਂ. ਪਚ੍ਛਾਭਤ੍ਤਂ ਪਟਿਗ੍ਗਹਿਤੇਹਿ ਕਤਂ ਪਨ ਅਬ੍ਭਞ੍ਜਨਾਦੀਸੁ ਉਪਨੇਤਬ੍ਬਂ. ਪੁਰੇਭਤ੍ਤਮ੍ਪਿ ਚ ਉਗ੍ਗਹਿਤਕੇਹਿ ਕਤਂ ਉਭਯੇਸਮ੍ਪਿ ਸਤ੍ਤਾਹਾਤਿਕ੍ਕਮੇ ਅਨਾਪਤ੍ਤਿ. ਏਸੇਵ ਨਯੋ ਅਕਪ੍ਪਿਯਮਂਸਸਪ੍ਪਿਮ੍ਹਿ. ਅਯਂ ਪਨ ਵਿਸੇਸੋ – ਯਤ੍ਥ ਪਾਲ਼ਿਯਂ ਆਗਤਸਪ੍ਪਿਨਾ ਨਿਸ੍ਸਗ੍ਗਿਯਂ, ਤਤ੍ਥ ਇਮਿਨਾ ਦੁਕ੍ਕਟਂ. ਅਨ੍ਧਕਟ੍ਠਕਥਾਯਂ ਕਾਰਣਪਤਿਰੂਪਕਂ ਵਤ੍ਵਾ ਮਨੁਸ੍ਸਸਪ੍ਪਿ ਚ ਨਵਨੀਤਞ੍ਚ ਪਟਿਕ੍ਖਿਤ੍ਤਂ, ਤਂ ਦੁਪ੍ਪਟਿਕ੍ਖਿਤ੍ਤਂ, ਸਬ੍ਬਅਟ੍ਠਕਥਾਸੁ ਅਨੁਞ੍ਞਾਤਤ੍ਤਾ. ਪਰਤੋ ਚਸ੍ਸ ਵਿਨਿਚ੍ਛਯੋਪਿ ਆਗਚ੍ਛਿਸ੍ਸਤਿ.

ਪਾਲ਼ਿਯਂ ਆਗਤਂ ਨਵਨੀਤਮ੍ਪਿ ਪੁਰੇਭਤ੍ਤਂ ਪਟਿਗ੍ਗਹਿਤਂ ਤਦਹੁਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਨਿਰਾਮਿਸਮੇਵ. ਸਤ੍ਤਾਹਾਤਿਕ੍ਕਮੇ ਨਾਨਾਭਾਜਨੇਸੁ ਠਪਿਤੇ ਭਾਜਨਗਣਨਾਯ ਏਕਭਾਜਨੇਪਿ ਅਮਿਸ੍ਸੇਤ੍ਵਾ ਪਿਣ੍ਡਪਿਣ੍ਡਵਸੇਨ ਠਪਿਤੇ ਪਿਣ੍ਡਗਣਨਾਯ ਨਿਸ੍ਸਗ੍ਗਿਯਾਨਿ. ਪਚ੍ਛਾਭਤ੍ਤਂ ਪਟਿਗ੍ਗਹਿਤਂ ਸਪ੍ਪਿਨਯੇਨੇਵ ਵੇਦਿਤਬ੍ਬਂ. ਏਤ੍ਥ ਪਨ ਦਧਿਗੁਲ਼ਿਕਾਯੋਪਿ ਤਕ੍ਕਬਿਨ੍ਦੂਨਿਪਿ ਹੋਨ੍ਤਿ, ਤਸ੍ਮਾ ਤਂ ਧੋਤਂ ਵਟ੍ਟਤੀਤਿ ਉਪਡ੍ਢਤ੍ਥੇਰਾ ਆਹਂਸੁ. ਮਹਾਸੀਵਤ੍ਥੇਰੋ ਪਨ ‘‘ਭਗਵਤਾ ਅਨੁਞ੍ਞਾਤਕਾਲਤੋ ਪਟ੍ਠਾਯ ਤਕ੍ਕਤੋ ਉਦ੍ਧਟਮਤ੍ਤਮੇਵ ਖਾਦਿਂਸੂ’’ਤਿ ਆਹ. ਤਸ੍ਮਾ ਨਵਨੀਤਂ ਪਰਿਭੁਞ੍ਜਨ੍ਤੇਨ ਧੋਵਿਤ੍ਵਾ ਦਧਿਤਕ੍ਕਮਕ੍ਖਿਕਾਕਿਪਿਲ੍ਲਿਕਾਦੀਨਿ ਅਪਨੇਤ੍ਵਾ ਪਰਿਭੁਞ੍ਜਿਤਬ੍ਬਂ. ਪਚਿਤ੍ਵਾ ਸਪ੍ਪਿਂ ਕਤ੍ਵਾ ਪਰਿਭੁਞ੍ਜਿਤੁਕਾਮੇਨ ਅਧੋਤਮ੍ਪਿ ਪਚਿਤੁਂ ਵਟ੍ਟਤਿ. ਯਂ ਤਤ੍ਥ ਦਧਿਗਤਂ ਵਾ ਤਕ੍ਕਗਤਂ ਵਾ ਤਂ ਖਯਂ ਗਮਿਸ੍ਸਤਿ, ਏਤ੍ਤਾਵਤਾ ਹਿ ਸਵਤ੍ਥੁਕਪਟਿਗ੍ਗਹਿਤਂ ਨਾਮ ਨ ਹੋਤੀਤਿ ਅਯਮੇਤ੍ਥ ਅਧਿਪ੍ਪਾਯੋ. ਆਮਿਸੇਨ ਸਦ੍ਧਿਂ ਪਕ੍ਕਤ੍ਤਾ ਪਨ ਤਸ੍ਮਿਮ੍ਪਿ ਕੁਕ੍ਕੁਚ੍ਚਾਯਨ੍ਤਿ ਕੁਕ੍ਕੁਚ੍ਚਕਾ. ਇਦਾਨਿ ਉਗ੍ਗਹੇਤ੍ਵਾ ਠਪਿਤਨਵਨੀਤੇ ਚ ਪੁਰੇਭਤ੍ਤਂ ਖੀਰਦਧੀਨਿ ਪਟਿਗ੍ਗਹੇਤ੍ਵਾ ਕਤਨਵਨੀਤੇ ਚ ਪਚ੍ਛਾਭਤ੍ਤਂ ਤਾਨਿ ਪਟਿਗ੍ਗਹੇਤ੍ਵਾ ਕਤਨਵਨੀਤੇ ਚ ਉਗ੍ਗਹਿਤੇਹਿ ਕਤਨਵਵੀਤੇ ਚ ਅਕਪ੍ਪਿਯਮਂਸਨਵਨੀਤੇ ਚ ਸਬ੍ਬੋ ਆਪਤ੍ਤਾਨਾਪਤ੍ਤਿਪਰਿਭੋਗਾਪਰਿਭੋਗਨਯੋ ਸਪ੍ਪਿਮ੍ਹਿ ਵੁਤ੍ਤਕ੍ਕਮੇਨੇਵ ਗਹੇਤਬ੍ਬੋ.

ਤੇਲਭਿਕ੍ਖਾਯ ਪਵਿਟ੍ਠਾਨਂ ਪਨ ਭਿਕ੍ਖੂਨਂ ਤਤ੍ਥੇਵ ਸਪ੍ਪਿਮ੍ਪਿ ਨਵਨੀਤਮ੍ਪਿ ਪਕ੍ਕਤੇਲਮ੍ਪਿ ਅਪਕ੍ਕਤੇਲਮ੍ਪਿ ਆਕਿਰਨ੍ਤਿ, ਤਤ੍ਥ ਤਕ੍ਕਦਧਿਬਿਨ੍ਦੂਨਿਪਿ ਭਤ੍ਤਸਿਤ੍ਥਾਨਿਪਿ ਤਣ੍ਡੁਲਕਣਾਪਿ ਮਕ੍ਖਿਕਾਦਯੋਪਿ ਹੋਨ੍ਤਿ. ਆਦਿਚ੍ਚਪਾਕਂ ਕਤ੍ਵਾ ਪਰਿਸ੍ਸਾਵੇਤ੍ਵਾ ਗਹਿਤਂ ਸਤ੍ਤਾਹਕਾਲਿਕਂ ਹੋਤਿ, ਪਟਿਗ੍ਗਹੇਤ੍ਵਾ ਠਪਿਤਭੇਸਜ੍ਜੇਹਿ ਸਦ੍ਧਿਂ ਪਚਿਤ੍ਵਾ ਨਤ੍ਥੁਪਾਨਮ੍ਪਿ ਕਾਤੁਂ ਵਟ੍ਟਤਿ. ਸਚੇ ਵਦ੍ਦਲਿਸਮਯੇ ਲਜ੍ਜਿ ਸਾਮਣੇਰੋ ਯਥਾ ਤਤ੍ਥ ਪਤਿਤਤਣ੍ਡੁਲਕਣਾਦਯੋ ਨ ਪਚ੍ਚਨ੍ਤਿ, ਏਵਂ ਸਾਮਿਸਪਾਕਂ ਮੋਚੇਨ੍ਤੋ ਅਗ੍ਗਿਮ੍ਹਿ ਵਿਲੀਯਾਪੇਤ੍ਵਾ ਪਰਿਸ੍ਸਾਵੇਤ੍ਵਾ ਪੁਨ ਪਚਿਤ੍ਵਾ ਦੇਤਿ, ਪੁਰਿਮਨਯੇਨੇਵ ਸਤ੍ਤਾਹਂ ਵਟ੍ਟਤਿ.

ਤੇਲੇਸੁ ਤਿਲਤੇਲਂ ਤਾਵ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਨਿਰਾਮਿਸਮੇਵ. ਸਤ੍ਤਾਹਾਤਿਕ੍ਕਮੇ ਪਨਸ੍ਸ ਭਾਜਨਗਣਨਾਯ ਨਿਸ੍ਸਗ੍ਗਿਯਭਾਵੋ ਵੇਦਿਤਬ੍ਬੋ. ਪਚ੍ਛਾਭਤ੍ਤਂ ਪਟਿਗ੍ਗਹਿਤਂ ਸਤ੍ਤਾਹਂ ਨਿਰਾਮਿਸਮੇਵ ਵਟ੍ਟਤਿ. ਉਗ੍ਗਹਿਤਕਂ ਕਤ੍ਵਾ ਨਿਕ੍ਖਿਤ੍ਤਂ ਅਜ੍ਝੋਹਰਿਤੁਂ ਨ ਵਟ੍ਟਤਿ, ਸੀਸਮਕ੍ਖਨਾਦੀਸੁ ਉਪਨੇਤਬ੍ਬਂ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ. ਪੁਰੇਭਤ੍ਤਂ ਤਿਲੇ ਪਟਿਗ੍ਗਹੇਤ੍ਵਾ ਕਤਤੇਲਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਅਨਜ੍ਝੋਹਰਣੀਯਂ ਹੋਤਿ, ਸੀਸਮਕ੍ਖਨਾਦੀਸੁ ਉਪਨੇਤਬ੍ਬਂ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ. ਪਚ੍ਛਾਭਤ੍ਤਂ ਤਿਲੇ ਪਟਿਗ੍ਗਹੇਤ੍ਵਾ ਕਤਤੇਲਂ ਅਨਜ੍ਝੋਹਰਣੀਯਮੇਵ, ਸਵਤ੍ਥੁਕਪਟਿਗ੍ਗਹਿਤਤ੍ਤਾ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ, ਸੀਸਮਕ੍ਖਨਾਦੀਸੁ ਉਪਨੇਤਬ੍ਬਂ. ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਉਗ੍ਗਹਿਤਕਤਿਲੇਹਿ ਕਤਤੇਲੇਪਿ ਏਸੇਵ ਨਯੋ.

ਪੁਰੇਭਤ੍ਤਂ ਪਟਿਗ੍ਗਹਿਤਕਤਿਲੇ ਭਜ੍ਜਿਤ੍ਵਾ ਵਾ ਤਿਲਪਿਟ੍ਠਂ ਵਾ ਸੇਦੇਤ੍ਵਾ ਉਣ੍ਹੋਦਕੇਨ ਵਾ ਤੇਮੇਤ੍ਵਾ ਕਤਤੇਲਂ ਸਚੇ ਅਨੁਪਸਮ੍ਪਨ੍ਨੇਨ ਕਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ. ਅਤ੍ਤਨਾ ਕਤਤੇਲਂ ਪਨ ਨਿਬ੍ਬਟ੍ਟਿਤਤ੍ਤਾ ਪੁਰੇਭਤ੍ਤਂ ਨਿਰਾਮਿਸਮੇਵ ਵਟ੍ਟਤਿ. ਸਾਮਂਪਕ੍ਕਤ੍ਤਾ ਸਾਮਿਸਂ ਨ ਵਟ੍ਟਤਿ, ਸਵਤ੍ਥੁਕਪਟਿਗ੍ਗਹਿਤਤ੍ਤਾ ਪਨ ਪਚ੍ਛਾਭਤ੍ਤਤੋ ਪਟ੍ਠਾਯ ਉਭਯਮ੍ਪਿ ਅਨਜ੍ਝੋਹਰਣੀਯਂ, ਸੀਸਮਕ੍ਖਨਾਦੀਸੁ ਉਪਨੇਤਬ੍ਬਂ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ. ਯਦਿ ਪਨ ਅਪ੍ਪਂ ਉਣ੍ਹੋਦਕਂ ਹੋਤਿ ਅਬ੍ਭੁਕ੍ਕਿਰਣਮਤ੍ਤਂ, ਅਬ੍ਬੋਹਾਰਿਕਂ ਹੋਤਿ, ਸਾਮਪਾਕਗਣਨਂ ਨ ਗਚ੍ਛਤਿ. ਸਾਸਪਤੇਲਾਦੀਸੁਪਿ ਅਵਤ੍ਥੁਕਪਟਿਗ੍ਗਹਿਤੇਸੁ ਅਵਤ੍ਥੁਕਤਿਲਤੇਲੇ ਵੁਤ੍ਤਸਦਿਸੋਵ ਵਿਨਿਚ੍ਛਯੋ.

ਸਚੇ ਪਨ ਪੁਰੇਭਤ੍ਤਂ ਪਟਿਗ੍ਗਹਿਤਾਨਂ ਸਾਸਪਾਦੀਨਂ ਚੁਣ੍ਣੇਹਿ ਆਦਿਚ੍ਚਪਾਕੇਨ ਸਕ੍ਕਾ ਤੇਲਂ ਕਾਤੁਂ, ਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਨਿਰਾਮਿਸਮੇਵ, ਸਤ੍ਤਾਹਾਤਿਕ੍ਕਮੇ ਨਿਸ੍ਸਗ੍ਗਿਯਂ. ਯਸ੍ਮਾ ਪਨ ਸਾਸਪਮਧੁਕਚੁਣ੍ਣਾਦੀਨਿ ਸੇਦੇਤ੍ਵਾ ਏਰਣ੍ਡਕਟ੍ਠੀਨਿ ਚ ਭਜ੍ਜਿਤ੍ਵਾ ਏਵ ਤੇਲਂ ਕਰੋਨ੍ਤਿ, ਤਸ੍ਮਾ ਤੇਸਂ ਤੇਲਂ ਅਨੁਪਸਮ੍ਪਨ੍ਨੇਹਿ ਕਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ. ਵਤ੍ਥੂਨਂ ਯਾਵਜੀਵਿਕਤ੍ਤਾ ਪਨ ਸਵਤ੍ਥੁਕਪਟਿਗ੍ਗਹਣੇ ਦੋਸੋ ਨਤ੍ਥੀਤਿ. ਅਤ੍ਤਨਾ ਕਤਂ ਸਤ੍ਤਾਹਂ ਨਿਰਾਮਿਸਪਰਿਭੋਗੇਨੇਵ ਪਰਿਭੁਞ੍ਜਿਤਬ੍ਬਂ. ਉਗ੍ਗਹਿਤਕੇਹਿ ਕਤਂ ਅਨਜ੍ਝੋਹਰਣੀਯਂ ਬਾਹਿਰਪਰਿਭੋਗੇ ਵਟ੍ਟਤਿ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ.

ਤੇਲਕਰਣਤ੍ਥਾਯ ਸਾਸਪਮਧੁਕਏਰਣ੍ਡਕਟ੍ਠੀਨਿ ਵਾ ਪਟਿਗ੍ਗਹੇਤ੍ਵਾ ਕਤਂ ਤੇਲਂ ਸਤ੍ਤਾਹਕਾਲਿਕਂ. ਦੁਤਿਯਦਿਵਸੇ ਕਤਂ ਛਾਹਂ ਵਟ੍ਟਤਿ. ਤਤਿਯਦਿਵਸੇ ਕਤਂ ਪਞ੍ਚਾਹਂ ਵਟ੍ਟਤਿ. ਚਤੁਤ੍ਥ-ਪਞ੍ਚਮ-ਛਟ੍ਠਸਤ੍ਤਾਮਦਿਵਸੇ ਕਤਂ ਤਦਹੇਵ ਵਟ੍ਟਤਿ. ਸਚੇ ਯਾਵ ਅਰੁਣਸ੍ਸ ਉਗ੍ਗਮਨਾ ਤਿਟ੍ਠਤਿ, ਨਿਸ੍ਸਗ੍ਗਿਯਂ. ਅਟ੍ਠਮੇ ਦਿਵਸੇ ਕਤਂ ਅਨਜ੍ਝੋਹਰਣੀਯਂ. ਅਨਿਸ੍ਸਗ੍ਗਿਯਤ੍ਤਾ ਪਨ ਬਾਹਿਰਪਰਿਭੋਗੇ ਵਟ੍ਟਤਿ. ਸਚੇਪਿ ਨ ਕਰੋਤਿ, ਤੇਲਤ੍ਥਾਯ ਗਹਿਤਸਾਸਪਾਦੀਨਂ ਸਤ੍ਤਾਹਾਤਿਕ੍ਕਮਨੇ ਦੁਕ੍ਕਟਮੇਵ. ਪਾਲ਼ਿਯਂ ਪਨ ਅਨਾਗਤਾਨਿ ਅਞ੍ਞਾਨਿਪਿ ਨਾਲ਼ਿਕੇਰਨਿਮ੍ਬਕੋਸਮ੍ਬਕਕਰਮਨ੍ਦਅਤਸੀਆਦੀਨਂ ਤੇਲਾਨਿ ਅਤ੍ਥਿ, ਤਾਨਿ ਪਟਿਗ੍ਗਹੇਤ੍ਵਾ ਸਤ੍ਤਾਹਂ ਅਤਿਕ੍ਕਾਮਯਤੋ ਦੁਕ੍ਕਟਂ ਹੋਤਿ. ਅਯਮੇਤੇਸੁ ਵਿਸੇਸੋ. ਸੇਸਂ ਯਾਵਕਾਲਿਕਵਤ੍ਥੁਂ ਯਾਵਜੀਵਿਕਵਤ੍ਥੁਞ੍ਚ ਸਲ੍ਲਕ੍ਖੇਤ੍ਵਾ ਸਾਮਂਪਾਕਸਵਤ੍ਥੁਕਪੁਰੇਭਤ੍ਤਪਚ੍ਛਾਭਤ੍ਤਪਟਿਗ੍ਗਹਿਤਉਗ੍ਗਹਿਤਕਵਤ੍ਥੁਵਿਧਾਨਂ ਸਬ੍ਬਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੬੨੩. ਵਸਾਤੇਲਨ੍ਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸਾਨਿ ਭੇਸਜ੍ਜਾਨਿ, ਅਚ੍ਛਵਸਂ, ਮਚ੍ਛਵਸਂ, ਸੁਸੁਕਾਵਸਂ, ਸੂਕਰਵਸਂ, ਗਦ੍ਰਭਵਸ’’ਨ੍ਤਿ (ਮਹਾਵ. ੨੬੨) ਏਵਂ ਅਨੁਞ੍ਞਾਤਵਸਾਨਂ ਤੇਲਂ. ਏਤ੍ਥ ਚ ‘‘ਅਚ੍ਛਵਸ’’ਨ੍ਤਿ ਵਚਨੇਨ ਠਪੇਤ੍ਵਾ ਮਨੁਸ੍ਸਵਸਂ ਸਬ੍ਬੇਸਂ ਅਕਪ੍ਪਿਯਮਂਸਾਨ ਵਸਾ ਅਨੁਞ੍ਞਾਤਾ. ਮਚ੍ਛਗ੍ਗਹਣੇਨ ਚ ਸੁਸੁਕਾਪਿ ਗਹਿਤਾ ਹੋਨ੍ਤਿ, ਵਾਲ਼ਮਚ੍ਛਤ੍ਤਾ ਪਨ ਵਿਸੁਂ ਵੁਤ੍ਤਂ. ਮਚ੍ਛਾਦਿਗ੍ਗਹਣੇਨ ਚੇਤ੍ਥ ਸਬ੍ਬੇਸਮ੍ਪਿ ਕਪ੍ਪਿਯਮਂਸਾਨਂ ਵਸਾ ਅਨੁਞ੍ਞਾਤਾ. ਮਂਸੇਸੁ ਹਿ ਦਸਮਨਉਸ੍ਸ-ਹਤ੍ਥਿ-ਅਸ੍ਸ-ਸੁਨਖ-ਅਹਿ-ਸੀਹ-ਬ੍ਯਗ੍ਘ-ਦੀਪਿ-ਅਚ੍ਛ-ਤਰਚ੍ਛਾਨਂ ਮਂਸਾਨਿ ਅਕਪ੍ਪਿਯਾਨਿ. ਵਸਾਸੁ ਏਕਾ ਮਨੁਸ੍ਸਵਸਾਵ. ਖੀਰਾਦੀਸੁ ਅਕਪ੍ਪਿਯਂ ਨਾਮ ਨਤ੍ਥਿ.

ਅਨੁਪਸਮ੍ਪਨ੍ਨੇਹਿ ਕਤਨਿਬ੍ਬਟ੍ਟਿਤਵਸਾਤੇਲਂ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ. ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਮੇਵ ਵਟ੍ਟਤਿ. ਯਂ ਪਨ ਤਤ੍ਥ ਸੁਖੁਮਰਜਸਦਿਸਂ ਮਂਸਂ ਵਾ ਨ੍ਹਾਰੁ ਵਾ ਅਟ੍ਠਿ ਵਾ ਲੋਹਿਤਂ ਵਾ ਹੋਤਿ, ਤਂ ਅਬ੍ਬੋਹਾਰਿਕਂ. ਸਚੇ ਪਨ ਵਸਂ ਪਟਿਗ੍ਗਹੇਤ੍ਵਾ ਸਯਂ ਕਰੋਤਿ, ਪੁਰੇਭਤ੍ਤਂ ਪਟਿਗ੍ਗਹੇਤ੍ਵਾ ਪਚਿਤ੍ਵਾ ਪਰਿਸ੍ਸਾਵੇਤ੍ਵਾ ਸਤ੍ਤਾਹਂ ਨਿਰਾਮਿਸਪਰਿਭੋਗੇਨ ਪਰਿਭੁਞ੍ਜਿਤਬ੍ਬਂ. ਨਿਰਾਮਿਸਪਰਿਭੋਗਞ੍ਹਿ ਸਨ੍ਧਾਯ ਇਦਂ ਵੁਤ੍ਤਂ – ‘‘ਕਾਲੇ ਪਟਿਗ੍ਗਹਿਤਂ ਕਾਲੇ ਨਿਪ੍ਪਕ੍ਕਂ ਕਾਲੇ ਸਂਸਟ੍ਠਂ ਤੇਲਪਰਿਭੋਗੇਨ ਪਰਿਭੁਞ੍ਜਿਤੁ’’ਨ੍ਤਿ (ਮਹਾਵ. ੨੬੨). ਤਤ੍ਰਾਪਿ ਅਬ੍ਬੋਹਾਰਿਕਂ ਅਬ੍ਬੋਹਾਰਿਕਮੇਵ. ਪਚ੍ਛਾਭਤ੍ਤਂ ਪਨ ਪਟਿਗ੍ਗਹਿਤੁਂ ਵਾ ਕਾਤੁਂ ਵਾ ਨ ਵਟ੍ਟਤਿਯੇਵ. ਵੁਤ੍ਤਞ੍ਹੇਤਂ –

‘‘ਵਿਕਾਲੇ ਚੇ, ਭਿਕ੍ਖਵੇ, ਪਟਿਗ੍ਗਹਿਤਂ ਵਿਕਾਲੇ ਨਿਪ੍ਪਕ੍ਕਂ ਵਿਕਾਲੇ ਸਂਸਟ੍ਠਂ, ਤਂ ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਤਿਣ੍ਣਂ ਦੁਕ੍ਕਟਾਨਂ. ਕਾਲੇ ਚੇ, ਭਿਕ੍ਖਵੇ, ਪਟਿਗ੍ਗਹਿਤਂ ਵਿਕਾਲੇ ਨਿਪ੍ਪਕ੍ਕਂ ਵਿਕਾਲੇ ਸਂਸਟ੍ਠਂ, ਤਂ ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ. ਕਾਲੇ ਚੇ, ਭਿਕ੍ਖਵੇ, ਪਟਿਗ੍ਗਹਿਤਂ ਕਾਲੇ ਨਿਪ੍ਪਕ੍ਕਂ ਵਿਕਾਲੇ ਸਂਸਟ੍ਠਂ, ਤਂ ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਕਾਲੇ ਚੇ, ਭਿਕ੍ਖਵੇ, ਪਟਿਗ੍ਗਹਿਤਂ ਕਾਲੇ ਨਿਪ੍ਪਕ੍ਕਂ ਕਾਲੇ ਸਂਸਟ੍ਠਂ, ਤਂ ਚੇ ਪਰਿਭੁਞ੍ਜੇਯ੍ਯ, ਅਨਾਪਤ੍ਤੀ’’ਤਿ.

ਉਪਤਿਸ੍ਸਤ੍ਥੇਰਂ ਪਨ ਅਨ੍ਤੇਵਾਸਿਕਾ ਪੁਚ੍ਛਿਂਸੁ – ‘‘ਭਨ੍ਤੇ, ਸਪ੍ਪਿਨਵਨੀਤਵਸਾਨਿ ਏਕਤੋ ਪਚਿਤ੍ਵਾ ਨਿਬ੍ਬਟ੍ਟਿਤਾਨਿ ਵਟ੍ਟਨ੍ਤਿ, ਨ ਵਟ੍ਟਨ੍ਤੀ’’ਤਿ? ‘‘ਨ ਵਟ੍ਟਨ੍ਤਿ, ਆਵੁਸੋ’’ਤਿ. ਥੇਰੋ ਕਿਰੇਤ੍ਥ ਪਕ੍ਕਤੇਲਕਸਟੇ ਵਿਯ ਕੁਕ੍ਕੁਚ੍ਚਾਯਤਿ. ਤਤੋ ਨਂ ਉਤ੍ਤਰਿ ਪੁਚ੍ਛਿਂਸੁ – ‘‘ਭਨ੍ਤੇ, ਨਵਨੀਤੇ ਦਧਿਗੁਲ਼ਿਕਾ ਵਾ ਤਕ੍ਕਬਿਨ੍ਦੁ ਵਾ ਹੋਤਿ, ਏਤਂ ਵਟ੍ਟਤੀ’’ਤਿ? ‘‘ਏਤਮ੍ਪਿ, ਆਵੁਸੋ, ਨ ਵਟ੍ਟਤੀ’’ਤਿ. ਤਤੋ ਨਂ ਆਹਂਸੁ – ‘‘ਭਨ੍ਤੇ, ਏਕਤੋ ਪਚਿਤ੍ਵਾ ਸਂਸਟ੍ਠਾਨਿ ਤੇਜਵਨ੍ਤਾਨਿ ਹੋਨ੍ਤਿ, ਰੋਗਂ ਨਿਗ੍ਗਣ੍ਹਨ੍ਤੀ’’ਤਿ? ‘‘ਸਾਧਾਵੁਸੋ’’ਤਿ ਥੇਰੋ ਸਮ੍ਪਟਿਚ੍ਛਿ.

ਮਹਾਸੁਮਤ੍ਥੇਰੋ ਪਨਾਹ – ‘‘ਕਪ੍ਪਿਯਮਂਸਵਸਾ ਸਾਮਿਸਪਰਿਭੋਗੇ ਵਟ੍ਟਤਿ, ਇਤਰਾ ਨਿਰਾਮਿਸਪਰਿਭੋਗੇ ਵਟ੍ਟਤੀ’’ਤਿ. ਮਹਾਪਦੁਮਤ੍ਥੇਰੋ ਪਨ ‘‘ਇਦਂ ਕਿ’’ਨ੍ਤਿ ਪਟਿਕ੍ਖਿਪਿਤ੍ਵਾ ‘‘ਨਨੁ ਵਾਤਾਬਾਧਿਕਾ ਭਿਕ੍ਖੂ ਪਞ੍ਚਮੂਲਕਸਾਵਯਾਗੁਯਂ ਅਚ੍ਛਸੂਕਰਤੇਲਾਦੀਨਿ ਪਕ੍ਖਿਪਿਤ੍ਵਾ ਯਾਗੁਂ ਪਿਵਨ੍ਤਿ, ਸਾ ਤੇਜੁਸ੍ਸਦਤ੍ਤਾ ਰੋਗਂ ਨਿਗ੍ਗਣ੍ਹਾਤੀ’’ਤਿ ਵਤ੍ਵਾ ‘‘ਵਟ੍ਟਤੀ’’ਤਿ ਆਹ.

ਮਧੁ ਨਾਮ ਮਕ੍ਖਿਕਾਮਧੂਤਿ ਮਧੁਕਰੀਹਿ ਨਾਮ ਮਧੁਮਕ੍ਖਿਕਾਹਿ ਖੁਦ੍ਦਕਮਕ੍ਖਿਕਾਹਿ ਭਮਰਮਕ੍ਖਿਕਾਹਿ ਚ ਕਤਂ ਮਧੁ. ਤਂ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਪਰਿਭੋਗਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਪਰਿਭੋਗਮੇਵ ਵਟ੍ਟਤਿ. ਸਤ੍ਤਾਹਾਤਿਕ੍ਕਮੇ ਸਚੇ ਸਿਲੇਸਸਦਿਸਂ ਮਹਾਮਧੁਂ ਖਣ੍ਡਂ ਖਣ੍ਡਂ ਕਤ੍ਵਾ ਠਪਿਤਂ, ਇਤਰਂ ਵਾ ਨਾਨਾਭਾਜਨੇਸੁ, ਵਤ੍ਥੁਗਣਨਾਯ ਨਿਸ੍ਸਗ੍ਗਿਯਾਨਿ. ਸਚੇ ਏਕਮੇਵ ਖਣ੍ਡਂ, ਏਕਭਾਜਨੇ ਵਾ ਇਤਰਂ ਏਕਮੇਵ ਨਿਸ੍ਸਗ੍ਗਿਯਂ. ਉਗ੍ਗਹਿਤਕਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ, ਅਰੁਮਕ੍ਖਨਾਦੀਸੁ ਉਪਨੇਤਬ੍ਬਂ. ਮਧੁਪਟਲਂ ਵਾ ਮਧੁਸਿਤ੍ਥਕਂ ਵਾ ਸਚੇ ਮਧੁਨਾ ਅਮਕ੍ਖਿਤਂ ਪਰਿਸੁਦ੍ਧਂ, ਯਾਵਜੀਵਿਕਂ. ਮਧੁਮਕ੍ਖਿਤਂ ਪਨ ਮਧੁਗਤਿਕਮੇਵ. ਚੀਰਿਕਾ ਨਾਮ ਸਪਕ੍ਖਾ ਦੀਘਮਕ੍ਖਿਕਾ, ਤੁਮ੍ਬਲਨਾਮਿਕਾ ਚ ਅਟ੍ਠਿਪਕ੍ਖਾ ਕਾਲ਼ਮਹਾਭਮਰਾ ਹੋਨ੍ਤਿ, ਤੇਸਂ ਆਸਯੇਸੁ ਨਿਯ੍ਯਾਸਸਦਿਸਂ ਮਧੁ ਹੋਤਿ, ਤਂ ਯਾਵਜੀਵਿਕਂ.

ਫਾਣਿਤਂ ਨਾਮ ਉਚ੍ਛੁਮ੍ਹਾ ਨਿਬ੍ਬਤ੍ਤਨ੍ਤਿ ਉਚ੍ਛੁਰਸਂ ਉਪਾਦਾਯ ਅਪਕ੍ਕਾ ਵਾ ਅਵਤ੍ਥੁਕਪਕ੍ਕਾ ਵਾ ਸਬ੍ਬਾਪਿ ਅਵਤ੍ਥੁਕਾ ਉਚ੍ਛੁਵਿਕਤਿ ਫਾਣਿਤਨ੍ਤਿ ਵੇਦਿਤਬ੍ਬਾ. ਤਂ ਫਾਣਿਤਂ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਮੇਵ ਵਟ੍ਟਤਿ. ਸਤ੍ਤਾਹਾਤਿਕ੍ਕਮੇ ਵਤ੍ਥੁਗਣਨਾਯ ਨਿਸ੍ਸਗ੍ਗਿਯਂ. ਬਹੂ ਪਿਣ੍ਡਾ ਚੁਣ੍ਣੇਤ੍ਵਾ ਏਕਭਾਜਨੇ ਪਕ੍ਖਿਤ੍ਤਾ ਹੋਨ੍ਤਿ ਘਨਸਨ੍ਨਿਵੇਸਾ, ਏਕਮੇਵ ਨਿਸ੍ਸਗ੍ਗਿਯਂ. ਉਗ੍ਗਹਿਤਕਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ, ਘਰਧੂਪਨਾਦੀਸੁ ਉਪਨੇਤਬ੍ਬਂ. ਪੁਰੇਭਤ੍ਤਂ ਪਟਿਗ੍ਗਹਿਤੇਨ ਅਪਰਿਸ੍ਸਾਵਿਤਉਚ੍ਛੁਰਸੇਨ ਕਤਫਾਣਿਤਂ ਸਚੇ ਅਨੁਪਸਮ੍ਪਨ੍ਨੇਨ ਕਤਂ, ਸਾਮਿਸਮ੍ਪਿ ਵਟ੍ਟਤਿ. ਸਯਂਕਤਂ ਨਿਰਾਮਿਸਮੇਵ ਵਟ੍ਟਤਿ. ਪਚ੍ਛਾਭਤ੍ਤਤੋ ਪਟ੍ਠਾਯ ਪਨ ਸਵਤ੍ਥੁਕਪਟਿਗ੍ਗਹਿਤਤ੍ਤਾ ਅਨਜ੍ਝੋਹਰਣੀਯਂ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ. ਪਚ੍ਛਾਭਤ੍ਤਂ ਅਪਰਿਸ੍ਸਾਵਿਤਪਟਿਗ੍ਗਹਿਤੇਨ ਕਤਮ੍ਪਿ ਅਨਜ੍ਝੋਹਰਣੀਯਮੇਵ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ. ਏਸ ਨਯੋ ਉਚ੍ਛੁਂ ਪਟਿਗ੍ਗਹੇਤ੍ਵਾ ਕਤਫਾਣਿਤੇਪਿ. ਪੁਰੇਭਤ੍ਤਂ ਪਨ ਪਰਿਸ੍ਸਾਵਿਤਪਟਿਗ੍ਗਹਿਤਕੇਨ ਕਤਂ ਸਚੇ ਅਨੁਪਸਮ੍ਪਨ੍ਨੇਨ ਕਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਮੇਵ. ਸਯਂਕਤਂ ਪੁਰੇਭਤ੍ਤਮ੍ਪਿ ਨਿਰਾਮਿਸਮੇਵ. ਪਚ੍ਛਾਭਤ੍ਤਂ ਪਰਿਸ੍ਸਾਵਿਤਪਟਿਗ੍ਗਹਿਤੇਨ ਕਤਂ ਪਨ ਨਿਰਾਮਿਸਮੇਵ ਸਤ੍ਤਾਹਂ ਵਟ੍ਟਤਿ. ਉਗ੍ਗਹਿਤਕਕਤਂ ਵੁਤ੍ਤਨਯਮੇਵ. ‘‘ਝਾਮਉਚ੍ਛੁਫਾਣਿਤਂ ਵਾ ਕੋਟ੍ਟਿਤਉਚ੍ਛੁਫਾਣਿਤਂ ਵਾ ਪੁਰੇਭਤ੍ਤਮੇਵ ਵਟ੍ਟਤੀ’’ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ.

ਮਹਾਪਚ੍ਚਰਿਯਂ ਪਨ ‘‘ਏਤਂ ਸਵਤ੍ਥੁਕਪਕ੍ਕਂ ਵਟ੍ਟਤਿ, ਨੋ ਵਟ੍ਟਤੀ’’ਤਿ ਪੁਚ੍ਛਂ ਕਤ੍ਵਾ ‘‘ਉਚ੍ਛੁਫਾਣਿਤਂ ਪਚ੍ਛਾਭਤ੍ਤਂ ਨੋਵਟ੍ਟਨਕਂ ਨਾਮ ਨਤ੍ਥੀ’’ਤਿ ਵੁਤ੍ਤਂ, ਤਂ ਯੁਤ੍ਤਂ. ਸੀਤੁਦਕੇਨ ਕਤਂ ਮਧੁਕਪੁਪ੍ਫਫਾਣਿਤਂ ਪੁਰੇਭਤ੍ਤਂ ਸਾਮਿਸਂ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਮੇਵ. ਸਤ੍ਤਾਹਾਤਿਕ੍ਕਮੇ ਵਤ੍ਥੁਗਣਨਾਯ ਦੁਕ੍ਕਟਂ. ਖੀਰਂ ਪਕ੍ਖਿਪਿਤ੍ਵਾ ਕਤਂ ਮਧੁਕਫਾਣਿਤਂ ਯਾਵਕਾਲਿਕਂ. ਖਣ੍ਡਸਕ੍ਖਰਂ ਪਨ ਖੀਰਜਲ੍ਲਿਕਂ ਅਪਨੇਤ੍ਵਾ ਸੋਧੇਨ੍ਤਿ, ਤਸ੍ਮਾ ਵਟ੍ਟਤਿ. ਮਧੁਕਪੁਪ੍ਫਂ ਪਨ ਪੁਰੇਭਤ੍ਤਂ ਅਲ੍ਲਂ ਵਟ੍ਟਤਿ, ਭਜ੍ਜਿਤਮ੍ਪਿ ਵਟ੍ਟਤਿ. ਭਜ੍ਜਿਤ੍ਵਾ ਤਿਲਾਦੀਹਿ ਮਿਸ੍ਸਂ ਵਾ ਅਮਿਸ੍ਸਂ ਵਾ ਕਤ੍ਵਾ ਕੋਟ੍ਟਿਤਮ੍ਪਿ ਵਟ੍ਟਤਿ. ਯਦਿ ਪਨ ਤਂ ਗਹੇਤ੍ਵਾ ਮੇਰਯਤ੍ਥਾਯ ਯੋਜੇਨ੍ਤਿ, ਯੋਜਿਤਂ ਬੀਜਤੋ ਪਟ੍ਠਾਯ ਨ ਵਟ੍ਟਤਿ. ਕਦਲੀ-ਖਜ੍ਜੂਰੀ-ਅਮ੍ਬ-ਲਬੁਜ-ਪਨਸ-ਚਿਞ੍ਚਾਦੀਨਂ ਸਬ੍ਬੇਸਂ ਯਾਵਕਾਲਿਕਫਲਾਨਂ ਫਾਣਿਤਂ ਯਾਵਕਾਲਿਕਮੇਵ. ਮਰਿਚਪਕ੍ਕੇਹਿ ਫਾਣਿਤਂ ਕਰੋਨ੍ਤਿ, ਤਂ ਯਾਵਜੀਵਿਕਂ.

ਤਾਨਿ ਪਟਿਗ੍ਗਹੇਤ੍ਵਾਤਿ ਸਚੇਪਿ ਸਬ੍ਬਾਨਿਪਿ ਪਟਿਗ੍ਗਹੇਤ੍ਵਾ ਏਕ ਘਟੇ ਅਵਿਨਿਬ੍ਭੋਗਾਨਿ ਕਤ੍ਵਾ ਨਿਕ੍ਖਿਪਤਿ, ਸਤ੍ਤਾਹਾਤਿਕ੍ਕਮੇ ਏਕਮੇਵ ਨਿਸ੍ਸਗ੍ਗਿਯਂ. ਵਿਨਿਭੁਤ੍ਤੇਸੁ ਪਞ੍ਚ ਨਿਸ੍ਸਗ੍ਗਿਯਾਨਿ. ਸਤ੍ਤਾਹਂ ਪਨ ਅਨਤਿਕ੍ਕਾਮੇਤ੍ਵਾ ਗਿਲਾਨੇਨਪਿ ਅਗਿਲਾਨੇਨਪਿ ਵੁਤ੍ਤਨਯੇਨੇਵ ਯਥਾਸੁਖਂ ਪਰਿਭੁਞ੍ਜਿਤਬ੍ਬਂ. ਸਤ੍ਤਵਿਧਞ੍ਹਿ ਓਦਿਸ੍ਸਂ ਨਾਮ – ਬ੍ਯਾਧਿਓਦਿਸ੍ਸਂ, ਪੁਗ੍ਗਲੋਦਿਸ੍ਸਂ, ਕਾਲੋਦਿਸ੍ਸਂ, ਸਮਯੋਦਿਸ੍ਸਂ, ਦੇਸੋਦਿਸ੍ਸਂ, ਵਸੋਦਿਸ੍ਸਂ, ਭੇਸਜ੍ਜੋਦਿਸ੍ਸਨ੍ਤਿ.

ਤਤ੍ਥ ਬ੍ਯਾਧਿਓਦਿਸ੍ਸਂ ਨਾਮ – ‘‘ਅਨੁਜਾਨਾਮਿ, ਭਿਕ੍ਖਵੇ, ਅਮਨੁਸ੍ਸਿਕਾਬਾਧੇ ਆਮਕਮਂਸਂ ਆਮਕਲੋਹਿਤ’’ਨ੍ਤਿ (ਮਹਾਵ. ੨੬੪) ਏਵਂ ਬ੍ਯਾਧਿਂ ਉਦ੍ਦਿਸ੍ਸ ਅਨੁਞ੍ਞਾਤਂ, ਤਂ ਤੇਨੇਵ ਆਬਾਧੇਨ ਆਬਾਧਿਕਸ੍ਸ ਵਟ੍ਟਤਿ, ਨ ਅਞ੍ਞਸ੍ਸ. ਤਞ੍ਚ ਖੋ ਕਾਲੇਪਿ ਵਿਕਾਲੇਪਿ ਕਪ੍ਪਿਯਮ੍ਪਿ ਅਕਪ੍ਪਿਯਮ੍ਪਿ ਵਟ੍ਟਤਿਯੇਵ.

ਪੁਗ੍ਗਲੋਦਿਸ੍ਸਂ ਨਾਮ – ‘‘ਅਨੁਜਾਨਾਮਿ, ਭਿਕ੍ਖਵੇ, ਰੋਮਨ੍ਥਕਸ੍ਸ ਰੋਮਨ੍ਥਨਂ. ਨ ਚ, ਭਿਕ੍ਖਵੇ, ਬਹਿਮੁਖਦ੍ਵਾਰਂ ਨੀਹਰਿਤ੍ਵਾ ਅਜ੍ਝੋਹਰਿਤਬ੍ਬ’’ਨ੍ਤਿ (ਚੂਲ਼ਵ. ੨੭੩) ਏਵਂ ਪੁਗ੍ਗਲਂ ਉਦ੍ਦਿਸ੍ਸ ਅਨੁਞ੍ਞਾਤਂ, ਤਂ ਤਸ੍ਸੇਵ ਵਟ੍ਟਤਿ, ਨ ਅਞ੍ਞਸ੍ਸ.

ਕਾਲੋਦਿਸ੍ਸਂ ਨਾਮ – ‘‘ਅਨੁਜਾਨਾਮਿ, ਭਿਕ੍ਖਵੇ, ਚਤ੍ਤਾਰਿ ਮਹਾਵਿਕਟਾਨਿ ਦਾਤੁਂ – ਗੂਥਂ, ਮੁਤ੍ਤਂ, ਛਾਰਿਕਂ, ਮਤ੍ਤਿਕ’’ਨ੍ਤਿ (ਮਹਾਵ. ੨੬੮) ਏਵਂ ਅਹਿਨਾ ਦਟ੍ਠਕਾਲਂ ਉਦ੍ਦਿਸ੍ਸ ਅਨੁਞ੍ਞਾਤਂ, ਤਂ ਤਸ੍ਮਿਂਯੇਵ ਕਾਲੇ ਅਪ੍ਪਟਿਗ੍ਗਹਿਤਕਮ੍ਪਿ ਵਟ੍ਟਤਿ, ਨ ਅਞ੍ਞਸ੍ਮਿਂ.

ਸਮਯੋਦਿਸ੍ਸਂ ਨਾਮ – ‘‘ਗਣਭੋਜਨੇ ਅਞ੍ਞਤ੍ਰ ਸਮਯਾ’’ਤਿਆਦਿਨਾ (ਪਾਚਿ. ੨੧੭) ਨਯੇਨ ਤਂ ਤਂ ਸਮਯਂ ਉਦ੍ਦਿਸ੍ਸ ਅਨੁਞ੍ਞਾਤਾ ਅਨਾਪਤ੍ਤਿਯੋ, ਤਾ ਤਸ੍ਮਿਂ ਤਸ੍ਮਿਂਯੇਵ ਸਮਯੇ ਅਨਾਪਤ੍ਤਿਯੋ ਹੋਨ੍ਤਿ, ਨ ਅਞ੍ਞਦਾ.

ਦੇਸੋਦਿਸ੍ਸਂ ਨਾਮ – ‘‘ਅਨੁਜਾਨਾਮਿ, ਭਿਕ੍ਖਵੇ, ਏਵਰੂਪੇਸੁ ਪਚ੍ਚਨ੍ਤਿਮੇਸੁ ਜਨਪਦੇਸੁ ਵਿਨਯਧਰਪਞ੍ਚਮੇਨ ਗਣੇਨ ਉਪਸਮ੍ਪਦ’’ਨ੍ਤਿ (ਮਹਾਵ. ੨੫੯) ਏਵਂ ਪਚ੍ਚਨ੍ਤਦੇਸੇ ਉਦ੍ਦਿਸ੍ਸ ਅਨੁਞ੍ਞਾਤਾਨਿ ਉਪਸਮ੍ਪਦਾਦੀਨਿ, ਤਾਨਿ ਤਤ੍ਥੇਵ ਵਟ੍ਟਨ੍ਤਿ, ਨ ਮਜ੍ਝਿਮਦੇਸੇ.

ਵਸੋਦਿਸ੍ਸਂ ਨਾਮ – ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸਾਨਿ ਭੇਸਜ੍ਜਾਨੀ’’ਤਿ (ਮਹਾਵ. ੨੬੨) ਏਵਂ ਵਸਾਨਾਮੇਨ ਅਨੁਞ੍ਞਾਤਂ, ਤਂ ਠਪੇਤ੍ਵਾ ਮਨੁਸ੍ਸਵਸਂ ਸਬ੍ਬੇਸਂ ਕਪ੍ਪਿਯਾਕਪ੍ਪਿਯਵਸਾਨਂ ਤੇਲਂ ਤਂਤਦਤ੍ਥਿਕਾਨਂ ਤੇਲਪਰਿਭੋਗੇਨ ਪਰਿਭੁਞ੍ਜਿਤੁਂ ਵਟ੍ਟਤਿ.

ਭੇਸਜ੍ਜੋਦਿਸ੍ਸਂ ਨਾਮ – ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚ ਭੇਸਜ੍ਜਾਨੀ’’ਤਿ (ਮਹਾਵ. ੨੬੦-੨੬੧) ਏਵਂ ਭੇਸਜ੍ਜਨਾਮੇਨ ਅਨੁਞ੍ਞਾਤਾਨਿ ਆਹਾਰਤ੍ਥਂ ਫਰਿਤੁਂ ਸਮਤ੍ਥਾਨਿ ਸਪ੍ਪਿਨਵਨੀਤਤੇਲਮਧੁਫਾਣਿਤਨ੍ਤਿ. ਤਾਨਿ ਪਟਿਗ੍ਗਹੇਤ੍ਵਾ ਤਦਹੁਪੁਰੇਭਤ੍ਤਂ ਯਥਾਸੁਖਂ ਪਚ੍ਛਾਭਤ੍ਤਤੋ ਪਟ੍ਠਾਯ ਸਤਿ ਪਚ੍ਚਯੇ ਵੁਤ੍ਤਨਯੇਨੇਵ ਸਤ੍ਤਾਹਂ ਪਰਿਭੁਞ੍ਜਿਤਬ੍ਬਾਨਿ.

੬੨੪. ਸਤ੍ਤਾਹਾਤਿਕ੍ਕਨ੍ਤੇ ਅਤਿਕ੍ਕਨ੍ਤਸਞ੍ਞੀ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਨ੍ਤਿ ਸਚੇਪਿ ਸਾਸਪਮਤ੍ਤਂ ਹੋਤਿ ਸਕਿਂ ਵਾ ਅਙ੍ਗੁਲਿਯਾ ਗਹੇਤ੍ਵਾ ਜਿਵ੍ਹਾਯ ਸਾਯਨਮਤ੍ਤਂ ਨਿਸ੍ਸਜ੍ਜਿਤਬ੍ਬਮੇਵ, ਪਾਚਿਤ੍ਤਿਯਞ੍ਚ ਦੇਸੇਤਬ੍ਬਂ.

ਨ ਕਾਯਿਕੇਨ ਪਰਿਭੋਗੇਨ ਪਰਿਭੁਞ੍ਜਿਤਬ੍ਬਨ੍ਤਿ ਕਾਯੋ ਵਾ ਕਾਯੇ ਅਰੁ ਵਾ ਨ ਮਕ੍ਖੇਤਬ੍ਬਂ. ਤੇਹਿ ਮਕ੍ਖਿਤਾਨਿ ਕਾਸਾਵਕਤ੍ਤਰਯਟ੍ਠਿਉਪਾਹਨਪਾਦਕਥਲਿਕਮਞ੍ਚਪੀਠਾਦੀਨਿਪਿ ਅਪਰਿਭੋਗਾਨਿ. ‘‘ਦ੍ਵਾਰਵਾਤਪਾਨਕਵਾਟੇਸੁਪਿ ਹਤ੍ਥੇਨ ਗਹਣਟ੍ਠਾਨਂ ਨ ਮਕ੍ਖੇਤਬ੍ਬ’’ਨ੍ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ‘‘ਕਸਾਵੇ ਪਨ ਪਕ੍ਖਿਪਿਤ੍ਵਾ ਦ੍ਵਾਰਵਾਤਪਾਨਕਵਾਟਾਨਿ ਮਕ੍ਖੇਤਬ੍ਬਾਨੀ’’ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ.

ਅਨਾਪਤ੍ਤਿ ਅਨ੍ਤੋਸਤ੍ਤਾਹਂ ਅਧਿਟ੍ਠੇਤੀਤਿ ਸਤ੍ਤਾਹਬ੍ਭਨ੍ਤਰੇ ਸਪ੍ਪਿਞ੍ਚ ਤੇਲਞ੍ਚ ਵਸਞ੍ਚ ਮੁਦ੍ਧਨਿਤੇਲਂ ਵਾ ਅਬ੍ਭਞ੍ਜਨਂ ਵਾ ਮਧੁਂ ਅਰੁਮਕ੍ਖਨਂ ਫਾਣਿਤਂ ਘਰਧੂਪਨਂ ਅਧਿਟ੍ਠੇਤਿ, ਅਨਾਪਤ੍ਤਿ. ਸਚੇ ਅਧਿਟ੍ਠਿਤਤੇਲਂ ਅਨਧਿਟ੍ਠਿਤਤੇਲਭਾਜਨੇ ਆਕਿਰਿਤੁਕਾਮੋ ਹੋਤਿ, ਭਾਜਨੇ ਚੇ ਸੁਖੁਮਂ ਛਿਦ੍ਦਂ ਪਵਿਟ੍ਠਂ ਪਵਿਟ੍ਠਂ ਤੇਲਂ ਪੁਰਾਣਤੇਲੇਨ ਅਜ੍ਝੋਤ੍ਥਰੀਯਤਿ, ਪੁਨ ਅਧਿਟ੍ਠਾਤਬ੍ਬਂ. ਅਥ ਮਹਾਮੁਖਂ ਹੋਤਿ, ਸਹਸਾਵ ਬਹੁਤੇਲਂ ਪਵਿਸਿਤ੍ਵਾ ਪੁਰਾਣਤੇਲਂ ਅਜ੍ਝੋਤ੍ਥਰਤਿ, ਪੁਨ ਅਧਿਟ੍ਠਾਨਕਿਚ੍ਚਂ ਨਤ੍ਥਿ. ਅਧਿਟ੍ਠਿਤਗਤਿਕਮੇਵ ਹਿ ਤਂ ਹੋਤਿ, ਏਤੇਨ ਨਯੇਨ ਅਧਿਟ੍ਠਿਤਤੇਲਭਾਜਨੇ ਅਨਧਿਟ੍ਠਿਤਤੇਲਾਕਿਰਣਮ੍ਪਿ ਵੇਦਿਤਬ੍ਬਂ.

੬੨੫. ਵਿਸ੍ਸਜ੍ਜੇਤੀਤਿ ਏਤ੍ਥ ਸਚੇ ਦ੍ਵਿਨ੍ਨਂ ਸਨ੍ਤਕਂ ਏਕੇਨ ਪਟਿਗ੍ਗਹਿਤਂ ਅਵਿਭਤ੍ਤਂ ਹੋਤਿ, ਸਤ੍ਤਾਹਾਤਿਕ੍ਕਮੇ ਦ੍ਵਿਨ੍ਨਮ੍ਪਿ ਅਨਾਪਤ੍ਤਿ, ਪਰਿਭੁਞ੍ਜਿਤੁਂ ਪਨ ਨ ਵਟ੍ਟਤਿ. ਸਚੇ ਯੇਨ ਪਟਿਗ੍ਗਹਿਤਂ, ਸੋ ਇਤਰਂ ਭਣਤਿ – ‘‘ਆਵੁਸੋ, ਇਮਂ ਤੇਲਂ ਸਤ੍ਤਾਹਮਤ੍ਤਂ ਪਰਿਭੁਞ੍ਜ ਤ੍ਵ’’ਨ੍ਤਿ. ਸੋ ਚ ਪਰਿਭੋਗਂ ਨ ਕਰੋਤਿ, ਕਸ੍ਸ ਆਪਤ੍ਤਿ? ਨ ਕਸ੍ਸਚਿਪਿ ਆਪਤ੍ਤਿ. ਕਸ੍ਮਾ? ਯੇਨ ਪਟਿਗ੍ਗਹਿਤਂ ਤੇਨ ਵਿਸ੍ਸਜ੍ਜਿਤਤ੍ਤਾ, ਇਤਰਸ੍ਸ ਅਪ੍ਪਟਿਗ੍ਗਹਿਤਤ੍ਤਾ.

ਵਿਨਸ੍ਸਤੀਤਿ ਅਪਰਿਭੋਗਂ ਹੋਤਿ. ਚਤ੍ਤੇਨਾਤਿਆਦੀਸੁ ਯੇਨ ਚਿਤ੍ਤੇਨ ਭੇਸਜ੍ਜਂ ਚਤ੍ਤਞ੍ਚ ਵਨ੍ਤਞ੍ਚ ਮੁਤ੍ਤਞ੍ਚ ਹੋਤਿ, ਤਂ ਚਿਤ੍ਤਂ ਚਤ੍ਤਂ ਵਨ੍ਤਂ ਮੁਤ੍ਤਨ੍ਤਿ ਵੁਚ੍ਚਤਿ. ਤੇਨ ਚਿਤ੍ਤੇਨ ਪੁਗ੍ਗਲੋ ਅਨਪੇਕ੍ਖੋਤਿ ਵੁਚ੍ਚਤ੍ਤਿ, ਏਵਂ ਅਨਪੇਕ੍ਖੋ ਸਾਮਣੇਰਸ੍ਸ ਦਤ੍ਵਾਤਿ ਅਤ੍ਥੋ. ਇਦਂ ਕਸ੍ਮਾ ਵੁਤ੍ਤਂ? ‘‘ਏਵਂ ਅਨ੍ਤੋਸਤ੍ਤਾਹੇ ਦਤ੍ਵਾ ਪਚ੍ਛਾ ਲਭਿਤ੍ਵਾ ਪਰਿਭੁਞ੍ਜਨ੍ਤਸ੍ਸ ਅਨਾਪਤ੍ਤਿਦਸ੍ਸਨਤ੍ਥ’’ਨ੍ਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨਾਹ – ‘‘ਨਯਿਦਂ ਯਾਚਿਤਬ੍ਬਂ, ਅਨ੍ਤੋਸਤ੍ਤਾਹੇ ਦਿਨ੍ਨਸ੍ਸ ਹਿ ਪੁਨ ਪਰਿਭੋਗੇ ਆਪਤ੍ਤਿਯੇਵ ਨਤ੍ਥਿ. ਸਤ੍ਤਾਹਾਤਿਕ੍ਕਨ੍ਤਸ੍ਸ ਪਨ ਪਰਿਭੋਗੇ ਅਨਾਪਤ੍ਤਿਦਸ੍ਸਨਤ੍ਥਮਿਦਂ ਵੁਤ੍ਤ’’ਨ੍ਤਿ. ਤਸ੍ਮਾ ਏਵਂ ਦਿਨ੍ਨਂ ਭੇਸਜ੍ਜਂ ਸਚੇ ਸਾਮਣੇਰੋ ਅਭਿਸਙ੍ਖਰਿਤ੍ਵਾ ਵਾ ਅਨਭਿਸਙ੍ਖਰਿਤ੍ਵਾ ਵਾ ਤਸ੍ਸ ਭਿਕ੍ਖੁਨੋ ਨਤ੍ਥੁਕਮ੍ਮਤ੍ਥਂ ਦਦੇਯ੍ਯ, ਗਹੇਤ੍ਵਾ ਨਤ੍ਥੁਕਮ੍ਮਂ ਕਾਤਬ੍ਬਂ. ਸਚੇ ਬਾਲੋ ਹੋਤਿ, ਦਾਤੁਂ ਨ ਜਾਨਾਤਿ, ਅਞ੍ਞੇਨ ਭਿਕ੍ਖੁਨਾ ਵਤ੍ਤਬ੍ਬੋ – ‘‘ਅਤ੍ਥਿ ਤੇ, ਸਾਮਣੇਰ, ਤੇਲ’’ਨ੍ਤਿ ‘‘ਆਮ, ਭਨ੍ਤੇ, ਅਤ੍ਥੀ’’ਤਿ. ‘‘ਆਹਰ, ਥੇਰਸ੍ਸ ਭੇਸਜ੍ਜਂ ਕਰਿਸ੍ਸਾਮਾ’’ਤਿ. ਏਵਮ੍ਪਿ ਵਟ੍ਟਤਿ. ਸੇਸਂ ਉਤ੍ਤਾਨਤ੍ਥਮੇਵ.

ਕਥਿਨਸਮੁਟ੍ਠਾਨਂ, ਅਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ,

ਤਿਚਿਤ੍ਤਂ, ਤਿਵੇਦਨਨ੍ਤਿ.

ਭੇਸਜ੍ਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ

੬੨੬. ਤੇਨ ਸਮਯੇਨਾਤਿ ਵਸ੍ਸਿਕਸਾਟਿਕਸਿਕ੍ਖਾਪਦਂ. ਤਤ੍ਥ ਵਸ੍ਸਿਕਸਾਟਿਕਾ ਅਨੁਞ੍ਞਾਤਾਤਿ ਚੀਵਰਕ੍ਖਨ੍ਧਕੇ ਵਿਸਾਖਾਵਤ੍ਥੁਸ੍ਮਿਂ (ਮਹਾਵ. ੩੪੯ ਆਦਯੋ) ਅਨੁਞ੍ਞਾਤਾ. ਪਟਿਕਚ੍ਚੇਵਾਤਿ ਪੁਰੇਯੇਵ.

੬੨੭. ਮਾਸੋ ਸੇਸੋ ਗਿਮ੍ਹਾਨਨ੍ਤਿ ਚਤੁਨ੍ਨਂ ਗਿਮ੍ਹਮਾਸਾਨਂ ਏਕੋ ਪਚ੍ਛਿਮਮਾਸੋ ਸੇਸੋ. ਕਤ੍ਵਾਤਿ ਸਿਬ੍ਬਨਰਜਨਕਪ੍ਪਪਰਿਯੋਸਾਨੇਨ ਨਿਟ੍ਠਪੇਤ੍ਵਾ. ਕਰੋਨ੍ਤੇਨ ਚ ਏਕਮੇਵ ਕਤ੍ਵਾ ਸਮਯੇ ਅਧਿਟ੍ਠਾਤਬ੍ਬਂ, ਦ੍ਵੇ ਅਧਿਟ੍ਠਾਤੁਂ ਨ ਵਟ੍ਟਨ੍ਤਿ.

ਅਤਿਰੇਕਮਾਸੇ ਸੇਸੇ ਗਿਮ੍ਹਾਨੇਤਿ ਗਿਮ੍ਹਾਨਨਾਮਕੇ ਅਤਿਰੇਕਮਾਸੇ ਸੇਸੇ.

ਅਤਿਰੇਕਦ੍ਧਮਾਸੇ ਸੇਸੇ ਗਿਮ੍ਹਾਨੇ ਕਤ੍ਵਾ ਨਿਵਾਸੇਤੀਤਿ ਏਤ੍ਥ ਪਨ ਠਤ੍ਵਾ ਵਸ੍ਸਿਕਸਾਟਿਕਾਯ ਪਰਿਯੇਸਨਕ੍ਖੇਤ੍ਤਂ ਕਰਣਕ੍ਖੇਤ੍ਤਂ ਨਿਵਾਸਨਕ੍ਖੇਤ੍ਤਂ ਅਧਿਟ੍ਠਾਨਕ੍ਖੇਤ੍ਤਨ੍ਤਿ ਚਤੁਬ੍ਬਿਧਂ ਖੇਤ੍ਤਂ, ਕੁਚ੍ਛਿਸਮਯੋ ਪਿਟ੍ਠਿਸਮਯੋਤਿ ਦੁਵਿਧੋ ਸਮਯੋ, ਪਿਟ੍ਠਿਸਮਯਚਤੁਕ੍ਕਂ ਕੁਚ੍ਛਿਸਮਯਚਤੁਕ੍ਕਨ੍ਤਿ ਦ੍ਵੇ ਚਤੁਕ੍ਕਾਨਿ ਚ ਵੇਦਿਤਬ੍ਬਾਨਿ.

ਤਤ੍ਥ ਜੇਟ੍ਠਮੂਲਪੁਣ੍ਣਮਾਸਿਯਾ ਪਚ੍ਛਿਮਪਾਟਿਪਦਦਿਵਸਤੋ ਪਟ੍ਠਾਯ ਯਾਵ ਕਾਲ਼ਪਕ੍ਖੁਪੋਸਥਾ, ਅਯਮੇਕੋ ਅਦ੍ਧਮਾਸੋ ਪਰਿਯੇਸਨਕ੍ਖੇਤ੍ਤਞ੍ਚੇਵ ਕਰਣਕ੍ਖੇਤ੍ਤਞ੍ਚ. ਏਤਸ੍ਮਿਞ੍ਹਿ ਅਨ੍ਤਰੇ ਵਸ੍ਸਿਕਸਾਟਿਕਂ ਅਲਦ੍ਧਂ ਪਰਿਯੇਸਿਤੁਂ ਲਦ੍ਧਂ ਕਾਤੁਞ੍ਚ ਵਟ੍ਟਤਿ, ਨਿਵਾਸੇਤੁਂ ਅਧਿਟ੍ਠਾਤੁਞ੍ਚ ਨ ਵਟ੍ਟਤਿ. ਕਾਲ਼ਪਕ੍ਖੁਪੋਸਥਸ੍ਸ ਪਚ੍ਛਿਮਪਾਟਿਪਦਦਿਵਸਤੋ ਪਟ੍ਠਾਯ ਯਾਵ ਆਸਾਲ਼੍ਹੀਪੁਣ੍ਣਮਾ, ਅਯਮੇਕੋ ਅਦ੍ਧਮਾਸੋ ਪਰਿਯੇਸਨਕਰਣਨਿਵਾਸਨਾਨਂ ਤਿਣ੍ਣਮ੍ਪਿ ਖੇਤ੍ਤਂ. ਏਤਸ੍ਮਿਞ੍ਹਿ ਅਨ੍ਤਰੇ ਪਰਿਯੇਸਿਤੁਂ ਕਾਤੁਂ ਨਿਵਾਸੇਤੁਞ੍ਚ ਵਟ੍ਟਤਿ, ਅਧਿਟ੍ਠਾਤੁਂਯੇਵ ਨ ਵਟ੍ਟਤਿ. ਆਸਾਲ਼੍ਹੀਪੁਣ੍ਣਮਾਸਿਯਾ ਪਚ੍ਛਿਮਪਾਟਿਪਦਦਿਵਸਤੋ ਪਟ੍ਠਾਯ ਯਾਵ ਕਤ੍ਤਿਕਪੁਣ੍ਣਮਾ, ਇਮੇ ਚਤ੍ਤਾਰੋ ਮਾਸਾ ਪਰਿਯੇਸਨਕਰਣਨਿਵਾਸਨਾਧਿਟ੍ਠਾਨਾਨਂ ਚਤੁਨ੍ਨਂ ਖੇਤ੍ਤਂ. ਏਤਸ੍ਮਿਞ੍ਹਿ ਅਨ੍ਤਰੇ ਅਲਦ੍ਧਂ ਪਰਿਯੇਸਿਤੁਂ ਲਦ੍ਧਂ ਕਾਤੁਂ ਨਿਵਾਸੇਤੁਂ ਅਧਿਟ੍ਠਾਤੁਞ੍ਚ ਵਟ੍ਟਤਿ. ਇਦਂ ਤਾਵ ਚਤੁਬ੍ਬਿਧਂ ਖੇਤ੍ਤਂ ਵੇਦਿਤਬ੍ਬਂ.

ਕਤ੍ਤਿਕਪੁਣ੍ਣਮਾਸਿਯਾ ਪਨ ਪਚ੍ਛਿਮਪਾਟਿਪਦਦਿਵਸਤੋ ਪਟ੍ਠਾਯ ਯਾਵ ਜੇਟ੍ਠਮੂਲਪੁਣ੍ਣਮਾ, ਇਮੇ ਸਤ੍ਤ ਮਾਸਾ ਪਿਟ੍ਠਿਸਮਯੋ ਨਾਮ. ਏਤਸ੍ਮਿਞ੍ਹਿ ਅਨ੍ਤਰੇ ‘‘ਕਾਲੋ ਵਸ੍ਸਿਕਸਾਟਿਕਾਯਾ’’ਤਿਆਦਿਨਾ ਨਯੇਨ ਸਤੁਪ੍ਪਾਦਂ ਕਤ੍ਵਾ ਅਞ੍ਞਾਤਕਅਪ੍ਪਵਾਰਿਤਟ੍ਠਾਨਤੋ ਵਸ੍ਸਿਕਸਾਟਿਕਚੀਵਰਂ ਨਿਪ੍ਫਾਦੇਨ੍ਤਸ੍ਸ ਇਮਿਨਾ ਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ‘‘ਦੇਥ ਮੇ ਵਸ੍ਸਿਕਸਾਟਿਕਚੀਵਰ’’ਨ੍ਤਿਆਦਿਨਾ ਨਯੇਨ ਵਿਞ੍ਞਤ੍ਤਿਂ ਕਤ੍ਵਾ ਨਿਪ੍ਫਾਦੇਨ੍ਤਸ੍ਸ ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਵੁਤ੍ਤਨਯੇਨੇਵ ਸਤੁਪ੍ਪਾਦਂ ਕਤ੍ਵਾ ਞਾਤਕਪਵਾਰਿਤਟ੍ਠਾਨਤੋ ਨਿਪ੍ਫਾਦੇਨ੍ਤਸ੍ਸ ਇਮਿਨਾਵ ਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਵਿਞ੍ਞਤ੍ਤਿਂ ਕਤ੍ਵਾ ਨਿਪ੍ਫਾਦੇਨ੍ਤਸ੍ਸ ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦੇਨ ਅਨਾਪਤ੍ਤਿ. ਵੁਤ੍ਤਞ੍ਹੇਤਂ ਪਰਿਵਾਰੇ –

‘‘ਮਾਤਰਂ ਚੀਵਰਂ ਯਾਚੇ, ਨੋ ਚ ਸਙ੍ਘੇ ਪਰਿਣਤਂ;

ਕੇਨਸ੍ਸ ਹੋਤਿ ਆਪਤ੍ਤਿ, ਅਨਾਪਤ੍ਤਿ ਚ ਞਾਤਕੇ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੮੧);

ਅਯਞ੍ਹਿ ਪਞ੍ਹੋ ਇਮਮਤ੍ਥਂ ਸਨ੍ਧਾਯ ਵੁਤ੍ਤੋਤਿ. ਏਵਂ ਪਿਟ੍ਠਿਸਮਯਚਤੁਕ੍ਕਂ ਵੇਦਿਤਬ੍ਬਂ.

ਜੇਟ੍ਠਮੂਲਪੁਣ੍ਣਮਾਸਿਯਾ ਪਨ ਪਚ੍ਛਿਮਪਾਟਿਪਦਦਿਵਸਤੋ ਪਟ੍ਠਾਯ ਯਾਵ ਕਤ੍ਤਿਕਪੁਣ੍ਣਮਾ, ਇਮੇ ਪਞ੍ਚ ਮਾਸਾ ਕੁਚ੍ਛਿਸਮਯੋ ਨਾਮ. ਏਤਸ੍ਮਿਞ੍ਹਿ ਅਨ੍ਤਰੇ ਵੁਤ੍ਤਨਯੇਨ ਸਤੁਪ੍ਪਾਦਂ ਕਤ੍ਵਾ ਅਞ੍ਞਾਤਕਅਪ੍ਪਵਾਰਿਤਟ੍ਠਾਨਤੋ ਵਸ੍ਸਿਕਸਾਟਿਕਚੀਵਰਂ ਨਿਪ੍ਫਾਦੇਨ੍ਤਸ੍ਸ ਵਤ੍ਤਭੇਦੇ ਦੁਕ੍ਕਟਂ. ਯੇ ਮਨੁਸ੍ਸਾ ਪੁਬ੍ਬੇਪਿ ਵਸ੍ਸਿਕਸਾਟਿਕਚੀਵਰਂ ਦੇਨ੍ਤਿ, ਇਮੇ ਪਨ ਸਚੇਪਿ ਅਤ੍ਤਨੋ ਅਞ੍ਞਾਤਕਅਪ੍ਪਵਾਰਿਤਾ ਹੋਨ੍ਤਿ, ਵਤ੍ਤਭੇਦੋ ਨਤ੍ਥਿ, ਤੇਸੁ ਸਤੁਪ੍ਪਾਦਕਰਣਸ੍ਸ ਅਨੁਞ੍ਞਾਤਤ੍ਤਾ. ਵਿਞ੍ਞਤਿਂ ਕਤ੍ਵਾ ਨਿਪ੍ਫਾਦੇਨ੍ਤਸ੍ਸ ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਇਦਂ ਪਨ ਪਕਤਿਯਾ ਵਸ੍ਸਿਕਸਾਟਿਕਦਾਯਕੇਸੁਪਿ ਹੋਤਿਯੇਵ. ਵੁਤ੍ਤਨਯੇਨੇਵ ਸਤੁਪ੍ਪਾਦਂ ਕਤ੍ਵਾ ਞਾਤਕਪਵਾਰਿਤਟ੍ਠਾਨਤੋ ਨਿਪ੍ਫਾਦੇਨ੍ਤਸ੍ਸ ਇਮਿਨਾ ਸਿਕ੍ਖਾਪਦੇਨ ਅਨਾਪਤ੍ਤਿ. ਵਿਞ੍ਞਤ੍ਤਿਂ ਕਤ੍ਵਾ ਨਿਪ੍ਫਾਦੇਨ੍ਤਸ੍ਸ ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦੇਨ ਅਨਾਪਤ੍ਤਿ. ‘‘ਨ ਵਤ੍ਤਬ੍ਬਾ ਦੇਥ ਮੇ’’ਤਿ ਇਦਞ੍ਹਿ ਪਰਿਯੇਸਨਕਾਲੇ ਅਞ੍ਞਾਤਕਅਪ੍ਪਵਾਰਿਤੇਯੇਵ ਸਨ੍ਧਾਯ ਵੁਤ੍ਤਂ. ਏਵਂ ਕੁਚ੍ਛਿਸਮਯਚਤੁਕ੍ਕਂ ਵੇਦਿਤਬ੍ਬਂ.

ਨਗ੍ਗੋ ਕਾਯਂ ਓਵਸ੍ਸਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਉਦਕਫੁਸਿਤਗਣਨਾਯ ਅਕਤ੍ਵਾ ਨ੍ਹਾਨਪਰਿਯੋਸਾਨਵਸੇਨ ਪਯੋਗੇ ਪਯੋਗੇ ਦੁਕ੍ਕਟੇਨ ਕਾਰੇਤਬ੍ਬੋ. ਸੋ ਚ ਖੋ ਵਿਵਟਙ੍ਗਣੇ ਆਕਾਸਤੋ ਪਤਿਤਉਦਕੇਨੇਵ ਨ੍ਹਾਯਨ੍ਤੋ. ਨ੍ਹਾਨਕੋਟ੍ਠਕਵਾਪਿਆਦੀਸੁ ਘਟੇਹਿ ਆਸਿਤ੍ਤਉਦਕੇਨ ਵਾ ਨ੍ਹਾਯਨ੍ਤਸ੍ਸ ਅਨਾਪਤ੍ਤਿ.

ਵਸ੍ਸਂ ਉਕ੍ਕਡ੍ਢਿਯਤੀਤਿ ਏਤ੍ਥ ਸਚੇ ਕਤਪਰਿਯੇਸਿਤਾਯ ਵਸ੍ਸਿਕਸਾਟਿਕਾਯ ਗਿਮ੍ਹਾਨਂ ਪਚ੍ਛਿਮ ਮਾਸਂ ਖੇਪੇਤ੍ਵਾ ਪੁਨ ਵਸ੍ਸਾਨਸ੍ਸ ਪਠਮਮਾਸਂ ਉਕ੍ਕਡ੍ਢਿਤ੍ਵਾ ਗਿਮ੍ਹਾਨਂ ਪਚ੍ਛਿਮਮਾਸਮੇਵ ਕਰੋਨ੍ਤਿ, ਵਸ੍ਸਿਕਸਾਟਿਕਾ ਧੋਵਿਤ੍ਵਾ ਨਿਕ੍ਖਿਪਿਤਬ੍ਬਾ. ਅਨਧਿਟ੍ਠਿਤਾ ਅਵਿਕਪ੍ਪਿਤਾ ਦ੍ਵੇ ਮਾਸੇ ਪਰਿਹਾਰਂ ਲਭਤਿ, ਵਸ੍ਸੂਪਨਾਯਿਕਦਿਵਸੇ ਅਧਿਟ੍ਠਾਤਬ੍ਬਾ. ਸਚੇ ਸਤਿਸਮ੍ਮੋਸੇਨ ਵਾ ਅਪ੍ਪਹੋਨਕਭਾਵੇਨ ਵਾ ਅਕਤਾ ਹੋਤਿ, ਤੇ ਚ ਦ੍ਵੇ ਮਾਸੇ ਵਸ੍ਸਾਨਸ੍ਸ ਚ ਚਾਤੁਮਾਸਨ੍ਤਿ ਛ ਮਾਸੇ ਪਰਿਹਾਰਂ ਲਭਤਿ. ਸਚੇ ਪਨ ਕਤ੍ਤਿਕਮਾਸੇ ਕਥਿਨਂ ਅਤ੍ਥਰੀਯਤਿ, ਅਪਰੇਪਿ ਚਤ੍ਤਾਰੋ ਮਾਸੇ ਲਭਤਿ, ਏਵਂ ਦਸ ਮਾਸਾ ਹੋਨ੍ਤਿ. ਤਤੋ ਪਰਮ੍ਪਿ ਸਤਿਯਾ ਪਚ੍ਚਾਸਾਯ ਮੂਲਚੀਵਰਂ ਕਤ੍ਵਾ ਠਪੇਨ੍ਤਸ੍ਸ ਏਕਮਾਸਨ੍ਤਿ ਏਵਂ ਏਕਾਦਸ ਮਾਸੇ ਪਰਿਹਾਰਂ ਲਭਤਿ. ਸਚੇ ਪਨ ਏਕਾਹਦ੍ਵੀਹਾਦਿਵਸੇਨ ਯਾਵ ਦਸਾਹਾਨਾਗਤਾਯ ਵਸ੍ਸੂਪਨਾਯਿਕਾਯ ਅਨ੍ਤੋਵਸ੍ਸੇ ਵਾ ਲਦ੍ਧਾ ਚੇਵ ਨਿਟ੍ਠਿਤਾ ਚ, ਕਦਾ ਅਧਿਟ੍ਠਾਤਬ੍ਬਾਤਿ ਏਤਂ ਅਟ੍ਠਕਥਾਸੁ ਨ ਵਿਚਾਰਿਤਂ. ਲਦ੍ਧਦਿਵਸਤੋ ਪਟ੍ਠਾਯ ਅਨ੍ਤੋਦਸਾਹੇ ਨਿਟ੍ਠਿਤਾ ਪਨ ਤਸ੍ਮਿਂਯੇਵ ਅਨ੍ਤੋਦਸਾਹੇ ਅਧਿਟ੍ਠਾਤਬ੍ਬਾ. ਦਸਾਹਾਤਿਕ੍ਕਮੇ ਨਿਟ੍ਠਿਤਾ ਤਦਹੇਵ ਅਧਿਟ੍ਠਾਤਬ੍ਬਾ. ਦਸਾਹੇ ਅਪ੍ਪਹੋਨ੍ਤੇ ਚੀਵਰਕਾਲਂ ਨਾਤਿਕ੍ਕਮੇਤਬ੍ਬਾਤਿ ਅਯਂ ਨੋ ਅਤ੍ਤਨੋਮਤਿ. ਕਸ੍ਮਾ? ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਚੀਵਰਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ; ਵਸ੍ਸਿਕਸਾਟਿਕਂ ਵਸ੍ਸਾਨਂ ਚਾਤੁਮਾਸਂ ਅਧਿਟ੍ਠਾਤੁਂ, ਤਤੋ ਪਰਂ ਵਿਕਪ੍ਪੇਤੁ’’ਨ੍ਤਿ (ਮਹਾਵ. ੩੫੮) ਹਿ ਵੁਤ੍ਤਂ. ਤਸ੍ਮਾ ਵਸ੍ਸੂਪਨਾਯਿਕਤੋ ਪੁਬ੍ਬੇ ਦਸਾਹਾਤਿਕ੍ਕਮੇਪਿ ਅਨਾਪਤ੍ਤਿ. ‘‘ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬ’’ਨ੍ਤਿ (ਪਾਰਾ. ੪੬੨) ਚ ਵੁਤ੍ਤਂ. ਤਸ੍ਮਾ ਏਕਾਹਦ੍ਵੀਹਾਦਿਵਸੇਨ ਯਾਵ ਦਸਾਹਾਨਾਗਤਾਯ ਵਸ੍ਸੂਪਨਾਯਿਕਾਯ ਅਨ੍ਤੋਵਸ੍ਸੇ ਵਾ ਲਦ੍ਧਾ ਚੇਵ ਨਿਟ੍ਠਿਤਾ ਚ ਵੁਤ੍ਤਨਯੇਨੇਵ ਅਨ੍ਤੋਦਸਾਹੇ ਵਾ ਤਦਹੁ ਵਾ ਅਧਿਟ੍ਠਾਤਬ੍ਬਾ, ਦਸਾਹੇ ਅਪ੍ਪਹੋਨ੍ਤੇ ਚੀਵਰਕਾਲਂ ਨਾਤਿਕ੍ਕਮੇਤਬ੍ਬਾ.

ਤਤ੍ਥ ਸਿਯਾ ‘‘ਵਸ੍ਸਾਨਂ ਚਾਤੁਮਾਸਂ ਅਧਿਟ੍ਠਾਤੁ’’ਨ੍ਤਿ ਵਚਨਤੋ ‘‘ਚਾਤੁਮਾਸਬ੍ਭਨ੍ਤਰੇ ਯਦਾ ਵਾ ਤਦਾ ਵਾ ਅਧਿਟ੍ਠਾਤੁਂ ਵਟ੍ਟਤੀ’’ਤਿ. ਯਦਿ ਏਵਂ, ‘‘ਕਣ੍ਡੁਪ੍ਪਟਿਚ੍ਛਾਦਿਂ ਯਾਵ ਆਬਾਧਾ ਅਧਿਟ੍ਠਾਤੁ’’ਨ੍ਤਿ ਵੁਤ੍ਤਂ ਸਾਪਿ, ਚ ਦਸਾਹਂ ਅਤਿਕ੍ਕਾਮੇਤਬ੍ਬਾ ਸਿਯਾ. ਏਵਞ੍ਚ ਸਤਿ ‘‘ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬ’’ਨ੍ਤਿ ਇਦਂ ਵਿਰੁਜ੍ਝਤਿ. ਤਸ੍ਮਾ ਯਥਾਵੁਤ੍ਤਮੇਵ ਗਹੇਤਬ੍ਬਂ, ਅਞ੍ਞਂ ਵਾ ਅਚਲਂ ਕਾਰਣਂ ਲਭਿਤ੍ਵਾ ਛਡ੍ਡੇਤਬ੍ਬਂ. ਅਪਿਚ ਕੁਰੁਨ੍ਦਿਯਮ੍ਪਿ ਨਿਸ੍ਸਗ੍ਗਿਯਾਵਸਾਨੇ ਵੁਤ੍ਤਂ – ‘‘ਕਦਾ ਅਧਿਟ੍ਠਾਤਬ੍ਬਾ? ਲਦ੍ਧਦਿਵਸਤੋ ਪਟ੍ਠਾਯ ਅਨ੍ਤੋਦਸਾਹੇ ਨਿਟ੍ਠਿਤਾ ਪਨ ਤਸ੍ਮਿਂਯੇਵ ਅਨ੍ਤੋਦਸਾਹੇ ਅਧਿਟ੍ਠਾਤਬ੍ਬਾ. ਯਦਿ ਨਪ੍ਪਹੋਤਿ ਯਾਵ ਕਤ੍ਤਿਕਪੁਣ੍ਣਮਾ ਪਰਿਹਾਰਂ ਲਭਤੀ’’ਤਿ.

੬੩੦. ਅਚ੍ਛਿਨ੍ਨਚੀਵਰਸ੍ਸਾਤਿ ਏਤਂ ਵਸ੍ਸਿਕਸਾਟਿਕਮੇਵ ਸਨ੍ਧਾਯ ਵੁਤ੍ਤਂ. ਤੇਸਞ੍ਹਿ ਨਗ੍ਗਾਨਂ ਕਾਯੋਵਸ੍ਸਾਪਨੇ ਅਨਾਪਤ੍ਤਿ. ਏਤ੍ਥ ਚ ਮਹਗ੍ਘਵਸ੍ਸਿਕਸਾਟਿਕਂ ਨਿਵਾਸੇਤ੍ਵਾ ਨ੍ਹਾਯਨ੍ਤਸ੍ਸ ਚੋਰੁਪਦ੍ਦਵੋ ਆਪਦਾ ਨਾਮ. ਸੇਸਮੇਤ੍ਥ ਉਤ੍ਤਾਨਮੇਵ.

ਛਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਚੀਵਰਅਚ੍ਛਿਨ੍ਦਨਸਿਕ੍ਖਾਪਦਵਣ੍ਣਨਾ

੬੩੧. ਤੇਨ ਸਮਯੇਨਾਤਿ ਚੀਵਰਅਚ੍ਛਿਨ੍ਦਨਸਿਕ੍ਖਾਪਦਂ. ਤਤ੍ਥ ਯਮ੍ਪਿ ਤ੍ਯਾਹਨ੍ਤਿ ਯਮ੍ਪਿ ਤੇ ਅਹਂ. ਸੋ ਕਿਰ ‘‘ਮਮ ਪਤ੍ਤਚੀਵਰਉਪਾਹਨਪਚ੍ਚਤ੍ਥਰਣਾਨਿ ਵਹਨ੍ਤੋ ਮਯਾ ਸਦ੍ਧਿਂ ਚਾਰਿਕਂ ਪਕ੍ਕਮਿਸ੍ਸਤੀ’’ਤਿ ਅਦਾਸਿ. ਤੇਨੇਵਮਾਹ. ਅਚ੍ਛਿਨ੍ਦੀਤਿ ਬਲਕ੍ਕਾਰੇਨ ਅਗ੍ਗਹੇਸਿ, ਸਕਸਞ੍ਞਾਯ ਗਹਿਤਤ੍ਤਾ ਪਨਸ੍ਸ ਪਾਰਾਜਿਕਂ ਨਤ੍ਥਿ, ਕਿਲਮੇਤ੍ਵਾ ਗਹਿਤਤ੍ਤਾ ਆਪਤ੍ਤਿ ਪਞ੍ਞਤ੍ਤਾ.

੬੩੩. ਸਯਂ ਅਚ੍ਛਿਨ੍ਦਤਿ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਨ੍ਤਿ ਏਕਂ ਚੀਵਰਂ ਏਕਾਬਦ੍ਧਾਨਿ ਚ ਬਹੂਨਿ ਅਚ੍ਛਿਨ੍ਦਤੋ ਏਕਾ ਆਪਤ੍ਤਿ. ਏਕਤੋ ਅਬਦ੍ਧਾਨਿ ਵਿਸੁਂ ਵਿਸੁਂ ਠਿਤਾਨਿ ਚ ਬਹੂਨਿ ਅਚ੍ਛਿਨ੍ਦਤੋ ‘‘ਸਙ੍ਘਾਟਿਂ ਆਹਰ, ਉਤ੍ਤਰਾਸਙ੍ਗਂ ਆਹਰਾ’’ਤਿ ਏਵਂ ਆਹਰਾਪਯਤੋ ਚ ਵਤ੍ਥੁਗਣਨਾਯ ਆਪਤ੍ਤਿਯੋ. ‘‘ਮਯਾ ਦਿਨ੍ਨਾਨਿ ਸਬ੍ਬਾਨਿ ਆਹਰਾ’’ਤਿ ਵਦਤੋਪਿ ਏਕਵਚਨੇਨੇਵ ਸਮ੍ਬਹੁਲਾ ਆਪਤ੍ਤਿਯੋ.

ਅਞ੍ਞਂ ਆਣਾਪੇਤਿ ਆਪਤ੍ਤਿ ਦੁਕ੍ਕਟਸ੍ਸਾਤਿ ‘‘ਚੀਵਰਂ ਗਣ੍ਹਾ’’ਤਿ ਆਣਾਪੇਤਿ, ਏਕਂ ਦੁਕ੍ਕਟਂ. ਆਣਤ੍ਤੋ ਬਹੂਨਿ ਗਣ੍ਹਾਤਿ, ਏਕਂ ਪਾਚਿਤ੍ਤਿਯਂ ‘‘ਸਙ੍ਘਾਟਿਂ ਗਣ੍ਹ, ਉਤ੍ਤਰਾਸਙ੍ਗਂ ਗਣ੍ਹਾ’’ਤਿ ਵਦਤੋ ਵਾਚਾਯ ਵਾਚਾਯ ਦੁਕ੍ਕਟਂ. ‘‘ਮਯਾ ਦਿਨ੍ਨਾਨਿ ਸਬ੍ਬਾਨਿ ਗਣ੍ਹਾ’’ਤਿ ਵਦਤੋ ਏਕਵਾਚਾਯ ਸਮ੍ਬਹੁਲਾ ਆਪਤ੍ਤਿਯੋ.

੬੩੪. ਅਞ੍ਞਂ ਪਰਿਕ੍ਖਾਰਨ੍ਤਿ ਵਿਕਪ੍ਪਨੁਪਗਪਚ੍ਛਿਮਚੀਵਰਂ ਠਪੇਤ੍ਵਾ ਯਂ ਕਿਞ੍ਚਿ ਅਨ੍ਤਮਸੋ ਸੂਚਿਮ੍ਪਿ. ਵੇਠੇਤ੍ਵਾ ਠਪਿਤਸੂਚੀਸੁਪਿ ਵਤ੍ਥੁਗਣਨਾਯ ਦੁਕ੍ਕਟਾਨਿ. ਸਿਥਿਲਵੇਠਿਤਾਸੁ ਏਵਂ. ਗਾਲ਼੍ਹਂ ਕਤ੍ਵਾ ਬਦ੍ਧਾਸੁ ਪਨ ਏਕਮੇਵ ਦੁਕ੍ਕਟਨ੍ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਸੂਚਿਘਰੇ ਪਕ੍ਖਿਤ੍ਤਾਸੁਪਿ ਏਸੇਵ ਨਯੋ. ਥਵਿਕਾਯ ਪਕ੍ਖਿਪਿਤ੍ਵਾ ਸਿਥਿਲਬਦ੍ਧ ਗਾਲ਼੍ਹਬਦ੍ਧੇਸੁ ਤਿਕਟੁਕਾਦੀਸੁ ਭੇਸਜ੍ਜੇਸੁਪਿ ਏਸੇਵ ਨਯੋ.

੬੩੫. ਸੋ ਵਾ ਦੇਤੀਤਿ ‘‘ਭਨ੍ਤੇ, ਤੁਮ੍ਹਾਕਂਯੇਵ ਇਦਂ ਸਾਰੁਪ੍ਪ’’ਨ੍ਤਿ ਏਵਂ ਵਾ ਦੇਤਿ, ਅਥ ਵਾ ਪਨ ‘‘ਆਵੁਸੋ, ਮਯਂ ਤੁਯ੍ਹਂ ‘ਵਤ੍ਤਪਟਿਪਤ੍ਤਿਂ ਕਰਿਸ੍ਸਤਿ, ਅਮ੍ਹਾਕਂ ਸਨ੍ਤਿਕੇ ਉਪਜ੍ਝਂ ਗਣ੍ਹਿਸ੍ਸਤਿ, ਧਮ੍ਮਂ ਪਰਿਯਾਪੁਣਿਸ੍ਸਤੀ’ਤਿ ਚੀਵਰਂ ਅਦਮ੍ਹ, ਸੋ ਦਾਨਿ ਤ੍ਵਂ ਨ ਵਤ੍ਤਂ ਕਰੋਸਿ, ਨ ਉਪਜ੍ਝਂ ਗਣ੍ਹਾਸਿ, ਨ ਧਮ੍ਮਂ ਪਰਿਯਾਪੁਣਾਸੀ’’ਤਿ ਏਵਮਾਦੀਨਿ ਵੁਤ੍ਤੋ ‘‘ਭਨ੍ਤੇ, ਚੀਵਰਤ੍ਥਾਯ ਮਞ੍ਞੇ ਭਣਥ, ਇਦਂ ਵੋ ਚੀਵਰ’’ਨ੍ਤਿ ਦੇਤਿ, ਏਵਮ੍ਪਿ ਸੋ ਵਾ ਦੇਤਿ. ਦਿਸਾਪਕ੍ਕਨ੍ਤਂ ਵਾ ਪਨ ਦਹਰਂ ‘‘ਨਿਵਤ੍ਤੇਥ ਨ’’ਨ੍ਤਿ ਭਣਤਿ, ਸੋ ਨ ਨਿਵਤ੍ਤਤਿ. ਚੀਵਰਂ ਗਹੇਤ੍ਵਾ ਰੁਨ੍ਧਥਾਤਿ, ਏਵਂ ਚੇ ਨਿਵਤ੍ਤਤਿ, ਸਾਧੁ. ਸਚੇ ‘‘ਪਤ੍ਤਚੀਵਰਤ੍ਥਾਯ ਮਞ੍ਞੇ ਤੁਮ੍ਹੇ ਭਣਥ, ਗਣ੍ਹਥ ਨ’’ਨ੍ਤਿ ਦੇਤਿ. ਏਵਮ੍ਪਿ ਸੋ ਵਾ ਦੇਤਿ, ਵਿਬ੍ਭਨ੍ਤਂ ਵਾ ਦਿਸ੍ਵਾ ‘‘ਮਯਂ ਤੁਯ੍ਹਂ ‘ਵਤ੍ਤਂ ਕਰਿਸ੍ਸਤੀ’ਤਿ ਪਤ੍ਤਚੀਵਰਂ ਅਦਮ੍ਹ, ਸੋ ਦਾਨਿ ਤ੍ਵਂ ਵਿਬ੍ਭਮਿਤ੍ਵਾ ਚਰਸੀ’’ਤਿ ਵਦਤਿ. ਇਤਰੋ ‘‘ਗਣ੍ਹਥ ਤੁਮ੍ਹਾਕਂ ਪਤ੍ਤਚੀਵਰ’’ਨ੍ਤਿ ਦੇਤਿ, ਏਵਮ੍ਪਿ ਸੋ ਵਾ ਦੇਤਿ. ‘‘ਮਮ ਸਨ੍ਤਿਕੇ ਉਪਜ੍ਝਂ ਗਣ੍ਹਨ੍ਤਸ੍ਸੇਵ ਦੇਮਿ, ਅਞ੍ਞਤ੍ਥ ਗਣ੍ਹਨ੍ਤਸ੍ਸ ਨ ਦੇਮਿ. ਵਤ੍ਤਂ ਕਰੋਨ੍ਤਸ੍ਸੇਵ ਦੇਮਿ, ਅਕਰੋਨ੍ਤਸ੍ਸ ਨ ਦੇਮਿ, ਧਮ੍ਮਂ ਪਰਿਯਾਪੁਣਨ੍ਤਸ੍ਸੇਵ ਦੇਮਿ, ਅਪਰਿਯਾਪੁਣਨ੍ਤਸ੍ਸ ਨ ਦੇਮਿ, ਅਵਿਬ੍ਭਮਨ੍ਤਸ੍ਸੇਵ ਦੇਮਿ, ਵਿਬ੍ਭਮਨ੍ਤਸ੍ਸ ਨ ਦੇਮੀ’’ਤਿ ਏਵਂ ਪਨ ਦਾਤੁਂ ਨ ਵਟ੍ਟਤਿ, ਦਦਤੋ ਦੁਕ੍ਕਟਂ. ਆਹਰਾਪੇਤੁਂ ਪਨ ਵਟ੍ਟਤਿ. ਚਜਿਤ੍ਵਾ ਦਿਨ੍ਨਂ ਅਚ੍ਛਿਨ੍ਦਿਤ੍ਵਾ ਗਣ੍ਹਨ੍ਤੋ ਭਣ੍ਡਗ੍ਘੇਨ ਕਾਰੇਤਬ੍ਬੋ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.

ਤਿਸਮੁਟ੍ਠਾਨਂ – ਕਾਯਚਿਤ੍ਤਤੋ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਚੀਵਰਅਚ੍ਛਿਨ੍ਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ

੬੩੬. ਤੇਨ ਸਮਯੇਨਾਤਿ ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਂ. ਤਤ੍ਥ ਖੋਮਨ੍ਤਿ ਖੋਮਵਾਕੇਹਿ ਕਤਸੁਤ੍ਤਂ. ਕਪ੍ਪਾਸਿਕਨ੍ਤਿ ਕਪ੍ਪਾਸਤੋ ਨਿਬ੍ਬਤ੍ਤਂ. ਕੋਸੇਯ੍ਯਨ੍ਤਿ ਕੋਸਿਯਂਸੂਹਿ ਕਨ੍ਤਿਤ੍ਵਾ ਕਤਸੁਤ੍ਤਂ. ਕਮ੍ਬਲਨ੍ਤਿ ਏਲ਼ਕਲੋਮਸੁਤ੍ਤਂ. ਸਾਣਨ੍ਤਿ ਸਾਣਵਾਕਸੁਤ੍ਤਂ. ਭਙ੍ਗਨ੍ਤਿ ਪਾਟੇਕ੍ਕਂ ਵਾਕਸੁਤ੍ਤਮੇਵਾਤਿ ਏਕੇ. ਏਤੇਹਿ ਪਞ੍ਚਹਿ ਮਿਸ੍ਸੇਤ੍ਵਾ ਕਤਸੁਤ੍ਤਂ ਪਨ ‘‘ਭਙ੍ਗ’’ਨ੍ਤਿ ਵੇਦਿਤਬ੍ਬਂ.

ਵਾਯਾਪੇਤਿ ਪਯੋਗੇ ਪਯੋਗੇ ਦੁਕ੍ਕਟਨ੍ਤਿ ਸਚੇ ਤਨ੍ਤਵਾਯਸ੍ਸ ਤੁਰਿਵੇਮਾਦੀਨਿ ਨਤ੍ਥਿ, ਤਾਨਿ ‘‘ਅਰਞ੍ਞਤੋ ਆਹਰਿਸ੍ਸਾਮੀ’’ਤਿ ਵਾਸਿਂ ਵਾ ਫਰਸੁਂ ਵਾ ਨਿਸੇਤਿ, ਤਤੋ ਪਟ੍ਠਾਯ ਯਂ ਯਂ ਉਪਕਰਣਤ੍ਥਾਯ ਵਾ ਚੀਵਰਵਾਯਨਤ੍ਥਾਯ ਵਾ ਕਰੋਤਿ, ਸਬ੍ਬਤ੍ਥ ਤਨ੍ਤਵਾਯਸ੍ਸ ਪਯੋਗੇ ਪਯੋਗੇ ਭਿਕ੍ਖੁਸ੍ਸ ਦੁਕ੍ਕਟਂ. ਦੀਘਤੋ ਵਿਦਤ੍ਥਿਮਤ੍ਤੇ ਤਿਰਿਯਞ੍ਚ ਹਤ੍ਥਮਤ੍ਤੇ ਵੀਤੇ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਮਹਾਪਚ੍ਚਰਿਯਂ ਪਨ ‘‘ਯਾਵ ਪਰਿਯੋਸਾਨਂ ਵਾਯਾਪੇਨ੍ਤਸ੍ਸ ਫਲਕੇ ਫਲਕੇ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ ਵੁਤ੍ਤਂ. ਤਮ੍ਪਿ ਇਦਮੇਵ ਪਮਾਣਂ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਵਿਕਪ੍ਪਨੁਪਗਪਚ੍ਛਿਮਞ੍ਹਿ ਚੀਵਰਸਙ੍ਖ੍ਯਂ ਗਚ੍ਛਤੀਤਿ.

ਅਪਿਚੇਤ੍ਥ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋ – ਸੁਤ੍ਤਂ ਤਾਵ ਸਾਮਂ ਵਿਞ੍ਞਾਪਿਤਂ ਅਕਪ੍ਪਿਯਂ, ਸੇਸਂ ਞਾਤਕਾਦਿਵਸੇਨ ਉਪ੍ਪਨ੍ਨਂ ਕਪ੍ਪਿਯਂ. ਤਨ੍ਤਵਾਯੋਪਿ ਅਞ੍ਞਾਤਕਅਪ੍ਪਵਾਰਿਤੋ ਵਿਞ੍ਞਤ੍ਤਿਯਾ ਲਦ੍ਧੋ ਅਕਪ੍ਪਿਯੋ, ਸੇਸੋ ਕਪ੍ਪਿਯੋ. ਤਤ੍ਥ ਅਕਪ੍ਪਿਯਸੁਤ੍ਤਂ ਅਕਪ੍ਪਿਯਤਨ੍ਤਵਾਯੇਨ ਵਾਯਾਪੇਨ੍ਤਸ੍ਸ ਪੁਬ੍ਬੇ ਵੁਤ੍ਤਨਯੇਨ ਨਿਸ੍ਸਗ੍ਗਿਯਂ. ਤੇਨੇਵ ਪਨ ਕਪ੍ਪਿਯਸੁਤ੍ਤਂ ਵਾਯਾਪੇਨ੍ਤਸ੍ਸ ਯਥਾ ਪੁਬ੍ਬੇ ਨਿਸ੍ਸਗ੍ਗਿਯਂ, ਏਵਂ ਦੁਕ੍ਕਟਂ. ਤੇਨੇਵ ਕਪ੍ਪਿਯਂ ਅਕਪ੍ਪਿਯਞ੍ਚ ਸੁਤ੍ਤਂ ਵਾਯਾਪੇਨ੍ਤਸ੍ਸ ਯਦਿ ਪਚ੍ਛਿਮਚੀਵਰਪ੍ਪਮਾਣੇਨ ਏਕੋ ਪਰਿਚ੍ਛੇਦੋ ਸੁਦ੍ਧਕਪ੍ਪਿਯਸੁਤ੍ਤਮਯੋ, ਏਕੋ ਅਕਪ੍ਪਿਯਸੁਤ੍ਤਮਯੋਤਿ ਏਵਂ ਕੇਦਾਰਬਦ੍ਧਂ ਵਿਯ ਚੀਵਰਂ ਹੋਤਿ, ਅਕਪ੍ਪਿਯਸੁਤ੍ਤਮਯੇ ਪਰਿਚ੍ਛੇਦੇ ਪਾਚਿਤ੍ਤਿਯਂ, ਇਤਰਸ੍ਮਿਂ ਤਥੇਵ ਦੁਕ੍ਕਟਂ. ਯਦਿ ਤਤੋ ਊਨਪਰਿਚ੍ਛੇਦਾ ਹੋਨ੍ਤਿ, ਅਨ੍ਤਮਸੋ ਅਚ੍ਛਿਮਣ੍ਡਲਪ੍ਪਮਾਣਾਪਿ, ਸਬ੍ਬਪਰਿਚ੍ਛੇਦੇਸੁ ਪਰਿਚ੍ਛੇਦਗਣਨਾਯ ਦੁਕ੍ਕਟਂ. ਅਥ ਏਕਨ੍ਤਰਿਕੇਨ ਵਾ ਸੁਤ੍ਤੇਨ ਦੀਘਤੋ ਵਾ ਕਪ੍ਪਿਯਂ ਤਿਰਿਯਂ ਅਕਪ੍ਪਿਯਂ ਕਤ੍ਵਾ ਵੀਤਂ ਹੋਤਿ, ਫਲਕੇ ਫਲਕੇ ਦੁਕ੍ਕਟਂ. ਕਪ੍ਪਿਯਤਨ੍ਤਵਾਯੇਨਪਿ ਅਕਪ੍ਪਿਯਸੁਤ੍ਤਂ ਵਾਯਾਪੇਨ੍ਤਸ੍ਸ ਯਥਾ ਪੁਬ੍ਬੇ ਨਿਸ੍ਸਗ੍ਗਿਯਂ, ਏਵਂ ਦੁਕ੍ਕਟਂ. ਤੇਨੇਵ ਕਪ੍ਪਿਯਞ੍ਚ ਅਕਪ੍ਪਿਯਞ੍ਚ ਸੁਤ੍ਤਂ ਵਾਯਾਪੇਨ੍ਤਸ੍ਸ ਸਚੇ ਪਚ੍ਛਿਮਚੀਵਰਪ੍ਪਮਾਣਾ ਊਨਕਾ ਵਾ ਅਕਪ੍ਪਿਯਸੁਤ੍ਤਪਰਿਚ੍ਛੇਦਾ ਹੋਨ੍ਤਿ, ਤੇਸੁ ਪਰਿਚ੍ਛੇਦਗਣਨਾਯ ਦੁਕ੍ਕਟਂ. ਕਪ੍ਪਿਯਸੁਤ੍ਤਪਰਿਚ੍ਛੇਦੇਸੁ ਅਨਾਪਤ੍ਤਿ. ਅਥ ਏਕਨ੍ਤਰਿਕੇਨ ਵਾ ਸੁਤ੍ਤੇਨ ਦੀਘਤੋ ਵਾ ਕਪ੍ਪਿਯਂ ਤਿਰਿਯਂ ਅਕਪ੍ਪਿਯਂ ਕਤ੍ਵਾ ਵੀਤਂ ਹੋਤਿ, ਫਲਕੇ ਫਲਕੇ ਦੁਕ੍ਕਟਂ.

ਯਦਿ ਪਨ ਦ੍ਵੇ ਤਨ੍ਤਵਾਯਾ ਹੋਨ੍ਤਿ, ਏਕੋ ਕਪ੍ਪਿਯੋ ਏਕੋ ਅਕਪ੍ਪਿਯੋ, ਸੁਤ੍ਤਞ੍ਚ ਅਕਪ੍ਪਿਯਂ, ਤੇ ਚੇ ਵਾਰੇਨ ਵਿਨਨ੍ਤਿ, ਅਕਪ੍ਪਿਯਤਨ੍ਤਵਾਯੇਨ ਵੀਤੇ ਫਲਕੇ ਫਲਕੇ ਪਾਚਿਤ੍ਤਿਯਂ, ਊਨਤਰੇ ਦੁਕ੍ਕਟਂ. ਇਤਰੇਨ ਵੀਤੇ ਉਭਯਤ੍ਥ ਦੁਕ੍ਕਟਂ. ਸਚੇ ਦ੍ਵੇਪਿ ਵੇਮਂ ਗਹੇਤ੍ਵਾ ਏਕਤੋ ਵਿਨਨ੍ਤਿ, ਫਲਕੇ ਫਲਕੇ ਪਾਚਿਤ੍ਤਿਯਂ. ਅਥ ਸੁਤ੍ਤਂ ਕਪ੍ਪਿਯਂ, ਚੀਵਰਞ੍ਚ ਕੇਦਾਰਬਦ੍ਧਾਦੀਹਿ ਸਪਰਿਚ੍ਛੇਦਂ, ਅਕਪ੍ਪਿਯਤਨ੍ਤਵਾਯੇਨ ਵੀਤੇ ਪਰਿਚ੍ਛੇਦੇ ਪਰਿਚ੍ਛੇਦੇ ਦੁਕ੍ਕਟਂ, ਇਤਰੇਨ ਵੀਤੇ ਅਨਾਪਤ੍ਤਿ. ਸਚੇ ਦ੍ਵੇਪਿ ਵੇਮਂ ਗਹੇਤ੍ਵਾ ਏਕਤੋ ਵਿਨਨ੍ਤਿ, ਫਲਕੇ ਫਲਕੇ ਦੁਕ੍ਕਟਂ. ਅਥ ਸੁਤ੍ਤਮ੍ਪਿ ਕਪ੍ਪਿਯਞ੍ਚ ਅਕਪ੍ਪਿਯਞ੍ਚ, ਤੇ ਚੇ ਵਾਰੇਨ ਵਿਨਨ੍ਤਿ, ਅਕਪ੍ਪਿਯਤਨ੍ਤਵਾਯੇਨ ਅਕਪ੍ਪਿਯਸੁਤ੍ਤਮਯੇਸੁ ਪਚ੍ਛਿਮਚੀਵਰਪ੍ਪਮਾਣੇਸੁ ਪਰਿਚ੍ਛੇਦੇਸੁ ਵੀਤੇਸੁ ਪਰਿਚ੍ਛੇਦਗਣਨਾਯ ਪਾਚਿਤ੍ਤਿਯਂ. ਊਨਕਤਰੇਸੁ ਕਪ੍ਪਿਯਸੁਤ੍ਤਮਯੇਸੁ ਚ ਦੁਕ੍ਕਟਂ. ਕਪ੍ਪਿਯਤਨ੍ਤਵਾਯੇਨ ਅਕਪ੍ਪਿਯਸੁਤ੍ਤਮਯੇਸੁ ਪਮਾਣਯੁਤ੍ਤੇਸੁ ਵਾ ਊਨਕੇਸੁ ਵਾ ਦੁਕ੍ਕਟਮੇਵ. ਕਪ੍ਪਿਯਸੁਤ੍ਤਮਯੇਸੁ ਅਨਾਪਤ੍ਤਿ.

ਅਥ ਏਕਨ੍ਤਰਿਕੇਨ ਵਾ ਸੁਤ੍ਤੇਨ ਦੀਘਤੋ ਵਾ ਅਕਪ੍ਪਿਯਂ ਤਿਰਿਯਂ ਕਪ੍ਪਿਯਂ ਕਤ੍ਵਾ ਵਿਨਨ੍ਤਿ, ਉਭੋਪਿ ਵਾ ਤੇ ਵੇਮਂ ਗਹੇਤ੍ਵਾ ਏਕਤੋ ਵਿਨਨ੍ਤਿ, ਅਪਰਿਚ੍ਛੇਦੇ ਚੀਵਰੇ ਫਲਕੇ ਫਲਕੇ ਦੁਕ੍ਕਟਂ, ਸਪਰਿਚ੍ਛੇਦੇ ਪਰਿਚ੍ਛੇਦਵਸੇਨ ਦੁਕ੍ਕਟਾਨੀਤਿ. ਅਯਂ ਪਨ ਅਤ੍ਥੋ ਮਹਾਅਟ੍ਠਕਥਾਯਂ ਅਪਾਕਟੋ, ਮਹਾਪਚ੍ਚਰਿਯਾਦੀਸੁ ਪਾਕਟੋ. ਇਧ ਸਬ੍ਬਾਕਾਰੇਨੇਵ ਪਾਕਟੋ.

ਸਚੇ ਸੁਤ੍ਤਮ੍ਪਿ ਕਪ੍ਪਿਯਂ, ਤਨ੍ਤਵਾਯੋਪਿ ਕਪ੍ਪਿਯੋ ਞਾਤਕਪ੍ਪਵਾਰਿਤੋ ਵਾ ਮੂਲੇਨ ਵਾ ਪਯੋਜਿਤੋ, ਵਾਯਾਪਨਪਚ੍ਚਯਾ ਅਨਾਪਤ੍ਤਿ. ਦਸਾਹਾਤਿਕ੍ਕਮਨਪਚ੍ਚਯਾ ਪਨ ਆਪਤ੍ਤਿਂ ਰਕ੍ਖਨ੍ਤੇਨ ਵਿਕਪ੍ਪਨੁਪਗਪ੍ਪਮਾਣਮਤ੍ਤੇ ਵੀਤੇ ਤਨ੍ਤੇ ਠਿਤਂਯੇਵ ਅਧਿਟ੍ਠਾਤਬ੍ਬਂ. ਦਸਾਹਾਤਿਕ੍ਕਮੇਨ ਨਿਟ੍ਠਾਪਿਯਮਾਨਞ੍ਹਿ ਨਿਸ੍ਸਗ੍ਗਿਯਂ ਭਵੇਯ੍ਯਾਤਿ. ਞਾਤਕਾਦੀਹਿ ਤਨ੍ਤਂ ਆਰੋਪੇਤ੍ਵਾ ‘‘ਤੁਮ੍ਹਾਕਂ, ਭਨ੍ਤੇ, ਇਦਂ ਚੀਵਰਂ ਗਣ੍ਹੇਯ੍ਯਾਥਾ’’ਤਿ ਨਿਯ੍ਯਾਤਿਤੇਪਿ ਏਸੇਵ ਨਯੋ.

ਸਚੇ ਤਨ੍ਤਵਾਯੋ ਏਵਂ ਪਯੋਜਿਤੋ ਵਾ ਸਯਂ ਦਾਤੁਕਾਮੋ ਵਾ ਹੁਤ੍ਵਾ ‘‘ਅਹਂ, ਭਨ੍ਤੇ, ਤੁਮ੍ਹਾਕਂ ਚੀਵਰਂ ਅਸੁਕਦਿਵਸੇ ਨਾਮ ਵਾਯਿਤ੍ਵਾ ਠਪੇਸ੍ਸਾਮੀ’’ਤਿ ਵਦਤਿ, ਭਿਕ੍ਖੁ ਚ ਤੇਨ ਪਰਿਚ੍ਛਿਨ੍ਨਦਿਵਸਤੋ ਦਸਾਹਂ ਅਤਿਕ੍ਕਾਮੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਸਚੇ ਪਨ ਤਨ੍ਤਵਾਯੋ ‘‘ਅਹਂ ਤੁਮ੍ਹਾਕਂ ਚੀਵਰਂ ਵਾਯਿਤ੍ਵਾ ਸਾਸਨਂ ਪੇਸੇਸ੍ਸਾਮੀ’’ਤਿ ਵਤ੍ਵਾ ਤਥੇਵ ਕਰੋਤਿ, ਤੇਨ ਪੇਸਿਤਭਿਕ੍ਖੁ ਪਨ ਤਸ੍ਸ ਭਿਕ੍ਖੁਨੋ ਨ ਆਰੋਚੇਤਿ, ਅਞ੍ਞੋ ਦਿਸ੍ਵਾ ਵਾ ਸੁਤ੍ਵਾ ਵਾ ‘‘ਤੁਮ੍ਹਾਕਂ, ਭਨ੍ਤੇ, ਚੀਵਰਂ ਨਿਟ੍ਠਿਤ’’ਨ੍ਤਿ ਆਰੋਚੇਤਿ, ਏਤਸ੍ਸ ਆਰੋਚਨਂ ਨ ਪਮਾਣਂ. ਯਦਾ ਪਨ ਤੇਨ ਪੇਸਿਤੋਯੇਵ ਆਰੋਚੇਤਿ, ਤਸ੍ਸ ਵਚਨਂ ਸੁਤਦਿਵਸਤੋ ਪਟ੍ਠਾਯ ਦਸਾਹਂ ਅਤਿਕ੍ਕਾਮਯਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਸਚੇ ਤਨ੍ਤਵਾਯੋ ‘‘ਅਹਂ ਤੁਮ੍ਹਾਕਂ ਚੀਵਰਂ ਵਾਯਿਤ੍ਵਾ ਕਸ੍ਸਚਿ ਹਤ੍ਥੇ ਪਹਿਣਿਸ੍ਸਾਮੀ’’ਤਿ ਵਤ੍ਵਾ ਤਥੇਵ ਕਰੋਤਿ, ਚੀਵਰਂ ਗਹੇਤ੍ਵਾ ਗਤਭਿਕ੍ਖੁ ਪਨ ਅਤ੍ਤਨੋ ਪਰਿਵੇਣੇ ਠਪੇਤ੍ਵਾ ਤਸ੍ਸ ਨ ਆਰੋਚੇਤਿ, ਅਞ੍ਞੋ ਕੋਚਿ ਭਣਤਿ ‘‘ਅਪਿ, ਭਨ੍ਤੇ, ਅਧੁਨਾ ਆਭਤਂ ਚੀਵਰਂ ਸੁਨ੍ਦਰ’’ਨ੍ਤਿ? ‘‘ਕੁਹਿਂ, ਆਵੁਸੋ, ਚੀਵਰ’’ਨ੍ਤਿ? ‘‘ਇਤ੍ਥਨ੍ਨਾਮਸ੍ਸ ਹਤ੍ਥੇ ਪੇਸਿਤ’’ਨ੍ਤਿ. ਏਤਸ੍ਸਪਿ ਵਚਨਂ ਨ ਪਮਾਣਂ. ਯਦਾ ਪਨ ਸੋ ਭਿਕ੍ਖੁ ਚੀਵਰਂ ਦੇਤਿ, ਲਦ੍ਧਦਿਵਸਤੋ ਪਟ੍ਠਾਯ ਦਸਾਹਂ ਅਤਿਕ੍ਕਾਮਯਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਸਚੇ ਪਨ ਵਾਯਾਪਨਮੂਲਂ ਅਦਿਨ੍ਨਂ ਹੋਤਿ, ਯਾਵ ਕਾਕਣਿਕਮਤ੍ਤਮ੍ਪਿ ਅਵਸਿਟ੍ਠਂ, ਤਾਵ ਰਕ੍ਖਤਿ.

੬੪੦. ਅਨਾਪਤ੍ਤਿ ਚੀਵਰਂ ਸਿਬ੍ਬੇਤੁਨ੍ਤਿ ਚੀਵਰਸਿਬ੍ਬਨਤ੍ਥਾਯ ਸੁਤ੍ਤਂ ਵਿਞ੍ਞਾਪੇਨ੍ਤਸ੍ਸ ਅਨਾਪਤ੍ਤੀਤਿ ਅਤ੍ਥੋ. ਆਯੋਗੇਤਿਆਦੀਸੁਪਿ ਨਿਮਿਤ੍ਤਤ੍ਥੇ ਭੁਮ੍ਮਵਚਨਂ, ਆਯੋਗਾਦਿਨਿਮਿਤ੍ਤਂ ਵਿਞ੍ਞਾਪੇਨ੍ਤਸ੍ਸ ਅਨਾਪਤ੍ਤੀਤਿ ਵੁਤ੍ਤਂ ਹੋਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਛਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਮਹਾਪੇਸਕਾਰਸਿਕ੍ਖਾਪਦਵਣ੍ਣਨਾ

੬੪੧. ਤੇਨ ਸਮਯੇਨਾਤਿ ਮਹਾਪੇਸਕਾਰਸਿਕ੍ਖਾਪਦਂ. ਤਤ੍ਥ ਸੁਤ੍ਤਂ ਧਾਰਯਿਤ੍ਵਾਤਿ ਸੁਤ੍ਤਂ ਤੁਲੇਤ੍ਵਾ ਪਲਪਰਿਚ੍ਛੇਦਂ ਕਤ੍ਵਾ. ਅਪ੍ਪਿਤਨ੍ਤਿ ਘਨਂ. ਸੁਵੀਤਨ੍ਤਿ ਸੁਟ੍ਠੁ ਵੀਤਂ, ਸਬ੍ਬਟ੍ਠਾਨੇਸੁ ਸਮਂ ਕਤ੍ਵਾ ਵੀਤਂ. ਸੁਪ੍ਪਵਾਯਿਤਨ੍ਤਿ ਸੁਟ੍ਠੁ ਪਵਾਯਿਤਂ ਸਬ੍ਬਟ੍ਠਾਨੇਸੁ ਸਮਂ ਕਤ੍ਵਾ ਤਨ੍ਤੇ ਪਸਾਰਿਤਂ. ਸੁਵਿਲੇਖਿਤਨ੍ਤਿ ਲੇਖਨਿਯਾ ਸੁਟ੍ਠੁ ਵਿਲਿਖਿਤਂ. ਸੁਵਿਤਚ੍ਛਿਤਨ੍ਤਿ ਕੋਚ੍ਛੇਨ ਸੁਟ੍ਠੁ ਵਿਤਚ੍ਛਿਤਂ, ਸੁਨਿਦ੍ਧੋਤਨ੍ਤਿ ਅਤ੍ਥੋ. ਪਟਿਬਦ੍ਧਨ੍ਤਿ ਵੇਕਲ੍ਲਂ. ਤਨ੍ਤੇਤਿ ਤਨ੍ਤੇ ਦੀਘਤੋ ਪਸਾਰਣੇਯੇਵ ਉਪਨੇਤ੍ਵਾਤਿ ਅਤ੍ਥੋ.

੬੪੨. ਤਤ੍ਰ ਚੇ ਸੋ ਭਿਕ੍ਖੂਤਿ ਯਤ੍ਰ ਗਾਮੇ ਵਾ ਨਿਗਮੇ ਵਾ ਤੇ ਤਨ੍ਤਵਾਯਾ ਤਤ੍ਰ. ਵਿਕਪ੍ਪਂ ਆਪਜ੍ਜੇਯ੍ਯਾਤਿ ਵਿਸਿਟ੍ਠਂ ਕਪ੍ਪਂ ਅਧਿਕਵਿਧਾਨਂ ਆਪਜ੍ਜੇਯ੍ਯ. ਪਾਲ਼ਿਯਂ ਪਨ ਯੇਨਾਕਾਰੇਨ ਵਿਕਪ੍ਪਂ ਆਪਨ੍ਨੋ ਹੋਤਿ, ਤਂ ਦਸ੍ਸੇਤੁਂ ‘‘ਇਦਂ ਖੋ, ਆਵੁਸੋ’’ਤਿਆਦਿ ਵੁਤ੍ਤਂ.

ਧਮ੍ਮਮ੍ਪਿ ਭਣਤੀਤਿ ਧਮ੍ਮਕਥਮ੍ਪਿ ਕਥੇਤਿ, ‘‘ਤਸ੍ਸ ਵਚਨੇਨ ਆਯਤਂ ਵਾ ਵਿਤ੍ਥਤਂ ਵਾ ਅਪ੍ਪਿਤਂ ਵਾ’’ਤਿ ਸੁਤ੍ਤਵਡ੍ਢਨਆਕਾਰਮੇਵ ਦਸ੍ਸੇਤਿ.

ਪੁਬ੍ਬੇ ਅਪ੍ਪਵਾਰਿਤੋਤਿ ਚੀਵਰਸਾਮਿਕੇਹਿ ਪੁਬ੍ਬੇ ਅਪ੍ਪਵਾਰਿਤੋ ਹੁਤ੍ਵਾ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਛਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ,

ਤਿਚਿਤ੍ਤਂ, ਤਿਵੇਦਨਨ੍ਤਿ.

ਮਹਾਪੇਸਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਅਚ੍ਚੇਕਚੀਵਰਸਿਕ੍ਖਾਪਦਵਣ੍ਣਨਾ

੬੪੬-੯. ਤੇਨ ਸਮਯੇਨਾਤਿ ਅਚ੍ਚੇਕਚੀਵਰਸਿਕ੍ਖਾਪਦਂ. ਤਤ੍ਥ ਦਸਾਹਾਨਾਗਤਨ੍ਤਿ ਦਸ ਅਹਾਨਿ ਦਸਾਹਂ, ਤੇਨ ਦਸਾਹੇਨ ਅਨਾਗਤਾ ਦਸਾਹਾਨਾਗਤਾ, ਦਸਾਹੇਨ ਅਸਮ੍ਪਤ੍ਤਾਤਿ ਅਤ੍ਥੋ, ਤਂ ਦਸਾਹਾਨਾਗਤਂ, ਅਚ੍ਚਨ੍ਤਸਂਯੋਗਵਸੇਨ ਭੁਮ੍ਮਤ੍ਥੇ ਉਪਯੋਗਵਚਨਂ, ਤੇਨੇਵਸ੍ਸ ਪਦਭਾਜਨੇ ‘‘ਦਸਾਹਾਨਾਗਤਾਯਾ’’ਤਿ ਵੁਤ੍ਤਂ. ਪਵਾਰਣਾਯਾਤਿ ਇਦਂ ਪਨ ਯਾ ਸਾ ਦਸਾਹਾਨਾਗਤਾਤਿ ਵੁਤ੍ਤਾ, ਤਂ ਸਰੂਪਤੋ ਦਸ੍ਸੇਤੁਂ ਅਸਮ੍ਮੋਹਤ੍ਥਂ ਅਨੁਪਯੋਗਵਚਨਂ.

ਕਤ੍ਤਿਕਤੇਮਾਸਿਕਪੁਣ੍ਣਮਨ੍ਤਿ ਪਠਮਕਤ੍ਤਿਕਤੇਮਾਸਿਕਪੁਣ੍ਣਮਂ. ਇਧਾਪਿ ਪਠਮਪਦਸ੍ਸ ਅਨੁਪਯੋਗਤ੍ਤਾ ਪੁਰਿਮਨਯੇਨੇਵ ਭੁਮ੍ਮਤ੍ਥੇ ਉਪਯੋਗਵਚਨਂ. ਇਦਂ ਵੁਤ੍ਤਂ ਹੋਤਿ – ‘‘‘ਯਤੋ ਪਟ੍ਠਾਯ ਪਠਮਮਹਾਪਵਾਰਣਾ ਦਸਾਹਾਨਾਗਤਾ’ਤਿ ਵੁਚ੍ਚਤਿ, ਸਚੇਪਿ ਤਾਨਿ ਦਿਵਸਾਨਿ ਅਚ੍ਚਨ੍ਤਮੇਵ ਭਿਕ੍ਖੁਨੋ ਅਚ੍ਚੇਕਚੀਵਰਂ ਉਪ੍ਪਜ੍ਜੇਯ੍ਯ, ‘ਅਚ੍ਚੇਕਂ ਇਦ’ਨ੍ਤਿ ਜਾਨਮਾਨੇਨ ਭਿਕ੍ਖੁਨਾ ਸਬ੍ਬਮ੍ਪਿ ਪਟਿਗ੍ਗਹੇਤਬ੍ਬ’’ਨ੍ਤਿ. ਤੇਨ ਪਵਾਰਣਾਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਿਤੋ ਪਠਾਯ ਉਪ੍ਪਨ੍ਨਸ੍ਸ ਚੀਵਰਸ੍ਸ ਨਿਧਾਨਕਾਲੋ ਦਸ੍ਸਿਤੋ ਹੋਤਿ. ਕਾਮਞ੍ਚੇਸ ‘‘ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬ’’ਨ੍ਤਿ ਇਮਿਨਾਵ ਸਿਦ੍ਧੋ, ਅਤ੍ਥੁਪ੍ਪਤ੍ਤਿਵਸੇਨ ਪਨ ਅਪੁਬ੍ਬਂ ਵਿਯ ਅਤ੍ਥਂ ਦਸ੍ਸੇਤ੍ਵਾ ਸਿਕ੍ਖਾਪਦਂ ਠਪਿਤਂ.

ਅਚ੍ਚੇਕਚੀਵਰਨ੍ਤਿ ਅਚ੍ਚਾਯਿਕਚੀਵਰਂ ਵੁਚ੍ਚਤਿ, ਤਸ੍ਸ ਪਨ ਅਚ੍ਚਾਯਿਕਭਾਵਂ ਦਸ੍ਸੇਤੁਂ ‘‘ਸੇਨਾਯ ਵਾ ਗਨ੍ਤੁਕਾਮੋ ਹੋਤੀ’’ਤਿਆਦਿ ਵੁਤ੍ਤਂ. ਤਤ੍ਥ ਸਦ੍ਧਾਤਿ ਇਮਿਨਾ ਸਦ੍ਧਾਮਤ੍ਤਕਮੇਵ ਦਸ੍ਸਿਤਂ. ਪਸਾਦੋਤਿ ਇਮਿਨਾ ਸੁਪ੍ਪਸਨ੍ਨਾ ਬਲਵਸਦ੍ਧਾ. ਏਤਂ ਅਚ੍ਚੇਕਚੀਵਰਂ ਨਾਮਾਤਿ ਏਤਂ ਇਮੇਹਿ ਕਾਰਣੇਹਿ ਦਾਤੁਕਾਮੇਨ ਦੂਤਂ ਵਾ ਪੇਸੇਤ੍ਵਾ ਸਯਂ ਵਾ ਆਗਨ੍ਤ੍ਵਾ ‘‘ਵਸ੍ਸਾਵਾਸਿਕਂ ਦਸ੍ਸਾਮੀ’’ਤਿ ਏਵਂ ਆਰੋਚਿਤਂ ਚੀਵਰਂ ਅਚ੍ਚੇਕਚੀਵਰਂ ਨਾਮ ਹੋਤੀ. ਛਟ੍ਠਿਤੋ ਪਟ੍ਠਾਯ ਪਨ ਉਪ੍ਪਨ੍ਨਂ ਅਨਚ੍ਚੇਕਚੀਵਰਮ੍ਪਿ ਪਚ੍ਚੁਦ੍ਧਰਿਤ੍ਵਾ ਠਪਿਤਚੀਵਰਮ੍ਪਿ ਏਤਂ ਪਰਿਹਾਰਂ ਲਭਤਿਯੇਵ.

ਸਞ੍ਞਾਣਂ ਕਤ੍ਵਾ ਨਿਕ੍ਖਿਪਿਤਬ੍ਬਨ੍ਤਿ ਕਿਞ੍ਚਿ ਨਿਮਿਤ੍ਤਂ ਕਤ੍ਵਾ ਠਪੇਤਬ੍ਬਂ. ਕਸ੍ਮਾ ਏਤਂ ਵੁਤ੍ਤਂ? ਯਦਿ ਹਿ ਤਂ ਪੁਰੇ ਪਵਾਰਣਾਯ ਵਿਭਜਨ੍ਤਿ. ਯੇਨ ਗਹਿਤਂ, ਤੇਨ ਛਿਨ੍ਨਵਸ੍ਸੇਨ ਨ ਭਵਿਤਬ੍ਬਂ. ਸਚੇ ਪਨ ਹੋਤਿ, ਤਂ ਚੀਵਰਂ ਸਙ੍ਘਿਕਮੇਵ ਹੋਤਿ. ਤਤੋ ਸਲ੍ਲਕ੍ਖੇਤ੍ਵਾ ਸੁਖਂ ਦਾਤੁਂ ਭਵਿਸ੍ਸਤੀਤਿ.

੬੫੦. ਅਚ੍ਚੇਕਚੀਵਰੇ ਅਚ੍ਚੇਕਚੀਵਰਸਞ੍ਞੀਤਿ ਏਵਮਾਦਿ ਵਿਭਜਿਤ੍ਵਾ ਗਹਿਤਮੇਵ ਸਨ੍ਧਾਯ ਵੁਤ੍ਤਂ. ਸਚੇ ਪਨ ਅਵਿਭਤ੍ਤਂ ਹੋਤਿ, ਸਙ੍ਘਸ੍ਸ ਵਾ ਭਣ੍ਡਾਗਾਰੇ, ਚੀਵਰਸਮਯਾਤਿਕ੍ਕਮੇਪਿ ਅਨਾਪਤ੍ਤਿ. ਇਤਿ ਅਤਿਰੇਕਚੀਵਰਸ੍ਸ ਦਸਾਹਂ ਪਰਿਹਾਰੋ. ਅਕਤਸ੍ਸ ਵਸ੍ਸਿਕਸਾਟਿਕਚੀਵਰਸ੍ਸ ਅਨਤ੍ਥਤੇ ਕਥਿਨੇ ਪਞ੍ਚ ਮਾਸਾ, ਵਸ੍ਸੇ ਉਕ੍ਕਡ੍ਢਿਤੇ ਛ ਮਾਸਾ, ਅਤ੍ਥਤੇ ਕਥਿਨੇ ਅਪਰੇ ਚਤ੍ਤਾਰੋ ਮਾਸਾ. ਹੇਮਨ੍ਤਸ੍ਸ ਪਚ੍ਛਿਮੇ ਦਿਵਸੇ ਮੂਲਚੀਵਰਾਧਿਟ੍ਠਾਨਵਸੇਨ ਅਪਰੋਪਿ ਏਕੋ ਮਾਸੋਤਿ ਏਕਾਦਸ ਮਾਸਾ ਪਰਿਹਾਰੋ. ਸਤਿਯਾ ਪਚ੍ਚਾਸਾਯ ਮੂਲਚੀਵਰਸ੍ਸ ਏਕੋ ਮਾਸੋ, ਅਚ੍ਚੇਕਚੀਵਰਸ੍ਸ ਅਨਤ੍ਥਤੇ ਕਥਿਨੇ ਏਕਾਦਸਦਿਵਸਾਧਿਕੋ ਮਾਸੋ, ਅਤ੍ਥਤੇ ਕਥਿਨੇ ਏਕਾਦਸਦਿਵਸਾਧਿਕਾ ਪਞ੍ਚ ਮਾਸਾ, ਤਤੋ ਪਰਂ ਏਕਦਿਵਸਮ੍ਪਿ ਪਰਿਹਾਰੋ ਨਤ੍ਥੀਤਿ ਵੇਦਿਤਬ੍ਬਂ.

ਅਨਚ੍ਚੇਕਚੀਵਰੇਤਿ ਅਚ੍ਚੇਕਚੀਵਰਸਦਿਸੇ ਅਞ੍ਞਸ੍ਮਿਂ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਕਥਿਨਸਮੁਟ੍ਠਾਨਂ – ਅਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਅਚ੍ਚੇਕਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਸਾਸਙ੍ਕਸਿਕ੍ਖਾਪਦਵਣ੍ਣਨਾ

੬੫੨. ਤੇਨ ਸਮਯੇਨਾਤਿ ਸਾਸਙ੍ਕਸਿਕ੍ਖਾਪਦਂ. ਤਤ੍ਥ ਵੁਤ੍ਥਵਸ੍ਸਾ ਆਰਞ੍ਞਕੇਸੂਤਿ ਤੇ ਪੁਬ੍ਬੇਪਿ ਅਰਞ੍ਞੇਯੇਵ ਵਿਹਰਿਂਸੁ. ਦੁਬ੍ਬਲਚੀਵਰਤ੍ਤਾ ਪਨ ਪਚ੍ਚਯਵਸੇਨ ਗਾਮਨ੍ਤਸੇਨਾਸਨੇ ਵਸ੍ਸਂ ਵਸਿਤ੍ਵਾ ਨਿਟ੍ਠਿਤਚੀਵਰਾ ਹੁਤ੍ਵਾ ‘‘ਇਦਾਨਿ ਨਿਪ੍ਪਲਿਬੋਧਾ ਸਮਣਧਮ੍ਮਂ ਕਰਿਸ੍ਸਾਮਾ’’ਤਿ ਆਰਞ੍ਞਕੇਸੁ ਸੇਨਾਸਨੇਸੁ ਵਿਹਰਨ੍ਤਿ. ਕਤ੍ਤਿਕਚੋਰਕਾਤਿ ਕਤ੍ਤਿਕਮਾਸੇ ਚੋਰਾ. ਪਰਿਪਾਤੇਨ੍ਤੀਤਿ ਉਪਦ੍ਦਵਨ੍ਤਿ, ਤਤ੍ਥ ਤਤ੍ਥ ਆਧਾਵਿਤ੍ਵਾ ਉਤ੍ਤਾਸੇਨ੍ਤਿ ਪਲਾਪੇਨ੍ਤਿ. ਅਨ੍ਤਰਘਰੇ ਨਿਕ੍ਖਿਪਿਤੁਨ੍ਤਿ ਅਨ੍ਤੋਗਾਮੇ ਨਿਕ੍ਖਿਪਿਤੁਂ. ਭਗਵਾ ਯਸ੍ਮਾ ਪਚ੍ਚਯਾ ਨਾਮ ਧਮ੍ਮੇਨ ਸਮੇਨ ਦੁਲ੍ਲਭਾ, ਸਲ੍ਲੇਖਵਾ ਹਿ ਭਿਕ੍ਖੁ ਮਾਤਰਮ੍ਪਿ ਵਿਞ੍ਞਾਪੇਤੁਂ ਨ ਸਕ੍ਕੋਤਿ. ਤਸ੍ਮਾ ਚੀਵਰਗੁਤ੍ਤਤ੍ਥਂ ਅਨ੍ਤਰਘਰੇ ਨਿਕ੍ਖਿਪਿਤੁਂ ਅਨੁਜਾਨਾਤਿ. ਭਿਕ੍ਖੂਨਂ ਪਨ ਅਨੁਰੂਪਤ੍ਤਾ ਅਰਞ੍ਞਵਾਸਂ ਨ ਪਟਿਕ੍ਖਿਪਿ.

੬੫੩. ਉਪਵਸ੍ਸਂ ਖੋ ਪਨਾਤਿ ਏਤ੍ਥ ਉਪਵਸ੍ਸਨ੍ਤਿ ਉਪਵਸ੍ਸ; ਉਪਵਸਿਤ੍ਵਾਤਿ ਵੁਤ੍ਤਂ ਹੋਤਿ. ਉਪਸਮ੍ਪਜ੍ਜਨ੍ਤਿਆਦੀਸੁ ਵਿਯ ਹਿ ਏਤ੍ਥ ਅਨੁਨਾਸਿਕੋ ਦਟ੍ਠਬ੍ਬੋ. ਵਸ੍ਸਂ ਉਪਗਨ੍ਤ੍ਵਾ ਵਸਿਤ੍ਵਾ ਚਾਤਿ ਅਤ੍ਥੋ. ਇਮਸ੍ਸ ਚ ਪਦਸ੍ਸ ‘‘ਤਥਾਰੂਪੇਸੁ ਭਿਕ੍ਖੁ ਸੇਨਾਸਨੇਸੁ ਵਿਹਰਨ੍ਤੋ’’ਤਿ ਇਮਿਨਾ ਸਮ੍ਬਨ੍ਧੋ. ਕਿਂ ਵੁਤ੍ਤਂ ਹੋਤਿ? ਵਸ੍ਸਂ ਉਪਗਨ੍ਤ੍ਵਾ ਵਸਿਤ੍ਵਾ ਚ ਤਤੋ ਪਰਂ ਪਚ੍ਛਿਮਕਤ੍ਤਿਕਪੁਣ੍ਣਮਪਰਿਯੋਸਾਨਕਾਲਂ ਯਾਨਿ ਖੋ ਪਨ ਤਾਨਿ ਆਰਞ੍ਞਕਾਨਿ ਸੇਨਾਸਨਾਨਿ ਸਾਸਙ੍ਕਸਮ੍ਮਤਾਨਿ ਸਪ੍ਪਟਿਭਯਾਨਿ; ਤਥਾਰੂਪੇਸੁ ਭਿਕ੍ਖੁ ਸੇਨਾਸਨੇਸੁ ਵਿਹਰਨ੍ਤੋ ਆਕਙ੍ਖਮਾਨੋ ਤਿਣ੍ਣਂ ਚੀਵਰਾਨਂ ਅਞ੍ਞਤਰਂ ਚੀਵਰਂ ਅਨ੍ਤਰਘਰੇ ਨਿਕ੍ਖਿਪੇਯ੍ਯਾਤਿ. ਯਸ੍ਮਾ ਪਨ ਯੋ ਵਸ੍ਸਂ ਉਪਗਨ੍ਤ੍ਵਾ ਯਾਵ ਪਠਮਕਤ੍ਤਿਕਪੁਣ੍ਣਮਂ ਵਸਤਿ, ਸੋ ਵੁਟ੍ਠਵਸ੍ਸਾਨਂ ਅਬ੍ਭਨ੍ਤਰੋ ਹੋਤਿ, ਤਸ੍ਮਾ ਇਦਂ ਅਤਿਗਹਨਂ ਬ੍ਯਞ੍ਜਨਵਿਚਾਰਣਂ ਅਕਤ੍ਵਾ ਪਦਭਾਜਨੇ ਕੇਵਲਂ ਚੀਵਰਨਿਕ੍ਖੇਪਾਰਹਂ ਪੁਗ੍ਗਲਂ ਦਸ੍ਸੇਤੁਂ ‘‘ਵੁਟ੍ਠਵਸ੍ਸਾਨ’’ਨ੍ਤਿ ਵੁਤ੍ਤਂ. ਤਸ੍ਸਾਪਿ ‘‘ਭਿਕ੍ਖੁ ਸੇਨਾਸਨੇਸੁ ਵਿਹਰਨ੍ਤੋ’’ਤਿ ਇਮਿਨਾ ਸਮ੍ਬਨ੍ਧੋ. ਅਯਞ੍ਹਿ ਏਤ੍ਥ ਅਤ੍ਥੋ ‘‘ਵੁਟ੍ਠਵਸ੍ਸਾਨਂ ਭਿਕ੍ਖੁ ਸੇਨਾਸਨੇਸੁ ਵਿਹਰਨ੍ਤੋ’’ਤਿ ਏਵਰੂਪਾਨਂ ਭਿਕ੍ਖੂਨਂ ਅਬ੍ਭਨ੍ਤਰੇ ਯੋ ਕੋਚਿ ਭਿਕ੍ਖੂਤਿ ਵੁਤ੍ਤਂ ਹੋਤਿ.

ਅਰਞ੍ਞਲਕ੍ਖਣਂ ਅਦਿਨ੍ਨਾਦਾਨਵਣ੍ਣਨਾਯਂ ਵੁਤ੍ਤਂ. ਅਯਂ ਪਨ ਵਿਸੇਸੋ – ਸਚੇ ਵਿਹਾਰੋ ਪਰਿਕ੍ਖਿਤ੍ਤੋ ਹੋਤਿ, ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਇਨ੍ਦਖੀਲਤੋ ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨਤੋ ਪਟ੍ਠਾਯ ਯਾਵ ਵਿਹਾਰਪਰਿਕ੍ਖੇਪਾ ਮਿਨਿਤਬ੍ਬਂ. ਸਚੇ ਵਿਹਾਰੋ ਅਪਰਿਕ੍ਖਿਤ੍ਤੋ ਹੋਤਿ, ਯਂ ਸਬ੍ਬਪਠਮਂ ਸੇਨਾਸਨਂ ਵਾ ਭਤ੍ਤਸਾਲਾ ਵਾ ਧੁਵਸਨ੍ਨਿਪਾਤਟ੍ਠਾਨਂ ਵਾ ਬੋਧਿਵਾ ਚੇਤਿਯਂ ਵਾ ਦੂਰੇ ਚੇਪਿ ਸੇਨਾਸਨਤੋ ਹੋਤਿ, ਤਂ ਪਰਿਚ੍ਛੇਦਂ ਕਤ੍ਵਾ ਮਿਨਿਤਬ੍ਬਂ. ਸਚੇਪਿ ਆਸਨ੍ਨੇ ਗਾਮੋ ਹੋਤਿ, ਵਿਹਾਰੇ ਠਿਤੇਹਿ ਘਰਮਾਨੁਸਕਾਨਂ ਸਦ੍ਦੋ ਸੂਯਤਿ, ਪਬ੍ਬਤਨਦੀਆਦੀਹਿ ਪਨ ਅਨ੍ਤਰਿਤਤ੍ਤਾ ਨ ਸਕ੍ਕਾ ਉਜੁਂ ਗਨ੍ਤੁਂ, ਯੋ ਚਸ੍ਸ ਪਕਤਿਮਗ੍ਗੋ ਹੋਤਿ, ਸਚੇਪਿ ਨਾਵਾਯ ਸਞ੍ਚਰਿਤਬ੍ਬੋ, ਤੇਨ ਮਗ੍ਗੇਨ ਗਾਮਤੋ ਪਞ੍ਚਧਨੁਸਤਿਕਂ ਗਹੇਤਬ੍ਬਂ. ਯੋ ਆਸਨ੍ਨਗਾਮਸ੍ਸ ਅਙ੍ਗਸਮ੍ਪਾਦਨਤ੍ਥਂ ਤਤੋ ਤਤੋ ਮਗ੍ਗਂ ਪਿਦਹਤਿ, ਅਯਂ ‘‘ਧੁਤਙ੍ਗਚੋਰੋ’’ਤਿ ਵੇਦਿਤਬ੍ਬੋ.

ਸਾਸਙ੍ਕਸਮ੍ਮਤਾਨੀਤਿ ‘‘ਸਾਸਙ੍ਕਾਨੀ’’ਤਿ ਸਮ੍ਮਤਾਨਿ; ਏਵਂ ਸਞ੍ਞਾਤਾਨੀਤਿ ਅਤ੍ਥੋ. ਪਦਭਾਜਨੇ ਪਨ ਯੇਨ ਕਾਰਣੇਨ ਤਾਨਿ ਸਾਸਙ੍ਕਸਮ੍ਮਤਾਨਿ, ਤਂ ਦਸ੍ਸੇਤੁਂ ‘‘ਆਰਾਮੇ ਆਰਾਮੂਪਚਾਰੇ’’ਤਿਆਦਿ ਵੁਤ੍ਤਂ.

ਸਹ ਪਟਿਭਯੇਨ ਸਪ੍ਪਟਿਭਯਾਨਿ, ਸਨ੍ਨਿਹਿਤਬਲਵਭਯਾਨੀਤਿ ਅਤ੍ਥੋ. ਪਦਭਾਜਨੇ ਪਨ ਯੇਨ ਕਾਰਣੇਨ ਤਾਨਿ ਸਪ੍ਪਟਿਭਯਾਨਿ; ਤਂ ਦਸ੍ਸੇਤੁਂ ‘‘ਆਰਾਮੇ ਆਰਾਮੂਪਚਾਰੇ’’ਤਿਆਦਿ ਵੁਤ੍ਤਂ.

ਸਮਨ੍ਤਾ ਗੋਚਰਗਾਮੇ ਨਿਕ੍ਖਿਪੇਯ੍ਯਾਤਿ ਆਰਞ੍ਞਕਸ੍ਸ ਸੇਨਾਸਨਸ੍ਸ ਸਮਨ੍ਤਾ ਸਬ੍ਬਦਿਸਾਭਾਗੇਸੁ ਅਤ੍ਤਨਾ ਅਭਿਰੁਚਿਤੇ ਗੋਚਰਗਾਮੇ ਸਤਿਯਾ ਅਙ੍ਗਸਮ੍ਪਤ੍ਤਿਯਾ ਨਿਕ੍ਖਿਪੇਯ੍ਯ.

ਤਤ੍ਰਾਯਂ ਅਙ੍ਗਸਮ੍ਪਤ੍ਤਿ – ਪੁਰਿਮਿਕਾਯ ਉਪਗਨ੍ਤ੍ਵਾ ਮਹਾਪਵਾਰਣਾਯ ਪਵਾਰਿਤੋ ਹੋਤਿ, ਇਦਮੇਕਂ ਅਙ੍ਗਂ. ਸਚੇ ਪਚ੍ਛਿਮਿਕਾਯ ਵਾ ਉਪਗਤੋ ਹੋਤਿ ਛਿਨ੍ਨਵਸ੍ਸੋ ਵਾ, ਨਿਕ੍ਖਿਪਿਤੁਂ ਨ ਲਭਤਿ. ਕਤ੍ਤਿਕਮਾਸੋਯੇਵ ਹੋਤਿ, ਇਦਂ ਦੁਤਿਯਂ ਅਙ੍ਗਂ. ਕਤ੍ਤਿਕਮਾਸਤੋ ਪਰਂ ਨ ਲਭਤਿ, ਪਞ੍ਚਧਨੁਸਤਿਕਂ ਪਚ੍ਛਿਮਮੇਵ ਪਮਾਣਯੁਤ੍ਤਂ ਸੇਨਾਸਨਂ ਹੋਤਿ, ਇਦਂ ਤਤਿਯਂ ਅਙ੍ਗਂ. ਊਨਪ੍ਪਮਾਣੇ ਵਾ ਗਾਵੁਤਤੋ ਅਤਿਰੇਕਪ੍ਪਮਾਣੇ ਵਾ ਨ ਲਭਤਿ, ਯਤ੍ਰ ਹਿ ਪਿਣ੍ਡਾਯ ਚਰਿਤ੍ਵਾ ਪੁਨ ਵਿਹਾਰਂ ਭਤ੍ਤਵੇਲਾਯਂ ਸਕ੍ਕਾ ਆਗਨ੍ਤੁਂ, ਤਦੇਵ ਇਧ ਅਧਿਪ੍ਪੇਤਂ. ਨਿਮਨ੍ਤਿਤੋ ਪਨ ਅਦ੍ਧਯੋਜਨਮ੍ਪਿ ਯੋਜਨਮ੍ਪਿ ਗਨ੍ਤ੍ਵਾ ਵਸਿਤੁਂ ਪਚ੍ਚੇਤਿ, ਇਦਮਪ੍ਪਮਾਣਂ. ਸਾਸਙ੍ਕਸਪ੍ਪਟਿਭਯਮੇਵ ਹੋਤਿ, ਇਦਂ ਚਤੁਤ੍ਥਂ ਅਙ੍ਗਂ. ਅਨਾਸਙ੍ਕਅਪ੍ਪਟਿਭਯੇ ਹਿ ਅਙ੍ਗਯੁਤ੍ਤੇਪਿ ਸੇਨਾਸਨੇ ਵਸਨ੍ਤੋ ਨਿਕ੍ਖਿਪਿਤੁਂ ਨ ਲਭਤੀਤਿ.

ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾਤਿ ਯਾ ਉਦੋਸਿਤਸਿਕ੍ਖਾਪਦੇ ਕੋਸਮ੍ਬਕਸਮ੍ਮੁਤਿ (ਪਾਰਾ. ੪੭੫) ਅਨੁਞ੍ਞਾਤਾ ਤਸ੍ਸਾ ਸਮ੍ਮੁਤਿਯਾ ਅਞ੍ਞਤ੍ਰ; ਸਚੇ ਸਾ ਲਦ੍ਧਾ ਹੋਤਿ, ਛਾਰਤ੍ਤਾਤਿਰੇਕਮ੍ਪਿ ਵਿਪ੍ਪਵਸਿਤੁਂ ਵਟ੍ਟਤਿ.

ਪੁਨ ਗਾਮਸੀਮਂ ਓਕ੍ਕਮਿਤ੍ਵਾਤਿ ਸਚੇ ਗੋਚਰਗਾਮਤੋ ਪੁਰਤ੍ਥਿਮਾਯ ਦਿਸਾਯ ਸੇਨਾਸਨਂ; ਅਯਞ੍ਚ ਪਚ੍ਛਿਮਦਿਸਂ ਗਤੋ ਹੋਤਿ, ਸੇਨਾਸਨਂ ਆਗਨ੍ਤ੍ਵਾ ਸਤ੍ਤਮਂ ਅਰੁਣਂ ਉਟ੍ਠਾਪੇਤੁਂ ਅਸਕ੍ਕੋਨ੍ਤੇਨ ਗਾਮਸੀਮਮ੍ਪਿ ਓਕ੍ਕਮਿਤ੍ਵਾ ਸਭਾਯਂ ਵਾ ਯਤ੍ਥ ਕਤ੍ਥਚਿ ਵਾ ਵਸਿਤ੍ਵਾ ਚੀਵਰਪ੍ਪਵਤ੍ਤਿਂ ਞਤ੍ਵਾ ਪਕ੍ਕਮਿਤੁਂ ਵਟ੍ਟਤੀਤਿ ਅਤ੍ਥੋ. ਏਵਂ ਅਸਕ੍ਕੋਨ੍ਤੇਨ ਤਤ੍ਥੇਵ ਠਿਤੇਨ ਪਚ੍ਚੁਦ੍ਧਰਿਤਬ੍ਬਂ, ਅਤਿਰੇਕਚੀਵਰਟ੍ਠਾਨੇ ਠਸ੍ਸਤੀਤਿ. ਸੇਸਂ ਉਤ੍ਤਾਨਮੇਵ.

ਕਥਿਨਸਮੁਟ੍ਠਾਨਂ – ਕਾਯਵਾਚਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਅਕਿਰਿਯਾ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਸਾਸਙ੍ਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਪਰਿਣਤਸਿਕ੍ਖਾਪਦਵਣ੍ਣਨਾ

੬੫੭. ਤੇਨ ਸਮਯੇਨਾਤਿ ਪਰਿਣਤਸਿਕ੍ਖਾਪਦਂ. ਤਤ੍ਥ ਪੂਗਸ੍ਸਾਤਿ ਸਮੂਹਸ੍ਸ; ਧਮ੍ਮਗਣਸ੍ਸਾਤਿ ਅਤ੍ਥੋ. ਪਟਿਯਤ੍ਤਨ੍ਤਿ ਪਟਿਯਾਦਿਤਂ. ਬਹੂ ਸਙ੍ਘਸ੍ਸ ਭਤ੍ਤਾਤਿ ਸਙ੍ਘਸ੍ਸ ਬਹੂਨਿ ਭਤ੍ਤਾਨਿ ਅਨੇਕਾਨਿ ਲਾਭਮੁਖਾਨਿ; ਨ ਸਙ੍ਘਸ੍ਸ ਕੇਨਚਿ ਪਰਿਹਾਨੀਤਿ ਦੀਪੇਨ੍ਤਿ. ਓਣੋਜੇਥਾਤਿ ਦੇਥ. ਕਿਂ ਪਨੇਵਂ ਵਤ੍ਤੁਂ ਵਟ੍ਟਤੀਤਿ ਕਸ੍ਮਾ ਨ ਵਟ੍ਟਤਿ? ਅਯਞ੍ਹਿ ਅਭਿਹਟਭਿਕ੍ਖਾ ਅਭਿਹਰਿਤ੍ਵਾ ਏਕਸ੍ਮਿਂ ਓਕਾਸੇ ਸਙ੍ਘਸ੍ਸਤ੍ਥਾਯ ਪਟਿਯਤ੍ਤਾ ਅਭਿਹਟਪਟਿਯਤ੍ਤੇ ਚ ਉਦ੍ਦਿਸ੍ਸ ਠਪਿਤਭਾਗੇ ਚ ਪਯੁਤ੍ਤਵਾਚਾ ਨਾਮ ਨਤ੍ਥਿ.

੬੫੮. ਸਙ੍ਘਿਕਨ੍ਤਿ ਸਙ੍ਘਸ੍ਸ ਸਨ੍ਤਕਂ. ਸੋ ਹਿ ਸਙ੍ਘਸ੍ਸ ਪਰਿਣਤਤ੍ਤਾ ਹਤ੍ਥਂ ਅਨਾਰੂਲ਼੍ਹੋਪਿ ਏਕੇਨ ਪਰਿਯਾਯੇਨ ਸਙ੍ਘਸ੍ਸ ਸਨ੍ਤਕੋ ਹੋਤਿ, ਪਦਭਾਜਨੇ ਪਨ ‘‘ਸਙ੍ਘਿਕਂ ਨਾਮ ਸਙ੍ਘਸ੍ਸ ਦਿਨ੍ਨਂ ਹੋਤਿ ਪਰਿਚ੍ਚਤ੍ਤ’’ਨ੍ਤਿ ਏਵਂ ਅਤ੍ਥੁਦ੍ਧਾਰਵਸੇਨ ਨਿਪ੍ਪਰਿਯਾਯਤੋਵ ਸਙ੍ਘਿਕਂ ਦਸ੍ਸਿਤਂ. ਲਾਭਨ੍ਤਿ ਪਟਿਲਭਿਤਬ੍ਬਵਤ੍ਥੁਂ ਆਹ. ਤੇਨੇਵਸ੍ਸ ਨਿਦ੍ਦੇਸੇ ‘‘ਚੀਵਰਮ੍ਪੀ’’ਤਿਆਦਿ ਵੁਤ੍ਤਂ. ਪਰਿਣਤਨ੍ਤਿ ਸਙ੍ਘਸ੍ਸ ਨਿਨ੍ਨਂ ਸਙ੍ਘਸ੍ਸ ਪੋਣਂ ਸਙ੍ਘਸ੍ਸ ਪਬ੍ਭਾਰਂ ਹੁਤ੍ਵਾ ਠਿਤਂ. ਯੇਨ ਪਨ ਕਾਰਣੇਨ ਸੋ ਪਰਿਣਤੋ ਹੋਤਿ, ਤਂ ਦਸ੍ਸੇਤੁਂ ‘‘ਦਸ੍ਸਾਮ ਕਰਿਸ੍ਸਾਮਾਤਿ ਵਾਚਾ ਭਿਨ੍ਨਾ ਹੋਤੀ’’ਤਿ ਪਦਭਾਜਨਂ ਵੁਤ੍ਤਂ.

੬੫੯. ਪਯੋਗੇ ਦੁਕ੍ਕਟਨ੍ਤਿ ਪਰਿਣਤਲਾਭਸ੍ਸ ਅਤ੍ਤਨੋ ਪਰਿਣਾਮਨਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਤਸ੍ਮਿਂ ਹਤ੍ਥਂ ਆਰੂਲ਼੍ਹੇ ਨਿਸ੍ਸਗ੍ਗਿਯਂ. ਸਚੇ ਪਨ ਸਙ੍ਘਸ੍ਸ ਦਿਨ੍ਨਂ ਹੋਤਿ, ਤਂ ਗਹੇਤੁਂ ਨ ਵਟ੍ਟਤਿ, ਸਙ੍ਘਸ੍ਸੇਵ ਦਾਤਬ੍ਬਂ. ਯੋਪਿ ਆਰਾਮਿਕੇਹਿ ਸਦ੍ਧਿਂ ਏਕਤੋ ਖਾਦਤਿ, ਭਣ੍ਡਂ ਅਗ੍ਘਾਪੇਤ੍ਵਾ ਕਾਰੇਤਬ੍ਬੋ. ਪਰਿਣਤਂ ਪਨ ਸਹਧਮ੍ਮਿਕਾਨਂ ਵਾ ਗਿਹੀਨਂ ਵਾ ਅਨ੍ਤਮਸੋ ਮਾਤੁਸਨ੍ਤਕਮ੍ਪਿ ‘‘ਇਦਂ ਮਯ੍ਹਂ ਦੇਹੀ’’ਤਿ ਸਙ੍ਘਸ੍ਸ ਪਰਿਣਤਭਾਵਂ ਞਤ੍ਵਾ ਅਤ੍ਤਨੋ ਪਰਿਣਾਮੇਤ੍ਵਾ ਗਣ੍ਹਨ੍ਤਸ੍ਸ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ‘‘ਇਮਸ੍ਸ ਭਿਕ੍ਖੁਨੋ ਦੇਹੀ’’ਤਿ ਏਵਂ ਅਞ੍ਞਸ੍ਸ ਪਰਿਣਾਮੇਨ੍ਤਸ੍ਸ ਸੁਦ੍ਧਿਕਪਾਚਿਤ੍ਤਿਯਂ. ਏਕਂ ਪਤ੍ਤਂ ਵਾ ਚੀਵਰਂ ਵਾ ਅਤ੍ਤਨੋ, ਏਕਂ ਅਞ੍ਞਸ੍ਸ ਪਰਿਣਾਮੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਞ੍ਚੇਵ ਸੁਦ੍ਧਿਕਪਾਚਿਤ੍ਤਿਯਞ੍ਚ. ਏਸੇਵ ਨਯੋ ਬਹੂਸੁ. ਵੁਤ੍ਤਮ੍ਪਿ ਚੇਤਂ –

‘‘ਨਿਸ੍ਸਗ੍ਗਿਯੇਨ ਆਪਤ੍ਤਿਂ, ਸੁਦ੍ਧਿਕੇਨ ਪਾਚਿਤ੍ਤਿਯਂ;

ਆਪਜ੍ਜੇਯ੍ਯ ਏਕਤੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੮੦);

ਅਯਞ੍ਹਿ ਪਰਿਣਾਮਨਂ ਸਨ੍ਧਾਯ ਵੁਤ੍ਤੋ. ਯੋਪਿ ਵਸ੍ਸਿਕਸਾਟਿਕਸਮਯੇ ਮਾਤੁਘਰੇਪਿ ਸਙ੍ਘਸ੍ਸ ਪਰਿਣਤਂ ਵਸ੍ਸਿਕਸਾਟਿਕਂ ਞਤ੍ਵਾ ਅਤ੍ਤਨੋ ਪਰਿਣਾਮੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਪਰਸ੍ਸ ਪਰਿਣਾਮੇਤਿ, ਸੁਦ੍ਧਿਕਪਾਚਿਤ੍ਤਿਯਂ. ਮਨੁਸ੍ਸਾ ‘‘ਸਙ੍ਘਭਤ੍ਤਂ ਕਰਿਸ੍ਸਾਮਾ’’ਤਿ ਸਪ੍ਪਿਤੇਲਾਦੀਨਿ ਆਹਰਨ੍ਤਿ, ਗਿਲਾਨੋ ਚੇਪਿ ਭਿਕ੍ਖੁ ਸਙ੍ਘਸ੍ਸ ਪਰਿਣਤਭਾਵਂ ਞਤ੍ਵਾ ਕਿਞ੍ਚਿ ਯਾਚਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਮੇਵ. ਸਚੇ ਪਨ ਸੋ ‘‘ਤੁਮ੍ਹਾਕਂ ਸਪ੍ਪਿਆਦੀਨਿ ਆਭਟਾਨਿ ਅਤ੍ਥੀ’’ਤਿ ਪੁਚ੍ਛਿਤ੍ਵਾ ‘‘ਆਮ, ਅਤ੍ਥੀ’’ਤਿ ਵੁਤ੍ਤੇ ‘‘ਮਯ੍ਹਮ੍ਪਿ ਦੇਥਾ’’ਤਿ ਵਦਤਿ, ਵਟ੍ਟਤਿ. ਅਥਾਪਿ ਨਂ ਕੁਕ੍ਕੁਚ੍ਚਾਯਨ੍ਤਂ ਉਪਾਸਕਾ ਵਦਨ੍ਤਿ – ‘‘ਸਙ੍ਘੋਪਿ ਅਮ੍ਹੇਹਿ ਦਿਨ੍ਨਮੇਵ ਲਭਤਿ; ਗਣ੍ਹਥ, ਭਨ੍ਤੇ’’ਤਿ ਏਵਮ੍ਪਿ ਵਟ੍ਟਤਿ.

੬੬੦. ਸਙ੍ਘਸ੍ਸ ਪਰਿਣਤਂ ਅਞ੍ਞਸਙ੍ਘਸ੍ਸਾਤਿ ਏਕਸ੍ਮਿਂ ਵਿਹਾਰੇ ਸਙ੍ਘਸ੍ਸ ਪਰਿਣਤਂ ਅਞ੍ਞਂ ਵਿਹਾਰਂ ਉਦ੍ਦਿਸਿਤ੍ਵਾ ‘‘ਅਸੁਕਸ੍ਮਿਂ ਨਾਮ ਮਹਾਵਿਹਾਰੇ ਸਙ੍ਘਸ੍ਸ ਦੇਥਾ’’ਤਿ ਪਰਿਣਾਮੇਤਿ.

ਚੇਤਿਯਸ੍ਸ ਵਾਤਿ ‘‘ਕਿਂ ਸਙ੍ਘਸ੍ਸ ਦਿਨ੍ਨੇਨ, ਚੇਤਿਯਸ੍ਸਪੂਜਂ ਕਰੋਥਾ’’ਤਿ ਏਵਂ ਚੇਤਿਯਸ੍ਸ ਵਾ ਪਰਿਣਾਮੇਤਿ.

ਚੇਤਿਯਸ੍ਸ ਪਰਿਣਤਨ੍ਤਿ ਏਤ੍ਥ ਨਿਯਮੇਤ੍ਵਾ ਅਞ੍ਞਚੇਤਿਯਸ੍ਸਤ੍ਥਾਯ ਰੋਪਿਤਮਾਲਾਵਚ੍ਛਤੋ ਅਞ੍ਞਚੇਤਿਯਮ੍ਹਿ ਪੁਪ੍ਫਮ੍ਪਿ ਆਰੋਪੇਤੁਂ ਨ ਵਟ੍ਟਤਿ. ਏਕਸ੍ਸ ਚੇਤਿਯਸ੍ਸ ਪਨ ਛਤ੍ਤਂ ਵਾ ਪਟਾਕਂ ਵਾ ਆਰੋਪੇਤ੍ਵਾ ਠਿਤਂ ਦਿਸ੍ਵਾ ਸੇਸਂ ਅਞ੍ਞਸ੍ਸ ਚੇਤਿਯਸ੍ਸ ਦਾਪੇਤੁਂ ਵਟ੍ਟਤਿ.

ਪੁਗ੍ਗਲਸ੍ਸ ਪਰਿਣਤਨ੍ਤਿ ਅਨ੍ਤਮਸੋ ਸੁਨਖਸ੍ਸਾਪਿ ਪਰਿਣਤਂ ‘‘ਇਮਸ੍ਸ ਸੁਨਖਸ੍ਸ ਮਾ ਦੇਹਿ, ਏਤਸ੍ਸ ਦੇਹੀ’’ਤਿ ਏਵਂ ਅਞ੍ਞਪੁਗ੍ਗਲਸ੍ਸ ਪਰਿਣਾਮੇਤਿ, ਦੁਕ੍ਕਟਂ. ਸਚੇ ਪਨ ਦਾਯਕਾ ‘‘ਮਯਂ ਸਙ੍ਘਸ੍ਸ ਭਤ੍ਤਂ ਦਾਤੁਕਾਮਾ, ਚੇਤਿਯਸ੍ਸ ਪੂਜਂ ਕਾਤੁਕਾਮਾ, ਏਕਸ੍ਸ ਭਿਕ੍ਖੁਨੋ ਪਰਿਕ੍ਖਾਰਂ ਦਾਤੁਕਾਮਾ, ਤੁਮ੍ਹਾਕਂ ਰੁਚਿਯਾ ਦਸ੍ਸਾਮ; ਭਣਥ, ਕਤ੍ਥ ਦੇਮਾ’’ਤਿ ਵਦਨ੍ਤਿ. ਏਵਂ ਵੁਤ੍ਤੇ ਤੇਨ ਭਿਕ੍ਖੁਨਾ ‘‘ਯਤ੍ਥ ਇਚ੍ਛਥ, ਤਤ੍ਥ ਦੇਥਾ’’ਤਿ ਵਤ੍ਤਬ੍ਬਾ. ਸਚੇ ਪਨ ਕੇਵਲਂ ‘‘ਕਤ੍ਥ ਦੇਮਾ’’ਤਿ ਪੁਚ੍ਛਨ੍ਤਿ, ਪਾਲ਼ਿਯਂ ਆਗਤਨਯੇਨੇਵ ਵਤ੍ਤਬ੍ਬਂ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.

ਤਿਸਮੁਟ੍ਠਾਨਂ – ਕਾਯਚਿਤ੍ਤਤੋ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.

ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ