੧. ਚੀਵਰਵਗ੍ਗੋ

੧. ਪਠਮਕਥਿਨਸਿਕ੍ਖਾਪਦਵਣ੍ਣਨਾ

ਤਿਂਸ ਨਿਸ੍ਸਗ੍ਗਿਯਾ ਧਮ੍ਮਾ, ਯੇ ਵੁਤ੍ਤਾ ਸਮਿਤਾਵਿਨਾ;

ਤੇਸਂ ਦਾਨਿ ਕਰਿਸ੍ਸਾਮਿ, ਅਪੁਬ੍ਬਪਦਵਣ੍ਣਨਂ.

੪੫੯. ਤੇਨ ਸਮਯੇਨ ਬੁਦ੍ਧੋ ਭਗਵਾ ਵੇਸਾਲਿਯਂ ਵਿਹਰਤਿ ਗੋਤਮਕੇ ਚੇਤਿਯੇ. ਤੇਨ ਖੋ ਪਨ ਸਮਯੇਨ ਭਗਵਤਾ ਭਿਕ੍ਖੂਨਂ ਤਿਚੀਵਰਂ ਅਨੁਞ੍ਞਾਤਂ ਹੋਤੀਤਿ ਏਤ੍ਥ ਤਿਚੀਵਰਨ੍ਤਿ ਅਨ੍ਤਰਵਾਸਕੋ ਉਤ੍ਤਰਾਸਙ੍ਗੋ ਸਙ੍ਘਾਟੀਤਿ ਇਦਂ ਚੀਵਰਤ੍ਤਯਂ ਪਰਿਭੁਞ੍ਜਿਤੁਂ ਅਨੁਞ੍ਞਾਤਂ ਹੋਤਿ. ਯਤ੍ਥ ਪਨੇਤਂ ਅਨੁਞ੍ਞਾਤਂ, ਯਦਾ ਚ ਅਨੁਞ੍ਞਾਤਂ, ਯੇਨ ਚ ਕਾਰਣੇਨ ਅਨੁਞ੍ਞਾਤਂ, ਤਂ ਸਬ੍ਬਂ ਚੀਵਰਕ੍ਖਨ੍ਧਕੇ ਜੀਵਕਵਤ੍ਥੁਸ੍ਮਿਂ (ਮਹਾਵ. ੩੨੬ ਆਦਯੋ) ਆਗਤਮੇਵ. ਅਞ੍ਞੇਨੇਵ ਤਿਚੀਵਰੇਨ ਗਾਮਂ ਪਵਿਸਨ੍ਤੀਤਿ ਯੇਨ ਵਿਹਾਰੇ ਅਚ੍ਛਨ੍ਤਿ ਨ੍ਹਾਨਞ੍ਚ ਓਤਰਨ੍ਤਿ, ਤਤੋ ਅਞ੍ਞੇਨ, ਏਵਂ ਦਿਵਸੇ ਦਿਵਸੇ ਨਵ ਚੀਵਰਾਨਿ ਧਾਰੇਨ੍ਤਿ.

੪੬੦. ਉਪ੍ਪਨ੍ਨਂ ਹੋਤੀਤਿ ਅਨੁਪਞ੍ਞਤ੍ਤਿਯਾ ਦ੍ਵਾਰਂ ਦਦਮਾਨਂ ਪਟਿਲਾਭਵਸੇਨ ਉਪ੍ਪਨ੍ਨਂ ਹੋਤਿ, ਨੋ ਨਿਪ੍ਫਤ੍ਤਿਵਸੇਨ.

ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਦਾਤੁਕਾਮੋ ਹੋਤੀਤਿ ਆਯਸ੍ਮਾ ਕਿਰ ਆਨਨ੍ਦੋ ਭਗਵਨ੍ਤਂ ਠਪੇਤ੍ਵਾ ਅਞ੍ਞੋ ਏਵਰੂਪੋ ਗੁਣਵਿਸਿਟ੍ਠੋ ਪੁਗ੍ਗਲੋ ਨਤ੍ਥੀਤਿ ਗੁਣਬਹੁਮਾਨੇਨ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਅਤਿਮਮਾਯਤਿ. ਸੋ ਸਦਾਪਿ ਮਨਾਪਂ ਚੀਵਰਂ ਲਭਿਤ੍ਵਾ ਰਜਿਤ੍ਵਾ ਕਪ੍ਪਬਿਨ੍ਦੁਂ ਦਤ੍ਵਾ ਥੇਰਸ੍ਸੇਵ ਦੇਤਿ, ਪੁਰੇਭਤ੍ਤੇ ਪਣੀਤਂ ਯਾਗੁਖਜ੍ਜਕਂ ਵਾ ਪਿਣ੍ਡਪਾਤਂ ਵਾ ਲਭਿਤ੍ਵਾਪਿ ਥੇਰਸ੍ਸੇਵ ਦੇਤਿ, ਪਚ੍ਛਾਭਤ੍ਤੇ ਮਧੁਫਾਣਿਤਾਦੀਨਿ ਲਭਿਤ੍ਵਾਪਿ ਥੇਰਸ੍ਸੇਵ ਦੇਤਿ, ਉਪਟ੍ਠਾਕਕੁਲੇਹਿ ਦਾਰਕੇ ਨਿਕ੍ਖਾਮੇਤ੍ਵਾ ਪਬ੍ਬਾਜੇਤ੍ਵਾਪਿ ਥੇਰਸ੍ਸ ਸਨ੍ਤਿਕੇ ਉਪਜ੍ਝਂ ਗਾਹਾਪੇਤ੍ਵਾ ਸਯਂ ਅਨੁਸਾਵਨਕਮ੍ਮਂ ਕਰੋਤਿ. ਆਯਸ੍ਮਾਪਿ ਸਾਰਿਪੁਤ੍ਤੋ ‘‘ਪਿਤੁ ਕਤ੍ਤਬ੍ਬਕਿਚ੍ਚਂ ਨਾਮ ਜੇਟ੍ਠਪੁਤ੍ਤਸ੍ਸ ਭਾਰੋ, ਤਂ ਮਯਾ ਭਗਵਤੋ ਕਤ੍ਤਬ੍ਬਂ ਕਿਚ੍ਚਂ ਆਨਨ੍ਦੋ ਕਰੋਤਿ, ਅਹਂ ਆਨਨ੍ਦਂ ਨਿਸ੍ਸਾਯ ਅਪ੍ਪੋਸ੍ਸੁਕ੍ਕੋ ਵਿਹਰਿਤੁਂ ਲਭਾਮੀ’’ਤਿ ਆਯਸ੍ਮਨ੍ਤਂ ਆਨਨ੍ਦਂ ਅਤਿਵਿਯ ਮਮਾਯਤਿ, ਸੋਪਿ ਮਨਾਪਂ ਚੀਵਰਂ ਲਭਿਤ੍ਵਾ ਆਨਨ੍ਦਤ੍ਥੇਰਸ੍ਸੇਵ ਦੇਤੀਤਿ ਸਬ੍ਬਂ ਪੁਰਿਮਸਦਿਸਮੇਵ. ਏਵਂ ਗੁਣਬਹੁਮਾਨੇਨ ਮਮਾਯਨ੍ਤੋ ਤਦਾ ਉਪ੍ਪਨ੍ਨਮ੍ਪਿ ਤਂ ਚੀਵਰਂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਦਾਤੁਕਾਮੋ ਹੋਤੀਤਿ ਵੇਦਿਤਬ੍ਬੋ.

ਨਵਮਂ ਵਾ ਭਗਵਾ ਦਿਵਸਂ ਦਸਮਂ ਵਾਤਿ ਏਤ੍ਥ ਪਨ ਸਚੇ ਭਵੇਯ੍ਯ ‘‘ਕਥਂ ਥੇਰੋ ਜਾਨਾਤੀ’’ਤਿ? ਬਹੂਹਿ ਕਾਰਣੇਹਿ ਜਾਨਾਤਿ. ਸਾਰਿਪੁਤ੍ਤਤ੍ਥੇਰੋ ਕਿਰ ਜਨਪਦਚਾਰਿਕਂ ਪਕ੍ਕਮਨ੍ਤੋ ਆਨਨ੍ਦਤ੍ਥੇਰਂ ਆਪੁਚ੍ਛਿਤ੍ਵਾਵ ਪਕ੍ਕਮਤਿ ‘‘ਅਹਂ ਏਤ੍ਤਕੇਨ ਨਾਮ ਕਾਲੇਨ ਆਗਚ੍ਛਿਸ੍ਸਾਮਿ, ਏਤ੍ਥਨ੍ਤਰੇ ਭਗਵਨ੍ਤਂ ਮਾ ਪਮਜ੍ਜੀ’’ਤਿ. ਸਚੇ ਸਮ੍ਮੁਖਾ ਨ ਆਪੁਚ੍ਛਤਿ, ਭਿਕ੍ਖੂ ਪੇਸੇਤ੍ਵਾਪਿ ਆਪੁਚ੍ਛਿਤ੍ਵਾਵ ਗਚ੍ਛਤਿ. ਸਚੇ ਅਞ੍ਞਤ੍ਥ ਵਸ੍ਸਂ ਵਸਤਿ, ਯੇ ਪਠਮਤਰਂ ਭਿਕ੍ਖੂ ਆਗਚ੍ਛਨ੍ਤਿ, ਤੇ ਏਵਂ ਪਹਿਣਤਿ ‘‘ਮਮ ਵਚਨੇਨ ਭਗਵਤੋ ਚ ਪਾਦੇ ਸਿਰਸਾ ਵਨ੍ਦਥ, ਆਨਨ੍ਦਸ੍ਸ ਚ ਆਰੋਗ੍ਯਂ ਵਤ੍ਵਾ ਮਂ ‘ਅਸੁਕਦਿਵਸੇ ਨਾਮ ਆਗਮਿਸ੍ਸਤੀ’ਤਿ ਵਦਥਾ’’ਤਿ ਸਦਾ ਚ ਯਥਾਪਰਿਚ੍ਛਿਨ੍ਨਦਿਵਸੇਯੇਵ ਏਤਿ. ਅਪਿਚਾਯਸ੍ਮਾ ਆਨਨ੍ਦੋ ਅਨੁਮਾਨੇਨਪਿ ਜਾਨਾਤਿ ‘‘ਏਤ੍ਤਕੇ ਦਿਵਸੇ ਭਗਵਤਾ ਵਿਯੋਗਂ ਸਹਨ੍ਤੋ ਅਧਿਵਾਸੇਨ੍ਤੋ ਆਯਸ੍ਮਾ ਸਾਰਿਪੁਤ੍ਤੋ ਵਸਿ, ਇਤੋ ਦਾਨਿ ਪਟ੍ਠਾਯ ਅਸੁਕਂ ਨਾਮ ਦਿਵਸਂ ਨ ਅਤਿਕ੍ਕਮਿਸ੍ਸਤਿ ਅਦ੍ਧਾ ਆਗਮਿਸ੍ਸਤੀ’’ਤਿ. ਯੇਸਂ ਯੇਸਞ੍ਹਿ ਪਞ੍ਞਾ ਮਹਤੀ ਤੇਸਂ ਤੇਸਂ ਭਗਵਤਿ ਪੇਮਞ੍ਚ ਗਾਰਵੋ ਚ ਮਹਾ ਹੋਤੀਤਿ ਇਮਿਨਾ ਨਯੇਨਾਪਿ ਜਾਨਾਤਿ. ਏਵਂ ਬਹੂਹਿ ਕਾਰਣੇਹਿ ਜਾਨਾਤਿ. ਤੇਨਾਹ – ‘‘ਨਵਮਂ ਵਾ ਭਗਵਾ ਦਿਵਸਂ ਦਸਮਂ ਵਾ’’ਤਿ. ਏਵਂ ਵੁਤ੍ਤੇ ਯਸ੍ਮਾ ਇਦਂ ਸਿਕ੍ਖਾਪਦਂ ਪਣ੍ਣਤ੍ਤਿਵਜ੍ਜਂ, ਨ ਲੋਕਵਜ੍ਜਂ; ਤਸ੍ਮਾ ਆਯਸ੍ਮਤਾ ਆਨਨ੍ਦੇਨ ਵੁਤ੍ਤਸਦਿਸਮੇਵ ਪਰਿਚ੍ਛੇਦਂ ਕਰੋਨ੍ਤੋ ‘‘ਅਥ ਖੋ ਭਗਵਾ…ਪੇ… ਧਾਰੇਤੁ’’ਨ੍ਤਿ. ਸਚੇ ਪਨ ਥੇਰੇਨ ਅਦ੍ਧਮਾਸੋ ਵਾ ਮਾਸੋ ਵਾ ਉਦ੍ਦਿਟ੍ਠੋ ਅਭਵਿਸ੍ਸ, ਸੋਪਿ ਭਗਵਤਾ ਅਨੁਞ੍ਞਾਤੋ ਅਸ੍ਸ.

੪੬੨-੩. ਨਿਟ੍ਠਿਤਚੀਵਰਸ੍ਮਿਨ੍ਤਿ ਯੇਨ ਕੇਨਚਿ ਨਿਟ੍ਠਾਨੇਨ ਨਿਟ੍ਠਿਤੇ ਚੀਵਰਸ੍ਮਿਂ. ਯਸ੍ਮਾ ਪਨ ਤਂ ਚੀਵਰਂ ਕਰਣੇਨਪਿ ਨਿਟ੍ਠਿਤਂ ਹੋਤਿ, ਨਸ੍ਸਨਾਦੀਹਿਪਿ ਤਸ੍ਮਾਸ੍ਸ ਪਦਭਾਜਨੇ ਅਤ੍ਥਮਤ੍ਤਮੇਵ ਦਸ੍ਸੇਤੁਂ ਭਿਕ੍ਖੁਨੋ ਚੀਵਰਂ ਕਤਂ ਵਾ ਹੋਤੀਤਿਆਦਿ ਵੁਤ੍ਤਂ. ਤਤ੍ਥ ਕਤਨ੍ਤਿ ਸੂਚਿਕਮ੍ਮਪਰਿਯੋਸਾਨੇਨ ਕਤਂ, ਸੂਚਿਕਮ੍ਮਪਰਿਯੋਸਾਨਂ ਨਾਮ ਯਂਕਿਞ੍ਚਿ ਸੂਚਿਯਾ ਕਤ੍ਤਬ੍ਬਂ ਪਾਸਪਟ੍ਟਗਣ੍ਠਿਕਪਟ੍ਟਪਰਿਯੋਸਾਨਂ ਕਤ੍ਵਾ ਸੂਚਿਯਾ ਪਟਿਸਾਮਨਂ. ਨਟ੍ਠਨ੍ਤਿ ਚੋਰਾਦੀਹਿ ਹਟਂ, ਏਤਮ੍ਪਿ ਹਿ ਕਰਣਪਲਿਬੋਧਸ੍ਸ ਨਿਟ੍ਠਿਤਤ੍ਤਾ ਨਿਟ੍ਠਿਤਨ੍ਤਿ ਵੁਚ੍ਚਤਿ. ਵਿਨਟ੍ਠਨ੍ਤਿ ਉਪਚਿਕਾਦੀਹਿ ਖਾਯਿਤਂ. ਦਡ੍ਢਨ੍ਤਿ ਅਗ੍ਗਿਨਾ ਦਡ੍ਢਂ. ਚੀਵਰਾਸਾ ਵਾ ਉਪਚ੍ਛਿਨ੍ਨਾਤਿ ‘‘ਅਸੁਕਸ੍ਮਿਂ ਨਾਮ ਕੁਲੇ ਚੀਵਰਂ ਲਭਿਸ੍ਸਾਮੀ’’ਤਿ ਯਾ ਚੀਵਰਾਸਾ ਉਪ੍ਪਨ੍ਨਾ ਹੋਤਿ, ਸਾ ਵਾ ਉਪਚ੍ਛਿਨ੍ਨਾ, ਏਤੇਸਮ੍ਪਿ ਹਿ ਕਰਣਪਲਿਬੋਧਸ੍ਸੇਵ ਨਿਟ੍ਠਿਤਤ੍ਤਾ ਨਿਟ੍ਠਿਤਭਾਵੋ ਵੇਦਿਤਬ੍ਬੋ.

ਉਬ੍ਭਤਸ੍ਮਿਂ ਕਥਿਨੇਤਿ ਕਥਿਨੇ ਚ ਉਬ੍ਭਤਸ੍ਮਿਂ. ਏਤੇਨ ਦੁਤਿਯਸ੍ਸ ਪਲਿਬੋਧਸ੍ਸ ਅਭਾਵਂ ਦਸ੍ਸੇਤਿ. ਤਂ ਪਨ ਕਥਿਨਂ ਯਸ੍ਮਾ ਅਟ੍ਠਸੁ ਵਾ ਮਾਤਿਕਾਸੁ ਏਕਾਯ ਅਨ੍ਤਰੁਬ੍ਭਾਰੇਨ ਵਾ ਉਦ੍ਧਰੀਯਤਿ, ਤੇਨਸ੍ਸ ਨਿਦ੍ਦੇਸੇ ‘‘ਅਟ੍ਠਨ੍ਨਂ ਮਾਤਿਕਾਨ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ‘‘ਅਟ੍ਠਿਮਾ, ਭਿਕ੍ਖਵੇ, ਮਾਤਿਕਾ ਕਥਿਨਸ੍ਸ ਉਬ੍ਭਾਰਾਯ – ਪਕ੍ਕਮਨਨ੍ਤਿਕਾ, ਨਿਟ੍ਠਾਨਨ੍ਤਿਕਾ, ਸਨ੍ਨਿਟ੍ਠਾਨਨ੍ਤਿਕਾ, ਨਾਸਨਨ੍ਤਿਕਾ, ਸਵਨਨ੍ਤਿਕਾ, ਆਸਾਵਚ੍ਛੇਦਿਕਾ, ਸੀਮਾਤਿਕ੍ਕਨ੍ਤਿਕਾ, ਸਹੁਬ੍ਭਾਰਾ’’ਤਿ ਏਵਂ ਅਟ੍ਠ ਮਾਤਿਕਾਯੋ ਕਥਿਨਕ੍ਖਨ੍ਧਕੇ ਆਗਤਾ. ਅਨ੍ਤਰੁਬ੍ਭਾਰੋਪਿ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ; ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਕਥਿਨਂ ਉਦ੍ਧਰੇਯ੍ਯ, ਏਸਾ ਞਤ੍ਤਿ. ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ; ਸਙ੍ਘੋ ਕਥਿਨਂ ਉਦ੍ਧਰਤਿ, ਯਸ੍ਸਾਯਸ੍ਮਤੋ ਖਮਤਿ, ਕਥਿਨਸ੍ਸ ਉਬ੍ਭਾਰੋ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ. ਉਬ੍ਭਤਂ ਸਙ੍ਘੇਨ ਕਥਿਨਂ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਪਾਚਿ. ੯੨੬) ਏਵਂ ਭਿਕ੍ਖੁਨੀਵਿਭਙ੍ਗੇ ਆਗਤੋ. ਤਤ੍ਥ ਯਂ ਵਤ੍ਤਬ੍ਬਂ ਤਂ ਆਗਤਟ੍ਠਾਨੇਯੇਵ ਵਣ੍ਣਯਿਸ੍ਸਾਮ. ਇਧ ਪਨ ਵੁਚ੍ਚਮਾਨੇ ਪਾਲ਼ਿ ਆਹਰਿਤਬ੍ਬਾ ਹੋਤਿ, ਅਤ੍ਥੋਪਿ ਵਤ੍ਤਬ੍ਬੋ. ਵੁਤ੍ਤੋਪਿ ਚ ਨ ਸੁਵਿਞ੍ਞੇਯ੍ਯੋ ਹੋਤਿ, ਅਟ੍ਠਾਨੇ ਵੁਤ੍ਤਤ੍ਤਾਯ.

ਦਸਾਹਪਰਮਨ੍ਤਿ ਦਸ ਅਹਾਨਿ ਪਰਮੋ ਪਰਿਚ੍ਛੇਦੋ ਅਸ੍ਸਾਤਿ ਦਸਾਹਪਰਮੋ, ਤਂ ਦਸਾਹਪਰਮਂ ਕਾਲਂ ਧਾਰੇਤਬ੍ਬਨ੍ਤਿ ਅਤ੍ਥੋ. ਪਦਭਾਜਨੇ ਪਨ ਅਤ੍ਥਮਤ੍ਤਮੇਵ ਦਸ੍ਸੇਤੁਂ ‘‘ਦਸਾਹਪਰਮਤਾ ਧਾਰੇਤਬ੍ਬ’’ਨ੍ਤਿ ਵੁਤ੍ਤਂ. ਇਦਞ੍ਹਿ ਵੁਤ੍ਤਂ ਹੋਤਿ ‘‘ਦਸਾਹਪਰਮ’’ਨ੍ਤਿ ਏਤ੍ਥ ਯਾ ਦਸਾਹਪਰਮਤਾ ਦਸਾਹਪਰਮਭਾਵੋ, ਅਯਂ ਏਤ੍ਤਕੋ ਕਾਲੋ ਯਾਵ ਨਾਤਿਕ੍ਕਮਤਿ ਤਾਵ ਧਾਰੇਤਬ੍ਬਨ੍ਤਿ.

ਅਧਿਟ੍ਠਿਤਵਿਕਪ੍ਪਿਤੇਸੁ ਅਪਰਿਯਾਪਨ੍ਨਤ੍ਤਾ ਅਤਿਰੇਕਂ ਚੀਵਰਨ੍ਤਿ ਅਤਿਰੇਕਚੀਵਰਂ. ਤੇਨੇਵਸ੍ਸ ਪਦਭਾਜਨੇ ਵੁਤ੍ਤਂ ‘‘ਅਨਧਿਟ੍ਠਿਤਂ ਅਵਿਕਪ੍ਪਿਤ’’ਨ੍ਤਿ.

ਛਨ੍ਨਂ ਚੀਵਰਾਨਂ ਅਞ੍ਞਤਰਨ੍ਤਿ ਖੋਮਂ, ਕਪ੍ਪਾਸਿਕਂ, ਕੋਸੇਯ੍ਯਂ, ਕਮ੍ਬਲਂ, ਸਾਣਂ, ਭਙ੍ਗਨ੍ਤਿ ਇਮੇਸਂ ਛਨ੍ਨਂ ਚੀਵਰਾਨਂ ਅਞ੍ਞਤਰਂ. ਏਤੇਨ ਚੀਵਰਸ੍ਸ ਜਾਤਿਂ ਦਸ੍ਸੇਤ੍ਵਾ ਇਦਾਨਿ ਪਮਾਣਂ ਦਸ੍ਸੇਤੁਂ ‘‘ਵਿਕਪ੍ਪਨੁਪਗਂ ਪਚ੍ਛਿਮ’’ਨ੍ਤਿ ਆਹ. ਤਸ੍ਸ ਪਮਾਣਂ ਦੀਘਤੋ ਦ੍ਵੇ ਵਿਦਤ੍ਥਿਯੋ, ਤਿਰਿਯਂ ਵਿਦਤ੍ਥਿ. ਤਤ੍ਰਾਯਂ ਪਾਲ਼ਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਆਯਾਮੇਨ ਅਟ੍ਠਙ੍ਗੁਲਂ ਸੁਗਤਙ੍ਗੁਲੇਨ ਚਤੁਰਙ੍ਗੁਲਵਿਤ੍ਥਤਂ ਪਚ੍ਛਿਮਂ ਚੀਵਰਂ ਵਿਕਪ੍ਪੇਤੁ’’ਨ੍ਤਿ (ਮਹਾਵ. ੩੫੮).

ਤਂ ਅਤਿਕ੍ਕਾਮਯਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਨ੍ਤਿ ਤਂ ਯਥਾਵੁਤ੍ਤਜਾਤਿਪ੍ਪਮਾਣਂ ਚੀਵਰਂ ਦਸਾਹਪਰਮਂ ਕਾਲਂ ਅਤਿਕ੍ਕਾਮਯਤੋ, ਏਤ੍ਥਨ੍ਤਰੇ ਯਥਾ ਅਤਿਰੇਕਚੀਵਰਂ ਨ ਹੋਤਿ ਤਥਾ ਅਕੁਬ੍ਬਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਤਞ੍ਚ ਚੀਵਰਂ ਨਿਸ੍ਸਗ੍ਗਿਯਂ ਹੋਤਿ, ਪਾਚਿਤ੍ਤਿਯਾਪਤ੍ਤਿ ਚਸ੍ਸ ਹੋਤੀਤਿ ਅਤ੍ਥੋ. ਅਥ ਵਾ ਨਿਸ੍ਸਜ੍ਜਨਂ ਨਿਸ੍ਸਗ੍ਗਿਯਂ, ਪੁਬ੍ਬਭਾਗੇ ਕਤ੍ਤਬ੍ਬਸ੍ਸ ਵਿਨਯਕਮ੍ਮਸ੍ਸੇਤਂ ਨਾਮਂ. ਨਿਸ੍ਸਗ੍ਗਿਯਮਸ੍ਸ ਅਤ੍ਥੀਤਿ ਨਿਸ੍ਸਗ੍ਗਿਯਮਿਚ੍ਚੇਵ. ਕਿਨ੍ਤਂ? ਪਾਚਿਤ੍ਤਿਯਂ. ਤਂ ਅਤਿਕ੍ਕਾਮਯਤੋ ਸਨਿਸ੍ਸਗ੍ਗਿਯਵਿਨਯਕਮ੍ਮਂ ਪਾਚਿਤ੍ਤਿਯਂ ਹੋਤੀਤਿ ਅਯਮੇਤ੍ਥ ਅਤ੍ਥੋ. ਪਦਭਾਜਨੇ ਪਨ ਪਠਮਂ ਤਾਵ ਅਤ੍ਥਵਿਕਪ੍ਪਂ ਦਸ੍ਸੇਤੁਂ ‘‘ਤਂ ਅਤਿਕ੍ਕਾਮਯਤੋ ਨਿਸ੍ਸਗ੍ਗਿਯਂ ਹੋਤੀ’’ਤਿ ਮਾਤਿਕਂ ਠਪੇਤ੍ਵਾ ‘‘ਏਕਾਦਸੇ ਅਰੁਣੁਗ੍ਗਮਨੇ ਨਿਸ੍ਸਗ੍ਗਿਯਂ ਹੋਤਿ, ਨਿਸ੍ਸਜ੍ਜਿਤਬ੍ਬ’’ਨ੍ਤਿ ਵੁਤ੍ਤਂ. ਪੁਨ ਯਸ੍ਸ ਚ ਨਿਸ੍ਸਜ੍ਜਿਤਬ੍ਬਂ, ਯਥਾ ਚ ਨਿਸ੍ਸਜ੍ਜਿਤਬ੍ਬਂ, ਤਂ ਦਸ੍ਸੇਤੁਂ ‘‘ਸਙ੍ਘਸ੍ਸ ਵਾ’’ਤਿਆਦਿ ਵੁਤ੍ਤਂ. ਤਤ੍ਥ ਏਕਾਦਸੇ ਅਰੁਣੁਗ੍ਗਮਨੇਤਿ ਏਤ੍ਥ ਯਂ ਦਿਵਸਂ ਚੀਵਰਂ ਉਪ੍ਪਨ੍ਨਂ ਤਸ੍ਸ ਯੋ ਅਰੁਣੋ, ਸੋ ਉਪ੍ਪਨ੍ਨਦਿਵਸਨਿਸ੍ਸਿਤੋ, ਤਸ੍ਮਾ ਚੀਵਰੁਪ੍ਪਾਦਦਿਵਸਏਨ ਸਦ੍ਧਿਂ ਏਕਾਦਸੇ ਅਰੁਣੁਗ੍ਗਮਨੇ ਨਿਸ੍ਸਗ੍ਗਿਯਂ ਹੋਤੀਤਿ ਵੇਦਿਤਬ੍ਬਂ. ਸਚੇਪਿ ਬਹੂਨਿ ਏਕਜ੍ਝਂ ਬਨ੍ਧਿਤ੍ਵਾ ਵਾ ਵੇਠੇਤ੍ਵਾ ਵਾ ਠਪਿਤਾਨਿ ਏਕਾਵ ਆਪਤ੍ਤਿ. ਅਬਦ੍ਧਾਵੇਠਿਤੇਸੁ ਵਤ੍ਥੁਗਣਨਾਯ ਆਪਤ੍ਤਿਯੋ.

ਨਿਸ੍ਸਜ੍ਜਿਤ੍ਵਾ ਆਪਤ੍ਤਿ ਦੇਸੇਤਬ੍ਬਾਤਿ ਕਥਂ ਦੇਸੇਤਬ੍ਬਾ? ਯਥਾ ਖਨ੍ਧਕੇ ਵੁਤ੍ਤਂ, ਕਥਞ੍ਚ ਤਤ੍ਥ ਵੁਤ੍ਤਂ? ਏਵਂ ਵੁਤ੍ਤਂ – ‘‘ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਅਹਂ, ਭਨ੍ਤੇ, ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ, ਤਂ ਪਟਿਦੇਸੇਮੀ’’’ਤਿ (ਚੂਲ਼ਵ. ੨੩੯). ਇਧ ਪਨ ਸਚੇ ਏਕਂ ਚੀਵਰਂ ਹੋਤਿ ‘‘ਏਕਂ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ ਵਤ੍ਤਬ੍ਬਂ. ਸਚੇ ਦ੍ਵੇ, ‘‘ਦ੍ਵੇ’’ਤਿ ਵਤ੍ਤਬ੍ਬਂ. ਸਚੇ ਬਹੂਨਿ ‘‘ਸਮ੍ਬਹੁਲਾਨੀ’’ਤਿ ਵਤ੍ਤਬ੍ਬਂ. ਨਿਸ੍ਸਜ੍ਜਨੇਪਿ ਸਚੇ ਏਕਂ ਯਥਾਪਾਲ਼ਿਮੇਵ ‘‘ਇਦਂ ਮੇ, ਭਨ੍ਤੇ, ਚੀਵਰ’’ਨ੍ਤਿ ਵਤ੍ਤਬ੍ਬਂ. ਸਚੇ ਦ੍ਵੇ ਵਾ ਬਹੂਨਿ ਵਾ, ‘‘ਇਮਾਨਿ ਮੇ, ਭਨ੍ਤੇ, ਚੀਵਰਾਨਿ ਦਸਾਹਾਤਿਕ੍ਕਨ੍ਤਾਨਿ ਨਿਸ੍ਸਗ੍ਗਿਯਾਨਿ, ਇਮਾਨਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀ’’ਤਿ ਵਤ੍ਤਬ੍ਬਂ. ਪਾਲ਼ਿਂ ਵਤ੍ਤੁਂ ਅਸਕ੍ਕੋਨ੍ਤੇਨ ਅਞ੍ਞਥਾਪਿ ਵਤ੍ਤਬ੍ਬਂ.

ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਆਪਤ੍ਤਿ ਪਟਿਗ੍ਗਹੇਤਬ੍ਬਾਤਿ ਖਨ੍ਧਕੇ ਵੁਤ੍ਤਨਯੇਨੇਵ ਪਟਿਗ੍ਗਹੇਤਬ੍ਬਾ. ਏਵਞ੍ਹਿ ਤਤ੍ਥ ਵੁਤ੍ਤਂ – ‘‘ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਆਪਤ੍ਤਿਂ ਸਰਤਿ ਵਿਵਰਤਿ ਉਤ੍ਤਾਨਿਂ ਕਰੋਤਿ ਦੇਸੇਤਿ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਆਪਤ੍ਤਿਂ ਪਟਿਗ੍ਗਣ੍ਹੇਯ੍ਯ’ਨ੍ਤਿ.

ਤੇਨ ਵਤ੍ਤਬ੍ਬੋ ‘ਪਸ੍ਸਸੀ’ਤਿ? ‘ਆਮ, ਪਸ੍ਸਾਮੀ’ਤਿ. ਆਯਤਿਂ ਸਂਵਰੇਯ੍ਯਾਸੀ’’ਤਿ (ਚੂਲ਼ਵ. ੨੩੯). ਦ੍ਵੀਸੁ ਪਨ ਸਮ੍ਬਹੁਲਾਸੁ ਵਾ ਪੁਰਿਮਨਯੇਨੇਵ ਵਚਨਭੇਦੋ ਞਾਤਬ੍ਬੋ.

ਚੀਵਰਦਾਨੇਪਿ ‘‘ਸਙ੍ਘੋ ਇਮਂ ਚੀਵਰਂ ਇਮਾਨਿ ਚੀਵਰਾਨੀ’’ਤਿ ਵਤ੍ਥੁਵਸੇਨ ਵਚਨਭੇਦੋ ਵੇਦਿਤਬ੍ਬੋ. ਗਣਸ੍ਸ ਚ ਪੁਗ੍ਗਲਸ੍ਸ ਚ ਨਿਸ੍ਸਜ੍ਜਨੇਪਿ ਏਸੇਵ ਨਯੋ.

ਆਪਤ੍ਤਿਦੇਸਨਾਪਟਿਗ੍ਗਹਣੇਸੁ ਪਨੇਤ੍ਥ ਅਯਂ ਪਾਲ਼ਿ – ‘‘ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਸਮ੍ਬਹੁਲੇ ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸੁ ਵਚਨੀਯਾ – ‘ਅਹਂ, ਭਨ੍ਤੇ, ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ ਤਂ ਪਟਿਦੇਸੇਮੀ’ਤਿ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਤੇ ਭਿਕ੍ਖੂ ਞਾਪੇਤਬ੍ਬਾ –

‘ਸੁਣਨ੍ਤੁ ਮੇ ਆਯਸ੍ਮਨ੍ਤਾ, ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਆਪਤ੍ਤਿਂ ਸਰਤਿ ਵਿਵਰਤਿ ਉਤ੍ਤਾਨਿਂ ਕਰੋਤਿ ਦੇਸੇਤਿ. ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਆਪਤ੍ਤਿਂ ਪਟਿਗ੍ਗਣ੍ਹੇਯ੍ਯ’ਨ੍ਤਿ.

ਤੇਨ ਵਤ੍ਤਬ੍ਬੋ ‘ਪਸ੍ਸਸੀ’ਤਿ? ‘ਆਮ, ਪਸ੍ਸਾਮੀ’ਤਿ. ‘ਆਯਤਿਂ ਸਂਵਰੇਯ੍ਯਾਸੀ’ਤਿ.

ਤੇਨ ਭਿਕ੍ਖੁਨਾ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਅਹਂ, ਆਵੁਸੋ, ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ ਤਂ ਪਟਿਦੇਸੇਮੀ’ਤਿ. ਤੇਨ ਵਤ੍ਤਬ੍ਬੋ ‘ਪਸ੍ਸਸੀ’ਤਿ, ਆਮ ਪਸ੍ਸਾਮੀਤਿ ਆਯਤਿਂ ਸਂਵਰੇਯ੍ਯਾਸੀ’’ਤਿ (ਚੂਲ਼ਵ. ੨੩੯). ਤਤ੍ਥ ਪੁਰਿਮਨਯੇਨੇਵ ਆਪਤ੍ਤਿਯਾ ਨਾਮਗ੍ਗਹਣਂ ਵਚਨਭੇਦੋ ਚ ਵੇਦਿਤਬ੍ਬੋ.

ਯਥਾ ਚ ਗਣਸ੍ਸ ਨਿਸ੍ਸਜ੍ਜਨੇ ਏਵਂ ਦ੍ਵਿਨ੍ਨਂ ਨਿਸ੍ਸਜ੍ਜਨੇਪਿ ਪਾਲ਼ਿ ਵੇਦਿਤਬ੍ਬਾ. ਯਦਿ ਹਿ ਵਿਸੇਸੋ ਭਵੇਯ੍ਯ, ਯਥੇਵ ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਣ੍ਣਨ੍ਨਂ ਪਾਰਿਸੁਦ੍ਧਿਉਪੋਸਥਂ ਕਾਤੁਂ, ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਤੇ ਭਿਕ੍ਖੂ ਞਾਪੇਤਬ੍ਬਾ’’ਤਿਆਦਿਨਾ ਨਯੇਨ ‘‘ਤਿਣ੍ਣਨ੍ਨਂ ਪਾਰਿਸੁਦ੍ਧਿਉਪੋਸਥਂ ਕਾਤੁ’’ਨ੍ਤਿ ਵਤ੍ਵਾ ਪੁਨ ‘‘ਅਨੁਜਾਨਾਮਿ, ਭਿਕ੍ਖਵੇ, ਦ੍ਵਿਨ੍ਨਂ ਪਾਰਿਸੁਦ੍ਧਿਉਪੋਸਥਂ ਕਾਤੁਂ, ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬੋ. ਥੇਰੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗ’’ਨ੍ਤਿਆਦਿਨਾ (ਮਹਾਵ. ੧੬੮) ਨਯੇਨ ਵਿਸੁਂਯੇਵ ਦ੍ਵਿਨ੍ਨਂ ਪਾਰਿਸੁਦ੍ਧਿਉਪੋਸਥੋ ਵੁਤ੍ਤੋ, ਏਵਮਿਧਾਪਿ ਵਿਸੁਂ ਪਾਲ਼ਿਂ ਵਦੇਯ੍ਯ, ਯਸ੍ਮਾ ਪਨ ਨਤ੍ਥਿ, ਤਸ੍ਮਾ ਅਵਤ੍ਵਾ ਗਤੋਤਿ, ਗਣਸ੍ਸ ਵੁਤ੍ਤਾ ਪਾਲ਼ਿਯੇਵੇਤ੍ਥ ਪਾਲ਼ਿ.

ਆਪਤ੍ਤਿਪਟਿਗ੍ਗਹਣੇ ਪਨ ਅਯਂ ਵਿਸੇਸੋ, ਯਥਾ ਗਣਸ੍ਸ ਨਿਸ੍ਸਜ੍ਜਿਤ੍ਵਾ ਆਪਤ੍ਤਿਯਾ ਦੇਸਿਯਮਾਨਾਯ ਆਪਤ੍ਤਿਪਟਿਗ੍ਗਾਹਕੋ ਭਿਕ੍ਖੁ ਞਤ੍ਤਿਂ ਠਪੇਤਿ, ਏਵਂ ਅਟ੍ਠਪੇਤ੍ਵਾ ਦ੍ਵੀਸੁ ਅਞ੍ਞਤਰੇਨ ਯਥਾ ਏਕਪੁਗ੍ਗਲੋ ਪਟਿਗ੍ਗਣ੍ਹਾਤਿ, ਏਵਂ ਆਪਤ੍ਤਿ ਪਟਿਗ੍ਗਹੇਤਬ੍ਬਾ. ਦ੍ਵਿਨ੍ਨਞ੍ਹਿ ਞਤ੍ਤਿਟ੍ਠਪਨਾ ਨਾਮ ਨਤ੍ਥਿ, ਯਦਿ ਸਿਯਾ ਦ੍ਵਿਨ੍ਨਂ ਪਾਰਿਸੁਦ੍ਧਿਉਪੋਸਥਂ ਵਿਸੁਂ ਨ ਵਦੇਯ੍ਯ.

ਨਿਸ੍ਸਟ੍ਠਚੀਵਰਦਾਨੇਪਿ ਯਥਾ ‘‘ਇਮਂ ਚੀਵਰਂ ਆਯਸ੍ਮਤੋ ਦਮ੍ਮੀ’’ਤਿ ਏਕੋ ਵਦਤਿ, ਏਵਂ ‘‘ਇਮਂ ਮਯਂ ਚੀਵਰਂ ਆਯਸ੍ਮਤੋ ਦੇਮਾ’’ਤਿ ਵਤ੍ਤੁਂ ਵਟ੍ਟਤਿ. ਇਤੋ ਗਰੁਕਤਰਾਨਿ ਹਿ ਞਤ੍ਤਿਦੁਤਿਯਕਮ੍ਮਾਨਿਪਿ ‘‘ਅਪਲੋਕੇਤ੍ਵਾ ਕਾਤਬ੍ਬਾਨੀ’’ਤਿ ਵੁਤ੍ਤਾਨਿ ਅਤ੍ਥਿ, ਤੇਸਂ ਏਤਂ ਅਨੁਲੋਮਂ ਨਿਸ੍ਸਟ੍ਠਚੀਵਰਂ ਪਨ ਦਾਤਬ੍ਬਮੇਵ ਅਦਾਤੁਂ ਨ ਲਬ੍ਭਤਿ, ਵਿਨਯਕਮ੍ਮਮਤ੍ਤਞ੍ਹੇਤਂ. ਨ ਤਂ ਤੇਨ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ ਦਿਨ੍ਨਮੇਵ ਹੋਤੀਤਿ.

੪੬੮. ਦਸਾਹਾਤਿਕ੍ਕਨ੍ਤੇ ਅਤਿਕ੍ਕਨ੍ਤਸਞ੍ਞੀਤਿ ਦਸਾਹਂ ਅਤਿਕ੍ਕਨ੍ਤੇ ਚੀਵਰੇ ‘‘ਅਤਿਕ੍ਕਨ੍ਤਂ ਇਦ’’ਨ੍ਤਿ ਏਵਂਸਞ੍ਞੀ, ਦਸਾਹੇ ਵਾ ਅਤਿਕ੍ਕਨ੍ਤੇ ‘‘ਅਤਿਕ੍ਕਨ੍ਤੋ ਦਸਾਹੋ’’ਤਿ ਏਵਂਸਞ੍ਞੀ. ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਨ੍ਤਿ ਨ ਇਧ ਸਞ੍ਞਾ ਰਕ੍ਖਤਿ. ਯੋਪਿ ਏਵਂਸਞ੍ਞੀ, ਤਸ੍ਸਪਿ ਤਂ ਚੀਵਰਂ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਾਪਤ੍ਤਿ ਚ. ਸਨਿਸ੍ਸਗ੍ਗਿਯਵਿਨਯਕਮ੍ਮਂ ਵਾ ਪਾਚਿਤ੍ਤਿਯਨ੍ਤਿ ਉਭੋਪਿ ਅਤ੍ਥਵਿਕਪ੍ਪਾ ਯੁਜ੍ਜਨ੍ਤਿ. ਏਸ ਨਯੋ ਸਬ੍ਬਤ੍ਥ.

ਅਵਿਸ੍ਸਜ੍ਜਿਤੇ ਵਿਸ੍ਸਜ੍ਜਿਤਸਞ੍ਞੀਤਿ ਕਸ੍ਸਚਿ ਅਦਿਨ੍ਨੇ ਅਪਰਿਚ੍ਚਤ੍ਤੇ ‘‘ਪਰਿਚ੍ਚਤ੍ਤਂ ਮਯਾ’’ਤਿ ਏਵਂਸਞ੍ਞੀ.

ਅਨਟ੍ਠੇ ਨਟ੍ਠਸਞ੍ਞੀਤਿ ਅਤ੍ਤਨੋ ਚੀਵਰੇਨ ਸਦ੍ਧਿਂ ਬਹੂਨਿ ਅਞ੍ਞੇਸਂ ਚੀਵਰਾਨਿ ਏਕਤੋ ਠਪਿਤਾਨਿ ਚੋਰਾ ਹਰਨ੍ਤਿ. ਤਤ੍ਰੇਸ ਅਤ੍ਤਨੋ ਚੀਵਰੇ ਅਨਟ੍ਠੇ ਨਟ੍ਠਸਞ੍ਞੀ ਹੋਤਿ. ਏਸ ਨਯੋ ਅਵਿਨਟ੍ਠਾਦੀਸੁਪਿ.

ਅਵਿਲੁਤ੍ਤੇਤਿ ਏਤ੍ਥ ਪਨ ਗਬ੍ਭਂ ਭਿਨ੍ਦਿਤ੍ਵਾ ਪਸਯ੍ਹਾਵਹਾਰਵਸੇਨ ਅਵਿਲੁਤ੍ਤੇਤਿ ਵੇਦਿਤਬ੍ਬਂ.

ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜਤਿ ਆਪਤ੍ਤਿ ਦੁਕ੍ਕਟਸ੍ਸਾਤਿ ਸਕਿਂ ਨਿਵਤ੍ਥਂ ਵਾ ਸਕਿਂ ਪਾਰੁਤਂ ਵਾ ਕਾਯਤੋ ਅਮੋਚੇਤ੍ਵਾ ਦਿਵਸਮ੍ਪਿ ਵਿਚਰਤਿ, ਏਕਾਵ ਆਪਤ੍ਤਿ. ਮੋਚੇਤ੍ਵਾ ਮੋਚੇਤ੍ਵਾ ਨਿਵਾਸੇਤਿ ਵਾ ਪਾਰੁਪਤਿ ਵਾ ਪਯੋਗੇ ਪਯੋਗੇ ਦੁਕ੍ਕਟਂ. ਦੁਨ੍ਨਿਵਤ੍ਥਂ ਵਾ ਦੁਪ੍ਪਾਰੁਤਂ ਵਾ ਸਣ੍ਠਪੇਨ੍ਤਸ੍ਸ ਅਨਾਪਤ੍ਤਿ. ਅਞ੍ਞਸ੍ਸ ਤਂ ਪਰਿਭੁਞ੍ਜਤੋਪਿ ਅਨਾਪਤ੍ਤਿ, ‘‘ਅਨਾਪਤ੍ਤਿ ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਤੀ’’ਤਿ (ਪਾਰਾ. ੫੭੦) ਆਦਿਵਚਨਞ੍ਚੇਤ੍ਥ ਸਾਧਕਂ. ਅਨਤਿਕ੍ਕਨ੍ਤੇ ਅਤਿਕ੍ਕਨ੍ਤਸਞ੍ਞਿਨੋ ਵੇਮਤਿਕਸ੍ਸ ਚ ਦੁਕ੍ਕਟਂ ਪਰਿਭੋਗਂ ਸਨ੍ਧਾਯ ਵੁਤ੍ਤਂ.

੪੬੯. ‘‘ਅਨਾਪਤ੍ਤਿ ਅਨ੍ਤੋਦਸਾਹਂ ਅਧਿਟ੍ਠੇਤਿ, ਵਿਕਪ੍ਪੇਤੀ’’ਤਿ ਏਤ੍ਥ ਪਨ ਅਧਿਟ੍ਠਾਨੁਪਗਂ ਵਿਕਪ੍ਪਨੁਪਗਞ੍ਚ ਵੇਦਿਤਬ੍ਬਂ. ਤਤ੍ਰਾਯਂ ਪਾਲ਼ਿ – ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਯਾਨਿ ਤਾਨਿ ਭਗਵਤਾ ਅਨੁਞ੍ਞਾਤਾਨਿ ‘ਤਿਚੀਵਰ’ਨ੍ਤਿ ਵਾ ‘ਵਸ੍ਸਿਕਸਾਟਿਕਾ’ਤਿ ਵਾ ‘ਨਿਸੀਦਨ’ਨ੍ਤਿ ਵਾ ‘ਪਚ੍ਚਤ੍ਥਰਣ’ਨ੍ਤਿ ਵਾ ‘ਕਣ੍ਡੁਪ੍ਪਟਿਚ੍ਛਾਦੀ’ਤਿ ਵਾ ਮੁਖਪੁਞ੍ਛਨਚੋਲ਼ਕਨ੍ਤਿ ਵਾ ਪਰਿਕ੍ਖਾਰਚੋਲ਼ਨ੍ਤਿ ਵਾ ਸਬ੍ਬਾਨਿ ਤਾਨਿ ਅਧਿਟ੍ਠਾਤਬ੍ਬਾਨੀਤਿ ਨੁ ਖੋ ਉਦਾਹੁ ਵਿਕਪ੍ਪੇਤਬ੍ਬਾਨੀ’’ਤਿ, ਭਗਵਤੋ ਏਤਮਤ੍ਥਂ ਆਰੋਚੇਸੁਂ –

‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਚੀਵਰਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ; ਵਸ੍ਸਿਕਸਾਟਿਕਂ ਵਸ੍ਸਾਨਂ ਚਾਤੁਮਾਸਂ ਅਧਿਟ੍ਠਾਤੁਂ ਤਤੋ ਪਰਂ ਵਿਕਪ੍ਪੇਤੁਂ; ਨਿਸੀਦਨਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ; ਪਚ੍ਚਤ੍ਥਰਣਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ; ਕਣ੍ਡੁਪ੍ਪਟਿਚ੍ਛਾਦਿਂ ਯਾਵਆਬਾਧਾ ਅਧਿਟ੍ਠਾਤੁਂ ਤਤੋ ਪਰਂ ਵਿਕਪ੍ਪੇਤੁਂ; ਮੁਖਪੁਞ੍ਛਨਚੋਲ਼ਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ; ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁ’’ਨ੍ਤਿ (ਮਹਾਵ. ੩੫੮).

‘‘ਤਤ੍ਥ ਤਿਚੀਵਰਂ’’ ਅਧਿਟ੍ਠਹਨ੍ਤੇਨ ਰਜਿਤ੍ਵਾ ਕਪ੍ਪਬਿਨ੍ਦੁਂ ਦਤ੍ਵਾ ਪਮਾਣਯੁਤ੍ਤਮੇਵ ਅਧਿਟ੍ਠਾਤਬ੍ਬਂ. ਤਸ੍ਸ ਪਮਾਣਂ ਉਕ੍ਕਟ੍ਠਪਰਿਚ੍ਛੇਦੇਨ ਸੁਗਤਚੀਵਰਤੋ ਊਨਕਂ ਵਟ੍ਟਤਿ, ਲਾਮਕਪਰਿਚ੍ਛੇਦੇਨ ਸਙ੍ਘਾਟਿਯਾ ਉਤ੍ਤਰਾਸਙ੍ਗਸ੍ਸ ਚ ਦੀਘਤੋ ਮੁਟ੍ਠਿਪਞ੍ਚਕਂ ਤਿਰਿਯਂ ਮੁਟ੍ਠਿਤ੍ਤਿਕਂ ਪਮਾਣਂ ਵਟ੍ਟਤਿ. ਅਨ੍ਤਰਵਾਸਕੋ ਦੀਘਤੋ ਮੁਟ੍ਠਿਪਞ੍ਚਕੋ ਤਿਰਿਯਂ ਦ੍ਵਿਹਤ੍ਥੋਪਿ ਵਟ੍ਟਤਿ. ਪਾਰੁਪਣੇਨਪਿ ਹਿ ਸਕ੍ਕਾ ਨਾਭਿਂ ਪਟਿਚ੍ਛਾਦੇਤੁਨ੍ਤਿ. ਵੁਤ੍ਤਪ੍ਪਮਾਣਤੋ ਪਨ ਅਤਿਰੇਕਂ ਊਨਕਞ੍ਚ ਪਰਿਕ੍ਖਾਰਚੋਲ਼ਨ੍ਤਿ ਅਧਿਟ੍ਠਾਤਬ੍ਬਂ.

ਤਤ੍ਥ ਯਸ੍ਮਾ ‘‘ਦ੍ਵੇ ਚੀਵਰਸ੍ਸ ਅਧਿਟ੍ਠਾਨਾ – ਕਾਯੇਨ ਵਾ ਅਧਿਟ੍ਠੇਤਿ, ਵਾਚਾਯ ਵਾ ਅਧਿਟ੍ਠੇਤੀ’’ਤਿ (ਪਰਿ. ੩੨੨) ਵੁਤ੍ਤਂ, ਤਸ੍ਮਾ ਪੁਰਾਣਸਙ੍ਘਾਟਿਂ ‘‘ਇਮਂ ਸਙ੍ਘਾਟਿਂ ਪਚ੍ਚੁਦ੍ਧਰਾਮੀ’’ਤਿ ਪਚ੍ਚੁਦ੍ਧਰਿਤ੍ਵਾ ਨਵਂ ਸਙ੍ਘਾਟਿਂ ਹਤ੍ਥੇਨ ਗਹੇਤ੍ਵਾ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ ਚਿਤ੍ਤੇਨ ਆਭੋਗਂ ਕਤ੍ਵਾ ਕਾਯਵਿਕਾਰਂ ਕਰੋਨ੍ਤੇਨ ਕਾਯੇਨ ਅਧਿਟ੍ਠਾਤਬ੍ਬਾ. ਇਦਂ ਕਾਯੇਨ ਅਧਿਟ੍ਠਾਨਂ, ਤਂ ਯੇਨ ਕੇਨਚਿ ਸਰੀਰਾਵਯਵੇਨ ਅਫੁਸਨ੍ਤਸ੍ਸ ਨ ਵਟ੍ਟਤਿ. ਵਾਚਾਯ ਅਧਿਟ੍ਠਾਨੇ ਪਨ ਵਚੀਭੇਦਂ ਕਤ੍ਵਾ ਵਾਚਾਯ ਅਧਿਟ੍ਠਾਤਬ੍ਬਾ. ਤਤ੍ਰ ਦੁਵਿਧਂ ਅਧਿਟ੍ਠਾਨਂ – ਸਚੇ ਹਤ੍ਥਪਾਸੇ ਹੋਤਿ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ ਵਾਚਾ ਭਿਨ੍ਦਿਤਬ੍ਬਾ. ਅਥ ਅਨ੍ਤੋਗਬ੍ਭੇ ਵਾ ਉਪਰਿਪਾਸਾਦੇ ਵਾ ਸਾਮਨ੍ਤਵਿਹਾਰੇ ਵਾ ਹੋਤਿ ਠਪਿਤਟ੍ਠਾਨਂ ਸਲ੍ਲਕ੍ਖੇਤ੍ਵਾ ‘‘ਏਤਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ ਵਾਚਾ ਭਿਨ੍ਦਿਤਬ੍ਬਾ. ਏਸ ਨਯੋ ਉਤ੍ਤਰਾਸਙ੍ਗੇ ਅਨ੍ਤਰਵਾਸਕੇ ਚ. ਨਾਮਮਤ੍ਤਮੇਵ ਹਿ ਵਿਸੇਸੋ. ਤਸ੍ਮਾ ਸਬ੍ਬਾਨਿ ਸਙ੍ਘਾਟਿਂ ਉਤ੍ਤਰਾਸਙ੍ਗਂ ਅਨ੍ਤਰਵਾਸਕਨ੍ਤਿ ਏਵਂ ਅਤ੍ਤਨੋ ਨਾਮੇਨੇਵ ਅਧਿਟ੍ਠਾਤਬ੍ਬਾਨਿ. ਸਚੇ ਅਧਿਟ੍ਠਹਿਤ੍ਵਾ ਠਪਿਤਵਤ੍ਥੇਹਿ ਸਙ੍ਘਾਟਿਆਦੀਨਿ ਕਰੋਤਿ, ਨਿਟ੍ਠਿਤੇ ਰਜਨੇ ਚ ਕਪ੍ਪੇ ਚ ਇਮਂ ‘‘ਪਚ੍ਚੁਦ੍ਧਰਾਮੀ’’ਤਿ ਪਚ੍ਚੁਦ੍ਧਰਿਤ੍ਵਾ ਪੁਨ ਅਧਿਟ੍ਠਾਤਬ੍ਬਾਨਿ. ਅਧਿਟ੍ਠਿਤੇਨ ਪਨ ਸਦ੍ਧਿਂ ਮਹਨ੍ਤਤਰਮੇਵ ਦੁਤਿਯਪਟ੍ਟਂ ਵਾ ਖਣ੍ਡਂ ਵਾ ਸਂਸਿਬ੍ਬਨ੍ਤੇਨ ਪੁਨ ਅਧਿਟ੍ਠਾਤਬ੍ਬਮੇਵ. ਸਮੇ ਵਾ ਖੁਦ੍ਦਕੇ ਵਾ ਅਧਿਟ੍ਠਾਨਕਿਚ੍ਚਂ ਨਤ੍ਥਿ.

ਤਿਚੀਵਰਂ ਪਨ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤੁਂ ਵਟ੍ਟਤਿ ਨ ਵਟ੍ਟਤੀਤਿ? ਮਹਾਪਦੁਮਤ੍ਥੇਰੋ ਕਿਰਾਹ – ‘‘ਤਿਚੀਵਰਂ ਤਿਚੀਵਰਮੇਵ ਅਧਿਟ੍ਠਾਤਬ੍ਬਂ. ਸਚੇ ਪਰਿਕ੍ਖਾਰਚੋਲ਼ਾਧਿਟ੍ਠਾਨਂ ਲਭੇਯ੍ਯ ਉਦੋਸਿਤਸਿਕ੍ਖਾਪਦੇ ਪਰਿਹਾਰੋ ਨਿਰਤ੍ਥਕੋ ਭਵੇਯ੍ਯਾ’’ਤਿ. ਏਵਂ ਵੁਤ੍ਤੇ ਕਿਰ ਅਵਸੇਸਾ ਭਿਕ੍ਖੂ ਆਹਂਸੁ – ‘‘ਪਰਿਕ੍ਖਾਰਚੋਲ਼ਮ੍ਪਿ ਭਗਵਤਾਵ ਅਧਿਟ੍ਠਾਤਬ੍ਬਨ੍ਤਿ ਵੁਤ੍ਤਂ, ਤਸ੍ਮਾ ਵਟ੍ਟਤੀ’’ਤਿ. ਮਹਾਪਚ੍ਚਰਿਯਮ੍ਪਿ ਵੁਤ੍ਤਂ ‘‘ਪਰਿਕ੍ਖਾਰਚੋਲ਼ਂ ਨਾਮ ਪਾਟੇਕ੍ਕਂ ਨਿਧਾਨਮੁਖਮੇਤਨ੍ਤਿ ਤਿਚੀਵਰਂ ਪਰਿਕ੍ਖਾਰਚੋਲ਼ਨ੍ਤਿ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਉਦੋਸਿਤਸਿਕ੍ਖਾਪਦੇ ਪਨ ਤਿਚੀਵਰਂ ਅਧਿਟ੍ਠਹਿਤ੍ਵਾ ਪਰਿਹਰਨ੍ਤਸ੍ਸ ਪਰਿਹਾਰੋ ਵੁਤ੍ਤੋ’’ਤਿ. ਉਭਤੋਵਿਭਙ੍ਗਭਾਣਕੋ ਪੁਣ੍ਣਵਾਲਿਕਵਾਸੀ ਮਹਾਤਿਸ੍ਸਤ੍ਥੇਰੋਪਿ ਕਿਰ ਆਹ – ‘‘ਮਯਂ ਪੁਬ੍ਬੇ ਮਹਾਥੇਰਾਨਂ ਅਸ੍ਸੁਮ੍ਹ, ਅਰਞ੍ਞਵਾਸਿਨੋ ਭਿਕ੍ਖੂ ਰੁਕ੍ਖਸੁਸਿਰਾਦੀਸੁ ਚੀਵਰਂ ਠਪੇਤ੍ਵਾ ਪਧਾਨਂ ਪਦਹਨਤ੍ਥਾਯ ਗਚ੍ਛਨ੍ਤਿ. ਸਾਮਨ੍ਤਵਿਹਾਰੇ ਧਮ੍ਮਸਵਨਤ੍ਥਾਯ ਗਤਾਨਞ੍ਚ ਨੇਸਂ ਸੂਰਿਯੇ ਉਟ੍ਠਿਤੇ ਸਾਮਣੇਰਾ ਵਾ ਦਹਰਭਿਕ੍ਖੂ ਵਾ ਪਤ੍ਤਚੀਵਰਂ ਗਹੇਤ੍ਵਾ ਗਚ੍ਛਨ੍ਤਿ, ਤਸ੍ਮਾ ਸੁਖਪਰਿਭੋਗਤ੍ਥਂ ਤਿਚੀਵਰਂ ਪਰਿਕ੍ਖਾਰਚੋਲ਼ਨ੍ਤਿ ਅਧਿਟ੍ਠਾਤੁਂ ਵਟ੍ਟਤੀ’’ਤਿ. ਮਹਾਪਚ੍ਚਰਿਯਮ੍ਪਿ ਵੁਤ੍ਤਂ ਪੁਬ੍ਬੇ ਆਰਞ੍ਞਿਕਾ ਭਿਕ੍ਖੂ ਅਬਦ੍ਧਸੀਮਾਯਂ ਦੁਪ੍ਪਰਿਹਾਰਨ੍ਤਿ ਤਿਚੀਵਰਂ ਪਰਿਕ੍ਖਾਰਚੋਲ਼ਮੇਵ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਂਸੂ’’ਤਿ.

‘‘ਵਸ੍ਸਿਕਸਾਟਿਕਾ’’ ਅਨਤਿਰਿਤ੍ਤਪ੍ਪਮਾਣਾ ਨਾਮਂ ਗਹੇਤ੍ਵਾ ਵੁਤ੍ਤਨਯੇਨੇਵ ਚਤ੍ਤਾਰੋ ਵਸ੍ਸਿਕੇ ਮਾਸੇ ਅਧਿਟ੍ਠਾਤਬ੍ਬਾ, ਤਤੋ ਪਰਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾ. ਵਣ੍ਣਭੇਦਮਤ੍ਤਰਤ੍ਤਾਪਿ ਚੇਸਾ ਵਟ੍ਟਤਿ. ਦ੍ਵੇ ਪਨ ਨ ਵਟ੍ਟਨ੍ਤਿ. ‘‘ਨਿਸੀਦਨਂ’’ ਵੁਤ੍ਤਨਯੇਨ ਅਧਿਟ੍ਠਾਤਬ੍ਬਮੇਵ, ਤਞ੍ਚ ਖੋ ਪਮਾਣਯੁਤ੍ਤਂ ਏਕਮੇਵ, ਦ੍ਵੇ ਨ ਵਟ੍ਟਨ੍ਤਿ. ‘‘ਪਚ੍ਚਤ੍ਥਰਣ’’ਮ੍ਪਿ ਅਧਿਟ੍ਠਾਤਬ੍ਬਮੇਵ, ਤਂ ਪਨ ਮਹਨ੍ਤਮ੍ਪਿ ਵਟ੍ਟਤਿ, ਏਕਮ੍ਪਿ ਵਟ੍ਟਤਿ, ਬਹੂਨਿਪਿ ਵਟ੍ਟਨ੍ਤਿ. ਨੀਲਮ੍ਪਿ ਪੀਤਕਮ੍ਪਿ ਸਦਸਮ੍ਪਿ ਪੁਪ੍ਫਦਸਮ੍ਪੀਤਿ ਸਬ੍ਬਪ੍ਪਕਾਰਂ ਵਟ੍ਟਤਿ. ਸਕਿਂ ਅਧਿਟ੍ਠਿਤਂ ਅਧਿਟ੍ਠਿਤਮੇਵ ਹੋਤਿ. ‘‘ਕਣ੍ਡੁਪ੍ਪਟਿਚ੍ਛਾਦਿ’’ ਯਾਵ ਆਬਾਧੋ ਅਤ੍ਥਿ, ਤਾਵ ਪਮਾਣਿਕਾ ਅਧਿਟ੍ਠਾਤਬ੍ਬਾ. ਆਬਾਧੇ ਵੂਪਸਨ੍ਤੇ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾ, ਏਕਾਵ ਵਟ੍ਟਤਿ. ‘‘ਮੁਖਪੁਞ੍ਛਨਚੋਲ਼ਂ’’ ਅਧਿਟ੍ਠਾਤਬ੍ਬਮੇਵ, ਯਾਵ ਏਕਂ ਧੋਵਿਯਤਿ, ਤਾਵ ਅਞ੍ਞਂ ਪਰਿਭੋਗਤ੍ਥਾਯ ਇਚ੍ਛਿਤਬ੍ਬਨ੍ਤਿ ਦ੍ਵੇ ਵਟ੍ਟਨ੍ਤਿ. ਅਪਰੇ ਪਨ ਥੇਰਾ ‘‘ਨਿਧਾਨਮੁਖਮੇਤਂ ਬਹੂਨਿਪਿ ਵਟ੍ਟਨ੍ਤੀ’’ਤਿ ਵਦਨ੍ਤਿ. ਪਰਿਕ੍ਖਾਰਚੋਲ਼ੇ ਗਣਨਾ ਨਤ੍ਥਿ, ਯਤ੍ਤਕਂ ਇਚ੍ਛਤਿ ਤਤ੍ਤਕਂ ਅਧਿਟ੍ਠਾਤਬ੍ਬਮੇਵ. ਥਵਿਕਾਪਿ ਪਰਿਸ੍ਸਾਵਨਮ੍ਪਿ ਵਿਕਪ੍ਪਨੁਪਗਂ ਪਚ੍ਛਿਮਚੀਵਰਪ੍ਪਮਾਣਂ ‘‘ਪਰਿਕ੍ਖਾਰਚੋਲ਼ਕ’’ਨ੍ਤਿ ਅਧਿਟ੍ਠਾਤਬ੍ਬਮੇਵ. ਬਹੂਨਿ ਏਕਤੋ ਕਤ੍ਵਾ ‘‘ਇਮਾਨਿ ਚੀਵਰਾਨਿ ਪਰਿਕ੍ਖਾਰਚੋਲ਼ਾਨਿ ਅਧਿਟ੍ਠਾਮੀ’’ਤਿ ਅਧਿਟ੍ਠਾਤੁਮ੍ਪਿ ਵਟ੍ਟਤਿਯੇਵ. ਭੇਸਜ੍ਜਨਵਕਮ੍ਮਮਾਤਾਪਿਤੁਆਦੀਨਂ ਅਤ੍ਥਾਯ ਠਪੇਨ੍ਤੇਨਪਿ ਅਧਿਟ੍ਠਾਤਬ੍ਬਮੇਵ. ਮਹਾਪਚ੍ਚਰਿਯਂ ਪਨ ‘‘ਅਨਾਪਤ੍ਤੀ’’ਤਿ ਵੁਤ੍ਤਂ. ਮਞ੍ਚਭਿਸਿ ਪੀਠਕਭਿਸਿ ਬਿਮ੍ਬੋਹਨਂ ਪਾਵਾਰੋ ਕੋਜਵੋਤਿ ਏਤੇਸੁ ਪਨ ਸੇਨਾਸਨਪਰਿਕ੍ਖਾਰਤ੍ਥਾਯ ਦਿਨ੍ਨਪਚ੍ਚਤ੍ਥਰਣੇ ਚ ਅਧਿਟ੍ਠਾਨਕਿਚ੍ਚਂ ਨਤ੍ਥਿਯੇਵ.

ਅਧਿਟ੍ਠਿਤਚੀਵਰਂ ਪਨ ਪਰਿਭੁਞ੍ਜਤੋ ਕਥਂ ਅਧਿਟ੍ਠਾਨਂ ਵਿਜਹਤੀਤਿ? ਅਞ੍ਞਸ੍ਸ ਦਾਨੇਨ, ਅਚ੍ਛਿਨ੍ਦਿਤ੍ਵਾ ਗਹਣੇਨ, ਵਿਸ੍ਸਾਸਗ੍ਗਾਹੇਨ, ਹੀਨਾਯਾਵਤ੍ਤਨੇਨ, ਸਿਕ੍ਖਾਪਚ੍ਚਕ੍ਖਾਨੇਨ, ਕਾਲਂਕਿਰਿਯਾਯ, ਲਿਙ੍ਗਪਰਿਵਤ੍ਤਨੇਨ, ਪਚ੍ਚੁਦ੍ਧਰਣੇਨ, ਛਿਦ੍ਦਭਾਵੇਨਾਤਿ ਇਮੇਹਿ ਨਵਹਿ ਕਾਰਣੇਹਿ ਵਿਜਹਤਿ. ਤਤ੍ਥ ਪੁਰਿਮੇਹਿ ਅਟ੍ਠਹਿ ਸਬ੍ਬਚੀਵਰਾਨਿ ਅਧਿਟ੍ਠਾਨਂ ਵਿਜਹਨ੍ਤਿ, ਛਿਦ੍ਦਭਾਵੇਨ ਪਨ ਤਿਚੀਵਰਸ੍ਸੇਵ ਸਬ੍ਬਅਟ੍ਠਕਥਾਸੁ ਅਧਿਟ੍ਠਾਨਵਿਜਹਨਂ ਵੁਤ੍ਤਂ, ਤਞ੍ਚ ਨਖਪਿਟ੍ਠਿਪ੍ਪਮਾਣੇਨ ਛਿਦ੍ਦੇਨ. ਤਤ੍ਥ ਨਖਪਿਟ੍ਠਿਪ੍ਪਮਾਣਂ ਕਨਿਟ੍ਠਙ੍ਗੁਲਿਨਖਵਸੇਨ ਵੇਦਿਤਬ੍ਬਂ, ਛਿਦ੍ਦਞ੍ਚ ਵਿਨਿਬ੍ਬਿਦ੍ਧਛਿਦ੍ਦਮੇਵ. ਛਿਦ੍ਦਸ੍ਸ ਹਿ ਅਬ੍ਭਨ੍ਤਰੇ ਏਕਤਨ੍ਤੁ ਚੇਪਿ ਅਚ੍ਛਿਨ੍ਨੋ ਹੋਤਿ, ਰਕ੍ਖਤਿ. ਤਤ੍ਥ ਸਙ੍ਘਾਟਿਯਾ ਚ ਉਤ੍ਤਰਾਸਙ੍ਗਸ੍ਸ ਚ ਦੀਘਨ੍ਤਤੋ ਵਿਦਤ੍ਥਿਪ੍ਪਮਾਣਸ੍ਸ ਤਿਰਿਯਨ੍ਤਤੋ ਅਟ੍ਠਙ੍ਗੁਲਪ੍ਪਮਾਣਸ੍ਸ ਪਦੇਸਸ੍ਸ ਓਰਤੋ ਛਿਦ੍ਦਂ ਅਧਿਟ੍ਠਾਨਂ ਭਿਨ੍ਦਤਿ, ਪਰਤੋ ਨ ਭਿਨ੍ਦਤਿ. ਅਨ੍ਤਰਵਾਸਕਸ੍ਸ ਪਨ ਦੀਘਨ੍ਤਤੋ ਵਿਦਤ੍ਥਿਪ੍ਪਮਾਣਸ੍ਸੇਵ ਤਿਰਿਯਨ੍ਤਤੋ ਚਤੁਰਙ੍ਗੁਲਪ੍ਪਮਾਣਸ੍ਸ ਪਦੇਸਸ੍ਸ ਓਰਤੋ ਛਿਦ੍ਦਂ ਅਧਿਟ੍ਠਾਨਂ ਭਿਨ੍ਦਤਿ, ਪਰਤੋ ਨ ਭਿਨ੍ਦਤਿ. ਤਸ੍ਮਾ ਜਾਤੇ ਛਿਦ੍ਦੇ ਤਂ ਚੀਵਰਂ ਅਤਿਰੇਕਚੀਵਰਟ੍ਠਾਨੇ ਤਿਟ੍ਠਤਿ, ਸੂਚਿਕਮ੍ਮਂ ਕਤ੍ਵਾ ਪੁਨ ਅਧਿਟ੍ਠਾਤਬ੍ਬਂ. ਮਹਾਸੁਮਤ੍ਥੇਰੋ ਪਨਾਹ – ‘‘ਪਮਾਣਚੀਵਰਸ੍ਸ ਯਤ੍ਥ ਕਤ੍ਥਚਿ ਛਿਦ੍ਦਂ ਅਧਿਟ੍ਠਾਨਂ ਭਿਨ੍ਦਤਿ, ਮਹਨ੍ਤਸ੍ਸ ਪਨ ਪਮਾਣਤੋ ਬਹਿ ਛਿਦ੍ਦਂ ਅਧਿਟ੍ਠਾਨਂ ਨ ਭਿਨ੍ਦਤਿ, ਅਨ੍ਤੋਜਾਤਂ ਭਿਨ੍ਦਤੀ’’ਤਿ. ਕਰਵੀਕਤਿਸ੍ਸਤ੍ਥੇਰੋ ਆਹ – ‘‘ਖੁਦ੍ਦਕਂ ਮਹਨ੍ਤਂ ਨ ਪਮਾਣਂ, ਦ੍ਵੇ ਚੀਵਰਾਨਿ ਪਾਰੁਪਨ੍ਤਸ੍ਸ ਵਾਮਹਤ੍ਥੇ ਸਙ੍ਘਰਿਤ੍ਵਾ ਠਪਿਤਟ੍ਠਾਨੇ ਛਿਦ੍ਦਂ ਅਧਿਟ੍ਠਾਨਂ ਨ ਭਿਨ੍ਦਤਿ, ਓਰਭਾਗੇ ਭਿਨ੍ਦਤਿ. ਅਨ੍ਤਰਵਾਸਕਸ੍ਸਪਿ ਓਵਟ੍ਟਿਕਂ ਕਰੋਨ੍ਤੇਨ ਸਙ੍ਘਰਿਤਟ੍ਠਾਨੇ ਛਿਦ੍ਦਂ ਨ ਭਿਨ੍ਦਤਿ, ਤਤੋ ਓਰਂ ਭਿਨ੍ਦਤੀ’’ਤਿ. ਅਨ੍ਧਕਟ੍ਠਕਥਾਯਂ ਪਨ ਤਿਚੀਵਰੇ ਮਹਾਸੁਮਤ੍ਥੇਰਵਾਦਂ ਪਮਾਣਂ ਕਤ੍ਵਾ ਉਤ੍ਤਰਿਮ੍ਪਿ ਇਦਂ ਵੁਤ੍ਤਂ ‘‘ਪਚ੍ਛਿਮਪ੍ਪਮਾਣਂ ਅਧਿਟ੍ਠਾਨਂ ਰਕ੍ਖਤੀ’’ਤਿ. ਪਰਿਕ੍ਖਾਰਚੋਲ਼ੇ ਦੀਘਸੋ ਅਟ੍ਠਙ੍ਗੁਲੇ ਸੁਗਤਙ੍ਗੁਲੇਨ ਤਿਰਿਯਂ ਚਤੁਰਙ੍ਗੁਲੇ ਯਤ੍ਥ ਕਤ੍ਥਚਿ ਛਿਦ੍ਦਂ ਅਧਿਟ੍ਠਾਨਂ ਵਿਜਹਤਿ. ਮਹਨ੍ਤੇ ਚੋਲ਼ੇ ਤਤੋ ਪਰੇਨ ਛਿਦ੍ਦਂ ਅਧਿਟ੍ਠਾਨਂ ਨ ਵਿਜਹਤਿ. ਏਸ ਨਯੋ ਸਬ੍ਬੇਸੁ ਅਧਿਟ੍ਠਾਤਬ੍ਬਕੇਸੁ ਚੀਵਰੇਸੂ’’ਤਿ.

ਤਤ੍ਥ ਯਸ੍ਮਾ ਸਬ੍ਬੇਸਮ੍ਪਿ ਅਧਿਟ੍ਠਾਤਬ੍ਬਕਚੀਵਰਾਨਂ ਵਿਕਪ੍ਪਨੁਪਗਪਚ੍ਛਿਮਪ੍ਪਮਾਣਤੋ ਅਞ੍ਞਂ ਪਚ੍ਛਿਮਪ੍ਪਮਾਣਂ ਨਾਮ ਨਤ੍ਥਿ, ਯਞ੍ਹਿ ਨਿਸੀਦਨ-ਕਣ੍ਡੁਪ੍ਪਟਿਚ੍ਛਾਦਿ-ਵਸ੍ਸਿਕਸਾਟਿਕਾਨਂ ਪਮਾਣਂ ਵੁਤ੍ਤਂ, ਤਂ ਉਕ੍ਕਟ੍ਠਂ, ਤਤੋ ਉਤ੍ਤਰਿ ਪਟਿਸਿਦ੍ਧਤ੍ਤਾ ਨ ਪਚ੍ਛਿਮਂ ਤਤੋ ਹੇਟ੍ਠਾ ਅਪ੍ਪਟਿਸਿਦ੍ਧਤ੍ਤਾ. ਤਿਚੀਵਰਸ੍ਸਾਪਿ ਸੁਗਤਚੀਵਰਪ੍ਪਮਾਣਤੋ ਊਨਕਤ੍ਤਂ ਉਕ੍ਕਟ੍ਠਪ੍ਪਮਾਣਮੇਵ. ਪਚ੍ਛਿਮਂ ਪਨ ਵਿਸੁਂ ਸੁਤ੍ਤੇ ਵੁਤ੍ਤਂ ਨਤ੍ਥਿ. ਮੁਖਪੁਞ੍ਛਨਪਚ੍ਚਤ੍ਥਰਣਪਰਿਕ੍ਖਾਰਚੋਲ਼ਾਨਂ ਉਕ੍ਕਟ੍ਠਪਰਿਚ੍ਛੇਦੋ ਨਤ੍ਥਿਯੇਵ. ਵਿਕਪ੍ਪਨੁਪਗਪਚ੍ਛਿਮੇਨ ਪਨ ਪਚ੍ਛਿਮਪਰਿਚ੍ਛੇਦੋ ਵੁਤ੍ਤੋ. ਤਸ੍ਮਾ ਯਂ ਤਾਵ ਅਨ੍ਧਕਟ੍ਠਕਥਾਯਂ ‘‘ਪਚ੍ਛਿਮਪ੍ਪਮਾਣਂ ਅਧਿਟ੍ਠਾਨਂ ਰਕ੍ਖਤੀ’’ਤਿ ਵਤ੍ਵਾ ਤਤ੍ਥ ਪਰਿਕ੍ਖਾਰਚੋਲ਼ਸ੍ਸੇਵ ਸੁਗਤਙ੍ਗੁਲੇਨ ਅਟ੍ਠਙ੍ਗੁਲਚਤੁਰਙ੍ਗੁਲਪਚ੍ਛਿਮਪ੍ਪਮਾਣਂ ਦਸ੍ਸੇਤ੍ਵਾ ਇਤਰੇਸਂ ਤਿਚੀਵਰਾਦੀਨਂ ਮੁਟ੍ਠਿਪਞ੍ਚਕਾਦਿਪਭੇਦਂ ਪਚ੍ਛਿਮਪ੍ਪਮਾਣਂ ਸਨ੍ਧਾਯ ‘‘ਏਸ ਨਯੋ ਸਬ੍ਬੇਸੁ ਅਧਿਟ੍ਠਾਤਬ੍ਬਕੇਸੁਚੀਵਰੇਸੂ’’ਤਿ ਵੁਤ੍ਤਂ, ਤਂ ਨ ਸਮੇਤਿ.

ਕਰਵੀਕਤਿਸ੍ਸਤ੍ਥੇਰਵਾਦੇਪਿ ਦੀਘਨ੍ਤਤੋਯੇਵ ਛਿਦ੍ਦਂ ਦਸ੍ਸਿਤਂ, ਤਿਰਿਯਨ੍ਤਤੋ ਨ ਦਸ੍ਸਿਤਂ, ਤਸ੍ਮਾ ਸੋ ਅਪਰਿਚ੍ਛਿਨ੍ਨੋ. ਮਹਾਸੁਮਤ੍ਥੇਰਵਾਦੇ ‘‘ਪਮਾਣਚੀਵਰਸ੍ਸ ਯਤ੍ਥ ਕਤ੍ਥਚਿ ਛਿਦ੍ਦਂ ਅਧਿਟ੍ਠਾਨਂ ਭਿਨ੍ਦਤਿ, ਮਹਨ੍ਤਸ੍ਸ ਪਨ ਪਮਾਣਤੋ ਬਹਿ ਛਿਦ੍ਦਂ ਅਧਿਟ੍ਠਾਨਂ ਨ ਭਿਨ੍ਦਤੀ’’ਤਿ ਵੁਤ੍ਤਂ. ਇਦਂ ਪਨ ਨ ਵੁਤ੍ਤਂ – ‘‘ਇਦਂ ਨਾਮ ਪਮਾਣਚੀਵਰਂ ਇਤੋ ਉਤ੍ਤਰਿ ਮਹਨ੍ਤਂ ਚੀਵਰ’’ਨ੍ਤਿ. ਅਪਿਚੇਤ੍ਥ ਤਿਚੀਵਰਾਦੀਨਂ ਮੁਟ੍ਠਿਪਞ੍ਚਕਾਦਿਭੇਦਂ ਪਚ੍ਛਿਮਪ੍ਪਮਾਣਨ੍ਤਿ ਅਧਿਪ੍ਪੇਤਂ. ਤਤ੍ਥ ਯਦਿ ਪਚ੍ਛਿਮਪ੍ਪਮਾਣਤੋ ਬਹਿ ਛਿਦ੍ਦਂ ਅਧਿਟ੍ਠਾਨਂ ਨ ਭਿਨ੍ਦੇਯ੍ਯ, ਉਕ੍ਕਟ੍ਠਪਤ੍ਤਸ੍ਸਾਪਿ ਮਜ੍ਝਿਮਪਤ੍ਤਸ੍ਸ ਵਾ ਓਮਕਪ੍ਪਮਾਣਤੋ ਬਹਿ ਛਿਦ੍ਦਂ ਅਧਿਟ੍ਠਾਨਂ ਨ ਭਿਨ੍ਦੇਯ੍ਯ, ਨ ਚ ਨ ਭਿਨ੍ਦਤਿ. ਤਸ੍ਮਾ ਅਯਮ੍ਪਿ ਵਾਦੋ ਅਪਰਿਚ੍ਛਿਨ੍ਨੋ.

ਯੋ ਪਨਾਯਂ ਸਬ੍ਬਪਠਮੋ ਅਟ੍ਠਕਥਾਵਾਦੋ, ਅਯਮੇਵੇਤ੍ਥ ਪਮਾਣਂ. ਕਸ੍ਮਾ? ਪਰਿਚ੍ਛੇਦਸਬ੍ਭਾਵਤੋ. ਤਿਚੀਵਰਸ੍ਸ ਹਿ ਪਚ੍ਛਿਮਪ੍ਪਮਾਣਞ੍ਚ ਛਿਦ੍ਦਪ੍ਪਮਾਣਞ੍ਚ ਛਿਦ੍ਦੁਪ੍ਪਤ੍ਤਿਦੇਸਪ੍ਪਮਾਣਞ੍ਚ ਸਬ੍ਬਅਟ੍ਠਕਥਾਸੁਯੇਵ ਪਰਿਚ੍ਛਿਨ੍ਦਿਤ੍ਵਾ ਵੁਤ੍ਤਂ, ਤਸ੍ਮਾ ਸ੍ਵੇਵ ਵਾਦੋ ਪਮਾਣਂ. ਅਦ੍ਧਾ ਹਿ ਸੋ ਭਗਵਤੋ ਅਧਿਪ੍ਪਾਯਂ ਅਨੁਗਨ੍ਤ੍ਵਾ ਵੁਤ੍ਤੋ. ਇਤਰੇਸੁ ਪਨ ਨੇਵ ਪਰਿਚ੍ਛੇਦੋ ਅਤ੍ਥਿ, ਨ ਪੁਬ੍ਬਾਪਰਂ ਸਮੇਤੀਤਿ.

ਯੋ ਪਨ ਦੁਬ੍ਬਲਟ੍ਠਾਨੇ ਪਠਮਂ ਅਗ੍ਗਲ਼ਂ ਦਤ੍ਵਾ ਪਚ੍ਛਾ ਦੁਬ੍ਬਲਟ੍ਠਾਨਂ ਛਿਨ੍ਦਿਤ੍ਵਾ ਅਪਨੇਤਿ, ਅਧਿਟ੍ਠਾਨਂ ਨ ਭਿਜ੍ਜਤਿ. ਮਣ੍ਡਲਪਰਿਵਤ੍ਤਨੇਪਿ ਏਸੇਵ ਨਯੋ. ਦੁਪਟ੍ਟਸ੍ਸ ਏਕਸ੍ਮਿਂ ਪਟਲੇ ਛਿਦ੍ਦੇ ਵਾ ਜਾਤੇ ਗਲ਼ਿਤੇ ਵਾ ਅਧਿਟ੍ਠਾਨਂ ਨ ਭਿਜ੍ਜਤਿ, ਖੁਦ੍ਦਕਂ ਚੀਵਰਂ ਮਹਨ੍ਤਂ ਕਰੋਤਿ, ਮਹਨ੍ਤਂ ਵਾ ਖੁਦ੍ਦਕਂ ਕਰੋਤਿ, ਅਧਿਟ੍ਠਾਨਂ ਨ ਭਿਜ੍ਜਤਿ. ਉਭੋ ਕੋਟਿਯੋ ਮਜ੍ਝੇ ਕਰੋਨ੍ਤੋ ਸਚੇ ਪਠਮਂ ਛਿਨ੍ਦਿਤ੍ਵਾ ਪਚ੍ਛਾ ਘਟੇਤਿ, ਅਧਿਟ੍ਠਾਨਂ ਭਿਜ੍ਜਤਿ. ਅਥ ਘਟੇਤ੍ਵਾ ਛਿਨ੍ਦਤਿ, ਨ ਭਿਜ੍ਜਤਿ, ਰਜਕੇਹਿ ਧੋਵਾਪੇਤ੍ਵਾ ਸੇਤਂ ਕਾਰਾਪੇਨ੍ਤਸ੍ਸਾਪਿ ਅਧਿਟ੍ਠਾਨਂ ਅਧਿਟ੍ਠਾਨਮੇਵਾਤਿ. ਅਯਂ ਤਾਵ ‘‘ਅਨ੍ਤੋਦਸਾਹਂ ਅਧਿਟ੍ਠੇਤਿ ਵਿਕਪ੍ਪੇਤੀ’’ਤਿ ਏਤ੍ਥ ਅਧਿਟ੍ਠਾਨੇ ਵਿਨਿਚ੍ਛਯੋ.

ਵਿਕਪ੍ਪਨੇ ਪਨ ਦ੍ਵੇ ਵਿਕਪ੍ਪਨਾ – ਸਮ੍ਮੁਖਾਵਿਕਪ੍ਪਨਾ ਚ ਪਰਮ੍ਮੁਖਾਵਿਕਪ੍ਪਨਾ ਚ. ਕਥਂ ਸਮ੍ਮੁਖਾਵਿਕਪ੍ਪਨਾ ਹੋਤੀਤਿ? ਚੀਵਰਾਨਂ ਏਕਬਹੁਭਾਵਂ ਸਨ੍ਨਿਹਿਤਾਸਨ੍ਨਿਹਿਤਭਾਵਞ੍ਚ ਞਤ੍ਵਾ ‘‘‘ਇਮਂ ਚੀਵਰ’ਨ੍ਤਿ ਵਾ ‘ਇਮਾਨਿ ਚੀਵਰਾਨੀ’ਤਿ ਵਾ ‘ਏਤਂ ਚੀਵਰ’ਨ੍ਤਿ ਵਾ ‘ਏਤਾਨਿ ਚੀਵਰਾਨੀ’’’ਤਿ ਵਾ ‘‘ਤੁਯ੍ਹਂ ਵਿਕਪ੍ਪੇਮੀ’’ਤਿ ਵਤ੍ਤਬ੍ਬਂ, ਅਯਮੇਕਾ ਸਮ੍ਮੁਖਾਵਿਕਪ੍ਪਨਾ. ਏਤ੍ਤਾਵਤਾ ਨਿਧੇਤੁਂ ਵਟ੍ਟਤਿ, ਪਰਿਭੁਞ੍ਜਿਤੁਂ ਪਨ ਵਿਸ੍ਸਜ੍ਜੇਤੁਂ ਵਾ ਅਧਿਟ੍ਠਾਤੁਂ ਵਾ ਨ ਵਟ੍ਟਤਿ. ‘‘ਮਯ੍ਹਂ ਸਨ੍ਤਕਂ, ਮਯ੍ਹਂ ਸਨ੍ਤਕਾਨਿ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਵਾ ਕਰੋਹੀ’’ਤਿ ਏਵਂ ਪਨ ਵੁਤ੍ਤੇ ਪਚ੍ਚੁਦ੍ਧਾਰੋ ਨਾਮ ਹੋਤਿ. ਤਤੋਪਭੁਤਿ ਪਰਿਭੋਗਾਦਯੋਪਿ ਵਟ੍ਟਨ੍ਤਿ.

ਅਪਰੋਪਿ ਨਯੋ – ਤਥੇਵ ਚੀਵਰਾਨਂ ਏਕਬਹੁਭਾਵਂ ਸਨ੍ਨਿਹਿਤਾਸਨ੍ਨਿਹਿਤਭਾਵਞ੍ਚ ਞਤ੍ਵਾ ਤਸ੍ਸੇਵ ਭਿਕ੍ਖੁਨੋ ਸਨ੍ਤਿਕੇ ‘‘‘ਇਮਂ ਚੀਵਰ’ਨ੍ਤਿ ਵਾ ‘ਇਮਾਨਿ ਚੀਵਰਾਨੀ’ਤਿ ਵਾ ‘ਏਤਂ ਚੀਵਰ’ਨ੍ਤਿ ਵਾ ‘ਏਤਾਨਿ ਚੀਵਰਾਨੀ’’’ਤਿ ਵਾ ਵਤ੍ਵਾ ਪਞ੍ਚਸੁ ਸਹਧਮ੍ਮਿਕੇਸੁ ਅਞ੍ਞਤਰਸ੍ਸ ਅਤ੍ਤਨਾ ਅਭਿਰੁਚਿਤਸ੍ਸ ਯਸ੍ਸ ਕਸ੍ਸਚਿ ਨਾਮਂ ਗਹੇਤ੍ਵਾ ‘‘‘ਤਿਸ੍ਸਸ੍ਸ ਭਿਕ੍ਖੁਨੋ ਵਿਕਪ੍ਪੇਮੀ’ਤਿ ਵਾ ‘ਤਿਸ੍ਸਾਯ ਭਿਕ੍ਖੁਨਿਯਾ, ਸਿਕ੍ਖਮਾਨਾਯ, ਤਿਸ੍ਸਸ੍ਸ ਸਾਮਣੇਰਸ੍ਸ, ਤਿਸ੍ਸਾਯ ਸਾਮਣੇਰਿਯਾ ਵਿਕਪ੍ਪੇਮੀ’’’ਤਿ ਵਾ ਵਤ੍ਤਬ੍ਬਂ, ਅਯਂ ਅਪਰਾਪਿ ਸਮ੍ਮੁਖਾਵਿਕਪ੍ਪਨਾ. ਏਤ੍ਤਾਵਤਾ ਨਿਧੇਤੁਂ ਵਟ੍ਟਤਿ, ਪਰਿਭੋਗਾਦੀਸੁ ਪਨ ਏਕਮ੍ਪਿ ਨ ਵਟ੍ਟਤਿ. ਤੇਨ ਪਨ ਭਿਕ੍ਖੁਨਾ ‘‘ਤਿਸ੍ਸਸ੍ਸ ਭਿਕ੍ਖੁਨੋ ਸਨ੍ਤਕਂ…ਪੇ… ਤਿਸ੍ਸਾਯ ਸਾਮਣੇਰਿਯਾ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਵਾ ਕਰੋਹੀ’’ਤਿ ਵੁਤ੍ਤੇ ਪਚ੍ਚੁਦ੍ਧਾਰੋ ਨਾਮ ਹੋਤਿ. ਤਤੋਪਭੁਤਿ ਪਰਿਭੋਗਾਦਯੋਪਿ ਵਟ੍ਟਨ੍ਤਿ.

ਕਥਂ ਪਰਮ੍ਮੁਖਾਵਿਕਪ੍ਪਨਾ ਹੋਤੀਤਿ? ਚੀਵਰਾਨਂ ਤਥੇਵ ਏਕਬਹੁਭਾਵਂ ਸਨ੍ਨਿਹਿਤਾਸਨ੍ਨਿਹਿਤਭਾਵਞ੍ਚ ਞਤ੍ਵਾ ‘‘‘ਇਮਂ ਚੀਵਰ’ਨ੍ਤਿ ਵਾ ‘ਇਮਾਨਿ ਚੀਵਰਾਨੀ’ਤਿ ਵਾ ‘ਏਤਂ ਚੀਵਰ’ਨ੍ਤਿ ਵਾ ‘ਏਤਾਨਿ ਚੀਵਰਾਨੀ’’’ਤਿ ਵਾ ਵਤ੍ਵਾ ‘‘ਤੁਯ੍ਹਂ ਵਿਕਪ੍ਪਨਤ੍ਥਾਯ ਦਮ੍ਮੀ’’ਤਿ ਵਤ੍ਤਬ੍ਬਂ. ਤੇਨ ਵਤ੍ਤਬ੍ਬੋ – ‘‘ਕੋ ਤੇ ਮਿਤ੍ਤੋ ਵਾ ਸਨ੍ਦਿਟ੍ਠੋ ਵਾ’’ਤਿ? ਤਤੋ ਇਤਰੇਨ ਪੁਰਿਮਨਯੇਨੇਵ ‘‘ਤਿਸ੍ਸੋ ਭਿਕ੍ਖੂਤਿ ਵਾ…ਪੇ… ਤਿਸ੍ਸਾ ਸਾਮਣੇਰੀ’’ਤਿ ਵਾ ਵਤ੍ਤਬ੍ਬਂ. ਪੁਨ ਤੇਨ ਭਿਕ੍ਖੁਨਾ ‘‘ਅਹਂ ਤਿਸ੍ਸਸ੍ਸ ਭਿਕ੍ਖੁਨੋ ਦਮ੍ਮੀਤਿ ਵਾ…ਪੇ… ਤਿਸ੍ਸਾਯ ਸਾਮਣੇਰਿਯਾ ਦਮ੍ਮੀ’’ਤਿ ਵਾ ਵਤ੍ਤਬ੍ਬਂ, ਅਯਂ ਪਰਮ੍ਮੁਖਾਵਿਕਪ੍ਪਨਾ. ਏਤ੍ਤਾਵਤਾ ਨਿਧੇਤੁਂ ਵਟ੍ਟਤਿ, ਪਰਿਭੋਗਾਦੀਸੁ ਪਨ ਏਕਮ੍ਪਿ ਨ ਵਟ੍ਟਤਿ. ਤੇਨ ਪਨ ਭਿਕ੍ਖੁਨਾ ਦੁਤਿਯਸਮ੍ਮੁਖਾਵਿਕਪ੍ਪਨਾਯਂ ਵੁਤ੍ਤਨਯੇਨੇਵ ‘‘ਇਤ੍ਥਨ੍ਨਾਮਸ੍ਸ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਵਾ ਕਰੋਹੀ’’ਤਿ ਵੁਤ੍ਤੇ ਪਚ੍ਚੁਦ੍ਧਾਰੋ ਨਾਮ ਹੋਤਿ. ਤਤੋਪਭੁਤਿ ਪਰਿਭੋਗਾਦਯੋਪਿ ਵਟ੍ਟਨ੍ਤਿ.

ਦ੍ਵਿਨ੍ਨਂ ਵਿਕਪ੍ਪਨਾਨਂ ਕਿਂ ਨਾਨਾਕਰਣਂ? ਸਮ੍ਮੁਖਾਵਿਕਪ੍ਪਨਾਯਂ ਸਯਂ ਵਿਕਪ੍ਪੇਤ੍ਵਾ ਪਰੇਨ ਪਚ੍ਚੁਦ੍ਧਰਾਪੇਤਿ. ਪਰਮ੍ਮੁਖਾਵਿਕਪ੍ਪਨਾਯ ਪਰੇਨੇਵ ਵਿਕਪ੍ਪਾਪੇਤ੍ਵਾ ਪਰੇਨੇਵ ਪਚ੍ਚੁਦ੍ਧਰਾਪੇਤਿ, ਇਦਮੇਤ੍ਥ ਨਾਨਾਕਰਣਂ. ਸਚੇ ਪਨ ਯਸ੍ਸ ਵਿਕਪ੍ਪੇਤਿ, ਸੋ ਪਞ੍ਞਤ੍ਤਿਕੋਵਿਦੋ ਨ ਹੋਤਿ, ਨ ਜਾਨਾਤਿ ਪਚ੍ਚੁਦ੍ਧਰਿਤੁਂ, ਤਂ ਚੀਵਰਂ ਗਹੇਤ੍ਵਾ ਅਞ੍ਞਸ੍ਸ ਬ੍ਯਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪੁਨ ਵਿਕਪ੍ਪੇਤ੍ਵਾ ਪਚ੍ਚੁਦ੍ਧਰਾਪੇਤਬ੍ਬਂ. ਵਿਕਪ੍ਪਿਤਵਿਕਪ੍ਪਨਾ ਨਾਮੇਸਾ ਵਟ੍ਟਤਿ. ਅਯਂ ‘‘ਵਿਕਪ੍ਪੇਤੀ’’ਤਿ ਇਮਸ੍ਮਿਂ ਪਦੇ ਵਿਨਿਚ੍ਛਯੋ.

‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਚੀਵਰਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁ’’ਨ੍ਤਿਆਦਿਵਚਨਤੋ ਚ ਇਦਂ ‘‘ਵਿਕਪ੍ਪੇਤੀ’’ਤਿ ਅਵਿਸੇਸੇਨ ਵੁਤ੍ਤਵਚਨਂ ਵਿਰੁਦ੍ਧਂ ਵਿਯ ਦਿਸ੍ਸਤਿ, ਨ ਚ ਵਿਰੁਦ੍ਧਂ ਤਥਾਗਤਾ ਭਾਸਨ੍ਤਿ. ਤਸ੍ਮਾ ਏਵਮਸ੍ਸ ਅਤ੍ਥੋ ਵੇਦਿਤਬ੍ਬੋ, ਤਿਚੀਵਰਂ ਤਿਚੀਵਰਸਙ੍ਖੇਪੇਨੇਵ ਪਰਿਹਰਤੋ ਅਧਿਟ੍ਠਾਤੁਮੇਵ ਅਨੁਜਾਨਾਮਿ, ਨ ਵਿਕਪ੍ਪੇਤੁਂ. ਵਸ੍ਸਿਕਸਾਟਿਕਂ ਪਨ ਚਾਤੁਮਾਸਤੋ ਪਰਂ ਵਿਕਪ੍ਪੇਤੁਮੇਵ ਨ ਅਧਿਟ੍ਠਾਤੁਂ. ਏਵਞ੍ਚ ਸਤਿ ਯੋ ਤਿਚੀਵਰੇ ਏਕੇਨ ਚੀਵਰੇਨ ਵਿਪ੍ਪਵਸਿਤੁਕਾਮੋ ਹੋਤਿ, ਤਸ੍ਸ ਤਿਚੀਵਰਾਧਿਟ੍ਠਾਨਂ ਪਚ੍ਚੁਦ੍ਧਰਿਤ੍ਵਾ ਵਿਪ੍ਪਵਾਸਸੁਖਤ੍ਥਂ ਵਿਕਪ੍ਪਨਾਯ ਓਕਾਸੋ ਦਿਨ੍ਨੋ ਹੋਤਿ. ਦਸਾਹਾਤਿਕ੍ਕਮੇ ਚ ਅਨਾਪਤ੍ਤੀਤਿ ਏਤੇਨੁਪਾਯੇਨ ਸਬ੍ਬਤ੍ਥ ਵਿਕਪ੍ਪਨਾਯ ਅਪ੍ਪਟਿਸਿਦ੍ਧਭਾਵੋ ਵੇਦਿਤਬ੍ਬੋ.

ਵਿਸ੍ਸਜ੍ਜੇਤੀਤਿ ਅਞ੍ਞਸ੍ਸ ਦੇਤਿ. ਕਥਂ ਪਨ ਦਿਨ੍ਨਂ ਹੋਤਿ, ਕਥਂ ਗਹਿਤਂ? ‘‘ਇਮਂ ਤੁਯ੍ਹਂ ਦੇਮਿ ਦਦਾਮਿ ਦਜ੍ਜਾਮਿ ਓਣੋਜੇਮਿ ਪਰਿਚ੍ਚਜਾਮਿ ਨਿਸ੍ਸਜ੍ਜਾਮਿ ਵਿਸ੍ਸਜ੍ਜਾਮੀਤਿ ਵਾ ‘‘ਇਤ੍ਥਨ੍ਨਾਮਸ੍ਸ ਦੇਮਿ…ਪੇ… ਨਿਸ੍ਸਜ੍ਜਾਮੀ’’ਤਿ ਵਾ ਵਦਤਿ, ਸਮ੍ਮੁਖਾਪਿ ਪਰਮ੍ਮੁਖਾਪਿ ਦਿਨ੍ਨਂਯੇਵ ਹੋਤਿ. ‘‘ਤੁਯ੍ਹਂ ਗਣ੍ਹਾਹੀ’’ਤਿ ਵੁਤ੍ਤੇ ‘‘ਮਯ੍ਹਂ ਗਣ੍ਹਾਮੀ’’ਤਿ ਵਦਤਿ, ਸੁਦਿਨ੍ਨਂ ਸੁਗ੍ਗਹਿਤਞ੍ਚ. ‘‘ਤਵ ਸਨ੍ਤਕਂ ਕਰੋਹਿ, ਤਵ ਸਨ੍ਤਕਂ ਹੋਤੁ, ਤਵ ਸਨ੍ਤਕਂ ਕਰਿਸ੍ਸਸੀ’’ਤਿ ਵੁਤ੍ਤੇ ‘‘ਮਮ ਸਨ੍ਤਕਂ ਕਰੋਮਿ, ਮਮ ਸਨ੍ਤਕਂ ਹੋਤੁ, ਮਮ ਸਨ੍ਤਕਂ ਕਰਿਸ੍ਸਾਮੀ’’ਤਿ ਵਦਤਿ, ਦੁਦ੍ਦਿਨ੍ਨਂ ਦੁਗ੍ਗਹਿਤਞ੍ਚ. ਨੇਵ ਦਾਤਾ ਦਾਤੁਂ ਜਾਨਾਤਿ, ਨ ਇਤਰੋ ਗਹੇਤੁਂ. ਸਚੇ ਪਨ ‘‘ਤਵ ਸਨ੍ਤਕਂ ਕਰੋਹੀ’’ਤਿ ਵੁਤ੍ਤੇ ‘‘ਸਾਧੁ, ਭਨ੍ਤੇ, ਮਯ੍ਹਂ ਗਣ੍ਹਾਮੀ’’ਤਿ ਗਣ੍ਹਾਤਿ, ਸੁਗ੍ਗਹਿਤਂ. ਸਚੇ ਪਨ ‘‘ਏਕੋ ਗਣ੍ਹਾਹੀ’’ਤਿ ਵਦਤਿ, ਇਤਰੋ ‘‘ਨ ਗਣ੍ਹਾਮੀ’’ਤਿ ਪੁਨ ਸੋ ‘‘ਦਿਨ੍ਨਂ ਮਯਾ ਤੁਯ੍ਹਂ, ਗਣ੍ਹਾਹੀ’’ਤਿ ਵਦਤਿ, ਇਤਰੋਪਿ ‘‘ਨ ਮਯ੍ਹਂ ਇਮਿਨਾ ਅਤ੍ਥੋ’’ਤਿ ਵਦਤਿ. ਤਤੋ ਪੁਰਿਮੋਪਿ ‘‘ਮਯਾ ਦਿਨ੍ਨ’’ਨ੍ਤਿ ਦਸਾਹਂ ਅਤਿਕ੍ਕਾਮੇਤਿ, ਪਚ੍ਛਿਮੋਪਿ ‘‘ਮਯਾ ਪਟਿਕ੍ਖਿਤ੍ਤ’’ਨ੍ਤਿ. ਕਸ੍ਸ ਆਪਤ੍ਤੀਤਿ? ਨ ਕਸ੍ਸਚਿ ਆਪਤ੍ਤਿ. ਯਸ੍ਸ ਪਨ ਰੁਚ੍ਚਤਿ, ਤੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬਂ.

ਯੋ ਪਨ ਅਧਿਟ੍ਠਾਨੇ ਵੇਮਤਿਕੋ, ਤੇਨ ਕਿਂ ਕਾਤਬ੍ਬਂ? ਵੇਮਤਿਕਭਾਵਂ ਆਰੋਚੇਤ੍ਵਾ ਸਚੇ ਅਨਧਿਟ੍ਠਿਤਂ ਭਵਿਸ੍ਸਤਿ, ਏਵਂ ਮੇ ਕਪ੍ਪਿਯਂ ਹੋਤੀਤਿ ਵਤ੍ਵਾ ਵੁਤ੍ਤਨਯੇਨੇਵ ਨਿਸ੍ਸਜ੍ਜਿਤਬ੍ਬਂ. ਨ ਹਿ ਏਵਂ ਜਾਨਾਪੇਤ੍ਵਾ ਵਿਨਯਕਮ੍ਮਂ ਕਰੋਨ੍ਤਸ੍ਸ ਮੁਸਾਵਾਦੋ ਹੋਤਿ. ਕੇਚਿ ਪਨ ‘‘ਏਕੇਨ ਭਿਕ੍ਖੁਨਾ ਵਿਸ੍ਸਾਸਂ ਗਹੇਤ੍ਵਾ ਪੁਨ ਦਿਨ੍ਨਂ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਨ ਯੁਜ੍ਜਤਿ. ਨ ਹਿ ਤਸ੍ਸੇਤਂ ਵਿਨਯਕਮ੍ਮਂ, ਨਾਪਿ ਤਂ ਏਤ੍ਤਕੇਨ ਅਞ੍ਞਂ ਵਤ੍ਥੁਂ ਹੋਤਿ.

ਨਸ੍ਸਤੀਤਿਆਦਿ ਉਤ੍ਤਾਨਤ੍ਥਮੇਵ. ਯੋ ਨ ਦਦੇਯ੍ਯ ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ‘‘ਮਯ੍ਹਂ ਦਿਨ੍ਨਂ ਇਮਿਨਾ’’ਤਿ ਇਮਾਯ ਸਞ੍ਞਾਯ ਨ ਦੇਨ੍ਤਸ੍ਸ ਦੁਕ੍ਕਟਂ. ਤਸ੍ਸ ਸਨ੍ਤਕਭਾਵਂ ਪਨ ਞਤ੍ਵਾ ਲੇਸੇਨ ਅਚ੍ਛਿਨ੍ਦਨ੍ਤੋ ਭਣ੍ਡਂ ਅਗ੍ਘਾਪੇਤ੍ਵਾ ਕਾਰੇਤਬ੍ਬੋਤਿ.

ਸਮੁਟ੍ਠਾਨਾਦੀਸੁ ਇਦਂ ਸਿਕ੍ਖਾਪਦਂ ਕਥਿਨਸਮੁਟ੍ਠਾਨਂ ਨਾਮ ਕਾਯਵਾਚਾਤੋ ਚ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਅਨਧਿਟ੍ਠਾਨੇਨ ਚ ਅਵਿਕਪ੍ਪਨੇਨ ਚ ਆਪਜ੍ਜਨਤੋ ਅਕਿਰਿਯਂ, ਸਞ੍ਞਾਯ ਅਭਾਵੇਪਿ ਨ ਮੁਚ੍ਚਤਿ, ਅਜਾਨਨ੍ਤੋਪਿ ਆਪਜ੍ਜਤੀਤਿ ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਪਠਮਕਥਿਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਉਦੋਸਿਤਸਿਕ੍ਖਾਪਦਵਣ੍ਣਨਾ

੪੭੧. ਤੇਨ ਸਮਯੇਨ ਬੁਦ੍ਧੋ ਭਗਵਾਤਿ ਉਦੋਸਿਤਸਿਕ੍ਖਾਪਦਂ. ਤਤ੍ਥ ਸਨ੍ਤਰੁਤ੍ਤਰੇਨਾਤਿ ਅਨ੍ਤਰਨ੍ਤਿ ਅਨ੍ਤਰਵਾਸਕੋ ਵੁਚ੍ਚਤਿ, ਉਤ੍ਤਰਨ੍ਤਿ ਉਤ੍ਤਰਾਸਙ੍ਗੋ, ਸਹ ਅਨ੍ਤਰੇਨ ਉਤ੍ਤਰਂ ਸਨ੍ਤਰੁਤ੍ਤਰਂ, ਤੇਨ ਸਨ੍ਤਰੁਤ੍ਤਰੇਨ, ਸਹ ਅਨ੍ਤਰਵਾਸਕੇਨ ਉਤ੍ਤਰਾਸਙ੍ਗੇਨਾਤਿ ਅਤ੍ਥੋ. ਕਣ੍ਣਕਿਤਾਨੀਤਿ ਸੇਦੇਨ ਫੁਟ੍ਠੋਕਾਸੇਸੁ ਸਞ੍ਜਾਤਕਾਲ਼ਸੇਤਮਣ੍ਡਲਾਨਿ. ਅਦ੍ਦਸ ਖੋ ਆਯਸ੍ਮਾ ਆਨਨ੍ਦੋ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋਤਿ ਥੇਰੋ ਕਿਰ ਭਗਵਤਿ ਦਿਵਾ ਪਟਿਸਲ੍ਲਾਨਤ੍ਥਾਯ ਗਨ੍ਧਕੁਟਿਂ ਪਵਿਟ੍ਠੇ ਤਂ ਓਕਾਸਂ ਲਭਿਤ੍ਵਾ ਦੁਨ੍ਨਿਕ੍ਖਿਤ੍ਤਾਨਿ ਦਾਰੁਭਣ੍ਡਮਤ੍ਤਿਕਾਭਣ੍ਡਾਨਿ ਪਟਿਸਾਮੇਨ੍ਤੋ ਅਸਮ੍ਮਟ੍ਠਟ੍ਠਾਨਂ ਸਮ੍ਮਜ੍ਜਨ੍ਤੋ ਗਿਲਾਨੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਨ੍ਥਾਰਂ ਕਰੋਨ੍ਤੋ ਤੇਸਂ ਭਿਕ੍ਖੂਨਂ ਸੇਨਾਸਨਟ੍ਠਾਨਂ ਸਮ੍ਪਤ੍ਤੋ ਅਦ੍ਦਸ. ਤੇਨ ਵੁਤ੍ਤਂ – ‘‘ਅਦ੍ਦਸ ਖੋ ਆਯਸ੍ਮਾ ਆਨਨ੍ਦੋ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ’’ਤਿ.

੪੭੩. ਅਵਿਪ੍ਪਵਾਸਸਮ੍ਮੁਤਿਂ ਦਾਤੁਨ੍ਤਿ ਅਵਿਪ੍ਪਵਾਸੇ ਸਮ੍ਮੁਤਿ ਅਵਿਪ੍ਪਵਾਸਸਮ੍ਮੁਤਿ, ਅਵਿਪ੍ਪਵਾਸਾਯ ਵਾ ਸਮ੍ਮੁਤਿ ਅਵਿਪ੍ਪਵਾਸਸਮ੍ਮੁਤਿ. ਕੋ ਪਨੇਤ੍ਥ ਆਨਿਸਂਸੋ? ਯੇਨ ਚੀਵਰੇਨ ਵਿਪ੍ਪਵਸਤਿ, ਤਂ ਨਿਸ੍ਸਗ੍ਗਿਯਂ ਨ ਹੋਤਿ, ਆਪਤ੍ਤਿਞ੍ਚ ਨਾਪਜ੍ਜਤਿ. ਕਿਤ੍ਤਕਂ ਕਾਲਂ? ਮਹਾਸੁਮਤ੍ਥੇਰੋ ਤਾਵ ਆਹ – ‘‘ਯਾਵ ਰੋਗੋ ਨ ਵੂਪਸਮਤਿ, ਵੂਪਸਨ੍ਤੇ ਪਨ ਰੋਗੇ ਸੀਘਂ ਚੀਵਰਟ੍ਠਾਨਂ ਆਗਨ੍ਤਬ੍ਬ’’ਨ੍ਤਿ. ਮਹਾਪਦੁਮਤ੍ਥੇਰੋ ਆਹ – ‘‘ਸੀਘਂ ਆਗਚ੍ਛਤੋ ਰੋਗੋ ਪਟਿਕੁਪ੍ਪੇਯ੍ਯ, ਤਸ੍ਮਾ ਸਣਿਕਂ ਆਗਨ੍ਤਬ੍ਬਂ. ਯਤੋ ਪਟ੍ਠਾਯ ਹਿ ਸਤ੍ਥਂ ਵਾ ਪਰਿਯੇਸਤਿ, ‘ਗਚ੍ਛਾਮੀ’ਤਿ ਆਭੋਗਂ ਵਾ ਕਰੋਤਿ, ਤਤੋ ਪਟ੍ਠਾਯ ਵਟ੍ਟਤਿ. ‘ਨ ਦਾਨਿ ਗਮਿਸ੍ਸਾਮੀ’ਤਿ ਏਵਂ ਪਨ ਧੁਰਨਿਕ੍ਖੇਪਂ ਕਰੋਨ੍ਤੇਨ ਪਚ੍ਚੁਦ੍ਧਰਿਤਬ੍ਬਂ, ਅਤਿਰੇਕਚੀਵਰਟ੍ਠਾਨੇ ਠਸ੍ਸਤੀ’’ਤਿ. ਸਚੇ ਪਨਸ੍ਸ ਰੋਗੋ ਪਟਿਕੁਪ੍ਪਤਿ, ਕਿਂ ਕਾਤਬ੍ਬਨ੍ਤਿ? ਫੁਸ੍ਸਦੇਵਤ੍ਥੇਰੋ ਤਾਵ ਆਹ – ‘‘ਸਚੇ ਸੋਯੇਵ ਰੋਗੋ ਪਟਿਕੁਪ੍ਪਤਿ, ਸਾ ਏਵ ਸਮ੍ਮੁਤਿ, ਪੁਨ ਸਮ੍ਮੁਤਿਦਾਨਕਿਚ੍ਚਂ ਨਤ੍ਥਿ. ਅਥਞ੍ਞੋ ਕੁਪ੍ਪਤਿ, ਪੁਨ ਦਾਤਬ੍ਬਾ ਸਮ੍ਮੁਤੀ’’ਤਿ. ਉਪਤਿਸ੍ਸਤ੍ਥੇਰੋ ਆਹ – ‘‘ਸੋ ਵਾ ਰੋਗੋ ਹੋਤੁ, ਅਞ੍ਞੋ ਵਾ ਪੁਨ ਸਮ੍ਮੁਤਿਦਾਨਕਿਚ੍ਚਂ ਨਤ੍ਥੀ’’ਤਿ.

੪੭੫-੬. ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾਤਿ ਇਧ ਪਨ ਪੁਰਿਮਸਿਕ੍ਖਾਪਦੇ ਵਿਯ ਅਤ੍ਥਂ ਅਗ੍ਗਹੇਤ੍ਵਾ ਨਿਟ੍ਠਿਤੇ ਚੀਵਰਸ੍ਮਿਂ ਭਿਕ੍ਖੁਨੋਤਿ ਏਵਂ ਸਾਮਿਵਸੇਨ ਕਰਣਵਚਨਸ੍ਸ ਅਤ੍ਥੋ ਵੇਦਿਤਬ੍ਬੋ. ਕਰਣਵਸੇਨ ਹਿ ਭਿਕ੍ਖੁਨਾ ਇਦਂ ਨਾਮ ਕਾਤਬ੍ਬਨ੍ਤਿ ਨਤ੍ਥਿ. ਸਾਮਿਵਸੇਨ ਪਨ ਭਿਕ੍ਖੁਨੋ ਚੀਵਰਸ੍ਮਿਂ ਨਿਟ੍ਠਿਤੇ ਕਥਿਨੇ ਚ ਉਬ੍ਭਤੇ ਏਵਂ ਛਿਨ੍ਨਪਲਿਬੋਧੋ ਏਕਰਤ੍ਤਮ੍ਪਿ ਚੇ ਭਿਕ੍ਖੁ ਤਿਚੀਵਰੇਨ ਵਿਪ੍ਪਵਸੇਯ੍ਯਾਤਿ ਏਵਂ ਅਤ੍ਥੋ ਯੁਜ੍ਜਤਿ. ਤਤ੍ਥ ਤਿਚੀਵਰੇਨਾਤਿ ਅਧਿਟ੍ਠਿਤੇਸੁ ਤੀਸੁ ਚੀਵਰੇਸੁ ਯੇਨ ਕੇਨਚਿ. ਏਕੇਨ ਵਿਪ੍ਪਵੁਤ੍ਥੋਪਿ ਹਿ ਤਿਚੀਵਰੇਨ ਵਿਪ੍ਪਵੁਤ੍ਥੋ ਹੋਤਿ, ਪਟਿਸਿਦ੍ਧਪਰਿਯਾਪਨ੍ਨੇਨ ਵਿਪ੍ਪਵੁਤ੍ਥਤ੍ਤਾ. ਤੇਨੇਵਸ੍ਸ ਪਦਭਾਜਨੇ ‘‘ਸਙ੍ਘਾਟਿਯਾ ਵਾ’’ਤਿਆਦਿ ਵੁਤ੍ਤਂ. ਵਿਪ੍ਪਵਸੇਯ੍ਯਾਤਿ ਵਿਪ੍ਪਯੁਤ੍ਤੋ ਵਸੇਯ੍ਯ.

੪੭੭-੮. ਗਾਮੋ ਏਕੂਪਚਾਰੋਤਿਆਦਿ ਅਵਿਪ੍ਪਵਾਸਲਕ੍ਖਣਵਵਤ੍ਥਾਪਨਤ੍ਥਂ ਵੁਤ੍ਤਂ. ਤਤੋ ਪਰਂ ਯਥਾਕ੍ਕਮੇਨ ਤਾਨੇਵ ਪਨ੍ਨਰਸ ਮਾਤਿਕਾਪਦਾਨਿ ਵਿਤ੍ਥਾਰੇਨ੍ਤੋ ‘‘ਗਾਮੋ ਏਕੂਪਚਾਰੋ ਨਾਮਾ’’ਤਿਆਦਿਮਾਹ. ਤਤ੍ਥ ਏਕਕੁਲਸ੍ਸ ਗਾਮੋਤਿ ਏਕਸ੍ਸ ਰਞ੍ਞੋ ਵਾ ਭੋਜਕਸ੍ਸ ਵਾ ਗਾਮੋ. ਪਰਿਕ੍ਖਿਤ੍ਤੋਤਿ ਯੇਨ ਕੇਨਚਿ ਪਾਕਾਰੇਨ ਵਾ ਵਤਿਯਾ ਵਾ ਪਰਿਕ੍ਖਾਯ ਵਾ ਪਰਿਕ੍ਖਿਤ੍ਤੋ. ਏਤ੍ਤਾਵਤਾ ਏਕਕੁਲਗਾਮਸ੍ਸ ਏਕੂਪਚਾਰਤਾ ਦਸ੍ਸਿਤਾ. ਅਨ੍ਤੋਗਾਮੇ ਵਤ੍ਥਬ੍ਬਨ੍ਤਿ ਏਵਰੂਪੇ ਗਾਮੇ ਚੀਵਰਂ ਨਿਕ੍ਖਿਪਿਤ੍ਵਾ ਗਾਮਬ੍ਭਨ੍ਤਰੇ ਯਥਾਰੁਚਿਤੇ ਠਾਨੇ ਅਰੁਣਂ ਉਟ੍ਠਾਪੇਤੁਂ ਵਟ੍ਟਤਿ. ਅਪਰਿਕ੍ਖਿਤ੍ਤੋਤਿ ਇਮਿਨਾ ਤਸ੍ਸੇਵ ਗਾਮਸ੍ਸ ਨਾਨੂਪਚਾਰਤਾ ਦਸ੍ਸਿਤਾ. ਏਵਰੂਪੇ ਗਾਮੇ ਯਸ੍ਮਿਂ ਘਰੇ ਚੀਵਰਂ ਨਿਕ੍ਖਿਤ੍ਤਂ, ਤਤ੍ਥ ਵਤ੍ਥਬ੍ਬਂ. ਹਤ੍ਥਪਾਸਾ ਵਾ ਨ ਵਿਜਹਿਤਬ੍ਬਨ੍ਤਿ ਅਥ ਵਾ ਤਂ ਘਰਂ ਸਮਨ੍ਤਤੋ ਹਤ੍ਥਪਾਸਾ ਨ ਵਿਜਹਿਤਬ੍ਬਂ, ਅਡ੍ਢਤੇਯ੍ਯਰਤਨਪ੍ਪਮਾਣਪ੍ਪਦੇਸਾ ਉਦ੍ਧਂ ਨ ਵਿਜਹਿਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਅਡ੍ਢਤੇਯ੍ਯਰਤਨਬ੍ਭਨ੍ਤਰੇ ਪਨ ਵਤ੍ਥੁਂ ਵਟ੍ਟਤਿ. ਤਂ ਪਮਾਣਂ ਅਤਿਕ੍ਕਮਿਤ੍ਵਾ ਸਚੇਪਿ ਇਦ੍ਧਿਮਾ ਭਿਕ੍ਖੂ ਆਕਾਸੇ ਅਰੁਣਂ ਉਟ੍ਠਾਪੇਤਿ, ਨਿਸ੍ਸਗ੍ਗਿਯਮੇਵ ਹੋਤਿ. ਏਤ੍ਥ ਚ ਯਸ੍ਮਿਂ ਘਰੇਤਿ ਘਰਪਰਿਚ੍ਛੇਦੋ ‘‘ਏਕਕੁਲਸ੍ਸ ਨਿਵੇਸਨਂ ਹੋਤੀ’’ਤਿਆਦਿਨਾ (ਪਾਰਾ. ੪੮੦) ਲਕ੍ਖਣੇਨ ਵੇਦਿਤਬ੍ਬੋ.

੪੭੯. ਨਾਨਾਕੁਲਸ੍ਸ ਗਾਮੋਤਿ ਨਾਨਾਰਾਜੂਨਂ ਵਾ ਭੋਜਕਾਨਂ ਵਾ ਗਾਮੋ, ਵੇਸਾਲਿਕੁਸਿਨਾਰਾਦਿਸਦਿਸੋ. ਪਰਿਕ੍ਖਿਤ੍ਤੋਤਿ ਇਮਿਨਾ ਨਾਨਾਕੁਲਗਾਮਸ੍ਸ ਏਕੂਪਚਾਰਤਾ ਦਸ੍ਸਿਤਾ. ਸਭਾਯੇ ਵਾ ਦ੍ਵਾਰਮੂਲੇ ਵਾਤਿ ਏਤ੍ਥ ਸਭਾਯਨ੍ਤਿ ਲਿਙ੍ਗਬ੍ਯਤ੍ਤਯੇਨ ਸਭਾ ਵੁਤ੍ਤਾ. ਦ੍ਵਾਰਮੂਲੇਤਿ ਨਗਰਦ੍ਵਾਰਸ੍ਸ ਸਮੀਪੇ. ਇਦਂ ਵੁਤ੍ਤਂ ਹੋਤਿ – ਏਵਰੂਪੇ ਗਾਮੇ ਯਸ੍ਮਿਂ ਘਰੇ ਚੀਵਰਂ ਨਿਕ੍ਖਿਤ੍ਤਂ, ਤਤ੍ਥ ਵਾ ਵਤ੍ਥਬ੍ਬਂ. ਤਤ੍ਥ ਸਦ੍ਦਸਙ੍ਘਟ੍ਟਨੇਨ ਵਾ ਜਨਸਮ੍ਬਾਧੇਨ ਵਾ ਵਸਿਤੁਂ ਅਸਕ੍ਕੋਨ੍ਤੇਨ ਸਭਾਯੇ ਵਾ ਵਤ੍ਥਬ੍ਬਂ ਨਗਰਦ੍ਵਾਰਮੂਲੇ ਵਾ. ਤਤ੍ਰਪਿ ਵਸਿਤੁਂ ਅਸਕ੍ਕੋਨ੍ਤੇਨ ਯਤ੍ਥ ਕਤ੍ਥਚਿ ਫਾਸੁਕਟ੍ਠਾਨੇ ਵਸਿਤ੍ਵਾ ਅਨ੍ਤੋਅਰੁਣੇ ਆਗਮ੍ਮ ਤੇਸਂਯੇਵ ਸਭਾਯਦ੍ਵਾਰਮੂਲਾਨਂ ਹਤ੍ਥਪਾਸਾ ਵਾ ਨ ਵਿਜਹਿਤਬ੍ਬਂ. ਘਰਸ੍ਸ ਪਨ ਚੀਵਰਸ੍ਸ ਵਾ ਹਤ੍ਥਪਾਸੇ ਵਤ੍ਤਬ੍ਬਮੇਵ ਨਤ੍ਥਿ.

ਸਭਾਯਂ ਗਚ੍ਛਨ੍ਤੇਨ ਹਤ੍ਥਪਾਸੇ ਚੀਵਰਂ ਨਿਕ੍ਖਿਪਿਤ੍ਵਾਤਿ ਸਚੇ ਘਰੇ ਅਟ੍ਠਪੇਤ੍ਵਾ ਸਭਾਯੇ ਠਪੇਸ੍ਸਾਮੀਤਿ ਸਭਾਯਂ ਗਚ੍ਛਤਿ, ਤੇਨ ਸਭਾਯਂ ਗਚ੍ਛਨ੍ਤੇਨ ਹਤ੍ਥਪਾਸੇਤਿ ਹਤ੍ਥਂ ਪਸਾਰੇਤ੍ਵਾ ‘‘ਹਨ੍ਦਿਮਂ ਚੀਵਰਂ ਠਪੇਮੀ’’ਤਿ ਏਵਂ ਨਿਕ੍ਖੇਪਸੁਖੇ ਹਤ੍ਥਪਾਸਗਤੇ ਕਿਸ੍ਮਿਞ੍ਚਿ ਆਪਣੇ ਚੀਵਰਂ ਨਿਕ੍ਖਿਪਿਤ੍ਵਾ ਪੁਰਿਮਨਯੇਨੇਵ ਸਭਾਯੇ ਵਾ ਵਤ੍ਥਬ੍ਬਂ ਦ੍ਵਾਰਮੂਲੇ ਵਾ, ਹਤ੍ਥਪਾਸਾ ਵਾ ਨ ਵਿਜਹਿਤਬ੍ਬਂ.

ਤਤ੍ਰਾਯਂ ਵਿਨਿਚ੍ਛਯੋ – ਫੁਸ੍ਸਦੇਵਤ੍ਥੇਰੋ ਤਾਵ ਆਹ – ‘‘ਚੀਵਰਹਤ੍ਥਪਾਸੇ ਵਸਿਤਬ੍ਬਂ ਨਤ੍ਥਿ, ਯਤ੍ਥ ਕਤ੍ਥਚਿ ਵੀਥਿਹਤ੍ਥਪਾਸੇਪਿ ਸਭਾਯਹਤ੍ਥਪਾਸੇਪਿ ਦ੍ਵਾਰਹਤ੍ਥਪਾਸੇਪਿ ਵਸਿਤੁਂ ਵਟ੍ਟਤੀ’’ਤਿ. ਉਪਤਿਸ੍ਸਤ੍ਥੇਰੋ ਪਨਾਹ – ‘‘ਨਗਰਸ੍ਸ ਬਹੂਨਿਪਿ ਦ੍ਵਾਰਾਨਿ ਹੋਨ੍ਤਿ ਬਹੂਨਿਪਿ ਸਭਾਯਾਨਿ, ਤਸ੍ਮਾ ਸਬ੍ਬਤ੍ਥ ਨ ਵਟ੍ਟਤਿ. ਯਸ੍ਸਾ ਪਨ ਵੀਥਿਯਾ ਚੀਵਰਂ ਠਪਿਤਂ ਯਂ ਤਸ੍ਸਾ ਸਮ੍ਮੁਖਟ੍ਠਾਨੇ ਸਭਾਯਞ੍ਚ ਦ੍ਵਾਰਞ੍ਚ ਤਸ੍ਸ ਸਭਾਯਸ੍ਸ ਚ ਦ੍ਵਾਰਸ੍ਸ ਚ ਹਤ੍ਥਪਾਸਾ ਨ ਵਿਜਹਿਤਬ੍ਬਂ. ਏਵਞ੍ਹਿ ਸਤਿ ਸਕ੍ਕਾ ਚੀਵਰਸ੍ਸ ਪਵਤ੍ਤਿ ਜਾਨਿਤੁ’’ਨ੍ਤਿ. ਸਭਾਯਂ ਪਨ ਗਚ੍ਛਨ੍ਤੇਨ ਯਸ੍ਸ ਆਪਣਿਕਸ੍ਸ ਹਤ੍ਥੇ ਨਿਕ੍ਖਿਤ੍ਤਂ, ਸਚੇ ਸੋ ਤਂ ਚੀਵਰਂ ਅਤਿਹਰਿਤ੍ਵਾ ਘਰੇ ਨਿਕ੍ਖਿਪਤਿ, ਵੀਥਿਹਤ੍ਥਪਾਸੋ ਨ ਰਕ੍ਖਤਿ, ਘਰਸ੍ਸ ਹਤ੍ਥਪਾਸੇ ਵਤ੍ਥਬ੍ਬਂ. ਸਚੇ ਮਹਨ੍ਤਂ ਘਰਂ ਹੋਤਿ, ਦ੍ਵੇ ਵੀਥਿਯੋ ਫਰਿਤ੍ਵਾ ਠਿਤਂ ਪੁਰਤੋ ਵਾ ਪਚ੍ਛਤੋ ਵਾ ਹਤ੍ਥਪਾਸੇਯੇਵ ਅਰੁਣਂ ਉਟ੍ਠਾਪੇਤਬ੍ਬਂ. ਸਭਾਯੇ ਨਿਕ੍ਖਿਪਿਤ੍ਵਾ ਪਨ ਸਭਾਯੇ ਵਾ ਤਸ੍ਸ ਸਮ੍ਮੁਖੇ ਨਗਰਦ੍ਵਾਰਮੂਲੇ ਵਾ ਤੇਸਂਯੇਵ ਹਤ੍ਥਪਾਸੇ ਵਾ ਅਰੁਣਂ ਉਟ੍ਠਾਪੇਤਬ੍ਬਂ.

ਅਪਰਿਕ੍ਖਿਤ੍ਤੋਤਿਇਮਿਨਾ ਤਸ੍ਸੇਵ ਗਾਮਸ੍ਸ ਨਾਨੂਪਚਾਰਤਾ ਦਸ੍ਸਿਤਾ. ਏਤੇਨੇਵੁਪਾਯੇਨ ਸਬ੍ਬਤ੍ਥ ਏਕੂਪਚਾਰਤਾ ਚ ਨਾਨੂਪਚਾਰਤਾ ਚ ਵੇਦਿਤਬ੍ਬਾ. ਪਾਲ਼ਿਯਂ ਪਨ ‘‘ਗਾਮੋ ਏਕੂਪਚਾਰੋ ਨਾਮਾ’’ਤਿ ਏਵਂ ਆਦਿਮ੍ਹਿ ‘‘ਅਜ੍ਝੋਕਾਸੋ ਏਕੂਪਚਾਰੋ ਨਾਮਾ’’ਤਿ ਏਵਂ ਅਨ੍ਤੇ ਚ ਏਕਮੇਵ ਮਾਤਿਕਾਪਦਂ ਉਦ੍ਧਰਿਤ੍ਵਾ ਪਦਭਾਜਨਂ ਵਿਤ੍ਥਾਰਿਤਂ. ਤਸ੍ਮਾ ਤਸ੍ਸੇਵ ਪਦਸ੍ਸਾਨੁਸਾਰੇਨ ਸਬ੍ਬਤ੍ਥ ਪਰਿਕ੍ਖੇਪਾਦਿਵਸੇਨ ਏਕੂਪਚਾਰਤਾ ਚ ਨਾਨੂਪਚਾਰਤਾ ਚ ਵੇਦਿਤਬ੍ਬਾ.

੪੮੦-੧. ਨਿਵੇਸਨਾਦੀਸੁ ਓਵਰਕਾਤਿ ਗਬ੍ਭਾਨਂਯੇਵੇਤਂ ਪਰਿਯਾਯਵਚਨਂ. ਹਤ੍ਥਪਾਸਾ ਵਾਤਿ ਗਬ੍ਭਸ੍ਸ ਹਤ੍ਥਪਾਸਾ. ਦ੍ਵਾਰਮੂਲੇ ਵਾਤਿ ਸਬ੍ਬੇਸਂ ਸਾਧਾਰਣੇ ਘਰਦ੍ਵਾਰਮੂਲੇ. ਹਤ੍ਥਪਾਸਾ ਵਾਤਿ ਗਬ੍ਭਸ੍ਸ ਵਾ ਘਰਦ੍ਵਾਰਮੂਲਸ੍ਸ ਵਾ ਹਤ੍ਥਪਾਸਾ.

੪੮੨-੭. ਉਦੋਸਿਤੋਤਿ ਯਾਨਾਦੀਨਂ ਭਣ੍ਡਾਨਂ ਸਾਲਾ. ਇਤੋ ਪਟ੍ਠਾਯ ਚ ਨਿਵੇਸਨੇ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ. ਅਟ੍ਟੋਤਿ ਪਟਿਰਾਜਾਦਿਪਟਿਬਾਹਨਤ੍ਥਂ ਇਟ੍ਠਕਾਹਿ ਕਤੋ ਬਹਲਭਿਤ੍ਤਿਕੋ ਚਤੁਪਞ੍ਚਭੂਮਿਕੋ ਪਤਿਸ੍ਸਯਵਿਸੇਸੋ. ਮਾਲ਼ੋਤਿ ਏਕਕੂਟਸਙ੍ਗਹਿਤੋ ਚਤੁਰਸ੍ਸਪਾਸਾਦੋ. ਪਾਸਾਦੋਤਿ ਦੀਘਪਾਸਾਦੋ. ਹਮ੍ਮਿਯਨ੍ਤਿ ਮੁਣ੍ਡਚ੍ਛਦਨਪਾਸਾਦੋ.

੪੮੯. ਸਤ੍ਤਬ੍ਭਨ੍ਤਰਾਤਿਏਤ੍ਥ ਏਕਂ ਅਬ੍ਭਨ੍ਤਰਂ ਅਟ੍ਠਵੀਸਤਿਹਤ੍ਥਂ ਹੋਤਿ. ਸਚੇ ਸਤ੍ਥੋ ਗਚ੍ਛਨ੍ਤੋ ਗਾਮਂ ਵਾ ਨਦਿਂ ਵਾ ਪਰਿਯਾਦਿਯਿਤ੍ਵਾ ਤਿਟ੍ਠਤਿ ਅਨ੍ਤੋਪਵਿਟ੍ਠੇਨ ਸਦ੍ਧਿਂ ਏਕਾਬਦ੍ਧੋ ਹੁਤ੍ਵਾ ਓਰਞ੍ਚ ਪਾਰਞ੍ਚ ਫਰਿਤ੍ਵਾ ਠਿਤੋ ਹੋਤਿ, ਸਤ੍ਥਪਰਿਹਾਰੋਵ ਲਬ੍ਭਤਿ. ਅਥ ਗਾਮੇ ਵਾ ਨਦਿਯਾ ਵਾ ਪਰਿਯਾਪਨ੍ਨੋ ਹੋਤਿ ਅਨ੍ਤੋਪਵਿਟ੍ਠੋ, ਗਾਮਪਰਿਹਾਰੋ ਚੇਵ ਨਦੀਪਰਿਹਾਰੋ ਚ ਲਬ੍ਭਤਿ. ਸਚੇ ਵਿਹਾਰਸੀਮਂ ਅਤਿਕ੍ਕਮਿਤ੍ਵਾ ਤਿਟ੍ਠਤਿ, ਅਨ੍ਤੋਸੀਮਾਯ ਚ ਚੀਵਰਂ ਹੋਤਿ, ਵਿਹਾਰਂ ਗਨ੍ਤ੍ਵਾ ਵਸਿਤਬ੍ਬਂ. ਸਚੇ ਬਹਿਸੀਮਾਯ ਚੀਵਰਂ ਹੋਤਿ ਸਤ੍ਥਸਮੀਪੇਯੇਵ ਵਸਿਤਬ੍ਬਂ. ਸਚੇ ਗਚ੍ਛਨ੍ਤੋ ਸਕਟੇ ਵਾ ਭਗ੍ਗੇ ਗੋਣੇ ਵਾ ਨਟ੍ਠੇ ਅਨ੍ਤਰਾ ਛਿਜ੍ਜਤਿ, ਯਸ੍ਮਿਂ ਕੋਟ੍ਠਾਸੇ ਚੀਵਰਂ ਤਤ੍ਥ ਵਸਿਤਬ੍ਬਂ.

੪੯੦. ਏਕਕੁਲਸ੍ਸ ਖੇਤ੍ਤੇ ਹਤ੍ਥਪਾਸੋ ਨਾਮ ਚੀਵਰਹਤ੍ਥਪਾਸੋਯੇਵ, ਨਾਨਾਕੁਲਸ੍ਸ ਖੇਤ੍ਤੇ ਹਤ੍ਥਪਾਸੋ ਨਾਮ ਖੇਤ੍ਤਦ੍ਵਾਰਸ੍ਸ ਹਤ੍ਥਪਾਸੋ. ਅਪਰਿਕ੍ਖਿਤ੍ਤੇ ਚੀਵਰਸ੍ਸੇਵ ਹਤ੍ਥਪਾਸੋ.

੪੯੧-੪. ਧਞ੍ਞਕਰਣਨ੍ਤਿ ਖਲਂ ਵੁਚ੍ਚਤਿ. ਆਰਾਮੋਤਿ ਪੁਪ੍ਫਾਰਾਮੋ ਵਾ ਫਲਾਰਾਮੋ ਵਾ. ਦ੍ਵੀਸੁਪਿ ਖੇਤ੍ਤੇ ਵੁਤ੍ਤਸਦਿਸੋਵ ਵਿਨਿਚ੍ਛਯੋ. ਵਿਹਾਰੋ ਨਿਵੇਸਨਸਦਿਸੋ. ਰੁਕ੍ਖਮੂਲੇ ਅਨ੍ਤੋਛਾਯਾਯਨ੍ਤਿ ਛਾਯਾਯ ਫੁਟ੍ਠੋਕਾਸਸ੍ਸ ਅਨ੍ਤੋ ਏਵ. ਵਿਰਲ਼ਸਾਖਸ੍ਸ ਪਨ ਰੁਕ੍ਖਸ੍ਸ ਆਤਪੇਨ ਫੁਟ੍ਠੋਕਾਸੇ ਠਪਿਤਂ ਨਿਸ੍ਸਗ੍ਗਿਯਮੇਵ ਹੋਤਿ, ਤਸ੍ਮਾ ਤਾਦਿਸਸ੍ਸ ਸਾਖਾਚ੍ਛਾਯਾਯ ਵਾ ਖਨ੍ਧਚ੍ਛਾਯਾਯ ਵਾ ਠਪੇਤਬ੍ਬਂ. ਸਚੇ ਸਾਖਾਯ ਵਾ ਵਿਟਪੇ ਵਾ ਠਪੇਤਿ, ਉਪਰਿ ਅਞ੍ਞਸਾਖਾਚ੍ਛਾਯਾਯ ਫੁਟ੍ਠੋਕਾਸੇਯੇਵ ਠਪੇਤਬ੍ਬਂ. ਖੁਜ੍ਜਰੁਕ੍ਖਸ੍ਸ ਛਾਯਾ ਦੂਰਂ ਗਚ੍ਛਤਿ, ਛਾਯਾਯ ਗਤਟ੍ਠਾਨੇ ਠਪੇਤੁਂ ਵਟ੍ਟਤਿਯੇਵ. ਇਧਾਪਿ ਹਤ੍ਥਪਾਸੋ ਚੀਵਰਹਤ੍ਥਪਾਸੋਯੇਵ.

ਅਗਾਮਕੇ ਅਰਞ੍ਞੇਤਿ ਅਗਾਮਕਂ ਨਾਮ ਅਰਞ੍ਞਂ ਵਿਞ੍ਝਾਟਵੀਆਦੀਸੁ ਵਾ ਸਮੁਦ੍ਦਮਜ੍ਝੇ ਵਾ ਮਚ੍ਛਬਨ੍ਧਾਨਂ ਅਗਮਨਪਥੇ ਦੀਪਕੇਸੁ ਲਬ੍ਭਤਿ. ਸਮਨ੍ਤਾ ਸਤ੍ਤਬ੍ਭਨ੍ਤਰਾਤਿ ਮਜ੍ਝੇ ਠਿਤਸ੍ਸ ਸਮਤ੍ਤਾ ਸਬ੍ਬਦਿਸਾਸੁ ਸਤ੍ਤਬ੍ਭਨ੍ਤਰਾ, ਵਿਨਿਬ੍ਬੇਧੇਨ ਚੁਦ੍ਦਸ ਹੋਨ੍ਤਿ. ਮਜ੍ਝੇ ਨਿਸਿਨ੍ਨੋ ਪੁਰਤ੍ਥਿਮਾਯ ਵਾ ਪਚ੍ਛਿਮਾਯ ਵਾ ਦਿਸਾਯ ਪਰਿਯਨ੍ਤੇ ਠਪਿਤਚੀਵਰਂ ਰਕ੍ਖਤਿ. ਸਚੇ ਪਨ ਅਰੁਣੁਗ੍ਗਮਨਸਮਯੇ ਕੇਸਗ੍ਗਮਤ੍ਤਮ੍ਪਿ ਪੁਰਤ੍ਥਿਮਂ ਦਿਸਂ ਗਚ੍ਛਤਿ, ਪਚ੍ਛਿਮਾਯ ਦਿਸਾਯ ਚੀਵਰਂ ਨਿਸ੍ਸਗ੍ਗਿਯਂ ਹੋਤਿ. ਏਸ ਨਯੋ ਇਤਰਸ੍ਮਿਂ. ਉਪੋਸਥਕਾਲੇ ਪਨ ਪਰਿਸਪਰਿਯਨ੍ਤੇ ਨਿਸਿਨ੍ਨਭਿਕ੍ਖੁਤੋ ਪਟ੍ਠਾਯ ਸਤ੍ਤਬ੍ਭਨ੍ਤਰਸੀਮਾ ਸੋਧੇਤਬ੍ਬਾ. ਯਤ੍ਤਕਂ ਭਿਕ੍ਖੁਸਙ੍ਘੋ ਵਡ੍ਢਤਿ, ਸੀਮਾਪਿ ਤਤ੍ਤਕਂ ਵਡ੍ਢਤਿ.

੪੯੫. ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜਤਿ ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਸਚੇ ਪਧਾਨਿਕੋ ਭਿਕ੍ਖੁ ਸਬ੍ਬਰਤ੍ਤਿਂ ਪਧਾਨਮਨੁਯੁਞ੍ਜਿਤ੍ਵਾ ਪਚ੍ਚੁਸਸਮਯੇ ‘‘ਨ੍ਹਾਯਿਸ੍ਸਾਮੀ’’ਤਿ ਤੀਣਿਪਿ ਚੀਵਰਾਨਿ ਤੀਰੇ ਠਪੇਤ੍ਵਾ ਨਦਿਂ ਓਤਰਤਿ, ਨ੍ਹਾਯਨ੍ਤਸ੍ਸੇਵ ਚਸ੍ਸ ਅਰੁਣਂ ਉਟ੍ਠਹਤਿ, ਕਿਂ ਕਾਤਬ੍ਬਂ. ਸੋ ਹਿ ਯਦਿ ਉਤ੍ਤਰਿਤ੍ਵਾ ਚੀਵਰਂ ਨਿਵਾਸੇਤਿ, ਨਿਸ੍ਸਗ੍ਗਿਯਚੀਵਰਂ ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜਨਪਚ੍ਚਯਾ ਦੁਕ੍ਕਟਂ ਆਪਜ੍ਜਤਿ. ਅਥ ਨਗ੍ਗੋ ਗਚ੍ਛਤਿ, ਏਵਮ੍ਪਿ ਦੁਕ੍ਕਟਂ ਆਪਜ੍ਜਤੀਤਿ? ਨ ਆਪਜ੍ਜਤਿ. ਸੋ ਹਿ ਯਾਵ ਅਞ੍ਞਂ ਭਿਕ੍ਖੁਂ ਦਿਸ੍ਵਾ ਵਿਨਯਕਮ੍ਮਂ ਨ ਕਰੋਤਿ, ਤਾਵ ਤੇਸਂ ਚੀਵਰਾਨਂ ਅਪਰਿਭੋਗਾਰਹਤ੍ਤਾ ਨਟ੍ਠਚੀਵਰਟ੍ਠਾਨੇ ਠਿਤੋ ਹੋਤਿ. ਨਟ੍ਠਚੀਵਰਸ੍ਸ ਚ ਅਕਪ੍ਪਿਯਂ ਨਾਮ ਨਤ੍ਥਿ. ਤਸ੍ਮਾ ਏਕਂ ਨਿਵਾਸੇਤ੍ਵਾ ਦ੍ਵੇ ਹਤ੍ਥੇਨ ਗਹੇਤ੍ਵਾ ਵਿਹਾਰਂ ਗਨ੍ਤ੍ਵਾ ਵਿਨਯਕਮ੍ਮਂ ਕਾਤਬ੍ਬਂ. ਸਚੇ ਦੂਰੇ ਵਿਹਾਰੋ ਹੋਤਿ, ਅਨ੍ਤਰਾਮਗ੍ਗੇ ਮਨੁਸ੍ਸਾ ਸਞ੍ਚਰਨ੍ਤਿ. ਏਕਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ਏਕਂ ਅਂਸਕੂਟੇ ਠਪੇਤ੍ਵਾ ਗਨ੍ਤਬ੍ਬਂ. ਸਚੇ ਵਿਹਾਰੇ ਸਭਾਗਭਿਕ੍ਖੂ ਨ ਪਸ੍ਸਤਿ, ਭਿਕ੍ਖਾਚਾਰਂ ਗਤਾ ਹੋਨ੍ਤਿ, ਸਙ੍ਘਾਟਿਂ ਬਹਿਗਾਮੇ ਠਪੇਤ੍ਵਾ ਸਨ੍ਤਰੁਤ੍ਤਰੇਨ ਆਸਨਸਾਲਂ ਗਨ੍ਤ੍ਵਾ ਵਿਨਯਕਮ੍ਮਂ ਕਾਤਬ੍ਬਂ. ਸਚੇ ਬਹਿਗਾਮੇ ਚੋਰਭਯਂ ਹੋਤਿ, ਪਾਰੁਪਿਤ੍ਵਾ ਗਨ੍ਤਬ੍ਬਂ. ਸਚੇ ਆਸਨਸਾਲਾ ਸਮ੍ਬਾਧਾ ਹੋਤਿ ਜਨਾਕਿਣ੍ਣਾ, ਨ ਸਕ੍ਕਾ ਏਕਮਨ੍ਤੇ ਚੀਵਰਂ ਅਪਨੇਤ੍ਵਾ ਵਿਨਯਕਮ੍ਮਂ ਕਾਤੁਂ, ਏਕਂ ਭਿਕ੍ਖੁਂ ਆਦਾਯ ਬਹਿਗਾਮਂ ਗਨ੍ਤ੍ਵਾ ਵਿਨਯਕਮ੍ਮਂ ਕਤ੍ਵਾ ਚੀਵਰਾਨਿ ਪਰਿਭੁਞ੍ਜਿਤਬ੍ਬਾਨਿ.

ਸਚੇ ਭਿਕ੍ਖੂ ਦਹਰਾਨਂ ਹਤ੍ਥੇ ਪਤ੍ਤਚੀਵਰਂ ਦਤ੍ਵਾ ਮਗ੍ਗਂ ਗਚ੍ਛਨ੍ਤਾ ਪਚ੍ਛਿਮੇ ਯਾਮੇ ਸਯਿਤੁਕਾਮਾ ਹੋਨ੍ਤਿ, ਅਤ੍ਤਨੋ ਅਤ੍ਤਨੋ ਚੀਵਰਂ ਹਤ੍ਥਪਾਸੇ ਕਤ੍ਵਾਵ ਸਯਿਤਬ੍ਬਂ. ਸਚੇ ਗਚ੍ਛਨ੍ਤਾਨਂਯੇਵ ਅਸਮ੍ਪਤ੍ਤੇਸੁ ਦਹਰੇਸੁ ਅਰੁਣਂ ਉਗ੍ਗਚ੍ਛਤਿ, ਚੀਵਰਂ ਨਿਸ੍ਸਗ੍ਗਿਯਂ ਹੋਤਿ, ਨਿਸ੍ਸਯੋ ਪਨ ਨ ਪਟਿਪ੍ਪਸ੍ਸਮ੍ਭਤਿ, ਦਹਰਾਨਮ੍ਪਿ ਪੁਰਤੋ ਗਚ੍ਛਨ੍ਤਾਨਂ ਥੇਰੇਸੁ ਅਸਮ੍ਪਤ੍ਤੇਸੁ ਏਸੇਵ ਨਯੋ. ਮਗ੍ਗਂ ਵਿਰਜ੍ਝਿਤ੍ਵਾ ਅਰਞ੍ਞੇ ਅਞ੍ਞਮਞ੍ਞਂ ਅਪਸ੍ਸਨ੍ਤੇਸੁਪਿ ਏਸੇਵ ਨਯੋ. ਸਚੇ ਪਨ ਦਹਰਾ ‘‘ਮਯਂ, ਭਨ੍ਤੇ, ਮੁਹੁਤ੍ਤਂ ਸਯਿਤ੍ਵਾ ਅਸੁਕਸ੍ਮਿਂ ਨਾਮ ਓਕਾਸੇ ਤੁਮ੍ਹੇ ਸਮ੍ਪਾਪੁਣਿਸ੍ਸਾਮਾ’’ਤਿ ਵਤ੍ਵਾ ਯਾਵ ਅਰੁਣੁਗ੍ਗਮਨਾ ਸਯਨ੍ਤਿ, ਚੀਵਰਞ੍ਚ ਨਿਸ੍ਸਗ੍ਗਿਯਂ ਹੋਤਿ, ਨਿਸ੍ਸਯੋ ਚ ਪਟਿਪ੍ਪਸ੍ਸਮ੍ਭਤਿ, ਦਹਰੇ ਉਯ੍ਯੋਜੇਤ੍ਵਾ ਥੇਰੇਸੁ ਸਯਨ੍ਤੇਸੁਪਿ ਏਸੇਵ ਨਯੋ. ਦ੍ਵੇਧਾਪਥਂ ਦਿਸ੍ਵਾ ਥੇਰਾ ‘‘ਅਯਂ ਮਗ੍ਗੋ’’ ਦਹਰਾ ‘‘ਅਯਂ ਮਗ੍ਗੋ’’ਤਿ ਵਤ੍ਵਾ ਅਞ੍ਞਮਞ੍ਞਸ੍ਸ ਵਚਨਂ ਅਗ੍ਗਹੇਤ੍ਵਾ ਗਤਾ, ਸਹ ਅਰੁਣੁਗ੍ਗਮਨਾ ਚੀਵਰਾਨਿ ਚ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨਿਸ੍ਸਯੋ ਚ ਪਟਿਪ੍ਪਸ੍ਸਮ੍ਭਤਿ. ਸਚੇ ਦਹਰਾ ਮਗ੍ਗਤੋ ਓਕ੍ਕਮ੍ਮ ‘‘ਅਨ੍ਤੋਅਰੁਣੇਯੇਵ ਨਿਵਤ੍ਤਿਸ੍ਸਾਮਾ’’ਤਿ ਭੇਸਜ੍ਜਤ੍ਥਾਯ ਗਾਮਂ ਪਵਿਸਿਤ੍ਵਾ ਆਗਚ੍ਛਨ੍ਤਿ. ਅਸਮ੍ਪਤ੍ਤਾਨਂਯੇਵ ਚ ਤੇਸਂ ਅਰੁਣੋ ਉਗ੍ਗਚ੍ਛਤਿ, ਚੀਵਰਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨਿਸ੍ਸਯੋ ਪਨ ਨ ਪਟਿਪ੍ਪਸ੍ਸਮ੍ਭਤਿ. ਸਚੇ ਪਨ ਧੇਨੁਭਯੇਨ ਵਾ ਸੁਨਖਭਯੇਨ ਵਾ ‘‘ਮੁਹੁਤ੍ਤਂ ਠਤ੍ਵਾ ਗਮਿਸ੍ਸਾਮਾ’’ਤਿ ਠਤ੍ਵਾ ਵਾ ਨਿਸੀਦਿਤ੍ਵਾ ਵਾ ਗਚ੍ਛਨ੍ਤਿ, ਅਨ੍ਤਰਾ ਅਰੁਣੇ ਉਗ੍ਗਤੇ ਚੀਵਰਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨਿਸ੍ਸਯੋ ਚ ਪਟਿਪ੍ਪਸ੍ਸਮ੍ਭਤਿ. ਸਚੇ ‘‘ਅਨ੍ਤੋਅਰੁਣੇਯੇਵ ਆਗਮਿਸ੍ਸਾਮਾ’’ਤਿ ਅਨ੍ਤੋਸੀਮਾਯਂ ਗਾਮਂ ਪਵਿਟ੍ਠਾਨਂ ਅਨ੍ਤਰਾ ਅਰੁਣੋ ਉਗ੍ਗਚ੍ਛਤਿ, ਨੇਵ ਚੀਵਰਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨ ਨਿਸ੍ਸਯੋ ਪਟਿਪ੍ਪਸ੍ਸਮ੍ਭਤਿ. ਸਚੇ ਪਨ ‘‘ਵਿਭਾਯਤੁ ਤਾਵਾ’’ਤਿ ਨਿਸੀਦਨ੍ਤਿ, ਅਰੁਣੇ ਉਗ੍ਗਤੇਪਿ ਨ ਚੀਵਰਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨਿਸ੍ਸਯੋ ਪਨ ਪਟਿਪ੍ਪਸ੍ਸਮ੍ਭਤਿ. ਯੇਪਿ ‘‘ਅਨ੍ਤੋਅਰੁਣੇਯੇਵ ਆਗਮਿਸ੍ਸਾਮਾ’’ਤਿ ਸਾਮਨ੍ਤਵਿਹਾਰਂ ਧਮ੍ਮਸਵਨਤ੍ਥਾਯ ਸਉਸ੍ਸਾਹਾ ਗਚ੍ਛਨ੍ਤਿ, ਅਨ੍ਤਰਾਮਗ੍ਗੇਯੇਵ ਚ ਨੇਸਂ ਅਰੁਣੋ ਉਗ੍ਗਚ੍ਛਤਿ, ਚੀਵਰਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨਿਸ੍ਸਯੋ ਪਨ ਨ ਪਟਿਪ੍ਪਸ੍ਸਮ੍ਭਤਿ. ਸਚੇ ਧਮ੍ਮਗਾਰਵੇਨ ‘‘ਯਾਵ ਪਰਿਯੋਸਾਨਂ ਸੁਤ੍ਵਾਵ ਗਮਿਸ੍ਸਾਮਾ’’ਤਿ ਨਿਸੀਦਨ੍ਤਿ, ਸਹ ਅਰੁਣਸ੍ਸੁਗ੍ਗਮਨਾ ਚੀਵਰਾਨਿਪਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨਿਸ੍ਸਯੋਪਿ ਪਟਿਪ੍ਪਸ੍ਸਮ੍ਭਤਿ. ਥੇਰੇਨ ਦਹਰਂ ਚੀਵਰਧੋਵਨਤ੍ਥਾਯ ਗਾਮਕਂ ਪੇਸੇਨ੍ਤੇਨ ਅਤ੍ਤਨੋ ਚੀਵਰਂ ਪਚ੍ਚੁਦ੍ਧਰਿਤ੍ਵਾਵ ਦਾਤਬ੍ਬਂ. ਦਹਰਸ੍ਸਾਪਿ ਚੀਵਰਂ ਪਚ੍ਚੁਦ੍ਧਰਾਪੇਤ੍ਵਾ ਠਪੇਤਬ੍ਬਂ. ਸਚੇ ਅਸ੍ਸਤਿਯਾ ਗਚ੍ਛਤਿ, ਅਤ੍ਤਨੋ ਚੀਵਰਂ ਪਚ੍ਚੁਦ੍ਧਰਿਤ੍ਵਾ ਦਹਰਸ੍ਸ ਚੀਵਰਂ ਵਿਸ੍ਸਾਸੇਨ ਗਹੇਤ੍ਵਾ ਠਪੇਤਬ੍ਬਂ. ਸਚੇ ਥੇਰੋ ਨਸ੍ਸਰਤਿ, ਦਹਰੋ ਏਵ ਸਰਤਿ, ਦਹਰੇਨ ਅਤ੍ਤਨੋ ਚੀਵਰਂ ਪਚ੍ਚੁਦ੍ਧਰਿਤ੍ਵਾ ਥੇਰਸ੍ਸ ਚੀਵਰਂ ਵਿਸ੍ਸਾਸੇਨ ਗਹੇਤ੍ਵਾ ਗਨ੍ਤ੍ਵਾ ਵਤ੍ਤਬ੍ਬੋ ‘‘ਭਨ੍ਤੇ, ਤੁਮ੍ਹਾਕਂ ਚੀਵਰਂ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਥਾ’’ਤਿ ਅਤ੍ਤਨੋਪਿ ਚੀਵਰਂ ਅਧਿਟ੍ਠਾਤਬ੍ਬਂ. ਏਵਂ ਏਕਸ੍ਸ ਸਤਿਯਾਪਿ ਆਪਤ੍ਤਿਮੋਕ੍ਖੋ ਹੋਤੀਤਿ. ਸੇਸਂ ਉਤ੍ਤਾਨਤ੍ਥਮੇਵ.

ਸਮੁਟ੍ਠਾਨਾਦੀਸੁ ਪਠਮਕਥਿਨਸਿਕ੍ਖਾਪਦੇ ਅਨਧਿਟ੍ਠਾਨਂ ਅਵਿਕਪ੍ਪਨਞ੍ਚ ਅਕਿਰਿਯਂ, ਇਧ ਅਪਚ੍ਚੁਦ੍ਧਰਣਂ ਅਯਮੇਵ ਵਿਸੇਸੋ. ਸੇਸਂ ਸਬ੍ਬਤ੍ਥ ਵੁਤ੍ਤਨਯਮੇਵਾਤਿ.

ਉਦੋਸਿਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਤਤਿਯਕਥਿਨਸਿਕ੍ਖਾਪਦਵਣ੍ਣਨਾ

੪੯੭. ਤੇਨ ਸਮਯੇਨਾਤਿ ਤਤਿਯਕਥਿਨਸਿਕ੍ਖਾਪਦਂ. ਤਤ੍ਥ ਉਸ੍ਸਾਪੇਤ੍ਵਾ ਪੁਨਪ੍ਪੁਨਂ ਵਿਮਜ੍ਜਤੀਤਿ ‘‘ਵਲੀਸੁ ਨਟ੍ਠਾਸੁ ਇਦਂ ਮਹਨ੍ਤਂ ਭਵਿਸ੍ਸਤੀ’’ਤਿ ਮਞ੍ਞਮਾਨੋ ਉਦਕੇਨ ਸਿਞ੍ਚਿਤ੍ਵਾ ਪਾਦੇਹਿ ਅਕ੍ਕਮਿਤ੍ਵਾ ਹਤ੍ਥੇਹਿ ਉਸ੍ਸਾਪੇਤ੍ਵਾ ਉਕ੍ਖਿਪਿਤ੍ਵਾ ਪਿਟ੍ਠਿਯਂ ਘਂਸਤਿ, ਤਂ ਆਤਪੇ ਸੁਕ੍ਖਂ ਪਠਮਪ੍ਪਮਾਣਮੇਵ ਹੋਤਿ. ਸੋ ਪੁਨਪਿ ਤਥਾ ਕਰੋਤਿ, ਤੇਨ ਵੁਤ੍ਤਂ – ‘‘ਉਸ੍ਸਾਪੇਤ੍ਵਾ ਪੁਨਪ੍ਪੁਨਂ ਵਿਮਜ੍ਜਤੀ’’ਤਿ. ਤਂ ਏਵਂ ਕਿਲਮਨ੍ਤਂ ਭਗਵਾ ਗਨ੍ਧਕੁਟਿਯਂ ਨਿਸਿਨ੍ਨੋਵ ਦਿਸ੍ਵਾ ਨਿਕ੍ਖਮਿਤ੍ਵਾ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਵਿਯ ਤਤ੍ਥ ਅਗਮਾਸਿ. ਤੇਨ ਵੁਤ੍ਤਂ – ‘‘ਅਦ੍ਦਸ ਖੋ ਭਗਵਾ’’ਤਿਆਦਿ.

੪੯੯-੫੦੦. ਏਕਾਦਸਮਾਸੇਤਿ ਏਕਂ ਪਚ੍ਛਿਮਕਤ੍ਤਿਕਮਾਸਂ ਠਪੇਤ੍ਵਾ ਸੇਸੇ ਏਕਾਦਸਮਾਸੇ. ਸਤ੍ਤਮਾਸੇਤਿ ਕਤ੍ਤਿਕਮਾਸਂ ਹੇਮਨ੍ਤਿਕੇ ਚ ਚਤ੍ਤਾਰੋਤਿ ਪਞ੍ਚਮਾਸੇ ਠਪੇਤ੍ਵਾ ਸੇਸੇ ਸਤ੍ਤਮਾਸੇ. ਕਾਲੇਪਿ ਆਦਿਸ੍ਸ ਦਿਨ੍ਨਨ੍ਤਿ ਸਙ੍ਘਸ੍ਸ ਵਾ ‘‘ਇਦਂ ਅਕਾਲਚੀਵਰ’’ਨ੍ਤਿ ਉਦ੍ਦਿਸਿਤ੍ਵਾ ਦਿਨ੍ਨਂ, ਏਕਪੁਗ੍ਗਲਸ੍ਸ ਵਾ ‘‘ਇਦਂ ਤੁਯ੍ਹਂ ਦਮ੍ਮੀ’’ਤਿ ਦਿਨ੍ਨਂ.

ਸਙ੍ਘਤੋ ਵਾਤਿ ਅਤ੍ਤਨੋ ਪਤ੍ਤਭਾਗਵਸੇਨ ਸਙ੍ਘਤੋ ਵਾ ਉਪ੍ਪਜ੍ਜੇਯ੍ਯ. ਗਣਤੋ ਵਾਤਿ ਇਦਂ ਸੁਤ੍ਤਨ੍ਤਿਕਗਣਸ੍ਸ ਦੇਮ, ਇਦਂ ਆਭਿਧਮ੍ਮਿਕਗਣਸ੍ਸਾਤਿ ਏਵਂ ਗਣਸ੍ਸ ਦੇਨ੍ਤਿ. ਤਤੋ ਅਤ੍ਤਨੋ ਪਤ੍ਤਭਾਗਵਸੇਨ ਗਣਤੋ ਵਾ ਉਪ੍ਪਜ੍ਜੇਯ੍ਯ.

ਨੋ ਚਸ੍ਸ ਪਾਰਿਪੂਰੀਤਿ ਨੋ ਚੇ ਪਾਰਿਪੂਰੀ ਭਵੇਯ੍ਯ, ਯਤ੍ਤਕੇਨ ਕਯਿਰਮਾਨਂ ਅਧਿਟ੍ਠਾਨਚੀਵਰਂ ਪਹੋਤਿ, ਤਞ੍ਚੇ ਚੀਵਰਂ ਤਤ੍ਤਕਂ ਨ ਭਵੇਯ੍ਯ, ਊਨਕਂ ਭਵੇਯ੍ਯਾਤਿ ਅਤ੍ਥੋ.

ਪਚ੍ਚਾਸਾ ਹੋਤਿ ਸਙ੍ਘਤੋ ਵਾਤਿਆਦੀਸੁ ਅਸੁਕਦਿਵਸਂ ਨਾਮ ਸਙ੍ਘੋ ਚੀਵਰਾਨਿ ਲਭਿਸ੍ਸਤਿ, ਗਣੋ ਲਭਿਸ੍ਸਤਿ, ਤਤੋ ਮੇ ਚੀਵਰਂ ਉਪ੍ਪਜ੍ਜਿਸ੍ਸਤੀਤਿ ਏਵਂ ਸਙ੍ਘਤੋ ਵਾ ਗਣਤੋ ਵਾ ਪਚ੍ਚਾਸਾ ਹੋਤਿ. ਞਾਤਕੇਹਿ ਮੇ ਚੀਵਰਤ੍ਥਾਯ ਪੇਸਿਤਂ, ਮਿਤ੍ਤੇਹਿ ਪੇਸਿਤਂ, ਤੇ ਆਗਤਾ ਚੀਵਰੇ ਦਸ੍ਸਨ੍ਤੀਤਿ ਏਵਂ ਞਾਤਿਤੋ ਵਾ ਮਿਤ੍ਤਤੋ ਵਾ ਪਚ੍ਚਾਸਾ ਹੋਤਿ. ਪਂਸੁਕੂਲਂ ਵਾਤਿ ਏਤ੍ਥ ਪਨ ਪਂਸੁਕੂਲਂ ਵਾ ਲਚ੍ਛਾਮੀਤਿ ਏਵਂ ਪਚ੍ਚਾਸਾ ਹੋਤੀਤਿ ਯੋਜੇਤਬ੍ਬਂ. ਅਤ੍ਤਨੋ ਵਾ ਧਨੇਨਾਤਿ ਅਤ੍ਤਨੋ ਕਪ੍ਪਾਸਸੁਤ੍ਤਾਦਿਨਾ ਧਨੇਨ, ਅਸੁਕਦਿਵਸਂ ਨਾਮ ਲਚ੍ਛਾਮੀਤਿ ਏਵਂ ਵਾ ਪਚ੍ਚਾਸਾ ਹੋਤੀਤਿ ਅਤ੍ਥੋ.

ਤਤੋ ਚੇ ਉਤ੍ਤਰਿ ਨਿਕ੍ਖਿਪੇਯ੍ਯ ਸਤਿਯਾਪਿ ਪਚ੍ਚਾਸਾਯਾਤਿ ਮਾਸਪਰਮਤੋ ਚੇ ਉਤ੍ਤਰਿ ਨਿਕ੍ਖਿਪੇਯ੍ਯ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਨ੍ਤਿ ਅਤ੍ਥੋ. ਏਵਂ ਪਨ ਅਵਤ੍ਵਾ ਯਸ੍ਮਾ ਅਨ੍ਤਰਾ ਉਪ੍ਪਜ੍ਜਮਾਨੇ ਪਚ੍ਚਾਸਾਚੀਵਰੇ ਮੂਲਚੀਵਰਸ੍ਸ ਉਪ੍ਪਨ੍ਨਦਿਵਸਤੋ ਯਾਵ ਵੀਸਤਿਮੋ ਦਿਵਸੋ ਤਾਵ ਉਪ੍ਪਨ੍ਨਂ ਪਚ੍ਚਾਸਾਚੀਵਰਂ ਮੂਲਚੀਵਰਂ ਅਤ੍ਤਨੋ ਗਤਿਕਂ ਕਰੋਤਿ, ਤਤੋ ਉਦ੍ਧਂ ਮੂਲਚੀਵਰਂ ਪਚ੍ਚਾਸਾਚੀਵਰਂ ਅਤ੍ਤਨੋ ਗਤਿਕਂ ਕਰੋਤਿ. ਤਸ੍ਮਾ ਤਂ ਵਿਸੇਸਂ ਦਸ੍ਸੇਤੁਂ ‘‘ਤਦਹੁਪ੍ਪਨ੍ਨੇ ਮੂਲਚੀਵਰੇ’’ਤਿਆਦਿਨਾ ਨਯੇਨ ਪਦਭਾਜਨਂ ਵੁਤ੍ਤਂ, ਤਂ ਉਤ੍ਤਾਨਤ੍ਥਮੇਵ.

ਵਿਸਭਾਗੇ ਉਪ੍ਪਨ੍ਨੇ ਮੂਲਚੀਵਰੇਤਿ ਯਦਿ ਮੂਲਚੀਵਰਂ ਸਣ੍ਹਂ, ਪਚ੍ਚਾਸਾਚੀਵਰਂ ਥੂਲਂ, ਨ ਸਕ੍ਕਾ ਯੋਜੇਤੁਂ. ਰਤ੍ਤਿਯੋ ਚ ਸੇਸਾ ਹੋਨ੍ਤਿ, ਨ ਤਾਵ ਮਾਸੋ ਪੂਰਤਿ, ਨ ਅਕਾਮਾ ਨਿਗ੍ਗਹੇਨ ਚੀਵਰਂ ਕਾਰੇਤਬ੍ਬਂ. ਅਞ੍ਞਂ ਪਚ੍ਚਾਸਾਚੀਵਰਂ ਲਭਿਤ੍ਵਾਯੇਵ ਕਾਲਬ੍ਭਨ੍ਤਰੇ ਕਾਰੇਤਬ੍ਬਂ. ਪਚ੍ਚਾਸਾਚੀਵਰਮ੍ਪਿ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤਬ੍ਬਂ. ਅਥ ਮੂਲਚੀਵਰਂ ਥੂਲਂ ਹੋਤਿ, ਪਚ੍ਚਾਸਾਚੀਵਰਂ ਸਣ੍ਹਂ, ਮੂਲਚੀਵਰਂ ਪਰਿਕ੍ਖਾਰਚੋਲ਼ਂ ਅਧਿਟ੍ਠਹਿਤ੍ਵਾ ਪਚ੍ਚਾਸਾਚੀਵਰਮੇਵ ਮੂਲਚੀਵਰਂ ਕਤ੍ਵਾ ਠਪੇਤਬ੍ਬਂ. ਤਂ ਪੁਨ ਮਾਸਪਰਿਹਾਰਂ ਲਭਤਿ, ਏਤੇਨੁਪਾਯੇਨ ਯਾਵ ਇਚ੍ਛਤਿ ਤਾਵ ਅਞ੍ਞਮਞ੍ਞਂ ਮੂਲਚੀਵਰਂ ਕਤ੍ਵਾ ਠਪੇਤੁਂ ਵਟ੍ਟਤੀਤਿ. ਸੇਸਂ ਉਤ੍ਤਾਨਮੇਵ.

ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨੇਵਾਤਿ.

ਤਤਿਯਕਥਿਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਪੁਰਾਣਚੀਵਰਸਿਕ੍ਖਾਪਦਵਣ੍ਣਨਾ

੫੦੩-੫. ਤੇਨ ਸਮਯੇਨਾਤਿ ਪੁਰਾਣਚੀਵਰਸਿਕ੍ਖਾਪਦਂ. ਤਤ੍ਥ ਯਾਵ ਸਤ੍ਤਮਾ ਪਿਤਾਮਹਯੁਗਾਤਿ ਪਿਤੁਪਿਤਾ ਪਿਤਾਮਹੋ, ਪਿਤਾਮਹਸ੍ਸ ਯੁਗਂ ਪਿਤਾਮਹਯੁਗਂ. ਯੁਗਨ੍ਤਿ ਆਯੁਪ੍ਪਮਾਣਂ ਵੁਚ੍ਚਤਿ. ਅਭਿਲਾਪ ਮਤ੍ਤਮੇਵ ਚੇਤਂ. ਅਤ੍ਥਤੋ ਪਨ ਪਿਤਾਮਹੋਯੇਵ ਪਿਤਾਮਹਯੁਗਂ. ਤਤੋ ਉਦ੍ਧਂ ਸਬ੍ਬੇਪਿ ਪੁਬ੍ਬਪੁਰਿਸਾ ਪਿਤਾਮਹਗ੍ਗਹਣੇਨੇਵ ਗਹਿਤਾ. ਏਵਂ ਯਾਵ ਸਤ੍ਤਮੋ ਪੁਰਿਸੋ ਤਾਵ ਯਾ ਅਸਮ੍ਬਦ੍ਧਾ ਸਾ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਸਮ੍ਬਦ੍ਧਾਤਿ ਵੁਚ੍ਚਤਿ. ਦੇਸਨਾਮੁਖਮੇਵ ਚੇਤਂ. ‘‘ਮਾਤਿਤੋ ਵਾ ਪਿਤਿਤੋ ਵਾ’’ਤਿਵਚਨਤੋ ਪਨ ਪਿਤਾਮਹਯੁਗਮ੍ਪਿ ਪਿਤਾਮਹਿਯੁਗਮ੍ਪਿ ਮਾਤਾਮਹਯੁਗਮ੍ਪਿ ਮਾਤਾਮਹਿਯੁਗਮ੍ਪਿ ਤੇਸਂ ਭਾਤੁਭਗਿਨੀਭਾਗਿਨੇਯ੍ਯਪੁਤ੍ਤਪਪੁਤ੍ਤਾਦਯੋਪਿ ਸਬ੍ਬੇ ਇਧ ਸਙ੍ਗਹਿਤਾ ਏਵਾਤਿ ਵੇਦਿਤਬ੍ਬਾ.

ਤਤ੍ਰਾਯਂ ਵਿਤ੍ਥਾਰਨਯੋ – ਪਿਤਾ ਪਿਤੁਪਿਤਾ ਤਸ੍ਸ ਪਿਤਾ ਤਸ੍ਸਾਪਿ ਪਿਤਾਤਿ ਏਵਂ ਯਾਵ ਸਤ੍ਤਮਾ ਯੁਗਾ, ਪਿਤਾ ਪਿਤੁਮਾਤਾ ਤਸ੍ਸਾ ਪਿਤਾ ਚ ਮਾਤਾ ਚ ਭਾਤਾ ਚ ਭਗਿਨੀ ਚ ਪੁਤ੍ਤਾ ਚ ਧੀਤਰੋ ਚਾਤਿ ਏਵਮ੍ਪਿ ਉਦ੍ਧਞ੍ਚ ਅਧੋ ਚ ਯਾਵ ਸਤ੍ਤਮਾ ਯੁਗਾ, ਪਿਤਾ ਪਿਤੁਭਾਤਾ ਪਿਤੁਭਗਿਨੀ ਪਿਤੁਪੁਤ੍ਤਾ ਪਿਤੁਧੀਤਰੋ ਤੇਸਮ੍ਪਿ ਪੁਤ੍ਤਧੀਤੁਪਰਮ੍ਪਰਾਤਿ ਏਵਮ੍ਪਿ ਯਾਵ ਸਤ੍ਤਮਾ ਯੁਗਾ, ਮਾਤਾ ਮਾਤੁਮਾਤਾ ਤਸ੍ਸਾ ਮਾਤਾ ਤਸ੍ਸਾਪਿ ਮਾਤਾਤਿ ਏਵਮ੍ਪਿ ਯਾਵ ਸਤ੍ਤਮਾ ਯੁਗਾ, ਮਾਤਾ ਮਾਤੁਪਿਤਾ ਤਸ੍ਸ ਮਾਤਾ ਚ ਪਿਤਾ ਚ ਭਾਤਾ ਚ ਭਗਿਨੀ ਚ ਪੁਤ੍ਤਾ ਚ ਧੀਤਰੋ ਚਾਤਿ, ਏਵਮ੍ਪਿ ਉਦ੍ਧਞ੍ਚ ਅਧੋ ਚ ਯਾਵ ਸਤ੍ਤਮਾ ਯੁਗਾ, ਮਾਤਾ ਮਾਤੁਭਾਤਾ ਮਾਤੁਭਗਿਨੀ ਮਾਤੁਪੁਤ੍ਤਾ ਮਾਤੁਧੀਤਰੋ ਤੇਸਮ੍ਪਿ ਪੁਤ੍ਤਧੀਤੁਪਰਮ੍ਪਰਾਤਿ ਏਵਮ੍ਪਿ ਯਾਵ ਸਤ੍ਤਮਾ ਯੁਗਾ, ਨੇਵ ਮਾਤੁਸਮ੍ਬਨ੍ਧੇਨ ਨ ਪਿਤੁਸਮ੍ਬਨ੍ਧੇਨ ਸਮ੍ਬਦ੍ਧਾ, ਅਯਂ ਅਞ੍ਞਾਤਿਕਾ ਨਾਮ.

ਉਭਤੋ ਸਙ੍ਘੇਤਿ ਭਿਕ੍ਖੁਨਿਸਙ੍ਘੇ ਞਤ੍ਤਿਚਤੁਤ੍ਥੇਨ ਭਿਕ੍ਖੁਸਙ੍ਘੇ ਞਤ੍ਤਿਚਤੁਤ੍ਥੇਨਾਤਿ ਅਟ੍ਠਵਾਚਿਕਵਿਨਯਕਮ੍ਮੇਨ ਉਪਸਮ੍ਪਨ੍ਨਾ.

ਸਕਿਂ ਨਿਵਤ੍ਥਮ੍ਪਿ ਸਕਿਂ ਪਾਰੁਤਮ੍ਪੀਤਿ ਰਜਿਤ੍ਵਾ ਕਪ੍ਪਂ ਕਤ੍ਵਾ ਏਕਵਾਰਮ੍ਪਿ ਨਿਵਤ੍ਥਂ ਵਾ ਪਾਰੁਤਂ ਵਾ. ਅਨ੍ਤਮਸੋ ਪਰਿਭੋਗਸੀਸੇਨ ਅਂਸੇ ਵਾ ਮਤ੍ਥਕੇ ਵਾ ਕਤ੍ਵਾ ਮਗ੍ਗਂ ਗਤੋ ਹੋਤਿ, ਉਸ੍ਸੀਸਕਂ ਵਾ ਕਤ੍ਵਾ ਨਿਪਨ੍ਨੋ ਹੋਤਿ, ਏਤਮ੍ਪਿ ਪੁਰਾਣਚੀਵਰਮੇਵ. ਸਚੇ ਪਨ ਪਚ੍ਚਤ੍ਥਰਣਸ੍ਸ ਹੇਟ੍ਠਾ ਕਤ੍ਵਾ ਨਿਪਜ੍ਜਤਿ, ਹਤ੍ਥੇਹਿ ਵਾ ਉਕ੍ਖਿਪਿਤ੍ਵਾ ਆਕਾਸੇ ਵਿਤਾਨਂ ਕਤ੍ਵਾ ਸੀਸੇਨ ਅਫੁਸਨ੍ਤੋ ਗਚ੍ਛਤਿ, ਅਯਂ ਪਰਿਭੋਗੋ ਨਾਮ ਨ ਹੋਤੀਤਿ ਕੁਰੁਨ੍ਦਿਯਂ ਵੁਤ੍ਤਂ.

ਧੋਤਂ ਨਿਸ੍ਸਗ੍ਗਿਯਨ੍ਤਿ ਏਤ੍ਥ ਏਵਂ ਆਣਤ੍ਤਾ ਭਿਕ੍ਖੁਨੀ ਧੋਵਨਤ੍ਥਾਯ ਉਦ੍ਧਨਂ ਸਜ੍ਜੇਤਿ, ਦਾਰੂਨਿ ਸਂਹਰਤਿ, ਅਗ੍ਗਿਂ ਕਰੋਤਿ, ਉਦਕਂ ਆਹਰਤਿ ਯਾਵ ਨਂ ਧੋਵਿਤ੍ਵਾ ਉਕ੍ਖਿਪਤਿ, ਤਾਵ ਭਿਕ੍ਖੁਨਿਯਾ ਪਯੋਗੇ ਪਯੋਗੇ ਭਿਕ੍ਖੁਸ੍ਸ ਦੁਕ੍ਕਟਂ. ਧੋਵਿਤ੍ਵਾ ਉਕ੍ਖਿਤ੍ਤਮਤ੍ਤੇ ਨਿਸ੍ਸਗ੍ਗਿਯਂ ਹੋਤਿ. ਸਚੇ ਦੁਦ੍ਧੋਤਨ੍ਤਿ ਮਞ੍ਞਮਾਨਾ ਪੁਨ ਸਿਞ੍ਚਤਿ ਵਾ ਧੋਵਤਿ ਵਾ ਯਾਵ ਨਿਟ੍ਠਾਨਂ ਨ ਗਚ੍ਛਤਿ ਤਾਵ ਪਯੋਗੇ ਪਯੋਗੇ ਦੁਕ੍ਕਟਂ. ਏਸ ਨਯੋ ਰਜਨਾਕੋਟਨੇਸੁ. ਰਜਨਦੋਣਿਯਞ੍ਹਿ ਰਜਨਂ ਆਕਿਰਿਤ੍ਵਾ ਯਾਵ ਸਕਿਂ ਚੀਵਰਂ ਰਜਤਿ, ਤਤੋ ਪੁਬ੍ਬੇ ਯਂਕਿਞ੍ਚਿ ਰਜਨਤ੍ਥਾਯ ਕਰੋਤਿ, ਪਚ੍ਛਾ ਵਾ ਪਟਿਰਜਤਿ, ਸਬ੍ਬਤ੍ਥ ਪਯੋਗੇ ਪਯੋਗੇ ਭਿਕ੍ਖੁਸ੍ਸ ਦੁਕ੍ਕਟਂ. ਏਵਂ ਆਕੋਟਨੇਪਿ ਪਯੋਗੋ ਵੇਦਿਤਬ੍ਬੋ.

੫੦੬. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਪੁਰਾਣਚੀਵਰਂ ਧੋਵਾਪੇਤੀਤਿ ਨੋ ਚੇਪਿ ‘‘ਇਮਂ ਧੋਵਾ’’ਤਿ ਵਦਤਿ, ਅਥ ਖੋ ਧੋਵਨਤ੍ਥਾਯ ਕਾਯਵਿਕਾਰਂ ਕਤ੍ਵਾ ਹਤ੍ਥੇਨ ਵਾ ਹਤ੍ਥੇ ਦੇਤਿ, ਪਾਦਮੂਲੇ ਵਾ ਠਪੇਤਿ, ਉਪਰਿ ਵਾ ਖਿਪਤਿ, ਸਿਕ੍ਖਮਾਨਾਸਾਮਣੇਰੀਸਾਮਣੇਰਉਪਾਸਕਤਿਤ੍ਥਿਯਾਦੀਨਂ ਵਾ ਹਤ੍ਥੇ ਪੇਸੇਤਿ, ਨਦੀਤਿਤ੍ਥੇ ਧੋਵਨ੍ਤਿਯਾ ਉਪਚਾਰੇ ਵਾ ਖਿਪਤਿ, ਅਨ੍ਤੋਦ੍ਵਾਦਸਹਤ੍ਥੇ ਓਕਾਸੇ ਠਤ੍ਵਾ, ਧੋਵਾਪਿਤਂਯੇਵ ਹੋਤਿ. ਸਚੇ ਪਨ ਉਪਚਾਰਂ ਮੁਞ੍ਚਿਤ੍ਵਾ ਓਰਤੋ ਠਪੇਤਿ ਸਾ ਚੇ ਧੋਵਿਤ੍ਵਾ ਆਨੇਤਿ, ਅਨਾਪਤ੍ਤਿ. ਸਿਕ੍ਖਮਾਨਾਯ ਵਾ ਸਾਮਣੇਰਿਯਾ ਵਾ ਉਪਾਸਿਕਾਯ ਵਾ ਹਤ੍ਥੇ ਧੋਵਨਤ੍ਥਾਯ ਦੇਤਿ, ਸਾ ਚੇ ਉਪਸਮ੍ਪਜ੍ਜਿਤ੍ਵਾ ਧੋਵਤਿ, ਆਪਤ੍ਤਿਯੇਵ. ਉਪਾਸਕਸ੍ਸ ਹਤ੍ਥੇ ਦੇਤਿ, ਸੋ ਚੇ ਲਿਙ੍ਗੇ ਪਰਿਵਤ੍ਤੇ ਭਿਕ੍ਖੁਨੀਸੁ ਪਬ੍ਬਜਿਤ੍ਵਾ ਉਪਸਮ੍ਪਜ੍ਜਿਤ੍ਵਾ ਧੋਵਤਿ, ਆਪਤ੍ਤਿਯੇਵ. ਸਾਮਣੇਰਸ੍ਸ ਵਾ ਭਿਕ੍ਖੁਸ੍ਸ ਵਾ ਹਤ੍ਥੇ ਦਿਨ੍ਨੇਪਿ ਲਿਙ੍ਗਪਰਿਵਤ੍ਤਨੇ ਏਸੇਵ ਨਯੋ.

ਧੋਵਾਪੇਤਿ ਰਜਾਪੇਤੀਤਿਆਦੀਸੁ ਏਕੇਨ ਵਤ੍ਥੁਨਾ ਨਿਸ੍ਸਗ੍ਗਿਯਂ, ਦੁਤਿਯੇਨ ਦੁਕ੍ਕਟਂ. ਤੀਣਿਪਿ ਕਾਰਾਪੇਨ੍ਤਸ੍ਸ ਏਕੇਨ ਨਿਸ੍ਸਗ੍ਗਿਯਂ, ਸੇਸੇਹਿ ਦ੍ਵੇ ਦੁਕ੍ਕਟਾਨਿ. ਯਸ੍ਮਾ ਪਨੇਤਾਨਿ ਧੋਵਨਾਦੀਨਿ ਪਟਿਪਾਟਿਯਾ ਵਾ ਉਪ੍ਪਟਿਪਾਟਿਯਾ ਵਾ ਕਾਰੇਨ੍ਤਸ੍ਸ ਮੋਕ੍ਖੋ ਨਤ੍ਥਿ, ਤਸ੍ਮਾ ਏਤ੍ਥ ਤੀਣਿ ਚਤੁਕ੍ਕਾਨਿ ਵੁਤ੍ਤਾਨਿ. ਸਚੇਪਿ ਹਿ ‘‘ਇਮਂ ਚੀਵਰਂ ਰਜਿਤ੍ਵਾ ਧੋਵਿਤ੍ਵਾ ਆਨੇਹੀ’’ਤਿ ਵੁਤ੍ਤੇ ਸਾ ਭਿਕ੍ਖੁਨੀ ਪਠਮਂ ਧੋਵਿਤ੍ਵਾ ਪਚ੍ਛਾ ਰਜਤਿ, ਨਿਸ੍ਸਗ੍ਗਿਯੇਨ ਦੁਕ੍ਕਟਮੇਵ. ਏਵਂ ਸਬ੍ਬੇਸੁ ਵਿਪਰੀਤਵਚਨੇਸੁ ਨਯੋ ਨੇਤਬ੍ਬੋ. ਸਚੇ ਪਨ ‘‘ਧੋਵਿਤ੍ਵਾ ਆਨੇਹੀ’’ਤਿ ਵੁਤ੍ਤਾ ਧੋਵਤਿ ਚੇਵ ਰਜਤਿ ਚ, ਧੋਵਾਪਨਪਚ੍ਚਯਾ ਏਵ ਆਪਤ੍ਤਿ, ਰਜਨੇ ਅਨਾਪਤ੍ਤਿ. ਏਵਂ ਸਬ੍ਬਤ੍ਥ ਵੁਤ੍ਤਾਧਿਕਕਰਣੇ ‘‘ਅਵੁਤ੍ਤਾ ਧੋਵਤੀ’’ਤਿ ਇਮਿਨਾ ਲਕ੍ਖਣੇਨ ਅਨਾਪਤ੍ਤਿ ਵੇਦਿਤਬ੍ਬਾ. ‘‘ਇਮਸ੍ਮਿਂ ਚੀਵਰੇ ਯਂ ਕਾਤਬ੍ਬਂ, ਸਬ੍ਬਂ ਤਂ ਤੁਯ੍ਹਂ ਭਾਰੋ’’ਤਿ ਵਦਨ੍ਤੋ ਪਨ ਏਕਵਾਚਾਯ ਸਮ੍ਬਹੁਲਾ ਆਪਤ੍ਤਿਯੋ ਆਪਜ੍ਜਤੀਤਿ.

ਅਞ੍ਞਾਤਿਕਾਯ ਵੇਮਤਿਕੋ ਅਞ੍ਞਾਤਿਕਾਯ ਞਾਤਿਕਸਞ੍ਞੀਤਿ ਇਮਾਨਿਪਿ ਪਦਾਨਿ ਵੁਤ੍ਤਾਨਂਯੇਵ ਤਿਣ੍ਣਂ ਚਤੁਕ੍ਕਾਨਂ ਵਸੇਨ ਵਿਤ੍ਥਾਰਤੋ ਵੇਦਿਤਬ੍ਬਾਨਿ.

ਏਕਤੋ ਉਪਸਮ੍ਪਨ੍ਨਾਯਾਤਿ ਭਿਕ੍ਖੁਨੀਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਧੋਵਾਪੇਨ੍ਤਸ੍ਸ ਦੁਕ੍ਕਟਂ. ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਪਨ ਯਥਾਵਤ੍ਥੁਕਮੇਵ, ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾ ਨਾਮ ਪਞ੍ਚਸਤਾ ਸਾਕਿਯਾਨਿਯੋ.

੫੦੭. ਅਵੁਤ੍ਤਾ ਧੋਵਤੀਤਿ ਉਦ੍ਦੇਸਾਯ ਵਾ ਓਵਾਦਾਯ ਵਾ ਆਗਤਾ ਕਿਲਿਨ੍ਨਂ ਚੀਵਰਂ ਦਿਸ੍ਵਾ ਠਪਿਤਟ੍ਠਾਨਤੋ ਗਹੇਤ੍ਵਾ ਵਾ ‘‘ਦੇਥ, ਅਯ੍ਯ, ਧੋਵਿਸ੍ਸਾਮੀ’’ਤਿ ਆਹਰਾਪੇਤ੍ਵਾ ਵਾ ਧੋਵਤਿ ਚੇਵ ਰਜਤਿ ਚ ਆਕੋਟੇਤਿ ਚ, ਅਯਂ ਅਵੁਤ੍ਤਾ ਧੋਵਤਿ ਨਾਮ. ਯਾਪਿ ‘‘ਇਮਂ ਚੀਵਰਂ ਧੋਵਾ’’ਤਿ ਦਹਰਂ ਵਾ ਸਾਮਣੇਰਂ ਵਾ ਆਣਾਪੇਨ੍ਤਸ੍ਸ ਭਿਕ੍ਖੁਨੋ ਸੁਤ੍ਵਾ ‘‘ਆਹਰਥਯ੍ਯ ਅਹਂ ਧੋਵਿਸ੍ਸਾਮੀ’’ਤਿ ਧੋਵਤਿ, ਤਾਵਕਾਲਿਕਂ ਵਾ ਗਹੇਤ੍ਵਾ ਧੋਵਿਤ੍ਵਾ ਰਜਿਤ੍ਵਾ ਦੇਤਿ, ਅਯਮ੍ਪਿ ਅਵੁਤ੍ਤਾ ਧੋਵਤਿ ਨਾਮ.

ਅਞ੍ਞਂ ਪਰਿਕ੍ਖਾਰਨ੍ਤਿ ਉਪਾਹਨਤ੍ਥਵਿਕਪਤ੍ਤਤ੍ਥਵਿਕਅਂਸਬਦ੍ਧਕਕਾਯਬਨ੍ਧਨਮਞ੍ਚਪੀਠਭਿਸਿਤਟ੍ਟਿਕਾਦਿਂ ਯਂਕਿਞ੍ਚਿ ਧੋਵਾਪੇਤਿ, ਅਨਾਪਤ੍ਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.

ਸਮੁਟ੍ਠਾਨਾਦੀਸੁ ਪਨ ਇਦਂ ਸਿਕ੍ਖਾਪਦਂ ਛਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਪੁਰਾਣਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਚੀਵਰਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ

੫੦੮. ਤੇਨ ਸਮਯੇਨਾਤਿ ਚੀਵਰਪਟਿਗ੍ਗਹਣਸਿਕ੍ਖਾਪਦਂ. ਤਤ੍ਥ ਪਿਣ੍ਡਪਾਤਪਟਿਕ੍ਕਨ੍ਤਾਤਿ ਪਿਣ੍ਡਪਾਤਤੋ ਪਟਿਕ੍ਕਨ੍ਤਾ. ਯੇਨ ਅਨ੍ਧਵਨਂ ਤੇਨੁਪਸਙ੍ਕਮੀਤਿ ਅਪਞ੍ਞਤ੍ਤੇ ਸਿਕ੍ਖਾਪਦੇ ਯੇਨ ਅਨ੍ਧਵਨਂ ਤੇਨੁਪਸਙ੍ਕਮਿ. ਕਤਕਮ੍ਮਾਤਿ ਕਤਚੋਰਿਕਕਮ੍ਮਾ, ਸਨ੍ਧਿਚ੍ਛੇਦਨਾਦੀਹਿ ਪਰਭਣ੍ਡਂ ਹਰਿਤਾਤਿ ਵੁਤ੍ਤਂ ਹੋਤਿ. ਚੋਰਗਾਮਣਿਕੋਤਿ ਚੋਰਜੇਟ੍ਠਕੋ. ਸੋ ਕਿਰ ਪੁਬ੍ਬੇ ਥੇਰਿਂ ਜਾਨਾਤਿ, ਤਸ੍ਮਾ ਚੋਰਾਨਂ ਪੁਰਤੋ ਗਚ੍ਛਨ੍ਤੋ ਦਿਸ੍ਵਾ ‘‘ਇਤੋ ਮਾ ਗਚ੍ਛਥ, ਸਬ੍ਬੇ ਇਤੋ ਏਥਾ’’ਤਿ ਤੇ ਗਹੇਤ੍ਵਾ ਅਞ੍ਞੇਨ ਮਗ੍ਗੇਨ ਅਗਮਾਸਿ. ਸਮਾਧਿਮ੍ਹਾ ਵੁਟ੍ਠਹਿਤ੍ਵਾਤਿ ਥੇਰੀ ਕਿਰ ਪਰਿਚ੍ਛਿਨ੍ਨਵੇਲਾਯਂਯੇਵ ਸਮਾਧਿਮ੍ਹਾ ਵੁਟ੍ਠਹਿ. ਸੋਪਿ ਤਸ੍ਮਿਂਯੇਵ ਖਣੇ ਏਵਂ ਅਵਚ, ਤਸ੍ਮਾ ਸਾ ਅਸ੍ਸੋਸਿ, ਸੁਤ੍ਵਾ ਚ ‘‘ਨਤ੍ਥਿ ਦਾਨਿ ਅਞ੍ਞੋ ਏਤ੍ਥ ਸਮਣੋ ਵਾ ਬ੍ਰਾਹ੍ਮਣੋ ਵਾ ਅਞ੍ਞਤ੍ਰ ਮਯਾ’’ਤਿ ਤਂ ਮਂਸਂ ਅਗ੍ਗਹੇਸਿ. ਤੇਨ ਵੁਤ੍ਤਂ – ‘‘ਅਥ ਖੋ ਉਪ੍ਪਲਵਣ੍ਣਾ ਭਿਕ੍ਖੁਨੀ’’ਤਿਆਦਿ.

ਓਹਿਯ੍ਯਕੋਤਿ ਅਵਹੀਯਕੋ ਅਵਸੇਸੋ, ਵਿਹਾਰਵਾਰਂ ਪਤ੍ਵਾ ਏਕੋਵ ਵਿਹਾਰੇ ਠਿਤੋਤਿ ਅਤ੍ਥੋ. ਸਚੇ ਮੇ ਤ੍ਵਂ ਅਨ੍ਤਰਵਾਸਕਂ ਦਦੇਯ੍ਯਾਸੀਤਿ ਕਸ੍ਮਾ ਆਹ? ਸਣ੍ਹਂ ਘਨਮਟ੍ਠਂ ਅਨ੍ਤਰਵਾਸਕਂ ਦਿਸ੍ਵਾ ਲੋਭੇਨ, ਅਪਿਚ ਅਪ੍ਪਕੋ ਤਸ੍ਸਾ ਅਨ੍ਤਰਵਾਸਕੇ ਲੋਭੋ, ਥੇਰਿਯਾ ਪਨ ਸਿਖਾਪ੍ਪਤ੍ਤਾ ਕੋਟ੍ਠਾਸਸਮ੍ਪਤ੍ਤਿ ਤੇਨਸ੍ਸਾ ਸਰੀਰਪਾਰਿਪੂਰਿਂ ਪਸ੍ਸਿਸ੍ਸਾਮੀਤਿ ਵਿਸਮਲੋਭਂ ਉਪ੍ਪਾਦੇਤ੍ਵਾ ਏਵਮਾਹ. ਅਨ੍ਤਿਮਨ੍ਤਿ ਪਞ੍ਚਨ੍ਨਂ ਚੀਵਰਾਨਂ ਸਬ੍ਬਪਰਿਯਨ੍ਤਂ ਹੁਤ੍ਵਾ ਅਨ੍ਤਿਮਂ, ਅਨ੍ਤਿਮਨ੍ਤਿ ਪਚ੍ਛਿਮਂ. ਅਞ੍ਞਂ ਲੇਸੇਨਾਪਿ ਵਿਕਪ੍ਪੇਤ੍ਵਾ ਵਾ ਪਚ੍ਚੁਦ੍ਧਰਿਤ੍ਵਾ ਵਾ ਠਪਿਤਂ ਚੀਵਰਂ ਨਤ੍ਥੀਤਿ ਏਵਂ ਯਥਾਅਨੁਞ੍ਞਾਤਾਨਂ ਪਞ੍ਚਨ੍ਨਂ ਚੀਵਰਾਨਂ ਧਾਰਣਵਸੇਨੇਵ ਆਹ, ਨ ਲੋਭੇਨ, ਨ ਹਿ ਖੀਣਾਸਵਾਨਂ ਲੋਭੋ ਅਤ੍ਥਿ. ਨਿਪ੍ਪੀਲ਼ਿਯਮਾਨਾਤਿ ਉਪਮਂ ਦਸ੍ਸੇਤ੍ਵਾ ਗਾਲ਼੍ਹਂ ਪੀਲ਼ਯਮਾਨਾ.

ਅਨ੍ਤਰਵਾਸਕਂ ਦਤ੍ਵਾ ਉਪਸ੍ਸਯਂ ਅਗਮਾਸੀਤਿ ਸਙ੍ਕਚ੍ਚਿਕਂ ਨਿਵਾਸੇਤ੍ਵਾ ਯਥਾ ਤਸ੍ਸ ਮਨੋਰਥੋ ਨ ਪੂਰਤਿ, ਏਵਂ ਹਤ੍ਥਤਲੇਯੇਵ ਦਸ੍ਸੇਤ੍ਵਾ ਅਗਮਾਸਿ.

੫੧੦. ਕਸ੍ਮਾ ਪਾਰਿਵਤ੍ਤਕਚੀਵਰਂ ਅਪ੍ਪਟਿਗਣ੍ਹਨ੍ਤੇ ਉਜ੍ਝਾਯਿਂਸੁ? ‘‘ਸਚੇ ਏਤ੍ਤਕੋਪਿ ਅਮ੍ਹੇਸੁ ਅਯ੍ਯਾਨਂ ਵਿਸ੍ਸਾਸੋ ਨਤ੍ਥਿ, ਕਥਂ ਮਯਂ ਯਾਪੇਸ੍ਸਾਮਾ’’ਤਿ ਵਿਹਤ੍ਥਤਾਯ ਸਮਭਿਤੁਨ੍ਨਤ੍ਤਾ.

ਅਨੁਜਾਨਾਮਿ ਭਿਕ੍ਖਵੇ ਇਮੇਸਂ ਪਞ੍ਚਨ੍ਨਨ੍ਤਿ ਇਮੇਸਂ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਸਮਸਦ੍ਧਾਨਂ ਸਮਸੀਲਾਨਂ ਸਮਦਿਟ੍ਠੀਨਂ ਪਾਰਿਵਤ੍ਤਕਂ ਗਹੇਤੁਂ ਅਨੁਜਾਨਾਮੀਤਿ ਅਤ੍ਥੋ.

੫੧੨. ਪਯੋਗੇ ਦੁਕ੍ਕਟਨ੍ਤਿ ਗਹਣਤ੍ਥਾਯ ਹਤ੍ਥਪ੍ਪਸਾਰਣਾਦੀਸੁ ਦੁਕ੍ਕਟਂ. ਪਟਿਲਾਭੇਨਾਤਿ ਪਟਿਗ੍ਗਹਣੇਨ. ਤਤ੍ਥ ਚ ਹਤ੍ਥੇਨ ਵਾ ਹਤ੍ਥੇ ਦੇਤੁ, ਪਾਦਮੂਲੇ ਵਾ ਠਪੇਤੁ, ਉਪਰਿ ਵਾ ਖਿਪਤੁ, ਸੋ ਚੇ ਸਾਦਿਯਤਿ, ਗਹਿਤਮੇਵ ਹੋਤਿ. ਸਚੇ ਪਨ ਸਿਕ੍ਖਮਾਨਾਸਾਮਣੇਰਸਾਮਣੇਰੀਉਪਾਸਕਉਪਾਸਿਕਾਦੀਨਂ ਹਤ੍ਥੇ ਪੇਸਿਤਂ ਪਟਿਗ੍ਗਣ੍ਹਾਤਿ, ਅਨਾਪਤ੍ਤਿ. ਧਮ੍ਮਕਥਂ ਕਥੇਨ੍ਤਸ੍ਸ ਚਤਸ੍ਸੋਪਿ ਪਰਿਸਾ ਚੀਵਰਾਨਿ ਚ ਨਾਨਾਵਿਰਾਗਵਤ੍ਥਾਨਿ ਚ ਆਨੇਤ੍ਵਾ ਪਾਦਮੂਲੇ ਠਪੇਨ੍ਤਿ, ਉਪਚਾਰੇ ਵਾ ਠਤ੍ਵਾ ਉਪਚਾਰਂ ਵਾ ਮੁਞ੍ਚਿਤ੍ਵਾ ਖਿਪਨ੍ਤਿ, ਯਂ ਤਤ੍ਥ ਭਿਕ੍ਖੁਨੀਨਂ ਸਨ੍ਤਕਂ, ਤਂ ਅਞ੍ਞਤ੍ਰ ਪਾਰਿਵਤ੍ਤਕਾ ਗਣ੍ਹਨ੍ਤਸ੍ਸ ਆਪਤ੍ਤਿਯੇਵ. ਅਥ ਪਨ ਰਤ੍ਤਿਭਾਗੇ ਖਿਤ੍ਤਾਨਿ ਹੋਨ੍ਤਿ, ‘‘ਇਦਂ ਭਿਕ੍ਖੁਨਿਯਾ, ਇਦਂ ਅਞ੍ਞੇਸ’’ਨ੍ਤਿ ਞਾਤੁਂ ਨ ਸਕ੍ਕਾ, ਪਾਰਿਵਤ੍ਤਕਕਿਚ੍ਚਂ ਨਤ੍ਥੀਤਿ ਮਹਾਪਚ੍ਚਰਿਯਂ ਕੁਰੁਨ੍ਦਿਯਞ੍ਚ ਵੁਤ੍ਤਂ, ਤਂ ਅਚਿਤ੍ਤਕਭਾਵੇਨ ਨ ਸਮੇਤਿ. ਸਚੇ ਭਿਕ੍ਖੁਨੀ ਵਸ੍ਸਾਵਾਸਿਕਂ ਦੇਤਿ, ਪਾਰਿਵਤ੍ਤਕਮੇਵ ਕਾਤਬ੍ਬਂ. ਸਚੇ ਪਨ ਸਙ੍ਕਾਰਕੂਟਾਦੀਸੁ ਠਪੇਤਿ, ‘‘ਪਂਸੁਕੂਲਂ ਗਣ੍ਹਿਸ੍ਸਨ੍ਤੀ’’ਤਿ ਪਂਸੁਕੂਲਂ ਅਧਿਟ੍ਠਹਿਤ੍ਵਾ ਗਹੇਤੁਂ ਵਟ੍ਟਤਿ.

੫੧੩. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀਤਿ ਤਿਕਪਾਚਿਤ੍ਤਿਯਂ. ਏਕਤੋ ਉਪਸਮ੍ਪਨ੍ਨਾਯਾਤਿ ਭਿਕ੍ਖੁਨੀਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਹਤ੍ਥਤੋ ਗਣ੍ਹਨ੍ਤਸ੍ਸ ਦੁਕ੍ਕਟਂ, ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਪਨ ਪਾਚਿਤ੍ਤਿਯਮੇਵ.

੫੧੪. ਪਰਿਤ੍ਤੇਨ ਵਾ ਵਿਪੁਲਨ੍ਤਿ ਅਪ੍ਪਗ੍ਘਚੀਵਰੇਨ ਵਾ ਉਪਾਹਨਤ੍ਥਵਿਕਪਤ੍ਤਤ੍ਥਵਿਕਅਂਸਬਦ੍ਧਕਕਾਯਬਨ੍ਧਨਾਦਿਨਾ ਵਾ ਮਹਗ੍ਘਂ ਚੇਤਾਪੇਤ੍ਵਾ ਸਚੇਪਿ ਚੀਵਰਂ ਪਟਿਗ੍ਗਣ੍ਹਾਤਿ, ਅਨਾਪਤ੍ਤਿ. ਮਹਾਪਚ੍ਚਰਿਯਂ ਪਨ ‘‘ਅਨ੍ਤਮਸੋ ਹਰੀਤਕੀਖਣ੍ਡੇਨਾਪੀ’’ਤਿ ਵੁਤ੍ਤਂ. ਵਿਪੁਲੇਨ ਵਾ ਪਰਿਤ੍ਤਨ੍ਤਿ ਇਦਂ ਵੁਤ੍ਤਵਿਪਲ੍ਲਾਸੇਨ ਵੇਦਿਤਬ੍ਬਂ. ਅਞ੍ਞਂ ਪਰਿਕ੍ਖਾਰਨ੍ਤਿ ਪਤ੍ਤਤ੍ਥਵਿਕਾਦਿਂ ਯਂ ਕਿਞ੍ਚਿ ਵਿਕਪ੍ਪਨੁਪਗਪਚ੍ਛਿਮਚੀਵਰਪ੍ਪਮਾਣਂ ਪਨ ਪਟਪਰਿਸ੍ਸਾਵਨਮ੍ਪਿ ਨ ਵਟ੍ਟਤਿ. ਯਂ ਨੇਵ ਅਧਿਟ੍ਠਾਨੁਪਗਂ ਨ ਵਿਕਪ੍ਪਨੁਪਗਂ ਤਂ ਸਬ੍ਬਂ ਵਟ੍ਟਤਿ. ਸਚੇਪਿ ਮਞ੍ਚਪ੍ਪਮਾਣਾ ਭਿਸਿਚ੍ਛਵਿ ਹੋਤਿ, ਵਟ੍ਟਤਿਯੇਵ; ਕੋ ਪਨ ਵਾਦੋ ਪਤ੍ਤਤ੍ਥਵਿਕਾਦੀਸੁ. ਸੇਸਂ ਉਤ੍ਤਾਨਤ੍ਥਮੇਵ.

ਸਮੁਟ੍ਠਾਨਾਦੀਸੁ ਇਦਂ ਛਸਮੁਟ੍ਠਾਨਂ, ਕਿਰਿਯਾਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਚੀਵਰਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ

੫੧੫. ਤੇਨ ਸਮਯੇਨਾਤਿ ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦਂ. ਤਤ੍ਥ ਉਪਨਨ੍ਦੋ ਸਕ੍ਯਪੁਤ੍ਤੋਤਿ ਅਸੀਤਿਸਹਸ੍ਸਮਤ੍ਤਾਨਂ ਸਕ੍ਯਕੁਲਾ ਪਬ੍ਬਜਿਤਾਨਂ ਭਿਕ੍ਖੂਨਂ ਪਤਿਕਿਟ੍ਠੋ ਲੋਲਜਾਤਿਕੋ. ਪਟ੍ਟੋਤਿ ਛੇਕੋ ਸਮਤ੍ਥੋ ਪਟਿਬਲੋ ਸਰਸਮ੍ਪਨ੍ਨੋ ਕਣ੍ਠਮਾਧੁਰਿਯੇਨ ਸਮਨ੍ਨਾਗਤੋ. ਕਿਸ੍ਮਿਂ ਵਿਯਾਤਿ ਕਿਂਸੁ ਵਿਯ ਕਿਲੇਸੋ ਵਿਯ, ਹਿਰੋਤ੍ਤਪ੍ਪਵਸੇਨ ਕਮ੍ਪਨਂ ਵਿਯ ਸਙ੍ਕਮ੍ਪਨਂ ਵਿਯ ਹੋਤੀਤਿ ਅਤ੍ਥੋ.

ਅਦ੍ਧਾਨਮਗ੍ਗਨ੍ਤਿ ਅਦ੍ਧਾਨਸਙ੍ਖਾਤਂ ਦੀਘਮਗ੍ਗਂ, ਨ ਨਗਰਵੀਥਿਮਗ੍ਗਨ੍ਤਿ ਅਤ੍ਥੋ. ਤੇ ਭਿਕ੍ਖੂ ਅਚ੍ਛਿਨ੍ਦਿਂਸੂਤਿ ਮੁਸਿਂਸੁ, ਪਤ੍ਤਚੀਵਰਾਨਿ ਨੇਸਂ ਹਰਿਂਸੂਤਿ ਅਤ੍ਥੋ. ਅਨੁਯੁਞ੍ਜਾਹੀਤਿ ਭਿਕ੍ਖੁਭਾਵਜਾਨਨਤ੍ਥਾਯ ਪੁਚ੍ਛ. ਅਨੁਯੁਞ੍ਜਿਯਮਾਨਾਤਿ ਪਬ੍ਬਜ੍ਜਾਉਪਸਮ੍ਪਦਾਪਤ੍ਤਚੀਵਰਾਧਿਟ੍ਠਾਨਾਦੀਨਿ ਪੁਚ੍ਛਿਯਮਾਨਾ. ਏਤਮਤ੍ਥਂ ਆਰੋਚੇਸੁਨ੍ਤਿ ਭਿਕ੍ਖੁਭਾਵਂ ਜਾਨਾਪੇਤ੍ਵਾ ਯੋ ‘‘ਸਾਕੇਤਾ ਸਾਵਤ੍ਥਿਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ’’ਤਿਆਦਿਨਾ ਨਯੇਨ ਵੁਤ੍ਤੋ, ਏਤਮਤ੍ਥਂ ਆਰੋਚੇਸੁਂ.

੫੧੭. ਅਞ੍ਞਾਤਕਂ ਗਹਪਤਿਂ ਵਾਤਿਆਦੀਸੁ ਯਂ ਪਰਤੋ ‘‘ਤਿਣੇਨ ਵਾ ਪਣ੍ਣੇਨ ਵਾ ਪਟਿਚ੍ਛਾਦੇਤ੍ਵਾ’’ਤਿ ਵੁਤ੍ਤਂ, ਤਂ ਆਦਿਂ ਕਤ੍ਵਾ ਏਵਂ ਅਨੁਪੁਬ੍ਬਕਥਾ ਵੇਦਿਤਬ੍ਬਾ. ਸਚੇ ਚੋਰੇ ਪਸ੍ਸਿਤ੍ਵਾ ਦਹਰਾ ਪਤ੍ਤਚੀਵਰਾਨਿ ਗਹੇਤ੍ਵਾ ਪਲਾਤਾ, ਚੋਰਾ ਥੇਰਾਨਂ ਨਿਵਾਸਨਪਾਰੁਪਨਮਤ੍ਤਂਯੇਵ ਹਰਿਤ੍ਵਾ ਗਚ੍ਛਨ੍ਤਿ, ਥੇਰੇਹਿ ਨੇਵ ਤਾਵ ਚੀਵਰਂ ਵਿਞ੍ਞਾਪੇਤਬ੍ਬਂ, ਨ ਸਾਖਾਪਲਾਸਂ ਭਞ੍ਜਿਤਬ੍ਬਂ. ਅਥ ਦਹਰਾ ਸਬ੍ਬਂ ਭਣ੍ਡਕਂ ਛਡ੍ਡੇਤ੍ਵਾ ਪਲਾਤਾ, ਚੋਰਾ ਥੇਰਾਨਂ ਨਿਵਾਸਨਪਾਰੁਪਨਂ ਤਞ੍ਚ ਭਣ੍ਡਕਂ ਗਹੇਤ੍ਵਾ ਗਚ੍ਛਨ੍ਤਿ, ਦਹਰੇਹਿ ਆਗਨ੍ਤ੍ਵਾ ਅਤ੍ਤਨੋ ਨਿਵਾਸਨਪਾਰੁਪਨਾਨਿ ਨ ਤਾਵ ਥੇਰਾਨਂ ਦਾਤਬ੍ਬਾਨਿ, ਨ ਹਿ ਅਨਚ੍ਛਿਨ੍ਨਚੀਵਰਾ ਅਤ੍ਤਨੋ ਅਤ੍ਥਾਯ ਸਾਖਾਪਲਾਸਂ ਭਞ੍ਜਿਤੁਂ ਲਭਨ੍ਤਿ, ਅਚ੍ਛਿਨ੍ਨਚੀਵਰਾਨਂ ਪਨ ਅਤ੍ਥਾਯ ਲਭਨ੍ਤਿ, ਅਚ੍ਛਿਨ੍ਨਚੀਵਰਾਵ ਅਤ੍ਤਨੋਪਿ ਪਰੇਸਮ੍ਪਿ ਅਤ੍ਥਾਯ ਲਭਨ੍ਤਿ. ਤਸ੍ਮਾ ਥੇਰੇਹਿ ਵਾ ਸਾਖਾਪਲਾਸਂ ਭਞ੍ਜਿਤ੍ਵਾ ਵਾਕਾਦੀਹਿ ਗਨ੍ਥੇਤ੍ਵਾ ਦਹਰਾਨਂ ਦਾਤਬ੍ਬਂ, ਦਹਰੇਹਿ ਵਾ ਥੇਰਾਨਂ ਅਤ੍ਥਾਯ ਭਞ੍ਜਿਤ੍ਵਾ ਗਨ੍ਥੇਤ੍ਵਾ ਤੇਸਂ ਹਤ੍ਥੇ ਦਤ੍ਵਾ ਵਾ ਅਦਤ੍ਵਾ ਵਾ ਅਤ੍ਤਨਾ ਨਿਵਾਸੇਤ੍ਵਾ ਅਤ੍ਤਨੋ ਨਿਵਾਸਨਪਾਰੁਪਨਾਨਿ ਥੇਰਾਨਂ ਦਾਤਬ੍ਬਾਨਿ, ਨੇਵ ਭੂਤਗਾਮਪਾਤਬ੍ਯਤਾਯ ਪਾਚਿਤ੍ਤਿਯਂ ਹੋਤਿ, ਨ ਤੇਸਂ ਧਾਰਣੇ ਦੁਕ੍ਕਟਂ.

ਸਚੇ ਅਨ੍ਤਰਾਮਗ੍ਗੇ ਰਜਕਤ੍ਥਰਣਂ ਵਾ ਹੋਤਿ, ਅਞ੍ਞੇ ਵਾ ਤਾਦਿਸੇ ਮਨੁਸ੍ਸੇ ਪਸ੍ਸਨ੍ਤਿ, ਚੀਵਰਂ ਵਿਞ੍ਞਾਪੇਤਬ੍ਬਂ. ਯਾਨਿ ਚ ਨੇਸਂ ਤੇ ਵਾ ਵਿਞ੍ਞਤ੍ਤਮਨੁਸ੍ਸਾ ਅਞ੍ਞੇ ਵਾ ਸਾਖਾਪਲਾਸਨਿਵਾਸਨੇ ਭਿਕ੍ਖੂ ਦਿਸ੍ਵਾ ਉਸ੍ਸਾਹਜਾਤਾ ਵਤ੍ਥਾਨਿ ਦੇਨ੍ਤਿ, ਤਾਨਿ ਸਦਸਾਨਿ ਵਾ ਹੋਨ੍ਤੁ ਅਦਸਾਨਿ ਵਾ ਨੀਲਾਦਿਨਾਨਾਵਣ੍ਣਾਨਿ ਵਾ ਕਪ੍ਪਿਯਾਨਿਪਿ ਅਕਪ੍ਪਿਯਾਨਿਪਿ ਸਬ੍ਬਾਨਿ ਅਚ੍ਛਿਨ੍ਨਚੀਵਰਟ੍ਠਾਨੇ ਠਿਤਤ੍ਤਾ ਤੇਸਂ ਨਿਵਾਸੇਤੁਞ੍ਚ ਪਾਰੁਪਿਤੁਞ੍ਚ ਵਟ੍ਟਨ੍ਤਿ. ਵੁਤ੍ਤਮ੍ਪਿਹੇਤਂ ਪਰਿਵਾਰੇ –

‘‘ਅਕਪ੍ਪਕਤਂ ਨਾਪਿ ਰਜਨਾਯ ਰਤ੍ਤਂ;

ਤੇਨ ਨਿਵਤ੍ਥੋ ਯੇਨ ਕਾਮਂ ਵਜੇਯ੍ਯ;

ਨ ਚਸ੍ਸ ਹੋਤਿ ਆਪਤ੍ਤਿ;

ਸੋ ਚ ਧਮ੍ਮੋ ਸੁਗਤੇਨ ਦੇਸਿਤੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੮੧);

ਅਯਞ੍ਹਿ ਪਞ੍ਹੋ ਅਚ੍ਛਿਨ੍ਨਚੀਵਰਕਂ ਭਿਕ੍ਖੁਂ ਸਨ੍ਧਾਯ ਵੁਤ੍ਤੋ. ਅਥ ਪਨ ਤਿਤ੍ਥਿਯੇਹਿ ਸਹਗਚ੍ਛਨ੍ਤਿ, ਤੇ ਚ ਨੇਸਂ ਕੁਸਚੀਰਵਾਕਚੀਰਫਲਕਚੀਰਾਨਿ ਦੇਨ੍ਤਿ, ਤਾਨਿਪਿ ਲਦ੍ਧਿਂ ਅਗ੍ਗਹੇਤ੍ਵਾ ਨਿਵਾਸੇਤੁਂ ਵਟ੍ਟਨ੍ਤਿ, ਨਿਵਾਸੇਤ੍ਵਾਪਿ ਲਦ੍ਧਿ ਨ ਗਹੇਤਬ੍ਬਾ.

ਇਦਾਨਿ ‘‘ਯਂ ਆਵਾਸਂ ਪਠਮਂ ਉਪਗਚ੍ਛਤਿ, ਸਚੇ ਤਤ੍ਥ ਹੋਤਿ ਸਙ੍ਘਸ੍ਸ ਵਿਹਾਰਚੀਵਰਂ ਵਾ’’ਤਿਆਦੀਸੁ ਵਿਹਾਰਚੀਵਰਂ ਨਾਮ ਮਨੁਸ੍ਸਾ ਆਵਾਸਂ ਕਾਰੇਤ੍ਵਾ ‘‘ਚਤ੍ਤਾਰੋਪਿ ਪਚ੍ਚਯਾ ਅਮ੍ਹਾਕਂਯੇਵ ਸਨ੍ਤਕਾ ਪਰਿਭੋਗਂ ਗਚ੍ਛਨ੍ਤੂ’’ਤਿ ਤਿਚੀਵਰਂ ਸਜ੍ਜੇਤ੍ਵਾ ਅਤ੍ਤਨਾ ਕਾਰਾਪਿਤੇ ਆਵਾਸੇ ਠਪੇਨ੍ਤਿ, ਏਤਂ ਵਿਹਾਰਚੀਵਰਂ ਨਾਮ. ਉਤ੍ਤਰਤ੍ਥਰਣਨ੍ਤਿ ਮਞ੍ਚਕਸ੍ਸ ਉਪਰਿ ਅਤ੍ਥਰਣਕਂ ਵੁਚ੍ਚਤਿ. ਭੁਮਤ੍ਥਰਣਨ੍ਤਿ ਪਰਿਕਮ੍ਮਕਤਾਯ ਭੂਮਿਯਾ ਰਕ੍ਖਣਤ੍ਥਂ ਚਿਮਿਲਿਕਾਹਿ ਕਤਅਤ੍ਥਰਣਂ ਤਸ੍ਸ ਉਪਰਿ ਤਟ੍ਟਿਕਂ ਪਤ੍ਥਰਿਤ੍ਵਾ ਚਙ੍ਕਮਨ੍ਤਿ. ਭਿਸਿਚ੍ਛਵੀਤਿ ਮਞ੍ਚਭਿਸਿਯਾ ਵਾ ਪੀਠਭਿਸਿਯਾ ਵਾ ਛਵਿ, ਸਚੇ ਪੂਰਿਤਾ ਹੋਤਿ ਵਿਧੁਨਿਤ੍ਵਾਪਿ ਗਹੇਤੁਂ ਵਟ੍ਟਤਿ. ਏਵਮੇਤੇਸੁ ਵਿਹਾਰਚੀਵਰਾਦੀਸੁ ਯਂ ਤਤ੍ਥ ਆਵਾਸੇ ਹੋਤਿ, ਤਂ ਅਨਾਪੁਚ੍ਛਾਪਿ ਗਹੇਤ੍ਵਾ ਨਿਵਾਸੇਤੁਂ ਵਾ ਪਾਰੁਪਿਤੁਂ ਵਾ ਅਚ੍ਛਿਨ੍ਨਚੀਵਰਕਾਨਂ ਭਿਕ੍ਖੂਨਂ ਲਬ੍ਭਤੀਤਿ ਵੇਦਿਤਬ੍ਬਂ. ਤਞ੍ਚ ਖੋ ਲਭਿਤ੍ਵਾ ਓਦਹਿਸ੍ਸਾਮਿ ਪੁਨ ਠਪੇਸ੍ਸਾਮੀਤਿ ਅਧਿਪ੍ਪਾਯੇਨ ਨ ਮੂਲਚ੍ਛੇਜ੍ਜਾਯ. ਲਭਿਤ੍ਵਾ ਚ ਪਨ ਞਾਤਿਤੋ ਵਾ ਉਪਟ੍ਠਾਕਤੋ ਵਾ ਅਞ੍ਞਤੋ ਵਾ ਕੁਤੋਚਿ ਪਾਕਤਿਕਮੇਵ ਕਾਤਬ੍ਬਂ. ਵਿਦੇਸਗਤੇਨ ਏਕਸ੍ਮਿਂ ਸਙ੍ਘਿਕੇ ਆਵਾਸੇ ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਨਤ੍ਥਾਯ ਠਪੇਤਬ੍ਬਂ. ਸਚਸ੍ਸ ਪਰਿਭੋਗੇਨੇਵ ਤਂ ਜੀਰਤਿ ਵਾ ਨਸ੍ਸਤਿ ਵਾ ਗੀਵਾ ਨ ਹੋਤਿ. ਸਚੇ ਪਨ ਏਤੇਸਂ ਵੁਤ੍ਤਪ੍ਪਕਾਰਾਨਂ ਗਿਹਿਵਤ੍ਥਾਦੀਨਂ ਭਿਸਿਚ੍ਛਵਿਪਰਿਯਨ੍ਤਾਨਂ ਕਿਞ੍ਚਿ ਨ ਲਬ੍ਭਤਿ, ਤੇਨ ਤਿਣੇਨ ਵਾ ਪਣ੍ਣੇਨ ਵਾ ਪਟਿਚ੍ਛਾਦੇਤ੍ਵਾ ਆਗਨ੍ਤਬ੍ਬਨ੍ਤਿ.

੫੧੯. ਯੇਹਿ ਕੇਹਿਚਿ ਵਾ ਅਚ੍ਛਿਨ੍ਨਨ੍ਤਿ ਏਤ੍ਥ ਯਮ੍ਪਿ ਅਚ੍ਛਿਨ੍ਨਚੀਵਰਾ ਆਚਰਿਯੁਪਜ੍ਝਾਯਾ ਅਞ੍ਞੇ ‘‘ਆਹਰਥ, ਆਵੁਸੋ, ਚੀਵਰ’’ਨ੍ਤਿ ਯਾਚਿਤ੍ਵਾ ਵਾ ਵਿਸ੍ਸਾਸੇਨ ਵਾ ਗਣ੍ਹਨ੍ਤਿ, ਤਮ੍ਪਿ ਸਙ੍ਗਹਂ ਗਚ੍ਛਤੀਤਿ ਵਤ੍ਤੁਂ ਯੁਜ੍ਜਤਿ.

ਪਰਿਭੋਗਜਿਣ੍ਣਂ ਵਾਤਿ ਏਤ੍ਥ ਚ ਅਚ੍ਛਿਨ੍ਨਚੀਵਰਾਨਂ ਆਚਰਿਯੁਪਜ੍ਝਾਯਾਦੀਨਂ ਅਤ੍ਤਨਾ ਤਿਣਪਣ੍ਣੇਹਿ ਪਟਿਚ੍ਛਾਦੇਤ੍ਵਾ ਦਿਨ੍ਨਚੀਵਰਮ੍ਪਿ ਸਙ੍ਗਹਂ ਗਚ੍ਛਤੀਤਿ ਵਤ੍ਤੁਂ ਯੁਜ੍ਜਤਿ. ਏਵਞ੍ਹਿ ਤੇ ਅਚ੍ਛਿਨ੍ਨਚੀਵਰਟ੍ਠਾਨੇ ਨਟ੍ਠਚੀਵਰਟ੍ਠਾਨੇ ਚ ਠਿਤਾ ਭਵਿਸ੍ਸਨ੍ਤਿ, ਤੇਨ ਨੇਸਂ ਵਿਞ੍ਞਤ੍ਤਿਯਂ ਅਕਪ੍ਪਿਯਚੀਵਰਪਰਿਭੋਗੇ ਚ ਅਨਾਪਤ੍ਤਿ ਅਨੁਰੂਪਾ ਭਵਿਸ੍ਸਤਿ.

੫੨੧. ਞਾਤਕਾਨਂ ਪਵਾਰਿਤਾਨਨ੍ਤਿ ਏਤ੍ਥ ‘‘ਏਤੇਸਂ ਸਨ੍ਤਕਂ ਦੇਥਾ’’ਤਿ ਵਿਞ੍ਞਾਪੇਨ੍ਤਸ੍ਸ ਯਾਚਨ੍ਤਸ੍ਸ ਅਨਾਪਤ੍ਤੀਤਿ ਏਵਮਤ੍ਥੋ ਦਟ੍ਠਬ੍ਬੋ. ਨ ਹਿ ਞਾਤਕਪਵਾਰਿਤਾਨਂ ਆਪਤ੍ਤਿ ਵਾ ਅਨਾਪਤ੍ਤਿ ਵਾ ਹੋਤਿ. ਅਤ੍ਤਨੋ ਧਨੇਨਾਤਿ ਏਤ੍ਥਾਪਿ ਅਤ੍ਤਨੋ ਕਪ੍ਪਿਯਭਣ੍ਡੇਨ ਕਪ੍ਪਿਯਵੋਹਾਰੇਨੇਵ ਚੀਵਰਂ ਵਿਞ੍ਞਾਪੇਨ੍ਤਸ੍ਸ ਚੇਤਾਪੇਨ੍ਤਸ੍ਸ ਪਰਿਵਤ੍ਤਾਪੇਨ੍ਤਸ੍ਸ ਅਨਾਪਤ੍ਤੀਤਿ ਏਵਮਤ੍ਥੋ ਦਟ੍ਠਬ੍ਬੋ. ਪਵਾਰਿਤਾਨਨ੍ਤਿ ਏਤ੍ਥ ਚ ਸਙ੍ਘਵਸੇਨ ਪਵਾਰਿਤੇਸੁ ਪਮਾਣਮੇਵ ਵਟ੍ਟਤਿ. ਪੁਗ੍ਗਲਿਕਪਵਾਰਣਾਯ ਯਂ ਯਂ ਪਵਾਰੇਤਿ, ਤਂ ਤਂਯੇਵ ਵਿਞ੍ਞਾਪੇਤਬ੍ਬਂ. ਯੋ ਚਤੂਹਿ ਪਚ੍ਚਯੇਹਿ ਪਵਾਰੇਤ੍ਵਾ ਸਯਮੇਵ ਸਲ੍ਲਕ੍ਖੇਤ੍ਵਾ ਕਾਲਾਨੁਕਾਲਂ ਚੀਵਰਾਨਿ ਦਿਵਸੇ ਦਿਵਸੇ ਯਾਗੁਭਤ੍ਤਾਦੀਨੀਤਿ ਏਵਂ ਯੇਨ ਯੇਨਤ੍ਥੋ ਤਂ ਤਂ ਦੇਤਿ, ਤਸ੍ਸ ਵਿਞ੍ਞਾਪਨਕਿਚ੍ਚਂ ਨਤ੍ਥਿ. ਯੋ ਪਨ ਪਵਾਰੇਤ੍ਵਾ ਬਾਲਤਾਯ ਵਾ ਸਤਿਸਮ੍ਮੋਸੇਨ ਵਾ ਨ ਦੇਤਿ, ਸੋ ਵਿਞ੍ਞਾਪੇਤਬ੍ਬੋ. ਯੋ ‘‘ਮਯ੍ਹਂ ਗੇਹਂ ਪਵਾਰੇਮੀ’’ਤਿ ਵਦਤਿ, ਤਸ੍ਸ ਗੇਹਂ ਗਨ੍ਤ੍ਵਾ ਯਥਾਸੁਖਂ ਨਿਸੀਦਿਤਬ੍ਬਂ ਨਿਪਜ੍ਜਿਤਬ੍ਬਂ, ਨ ਕਿਞ੍ਚਿ ਗਹੇਤਬ੍ਬਂ. ਯੋ ਪਨ ‘‘ਯਂ ਮਯ੍ਹਂ ਗੇਹੇ ਅਤ੍ਥਿ, ਤਂ ਪਵਾਰੇਮੀ’’ਤਿ ਵਦਤਿ. ਯਂ ਤਤ੍ਥ ਕਪ੍ਪਿਯਂ, ਤਂ ਵਿਞ੍ਞਾਪੇਤਬ੍ਬਂ, ਗੇਹੇ ਪਨ ਨਿਸੀਦਿਤੁਂ ਵਾ ਨਿਪਜ੍ਜਿਤੁਂ ਵਾ ਨ ਲਬ੍ਭਤੀਤਿ ਕੁਰੁਨ੍ਦਿਯਂ ਵੁਤ੍ਤਂ.

ਅਞ੍ਞਸ੍ਸਤ੍ਥਾਯਾਤਿ ਏਤ੍ਥ ਅਤ੍ਤਨੋ ਞਾਤਕਪਵਾਰਿਤੇ ਨ ਕੇਵਲਂ ਅਤ੍ਤਨੋ ਅਤ੍ਥਾਯ, ਅਥ ਖੋ ਅਞ੍ਞਸ੍ਸਤ੍ਥਾਯ ਵਿਞ੍ਞਾਪੇਨ੍ਤਸ੍ਸ ਅਨਾਪਤ੍ਤੀਤਿ ਅਯਮੇਕੋ ਅਤ੍ਥੋ. ਅਯਂ ਪਨ ਦੁਤਿਯੋ ਅਞ੍ਞਸ੍ਸਾਤਿ ਯੇ ਅਞ੍ਞਸ੍ਸ ਞਾਤਕਪਵਾਰਿਤਾ, ਤੇ ਤਸ੍ਸੇਵ ‘‘ਅਞ੍ਞਸ੍ਸਾ’’ਤਿ ਲਦ੍ਧਵੋਹਾਰਸ੍ਸ ਬੁਦ੍ਧਰਕ੍ਖਿਤਸ੍ਸ ਵਾ ਧਮ੍ਮਰਕ੍ਖਿਤਸ੍ਸ ਵਾ ਅਤ੍ਥਾਯ ਵਿਞ੍ਞਾਪੇਨ੍ਤਸ੍ਸ ਅਨਾਪਤ੍ਤੀਤਿ. ਸੇਸਂ ਉਤ੍ਤਾਨਤ੍ਥਮੇਵ.

ਸਮੁਟ੍ਠਾਨਾਦੀਸੁ ਇਦਮ੍ਪਿ ਛਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਤਤੁਤ੍ਤਰਿਸਿਕ੍ਖਾਪਦਵਣ੍ਣਨਾ

੫੨੨-੪. ਤੇਨ ਸਮਯੇਨਾਤਿ ਤਤੁਤ੍ਤਰਿਸਿਕ੍ਖਾਪਦਂ. ਤਤ੍ਥ ਅਭਿਹਟ੍ਠੁਨ੍ਤਿ ਅਭੀਤਿ ਉਪਸਗ੍ਗੋ, ਹਰਿਤੁਨ੍ਤਿ ਅਤ੍ਥੋ, ਗਣ੍ਹਿਤੁਨ੍ਤਿ ਵੁਤ੍ਤਂ ਹੋਤਿ. ਪਵਾਰੇਯ੍ਯਾਤਿ ਇਚ੍ਛਾਪੇਯ੍ਯ, ਇਚ੍ਛਂ ਰੁਚਿਂ ਉਪ੍ਪਾਦੇਯ੍ਯ, ਵਦੇਯ੍ਯ ਨਿਮਨ੍ਤੇਯ੍ਯਾਤਿ ਅਤ੍ਥੋ. ਅਭਿਹਟ੍ਠੁਂ ਪਵਾਰੇਨ੍ਤੇਨ ਪਨ ਯਥਾ ਵਤ੍ਤਬ੍ਬਂ, ਤਂ ਆਕਾਰਂ ਦਸ੍ਸੇਤੁਂ ‘‘ਯਾਵਤਕਂ ਇਚ੍ਛਸਿ ਤਾਵਤਕਂ ਗਣ੍ਹਾਹੀ’’ਤਿ ਏਵਮਸ੍ਸ ਪਦਭਾਜਨਂ ਵੁਤ੍ਤਂ. ਅਥ ਵਾ ਯਥਾ ‘‘ਨੇਕ੍ਖਮ੍ਮਂ ਦਟ੍ਠੁ ਖੇਮਤੋ’’ਤਿ (ਸੁ. ਨਿ. ੪੨੬, ੧੧੦੪; ਚੂਲ਼ਨਿ. ਜਤੁਕਣ੍ਣਿਮਾਣਵਪੁਚ੍ਛਾਨਿਦ੍ਦੇਸ ੬੭) ਏਤ੍ਥ ਦਿਸ੍ਵਾਤਿ ਅਤ੍ਥੋ, ਏਵਮਿਧਾਪਿ ‘‘ਅਭਿਅਟ੍ਠੁਂ ਪਵਾਰੇਯ੍ਯਾ’’ਤਿ ਅਭਿਹਰਿਤ੍ਵਾ ਪਵਾਰੇਯ੍ਯਾਤਿ ਅਤ੍ਥੋ. ਤਤ੍ਥ ਕਾਯਾਭਿਹਾਰੋ ਵਾਚਾਭਿਹਾਰੋਤਿ ਦੁਵਿਧੋ ਅਭਿਹਾਰੋ, ਕਾਯੇਨ ਵਾ ਹਿ ਵਤ੍ਥਾਨਿ ਅਭਿਹਰਿਤ੍ਵਾ ਪਾਦਮੂਲੇ ਠਪੇਤ੍ਵਾ ‘‘ਯਤ੍ਤਕਂ ਇਚ੍ਛਸਿ ਤਤ੍ਤਕਂ ਗਣ੍ਹਾਹੀ’’ਤਿ ਵਦਨ੍ਤੋ ਪਵਾਰੇਯ੍ਯ, ਵਾਚਾਯ ਵਾ ‘‘ਅਮ੍ਹਾਕਂ ਦੁਸ੍ਸਕੋਟ੍ਠਾਗਾਰਂ ਪਰਿਪੁਣ੍ਣਂ, ਯਤ੍ਤਕਂ ਇਚ੍ਛਸਿ ਤਤ੍ਤਕਂ ਗਣ੍ਹਾਹੀ’’ਤਿ ਵਦਨ੍ਤੋ ਪਵਾਰੇਯ੍ਯ, ਤਦੁਭਯਮ੍ਪਿ ਏਕਜ੍ਝਂ ਕਤ੍ਵਾ ‘‘ਅਭਿਹਟ੍ਠੁਂ ਪਵਾਰੇਯ੍ਯਾ’’ਤਿ ਵੁਤ੍ਤਂ.

ਸਨ੍ਤਰੁਤ੍ਤਰਪਰਮਨ੍ਤਿ ਸਅਨ੍ਤਰਂ ਉਤ੍ਤਰਂ ਪਰਮਂ ਅਸ੍ਸ ਚੀਵਰਸ੍ਸਾਤਿ ਸਨ੍ਤਰੁਤ੍ਤਰਪਰਮਂ, ਨਿਵਾਸਨੇਨ ਸਦ੍ਧਿਂ ਪਾਰੁਪਨਂ ਉਕ੍ਕਟ੍ਠਪਰਿਚ੍ਛੇਦੋ ਅਸ੍ਸਾਤਿ ਵੁਤ੍ਤਂ ਹੋਤਿ. ਤਤੋ ਚੀਵਰਂ ਸਾਦਿਤਬ੍ਬਨ੍ਤਿ ਤਤੋ ਅਭਿਹਟਚੀਵਰਤੋ ਏਤ੍ਤਕਂ ਚੀਵਰਂ ਗਹੇਤਬ੍ਬਂ, ਨ ਇਤੋ ਪਰਨ੍ਤਿ ਅਤ੍ਥੋ. ਯਸ੍ਮਾ ਪਨ ਅਚ੍ਛਿਨ੍ਨਸਬ੍ਬਚੀਵਰੇਨ ਤਿਚੀਵਰਿਕੇਨੇਵ ਭਿਕ੍ਖੁਨਾ ਏਵਂ ਪਟਿਪਜ੍ਜਿਤਬ੍ਬਂ, ਅਞ੍ਞੇਨ ਅਞ੍ਞਥਾਪਿ, ਤਸ੍ਮਾ ਤਂ ਵਿਭਾਗਂ ਦਸ੍ਸੇਤੁਂ ‘‘ਸਚੇ ਤੀਣਿ ਨਟ੍ਠਾਨਿ ਹੋਨ੍ਤੀ’’ਤਿਆਦਿਨਾ ਨਯੇਨਸ੍ਸ ਪਦਭਾਜਨਂ ਵੁਤ੍ਤਂ.

ਤਤ੍ਰਾਯਂ ਵਿਨਿਚ੍ਛਯੋ – ਯਸ੍ਸ ਤੀਣਿ ਨਟ੍ਠਾਨਿ, ਤੇਨ ਦ੍ਵੇ ਸਾਦਿਤਬ੍ਬਾਨਿ, ਏਕਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ਅਞ੍ਞਂ ਸਭਾਗਟ੍ਠਾਨਤੋ ਪਰਿਯੇਸਿਸ੍ਸਤਿ. ਯਸ੍ਸ ਦ੍ਵੇ ਨਟ੍ਠਾਨਿ, ਤੇਨ ਏਕਂ ਸਾਦਿਤਬ੍ਬਂ. ਸਚੇ ਪਕਤਿਯਾਵ ਸਨ੍ਤਰੁਤ੍ਤਰੇਨ ਚਰਤਿ, ਦ੍ਵੇ ਸਾਦਿਤਬ੍ਬਾਨਿ. ਏਵਂ ਏਕਂ ਸਾਦਿਯਨ੍ਤੇਨੇਵ ਸਮੋ ਭਵਿਸ੍ਸਤਿ. ਯਸ੍ਸ ਤੀਸੁ ਏਕਂ ਨਟ੍ਠਂ, ਨ ਸਾਦਿਤਬ੍ਬਂ. ਯਸ੍ਸ ਪਨ ਦ੍ਵੀਸੁ ਏਕਂ ਨਟ੍ਠਂ, ਏਕਂ ਸਾਦਿਤਬ੍ਬਂ. ਯਸ੍ਸ ਏਕਂਯੇਵ ਹੋਤਿ, ਤਞ੍ਚ ਨਟ੍ਠਂ, ਦ੍ਵੇ ਸਾਦਿਤਬ੍ਬਾਨਿ. ਭਿਕ੍ਖੁਨਿਯਾ ਪਨ ਪਞ੍ਚਸੁਪਿ ਨਟ੍ਠੇਸੁ ਦ੍ਵੇ ਸਾਦਿਤਬ੍ਬਾਨਿ. ਚਤੂਸੁ ਨਟ੍ਠੇਸੁ ਏਕਂ ਸਾਦਿਤਬ੍ਬਂ, ਤੀਸੁ ਨਟ੍ਠੇਸੁ ਕਿਞ੍ਚਿ ਨ ਸਾਦਿਤਬ੍ਬਂ, ਕੋ ਪਨ ਵਾਦੋ ਦ੍ਵੀਸੁ ਵਾ ਏਕਸ੍ਮਿਂ ਵਾ. ਯੇਨ ਕੇਨਚਿ ਹਿ ਸਨ੍ਤਰੁਤ੍ਤਰਪਰਮਤਾਯ ਠਾਤਬ੍ਬਂ, ਤਤੋ ਉਤ੍ਤਰਿ ਨ ਲਬ੍ਭਤੀਤਿ ਇਦਮੇਤ੍ਥ ਲਕ੍ਖਣਂ.

੫੨੬. ਸੇਸਕਂ ਆਹਰਿਸ੍ਸਾਮੀਤਿ ਦ੍ਵੇ ਚੀਵਰਾਨਿ ਕਤ੍ਵਾ ਸੇਸਂ ਪੁਨ ਆਹਰਿਸ੍ਸਾਮੀਤਿ ਅਤ੍ਥੋ. ਨ ਅਚ੍ਛਿਨ੍ਨਕਾਰਣਾਤਿ ਬਾਹੁਸਚ੍ਚਾਦਿਗੁਣਵਸੇਨ ਦੇਨ੍ਤਿ. ਞਾਤਕਾਨਨ੍ਤਿਆਦੀਸੁ ਞਾਤਕਾਨਂ ਦੇਨ੍ਤਾਨਂ ਸਾਦਿਯਨ੍ਤਸ੍ਸ ਪਵਾਰਿਤਾਨਂ ਦੇਨ੍ਤਾਨਂ ਸਾਦਿਯਨ੍ਤਸ੍ਸ ਅਤ੍ਤਨੋ ਧਨੇਨ ਸਾਦਿਯਨ੍ਤਸ੍ਸ ਅਨਾਪਤ੍ਤੀਤਿ ਅਤ੍ਥੋ. ਅਟ੍ਠਕਥਾਸੁ ਪਨ ‘‘ਞਾਤਕਪਵਾਰਿਤਟ੍ਠਾਨੇ ਪਕਤਿਯਾ ਬਹੁਮ੍ਪਿ ਵਟ੍ਟਤਿ, ਅਚ੍ਛਿਨ੍ਨਕਾਰਣਾ ਪਮਾਣਮੇਵ ਵਟ੍ਟਤੀ’’ਤਿ ਵੁਤ੍ਤਂ. ਤਂ ਪਾਲ਼ਿਯਾ ਨ ਸਮੇਤਿ. ਯਸ੍ਮਾ ਪਨਿਦਂ ਸਿਕ੍ਖਾਪਦਂ ਅਞ੍ਞਸ੍ਸਤ੍ਥਾਯ ਵਿਞ੍ਞਾਪਨਵਤ੍ਥੁਸ੍ਮਿਂਯੇਵ ਪਞ੍ਞਤ੍ਤਂ, ਤਸ੍ਮਾ ਇਧ ‘‘ਅਞ੍ਞਸ੍ਸਤ੍ਥਾਯਾ’’ਤਿ ਨ ਵੁਤ੍ਤਂ. ਸੇਸਂ ਉਤ੍ਤਾਨਤ੍ਥਮੇਵ.

ਸਮੁਟ੍ਠਾਨਾਦੀਸੁ ਇਦਮ੍ਪਿ ਛਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਤਤੁਤ੍ਤਰਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਪਠਮਉਪਕ੍ਖਟਸਿਕ੍ਖਾਪਦਵਣ੍ਣਨਾ

੫੨੭. ਤੇਨ ਸਮਯੇਨਾਤਿ ਉਪਕ੍ਖਟਸਿਕ੍ਖਾਪਦਂ. ਤਤ੍ਥ ਅਤ੍ਥਾਵੁਸੋ ਮਂ ਸੋ ਉਪਟ੍ਠਾਕੋਤਿ ਆਵੁਸੋ, ਯਂ ਤ੍ਵਂ ਭਣਸਿ, ਅਤ੍ਥਿ ਏਵਰੂਪੋ ਸੋ ਮਮ ਉਪਟ੍ਠਾਕੋਤਿ ਅਯਮੇਤ੍ਥ ਅਤ੍ਥੋ. ਅਪਿ ਮੇਯ੍ਯ ਏਵਂ ਹੋਤੀਤਿ ਅਪਿ ਮੇ ਅਯ੍ਯ ਏਵਂ ਹੋਤਿ, ਅਪਿ ਮਯ੍ਯਾ ਏਵਨ੍ਤਿਪਿ ਪਾਠੋ.

੫੨੮-੯. ਭਿਕ੍ਖੁਂ ਪਨੇਵ ਉਦ੍ਦਿਸ੍ਸਾਤਿ ਏਤ੍ਥ ਉਦ੍ਦਿਸ੍ਸਾਤਿ ਅਪਦਿਸ੍ਸ ਆਰਬ੍ਭ. ਯਸ੍ਮਾ ਪਨ ਯਂ ਉਦ੍ਦਿਸ੍ਸ ਉਪਕ੍ਖਟਂ ਹੋਤਿ, ਤਂ ਤਸ੍ਸਤ੍ਥਾਯ ਉਪਕ੍ਖਟਂ ਨਾਮ ਹੋਤਿ. ਤਸ੍ਮਾਸ੍ਸ ਪਦਭਾਜਨੇ ‘‘ਭਿਕ੍ਖੁਸ੍ਸਤ੍ਥਾਯਾ’’ਤਿ ਵੁਤ੍ਤਂ.

ਭਿਕ੍ਖੁਂ ਆਰਮ੍ਮਣਂ ਕਰਿਤ੍ਵਾਤਿ ਭਿਕ੍ਖੁਂ ਪਚ੍ਚਯਂ ਕਤ੍ਵਾ, ਯਞ੍ਹਿ ਭਿਕ੍ਖੁਂ ਉਦ੍ਦਿਸ੍ਸ ਉਪਕ੍ਖਟਂ, ਤਂ ਨਿਯਮੇਨੇਵ ਭਿਕ੍ਖੁਂ ਪਚ੍ਚਯਂ ਕਤ੍ਵਾ ਉਪਕ੍ਖਟਂ ਹੋਤਿ, ਤੇਨ ਵੁਤ੍ਤਂ – ‘‘ਭਿਕ੍ਖੁਂ ਆਰਮ੍ਮਣਂ ਕਰਿਤ੍ਵਾ’’ਤਿ. ਪਚ੍ਚਯੋਪਿ ਹਿ ‘‘ਲਭਤਿ ਮਾਰੋ ਆਰਮ੍ਮਣ’’ਨ੍ਤਿਆਦੀਸੁ (ਸਂ. ਨਿ. ੪.੨੪੩) ਆਰਮ੍ਮਣਨ੍ਤਿ ਆਗਤੋ. ਇਦਾਨਿ ‘‘ਉਦ੍ਦਿਸ੍ਸਾ’’ਤਿ ਏਤ੍ਥ ਯੋ ਕਤ੍ਤਾ, ਤਸ੍ਸ ਆਕਾਰਦਸ੍ਸਨਤ੍ਥਂ ‘‘ਭਿਕ੍ਖੁਂ ਅਚ੍ਛਾਦੇਤੁਕਾਮੋ’’ਤਿ ਵੁਤ੍ਤਂ. ਭਿਕ੍ਖੁਂ ਅਚ੍ਛਾਦੇਤੁਕਾਮੇਨ ਹਿ ਤੇਨ ਤਂ ਉਦ੍ਦਿਸ੍ਸ ਉਪਕ੍ਖਟਂ, ਨ ਅਞ੍ਞੇਨ ਕਾਰਣੇਨ. ਇਤਿ ਸੋ ਅਚ੍ਛਾਦੇਤੁਕਾਮੋ ਹੋਤਿ. ਤੇਨ ਵੁਤ੍ਤਂ – ‘‘ਭਿਕ੍ਖੁਂ ਅਚ੍ਛਾਦੇਤੁਕਾਮੋ’’ਤਿ.

ਅਞ੍ਞਾਤਕਸ੍ਸ ਗਹਪਤਿਸ੍ਸ ਵਾਤਿ ਅਞ੍ਞਾਤਕੇਨ ਗਹਪਤਿਨਾ ਵਾਤਿ ਅਤ੍ਥੋ. ਕਰਣਤ੍ਥੇ ਹਿ ਇਦਂ ਸਾਮਿਵਚਨਂ. ਪਦਭਾਜਨੇ ਪਨ ਬ੍ਯਞ੍ਜਨਂ ਅਵਿਚਾਰੇਤ੍ਵਾ ਅਤ੍ਥਮਤ੍ਤਮੇਵ ਦਸ੍ਸੇਤੁਂ ‘‘ਅਞ੍ਞਾਤਕੋ ਨਾਮ…ਪੇ… ਗਹਪਤਿ ਨਾਮਾ’’ਤਿਆਦਿ ਵੁਤ੍ਤਂ.

ਚੀਵਰਚੇਤਾਪਨ੍ਨਨ੍ਤਿ ਚੀਵਰਮੂਲਂ, ਤਂ ਪਨ ਯਸ੍ਮਾ ਹਿਰਞ੍ਞਾਦੀਸੁ ਅਞ੍ਞਤਰਂ ਹੋਤਿ, ਤਸ੍ਮਾ ਪਦਭਾਜਨੇ ‘‘ਹਿਰਞ੍ਞਂ ਵਾ’’ਤਿਆਦਿ ਵੁਤ੍ਤਂ. ਉਪਕ੍ਖਟਂ ਹੋਤੀਤਿ ਸਜ੍ਜਿਤਂ ਹੋਤਿ, ਸਂਹਰਿਤ੍ਵਾ ਠਪਿਤਂ, ਯਸ੍ਮਾ ਪਨ ‘‘ਹਿਰਞ੍ਞਂ ਵਾ’’ਤਿਆਦਿਨਾ ਵਚਨੇਨਸ੍ਸ ਉਪਕ੍ਖਟਭਾਵੋ ਦਸ੍ਸਿਤੋ ਹੋਤਿ, ਤਸ੍ਮਾ ‘‘ਉਪਕ੍ਖਟਂ ਨਾਮਾ’’ਤਿ ਪਦਂ ਉਦ੍ਧਰਿਤ੍ਵਾ ਵਿਸੁਂ ਪਦਭਾਜਨਂ ਨ ਵੁਤ੍ਤਂ. ਇਮਿਨਾਤਿ ਉਪਕ੍ਖਟਂ ਸਨ੍ਧਾਯਾਹ, ਤੇਨੇਵਸ੍ਸ ਪਦਭਾਜਨੇ ‘‘ਪਚ੍ਚੁਪਟ੍ਠਿਤੇਨਾ’’ਤਿ ਵੁਤ੍ਤਂ. ਯਞ੍ਹਿ ਉਪਕ੍ਖਟਂ ਸਂਹਰਿਤ੍ਵਾ ਠਪਿਤਂ, ਤਂ ਪਚ੍ਚੁਪਟ੍ਠਿਤਂ ਹੋਤੀਤਿ. ਅਚ੍ਛਾਦੇਸ੍ਸਾਮੀਤਿ ਵੋਹਾਰਵਚਨਮੇਤਂ ‘‘ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਸ੍ਸਾਮੀ’’ਤਿ ਅਯਂ ਪਨੇਤ੍ਥ ਅਤ੍ਥੋ. ਤੇਨੇਵਸ੍ਸ ਪਦਭਾਜਨੇਪਿ ‘‘ਦਸ੍ਸਾਮੀ’’ਤਿ ਵੁਤ੍ਤਂ.

ਤਤ੍ਰ ਚੇ ਸੋ ਭਿਕ੍ਖੂਤਿ ਯਤ੍ਰ ਸੋ ਗਹਪਤਿ ਵਾ ਗਹਪਤਾਨੀ ਵਾ ਤਤ੍ਰ ਸੋ ਭਿਕ੍ਖੁ ਪੁਬ੍ਬੇ ਅਪ੍ਪਵਾਰਿਤੋ ਉਪਸਙ੍ਕਮਿਤ੍ਵਾ ਚੀਵਰੇ ਵਿਕਪ੍ਪਂ ਆਪਜ੍ਜੇਯ੍ਯ ਚੇਤਿ ਅਯਮੇਤ੍ਥ ਪਦਸਮ੍ਬਨ੍ਧੋ. ਤਤ੍ਥ ਉਪਸਙ੍ਕਮਿਤ੍ਵਾਤਿ ਇਮਸ੍ਸ ਗਨ੍ਤ੍ਵਾਤਿ ਇਮਿਨਾਵ ਅਤ੍ਥੇ ਸਿਦ੍ਧੇ ਪਚੁਰਵੋਹਾਰਵਸੇਨ ‘‘ਘਰ’’ਨ੍ਤਿ ਵੁਤ੍ਤਂ. ਯਤ੍ਰ ਪਨ ਸੋ ਦਾਯਕੋ ਤਤ੍ਰ ਗਨ੍ਤ੍ਵਾਤਿ ਅਯਮੇਵੇਤ੍ਥ ਅਤ੍ਥੋ, ਤਸ੍ਮਾ ਪੁਨਪਿ ਵੁਤ੍ਤਂ ‘‘ਯਤ੍ਥ ਕਤ੍ਥਚਿ ਉਪਸਙ੍ਕਮਿਤ੍ਵਾ’’ਤਿ. ਵਿਕਪ੍ਪਂ ਆਪਜ੍ਜੇਯ੍ਯਾਤਿ ਵਿਸਿਟ੍ਠਕਪ੍ਪਂ ਅਧਿਕਵਿਧਾਨਂ ਆਪਜ੍ਜੇਯ੍ਯ, ਪਦਭਾਜਨੇ ਪਨ ਯੇਨਾਕਾਰੇਨ ਵਿਕਪ੍ਪਂ ਆਪਨ੍ਨੋ ਹੋਤਿ ਤਮੇਵ ਦਸ੍ਸੇਤੁਂ ‘‘ਆਯਤਂ ਵਾ’’ਤਿਆਦਿ ਵੁਤ੍ਤਂ. ਸਾਧੂਤਿ ਆਯਾਚਨੇ ਨਿਪਾਤੋ. ਵਤਾਤਿ ਪਰਿਵਿਤਕ੍ਕੇ. ਮਨ੍ਤਿ ਅਤ੍ਤਾਨਂ ਨਿਦ੍ਦਿਸਤਿ. ਆਯਸ੍ਮਾਤਿ ਪਰਂ ਆਲਪਤਿ ਆਮਨ੍ਤੇਤਿ. ਯਸ੍ਮਾ ਪਨਿਦਂ ਸਬ੍ਬਂ ਬ੍ਯਞ੍ਜਨਮਤ੍ਤਮੇਵ, ਉਤ੍ਤਾਨਤ੍ਥਮੇਵ, ਤਸ੍ਮਾਸ੍ਸ ਪਦਭਾਜਨੇ ਅਤ੍ਥੋ ਨ ਵੁਤ੍ਤੋ. ਕਲ੍ਯਾਣਕਮ੍ਯਤਂ ਉਪਾਦਾਯਾਤਿ ਸੁਨ੍ਦਰਕਾਮਤਂ ਵਿਸਿਟ੍ਠਕਾਮਤਂ ਚਿਤ੍ਤੇਨ ਗਹੇਤ੍ਵਾ, ਤਸ੍ਸ ‘‘ਆਪਜ੍ਜੇਯ੍ਯ ਚੇ’’ਤਿ ਇਮਿਨਾ ਸਮ੍ਬਨ੍ਧੋ. ਯਸ੍ਮਾ ਪਨ ਯੋ ਕਲ੍ਯਾਣਕਮ੍ਯਤਂ ਉਪਾਦਾਯ ਆਪਜ੍ਜਤਿ, ਸੋ ਸਾਧਤ੍ਥਿਕੋ ਮਹਗ੍ਘਤ੍ਥਿਕੋ ਹੋਤਿ, ਤਸ੍ਮਾਸ੍ਸ ਪਦਭਾਜਨੇ ਬ੍ਯਞ੍ਜਨਂ ਪਹਾਯ ਅਧਿਪ੍ਪੇਤਤ੍ਥਮੇਵ ਦਸ੍ਸੇਤੁਂ ਤਦੇਵ ਵਚਨਂ ਵੁਤ੍ਤਂ. ਯਸ੍ਮਾ ਪਨ ਨ ਇਮਸ੍ਸ ਆਪਜ੍ਜਨਮਤ੍ਤੇਨੇਵ ਆਪਤ੍ਤਿ ਸੀਸਂ ਏਤਿ, ਤਸ੍ਮਾ ‘‘ਤਸ੍ਸ ਵਚਨੇਨਾ’’ਤਿਆਦਿ ਵੁਤ੍ਤਂ.

੫੩੧. ਅਨਾਪਤ੍ਤਿ ਞਾਤਕਾਨਨ੍ਤਿਆਦੀਸੁ ਞਾਤਕਾਨਂ ਚੀਵਰੇ ਵਿਕਪ੍ਪਂ ਆਪਜ੍ਜਨ੍ਤਸ੍ਸ ਅਨਾਪਤ੍ਤੀਤਿ ਏਵਮਤ੍ਥੋ ਦਟ੍ਠਬ੍ਬੋ. ਮਹਗ੍ਘਂ ਚੇਤਾਪੇਤੁਕਾਮਸ੍ਸ ਅਪ੍ਪਗ੍ਘਂ ਚੇਤਾਪੇਤੀਤਿ ਗਹਪਤਿਸ੍ਸ ਵੀਸਤਿਅਗ੍ਘਨਕਂ ਚੀਵਰਂ ਚੇਤਾਪੇਤੁਕਾਮਸ੍ਸ ‘‘ਅਲਂ ਮਯ੍ਹਂ ਏਤੇਨ, ਦਸਗ੍ਘਨਕਂ ਵਾ ਅਟ੍ਠਗ੍ਘਨਕਂ ਵਾ ਦੇਹੀ’’ਤਿ ਵਦਤਿ ਅਨਾਪਤ੍ਤਿ. ਅਪ੍ਪਗ੍ਘਨ੍ਤਿ ਇਦਞ੍ਚ ਅਤਿਰੇਕਨਿਵਾਰਣਤ੍ਥਮੇਵ ਵੁਤ੍ਤਂ, ਸਮਕੇਪਿ ਪਨ ਅਨਾਪਤ੍ਤਿ, ਤਞ੍ਚ ਖੋ ਅਗ੍ਘਵਸੇਨੇਵ ਨ ਪਮਾਣਵਸੇਨ, ਅਗ੍ਘਵਡ੍ਢਨਕਞ੍ਹਿ ਇਦਂ ਸਿਕ੍ਖਾਪਦਂ. ਤਸ੍ਮਾ ਯੋ ਵੀਸਤਿਅਗ੍ਘਨਕਂ ਅਨ੍ਤਰਵਾਸਕਂ ਚੇਤਾਪੇਤੁਕਾਮੋ, ‘‘ਤਂ ਏਤ੍ਤਕਮੇਵ ਮੇ ਅਗ੍ਘਨਕਂ ਚੀਵਰਂ ਦੇਹੀ’’ਤਿ ਵਤ੍ਤੁਮ੍ਪਿ ਵਟ੍ਟਤਿ. ਸੇਸਂ ਉਤ੍ਤਾਨਤ੍ਥਮੇਵ.

ਸਮੁਟ੍ਠਾਨਾਦੀਨਿਪਿ ਤਤੁਤ੍ਤਰਿਸਿਕ੍ਖਾਪਦਸਦਿਸਾਨੇਵਾਤਿ.

ਪਠਮਉਪਕ੍ਖਟਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਦੁਤਿਯਉਪਕ੍ਖਟਸਿਕ੍ਖਾਪਦਵਣ੍ਣਨਾ

੫੩੨. ਦੁਤਿਯਉਪਕ੍ਖਟੇਪਿ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਤਞ੍ਹਿ ਇਮਸ੍ਸ ਅਨੁਪਞ੍ਞਤ੍ਤਿਸਦਿਸਂ. ਕੇਵਲਂ ਪਠਮਸਿਕ੍ਖਾਪਦੇ ਏਕਸ੍ਸ ਪੀਲ਼ਾ ਕਤਾ, ਦੁਤਿਯੇ ਦ੍ਵਿਨ੍ਨਂ, ਅਯਮੇਵੇਤ੍ਥ ਵਿਸੇਸੋ. ਸੇਸਂ ਸਬ੍ਬਂ ਪਠਮਸਦਿਸਮੇਵ. ਯਥਾ ਚ ਦ੍ਵਿਨ੍ਨਂ, ਏਵਂ ਬਹੂਨਂ ਪੀਲ਼ਂ ਕਤ੍ਵਾ ਗਣ੍ਹਤੋਪਿ ਆਪਤ੍ਤਿ ਵੇਦਿਤਬ੍ਬਾਤਿ.

ਦੁਤਿਯਉਪਕ੍ਖਟਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਰਾਜਸਿਕ੍ਖਾਪਦਵਣ੍ਣਨਾ

੫੩੭. ਤੇਨ ਸਮਯੇਨਾਤਿ ਰਾਜਸਿਕ੍ਖਾਪਦਂ. ਤਤ੍ਥ ਉਪਾਸਕਂ ਸਞ੍ਞਾਪੇਤ੍ਵਾਤਿ ਜਾਨਾਪੇਤ੍ਵਾ, ‘‘ਇਮਿਨਾ ਮੂਲੇਨ ਚੀਵਰਂ ਕਿਣਿਤ੍ਵਾ ਥੇਰਸ੍ਸ ਦੇਹੀ’’ਤਿ ਏਵਂ ਵਤ੍ਵਾਤਿ ਅਧਿਪ੍ਪਾਯੋ. ਪਞ੍ਞਾਸਬਨ੍ਧੋਤਿ ਪਞ੍ਞਾਸਕਹਾਪਣਦਣ੍ਡੋਤਿ ਵੁਤ੍ਤਂ ਹੋਤਿ. ਪਞ੍ਞਾਸਂ ਬਦ੍ਧੋਤਿਪਿ ਪਾਠੋ, ਪਞ੍ਞਾਸਂ ਜਿਤੋ ਪਞ੍ਞਾਸਂ ਦਾਪੇਤਬ੍ਬੋਤਿ ਅਧਿਪ੍ਪਾਯੋ. ਅਜ੍ਜਣ੍ਹੋ, ਭਨ੍ਤੇ, ਆਗਮੇਹੀਤਿ ਭਨ੍ਤੇ, ਅਜ੍ਜ ਏਕਦਿਵਸਂ ਅਮ੍ਹਾਕਂ ਤਿਟ੍ਠ, ਅਧਿਵਾਸੇਹੀਤਿ ਅਤ੍ਥੋ. ਪਰਾਮਸੀਤਿ ਗਣ੍ਹਿ. ਜੀਨੋਸੀਤਿ ਜਿਤੋਸਿ.

੫੩੮-੯. ਰਾਜਭੋਗ੍ਗੋਤਿ ਰਾਜਤੋ ਭੋਗ੍ਗਂ ਭੁਞ੍ਜਿਤਬ੍ਬਂ ਅਸ੍ਸਤ੍ਥੀਤਿ ਰਾਜਭੋਗ੍ਗੋ, ਰਾਜਭੋਗੋਤਿਪਿ ਪਾਠੋ, ਰਾਜਤੋ ਭੋਗੋ ਅਸ੍ਸ ਅਤ੍ਥੀਤਿ ਅਤ੍ਥੋ.

ਪਹਿਣੇਯ੍ਯਾਤਿ ਪੇਸੇਯ੍ਯ, ਉਤ੍ਤਾਨਤ੍ਥਤ੍ਤਾ ਪਨਸ੍ਸ ਪਦਭਾਜਨਂ ਨ ਵੁਤ੍ਤਂ. ਯਥਾ ਚ ਏਤਸ੍ਸ, ਏਵਂ ‘‘ਚੀਵਰਂ ਇਤ੍ਥਨ੍ਨਾਮਂ ਭਿਕ੍ਖੁ’’ਨ੍ਤਿਆਦੀਨਮ੍ਪਿ ਪਦਾਨਂ ਉਤ੍ਤਾਨਤ੍ਥਤ੍ਤਾਯੇਵ ਪਦਭਾਜਨਂ ਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਆਭਤਨ੍ਤਿ ਆਨੀਤਂ. ਕਾਲੇਨਕਪ੍ਪਿਯਨ੍ਤਿ ਯੁਤ੍ਤਪਤ੍ਤਕਾਲੇਨ, ਯਦਾ ਨੋ ਅਤ੍ਥੋ ਹੋਤਿ, ਤਦਾ ਕਪ੍ਪਿਯਂ ਚੀਵਰਂ ਗਣ੍ਹਾਮਾਤਿ ਅਤ੍ਥੋ.

ਵੇਯ੍ਯਾਵਚ੍ਚਕਰੋਤਿ ਕਿਚ੍ਚਕਰੋ, ਕਪ੍ਪਿਯਕਾਰਕੋਤਿ ਅਤ੍ਥੋ. ਸਞ੍ਞਤ੍ਤੋ ਸੋ ਮਯਾਤਿ ਆਣਤ੍ਤੋ ਸੋ ਮਯਾ, ਯਥਾ ਤੁਮ੍ਹਾਕਂ ਚੀਵਰੇਨ ਅਤ੍ਥੇ ਸਤਿ ਚੀਵਰਂ ਦਸ੍ਸਤਿ, ਏਵਂ ਵੁਤ੍ਤੋਤਿ ਅਤ੍ਥੋ. ਅਤ੍ਥੋ ਮੇ ਆਵੁਸੋ ਚੀਵਰੇਨਾਤਿ ਚੋਦਨਾਲਕ੍ਖਣਨਿਦਸ੍ਸਨਮੇਤਂ, ਇਦਞ੍ਹਿ ਵਚਨਂ ਵਤ੍ਤਬ੍ਬਂ, ਅਸ੍ਸ ਵਾ ਅਤ੍ਥੋ ਯਾਯ ਕਾਯਚਿ ਭਾਸਾਯ; ਇਦਂ ਚੋਦਨਾਲਕ੍ਖਣਂ. ‘‘ਦੇਹਿ ਮੇ ਚੀਵਰ’’ਨ੍ਤਿਆਦੀਨਿ ਪਨ ਨਵਤ੍ਤਬ੍ਬਾਕਾਰਦਸ੍ਸਨਤ੍ਥਂ ਵੁਤ੍ਤਾਨਿ, ਏਤਾਨਿ ਹਿ ਵਚਨਾਨਿ ਏਤੇਸਂ ਵਾ ਅਤ੍ਥੋ ਯਾਯ ਕਾਯਚਿ ਭਾਸਾਯ ਨ ਵਤ੍ਤਬ੍ਬੋ.

ਦੁਤਿਯਮ੍ਪਿ ਵਤ੍ਤਬ੍ਬੋ ਤਤਿਯਮ੍ਪਿ ਵਤ੍ਤਬ੍ਬੋਤਿ ‘‘ਅਤ੍ਥੋ ਮੇ ਆਵੁਸੋ ਚੀਵਰੇਨਾ’’ਤਿ ਇਦਮੇਵ ਯਾਵਤਤਿਯਂ ਵਤ੍ਤਬ੍ਬੋਤਿ. ਏਵਂ ‘‘ਦ੍ਵਤ੍ਤਿਕ੍ਖਤ੍ਤੁਂ ਚੋਦੇਤਬ੍ਬੋ ਸਾਰੇਤਬ੍ਬੋ’’ਤਿ ਏਤ੍ਥ ਉਦ੍ਦਿਟ੍ਠਚੋਦਨਾਪਰਿਚ੍ਛੇਦਂ ਦਸ੍ਸੇਤ੍ਵਾ ਇਦਾਨਿ ‘‘ਦ੍ਵਤ੍ਤਿਕ੍ਖਤ੍ਤੁਂ ਚੋਦਯਮਾਨੋ ਸਾਰਯਮਾਨੋ ਤਂ ਚੀਵਰਂ ਅਭਿਨਿਪ੍ਫਾਦੇਯ੍ਯ, ਇਚ੍ਚੇਤਂ ਕੁਸਲ’’ਨ੍ਤਿ ਇਮੇਸਂ ਪਦਾਨਂ ਸਙ੍ਖੇਪਤੋ ਅਤ੍ਥਂ ਦਸ੍ਸੇਨ੍ਤੋ ‘‘ਸਚੇ ਅਭਿਨਿਪ੍ਫਾਦੇਤਿ, ਇਚ੍ਚੇਤਂ ਕੁਸਲ’’ਨ੍ਤਿ ਆਹ. ਏਵਂ ਯਾਵਤਤਿਯਂ ਚੋਦੇਨ੍ਤੋ ਤਂ ਚੀਵਰਂ ਯਦਿ ਨਿਪ੍ਫਾਦੇਤਿ, ਸਕ੍ਕੋਤਿ ਅਤ੍ਤਨੋ ਪਟਿਲਾਭਵਸੇਨ ਨਿਪ੍ਫਾਦੇਤੁਂ, ਇਚ੍ਚੇਤਂ ਕੁਸਲਂ ਸਾਧੁ ਸੁਟ੍ਠੁ ਸੁਨ੍ਦਰਂ.