੯. ਦੁਤਿਯਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ
੩੯੧. ਤੇਨ ਸਮਯੇਨ ਬੁਦ੍ਧੋ ਭਗਵਾਤਿ ਦੁਤਿਯਦੁਟ੍ਠਦੋਸਸਿਕ੍ਖਾਪਦਂ. ਤਤ੍ਥ ਹਨ੍ਦ ਮਯਂ ਆਵੁਸੋ ਇਮਂ ਛਗਲਕਂ ਦਬ੍ਬਂ ਮਲ੍ਲਪੁਤ੍ਤਂ ਨਾਮ ਕਰੋਮਾਤਿ ਤੇ ਕਿਰ ਪਠਮਵਤ੍ਥੁਸ੍ਮਿਂ ਅਤ੍ਤਨੋ ਮਨੋਰਥਂ ਸਮ੍ਪਾਦੇਤੁਂ ਅਸਕ੍ਕੋਨ੍ਤਾ ਲਦ੍ਧਨਿਗ੍ਗਹਾ ਵਿਘਾਤਪ੍ਪਤ੍ਤਾ ‘‘ਇਦਾਨਿ ਜਾਨਿਸ੍ਸਾਮਾ’’ਤਿ ਤਾਦਿਸਂ ਵਤ੍ਥੁਂ ਪਰਿਯੇਸਮਾਨਾ ਵਿਚਰਨ੍ਤਿ. ਅਥੇਕਦਿਵਸਂ ਦਿਸ੍ਵਾ ਤੁਟ੍ਠਾ ਅਞ੍ਞਮਞ੍ਞਂ ਓਲੋਕੇਤ੍ਵਾ ਏਵਮਾਹਂਸੁ – ‘‘ਹਨ੍ਦ ਮਯਂ, ਆਵੁਸੋ, ਇਮਂ ਛਗਲਕਂ ਦਬ੍ਬਂ ਮਲ੍ਲਪੁਤ੍ਤਂ ਨਾਮ ਕਰੋਮਾ’’ਤਿ, ‘‘ਦਬ੍ਬੋ ਮਲ੍ਲਪੁਤ੍ਤੋ ਨਾਮਾਯ’’ਨ੍ਤਿ ਏਵਮਸ੍ਸ ਨਾਮਂ ਕਰੋਮਾਤਿ ਵੁਤ੍ਤਂ ਹੋਤਿ. ਏਸ ਨਯੋ ਮੇਤ੍ਤਿਯਂ ਨਾਮ ਭਿਕ੍ਖੁਨਿਨ੍ਤਿ ਏਤ੍ਥਾਪਿ.
ਤੇ ਭਿਕ੍ਖੂ ਮੇਤ੍ਤਿਯਭੁਮਜਕੇ ਭਿਕ੍ਖੂ ਅਨੁਯੁਞ੍ਜਿਂਸੂਤਿ ਏਵਂ ਅਨੁਯੁਞ੍ਜਿਂਸੁ –‘‘ਆਵੁਸੋ, ਕੁਹਿਂ ਤੁਮ੍ਹੇਹਿ ਦਬ੍ਬੋ ਮਲ੍ਲਪੁਤ੍ਤੋ ਮੇਤ੍ਤਿਯਾਯ ਭਿਕ੍ਖੁਨਿਯਾ ਸਦ੍ਧਿਂ ਦਿਟ੍ਠੋ’’ਤਿ? ‘‘ਗਿਜ੍ਝਕੂਟਪਬ੍ਬਤਪਾਦੇ’’ਤਿ. ‘‘ਕਾਯ ਵੇਲਾਯ’’ਤਿ? ‘‘ਭਿਕ੍ਖਾਚਾਰਗਮਨਵੇਲਾਯਾ’’ਤਿ. ਆਵੁਸੋ ਦਬ੍ਬ ਇਮੇ ਏਵਂ ਵਦਨ੍ਤਿ – ‘‘ਤ੍ਵਂ ਤਦਾ ਕੁਹਿ’’ਨ੍ਤਿ? ‘‘ਵੇਲ਼ੁਵਨੇ ਭਤ੍ਤਾਨਿ ਉਦ੍ਦਿਸਾਮੀ’’ਤਿ. ‘‘ਤਵ ਤਾਯ ਵੇਲਾਯ ਵੇਲ਼ੁਵਨੇ ਅਤ੍ਥਿਭਾਵਂ ਕੋ ਜਾਨਾਤੀ’’ਤਿ? ‘‘ਭਿਕ੍ਖੁਸਙ੍ਘੋ, ਭਨ੍ਤੇ’’ਤਿ. ਤੇ ਸਙ੍ਘਂ ਪੁਚ੍ਛਿਂਸੁ – ‘‘ਜਾਨਾਥ ਤੁਮ੍ਹੇ ਤਾਯ ਵੇਲਾਯ ਇਮਸ੍ਸ ਵੇਲ਼ੁਵਨੇ ਅਤ੍ਥਿਭਾਵ’’ਨ੍ਤਿ. ‘‘ਆਮ, ਆਵੁਸੋ, ਜਾਨਾਮ, ਥੇਰੋ ਸਮ੍ਮੁਤਿਲਦ੍ਧਦਿਵਸਤੋ ਪਟ੍ਠਾਯ ਵੇਲ਼ੁਵਨੇਯੇਵਾ’’ਤਿ. ਤਤੋ ਮੇਤ੍ਤਿਯਭੁਮਜਕੇ ਆਹਂਸੁ – ‘‘ਆਵੁਸੋ, ਤੁਮ੍ਹਾਕਂ ਕਥਾ ਨ ਸਮੇਤਿ, ਕਚ੍ਚਿ ਨੋ ਲੇਸਂ ਓਡ੍ਡੇਤ੍ਵਾ ਵਦਥਾ’’ਤਿ. ਏਵਂ ਤੇ ਤੇਹਿ ਭਿਕ੍ਖੂਹਿ ਅਨੁਯੁਞ੍ਜਿਯਮਾਨਾ ਆਮ ਆਵੁਸੋਤਿ ਵਤ੍ਵਾ ਏਤਮਤ੍ਥਂ ਆਰੋਚੇਸੁਂ.
ਕਿਂ ਪਨ ਤੁਮ੍ਹੇ, ਆਵੁਸੋ, ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸਾਤਿ ਏਤ੍ਥ ਅਞ੍ਞਭਾਗਸ੍ਸ ਇਦਂ, ਅਞ੍ਞਭਾਗੋ ਵਾ ਅਸ੍ਸ ਅਤ੍ਥੀਤਿ ਅਞ੍ਞਭਾਗਿਯਂ. ਅਧਿਕਰਣਨ੍ਤਿ ਆਧਾਰੋ ਵੇਦਿਤਬ੍ਬੋ, ਵਤ੍ਥੁ ਅਧਿਟ੍ਠਾਨਨ੍ਤਿ ਵੁਤ੍ਤਂ ਹੋਤਿ. ਯੋ ਹਿ ਸੋ ‘‘ਦਬ੍ਬੋ ਮਲ੍ਲਪੁਤ੍ਤੋ ਨਾਮਾ’’ਤਿ ਛਗਲਕੋ ਵੁਤ੍ਤੋ, ਸੋ ਯ੍ਵਾਯਂ ਆਯਸ੍ਮਤੋ ਦਬ੍ਬਸ੍ਸ ਮਲ੍ਲਪੁਤ੍ਤਸ੍ਸ ਭਾਗੋ ਕੋਟ੍ਠਾਸੋ ਪਕ੍ਖੋ ਮਨੁਸ੍ਸਜਾਤਿ ਚੇਵ ਭਿਕ੍ਖੁਭਾਵੋ ਚ ਤਤੋ ਅਞ੍ਞਸ੍ਸ ਭਾਗਸ੍ਸ ਕੋਟ੍ਠਾਸਸ੍ਸ ਪਕ੍ਖਸ੍ਸ ਹੋਤਿ ਤਿਰਚ੍ਛਾਨਜਾਤਿਯਾ ਚੇਵ ਛਗਲਕਭਾਵਸ੍ਸ ਚ ਸੋ ਵਾ ਅਞ੍ਞਭਾਗੋ ਅਸ੍ਸ ਅਤ੍ਥੀਤਿ ਤਸ੍ਮਾ ਅਞ੍ਞਭਾਗਿਯਸਙ੍ਖ੍ਯਂ ਲਭਤਿ. ਯਸ੍ਮਾ ਚ ਤੇਸਂ ‘‘ਇਮਂ ਮਯਂ ਦਬ੍ਬਂ ਮਲ੍ਲਪੁਤ੍ਤਂ ਨਾਮ ਕਰੋਮਾ’’ਤਿ ਵਦਨ੍ਤਾਨਂ ਤਸ੍ਸਾ ਨਾਮਕਰਣਸਞ੍ਞਾਯ ਆਧਾਰੋ ਵਤ੍ਥੁ ਅਧਿਟ੍ਠਾਨਂ, ਤਸ੍ਮਾ ਅਧਿਕਰਣਨ੍ਤਿ ਵੇਦਿਤਬ੍ਬੋ. ਤਞ੍ਹਿ ਸਨ੍ਧਾਯ ‘‘ਤੇ ਭਿਕ੍ਖੂ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸਾ’’ਤਿ ਆਹਂਸੁ, ਨ ਵਿਵਾਦਾਧਿਕਰਣਾਦੀਸੁ ਅਞ੍ਞਤਰਂ. ਕਸ੍ਮਾ? ਅਸਮ੍ਭਵਤੋ. ਨ ਹਿ ਤੇ ਚਤੁਨ੍ਨਂ ਅਧਿਕਰਣਾਨਂ ਕਸ੍ਸਚਿ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਞ੍ਚਿਦੇਸਂ ਲੇਸਮਤ੍ਤਂ ਉਪਾਦਿਯਿਂਸੁ. ਨ ਚ ਚਤੁਨ੍ਨਂ ਅਧਿਕਰਣਾਨਂ ਲੇਸੋ ਨਾਮ ਅਤ੍ਥਿ. ਜਾਤਿਲੇਸਾਦਯੋ ਹਿ ਪੁਗ੍ਗਲਾਨਂਯੇਵ ਲੇਸਾ ਵੁਤ੍ਤਾ, ਨ ਵਿਵਾਦਾਧਿਕਰਣਾਦੀਨਂ. ਇਦਞ੍ਚ ‘‘ਦਬ੍ਬੋ ਮਲ੍ਲਪੁਤ੍ਤੋ’’ਤਿ ਨਾਮਂ ਤਸ੍ਸ ਅਞ੍ਞਭਾਗਿਯਾਧਿਕਰਣਭਾਵੇ ਠਿਤਸ੍ਸ ਛਗਲਕਸ੍ਸ ਕੋਚਿ ਦੇਸੋ ਹੋਤਿ ਥੇਰਂ ਅਮੂਲਕੇਨ ਪਾਰਾਜਿਕੇਨ ਅਨੁਦ੍ਧਂਸੇਤੁਂ ਲੇਸਮਤ੍ਤੋ.
ਏਤ੍ਥ ਚ ਦਿਸ੍ਸਤਿ ਅਪਦਿਸ੍ਸਤਿ ਅਸ੍ਸ ਅਯਨ੍ਤਿ ਵੋਹਰੀਯਤੀਤਿ ਦੇਸੋ. ਜਾਤਿਆਦੀਸੁ ਅਞ੍ਞਤਰਕੋਟ੍ਠਾਸਸ੍ਸੇਤਂ ਅਧਿਵਚਨਂ. ਅਞ੍ਞਮ੍ਪਿ ਵਤ੍ਥੁਂ ਲਿਸ੍ਸਤਿ ਸਿਲਿਸ੍ਸਤਿ ਵੋਹਾਰਮਤ੍ਤੇਨੇਵ ਈਸਕਂ ਅਲ੍ਲੀਯਤੀਤਿ ਲੇਸੋ. ਜਾਤਿਆਦੀਨਂਯੇਵ ਅਞ੍ਞਤਰਕੋਟ੍ਠਾਸਸ੍ਸੇਤਂ ਅਧਿਵਚਨਂ. ਤਤੋ ਪਰਂ ਉਤ੍ਤਾਨਤ੍ਥਮੇਵ. ਸਿਕ੍ਖਾਪਦਪਞ੍ਞਤ੍ਤਿਯਮ੍ਪਿ ਅਯਮੇਵਤ੍ਥੋ. ਪਦਭਾਜਨੇ ਪਨ ਯਸ੍ਸ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਿਞ੍ਚਿਦੇਸਂ ਲੇਸਮਤ੍ਤਂ ਉਪਾਦਾਯ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਯ੍ਯ, ਤਂ ਯਸ੍ਮਾ ਅਟ੍ਠੁਪ੍ਪਤ੍ਤਿਵਸੇਨੇਵ ਆਵਿਭੂਤਂ, ਤਸ੍ਮਾ ਨ ਵਿਭਤ੍ਤਨ੍ਤਿ ਵੇਦਿਤਬ੍ਬਂ.
੩੯੩. ਯਾਨਿ ਪਨ ਅਧਿਕਰਣਨ੍ਤਿ ਵਚਨਸਾਮਞ੍ਞਤੋ ਅਤ੍ਥੁਦ੍ਧਾਰਵਸੇਨ ਪਵਤ੍ਤਾਨਿ ਚਤ੍ਤਾਰਿ ਅਧਿਕਰਣਾਨਿ, ਤੇਸਂ ਅਞ੍ਞਭਾਗਿਯਤਾ ਚ ਤਬ੍ਭਾਗਿਯਤਾ ਚ ਯਸ੍ਮਾ ਅਪਾਕਟਾ ਜਾਨਿਤਬ੍ਬਾ ਚ ਵਿਨਯਧਰੇਹਿ, ਤਸ੍ਮਾ ਵਚਨਸਾਮਞ੍ਞਤੋ ਲਦ੍ਧਂ ਅਧਿਕਰਣਂ ਨਿਸ੍ਸਾਯ ਤਂ ਆਵਿਕਰੋਨ੍ਤੋ ‘‘ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸਾਤਿ ਆਪਤ੍ਤਞ੍ਞਭਾਗਿਯਂ ਵਾ ਹੋਤਿ ਅਧਿਕਰਣਞ੍ਞਭਾਗਿਯਂ ਵਾ’’ਤਿਆਦਿਮਾਹ. ਯਾ ਚ ਸਾ ਅਵਸਾਨੇ ਆਪਤ੍ਤਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਵਸੇਨ ਚੋਦਨਾ ਵੁਤ੍ਤਾ, ਤਮ੍ਪਿ ਦਸ੍ਸੇਤੁਂ ਅਯਂ ਸਬ੍ਬਾਧਿਕਰਣਾਨਂ ਤਬ੍ਭਾਗਿਯਅਞ੍ਞਭਾਗਿਯਤਾ ਸਮਾਹਟਾਤਿ ਵੇਦਿਤਬ੍ਬਾ.
ਤਤ੍ਥ ਚ ਆਪਤ੍ਤਞ੍ਞਭਾਗਿਯਂ ਵਾਤਿ ਪਠਮਂ ਉਦ੍ਦਿਟ੍ਠਤ੍ਤਾ ‘‘ਕਥਞ੍ਚ ਆਪਤ੍ਤਿ ਆਪਤ੍ਤਿਯਾ ਅਞ੍ਞਭਾਗਿਯਾ ਹੋਤੀ’’ਤਿ ਨਿਦ੍ਦੇਸੇ ਆਰਭਿਤਬ੍ਬੇ ਯਸ੍ਮਾ ਆਪਤ੍ਤਾਧਿਕਰਣਸ੍ਸ ਤਬ੍ਭਾਗਿਯਵਿਚਾਰਣਾਯਂਯੇਵ ਅਯਮਤ੍ਥੋ ਆਗਮਿਸ੍ਸਤਿ, ਤਸ੍ਮਾ ਏਵਂ ਅਨਾਰਭਿਤ੍ਵਾ ‘‘ਕਥਞ੍ਚ ਅਧਿਕਰਣਂ ਅਧਿਕਰਣਸ੍ਸ ਅਞ੍ਞਭਾਗਿਯ’’ਨ੍ਤਿ ਪਚ੍ਛਿਮਪਦਂਯੇਵ ਗਹੇਤ੍ਵਾ ਨਿਦ੍ਦੇਸੋ ਆਰਦ੍ਧੋਤਿ ਵੇਦਿਤਬ੍ਬੋ.
ਤਤ੍ਥ ਅਞ੍ਞਭਾਗਿਯਵਾਰੋ ਉਤ੍ਤਾਨਤ੍ਥੋਯੇਵ. ਏਕਮੇਕਞ੍ਹਿ ਅਧਿਕਰਣਂ ਇਤਰੇਸਂ ਤਿਣ੍ਣਂ ਤਿਣ੍ਣਂ ਅਞ੍ਞਭਾਗਿਯਂ ਅਞ੍ਞਪਕ੍ਖਿਯਂ ਅਞ੍ਞਕੋਟ੍ਠਾਸਿਯਂ ਹੋਤਿ, ਵਤ੍ਥੁਵਿਸਭਾਗਤ੍ਤਾ, ਤਬ੍ਭਾਗਿਯਵਾਰੇ ਪਨ ਵਿਵਾਦਾਧਿਕਰਣਂ ਵਿਵਾਦਾਧਿਕਰਣਸ੍ਸ ਤਬ੍ਭਾਗਿਯਂ ਤਪ੍ਪਕ੍ਖਿਯਂ ਤਂਕੋਟ੍ਠਾਸਿਯਂ ਵਤ੍ਥੁਸਭਾਗਤ੍ਤਾ, ਤਥਾ ਅਨੁਵਾਦਾਧਿਕਰਣਂ ਅਨੁਵਾਦਾਧਿਕਰਣਸ੍ਸ. ਕਥਂ? ਬੁਦ੍ਧਕਾਲਤੋ ਪਟ੍ਠਾਯ ਹਿ ਅਟ੍ਠਾਰਸ ਭੇਦਕਰਵਤ੍ਥੂਨਿ ਨਿਸ੍ਸਾਯ ਉਪ੍ਪਨ੍ਨਵਿਵਾਦੋ ਚ ਇਦਾਨਿ ਉਪ੍ਪਜ੍ਜਨਕਵਿਵਾਦੋ ਚ ਵਤ੍ਥੁਸਭਾਗਤਾਯ ਏਕਂ ਵਿਵਾਦਾਧਿਕਰਣਮੇਵ ਹੋਤਿ, ਤਥਾ ਬੁਦ੍ਧਕਾਲਤੋ ਪਟ੍ਠਾਯ ਚਤਸ੍ਸੋ ਵਿਪਤ੍ਤਿਯੋ ਨਿਸ੍ਸਾਯ ਉਪ੍ਪਨ੍ਨਅਨੁਵਾਦੋ ਚ ਇਦਾਨਿ ਉਪ੍ਪਜ੍ਜਨਕਅਨੁਵਾਦੋ ਚ ਵਤ੍ਥੁਸਭਾਗਤਾਯ ਏਕਂ ਅਨੁਵਾਦਾਧਿਕਰਣਮੇਵ ਹੋਤਿ. ਯਸ੍ਮਾ ਪਨ ਆਪਤ੍ਤਾਧਿਕਰਣਂ ਆਪਤ੍ਤਾਧਿਕਰਣਸ੍ਸ ਸਭਾਗਵਿਸਭਾਗਵਤ੍ਥੁਤੋ ਸਭਾਗਸਰਿਕ੍ਖਾਸਰਿਕ੍ਖਤੋ ਚ ਏਕਂਸੇਨ ਤਬ੍ਭਾਗਿਯਂ ਨ ਹੋਤਿ, ਤਸ੍ਮਾ ਆਪਤ੍ਤਾਧਿਕਰਣਂ ਆਪਤ੍ਤਾਧਿਕਰਣਸ੍ਸ ਸਿਯਾ ਤਬ੍ਭਾਗਿਯਂ ਸਿਯਾ ਅਞ੍ਞਭਾਗਿਯਨ੍ਤਿ ਵੁਤ੍ਤਂ. ਤਤ੍ਥ ਆਦਿਤੋ ਪਟ੍ਠਾਯ ਅਞ੍ਞਭਾਗਿਯਸ੍ਸ ਪਠਮਂ ਨਿਦ੍ਦਿਟ੍ਠਤ੍ਤਾ ਇਧਾਪਿ ਅਞ੍ਞਭਾਗਿਯਮੇਵ ਪਠਮਂ ਨਿਦ੍ਦਿਟ੍ਠਂ, ਤਤ੍ਥ ਅਞ੍ਞਭਾਗਿਯਤ੍ਤਞ੍ਚ ਪਰਤੋ ਤਬ੍ਭਾਗਿਯਤ੍ਤਞ੍ਚ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.
ਕਿਚ੍ਚਾਧਿਕਰਣਂ ਕਿਚ੍ਚਾਧਿਕਰਣਸ੍ਸ ਤਬ੍ਭਾਗਿਯਨ੍ਤਿ ਏਤ੍ਥ ਪਨ ਬੁਦ੍ਧਕਾਲਤੋ ਪਟ੍ਠਾਯ ਚਤ੍ਤਾਰਿ ਸਙ੍ਘਕਮ੍ਮਾਨਿ ਨਿਸ੍ਸਾਯ ਉਪ੍ਪਨ੍ਨਂ ਅਧਿਕਰਣਞ੍ਚ ਇਦਾਨਿ ਚਤ੍ਤਾਰਿ ਸਙ੍ਘਕਮ੍ਮਾਨਿ ਨਿਸ੍ਸਾਯ ਉਪ੍ਪਜ੍ਜਨਕਂ ਅਧਿਕਰਣਞ੍ਚ ਸਭਾਗਤਾਯ ਸਰਿਕ੍ਖਤਾਯ ਚ ਏਕਂ ਕਿਚ੍ਚਾਧਿਕਰਣਮੇਵ ਹੋਤਿ. ਕਿਂ ਪਨ ਸਙ੍ਘਕਮ੍ਮਾਨਿ ਨਿਸ੍ਸਾਯ ਉਪ੍ਪਨ੍ਨਂ ਅਧਿਕਰਣਂ ਕਿਚ੍ਚਾਧਿਕਰਣਂ, ਉਦਾਹੁ ਸਙ੍ਘਕਮ੍ਮਾਨਮੇਵੇਤਂ ਅਧਿਵਚਨਨ੍ਤਿ? ਸਙ੍ਘਕਮ੍ਮਾਨਮੇਵੇਤਂ ਅਧਿਵਚਨਂ. ਏਵਂ ਸਨ੍ਤੇਪਿ ਸਙ੍ਘਕਮ੍ਮਂ ਨਾਮ ‘‘ਇਦਞ੍ਚਿਦਞ੍ਚ ਏਵਂ ਕਤ੍ਤਬ੍ਬ’’ਨ੍ਤਿ ਯਂ ਕਮ੍ਮਲਕ੍ਖਣਂ ਮਨਸਿਕਰੋਤਿ ਤਂ ਨਿਸ੍ਸਾਯ ਉਪ੍ਪਜ੍ਜਨਤੋ ਪੁਰਿਮਂ ਪੁਰਿਮਂ ਸਙ੍ਘਕਮ੍ਮਂ ਨਿਸ੍ਸਾਯ ਉਪ੍ਪਜ੍ਜਨਤੋ ਚ ਸਙ੍ਘਕਮ੍ਮਾਨਿ ਨਿਸ੍ਸਾਯ ਉਪ੍ਪਨ੍ਨਂ ਅਧਿਕਰਣਂ ਕਿਚ੍ਚਾਧਿਕਰਣਨ੍ਤਿ ਵੁਤ੍ਤਂ.
੩੯੪. ਕਿਞ੍ਚਿ ਦੇਸਂ ਲੇਸਮਤ੍ਤਂ ਉਪਾਦਾਯਾਤਿ ਏਤ੍ਥ ਪਨ ਯਸ੍ਮਾ ਦੇਸੋਤਿ ਵਾ ਲੇਸਮਤ੍ਤੋਤਿ ਵਾ ਪੁਬ੍ਬੇ ਵੁਤ੍ਤਨਯੇਨੇਵ ਬ੍ਯਞ੍ਜਨਤੋ ਨਾਨਂ ਅਤ੍ਥਤੋ ਏਕਂ, ਤਸ੍ਮਾ ‘‘ਲੇਸੋ ਨਾਮ ਦਸ ਲੇਸਾ ਜਾਤਿਲੇਸੋ ਨਾਮਲੇਸੋ’’ਤਿਆਦਿਮਾਹ. ਤਤ੍ਥ ਜਾਤਿਯੇਵ ਜਾਤਿਲੇਸੋ. ਏਸ ਨਯੋ ਸੇਸੇਸੁ.
੩੯੫. ਇਦਾਨਿ ਤਮੇਵ ਲੇਸਂ ਵਿਤ੍ਥਾਰਤੋ ਦਸ੍ਸੇਤੁਂ ਯਥਾ ਤਂ ਉਪਾਦਾਯ ਅਨੁਦ੍ਧਂਸਨਾ ਹੋਤਿ ਤਥਾ ਸਵਤ੍ਥੁਕਂ ਕਤ੍ਵਾ ਦਸ੍ਸੇਨ੍ਤੋ ‘‘ਜਾਤਿਲੇਸੋ ਨਾਮ ਖਤ੍ਤਿਯੋ ਦਿਟ੍ਠੋ ਹੋਤੀ’’ਤਿਆਦਿਮਾਹ. ਤਤ੍ਥ ਖਤ੍ਤਿਯੋ ਦਿਟ੍ਠੋ ਹੋਤੀਤਿ ਅਞ੍ਞੋ ਕੋਚਿ ਖਤ੍ਤਿਯਜਾਤਿਯੋ ਇਮਿਨਾ ਚੋਦਕੇਨ ਦਿਟ੍ਠੋ ਹੋਤਿ. ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋਤਿ ਮੇਥੁਨਧਮ੍ਮਾਦੀਸੁ ਅਞ੍ਞਤਰਂ ਆਪਜ੍ਜਨ੍ਤੋ. ਅਞ੍ਞਂ ਖਤ੍ਤਿਯਂ ਪਸ੍ਸਿਤ੍ਵਾ ਚੋਦੇਤੀਤਿ ਅਥ ਸੋ ਅਞ੍ਞਂ ਅਤ੍ਤਨੋ ਵੇਰਿਂ ਖਤ੍ਤਿਯਜਾਤਿਯਂ ਭਿਕ੍ਖੁਂ ਪਸ੍ਸਿਤ੍ਵਾ ਤਂ ਖਤ੍ਤਿਯਜਾਤਿਲੇਸਂ ਗਹੇਤ੍ਵਾ ਏਵਂ ਚੋਦੇਤਿ ‘‘ਖਤ੍ਤਿਯੋ ਮਯਾ ਦਿਟ੍ਠੋ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ, ਤ੍ਵਂ ਖਤ੍ਤਿਯੋ, ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸੀ’’ ਅਥ ਵਾ ‘‘ਤ੍ਵਂ ਸੋ ਖਤ੍ਤਿਯੋ, ਨ ਅਞ੍ਞੋ, ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸਿ, ਅਸ੍ਸਮਣੋਸਿ ਅਸਕ੍ਯਪੁਤ੍ਤਿਯੋਸਿ ਨਤ੍ਥਿ ਤਯਾ ਸਦ੍ਧਿਂ ਉਪੋਸਥੋ ਵਾ ਪਵਾਰਣਾ ਵਾ ਸਙ੍ਘਕਮ੍ਮਂ ਵਾ’’ਤਿ, ਆਪਤ੍ਤਿ ਵਾਚਾਯ ਵਾਚਾਯ ਸਙ੍ਘਾਦਿਸੇਸਸ੍ਸ. ਏਤ੍ਥ ਚ ਤੇਸਂ ਖਤ੍ਤਿਯਾਨਂ ਅਞ੍ਞਮਞ੍ਞਂ ਅਸਦਿਸਸ੍ਸ ਤਸ੍ਸ ਤਸ੍ਸ ਦੀਘਾਦਿਨੋ ਵਾ ਦਿਟ੍ਠਾਦਿਨੋ ਵਾ ਵਸੇਨ ਅਞ੍ਞਭਾਗਿਯਤਾ ਖਤ੍ਤਿਯਜਾਤਿਪਞ੍ਞਤ੍ਤਿਯਾ ਆਧਾਰਵਸੇਨ ਅਧਿਕਰਣਤਾ ਚ ਵੇਦਿਤਬ੍ਬਾ, ਏਤੇਨੁਪਾਯੇਨ ਸਬ੍ਬਪਦੇਸੁ ਯੋਜਨਾ ਵੇਦਿਤਬ੍ਬਾ.
੪੦੦. ਪਤ੍ਤਲੇਸਨਿਦ੍ਦੇਸੇ ਚ ਸਾਟਕਪਤ੍ਤੋਤਿ ਲੋਹਪਤ੍ਤਸਦਿਸੋ ਸੁਸਣ੍ਠਾਨੋ ਸੁਚ੍ਛਵਿ ਸਿਨਿਦ੍ਧੋ ਭਮਰਵਣ੍ਣੋ ਮਤ੍ਤਿਕਾਪਤ੍ਤੋ ਵੁਚ੍ਚਤਿ. ਸੁਮ੍ਭਕਪਤ੍ਤੋਤਿ ਪਕਤਿਮਤ੍ਤਿਕਾਪਤ੍ਤੋ.
੪੦੬. ਯਸ੍ਮਾ ਪਨ ਆਪਤ੍ਤਿਲੇਸਸ੍ਸ ਏਕਪਦੇਨੇਵ ਸਙ੍ਖੇਪਤੋ ਨਿਦ੍ਦੇਸੋ ਵੁਤ੍ਤੋ, ਤਸ੍ਮਾ ਵਿਤ੍ਥਾਰਤੋਪਿ ਤਂ ਦਸ੍ਸੇਤੁਂ ‘‘ਭਿਕ੍ਖੁ ਸਙ੍ਘਾਦਿਸੇਸਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ ਹੋਤੀ’’ਤਿਆਦਿ ਵੁਤ੍ਤਂ. ਕਸ੍ਮਾ ਪਨਸ੍ਸ ਤਤ੍ਥੇਵ ਨਿਦ੍ਦੇਸਂ ਅਵਤ੍ਵਾ ਇਧ ਵਿਸੁਂ ਵੁਤ੍ਤੋਤਿ? ਸੇਸਨਿਦ੍ਦੇਸੇਹਿ ਅਸਭਾਗਤ੍ਤਾ. ਸੇਸਨਿਦ੍ਦੇਸਾ ਹਿ ਅਞ੍ਞਂ ਦਿਸ੍ਵਾ ਅਞ੍ਞਸ੍ਸ ਚੋਦਨਾਵਸੇਨ ਵੁਤ੍ਤਾ. ਅਯਂ ਪਨ ਏਕਮੇਵ ਅਞ੍ਞਂ ਆਪਤ੍ਤਿਂ ਆਪਜ੍ਜਨ੍ਤਂ ਦਿਸ੍ਵਾ ਅਞ੍ਞਾਯ ਆਪਤ੍ਤਿਯਾ ਚੋਦਨਾਵਸੇਨ ਵੁਤ੍ਤੋ. ਯਦਿ ਏਵਂ ਕਥਂ ਅਞ੍ਞਭਾਗਿਯਂ ਅਧਿਕਰਣਂ ਹੋਤੀਤਿ? ਆਪਤ੍ਤਿਯਾ. ਤੇਨੇਵ ਵੁਤ੍ਤਂ – ‘‘ਏਵਮ੍ਪਿ ਆਪਤ੍ਤਞ੍ਞਭਾਗਿਯਞ੍ਚ ਹੋਤਿ ਲੇਸੋ ਚ ਉਪਾਦਿਨ੍ਨੋ’’ਤਿ. ਯਞ੍ਹਿ ਸੋ ਸਙ੍ਘਾਦਿਸੇਸਂ ਆਪਨ੍ਨੋ ਤਂ ਪਾਰਾਜਿਕਸ੍ਸ ਅਞ੍ਞਭਾਗਿਯਂ ਅਧਿਕਰਣਂ. ਤਸ੍ਸ ਪਨ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਲੇਸੋ ਨਾਮ ਯੋ ਸੋ ਸਬ੍ਬਖਤ੍ਤਿਯਾਨਂ ਸਾਧਾਰਣੋ ਖਤ੍ਤਿਯਭਾਵੋ ਵਿਯ ਸਬ੍ਬਾਪਤ੍ਤੀਨਂ ਸਾਧਾਰਣੋ ਆਪਤ੍ਤਿਭਾਵੋ. ਏਤੇਨੁਪਾਯੇਨ ਸੇਸਾਪਤ੍ਤਿਮੂਲਕਨਯੋ ਚੋਦਾਪਕਵਾਰੋ ਚ ਵੇਦਿਤਬ੍ਬੋ.
੪੦੮. ਅਨਾਪਤ੍ਤਿ ਤਥਾਸਞ੍ਞੀ ਚੋਦੇਤਿ ਵਾ ਚੋਦਾਪੇਤਿ ਵਾਤਿ ‘‘ਪਾਰਾਜਿਕਂਯੇਵ ਅਯਂ ਆਪਨ੍ਨੋ’’ਤਿ ਯੋ ਏਵਂ ਤਥਾਸਞ੍ਞੀ ਚੋਦੇਤਿ ਵਾ ਚੋਦਾਪੇਤਿ ਵਾ ਤਸ੍ਸ ਅਨਾਪਤ੍ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਸਮੁਟ੍ਠਾਨਾਦੀਨਿਪਿ ਪਠਮਦੁਟ੍ਠਦੋਸਸਦਿਸਾਨੇਵਾਤਿ.
ਦੁਤਿਯਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.