੨. ਸਙ੍ਘਾਦਿਸੇਸਕਣ੍ਡਂ
੧. ਸੁਕ੍ਕਵਿਸ੍ਸਟ੍ਠਿਸਿਕ੍ਖਾਪਦਵਣ੍ਣਨਾ
ਯਂ ਪਾਰਾਜਿਕਕਣ੍ਡਸ੍ਸ, ਸਙ੍ਗੀਤਂ ਸਮਨਨ੍ਤਰਂ;
ਤਸ੍ਸ ਤੇਰਸਕਸ੍ਸਾਯਮਪੁਬ੍ਬਪਦਵਣ੍ਣਨਾ.
੨੩੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਸੇਯ੍ਯਸਕੋ ਅਨਭਿਰਤੋ ਬ੍ਰਹ੍ਮਚਰਿਯਂ ਚਰਤੀਤਿ ਏਤ੍ਥ ਆਯਸ੍ਮਾਤਿ ਪਿਯਵਚਨਂ. ਸੇਯ੍ਯਸਕੋਤਿ ਤਸ੍ਸ ਭਿਕ੍ਖੁਨੋ ਨਾਮਂ. ਅਨਭਿਰਤੋਤਿ ਵਿਕ੍ਖਿਤ੍ਤਚਿਤ੍ਤੋ ਕਾਮਰਾਗਪਰਿਲ਼ਾਹੇਨ ਪਰਿਡਯ੍ਹਮਾਨੋ ਨ ਪਨ ਗਿਹਿਭਾਵਂ ਪਤ੍ਥਯਮਾਨੋ. ਸੋ ਤੇਨ ਕਿਸੋ ਹੋਤੀਤਿ ਸੋ ਸੇਯ੍ਯਸਕੋ ਤੇਨ ਅਨਭਿਰਤਭਾਵੇਨ ਕਿਸੋ ਹੋਤਿ.
ਅਦ੍ਦਸਾ ਖੋ ਆਯਸ੍ਮਾ ਉਦਾਯੀਤਿ ਏਤ੍ਥ ਉਦਾਯੀਤਿ ਤਸ੍ਸ ਥੇਰਸ੍ਸ ਨਾਮਂ, ਅਯਞ੍ਹਿ ਸੇਯ੍ਯਸਕਸ੍ਸ ਉਪਜ੍ਝਾਯੋ ਲਾਲ਼ੁਦਾਯੀ ਨਾਮ ਭਨ੍ਤਮਿਗਸਪ੍ਪਟਿਭਾਗੋ ਨਿਦ੍ਦਾਰਾਮਤਾਦਿਮਨੁਯੁਤ੍ਤਾਨਂ ਅਞ੍ਞਤਰੋ ਲੋਲਭਿਕ੍ਖੁ. ਕਚ੍ਚਿ ਨੋ ਤ੍ਵਨ੍ਤਿ ਕਚ੍ਚਿ ਨੁ ਤ੍ਵਂ. ਯਾਵਦਤ੍ਥਂ ਭੁਞ੍ਜਾਤਿਆਦੀਸੁ ਯਾਵਤਾ ਅਤ੍ਥੋਤਿ ਯਾਵਦਤ੍ਥਂ. ਇਦਂ ਵੁਤ੍ਤਂ ਹੋਤਿ – ਯਾਵਤਾ ਤੇ ਭੋਜਨੇਨ ਅਤ੍ਥੋ ਯਤ੍ਤਕਂ ਤ੍ਵਂ ਇਚ੍ਛਸਿ ਤਤ੍ਤਕਂ ਭੁਞ੍ਜ, ਯਤ੍ਤਕਂ ਕਾਲਂ ਰਤ੍ਤਿਂ ਵਾ ਦਿਵਾ ਵਾ ਸੁਪਿਤੁਂ ਇਚ੍ਛਸਿ ਤਤ੍ਤਕਂ ਸੁਪ, ਮਤ੍ਤਿਕਾਦੀਹਿ ਕਾਯਂ ਉਬ੍ਬਟ੍ਟੇਤ੍ਵਾ ਚੁਣ੍ਣਾਦੀਹਿ ਘਂਸਿਤ੍ਵਾ ਯਤ੍ਤਕਂ ਨ੍ਹਾਨਂ ਇਚ੍ਛਸਿ ਤਤ੍ਤਕਂ ਨ੍ਹਾਯ, ਉਦ੍ਦੇਸੇਨ ਵਾ ਪਰਿਪੁਚ੍ਛਾਯ ਵਾ ਵਤ੍ਤਪਟਿਪਤ੍ਤਿਯਾ ਵਾ ਕਮ੍ਮਟ੍ਠਾਨੇਨ ਵਾ ਅਤ੍ਥੋ ਨਤ੍ਥੀਤਿ. ਯਦਾ ਤੇ ਅਨਭਿਰਤਿ ਉਪ੍ਪਜ੍ਜਤੀਤਿ ਯਸ੍ਮਿਂ ਕਾਲੇ ਤਵ ਕਾਮਰਾਗਵਸੇਨ ਉਕ੍ਕਣ੍ਠਿਤਤਾ ਵਿਕ੍ਖਿਤ੍ਤਚਿਤ੍ਤਤਾ ਉਪ੍ਪਜ੍ਜਤਿ. ਰਾਗੋ ਚਿਤ੍ਤਂ ਅਨੁਦ੍ਧਂਸੇਤੀਤਿ ਕਾਮਰਾਗੋ ਚਿਤ੍ਤਂ ਧਂਸੇਤਿ ਪਧਂਸੇਤਿ ਵਿਕ੍ਖਿਪਤਿ ਚੇਵ ਮਿਲਾਪੇਤਿ ਚ. ਤਦਾ ਹਤ੍ਥੇਨ ਉਪਕ੍ਕਮਿਤ੍ਵਾ ਅਸੁਚਿਂ ਮੋਚੇਹੀਤਿ ਤਸ੍ਮਿਂ ਕਾਲੇ ਹਤ੍ਥੇਨ ਵਾਯਮਿਤ੍ਵਾ ਅਸੁਚਿਮੋਚਨਂ ਕਰੋਹਿ, ਏਵਞ੍ਹਿ ਤੇ ਚਿਤ੍ਤੇਕਗ੍ਗਤਾ ਭਵਿਸ੍ਸਤਿ. ਇਤਿ ਤਂ ਉਪਜ੍ਝਾਯੋ ਅਨੁਸਾਸਿ ਯਥਾ ਤਂ ਬਾਲੋ ਬਾਲਂ ਮਗੋ ਮਗਂ.
੨੩੫. ਤੇਸਂ ਮੁਟ੍ਠਸ੍ਸਤੀਨਂ ਅਸਮ੍ਪਜਾਨਾਨਂ ਨਿਦ੍ਦਂ ਓਕ੍ਕਮਨ੍ਤਾਨਨ੍ਤਿ ਸਤਿਸਮ੍ਪਜਞ੍ਞਂ ਪਹਾਯ ਨਿਦ੍ਦਂ ਓਤਰਨ੍ਤਾਨਂ. ਤਤ੍ਥ ਕਿਞ੍ਚਾਪਿ ਨਿਦ੍ਦਂ ਓਕ੍ਕਮਨ੍ਤਾਨਂ ਅਬ੍ਯਾਕਤੋ ਭਵਙ੍ਗਵਾਰੋ ਪਵਤ੍ਤਤਿ, ਸਤਿਸਮ੍ਪਜਞ੍ਞਵਾਰੋ ਗਲ਼ਤਿ, ਤਥਾਪਿ ਸਯਨਕਾਲੇ ਮਨਸਿਕਾਰੋ ਕਾਤਬ੍ਬੋ. ਦਿਵਾ ਸੁਪਨ੍ਤੇਨ ਯਾਵ ਨ੍ਹਾਤਸ੍ਸ ਭਿਕ੍ਖੁਨੋ ਕੇਸਾ ਨ ਸੁਕ੍ਖਨ੍ਤਿ ਤਾਵ ਸੁਪਿਤ੍ਵਾ ਵੁਟ੍ਠਹਿਸ੍ਸਾਮੀਤਿ ਸਉਸ੍ਸਾਹੇਨ ਸੁਪਿਤਬ੍ਬਂ. ਰਤ੍ਤਿਂ ਸੁਪਨ੍ਤੇਨ ਏਤ੍ਤਕਂ ਨਾਮ ਰਤ੍ਤਿਭਾਗਂ ਸੁਪਿਤ੍ਵਾ ਚਨ੍ਦੇਨ ਵਾ ਤਾਰਕਾਯ ਵਾ ਇਦਂ ਨਾਮ ਠਾਨਂ ਪਤ੍ਤਕਾਲੇ ਵੁਟ੍ਠਹਿਸ੍ਸਾਮੀਤਿ ਸਉਸ੍ਸਾਹੇਨ ਸੁਪਿਤਬ੍ਬਂ. ਬੁਦ੍ਧਾਨੁਸ੍ਸਤਿਆਦੀਸੁ ਚ ਦਸਸੁ ਕਮ੍ਮਟ੍ਠਾਨੇਸੁ ਏਕਂ ਅਞ੍ਞਂ ਵਾ ਚਿਤ੍ਤਰੁਚਿਯਂ ਕਮ੍ਮਟ੍ਠਾਨਂ ਗਹੇਤ੍ਵਾਵ ਨਿਦ੍ਦਾ ਓਕ੍ਕਮਿਤਬ੍ਬਾ. ਏਵਂ ਕਰੋਨ੍ਤੋ ਹਿ ਸਤੋ ਸਮ੍ਪਜਾਨੋ ਸਤਿਞ੍ਚ ਸਮ੍ਪਜਞ੍ਞਞ੍ਚ ਅਵਿਜਹਿਤ੍ਵਾਵ ਨਿਦ੍ਦਂ ਓਕ੍ਕਮਤੀਤਿ ਵੁਚ੍ਚਤਿ. ਤੇ ਪਨ ਭਿਕ੍ਖੂ ਬਾਲਾ ਲੋਲਾ ਭਨ੍ਤਮਿਗਸਪ੍ਪਟਿਭਾਗਾ ਨ ਏਵਮਕਂਸੁ. ਤੇਨ ਵੁਤ੍ਤਂ – ‘‘ਤੇਸਂ ਮੁਟ੍ਠਸ੍ਸਤੀਨਂ ਅਸਮ੍ਪਜਾਨਾਨਂ ਨਿਦ੍ਦਂ ਓਕ੍ਕਮਨ੍ਤਾਨ’’ਨ੍ਤਿ.
ਅਤ੍ਥਿ ਚੇਤ੍ਥ ਚੇਤਨਾ ਲਬ੍ਭਤੀਤਿ ਏਤ੍ਥ ਚ ਸੁਪਿਨਨ੍ਤੇ ਅਸ੍ਸਾਦਚੇਤਨਾ ਅਤ੍ਥਿ ਉਪਲਬ੍ਭਤਿ. ਅਤ੍ਥੇਸਾ, ਭਿਕ੍ਖਵੇ, ਚੇਤਨਾ; ਸਾ ਚ ਖੋ ਅਬ੍ਬੋਹਾਰਿਕਾਤਿ ਭਿਕ੍ਖਵੇ ਏਸਾ ਅਸ੍ਸਾਦਚੇਤਨਾ ਅਤ੍ਥਿ, ਸਾ ਚ ਖੋ ਅਵਿਸਯੇ ਉਪ੍ਪਨ੍ਨਤ੍ਤਾ ਅਬ੍ਬੋਹਾਰਿਕਾ, ਆਪਤ੍ਤਿਯਾ ਅਙ੍ਗਂ ਨ ਹੋਤਿ. ਇਤਿ ਭਗਵਾ ਸੁਪਿਨਨ੍ਤੇ ਚੇਤਨਾਯ ਅਬ੍ਬੋਹਾਰਿਕਭਾਵਂ ਦਸ੍ਸੇਤ੍ਵਾ ‘‘ਏਵਞ੍ਚ ਪਨ ਭਿਕ੍ਖਵੇ ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ, ਸਞ੍ਚੇਤਨਿਕਾ ਸੁਕ੍ਕਵਿਸ੍ਸਟ੍ਠਿ ਅਞ੍ਞਤ੍ਰ ਸੁਪਿਨਨ੍ਤਾ ਸਙ੍ਘਾਦਿਸੇਸੋ’’ਤਿ ਸਾਨੁਪਞ੍ਞਤ੍ਤਿਕਂ ਸਿਕ੍ਖਾਪਦਂ ਪਞ੍ਞਾਪੇਸਿ.
੨੩੬-੨੩੭. ਤਤ੍ਥ ਸਂਵਿਜ੍ਜਤਿ ਚੇਤਨਾ ਅਸ੍ਸਾਤਿ ਸਞ੍ਚੇਤਨਾ, ਸਞ੍ਚੇਤਨਾਵ ਸਞ੍ਚੇਤਨਿਕਾ, ਸਞ੍ਚੇਤਨਾ ਵਾ ਅਸ੍ਸਾ ਅਤ੍ਥੀਤਿ ਸਞ੍ਚੇਤਨਿਕਾ. ਯਸ੍ਮਾ ਪਨ ਯਸ੍ਸ ਸਞ੍ਚੇਤਨਿਕਾ ਸੁਕ੍ਕਵਿਸ੍ਸਟ੍ਠਿ ਹੋਤਿ ਸੋ ਜਾਨਨ੍ਤੋ ਸਞ੍ਜਾਨਨ੍ਤੋ ਹੋਤਿ, ਸਾ ਚਸ੍ਸ ਸੁਕ੍ਕਵਿਸ੍ਸਟ੍ਠਿ ਚੇਚ੍ਚ ਅਭਿਵਿਤਰਿਤ੍ਵਾ ਵੀਤਿਕ੍ਕਮੋ ਹੋਤਿ, ਤਸ੍ਮਾ ਬ੍ਯਞ੍ਜਨੇ ਆਦਰਂ ਅਕਤ੍ਵਾ ਅਤ੍ਥਮੇਵ ਦਸ੍ਸੇਤੁਂ ‘‘ਜਾਨਨ੍ਤੋ ਸਞ੍ਜਾਨਨ੍ਤੋ ਚੇਚ੍ਚ ਅਭਿਵਿਤਰਿਤ੍ਵਾ ਵੀਤਿਕ੍ਕਮੋ’’ਤਿ ਏਵਮਸ੍ਸ ਪਦਭਾਜਨਂ ਵੁਤ੍ਤਂ. ਤਤ੍ਥ ਜਾਨਨ੍ਤੋਤਿ ਉਪਕ੍ਕਮਾਮੀਤਿ ਜਾਨਨ੍ਤੋ. ਸਞ੍ਜਾਨਨ੍ਤੋਤਿ ਸੁਕ੍ਕਂ ਮੋਚੇਮੀਤਿ ਸਞ੍ਜਾਨਨ੍ਤੋ, ਤੇਨੇਵ ਉਪਕ੍ਕਮਜਾਨਨਾਕਾਰੇਨ ਸਦ੍ਧਿਂ ਜਾਨਨ੍ਤੋਤਿ ਅਤ੍ਥੋ. ਚੇਚ੍ਚਾਤਿ ਮੋਚਨਸ੍ਸਾਦਚੇਤਨਾਵਸੇਨ ਚੇਤੇਤ੍ਵਾ ਪਕਪ੍ਪੇਤ੍ਵਾ. ਅਭਿਵਿਤਰਿਤ੍ਵਾਤਿ ਉਪਕ੍ਕਮਵਸੇਨ ਮਦ੍ਦਨ੍ਤੋ ਨਿਰਾਸਙ੍ਕਚਿਤ੍ਤਂ ਪੇਸੇਤ੍ਵਾ. ਵੀਤਿਕ੍ਕਮੋਤਿ ਏਵਂ ਪਵਤ੍ਤਸ੍ਸ ਯੋ ਵੀਤਿਕ੍ਕਮੋ ਅਯਂ ਸਞ੍ਚੇਤਨਿਕਾਸਦ੍ਦਸ੍ਸ ਸਿਖਾਪ੍ਪਤ੍ਤੋ ਅਤ੍ਥੋਤਿ ਵੁਤ੍ਤਂ ਹੋਤਿ.
ਇਦਾਨਿ ਸੁਕ੍ਕਵਿਸ੍ਸਟ੍ਠੀਤਿ ਏਤ੍ਥ ਯਸ੍ਸ ਸੁਕ੍ਕਸ੍ਸ ਵਿਸ੍ਸਟ੍ਠਿ ਤਂ ਤਾਵ ਸਙ੍ਖ੍ਯਾਤੋ ਵਣ੍ਣਭੇਦਤੋ ਚ ਦਸ੍ਸੇਤੁਂ ‘‘ਸੁਕ੍ਕਨ੍ਤਿ ਦਸ ਸੁਕ੍ਕਾਨੀ’’ਤਿਆਦਿਮਾਹ. ਤਤ੍ਥ ਸੁਕ੍ਕਾਨਂ ਆਸਯਭੇਦਤੋ ਧਾਤੁਨਾਨਤ੍ਤਤੋ ਚ ਨੀਲਾਦਿਵਣ੍ਣਭੇਦੋ ਵੇਦਿਤਬ੍ਬੋ.
ਵਿਸ੍ਸਟ੍ਠੀਤਿ ਵਿਸ੍ਸਗ੍ਗੋ, ਅਤ੍ਥਤੋ ਪਨੇਤਂ ਠਾਨਾਚਾਵਨਂ ਹੋਤਿ, ਤੇਨਾਹ – ‘‘ਵਿਸ੍ਸਟ੍ਠੀਤਿ ਠਾਨਤੋਚਾਵਨਾ ਵੁਚ੍ਚਤੀ’’ਤਿ. ਤਤ੍ਥ ਵਤ੍ਥਿਸੀਸਂ ਕਟਿ ਕਾਯੋਤਿ ਤਿਧਾ ਸੁਕ੍ਕਸ੍ਸ ਠਾਨਂ ਪਕਪ੍ਪੇਨ੍ਤਿ, ਏਕੋ ਕਿਰਾਚਰਿਯੋ ‘‘ਵਤ੍ਥਿਸੀਸਂ ਸੁਕ੍ਕਸ੍ਸ ਠਾਨ’’ਨ੍ਤਿ ਆਹ. ਏਕੋ ‘‘ਕਟੀ’’ਤਿ, ਏਕੋ ‘‘ਸਕਲੋ ਕਾਯੋ’’ਤਿ, ਤੇਸੁ ਤਤਿਯਸ੍ਸ ਭਾਸਿਤਂ ਸੁਭਾਸਿਤਂ. ਕੇਸਲੋਮਨਖਦਨ੍ਤਾਨਞ੍ਹਿ ਮਂਸਵਿਨਿਮੁਤ੍ਤਟ੍ਠਾਨਂ ਉਚ੍ਚਾਰਪਸ੍ਸਾਵਖੇਲ਼ਸਿਙ੍ਘਾਣਿਕਾਥਦ੍ਧਸੁਕ੍ਖਚਮ੍ਮਾਨਿ ਚ ਵਜ੍ਜੇਤ੍ਵਾ ਅਵਸੇਸੋ ਛਵਿਮਂਸਲੋਹਿਤਾਨੁਗਤੋ ਸਬ੍ਬੋਪਿ ਕਾਯੋ ਕਾਯਪ੍ਪਸਾਦਭਾਵਜੀਵਿਤਿਨ੍ਦ੍ਰਿਯਾਬਦ੍ਧਪਿਤ੍ਤਾਨਂ ਸਮ੍ਭਵਸ੍ਸ ਚ ਠਾਨਮੇਵ. ਤਥਾ ਹਿ ਰਾਗਪਰਿਯੁਟ੍ਠਾਨੇਨਾਭਿਭੂਤਾਨਂ ਹਤ੍ਥੀਨਂ ਉਭੋਹਿ ਕਣ੍ਣਚੂਲ਼ਿਕਾਹਿ ਸਮ੍ਭਵੋ ਨਿਕ੍ਖਮਤਿ, ਮਹਾਸੇਨਰਾਜਾ ਚ ਰਾਗਪਰਿਯੁਟ੍ਠਿਤੋ ਸਮ੍ਭਵਵੇਗਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਸਤ੍ਥੇਨ ਬਾਹੁਸੀਸਂ ਫਾਲੇਤ੍ਵਾ ਵਣਮੁਖੇਨ ਨਿਕ੍ਖਨ੍ਤਂ ਸਮ੍ਭਵਂ ਦਸ੍ਸੇਸੀਤਿ.
ਏਤ੍ਥ ਪਨ ਪਠਮਸ੍ਸ ਆਚਰਿਯਸ੍ਸ ਵਾਦੇ ਮੋਚਨਸ੍ਸਾਦੇਨ ਨਿਮਿਤ੍ਤੇ ਉਪਕ੍ਕਮਤੋ ਯਤ੍ਤਕਂ ਏਕਾ ਖੁਦ੍ਦਕਮਕ੍ਖਿਕਾ ਪਿਵੇਯ੍ਯ ਤਤ੍ਤਕੇ ਅਸੁਚਿਮ੍ਹਿ ਵਤ੍ਥਿਸੀਸਤੋ ਮੁਞ੍ਚਿਤ੍ਵਾ ਦਕਸੋਤਂ ਓਤਿਣ੍ਣਮਤ੍ਤੇ ਬਹਿ ਨਿਕ੍ਖਨ੍ਤੇ ਵਾ ਅਨਿਕ੍ਖਨ੍ਤੇ ਵਾ ਸਙ੍ਘਾਦਿਸੇਸੋ. ਦੁਤਿਯਸ੍ਸ ਵਾਦੇ ਤਥੇਵ ਕਟਿਤੋ ਮੁਚ੍ਚਿਤ੍ਵਾ ਦਕਸੋਤਂ ਓਤਿਣ੍ਣਮਤ੍ਤੇ, ਤਤਿਯਸ੍ਸ ਵਾਦੇ ਤਥੇਵ ਸਕਲਕਾਯਂ ਸਙ੍ਖੋਭੇਤ੍ਵਾ ਤਤੋ ਮੁਚ੍ਚਿਤ੍ਵਾ ਦਕਸੋਤਂ ਓਤਿਣ੍ਣਮਤ੍ਤੇ ਬਹਿ ਨਿਕ੍ਖਨ੍ਤੇ ਵਾ ਅਨਿਕ੍ਖਨ੍ਤੇ ਵਾ ਸਙ੍ਘਾਦਿਸੇਸੋ. ਦਕਸੋਤੋਰੋਹਣਞ੍ਚੇਤ੍ਥ ਅਧਿਵਾਸੇਤ੍ਵਾ ਅਨ੍ਤਰਾ ਨਿਵਾਰੇਤੁਂ ਅਸਕ੍ਕੁਣੇਯ੍ਯਤਾਯ ਵੁਤ੍ਤਂ, ਠਾਨਾ ਚੁਤਞ੍ਹਿ ਅਵਸ੍ਸਂ ਦਕਸੋਤਂ ਓਤਰਤਿ. ਤਸ੍ਮਾ ਠਾਨਾ ਚਾਵਨਮਤ੍ਤੇਨੇਵੇਤ੍ਥ ਆਪਤ੍ਤਿ ਵੇਦਿਤਬ੍ਬਾ, ਸਾ ਚ ਖੋ ਨਿਮਿਤ੍ਤੇ ਉਪਕ੍ਕਮਨ੍ਤਸ੍ਸੇਵ ਹਤ੍ਥਪਰਿਕਮ੍ਮਪਾਦਪਰਿਕਮ੍ਮਗਤ੍ਤਪਰਿਕਮ੍ਮਕਰਣੇਨ ਸਚੇਪਿ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ. ਅਯਂ ਸਬ੍ਬਾਚਰਿਯਸਾਧਾਰਣਵਿਨਿਚ੍ਛਯੋ.
ਅਞ੍ਞਤ੍ਰ ਸੁਪਿਨਨ੍ਤਾਤਿ ਏਤ੍ਥ ਸੁਪਿਨੋ ਏਵ ਸੁਪਿਨਨ੍ਤੋ, ਤਂ ਠਪੇਤ੍ਵਾ ਅਪਨੇਤ੍ਵਾਤਿ ਵੁਤ੍ਤਂ ਹੋਤਿ. ਤਞ੍ਚ ਪਨ ਸੁਪਿਨਂ ਪਸ੍ਸਨ੍ਤੋ ਚਤੂਹਿ ਕਾਰਣੇਹਿ ਪਸ੍ਸਤਿ ਧਾਤੁਕ੍ਖੋਭਤੋ ਵਾ ਅਨੁਭੂਤਪੁਬ੍ਬਤੋ ਵਾ ਦੇਵਤੋਪਸਂਹਾਰਤੋ ਵਾ ਪੁਬ੍ਬਨਿਮਿਤ੍ਤਤੋ ਵਾਤਿ.
ਤਤ੍ਥ ਪਿਤ੍ਤਾਦੀਨਂ ਖੋਭਕਰਣਪਚ੍ਚਯਯੋਗੇਨ ਖੁਭਿਤਧਾਤੁਕੋ ਧਾਤੁਕ੍ਖੋਭਤੋ ਸੁਪਿਨਂ ਪਸ੍ਸਤਿ, ਪਸ੍ਸਨ੍ਤੋ ਚ ਨਾਨਾਵਿਧਂ ਸੁਪਿਨਂ ਪਸ੍ਸਤਿ – ਪਬ੍ਬਤਾ ਪਤਨ੍ਤੋ ਵਿਯ, ਆਕਾਸੇਨ ਗਚ੍ਛਨ੍ਤੋ ਵਿਯ, ਵਾਲ਼ਮਿਗਹਤ੍ਥੀਚੋਰਾਦੀਹਿ ਅਨੁਬਦ੍ਧੋ ਵਿਯ ਹੋਤਿ. ਅਨੁਭੂਤਪੁਬ੍ਬਤੋ ਪਸ੍ਸਨ੍ਤੋ ਪੁਬ੍ਬੇ ਅਨੁਭੂਤਪੁਬ੍ਬਂ ਆਰਮ੍ਮਣਂ ਪਸ੍ਸਤਿ. ਦੇਵਤੋਪਸਂਹਾਰਤੋ ਪਸ੍ਸਨ੍ਤਸ੍ਸ ਦੇਵਤਾ ਅਤ੍ਥਕਾਮਤਾਯ ਵਾ ਅਨਤ੍ਥਕਾਮਤਾਯ ਵਾ ਅਤ੍ਥਾਯ ਵਾ ਅਨਤ੍ਥਾਯ ਵਾ ਨਾਨਾਵਿਧਾਨਿ ਆਰਮ੍ਮਣਾਨਿ ਉਪਸਂਹਰਨ੍ਤਿ, ਸੋ ਤਾਸਂ ਦੇਵਤਾਨਂ ਆਨੁਭਾਵੇਨ ਤਾਨਿ ਆਰਮ੍ਮਣਾਨਿ ਪਸ੍ਸਤਿ. ਪੁਬ੍ਬਨਿਮਿਤ੍ਤਤੋ ਪਸ੍ਸਨ੍ਤੋ ਪੁਞ੍ਞਾਪੁਞ੍ਞਵਸੇਨ ਉਪ੍ਪਜ੍ਜਿਤੁਕਾਮਸ੍ਸ ਅਤ੍ਥਸ੍ਸ ਵਾ ਅਨਤ੍ਥਸ੍ਸ ਵਾ ਪੁਬ੍ਬਨਿਮਿਤ੍ਤਭੂਤਂ ਸੁਪਿਨਂ ਪਸ੍ਸਤਿ, ਬੋਧਿਸਤ੍ਤਸ੍ਸਮਾਤਾ ਵਿਯ ਪੁਤ੍ਤਪਟਿਲਾਭਨਿਮਿਤ੍ਤਂ, ਬੋਧਿਸਤ੍ਤੋ ਵਿਯ ਪਞ੍ਚ ਮਹਾਸੁਪਿਨੇ (ਅ. ਨਿ. ੫.੧੯੬), ਕੋਸਲਰਾਜਾ ਵਿਯ ਸੋਲ਼ਸ ਸੁਪਿਨੇਤਿ.
ਤਤ੍ਥ ਯਂ ਧਾਤੁਕ੍ਖੋਭਤੋ ਅਨੁਭੂਤਪੁਬ੍ਬਤੋ ਚ ਸੁਪਿਨਂ ਪਸ੍ਸਤਿ ਨ ਤਂ ਸਚ੍ਚਂ ਹੋਤਿ. ਯਂ ਦੇਵਤੋਪਸਂਹਾਰਤੋ ਪਸ੍ਸਤਿ ਤਂ ਸਚ੍ਚਂ ਵਾ ਹੋਤਿ ਅਲੀਕਂ ਵਾ, ਕੁਦ੍ਧਾ ਹਿ ਦੇਵਤਾ ਉਪਾਯੇਨ ਵਿਨਾਸੇਤੁਕਾਮਾ ਵਿਪਰੀਤਮ੍ਪਿ ਕਤ੍ਵਾ ਦਸ੍ਸੇਨ੍ਤਿ. ਯਂ ਪਨ ਪੁਬ੍ਬਨਿਮਿਤ੍ਤਤੋ ਪਸ੍ਸਤਿ ਤਂ ਏਕਨ੍ਤਸਚ੍ਚਮੇਵ ਹੋਤਿ. ਏਤੇਸਞ੍ਚ ਚਤੁਨ੍ਨਂ ਮੂਲਕਾਰਣਾਨਂ ਸਂਸਗ੍ਗਭੇਦਤੋਪਿ ਸੁਪਿਨਭੇਦੋ ਹੋਤਿਯੇਵ.
ਤਞ੍ਚ ਪਨੇਤਂ ਚਤੁਬ੍ਬਿਧਮ੍ਪਿ ਸੁਪਿਨਂ ਸੇਕ੍ਖਪੁਥੁਜ੍ਜਨਾਵ ਪਸ੍ਸਨ੍ਤਿ ਅਪ੍ਪਹੀਨਵਿਪਲ੍ਲਾਸਤ੍ਤਾ, ਅਸੇਕ੍ਖਾ ਪਨ ਨ ਪਸ੍ਸਨ੍ਤਿ ਪਹੀਨਵਿਪਲ੍ਲਾਸਤ੍ਤਾ. ਕਿਂ ਪਨੇਤਂ ਪਸ੍ਸਨ੍ਤੋ ਸੁਤ੍ਤੋ ਪਸ੍ਸਤਿ ਪਟਿਬੁਦ੍ਧੋ, ਉਦਾਹੁ ਨੇਵ ਸੁਤ੍ਤੋ ਨ ਪਟਿਬੁਦ੍ਧੋਤਿ? ਕਿਞ੍ਚੇਤ੍ਥ ਯਦਿ ਤਾਵ ਸੁਤ੍ਤੋ ਪਸ੍ਸਤਿ ਅਭਿਧਮ੍ਮਵਿਰੋਧੋ ਆਪਜ੍ਜਤਿ, ਭਵਙ੍ਗਚਿਤ੍ਤੇਨ ਹਿ ਸੁਪਤਿ ਤਂ ਰੂਪਨਿਮਿਤ੍ਤਾਦਿਆਰਮ੍ਮਣਂ ਰਾਗਾਦਿਸਮ੍ਪਯੁਤ੍ਤਂ ਵਾ ਨ ਹੋਤਿ, ਸੁਪਿਨਂ ਪਸ੍ਸਨ੍ਤਸ੍ਸ ਚ ਈਦਿਸਾਨਿ ਚਿਤ੍ਤਾਨਿ ਉਪ੍ਪਜ੍ਜਨ੍ਤਿ. ਅਥ ਪਟਿਬੁਦ੍ਧੋ ਪਸ੍ਸਤਿ ਵਿਨਯਵਿਰੋਧੋ ਆਪਜ੍ਜਤਿ, ਯਞ੍ਹਿ ਪਟਿਬੁਦ੍ਧੋ ਪਸ੍ਸਤਿ ਤਂ ਸਬ੍ਬੋਹਾਰਿਕਚਿਤ੍ਤੇਨ ਪਸ੍ਸਤਿ, ਸਬ੍ਬੋਹਾਰਿਕਚਿਤ੍ਤੇਨ ਚ ਕਤੇ ਵੀਤਿਕ੍ਕਮੇ ਅਨਾਪਤ੍ਤਿ ਨਾਮ ਨਤ੍ਥਿ. ਸੁਪਿਨਂ ਪਸ੍ਸਨ੍ਤੇਨ ਪਨ ਕਤੇਪਿ ਵੀਤਿਕ੍ਕਮੇ ਏਕਨ੍ਤਂ ਅਨਾਪਤ੍ਤਿ ਏਵ. ਅਥ ਨੇਵ ਸੁਤ੍ਤੋ ਨ ਪਟਿਬੁਦ੍ਧੋ ਪਸ੍ਸਤਿ, ਕੋ ਨਾਮ ਪਸ੍ਸਤਿ; ਏਵਞ੍ਚ ਸਤਿ ਸੁਪਿਨਸ੍ਸ ਅਭਾਵੋਵ ਆਪਜ੍ਜਤੀਤਿ, ਨ ਅਭਾਵੋ. ਕਸ੍ਮਾ? ਯਸ੍ਮਾ ਕਪਿਮਿਦ੍ਧਪਰੇਤੋ ਪਸ੍ਸਤਿ. ਵੁਤ੍ਤਞ੍ਹੇਤਂ – ‘‘ਕਪਿਮਿਦ੍ਧਪਰੇਤੋ ਖੋ, ਮਹਾਰਾਜ, ਸੁਪਿਨਂ ਪਸ੍ਸਤੀ’’ਤਿ. ਕਪਿਮਿਦ੍ਧਪਰੇਤੋਤਿ ਮਕ੍ਕਟਨਿਦ੍ਦਾਯ ਯੁਤ੍ਤੋ. ਯਥਾ ਹਿ ਮਕ੍ਕਟਸ੍ਸ ਨਿਦ੍ਦਾ ਲਹੁਪਰਿਵਤ੍ਤਾ ਹੋਤਿ; ਏਵਂ ਯਾ ਨਿਦ੍ਦਾ ਪੁਨਪ੍ਪੁਨਂ ਕੁਸਲਾਦਿਚਿਤ੍ਤਵੋਕਿਣ੍ਣਤ੍ਤਾ ਲਹੁਪਰਿਵਤ੍ਤਾ, ਯਸ੍ਸਾ ਪਵਤ੍ਤਿਯਂ ਪੁਨਪ੍ਪੁਨਂ ਭਵਙ੍ਗਤੋ ਉਤ੍ਤਰਣਂ ਹੋਤਿ ਤਾਯ ਯੁਤ੍ਤੋ ਸੁਪਿਨਂ ਪਸ੍ਸਤਿ, ਤੇਨਾਯਂ ਸੁਪਿਨੋ ਕੁਸਲੋਪਿ ਹੋਤਿ ਅਕੁਸਲੋਪਿ ਅਬ੍ਯਾਕਤੋਪਿ. ਤਤ੍ਥ ਸੁਪਿਨਨ੍ਤੇ ਚੇਤਿਯਵਨ੍ਦਨਧਮ੍ਮਸ੍ਸਵਨਧਮ੍ਮਦੇਸਨਾਦੀਨਿ ਕਰੋਨ੍ਤਸ੍ਸ ਕੁਸਲੋ, ਪਾਣਾਤਿਪਾਤਾਦੀਨਿ ਕਰੋਨ੍ਤਸ੍ਸ ਅਕੁਸਲੋ, ਦ੍ਵੀਹਿ ਅਨ੍ਤੇਹਿ ਮੁਤ੍ਤੋ ਆਵਜ੍ਜਨਤਦਾਰਮ੍ਮਣਕ੍ਖਣੇ ਅਬ੍ਯਾਕਤੋਤਿ ਵੇਦਿਤਬ੍ਬੋ. ਸ੍ਵਾਯਂ ਦੁਬ੍ਬਲਵਤ੍ਥੁਕਤ੍ਤਾ ਚੇਤਨਾਯ ਪਟਿਸਨ੍ਧਿਂ ਆਕਡ੍ਢਿਤੁਂ ਅਸਮਤ੍ਥੋ, ਪਵਤ੍ਤੇ ਪਨ ਅਞ੍ਞੇਹਿ ਕੁਸਲਾਕੁਸਲੇਹਿ ਉਪਤ੍ਥਮ੍ਭਿਤੋ ਵਿਪਾਕਂ ਦੇਤਿ. ਕਿਞ੍ਚਾਪਿ ਵਿਪਾਕਂ ਦੇਤਿ? ਅਥ ਖੋ ਅਵਿਸਯੇ ਉਪ੍ਪਨ੍ਨਤ੍ਤਾ ਅਬ੍ਬੋਹਾਰਿਕਾਵ ਸੁਪਿਨਨ੍ਤਚੇਤਨਾ. ਤੇਨਾਹ – ‘‘ਠਪੇਤ੍ਵਾ ਸੁਪਿਨਨ੍ਤ’’ਨ੍ਤਿ.
ਸਙ੍ਘਾਦਿਸੇਸੋਤਿ ਇਮਸ੍ਸ ਆਪਤ੍ਤਿਨਿਕਾਯਸ੍ਸ ਨਾਮਂ. ਤਸ੍ਮਾ ਯਾ ਅਞ੍ਞਤ੍ਰ ਸੁਪਿਨਨ੍ਤਾ ਸਞ੍ਚੇਤਨਿਕਾ ਸੁਕ੍ਕਵਿਸ੍ਸਟ੍ਠਿ, ਅਯਂ ਸਙ੍ਘਾਦਿਸੇਸੋ ਨਾਮ ਆਪਤ੍ਤਿਨਿਕਾਯੋਤਿ ਏਵਮੇਤ੍ਥ ਸਮ੍ਬਨ੍ਧੋ ਵੇਦਿਤਬ੍ਬੋ. ਵਚਨਤ੍ਥੋ ਪਨੇਤ੍ਥ ਸਙ੍ਘੋ ਆਦਿਮ੍ਹਿ ਚੇਵ ਸੇਸੇ ਚ ਇਚ੍ਛਿਤਬ੍ਬੋ ਅਸ੍ਸਾਤਿ ਸਙ੍ਘਾਦਿਸੇਸੋ. ਕਿਂ ਵੁਤ੍ਤਂ ਹੋਤਿ? ਇਮਂ ਆਪਤ੍ਤਿਂ ਆਪਜ੍ਜਿਤ੍ਵਾ ਵੁਟ੍ਠਾਤੁਕਾਮਸ੍ਸ ਯਂ ਤਂ ਆਪਤ੍ਤਿਵੁਟ੍ਠਾਨਂ, ਤਸ੍ਸ ਆਦਿਮ੍ਹਿ ਚੇਵ ਪਰਿਵਾਸਦਾਨਤ੍ਥਾਯ ਆਦਿਤੋ ਸੇਸੇ ਚ ਮਜ੍ਝੇ ਮਾਨਤ੍ਤਦਾਨਤ੍ਥਾਯ ਮੂਲਾਯ ਪਟਿਕਸ੍ਸਨੇਨ ਵਾ ਸਹ ਮਾਨਤ੍ਤਦਾਨਤ੍ਥਾਯ ਅਵਸਾਨੇ ਅਬ੍ਭਾਨਤ੍ਥਾਯ ਸਙ੍ਘੋ ਇਚ੍ਛਿਤਬ੍ਬੋ. ਨ ਹੇਤ੍ਥ ਏਕਮ੍ਪਿ ਕਮ੍ਮਂ ਵਿਨਾ ਸਙ੍ਘੇਨ ਸਕ੍ਕਾ ਕਾਤੁਨ੍ਤਿ ਸਙ੍ਘੋ ਆਦਿਮ੍ਹਿ ਚੇਵ ਸੇਸੇ ਚ ਇਚ੍ਛਿਤਬ੍ਬੋ ਅਸ੍ਸਾਤਿ ਸਙ੍ਘਾਦਿਸੇਸੋਤਿ. ਬ੍ਯਞ੍ਜਨਂ ਪਨ ਅਨਾਦਿਯਿਤ੍ਵਾ ਅਤ੍ਥਮੇਵ ਦਸ੍ਸੇਤੁਂ ‘‘ਸਙ੍ਘੋਵ ਤਸ੍ਸਾ ਆਪਤ੍ਤਿਯਾ ਪਰਿਵਾਸਂ ਦੇਤਿ, ਮੂਲਾਯ ਪਟਿਕਸ੍ਸਤਿ, ਮਾਨਤ੍ਤਂ ਦੇਤਿ, ਅਬ੍ਭੇਤਿ ਨ ਸਮ੍ਬਹੁਲਾ ਨ ਏਕਪੁਗ੍ਗਲੋ, ਤੇਨ ਵੁਚ੍ਚਤਿ ਸਙ੍ਘਾਦਿਸੇਸੋ’’ਤਿ ਇਦਮਸ੍ਸ ਪਦਭਾਜਨਂ –
‘‘ਸਙ੍ਘਾਦਿਸੇਸੋਤਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;
ਸਙ੍ਘੋਵ ਦੇਤਿ ਪਰਿਵਾਸਂ, ਮੂਲਾਯ ਪਟਿਕਸ੍ਸਤਿ;
ਮਾਨਤ੍ਤਂ ਦੇਤਿ ਅਬ੍ਭੇਤਿ, ਤੇਨੇਤਂ ਇਤਿ ਵੁਚ੍ਚਤੀ’’ਤਿ. (ਪਰਿ. ੩੩੯) –
ਪਰਿਵਾਰੇ ਵਚਨਕਾਰਣਞ੍ਚ ਵੁਤ੍ਤਂ, ਤਤ੍ਥ ਪਰਿਵਾਸਦਾਨਾਦੀਨਿ ਸਮੁਚ੍ਚਯਕ੍ਖਨ੍ਧਕੇ ਵਿਤ੍ਥਾਰਤੋ ਆਗਤਾਨਿ, ਤਤ੍ਥੇਵ ਨੇਸਂ ਸਂਵਣ੍ਣਨਂ ਕਰਿਸ੍ਸਾਮ.
ਤਸ੍ਸੇਵ ਆਪਤ੍ਤਿਨਿਕਾਯਸ੍ਸਾਤਿ ਤਸ੍ਸ ਏਵ ਆਪਤ੍ਤਿਸਮੂਹਸ੍ਸ. ਤਤ੍ਥ ਕਿਞ੍ਚਾਪਿ ਅਯਂ ਏਕਾਵ ਆਪਤ੍ਤਿ, ਰੂਲ਼੍ਹਿਸਦ੍ਦੇਨ ਪਨ ਅਵਯਵੇ ਸਮੂਹਵੋਹਾਰੇਨ ਵਾ ‘‘ਨਿਕਾਯੋ’’ਤਿ ਵੁਤ੍ਤੋ – ‘‘ਏਕੋ ਵੇਦਨਾਕ੍ਖਨ੍ਧੋ, ਏਕੋ ਵਿਞ੍ਞਾਣਕ੍ਖਨ੍ਧੋ’’ਤਿਆਦੀਸੁ ਵਿਯ.
ਏਵਂ ਉਦ੍ਦਿਟ੍ਠਸਿਕ੍ਖਾਪਦਂ ਪਦਾਨੁਕ੍ਕਮੇਨ ਵਿਭਜਿਤ੍ਵਾ ਇਦਾਨਿ ਇਮਂ ਸੁਕ੍ਕਵਿਸ੍ਸਟ੍ਠਿਂ ਆਪਜ੍ਜਨ੍ਤਸ੍ਸ ਉਪਾਯਞ੍ਚ ਕਾਲਞ੍ਚ ਅਧਿਪ੍ਪਾਯਞ੍ਚ ਅਧਿਪ੍ਪਾਯਵਤ੍ਥੁਞ੍ਚ ਦਸ੍ਸੇਤੁਂ ‘‘ਅਜ੍ਝਤ੍ਤਰੂਪੇ ਮੋਚੇਤੀ’’ਤਿਆਦਿਮਾਹ. ਏਤ੍ਥ ਹਿ ਅਜ੍ਝਤ੍ਤਰੂਪਾਦੀਹਿ ਚਤੂਹਿ ਪਦੇਹਿ ਉਪਾਯੋ ਦਸ੍ਸਿਤੋ, ਅਜ੍ਝਤ੍ਤਰੂਪੇ ਵਾ ਮੋਚੇਯ੍ਯ ਬਹਿਦ੍ਧਾਰੂਪੇ ਵਾ ਉਭਯਤ੍ਥ ਵਾ ਆਕਾਸੇ ਵਾ ਕਟਿਂ ਕਮ੍ਪੇਨ੍ਤੋ, ਇਤੋ ਪਰਂ ਅਞ੍ਞੋ ਉਪਾਯੋ ਨਤ੍ਥਿ. ਤਤ੍ਥ ਰੂਪੇ ਘਟ੍ਟੇਤ੍ਵਾ ਮੋਚੇਨ੍ਤੋਪਿ ਰੂਪੇਨ ਘਟ੍ਟੇਤ੍ਵਾ ਮੋਚੇਨ੍ਤੋਪਿ ਰੂਪੇ ਮੋਚੇਤਿਚ੍ਚੇਵ ਵੇਦਿਤਬ੍ਬੋ. ਰੂਪੇ ਹਿ ਸਤਿ ਸੋ ਮੋਚੇਤਿ ਨ ਰੂਪਂ ਅਲਭਿਤ੍ਵਾ. ਰਾਗੂਪਤ੍ਥਮ੍ਭਾਦੀਹਿ ਪਨ ਪਞ੍ਚਹਿ ਕਾਲੋ ਦਸ੍ਸਿਤੋ. ਰਾਗੂਪਤ੍ਥਮ੍ਭਾਦਿਕਾਲੇਸੁ ਹਿ ਅਙ੍ਗਜਾਤਂ ਕਮ੍ਮਨਿਯਂ ਹੋਤਿ, ਯਸ੍ਸ ਕਮ੍ਮਨਿਯਤ੍ਤੇ ਸਤਿ ਮੋਚੇਤਿ. ਇਤੋ ਪਰਂ ਅਞ੍ਞੋ ਕਾਲੋ ਨਤ੍ਥਿ, ਨ ਹਿ ਵਿਨਾ ਰਾਗੂਪਤ੍ਥਮ੍ਭਾਦੀਹਿ ਪੁਬ੍ਬਣ੍ਹਾਦਯੋ ਕਾਲਭੇਦਾ ਮੋਚਨੇ ਨਿਮਿਤ੍ਤਂ ਹੋਨ੍ਤਿ.
ਆਰੋਗ੍ਯਤ੍ਥਾਯਾਤਿਆਦੀਹਿ ਦਸਹਿ ਅਧਿਪ੍ਪਾਯੋ ਦਸ੍ਸਿਤੋ, ਏਵਰੂਪੇਨ ਹਿ ਅਧਿਪ੍ਪਾਯਭੇਦੇਨ ਮੋਚੇਤਿ ਨ ਅਞ੍ਞਥਾ. ਨੀਲਾਦੀਹਿ ਪਨ ਦਸਹਿ ਨਵਮਸ੍ਸ ਅਧਿਪ੍ਪਾਯਸ੍ਸ ਵਤ੍ਥੁ ਦਸ੍ਸਿਤਂ, ਵੀਮਂਸਨ੍ਤੋ ਹਿ ਨੀਲਾਦੀਸੁ ਅਞ੍ਞਤਰਸ੍ਸ ਵਸੇਨ ਵੀਮਂਸਤਿ ਨ ਤੇਹਿ ਵਿਨਿਮੁਤ੍ਤਨ੍ਤਿ.
੨੩੮. ਇਤੋ ਪਰਂ ਪਨ ਇਮੇਸਂਯੇਵ ਅਜ੍ਝਤ੍ਤਰੂਪਾਦੀਨਂ ਪਦਾਨਂ ਪਕਾਸਨਤ੍ਥਂ ‘‘ਅਜ੍ਝਤ੍ਤਰੂਪੇਤਿ ਅਜ੍ਝਤ੍ਤਂ ਉਪਾਦਿਨ੍ਨੇ ਰੂਪੇ’’ਤਿਆਦਿ ਵੁਤ੍ਤਂ, ਤਤ੍ਥ ਅਜ੍ਝਤ੍ਤਂ ਉਪਾਦਿਨ੍ਨੇ ਰੂਪੇਤਿ ਅਤ੍ਤਨੋ ਹਤ੍ਥਾਦਿਭੇਦੇ ਰੂਪੇ. ਬਹਿਦ੍ਧਾ ਉਪਾਦਿਨ੍ਨੇਤਿ ਪਰਸ੍ਸ ਤਾਦਿਸੇਯੇਵ. ਅਨੁਪਾਦਿਨ੍ਨੇਤਿ ਤਾਲ਼ਚ੍ਛਿਦ੍ਦਾਦਿਭੇਦੇ. ਤਦੁਭਯੇਤਿ ਅਤ੍ਤਨੋ ਚ ਪਰਸ੍ਸ ਚ ਰੂਪੇ, ਉਭਯਘਟ੍ਟਨਵਸੇਨੇਤਂ ਵੁਤ੍ਤਂ. ਅਤ੍ਤਨੋ ਰੂਪੇਨ ਚ ਅਨੁਪਾਦਿਨ੍ਨਰੂਪੇਨ ਚ ਏਕਤੋ ਘਟ੍ਟਨੇਪਿ ਲਬ੍ਭਤਿ. ਆਕਾਸੇ ਵਾਯਮਨ੍ਤਸ੍ਸਾਤਿ ਕੇਨਚਿ ਰੂਪੇਨ ਅਘਟ੍ਟੇਤ੍ਵਾ ਆਕਾਸੇਯੇਵ ਕਟਿਕਮ੍ਪਨਪਯਓਗੇਨ ਅਙ੍ਗਜਾਤਂ ਚਾਲੇਨ੍ਤਸ੍ਸ.
ਰਾਗੂਪਤ੍ਥਮ੍ਭੇਤਿ ਰਾਗਸ੍ਸ ਬਲਵਭਾਵੇ, ਰਾਗੇਨ ਵਾ ਅਙ੍ਗਜਾਤਸ੍ਸ ਉਪਤ੍ਥਮ੍ਭੇ, ਥਦ੍ਧਭਾਵੇ ਸਞ੍ਜਾਤੇਤਿ ਵੁਤ੍ਤਂ ਹੋਤਿ. ਕਮ੍ਮਨਿਯਂ ਹੋਤੀਤਿ ਮੋਚਨਕਮ੍ਮਕ੍ਖਮਂ ਅਜ੍ਝਤ੍ਤਰੂਪਾਦੀਸੁ ਉਪਕ੍ਕਮਾਰਹਂ ਹੋਤਿ.
ਉਚ੍ਚਾਲਿਙ੍ਗਪਾਣਕਦਟ੍ਠੂਪਤ੍ਥਮ੍ਭੇਤਿ ਉਚ੍ਚਾਲਿਙ੍ਗਪਾਣਕਦਟ੍ਠੇਨ ਅਙ੍ਗਜਾਤੇ ਉਪਤ੍ਥਮ੍ਭੇ. ਉਚ੍ਚਾਲਿਙ੍ਗਪਾਣਕਾ ਨਾਮ ਲੋਮਸਪਾਣਕਾ ਹੋਨ੍ਤਿ, ਤੇਸਂ ਲੋਮੇਹਿ ਫੁਟ੍ਠਂ ਅਙ੍ਗਜਾਤਂ ਕਣ੍ਡੁਂ ਗਹੇਤ੍ਵਾ ਥਦ੍ਧਂ ਹੋਤਿ, ਤਤ੍ਥ ਯਸ੍ਮਾ ਤਾਨਿ ਲੋਮਾਨਿ ਅਙ੍ਗਜਾਤਂ ਡਂਸਨ੍ਤਾਨਿ ਵਿਯ ਵਿਜ੍ਝਨ੍ਤਿ, ਤਸ੍ਮਾ ‘‘ਉਚ੍ਚਾਲਿਙ੍ਗਪਾਣਕਦਟ੍ਠੇਨਾ’’ਤਿ ਵੁਤ੍ਤਂ, ਅਤ੍ਥਤੋ ਪਨ ਉਚ੍ਚਾਲਿਙ੍ਗਪਾਣਕਲੋਮਵੇਧਨੇਨਾਤਿ ਵੁਤ੍ਤਂ ਹੋਤਿ.
੨੩੯. ਅਰੋਗੋ ਭਵਿਸ੍ਸਾਮੀਤਿ ਮੋਚੇਤ੍ਵਾ ਅਰੋਗੋ ਭਵਿਸ੍ਸਾਮਿ. ਸੁਖਂ ਵੇਦਨਂ ਉਪ੍ਪਾਦੇਸ੍ਸਾਮੀਤਿ ਮੋਚਨੇਨ ਚ ਮੁਚ੍ਚਨੁਪ੍ਪਤ੍ਤਿਯਾ ਮੁਤ੍ਤਪਚ੍ਚਯਾ ਚ ਯਾ ਸੁਖਾ ਵੇਦਨਾ ਹੋਤਿ, ਤਂ ਉਪ੍ਪਾਦੇਸ੍ਸਾਮੀਤਿ ਅਤ੍ਥੋ. ਭੇਸਜ੍ਜਂ ਭਵਿਸ੍ਸਤੀਤਿ ਇਦਂ ਮੇ ਮੋਚਿਤਂ ਕਿਞ੍ਚਿਦੇਵ ਭੇਸਜ੍ਜਂ ਭਵਿਸ੍ਸਤਿ. ਦਾਨਂ ਦਸ੍ਸਾਮੀਤਿ ਮੋਚੇਤ੍ਵਾ ਕੀਟਕਿਪਿਲ੍ਲਿਕਾਦੀਨਂ ਦਾਨਂ ਦਸ੍ਸਾਮਿ. ਪੁਞ੍ਞਂ ਭਵਿਸ੍ਸਤੀਤਿ ਮੋਚੇਤ੍ਵਾ ਕੀਟਾਦੀਨਂ ਦੇਨ੍ਤਸ੍ਸ ਪੁਞ੍ਞਂ ਭਵਿਸ੍ਸਤਿ. ਯਞ੍ਞਂ ਯਜਿਸ੍ਸਾਮੀਤਿ ਮੋਚੇਤ੍ਵਾ ਕੀਟਾਦੀਨਂ ਯਞ੍ਞਂ ਯਜਿਸ੍ਸਾਮਿ. ਕਿਞ੍ਚਿ ਕਿਞ੍ਚਿ ਮਨ੍ਤਪਦਂ ਵਤ੍ਵਾ ਦਸ੍ਸਾਮੀਤਿ ਵੁਤ੍ਤਂ ਹੋਤਿ. ਸਗ੍ਗਂ ਗਮਿਸ੍ਸਾਮੀਤਿ ਮੋਚੇਤ੍ਵਾ ਕੀਟਾਦੀਨਂ ਦਿਨ੍ਨਦਾਨੇਨ ਵਾ ਪੁਞ੍ਞੇਨ ਵਾ ਯਞ੍ਞੇਨ ਵਾ ਸਗ੍ਗਂ ਗਮਿਸ੍ਸਾਮਿ. ਬੀਜਂ ਭਵਿਸ੍ਸਤੀਤਿ ਕੁਲਵਂਸਙ੍ਕੁਰਸ੍ਸ ਦਾਰਕਸ੍ਸ ਬੀਜਂ ਭਵਿਸ੍ਸਤਿ, ‘‘ਇਮਿਨਾ ਬੀਜੇਨ ਪੁਤ੍ਤੋ ਨਿਬ੍ਬਤ੍ਤਿਸ੍ਸਤੀ’’ਤਿ ਇਮਿਨਾ ਅਧਿਪ੍ਪਾਯੇਨ ਮੋਚੇਤੀਤਿ ਅਤ੍ਥੋ. ਵੀਮਂਸਤ੍ਥਾਯਾਤਿ ਜਾਨਨਤ੍ਥਾਯ. ਨੀਲਂ ਭਵਿਸ੍ਸਤੀਤਿਆਦੀਸੁ ਜਾਨਿਸ੍ਸਾਮਿ ਤਾਵ ਕਿਂ ਮੇ ਮੋਚਿਤਂ ਨੀਲਂ ਭਵਿਸ੍ਸਤਿ ਪੀਤਕਾਦੀਸੁ ਅਞ੍ਞਤਰਵਣ੍ਣਨ੍ਤਿ ਏਵਮਤ੍ਥੋ ਦਟ੍ਠਬ੍ਬੋ. ਖਿਡ੍ਡਾਧਿਪ੍ਪਾਯੋਤਿ ਖਿਡ੍ਡਾਪਸੁਤੋ, ਤੇਨ ਤੇਨ ਅਧਿਪ੍ਪਾਯੇਨ ਕੀਲ਼ਨ੍ਤੋ ਮੋਚੇਤੀਤਿ ਵੁਤ੍ਤਂ ਹੋਤਿ.
੨੪੦. ਇਦਾਨਿ ਯਦਿਦਂ ‘‘ਅਜ੍ਝਤ੍ਤਰੂਪੇ ਮੋਚੇਤੀ’’ਤਿਆਦਿ ਵੁਤ੍ਤਂ ਤਤ੍ਥ ਯਥਾ ਮੋਚੇਨ੍ਤੋ ਆਪਤ੍ਤਿਂ ਆਪਜ੍ਜਤਿ, ਤੇਸਞ੍ਚ ਪਦਾਨਂ ਵਸੇਨ ਯਤ੍ਤਕੋ ਆਪਤ੍ਤਿਭੇਦੋ ਹੋਤਿ, ਤਂ ਸਬ੍ਬਂ ਦਸ੍ਸੇਨ੍ਤੋ ‘‘ਅਜ੍ਝਤ੍ਤਰੂਪੇ ਚੇਤੇਤਿ ਉਪਕ੍ਕਮਤਿ ਮੁਚ੍ਚਤਿ ਆਪਤ੍ਤਿ ਸਙ੍ਘਾਦਿਸੇਸਸ੍ਸਾ’’ਤਿਆਦਿਮਾਹ.
ਤਤ੍ਥ ਚੇਤੇਤੀਤਿ ਮੋਚਨਸ੍ਸਾਦਸਮ੍ਪਯੁਤ੍ਤਾਯ ਚੇਤਨਾਯ ਮੁਚ੍ਚਤੂਤਿ ਚੇਤੇਤਿ. ਉਪਕ੍ਕਮਤੀਤਿ ਤਦਨੁਰੂਪਂ ਵਾਯਾਮਂ ਕਰੋਤਿ. ਮੁਚ੍ਚਤੀਤਿ ਏਵਂ ਚੇਤੇਨ੍ਤਸ੍ਸ ਤਦਨੁਰੂਪੇਨ ਵਾਯਾਮੇਨ ਵਾਯਮਤੋ ਸੁਕ੍ਕਂ ਠਾਨਾ ਚਵਤਿ. ਆਪਤ੍ਤਿ ਸਙ੍ਘਾਦਿਸੇਸਸ੍ਸਾਤਿ ਇਮੇਹਿ ਤੀਹਿ ਅਙ੍ਗੇਹਿ ਅਸ੍ਸ ਪੁਗ੍ਗਲਸ੍ਸ ਸਙ੍ਘਾਦਿਸੇਸੋ ਨਾਮ ਆਪਤ੍ਤਿਨਿਕਾਯੋ ਹੋਤੀਤਿ ਅਤ੍ਥੋ. ਏਸ ਨਯੋ ਬਹਿਦ੍ਧਾਰੂਪੇਤਿਆਦੀਸੁਪਿ ਅਵਸੇਸੇਸੁ ਅਟ੍ਠਵੀਸਤਿਯਾ ਪਦੇਸੁ.
ਏਤ੍ਥ ਪਨ ਦ੍ਵੇ ਆਪਤ੍ਤਿਸਹਸ੍ਸਾਨਿ ਨੀਹਰਿਤ੍ਵਾ ਦਸ੍ਸੇਤਬ੍ਬਾਨਿ. ਕਥਂ? ਅਜ੍ਝਤ੍ਤਰੂਪੇ ਤਾਵ ਰਾਗੂਪਤ੍ਥਮ੍ਭੇ ਆਰੋਗ੍ਯਤ੍ਥਾਯ ਨੀਲਂ ਮੋਚੇਨ੍ਤਸ੍ਸ ਏਕਾ ਆਪਤ੍ਤਿ, ਅਜ੍ਝਤ੍ਤਰੂਪੇਯੇਵ ਰਾਗੂਪਤ੍ਥਮ੍ਭੇ ਆਰੋਗ੍ਯਤ੍ਥਾਯ ਪੀਤਾਦੀਨਂ ਮੋਚਨਵਸੇਨ ਅਪਰਾ ਨਵਾਤਿ ਦਸ. ਯਥਾ ਚ ਆਰੋਗ੍ਯਤ੍ਥਾਯ ਦਸ, ਏਵਂ ਸੁਖਾਦੀਨਂ ਨਵਨ੍ਨਂ ਪਦਾਨਂ ਅਤ੍ਥਾਯ ਏਕੇਕਪਦੇ ਦਸ ਦਸ ਕਤ੍ਵਾ ਨਵੁਤਿ, ਇਤਿ ਇਮਾ ਚ ਨਵੁਤਿ ਪੁਰਿਮਾ ਚ ਦਸਾਤਿ ਰਾਗੂਪਤ੍ਥਮ੍ਭੇ ਤਾਵ ਸਤਂ. ਯਥਾ ਪਨ ਰਾਗੂਪਤ੍ਥਮ੍ਭੇ ਏਵਂ ਵਚ੍ਚੂਪਤ੍ਥਮ੍ਭਾਦੀਸੁਪਿ ਚਤੂਸੁ ਏਕੇਕਸ੍ਮਿਂ ਉਪਤ੍ਥਮ੍ਭੇ ਸਤਂ ਸਤਂ ਕਤ੍ਵਾ ਚਤ੍ਤਾਰਿ ਸਤਾਨਿ, ਇਤਿ ਇਮਾਨਿ ਚਤ੍ਤਾਰਿ ਪੁਰਿਮਞ੍ਚ ਏਕਨ੍ਤਿ ਅਜ੍ਝਤ੍ਤਰੂਪੇ ਤਾਵ ਪਞ੍ਚਨ੍ਨਂ ਉਪਤ੍ਥਮ੍ਭਾਨਂ ਵਸੇਨ ਪਞ੍ਚ ਸਤਾਨਿ. ਯਥਾ ਚ ਅਜ੍ਝਤ੍ਤਰੂਪੇ ਪਞ੍ਚ, ਏਵਂ ਬਹਿਦ੍ਧਾਰੂਪੇ ਪਞ੍ਚ, ਅਜ੍ਝਤ੍ਤਬਹਿਦ੍ਧਾਰੂਪੇ ਪਞ੍ਚ, ਆਕਾਸੇ ਕਟਿਂ ਕਮ੍ਪੇਨ੍ਤਸ੍ਸ ਪਞ੍ਚਾਤਿ ਸਬ੍ਬਾਨਿਪਿ ਚਤੁਨ੍ਨਂ ਪਞ੍ਚਕਾਨਂ ਵਸੇਨ ਦ੍ਵੇ ਆਪਤ੍ਤਿਸਹਸ੍ਸਾਨਿ ਵੇਦਿਤਬ੍ਬਾਨਿ.
ਇਦਾਨਿ ਆਰੋਗ੍ਯਤ੍ਥਾਯਾਤਿਆਦੀਸੁ ਤਾਵ ਦਸਸੁ ਪਦੇਸੁ ਪਟਿਪਾਟਿਯਾ ਵਾ ਉਪ੍ਪਟਿਪਾਟਿਯਾ ਵਾ ਹੇਟ੍ਠਾ ਵਾ ਗਹੇਤ੍ਵਾ ਉਪਰਿ ਗਣ੍ਹਨ੍ਤਸ੍ਸ, ਉਪਰਿ ਵਾ ਗਹੇਤ੍ਵਾ ਹੇਟ੍ਠਾ ਗਣ੍ਹਨ੍ਤਸ੍ਸ, ਉਭਤੋ ਵਾ ਗਹੇਤ੍ਵਾ ਮਜ੍ਝੇ ਠਪੇਨ੍ਤਸ੍ਸ, ਮਜ੍ਝੇ ਵਾ ਗਹੇਤ੍ਵਾ ਉਭਤੋ ਹਰਨ੍ਤਸ੍ਸ, ਸਬ੍ਬਮੂਲਂ ਵਾ ਕਤ੍ਵਾ ਗਣ੍ਹਨ੍ਤਸ੍ਸ ਚੇਤਨੂਪਕ੍ਕਮਮੋਚਨੇ ਸਤਿ ਵਿਸਙ੍ਕੇਤੋ ਨਾਮ ਨਤ੍ਥੀਤਿ ਦਸ੍ਸੇਤੁਂ ‘‘ਆਰੋਗ੍ਯਤ੍ਥਞ੍ਚ ਸੁਖਤ੍ਥਞ੍ਚਾ’’ਤਿ ਖਣ੍ਡਚਕ੍ਕਬਦ੍ਧਚਕ੍ਕਾਦਿਭੇਦਵਿਚਿਤ੍ਤਂ ਪਾਲ਼ਿਮਾਹ.
ਤਤ੍ਥ ਆਰੋਗ੍ਯਤ੍ਥਞ੍ਚ ਸੁਖਤ੍ਥਞ੍ਚ ਆਰੋਗ੍ਯਤ੍ਥਞ੍ਚ ਭੇਸਜ੍ਜਤ੍ਥਞ੍ਚਾ ਤਿ ਏਵਂ ਆਰੋਗ੍ਯਪਦਂ ਸਬ੍ਬਪਦੇਹਿ ਯੋਜੇਤ੍ਵਾ ਵੁਤ੍ਤਮੇਕਂ ਖਣ੍ਡਚਕ੍ਕਂ. ਸੁਖਪਦਾਦੀਨਿ ਸਬ੍ਬਪਦੇਹਿ ਯੋਜੇਤ੍ਵਾ ਯਾਵ ਅਤ੍ਤਨੋ ਅਤ੍ਤਨੋ ਅਤੀਤਾਨਨ੍ਤਰਪਦਂ ਤਾਵ ਆਨੇਤ੍ਵਾ ਵੁਤ੍ਤਾਨਿ ਨਵ ਬਦ੍ਧਚਕ੍ਕਾਨੀਤਿ ਏਵਂ ਏਕੇਕਮੂਲਕਾਨਿ ਦਸ ਚਕ੍ਕਾਨਿ ਹੋਨ੍ਤਿ, ਤਾਨਿ ਦੁਮੂਲਕਾਦੀਹਿ ਸਦ੍ਧਿਂ ਅਸਮ੍ਮੋਹਤੋ ਵਿਤ੍ਥਾਰੇਤ੍ਵਾ ਵੇਦਿਤਬ੍ਬਾਨਿ. ਅਤ੍ਥੋ ਪਨੇਤ੍ਥ ਪਾਕਟੋਯੇਵ.
ਯਥਾ ਚ ਆਰੋਗ੍ਯਤ੍ਥਾਯਾਤਿਆਦੀਸੁ ਦਸਸੁ ਪਦੇਸੁ, ਏਵਂ ਨੀਲਾਦੀਸੁਪਿ ‘‘ਨੀਲਞ੍ਚ ਪੀਤਕਞ੍ਚ ਚੇਤੇਤਿ ਉਪਕ੍ਕਮਤੀ’’ਤਿਆਦਿਨਾ ਨਯੇਨ ਦਸ ਚਕ੍ਕਾਨਿ ਵੁਤ੍ਤਾਨਿ, ਤਾਨਿਪਿ ਅਸਮ੍ਮੋਹਤੋ ਵਿਤ੍ਥਾਰੇਤ੍ਵਾ ਵੇਦਿਤਬ੍ਬਾਨਿ. ਅਤ੍ਥੋ ਪਨੇਤ੍ਥ ਪਾਕਟੋਯੇਵ.
ਪੁਨ ਆਰੋਗ੍ਯਤ੍ਥਞ੍ਚ ਨੀਲਞ੍ਚ ਆਰੋਗ੍ਯਤ੍ਥਞ੍ਚ ਸੁਖਤ੍ਥਞ੍ਚ ਨੀਲਞ੍ਚ ਪੀਤਕਞ੍ਚਾਤਿ ਏਕੇਨੇਕਂ ਦ੍ਵੀਹਿ ਦ੍ਵੇ…ਪੇ… ਦਸਹਿ ਦਸਾਤਿ ਏਵਂ ਪੁਰਿਮਪਦੇਹਿ ਸਦ੍ਧਿਂ ਪਚ੍ਛਿਮਪਦਾਨਿ ਯੋਜੇਤ੍ਵਾ ਏਕਂ ਮਿਸ੍ਸਕਚਕ੍ਕਂ ਵੁਤ੍ਤਂ.
ਇਦਾਨਿ ਯਸ੍ਮਾ ‘‘ਨੀਲਂ ਮੋਚੇਸ੍ਸਾਮੀ’’ਤਿ ਚੇਤੇਤ੍ਵਾ ਉਪਕ੍ਕਮਨ੍ਤਸ੍ਸ ਪੀਤਕਾਦੀਸੁ ਮੁਤ੍ਤੇਸੁਪਿ ਪੀਤਕਾਦਿਵਸੇਨ ਚੇਤੇਤ੍ਵਾ ਉਪਕ੍ਕਮਨ੍ਤਸ੍ਸ ਇਤਰੇਸੁ ਮੁਤ੍ਤੇਸੁਪਿ ਨੇਵਤ੍ਥਿ ਵਿਸਙ੍ਕੇਤੋ, ਤਸ੍ਮਾ ਏਤਮ੍ਪਿ ਨਯਂ ਦਸ੍ਸੇਤੁਂ ‘‘ਨੀਲਂ ਮੋਚੇਸ੍ਸਾਮੀਤਿ ਚੇਤੇਤਿ ਉਪਕ੍ਕਮਤਿ ਪੀਤਕਂ ਮੁਚ੍ਚਤੀ’’ਤਿਆਦਿਨਾ ਨਯੇਨ ਚਕ੍ਕਾਨਿ ਵੁਤ੍ਤਾਨਿ. ਤਤੋ ਪਰਂ ਸਬ੍ਬਪਚ੍ਛਿਮਪਦਂ ਨੀਲਾਦੀਹਿ ਨਵਹਿ ਪਦੇਹਿ ਸਦ੍ਧਿਂ ਯੋਜੇਤ੍ਵਾ ਕੁਚ੍ਛਿਚਕ੍ਕਂ ਨਾਮ ਵੁਤ੍ਤਂ. ਤਤੋ ਪੀਤਕਾਦੀਨਿ ਨਵ ਪਦਾਨਿ ਏਕੇਨ ਨੀਲਪਦੇਨੇਵ ਸਦ੍ਧਿਂ ਯੋਜੇਤ੍ਵਾ ਪਿਟ੍ਠਿਚਕ੍ਕਂ ਨਾਮ ਵੁਤ੍ਤਂ. ਤਤੋ ਲੋਹਿਤਕਾਦੀਨਿ ਨਵ ਪਦਾਨਿ ਏਕੇਨ ਪੀਤਕਪਦੇਨੇਵ ਸਦ੍ਧਿਂ ਯੋਜੇਤ੍ਵਾ ਦੁਤਿਯਂ ਪਿਟ੍ਠਿਚਕ੍ਕਂ ਵੁਤ੍ਤਂ. ਏਵਂ ਲੋਹਿਤਕਪਦਾਦੀਹਿ ਸਦ੍ਧਿਂ ਇਤਰਾਨਿ ਨਵ ਨਵ ਪਦਾਨਿ ਯੋਜੇਤ੍ਵਾ ਅਞ੍ਞਾਨਿਪਿ ਅਟ੍ਠ ਚਕ੍ਕਾਨਿ ਵੁਤ੍ਤਾਨੀਤਿ ਏਵਂ ਦਸਗਤਿਕਂ ਪਿਟ੍ਠਿਚਕ੍ਕਂ ਵੇਦਿਤਬ੍ਬਂ.
ਏਵਂ ਖਣ੍ਡਚਕ੍ਕਾਦੀਨਂ ਅਨੇਕੇਸਂ ਚਕ੍ਕਾਨਂ ਵਸੇਨ ਵਿਤ੍ਥਾਰਤੋ ਗਰੁਕਾਪਤ੍ਤਿਮੇਵ ਦਸ੍ਸੇਤ੍ਵਾ ਇਦਾਨਿ ਅਙ੍ਗਵਸੇਨੇਵ ਗਰੁਕਾਪਤ੍ਤਿਞ੍ਚ ਲਹੁਕਾਪਤ੍ਤਿਞ੍ਚ ਅਨਾਪਤ੍ਤਿਞ੍ਚ ਦਸ੍ਸੇਤੁਂ ‘‘ਚੇਤੇਤਿ ਉਪਕ੍ਕਮਤਿ ਮੁਚ੍ਚਤੀ’’ਤਿਆਦਿਮਾਹ. ਤਤ੍ਥ ਪੁਰਿਮਨਯੇਨ ਅਜ੍ਝਤ੍ਤਰੂਪਾਦੀਸੁ ਰਾਗਾਦਿਉਪਤ੍ਥਮ੍ਭੇ ਸਤਿ ਆਰੋਗ੍ਯਾਦੀਨਂ ਅਤ੍ਥਾਯ ਚੇਤੇਨ੍ਤਸ੍ਸ ਉਪਕ੍ਕਮਿਤ੍ਵਾ ਅਸੁਚਿਮੋਚਨੇ ਤਿਵਙ੍ਗਸਮ੍ਪਨ੍ਨਾ ਗਰੁਕਾਪਤ੍ਤਿ ਵੁਤ੍ਤਾ. ਦੁਤਿਯੇਨ ਨਯੇਨ ਚੇਤੇਨ੍ਤਸ੍ਸ ਉਪਕ੍ਕਮਨ੍ਤਸ੍ਸ ਚ ਮੋਚਨੇ ਅਸਤਿ ਦੁਵਙ੍ਗਸਮ੍ਪਨ੍ਨਾ ਲਹੁਕਾ ਥੁਲ੍ਲਚ੍ਚਯਾਪਤ੍ਤਿ. ‘‘ਚੇਤੇਤਿ ਨ ਉਪਕ੍ਕਮਤਿ ਮੁਚ੍ਚਤੀ’’ਤਿਆਦੀਹਿ ਛਹਿ ਨਯੇਹਿ ਅਨਾਪਤ੍ਤਿ.
ਅਯਂ ਪਨ ਆਪਤ੍ਤਾਨਾਪਤ੍ਤਿਭੇਦੋ ਸਣ੍ਹੋ ਸੁਖੁਮੋ, ਤਸ੍ਮਾ ਸੁਟ੍ਠੁ ਸਲ੍ਲਕ੍ਖੇਤਬ੍ਬੋ. ਸੁਟ੍ਠੁ ਸਲ੍ਲਕ੍ਖੇਤ੍ਵਾ ਕੁਕ੍ਕੁਚ੍ਚਂ ਪੁਚ੍ਛਿਤੇਨ ਆਪਤ੍ਤਿ ਵਾ ਅਨਾਪਤ੍ਤਿ ਵਾ ਆਚਿਕ੍ਖਿਤਬ੍ਬਾ, ਵਿਨਯਕਮ੍ਮਂ ਵਾ ਕਾਤਬ੍ਬਂ. ਅਸਲ੍ਲਕ੍ਖੇਤ੍ਵਾ ਕਰੋਨ੍ਤੋ ਹਿ ਰੋਗਨਿਦਾਨਂ ਅਜਾਨਿਤ੍ਵਾ ਭੇਸਜ੍ਜਂ ਕਰੋਨ੍ਤੋ ਵੇਜ੍ਜੋ ਵਿਯ ਵਿਘਾਤਞ੍ਚ ਆਪਜ੍ਜਤਿ, ਨ ਚ ਤਂ ਪੁਗ੍ਗਲਂ ਤਿਕਿਚ੍ਛਿਤੁਂ ਸਮਤ੍ਥੋ ਹੋਤਿ. ਤਤ੍ਰਾਯਂ ਸਲ੍ਲਕ੍ਖਣਵਿਧਿ – ਕੁਕ੍ਕੁਚ੍ਚੇਨ ਆਗਤੋ ਭਿਕ੍ਖੁ ਯਾਵਤਤਿਯਂ ਪੁਚ੍ਛਿਤਬ੍ਬੋ – ‘‘ਕਤਰੇਨ ਪਯੋਗੇਨ ਕਤਰੇਨ ਰਾਗੇਨ ਆਪਨ੍ਨੋਸੀ’’ਤਿ. ਸਚੇ ਪਠਮਂ ਅਞ੍ਞਂ ਵਤ੍ਵਾ ਪਚ੍ਛਾ ਅਞ੍ਞਂ ਵਦਤਿ ਨ ਏਕਮਗ੍ਗੇਨ ਕਥੇਤਿ, ਸੋ ਵਤ੍ਤਬ੍ਬੋ – ‘‘ਤ੍ਵਂ ਨ ਏਕਮਗ੍ਗੇਨ ਕਥੇਸਿ ਪਰਿਹਰਸਿ, ਨ ਸਕ੍ਕਾ ਤਵ ਵਿਨਯਕਮ੍ਮਂ ਕਾਤੁਂ ਗਚ੍ਛ ਸੋਤ੍ਥਿਂ ਗਵੇਸਾ’’ਤਿ. ਸਚੇ ਪਨ ਤਿਕ੍ਖਤ੍ਤੁਮ੍ਪਿ ਏਕਮਗ੍ਗੇਨੇਵ ਕਥੇਤਿ, ਯਥਾਭੂਤਂ ਅਤ੍ਤਾਨਂ ਆਵਿਕਰੋਤਿ, ਅਥਸ੍ਸ ਆਪਤ੍ਤਾਨਾਪਤ੍ਤਿਗਰੁਕਲਹੁਕਾਪਤ੍ਤਿਵਿਨਿਚ੍ਛਯਤ੍ਥਂ ਏਕਾਦਸਨ੍ਨਂ ਰਾਗਾਨਂ ਵਸੇਨ ਏਕਾਦਸ ਪਯੋਗਾ ਸਮਵੇਕ੍ਖਿਤਬ੍ਬਾ.
ਤਤ੍ਰਿਮੇ ਏਕਾਦਸ ਰਾਗਾ – ਮੋਚਨਸ੍ਸਾਦੋ, ਮੁਚ੍ਚਨਸ੍ਸਾਦੋ, ਮੁਤ੍ਤਸ੍ਸਾਦੋ, ਮੇਥੁਨਸ੍ਸਾਦੋ, ਫਸ੍ਸਸ੍ਸਾਦੋ, ਕਣ੍ਡੁਵਨਸ੍ਸਾਦੋ, ਦਸ੍ਸਨਸ੍ਸਾਦੋ, ਨਿਸਜ੍ਜਸ੍ਸਾਦੋ, ਵਾਚਸ੍ਸਾਦੋ, ਗੇਹਸ੍ਸਿਤਪੇਮਂ, ਵਨਭਙ੍ਗਿਯਨ੍ਤਿ. ਤਤ੍ਥ ਮੋਚੇਤੁਂ ਅਸ੍ਸਾਦੋ ਮੋਚਨਸ੍ਸਾਦੋ, ਮੁਚ੍ਚਨੇ ਅਸ੍ਸਾਦੋ ਮੁਚ੍ਚਨਸ੍ਸਾਦੋ, ਮੁਤ੍ਤੇ ਅਸ੍ਸਾਦੋ ਮੁਤ੍ਤਸ੍ਸਾਦੋ, ਮੇਥੁਨੇ ਅਸ੍ਸਾਦੋ ਮੇਥੁਨਸ੍ਸਾਦੋ, ਫਸ੍ਸੇ ਅਸ੍ਸਾਦੋ ਫਸ੍ਸਸ੍ਸਾਦੋ, ਕਣ੍ਡੁਵਨੇ ਅਸ੍ਸਾਦੋ ਕਣ੍ਡੁਵਨਸ੍ਸਾਦੋ, ਦਸ੍ਸਨੇ ਅਸ੍ਸਾਦੋ ਦਸ੍ਸਨਸ੍ਸਾਦੋ, ਨਿਸਜ੍ਜਾਯ ਅਸ੍ਸਾਦੋ ਨਿਸਜ੍ਜਸ੍ਸਾਦੋ, ਵਾਚਾਯ ਅਸ੍ਸਾਦੋ ਵਾਚਸ੍ਸਾਦੋ, ਗੇਹਸ੍ਸਿਤਂ ਪੇਮਂ ਗੇਹਸ੍ਸਿਤਪੇਮਂ, ਵਨਭਙ੍ਗਿਯਨ੍ਤਿ ਯਂਕਿਞ੍ਚਿ ਪੁਪ੍ਫਫਲਾਦਿ ਵਨਤੋ ਭਞ੍ਜਿਤ੍ਵਾ ਆਹਟਂ. ਏਤ੍ਥ ਚ ਨਵਹਿ ਪਦੇਹਿ ਸਮ੍ਪਯੁਤ੍ਤਅਸ੍ਸਾਦਸੀਸੇਨ ਰਾਗੋ ਵੁਤ੍ਤੋ. ਏਕੇਨ ਪਦੇਨ ਸਰੂਪੇਨੇਵ, ਏਕੇਨ ਪਦੇਨ ਵਤ੍ਥੁਨਾ ਵੁਤ੍ਤੋ, ਵਨਭਙ੍ਗੋ ਹਿ ਰਾਗਸ੍ਸ ਵਤ੍ਥੁ ਨ ਰਾਗੋਯੇਵ.
ਏਤੇਸਂ ਪਨ ਰਾਗਾਨਂ ਵਸੇਨ ਏਵਂ ਪਯੋਗਾ ਸਮਵੇਕ੍ਖਿਤਬ੍ਬਾ – ਮੋਚਨਸ੍ਸਾਦੇ ਮੋਚਨਸ੍ਸਾਦਚੇਤਨਾਯ ਚੇਤੇਨ੍ਤੋ ਚੇਵ ਅਸ੍ਸਾਦੇਨ੍ਤੋ ਚ ਉਪਕ੍ਕਮਤਿ ਮੁਚ੍ਚਤਿ ਸਙ੍ਘਾਦਿਸੇਸੋ. ਤਥੇਵ ਚੇਤੇਨ੍ਤੋ ਚ ਅਸ੍ਸਾਦੇਨ੍ਤੋ ਚ ਉਪਕ੍ਕਮਤਿ ਨ ਮੁਚ੍ਚਤਿ ਥੁਲ੍ਲਚ੍ਚਯਂ. ਸਚੇ ਪਨ ਸਯਨਕਾਲੇ ਰਾਗਪਰਿਯੁਟ੍ਠਿਤੋ ਹੁਤ੍ਵਾ ਊਰੁਨਾ ਵਾ ਮੁਟ੍ਠਿਨਾ ਵਾ ਅਙ੍ਗਜਾਤਂ ਗਾਲ਼੍ਹਂ ਪੀਲ਼ੇਤ੍ਵਾ ਮੋਚਨਤ੍ਥਾਯ ਸਉਸ੍ਸਾਹੋਵ ਸੁਪਤਿ, ਸੁਪਨ੍ਤਸ੍ਸ ਚਸ੍ਸ ਅਸੁਚਿ ਮੁਚ੍ਚਤਿ ਸਙ੍ਘਾਦਿਸੇਸੋ. ਸਚੇ ਰਾਗਪਰਿਯੁਟ੍ਠਾਨਂ ਅਸੁਭਮਨਸਿਕਾਰੇਨ ਵੂਪਸਮੇਤ੍ਵਾ ਸੁਦ੍ਧਚਿਤ੍ਤੋ ਸੁਪਤਿ, ਸੁਪਨ੍ਤਸ੍ਸ ਮੁਤ੍ਤੇਪਿ ਅਨਾਪਤ੍ਤਿ.
ਮੁਚ੍ਚਨਸ੍ਸਾਦੇ ਅਤ੍ਤਨੋ ਧਮ੍ਮਤਾਯ ਮੁਚ੍ਚਮਾਨਂ ਅਸ੍ਸਾਦੇਤਿ ਨ ਉਪਕ੍ਕਮਤਿ ਅਨਾਪਤ੍ਤਿ. ਸਚੇ ਪਨ ਮੁਚ੍ਚਮਾਨਂ ਅਸ੍ਸਾਦੇਨ੍ਤੋ ਉਪਕ੍ਕਮਤਿ, ਤੇਨ ਉਪਕ੍ਕਮੇਨ ਮੁਤ੍ਤੇ ਸਙ੍ਘਾਦਿਸੇਸੋ. ਅਤ੍ਤਨੋ ਧਮ੍ਮਤਾਯ ਮੁਚ੍ਚਮਾਨੇ ‘‘ਮਾ ਕਾਸਾਵਂ ਵਾ ਸੇਨਾਸਨਂ ਵਾ ਦੁਸ੍ਸੀ’’ਤਿ ਅਙ੍ਗਜਾਤਂ ਗਹੇਤ੍ਵਾ ਜਗ੍ਗਨਤ੍ਥਾਯ ਉਦਕਟ੍ਠਾਨਂ ਗਚ੍ਛਤਿ ਵਟ੍ਟਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ.
ਮੁਤ੍ਤਸ੍ਸਾਦੇ ਅਤ੍ਤਨੋ ਧਮ੍ਮਤਾਯ ਮੁਤ੍ਤੇ ਠਾਨਾ ਚੁਤੇ ਅਸੁਚਿਮ੍ਹਿ ਪਚ੍ਛਾ ਅਸ੍ਸਾਦੇਨ੍ਤਸ੍ਸ ਵਿਨਾ ਉਪਕ੍ਕਮੇਨ ਮੁਚ੍ਚਤਿ, ਅਨਾਪਤ੍ਤਿ. ਸਚੇ ਅਸ੍ਸਾਦੇਤ੍ਵਾ ਪੁਨ ਮੋਚਨਤ੍ਥਾਯ ਨਿਮਿਤ੍ਤੇ ਉਪਕ੍ਕਮਿਤ੍ਵਾ ਮੋਚੇਤਿ, ਸਙ੍ਘਾਦਿਸੇਸੋ.
ਮੇਥੁਨਸ੍ਸਾਦੇ ਮੇਥੁਨਰਾਗੇਨ ਮਾਤੁਗਾਮਂ ਗਣ੍ਹਾਤਿ, ਤੇਨ ਪਯੋਗੇਨ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ. ਮੇਥੁਨਧਮ੍ਮਸ੍ਸ ਪਯੋਗਤ੍ਤਾ ਪਨ ਤਾਦਿਸੇ ਗਹਣੇ ਦੁਕ੍ਕਟਂ, ਸੀਸਂ ਪਤ੍ਤੇ ਪਾਰਾਜਿਕਂ. ਸਚੇ ਮੇਥੁਨਰਾਗੇਨ ਰਤ੍ਤੋ ਪੁਨ ਅਸ੍ਸਾਦੇਤ੍ਵਾ ਮੋਚਨਤ੍ਥਾਯ ਨਿਮਿਤ੍ਤੇ ਉਪਕ੍ਕਮਿਤ੍ਵਾ ਮੋਚੇਤਿ, ਸਙ੍ਘਾਦਿਸੇਸੋ.
ਫਸ੍ਸਸ੍ਸਾਦੇ ਦੁਵਿਧੋ ਫਸ੍ਸੋ – ਅਜ੍ਝਤ੍ਤਿਕੋ, ਬਾਹਿਰੋ ਚ. ਅਜ੍ਝਤ੍ਤਿਕੇ ਤਾਵ ਅਤ੍ਤਨੋ ਨਿਮਿਤ੍ਤਂ ਥਦ੍ਧਂ ਮੁਦੁਕਨ੍ਤਿ ਜਾਨਿਸ੍ਸਾਮੀਤਿ ਵਾ ਲੋਲਭਾਵੇਨ ਵਾ ਕੀਲ਼ਾਪਯਤੋ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ. ਸਚੇ ਕੀਲ਼ਾਪੇਨ੍ਤੋ ਅਸ੍ਸਾਦੇਤ੍ਵਾ ਮੋਚਨਤ੍ਥਾਯ ਨਿਮਿਤ੍ਤੇ ਉਪਕ੍ਕਮਿਤ੍ਵਾ ਮੋਚੇਤਿ, ਸਙ੍ਘਾਦਿਸੇਸੋ. ਬਾਹਿਰਫਸ੍ਸੇ ਪਨ ਕਾਯਸਂਸਗ੍ਗਰਾਗੇਨ ਮਾਤੁਗਾਮਸ੍ਸ ਅਙ੍ਗਮਙ੍ਗਾਨਿ ਪਰਾਮਸਤੋ ਚੇਵ ਆਲਿਙ੍ਗਤੋ ਚ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ. ਕਾਯਸਂਸਗ੍ਗਸਙ੍ਘਾਦਿਸੇਸਂ ਪਨ ਆਪਜ੍ਜਤਿ. ਸਚੇ ਕਾਯਸਂਸਗ੍ਗਰਾਗੇਨ ਰਤ੍ਤੋ ਪੁਨ ਅਸ੍ਸਾਦੇਤ੍ਵਾ ਮੋਚਨਤ੍ਥਾਯ ਨਿਮਿਤ੍ਤੇ ਉਪਕ੍ਕਮਿਤ੍ਵਾ ਮੋਚੇਤਿ ਵਿਸਟ੍ਠਿਪਚ੍ਚਯਾਪਿ ਸਙ੍ਘਾਦਿਸੇਸੋ.
ਕਣ੍ਡੁਵਨਸ੍ਸਾਦੇ ਦਦ੍ਦੁਕਚ੍ਛੁਪਿਲ਼ਕਪਾਣਕਾਦੀਨਂ ਅਞ੍ਞਤਰਵਸੇਨ ਕਣ੍ਡੁਵਮਾਨਂ ਨਿਮਿਤ੍ਤਂ ਕਣ੍ਡੁਵਨਸ੍ਸਾਦੇ ਨੇਵ ਕਣ੍ਡੁਵਤੋ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ. ਕਣ੍ਡੁਵਨਸ੍ਸਾਦੇਨ ਰਤ੍ਤੋ ਪੁਨ ਅਸ੍ਸਾਦੇਤ੍ਵਾ ਮੋਚਨਤ੍ਥਾਯ ਨਿਮਿਤ੍ਤੇ ਉਪਕ੍ਕਮਿਤ੍ਵਾ ਮੋਚੇਤਿ, ਸਙ੍ਘਾਦਿਸੇਸੋ.
ਦਸ੍ਸਨਸ੍ਸਾਦੇ ਦਸ੍ਸਨਸ੍ਸਾਦੇਨ ਪੁਨਪ੍ਪੁਨਂ ਮਾਤੁਗਾਮਸ੍ਸ ਅਨੋਕਾਸਂ ਉਪਨਿਜ੍ਝਾਯਤੋ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ. ਮਾਤੁਗਾਮਸ੍ਸ ਅਨੋਕਾਸੁਪਨਿਜ੍ਝਾਨੇ ਪਨ ਦੁਕ੍ਕਟਂ. ਸਚੇ ਦਸ੍ਸਨਸ੍ਸਾਦੇਨ ਰਤ੍ਤੋ ਪੁਨ ਅਸ੍ਸਾਦੇਤ੍ਵਾ ਮੋਚਨਤ੍ਥਾਯ ਨਿਮਿਤ੍ਤੇ ਉਪਕ੍ਕਮਿਤ੍ਵਾ ਮੋਚੇਤਿ, ਸਙ੍ਘਾਦਿਸੇਸੋ.
ਨਿਸਜ੍ਜਸ੍ਸਾਦੇ ਮਾਤੁਗਾਮੇਨ ਸਦ੍ਧਿਂ ਰਹੋ ਨਿਸਜ੍ਜਸ੍ਸਾਦਰਾਗੇਨ ਨਿਸਿਨ੍ਨਸ੍ਸ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ. ਰਹੋ ਨਿਸਜ੍ਜਪਚ੍ਚਯਾ ਪਨ ਆਪਨ੍ਨਾਯ ਆਪਤ੍ਤਿਯਾ ਕਾਰੇਤਬ੍ਬੋ. ਸਚੇ ਨਿਸਜ੍ਜਸ੍ਸਾਦੇਨ ਰਤ੍ਤੋ ਪੁਨ ਅਸ੍ਸਾਦੇਤ੍ਵਾ ਮੋਚਨਤ੍ਥਾਯ ਨਿਮਿਤ੍ਤੇ ਉਪਕ੍ਕਮਿਤ੍ਵਾ ਮੋਚੇਤਿ, ਸਙ੍ਘਾਦਿਸੇਸੋ.
ਵਾਚਸ੍ਸਾਦੇ ਵਾਚਸ੍ਸਾਦਰਾਗੇਨ ਮਾਤੁਗਾਮਂ ਮੇਥੁਨਸਨ੍ਨਿਸ੍ਸਿਤਾਹਿ ਵਾਚਾਹਿ ਓਭਾਸਨ੍ਤਸ੍ਸ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ. ਦੁਟ੍ਠੁਲ੍ਲਵਾਚਾਸਙ੍ਘਾਦਿਸੇਸਂ ਪਨ ਆਪਜ੍ਜਤਿ. ਸਚੇ ਵਾਚਸ੍ਸਾਦੇਨ ਰਤ੍ਤੋ ਪੁਨ ਅਸ੍ਸਾਦੇਤ੍ਵਾ ਮੋਚਨਤ੍ਥਾਯ ਨਿਮਿਤ੍ਤੇ ਉਪਕ੍ਕਮਿਤ੍ਵਾ ਮੋਚੇਤਿ, ਸਙ੍ਘਾਦਿਸੇਸੋ.
ਗੇਹਸ੍ਸਿਤਪੇਮੇ ਮਾਤਰਂ ਵਾ ਮਾਤੁਪੇਮੇਨ ਭਗਿਨਿਂ ਵਾ ਭਗਿਨਿਪੇਮੇਨ ਪੁਨਪ੍ਪੁਨਂ ਪਰਾਮਸਤੋ ਚੇਵ ਆਲਿਙ੍ਗਤੋ ਚ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ. ਗੇਹਸ੍ਸਿਤਪੇਮੇਨ ਪਨ ਫੁਸਨਪਚ੍ਚਯਾ ਦੁਕ੍ਕਟਂ. ਸਚੇ ਗੇਹਸ੍ਸਿਤਪੇਮੇਨ ਰਤ੍ਤੋ ਪੁਨ ਅਸ੍ਸਾਦੇਤ੍ਵਾ ਮੋਚਨਤ੍ਥਾਯ ਨਿਮਿਤ੍ਤੇ ਉਪਕ੍ਕਮਿਤ੍ਵਾ ਮੋਚੇਤਿ, ਸਙ੍ਘਾਦਿਸੇਸੋ.
ਵਨਭਙ੍ਗੇ ਇਤ੍ਥਿਪੁਰਿਸਾ ਅਞ੍ਞਮਞ੍ਞਂ ਕਿਞ੍ਚਿਦੇਵ ਤਮ੍ਬੂਲਗਨ੍ਧਪੁਪ੍ਫਵਾਸਾਦਿਪ੍ਪਕਾਰਂ ਪਣ੍ਣਾਕਾਰਂ ਮਿਤ੍ਤਸਨ੍ਥਵਭਾਵਸ੍ਸ ਦਲ਼੍ਹਭਾਵਤ੍ਥਾਯ ਪੇਸੇਨ੍ਤਿ ਅਯਂ ਵਨਭਙ੍ਗੋ ਨਾਮ. ਤਞ੍ਚੇ ਮਾਤੁਗਾਮੋ ਕਸ੍ਸਚਿ ਸਂਸਟ੍ਠਵਿਹਾਰਿਕਸ੍ਸ ਕੁਲੂਪਕਭਿਕ੍ਖੁਨੋ ਪੇਸੇਤਿ, ਤਸ੍ਸ ਚ ‘‘ਅਸੁਕਾਯ ਨਾਮ ਇਦਂ ਪੇਸਿਤ’’ਨ੍ਤਿ ਸਾਰਤ੍ਤਸ੍ਸ ਪੁਨਪ੍ਪੁਨਂ ਹਤ੍ਥੇਹਿ ਤਂ ਵਨਭਙ੍ਗਂ ਕੀਲ਼ਾਪਯਤੋ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ. ਸਚੇ ਵਨਭਙ੍ਗੇ ਸਾਰਤ੍ਤੋ ਪੁਨ ਅਸ੍ਸਾਦੇਤ੍ਵਾ ਮੋਚਨਤ੍ਥਾਯ ਨਿਮਿਤ੍ਤੇ ਉਪਕ੍ਕਮਿਤ੍ਵਾ ਮੋਚੇਤਿ, ਸਙ੍ਘਾਦਿਸੇਸੋ. ਸਚੇ ਉਪਕ੍ਕਮਨ੍ਤੇਪਿ ਨ ਮੁਚ੍ਚਤਿ, ਥੁਲ੍ਲਚ੍ਚਯਂ.
ਏਵਮੇਤੇਸਂ ਏਕਾਦਸਨ੍ਨਂ ਰਾਗਾਨਂ ਵਸੇਨ ਇਮੇ ਏਕਾਦਸ ਪਯੋਗੇ ਸਮੇਵੇਕ੍ਖਿਤ੍ਵਾ ਆਪਤ੍ਤਿ ਵਾ ਅਨਾਪਤ੍ਤਿ ਵਾ ਸਲ੍ਲਕ੍ਖੇਤਬ੍ਬਾ. ਸਲ੍ਲਕ੍ਖੇਤ੍ਵਾ ਸਚੇ ਗਰੁਕਾ ਹੋਤਿ ‘‘ਗਰੁਕਾ’’ਤਿ ਆਚਿਕ੍ਖਿਤਬ੍ਬਾ. ਸਚੇ ਲਹੁਕਾ ਹੋਤਿ ‘‘ਲਹੁਕਾ’’ਤਿ ਆਚਿਕ੍ਖਿਤਬ੍ਬਾ. ਤਦਨੁਰੂਪਞ੍ਚ ਵਿਨਯਕਮ੍ਮਂ ਕਾਤਬ੍ਬਂ. ਏਵਞ੍ਹਿ ਕਤਂ ਸੁਕਤਂ ਹੋਤਿ ਰੋਗਨਿਦਾਨਂ ਞਤ੍ਵਾ ਵੇਜ੍ਜੇਨ ਕਤਭੇਸਜ੍ਜਮਿਵ, ਤਸ੍ਸ ਚ ਪੁਗ੍ਗਲਸ੍ਸ ਸੋਤ੍ਥਿਭਾਵਾਯ ਸਂਵਤ੍ਤਤਿ.
੨੬੨. ਚੇਤੇਤਿ ਨ ਉਪਕ੍ਕਮਤੀਤਿਆਦੀਸੁ ਮੋਚਨਸ੍ਸਾਦਚੇਤਨਾਯ ਚੇਤੇਤਿ, ਨ ਉਪਕ੍ਕਮਤਿ, ਮੁਚ੍ਚਤਿ, ਅਨਾਪਤ੍ਤਿ. ਮੋਚਨਸ੍ਸਾਦਪੀਲ਼ਿਤੋ ‘‘ਅਹੋ ਵਤ ਮੁਚ੍ਚੇਯ੍ਯਾ’’ਤਿ ਚੇਤੇਤਿ, ਨ ਉਪਕ੍ਕਮਤਿ, ਨ ਮੁਚ੍ਚਤਿ, ਅਨਾਪਤ੍ਤਿ. ਮੋਚਨਸ੍ਸਾਦੇਨ ਨ ਚੇਤੇਤਿ, ਫਸ੍ਸਸ੍ਸਾਦੇਨ ਕਣ੍ਡੁਵਨਸ੍ਸਾਦੇਨ ਵਾ ਉਪਕ੍ਕਮਤਿ, ਮੁਚ੍ਚਤਿ, ਅਨਾਪਤ੍ਤਿ. ਤਥੇਵ ਨ ਚੇਤੇਤਿ, ਉਪਕ੍ਕਮਤਿ, ਨ ਮੁਚ੍ਚਤਿ, ਅਨਾਪਤ੍ਤਿ. ਕਾਮਵਿਤਕ੍ਕਂ ਵਿਤਕ੍ਕੇਨ੍ਤੋ ਮੋਚਨਤ੍ਥਾਯ ਨ ਚੇਤੇਤਿ, ਨ ਉਪਕ੍ਕਮਤਿ, ਮੁਚ੍ਚਤਿ, ਅਨਾਪਤ੍ਤਿ. ਸਚੇ ਪਨਸ੍ਸ ਵਿਤਕ੍ਕਯਤੋਪਿ ਨ ਮੁਚ੍ਚਤਿ ਇਦਂ ਆਗਤਮੇਵ ਹੋਤਿ, ‘‘ਨ ਚੇਤੇਤਿ, ਨ ਉਪਕ੍ਕਮਤਿ, ਨ ਮੁਚ੍ਚਤਿ, ਅਨਾਪਤ੍ਤੀ’’ਤਿ.
ਅਨਾਪਤ੍ਤਿ ਸੁਪਿਨਨ੍ਤੇਨਾਤਿ ਸੁਤ੍ਤਸ੍ਸ ਸੁਪਿਨੇ ਮੇਥੁਨਂ ਧਮ੍ਮਂ ਪਟਿਸੇਵਨ੍ਤਸ੍ਸ ਵਿਯ ਕਾਯਸਂਸਗ੍ਗਾਦੀਨਿ ਆਪਜ੍ਜਨ੍ਤਸ੍ਸ ਵਿਯ ਸੁਪਿਨਨ੍ਤੇਨੇਵ ਕਾਰਣੇਨ ਯਸ੍ਸ ਅਸੁਚਿ ਮੁਚ੍ਚਤਿ, ਤਸ੍ਸ ਅਨਾਪਤ੍ਤਿ. ਸੁਪਿਨੇ ਪਨ ਉਪ੍ਪਨ੍ਨਾਯ ਅਸ੍ਸਾਦਚੇਤਨਾਯ ਸਚਸ੍ਸ ਵਿਸਯੋ ਹੋਤਿ, ਨਿਚ੍ਚਲੇਨ ਭਵਿਤਬ੍ਬਂ, ਨ ਹਤ੍ਥੇਨ ਨਿਮਿਤ੍ਤਂ ਕੀਲ਼ਾਪੇਤਬ੍ਬਂ, ਕਾਸਾਵਪਚ੍ਚਤ੍ਥਰਣਰਕ੍ਖਣਤ੍ਥਂ ਪਨ ਹਤ੍ਥਪੁਟੇਨ ਗਹੇਤ੍ਵਾ ਜਗ੍ਗਨਤ੍ਥਾਯ ਉਦਕਟ੍ਠਾਨਂ ਗਨ੍ਤੁਂ ਵਟ੍ਟਤਿ.
ਨਮੋਚਨਾਧਿਪ੍ਪਾਯਸ੍ਸਾਤਿ ਯਸ੍ਸ ਭੇਸਜ੍ਜੇਨ ਵਾ ਨਿਮਿਤ੍ਤਂ ਆਲਿਮ੍ਪਨ੍ਤਸ੍ਸ ਉਚ੍ਚਾਰਾਦੀਨਿ ਵਾ ਕਰੋਨ੍ਤਸ੍ਸ ਨਮੋਚਨਾਧਿਪ੍ਪਾਯਸ੍ਸ ਮੁਚ੍ਚਤਿ, ਤਸ੍ਸਾਪਿ ਅਨਾਪਤ੍ਤਿ. ਉਮ੍ਮਤ੍ਤਕਸ੍ਸ ਦੁਵਿਧਸ੍ਸਾਪਿ ਅਨਾਪਤ੍ਤਿ. ਇਧ ਸੇਯ੍ਯਸਕੋ ਆਦਿਕਮ੍ਮਿਕੋ, ਤਸ੍ਸ ਅਨਾਪਤ੍ਤਿ ਆਦਿਕਮ੍ਮਿਕਸ੍ਸਾਤਿ.
ਪਦਭਾਜਨੀਯਵਣ੍ਣਨਾ ਨਿਟ੍ਠਿਤਾ.
ਸਮੁਟ੍ਠਾਨਾਦੀਸੁ ਇਦਂ ਸਿਕ੍ਖਾਪਦਂ ਪਠਮਪਾਰਾਜਿਕਸਮੁਟ੍ਠਾਨਂ ਕਾਯਚਿਤ੍ਤਤੋ ਸਮੁਟ੍ਠਾਤਿ. ਕਿਰਿਯਾ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਅਕੁਸਲਚਿਤ੍ਤਂ, ਦ੍ਵਿਵੇਦਨਂ, ਸੁਖਮਜ੍ਝਤ੍ਤਦ੍ਵਯੇਨਾਤਿ.
੨੬੩. ਵਿਨੀਤਵਤ੍ਥੂਸੁ ਸੁਪਿਨਵਤ੍ਥੁ ਅਨੁਪਞ੍ਞਤ੍ਤਿਯਂ ਵੁਤ੍ਤਨਯਮੇਵ. ਉਚ੍ਚਾਰਪਸ੍ਸਾਵਵਤ੍ਥੂਨਿ ਉਤ੍ਤਾਨਤ੍ਥਾਨੇਵ.
ਵਿਤਕ੍ਕਵਤ੍ਥੁਸ੍ਮਿਂ ਕਾਮਵਿਤਕ੍ਕਨ੍ਤਿ ਗੇਹਸ੍ਸਿਤਕਾਮਵਿਤਕ੍ਕਂ. ਤਤ੍ਥ ਕਿਞ੍ਚਾਪਿ ਅਨਾਪਤ੍ਤਿ ਵੁਤ੍ਤਾ, ਅਥ ਖੋ ਵਿਤਕ੍ਕਗਤਿਕੇਨ ਨ ਭਵਿਤਬ੍ਬਂ. ਉਣ੍ਹੋਦਕਵਤ੍ਥੂਸੁ ਪਠਮਂ ਉਤ੍ਤਾਨਮੇਵ. ਦੁਤਿਯੇ ਸੋ ਭਿਕ੍ਖੁ ਮੋਚੇਤੁਕਾਮੋ ਉਣ੍ਹੋਦਕੇਨ ਨਿਮਿਤ੍ਤਂ ਪਹਰਿਤ੍ਵਾ ਪਹਰਿਤ੍ਵਾ ਨ੍ਹਾਯਿ, ਤੇਨਸ੍ਸ ਆਪਤ੍ਤਿ ਵੁਤ੍ਤਾ. ਤਤਿਯੇ ਉਪਕ੍ਕਮਸ੍ਸ ਅਤ੍ਥਿਤਾਯ ਥੁਲ੍ਲਚ੍ਚਯਂ. ਭੇਸਜ੍ਜਕਣ੍ਡੁਵਨਵਤ੍ਥੂਨਿ ਉਤ੍ਤਾਨਤ੍ਥਾਨੇਵ.
੨੬੪. ਮਗ੍ਗਵਤ੍ਥੂਸੁ ਪਠਮਸ੍ਸ ਥੁਲਊਰੁਕਸ੍ਸ ਮਗ੍ਗਂ ਗਚ੍ਛਨ੍ਤਸ੍ਸ ਸਮ੍ਬਾਧਟ੍ਠਾਨੇ ਘਟ੍ਟਨਾਯ ਅਸੁਚਿ ਮੁਚ੍ਚਿ, ਤਸ੍ਸ ਨਮੋਚਨਾਧਿਪ੍ਪਾਯਤ੍ਤਾ ਅਨਾਪਤ੍ਤਿ. ਦੁਤਿਯਸ੍ਸ ਤਥੇਵ ਮੁਚ੍ਚਿ, ਮੋਚਨਾਧਿਪ੍ਪਾਯਤ੍ਤਾ ਪਨ ਸਙ੍ਘਾਦਿਸੇਸੋ. ਤਤਿਯਸ੍ਸ ਨ ਮੁਚ੍ਚਿ, ਉਪਕ੍ਕਮਸਬ੍ਭਾਵਤੋ ਪਨ ਥੁਲ੍ਲਚ੍ਚਯਂ. ਤਸ੍ਮਾ ਮਗ੍ਗਂ ਗਚ੍ਛਨ੍ਤੇਨ ਉਪ੍ਪਨ੍ਨੇ ਪਰਿਲ਼ਾਹੇ ਨ ਗਨ੍ਤਬ੍ਬਂ, ਗਮਨਂ ਉਪਚ੍ਛਿਨ੍ਦਿਤ੍ਵਾ ਅਸੁਭਾਦਿਮਨਸਿਕਾਰੇਨ ਚਿਤ੍ਤਂ ਵੂਪਸਮੇਤ੍ਵਾ ਸੁਦ੍ਧਚਿਤ੍ਤੇਨ ਕਮ੍ਮਟ੍ਠਾਨਂ ਆਦਾਯ ਗਨ੍ਤਬ੍ਬਂ. ਸਚੇ ਠਿਤੋ ਵਿਨੋਦੇਤੁਂ ਨ ਸਕ੍ਕੋਤਿ, ਮਗ੍ਗਾ ਓਕ੍ਕਮ੍ਮ ਨਿਸੀਦਿਤ੍ਵਾ ਵਿਨੋਦੇਤ੍ਵਾ ਕਮ੍ਮਟ੍ਠਾਨਂ ਆਦਾਯ ਸੁਦ੍ਧਚਿਤ੍ਤੇਨੇਵ ਗਨ੍ਤਬ੍ਬਂ.
ਵਤ੍ਥਿਵਤ੍ਥੂਸੁ ਤੇ ਭਿਕ੍ਖੂ ਵਤ੍ਥਿਂ ਦਲ਼੍ਹਂ ਗਹੇਤ੍ਵਾ ਪੂਰੇਤ੍ਵਾ ਪੂਰੇਤ੍ਵਾ ਵਿਸ੍ਸਜ੍ਜੇਨ੍ਤਾ ਗਾਮਦਾਰਕਾ ਵਿਯ ਪਸ੍ਸਾਵਮਕਂਸੁ. ਜਨ੍ਤਾਘਰਵਤ੍ਥੁਸ੍ਮਿਂ ਉਦਰਂ ਤਾਪੇਨ੍ਤਸ੍ਸ ਮੋਚਨਾਧਿਪ੍ਪਾਯਸ੍ਸਾਪਿ ਅਮੋਚਨਾਧਿਪ੍ਪਾਯਸ੍ਸਾਪਿ ਮੁਤ੍ਤੇ ਅਨਾਪਤ੍ਤਿਯੇਵ. ਪਰਿਕਮ੍ਮਂ ਕਰੋਨ੍ਤਸ੍ਸ ਨਿਮਿਤ੍ਤਚਾਲਨਵਸੇਨ ਅਸੁਚਿ ਮੁਚ੍ਚਿ, ਤਸ੍ਮਾ ਆਪਤ੍ਤਿਟ੍ਠਾਨੇ ਆਪਤ੍ਤਿ ਵੁਤ੍ਤਾ.
੨੬੫. ਊਰੁਘਟ੍ਟਾਪਨਵਤ੍ਥੂਸੁ ਯੇਸਂ ਆਪਤ੍ਤਿ ਵੁਤ੍ਤਾ ਤੇ ਅਙ੍ਗਜਾਤਮ੍ਪਿ ਫੁਸਾਪੇਸੁਨ੍ਤਿ ਵੇਦਿਤਬ੍ਬਾਤਿ ਏਵਂ ਕੁਰੁਨ੍ਦਟ੍ਠਕਥਾਯਂ ਵੁਤ੍ਤਂ. ਸਾਮਣੇਰਾਦਿਵਤ੍ਥੂਨਿ ਉਤ੍ਤਾਨਤ੍ਥਾਨੇਵ.
੨੬੬. ਕਾਯਤ੍ਥਮ੍ਭਨਵਤ੍ਥੁਸ੍ਮਿਂ ਕਾਯਂ ਥਮ੍ਭੇਨ੍ਤਸ੍ਸਾਤਿ ਚਿਰਂ ਨਿਸੀਦਿਤ੍ਵਾ ਵਾ ਨਿਪਜ੍ਜਿਤ੍ਵਾ ਵਾ ਨਵਕਮ੍ਮਂ ਵਾ ਕਤ੍ਵਾ ਆਲਸਿਯਵਿਮੋਚਨਤ੍ਥਂ ਵਿਜਮ੍ਭੇਨ੍ਤਸ੍ਸ.
ਉਪਨਿਜ੍ਝਾਯਨਵਤ੍ਥੁਸ੍ਮਿਂ ਸਚੇਪਿ ਪਟਸਤਂ ਨਿਵਤ੍ਥਾ ਹੋਤਿ ਪੁਰਤੋ ਵਾ ਪਚ੍ਛਤੋ ਵਾ ਠਤ੍ਵਾ ‘‘ਇਮਸ੍ਮਿਂ ਨਾਮ ਓਕਾਸੇ ਨਿਮਿਤ੍ਤ’’ਨ੍ਤਿ ਉਪਨਿਜ੍ਝਾਯਨ੍ਤਸ੍ਸ ਦੁਕ੍ਕਟਮੇਵ. ਅਨਿਵਤ੍ਥਾਨਂ ਗਾਮਦਾਰਿਕਾਨਂ ਨਿਮਿਤ੍ਤਂ ਉਪਨਿਜ੍ਝਾਯਨ੍ਤਸ੍ਸ ਪਨ ਕਿਮੇਵ ਵਤ੍ਤਬ੍ਬਂ. ਤਿਰਚ੍ਛਾਨਗਤਾਨਮ੍ਪਿ ਨਿਮਿਤ੍ਤੇ ਏਸੇਵ ਨਯੋ. ਇਤੋ ਚਿਤੋ ਚ ਅਵਿਲੋਕੇਤ੍ਵਾ ਪਨ ਦਿਵਸਮ੍ਪਿ ਏਕਪਯੋਗੇਨ ਉਪਨਿਜ੍ਝਾਯਨ੍ਤਸ੍ਸ ਏਕਮੇਵ ਦੁਕ੍ਕਟਂ. ਇਤੋ ਚਿਤੋ ਚ ਵਿਲੋਕੇਤ੍ਵਾ ਪੁਨਪ੍ਪੁਨਂ ਉਪਨਿਜ੍ਝਾਯਨ੍ਤਸ੍ਸ ਪਯੋਗੇ ਪਯੋਗੇ ਦੁਕ੍ਕਟਂ. ਉਮ੍ਮੀਲਨਨਿਮੀਲਨਵਸੇਨ ਪਨ ਨ ਕਾਰੇਤਬ੍ਬੋ. ਸਹਸਾ ਉਪਨਿਜ੍ਝਾਯਿਤ੍ਵਾ ਪੁਨ ਪਟਿਸਙ੍ਖਾਯ ਸਂਵਰੇ ਤਿਟ੍ਠਤੋ ਅਨਾਪਤ੍ਤਿ, ਤਂ ਸਂਵਰਂ ਪਹਾਯ ਪੁਨ ਉਪਨਿਜ੍ਝਾਯਤੋ ਦੁਕ੍ਕਟਮੇਵ.
੨੬੭. ਤਾਲ਼ਚ੍ਛਿਦ੍ਦਾਦਿਵਤ੍ਥੂਨਿ ਉਤ੍ਤਾਨਤ੍ਥਾਨੇਵ. ਨ੍ਹਾਨਵਤ੍ਥੂਸੁ ਯੇ ਉਦਕਸੋਤਂ ਨਿਮਿਤ੍ਤੇਨ ਪਹਰਿਂਸੁ ਤੇਸਂ ਆਪਤ੍ਤਿ ਵੁਤ੍ਤਾ. ਉਦਞ੍ਜਲਵਤ੍ਥੂਸੁਪਿ ਏਸੇਵ ਨਯੋ. ਏਤ੍ਥ ਚ ਉਦਞ੍ਜਲਨ੍ਤਿ ਉਦਕਚਿਕ੍ਖਲ੍ਲੋ ਵੁਚ੍ਚਤਿ. ਏਤੇਨੇਵ ਉਪਾਯੇਨ ਇਤੋ ਪਰਾਨਿ ਸਬ੍ਬਾਨੇਵ ਉਦਕੇ ਧਾਵਨਾਦਿਵਤ੍ਥੂਨਿ ਵੇਦਿਤਬ੍ਬਾਨਿ. ਅਯਂ ਪਨ ਵਿਸੇਸੋ. ਪੁਪ੍ਫਾਵਲ਼ਿਯਵਤ੍ਥੂਸੁ ਸਚੇਪਿ ਨਮੋਚਨਾਧਿਪ੍ਪਾਯਸ੍ਸ ਅਨਾਪਤ੍ਤਿ, ਕੀਲ਼ਨਪਚ੍ਚਯਾ ਪਨ ਦੁਕ੍ਕਟਂ ਹੋਤੀਤਿ.
ਸੁਕ੍ਕਵਿਸ੍ਸਟ੍ਠਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਕਾਯਸਂਸਗ੍ਗਸਿਕ੍ਖਾਪਦਵਣ੍ਣਨਾ
੨੬੯. ਤੇਨ ਸਮਯੇਨ ਬੁਦ੍ਧੋ ਭਗਵਾਤਿ ਕਾਯਸਂਸਗ੍ਗਸਿਕ੍ਖਾਪਦਂ. ਤਤ੍ਰਾਯਂ ਅਨੁਤ੍ਤਾਨਪਦਵਣ੍ਣਨਾ – ਅਰਞ੍ਞੇ ਵਿਹਰਤੀਤਿ ਨ ਆਵੇਣਿਕੇ ਅਰਞ੍ਞੇ, ਜੇਤਵਨਵਿਹਾਰਸ੍ਸੇਵ ਪਚ੍ਚਨ੍ਤੇ ਏਕਪਸ੍ਸੇ. ਮਜ੍ਝੇ ਗਬ੍ਭੋਤਿ ਤਸ੍ਸ ਚ ਵਿਹਾਰਸ੍ਸ ਮਜ੍ਝੇ ਗਬ੍ਭੋ ਹੋਤਿ. ਸਮਨ੍ਤਾ ਪਰਿਯਾਗਾਰੋਤਿ ਸਮਨ੍ਤਾ ਪਨਸ੍ਸ ਮਣ੍ਡਲਮਾਲ਼ਪਰਿਕ੍ਖੇਪੋ ਹੋਤਿ. ਸੋ ਕਿਰ ਮਜ੍ਝੇ ਚਤੁਰਸ੍ਸਂ ਗਬ੍ਭਂ ਕਤ੍ਵਾ ਬਹਿ ਮਣ੍ਡਲਮਾਲ਼ਪਰਿਕ੍ਖੇਪੇਨ ਕਤੋ, ਯਥਾ ਸਕ੍ਕਾ ਹੋਤਿ ਅਨ੍ਤੋਯੇਵ ਆਵਿਞ੍ਛਨ੍ਤੇਹਿ ਵਿਚਰਿਤੁਂ.
ਸੁਪਞ੍ਞਤ੍ਤਨ੍ਤਿ ਸੁਟ੍ਠ ਠਪਿਤਂ, ਯਥਾ ਯਥਾ ਯਸ੍ਮਿਂ ਯਸ੍ਮਿਞ੍ਚ ਓਕਾਸੇ ਠਪਿਤਂ ਪਾਸਾਦਿਕਂ ਹੋਤਿ ਲੋਕਰਞ੍ਜਕਂ ਤਥਾ ਤਥਾ ਤਸ੍ਮਿਂ ਤਸ੍ਮਿਂ ਓਕਾਸੇ ਠਪਿਤਂ, ਵਤ੍ਤਸੀਸੇਨ ਹਿ ਸੋਂ ਏਕਕਿਚ੍ਚਮ੍ਪਿ ਨ ਕਰੋਤਿ. ਏਕਚ੍ਚੇ ਵਾਤਪਾਨੇ ਵਿਵਰਨ੍ਤੋਤਿ ਯੇਸੁ ਵਿਵਟੇਸੁ ਅਨ੍ਧਕਾਰੋ ਹੋਤਿ ਤਾਨਿ ਵਿਵਰਨ੍ਤੋ ਯੇਸੁ ਵਿਵਟੇਸੁ ਆਲੋਕੋ ਹੋਤਿ ਤਾਨਿ ਥਕੇਨ੍ਤੋ.
ਏਵਂ ਵੁਤ੍ਤੇ ਸਾ ਬ੍ਰਾਹ੍ਮਣੀ ਤਂ ਬ੍ਰਾਹ੍ਮਣਂ ਏਤਦਵੋਚਾਤਿ ਏਵਂ ਤੇਨ ਬ੍ਰਾਹ੍ਮਣੇਨ ਪਸਂਸਿਤ੍ਵਾ ਵੁਤ੍ਤੇ ਸਾ ਬ੍ਰਾਹ੍ਮਣੀ ‘‘ਪਸਨ੍ਨੋ ਅਯਂ ਬ੍ਰਾਹ੍ਮਣੋ ਪਬ੍ਬਜਿਤੁਕਾਮੋ ਮਞ੍ਞੇ’’ਤਿ ਸਲ੍ਲਕ੍ਖੇਤ੍ਵਾ ਨਿਗੂਹਿਤਬ੍ਬਮ੍ਪਿ ਤਂ ਅਤ੍ਤਨੋ ਵਿਪ੍ਪਕਾਰਂ ਪਕਾਸੇਨ੍ਤੀ ਕੇਵਲਂ ਤਸ੍ਸ ਸਦ੍ਧਾਵਿਘਾਤਾਪੇਕ੍ਖਾ ਹੁਤ੍ਵਾ ਏਤਂ ‘‘ਕੁਤੋ ਤਸ੍ਸ ਉਲ਼ਾਰਤ੍ਤਤਾ’’ਤਿਆਦਿਵਚਨਮਵੋਚ. ਤਤ੍ਥ ਉਲ਼ਾਰੋ ਅਤ੍ਤਾ ਅਸ੍ਸਾਤਿ ਉਲ਼ਾਰਤ੍ਤਾ, ਉਲ਼ਾਰਤ੍ਤਨੋ ਭਾਵੋ ਉਟ੍ਠਾਰਤ੍ਤਤਾ. ਕੁਲਿਤ੍ਥੀਹੀਤਿਆਦੀਸੁ ਕੁਲਿਤ੍ਥਿਯੋ ਨਾਮ ਘਰਸ੍ਸਾਮਿਨਿਯੋ. ਕੁਲਧੀਤਰੋ ਨਾਮ ਪੁਰਿਸਨ੍ਤਰਗਤਾ ਕੁਲਧੀਤਰੋ. ਕੁਲਕੁਮਾਰਿਯੋ ਨਾਮ ਅਨਿਵਿਟ੍ਠਾ ਵੁਚ੍ਚਨ੍ਤਿ. ਕੁਲਸੁਣ੍ਹਾ ਨਾਮ ਪਰਕੁਲਤੋ ਆਨੀਤਾ ਕੁਲਦਾਰਕਾਨਂ ਵਧੁਯੋ.
੨੭੦. ਓਤਿਣ੍ਣੋਤਿ ਯਕ੍ਖਾਦੀਹਿ ਵਿਯ ਸਤ੍ਤਾ ਅਨ੍ਤੋ ਉਪ੍ਪਜ੍ਜਨ੍ਤੇਨ ਰਾਗੇਨ ਓਤਿਣ੍ਣੋ, ਕੂਪਾਦੀਨਿ ਵਿਯ ਸਤ੍ਤਾ ਅਸਮਪੇਕ੍ਖਿਤ੍ਵਾ ਰਜਨੀਯੇ ਠਾਨੇ ਰਜ੍ਜਨ੍ਤੋ ਸਯਂ ਵਾ ਰਾਗਂ ਓਤਿਣ੍ਣੋ, ਯਸ੍ਮਾ ਪਨ ਉਭਯਥਾਪਿ ਰਾਗਸਮਙ੍ਗਿਸ੍ਸੇਵੇਤਂ ਅਧਿਵਚਨਂ, ਤਸ੍ਮਾ ‘‘ਓਤਿਣ੍ਣੋ ਨਾਮ ਸਾਰਤ੍ਤੋ ਅਪੇਕ੍ਖਵਾ ਪਟਿਬਦ੍ਧਚਿਤ੍ਤੋ’’ਤਿ ਏਵਮਸ੍ਸ ਪਦਭਾਜਨਂ ਵੁਤ੍ਤਂ.
ਤਤ੍ਥ ਸਾਰਤ੍ਤੋਤਿ ਕਾਯਸਂਸਗ੍ਗਰਾਗੇਨ ਸੁਟ੍ਠੁ ਰਤ੍ਤੋ. ਅਪੇਕ੍ਖਵਾਤਿ ਕਾਯਸਂਸਗ੍ਗਾਪੇਕ੍ਖਾਯ ਅਪੇਕ੍ਖਵਾ. ਪਟਿਬਦ੍ਧਚਿਤ੍ਤੋਤਿ ਕਾਯਸਂਸਗ੍ਗਰਾਗੇਨੇਵ ਤਸ੍ਮਿਂ ਵਤ੍ਥੁਸ੍ਮਿਂ ਪਟਿਬਦ੍ਧਚਿਤ੍ਤੋ. ਵਿਪਰਿਣਤੇਨਾਤਿ ਪਰਿਸੁਦ੍ਧਭਵਙ੍ਗਸਨ੍ਤਤਿਸਙ੍ਖਾਤਂ ਪਕਤਿਂ ਵਿਜਹਿਤ੍ਵਾ ਅਞ੍ਞਥਾ ਪਵਤ੍ਤੇਨ, ਵਿਰੂਪਂ ਵਾ ਪਰਿਣਤੇਨ ਵਿਰੂਪਂ ਪਰਿਵਤ੍ਤੇਨ, ਯਥਾ ਪਰਿਵਤ੍ਤਮਾਨਂ ਵਿਰੂਪਂ ਹੋਤਿ ਏਵਂ ਪਰਿਵਤ੍ਤਿਤ੍ਵਾ ਠਿਤੇਨਾਤਿ ਅਧਿਪ੍ਪਾਯੋ.
੨੭੧. ਯਸ੍ਮਾ ਪਨੇਤਂ ਰਾਗਾਦੀਹਿ ਸਮ੍ਪਯੋਗਂ ਨਾਤਿਵਤ੍ਤਤਿ, ਤਸ੍ਮਾ ‘‘ਵਿਪਰਿਣਤਨ੍ਤਿ ਰਤ੍ਤਮ੍ਪਿ ਚਿਤ੍ਤ’’ਨ੍ਤਿਆਦਿਨਾ ਨਯੇਨਸ੍ਸ ਪਦਭਾਜਨਂ ਵਤ੍ਵਾ ਅਨ੍ਤੇ ਇਧਾਧਿਪ੍ਪੇਤਮਤ੍ਥਂ ਦਸ੍ਸੇਨ੍ਤੋ ‘‘ਅਪਿਚ ਰਤ੍ਤਂ ਚਿਤ੍ਤਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਂ ਵਿਪਰਿਣਤ’’ਨ੍ਤਿ ਆਹ.
ਤਦਹੁਜਾਤਾਤਿ ਤਂਦਿਵਸਂ ਜਾਤਾ ਜਾਤਮਤ੍ਤਾ ਅਲ੍ਲਮਂਸਪੇਸਿਵਣ੍ਣਾ, ਏਵਰੂਪਾਯਪਿ ਹਿ ਸਦ੍ਧਿਂ ਕਾਯਸਂਸਗ੍ਗੇ ਸਙ੍ਘਾਦਿਸੇਸੋ, ਮੇਥੁਨਵੀਤਿਕ੍ਕਮੇ ਪਾਰਾਜਿਕਂ, ਰਹੋ ਨਿਸਜ੍ਜਸ੍ਸਾਦੇ ਪਾਚਿਤ੍ਤਿਯਞ੍ਚ ਹੋਤਿ. ਪਗੇਵਾਤਿ ਪਠਮਮੇਵ.
ਕਾਯਸਂਸਗ੍ਗਂ ਸਮਾਪਜ੍ਜੇਯ੍ਯਾਤਿ ਹਤ੍ਥਗ੍ਗਹਣਾਦਿਕਾਯਸਮ੍ਪਯੋਗਂ ਕਾਯਮਿਸ੍ਸੀਭਾਵਂ ਸਮਾਪਜ੍ਜੇਯ੍ਯ, ਯਸ੍ਮਾ ਪਨੇਤਂ ਸਮਾਪਜ੍ਜਨ੍ਤਸ੍ਸ ਯੋ ਸੋ ਕਾਯਸਂਸਗ੍ਗੋ ਨਾਮ ਸੋ ਅਤ੍ਥਤੋ ਅਜ੍ਝਾਚਾਰੋ ਹੋਤਿ, ਰਾਗਵਸੇਨ ਅਭਿਭਵਿਤ੍ਵਾ ਸਞ੍ਞਮਵੇਲਂ ਆਚਾਰੋ, ਤਸ੍ਮਾਸ੍ਸ ਸਙ੍ਖੇਪਨ ਅਤ੍ਥਂ ਦਸ੍ਸੇਨ੍ਤੋ ‘‘ਅਜ੍ਝਾਚਾਰੋ ਵੁਚ੍ਚਤੀ’’ਤਿ ਪਦਭਾਜਨਮਾਹ.
ਹਤ੍ਥਗ੍ਗਾਹਂ ਵਾਤਿਆਦਿਭੇਦਂ ਪਨਸ੍ਸ ਵਿਤ੍ਥਾਰੇਨ ਅਤ੍ਥਦਸ੍ਸਨਂ. ਤਤ੍ਥ ਹਤ੍ਥਾਦੀਨਂ ਵਿਭਾਗਦਸ੍ਸਨਤ੍ਥਂ ‘‘ਹਤ੍ਥੋ ਨਾਮ ਕਪ੍ਪਰਂ ਉਪਾਦਾਯਾ’’ਤਿਆਦਿਮਾਹ ਤਤ੍ਥ ਕਪ੍ਪਰਂ ਉਪਾਦਾਯਾਤਿ ਦੁਤਿਯਂ. ਮਹਾਸਨ੍ਧਿਂ ਉਪਾਦਾਯ. ਅਞ੍ਞਤ੍ਥ ਪਨ ਮਣਿਬਨ੍ਧਤੋ ਪਟ੍ਠਾਯ ਯਾਵ ਅਗ੍ਗਨਖਾ ਹਤ੍ਥੋ ਇਧ ਸਦ੍ਧਿਂ ਅਗ੍ਗਬਾਹਾਯ ਕਪ੍ਪਰਤੋ ਪਟ੍ਠਾਯ ਅਧਿਪ੍ਪੇਤੋ.
ਸੁਦ੍ਧਕੇਸਾ ਵਾਤਿ ਸੁਤ੍ਤਾਦੀਹਿ ਅਮਿਸ੍ਸਾ ਸੁਦ੍ਧਾ ਕੇਸਾਯੇਵ. ਵੇਣੀਤਿ ਤੀਹਿ ਕੇਸਵਟ੍ਟੀਹਿ ਵਿਨਨ੍ਧਿਤ੍ਵਾ ਕਤਕੇਸਕਲਾਪਸ੍ਸੇਤਂ ਨਾਮਂ. ਸੁਤ੍ਤਮਿਸ੍ਸਾਤਿ ਪਞ੍ਚਵਣ੍ਣੇਨ ਸੁਤ੍ਤੇਨ ਕੇਸੇ ਮਿਸ੍ਸੇਤ੍ਵਾ ਕਤਾ. ਮਾਲਾਮਿਸ੍ਸਾਤਿ ਵਸ੍ਸਿਕਪੁਪ੍ਫਾਦੀਹਿ ਮਿਸ੍ਸੇਤ੍ਵਾ ਤੀਹਿ ਕੇਸਵਟ੍ਟੀਹਿ ਵਿਨਨ੍ਧਿਤ੍ਵਾ ਕਤਾ, ਅਵਿਨਦ੍ਧੋਪਿ ਵਾ ਕੇਵਲਂ ਪੁਪ੍ਫਮਿਸ੍ਸਕੋ ਕੇਸਕਲਾਪੋ ਇਧ ‘‘ਵੇਣੀ’’ਤਿ ਵੇਦਿਤਬ੍ਬੋ. ਹਿਰਞ੍ਞਮਿਸ੍ਸਾਤਿ ਕਹਾਪਣਮਾਲਾਯ ਮਿਸ੍ਸੇਤ੍ਵਾ ਕਤਾ. ਸੁਵਣ੍ਣਮਿਸ੍ਸਾਤਿ ਸੁਵਣ੍ਣਚੀਰਕੇਹਿ ਵਾ ਪਾਮਙ੍ਗਾਦੀਹਿ ਵਾ ਮਿਸ੍ਸੇਤ੍ਵਾ ਕਤਾ. ਮੁਤ੍ਤਾਮਿਸ੍ਸਾਤਿ ਮੁਤ੍ਤਾਵਲੀਹਿ ਮਿਸ੍ਸੇਤ੍ਵਾ ਕਤਾ. ਮਣਿਮਿਸ੍ਸਾਤਿ ਸੁਤ੍ਤਾਰੂਲ਼੍ਹੇਹਿ ਮਣੀਹਿ ਮਿਸ੍ਸੇਤ੍ਵਾ ਕਤਾ. ਏਤਾਸੁ ਹਿ ਯਂਕਿਞ੍ਚਿ ਵੇਣਿਂ ਗਣ੍ਹਨ੍ਤਸ੍ਸ ਸਙ੍ਘਾਦਿਸੇਸੋਯੇਵ. ‘‘ਅਹਂ ਮਿਸ੍ਸਕਵੇਣਿਂ ਅਗ੍ਗਹੇਸਿ’’ਨ੍ਤਿ ਵਦਨ੍ਤਸ੍ਸ ਮੋਕ੍ਖੋ ਨਤ੍ਥਿ. ਵੇਣਿਗ੍ਗਹਣੇਨ ਚੇਤ੍ਥ ਕੇਸਾਪਿ ਗਹਿਤਾਵ ਹੋਨ੍ਤਿ, ਤਸ੍ਮਾ ਯੋ ਏਕਮ੍ਪਿ ਕੇਸਂ ਗਣ੍ਹਾਤਿ ਤਸ੍ਸਪਿ ਆਪਤ੍ਤਿਯੇਵ.
ਹਤ੍ਥਞ੍ਚ ਵੇਣਿਞ੍ਚ ਠਪੇਤ੍ਵਾਤਿ ਇਧ ਵੁਤ੍ਤਲਕ੍ਖਣਂ ਹਤ੍ਥਞ੍ਚ ਸਬ੍ਬਪ੍ਪਕਾਰਞ੍ਚ ਵੇਣਿਂ ਠਪੇਤ੍ਵਾ ਅਵਸੇਸਂ ਸਰੀਰਂ ‘‘ਅਙ੍ਗ’’ਨ੍ਤਿ ਵੇਦਿਤਬ੍ਬਂ. ਏਵਂ ਪਰਿਚ੍ਛਿਨ੍ਨੇਸੁ ਹਤ੍ਥਾਦੀਸੁ ਹਤ੍ਥਸ੍ਸ ਗਹਣਂ ਹਤ੍ਥਗ੍ਗਾਹੋ, ਵੇਣਿਯਾ ਗਹਣਂ ਵੇਣਿਗ੍ਗਾਹੋ, ਅਵਸੇਸਸਸਰੀਰਸ੍ਸ ਪਰਾਮਸਨਂ ਅਞ੍ਞਤਰਸ੍ਸ ਵਾ ਅਞ੍ਞਤਰਸ੍ਸ ਵਾ ਅਙ੍ਗਸ੍ਸ ਪਰਾਮਸਨਂ, ਯੋ ਤਂ ਹਤ੍ਥਗ੍ਗਾਹਂ ਵਾ ਵੇਣਿਗ੍ਗਾਹਂ ਵਾ ਅਞ੍ਞਤਰਸ੍ਸ ਵਾ ਅਞ੍ਞਤਰਸ੍ਸ ਵਾ ਅਙ੍ਗਸ੍ਸ ਪਰਾਮਸਨਂ ਸਮਾਪਜ੍ਜੇਯ੍ਯ, ਤਸ੍ਸ ਸਙ੍ਘਾਦਿਸੇਸੋ ਨਾਮ ਆਪਤ੍ਤਿਨਿਕਾਯੋ ਹੋਤੀਤਿ. ਅਯਂ ਸਿਕ੍ਖਾਪਦਸ੍ਸ ਅਤ੍ਥੋ.
੨੭੨. ਯਸ੍ਮਾ ਪਨ ਯੋ ਚ ਹਤ੍ਥਗ੍ਗਾਹੋ ਯੋ ਚ ਵੇਣਿਗ੍ਗਾਹੋ ਯਞ੍ਚ ਅਵਸੇਸਸ੍ਸ ਅਙ੍ਗਸ੍ਸ ਪਰਾਮਸਨਂ ਤਂ ਸਬ੍ਬਮ੍ਪਿ ਭੇਦਤੋ ਦ੍ਵਾਦਸਵਿਧਂ ਹੋਤਿ, ਤਸ੍ਮਾ ਤਂ ਭੇਦਂ ਦਸ੍ਸੇਤੁਂ ‘‘ਆਮਸਨਾ ਪਰਾਮਸਨਾ’’ਤਿਆਦਿਨਾ ਨਯੇਨਸ੍ਸ ਪਦਭਾਜਨਂ ਵੁਤ੍ਤਂ. ਤਤ੍ਥ ਯਞ੍ਚ ਵੁਤ੍ਤਂ ‘‘ਆਮਸਨਾ ਨਾਮ ਆਮਟ੍ਠਮਤ੍ਤਾ’’ਤਿ ਯਞ੍ਚ ‘‘ਛੁਪਨਂ ਨਾਮ ਫੁਟ੍ਠਮਤ੍ਤ’’ਨ੍ਤਿ, ਇਮੇਸਂ ਅਯਂ ਵਿਸੇਸੋ – ਆਮਸਨਾਤਿ ਆਮਜ੍ਜਨਾ ਫੁਟ੍ਠੋਕਾਸਂ ਅਨਤਿਕ੍ਕਮਿਤ੍ਵਾਪਿ ਤਤ੍ਥੇਵ ਸਙ੍ਘਟ੍ਟਨਾ. ਅਯਞ੍ਹਿ ‘‘ਆਮਟ੍ਠਮਤ੍ਤਾ’’ਤਿ ਵੁਚ੍ਚਤਿ. ਛੁਪਨਨ੍ਤਿ ਅਸਙ੍ਘਟ੍ਟੇਤ੍ਵਾ ਫੁਟ੍ਠਮਤ੍ਤਂ.
ਯਮ੍ਪਿ ਉਮ੍ਮਸਨਾਯ ਚ ਉਲ੍ਲਙ੍ਘਨਾਯ ਚ ਨਿਦ੍ਦੇਸੇ ‘‘ਉਦ੍ਧਂ ਉਚ੍ਚਾਰਣਾ’’ਤਿ ਏਕਮੇਵ ਪਦਂ ਵੁਤ੍ਤਂ. ਤਤ੍ਰਾਪਿ ਅਯਂ ਵਿਸੇਸੋ – ਪਠਮਂ ਅਤ੍ਤਨੋ ਕਾਯਸ੍ਸ ਇਤ੍ਥਿਯਾ ਕਾਯੇ ਉਦ੍ਧਂ ਪੇਸਨਵਸੇਨ ਵੁਤ੍ਤਂ, ਦੁਤਿਯਂ ਇਤ੍ਥਿਯਾ ਕਾਯਂ ਉਕ੍ਖਿਪਨਵਸੇਨ, ਸੇਸਂ ਪਾਕਟਮੇਵ.
੨੭੩. ਇਦਾਨਿ ਯ੍ਵਾਯਂ ਓਤਿਣ੍ਣੋ ਵਿਪਰਿਣਤੇਨ ਚਿਤ੍ਤੇਨ ਕਾਯਸਂਸਗ੍ਗਂ ਸਮਾਪਜ੍ਜਤਿ, ਤਸ੍ਸ ਏਤੇਸਂ ਪਦਾਨਂ ਵਸੇਨ ਵਿਤ੍ਥਾਰਤੋ ਆਪਤ੍ਤਿਭੇਦਂ ਦਸ੍ਸੇਨ੍ਤੋ ‘‘ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ ਭਿਕ੍ਖੁ ਚ ਨਂ ਇਤ੍ਥਿਯਾ ਕਾਯੇਨ ਕਾਯ’’ਨ੍ਤਿਆਦਿਮਾਹ. ਤਤ੍ਥ ਭਿਕ੍ਖੁ ਚ ਨਂ ਇਤ੍ਥਿਯਾ ਕਾਯੇਨ ਕਾਯਨ੍ਤਿ ਸੋ ਸਾਰਤ੍ਤੋ ਚ ਇਤ੍ਥਿਸਞ੍ਞੀ ਚ ਭਿਕ੍ਖੁ ਅਤ੍ਤਨੋ ਕਾਯੇਨ. ਨਨ੍ਤਿ ਨਿਪਾਤਮਤ੍ਤਂ. ਅਥ ਵਾ ਏਤਂ ਤਸ੍ਸਾ ਇਤ੍ਥਿਯਾ ਹਤ੍ਥਾਦਿਭੇਦਂ ਕਾਯਂ. ਆਮਸਤਿ ਪਰਾਮਸਤੀਤਿ ਏਤੇਸੁ ਚੇ ਏਕੇਨਾਪਿ ਆਕਾਰੇਨ ਅਜ੍ਝਾਚਰਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ. ਤਤ੍ਥ ਸਕਿਂ ਆਮਸਤੋ ਏਕਾ ਆਪਤ੍ਤਿ, ਪੁਨਪ੍ਪੁਨਂ ਆਮਸਤੋ ਪਯੋਗੇ ਪਯੋਗੇ ਸਙ੍ਘਾਦਿਸੇਸੋ.
ਪਰਾਮਸਨ੍ਤੋਪਿ ਸਚੇ ਕਾਯਤੋ ਅਮੋਚੇਤ੍ਵਾਵ ਇਤੋ ਚਿਤੋ ਚ ਅਤ੍ਤਨੋ ਹਤ੍ਥਂ ਵਾ ਕਾਯਂ ਵਾ ਸਞ੍ਚੋਪੇਤਿ ਹਰਤਿ ਪੇਸੇਤਿ ਦਿਵਸਮ੍ਪਿ ਪਰਾਮਸਤੋ ਏਕਾਵ ਆਪਤ੍ਤਿ. ਸਚੇ ਕਾਯਤੋ ਮੋਚੇਤ੍ਵਾ ਮੋਚੇਤ੍ਵਾ ਪਰਾਮਸਤਿ ਪਯੋਗੇ ਪਯੋਗੇ ਆਪਤ੍ਤਿ.
ਓਮਸਨ੍ਤੋਪਿ ਸਚੇ ਕਾਯਤੋ ਅਮੋਚੇਤ੍ਵਾਵ ਇਤ੍ਥਿਯਾ ਮਤ੍ਥਕਤੋ ਪਟ੍ਠਾਯ ਯਾਵ ਪਾਦਪਿਟ੍ਠਿਂ ਓਮਸਤਿ ਏਕਾਵ ਆਪਤ੍ਤਿ. ਸਚੇ ਪਨ ਉਦਰਾਦੀਸੁ ਤਂ ਤਂ ਠਾਨਂ ਪਤ੍ਵਾ ਮੁਞ੍ਚਿਤ੍ਵਾ ਮੁਞ੍ਚਿਤ੍ਵਾ ਓਮਸਤਿ ਪਯੋਗੇ ਪਯੋਗੇ ਆਪਤ੍ਤਿ. ਉਮ੍ਮਸਨਾਯਪਿ ਪਾਦਤੋ ਪਟ੍ਠਾਯ ਯਾਵ ਸੀਸਂ ਉਮ੍ਮਸਨ੍ਤਸ੍ਸ ਏਸੇਵ ਨਯੋ.
ਓਲਙ੍ਘਨਾਯ ਮਾਤੁਗਾਮਂ ਕੇਸੇਸੁ ਗਹੇਤ੍ਵਾ ਨਾਮੇਤ੍ਵਾ ਚੁਮ੍ਬਨਾਦੀਸੁ ਯਂ ਅਜ੍ਝਾਚਾਰਂ ਇਚ੍ਛਤਿ ਤਂ ਕਤ੍ਵਾ ਮੁਞ੍ਚਤੋ ਏਕਾਵ ਆਪਤ੍ਤਿ. ਉਟ੍ਠਿਤਂ ਪੁਨਪ੍ਪੁਨਂ ਨਾਮਯਤੋ ਪਯੋਗੇ ਪਯੋਗੇ ਆਪਤ੍ਤਿ. ਉਲ੍ਲਙ੍ਘਨਾਯਪਿ ਕੇਸੇਸੁ ਵਾ ਹਤ੍ਥੇਸੁ ਵਾ ਗਹੇਤ੍ਵਾ ਵੁਟ੍ਠਾਪਯਤੋ ਏਸੇਵ ਨਯੋ.
ਆਕਡ੍ਢਨਾਯ ਅਤ੍ਤਨੋ ਅਭਿਮੁਖਂ ਆਕਡ੍ਢਨ੍ਤੋ ਯਾਵ ਨ ਮੁਞ੍ਚਤਿ ਤਾਵ ਏਕਾਵ ਆਪਤ੍ਤਿ. ਮੁਞ੍ਚਿਤ੍ਵਾ ਮੁਞ੍ਚਿਤ੍ਵਾ ਆਕਡ੍ਢਨ੍ਤਸ੍ਸ ਪਯੋਗੇ ਪਯੋਗੇ ਆਪਤ੍ਤਿ. ਪਤਿਕਡ੍ਢਨਾਯਪਿ ਪਰਮ੍ਮੁਖਂ ਪਿਟ੍ਠਿਯਂ ਗਹੇਤ੍ਵਾ ਪਟਿਪ੍ਪਣਾਮਯਤੋ ਏਸੇਵ ਨਯੋ.
ਅਭਿਨਿਗ੍ਗਣ੍ਹਨਾਯ ਹਤ੍ਥੇ ਵਾ ਬਾਹਾਯ ਵਾ ਦਲ਼੍ਹਂ ਗਹੇਤ੍ਵਾ ਯੋਜਨਮ੍ਪਿ ਗਚ੍ਛਤੋ ਏਕਾਵ ਆਪਤ੍ਤਿ. ਮੁਞ੍ਚਿਤ੍ਵਾ ਪੁਨਪ੍ਪੁਨਂ ਗਣ੍ਹਤੋ ਪਯੋਗੇ ਪਯੋਗੇ ਆਪਤ੍ਤਿ. ਅਮੁਞ੍ਚਿਤ੍ਵਾ ਪੁਨਪ੍ਪੁਨਂ ਫੁਸਤੋ ਚ ਆਲਿਙ੍ਗਤੋ ਚ ਪਯੋਗੇ ਪਯੋਗੇ ਆਪਤ੍ਤੀਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨਾਹ – ‘‘ਮੂਲਗ੍ਗਹਣਮੇਵ ਪਮਾਣਂ, ਤਸ੍ਮਾ ਯਾਵ ਨ ਮੁਞ੍ਚਤਿ ਤਾਵ ਏਕਾ ਏਵ ਆਪਤ੍ਤੀ’’ਤਿ.
ਅਭਿਨਿਪ੍ਪੀਲ਼ਨਾਯ ਵਤ੍ਥੇਨ ਵਾ ਆਭਰਣੇਨ ਵਾ ਸਦ੍ਧਿਂ ਪੀਲ਼ਯਤੋ ਅਙ੍ਗਂ ਅਫੁਸਨ੍ਤਸ੍ਸ ਥੁਲ੍ਲਚ੍ਚਯਂ, ਫੁਸਨ੍ਤਸ੍ਸ ਸਙ੍ਘਾਦਿਸੇਸੋ, ਏਕਪਯੋਗੇਨ ਏਕਾ ਆਪਤ੍ਤਿ, ਨਾਨਾਪਯੋਗੇਨ ਨਾਨਾ.
ਗਹਣਛੁਪਨੇਸੁ ਅਞ੍ਞਂ ਕਿਞ੍ਚਿ ਵਿਕਾਰਂ ਅਕਰੋਨ੍ਤੋਪਿ ਗਹਿਤਮਤ੍ਤਫੁਟ੍ਠਮਤ੍ਤੇਨਾਪਿ ਆਪਤ੍ਤਿਂ ਆਪਜ੍ਜਤਿ.
ਏਵਮੇਤੇਸੁ ਆਮਸਨਾਦੀਸੁ ਏਕੇਨਾਪਿ ਆਕਾਰੇਨ ਅਜ੍ਝਾਚਾਰਤੋ ਇਤ੍ਥਿਯਾ ਇਤ੍ਥਿਸਞ੍ਞਿਸ੍ਸ ਸਙ੍ਘਾਦਿਸੇਸੋ, ਵੇਮਤਿਕਸ੍ਸ ਥੁਲ੍ਲਚ੍ਚਯਂ, ਪਣ੍ਡਕਪੁਰਿਸਤਿਰਚ੍ਛਾਨਗਤਸਞ੍ਞਿਸ੍ਸਾਪਿ ਥੁਲ੍ਲਚ੍ਚਯਮੇਵ. ਪਣ੍ਡਕੇ ਪਣ੍ਡਕਸਞ੍ਞਿਸ੍ਸ ਥੁਲ੍ਲਚ੍ਚਯਂ, ਵੇਮਤਿਕਸ੍ਸ ਦੁਕ੍ਕਟਂ. ਪੁਰਿਸਤਿਰਚ੍ਛਾਨਗਤਇਤ੍ਥਿਸਞ੍ਞਿਸ੍ਸਾਪਿ ਦੁਕ੍ਕਟਮੇਵ. ਪੁਰਿਸੇ ਪੁਰਿਸਸਞ੍ਞਿਸ੍ਸਾਪਿ ਵੇਮਤਿਕਸ੍ਸਾਪਿ ਇਤ੍ਥਿਪਣ੍ਡਕਤਿਰਚ੍ਛਾਨਗਤਸਞ੍ਞਿਸ੍ਸਾਪਿ ਦੁਕ੍ਕਟਮੇਵ. ਤਿਰਚ੍ਛਾਨਗਤੇਪਿ ਸਬ੍ਬਾਕਾਰੇਨ ਦੁਕ੍ਕਟਮੇਵਾਤਿ. ਇਮਾ ਏਕਮੂਲਕਨਯੇ ਵੁਤ੍ਤਾ ਆਪਤ੍ਤਿਯੋ ਸਲ੍ਲਕ੍ਖੇਤ੍ਵਾ ਇਮਿਨਾਵ ਉਪਾਯੇਨ ‘‘ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨ’’ਨ੍ਤਿਆਦਿਵਸੇਨ ਵੁਤ੍ਤੇ ਦੁਮੂਲਕਨਯੇਪਿ ਦਿਗੁਣਾ ਆਪਤ੍ਤਿਯੋ ਵੇਦਿਤਬ੍ਬਾ. ਯਥਾ ਚ ਦ੍ਵੀਸੁ ਇਤ੍ਥੀਸੁ ਦ੍ਵੇ ਸਙ੍ਘਾਦਿਸੇਸਾ; ਏਵਂ ਸਮ੍ਬਹੁਲਾਸੁ ਸਮ੍ਬਹੁਲਾ ਵੇਦਿਤਬ੍ਬਾ.
ਯੋ ਹਿ ਏਕਤੋ ਠਿਤਾ ਸਮ੍ਬਹੁਲਾ ਇਤ੍ਥਿਯੋ ਬਾਹਾਹਿ ਪਰਿਕ੍ਖਿਪਿਤ੍ਵਾ ਗਣ੍ਹਾਤਿ ਸੋ ਯਤ੍ਤਕਾ ਇਤ੍ਥਿਯੋ ਫੁਟ੍ਠਾ ਤਾਸਂ ਗਣਨਾਯ ਸਙ੍ਘਾਦਿਸੇਸੇ ਆਪਜ੍ਜਤਿ, ਮਜ੍ਝਗਤਾਨਂ ਗਣਨਾਯ ਥੁਲ੍ਲਚ੍ਚਯੇ. ਤਾ ਹਿ ਤੇਨ ਕਾਯਪ੍ਪਟਿਬਦ੍ਧੇਨ ਆਮਟ੍ਠਾ ਹੋਨ੍ਤਿ. ਯੋ ਪਨ ਸਮ੍ਬਹੁਲਾਨਂ ਅਙ੍ਗੁਲਿਯੋ ਵਾ ਕੇਸੇ ਵਾ ਏਕਤੋ ਕਤ੍ਵਾ ਗਣ੍ਹਾਤਿ, ਸੋ ਅਙ੍ਗੁਲਿਯੋ ਚ ਕੇਸੇ ਚ ਅਗਣੇਤ੍ਵਾ ਇਤ੍ਥਿਯੋ ਗਣੇਤ੍ਵਾ ਸਙ੍ਘਾਦਿਸੇਸੇਹਿ ਕਾਰੇਤਬ੍ਬੋ. ਯਾਸਞ੍ਚ ਇਤ੍ਥੀਨਂ ਅਙ੍ਗੁਲਿਯੋ ਵਾ ਕੇਸਾ ਵਾ ਮਜ੍ਝਗਤਾ ਹੋਨ੍ਤਿ, ਤਾਸਂ ਗਣਨਾਯ ਥੁਲ੍ਲਚ੍ਚਯੇ ਆਪਜ੍ਜਤਿ. ਤਾ ਹਿ ਤੇਨ ਕਾਯਪ੍ਪਟਿਬਦ੍ਧੇਨ ਆਮਟ੍ਠਾ ਹੋਨ੍ਤਿ, ਸਮ੍ਬਹੁਲਾ ਪਨ ਇਤ੍ਥਿਯੋ ਕਾਯਪ੍ਪਟਿਬਦ੍ਧੇਹਿ ਰਜ੍ਜੁਵਤ੍ਥਾਦੀਹਿ ਪਰਿਕ੍ਖਿਪਿਤ੍ਵਾ ਗਣ੍ਹਨ੍ਤੋ ਸਬ੍ਬਾਸਂਯੇਵ ਅਨ੍ਤੋਪਰਿਕ੍ਖੇਪਗਤਾਨਂ ਗਣਨਾਯ ਥੁਲ੍ਲਚ੍ਚਯੇ ਆਪਜ੍ਜਤਿ. ਮਹਾਪਚ੍ਚਰਿਯਂ ਅਫੁਟ੍ਠਾਸੁ ਦੁਕ੍ਕਟਂ ਵੁਤ੍ਤਂ. ਤਤ੍ਥ ਯਸ੍ਮਾ ਪਾਲ਼ਿਯਂ ਕਾਯਪ੍ਪਟਿਬਦ੍ਧਪ੍ਪਟਿਬਦ੍ਧੇਨ ਆਮਸਨਂ ਨਾਮ ਨਤ੍ਥਿ, ਤਸ੍ਮਾ ਸਬ੍ਬਮ੍ਪਿ ਕਾਯਪ੍ਪਟਿਬਦ੍ਧਪ੍ਪਟਿਬਦ੍ਧਂ ਕਾਯਪ੍ਪਟਿਬਦ੍ਧੇਨੇਵ ਸਙ੍ਗਹੇਤ੍ਵਾ ਮਹਾਅਟ੍ਠਕਥਾਯਞ੍ਚ ਕੁਰੁਨ੍ਦਿਯਞ੍ਚ ਵੁਤ੍ਤੋ ਪੁਰਿਮਨਯੋਯੇਵੇਤ੍ਥ ਯੁਤ੍ਤਤਰੋ ਦਿਸ੍ਸਤਿ.
ਯੋ ਹਿ ਹਤ੍ਥੇਨ ਹਤ੍ਥਂ ਗਹੇਤ੍ਵਾ ਪਟਿਪਾਟਿਯਾ ਠਿਤਾਸੁ ਇਤ੍ਥੀਸੁ ਸਮਸਾਰਾਗੋ ਏਕਂ ਹਤ੍ਥੇ ਗਣ੍ਹਾਤਿ, ਸੋ ਗਹਿਤਿਤ੍ਥਿਯਾ ਵਸੇਨ ਏਕਂ ਸਙ੍ਘਾਦਿਸੇਸਂ ਆਪਜ੍ਜਤਿ, ਇਤਰਾਸਂ ਗਣਨਾਯ ਪੁਰਿਮਨਯੇਨੇਵ ਥੁਲ੍ਲਚ੍ਚਯੇ. ਸਚੇ ਸੋ ਤਂ ਕਾਯਪ੍ਪਟਿਬਦ੍ਧੇ ਵਤ੍ਥੇ ਵਾ ਪੁਪ੍ਫੇ ਵਾ ਗਣ੍ਹਾਤਿ, ਸਬ੍ਬਾਸਂ ਗਣਨਾਯ ਥੁਲ੍ਲਚ੍ਚਯੇ ਆਪਜ੍ਜਤਿ. ਯਥੇਵ ਹਿ ਰਜ੍ਜੁਵਤ੍ਥਾਦੀਹਿ ਪਰਿਕ੍ਖਿਪਨ੍ਤੇਨ ਸਬ੍ਬਾਪਿ ਕਾਯਪ੍ਪਟਿਬਦ੍ਧੇਨ ਆਮਟ੍ਠਾ ਹੋਨ੍ਤਿ, ਤਥਾ ਇਧਾਪਿ ਸਬ੍ਬਾਪਿ ਕਾਯਪ੍ਪਟਿਬਦ੍ਧੇਨ ਆਮਟ੍ਠਾ ਹੋਨ੍ਤਿ. ਸਚੇ ਪਨ ਤਾ ਇਤ੍ਥਿਯੋ ਅਞ੍ਞਮਞ੍ਞਂ ਵਤ੍ਥਕੋਟਿਯਂ ਗਹੇਤ੍ਵਾ ਠਿਤਾ ਹੋਨ੍ਤਿ, ਤਤ੍ਰ ਚੇਸੋ ਪੁਰਿਮਨਯੇਨੇਵ ਪਠਮਂ ਇਤ੍ਥਿਂ ਹਤ੍ਥੇ ਗਣ੍ਹਾਤਿ ਗਹਿਤਾਯ ਵਸੇਨ ਸਙ੍ਘਾਦਿਸੇਸਂ ਆਪਜ੍ਜਤਿ, ਇਤਰਾਸਂ ਗਣਨਾਯ ਦੁਕ੍ਕਟਾਨਿ. ਸਬ੍ਬਾਸਞ੍ਹਿ ਤਾਸਂ ਤੇਨ ਪੁਰਿਮਨਯੇਨੇਵ ਕਾਯਪਟਿਬਦ੍ਧੇਨ ਕਾਯਪ੍ਪਟਿਬਦ੍ਧਂ ਆਮਟ੍ਠਂ ਹੋਤਿ. ਸਚੇ ਪਨ ਸੋਪਿ ਤਂ ਕਾਯਪ੍ਪਟਿਬਦ੍ਧੇਯੇਵ ਗਣ੍ਹਾਤਿ ਤਸ੍ਸਾ ਵਸੇਨ ਥੁਲ੍ਲਚ੍ਚਯਂ ਆਪਜ੍ਜਤਿ, ਇਤਰਾਸਂ ਗਣਨਾਯ ਅਨਨ੍ਤਰਨਯੇਨੇਵ ਦੁਕ੍ਕਟਾਨਿ.
ਯੋ ਪਨ ਘਨਵਤ੍ਥਨਿਵਤ੍ਥਂ ਇਤ੍ਥਿਂ ਕਾਯਸਂਸਗ੍ਗਰਾਗੇਨ ਵਤ੍ਥੇ ਘਟ੍ਟੇਤਿ, ਥੁਲ੍ਲਚ੍ਚਯਂ. ਵਿਰਲ਼ਵਤ੍ਥਨਿਵਤ੍ਥਂ ਘਟ੍ਟੇਤਿ, ਤਤ੍ਰ ਚੇ ਵਤ੍ਥਨ੍ਤਰੇਹਿ ਇਤ੍ਥਿਯਾ ਵਾ ਨਿਕ੍ਖਨ੍ਤਲੋਮਾਨਿ ਭਿਕ੍ਖੁਂ ਭਿਕ੍ਖੁਨੋ ਵਾ ਪਵਿਟ੍ਠਲੋਮਾਨਿ ਇਤ੍ਥਿਂ ਫੁਸਨ੍ਤਿ, ਉਭਿਨ੍ਨਂ ਲੋਮਾਨਿਯੇਵ ਵਾ ਲੋਮਾਨਿ ਫੁਸਨ੍ਤਿ, ਸਙ੍ਘਾਦਿਸੇਸੋ. ਉਪਾਦਿਨ੍ਨਕੇਨ ਹਿ ਕਮ੍ਮਜਰੂਪੇਨ ਉਪਾਦਿਨ੍ਨਕਂ ਵਾ ਅਨੁਪਾਦਿਨ੍ਨਕਂ ਵਾ ਅਨੁਪਾਦਿਨ੍ਨਕੇਨਪਿ ਕੇਨਚਿ ਕੇਸਾਦਿਨਾ ਉਪਾਦਿਨ੍ਨਕਂ ਵਾ ਅਨੁਪਾਦਿਨ੍ਨਕਂ ਵਾ ਫੁਸਨ੍ਤੋਪਿ ਸਙ੍ਘਾਦਿਸੇਸਂ ਆਪਜ੍ਜਤਿਯੇਵ.
ਤਤ੍ਥ ਕੁਰੁਨ੍ਦਿਯਂ ‘‘ਲੋਮਾਨਿ ਗਣੇਤ੍ਵਾ ਸਙ੍ਘਾਦਿਸੇਸੋ’’ਤਿ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ‘‘ਲੋਮਾਨਿ ਗਣੇਤ੍ਵਾ ਆਪਤ੍ਤਿਯਾ ਨ ਕਾਰੇਤਬ੍ਬੋ, ਏਕਮੇਵ ਸਙ੍ਘਾਦਿਸੇਸਂ ਆਪਜ੍ਜਤਿ. ਸਙ੍ਘਿਕਮਞ੍ਚੇ ਪਨ ਅਪਚ੍ਚਤ੍ਥਰਿਤ੍ਵਾ ਨਿਪਨ੍ਨੋ ਲੋਮਾਨਿ ਗਣੇਤ੍ਵਾ ਕਾਰੇਤਬ੍ਬੋ’’ਤਿ ਵੁਤ੍ਤਂ, ਤਦੇਵ ਯੁਤ੍ਤਂ. ਇਤ੍ਥਿਵਸੇਨ ਹਿ ਅਯਂ ਆਪਤ੍ਤਿ, ਨ ਕੋਟ੍ਠਾਸਵਸੇਨਾਤਿ.
ਏਤ੍ਥਾਹ ‘‘ਯੋ ਪਨ ‘ਕਾਯਪ੍ਪਟਿਬਦ੍ਧਂ ਗਣ੍ਹਿਸ੍ਸਾਮੀ’ਤਿ ਕਾਯਂ ਗਣ੍ਹਾਤਿ, ‘ਕਾਯਂ ਗਣ੍ਹਿਸ੍ਸਾਮੀ’ਤਿ ਕਾਯਪ੍ਪਟਿਬਦ੍ਧਂ ਗਣ੍ਹਾਤਿ, ਸੋ ਕਿਂ ਆਪਜ੍ਜਤੀ’’ਤਿ. ਮਹਾਸੁਮਤ੍ਥੇਰੋ ਤਾਵ ‘‘ਯਥਾਵਤ੍ਥੁਕਮੇਵਾ’’ਤਿ ਵਦਤਿ. ਅਯਂ ਕਿਰਸ੍ਸ ਲਦ੍ਧਿ –
‘‘ਵਤ੍ਥੁ ਸਞ੍ਞਾ ਚ ਰਾਗੋ ਚ, ਫਸ੍ਸਪ੍ਪਟਿਵਿਜਾਨਨਾ;
ਯਥਾਨਿਦ੍ਦਿਟ੍ਠਨਿਦ੍ਦੇਸੇ, ਗਰੁਕਂ ਤੇਨ ਕਾਰਯੇ’’ਤਿ.
ਏਤ੍ਥ ‘‘ਵਤ੍ਥੂ’’ਤਿ ਇਤ੍ਥੀ. ‘‘ਸਞ੍ਞਾ’’ਤਿ ਇਤ੍ਥਿਸਞ੍ਞਾ. ‘‘ਰਾਗੋ’’ਤਿ ਕਾਯਸਂਸਗ੍ਗਰਾਗੋ. ‘‘ਫਸ੍ਸਪ੍ਪਟਿਵਿਜਾਨਨਾ’’ਤਿ ਕਾਯਸਂਸਗ੍ਗਫਸ੍ਸਜਾਨਨਾ. ਤਸ੍ਮਾ ਯੋ ਇਤ੍ਥਿਯਾ ਇਤ੍ਥਿਸਞ੍ਞੀ ਕਾਯਸਂਸਗ੍ਗਰਾਗੇਨ ‘‘ਕਾਯਪ੍ਪਟਿਬਦ੍ਧਂ ਗਹੇਸ੍ਸਾਮੀ’’ਤਿ ਪਵਤ੍ਤੋਪਿ ਕਾਯਂ ਫੁਸਤਿ, ਗਰੁਕਂ ਸਙ੍ਘਾਦਿਸੇਸਂਯੇਵ ਆਪਜ੍ਜਤਿ. ਇਤਰੋਪਿ ਥੁਲ੍ਲਚ੍ਚਯਨ੍ਤਿ ਮਹਾਪਦੁਮਤ੍ਥੇਰੋ ਪਨਾਹ –
‘‘ਸਞ੍ਞਾਯ ਵਿਰਾਗਿਤਮ੍ਹਿ, ਗਹਣੇ ਚ ਵਿਰਾਗਿਤੇ;
ਯਥਾਨਿਦ੍ਦਿਟ੍ਠਨਿਦ੍ਦੇਸੇ, ਗਰੁਕਂ ਤਤ੍ਥ ਨ ਦਿਸ੍ਸਤੀ’’ਤਿ.
ਅਸ੍ਸਾਪਾਯਂ ਲਦ੍ਧਿ ਇਤ੍ਥਿਯਾ ਇਤ੍ਥਿਸਞ੍ਞਿਨੋ ਹਿ ਸਙ੍ਘਾਦਿਸੇਸੋ ਵੁਤ੍ਤੋ. ਇਮਿਨਾ ਚ ਇਤ੍ਥਿਸਞ੍ਞਾ ਵਿਰਾਗਿਤਾ ਕਾਯਪ੍ਪਟਿਬਦ੍ਧੇ ਕਾਯਪ੍ਪਟਿਬਦ੍ਧਸਞ੍ਞਾ ਉਪ੍ਪਾਦਿਤਾ, ਤਂ ਗਣ੍ਹਨ੍ਤਸ੍ਸ ਪਨ ਥੁਲ੍ਲਚ੍ਚਯਂ ਵੁਤ੍ਤਂ. ਇਮਿਨਾ ਚ ਗਹਣਮ੍ਪਿ ਵਿਰਾਗਿਤਂ ਤਂ ਅਗ੍ਗਹੇਤ੍ਵਾ ਇਤ੍ਥੀ ਗਹਿਤਾ, ਤਸ੍ਮਾ ਏਤ੍ਥ ਇਤ੍ਥਿਸਞ੍ਞਾਯ ਅਭਾਵਤੋ ਸਙ੍ਘਾਦਿਸੇਸੋ ਨ ਦਿਸ੍ਸਤਿ, ਕਾਯਪ੍ਪਟਿਬਦ੍ਧਸ੍ਸ ਅਗ੍ਗਹਿਤਤ੍ਤਾ ਥੁਲ੍ਲਚ੍ਚਯਂ ਨ ਦਿਸ੍ਸਤਿ, ਕਾਯਸਂਸਗ੍ਗਰਾਗੇਨ ਫੁਟ੍ਠਤ੍ਤਾ ਪਨ ਦੁਕ੍ਕਟਂ. ਕਾਯਸਂਸਗ੍ਗਰਾਗੇਨ ਹਿ ਇਮਂ ਨਾਮ ਵਤ੍ਥੁਂ ਫੁਸਤੋ ਅਨਾਪਤ੍ਤੀਤਿ ਨਤ੍ਥਿ, ਤਸ੍ਮਾ ਦੁਕ੍ਕਟਮੇਵਾਤਿ.
ਇਦਞ੍ਚ ਪਨ ਵਤ੍ਵਾ ਇਦਂ ਚਤੁਕ੍ਕਮਾਹ. ‘‘ਸਾਰਤ੍ਤਂ ਗਣ੍ਹਿਸ੍ਸਾਮੀ’ਤਿ ਸਾਰਤ੍ਤਂ ਗਣ੍ਹਿ ਸਙ੍ਘਾਦਿਸੇਸੋ, ‘ਵਿਰਤ੍ਤਂ ਗਣ੍ਹਿਸ੍ਸਾਮੀ’ਤਿ ਵਿਰਤ੍ਤਂ ਗਣ੍ਹਿ ਦੁਕ੍ਕਟਂ, ‘ਸਾਰਤ੍ਤਂ ਗਣ੍ਹਿਸ੍ਸਾਮੀ’ਤਿ ਵਿਰਤ੍ਤਂ ਗਣ੍ਹਿ ਦੁਕ੍ਕਟਂ, ‘ਵਿਰਤ੍ਤਂ ਗਣ੍ਹਿਸ੍ਸਾਮੀ’ਤਿ ਸਾਰਤ੍ਤਂ ਗਣ੍ਹਿ ਦੁਕ੍ਕਟਮੇਵਾ’’ਤਿ. ਕਿਞ੍ਚਾਪਿ ਏਵਮਾਹ? ਅਥ ਖੋ ਮਹਾਸੁਮਤ੍ਥੇਰਵਾਦੋਯੇਵੇਤ੍ਥ ‘‘ਇਤ੍ਥਿ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ ਭਿਕ੍ਖੁ ਚ ਨਂ ਇਤ੍ਥਿਯਾ ਕਾਯੇਨ ਕਾਯਪ੍ਪਟਿਬਦ੍ਧਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ ਇਮਾਯ ਪਾਲ਼ਿਯਾ ‘‘ਯੋ ਹਿ ਏਕਤੋ ਠਿਤਾ ਸਮ੍ਬਹੁਲਾ ਇਤ੍ਥਿਯੋ ਬਾਹਾਹਿ ਪਰਿਕ੍ਖਿਪਿਤ੍ਵਾ ਗਣ੍ਹਾਤਿ, ਸੋ ਯਤ੍ਤਕਾ ਇਤ੍ਥਿਯੋ ਫੁਟ੍ਠਾ ਤਾਸਂ ਗਣਨਾਯ ਸਙ੍ਘਾਦਿਸੇਸੇ ਆਪਜ੍ਜਤਿ, ਮਜ੍ਝਗਤਾਨਂ ਗਣਨਾਯ ਥੁਲ੍ਲਚ੍ਚਯੇ’’ਤਿਆਦੀਹਿ ਅਟ੍ਠਕਥਾਵਿਨਿਚ੍ਛਯੇਹਿ ਚ ਸਮੇਤਿ. ਯਦਿ ਹਿ ਸਞ੍ਞਾਦਿਵਿਰਾਗੇਨ ਵਿਰਾਗਿਤਂ ਨਾਮ ਭਵੇਯ੍ਯ ‘‘ਪਣ੍ਡਕੋ ਚ ਹੋਤਿ ਇਤ੍ਥਿਸਞ੍ਞੀ’’ਤਿਆਦੀਸੁ ਵਿਯ ‘‘ਕਾਯਪ੍ਪਟਿਬਦ੍ਧਞ੍ਚ ਹੋਤਿ ਕਾਯਸਞ੍ਞੀ ਚਾ’’ਤਿਆਦਿਨਾਪਿ ਨਯੇਨ ਪਾਲ਼ਿਯਂ ਵਿਸੇਸਂ ਵਦੇਯ੍ਯ. ਯਸ੍ਮਾ ਪਨ ਸੋ ਨ ਵੁਤ੍ਤੋ, ਤਸ੍ਮਾ ਇਤ੍ਥਿਯਾ ਇਤ੍ਥਿਸਞ੍ਞਾਯ ਸਤਿ ਇਤ੍ਥਿਂ ਆਮਸਨ੍ਤਸ੍ਸ ਸਙ੍ਘਾਦਿਸੇਸੋ, ਕਾਯਪ੍ਪਟਿਬਦ੍ਧਂ ਆਮਸਨ੍ਤਸ੍ਸ ਥੁਲ੍ਲਚ੍ਚਯਨ੍ਤਿ ਯਥਾਵਤ੍ਥੁਕਮੇਵ ਯੁਜ੍ਜਤਿ.
ਮਹਾਪਚ੍ਚਰਿਯਮ੍ਪਿ ਚੇਤਂ ਵੁਤ੍ਤਂ – ‘‘ਨੀਲਂ ਪਾਰੁਪਿਤ੍ਵਾ ਸਯਿਤਾਯ ਕਾਲ਼ਿਤ੍ਥਿਯਾ ਕਾਯਂ ਘਟ੍ਟੇਸ੍ਸਾਮੀ’ਤਿ ਕਾਯਂ ਘਟ੍ਟੇਤਿ, ਸਙ੍ਘਾਦਿਸੇਸੋ; ‘ਕਾਯਂ ਘਟ੍ਟੇਸ੍ਸਾਮੀ’ਤਿ ਨੀਲਂ ਘਟ੍ਟੇਤਿ, ਥੁਲ੍ਲਚ੍ਚਯਂ; ‘ਨੀਲਂ ਘਟ੍ਟੇਸ੍ਸਾਮੀ’ਤਿ ਕਾਯਂ ਘਟ੍ਟੇਤਿ, ਸਙ੍ਘਾਦਿਸੇਸੋ; ‘ਨੀਲਂ ਘਟ੍ਟੇਸ੍ਸਾਮੀ’ਤਿ ਨੀਲਂ ਘਟ੍ਟੇਤਿ, ਥੁਲ੍ਲਚ੍ਚਯ’’ਨ੍ਤਿ. ਯੋਪਾਯਂ ‘‘ਇਤ੍ਥੀ ਚ ਪਣ੍ਡਕੋ ਚਾ’’ਤਿਆਦਿਨਾ ਨਯੇਨ ਵਤ੍ਥੁਮਿਸ੍ਸਕਨਯੋ ਵੁਤ੍ਤੋ, ਤਸ੍ਮਿਮ੍ਪਿ ਵਤ੍ਥੁ ਸਞ੍ਞਾਵਿਮਤਿਵਸੇਨ ਵੁਤ੍ਤਾ ਆਪਤ੍ਤਿਯੋ ਪਾਲ਼ਿਯਂ ਅਸਮ੍ਮੁਯ੍ਹਨ੍ਤੇਨ ਵੇਦਿਤਬ੍ਬਾ.
ਕਾਯੇਨਕਾਯਪ੍ਪਟਿਬਦ੍ਧਵਾਰੇ ਪਨ ਇਤ੍ਥਿਯਾ ਇਤ੍ਥਿਸਞ੍ਞਿਸ੍ਸ ਕਾਯਪ੍ਪਟਿਬਦ੍ਧਂ ਗਣ੍ਹਤੋ ਥੁਲ੍ਲਚ੍ਚਯਂ, ਸੇਸੇ ਸਬ੍ਬਤ੍ਥ ਦੁਕ੍ਕਟਂ. ਕਾਯਪ੍ਪਟਿਬਦ੍ਧੇਨਕਾਯਵਾਰੇਪਿ ਏਸੇਵ ਨਯੋ. ਕਾਯਪ੍ਪਟਿਬਦ੍ਧੇਨਕਆਯਪ੍ਪਟਿਬਦ੍ਧਵਾਰੇ ਚ ਨਿਸ੍ਸਗ੍ਗਿਯੇਨਕਾਯਵਾਰਾਦੀਸੁ ਚਸ੍ਸ ਸਬ੍ਬਤ੍ਥ ਦੁਕ੍ਕਟਮੇਵ.
‘‘ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ ਇਤ੍ਥੀ ਚ ਨਂ ਭਿਕ੍ਖੁਸ੍ਸ ਕਾਯੇਨ ਕਾਯ’’ਨ੍ਤਿਆਦਿਵਾਰੋ ਪਨ ਭਿਕ੍ਖੁਮ੍ਹਿ ਮਾਤੁਗਾਮਸ੍ਸ ਰਾਗਵਸੇਨ ਵੁਤ੍ਤੋ. ਤਤ੍ਥ ਇਤ੍ਥੀ ਚ ਨਂ ਭਿਕ੍ਖੁਸ੍ਸ ਕਾਯੇਨ ਕਾਯਨ੍ਤਿ ਭਿਕ੍ਖੁਮ੍ਹਿ ਸਾਰਤ੍ਤਾ ਇਤ੍ਥੀ ਤਸ੍ਸ ਨਿਸਿਨ੍ਨੋਕਾਸਂ ਵਾ ਨਿਪਨ੍ਨੋਕਾਸਂ ਵਾ ਗਨ੍ਤ੍ਵਾ ਅਤ੍ਤਨੋ ਕਾਯੇਨ ਤਂ ਭਿਕ੍ਖੁਸ੍ਸ ਕਾਯਂ ਆਮਸਤਿ…ਪੇ… ਛੁਪਤਿ. ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ, ਫਸ੍ਸਂ ਪਟਿਵਿਜਾਨਾਤੀਤਿ ਏਵਂ ਤਾਯ ਆਮਟ੍ਠੋ ਵਾ ਛੁਪਿਤੋ ਵਾ ਸੇਵਨਾਧਿਪ੍ਪਾਯੋ ਹੁਤ੍ਵਾ ਸਚੇ ਫਸ੍ਸਪ੍ਪਟਿਵਿਜਾਨਨਤ੍ਥਂ ਈਸਕਮ੍ਪਿ ਕਾਯਂ ਚਾਲੇਤਿ ਫਨ੍ਦੇਤਿ, ਸਙ੍ਘਾਦਿਸੇਸਂ ਆਪਜ੍ਜਤਿ.
ਦ੍ਵੇ ਇਤ੍ਥਿਯੋਤਿ ਏਤ੍ਥ ਦ੍ਵੇ ਸਙ੍ਘਾਦਿਸੇਸੇ ਆਪਜ੍ਜਤਿ, ਇਤ੍ਥਿਯਾ ਚ ਪਣ੍ਡਕੇ ਚ ਸਙ੍ਘਾਦਿਸੇਸੇਨ ਸਹ ਦੁਕ੍ਕਟਂ. ਏਤੇਨ ਉਪਾਯੇਨ ਯਾਵ ‘‘ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਂ ਆਮਸਤਿ, ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਨ ਚ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਤਾਵ ਪੁਰਿਮਨਯੇਨੇਵ ਆਪਤ੍ਤਿਭੇਦੋ ਵੇਦਿਤਬ੍ਬੋ.
ਏਤ੍ਥ ਚ ਕਾਯੇਨ ਵਾਯਮਤਿ ਨ ਚ ਫਸ੍ਸਂ ਪਟਿਵਿਜਾਨਾਤੀਤਿ ਅਤ੍ਤਨਾ ਨਿਸ੍ਸਟ੍ਠਂ ਪੁਪ੍ਫਂ ਵਾ ਫਲਂ ਵਾ ਇਤ੍ਥਿਂ ਅਤ੍ਤਨੋ ਨਿਸ੍ਸਗ੍ਗਿਯੇਨ ਪੁਪ੍ਫੇਨ ਵਾ ਫਲੇਨ ਵਾ ਪਹਰਨ੍ਤਿਂ ਦਿਸ੍ਵਾ ਕਾਯੇਨ ਵਿਕਾਰਂ ਕਰੋਤਿ, ਅਙ੍ਗੁਲਿਂ ਵਾ ਚਾਲੇਤਿ, ਭਮੁਕਂ ਵਾ ਉਕ੍ਖਿਪਤਿ, ਅਕ੍ਖਿਂ ਵਾ ਨਿਖਣਤਿ, ਅਞ੍ਞਂ ਵਾ ਏਵਰੂਪਂ ਵਿਕਾਰਂ ਕਰੋਤਿ, ਅਯਂ ਵੁਚ੍ਚਤਿ ‘‘ਕਾਯੇਨ ਵਾਯਮਤਿ ਨ ਚ ਫਸ੍ਸਂ ਪਟਿਵਿਜਾਨਾਤੀ’’ਤਿ. ਅਯਮ੍ਪਿ ਕਾਯੇਨ ਵਾਯਮਿਤਤ੍ਤਾ ਦੁਕ੍ਕਟਂ ਆਪਜ੍ਜਤਿ, ਦ੍ਵੀਸੁ ਇਤ੍ਥੀਸੁ ਦ੍ਵੇ, ਇਤ੍ਥੀਪਣ੍ਡਕੇਸੁਪਿ ਦ੍ਵੇ ਏਵ ਦੁਕ੍ਕਟੇ ਆਪਜ੍ਜਤਿ.
੨੭੯. ਏਵਂ ਵਤ੍ਥੁਵਸੇਨ ਵਿਤ੍ਥਾਰਤੋ ਆਪਤ੍ਤਿਭੇਦਂ ਦਸ੍ਸੇਤ੍ਵਾ ਇਦਾਨਿ ਲਕ੍ਖਣਵਸੇਨ ਸਙ੍ਖੇਪਤੋ ਆਪਤ੍ਤਿਭੇਦਞ੍ਚ ਅਨਾਪਤ੍ਤਿਭੇਦਞ੍ਚ ਦਸ੍ਸੇਨ੍ਤੋ ‘‘ਸੇਵਨਾਧਿਪ੍ਪਾਯੋ’’ਤਿਆਦਿਮਾਹ. ਤਤ੍ਥ ਪੁਰਿਮਨਯੇ ਇਤ੍ਥਿਯਾ ਫੁਟ੍ਠੋ ਸਮਾਨੋ ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ, ਫਸ੍ਸਂ ਪਟਿਵਿਜਾਨਾਤੀਤਿ ਤਿਵਙ੍ਗਸਮ੍ਪਤ੍ਤਿਯਾ ਸਙ੍ਘਾਦਿਸੇਸੋ. ਦੁਤਿਯੇ ਨਯੇ ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਾਮਸਨੇ ਵਿਯ ਵਾਯਮਿਤ੍ਵਾ ਅਛੁਪਨੇ ਵਿਯ ਚ ਫਸ੍ਸਸ੍ਸ ਅਪ੍ਪਟਿਵਿਜਾਨਨਤੋ ਦੁਵਙ੍ਗਸਮ੍ਪਤ੍ਤਿਯਾ ਦੁਕ੍ਕਟਂ. ਤਤਿਯੇ ਕਾਯੇਨ ਅਵਾਯਮਤੋ ਅਨਾਪਤ੍ਤਿ. ਯੋ ਹਿ ਸੇਵਨਾਧਿਪ੍ਪਾਯੋਪਿ ਨਿਚ੍ਚਲੇਨ ਕਾਯੇਨ ਕੇਵਲਂ ਫਸ੍ਸਂ ਪਟਿਵਿਜਾਨਾਤਿ ਸਾਦਿਯਤਿ ਅਨੁਭੋਤਿ, ਤਸ੍ਸ ਚਿਤ੍ਤੁਪ੍ਪਾਦਮਤ੍ਤੇ ਆਪਤ੍ਤਿਯਾ ਅਭਾਵਤੋ ਅਨਾਪਤ੍ਤਿ. ਚਤੁਤ੍ਥੇ ਪਨ ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਾਮਸਨੇ ਵਿਯ ਫਸ੍ਸਪ੍ਪਟਿਵਿਜਾਨਨਾਪਿ ਨਤ੍ਥਿ, ਕੇਵਲਂ ਚਿਤ੍ਤੁਪ੍ਪਾਦਮਤ੍ਤਮੇਵ, ਤਸ੍ਮਾ ਅਨਾਪਤ੍ਤਿ. ਮੋਕ੍ਖਾਧਿਪ੍ਪਾਯਸ੍ਸ ਸਬ੍ਬਾਕਾਰੇਸੁ ਅਨਾਪਤ੍ਤਿਯੇਵ.
ਏਤ੍ਥ ਪਨ ਯੋ ਇਤ੍ਥਿਯਾ ਗਹਿਤੋ ਤਂ ਅਤ੍ਤਨੋ ਸਰੀਰਾ ਮੋਚੇਤੁਕਾਮੋ ਪਟਿਪ੍ਪਣਾਮੇਤਿ ਵਾ ਪਹਰਤਿ ਵਾ ਅਯਂ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ. ਯੋ ਆਗਚ੍ਛਨ੍ਤਿਂ ਦਿਸ੍ਵਾ ਤਤੋ ਮੁਞ੍ਚਿਤੁਕਾਮੋ ਉਤ੍ਤਾਸੇਤ੍ਵਾ ਪਲਾਪੇਤਿ, ਅਯਂ ਕਾਯੇਨ ਵਾਯਮਤਿ ਨ ਚ ਫਸ੍ਸਂ ਪਟਿਵਿਜਾਨਾਤਿ. ਯੋ ਤਾਦਿਸਂ ਦੀਘਜਾਤਿਂ ਕਾਯੇ ਆਰੂਲ਼੍ਹਂ ਦਿਸ੍ਵਾ ‘‘ਸਣਿਕਂ ਗਚ੍ਛਤੁ ਘਟ੍ਟਿਯਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯਾ’’ਤਿ ਨ ਘਟ੍ਟੇਤਿ, ਇਤ੍ਥਿਮੇਵ ਵਾ ਅਙ੍ਗਂ ਫੁਸਮਾਨਂ ਞਤ੍ਵਾ ‘‘ਏਸਾ ‘ਅਨਤ੍ਥਿਕੋ ਅਯਂ ਮਯਾ’ਤਿ ਸਯਮੇਵ ਪਕ੍ਕਮਿਸ੍ਸਤੀ’’ਤਿ ਅਜਾਨਨ੍ਤੋ ਵਿਯ ਨਿਚ੍ਚਲੋ ਹੋਤਿ, ਬਲਵਿਤ੍ਥਿਯਾ ਵਾ ਗਾਲ਼੍ਹਂ ਆਲਿਙ੍ਗਿਤ੍ਵਾ ਗਹਿਤੋ ਦਹਰਭਿਕ੍ਖੁ ਪਲਾਯਿਤੁਕਾਮੋਪਿ ਸੁਟ੍ਠੁ ਗਹਿਤਤ੍ਤਾ ਨਿਚ੍ਚਲੋ ਹੋਤਿ, ਅਯਂ ਨ ਚ ਕਾਯੇਨ ਵਾਯਮਤਿ, ਫਸ੍ਸਂ ਪਟਿਵਿਜਾਨਾਤਿ. ਯੋ ਪਨ ਆਗਚ੍ਛਨ੍ਤਿਂ ਦਿਸ੍ਵਾ ‘‘ਆਗਚ੍ਛਤੁ ਤਾਵ ਤਤੋ ਨਂ ਪਹਰਿਤ੍ਵਾ ਵਾ ਪਣਾਮੇਤ੍ਵਾ ਵਾ ਪਕ੍ਕਮਿਸ੍ਸਾਮੀ’’ਤਿ ਨਿਚ੍ਚਲੋ ਹੋਤਿ, ਅਯਂ ਮੋਕ੍ਖਾਧਿਪ੍ਪਾਯੋ ਨ ਚ ਕਾਯੇਨ ਵਾਯਮਤਿ, ਨ ਚ ਫਸ੍ਸਂ ਪਟਿਵਿਜਾਨਾਤੀਤਿ ਵੇਦਿਤਬ੍ਬੋ.
੨੮੦. ਅਸਞ੍ਚਿਚ੍ਚਾਤਿ ਇਮਿਨਾ ਉਪਾਯੇਨ ਇਮਂ ਫੁਸਿਸ੍ਸਾਮੀਤਿ ਅਚੇਤੇਤ੍ਵਾ, ਏਵਞ੍ਹਿ ਅਚੇਤੇਤ੍ਵਾ ਪਤ੍ਤਪ੍ਪਟਿਗ੍ਗਹਣਾਦੀਸੁ ਮਾਤੁਗਾਮਸ੍ਸ ਅਙ੍ਗੇ ਫੁਟ੍ਠੇਪਿ ਅਨਾਪਤ੍ਤਿ.
ਅਸਤਿਯਾਤਿ ਅਞ੍ਞਵਿਹਿਤੋ ਹੋਤਿ ਮਾਤੁਗਾਮਂ ਫੁਸਾਮੀਤਿ ਸਤਿ ਨਤ੍ਥਿ, ਏਵਂ ਅਸਤਿਯਾ ਹਤ੍ਥਪਾਦਪਸਾਰਣਾਦਿਕਾਲੇ ਫੁਸਨ੍ਤਸ੍ਸ ਅਨਾਪਤ੍ਤਿ.
ਅਜਾਨਨ੍ਤਸ੍ਸਾਤਿ ਦਾਰਕਵੇਸੇਨ ਠਿਤਂ ਦਾਰਿਕਂ ‘‘ਇਤ੍ਥੀ’’ਤਿ ਅਜਾਨਨ੍ਤੋ ਕੇਨਚਿਦੇਵ ਕਰਣੀਯੇਨ ਫੁਸਤਿ, ਏਵਂ ‘‘ਇਤ੍ਥੀ’’ਤਿ ਅਜਾਨਨ੍ਤਸ੍ਸ ਫੁਸਤੋ ਅਨਾਪਤ੍ਤਿ.
ਅਸਾਦਿਯਨ੍ਤਸ੍ਸਾਤਿ ਕਾਯਸਂਸਗ੍ਗਂ ਅਸਾਦਿਯਨ੍ਤਸ੍ਸ, ਤਸ੍ਸ ਬਾਹਾਪਰਮ੍ਪਰਾਯ ਨੀਤਭਿਕ੍ਖੁਸ੍ਸ ਵਿਯ ਅਨਾਪਤ੍ਤਿ. ਉਮ੍ਮਤ੍ਤਕਾਦਯੋ ਵੁਤ੍ਤਨਯਾਏਵ. ਇਧ ਪਨ ਉਦਾਯਿਤ੍ਥੇਰੋ ਆਦਿਕਮ੍ਮਿਕੋ, ਤਸ੍ਸ ਅਨਾਪਤ੍ਤਿ ਆਦਿਕਮ੍ਮਿਕਸ੍ਸਾਤਿ.
ਪਦਭਾਜਨੀਯਵਣ੍ਣਨਾ ਨਿਟ੍ਠਿਤਾ.
ਸਮੁਟ੍ਠਾਨਾਦੀਸੁ ਇਦਂ ਸਿਕ੍ਖਾਪਦਂ ਪਠਮਪਾਰਾਜਿਕਸਮੁਟ੍ਠਾਨਂ ਕਾਯਚਿਤ੍ਤਤੋ ਸਮੁਟ੍ਠਾਤਿ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਅਕੁਸਲਚਿਤ੍ਤਂ, ਦ੍ਵਿਵੇਦਨਂ, ਸੁਖਮਜ੍ਝਤ੍ਤਦ੍ਵਯੇਨਾਤਿ.
੨੮੧. ਵਿਨੀਤਵਤ੍ਥੂਸੁ – ਮਾਤੁਯਾ ਮਾਤੁਪੇਮੇਨਾਤਿ ਮਾਤੁਪੇਮੇਨ ਮਾਤੁਯਾ ਕਾਯਂ ਆਮਸਿ. ਏਸ ਨਯੋ ਧੀਤੁਭਗਿਨਿਵਤ੍ਥੂਸੁ. ਤਤ੍ਥ ਯਸ੍ਮਾ ਮਾਤਾ ਵਾ ਹੋਤੁ ਧੀਤਾ ਵਾ ਇਤ੍ਥੀ ਨਾਮ ਸਬ੍ਬਾਪਿ ਬ੍ਰਹ੍ਮਚਰਿਯਸ੍ਸ ਪਾਰਿਪਨ੍ਥਿਕਾਵ. ਤਸ੍ਮਾ ‘‘ਅਯਂ ਮੇ ਮਾਤਾ ਅਯਂ ਧੀਤਾ ਅਯਂ ਮੇ ਭਗਿਨੀ’’ਤਿ ਗੇਹਸ੍ਸਿਤਪੇਮੇਨ ਆਮਸਤੋਪਿ ਦੁਕ੍ਕਟਮੇਵ ਵੁਤ੍ਤਂ.
ਇਮਂ ਪਨ ਭਗਵਤੋ ਆਣਂ ਅਨੁਸ੍ਸਰਨ੍ਤੇਨ ਸਚੇਪਿ ਨਦੀਸੋਤੇਨ ਵੁਯ੍ਹਮਾਨਂ ਮਾਤਰਂ ਪਸ੍ਸਤਿ ਨੇਵ ਹਤ੍ਥੇਨ ਪਰਾਮਸਿਤਬ੍ਬਾ. ਪਣ੍ਡਿਤੇਨ ਪਨ ਭਿਕ੍ਖੁਨਾ ਨਾਵਾ ਵਾ ਫਲਕਂ ਵਾ ਕਦਲਿਕ੍ਖਨ੍ਧੋ ਵਾ ਦਾਰੁਕ੍ਖਨ੍ਧੋ ਵਾ ਉਪਸਂਹਰਿਤਬ੍ਬੋ. ਤਸ੍ਮਿਂ ਅਸਤਿ ਕਾਸਾਵਮ੍ਪਿ ਉਪਸਂਹਰਿਤ੍ਵਾ ਪੁਰਤੋ ਠਪੇਤਬ੍ਬਂ, ‘‘ਏਤ੍ਥ ਗਣ੍ਹਾਹੀ’’ਤਿ ਪਨ ਨ ਵਤ੍ਤਬ੍ਬਾ. ਗਹਿਤੇ ਪਰਿਕ੍ਖਾਰਂ ਕਡ੍ਢਾਮੀਤਿ ਕਡ੍ਢਨ੍ਤੇਨ ਗਨ੍ਤਬ੍ਬਂ. ਸਚੇ ਭਾਯਤਿ ਪੁਰਤੋ ਪੁਰਤੋ ਗਨ੍ਤ੍ਵਾ ‘‘ਮਾ ਭਾਯੀ’’ਤਿ ਸਮਸ੍ਸਾਸੇਤਬ੍ਬਾ. ਸਚੇ ਭਾਯਮਾਨਾ ਪੁਤ੍ਤਸ੍ਸ ਸਹਸਾ ਖਨ੍ਧੇ ਵਾ ਅਭਿਰੁਹਤਿ, ਹਤ੍ਥੇ ਵਾ ਗਣ੍ਹਾਤਿ, ਨ ‘‘ਅਪੇਹਿ ਮਹਲ੍ਲਿਕੇ’’ਤਿ ਨਿਦ੍ਧੁਨਿਤਬ੍ਬਾ, ਥਲਂ ਪਾਪੇਤਬ੍ਬਾ. ਕਦ੍ਦਮੇ ਲਗ੍ਗਾਯਪਿ ਕੂਪੇ ਪਤਿਤਾਯਪਿ ਏਸੇਵ ਨਯੋ.
ਤਤ੍ਰਪਿ ਹਿ ਯੋਤ੍ਤਂ ਵਾ ਵਤ੍ਥਂ ਵਾ ਪਕ੍ਖਿਪਿਤ੍ਵਾ ਹਤ੍ਥੇਨ ਗਹਿਤਭਾਵਂ ਞਤ੍ਵਾ ਉਦ੍ਧਰਿਤਬ੍ਬਾ, ਨਤ੍ਵੇਵ ਆਮਸਿਤਬ੍ਬਾ. ਨ ਕੇਵਲਞ੍ਚ ਮਾਤੁਗਾਮਸ੍ਸ ਸਰੀਰਮੇਵ ਅਨਾਮਾਸਂ, ਨਿਵਾਸਨਪਾਵੁਰਣਮ੍ਪਿ ਆਭਰਣਭਣ੍ਡਮ੍ਪਿ ਤਿਣਣ੍ਡੁਪਕਂ ਵਾ ਤਾਲ਼ਪਣ੍ਣਮੁਦ੍ਦਿਕਂ ਵਾ ਉਪਾਦਾਯ ਅਨਾਮਾਸਮੇਵ, ਤਞ੍ਚ ਖੋ ਨਿਵਾਸਨਪਾਰੁਪਨਂ ਪਿਲ਼ਨ੍ਧਨਤ੍ਥਾਯ ਠਪਿਤਮੇਵ. ਸਚੇ ਪਨ ਨਿਵਾਸਨਂ ਵਾ ਪਾਰੁਪਨਂ ਵਾ ਪਰਿਵਤ੍ਤੇਤ੍ਵਾ ਚੀਵਰਤ੍ਥਾਯ ਪਾਦਮੂਲੇ ਠਪੇਤਿ ਵਟ੍ਟਤਿ. ਆਭਰਣਭਣ੍ਡੇਸੁ ਪਨ ਸੀਸਪਸਾਧਨਕਦਨ੍ਤਸੂਚਿਆਦਿਕਪ੍ਪਿਯਭਣ੍ਡਂ ‘‘ਇਮਂ ਭਨ੍ਤੇ ਤੁਮ੍ਹਾਕਂ ਗਣ੍ਹਥਾ’’ਤਿ ਦਿਯ੍ਯਮਾਨਂ ਸਿਪਾਟਿਕਾਸੂਚਿਆਦਿਉਪਕਰਣਤ੍ਥਾਯ ਗਹੇਤਬ੍ਬਂ. ਸੁਵਣ੍ਣਰਜਤਮੁਤ੍ਤਾਦਿਮਯਂ ਪਨ ਅਨਾਮਾਸਮੇਵ ਦੀਯ੍ਯਮਾਨਮ੍ਪਿ ਨ ਗਹੇਤਬ੍ਬਂ. ਨ ਕੇਵਲਞ੍ਚ ਏਤਾਸਂ ਸਰੀਰੂਪਗਮੇਵ ਅਨਾਮਾਸਂ, ਇਤ੍ਥਿਸਣ੍ਠਾਨੇਨ ਕਤਂ ਕਟ੍ਠਰੂਪਮ੍ਪਿ ਦਨ੍ਤਰੂਪਮ੍ਪਿ ਅਯਰੂਪਮ੍ਪਿ ਲੋਹਰੂਪਮ੍ਪਿ ਤਿਪੁਰੂਪਮ੍ਪਿ ਪੋਤ੍ਥਕਰੂਪਮ੍ਪਿ ਸਬ੍ਬਰਤਨਰੂਪਮ੍ਪਿ ਅਨ੍ਤਮਸੋ ਪਿਟ੍ਠਮਯਰੂਪਮ੍ਪਿ ਅਨਾਮਾਸਮੇਵ. ਪਰਿਭੋਗਤ੍ਥਾਯ ਪਨ ‘‘ਇਦਂ ਤੁਮ੍ਹਾਕਂ ਹੋਤੂ’’ਤਿ ਲਭਿਤ੍ਵਾ ਠਪੇਤ੍ਵਾ ਸਬ੍ਬਰਤਨਮਯਂ ਅਵਸੇਸਂ ਭਿਨ੍ਦਿਤ੍ਵਾ ਉਪਕਰਣਾਰਹਂ ਉਪਕਰਣੇ ਪਰਿਭੋਗਾਰਹਂ ਪਰਿਭੋਗੇ ਉਪਨੇਤੁਂ ਵਟ੍ਟਤਿ.
ਯਥਾ ਚ ਇਤ੍ਥਿਰੂਪਕਂ; ਏਵਂ ਸਤ੍ਤਵਿਧਮ੍ਪਿ ਧਞ੍ਞਂ ਅਨਾਮਾਸਂ. ਤਸ੍ਮਾ ਖੇਤ੍ਤਮਜ੍ਝੇਨ ਗਚ੍ਛਤਾ ਤਤ੍ਥਜਾਤਕਮ੍ਪਿ ਧਞ੍ਞਫਲਂ ਨ ਆਮਸਨ੍ਤੇਨ ਗਨ੍ਤਬ੍ਬਂ. ਸਚੇ ਘਰਦ੍ਵਾਰੇ ਵਾ ਅਨ੍ਤਰਾਮਗ੍ਗੇ ਵਾ ਧਞ੍ਞਂ ਪਸਾਰਿਤਂ ਹੋਤਿ ਪਸ੍ਸੇਨ ਚ ਮਗ੍ਗੋ ਅਤ੍ਥਿ ਨ ਮਦ੍ਦਨ੍ਤੇਨ ਗਨ੍ਤਬ੍ਬਂ. ਗਮਨਮਗ੍ਗੇ ਅਸਤਿ ਮਗ੍ਗਂ ਅਧਿਟ੍ਠਾਯ ਗਨ੍ਤਬ੍ਬਂ. ਅਨ੍ਤਰਘਰੇ ਧਞ੍ਞਸ੍ਸ ਉਪਰਿ ਆਸਨਂ ਪਞ੍ਞਾਪੇਤ੍ਵਾ ਦੇਨ੍ਤਿ ਨਿਸੀਦਿਤੁਂ ਵਟ੍ਟਤਿ. ਕੇਚਿ ਆਸਨਸਾਲਾਯਂ ਧਞ੍ਞਂ ਆਕਿਰਨ੍ਤਿ, ਸਚੇ ਸਕ੍ਕਾ ਹੋਤਿ ਹਰਾਪੇਤੁਂ ਹਰਾਪੇਤਬ੍ਬਂ, ਨੋ ਚੇ ਏਕਮਨ੍ਤਂ ਧਞ੍ਞਂ ਅਮਦ੍ਦਨ੍ਤੇਨ ਪੀਠਕਂ ਪਞ੍ਞਪੇਤ੍ਵਾ ਨਿਸੀਦਿਤਬ੍ਬਂ. ਸਚੇ ਓਕਾਸੋ ਨ ਹੋਤਿ, ਮਨੁਸ੍ਸਾ ਧਞ੍ਞਮਜ੍ਝੇਯੇਵ ਆਸਨਂ ਪਞ੍ਞਪੇਤ੍ਵਾ ਦੇਨ੍ਤਿ, ਨਿਸੀਦਿਤਬ੍ਬਂ. ਤਤ੍ਥਜਾਤਕਾਨਿ ਮੁਗ੍ਗਮਾਸਾਦੀਨਿ ਅਪਰਣ੍ਣਾਨਿਪਿ ਤਾਲਪਨਸਾਦੀਨਿ ਵਾ ਫਲਾਨਿ ਕੀਲ਼ਨ੍ਤੇਨ ਨ ਆਮਸਿਤਬ੍ਬਾਨਿ. ਮਨੁਸ੍ਸੇਹਿ ਰਾਸਿਕਤੇਸੁਪਿ ਏਸੇਵ ਨਯੋ. ਅਰਞ੍ਞੇ ਪਨ ਰੁਕ੍ਖਤੋ ਪਤਿਤਾਨਿ ਫਲਾਨਿ ‘‘ਅਨੁਪਸਮ੍ਪਨ੍ਨਾਨਂ ਦਸ੍ਸਾਮੀ’’ਤਿ ਗਣ੍ਹਿਤੁਂ ਵਟ੍ਟਤਿ.
ਮੁਤ੍ਤਾ, ਮਣਿ, ਵੇਲ਼ੁਰਿਯੋ, ਸਙ੍ਖੋ, ਸਿਲਾ, ਪਵਾਲ਼ਂ, ਰਜਤਂ, ਜਾਤਰੂਪਂ, ਲੋਹਿਤਙ੍ਕੋ, ਮਸਾਰਗਲ੍ਲਨ੍ਤਿ ਇਮੇਸੁ ਦਸਸੁ ਰਤਨੇਸੁ ਮੁਤ੍ਤਾ ਅਧੋਤਾ ਅਨਿਵਿਦ੍ਧਾ ਯਥਾਜਾਤਾਵ ਆਮਸਿਤੁਂ ਵਟ੍ਟਤਿ. ਸੇਸਾ ਅਨਾਮਾਸਾਤਿ ਵਦਨ੍ਤਿ. ਮਹਾਪਚ੍ਚਰਿਯਂ ਪਨ ‘‘ਮੁਤ੍ਤਾ ਧੋਤਾਪਿ ਅਧੋਤਾਪਿ ਅਨਾਮਾਸਾ ਭਣ੍ਡਮੂਲਤ੍ਥਾਯ ਚ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ, ਕੁਟ੍ਠਰੋਗਸ੍ਸ ਭੇਸਜ੍ਜਤ੍ਥਾਯ ਪਨ ਵਟ੍ਟਤੀ’’ਤਿ ਵੁਤ੍ਤਂ. ਅਨ੍ਤਮਸੋ ਜਾਤਿਫਲਿਕਂ ਉਪਾਦਾਯ ਸਬ੍ਬੋਪਿ ਨੀਲਪੀਤਾਦਿਵਣ੍ਣਭੇਦੋ ਮਣਿ ਧੋਤਵਿਦ੍ਧਵਟ੍ਟਿਤੋ ਅਨਾਮਾਸੋ, ਯਥਾਜਾਤੋ ਪਨ ਆਕਰਮੁਤ੍ਤੋ ਪਤ੍ਤਾਦਿਭਣ੍ਡਮੂਲਤ੍ਥਂ ਸਮ੍ਪਟਿਚ੍ਛਿਤੁਂ ਵਟ੍ਟਤੀਤਿ ਵੁਤ੍ਤੋ. ਸੋਪਿ ਮਹਾਪਚ੍ਚਰਿਯਂ ਪਟਿਕ੍ਖਿਤ੍ਤੋ, ਪਚਿਤ੍ਵਾ ਕਤੋ ਕਾਚਮਣਿਯੇਵੇਕੋ ਵਟ੍ਟਤੀਤਿ ਵੁਤ੍ਤੋ. ਵੇਲ਼ੁਰਿਯੇਪਿ ਮਣਿਸਦਿਸੋਵ ਵਿਨਿਚ੍ਛਯੋ.
ਸਙ੍ਖੋ ਧਮਨਸਙ੍ਖੋ ਚ ਧੋਤਵਿਦ੍ਧੋ ਚ ਰਤਨਮਿਸ੍ਸੋ ਅਨਾਮਾਸੋ. ਪਾਨੀਯਸਙ੍ਖੋ ਧੋਤੋਪਿ ਅਧੋਤੋਪਿ ਆਮਾਸੋਵ ਸੇਸਞ੍ਚ ਅਞ੍ਜਨਾਦਿਭੇਸਜ੍ਜਤ੍ਥਾਯਪਿ ਭਣ੍ਡਮੂਲਤ੍ਥਾਯਪਿ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਸਿਲਾ ਧੋਤਵਿਦ੍ਧਾ ਰਤਨਸਂਯੁਤ੍ਤਾ ਮੁਗ੍ਗਵਣ੍ਣਾਵ ਅਨਾਮਾਸਾ. ਸੇਸਾ ਸਤ੍ਥਕਨਿਸਾਨਾਦਿਅਤ੍ਥਾਯ ਗਣ੍ਹਿਤੁਂ ਵਟ੍ਟਤਿ. ਏਤ੍ਥ ਚ ਰਤਨਸਂਯੁਤ੍ਤਾਤਿ ਸੁਵਣ੍ਣੇਨ ਸਦ੍ਧਿਂ ਯੋਜੇਤ੍ਵਾ ਪਚਿਤ੍ਵਾ ਕਤਾਤਿ ਵਦਨ੍ਤਿ. ਪਵਾਲ਼ਂ ਧੋਤਵਿਦ੍ਧਂ ਅਨਾਮਾਸਂ. ਸੇਸਂ ਆਮਾਸਂ ਭਣ੍ਡਮੂਲਤ੍ਥਞ੍ਚ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਮਹਾਪਚ੍ਚਰਿਯਂ ਪਨ ‘‘ਧੋਤਮ੍ਪਿ ਅਧੋਤਮ੍ਪਿ ਸਬ੍ਬਂ ਅਨਾਮਾਸਂ, ਨ ਚ ਸਮ੍ਪਟਿਚ੍ਛਿਤੁਂ ਵਟ੍ਟਤੀ’’ਤਿ ਵੁਤ੍ਤਂ.
ਰਜਤਂ ਜਾਤਰੂਪਞ੍ਚ ਕਤਭਣ੍ਡਮ੍ਪਿ ਅਕਤਭਣ੍ਡਮ੍ਪਿ ਸਬ੍ਬੇਨ ਸਬ੍ਬਂ ਬੀਜਤੋ ਪਟ੍ਠਾਯ ਅਨਾਮਾਸਞ੍ਚ ਅਸਮ੍ਪਟਿਚ੍ਛਿਯਞ੍ਚ, ਉਤ੍ਤਰਰਾਜਪੁਤ੍ਤੋ ਕਿਰ ਸੁਵਣ੍ਣਚੇਤਿਯਂ ਕਾਰੇਤ੍ਵਾ ਮਹਾਪਦੁਮਤ੍ਥੇਰਸ੍ਸ ਪੇਸੇਸਿ. ਥੇਰੋ ‘‘ਨ ਕਪ੍ਪਤੀ’’ਤਿ ਪਟਿਕ੍ਖਿਪਿ. ਚੇਤਿਯਘਰੇ ਸੁਵਣ੍ਣਪਦੁਮਸੁਵਣ੍ਣਬੁਬ੍ਬੁਲ਼ਕਾਦੀਨਿ ਹੋਨ੍ਤਿ, ਏਤਾਨਿਪਿ ਅਨਾਮਾਸਾਨਿ. ਚੇਤਿਯਘਰਗੋਪਕਾ ਪਨ ਰੂਪਿਯਛਡ੍ਡਕਟ੍ਠਾਨੇ ਠਿਤਾ, ਤਸ੍ਮਾ ਤੇਸਂ ਕੇਲ਼ਾਪਯਿਤੁਂ ਵਟ੍ਟਤੀਤਿ ਵੁਤ੍ਤਂ. ਕੁਰੁਨ੍ਦਿਯਂ ਪਨ ਤਂ ਪਟਿਕ੍ਖਿਤ੍ਤਂ. ਸੁਵਣ੍ਣਚੇਤਿਯੇ ਕਚਵਰਮੇਵ ਹਰਿਤੁਂ ਵਟ੍ਟਤੀਤਿ ਏਤ੍ਤਕਮੇਵ ਅਨੁਞ੍ਞਾਤਂ. ਆਰਕੂਟਲੋਹਮ੍ਪਿ ਜਾਤਰੂਪਗਤਿਕਮੇਵ ਅਨਾਮਾਸਨ੍ਤਿ ਸਬ੍ਬਅਟ੍ਠਕਥਾਸੁ ਵੁਤ੍ਤਂ. ਸੇਨਾਸਨਪਰਿਭੋਗੋ ਪਨ ਸਬ੍ਬਕਪ੍ਪਿਯੋ, ਤਸ੍ਮਾ ਜਾਤਰੂਪਰਜਤਮਯਾ ਸਬ੍ਬੇਪਿ ਸੇਨਾਸਨਪਰਿਕ੍ਖਾਰਾ ਆਮਾਸਾ. ਭਿਕ੍ਖੂਨਂ ਧਮ੍ਮਵਿਨਯਵਣ੍ਣਨਟ੍ਠਾਨੇ ਰਤਨਮਣ੍ਡਪੇ ਕਰੋਨ੍ਤਿ ਫਲਿਕਤ੍ਥਮ੍ਭੇ ਰਤਨਦਾਮਪਤਿਮਣ੍ਡਿਤੇ, ਤਤ੍ਥ ਸਬ੍ਬੂਪਕਰਣਾਨਿ ਭਿਕ੍ਖੂਨਂ ਪਟਿਜਗ੍ਗਿਤੁਂ ਵਟ੍ਟਤਿ.
ਲੋਹਿਤਙ੍ਕਮਸਾਰਗਲ੍ਲਾ ਧੋਤਵਿਦ੍ਧਾ ਅਨਾਮਾਸਾ, ਇਤਰੇ ਆਮਾਸਾ, ਭਣ੍ਡਮੂਲਤ੍ਥਾਯ ਵਟ੍ਟਨ੍ਤੀਤਿ ਵੁਤ੍ਤਾ. ਮਹਾਪਚ੍ਚਰਿਯਂ ਪਨ ‘‘ਧੋਤਾਪਿ ਅਧੋਤਾਪਿ ਸਬ੍ਬਸੋ ਅਨਾਮਾਸਾ ਨ ਚ ਸਮ੍ਪਟਿਚ੍ਛਿਤੁਂ ਵਟ੍ਟਨ੍ਤੀ’’ਤਿ ਵੁਤ੍ਤਂ.
ਸਬ੍ਬਂ ਆਵੁਧਭਣ੍ਡਂ ਅਨਾਮਾਸਂ, ਭਣ੍ਡਮੂਲਤ੍ਥਾਯ ਦੀਯ੍ਯਮਾਨਮ੍ਪਿ ਨ ਸਮ੍ਪਟਿਚ੍ਛਿਤਬ੍ਬਂ. ਸਤ੍ਥਵਣਿਜ੍ਜਾ ਨਾਮ ਨ ਵਟ੍ਟਤਿ. ਸੁਦ੍ਧਧਨੁਦਣ੍ਡੋਪਿ ਧਨੁਜਿਯਾਪਿ ਪਤੋਦੋਪਿ ਅਙ੍ਕੁਸੋਪਿ ਅਨ੍ਤਮਸੋ ਵਾਸਿਫਰਸੁਆਦੀਨਿਪਿ ਆਵੁਧਸਙ੍ਖੇਪੇਨ ਕਤਾਨਿ ਅਨਾਮਾਸਾਨਿ. ਸਚੇ ਕੇਨਚਿ ਵਿਹਾਰੇ ਸਤ੍ਤਿ ਵਾ ਤੋਮਰੋ ਵਾ ਠਪਿਤੋ ਹੋਤਿ, ਵਿਹਾਰਂ ਜਗ੍ਗਨ੍ਤੇਨ ‘‘ਹਰਨ੍ਤੂ’’ਤਿ ਸਾਮਿਕਾਨਂ ਪੇਸੇਤਬ੍ਬਂ. ਸਚੇ ਨ ਹਰਨ੍ਤਿ, ਤਂ ਅਚਾਲੇਨ੍ਤੇਨ ਵਿਹਾਰੋ ਪਟਿਜਗ੍ਗਿਤਬ੍ਬੋ. ਯੁਦ੍ਧਭੂਮਿਯਂ ਪਤਿਤਂ ਅਸਿਂ ਵਾ ਸਤ੍ਤਿਂ ਵਾ ਤੋਮਰਂ ਵਾ ਦਿਸ੍ਵਾ ਪਾਸਾਣੇਨ ਵਾ ਕੇਨਚਿ ਵਾ ਅਸਿਂ ਭਿਨ੍ਦਿਤ੍ਵਾ ਸਤ੍ਥਕਤ੍ਥਾਯ ਗਹੇਤੁਂ ਵਟ੍ਟਤਿ, ਇਤਰਾਨਿਪਿ ਵਿਯੋਜੇਤ੍ਵਾ ਕਿਞ੍ਚਿ ਸਤ੍ਥਕਤ੍ਥਾਯ ਗਹੇਤੁਂ ਵਟ੍ਟਤਿ ਕਿਞ੍ਚਿ ਕਤ੍ਤਰਦਣ੍ਡਾਦਿਅਤ੍ਥਾਯ. ‘‘ਇਦਂ ਗਣ੍ਹਥਾ’’ਤਿ ਦੀਯ੍ਯਮਾਨਂ ਪਨ ‘‘ਵਿਨਾਸੇਤ੍ਵਾ ਕਪ੍ਪਿਯਭਣ੍ਡਂ ਕਰਿਸ੍ਸਾਮੀ’’ਤਿ ਸਬ੍ਬਮ੍ਪਿ ਸਮ੍ਪਟਿਚ੍ਛਿਤੁਂ ਵਟ੍ਟਤਿ.
ਮਚ੍ਛਜਾਲਪਕ੍ਖਿਜਾਲਾਦੀਨਿਪਿ ਫਲਕਜਾਲਿਕਾਦੀਨਿ ਸਰਪਰਿਤ੍ਤਾਨਾਨੀਪਿ ਸਬ੍ਬਾਨਿ ਅਨਾਮਾਸਾਨਿ. ਪਰਿਭੋਗਤ੍ਥਾਯ ਲਬ੍ਭਮਾਨੇਸੁ ਪਨ ਜਾਲਂ ਤਾਵ ‘‘ਆਸਨਸ੍ਸ ਵਾ ਚੇਤਿਯਸ੍ਸ ਵਾ ਉਪਰਿ ਬਨ੍ਧਿਸ੍ਸਾਮਿ, ਛਤ੍ਤਂ ਵਾ ਵੇਠੇਸ੍ਸਾਮੀ’’ਤਿ ਗਹੇਤੁਂ ਵਟ੍ਟਤਿ. ਸਰਪਰਿਤ੍ਤਾਨਂ ਸਬ੍ਬਮ੍ਪਿ ਭਣ੍ਡਮੂਲਤ੍ਥਾਯ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਪਰੂਪਰੋਧਨਿਵਾਰਣਞ੍ਹਿ ਏਤਂ ਨ ਉਪਰੋਧਕਰਨ੍ਤਿ ਫਲਕਂ ਦਨ੍ਤਕਟ੍ਠਭਾਜਨਂ ਕਰਿਸ੍ਸਾਮੀਤਿ ਗਹੇਤੁਂ ਵਟ੍ਟਤਿ.
ਚਮ੍ਮਵਿਨਦ੍ਧਾਨਿ ਵੀਣਾਭੇਰਿਆਦੀਨਿ ਅਨਾਮਾਸਾਨਿ. ਕੁਰੁਨ੍ਦਿਯਂ ਪਨ ‘‘ਭੇਰਿਸਙ੍ਘਾਟੋਪਿ ਵੀਣਾਸਙ੍ਘਾਟੋਪਿ ਤੁਚ੍ਛਪੋਕ੍ਖਰਮ੍ਪਿ ਮੁਖਵਟ੍ਟਿਯਂ ਆਰੋਪਿਤਚਮ੍ਮਮ੍ਪਿ ਵੀਣਾਦਣ੍ਡਕੋਪਿ ਸਬ੍ਬਂ ਅਨਾਮਾਸ’’ਨ੍ਤਿ ਵੁਤ੍ਤਂ. ਓਨਹਿਤੁਂ ਵਾ ਓਨਹਾਪੇਤੁਂ ਵਾ ਵਾਦੇਤੁਂ ਵਾ ਵਾਦਾਪੇਤੁਂ ਵਾ ਨ ਲਬ੍ਭਤਿਯੇਵ. ਚੇਤਿਯਙ੍ਗਣੇ ਪੂਜਂ ਕਤ੍ਵਾ ਮਨੁਸ੍ਸੇਹਿ ਛਡ੍ਡਿਤਂ ਦਿਸ੍ਵਾਪਿ ਅਚਾਲੇਤ੍ਵਾਵ ਅਨ੍ਤਰਨ੍ਤਰੇ ਸਮ੍ਮਜ੍ਜਿਤਬ੍ਬਂ, ਕਚਵਰਛਡ੍ਡਨਕਾਲੇ ਪਨ ਕਚਵਰਨਿਯਾਮੇਨੇਵ ਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤੁਂ ਵਟ੍ਟਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਭਣ੍ਡਮੂਲਤ੍ਥਾਯ ਸਮ੍ਪਟਿਚ੍ਛਿਤੁਮ੍ਪਿ ਵਟ੍ਟਤਿ. ਪਰਿਭੋਗਤ੍ਥਾਯ ਲਬ੍ਭਮਾਨੇਸੁ ਪਨ ਵੀਣਾਦੋਣਿਕਞ੍ਚ ਭੇਰਿਪੋਕ੍ਖਰਞ੍ਚ ਦਨ੍ਤਕਟ੍ਠਭਾਜਨਂ ਕਰਿਸ੍ਸਾਮ ਚਮ੍ਮਂ ਸਤ੍ਥਕਕੋਸਕਨ੍ਤਿ ਏਵਂ ਤਸ੍ਸ ਤਸ੍ਸ ਪਰਿਕ੍ਖਾਰਸ੍ਸ ਉਪਕਰਣਤ੍ਥਾਯ ਗਹੇਤ੍ਵਾ ਤਥਾ ਤਥਾ ਕਾਤੁਂ ਵਟ੍ਟਤਿ.
ਪੁਰਾਣਦੁਤਿਯਿਕਾਵਤ੍ਥੁ ਉਤ੍ਤਾਨਮੇਵ. ਯਕ੍ਖਿਵਤ੍ਥੁਸ੍ਮਿਂ ਸਚੇਪਿ ਪਰਨਿਮ੍ਮਿਤਵਸਵਤ੍ਤਿਦੇਵਿਯਾ ਕਾਯਸਂਸਗ੍ਗਂ ਸਮਾਪਜ੍ਜਤਿ ਥੁਲ੍ਲਚ੍ਚਯਮੇਵ. ਪਣ੍ਡਕਵਤ੍ਥੁ ਚ ਸੁਤ੍ਤਿਤ੍ਥਿਵਤ੍ਥੁ ਚ ਪਾਕਟਮੇਵ. ਮਤਿਤ੍ਥਿਵਤ੍ਥੁਸ੍ਮਿਂ ਪਾਰਾਜਿਕਪ੍ਪਹੋਨਕਕਾਲੇ ਥੁਲ੍ਲਚ੍ਚਯਂ, ਤਤੋ ਪਰਂ ਦੁਕ੍ਕਟਂ. ਤਿਰਚ੍ਛਾਨਗਤਵਤ੍ਥੁਸ੍ਮਿਂ ਨਾਗਮਾਣਵਿਕਾਯਪਿ ਸੁਪਣ੍ਣਮਾਣਵਿਕਾਯਪਿ ਕਿਨ੍ਨਰਿਯਾਪਿ ਗਾਵਿਯਾਪਿ ਦੁਕ੍ਕਟਮੇਵ. ਦਾਰੁਧੀਤਲਿਕਾਵਤ੍ਥੁਸ੍ਮਿਂ ਨ ਕੇਵਲਂ ਦਾਰੁਨਾ ਏਵ, ਅਨ੍ਤਮਸੋ ਚਿਤ੍ਤਕਮ੍ਮਲਿਖਿਤੇਪਿ ਇਤ੍ਥਿਰੂਪੇ ਦੁਕ੍ਕਟਮੇਵ.
੨੮੨. ਸਮ੍ਪੀਲ਼ਨਵਤ੍ਥੁ ਉਤ੍ਤਾਨਤ੍ਥਮੇਵ. ਸਙ੍ਕਮਵਤ੍ਥੁਸ੍ਮਿਂ ਏਕਪਦਿਕਸਙ੍ਕਮੋ ਵਾ ਹੋਤੁ ਸਕਟਮਗ੍ਗਸਙ੍ਕਮੋ ਵਾ, ਚਾਲੇਸ੍ਸਾਮੀਤਿ ਪਯੋਗੇ ਕਤਮਤ੍ਤੇਵ ਚਾਲੇਤੁ ਵਾ ਮਾ ਵਾ, ਦੁਕ੍ਕਟਂ. ਮਗ੍ਗਵਤ੍ਥੁ ਪਾਕਟਮੇਵ. ਰੁਕ੍ਖਵਤ੍ਥੁਸ੍ਮਿਂ ਰੁਕ੍ਖੋ ਮਹਨ੍ਤੋ ਵਾ ਹੋਤੁ ਮਹਾਜਮ੍ਬੁਪ੍ਪਮਾਣੋ ਖੁਦ੍ਦਕੋ ਵਾ, ਤਂ ਚਾਲੇਤੁਂ ਸਕ੍ਕੋਤੁ ਵਾ ਮਾ ਵਾ, ਪਯੋਗਮਤ੍ਤੇਨ ਦੁਕ੍ਕਟਂ. ਨਾਵਾਵਤ੍ਥੁਸ੍ਮਿਮ੍ਪਿ ਏਸੇਵ ਨਯੋ. ਰਜ੍ਜਵਤ੍ਥੁਸ੍ਮਿਂ ਯਂ ਰਜ੍ਜੁਂ ਆਵਿਞ੍ਛਨ੍ਤੋ ਠਾਨਾ ਚਾਲੇਤੁਂ ਸਕ੍ਕੋਤਿ, ਤਤ੍ਥ ਥੁਲ੍ਲਚ੍ਚਯਂ. ਯਾ ਮਹਾਰਜ੍ਜੁ ਹੋਤਿ, ਈਸਕਮ੍ਪਿ ਠਾਨਾ ਨ ਚਲਤਿ, ਤਤ੍ਥ ਦੁਕ੍ਕਟਂ. ਦਣ੍ਡੇਪਿ ਏਸੇਵ ਨਯੋ. ਭੂਮਿਯਂ ਪਤਿਤਮਹਾਰੁਕ੍ਖੋਪਿ ਹਿ ਦਣ੍ਡਗ੍ਗਹਣੇਨੇਵ ਇਧ ਗਹਿਤੋ. ਪਤ੍ਤਵਤ੍ਥੁ ਪਾਕਟਮੇਵ. ਵਨ੍ਦਨਵਤ੍ਥੁਸ੍ਮਿਂ ਇਤ੍ਥੀ ਪਾਦੇ ਸਮ੍ਬਾਹਿਤ੍ਵਾ ਵਨ੍ਦਿਤੁਕਾਮਾ ਵਾਰੇਤਬ੍ਬਾ ਪਾਦਾ ਵਾ ਪਟਿਚ੍ਛਾਦੇਤਬ੍ਬਾ, ਨਿਚ੍ਚਲੇਨ ਵਾ ਭਵਿਤਬ੍ਬਂ. ਨਿਚ੍ਚਲਸ੍ਸ ਹਿ ਚਿਤ੍ਤੇਨ ਸਾਦਿਯਤੋਪਿ ਅਨਾਪਤ੍ਤਿ. ਅਵਸਾਨੇ ਗਹਣਵਤ੍ਥੁਪਾਕਟਮੇਵਾਤਿ.
ਕਾਯਸਂਸਗ੍ਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਦੁਟ੍ਠੁਲ੍ਲਵਾਚਾਸਿਕ੍ਖਾਪਦਵਣ੍ਣਨਾ
੨੮੩. ਤੇਨ ਸਮਯੇਨ ਬੁਦ੍ਧੋ ਭਗਵਾਤਿ ਦੁਟ੍ਠੁਲ੍ਲਵਾਚਾਸਿਕ੍ਖਾਪਦਂ. ਤਤ੍ਥ ਆਦਿਸ੍ਸਾਤਿ ਅਪਦਿਸਿਤ੍ਵਾ. ਵਣ੍ਣਮ੍ਪਿ ਭਣਤੀਤਿਆਦੀਨਿ ਪਰਤੋ ਆਵਿ ਭਵਿਸ੍ਸਨ੍ਤਿ. ਛਿਨ੍ਨਿਕਾਤਿ ਛਿਨ੍ਨਓਤ੍ਤਪ੍ਪਾ. ਧੁਤ੍ਤਿਕਾਤਿ ਸਠਾ. ਅਹਿਰਿਕਾਯੋਤਿ ਨਿਲ੍ਲਜ੍ਜਾ. ਉਹਸਨ੍ਤੀਤਿ ਸਿਤਂ ਕਤ੍ਵਾ ਮਨ੍ਦਹਸਿਤਂ ਹਸਨ੍ਤਿ. ਉਲ੍ਲਪਨ੍ਤੀਤਿ ‘‘ਅਹੋ ਅਯ੍ਯੋ’’ਤਿਆਦਿਨਾ ਨਯੇਨ ਉਚ੍ਚਕਰਣਿਂ ਨਾਨਾਵਿਧਂ ਪਲੋਭਨਕਥਂ ਕਥੇਨ੍ਤਿ. ਉਜ੍ਜਗ੍ਘਨ੍ਤੀਤਿ ਮਹਾਹਸਿਤਂ ਹਸਨ੍ਤਿ. ਉਪ੍ਪਣ੍ਡੇਨ੍ਤੀਤਿ ‘‘ਪਣ੍ਡਕੋ ਅਯਂ, ਨਾਯਂ ਪੁਰਿਸੋ’’ਤਿਆਦਿਨਾ ਨਯੇਨ ਪਰਿਹਾਸਂ ਕਰੋਨ੍ਤਿ.
੨੮੫. ਸਾਰਤ੍ਤੋਤਿ ਦੁਟ੍ਠੁਲ੍ਲਵਾਚਸ੍ਸਾਦਰਾਗੇਨ ਸਾਰਤ੍ਤੋ. ਅਪੇਕ੍ਖਵਾ ਪਟਿਬਦ੍ਧਚਿਤ੍ਤੋਤਿ ਵੁਤ੍ਤਨਯਮੇਵ, ਕੇਵਲਂ ਇਧ ਵਾਚਸ੍ਸਾਦਰਾਗੋ ਯੋਜੇਤਬ੍ਬੋ. ਮਾਤੁਗਾਮਂ ਦੁਟ੍ਠੁਲ੍ਲਾਹਿ ਵਾਚਾਹੀਤਿ ਏਤ੍ਥ ਅਧਿਪ੍ਪੇਤਂ ਮਾਤੁਗਾਮਂ ਦਸ੍ਸੇਨ੍ਤੋ ‘‘ਮਾਤੁਗਾਮੋ’’ਤਿਆਦਿਮਾਹ. ਤਤ੍ਥ ਵਿਞ੍ਞੂ ਪਟਿਬਲਾ ਸੁਭਾਸਿਤਦੁਬ੍ਭਾਸਿਤਂ ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਜਾਨਿਤੁਨ੍ਤਿ ਯਾ ਪਣ੍ਡਿਤਾ ਸਾਤ੍ਥਕਨਿਰਤ੍ਥਕਕਥਂ ਅਸਦ੍ਧਮ੍ਮਸਦ੍ਧਮ੍ਮਪਟਿਸਂਯੁਤ੍ਤਕਥਞ੍ਚ ਜਾਨਿਤੁਂ ਪਟਿਬਲਾ, ਅਯਂ ਇਧ ਅਧਿਪ੍ਪੇਤਾ. ਯਾ ਪਨ ਮਹਲ੍ਲਿਕਾਪਿ ਬਾਲਾ ਏਲਮੂਗਾ ਅਯਂ ਇਧ ਅਨਧਿਪ੍ਪੇਤਾਤਿ ਦਸ੍ਸੇਤਿ.
ਓਭਾਸੇਯ੍ਯਾਤਿ ਅਵਭਾਸੇਯ੍ਯ ਨਾਨਾਪ੍ਪਕਾਰਕਂ ਅਸਦ੍ਧਮ੍ਮਵਚਨਂ ਵਦੇਯ੍ਯ. ਯਸ੍ਮਾ ਪਨੇਵਂ ਓਭਾਸਨ੍ਤਸ੍ਸ ਯੋ ਸੋ ਓਭਾਸੋ ਨਾਮ, ਸੋ ਅਤ੍ਥਤੋ ਅਜ੍ਝਾਚਾਰੋ ਹੋਤਿ ਰਾਗਵਸੇਨ ਅਭਿਭਵਿਤ੍ਵਾ ਸਞ੍ਞਮਵੇਲਂ ਆਚਾਰੋ, ਤਸ੍ਮਾ ਤਮਤ੍ਥਂ ਦਸ੍ਸੇਨ੍ਤੋ ‘‘ਓਭਾਸੇਯ੍ਯਾਤਿ ਅਜ੍ਝਾਚਾਰੋ ਵੁਚ੍ਚਤੀ’’ਤਿ ਆਹ. ਯਥਾ ਤਨ੍ਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ, ਯਥਾ ਯੁਵਾ ਯੁਵਤਿਨ੍ਤਿ ਅਤ੍ਥੋ.
ਦ੍ਵੇ ਮਗ੍ਗੇ ਆਦਿਸ੍ਸਾਤਿਆਦਿ ਯੇਨਾਕਾਰੇਨ ਓਭਾਸਤੋ ਸਙ੍ਘਾਦਿਸੇਸੋ ਹੋਤਿ, ਤਂ ਦਸ੍ਸੇਤੁਂ ਵੁਤ੍ਤਂ. ਤਤ੍ਥ ਦ੍ਵੇ ਮਗ੍ਗੇਤਿ ਵਚ੍ਚਮਗ੍ਗਞ੍ਚ ਪਸ੍ਸਾਵਮਗ੍ਗਞ੍ਚ. ਸੇਸਂ ਉਦ੍ਦੇਸੇ ਤਾਵ ਪਾਕਟਮੇਵ. ਨਿਦ੍ਦੇਸੇ ਪਨ ਥੋਮੇਤੀਤਿ ‘‘ਇਤ੍ਥਿਲਕ੍ਖਣੇਨ ਸੁਭਲਕ੍ਖਣੇਨ ਸਮਨ੍ਨਾਗਤਾਸੀ’’ਤਿ ਵਦਤਿ, ਨ ਤਾਵ ਸੀਸਂ ਏਤਿ. ‘‘ਤਵ ਵਚ੍ਚਮਗ੍ਗੋ ਚ ਪਸ੍ਸਾਵਮਗ੍ਗੋ ਚ ਈਦਿਸੋ ਤੇਨ ਨਾਮ ਈਦਿਸੇਨ ਇਤ੍ਥਿਲਕ੍ਖਣੇਨ ਸੁਭਲਕ੍ਖਣੇਨ ਸਮਨ੍ਨਾਗਤਾਸੀ’’ਤਿ ਵਦਤਿ, ਸੀਸਂ ਏਤਿ, ਸਙ੍ਘਾਦਿਸੇਸੋ. ਵਣ੍ਣੇਤਿ ਪਸਂਸਤੀਤਿ ਇਮਾਨਿ ਪਨ ਥੋਮਨਪਦਸ੍ਸੇਵ ਵੇਵਚਨਾਨਿ.
ਖੁਂਸੇਤੀਤਿ ਵਾਚਾਪਤੋਦੇਨ ਘਟ੍ਟੇਤਿ. ਵਮ੍ਭੇਤੀਤਿ ਅਪਸਾਦੇਤਿ. ਗਰਹਤੀਤਿ ਦੋਸਂ ਦੇਤਿ. ਪਰਤੋ ਪਨ ਪਾਲ਼ਿਯਾ ਆਗਤੇਹਿ ‘‘ਅਨਿਮਿਤ੍ਤਾਸੀ’’ਤਿਆਦੀਹਿ ਏਕਾਦਸਹਿ ਪਦੇਹਿ ਅਘਟਿਤੇ ਸੀਸਂ ਨ ਏਤਿ, ਘਟਿਤੇਪਿ ਤੇਸੁ ਸਿਖਰਣੀਸਿ ਸਮ੍ਭਿਨ੍ਨਾਸਿ ਉਭਤੋਬ੍ਯਞ੍ਜਨਾਸੀਤਿ ਇਮੇਹਿ ਤੀਹਿ ਘਟਿਤੇਯੇਵ ਸਙ੍ਘਾਦਿਸੇਸੋ.
ਦੇਹਿ ਮੇਤਿ ਯਾਚਨਾਯਪਿ ਏਤ੍ਤਕੇਨੇਵ ਸੀਸਂ ਨ ਏਤਿ, ‘‘ਮੇਥੁਨਂ ਧਮ੍ਮਂ ਦੇਹੀ’’ਤਿ ਏਵਂ ਮੇਥੁਨਧਮ੍ਮੇਨ ਘਟਿਤੇ ਏਵ ਸਙ੍ਘਾਦਿਸੇਸੋ.
ਕਦਾ ਤੇ ਮਾਤਾ ਪਸੀਦਿਸ੍ਸਤੀਤਿਆਦੀਸੁ ਆਯਾਚਨਵਚਨੇਸੁਪਿ ਏਤ੍ਤਕੇਨੇਵ ਸੀਸਂ ਨ ਏਤਿ, ‘‘ਕਦਾ ਤੇ ਮਾਤਾ ਪਸੀਦਿਸ੍ਸਤਿ, ਕਦਾ ਤੇ ਮੇਥੁਨਂ ਧਮ੍ਮਂ ਲਭਿਸ੍ਸਾਮੀ’’ਤਿ ਵਾ ‘‘ਤਵ ਮਾਤਰਿ ਪਸਨ੍ਨਾਯ ਮੇਥੁਨਂ ਧਮ੍ਮਂ ਲਭਿਸ੍ਸਾਮੀ’’ਤਿ ਵਾ ਆਦਿਨਾ ਪਨ ਨਯੇਨ ਮੇਥੁਨਧਮ੍ਮੇਨ ਘਟਿਤੇਯੇਵ ਸਙ੍ਘਾਦਿਸੇਸੋ.
ਕਥਂ ਤ੍ਵਂ ਸਾਮਿਕਸ੍ਸ ਦੇਸੀਤਿਆਦੀਸੁ ਪੁਚ੍ਛਾਵਚਨੇਸੁਪਿ ਮੇਥੁਨਧਮ੍ਮਨ੍ਤਿ ਵੁਤ੍ਤੇਯੇਵ ਸਙ੍ਘਾਦਿਸੇਸੋ, ਨ ਇਤਰਥਾ. ਏਵਂ ਕਿਰ ਤ੍ਵਂ ਸਾਮਿਕਸ੍ਸ ਦੇਸੀਤਿ ਪਟਿਪੁਚ੍ਛਾਵਚਨੇਸੁਪਿ ਏਸੇਵ ਨਯੋ.
ਆਚਿਕ੍ਖਨਾਯ ਪੁਟ੍ਠੋ ਭਣਤੀਤਿ ‘‘ਕਥਂ ਦਦਮਾਨਾ ਸਾਮਿਕਸ੍ਸ ਪਿਯਾ ਹੋਤੀ’’ਤਿ ਏਵਂ ਪੁਟ੍ਠੋ ਆਚਿਕ੍ਖਤਿ. ਏਤ੍ਥ ਚ ‘‘ਏਵਂ ਦੇਹਿ ਏਵਂ ਦਦਮਾਨਾ’’ਤਿ ਵੁਤ੍ਤੇਪਿ ਸੀਸਂ ਨ ਏਤਿ. ‘‘ਮੇਥੁਨਧਮ੍ਮਂ ਏਵਂ ਦੇਹਿ ਏਵਂ ਉਪਨੇਹਿ ਏਵਂ ਮੇਥੁਨਧਮ੍ਮਂ ਦਦਮਾਨਾ ਉਪਨਯਮਾਨਾ ਪਿਯਾ ਹੋਤੀ’’ਤਿਆਦਿਨਾ ਪਨ ਨਯੇਨ ਮੇਥੁਨਧਮ੍ਮੇਨ ਘਟਿਤੇਯੇਵ ਸਙ੍ਘਾਦਿਸੇਸੋ. ਅਨੁਸਾਸਨੀਵਚਨੇਸੁਪਿ ਏਸੇਵ ਨਯੋ.
ਅਕ੍ਕੋਸਨਿਦ੍ਦੇਸੇ – ਅਨਿਮਿਤ੍ਤਾਸੀਤਿ ਨਿਮਿਤ੍ਤਰਹਿਤਾਸਿ, ਕੁਞ੍ਚਿਕਪਣਾਲਿਮਤ੍ਤਮੇਵ ਤਵ ਦਕਸੋਤਨ੍ਤਿ ਵੁਤ੍ਤਂ ਹੋਤਿ.
ਨਿਮਿਤ੍ਤਮਤ੍ਤਾਸੀਤਿ ਤਵ ਇਤ੍ਥਿਨਿਮਿਤ੍ਤਂ ਅਪਰਿਪੁਣ੍ਣਂ ਸਞ੍ਞਾਮਤ੍ਤਮੇਵਾਤਿ ਵੁਤ੍ਤਂ ਹੋਤਿ. ਅਲੋਹਿਤਾਤਿ ਸੁਕ੍ਖਸੋਤਾ. ਧੁਵਲੋਹਿਤਾਤਿ ਨਿਚ੍ਚਲੋਹਿਤਾ ਕਿਲਿਨ੍ਨਦਕਸੋਤਾ. ਧੁਵਚੋਲ਼ਾਤਿ ਨਿਚ੍ਚਪਕ੍ਖਿਤ੍ਤਾਣਿਚੋਲ਼ਾ, ਸਦਾ ਆਣਿਚੋਲ਼ਕਂ ਸੇਵਸੀਤਿ ਵੁਤ੍ਤਂ ਹੋਤਿ. ਪਗ੍ਘਰਨ੍ਤੀਤਿ ਸਵਨ੍ਤੀ; ਸਦਾ ਤੇ ਮੁਤ੍ਤਂ ਸਵਤੀਤਿ ਵੁਤ੍ਤਂ ਹੋਤਿ. ਸਿਖਰਣੀਤਿ ਬਹਿਨਿਕ੍ਖਨ੍ਤਆਣਿਮਂਸਾ. ਇਤ੍ਥਿਪਣ੍ਡਕਾਤਿ ਅਨਿਮਿਤ੍ਤਾਵ ਵੁਚ੍ਚਤਿ. ਵੇਪੁਰਿਸਿਕਾਤਿ ਸਮਸ੍ਸੁਦਾਠਿਕਾ ਪੁਰਿਸਰੂਪਾ ਇਤ੍ਥੀ. ਸਮ੍ਭਿਨ੍ਨਾਤਿ ਸਮ੍ਭਿਨ੍ਨਵਚ੍ਚਮਗ੍ਗਪਸ੍ਸਾਵਮਗ੍ਗਾ. ਉਭਤੋਬ੍ਯਞ੍ਜਨਾਤਿ ਇਤ੍ਥਿਨਿਮਿਤ੍ਤੇਨ ਚ ਪੁਰਿਸਨਿਮਿਤ੍ਤੇਨ ਚਾਤਿ ਉਭੋਹਿ ਬ੍ਯਞ੍ਜਨੇਹਿ ਸਮਨ੍ਨਾਗਤਾ.
ਇਮੇਸੁ ਚ ਪਨ ਏਕਾਦਸਸੁ ਪਦੇਸੁ ਸਿਖਰਣੀਸਿ ਸਮ੍ਭਿਨ੍ਨਾਸਿ ਉਭਤੋਬ੍ਯਞ੍ਜਨਾਸੀਤਿ ਇਮਾਨਿਯੇਵ ਤੀਣਿ ਪਦਾਨਿ ਸੁਦ੍ਧਾਨਿ ਸੀਸਂ ਏਨ੍ਤਿ. ਇਤਿ ਇਮਾਨਿ ਚ ਤੀਣਿ ਪੁਰਿਮਾਨਿ ਚ ਵਚ੍ਚਮਗ੍ਗਪਸ੍ਸਾਵਮਗ੍ਗਮੇਥੁਨਧਮ੍ਮਪਦਾਨਿ ਤੀਣੀਤਿ ਛ ਪਦਾਨਿ ਸੁਦ੍ਧਾਨਿ ਆਪਤ੍ਤਿਕਰਾਨਿ. ਸੇਸਾਨਿ ਅਨਿਮਿਤ੍ਤਾਤਿਆਦੀਨਿ ‘‘ਅਨਿਮਿਤ੍ਤੇ ਮੇਥੁਨਧਮ੍ਮਂ ਮੇ ਦੇਹੀ’’ਤਿ ਵਾ ‘‘ਅਨਿਮਿਤ੍ਤਾਸਿ ਮੇਥੁਨਧਮ੍ਮਂ ਮੇ ਦੇਹੀ’’ਤਿ ਵਾ ਆਦਿਨਾ ਨਯੇਨ ਮੇਥੁਨਧਮ੍ਮੇਨ ਘਟਿਤਾਨੇਵ ਆਪਤ੍ਤਿਕਰਾਨਿ ਹੋਨ੍ਤੀਤਿ ਵੇਦਿਤਬ੍ਬਾਨਿ.
੨੮੬. ਇਦਾਨਿ ਯ੍ਵਾਯਂ ਓਤਿਣ੍ਣੋ ਵਿਪਰਿਣਤੇਨ ਚਿਤ੍ਤੇਨ ਓਭਾਸਤਿ, ਤਸ੍ਸ ਵਚ੍ਚਮਗ੍ਗਪਸ੍ਸਾਵਮਗ੍ਗੇ ਆਦਿਸ੍ਸ ਏਤੇਸਂ ਵਣ੍ਣਭਣਨਾਦੀਨਂ ਵਸੇਨ ਵਿਤ੍ਥਾਰਤੋ ਆਪਤ੍ਤਿਭੇਦਂ ਦਸ੍ਸੇਨ੍ਤੋ ‘‘ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ’’ਤਿਆਦਿਮਾਹ. ਤੇਸਂ ਅਤ੍ਥੋ ਕਾਯਸਂਸਗ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.
ਅਯਂ ਪਨ ਵਿਸੇਸੋ – ਅਧਕ੍ਖਕਨ੍ਤਿ ਅਕ੍ਖਕਤੋ ਪਟ੍ਠਾਯ ਅਧੋ. ਉਬ੍ਭਜਾਣੁਮਣ੍ਡਲ ਜਾਣੁਮਣ੍ਡਲਤੋ ਪਟ੍ਠਾਯ ਉਦ੍ਧਂ. ਉਬ੍ਭਕ੍ਖਕਨ੍ਤਿ ਅਕ੍ਖਕਤੋ ਪਟ੍ਠਾਯ ਉਦ੍ਧਂ. ਅਧੋ ਜਾਣੁਮਣ੍ਡਲਨ੍ਤਿ ਜਾਣੁਮਣ੍ਡਲਤੋ ਪਟ੍ਠਾਯ ਅਧੋ. ਅਕ੍ਖਕਂ ਪਨ ਜਾਣੁਮਣ੍ਡਲਞ੍ਚ ਏਤ੍ਥੇਵ ਦੁਕ੍ਕਟਕ੍ਖੇਤ੍ਤੇ ਸਙ੍ਗਹਂ ਗਚ੍ਛਨ੍ਤਿ ਭਿਕ੍ਖੁਨਿਯਾ ਕਾਯਸਂਸਗ੍ਗੇ ਵਿਯ. ਨ ਹਿ ਬੁਦ੍ਧਾ ਗਰੁਕਾਪਤ੍ਤਿਂ ਸਾਵਸੇਸਂ ਪਞ੍ਞਪੇਨ੍ਤੀਤਿ. ਕਾਯਪ੍ਪਟਿਬਦ੍ਧਨ੍ਤਿ ਵਤ੍ਥਂ ਵਾ ਪੁਪ੍ਫਂ ਵਾ ਆਭਰਣਂ ਵਾ.
੨੮੭. ਅਤ੍ਥਪੁਰੇਕ੍ਖਾਰਸ੍ਸਾਤਿ ਅਨਿਮਿਤ੍ਤਾਤਿਆਦੀਨਂ ਪਦਾਨਂ ਅਤ੍ਥਂ ਕਥੇਨ੍ਤਸ੍ਸ, ਅਟ੍ਠਕਥਂ ਵਾ ਸਜ੍ਝਾਯਂ ਕਰੋਨ੍ਤਸ੍ਸ.
ਧਮ੍ਮਪੁਰੇਕ੍ਖਾਰਸ੍ਸਾਤਿ ਪਾਲ਼ਿਂ ਵਾਚੇਨ੍ਤਸ੍ਸ ਵਾ ਸਜ੍ਝਾਯਨ੍ਤਸ੍ਸ ਵਾ. ਏਵਂ ਅਤ੍ਥਞ੍ਚ ਧਮ੍ਮਞ੍ਚ ਪੁਰਕ੍ਖਤ੍ਵਾ ਭਣਨ੍ਤਸ੍ਸ ਅਤ੍ਥਪੁਰੇਕ੍ਖਾਰਸ੍ਸ ਚ ਧਮ੍ਮਪੁਰੇਕ੍ਖਾਰਸ੍ਸ ਚ ਅਨਾਪਤ੍ਤਿ.
ਅਨੁਸਾਸਨਿਪੁਰੇਕ੍ਖਾਰਸ੍ਸਾਤਿ ‘‘ਇਦਾਨਿਪਿ ਅਨਿਮਿਤ੍ਤਾਸਿ ਉਭਤ੍ਤੋਬ੍ਯਞ੍ਜਨਾਸਿ ਅਪ੍ਪਮਾਦਂ ਇਦਾਨਿ ਕਰੇਯ੍ਯਾਸਿ, ਯਥਾ ਆਯਤਿਮ੍ਪਿ ਏਵਰੂਪਾ ਨ ਹੋਹਿਸੀ’’ਤਿ ਏਵਂ ਅਨੁਸਿਟ੍ਠਿਂ ਪੁਰਕ੍ਖਤ੍ਵਾ ਭਣਨ੍ਤਸ੍ਸ ਅਨੁਸਾਸਨਿਪੁਰੇਕ੍ਖਾਰਸ੍ਸ ਅਨਾਪਤ੍ਤਿ. ਯੋ ਪਨ ਭਿਕ੍ਖੁਨੀਨਂ ਪਾਲ਼ਿਂ ਵਾਚੇਨ੍ਤੋ ਪਕਤਿਵਾਚਨਾਮਗ੍ਗਂ ਪਹਾਯ ਹਸਨ੍ਤੋ ਹਸਨ੍ਤੋ ‘‘ਸਿਖਰਣੀਸਿ ਸਮ੍ਭਿਨ੍ਨਾਸਿ ਉਭਤੋਬ੍ਯਞ੍ਜਨਾਸੀ’’ਤਿ ਪੁਨਪ੍ਪੁਨਂ ਭਣਤਿ, ਤਸ੍ਸ ਆਪਤ੍ਤਿਯੇਵ. ਉਮ੍ਮਤ੍ਤਕਸ੍ਸ ਅਨਾਪਤ੍ਤਿ. ਇਧ ਆਦਿਕਮ੍ਮਿਕੋ ਉਦਾਯਿਤ੍ਥੇਰੋ, ਤਸ੍ਸ ਅਨਾਪਤ੍ਤਿ ਆਦਿਕਮ੍ਮਿਕਸ੍ਸਾਤਿ.
ਪਦਭਾਜਨੀਯਵਣ੍ਣਨਾ ਨਿਟ੍ਠਿਤਾ.
ਸਮੁਟ੍ਠਾਨਾਦੀਸੁ ਇਦਂ ਸਿਕ੍ਖਾਪਦਂ ਤਿਸਮੁਟ੍ਠਾਨਂ ਕਾਯਚਿਤ੍ਤਤੋ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦ੍ਵਿਵੇਦਨਨ੍ਤਿ.
੨੮੮. ਵਿਨੀਤਵਤ੍ਥੂਸੁ ਲੋਹਿਤਵਤ੍ਥੁਸ੍ਮਿਂ ਸੋ ਭਿਕ੍ਖੁ ਇਤ੍ਥਿਯਾ ਲੋਹਿਤਕਂ ਨਿਮਿਤ੍ਤਂ ਸਨ੍ਧਾਯਾਹ – ਇਤਰਾ ਨ ਅਞ੍ਞਾਸਿ, ਤਸ੍ਮਾ ਦੁਕ੍ਕਟਂ.
ਕਕ੍ਕਸਲੋਮਨ੍ਤਿ ਰਸ੍ਸਲੋਮੇਹਿ ਬਹੁਲੋਮਂ. ਆਕਿਣ੍ਣਲੋਮਨ੍ਤਿ ਜਟਿਤਲੋਮਂ. ਖਰਲੋਮਨ੍ਤਿ ਥਦ੍ਧਲੋਮਂ. ਦੀਘਲੋਮਨ੍ਤਿ ਅਰਸ੍ਸਲੋਮਂ. ਸਬ੍ਬਂ ਇਤ੍ਥਿਨਿਮਿਤ੍ਤਮੇਵ ਸਨ੍ਧਾਯ ਵੁਤ੍ਤਂ.
੨੮੯. ਵਾਪਿਤਂ ਖੋ ਤੇਤਿ ਅਸਦ੍ਧਮ੍ਮਂ ਸਨ੍ਧਾਯਾਹ, ਸਾ ਅਸਲ੍ਲਕ੍ਖੇਤ੍ਵਾ ਨੋ ਚ ਖੋ ਪਟਿਵੁਤ੍ਤਨ੍ਤਿ ਆਹ. ਪਟਿਵੁਤ੍ਤਂ ਨਾਮ ਉਦਕਵਪ੍ਪੇ ਬੀਜੇਹਿ ਅਪ੍ਪਤਿਟ੍ਠਿਤੋਕਾਸੇ ਪਾਣਕੇਹਿ ਵਿਨਾਸਿਤਬੀਜੇ ਵਾ ਓਕਾਸੇ ਪੁਨ ਬੀਜਂ ਪਤਿਟ੍ਠਾਪੇਤ੍ਵਾ ਉਦਕੇਨ ਆਸਿਤ੍ਤਂ, ਥਲਵਪ੍ਪੇ ਵਿਸਮਪਤਿਤਾਨਂ ਵਾ ਬੀਜਾਨਂ ਸਮਕਰਣਤ੍ਥਾਯ ਪੁਨ ਅਟ੍ਠਦਨ੍ਤਕੇਨ ਸਮੀਕਤਂ, ਤੇਸੁ ਅਞ੍ਞਤਰਂ ਸਨ੍ਧਾਯ ਏਸਾ ਆਹ.