੮. ਪਠਮਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ

੩੮੦. ਤੇਨ ਸਮਯੇਨ ਬੁਦ੍ਧੋ ਭਗਵਾਤਿ ਦੁਟ੍ਠਦੋਸਸਿਕ੍ਖਾਪਦਂ. ਤਤ੍ਥ ਵੇਲ਼ੁਵਨੇ ਕਲਨ੍ਦਕਨਿਵਾਪੇਤਿ ਵੇਲ਼ੁਵਨਨ੍ਤਿ ਤਸ੍ਸ ਉਯ੍ਯਾਨਸ੍ਸ ਨਾਮਂ, ਤਂ ਕਿਰ ਵੇਲ਼ੁਹਿ ਚ ਪਰਿਕ੍ਖਿਤ੍ਤਂ ਅਹੋਸਿ ਅਟ੍ਠਾਰਸਹਤ੍ਥੇਨ ਚ ਪਾਕਾਰੇਨ ਗੋਪੁਰਟ੍ਟਾਲਕਯੁਤ੍ਤਂ ਨੀਲੋਭਾਸਂ ਮਨੋਰਮਂ ਤੇਨ ‘‘ਵੇਲ਼ੁਵਨ’’ਨ੍ਤਿ ਵੁਚ੍ਚਤਿ, ਕਲਨ੍ਦਕਾਨਞ੍ਚੇਤ੍ਥ ਨਿਵਾਪਂ ਅਦਂਸੁ ਤੇਨ ‘‘ਕਲਨ੍ਦਕਨਿਵਾਪ’’ਤਿ ਵੁਚ੍ਚਤਿ.

ਪੁਬ੍ਬੇ ਕਿਰ ਅਞ੍ਞਤਰੋ ਰਾਜਾ ਤਤ੍ਥ ਉਯ੍ਯਾਨਕੀਲ਼ਨਤ੍ਥਂ ਆਗਤੋ, ਸੁਰਾਮਦੇਨ ਮਤ੍ਤੋ ਦਿਵਾਸੇਯ੍ਯਂ ਸੁਪਿ, ਪਰਿਜਨੋਪਿਸ੍ਸ ਸੁਤ੍ਤੋ ਰਾਜਾਤਿ ਪੁਪ੍ਫਫਲਾਦੀਹਿ ਪਲੋਭਿਯਮਾਨੋ ਇਤੋ ਚਿਤੋ ਚ ਪਕ੍ਕਮਿ. ਅਥ ਸੁਰਾਗਨ੍ਧੇਨ ਅਞ੍ਞਤਰਸ੍ਮਾ ਸੁਸਿਰਰੁਕ੍ਖਾ ਕਣ੍ਹਸਪ੍ਪੋ ਨਿਕ੍ਖਮਿਤ੍ਵਾ ਰਞ੍ਞੋ ਅਭਿਮੁਖੋ ਆਗਚ੍ਛਤਿ, ਤਂ ਦਿਸ੍ਵਾ ਰੁਕ੍ਖਦੇਵਤਾ ‘‘ਰਞ੍ਞੋ ਜੀਵਿਤਂ ਦਸ੍ਸਾਮੀ’’ਤਿ ਕਾਲ਼ਕਵੇਸੇਨ ਆਗਨ੍ਤ੍ਵਾ ਕਣ੍ਣਮੂਲੇ ਸਦ੍ਦਮਕਾਸਿ, ਰਾਜਾ ਪਟਿਬੁਜ੍ਝਿ, ਕਣ੍ਹਸਪ੍ਪੋ ਨਿਵਤ੍ਤੋ, ਸੋ ਤਂ ਦਿਸ੍ਵਾ ‘‘ਇਮਾਯ ਕਾਲ਼ਕਾਯ ਮਮ ਜੀਵਿਤਂ ਦਿਨ੍ਨ’’ਨ੍ਤਿ ਕਾਲ਼ਕਾਨਂ ਤਤ੍ਥ ਨਿਵਾਪਂ ਪਟ੍ਠਪੇਸਿ, ਅਭਯਘੋਸਨਞ੍ਚ ਘੋਸਾਪੇਸਿ, ਤਸ੍ਮਾ ਤਂ ਤਤੋਪਭੁਤਿ ਕਲਨ੍ਦਕਨਿਵਾਪਨ੍ਤਿ ਸਙ੍ਖ੍ਯਂ ਗਤਂ. ਕਲਨ੍ਦਕਾਤਿ ਹਿ ਕਾਲ਼ਕਾਨਂ ਏਤਂ ਨਾਮਂ.

ਦਬ੍ਬੋਤਿ ਤਸ੍ਸ ਥੇਰਸ੍ਸ ਨਾਮਂ. ਮਲ੍ਲਪੁਤ੍ਤੋਤਿ ਮਲ੍ਲਰਾਜਸ੍ਸ ਪੁਤ੍ਤੋ. ਜਾਤਿਯਾ ਸਤ੍ਤਵਸ੍ਸੇਨ ਅਰਹਤ੍ਤਂ ਸਚ੍ਛਿਕਤਨ੍ਤਿ ਥੇਰੋ ਕਿਰ ਸਤ੍ਤਵਸ੍ਸਿਕੋਵ ਸਂਵੇਗਂ ਲਭਿਤ੍ਵਾ ਪਬ੍ਬਜਿਤੋ ਖੁਰਗ੍ਗੇਯੇਵ ਅਰਹਤ੍ਤਂ ਪਾਪੁਣੀਤਿ ਵੇਦਿਤਬ੍ਬੋ. ਯਂਕਿਞ੍ਚਿ ਸਾਵਕੇਨ ਪਤ੍ਤਬ੍ਬਂ ਸਬ੍ਬਂ ਤੇਨ ਅਨੁਪ੍ਪਤ੍ਤਨ੍ਤਿ ਸਾਵਕੇਨ ਪਤ੍ਤਬ੍ਬਂ ਨਾਮ ਤਿਸ੍ਸੋ ਵਿਜ੍ਜਾ, ਚਤਸ੍ਸੋ ਪਟਿਸਮ੍ਭਿਦਾ, ਛ ਅਭਿਞ੍ਞਾ, ਨਵ ਲੋਕੁਤ੍ਤਰਧਮ੍ਮਾਤਿ ਇਦਂ ਗੁਣਜਾਤਂ, ਤਂ ਸਬ੍ਬਂ ਤੇਨ ਅਨੁਪ੍ਪਤ੍ਤਂ ਹੋਤਿ. ਨਤ੍ਥਿ ਚਸ੍ਸ ਕਿਞ੍ਚਿ ਉਤ੍ਤਰਿ ਕਰਣੀਯਨ੍ਤਿ ਚਤੂਸੁ ਸਚ੍ਚੇਸੁ, ਚਤੂਹਿ ਮਗ੍ਗੇਹਿ, ਸੋਲ਼ਸਵਿਧਸ੍ਸ ਕਿਚ੍ਚਸ੍ਸ ਕਤਤ੍ਤਾ ਇਦਾਨਿਸ੍ਸ ਕਿਞ੍ਚਿ ਉਤ੍ਤਰਿ ਕਰਣੀਯਂ ਨਤ੍ਥਿ. ਕਤਸ੍ਸ ਵਾ ਪਤਿਚਯੋਤਿ ਤਸ੍ਸੇਵ ਕਤਸ੍ਸ ਕਿਚ੍ਚਸ੍ਸ ਪੁਨ ਵਡ੍ਢਨਮ੍ਪਿ ਨਤ੍ਥਿ, ਧੋਤਸ੍ਸ ਵਿਯ ਵਤ੍ਥਸ੍ਸ ਪਟਿਧੋਵਨਂ ਪਿਸਿਤਸ੍ਸ ਵਿਯ ਗਨ੍ਧਸ੍ਸ ਪਟਿਪਿਸਨਂ, ਪੁਪ੍ਫਿਤਸ੍ਸ ਵਿਯ ਚ ਪੁਪ੍ਫਸ੍ਸ ਪਟਿਪੁਪ੍ਫਨਨ੍ਤਿ. ਰਹੋਗਤਸ੍ਸਾਤਿ ਰਹਸਿ ਗਤਸ੍ਸ. ਪਟਿਸਲ੍ਲੀਨਸ੍ਸਾਤਿ ਤਤੋ ਤਤੋ ਪਟਿਕ੍ਕਮਿਤ੍ਵਾ ਸਲ੍ਲੀਨਸ੍ਸ, ਏਕੀਭਾਵਂ ਗਤਸ੍ਸਾਤਿ ਵੁਤ੍ਤਂ ਹੋਤਿ.

ਅਥ ਖੋ ਆਯਸ੍ਮਤੋ ਦਬ੍ਬਸ੍ਸ ਮਲ੍ਲਪੁਤ੍ਤਸ੍ਸ ਏਤਦਹੋਸਿ – ‘‘ਯਨ੍ਨੂਨਾਹਂ ਸਙ੍ਘਸ੍ਸ ਸੇਨਾਸਨਞ੍ਚ ਪਞ੍ਞਪੇਯ੍ਯਂ ਭਤ੍ਤਾਨਿ ਚ ਉਦ੍ਦਿਸੇਯ੍ਯ’’ਨ੍ਤਿ ਥੇਰੋ ਕਿਰ ਅਤ੍ਤਨੋ ਕਤਕਿਚ੍ਚਭਾਵਂ ਦਿਸ੍ਵਾ ‘‘ਅਹਂ ਇਮਂ ਅਨ੍ਤਿਮਸਰੀਰਂ ਧਾਰੇਮਿ, ਤਞ੍ਚ ਖੋ ਵਾਤਮੁਖੇ ਠਿਤ ਪਦੀਪੋ ਵਿਯ ਅਨਿਚ੍ਚਤਾਮੁਖੇ ਠਿਤਂ, ਨਚਿਰਸ੍ਸੇਵ ਨਿਬ੍ਬਾਯਨਧਮ੍ਮਂ ਯਾਵ ਨ ਨਿਬ੍ਬਾਯਤਿ ਤਾਵ ਕਿਨ੍ਨੁ ਖੋ ਅਹਂ ਸਙ੍ਘਸ੍ਸ ਵੇਯ੍ਯਾਵਚ੍ਚਂ ਕਰੇਯ੍ਯ’’ਨ੍ਤਿ ਚਿਨ੍ਤੇਨ੍ਤੋ ਇਤਿ ਪਟਿਸਞ੍ਚਿਕ੍ਖਤਿ – ‘‘ਤਿਰੋਰਟ੍ਠੇਸੁ ਬਹੂ ਕੁਲਪੁਤ੍ਤਾ ਭਗਵਨ੍ਤਂ ਅਦਿਸ੍ਵਾਵ ਪਬ੍ਬਜਨ੍ਤਿ, ਤੇ ਭਗਵਨ੍ਤਂ ‘ਪਸ੍ਸਿਸ੍ਸਾਮ ਚੇਵ ਵਨ੍ਦਿਸ੍ਸਾਮ ਚਾ’ਤਿ ਦੂਰਤੋਪਿ ਆਗਚ੍ਛਨ੍ਤਿ, ਤਤ੍ਰ ਯੇਸਂ ਸੇਨਾਸਨਂ ਨਪ੍ਪਹੋਤਿ, ਤੇ ਸਿਲਾਪਟ੍ਟਕੇਪਿ ਸੇਯ੍ਯਂ ਕਪ੍ਪੇਨ੍ਤਿ. ਪਹੋਮਿ ਖੋ ਪਨਾਹਂ ਅਤ੍ਤਨੋ ਆਨੁਭਾਵੇਨ ਤੇਸਂ ਕੁਲਪੁਤ੍ਤਾਨਂ ਇਚ੍ਛਾਵਸੇਨ ਪਾਸਾਦਵਿਹਾਰਅਡ੍ਢਯੋਗਾਦੀਨਿ ਮਞ੍ਚਪੀਠਕਤ੍ਥਰਣਾਦੀਨਿ ਚ ਸੇਨਾਸੇਨਾਨਿ ਨਿਮ੍ਮਿਨਿਤ੍ਵਾ ਦਾਤੁਂ. ਪੁਨਦਿਵਸੇ ਚੇਤ੍ਥ ਏਕਚ੍ਚੇ ਅਤਿਵਿਯ ਕਿਲਨ੍ਤਰੂਪਾ ਹੋਨ੍ਤਿ, ਤੇ ਗਾਰਵੇਨ ਭਿਕ੍ਖੂਨਂ ਪੁਰਤੋ ਠਤ੍ਵਾ ਭਤ੍ਤਾਨਿਪਿ ਨ ਉਦ੍ਦਿਸਾਪੇਨ੍ਤਿ, ਅਹਂ ਖੋ ਪਨ ਨੇਸਂ ਭਤ੍ਤਾਨਿਪਿ ਉਦ੍ਦਿਸਿਤੁਂ ਪਹੋਮੀ’’ਤਿ. ਇਤਿ ਪਟਿਸਞ੍ਚਿਕ੍ਖਨ੍ਤਸ੍ਸ ‘‘ਅਥ ਖੋ ਆਯਸ੍ਮਤੋ ਦਬ੍ਬਸ੍ਸ ਮਲ੍ਲਪੁਤ੍ਤਸ੍ਸ ਏਤਦਹੋਸਿ – ‘ਯਨ੍ਨੂਨਾਹਂ ਸਙ੍ਘਸ੍ਸ ਸੇਨਾਸਨਞ੍ਚ ਪਞ੍ਞਪੇਯ੍ਯਂ ਭਤ੍ਤਾਨਿ ਚ ਉਦ੍ਦਿਸੇਯ੍ਯ’’ਨ੍ਤਿ.

ਨਨੁ ਚ ਇਮਾਨਿ ਦ੍ਵੇ ਠਾਨਾਨਿ ਭਸ੍ਸਾਰਾਮਤਾਦਿਮਨੁਯੁਤ੍ਤਸ੍ਸ ਯੁਤ੍ਤਾਨਿ, ਅਯਞ੍ਚ ਖੀਣਾਸਵੋ ਨਿਪ੍ਪਪਞ੍ਚਾਰਾਮੋ, ਇਮਸ੍ਸ ਕਸ੍ਮਾ ਇਮਾਨਿ ਪਟਿਭਂਸੂਤਿ? ਪੁਬ੍ਬਪਤ੍ਥਨਾਯ ਚੋਦਿਤਤ੍ਤਾ. ਸਬ੍ਬਬੁਦ੍ਧਾਨਂ ਕਿਰ ਇਮਂ ਠਾਨਨ੍ਤਰਂ ਪਤ੍ਤਾ ਸਾਵਕਾ ਹੋਨ੍ਤਿਯੇਵ. ਅਯਞ੍ਚ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਅਞ੍ਞਤਰਸ੍ਮਿਂ ਕੁਲੇ ਪਚ੍ਚਾਜਾਤੋ ਇਮਂ ਠਾਨਨ੍ਤਰਂ ਪਤ੍ਤਸ੍ਸ ਭਿਕ੍ਖੁਨੋ ਆਨੁਭਾਵਂ ਦਿਸ੍ਵਾ ਅਟ੍ਠਸਟ੍ਠਿਯਾ ਭਿਕ੍ਖੁਸਤਸਹਸ੍ਸੇਹਿ ਸਦ੍ਧਿਂ ਭਗਵਨ੍ਤਂ ਸਤ੍ਤ ਦਿਵਸਾਨਿ ਨਿਮਨ੍ਤੇਤ੍ਵਾ ਮਹਾਦਾਨਂ ਦਤ੍ਵਾ ਪਾਦਮੂਲੇ ਨਿਪਜ੍ਜਿਤ੍ਵਾ ‘‘ਅਨਾਗਤੇ ਤੁਮ੍ਹਾਦਿਸਸ੍ਸ ਬੁਦ੍ਧਸ੍ਸ ਉਪ੍ਪਨ੍ਨਕਾਲੇ ਅਹਮ੍ਪਿ ਇਤ੍ਥਨ੍ਨਾਮੋ ਤੁਮ੍ਹਾਕਂ ਸਾਵਕੋ ਵਿਯ ਸੇਨਾਸਨਪਞ੍ਞਾਪਕੋ ਚ ਭਤ੍ਤੁਦ੍ਦੇਸਕੋ ਚ ਅਸ੍ਸ’’ਨ੍ਤਿ ਪਤ੍ਥਨਂ ਅਕਾਸਿ. ਭਗਵਾ ਅਨਾਗਤਂਸਞਾਣਂ ਪੇਸੇਤ੍ਵਾ ਅਦ੍ਦਸ, ਦਿਸ੍ਵਾ ਚ ਇਤੋ ਕਪ੍ਪਸਤਸਹਸ੍ਸਸ੍ਸ ਅਚ੍ਚਯੇਨ ਗੋਤਮੋ ਨਾਮ ਬੁਦ੍ਧੋ ਉਪ੍ਪਜ੍ਜਿਸ੍ਸਤਿ, ਤਦਾ ਤ੍ਵਂ ਦਬ੍ਬੋ ਨਾਮ ਮਲ੍ਲਪੁਤ੍ਤੋ ਹੁਤ੍ਵਾ ਜਾਤਿਯਾ ਸਤ੍ਤਵਸ੍ਸੋ ਨਿਕ੍ਖਮ੍ਮ ਪਬ੍ਬਜਿਤ੍ਵਾ ਅਰਹਤ੍ਤਂ ਸਚ੍ਛਿਕਰਿਸ੍ਸਸਿ, ਇਮਞ੍ਚ ਠਾਨਨ੍ਤਰਂ ਲਚ੍ਛਸੀ’’ਤਿ ਬ੍ਯਾਕਾਸਿ. ਸੋ ਤਤੋਪਭੁਤਿ ਦਾਨਸੀਲਾਦੀਨਿ ਪੂਰਯਮਾਨੋ ਦੇਵਮਨੁਸ੍ਸਸਮ੍ਪਤ੍ਤਿਂ ਅਨੁਭਵਿਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਤੇਨ ਭਗਵਤਾ ਬ੍ਯਾਕਤਸਦਿਸਮੇਵ ਅਰਹਤ੍ਤਂ ਸਚ੍ਛਾਕਾਸਿ. ਅਥਸ੍ਸ ਰਹੋਗਤਸ੍ਸ ‘‘ਕਿਨ੍ਨੁ ਖੋ ਅਹਂ ਸਙ੍ਘਸ੍ਸ ਵੇਯ੍ਯਾਵਚ੍ਚਂ ਕਰੇਯ੍ਯ’’ਨ੍ਤਿ ਚਿਨ੍ਤਯਤੋ ਤਾਯ ਪੁਬ੍ਬਪਤ੍ਥਨਾਯ ਚੋਦਿਤਤ੍ਤਾ ਇਮਾਨਿ ਦ੍ਵੇ ਠਾਨਾਨਿ ਪਟਿਭਂਸੂਤਿ.

ਅਥਸ੍ਸ ਏਤਦਹੋਸਿ – ‘‘ਅਹਂ ਖੋ ਅਨਿਸ੍ਸਰੋਸ੍ਮਿ ਅਤ੍ਤਨਿ, ਸਤ੍ਥਾਰਾ ਸਦ੍ਧਿਂ ਏਕਟ੍ਠਾਨੇ ਵਸਾਮਿ, ਸਚੇ ਮਂ ਭਗਵਾ ਅਨੁਜਾਨਿਸ੍ਸਤਿ, ਇਮਾਨਿ ਦ੍ਵੇ ਠਾਨਾਨਿ ਸਮਾਦਿਯਿਸ੍ਸਾਮੀ’’ਤਿ ਭਗਵਤੋ ਸਨ੍ਤਿਕਂ ਅਗਮਾਸਿ. ਤੇਨ ਵੁਤ੍ਤਂ – ‘‘ਅਥ ਖੋ ਆਯਸ੍ਮਾ ਦਬ੍ਬੋ ਮਲ੍ਲਪੁਤ੍ਤੋ…ਪੇ… ਭਤ੍ਤਾਨਿ ਚ ਉਦ੍ਦਿਸਿਤੁ’’ਨ੍ਤਿ. ਅਥ ਨਂ ਭਗਵਾ ‘‘ਸਾਧੁ ਸਾਧੁ ਦਬ੍ਬਾ’’ਤਿ ਸਮ੍ਪਹਂਸੇਤ੍ਵਾ ਯਸ੍ਮਾ ਅਰਹਤਿ ਏਵਰੂਪੋ ਅਗਤਿਗਮਨਪਰਿਬਾਹਿਰੋ ਭਿਕ੍ਖੁ ਇਮਾਨਿ ਦ੍ਵੇ ਠਾਨਾਨਿ ਵਿਚਾਰੇਤੁਂ, ਤਸ੍ਮਾ ‘‘ਤੇਨ ਹਿ ਤ੍ਵਂ ਦਬ੍ਬ ਸਙ੍ਘਸ੍ਸ ਸੇਨਾਸਨਞ੍ਚ ਪਞ੍ਞਪੇਹਿ ਭਤ੍ਤਾਨਿ ਚ ਉਦ੍ਦਿਸਾ’’ਤਿ ਆਹ. ਭਗਵਤੋ ਪਚ੍ਚਸ੍ਸੋਸੀਤਿ ਭਗਵਤੋ ਵਚਨਂ ਪਤਿਅਸ੍ਸੋਸਿ ਅਭਿਮੁਖੋ ਅਸ੍ਸੋਸਿ, ਸਮ੍ਪਟਿਚ੍ਛੀਤਿ ਵੁਤ੍ਤਂ ਹੋਤਿ.

ਪਠਮਂ ਦਬ੍ਬੋ ਯਾਚਿਤਬ੍ਬੋਤਿ ਕਸ੍ਮਾ ਭਗਵਾ ਯਾਚਾਪੇਤਿ? ਗਰਹਮੋਚਨਤ੍ਥਂ. ਪਸ੍ਸਤਿ ਹਿ ਭਗਵਾ ‘‘ਅਨਾਗਤੇ ਦਬ੍ਬਸ੍ਸ ਇਮਂ ਠਾਨਂ ਨਿਸ੍ਸਾਯ ਮੇਤ੍ਤਿਯਭੁਮਜਕਾਨਂ ਵਸੇਨ ਮਹਾਉਪਦ੍ਦਵੋ ਉਪ੍ਪਜ੍ਜਿਸ੍ਸਤਿ, ਤਤ੍ਰ ਕੇਚਿ ਗਰਹਿਸ੍ਸਨ੍ਤਿ ‘ਅਯਂ ਤੁਣ੍ਹੀਭੂਤੋ ਅਤ੍ਤਨੋ ਕਮ੍ਮਂ ਅਕਤ੍ਵਾ ਕਸ੍ਮਾ ਈਦਿਸਂ ਠਾਨਂ ਵਿਚਾਰੇਤੀ’ਤਿ. ਤਤੋ ਅਞ੍ਞੇ ਵਕ੍ਖਨ੍ਤਿ ‘ਕੋ ਇਮਸ੍ਸ ਦੋਸੋ ਏਤੇਹੇਵ ਯਾਚਿਤ੍ਵਾ ਠਪਿਤੋ’ਤਿ ਏਵਂ ਗਰਹਤੋ ਮੁਚ੍ਚਿਸ੍ਸਤੀ’’ਤਿ. ਏਵਂ ਗਰਹਮੋਚਨਤ੍ਥਂ ਯਾਚਾਪੇਤ੍ਵਾਪਿ ਪੁਨ ਯਸ੍ਮਾ ਅਸਮ੍ਮਤੇ ਭਿਕ੍ਖੁਸ੍ਮਿਂ ਸਙ੍ਘਮਜ੍ਝੇ ਕਿਞ੍ਚਿ ਕਥਯਮਾਨੇ ਖਿਯ੍ਯਨਧਮ੍ਮੋ ਉਪ੍ਪਜ੍ਜਤਿ ‘‘ਅਯਂ ਕਸ੍ਮਾ ਸਙ੍ਘਮਜ੍ਝੇ ਉਚ੍ਚਾਸਦ੍ਦਂ ਕਰੋਤਿ, ਇਸ੍ਸਰਿਯਂ ਦਸ੍ਸੇਤੀ’’ਤਿ. ਸਮ੍ਮਤੇ ਪਨ ਕਥੇਨ੍ਤੇ ‘‘ਮਾਯਸ੍ਮਨ੍ਤੋ ਕਿਞ੍ਚਿ ਅਵਚੁਤ੍ਥ, ਸਮ੍ਮਤੋ ਅਯਂ, ਕਥੇਤੁ ਯਥਾਸੁਖ’’ਨ੍ਤਿ ਵਤ੍ਤਾਰੋ ਭਵਨ੍ਤਿ. ਅਸਮ੍ਮਤਞ੍ਚ ਅਭੂਤੇਨ ਅਬ੍ਭਾਚਿਕ੍ਖਨ੍ਤਸ੍ਸ ਲਹੁਕਾ ਆਪਤ੍ਤਿ ਹੋਤਿ ਦੁਕ੍ਕਟਮਤ੍ਤਾ. ਸਮ੍ਮਤਂ ਪਨ ਅਬ੍ਭਾਚਿਕ੍ਖਤੋ ਗਰੁਕਤਰਾ ਪਾਚਿਤ੍ਤਿਯਾਪਤ੍ਤਿ ਹੋਤਿ. ਅਥ ਸਮ੍ਮਤੋ ਭਿਕ੍ਖੁ ਆਪਤ੍ਤਿਯਾ ਗਰੁਕਭਾਵੇਨ ਵੇਰੀਹਿਪਿ ਦੁਪ੍ਪਧਂਸਿਯਤਰੋ ਹੋਤਿ, ਤਸ੍ਮਾ ਤਂ ਆਯਸ੍ਮਨ੍ਤਂ ਸਮ੍ਮਨ੍ਨਾਪੇਤੁਂ ‘‘ਬ੍ਯਤ੍ਤੇਨ ਭਿਕ੍ਖੁਨਾ’’ਤਿਆਦਿਮਾਹ. ਕਿਂ ਪਨ ਦ੍ਵੇ ਸਮ੍ਮੁਤਿਯੋ ਏਕਸ੍ਸ ਦਾਤੁਂ ਵਟ੍ਟਨ੍ਤੀਤਿ? ਨ ਕੇਵਲਂ ਦ੍ਵੇ, ਸਚੇ ਪਹੋਤਿ, ਤੇਰਸਾਪਿ ਦਾਤੁਂ ਵਟ੍ਟਨ੍ਤਿ. ਅਪ੍ਪਹੋਨ੍ਤਾਨਂ ਪਨ ਏਕਾਪਿ ਦ੍ਵਿਨ੍ਨਂ ਵਾ ਤਿਣ੍ਣਂ ਵਾ ਦਾਤੁਂ ਵਟ੍ਟਤਿ.

੩੮੨. ਸਭਾਗਾਨਨ੍ਤਿ ਗੁਣਸਭਾਗਾਨਂ, ਨ ਮਿਤ੍ਤਸਨ੍ਥਵਸਭਾਗਾਨਂ. ਤੇਨੇਵਾਹ ‘‘ਯੇ ਤੇ ਭਿਕ੍ਖੂ ਸੁਤ੍ਤਨ੍ਤਿਕਾ ਤੇਸਂ ਏਕਜ੍ਝ’’ਨ੍ਤਿਆਦਿ. ਯਾਵਤਿਕਾ ਹਿ ਸੁਤ੍ਤਨ੍ਤਿਕਾ ਹੋਨ੍ਤਿ, ਤੇ ਉਚ੍ਚਿਨਿਤ੍ਵਾ ਏਕਤੋ ਤੇਸਂ ਅਨੁਰੂਪਮੇਵ ਸੇਨਾਸਨਂ ਪਞ੍ਞਪੇਤਿ; ਏਵਂ ਸੇਸਾਨਂ. ਕਾਯਦਲ਼੍ਹੀਬਹੁਲਾਤਿ ਕਾਯਸ੍ਸ ਦਲ਼੍ਹੀਭਾਵਕਰਣਬਹੁਲਾ, ਕਾਯਪੋਸਨਬਹੁਲਾਤਿ ਅਤ੍ਥੋ. ਇਮਾਯਪਿਮੇ ਆਯਸ੍ਮਨ੍ਤੋ ਰਤਿਯਾਤਿ ਇਮਾਯ ਸਗ੍ਗਮਗ੍ਗਸ੍ਸ ਤਿਰਚ੍ਛਾਨਭੂਤਾਯ ਤਿਰਚ੍ਛਾਨਕਥਾਰਤਿਯਾ. ਅਚ੍ਛਿਸ੍ਸਨ੍ਤੀਤਿ ਵਿਹਰਿਸ੍ਸਨ੍ਤਿ.

ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਤੇਨੇਵਾਲੋਕੇਨਾਤਿ ਤੇਜੋਕਸਿਣਚਤੁਤ੍ਥਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਅਭਿਞ੍ਞਾਞਾਣੇਨ ਅਙ੍ਗੁਲਿਜਲਨਂ ਅਧਿਟ੍ਠਾਯ ਤੇਨੇਵ ਤੇਜੋਧਾਤੁਸਮਾਪਤ੍ਤਿਜਨਿਤੇਨ ਅਙ੍ਗੁਲਿਜਾਲਾਲੋਕੇਨਾਤਿ ਅਤ੍ਥੋ. ਅਯਂ ਪਨ ਥੇਰਸ੍ਸ ਆਨੁਭਾਵੋ ਨਚਿਰਸ੍ਸੇਵ ਸਕਲਜਮ੍ਬੁਦੀਪੇ ਪਾਕਟੋ ਅਹੋਸਿ, ਤਂ ਸੁਤ੍ਵਾ ਇਦ੍ਧਿਪਾਟਿਹਾਰਿਯਂ ਦਟ੍ਠੁਕਾਮਾ ਅਪਿਸੁ ਭਿਕ੍ਖੂ ਸਞ੍ਚਿਚ੍ਚ ਵਿਕਾਲੇ ਆਗਚ੍ਛਨ੍ਤਿ. ਤੇ ਸਞ੍ਚਿਚ੍ਚ ਦੂਰੇ ਅਪਦਿਸਨ੍ਤੀਤਿ ਜਾਨਨ੍ਤਾਵ ਦੂਰੇ ਅਪਦਿਸਨ੍ਤਿ. ਕਥਂ? ‘‘ਅਮ੍ਹਾਕਂ ਆਵੁਸੋ ਦਬ੍ਬ ਗਿਜ੍ਝਕੂਟੇ’’ਤਿ ਇਮਿਨਾ ਨਯੇਨ.

ਅਙ੍ਗੁਲਿਯਾ ਜਲਮਾਨਾਯ ਪੁਰਤੋ ਪੁਰਤੋ ਗਚ੍ਛਤੀਤਿ ਸਚੇ ਏਕੋ ਭਿਕ੍ਖੁ ਹੋਤਿ, ਸਯਮੇਵ ਗਚ੍ਛਤਿ. ਸਚੇ ਬਹੂ ਹੋਨ੍ਤਿ, ਬਹੂ ਅਤ੍ਤਭਾਵੇ ਨਿਮ੍ਮਿਨਾਤਿ. ਸਬ੍ਬੇ ਅਤ੍ਤਨਾ ਸਦਿਸਾ ਏਵ ਸੇਨਾਸਨਂ ਪਞ੍ਞਪੇਨ੍ਤਿ.

ਅਯਂ ਮਞ੍ਚੋਤਿਆਦੀਸੁ ਪਨ ਥੇਰੇ ‘‘ਅਯਂ ਮਞ੍ਚੋ’’ਤਿ ਵਦਨ੍ਤੇ ਨਿਮ੍ਮਿਤਾਪਿ ਅਤ੍ਤਨੋ ਅਤ੍ਤਨੋ ਗਤਗਤਟ੍ਠਾਨੇ ‘‘ਅਯਂ ਮਞ੍ਚੋ’’ਤਿ ਵਦਨ੍ਤਿ; ਏਵਂ ਸਬ੍ਬਪਦੇਸੁ. ਅਯਞ੍ਹਿ ਨਿਮ੍ਮਿਤਾਨਂ ਧਮ੍ਮਤਾ –

‘‘ਏਕਸ੍ਮਿਂ ਭਾਸਮਾਨਸ੍ਮਿਂ, ਸਬ੍ਬੇ ਭਾਸਨ੍ਤਿ ਨਿਮ੍ਮਿਤਾ;

ਏਕਸ੍ਮਿਂ ਤੁਣ੍ਹਿਮਾਸੀਨੇ, ਸਬ੍ਬੇ ਤੁਣ੍ਹੀ ਭਵਨ੍ਤਿ ਤੇ’’ਤਿ.

ਯਸ੍ਮਿਂ ਪਨ ਵਿਹਾਰੇ ਮਞ੍ਚਪੀਠਾਦੀਨਿ ਨ ਪਰਿਪੂਰਨ੍ਤਿ, ਤਸ੍ਮਿਂ ਅਤ੍ਤਨੋ ਆਨੁਭਾਵੇਨ ਪੂਰੇਨ੍ਤਿ. ਤੇਨ ਨਿਮ੍ਮਿਤਾਨਂ ਅਵਤ੍ਥੁਕਵਚਨਂ ਨ ਹੋਤਿ.

ਸੇਨਾਸਨਂ ਪਞ੍ਞਪੇਤ੍ਵਾ ਪੁਨਦੇਵ ਵੇਲ਼ੁਵਨਂ ਪਚ੍ਚਾਗਚ੍ਛਤੀਤਿ ਤੇਹਿ ਸਦ੍ਧਿਂ ਜਨਪਦਕਥਂ ਕਥੇਨ੍ਤੋ ਨ ਨਿਸੀਦਤਿ, ਅਤ੍ਤਨੋ ਵਸਨਟ੍ਠਾਨਮੇਵ ਪਚ੍ਚਾਗਚ੍ਛਤਿ.

੩੮੩. ਮੇਤ੍ਤਿਯਭੂਮਜਕਾਤਿ ਮੇਤ੍ਤਿਯੋ ਚੇਵ ਭੂਮਜਕੋ ਚ, ਛਬ੍ਬਗ੍ਗਿਯਾਨਂ ਅਗ੍ਗਪੁਰਿਸਾ ਏਤੇ. ਲਾਮਕਾਨਿ ਚ ਭਤ੍ਤਾਨੀਤਿ ਸੇਨਾਸਨਾਨਿ ਤਾਵ ਨਵਕਾਨਂ ਲਾਮਕਾਨਿ ਪਾਪੁਣਨ੍ਤੀਤਿ ਅਨਚ੍ਛਰਿਯਮੇਤਂ. ਭਤ੍ਤਾਨਿ ਪਨ ਸਲਾਕਾਯੋ ਪਚ੍ਛਿਯਂ ਵਾ ਚੀਵਰਭੋਗੇ ਵਾ ਪਕ੍ਖਿਪਿਤ੍ਵਾ ਆਲੋਲ਼ੇਤ੍ਵਾ ਏਕਮੇਕਂ ਉਦ੍ਧਰਿਤ੍ਵਾ ਪਞ੍ਞਾਪੇਨ੍ਤਿ, ਤਾਨਿਪਿ ਤੇਸਂ ਮਨ੍ਦਪੁਞਤਾਯ ਲਾਮਕਾਨਿ ਸਬ੍ਬਪਚ੍ਛਿਮਾਨੇਵ ਪਾਪੁਣਨ੍ਤਿ. ਯਮ੍ਪਿ ਏਕਚਾਰਿਕਭਤ੍ਤਂ ਹੋਤਿ, ਤਮ੍ਪਿ ਏਤੇਸਂ ਪਤ੍ਤਦਿਵਸੇ ਲਾਮਕਂ ਵਾ ਹੋਤਿ, ਏਤੇ ਵਾ ਦਿਸ੍ਵਾਵ ਪਣੀਤਂ ਅਦਤ੍ਵਾ ਲਾਮਕਮੇਵ ਦੇਨ੍ਤਿ.

ਅਭਿਸਙ੍ਖਾਰਿਕਨ੍ਤਿ ਨਾਨਾਸਮ੍ਭਾਰੇਹਿ ਅਭਿਸਙ੍ਖਰਿਤ੍ਵਾ ਕਤਂ ਸੁਸਜ੍ਜਿਤਂ, ਸੁਸਮ੍ਪਾਦਿਤਨ੍ਤਿ ਅਤ੍ਥੋ. ਕਣਾਜਕਨ੍ਤਿ ਸਕੁਣ੍ਡਕਭਤ੍ਤਂ. ਬਿਲਙ੍ਗਦੁਤਿਯਨ੍ਤਿ ਕਞ੍ਜਿਕਦੁਤਿਯਂ.

ਕਲ੍ਯਾਣਭਤ੍ਤਿਕੋਤਿ ਕਲ੍ਯਾਣਂ ਸੁਨ੍ਦਰਂ ਅਤਿਵਿਯ ਪਣੀਤਂ ਭਤ੍ਤਮਸ੍ਸਾਤਿ ਕਲ੍ਯਾਣਭਤ੍ਤਿਕੋ, ਪਣੀਤਦਾਯਕਤ੍ਤਾ ਭਤ੍ਤੇਨੇਵ ਪਞ੍ਞਾਤੋ. ਚਤੁਕ੍ਕਭਤ੍ਤਂ ਦੇਤੀਤਿ ਚਤ੍ਤਾਰਿ ਭਤ੍ਤਾਨਿ ਦੇਤਿ, ਤਦ੍ਧਿਤਵੋਹਾਰੇਨ ਪਨ ‘‘ਚਤੁਕ੍ਕਭਤ੍ਤ’’ਨ੍ਤਿ ਵੁਤ੍ਤਂ. ਉਪਤਿਟ੍ਠਿਤ੍ਵਾ ਪਰਿਵਿਸਤੀਤਿ ਸਬ੍ਬਕਮ੍ਮਨ੍ਤੇ ਵਿਸ੍ਸਜ੍ਜੇਤ੍ਵਾ ਮਹਨ੍ਤਂ ਪੂਜਾਸਕ੍ਕਾਰਂ ਕਤ੍ਵਾ ਸਮੀਪੇ ਠਤ੍ਵਾ ਪਰਿਵਿਸਤਿ. ਓਦਨੇਨ ਪੁਚ੍ਛਨ੍ਤੀਤਿ ਓਦਨਹਤ੍ਥਾ ਉਪਸਙ੍ਕਮਿਤ੍ਵਾ ‘‘ਕਿਂ ਭਨ੍ਤੇ ਓਦਨਂ ਦੇਮਾ’’ਤਿ ਪੁਚ੍ਛਨ੍ਤਿ, ਏਵਂ ਕਰਣਤ੍ਥੇਯੇਵ ਕਰਣਵਚਨਂ ਹੋਤਿ. ਏਸ ਨਯੋ ਸੂਪਾਦੀਸੁ.

ਸ੍ਵਾਤਨਾਯਾਤਿ ਸ੍ਵੇ ਭਵੋ ਭਤ੍ਤਪਰਿਭੋਗੋ ਸ੍ਵਾਤਨੋ ਤਸ੍ਸਤ੍ਥਾਯ, ਸ੍ਵਾਤਨਾਯ ਸ੍ਵੇ ਕਤ੍ਤਬ੍ਬਸ੍ਸ ਭਤ੍ਤਪਰਿਭੋਗਸ੍ਸਤ੍ਥਾਯਾਤਿ ਵੁਤ੍ਤਂ ਹੋਤਿ. ਉਦ੍ਦਿਟ੍ਠਂ ਹੋਤੀਤਿ ਪਾਪੇਤ੍ਵਾ ਦਿਨ੍ਨਂ ਹੋਤਿ. ਮੇਤ੍ਤਿਯਭੂਮਜਕਾਨਂ ਖੋ ਗਹਪਤੀਤਿ ਇਦਂ ਥੇਰੋ ਅਸਮਨ੍ਨਾਹਰਿਤ੍ਵਾ ਆਹ. ਏਵਂਬਲਵਤੀ ਹਿ ਤੇਸਂ ਮਨ੍ਦਪੁਞ੍ਞਤਾ, ਯਂ ਸਤਿਵੇਪੁਲ੍ਲਪ੍ਪਤ੍ਤਾਨਮ੍ਪਿ ਅਸਮਨ੍ਨਾਹਾਰੋ ਹੋਤਿ. ਯੇ ਜੇਤਿ ਏਤ੍ਥ ਜੇਤਿ ਦਾਸਿਂ ਆਲਪਤਿ.

ਹਿਯ੍ਯੋ ਖੋ ਆਵੁਸੋ ਅਮ੍ਹਾਕਨ੍ਤਿ ਰਤ੍ਤਿਂ ਸਮ੍ਮਨ੍ਤਯਮਾਨਾ ਅਤੀਤਂ ਦਿਵਸਭਾਗਂ ਸਨ੍ਧਾਯ ‘‘ਹਿਯ੍ਯੋ’’ਤਿ ਵਦਨ੍ਤਿ. ਨ ਚਿਤ੍ਤਰੂਪਨ੍ਤਿ ਨ ਚਿਤ੍ਤਾਨੁਰੂਪਂ, ਯਥਾ ਪੁਬ੍ਬੇ ਯਤ੍ਤਕਂ ਇਚ੍ਛਨ੍ਤਿ, ਤਤ੍ਤਕਂ ਸੁਪਨ੍ਤਿ, ਨ ਏਵਂ ਸੁਪਿਂਸੁ, ਅਪ੍ਪਕਮੇਵ ਸੁਪਿਂਸੂਤਿ ਵੁਤ੍ਤਂ ਹੋਤਿ.

ਬਹਾਰਾਮਕੋਟ੍ਠਕੇਤਿ ਵੇਲ਼ੁਵਨਵਿਹਾਰਸ੍ਸ ਬਹਿਦ੍ਵਾਰਕੋਟ੍ਠਕੇ. ਪਤ੍ਤਕ੍ਖਨ੍ਧਾਤਿ ਪਤਿਤਕ੍ਖਨ੍ਧਾ ਖਨ੍ਧਟ੍ਠਿਕਂ ਨਾਮੇਤ੍ਵਾ ਨਿਸਿਨ੍ਨਾ. ਪਜ੍ਝਾਯਨ੍ਤਾਤਿ ਪਧੂਪਾਯਨ੍ਤਾ.

ਯਤੋ ਨਿਵਾਤਂ ਤਤੋ ਸਵਾਤਨ੍ਤਿ ਯਤ੍ਥ ਨਿਵਾਤਂ ਅਪ੍ਪਕੋਪਿ ਵਾਤੋ ਨਤ੍ਥਿ, ਤਤ੍ਥ ਮਹਾਵਾਤੋ ਉਟ੍ਠਿਤੋਤਿ ਅਧਿਪ੍ਪਾਯੋ. ਉਦਕਂ ਮਞ੍ਞੇ ਆਦਿਤ੍ਤਨ੍ਤਿ ਉਦਕਂ ਵਿਯ ਆਦਿਤ੍ਤਂ.

੩੮੪. ਸਰਸਿ ਤ੍ਵਂ ਦਬ੍ਬ ਏਵਰੂਪਂ ਕਤ੍ਤਾਤਿ ਤ੍ਵਂ ਦਬ੍ਬ ਏਵਰੂਪਂ ਕਤ੍ਤਾ ਸਰਸਿ. ਅਥ ਵਾ ਸਰਸਿ ਤ੍ਵਂ ਦਬ੍ਬ ਏਵਰੂਪਂ ਯਥਾਯਂ ਭਿਕ੍ਖੁਨੀ ਆਹ, ਕਤ੍ਤਾ ਧਾਸਿ ਏਵਰੂਪਂ, ਯਥਾਯਂ ਭਿਕ੍ਖੁਨੀ ਆਹਾਤਿ ਏਵਂ ਯੋਜੇਤ੍ਵਾਪੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਯੇ ਪਨ ‘‘ਕਤ੍ਵਾ’’ਤਿ ਪਠਨ੍ਤਿ ਤੇਸਂ ਉਜੁਕਮੇਵ.

ਯਥਾ ਮਂ ਭਨ੍ਤੇ ਭਗਵਾ ਜਾਨਾਤੀਤਿ ਥੇਰੋ ਕਿਂ ਦਸ੍ਸੇਤਿ. ਭਗਵਾ ਭਨ੍ਤੇ ਸਬ੍ਬਞ੍ਞੂ, ਅਹਞ੍ਚ ਖੀਣਾਸਵੋ, ਨਤ੍ਥਿ ਮਯ੍ਹਂ ਵਤ੍ਥੁਪਟਿਸੇਵਨਾ, ਤਂ ਮਂ ਭਗਵਾ ਜਾਨਾਤਿ, ਤਤ੍ਰਾਹਂ ਕਿਂ ਵਕ੍ਖਾਮਿ, ਯਥਾ ਮਂ ਭਗਵਾ ਜਾਨਾਤਿ ਤਥੇਵਾਹਂ ਦਟ੍ਠਬ੍ਬੋਤਿ.

ਨ ਖੋ ਦਬ੍ਬ ਦਬ੍ਬਾ ਏਵਂ ਨਿਬ੍ਬੇਠੇਨ੍ਤੀਤਿ ਏਤ੍ਥ ਨ ਖੋ ਦਬ੍ਬ ਪਣ੍ਡਿਤਾ ਯਥਾ ਤ੍ਵਂ ਪਰਪ੍ਪਚ੍ਚਯੇਨ ਨਿਬ੍ਬੇਠੇਸਿ, ਏਵਂ ਨਿਬ੍ਬੇਠੇਨ੍ਤਿ; ਅਪਿ ਚ ਖੋ ਯਦੇਵ ਸਾਮਂ ਞਾਤਂ ਤੇਨ ਨਿਬ੍ਬੇਠੇਨ੍ਤੀਤਿ ਏਵਮਤ੍ਥੋ ਦਟ੍ਠਬ੍ਬੋ. ਸਚੇ ਤਯਾ ਕਤਂ ਕਤਨ੍ਤਿ ਇਮਿਨਾ ਕਿਂ ਦਸ੍ਸੇਤਿ? ਨ ਹਿ ਸਕ੍ਕਾ ਪਰਿਸਬਲੇਨ ਵਾ ਪਕ੍ਖੁਪਤ੍ਥਮ੍ਭੇਨ ਵਾ ਅਕਾਰਕੋ ਕਾਰਕੋ ਕਾਤੁਂ, ਕਾਰਕੋ ਵਾ ਅਕਾਰਕੋ ਕਾਤੁਂ, ਤਸ੍ਮਾ ਯਂ ਸਯਂ ਕਤਂ ਵਾ ਅਕਤਂ ਵਾ ਤਦੇਵ ਵਤ੍ਤਬ੍ਬਨ੍ਤਿ ਦਸ੍ਸੇਤਿ. ਕਸ੍ਮਾ ਪਨ ਭਗਵਾ ਜਾਨਨ੍ਤੋਪਿ ‘‘ਅਹਂ ਜਾਨਾਮਿ, ਖੀਣਾਸਵੋ ਤ੍ਵਂ; ਨਤ੍ਥਿ ਤੁਯ੍ਹਂ ਦੋਸੋ, ਅਯਂ ਭਿਕ੍ਖੁਨੀ ਮੁਸਾਵਾਦਿਨੀ’’ਤਿ ਨਾਵੋਚਾਤਿ? ਪਰਾਨੁਦ੍ਦਯਤਾਯ. ਸਚੇ ਹਿ ਭਗਵਾ ਯਂ ਯਂ ਜਾਨਾਤਿ ਤਂ ਤਂ ਵਦੇਯ੍ਯ, ਅਞ੍ਞੇਨ ਪਾਰਾਜਿਕਂ ਆਪਨ੍ਨੇਨ ਪੁਟ੍ਠੇਨ ‘‘ਅਹਂ ਜਾਨਾਮਿ ਤ੍ਵਂ ਪਾਰਾਜਿਕੋ’’ਤਿ ਵਤ੍ਤਬ੍ਬਂ ਭਵੇਯ੍ਯ, ਤਤੋ ਸੋ ਪੁਗ੍ਗਲੋ ‘‘ਅਯਂ ਪੁਬ੍ਬੇ ਦਬ੍ਬਂ ਮਲ੍ਲਪੁਤ੍ਤਂ ਸੁਦ੍ਧਂ ਕਤ੍ਵਾ ਇਦਾਨਿ ਮਂ ਅਸੁਦ੍ਧਂ ਕਰੋਤਿ; ਕਸ੍ਸ ਦਾਨਿ ਕਿਂ ਵਦਾਮਿ, ਯਤ੍ਰ ਸਤ੍ਥਾਪਿ ਸਾਵਕੇਸੁ ਛਨ੍ਦਾਗਤਿਂ ਗਚ੍ਛਤਿ; ਕੁਤੋ ਇਮਸ੍ਸ ਸਬ੍ਬਞ੍ਞੁਭਾਵੋ’’ਤਿ ਆਘਾਤਂ ਬਨ੍ਧਿਤ੍ਵਾ ਅਪਾਯੂਪਗੋ ਭਵੇਯ੍ਯ, ਤਸ੍ਮਾ ਭਗਵਾ ਇਮਾਯ ਪਰਾਨੁਦ੍ਦਯਤਾਯ ਜਾਨਨ੍ਤੋਪਿ ਨਾਵੋਚ.

ਕਿਞ੍ਚ ਭਿਯ੍ਯੋ ਉਪਵਾਦਪਰਿਵਜ੍ਜਨਤੋਪਿ ਨਾਵੋਚ. ਯਦਿ ਹਿ ਭਗਵਾ ਏਵਂ ਵਦੇਯ੍ਯ, ਏਵਂ ਉਪਵਾਦੋ ਭਵੇਯ੍ਯ ‘‘ਦਬ੍ਬਸ੍ਸ ਮਲ੍ਲਪੁਤ੍ਤਸ੍ਸ ਵੁਟ੍ਠਾਨਂ ਨਾਮ ਭਾਰਿਯਂ, ਸਮ੍ਮਾਸਮ੍ਬੁਦ੍ਧਂ ਪਨ ਸਕ੍ਖਿਂ ਲਭਿਤ੍ਵਾ ਵੁਟ੍ਠਿਤੋ’’ਤਿ. ਇਦਞ੍ਚ ਵੁਟ੍ਠਾਨਲਕ੍ਖਣਂ ਮਞ੍ਞਮਾਨਾ ‘‘ਬੁਦ੍ਧਕਾਲੇਪਿ ਸਕ੍ਖਿਨਾ ਸੁਦ੍ਧਿ ਵਾ ਅਸੁਦ੍ਧਿ ਵਾ ਹੋਤਿ ਮਯਂ ਜਾਨਾਮ, ਅਯਂ ਪੁਗ੍ਗਲੋ ਅਸੁਦ੍ਧੋ’’ਤਿ ਏਵਂ ਪਾਪਭਿਕ੍ਖੂ ਲਜ੍ਜਿਮ੍ਪਿ ਵਿਨਾਸੇਯ੍ਯੁਨ੍ਤਿ. ਅਪਿਚ ਅਨਾਗਤੇਪਿ ਭਿਕ੍ਖੂ ਓਤਿਣ੍ਣੇ ਵਤ੍ਥੁਸ੍ਮਿਂ ਚੋਦੇਤ੍ਵਾ ਸਾਰੇਤ੍ਵਾ ‘‘ਸਚੇ ਤਯਾ ਕਤਂ, ‘ਕਤ’ਨ੍ਤਿ ਵਦੇਹੀ’’ਤਿ ਲਜ੍ਜੀਨਂ ਪਟਿਞ੍ਞਂ ਗਹੇਤ੍ਵਾ ਕਮ੍ਮਂ ਕਰਿਸ੍ਸਨ੍ਤੀਤਿ ਵਿਨਯਲਕ੍ਖਣੇ ਤਨ੍ਤਿਂ ਠਪੇਨ੍ਤੋ ‘‘ਅਹਂ ਜਾਨਾਮੀ’’ਤਿ ਅਵਤ੍ਵਾਵ ‘‘ਸਚੇ ਤਯਾ ਕਤਂ, ‘ਕਤ’ਨ੍ਤਿ ਵਦੇਹੀ’’ਤਿ ਆਹ.

ਨਾਭਿਜਾਨਾਮਿ ਸੁਪਿਨਨ੍ਤੇਨਪਿ ਮੇਥੁਨਂ ਧਮ੍ਮਂ ਪਟਿਸੇਵਿਤਾਤਿ ਸੁਪਿਨਨ੍ਤੇਨਪਿ ਮੇਥੁਨਂ ਧਮ੍ਮਂ ਨ ਅਭਿਜਾਨਾਮਿ, ਨ ਪਟਿਸੇਵਿਤਾ ਅਹਨ੍ਤਿ ਵੁਤ੍ਤਂ ਹੋਤਿ. ਅਥ ਵਾ ਪਟਿਸੇਵਿਤਾ ਹੁਤ੍ਵਾ ਸੁਪਿਨਨ੍ਤੇਨਪਿ ਮੇਥੁਨਂ ਧਮ੍ਮਂ ਨ ਜਾਨਾਮੀਤਿ ਵੁਤ੍ਤਂ ਹੋਤਿ. ਯੇ ਪਨ ‘‘ਪਟਿਸੇਵਿਤ੍ਵਾ’’ਤਿ ਪਠਨ੍ਤਿ ਤੇਸਂ ਉਜੁਕਮੇਵ. ਪਗੇਵ ਜਾਗਰੋਤਿ ਜਾਗਰਨ੍ਤੋ ਪਨ ਪਠਮਂਯੇਵ ਨ ਜਾਨਾਮੀਤਿ.

ਤੇਨ ਹਿ ਭਿਕ੍ਖਵੇ ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥਾਤਿ ਯਸ੍ਮਾ ਦਬ੍ਬਸ੍ਸ ਚ ਇਮਿਸ੍ਸਾ ਚ ਵਚਨਂ ਨ ਘਟੀਯਤਿ ਤਸ੍ਮਾ ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥਾਤਿ ਵੁਤ੍ਤਂ ਹੋਤਿ.

ਤਤ੍ਥ ਤਿਸ੍ਸੋ ਨਾਸਨਾ – ਲਿਙ੍ਗਨਾਸਨਾ, ਸਂਵਾਸਨਾਸਨਾ, ਦਣ੍ਡਕਮ੍ਮਨਾਸਨਾਤਿ. ਤਾਸੁ ‘‘ਦੂਸਕੋ ਨਾਸੇਤਬ੍ਬੋ’’ਤਿ (ਪਾਰਾ. ੬੬) ਅਯਂ ‘‘ਲਿਙ੍ਗਨਾਸਨਾ’’. ਆਪਤ੍ਤਿਯਾ ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਵਾ ਉਕ੍ਖੇਪਨੀਯਕਮ੍ਮਂ ਕਰੋਨ੍ਤਿ, ਅਯਂ ‘‘ਸਂਵਾਸਨਾਸਨਾ’’. ‘‘ਚਰ ਪਿਰੇ ਵਿਨਸ੍ਸਾ’’ਤਿ (ਪਾਚਿ. ੪੨੯) ਦਣ੍ਡਕਮ੍ਮਂ ਕਰੋਨ੍ਤਿ, ਅਯਂ ‘‘ਦਣ੍ਡਕਮ੍ਮਨਾਸਨਾ’’. ਇਧ ਪਨ ਲਿਙ੍ਗਨਾਸਨਂ ਸਨ੍ਧਾਯਾਹ – ‘‘ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥਾ’’ਤਿ.

ਇਮੇ ਚ ਭਿਕ੍ਖੂ ਅਨੁਯੁਞ੍ਜਥਾਤਿ ਇਮਿਨਾ ਇਮਂ ਦੀਪੇਤਿ ‘‘ਅਯਂ ਭਿਕ੍ਖੁਨੀ ਅਤ੍ਤਨੋ ਧਮ੍ਮਤਾਯ ਅਕਾਰਿਕਾ ਅਦ੍ਧਾ ਅਞ੍ਞੇਹਿ ਉਯ੍ਯੋਜਿਤਾ, ਤਸ੍ਮਾ ਯੇਹਿ ਉਯ੍ਯੋਜਿਤਾ ਇਮੇ ਭਿਕ੍ਖੂ ਅਨੁਯੁਞ੍ਜਥ ਗਵੇਸਥ ਜਾਨਾਥਾ’’ਤਿ.

ਕਿਂ ਪਨ ਭਗਵਤਾ ਮੇਤ੍ਤਿਯਾ ਭਿਕ੍ਖੁਨੀ ਪਟਿਞ੍ਞਾਯ ਨਾਸਿਤਾ ਅਪ੍ਪਟਿਞ੍ਞਾਯ ਨਾਸਿਤਾਤਿ, ਕਿਞ੍ਚੇਤ੍ਥ ਯਦਿ ਤਾਵ ਪਟਿਞ੍ਞਾਯ ਨਾਸਿਤਾ, ਥੇਰੋ ਕਾਰਕੋ ਹੋਤਿ ਸਦੋਸੋ? ਅਥ ਅਪ੍ਪਟਿਞ੍ਞਾਯ, ਥੇਰੋ ਅਕਾਰਕੋ ਹੋਤਿ ਨਿਦ੍ਦੋਸੋ.

ਭਾਤਿਯਰਾਜਕਾਲੇਪਿ ਮਹਾਵਿਹਾਰਵਾਸੀਨਞ੍ਚ ਅਭਯਗਿਰਿਵਾਸੀਨਞ੍ਚ ਥੇਰਾਨਂ ਇਮਸ੍ਮਿਂਯੇਵ ਪਦੇ ਵਿਵਾਦੋ ਅਹੋਸਿ. ਅਭਯਗਿਰਿਵਾਸਿਨੋਪਿ ਅਤ੍ਤਨੋ ਸੁਤ੍ਤਂ ਵਤ੍ਵਾ ‘‘ਤੁਮ੍ਹਾਕਂ ਵਾਦੇ ਥੇਰੋ ਕਾਰਕੋ ਹੋਤੀ’’ਤਿ ਵਦਨ੍ਤਿ. ਮਹਾਵਿਹਾਰਵਾਸਿਨੋਪਿ ਅਤ੍ਤਨੋ ਸੁਤ੍ਤਂ ਵਤ੍ਵਾ ‘‘ਤੁਮ੍ਹਾਕਂ ਵਾਦੇ ਥੇਰੋ ਕਾਰਕੋ ਹੋਤੀ’’ਤਿ ਵਦਨ੍ਤਿ. ਪਞ੍ਹੋ ਨ ਛਿਜ੍ਜਤਿ. ਰਾਜਾ ਸੁਤ੍ਵਾ ਥੇਰੇ ਸਨ੍ਨਿਪਾਤੇਤ੍ਵਾ ਦੀਘਕਾਰਾਯਨਂ ਨਾਮ ਬ੍ਰਾਹ੍ਮਣਜਾਤਿਯਂ ਅਮਚ੍ਚਂ ‘‘ਥੇਰਾਨਂ ਕਥਂ ਸੁਣਾਹੀ’’ਤਿ ਆਣਾਪੇਸਿ. ਅਮਚ੍ਚੋ ਕਿਰ ਪਣ੍ਡਿਤੋ ਭਾਸਨ੍ਤਰਕੁਸਲੋ ਸੋ ਆਹ – ‘‘ਵਦਨ੍ਤੁ ਤਾਵ ਥੇਰਾ ਸੁਤ੍ਤ’’ਨ੍ਤਿ. ਤਤੋ ਅਭਯਗਿਰਿਥੇਰਾ ਅਤ੍ਤਨੋ ਸੁਤ੍ਤਂ ਵਦਿਂਸੁ – ‘‘ਤੇਨ ਹਿ, ਭਿਕ੍ਖਵੇ, ਮੇਤ੍ਤਿਯਂ ਭਿਕ੍ਖੁਨਿਂ ਸਕਾਯ ਪਟਿਞ੍ਞਾਯ ਨਾਸੇਥਾ’’ਤਿ. ਅਮਚ੍ਚੋ ‘‘ਭਨ੍ਤੇ, ਤੁਮ੍ਹਾਕਂ ਵਾਦੇ ਥੇਰੋ ਕਾਰਕੋ ਹੋਤਿ ਸਦੋਸੋ’’ਤਿ ਆਹ. ਮਹਾਵਿਹਾਰਵਾਸਿਨੋਪਿ ਅਤ੍ਤਨੋ ਸੁਤ੍ਤਂ ਵਦਿਂਸੁ – ‘‘ਤੇਨ ਹਿ, ਭਿਕ੍ਖਵੇ, ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥਾ’’ਤਿ. ਅਮਚ੍ਚੋ ‘‘ਭਨ੍ਤੇ, ਤੁਮ੍ਹਾਕਂ ਵਾਦੇ ਥੇਰੋ ਅਕਾਰਕੋ ਹੋਤਿ ਨਿਦ੍ਦੋਸੋ’’ਤਿ ਆਹ. ਕਿਂ ਪਨੇਤ੍ਥ ਯੁਤ੍ਤਂ? ਯਂ ਪਚ੍ਛਾ ਵੁਤ੍ਤਂ ਵਿਚਾਰਿਤਞ੍ਹੇਤਂ ਅਟ੍ਠਕਥਾਚਰਿਯੇਹਿ, ਭਿਕ੍ਖੁ ਭਿਕ੍ਖੁਂ ਅਮੂਲਕੇਨ ਅਨ੍ਤਿਮਵਤ੍ਥੁਨਾ ਅਨੁਦ੍ਧਂਸੇਤਿ, ਸਙ੍ਘਾਦਿਸੇਸੋ; ਭਿਕ੍ਖੁਨਿਂ ਅਨੁਦ੍ਧਂਸੇਤਿ, ਦੁਕ੍ਕਟਂ. ਕੁਰੁਨ੍ਦਿਯਂ ਪਨ ‘‘ਮੁਸਾਵਾਦੇ ਪਾਚਿਤ੍ਤਿਯ’’ਨ੍ਤਿ ਵੁਤ੍ਤਂ.

ਤਤ੍ਰਾਯਂ ਵਿਚਾਰਣਾ, ਪੁਰਿਮਨਯੇ ਤਾਵ ਅਨੁਦ੍ਧਂਸਨਾਧਿਪ੍ਪਾਯਤ੍ਤਾ ਦੁਕ੍ਕਟਮੇਵ ਯੁਜ੍ਜਤਿ. ਯਥਾ ਸਤਿਪਿ ਮੁਸਾਵਾਦੇ ਭਿਕ੍ਖੁਨੋ ਭਿਕ੍ਖੁਸ੍ਮਿਂ ਸਙ੍ਘਾਦਿਸੇਸੋ, ਸਤਿਪਿ ਚ ਮੁਸਾਵਾਦੇ ਅਸੁਦ੍ਧਂ ਸੁਦ੍ਧਦਿਟ੍ਠਿਨੋ ਅਕ੍ਕੋਸਾਧਿਪ੍ਪਾਯੇਨ ਵਦਨ੍ਤਸ੍ਸ ਓਮਸਵਾਦੇਨੇਵ ਪਾਚਿਤ੍ਤਿਯਂ, ਨ ਸਮ੍ਪਜਾਨਮੁਸਾਵਾਦੇਨ; ਏਵਂ ਇਧਾਪਿ ਅਨੁਦ੍ਧਂਸਨਾਧਿਪ੍ਪਾਯਤ੍ਤਾ ਸਮ੍ਪਜਾਨਮੁਸਾਵਾਦੇ ਪਾਚਿਤ੍ਤਿਯਂ ਨ ਯੁਜ੍ਜਤਿ, ਦੁਕ੍ਕਟਮੇਵ ਯੁਤ੍ਤਂ. ਪਚ੍ਛਿਮਨਯੇਪਿ ਮੁਸਾਵਾਦਤ੍ਤਾ ਪਾਚਿਤ੍ਤਿਯਮੇਵ ਯੁਜ੍ਜਤਿ, ਵਚਨਪ੍ਪਮਾਣਤੋ ਹਿ ਅਨੁਦ੍ਧਂਸਨਾਧਿਪ੍ਪਾਯੇਨ ਭਿਕ੍ਖੁਸ੍ਸ ਭਿਕ੍ਖੁਸ੍ਮਿਂ ਸਙ੍ਘਾਦਿਸੇਸੋ. ਅਕ੍ਕੋਸਾਧਿਪ੍ਪਾਯਸ੍ਸ ਚ ਓਮਸਵਾਦੋ. ਭਿਕ੍ਖੁਸ੍ਸ ਪਨ ਭਿਕ੍ਖੁਨਿਯਾ ਦੁਕ੍ਕਟਨ੍ਤਿਵਚਨਂ ਨਤ੍ਥਿ, ਸਮ੍ਪਜਾਨਮੁਸਾਵਾਦੇ ਪਾਚਿਤ੍ਤਿਯਨ੍ਤਿ ਵਚਨਮਤ੍ਥਿ, ਤਸ੍ਮਾ ਪਾਚਿਤ੍ਤਿਯਮੇਵ ਯੁਜ੍ਜਤਿ.

ਤਤ੍ਰ ਪਨ ਇਦਂ ਉਪਪਰਿਕ੍ਖਿਤਬ੍ਬਂ – ‘‘ਅਨੁਦ੍ਧਂਸਨਾਧਿਪ੍ਪਾਯੇ ਅਸਤਿ ਪਾਚਿਤ੍ਤਿਯਂ, ਤਸ੍ਮਿਂ ਸਤਿ ਕੇਨ ਭਵਿਤਬ੍ਬ’’ਨ੍ਤਿ? ਤਤ੍ਰ ਯਸ੍ਮਾ ਮੁਸਾ ਭਣਨ੍ਤਸ੍ਸ ਪਾਚਿਤ੍ਤਿਯੇ ਸਿਦ੍ਧੇਪਿ ਅਮੂਲਕੇਨ ਸਙ੍ਘਾਦਿਸੇਸੇਨ ਅਨੁਦ੍ਧਂਸਨੇ ਵਿਸੁਂ ਪਾਚਿਤ੍ਤਿਯਂ ਵੁਤ੍ਤਂ, ਤਸ੍ਮਾ ਅਨੁਦ੍ਧਂਸਨਾਧਿਪ੍ਪਾਯੇ ਸਤਿ ਸਮ੍ਪਜਾਨਮੁਸਾਵਾਦੇ ਪਾਚਿਤ੍ਤਿਯਸ੍ਸ ਓਕਾਸੋ ਨ ਦਿਸ੍ਸਤਿ, ਨ ਚ ਸਕ੍ਕਾ ਅਨੁਦ੍ਧਂਸੇਨ੍ਤਸ੍ਸ ਅਨਾਪਤ੍ਤਿਯਾ ਭਵਿਤੁਨ੍ਤਿ ਪੁਰਿਮਨਯੋਵੇਤ੍ਥ ਪਰਿਸੁਦ੍ਧਤਰੋ ਖਾਯਤਿ. ਤਥਾ ਭਿਕ੍ਖੁਨੀ ਭਿਕ੍ਖੁਨਿਂ ਅਮੂਲਕੇਨ ਅਨ੍ਤਿਮਵਤ੍ਥੁਨਾ ਅਨੁਦ੍ਧਂਸੇਤਿ ਸਙ੍ਘਾਦਿਸੇਸੋ, ਭਿਕ੍ਖੁਂ ਅਨੁਦ੍ਧਂਸੇਤਿ ਦੁਕ੍ਕਟਂ, ਤਤ੍ਰ ਸਙ੍ਘਾਦਿਸੇਸੋ ਵੁਟ੍ਠਾਨਗਾਮੀ ਦੁਕ੍ਕਟਂ, ਦੇਸਨਾਗਾਮੀ ਏਤੇਹਿ ਨਾਸਨਾ ਨਤ੍ਥਿ. ਯਸ੍ਮਾ ਪਨ ਸਾ ਪਕਤਿਯਾਵ ਦੁਸ੍ਸੀਲਾ ਪਾਪਭਿਕ੍ਖੁਨੀ ਇਦਾਨਿ ਚ ਸਯਮੇਵ ‘‘ਦੁਸ੍ਸੀਲਾਮ੍ਹੀ’’ਤਿ ਵਦਤਿ ਤਸ੍ਮਾ ਨਂ ਭਗਵਾ ਅਸੁਦ੍ਧਤ੍ਤਾਯੇਵ ਨਾਸੇਸੀਤਿ.

ਅਥ ਖੋ ਮੇਤ੍ਤਿਯਭੂਮਜਕਾਤਿ ਏਵਂ ‘‘ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥ, ਇਮੇ ਚ ਭਿਕ੍ਖੂ ਅਨੁਯੁਞ੍ਜਥਾ’’ਤਿ ਵਤ੍ਵਾ ਉਟ੍ਠਾਯਾਸਨਾ ਵਿਹਾਰਂ ਪਵਿਟ੍ਠੇ ਭਗਵਤਿ ਤੇਹਿ ਭਿਕ੍ਖੂਹਿ ‘‘ਦੇਥ ਦਾਨਿ ਇਮਿਸ੍ਸਾ ਸੇਤਕਾਨੀ’’ਤਿ ਨਾਸਿਯਮਾਨਂ ਤਂ ਭਿਕ੍ਖੁਨਿਂ ਦਿਸ੍ਵਾ ਤੇ ਭਿਕ੍ਖੂ ਤਂ ਮੋਚੇਤੁਕਾਮਤਾਯ ਅਤ੍ਤਨੋ ਅਪਰਾਧਂ ਆਵਿਕਰਿਂਸੁ, ਏਤਮਤ੍ਥਂ ਦਸ੍ਸੇਤੁਂ ‘‘ਅਥ ਖੋ ਮੇਤ੍ਤਿਯਭੂਮਜਕਾ’’ਤਿਆਦਿ ਵੁਤ੍ਤਂ.

੩੮੫-੬. ਦੁਟ੍ਠੋ ਦੋਸੋਤਿ ਦੂਸਿਤੋ ਚੇਵ ਦੂਸਕੋ ਚ. ਉਪ੍ਪਨ੍ਨੇ ਹਿ ਦੋਸੇ ਪੁਗ੍ਗਲੋ ਤੇਨ ਦੋਸੇਨ ਦੂਸਿਤੋ ਹੋਤਿ ਪਕਤਿਭਾਵਂ ਜਹਾਪਿਤੋ, ਤਸ੍ਮਾ ‘‘ਦੁਟ੍ਠੋ’’ਤਿ ਵੁਚ੍ਚਤਿ. ਪਰਞ੍ਚ ਦੂਸੇਤਿ ਵਿਨਾਸੇਤਿ, ਤਸ੍ਮਾ ‘‘ਦੋਸੋ’’ਤਿ ਵੁਚ੍ਚਤਿ. ਇਤਿ ‘‘ਦੁਟ੍ਠੋ ਦੋਸੋ’’ਤਿ ਏਕਸ੍ਸੇਵੇਤਂ ਪੁਗ੍ਗਲਸ੍ਸ ਆਕਾਰਨਾਨਤ੍ਤੇਨ ਨਿਦਸ੍ਸਨਂ, ਤੇਨ ਵੁਤ੍ਤਂ ‘‘ਦੁਟ੍ਠੋ ਦੋਸੋਤਿ ਦੂਸਿਤੋ ਚੇਵ ਦੂਸਕੋ ਚਾ’’ਤਿ ਤਤ੍ਥ ਸਦ੍ਦਲਕ੍ਖਣਂ ਪਰਿਯੇਸਿਤਬ੍ਬਂ. ਯਸ੍ਮਾ ਪਨ ਸੋ ‘‘ਦੁਟ੍ਠੋ ਦੋਸੋ’’ਤਿ ਸਙ੍ਖ੍ਯਂ ਗਤੋ ਪਟਿਘਸਮਙ੍ਗੀਪੁਗ੍ਗਲੋ ਕੁਪਿਤਾਦਿਭਾਵੇ ਠਿਤੋਵ ਹੋਤਿ, ਤੇਨਸ੍ਸ ਪਦਭਾਜਨੇ ‘‘ਕੁਪਿਤੋ’’ਤਿਆਦਿ ਵੁਤ੍ਤਂ. ਤਤ੍ਥ ਕੁਪਿਤੋਤਿ ਕੁਪ੍ਪਭਾਵਂ ਪਕਤਿਤੋ ਚਵਨਭਾਵਂ ਪਤ੍ਤੋ. ਅਨਤ੍ਤਮਨੋਤਿ ਨ ਸਕਮਨੋ ਅਤ੍ਤਨੋ ਵਸੇ ਅਟ੍ਠਿਤਚਿਤ੍ਤੋ; ਅਪਿਚ ਪੀਤਿਸੁਖੇਹਿ ਨ ਅਤ੍ਤਮਨੋ ਨ ਅਤ੍ਤਚਿਤ੍ਤੋਤਿ ਅਨਤ੍ਤਮਨੋ. ਅਨਭਿਰਦ੍ਧੋਤਿ ਨ ਸੁਖਿਤੋ ਨ ਵਾ ਪਸਾਦਿਤੋਤਿ ਅਨਭਿਰਦ੍ਧੋ. ਪਟਿਘੇਨ ਆਹਤਂ ਚਿਤ੍ਤਮਸ੍ਸਾਤਿ ਆਹਤਚਿਤ੍ਤੋ. ਚਿਤ੍ਤਥਦ੍ਧਭਾਵਚਿਤ੍ਤਕਚਵਰਸਙ੍ਖਾਤਂ ਪਟਿਘਖੀਲਂ ਜਾਤਮਸ੍ਸਾਤਿ ਖਿਲਜਾਤੋ. ਅਪ੍ਪਤੀਤੋਤਿ ਨਪ੍ਪਤੀਤੋ ਪੀਤਿਸੁਖਾਦੀਹਿ ਵਜ੍ਜਿਤੋ, ਨ ਅਭਿਸਟੋਤਿ ਅਤ੍ਥੋ. ਪਦਭਾਜਨੇ ਪਨ ਯੇਸਂ ਧਮ੍ਮਾਨਂ ਵਸੇਨ ਅਪ੍ਪਤੀਤੋ ਹੋਤਿ, ਤੇ ਦਸ੍ਸੇਤੁਂ ‘‘ਤੇਨ ਚ ਕੋਪੇਨਾ’’ਤਿਆਦਿ ਵੁਤ੍ਤਂ.

ਤਤ੍ਥ ਤੇਨ ਚ ਕੋਪੇਨਾਤਿ ਯੇਨ ਦੁਟ੍ਠੋਤਿ ਚ ਕੁਪਿਤੋਤਿ ਚ ਵੁਤ੍ਤੋ ਉਭਯਮ੍ਪਿ ਹੇਤਂ ਪਕਤਿਭਾਵਂ ਜਹਾਪਨਤੋ ਏਕਾਕਾਰਂ ਹੋਤਿ. ਤੇਨ ਚ ਦੋਸੇਨਾਤਿ ਯੇਨ ‘‘ਦੋਸੋ’’ਤਿ ਵੁਤ੍ਤੋ. ਇਮੇਹਿ ਦ੍ਵੀਹਿ ਸਙ੍ਖਾਰਕ੍ਖਨ੍ਧਮੇਵ ਦਸ੍ਸੇਤਿ.

ਤਾਯ ਚ ਅਨਤ੍ਤਮਨਤਾਯਾਤਿ ਯਾਯ ‘‘ਅਨਤ੍ਤਮਨੋ’’ਤਿ ਵੁਤ੍ਤੋ. ਤਾਯ ਚ ਅਨਭਿਰਦ੍ਧਿਯਾਤਿ ਯਾਯ ‘‘ਅਨਭਿਰਦ੍ਧੋ’’ਤਿ ਵੁਤ੍ਤੋ. ਇਮੇਹਿ ਦ੍ਵੀਹਿ ਵੇਦਨਾਕ੍ਖਨ੍ਧਂ ਦਸ੍ਸੇਤਿ.

ਅਮੂਲਕੇਨ ਪਾਰਾਜਿਕੇਨਾਤਿ ਏਤ੍ਥ ਨਾਸ੍ਸ ਮੂਲਨ੍ਤਿ ਅਮੂਲਕਂ, ਤਂ ਪਨਸ੍ਸ ਅਮੂਲਕਤ੍ਤਂ ਯਸ੍ਮਾ ਚੋਦਕਵਸੇਨ ਅਧਿਪ੍ਪੇਤਂ, ਨ ਚੁਦਿਤਕਵਸੇਨ. ਤਸ੍ਮਾ ਤਮਤ੍ਥਂ ਦਸ੍ਸੇਤੁਂ ਪਦਭਾਜਨੇ ‘‘ਅਮੂਲਕਂ ਨਾਮ ਅਦਿਟ੍ਠਂ ਅਸੁਤਂ ਅਪਰਿਸਙ੍ਕਿਤ’’ਨ੍ਤਿ ਆਹ. ਤੇਨ ਇਮਂ ਦੀਪੇਤਿ ‘‘ਯਂ ਪਾਰਾਜਿਕਂ ਚੋਦਕੇਨ ਚੁਦਿਤਕਮ੍ਹਿ ਪੁਗ੍ਗਲੇ ਨੇਵ ਦਿਟ੍ਠਂ ਨ ਸੁਤਂ ਨ ਪਰਿਸਙ੍ਕਿਤਂ ਇਦਂ ਏਤੇਸਂ ਦਸ੍ਸਨਸਵਨਪਰਿਸਙ੍ਕਾਸਙ੍ਖਾਤਾਨਂ ਮੂਲਾਨਂ ਅਭਾਵਤੋ ਅਮੂਲਕਂ ਨਾਮ, ਤਂ ਪਨ ਸੋ ਆਪਨ੍ਨੋ ਵਾ ਹੋਤੁ ਅਨਾਪਨ੍ਨੋ ਵਾ ਏਤਂ ਇਧ ਅਪ੍ਪਮਾਣਨ੍ਤਿ.

ਤਤ੍ਥ ਅਦਿਟ੍ਠਂ ਨਾਮ ਅਤ੍ਤਨੋ ਪਸਾਦਚਕ੍ਖੁਨਾ ਵਾ ਦਿਬ੍ਬਚਕ੍ਖੁਨਾ ਵਾ ਅਦਿਟ੍ਠਂ. ਅਸੁਤਂ ਨਾਮ ਤਥੇਵ ਕੇਨਚਿ ਵੁਚ੍ਚਮਾਨਂ ਨ ਸੁਤਂ. ਅਪਰਿਸਙ੍ਕਿਤਂ ਨਾਮ ਚਿਤ੍ਤੇਨ ਅਪਰਿਸਙ੍ਕਿਤਂ.

‘‘ਦਿਟ੍ਠਂ’’ ਨਾਮ ਅਤ੍ਤਨਾ ਵਾ ਪਰੇਨ ਵਾ ਪਸਾਦਚਕ੍ਖੁਨਾ ਵਾ ਦਿਬ੍ਬਚਕ੍ਖੁਨਾ ਵਾ ਦਿਟ੍ਠਂ. ‘‘ਸੁਤਂ’’ ਨਾਮ ਤਥੇਵ ਸੁਤਂ. ‘‘ਪਰਿਸਙ੍ਕਿਤ’’ਮ੍ਪਿ ਅਤ੍ਤਨਾ ਵਾ ਪਰੇਨ ਵਾ ਪਰਿਸਙ੍ਕਿਤਂ. ਤਤ੍ਥ ਅਤ੍ਤਨਾ ਦਿਟ੍ਠਂ ਦਿਟ੍ਠਮੇਵ, ਪਰੇਹਿ ਦਿਟ੍ਠਂ ਅਤ੍ਤਨਾ ਸੁਤਂ, ਪਰੇਹਿ ਸੁਤਂ, ਪਰੇਹਿ ਪਰਿਸਙ੍ਕਿਤਨ੍ਤਿ ਇਦਂ ਪਨ ਸਬ੍ਬਮ੍ਪਿ ਅਤ੍ਤਨਾ ਸੁਤਟ੍ਠਾਨੇਯੇਵ ਤਿਟ੍ਠਤਿ.

ਪਰਿਸਙ੍ਕਿਤਂ ਪਨ ਤਿਵਿਧਂ – ਦਿਟ੍ਠਪਰਿਸਙ੍ਕਿਤਂ, ਸੁਤਪਰਿਸਙ੍ਕਿਤਂ, ਮੁਤਪਰਿਸਙ੍ਕਿਤਨ੍ਤਿ. ਤਤ੍ਥ ਦਿਟ੍ਠਪਰਿਸਙ੍ਕਿਤਂ ਨਾਮ ਏਕੋ ਭਿਕ੍ਖੁ ਉਚ੍ਚਾਰਪਸ੍ਸਾਵਕਮ੍ਮੇਨ ਗਾਮਸਮੀਪੇ ਏਕਂ ਗੁਮ੍ਬਂ ਪਵਿਟ੍ਠੋ, ਅਞ੍ਞਤਰਾਪਿ ਇਤ੍ਥੀ ਕੇਨਚਿਦੇਵ ਕਰਣੀਯੇਨ ਤਂ ਗੁਮ੍ਬਂ ਪਵਿਸਿਤ੍ਵਾ ਨਿਵਤ੍ਤਾ, ਨਾਪਿ ਭਿਕ੍ਖੁ ਇਤ੍ਥਿਂ ਅਦ੍ਦਸ; ਨ ਇਤ੍ਥੀ ਭਿਕ੍ਖੁਂ, ਅਦਿਸ੍ਵਾਵ ਉਭੋਪਿ ਯਥਾਰੁਚਿਂ ਪਕ੍ਕਨ੍ਤਾ, ਅਞ੍ਞਤਰੋ ਭਿਕ੍ਖੁ ਉਭਿਨ੍ਨਂ ਤਤੋ ਨਿਕ੍ਖਮਨਂ ਸਲ੍ਲਕ੍ਖੇਤ੍ਵਾ ‘‘ਅਦ੍ਧਾ ਇਮੇਸਂ ਕਤਂ ਵਾ ਕਰਿਸ੍ਸਨ੍ਤਿ ਵਾ’’ਤਿ ਪਰਿਸਙ੍ਕਤਿ, ਇਦਂ ਦਿਟ੍ਠਪਰਿਸਙ੍ਕਿਤਂ ਨਾਮ.

ਸੁਤਪਰਿਸਙ੍ਕਿਤਂ ਨਾਮ ਇਧੇਕਚ੍ਚੋ ਅਨ੍ਧਕਾਰੇ ਵਾ ਪਟਿਚ੍ਛਨ੍ਨੇ ਵਾ ਓਕਾਸੇ ਮਾਤੁਗਾਮੇਨ ਸਦ੍ਧਿਂ ਭਿਕ੍ਖੁਨੋ ਤਾਦਿਸਂ ਪਟਿਸਨ੍ਥਾਰਵਚਨਂ ਸੁਣਾਤਿ, ਸਮੀਪੇ ਅਞ੍ਞਂ ਵਿਜ੍ਜਮਾਨਮ੍ਪਿ ‘‘ਅਤ੍ਥਿ ਨਤ੍ਥੀ’’ਤਿ ਨ ਜਾਨਾਤਿ, ਸੋ ‘‘ਅਦ੍ਧਾ ਇਮੇਸਂ ਕਤਂ ਵਾ ਕਰਿਸ੍ਸਨ੍ਤਿ ਵਾ’’ਤਿ ਪਰਿਸਙ੍ਕਤਿ, ਇਦਂ ਸੁਤਪਰਿਸਙ੍ਕਿਤਂ ਨਾਮ.

ਮੁਤਪਰਿਸਙ੍ਕਿਤਂ ਨਾਮ ਸਮ੍ਬਹੁਲਾ ਧੁਤ੍ਤਾ ਰਤ੍ਤਿਭਾਗੇ ਪੁਪ੍ਫਗਨ੍ਧਮਂਸਸੁਰਾਦੀਨਿ ਗਹੇਤ੍ਵਾ ਇਤ੍ਥੀਹਿ ਸਦ੍ਧਿਂ ਏਕਂ ਪਚ੍ਚਨ੍ਤਵਿਹਾਰਂ ਗਨ੍ਤ੍ਵਾ ਮਣ੍ਡਪੇ ਵਾ ਭੋਜਨਸਾਲਾਦੀਸੁ ਵਾ ਯਥਾਸੁਖਂ ਕੀਲ਼ਿਤ੍ਵਾ ਪੁਪ੍ਫਾਦੀਨਿ ਵਿਕਿਰਿਤ੍ਵਾ ਗਤਾ, ਪੁਨਦਿਵਸੇ ਭਿਕ੍ਖੂ ਤਂ ਵਿਪ੍ਪਕਾਰਂ ਦਿਸ੍ਵਾ ‘‘ਕਸ੍ਸਿਦਂ ਕਮ੍ਮ’’ਨ੍ਤਿ ਵਿਚਿਨਨ੍ਤਿ. ਤਤ੍ਰ ਚ ਕੇਨਚਿ ਭਿਕ੍ਖੁਨਾ ਪਗੇਵ ਵੁਟ੍ਠਹਿਤ੍ਵਾ ਵਤ੍ਤਸੀਸੇਨ ਮਣ੍ਡਪਂ ਵਾ ਭੋਜਨਸਾਲਂ ਵਾ ਪਟਿਜਗ੍ਗਨ੍ਤੇਨ ਪੁਪ੍ਫਾਦੀਨਿ ਆਮਟ੍ਠਾਨਿ ਹੋਨ੍ਤਿ, ਕੇਨਚਿ ਉਪਟ੍ਠਾਕਕੁਲਤੋ ਆਭਤੇਹਿ ਪੁਪ੍ਫਾਦੀਹਿ ਪੂਜਾ ਕਤਾ ਹੋਤਿ, ਕੇਨਚਿ ਭੇਸਜ੍ਜਤ੍ਥਂ ਅਰਿਟ੍ਠਂ ਪੀਤਂ ਹੋਤਿ, ਅਥ ਤੇ ‘‘ਕਸ੍ਸਿਦਂ ਕਮ੍ਮ’’ਨ੍ਤਿ ਵਿਚਿਨਨ੍ਤਾ ਭਿਕ੍ਖੂ ਤੇਸਂ ਹਤ੍ਥਗਨ੍ਧਞ੍ਚ ਮੁਖਗਨ੍ਧਞ੍ਚ ਘਾਯਿਤ੍ਵਾ ਤੇ ਭਿਕ੍ਖੂ ਪਰਿਸਙ੍ਕਨ੍ਤਿ, ਇਦਂ ਮੁਤਪਰਿਸਙ੍ਕਿਤਂ ਨਾਮ.

ਤਤ੍ਥ ਦਿਟ੍ਠਂ ਅਤ੍ਥਿ ਸਮੂਲਕਂ, ਅਤ੍ਥਿ ਅਮੂਲਕਂ; ਦਿਟ੍ਠਮੇਵ ਅਤ੍ਥਿ ਸਞ੍ਞਾਸਮੂਲਕਂ, ਅਤ੍ਥਿ ਸਞ੍ਞਾਅਮੂਲਕਂ. ਏਸ ਨਯੋ ਸੁਤੇਪਿ. ਪਰਿਸਙ੍ਕਿਤੇ ਪਨ ਦਿਟ੍ਠਪਰਿਸਙ੍ਕਿਤਂ ਅਤ੍ਥਿ ਸਮੂਲਕਂ, ਅਤ੍ਥਿ ਅਮੂਲਕਂ; ਦਿਟ੍ਠਪਰਿਸਙ੍ਕਿਤਮੇਵ ਅਤ੍ਥਿ ਸਞ੍ਞਾਸਮੂਲਕਂ, ਅਤ੍ਥਿ ਸਞ੍ਞਾਅਮੂਲਕਂ. ਏਸ ਨਯੋ ਸੁਤਮੁਤਪਰਿਸਙ੍ਕਿਤੇਸੁ. ਤਤ੍ਥ ਦਿਟ੍ਠਂ ਸਮੂਲਕਂ ਨਾਮ ਪਾਰਾਜਿਕਂ ਆਪਜ੍ਜਨ੍ਤਂ ਦਿਸ੍ਵਾਵ ‘‘ਦਿਟ੍ਠੋ ਮਯਾ’’ਤਿ ਵਦਤਿ, ਅਮੂਲਕਂ ਨਾਮ ਪਟਿਚ੍ਛਨ੍ਨੋਕਾਸਤੋ ਨਿਕ੍ਖਮਨ੍ਤਂ ਦਿਸ੍ਵਾ ਵੀਤਿਕ੍ਕਮਂ ਅਦਿਸ੍ਵਾ ‘‘ਦਿਟ੍ਠੋ ਮਯਾ’’ਤਿ ਵਦਤਿ. ਦਿਟ੍ਠਮੇਵ ਸਞ੍ਞਾਸਮੂਲਕਂ ਨਾਮ ਦਿਸ੍ਵਾਵ ਦਿਟ੍ਠਸਞ੍ਞੀ ਹੁਤ੍ਵਾ ਚੋਦੇਤਿ, ਸਞ੍ਞਾਅਮੂਲਕਂ ਨਾਮ ਪੁਬ੍ਬੇ ਪਾਰਾਜਿਕਵੀਤਿਕ੍ਕਮਂ ਦਿਸ੍ਵਾ ਪਚ੍ਛਾ ਅਦਿਟ੍ਠਸਞ੍ਞੀ ਜਾਤੋ, ਸੋ ਸਞ੍ਞਾਯ ਅਮੂਲਕਂ ਕਤ੍ਵਾ ‘‘ਦਿਟ੍ਠੋ ਮਯਾ’’ਤਿ ਚੋਦੇਤਿ. ਏਤੇਨ ਨਯੇਨ ਸੁਤਮੁਤਪਰਿਸਙ੍ਕਿਤਾਨਿਪਿ ਵਿਤ੍ਥਾਰਤੋ ਵੇਦਿਤਬ੍ਬਾਨਿ. ਏਤ੍ਥ ਚ ਸਬ੍ਬਪ੍ਪਕਾਰੇਣਾਪਿ ਸਮੂਲਕੇਨ ਵਾ ਸਞ੍ਞਾਸਮੂਲਕੇਨ ਵਾ ਚੋਦੇਨ੍ਤਸ੍ਸ ਅਨਾਪਤ੍ਤਿ, ਅਮੂਲਕੇਨ ਵਾ ਪਨ ਸਞ੍ਞਾਅਮੂਲਕੇਨ ਵਾ ਚੋਦੇਨ੍ਤਸ੍ਸੇਵ ਆਪਤ੍ਤਿ.

ਅਨੁਦ੍ਧਂਸੇਯ੍ਯਾਤਿ ਧਂਸੇਯ੍ਯ ਪਧਂਸੇਯ੍ਯ ਅਭਿਭਵੇਯ੍ਯ ਅਜ੍ਝੋਤ੍ਥਰੇਯ੍ਯ. ਤਂ ਪਨ ਅਨੁਦ੍ਧਂਸਨਂ ਯਸ੍ਮਾ ਅਤ੍ਤਨਾ ਚੋਦੇਨ੍ਤੋਪਿ ਪਰੇਨ ਚੋਦਾਪੇਨ੍ਤੋਪਿ ਕਰੋਤਿਯੇਵ, ਤਸ੍ਮਾਸ੍ਸ ਪਦਭਾਜਨੇ ‘‘ਚੋਦੇਤਿ ਵਾ ਚੋਦਾਪੇਤਿ ਵਾ’’ਤਿ ਵੁਤ੍ਤਂ.

ਤਤ੍ਥ ਚੋਦੇਤੀਤਿ ‘‘ਪਾਰਾਜਿਕਂ ਧਮ੍ਮਂ ਆਪਨ੍ਨੋਸੀ’’ਤਿਆਦੀਹਿ ਵਚਨੇਹਿ ਸਯਂ ਚੋਦੇਤਿ, ਤਸ੍ਸ ਵਾਚਾਯ ਵਾਚਾਯ ਸਙ੍ਘਾਦਿਸੇਸੋ. ਚੋਦਾਪੇਤੀਤਿ ਅਤ੍ਤਨਾ ਸਮੀਪੇ ਠਤ੍ਵਾ ਅਞ੍ਞਂ ਭਿਕ੍ਖੁ ਆਣਾਪੇਤਿ, ਸੋ ਤਸ੍ਸ ਵਚਨੇਨ ਤਂ ਚੋਦੇਤਿ, ਚੋਦਾਪਕਸ੍ਸੇਵ ਵਾਚਾਯ ਵਾਚਾਯ ਸਙ੍ਘਾਦਿਸੇਸੋ. ਅਥ ਸੋਪਿ ‘‘ਮਯਾ ਦਿਟ੍ਠਂ ਸੁਤਂ ਅਤ੍ਥੀ’’ਤਿ ਚੋਦੇਤਿ, ਦ੍ਵਿਨ੍ਨਮ੍ਪਿ ਜਨਾਨਂ ਵਾਚਾਯ ਵਾਚਾਯ ਸਙ੍ਘਾਦਿਸੇਸੋ.

ਚੋਦਨਾਪ੍ਪਭੇਦਕੋਸਲ੍ਲਤ੍ਥਂ ਪਨੇਤ੍ਥ ਏਕਵਤ੍ਥੁਏਕਚੋਦਕਾਦਿਚਤੁਕ੍ਕਂ ਤਾਵ ਵੇਦਿਤਬ੍ਬਂ. ਤਤ੍ਥ ਏਕੋ ਭਿਕ੍ਖੁ ਏਕਂ ਭਿਕ੍ਖੁਂ ਏਕੇਨ ਵਤ੍ਥੁਨਾ ਚੋਦੇਤਿ, ਇਮਿਸ੍ਸਾ ਚੋਦਨਾਯ ਏਕਂ ਵਤ੍ਥੁ ਏਕੋ ਚੋਦਕੋ. ਸਮ੍ਬਹੁਲਾ ਏਕਂ ਏਕਵਤ੍ਥੁਨਾ ਚੋਦੇਨ੍ਤਿ, ਪਞ੍ਚਸਤਾ ਮੇਤ੍ਤਿਯਭੂਮਜਕਪ੍ਪਮੁਖਾ ਛਬ੍ਬਗ੍ਗਿਯਾ ਭਿਕ੍ਖੂ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਮਿਵ, ਇਮਿਸ੍ਸਾ ਚੋਦਨਾਯ ਏਕਂ ਵਤ੍ਥੁ ਨਾਨਾਚੋਦਕਾ. ਏਕੋ ਭਿਕ੍ਖੁ ਏਕਂ ਭਿਕ੍ਖੁਂ ਸਮ੍ਬਹੁਲੇਹਿ ਵਤ੍ਥੂਹਿ ਚੋਦੇਤਿ, ਇਮਿਸ੍ਸਾ ਚੋਦਨਾਯ ਨਾਨਾਵਤ੍ਥੂਨਿ ਏਕੋ ਚੋਦਕੋ. ਸਮ੍ਬਹੁਲਾ ਸਮ੍ਬਹੁਲੇ ਸਮ੍ਬਹੁਲੇਹਿ ਵਤ੍ਥੂਹਿ ਚੋਦੇਨ੍ਤਿ, ਇਮਿਸ੍ਸਾ ਚੋਦਨਾਯ ਨਾਨਾਵਤ੍ਥੂਨਿ ਨਾਨਾਚੋਦਕਾ.

ਚੋਦੇਤੁਂ ਪਨ ਕੋ ਲਭਤਿ, ਕੋ ਨ ਲਭਤੀਤਿ? ਦੁਬ੍ਬਲਚੋਦਕਵਚਨਂ ਤਾਵ ਗਹੇਤ੍ਵਾ ਕੋਚਿ ਨ ਲਭਤਿ. ਦੁਬ੍ਬਲਚੋਦਕੋ ਨਾਮ ਸਮ੍ਬਹੁਲੇਸੁ ਕਥਾਸਲ੍ਲਾਪੇਨ ਨਿਸਿਨ੍ਨੇਸੁ ਏਕੋ ਏਕਂ ਆਰਬ੍ਭ ਅਨੋਦਿਸ੍ਸਕਂ ਕਤ੍ਵਾ ਪਾਰਾਜਿਕਵਤ੍ਥੁਂ ਕਥੇਤਿ, ਅਞ੍ਞੋ ਤਂ ਸੁਤ੍ਵਾ ਇਤਰਸ੍ਸ ਗਨ੍ਤ੍ਵਾ ਆਰੋਚੇਤਿ. ਸੋ ਤਂ ਉਪਸਙ੍ਕਮਿਤ੍ਵਾ ‘‘ਤ੍ਵਂ ਕਿਰ ਮਂ ਇਦਞ੍ਚਿਦਞ੍ਚ ਵਦਸੀ’’ਤਿ ਵਦਤਿ. ਸੋ ‘‘ਨਾਹਂ ਏਵਰੂਪਂ ਜਾਨਾਮਿ, ਕਥਾਪਵਤ੍ਤਿਯਂ ਪਨ ਮਯਾ ਅਨੋਦਿਸ੍ਸਕਂ ਕਤ੍ਵਾ ਵੁਤ੍ਤਮਤ੍ਥਿ, ਸਚੇ ਅਹਂ ਤਵ ਇਮਂ ਦੁਕ੍ਖੁਪ੍ਪਤ੍ਤਿਂ ਜਾਨੇਯ੍ਯਂ, ਏਤ੍ਤਕਮ੍ਪਿ ਨ ਕਥੇਯ੍ਯ’’ਨ੍ਤਿ ਅਯਂ ਦੁਬ੍ਬਲਚੋਦਕੋ. ਤਸ੍ਸੇਤਂ ਕਥਾਸਲ੍ਲਾਪਂ ਗਹੇਤ੍ਵਾ ਤਂ ਭਿਕ੍ਖੁਂ ਕੋਚਿ ਚੋਦੇਤੁਂ ਨ ਲਭਤਿ. ਏਤਂ ਪਨ ਅਗ੍ਗਹੇਤ੍ਵਾ ਸੀਲਸਮ੍ਪਨ੍ਨੋ ਭਿਕ੍ਖੁ ਭਿਕ੍ਖੁਂ ਵਾ ਭਿਕ੍ਖੁਨਿਂ ਵਾ ਸੀਲਸਮ੍ਪਨ੍ਨਾ ਚ ਭਿਕ੍ਖੁਨੀ ਭਿਕ੍ਖੁਨੀਮੇਵ ਚੋਦੇਤੁਂ ਲਭਤੀਤਿ ਮਹਾਪਦੁਮਤ੍ਥੇਰੋ ਆਹ. ਮਹਾਸੁਮਤ੍ਥੇਰੋ ਪਨ ‘‘ਪਞ੍ਚਪਿ ਸਹਧਮ੍ਮਿਕਾ ਲਭਨ੍ਤੀ’’ਤਿ ਆਹ. ਗੋਦਤ੍ਤਤ੍ਥੇਰੋ ਪਨ ‘‘ਨ ਕੋਚਿ ਨ ਲਭਤੀ’’ਤਿ ਵਤ੍ਵਾ ‘‘ਭਿਕ੍ਖੁਸ੍ਸ ਸੁਤ੍ਵਾ ਚੋਦੇਤਿ, ਭਿਕ੍ਖੁਨਿਯਾ ਸੁਤ੍ਵਾ ਚੋਦੇਤਿ…ਪੇ… ਤਿਤ੍ਥਿਯਸਾਵਕਾਨਂ ਸੁਤ੍ਵਾ ਚੋਦੇਤੀ’’ਤਿ ਇਦਂ ਸੁਤ੍ਤਮਾਹਰਿ. ਤਿਣ੍ਣਮ੍ਪਿ ਥੇਰਾਨਂ ਵਾਦੇ ਚੁਦਿਤਕਸ੍ਸੇਵ ਪਟਿਞ੍ਞਾਯ ਕਾਰੇਤਬ੍ਬੋ.

ਅਯਂ ਪਨ ਚੋਦਨਾ ਨਾਮ ਦੂਤਂ ਵਾ ਪਣ੍ਣਂ ਵਾ ਸਾਸਨਂ ਵਾ ਪੇਸੇਤ੍ਵਾ ਚੋਦੇਨ੍ਤਸ੍ਸ ਸੀਸਂ ਨ ਏਤਿ, ਪੁਗ੍ਗਲਸ੍ਸ ਪਨ ਸਮੀਪੇ ਠਤ੍ਵਾਵ ਹਤ੍ਥਮੁਦ੍ਦਾਯ ਵਾ ਵਚੀਭੇਦੇਨ ਵਾ ਚੋਦੇਨ੍ਤਸ੍ਸੇਵ ਸੀਸਂ ਏਤਿ. ਸਿਕ੍ਖਾਪਚ੍ਚਕ੍ਖਾਨਮੇਵ ਹਿ ਹਤ੍ਥਮੁਦ੍ਦਾਯ ਸੀਸਂ ਨ ਏਤਿ, ਇਦਂ ਪਨ ਅਨੁਦ੍ਧਂਸਨਂ ਅਭੂਤਾਰੋਚਨਞ੍ਚ ਏਤਿਯੇਵ. ਯੋ ਪਨ ਦ੍ਵਿਨ੍ਨਂ ਠਿਤਟ੍ਠਾਨੇ ਏਕਂ ਨਿਯਮੇਤ੍ਵਾ ਚੋਦੇਤਿ, ਸੋ ਚੇ ਜਾਨਾਤਿ, ਸੀਸਂ ਏਤਿ. ਇਤਰੋ ਜਾਨਾਤਿ, ਸੀਸਂ ਨ ਏਤਿ. ਦ੍ਵੇਪਿ ਨਿਯਮੇਤ੍ਵਾ ਚੋਦੇਤਿ, ਏਕੋ ਵਾ ਜਾਨਾਤੁ ਦ੍ਵੇ ਵਾ, ਸੀਸਂ ਏਤਿਯੇਵ. ਏਸਵ ਨਯੋ ਸਮ੍ਬਹੁਲੇਸੁ. ਤਙ੍ਖਣੇਯੇਵ ਚ ਜਾਨਨਂ ਨਾਮ ਦੁਕ੍ਕਰਂ, ਸਮਯੇਨ ਆਵਜ੍ਜਿਤ੍ਵਾ ਞਾਤੇ ਪਨ ਞਾਤਮੇਵ ਹੋਤਿ. ਪਚ੍ਛਾ ਚੇ ਜਾਨਾਤਿ, ਸੀਸਂ ਨ ਏਤਿ. ਸਿਕ੍ਖਾਪਚ੍ਚਕ੍ਖਾਨਂ ਅਭੂਤਾਰੋਚਨਂ ਦੁਟ੍ਠੁਲ੍ਲਵਾਚਾ-ਅਤ੍ਤਕਾਮ-ਦੁਟ੍ਠਦੋਸਭੂਤਾਰੋਚਨਸਿਕ੍ਖਾਪਦਾਨੀਤਿ ਸਬ੍ਬਾਨੇਵ ਹਿ ਇਮਾਨਿ ਏਕਪਰਿਚ੍ਛੇਦਾਨਿ.

ਏਵਂ ਕਾਯਵਾਚਾਵਸੇਨ ਚਾਯਂ ਦੁਵਿਧਾਪਿ ਚੋਦਨਾ. ਪੁਨ ਦਿਟ੍ਠਚੋਦਨਾ, ਸੁਤਚੋਦਨਾ, ਪਰਿਸਙ੍ਕਿਤਚੋਦਨਾਤਿ ਤਿਵਿਧਾ ਹੋਤਿ. ਅਪਰਾਪਿ ਚਤੁਬ੍ਬਿਧਾ ਹੋਤਿ – ਸੀਲਵਿਪਤ੍ਤਿਚੋਦਨਾ, ਆਚਾਰਵਿਪਤ੍ਤਿਚੋਦਨਾ, ਦਿਟ੍ਠਿਵਿਪਤ੍ਤਿਚੋਦਨਾ, ਆਜੀਵਵਿਪਤ੍ਤਿਚੋਦਨਾਤਿ. ਤਤ੍ਥ ਗਰੁਕਾਨਂ ਦ੍ਵਿਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਵਸੇਨ ਸੀਲਵਿਪਤ੍ਤਿਚੋਦਨਾ ਵੇਦਿਤਬ੍ਬਾ. ਅਵਸੇਸਾਨਂ ਵਸੇਨ ਆਚਾਰਵਿਪਤ੍ਤਿਚੋਦਨਾ, ਮਿਚ੍ਛਾਦਿਟ੍ਠਿਅਨ੍ਤਗ੍ਗਾਹਿਕਦਿਟ੍ਠਿਵਸੇਨ ਦਿਟ੍ਠਿਵਿਪਤ੍ਤਿਚੋਦਨਾ, ਆਜੀਵਹੇਤੁ ਪਞ੍ਞਤ੍ਤਾਨਂ ਛਨ੍ਨਂ ਸਿਕ੍ਖਾਪਦਾਨਂ ਵਸੇਨ ਆਜੀਵਵਿਪਤ੍ਤਿਚੋਦਨਾ ਵੇਦਿਤਬ੍ਬਾ.

ਅਪਰਾਪਿ ਚਤੁਬ੍ਬਿਧਾ ਹੋਤਿ – ਵਤ੍ਥੁਸਨ੍ਦਸ੍ਸਨਾ, ਆਪਤ੍ਤਿਸਨ੍ਦਸ੍ਸਨਾ, ਸਂਵਾਸਪਟਿਕ੍ਖੇਪੋ, ਸਾਮੀਚਿਪਟਿਕ੍ਖੇਪੋਤਿ. ਤਤ੍ਥ ਵਤ੍ਥੁਸਨ੍ਦਸ੍ਸਨਾ ਨਾਮ ‘‘ਤ੍ਵਂ ਮੇਥੁਨਂ ਧਮ੍ਮਂ ਪਟਿਸੇਵਿਤ੍ਥ, ਅਦਿਨ੍ਨਂ ਆਦਿਯਿਤ੍ਥ, ਮਨੁਸ੍ਸਂ ਘਾਤਯਿਤ੍ਥ, ਅਭੂਤਂ ਆਰੋਚਯਿਤ੍ਥਾ’’ਤਿ ਏਵਂ ਪਵਤ੍ਤਾ. ਆਪਤ੍ਤਿਸਨ੍ਦਸ੍ਸਨਾ ਨਾਮ ‘‘ਤ੍ਵਂ ਮੇਥੁਨਧਮ੍ਮਪਾਰਾਜਿਕਾਪਤ੍ਤਿਂ ਆਪਨ੍ਨੋ’’ਤਿ ਏਵਮਾਦਿਨਯਪ੍ਪਵਤ੍ਤਾ. ਸਂਵਾਸਪਟਿਕ੍ਖੇਪੋ ਨਾਮ ‘‘ਨਤ੍ਥਿ ਤਯਾ ਸਦ੍ਧਿਂ ਉਪੋਸਥੋ ਵਾ ਪਵਾਰਣਾ ਵਾ ਸਙ੍ਘਕਮ੍ਮਂ ਵਾ’’ਤਿ ਏਵਂ ਪਵਤ੍ਤਾ; ਏਤ੍ਤਾਵਤਾ ਪਨ ਸੀਸਂ ਨ ਏਤਿ, ‘‘ਅਸ੍ਸਮਣੋਸਿ ਅਸਕ੍ਯਪੁਤ੍ਤਿਯੋਸੀ’’ਤਿਆਦਿਵਚਨੇਹਿ ਸਦ੍ਧਿਂ ਘਟਿਤੇਯੇਵ ਸੀਸਂ ਏਤਿ. ਸਾਮੀਚਿਪਟਿਕ੍ਖੇਪੋ ਨਾਮ ਅਭਿਵਾਦਨ-ਪਚ੍ਚੁਟ੍ਠਾਨ-ਅਞ੍ਜਲਿਕਮ੍ਮ-ਬੀਜਨਾਦਿਕਮ੍ਮਾਨਂ ਅਕਰਣਂ. ਤਂ ਪਟਿਪਾਟਿਯਾ ਵਨ੍ਦਨਾਦੀਨਿ ਕਰੋਤੋ ਏਕਸ੍ਸ ਅਕਤ੍ਵਾ ਸੇਸਾਨਂ ਕਰਣਕਾਲੇ ਵੇਦਿਤਬ੍ਬਂ. ਏਤ੍ਤਾਵਤਾ ਚ ਚੋਦਨਾ ਨਾਮ ਹੋਤਿ, ਆਪਤ੍ਤਿ ਪਨ ਸੀਸਂ ਨ ਏਤਿ. ‘‘ਕਸ੍ਮਾ ਮਮ ਵਨ੍ਦਨਾਦੀਨਿ ਨ ਕਰੋਸੀ’’ਤਿ ਪੁਚ੍ਛਿਤੇ ਪਨ ‘‘ਅਸ੍ਸਮਣੋਸਿ ਅਸਕ੍ਯਪੁਤ੍ਤਿਯੋਸੀ’’ਤਿਆਦਿਵਚਨੇਹਿ ਸਦ੍ਧਿਂ ਘਟਿਤੇਯੇਵ ਸੀਸਂ ਏਤਿ. ਯਾਗੁਭਤ੍ਤਾਦਿਨਾ ਪਨ ਯਂ ਇਚ੍ਛਤਿ ਤਂ ਆਪੁਚ੍ਛਤਿ, ਨ ਤਾਵਤਾ ਚੋਦਨਾ ਹੋਤਿ.

ਅਪਰਾਪਿ ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕੇ ‘‘ਏਕਂ, ਭਿਕ੍ਖਵੇ, ਅਧਮ੍ਮਿਕਂ ਪਾਤਿਮੋਕ੍ਖਟ੍ਠਪਨਂ ਏਕਂ ਧਮ੍ਮਿਕ’’ਨ੍ਤਿ ਆਦਿਂ ‘‘ਕਤ੍ਵਾ ਯਾਵ ਦਸ ਅਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ ਦਸ ਧਮ੍ਮਿਕਾਨੀ’’ਤਿ (ਚੂਲ਼ਵ. ੩੮੭) ਏਵਂ ਅਧਮ੍ਮਿਕਾ ਪਞ੍ਚਪਞ੍ਞਾਸ ਧਮ੍ਮਿਕਾ ਪਞ੍ਚਪਞ੍ਞਾਸਾਤਿ ਦਸੁਤ੍ਤਰਸਤਂ ਚੋਦਨਾ ਵੁਤ੍ਤਾ. ਤਾ ਦਿਟ੍ਠੇਨ ਚੋਦੇਨ੍ਤਸ੍ਸ ਦਸੁਤ੍ਤਰਸਤਂ, ਸੁਤੇਨ ਚੋਦੇਨ੍ਤਸ੍ਸ ਦਸੁਤ੍ਤਰਸਤਂ, ਪਰਿਸਙ੍ਕਿਤੇਨ ਚੋਦੇਨ੍ਤਸ੍ਸ ਦਸੁਤ੍ਤਰਸਤਨ੍ਤਿ ਤਿਂਸਾਨਿ ਤੀਣਿ ਸਤਾਨਿ ਹੋਨ੍ਤਿ. ਤਾਨਿ ਕਾਯੇਨ ਚੋਦੇਨ੍ਤਸ੍ਸ, ਵਾਚਾਯ ਚੋਦੇਨ੍ਤਸ੍ਸ, ਕਾਯਵਾਚਾਹਿ ਚੋਦੇਨ੍ਤਸ੍ਸਾਤਿ ਤਿਗੁਣਾਨਿ ਕਤਾਨਿ ਨਵੁਤਾਨਿ ਨਵ ਸਤਾਨਿ ਹੋਨ੍ਤਿ. ਤਾਨਿ ਅਤ੍ਤਨਾ ਚੋਦੇਨ੍ਤਸ੍ਸਾਪਿ ਪਰੇਨ ਚੋਦਾਪੇਨ੍ਤਸ੍ਸਾਪਿ ਤਤ੍ਤਕਾਨੇਵਾਤਿ ਵੀਸਤਿਊਨਾਨਿ ਦ੍ਵੇ ਸਹਸ੍ਸਾਨਿ ਹੋਨ੍ਤਿ, ਪੁਨ ਦਿਟ੍ਠਾਦਿਭੇਦੇ ਸਮੂਲਕਾਮੂਲਕਵਸੇਨ ਅਨੇਕਸਹਸ੍ਸਾ ਚੋਦਨਾ ਹੋਨ੍ਤੀਤਿ ਵੇਦਿਤਬ੍ਬਾ.

ਇਮਸ੍ਮਿਂ ਪਨ ਠਾਨੇ ਠਤ੍ਵਾ ਅਟ੍ਠਕਥਾਯ ‘‘ਅਤ੍ਤਾਦਾਨਂ ਆਦਾਤੁਕਾਮੇਨ ਉਪਾਲਿ ਭਿਕ੍ਖੁਨਾ ਪਞ੍ਚਙ੍ਗਸਮਨ੍ਨਾਗਤਂ ਅਤ੍ਤਾਦਾਨਂ ਆਦਾਤਬ੍ਬ’’ਨ੍ਤਿ (ਚੂਲ਼ਵ. ੩੯੮) ਚ ‘‘ਚੋਦਕੇਨ ਉਪਾਲਿ ਭਿਕ੍ਖੁਨਾ ਪਰਂ ਚੋਦੇਤੁਕਾਮੇਨ ਪਞ੍ਚ ਧਮ੍ਮੇ ਅਜ੍ਝਤ੍ਤਂ ਪਚ੍ਚਵੇਕ੍ਖਿਤ੍ਵਾ ਪਰੋ ਚੋਦੇਤਬ੍ਬੋ’’ਤਿ (ਚੂਲ਼ਵ. ੩੯੯) ਚ ਏਵਂ ਉਪਾਲਿਪਞ੍ਚਕਾਦੀਸੁ ਵੁਤ੍ਤਾਨਿ ਬਹੂਨਿ ਸੁਤ੍ਤਾਨਿ ਆਹਰਿਤ੍ਵਾ ਅਤ੍ਤਾਦਾਨਲਕ੍ਖਣਞ੍ਚ ਚੋਦਕਵਤ੍ਤਞ੍ਚ ਚੁਦਿਤਕਵਤ੍ਤਞ੍ਚ ਸਙ੍ਘੇਨ ਕਾਤਬ੍ਬਕਿਚ੍ਚਞ੍ਚ ਅਨੁਵਿਜ੍ਜਕਵਤ੍ਤਞ੍ਚ ਸਬ੍ਬਂ ਵਿਤ੍ਥਾਰੇਨ ਕਥਿਤਂ, ਤਂ ਮਯਂ ਯਥਾਆਗਤਟ੍ਠਾਨੇਯੇਵ ਵਣ੍ਣਯਿਸ੍ਸਾਮ.

ਵੁਤ੍ਤਪ੍ਪਭੇਦਾਸੁ ਪਨ ਇਮਾਸੁ ਚੋਦਨਾਸੁ ਯਾਯ ਕਾਯਚਿ ਚੋਦਨਾਯ ਵਸੇਨ ਸਙ੍ਘਮਜ੍ਝੇ ਓਸਟੇ ਵਤ੍ਥੁਸ੍ਮਿਂ ਚੁਦਿਤਕਚੋਦਕਾ ਵਤ੍ਤਬ੍ਬਾ ‘‘ਤੁਮ੍ਹੇ ਅਮ੍ਹਾਕਂ ਵਿਨਿਚ੍ਛਯੇਨ ਤੁਟ੍ਠਾ ਭਵਿਸ੍ਸਥਾ’’ਤਿ. ਸਚੇ ‘‘ਭਵਿਸ੍ਸਾਮਾ’’ਤਿ ਵਦਨ੍ਤਿ, ਸਙ੍ਘੇਨ ਤਂ ਅਧਿਕਰਣਂ ਸਮ੍ਪਟਿਚ੍ਛਿਤਬ੍ਬਂ. ਅਥ ਪਨ ‘‘ਵਿਨਿਚ੍ਛਿਨਥ ਤਾਵ, ਭਨ੍ਤੇ, ਸਚੇ ਅਮ੍ਹਾਕਂ ਖਮਿਸ੍ਸਤਿ, ਗਣ੍ਹਿਸ੍ਸਾਮਾ’’ਤਿ ਵਦਨ੍ਤਿ. ‘‘ਚੇਤਿਯਂ ਤਾਵ ਵਨ੍ਦਥਾ’’ਤਿਆਦੀਨਿ ਵਤ੍ਵਾ ਦੀਘਸੁਤ੍ਤਂ ਕਤ੍ਵਾ ਵਿਸ੍ਸਜ੍ਜਿਤਬ੍ਬਂ. ਤੇ ਚੇ ਚਿਰਰਤ੍ਤਂ ਕਿਲਨ੍ਤਾ ਪਕ੍ਕਨ੍ਤਪਰਿਸਾ ਉਪਚ੍ਛਿਨ੍ਨਪਕ੍ਖਾ ਹੁਤ੍ਵਾ ਪੁਨ ਯਾਚਨ੍ਤਿ, ਯਾਵਤਤਿਯਂ ਪਟਿਕ੍ਖਿਪਿਤ੍ਵਾ ਯਦਾ ਨਿਮ੍ਮਦਾ ਹੋਨ੍ਤਿ ਤਦਾ ਨੇਸਂ ਅਧਿਕਰਣਂ ਵਿਨਿਚ੍ਛਿਨਿਤਬ੍ਬਂ. ਵਿਨਿਚ੍ਛਿਨਨ੍ਤੇਹਿ ਚ ਸਚੇ ਅਲਜ੍ਜੁਸ੍ਸਨ੍ਨਾ ਹੋਤਿ, ਪਰਿਸਾ ਉਬ੍ਬਾਹਿਕਾਯ ਤਂ ਅਧਿਕਰਣਂ ਵਿਨਿਚ੍ਛਿਨਿਤਬ੍ਬਂ. ਸਚੇ ਬਾਲੁਸ੍ਸਨ੍ਨਾ ਹੋਤਿ ਪਰਿਸਾ ‘‘ਤੁਮ੍ਹਾਕਂ ਸਭਾਗੇ ਵਿਨਯਧਰੇ ਪਰਿਯੇਸਥਾ’’ਤਿ ਵਿਨਯਧਰੇ ਪਰਿਯੇਸਾਪੇਤ੍ਵਾ ਯੇਨ ਧਮ੍ਮੇਨ ਯੇਨ ਵਿਨਯੇਨ ਯੇਨ ਸਤ੍ਥੁਸਾਸਨੇਨ ਤਂ ਅਧਿਕਰਣਂ ਵੂਪਸਮਤਿ, ਤਥਾ ਤਂ ਅਧਿਕਰਣਂ ਵੂਪਸਮੇਤਬ੍ਬਂ.

ਤਤ੍ਥ ਚ ‘‘ਧਮ੍ਮੋ’’ਤਿ ਭੂਤਂ ਵਤ੍ਥੁ. ‘‘ਵਿਨਯੋ’’ਤਿ ਚੋਦਨਾ ਸਾਰਣਾ ਚ. ‘‘ਸਤ੍ਥੁਸਾਸਨ’’ਨ੍ਤਿ ਞਤ੍ਤਿਸਮ੍ਪਦਾ ਚ ਅਨੁਸਾਵਨਸਮ੍ਪਦਾ ਚ. ਤਸ੍ਮਾ ਚੋਦਕੇਨ ਵਤ੍ਥੁਸ੍ਮਿਂ ਆਰੋਚਿਤੇ ਚੁਦਿਤਕੋ ਪੁਚ੍ਛਿਤਬ੍ਬੋ ‘‘ਸਨ੍ਤਮੇਤਂ, ਨੋ’’ਤਿ. ਏਵਂ ਵਤ੍ਥੁਂ ਉਪਪਰਿਕ੍ਖਿਤ੍ਵਾ ਭੂਤੇਨ ਵਤ੍ਥੁਨਾ ਚੋਦੇਤ੍ਵਾ ਸਾਰੇਤ੍ਵਾ ਚ ਞਤ੍ਤਿਸਮ੍ਪਦਾਯ ਅਨੁਸਾਵਨਸਮ੍ਪਦਾਯ ਚ ਤਂ ਅਧਿਕਰਣਂ ਵੂਪਸਮੇਤਬ੍ਬਂ. ਤਤ੍ਰ ਚੇ ਅਲਜ੍ਜੀ ਲਜ੍ਜਿਂ ਚੋਦੇਤਿ, ਸੋ ਚ ਅਲਜ੍ਜੀ ਬਾਲੋ ਹੋਤਿ ਅਬ੍ਯਤ੍ਤੋ ਨਾਸ੍ਸ ਨਯੋ ਦਾਤਬ੍ਬੋ. ਏਵਂ ਪਨ ਵਤ੍ਤਬ੍ਬੋ – ‘‘ਕਿਮ੍ਹਿ ਨਂ ਚੋਦੇਸੀ’’ਤਿ? ਅਦ੍ਧਾ ਸੋ ਵਕ੍ਖਤਿ – ‘‘ਕਿਮਿਦਂ, ਭਨ੍ਤੇ, ਕਿਮ੍ਹਿ ਨਂ ਨਾਮਾ’’ਤਿ. ਤ੍ਵਂ ਕਿਮ੍ਹਿ ਨਮ੍ਪਿ ਨ ਜਾਨਾਸਿ, ਨ ਯੁਤ੍ਤਂ ਤਯਾ ਏਵਰੂਪੇਨ ਬਾਲੇਨ ਪਰਂ ਚੋਦੇਤੁਨ੍ਤਿ ਉਯ੍ਯੋਜੇਤਬ੍ਬੋ ਨਾਸ੍ਸ ਅਨੁਯੋਗੋ ਦਾਤਬ੍ਬੋ. ਸਚੇ ਪਨ ਸੋ ਅਲਜ੍ਜੀ ਪਣ੍ਡਿਤੋ ਹੋਤਿ ਬ੍ਯਤ੍ਤੋ ਦਿਟ੍ਠੇਨ ਵਾ ਸੁਤੇਨ ਵਾ ਅਜ੍ਝੋਤ੍ਥਰਿਤ੍ਵਾ ਸਮ੍ਪਾਦੇਤੁਂ ਸਕ੍ਕੋਤਿ ਏਤਸ੍ਸ ਅਨੁਯੋਗਂ ਦਤ੍ਵਾ ਲਜ੍ਜਿਸ੍ਸੇਵ ਪਟਿਞ੍ਞਾਯ ਕਮ੍ਮਂ ਕਾਤਬ੍ਬਂ.

ਸਚੇ ਲਜ੍ਜੀ ਅਲਜ੍ਜਿਂ ਚੋਦੇਤਿ, ਸੋ ਚ ਲਜ੍ਜੀ ਬਾਲੋ ਹੋਤਿ ਅਬ੍ਯਤ੍ਤੋ, ਨ ਸਕ੍ਕੋਤਿ ਅਨੁਯੋਗਂ ਦਾਤੁਂ. ਤਸ੍ਸ ਨਯੋ ਦਾਤਬ੍ਬੋ – ‘‘ਕਿਮ੍ਹਿ ਨਂ ਚੋਦੇਸਿ ਸੀਲਵਿਪਤ੍ਤਿਯਾ ਵਾ ਆਚਾਰਵਿਪਤ੍ਤਿਆਦੀਸੁ ਵਾ ਏਕਿਸ੍ਸਾ’’ਤਿ. ਕਸ੍ਮਾ ਪਨ ਇਮਸ੍ਸੇਵ ਏਵਂ ਨਯੋ ਦਾਤਬ੍ਬੋ, ਨ ਇਤਰਸ੍ਸ? ਨਨੁ ਨ ਯੁਤ੍ਤਂ ਵਿਨਯਧਰਾਨਂ ਅਗਤਿਗਮਨਨ੍ਤਿ? ਨ ਯੁਤ੍ਤਮੇਵ. ਇਦਂ ਪਨ ਅਗਤਿਗਮਨਂ ਨ ਹੋਤਿ, ਧਮ੍ਮਾਨੁਗ੍ਗਹੋ ਨਾਮ ਏਸੋ ਅਲਜ੍ਜਿਨਿਗ੍ਗਹਤ੍ਥਾਯ ਹਿ ਲਜ੍ਜਿਪਗ੍ਗਹਤ੍ਥਾਯ ਚ ਸਿਕ੍ਖਾਪਦਂ ਪਞ੍ਞਤ੍ਤਂ. ਤਤ੍ਰ ਅਲਜ੍ਜੀ ਨਯਂ ਲਭਿਤ੍ਵਾ ਅਜ੍ਝੋਤ੍ਥਰਨ੍ਤੋ ਏਹੀਤਿ, ਲਜ੍ਜੀ ਪਨ ਨਯਂ ਲਭਿਤ੍ਵਾ ਦਿਟ੍ਠੇ ਦਿਟ੍ਠਸਨ੍ਤਾਨੇਨ, ਸੁਤੇ ਸੁਤਸਨ੍ਤਾਨੇਨ ਪਤਿਟ੍ਠਾਯ ਕਥੇਸ੍ਸਤਿ, ਤਸ੍ਮਾ ਤਸ੍ਸ ਧਮ੍ਮਾਨੁਗ੍ਗਹੋ ਵਟ੍ਟਤਿ. ਸਚੇ ਪਨ ਸੋ ਲਜ੍ਜੀ ਪਣ੍ਡਿਤੋ ਹੋਤਿ ਬ੍ਯਤ੍ਤੋ, ਪਤਿਟ੍ਠਾਯ ਕਥੇਤਿ, ਅਲਜ੍ਜੀ ਚ ‘‘ਏਤਮ੍ਪਿ ਨਤ੍ਥਿ, ਏਤਮ੍ਪਿ ਨਤ੍ਥੀ’’ਤਿ ਪਟਿਞ੍ਞਂ ਨ ਦੇਤਿ, ਅਲਜ੍ਜਿਸ੍ਸ ਪਟਿਞ੍ਞਾਯ ਏਵ ਕਾਤਬ੍ਬਂ.

ਤਦਤ੍ਥਦੀਪਨਤ੍ਥਞ੍ਚ ਇਦਂ ਵਤ੍ਥੁ ਵੇਦਿਤਬ੍ਬਂ. ਤੇਪਿਟਕਚੂਲ਼ਾਭਯਤ੍ਥੇਰੋ ਕਿਰ ਲੋਹਪਾਸਾਦਸ੍ਸ ਹੇਟ੍ਠਾ ਭਿਕ੍ਖੂਨਂ ਵਿਨਯਂ ਕਥੇਤ੍ਵਾ ਸਾਯਨ੍ਹਸਮਯੇ ਵੁਟ੍ਠਾਤਿ, ਤਸ੍ਸ ਵੁਟ੍ਠਾਨਸਮਯੇ ਦ੍ਵੇ ਅਤ੍ਤਪਚ੍ਚਤ੍ਥਿਕਾ ਕਥਂ ਪਵਤ੍ਤੇਸੁਂ. ਏਕੋ ‘‘ਏਤਮ੍ਪਿ ਨਤ੍ਥਿ, ਏਤਮ੍ਪਿ ਨਤ੍ਥੀ’’ਤਿ ਪਟਿਞ੍ਞਂ ਨ ਦੇਤਿ. ਅਥ ਅਪ੍ਪਾਵਸੇਸੇ ਪਠਮਯਾਮੇ ਥੇਰਸ੍ਸ ਤਸ੍ਮਿਂ ਪੁਗ੍ਗਲੇ ‘‘ਅਯਂ ਪਤਿਟ੍ਠਾਯ ਕਥੇਤਿ, ਅਯਂ ਪਨ ਪਟਿਞ੍ਞਂ ਨ ਦੇਤਿ, ਬਹੂਨਿ ਚ ਵਤ੍ਥੂਨਿ ਓਸਟਾਨਿ ਅਦ੍ਧਾ ਏਤਂ ਕਤਂ ਭਵਿਸ੍ਸਤੀ’’ਤਿ ਅਸੁਦ੍ਧਲਦ੍ਧਿ ਉਪ੍ਪਨ੍ਨਾ. ਤਤੋ ਬੀਜਨੀਦਣ੍ਡਕੇਨ ਪਾਦਕਥਲਿਕਾਯ ਸਞ੍ਞਂ ਦਤ੍ਵਾ ‘‘ਅਹਂ ਆਵੁਸੋ ਵਿਨਿਚ੍ਛਿਨਿਤੁਂ ਅਨਨੁਚ੍ਛਵਿਕੋ ਅਞ੍ਞੇਨ ਵਿਨਿਚ੍ਛਿਨਾਪੇਹੀ’’ਤਿ ਆਹ. ਕਸ੍ਮਾ ਭਨ੍ਤੇਤਿ? ਥੇਰੋ ਤਮਤ੍ਥਂ ਆਰੋਚੇਸਿ, ਚੁਦਿਤਕਪੁਗ੍ਗਲਸ੍ਸ ਕਾਯੇ ਡਾਹੋ ਉਟ੍ਠਿਤੋ, ਤਤੋ ਸੋ ਥੇਰਂ ਵਨ੍ਦਿਤ੍ਵਾ ‘‘ਭਨ੍ਤੇ, ਵਿਨਿਚ੍ਛਿਨਿਤੁਂ ਅਨੁਰੂਪੇਨ ਵਿਨਯਧਰੇਨ ਨਾਮ ਤੁਮ੍ਹਾਦਿਸੇਨੇਵ ਭਵਿਤੁਂ ਵਟ੍ਟਤਿ. ਚੋਦਕੇਨ ਚ ਈਦਿਸੇਨੇਵ ਭਵਿਤੁਂ ਵਟ੍ਟਤੀ’’ਤਿ ਵਤ੍ਵਾ ਸੇਤਕਾਨਿ ਨਿਵਾਸੇਤ੍ਵਾ ‘‘ਚਿਰਂ ਕਿਲਮਿਤਤ੍ਥ ਮਯਾ’’ਤਿ ਖਮਾਪੇਤ੍ਵਾ ਪਕ੍ਕਾਮਿ.

ਏਵਂ ਲਜ੍ਜਿਨਾ ਚੋਦਿਯਮਾਨੋ ਅਲਜ੍ਜੀ ਬਹੂਸੁਪਿ ਵਤ੍ਥੂਸੁ ਉਪ੍ਪਨ੍ਨੇਸੁ ਪਟਿਞ੍ਞਂ ਨ ਦੇਤਿ, ਸੋ ਨੇਵ ‘‘ਸੁਦ੍ਧੋ’’ਤਿ ਵਤ੍ਤਬ੍ਬੋ ਨ ‘‘ਅਸੁਦ੍ਧੋ’’ਤਿ. ਜੀਵਮਤਕੋ ਨਾਮ ਆਮਕਪੂਤਿਕੋ ਨਾਮ ਚੇਸ.

ਸਚੇ ਪਨਸ੍ਸ ਅਞ੍ਞਮ੍ਪਿ ਤਾਦਿਸਂ ਵਤ੍ਥੁਂ ਉਪ੍ਪਜ੍ਜਤਿ ਨ ਵਿਨਿਚ੍ਛਿਨਿਤਬ੍ਬਂ. ਤਥਾ ਨਾਸਿਤਕੋਵ ਭਵਿਸ੍ਸਤਿ. ਸਚੇ ਪਨ ਅਲਜ੍ਜੀਯੇਵ ਅਲਜ੍ਜਿਂ ਚੋਦੇਤਿ, ਸੋ ਵਤ੍ਤਬ੍ਬੋ ‘‘ਆਵੁਸੋ ਤਵ ਵਚਨੇਨਾਯਂ ਕਿਂ ਸਕ੍ਕਾ ਵਤ੍ਤੁ’’ਨ੍ਤਿ ਇਤਰਮ੍ਪਿ ਤਥੇਵ ਵਤ੍ਵਾ ਉਭੋਪਿ ‘‘ਏਕਸਮ੍ਭੋਗਪਰਿਭੋਗਾ ਹੁਤ੍ਵਾ ਜੀਵਥਾ’’ਤਿ ਵਤ੍ਵਾ ਉਯ੍ਯੋਜੇਤਬ੍ਬਾ, ਸੀਲਤ੍ਥਾਯ ਤੇਸਂ ਵਿਨਿਚ੍ਛਯੋ ਨ ਕਾਤਬ੍ਬੋ. ਪਤ੍ਤਚੀਵਰਪਰਿਵੇਣਾਦਿਅਤ੍ਥਾਯ ਪਨ ਪਤਿਰੂਪਂ ਸਕ੍ਖਿਂ ਲਭਿਤ੍ਵਾ ਕਾਤਬ੍ਬੋ.

ਅਥ ਲਜ੍ਜੀ ਲਜ੍ਜਿਂ ਚੋਦੇਤਿ, ਵਿਵਾਦੋ ਚ ਨੇਸਂ ਕਿਸ੍ਮਿਞ੍ਚਿਦੇਵ ਅਪ੍ਪਮਤ੍ਤਕੋ ਹੋਤਿ, ਸਞ੍ਞਾਪੇਤ੍ਵਾ ‘‘ਮਾ ਏਵਂ ਕਰੋਥਾ’’ਤਿ ਅਚ੍ਚਯਂ ਦੇਸਾਪੇਤ੍ਵਾ ਉਯ੍ਯੋਜੇਤਬ੍ਬਾ. ਅਥ ਪਨੇਤ੍ਥ ਚੁਦਿਤਕੇਨ ਸਹਸਾ ਵਿਰਦ੍ਧਂ ਹੋਤਿ, ਆਦਿਤੋ ਪਟ੍ਠਾਯ ਅਲਜ੍ਜੀ ਨਾਮ ਨਤ੍ਥਿ. ਸੋ ਚ ਪਕ੍ਖਾਨੁਰਕ੍ਖਣਤ੍ਥਾਯ ਪਟਿਞ੍ਞਂ ਨ ਦੇਤਿ, ‘‘ਮਯਂ ਸਦ੍ਦਹਾਮ, ਮਯਂ ਸਦ੍ਦਹਾਮਾ’’ਤਿ ਬਹੂ ਉਟ੍ਠਹਨ੍ਤਿ. ਸੋ ਤੇਸਂ ਪਟਿਞ੍ਞਾਯ ਏਕਵਾਰਂ ਦ੍ਵੇਵਾਰਂ ਸੁਦ੍ਧੋ ਹੋਤੁ. ਅਥ ਪਨ ਵਿਰਦ੍ਧਕਾਲਤੋ ਪਟ੍ਠਾਯ ਠਾਨੇ ਨ ਤਿਟ੍ਠਤਿ, ਵਿਨਿਚ੍ਛਯੋ ਨ ਦਾਤਬ੍ਬੋ.

ਏਵਂ ਯਾਯ ਕਾਯਚਿ ਚੋਦਨਾਯ ਵਸੇਨ ਸਙ੍ਘਮਜ੍ਝੇ ਓਸਟੇ ਵਤ੍ਥੁਸ੍ਮਿਂ ਚੁਦਿਤਕਚੋਦਕੇਸੁ ਪਟਿਪਤ੍ਤਿਂ ਞਤ੍ਵਾ ਤਸ੍ਸਾਯੇਵ ਚੋਦਨਾਯ ਸਮ੍ਪਤ੍ਤਿਵਿਪਤ੍ਤਿਜਾਨਨਤ੍ਥਂ ਆਦਿਮਜ੍ਝਪਰਿਯੋਸਾਨਾਦੀਨਂ ਵਸੇਨ ਵਿਨਿਚ੍ਛਯੋ ਵੇਦਿਤਬ੍ਬੋ. ਸੇਯ੍ਯਥਿਦਂ ਚੋਦਨਾਯ ਕੋ ਆਦਿ, ਕਿਂ ਮਜ੍ਝੇ, ਕਿਂ ਪਰਿਯੋਸਾਨਂ? ਚੋਦਨਾਯ ‘‘ਅਹਂ ਤਂ ਵਤ੍ਤੁਕਾਮੋ, ਕਰੋਤੁ ਮੇ ਆਯਸ੍ਮਾ ਓਕਾਸ’’ਨ੍ਤਿ ਏਵਂ ਓਕਾਸਕਮ੍ਮਂ ਆਦਿ, ਓਤਿਣ੍ਣੇਨ ਵਤ੍ਥੁਨਾ ਚੋਦੇਤ੍ਵਾ ਸਾਰੇਤ੍ਵਾ ਵਿਨਿਚ੍ਛਯੋ ਮਜ੍ਝੇ, ਆਪਤ੍ਤਿਯਂ ਵਾ ਅਨਾਪਤ੍ਤਿਯਂ ਵਾ ਪਤਿਟ੍ਠਾਪਨੇਨ ਸਮਥੋ ਪਰਿਯੋਸਾਨਂ.

ਚੋਦਨਾਯ ਕਤਿ ਮੂਲਾਨਿ, ਕਤਿ ਵਤ੍ਥੂਨਿ, ਕਤਿ ਭੂਮਿਯੋ? ਚੋਦਨਾਯ ਦ੍ਵੇ ਮੂਲਾਨਿ – ਸਮੂਲਿਕਾ ਵਾ ਅਮੂਲਿਕਾ ਵਾ; ਤੀਣਿ ਵਤ੍ਥੂਨਿ – ਦਿਟ੍ਠਂ, ਸੁਤਂ, ਪਰਿਸਙ੍ਕਿਤਂ; ਪਞ੍ਚ ਭੂਮਿਯੋ – ਕਾਲੇਨ ਵਕ੍ਖਾਮਿ ਨੋ ਅਕਾਲੇਨ, ਭੂਤੇਨ ਵਕ੍ਖਾਮਿ ਨੋ ਅਭੂਤੇਨ, ਸਣ੍ਹੇਨ ਵਕ੍ਖਾਮਿ ਨੋ ਫਰੁਸੇਨ, ਅਤ੍ਥਸਂਹਿਤੇਨ ਵਕ੍ਖਾਮਿ ਨੋ ਅਨਤ੍ਥਸਂਹਿਤੇਨ, ਮੇਤ੍ਤਚਿਤ੍ਤੋ ਵਕ੍ਖਾਮਿ ਨੋ ਦੋਸਨ੍ਤਰੋਤਿ. ਇਮਾਯ ਚ ਪਨ ਚੋਦਨਾਯ ਚੋਦਕੇਨ ਪੁਗ੍ਗਲੇਨ ‘‘ਪਰਿਸੁਦ੍ਧਕਾਯਸਮਾਚਾਰੋ ਨੁ ਖੋਮ੍ਹੀ’’ਤਿਆਦਿਨਾ (ਚੂਲ਼ਵ. ੩੯੯) ਨਯੇਨ ਉਪਾਲਿਪਞ੍ਚਕੇ ਵੁਤ੍ਤੇਸੁ ਪਨ੍ਨਰਸਸੁ ਧਮ੍ਮੇਸੁ ਪਤਿਟ੍ਠਾਤਬ੍ਬਂ, ਚੁਦਿਤਕੇਨ ਦ੍ਵੀਸੁ ਧਮ੍ਮੇਸੁ ਪਤਿਟ੍ਠਾਤਬ੍ਬਂ ਸਚ੍ਚੇ ਚ ਅਕੁਪ੍ਪੇ ਚਾਤਿ.

ਅਪ੍ਪੇਵ ਨਾਮ ਨਂ ਇਮਮ੍ਹਾ ਬ੍ਰਹ੍ਮਚਰਿਯਾ ਚਾਵੇਯ੍ਯਨ੍ਤਿ ਅਪਿ ਏਵ ਨਾਮ ਨਂ ਪੁਗ੍ਗਲਂ ਇਮਮ੍ਹਾ ਸੇਟ੍ਠਚਰਿਯਾ ਚਾਵੇਯ੍ਯਂ, ‘‘ਸਾਧੁ ਵਤਸ੍ਸ ਸਚਾਹਂ ਇਮਂ ਪੁਗ੍ਗਲਂ ਇਮਮ੍ਹਾ ਬ੍ਰਹ੍ਮਚਰਿਯਾ ਚਾਵੇਯ੍ਯ’’ਨ੍ਤਿ ਇਮਿਨਾ ਅਧਿਪ੍ਪਾਯੇਨ ਅਨੁਦ੍ਧਂਸੇਯ੍ਯਾਤਿ ਵੁਤ੍ਤਂਹੋਤਿ. ਪਦਭਾਜਨੇ ਪਨ ‘‘ਬ੍ਰਹ੍ਮਚਰਿਯਾ ਚਾਵੇਯ੍ਯ’’ਨ੍ਤਿ ਇਮਸ੍ਸੇਵ ਪਰਿਯਾਯਮਤ੍ਥਂ ਦਸ੍ਸੇਤੁਂ ‘‘ਭਿਕ੍ਖੁਭਾਵਾ ਚਾਵੇਯ੍ਯ’’ਨ੍ਤਿਆਦਿ ਵੁਤ੍ਤਂ.

ਖਣਾਦੀਨਿ ਸਮਯਵੇਵਚਨਾਨਿ. ਤਂ ਖਣਂ ਤਂ ਲਯਂ ਤਂ ਮੁਹੁਤ੍ਤਂ ਵੀਤਿਵਤ੍ਤੇਤਿ ਤਸ੍ਮਿਂ ਖਣੇ ਤਸ੍ਮਿਂ ਲਯੇ ਤਸ੍ਮਿਂ ਮੁਹੁਤ੍ਤੇ ਵੀਤਿਵਤ੍ਤੇ. ਭੁਮ੍ਮਪ੍ਪਤ੍ਤਿਯਾ ਹਿ ਇਦਂ ਉਪਯੋਗਵਚਨਂ.

ਸਮਨੁਗ੍ਗਾਹਿਯਮਾਨਨਿਦ੍ਦੇਸੇ ਯੇਨ ਵਤ੍ਥੁਨਾ ਅਨੁਦ੍ਧਂਸਿਤੋ ਹੋਤੀਤਿ ਚਤੂਸੁ ਪਾਰਾਜਿਕਵਤ੍ਥੂਸੁ ਯੇਨ ਵਤ੍ਥੁਨਾ ਚੋਦਕੇਨ ਚੁਦਿਤਕੋ ਅਨੁਦ੍ਧਂਸਿਤੋ ਅਭਿਭੂਤੋ ਅਜ੍ਝੋਤ੍ਥਟੋ ਹੋਤਿ. ਤਸ੍ਮਿਂ ਵਤ੍ਥੁਸ੍ਮਿਂ ਸਮਨੁਗ੍ਗਾਹਿਯਮਾਨੋਤਿ ਤਸ੍ਮਿਂ ਚੋਦਕੇਨ ਵੁਤ੍ਤਵਤ੍ਥੁਸ੍ਮਿਂ ਸੋ ਚੋਦਕੋ ਅਨੁਵਿਜ੍ਜਕੇਨ ‘‘ਕਿਂ ਤੇ ਦਿਟ੍ਠਂ, ਕਿਨ੍ਤਿ ਤੇ ਦਿਟ੍ਠ’’ਨ੍ਤਿਆਦਿਨਾ ਨਯੇਨ ਅਨੁਵਿਜ੍ਜਿਯਮਾਨੋ ਵੀਮਂਸਿਯਮਾਨੋ ਉਪਪਰਿਕ੍ਖਿਯਮਾਨੋ.

ਅਸਮਨੁਗ੍ਗਾਹਿਯਮਾਨਨਿਦ੍ਦੇਸੇ ਨ ਕੇਨਚਿ ਵੁਚ੍ਚਮਾਨੋਤਿ ਅਨੁਵਿਜ੍ਜਕੇਨ ਵਾ ਅਞ੍ਞੇਨ ਵਾ ਕੇਨਚਿ, ਅਥ ਵਾ ਦਿਟ੍ਠਾਦੀਸੁ ਵਤ੍ਥੂਸੁ ਕੇਨਚਿ ਅਵੁਚ੍ਚਮਾਨੋ. ਏਤੇਸਞ੍ਚ ਦ੍ਵਿਨ੍ਨਂ ਮਾਤਿਕਾਪਦਾਨਂ ਪਰਤੋ ‘‘ਭਿਕ੍ਖੁ ਚ ਦੋਸਂ ਪਤਿਟ੍ਠਾਤੀ’’ਤਿਇਮਿਨਾ ਸਮ੍ਬਨ੍ਧੋ ਵੇਦਿਤਬ੍ਬੋ. ਇਦਞ੍ਹਿ ਵੁਤ੍ਤਂ ਹੋਤਿ – ‘‘ਏਵਂ ਸਮਨੁਗ੍ਗਾਹਿਯਮਾਨੋ ਵਾ ਅਸਮਨੁਗ੍ਗਾਹਿਯਮਾਨੋ ਵਾ ਭਿਕ੍ਖੁ ਚ ਦੋਸਂ ਪਤਿਟ੍ਠਾਤਿ ਪਟਿਚ੍ਚ ਤਿਟ੍ਠਤਿ ਪਟਿਜਾਨਾਤਿ ਸਙ੍ਘਾਦਿਸੇਸੋ’’ਤਿ. ਇਦਞ੍ਚ ਅਮੂਲਕਭਾਵਸ੍ਸ ਪਾਕਟਕਾਲਦਸ੍ਸਨਤ੍ਥਮੇਵ ਵੁਤ੍ਤਂ. ਆਪਤ੍ਤਿਂ ਪਨ ਅਨੁਦ੍ਧਂਸਿਤਕ੍ਖਣੇਯੇਵ ਆਪਜ੍ਜਤਿ.

ਇਦਾਨਿ ‘‘ਅਮੂਲਕਞ੍ਚੇਵ ਤਂ ਅਧਿਕਰਣਂ ਹੋਤੀ’’ਤਿ ਏਤ੍ਥ ਯਸ੍ਮਾ ਅਮੂਲਕਲਕ੍ਖਣਂ ਪੁਬ੍ਬੇ ਵੁਤ੍ਤਂ, ਤਸ੍ਮਾ ਤਂ ਅਵਤ੍ਵਾ ਅਪੁਬ੍ਬਮੇਵ ਦਸ੍ਸੇਤੁਂ ‘‘ਅਧਿਕਰਣਂ ਨਾਮਾ’’ਤਿਆਦਿਮਾਹ. ਤਤ੍ਥ ਯਸ੍ਮਾ ਅਧਿਕਰਣਂ ਅਧਿਕਰਣਟ੍ਠੇਨ ਏਕਮ੍ਪਿ ਵਤ੍ਥੁਵਸੇਨ ਨਾਨਾ ਹੋਤਿ, ਤੇਨਸ੍ਸ ਤਂ ਨਾਨਤ੍ਤਂ ਦਸ੍ਸੇਤੁਂ ‘‘ਚਤ੍ਤਾਰਿ ਅਧਿਕਰਣਾਨਿ ਵਿਵਾਦਾਧਿਕਰਣ’’ਨ੍ਤਿਆਦਿਮਾਹ. ਕੋ ਪਨ ਸੋ ਅਧਿਕਰਣਟ੍ਠੋ, ਯੇਨੇਤਂ ਏਕਂ ਹੋਤੀਤਿ? ਸਮਥੇਹਿ ਅਧਿਕਰਣੀਯਤਾ. ਤਸ੍ਮਾ ਯਂ ਅਧਿਕਿਚ੍ਚ ਆਰਬ੍ਭ ਪਟਿਚ੍ਚ ਸਨ੍ਧਾਯ ਸਮਥਾ ਵਤ੍ਤਨ੍ਤਿ, ਤਂ ‘‘ਅਧਿਕਰਣ’’ਨ੍ਤਿ ਵੇਦਿਤਬ੍ਬਂ.

ਅਟ੍ਠਕਥਾਸੁ ਪਨ ਵੁਤ੍ਤਂ – ‘‘ਅਧਿਕਰਣਨ੍ਤਿ ਕੇਚਿ ਗਾਹਂ ਵਦਨ੍ਤਿ, ਕੇਚਿ ਚੇਤਨਂ, ਕੇਚਿ ਅਕ੍ਖਨ੍ਤਿਂ ਕੇਚਿ ਵੋਹਾਰਂ, ਕੇਚਿ ਪਣ੍ਣਤ੍ਤਿ’’ਨ੍ਤਿ. ਪੁਨ ਏਵਂ ਵਿਚਾਰਿਤਂ ‘‘ਯਦਿ ਗਾਹੋ ਅਧਿਕਰਣਂ ਨਾਮ, ਏਕੋ ਅਤ੍ਤਾਦਾਨਂ ਗਹੇਤ੍ਵਾ ਸਭਾਗੇਨ ਭਿਕ੍ਖੁਨਾ ਸਦ੍ਧਿਂ ਮਨ੍ਤਯਮਾਨੋ ਤਤ੍ਥ ਆਦੀਨਵਂ ਦਿਸ੍ਵਾ ਪੁਨ ਚਜਤਿ, ਤਸ੍ਸ ਤਂ ਅਧਿਕਰਣਂ ਸਮਥਪ੍ਪਤ੍ਤਂ ਭਵਿਸ੍ਸਤਿ. ਯਦਿ ਚੇਤਨਾ ਅਧਿਕਰਣਂ, ‘‘ਇਦਂ ਅਤ੍ਤਾਦਾਨਂ ਗਣ੍ਹਾਮੀ’’ਤਿ ਉਪ੍ਪਨ੍ਨਾ ਚੇਤਨਾ ਨਿਰੁਜ੍ਝਤਿ. ਯਦਿ ਅਕ੍ਖਨ੍ਤਿ ਅਧਿਕਰਣਂ, ਅਕ੍ਖਨ੍ਤਿਯਾ ਅਤ੍ਤਾਦਾਨਂ ਗਹੇਤ੍ਵਾਪਿ ਅਪਰਭਾਗੇ ਵਿਨਿਚ੍ਛਯਂ ਅਲਭਮਾਨੋ ਵਾ ਖਮਾਪਿਤੋ ਵਾ ਚਜਤਿ. ਯਦਿ ਵੋਹਾਰੋ ਅਧਿਕਰਣਂ, ਕਥੇਨ੍ਤੋ ਆਹਿਣ੍ਡਿਤ੍ਵਾ ਅਪਰਭਾਗੇ ਤੁਣ੍ਹੀ ਹੋਤਿ ਨਿਰਵੋ, ਏਵਮਸ੍ਸ ਤਂ ਅਧਿਕਰਣਂ ਸਮਥਪ੍ਪਤ੍ਤਂ ਭਵਿਸ੍ਸਤਿ, ਤਸ੍ਮਾ ਪਣ੍ਣਤ੍ਤਿ ਅਧਿਕਰਣਨ੍ਤਿ.

ਤਂ ਪਨੇਤਂ ‘‘ਮੇਥੁਨਧਮ੍ਮਪਾਰਾਜਿਕਾਪਤ੍ਤਿ ਮੇਥੁਨਧਮ੍ਮਪਾਰਾਜਿਕਾਪਤ੍ਤਿਯਾ ਤਬ੍ਭਾਗਿਯਾ…ਪੇ… ਏਵਂ ਆਪਤ੍ਤਾਧਿਕਰਣਂ ਆਪਤ੍ਤਾਧਿਕਰਣਸ੍ਸ ਤਬ੍ਭਾਗਿਯਨ੍ਤਿ ਚ ਵਿਵਾਦਾਧਿਕਰਣਂ ਸਿਯਾ ਕੁਸਲਂ ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤ’’ਨ੍ਤਿ ਚ ਏਵਮਾਦੀਹਿ ਵਿਰੁਜ੍ਝਤਿ. ਨ ਹਿ ਤੇ ਪਣ੍ਣਤ੍ਤਿਯਾ ਕੁਸਲਾਦਿਭਾਵਂ ਇਚ੍ਛਨ੍ਤਿ, ਨ ਚ ‘‘ਅਮੂਲਕੇਨ ਪਾਰਾਜਿਕੇਨ ਧਮ੍ਮੇਨਾ’’ਤਿ ਏਤ੍ਥ ਆਗਤੋ ਪਾਰਾਜਿਕਧਮ੍ਮੋ ਪਣ੍ਣਤ੍ਤਿ ਨਾਮ ਹੋਤਿ. ਕਸ੍ਮਾ? ਅਚ੍ਚਨ੍ਤਅਕੁਸਲਤ੍ਤਾ. ਵੁਤ੍ਤਮ੍ਪਿ ਹੇਤਂ – ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤ’’ਨ੍ਤਿ (ਪਰਿ. ੩੦੩).

ਯਞ੍ਚੇਤਂ ‘‘ਅਮੂਲਕੇਨ ਪਾਰਾਜਿਕੇਨਾ’’ਤਿ ਏਤ੍ਥ ਅਮੂਲਕਂ ਪਾਰਾਜਿਕਂ ਨਿਦ੍ਦਿਟ੍ਠਂ, ਤਸ੍ਸੇਵਾਯਂ ‘‘ਅਮੂਲਕਞ੍ਚੇਵ ਤਂ ਅਧਿਕਰਣਂ ਹੋਤੀ’’ਤਿ ਪਟਿਨਿਦ੍ਦੇਸੋ, ਨ ਪਣ੍ਣਤ੍ਤਿਯਾ ਨ ਹਿ ਅਞ੍ਞਂ ਨਿਦ੍ਦਿਸਿਤ੍ਵਾ ਅਞ੍ਞਂ ਪਟਿਨਿਦ੍ਦਿਸਤਿ. ਯਸ੍ਮਾ ਪਨ ਯਾਯ ਪਣ੍ਣਤ੍ਤਿਯਾ ਯੇਨ ਅਭਿਲਾਪੇਨ ਚੋਦਕੇਨ ਸੋ ਪੁਗ੍ਗਲੋ ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਤਿ ਪਞ੍ਞਤ੍ਤੋ, ਪਾਰਾਜਿਕਸਙ੍ਖਾਤਸ੍ਸ ਅਧਿਕਰਣਸ੍ਸ ਅਮੂਲਕਤ੍ਤਾ ਸਾਪਿ ਪਞ੍ਞਤ੍ਤਿ ਅਮੂਲਿਕਾ ਹੋਤਿ, ਅਧਿਕਰਣੇ ਪਵਤ੍ਤਤ੍ਤਾ ਚ ਅਧਿਕਰਣਂ. ਤਸ੍ਮਾ ਇਮਿਨਾ ਪਰਿਯਾਯੇਨ ਪਣ੍ਣਤ੍ਤਿ ‘‘ਅਧਿਕਰਣ’’ਨ੍ਤਿ ਯੁਜ੍ਜੇਯ੍ਯ, ਯਸ੍ਮਾ ਵਾ ਯਂ ਅਮੂਲਕਂ ਨਾਮ ਅਧਿਕਰਣਂ ਤਂ ਸਭਾਵਤੋ ਨਤ੍ਥਿ, ਪਞ੍ਞਤ੍ਤਿਮਤ੍ਤਮੇਵ ਅਤ੍ਥਿ. ਤਸ੍ਮਾਪਿ ਪਣ੍ਣਤ੍ਤਿ ਅਧਿਕਰਣਨ੍ਤਿ ਯੁਜ੍ਜੇਯ੍ਯ. ਤਞ੍ਚ ਖੋ ਇਧੇਵ ਨ ਸਬ੍ਬਤ੍ਥ. ਨ ਹਿ ਵਿਵਾਦਾਦੀਨਂ ਪਣ੍ਣਤ੍ਤਿ ਅਧਿਕਰਣਂ. ਅਧਿਕਰਣਟ੍ਠੋ ਪਨ ਤੇਸਂ ਪੁਬ੍ਬੇ ਵੁਤ੍ਤਸਮਥੇਹਿ ਅਧਿਕਰਣੀਯਤਾ. ਇਤਿ ਇਮਿਨਾ ਅਧਿਕਰਣਟ੍ਠੇਨ ਇਧੇਕਚ੍ਚੋ ਵਿਵਾਦੋ ਵਿਵਾਦੋ ਚੇਵ ਅਧਿਕਰਣਞ੍ਚਾਤਿ ਵਿਵਾਦਾਧਿਕਰਣਂ. ਏਸ ਨਯੋ ਸੇਸੇਸੁ.

ਤਤ੍ਥ ‘‘ਇਧ ਭਿਕ੍ਖੂ ਵਿਵਦਨ੍ਤਿ ਧਮ੍ਮੋਤਿ ਵਾ ਅਧਮ੍ਮੋਤਿ ਵਾ’’ਤਿ ਏਵਂ ਅਟ੍ਠਾਰਸ ਭੇਦਕਰਵਤ੍ਥੂਨਿ ਨਿਸ੍ਸਾਯ ਉਪ੍ਪਨ੍ਨੋ ਵਿਵਾਦੋ ਵਿਵਾਦਾਧਿਕਰਣਂ. ‘‘ਇਧ ਭਿਕ੍ਖੂ ਭਿਕ੍ਖੁਂ ਅਨੁਵਦਨ੍ਤਿ ਸੀਲਵਿਪਤ੍ਤਿਯਾ ਵਾ’’ਤਿ ਏਵਂ ਚਤਸ੍ਸੋ ਵਿਪਤ੍ਤਿਯੋ ਨਿਸ੍ਸਾਯ ਉਪ੍ਪਨ੍ਨੋ ਅਨੁਵਾਦੋ ਅਨੁਵਾਦਾਧਿਕਰਣਂ. ‘‘ਪਞ੍ਚਪਿ ਆਪਤ੍ਤਿਕ੍ਖਨ੍ਧਾ ਆਪਤ੍ਤਾਧਿਕਰਣਂ, ਸਤ੍ਤਪਿ ਆਪਤ੍ਤਿਕ੍ਖਨ੍ਧਾ ਆਪਤ੍ਤਾਧਿਕਰਣ’’ਨ੍ਤਿ ਏਵਂ ਆਪਤ੍ਤਿਯੇਵ ਆਪਤ੍ਤਾਧਿਕਰਣਂ. ‘‘ਯਾ ਸਙ੍ਘਸ੍ਸ ਕਿਚ੍ਚਯਤਾ ਕਰਣੀਯਤਾ ਅਪਲੋਕਨਕਮ੍ਮਂ ਞਤ੍ਤਿਕਮ੍ਮਂ ਞਤ੍ਤਿਦੁਤਿਯਕਮ੍ਮਂ ਞਤ੍ਤਿਚਤੁਤ੍ਥਕਮ੍ਮ’’ਨ੍ਤਿ (ਚੂਲ਼ਵ. ੨੧੫) ਏਵਂ ਚਤੁਬ੍ਬਿਧਂ ਸਙ੍ਘਕਿਚ੍ਚਂ ਕਿਚ੍ਚਾਧਿਕਰਣਨ੍ਤਿ ਵੇਦਿਤਬ੍ਬਂ.

ਇਮਸ੍ਮਿਂ ਪਨਤ੍ਥੇ ਪਾਰਾਜਿਕਾਪਤ੍ਤਿਸਙ੍ਖਾਤਂ ਆਪਤ੍ਤਾਧਿਕਰਣਮੇਵ ਅਧਿਪ੍ਪੇਤਂ. ਸੇਸਾਨਿ ਅਤ੍ਥੁਦ੍ਧਾਰਵਸੇਨ ਵੁਤ੍ਤਾਨਿ, ਏਤ੍ਤਕਾ ਹਿ ਅਧਿਕਰਣਸਦ੍ਦਸ੍ਸ ਅਤ੍ਥਾ. ਤੇਸੁ ਪਾਰਾਜਿਕਮੇਵ ਇਧ ਅਧਿਪ੍ਪੇਤਂ. ਤਂ ਦਿਟ੍ਠਾਦੀਹਿ ਮੂਲੇਹਿ ਅਮੂਲਕਞ੍ਚੇਵ ਅਧਿਕਰਣਂ ਹੋਤਿ. ਅਯਞ੍ਚ ਭਿਕ੍ਖੁ ਦੋਸਂ ਪਤਿਟ੍ਠਾਤਿ, ਪਟਿਚ੍ਚ ਤਿਟ੍ਠਤਿ ‘‘ਤੁਚ੍ਛਕਂ ਮਯਾ ਭਣਿਤ’’ਨ੍ਤਿਆਦੀਨਿ ਵਦਨ੍ਤੋ ਪਟਿਜਾਨਾਤਿ. ਤਸ੍ਸ ਭਿਕ੍ਖੁਨੋ ਅਨੁਦ੍ਧਂਸਿਤਕ੍ਖਣੇਯੇਵ ਸਙ੍ਘਾਦਿਸੇਸੋਤਿ ਅਯਂ ਤਾਵਸ੍ਸ ਸਪਦਾਨੁਕ੍ਕਮਨਿਦ੍ਦੇਸਸ੍ਸ ਸਿਕ੍ਖਾਪਦਸ੍ਸ ਅਤ੍ਥੋ.

੩੮੭. ਇਦਾਨਿ ਯਾਨਿ ਤਾਨਿ ਸਙ੍ਖੇਪਤੋ ਦਿਟ੍ਠਾਦੀਨਿ ਚੋਦਨਾਵਤ੍ਥੂਨਿ ਵੁਤ੍ਤਾਨਿ, ਤੇਸਂ ਵਸੇਨ ਵਿਤ੍ਥਾਰਤੋ ਆਪਤ੍ਤਿਂ ਰੋਪੇਤ੍ਵਾ ਦਸ੍ਸੇਨ੍ਤੋ ‘‘ਅਦਿਟ੍ਠਸ੍ਸ ਹੋਤੀ’’ਤਿਆਦਿਮਾਹ. ਤਤ੍ਥ ਅਦਿਟ੍ਠਸ੍ਸ ਹੋਤੀਤਿ ਅਦਿਟ੍ਠੋ ਅਸ੍ਸ ਹੋਤਿ. ਏਤੇਨ ਚੋਦਕੇਨ ਅਦਿਟ੍ਠੋ ਹੋਤਿ, ਸੋ ਪੁਗ੍ਗਲੋ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋਤਿ ਅਤ੍ਥੋ. ਏਸ ਨਯੋ ਅਸੁਤਸ੍ਸ ਹੋਤੀਤਿਆਦੀਸੁਪਿ.

ਦਿਟ੍ਠੋ ਮਯਾਤਿ ਦਿਟ੍ਠੋਸਿ ਮਯਾਤਿ ਵੁਤ੍ਤਂ ਹੋਤਿ. ਏਸ ਨਯੋ ਸੁਤੋ ਮਯਾਤਿਆਦੀਸੁਪਿ. ਸੇਸਂ ਅਦਿਟ੍ਠਮੂਲਕੇ ਉਤ੍ਤਾਨਤ੍ਥਮੇਵ. ਦਿਟ੍ਠਮੂਲਕੇ ਪਨ ਤਞ੍ਚੇ ਚੋਦੇਤਿ ‘‘ਸੁਤੋ ਮਯਾ’’ਤਿ ਏਵਂ ਵੁਤ੍ਤਾਨਂ ਸੁਤ੍ਤਾਦੀਨਂ ਆਭਾਵੇਨ ਅਮੂਲਕਤ੍ਤਂ ਵੇਦਿਤਬ੍ਬਂ.

ਸਬ੍ਬਸ੍ਮਿਂਯੇਵ ਚ ਇਮਸ੍ਮਿਂ ਚੋਦਕਵਾਰੇ ਯਥਾ ਇਧਾਗਤੇਸੁ ‘‘ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸਿ, ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸੀ’’ਤਿ ਇਮੇਸੁ ਵਚਨੇਸੁ ਏਕੇਕਸ੍ਸ ਵਸੇਨ ਵਾਚਾਯ ਵਾਚਾਯ ਸਙ੍ਘਾਦਿਸੇਸੋ ਹੋਤਿ, ਏਵਂ ਅਞ੍ਞਤ੍ਰ ਆਗਤੇਸੁ ‘‘ਦੁਸ੍ਸੀਲੋ, ਪਾਪਧਮ੍ਮੋ, ਅਸੁਚਿਸਙ੍ਕਸ੍ਸਰਸਮਾਚਾਰੋ, ਪਟਿਚ੍ਛਨ੍ਨਕਮ੍ਮਨ੍ਤੋ, ਅਸ੍ਸਮਣੋ ਸਮਣਪਟਿਞ੍ਞੋ, ਅਬ੍ਰਹ੍ਮਚਾਰੀ ਬ੍ਰਹ੍ਮਚਾਰਿਪਟਿਞ੍ਞੋ, ਅਨ੍ਤੋਪੂਤਿ, ਅਵਸ੍ਸੁਤੋ, ਕਸਮ੍ਬੁਜਾਤੋ’’ਤਿ ਇਮੇਸੁਪਿ ਵਚਨੇਸੁ ਏਕੇਕਸ੍ਸ ਵਸੇਨ ਵਾਚਾਯ ਵਾਚਾਯ ਸਙ੍ਘਾਦਿਸੇਸੋ ਹੋਤਿਯੇਵ.

‘‘ਨਤ੍ਥਿ ਤਯਾ ਸਦ੍ਧਿਂ ਉਪੋਸਥੋ ਵਾ ਪਵਾਰਣਾ ਵਾ ਸਙ੍ਘਕਮ੍ਮਂ ਵਾ’’ਤਿ ਇਮਾਨਿ ਪਨ ਸੁਦ੍ਧਾਨਿ ਸੀਸਂ ਨ ਏਨ੍ਤਿ, ‘‘ਦੁਸ੍ਸੀਲੋਸਿ ਨਤ੍ਥਿ ਤਯਾ ਸਦ੍ਧਿਂ ਉਪੋਸਥੋ ਵਾ’’ਤਿ ਏਵਂ ਦੁਸ੍ਸੀਲਾਦਿਪਦੇਸੁ ਪਨ ‘‘ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸੀ’’ਤਿਆਦਿਪਦੇਸੁ ਵਾ ਯੇਨ ਕੇਨਚਿ ਸਦ੍ਧਿਂ ਘਟਿਤਾਨੇਵ ਸੀਸਂ ਏਨ੍ਤਿ, ਸਙ੍ਘਾਦਿਸੇਸਕਰਾਨਿ ਹੋਨ੍ਤਿ.

ਮਹਾਪਦੁਮਤ੍ਥੇਰੋ ਪਨਾਹ – ‘‘ਨ ਕੇਵਲਂ ਇਧ ਪਾਲ਼ਿਯਂ ਅਨਾਗਤਾਨਿ ‘ਦੁਸ੍ਸੀਲੋ ਪਾਪਧਮ੍ਮੋ’ਤਿਆਦਿਪਦਾਨੇਵ ਸੀਸਂ ਏਨ੍ਤਿ, ‘ਕੋਣ੍ਠੋਸਿ ਮਹਾਸਾਮਣੇਰੋਸਿ, ਮਹਾਉਪਾਸਕੋਸਿ, ਜੇਟ੍ਠਬ੍ਬਤਿਕੋਸਿ, ਨਿਗਣ੍ਠੋਸਿ, ਆਜੀਵਕੋਸਿ, ਤਾਪਸੋਸਿ, ਪਰਿਬ੍ਬਾਜਕੋਸਿ, ਪਣ੍ਡਕੋਸਿ, ਥੇਯ੍ਯਸਂਵਾਸਕੋਸਿ, ਤਿਤ੍ਥਿਯਪਕ੍ਕਨ੍ਤਕੋਸਿ, ਤਿਰਚ੍ਛਾਨਗਤੋਸਿ, ਮਾਤੁਘਾਤਕੋਸਿ, ਪਿਤੁਘਾਤਕੋਸਿ, ਅਰਹਨ੍ਤਘਾਤਕੋਸਿ, ਸਙ੍ਘਭੇਦਕੋਸਿ, ਲੋਹਿਤੁਪ੍ਪਾਦਕੋਸਿ, ਭਿਕ੍ਖੁਨੀਦੂਸਕੋਸਿ, ਉਭਤੋਬ੍ਯਞ੍ਜਨਕਓਸੀ’ਤਿ ਇਮਾਨਿਪਿ ਸੀਸਂ ਏਨ੍ਤਿਯੇਵਾ’’ਤਿ. ਮਹਾਪਦੁਮਤ੍ਥੇਰੋਯੇਵ ਚ ‘‘ਦਿਟ੍ਠੇ ਵੇਮਤਿਕੋਤਿਆਦੀਸੁ ਯਦਗ੍ਗੇਨ ਵੇਮਤਿਕੋ ਤਦਗ੍ਗੇਨ ਨੋ ਕਪ੍ਪੇਤਿ, ਯਦਗ੍ਗੇਨ ਨੋ ਕਪ੍ਪੇਤਿ ਤਦਗ੍ਗੇਨ ਨਸ੍ਸਰਤਿ, ਯਦਗ੍ਗੇਨ ਨਸ੍ਸਰਤਿ ਤਦਗ੍ਗੇਨ ਪਮੁਟ੍ਠੋ ਹੋਤੀ’’ਤਿ ਵਦਤਿ.

ਮਹਾਸੁਮਤ੍ਥੇਰੋ ਪਨ ਏਕੇਕਂ ਦ੍ਵਿਧਾ ਭਿਨ੍ਦਿਤ੍ਵਾ ਚਤੁਨ੍ਨਮ੍ਪਿ ਪਾਟੇਕ੍ਕਂ ਨਯਂ ਦਸ੍ਸੇਤਿ. ਕਥਂ? ਦਿਟ੍ਠੇ ਵੇਮਤਿਕੋਤਿ ਅਯਂ ਤਾਵ ਦਸ੍ਸਨੇ ਵਾ ਵੇਮਤਿਕੋ ਹੋਤਿ ਪੁਗ੍ਗਲੇ ਵਾ, ਤਤ੍ਥ ‘‘ਦਿਟ੍ਠੋ ਨੁਖੋ ਮਯਾ ਨ ਦਿਟ੍ਠੋ’’ਤਿ ਏਵਂ ਦਸ੍ਸਨੇ ਵੇਮਤਿਕੋ ਹੋਤਿ. ‘‘ਅਯਂ ਨੁਖੋ ਮਯਾ ਦਿਟ੍ਠੋ ਅਞ੍ਞੋ’’ਤਿ ਏਵਂ ਪੁਗ੍ਗਲੇ ਵੇਮਤਿਕੋ ਹੋਤਿ. ਏਵਂ ਦਸ੍ਸਨਂ ਵਾ ਨੋ ਕਪ੍ਪੇਤਿ ਪੁਗ੍ਗਲਂ ਵਾ, ਦਸ੍ਸਨਂ ਵਾ ਨਸ੍ਸਰਤਿ ਪੁਗ੍ਗਲਂ ਵਾ, ਦਸ੍ਸਨਂ ਵਾ ਪਮੁਟ੍ਠੋ ਹੋਤਿ ਪੁਗ੍ਗਲਂ ਵਾ. ਏਤ੍ਥ ਚ ਵੇਮਤਿਕੋਤਿ ਵਿਮਤਿਜਾਤੋ. ਨੋ ਕਪ੍ਪੇਤੀਤਿ ਨ ਸਦ੍ਦਹਤਿ. ਨਸ੍ਸਰਤੀਤਿ ਅਸਾਰਿਯਮਾਨੋ ਨਸ੍ਸਰਤਿ. ਯਦਾ ਪਨ ਤਂ ‘‘ਅਸੁਕਸ੍ਮਿਂ ਨਾਮ ਭਨ੍ਤੇ ਠਾਨੇ ਅਸੁਕਸ੍ਮਿਂ ਨਾਮ ਕਾਲੇ’’ਤਿ ਸਾਰੇਨ੍ਤਿ ਤਦਾ ਸਰਤਿ. ਪਮੁਟ੍ਠੋਤਿ ਯੋ ਤੇਹਿ ਤੇਹਿ ਉਪਾਯੇਹਿ ਸਾਰਿਯਮਾਨੋਪਿ ਨਸ੍ਸਰਤਿਯੇਵਾਤਿ. ਏਤੇਨੇਵੁਪਾਯੇਨ ਚੋਦਾਪਕਵਾਰੋਪਿ ਵੇਦਿਤਬ੍ਬੋ, ਕੇਵਲਞ੍ਹਿ ਤਤ੍ਥ ‘‘ਮਯਾ’’ਤਿ ਪਰਿਹੀਨਂ, ਸੇਸਂ ਚੋਦਕਵਾਰਸਦਿਸਮੇਵ.

੩੮੯. ਤਤੋ ਪਰਂ ਆਪਤ੍ਤਿਭੇਦਂ ਅਨਾਪਤ੍ਤਿਭੇਦਞ੍ਚ ਦਸ੍ਸੇਤੁਂ ‘‘ਅਸੁਦ੍ਧੇ ਸੁਦ੍ਧਦਿਟ੍ਠੀ’’ਤਿਆਦਿਕਂ ਚਤੁਕ੍ਕਂ ਠਪੇਤ੍ਵਾ ਏਕਮੇਕਂ ਪਦਂ ਚਤੂਹਿ ਚਤੂਹਿ ਭੇਦੇਹਿ ਨਿਦ੍ਦਿਟ੍ਠਂ, ਤਂ ਸਬ੍ਬਂ ਪਾਲ਼ਿਨਯੇਨੇਵ ਸਕ੍ਕਾ ਜਾਨਿਤੁਂ. ਕੇਵਲਂ ਹੇਤ੍ਥਾਧਿਪ੍ਪਾਯਭੇਦੋ ਵੇਦਿਤਬ੍ਬੋ. ਅਯਞ੍ਹਿ ਅਧਿਪ੍ਪਾਯੋ ਨਾਮ – ਚਾਵਨਾਧਿਪ੍ਪਾਯੋ, ਅਕ੍ਕੋਸਾਧਿਪ੍ਪਾਯੋ, ਕਮ੍ਮਾਧਿਪ੍ਪਾਯੋ, ਵੁਟ੍ਠਾਨਾਧਿਪ੍ਪਾਯੋ, ਉਪੋਸਥਪਵਾਰਣਟ੍ਠਪਨਾਧਿਪ੍ਪਾਯੋ, ਅਨੁਵਿਜ੍ਜਨਾਧਿਪ੍ਪਾਯੋ, ਧਮ੍ਮਕਥਾਧਿਪ੍ਪਾਯੋਤਿ ਅਨੇਕਵਿਧੋ. ਤਤ੍ਥ ਪੁਰਿਮੇਸੁ ਚਤੂਸੁ ਅਧਿਪ੍ਪਾਯੇਸੁ ਓਕਾਸਂ ਅਕਾਰਾਪੇਨ੍ਤਸ੍ਸ ਦੁਕ੍ਕਟਂ. ਓਕਾਸਂ ਕਾਰਾਪੇਤ੍ਵਾਪਿ ਚ ਸਮ੍ਮੁਖਾ ਅਮੂਲਕੇਨ ਪਾਰਾਜਿਕੇਨ ਅਨੁਦ੍ਧਂਸੇਨ੍ਤਸ੍ਸ ਸਙ੍ਘਾਦਿਸੇਸੋ. ਅਮੂਲਕੇਨ ਸਙ੍ਘਾਦਿਸੇਸੇਨ ਅਨੁਦ੍ਧਂਸੇਨ੍ਤਸ੍ਸ ਪਾਚਿਤ੍ਤਿਯਂ. ਆਚਾਰਵਿਪਤ੍ਤਿਯਾ ਅਨੁਦ੍ਧਂਸੇਨ੍ਤਸ੍ਸ ਦੁਕ੍ਕਟਂ. ਅਕ੍ਕੋਸਾਧਿਪ੍ਪਾਯੇਨ ਵਦਨ੍ਤਸ੍ਸ ਪਾਚਿਤ੍ਤਿਯਂ. ਅਸਮ੍ਮੁਖਾ ਪਨ ਸਤ੍ਤਹਿਪਿ ਆਪਤ੍ਤਿਕ੍ਖਨ੍ਧੇਹਿ ਵਦਨ੍ਤਸ੍ਸ ਦੁਕ੍ਕਟਂ. ਅਸਮ੍ਮੁਖਾ ਏਵ ਸਤ੍ਤਵਿਧਮ੍ਪਿ ਕਮ੍ਮਂ ਕਰੋਨ੍ਤਸ੍ਸ ਦੁਕ੍ਕਟਮੇਵ.

ਕੁਰੁਨ੍ਦਿਯਂ ਪਨ ‘‘ਵੁਟ੍ਠਾਨਾਧਿਪ੍ਪਾਯੇਨ ‘ਤ੍ਵਂ ਇਮਂ ਨਾਮ ਆਪਤ੍ਤਿਂ ਆਪਨ੍ਨੋ ਤਂ ਪਟਿਕਰੋਹੀ’ਤਿ ਵਦਨ੍ਤਸ੍ਸ ਓਕਾਸਕਿਚ੍ਚਂ ਨਤ੍ਥੀ’’ਤਿ ਵੁਤ੍ਤਂ. ਸਬ੍ਬਤ੍ਥੇਵ ਪਨ ‘‘ਉਪੋਸਥਪਵਾਰਣਂ ਠਪੇਨ੍ਤਸ੍ਸ ਓਕਾਸਕਮ੍ਮਂ ਨਤ੍ਥੀ’’ਤਿ ਵੁਤ੍ਤਂ. ਠਪਨਕ੍ਖੇਤ੍ਤਂ ਪਨ ਜਾਨਿਤਬ੍ਬਂ. ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ ਅਜ੍ਜੁਪੋਸਥੋ ਪਨ੍ਨਰਸੋ ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ ਸਙ੍ਘੋ ਉਪੋਸਥਂ ਕਰੇਯ੍ਯ’’ਤਿ ਏਤਸ੍ਮਿਞ੍ਹਿ ਰੇ-ਕਾਰੇ ਅਨਤਿਕ੍ਕਨ੍ਤੇਯੇਵ ਠਪੇਤੁਂ ਲਬ੍ਭਤਿ. ਤਤੋ ਪਰਂ ਪਨ ਯ੍ਯ-ਕਾਰੇ ਪਤ੍ਤੇ ਨ ਲਬ੍ਭਤਿ. ਏਸ ਨਯੋ ਪਵਾਰਣਾਯ. ਅਨੁਵਿਜ੍ਜਕਸ੍ਸਾਪਿ ਓਸਟੇ ਵਤ੍ਥੁਸ੍ਮਿਂ ‘‘ਅਤ੍ਥੇਤਂ ਤਵਾ’’ਤਿ ਅਨੁਵਿਜ੍ਜਨਾਧਿਪ੍ਪਾਯੇਨ ਵਦਨ੍ਤਸ੍ਸ ਓਕਾਸਕਮ੍ਮਂ ਨਤ੍ਥਿ.

ਧਮ੍ਮਕਥਿਕਸ੍ਸਾਪਿ ਧਮ੍ਮਾਸਨੇ ਨਿਸੀਦਿਤ੍ਵਾ ‘‘ਯੋ ਇਦਞ੍ਚਿਦਞ੍ਚ ਕਰੋਤਿ, ਅਯਂ ਭਿਕ੍ਖੁ ਅਸ੍ਸਮਣੋ’’ਤਿਆਦਿਨਾ ਨਯੇਨ ਅਨੋਦਿਸ੍ਸ ਧਮ੍ਮਂ ਕਥੇਨ੍ਤਸ੍ਸ ਓਕਾਸਕਮ੍ਮਂ ਨਤ੍ਥਿ. ਸਚੇ ਪਨ ਓਦਿਸ੍ਸ ਨਿਯਮੇਤ੍ਵਾ ‘‘ਅਸੁਕੋ ਚ ਅਸੁਕੋ ਚ ਅਸ੍ਸਮਣੋ ਅਨੁਪਾਸਕੋ’’ਤਿ ਕਥੇਤਿ, ਧਮ੍ਮਾਸਨਤੋ ਓਰੋਹਿਤ੍ਵਾ ਆਪਤ੍ਤਿਂ ਦੇਸੇਤ੍ਵਾ ਗਨ੍ਤਬ੍ਬਂ. ਯਂ ਪਨ ਤਤ੍ਥ ਤਤ੍ਥ ‘‘ਅਨੋਕਾਸਂ ਕਾਰਾਪੇਤ੍ਵਾ’’ਤਿ ਵੁਤ੍ਤਂ ਤਸ੍ਸ ਓਕਾਸਂ ਅਕਾਰਾਪੇਤ੍ਵਾਤਿ ਏਵਮਤ੍ਥੋ ਵੇਦਿਤਬ੍ਬੋ, ਨ ਹਿ ਕੋਚਿ ਅਨੋਕਾਸੋ ਨਾਮ ਅਤ੍ਥਿ, ਯਮੋਕਾਸਂ ਕਾਰਾਪੇਤ੍ਵਾ ਆਪਤ੍ਤਿਂ ਆਪਜ੍ਜਤਿ, ਓਕਾਸਂ ਪਨ ਅਕਾਰਾਪੇਤ੍ਵਾ ਆਪਜ੍ਜਤੀਤਿ. ਸੇਸਂ ਉਤ੍ਤਾਨਮੇਵ.

ਸਮੁਟ੍ਠਾਨਾਦੀਸੁ ਤਿਸਮੁਟ੍ਠਾਨਂ – ਕਾਯਚਿਤ੍ਤਤੋ, ਵਾਚਾਚਿਤ੍ਤਤੋ, ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ. ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਪਠਮਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.