੭. ਵਿਹਾਰਕਾਰਸਿਕ੍ਖਾਪਦਵਣ੍ਣਨਾ

੩੬੫. ਤੇਨ ਸਮਯੇਨਾਤਿ ਵਿਹਾਰਕਾਰਸਿਕ੍ਖਾਪਦਂ. ਤਤ੍ਥ ਕੋਸਮ੍ਬਿਯਨ੍ਤਿ ਏਵਂਨਾਮਕੇ ਨਗਰੇ. ਘੋਸਿਤਾਰਾਮੇਤਿ ਘੋਸਿਤਸ੍ਸ ਆਰਾਮੇ. ਘੋਸਿਤਨਾਮਕੇਨ ਕਿਰ ਸੇਟ੍ਠਿਨਾ ਸੋ ਕਾਰਿਤੋ, ਤਸ੍ਮਾ ‘‘ਘੋਸਿਤਾਰਾਮੋ’’ਤਿ ਵੁਚ੍ਚਤਿ. ਛਨ੍ਨਸ੍ਸਾਤਿ ਬੋਧਿਸਤ੍ਤਕਾਲੇ ਉਪਟ੍ਠਾਕਛਨ੍ਨਸ੍ਸ. ਵਿਹਾਰਵਤ੍ਥੁਂ, ਭਨ੍ਤੇ, ਜਾਨਾਹੀਤਿ ਵਿਹਾਰਸ੍ਸ ਪਤਿਟ੍ਠਾਨਟ੍ਠਾਨਂ, ਭਨ੍ਤੇ, ਜਾਨਾਹਿ. ਏਤ੍ਥ ਚ ਵਿਹਾਰੋਤਿ ਨ ਸਕਲਵਿਹਾਰੋ, ਏਕੋ ਆਵਾਸੋ, ਤੇਨੇਵਾਹ – ‘‘ਅਯ੍ਯਸ੍ਸ ਵਿਹਾਰਂ ਕਾਰਾਪੇਸ੍ਸਾਮੀ’’ਤਿ.

ਚੇਤਿਯਰੁਕ੍ਖਨ੍ਤਿ ਏਤ੍ਥ ਚਿਤ੍ਤੀਕਤਟ੍ਠੇਨ ਚੇਤਿਯਂ, ਪੂਜਾਰਹਾਨਂ ਦੇਵਟ੍ਠਾਨਾਨਮੇਤਂ ਅਧਿਵਚਨਂ, ‘‘ਚੇਤਿਯ’’ਨ੍ਤਿ ਸਮ੍ਮਤਂ ਰੁਕ੍ਖਂ ਚੇਤਿਯਰੁਕ੍ਖਂ. ਗਾਮੇਨ ਪੂਜਿਤਂ ਗਾਮਸ੍ਸ ਵਾ ਪੂਜਿਤਨ੍ਤਿ ਗਾਮਪੂਜਿਤਂ. ਏਸੇਵ ਨਯੋ ਸੇਸਪਦੇਸੁਪਿ. ਅਪਿਚੇਤ੍ਥ ਜਨਪਦੋਤਿ ਏਕਸ੍ਸ ਰਞ੍ਞੋ ਰਜ੍ਜੇ ਏਕੇਕੋ ਕੋਟ੍ਠਾਸੋ. ਰਟ੍ਠਨ੍ਤਿ ਸਕਲਰਜ੍ਜਂ ਵੇਦਿਤਬ੍ਬਂ, ਸਕਲਰਜ੍ਜਮ੍ਪਿ ਹਿ ਕਦਾਚਿ ਕਦਾਚਿ ਤਸ੍ਸ ਰੁਕ੍ਖਸ੍ਸ ਪੂਜਂ ਕਰੋਤਿ, ਤੇਨ ਵੁਤ੍ਤਂ ‘‘ਰਟ੍ਠਪੂਜਿਤ’’ਨ੍ਤਿ. ਏਕਿਨ੍ਦ੍ਰਿਯਨ੍ਤਿ ਕਾਯਿਨ੍ਦ੍ਰਿਯਂ ਸਨ੍ਧਾਯ ਵਦਨ੍ਤਿ. ਜੀਵਸਞ੍ਞਿਨੋਤਿ ਸਤ੍ਤਸਞ੍ਞਿਨੋ.

੩੬੬. ਮਹਲ੍ਲਕਨ੍ਤਿ ਸਸ੍ਸਾਮਿਕਭਾਵੇਨ ਸਂਯਾਚਿਕਕੁਟਿਤੋ ਮਹਨ੍ਤਭਾਵੋ ਏਤਸ੍ਸ ਅਤ੍ਥੀਤਿ ਮਹਲ੍ਲਕੋ. ਯਸ੍ਮਾ ਵਾ ਵਤ੍ਥੁਂ ਦੇਸਾਪੇਤ੍ਵਾ ਪਮਾਣਾਤਿਕ੍ਕਮੇਨਪਿ ਕਾਤੁਂ ਵਟ੍ਟਤਿ, ਤਸ੍ਮਾ ਪਮਾਣਮਹਨ੍ਤਤਾਯਪਿ ਮਹਲ੍ਲਕੋ, ਤਂ ਮਹਲ੍ਲਕਂ. ਯਸ੍ਮਾ ਪਨਸ੍ਸ ਤਂ ਪਮਾਣਮਹਤ੍ਤਂ ਸਸ੍ਸਾਮਿਕਤ੍ਤਾਵ ਲਬ੍ਭਤਿ, ਤਸ੍ਮਾ ਤਦਤ੍ਥਦਸ੍ਸਨਤ੍ਥਂ ‘‘ਮਹਲ੍ਲਕੋ ਨਾਮ ਵਿਹਾਰੋ ਸਸ੍ਸਾਮਿਕੋ ਵੁਚ੍ਚਤੀ’’ਤਿ ਪਦਭਾਜਨਂ ਵੁਤ੍ਤਂ. ਸੇਸਂ ਸਬ੍ਬਂ ਕੁਟਿਕਾਰਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ ਸਦ੍ਧਿਂ ਸਮੁਟ੍ਠਾਨਾਦੀਹਿ. ਸਸ੍ਸਾਮਿਕਭਾਵਮਤ੍ਤਮੇਵ ਹਿ ਏਤ੍ਥ ਕਿਰਿਯਤੋ ਸਮੁਟ੍ਠਾਨਾਭਾਵੋ ਪਮਾਣਨਿਯਮਾਭਾਵੋ ਚ ਵਿਸੇਸੋ, ਪਮਾਣਨਿਯਮਾਭਾਵਾ ਚ ਚਤੁਕ੍ਕਪਾਰਿਹਾਨੀਤਿ.

ਵਿਹਾਰਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.