੬. ਕੁਟਿਕਾਰਸਿਕ੍ਖਾਪਦਵਣ੍ਣਨਾ
੩੪੨. ਤੇਨ ਸਮਯੇਨਾਤਿ ਕੁਟਿਕਾਰਸਿਕ੍ਖਾਪਦਂ. ਤਤ੍ਥ ਆਲ਼ਵਕਾਤਿ ਆਲ਼ਵਿਰਟ੍ਠੇ ਜਾਤਾ ਦਾਰਕਾ ਆਲ਼ਵਕਾ ਨਾਮ, ਤੇ ਪਬ੍ਬਜਿਤਕਾਲੇਪਿ ‘‘ਆਲ਼ਵਕਾ’’ਤ੍ਵੇਵ ਪਞ੍ਞਾਯਿਂਸੁ. ਤੇ ਸਨ੍ਧਾਯ ਵੁਤ੍ਤਂ ‘‘ਆਲ਼ਵਕਾ ਭਿਕ੍ਖੂ’’ਤਿ. ਸਞ੍ਞਾਚਿਕਾਯੋਤਿ ਸਯਂ ਯਾਚਿਤ੍ਵਾ ਗਹਿਤੂਪਕਰਣਾਯੋ. ਕਾਰਾਪੇਨ੍ਤੀਤਿ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਤੇ ਕਿਰ ਸਾਸਨੇ ਵਿਪਸ੍ਸਨਾਧੁਰਞ੍ਚ ਗਨ੍ਥਧੁਰਞ੍ਚਾਤਿ ਦ੍ਵੇਪਿ ਧੁਰਾਨਿ ਛਡ੍ਡੇਤ੍ਵਾ ਨਵਕਮ੍ਮਮੇਵ ਧੁਰਂ ਕਤ੍ਵਾ ਪਗ੍ਗਣ੍ਹਿਂਸੁ. ਅਸ੍ਸਾਮਿਕਾਯੋਤਿ ਅਨਿਸ੍ਸਰਾਯੋ, ਕਾਰੇਤਾ ਦਾਯਕੇਨ ਵਿਰਹਿਤਾਯੋਤਿ ਅਤ੍ਥੋ. ਅਤ੍ਤੁਦ੍ਦੇਸਿਕਾਯੋਤਿ ਅਤ੍ਤਾਨਂ ਉਦ੍ਦਿਸ੍ਸ ਅਤ੍ਤਨੋ ਅਤ੍ਥਾਯ ਆਰਦ੍ਧਾਯੋਤਿ ਅਤ੍ਥੋ. ਅਪ੍ਪਮਾਣਿਕਾਯੋਤਿ ‘‘ਏਤ੍ਤਕੇਨ ਨਿਟ੍ਠਂ ਗਚ੍ਛਿਸ੍ਸਨ੍ਤੀ’’ਤਿ ਏਵਂ ਅਪਰਿਚ੍ਛਿਨ੍ਨਪ੍ਪਮਾਣਾਯੋ, ਵੁਦ੍ਧਿਪ੍ਪਮਾਣਾਯੋ ਵਾ ਮਹਨ੍ਤਪ੍ਪਮਾਣਾਯੋਤਿ ਅਤ੍ਥੋ.
ਯਾਚਨਾ ਏਵ ਬਹੁਲਾ ਏਤੇਸਂ ਮਨ੍ਦਂ ਅਞ੍ਞਂ ਕਮ੍ਮਨ੍ਤਿ ਯਾਚਨਬਹੁਲਾ. ਏਵਂ ਵਿਞ੍ਞਤ੍ਤਿਬਹੁਲਾ ਵੇਦਿਤਬ੍ਬਾ. ਅਤ੍ਥਤੋ ਪਨੇਤ੍ਥ ਨਾਨਾਕਰਣਂ ਨਤ੍ਥਿ, ਅਨੇਕਕ੍ਖਤ੍ਤੁਂ ‘‘ਪੁਰਿਸਂ ਦੇਥ, ਪੁਰਿਸਤ੍ਥਕਰਂ ਦੇਥਾ’’ਤਿ ਯਾਚਨ੍ਤਾਨਮੇਤਂ ਅਧਿਵਚਨਂ. ਤਤ੍ਥ ਮੂਲਚ੍ਛੇਜ੍ਜਾਯ ਪੁਰਿਸਂ ਯਾਚਿਤੁਂ ਨ ਵਟ੍ਟਤਿ, ਸਹਾਯਤ੍ਥਾਯ ਕਮ੍ਮਕਰਣਤ੍ਥਾਯ ‘‘ਪੁਰਿਸਂ ਦੇਥਾ’’ਤਿ ਯਾਚਿਤੁਂ ਵਟ੍ਟਤਿ. ਪੁਰਿਸਤ੍ਥਕਰਨ੍ਤਿ ਪੁਰਿਸੇਨ ਕਾਤਬ੍ਬਂ ਹਤ੍ਥਕਮ੍ਮਂ ਵੁਚ੍ਚਤਿ, ਤਂ ਯਾਚਿਤੁਂ ਵਟ੍ਟਤਿ. ਹਤ੍ਥਕਮ੍ਮਂ ਨਾਮ ਕਿਞ੍ਚਿ ਵਤ੍ਥੁ ਨ ਹੋਤਿ, ਤਸ੍ਮਾ ਠਪੇਤ੍ਵਾ ਮਿਗਲੁਦ੍ਦਕਮਚ੍ਛਬਨ੍ਧਕਾਦੀਨਂ ਸਕਕਮ੍ਮਂ ਅਵਸੇਸਂ ਸਬ੍ਬਂ ਕਪ੍ਪਿਯਂ. ‘‘ਕਿਂ, ਭਨ੍ਤੇ, ਆਗਤਤ੍ਥ ਕੇਨ ਕਮ੍ਮ’’ਨ੍ਤਿ ਪੁਚ੍ਛਿਤੇ ਵਾ ਅਪੁਚ੍ਛਿਤੇ ਵਾ ਯਾਚਿਤੁਂ ਵਟ੍ਟਤਿ, ਵਿਞ੍ਞਤ੍ਤਿਪਚ੍ਚਯਾ ਦੋਸੋ ਨਤ੍ਥਿ. ਤਸ੍ਮਾ ਮਿਗਲੁਦ੍ਦਕਾਦਯੋ ਸਕਕਮ੍ਮਂ ਨ ਯਾਚਿਤਬ੍ਬਾ, ‘‘ਹਤ੍ਥਕਮ੍ਮਂ ਦੇਥਾ’’ਤਿ ਅਨਿਯਮੇਤ੍ਵਾਪਿ ਨ ਯਾਚਿਤਬ੍ਬਾ; ਏਵਂ ਯਾਚਿਤਾ ਹਿ ਤੇ ‘‘ਸਾਧੁ, ਭਨ੍ਤੇ’’ਤਿ ਭਿਕ੍ਖੂ ਉਯ੍ਯੋਜੇਤ੍ਵਾ ਮਿਗੇਪਿ ਮਾਰੇਤ੍ਵਾ ਆਹਰੇਯ੍ਯੁਂ. ਨਿਯਮੇਤ੍ਵਾ ਪਨ ‘‘ਵਿਹਾਰੇ ਕਿਞ੍ਚਿ ਕਤ੍ਤਬ੍ਬਂ ਅਤ੍ਥਿ, ਤਤ੍ਥ ਹਤ੍ਥਕਮ੍ਮਂ ਦੇਥਾ’’ਤਿ ਯਾਚਿਤਬ੍ਬਾ. ਫਾਲਨਙ੍ਗਲਾਦੀਨਿ ਉਪਕਰਣਾਨਿ ਗਹੇਤ੍ਵਾ ਕਸਿਤੁਂ ਵਾ ਵਪਿਤੁਂ ਵਾ ਲਾਯਿਤੁਂ ਵਾ ਗਚ੍ਛਨ੍ਤਂ ਸਕਿਚ੍ਚਪਸੁਤਮ੍ਪਿ ਕਸ੍ਸਕਂ ਵਾ ਅਞ੍ਞਂ ਵਾ ਕਿਞ੍ਚਿ ਹਤ੍ਥਕਮ੍ਮਂ ਯਾਚਿਤੁਂ ਵਟ੍ਟਤੇਵ. ਯੋ ਪਨ ਵਿਘਾਸਾਦੋ ਵਾ ਅਞ੍ਞੋ ਵਾ ਕੋਚਿ ਨਿਕ੍ਕਮ੍ਮੋ ਨਿਰਤ੍ਥਕਕਥਂ ਕਥੇਨ੍ਤੋ ਨਿਦ੍ਦਾਯਨ੍ਤੋ ਵਾ ਵਿਹਰਤਿ, ਏਵਰੂਪਂ ਅਯਾਚਿਤ੍ਵਾਪਿ ‘‘ਏਹਿ ਰੇ ਇਦਂ ਵਾ ਇਦਂ ਵਾ ਕਰੋਹੀ’’ਤਿ ਯਦਿਚ੍ਛਕਂ ਕਾਰਾਪੇਤੁਂ ਵਟ੍ਟਤਿ.
ਹਤ੍ਥਕਮ੍ਮਸ੍ਸ ਪਨ ਸਬ੍ਬਕਪ੍ਪਿਯਭਾਵਦੀਪਨਤ੍ਥਂ ਇਮਂ ਨਯਂ ਕਥੇਨ੍ਤਿ. ਸਚੇ ਹਿ ਭਿਕ੍ਖੁ ਪਾਸਾਦਂ ਕਾਰੇਤੁਕਾਮੋ ਹੋਤਿ, ਥਮ੍ਭਤ੍ਥਾਯ ਪਾਸਾਣਕੋਟ੍ਟਕਾਨਂ ਘਰਂ ਗਨ੍ਤ੍ਵਾ ਵਤ੍ਤਬ੍ਬਂ ‘‘ਹਤ੍ਥਕਮ੍ਮਂ ਲਦ੍ਧੁਂ ਵਟ੍ਟਤਿ ਉਪਾਸਕਾ’’ਤਿ. ਕਿਂ ਕਾਤਬ੍ਬਂ, ਭਨ੍ਤੇ,ਤਿ? ਪਾਸਾਣਤ੍ਥਮ੍ਭਾ ਉਦ੍ਧਰਿਤ੍ਵਾ ਦਾਤਬ੍ਬਾਤਿ. ਸਚੇ ਤੇ ਉਦ੍ਧਰਿਤ੍ਵਾ ਵਾ ਦੇਨ੍ਤਿ, ਉਦ੍ਧਰਿਤ੍ਵਾ ਨਿਕ੍ਖਿਤ੍ਤੇ ਅਤ੍ਤਨੋ ਥਮ੍ਭੇ ਵਾ ਦੇਨ੍ਤਿ, ਵਟ੍ਟਤਿ. ਅਥਾਪਿ ਵਦਨ੍ਤਿ – ‘‘ਅਮ੍ਹਾਕਂ, ਭਨ੍ਤੇ, ਹਤ੍ਥਕਮ੍ਮਂ ਕਾਤੁਂ ਖਣੋ ਨਤ੍ਥਿ, ਅਞ੍ਞਂ ਉਦ੍ਧਰਾਪੇਥ, ਤਸ੍ਸ ਮੂਲਂ ਦਸ੍ਸਾਮਾ’’ਤਿ ਉਦ੍ਧਰਾਪੇਤ੍ਵਾ ‘‘ਪਾਸਾਣਤ੍ਥਮ੍ਭੇ ਉਦ੍ਧਟਮਨੁਸ੍ਸਾਨਂ ਮੂਲਂ ਦੇਥਾ’’ਤਿ ਵਤ੍ਤੁਂ ਵਟ੍ਟਤਿ. ਏਤੇਨੇਵੁਪਾਯੇਨ ਪਾਸਾਦਦਾਰੂਨਂ ਅਤ੍ਥਾਯ ਵਡ੍ਢਕੀਨਂ ਸਨ੍ਤਿਕਂ ਇਟ੍ਠਕਤ੍ਥਾਯ ਇਟ੍ਠਕਵਡ੍ਢਕੀਨਂ ਛਦਨਤ੍ਥਾਯ ਗੇਹਚ੍ਛਾਦਕਾਨਂ ਚਿਤ੍ਤਕਮ੍ਮਤ੍ਥਾਯ ਚਿਤ੍ਤਕਾਰਾਨਨ੍ਤਿ ਯੇਨ ਯੇਨ ਅਤ੍ਥੋ ਹੋਤਿ, ਤਸ੍ਸ ਤਸ੍ਸ ਅਤ੍ਥਾਯ ਤੇਸਂ ਤੇਸਂ ਸਿਪ੍ਪਕਾਰਕਾਨਂ ਸਨ੍ਤਿਕਂ ਗਨ੍ਤ੍ਵਾ ਹਤ੍ਥਕਮ੍ਮਂ ਯਾਚਿਤੁਂ ਵਟ੍ਟਤਿ. ਹਤ੍ਥਕਮ੍ਮਯਾਚਨਵਸੇਨ ਚ ਮੂਲਚ੍ਛੇਜ੍ਜਾਯ ਵਾ ਭਤ੍ਤਵੇਤਨਾਨੁਪ੍ਪਦਾਨੇਨ ਵਾ ਲਦ੍ਧਮ੍ਪਿ ਸਬ੍ਬਂ ਗਹੇਤੁਂ ਵਟ੍ਟਤਿ. ਅਰਞ੍ਞਤੋ ਆਹਰਾਪੇਨ੍ਤੇਨ ਚ ਸਬ੍ਬਂ ਅਨਜ੍ਝਾਵੁਤ੍ਥਕਂ ਆਹਰਾਪੇਤਬ੍ਬਂ.
ਨ ਕੇਵਲਞ੍ਚ ਪਾਸਾਦਂ ਕਾਰੇਤੁਕਾਮੇਨ ਮਞ੍ਚਪੀਠਪਤ੍ਤਪਰਿਸ੍ਸਾਵਨਧਮਕਰਕਚੀਵਰਾਦੀਨਿ ਕਾਰਾਪੇਤੁਕਾਮੇਨਾਪਿ ਦਾਰੁਲੋਹਸੁਤ੍ਤਾਦੀਨਿ ਲਭਿਤ੍ਵਾ ਤੇ ਤੇ ਸਿਪ੍ਪਕਾਰਕੇ ਉਪਸਙ੍ਕਮਿਤ੍ਵਾ ਵੁਤ੍ਤਨਯੇਨੇਵ ਹਤ੍ਥਕਮ੍ਮਂ ਯਾਚਿਤਬ੍ਬਂ. ਹਤ੍ਥਕਮ੍ਮਯਾਚਨਵਸੇਨ ਚ ਮੂਲਚ੍ਛੇਜ੍ਜਾਯ ਵਾ ਭਤ੍ਤਵੇਤਨਾਨੁਪ੍ਪਦਾਨੇਨ ਵਾ ਲਦ੍ਧਮ੍ਪਿ ਸਬ੍ਬਂ ਗਹੇਤਬ੍ਬਂ. ਸਚੇ ਪਨ ਕਾਤੁਂ ਨ ਇਚ੍ਛਨ੍ਤਿ, ਭਤ੍ਤਵੇਤਨਂ ਪਚ੍ਚਾਸੀਸਨ੍ਤਿ, ਅਕਪ੍ਪਿਯਕਹਾਪਣਾਦਿ ਨ ਦਾਤਬ੍ਬਂ. ਭਿਕ੍ਖਾਚਾਰਵਤ੍ਤੇਨ ਤਣ੍ਡੁਲਾਦੀਨਿ ਪਰਿਯੇਸਿਤ੍ਵਾ ਦਾਤੁਂ ਵਟ੍ਟਤਿ.
ਹਤ੍ਥਕਮ੍ਮਵਸੇਨ ਪਤ੍ਤਂ ਕਾਰੇਤ੍ਵਾ ਤਥੇਵ ਪਾਚੇਤ੍ਵਾ ਨਵਪਕ੍ਕਸ੍ਸ ਪਤ੍ਤਸ੍ਸ ਪੁਞ੍ਛਨਤੇਲਤ੍ਥਾਯ ਅਨ੍ਤੋਗਾਮਂ ਪਵਿਟ੍ਠੇਨ ‘‘ਭਿਕ੍ਖਾਯ ਆਗਤੋ’’ਤਿ ਸਲ੍ਲਕ੍ਖੇਤ੍ਵਾ ਯਾਗੁਯਾ ਵਾ ਭਤ੍ਤੇ ਵਾ ਆਨੀਤੇ ਹਤ੍ਥੇਨ ਪਤ੍ਤੋ ਪਿਧਾਤਬ੍ਬੋ. ਸਚੇ ਉਪਾਸਿਕਾ ‘‘ਕਿਂ, ਭਨ੍ਤੇ’’ਤਿ ਪੁਚ੍ਛਤਿ, ‘‘ਨਵਪਕ੍ਕੋ ਪਤ੍ਤੋ ਪੁਞ੍ਛਨਤੇਲੇਨ ਅਤ੍ਥੋ’’ਤਿ ਵਤ੍ਤਬ੍ਬਂ. ਸਚੇ ਸਾ ‘‘ਦੇਹਿ, ਭਨ੍ਤੇ’’ਤਿ ਪਤ੍ਤਂ ਗਹੇਤ੍ਵਾ ਤੇਲੇਨ ਪੁਞ੍ਛਿਤ੍ਵਾ ਯਾਗੁਯਾ ਵਾ ਭਤ੍ਤਸ੍ਸ ਵਾ ਪੂਰੇਤ੍ਵਾ ਦੇਤਿ, ਵਿਞ੍ਞਤ੍ਤਿ ਨਾਮ ਨ ਹੋਤਿ, ਗਹੇਤੁਂ ਵਟ੍ਟਤੀਤਿ.
ਭਿਕ੍ਖੂ ਪਗੇਵ ਪਿਣ੍ਡਾਯ ਚਰਿਤ੍ਵਾ ਆਸਨਸਾਲਂ ਗਨ੍ਤ੍ਵਾ ਆਸਨਂ ਅਪਸ੍ਸਨ੍ਤਾ ਤਿਟ੍ਠਨ੍ਤਿ. ਤਤ੍ਰ ਚੇ ਉਪਾਸਕਾ ਭਿਕ੍ਖੂ ਠਿਤੇ ਦਿਸ੍ਵਾ ਸਯਮੇਵ ਆਸਨਾਨਿ ਆਹਰਾਪੇਨ੍ਤਿ, ਨਿਸੀਦਿਤ੍ਵਾ ਗਚ੍ਛਨ੍ਤੇਹਿ ਆਪੁਚ੍ਛਿਤ੍ਵਾ ਗਨ੍ਤਬ੍ਬਂ. ਅਨਾਪੁਚ੍ਛਾ ਗਤਾਨਮ੍ਪਿ ਨਟ੍ਠਂ ਗੀਵਾ ਨ ਹੋਤਿ, ਆਪੁਚ੍ਛਿਤ੍ਵਾ ਗਮਨਂ ਪਨ ਵਤ੍ਤਂ. ਸਚੇ ਭਿਕ੍ਖੂਹਿ ‘‘ਆਸਨਾਨਿ ਆਹਰਥਾ’’ਤਿ ਵੁਤ੍ਤੇਹਿ ਆਹਟਾਨਿ ਹੋਨ੍ਤਿ, ਆਪੁਚ੍ਛਿਤ੍ਵਾਵ ਗਨ੍ਤਬ੍ਬਂ. ਅਨਾਪੁਚ੍ਛਾ ਗਤਾਨਂ ਵਤ੍ਤਭੇਦੋ ਚ ਨਟ੍ਠਞ੍ਚ ਗੀਵਾਤਿ. ਅਤ੍ਥਰਣਕੋਜਵਾਦੀਸੁਪਿ ਏਸੇਵ ਨਯੋ.
ਮਕ੍ਖਿਕਾਯੋ ਬਹੁਕਾ ਹੋਨ੍ਤਿ, ‘‘ਮਕ੍ਖਿਕਾਬੀਜਨਿਂ ਆਹਰਥਾ’’ਤਿ ਵਤ੍ਤਬ੍ਬਂ. ਪੁਚਿਮਨ੍ਦਸਾਖਾਦੀਨਿ ਆਹਰਨ੍ਤਿ, ਕਪ੍ਪਿਯਂ ਕਾਰਾਪੇਤ੍ਵਾ ਪਟਿਗ੍ਗਹੇਤਬ੍ਬਾਨਿ. ਆਸਨਸਾਲਾਯ ਉਦਕਭਾਜਨਂ ਰਿਤ੍ਤਂ ਹੋਤਿ, ‘‘ਧਮਕਰਣਂ ਗਣ੍ਹਾ’’ਤਿ ਨ ਵਤ੍ਤਬ੍ਬਂ. ਧਮਕਰਕਞ੍ਹਿ ਰਿਤ੍ਤਭਾਜਨੇ ਪਕ੍ਖਿਪਨ੍ਤੋ ਭਿਨ੍ਦੇਯ੍ਯ ‘‘ਨਦਿਂ ਵਾ ਤਲ਼ਾਕਂ ਵਾ ਗਨ੍ਤ੍ਵਾ ਪਨ ਉਦਕਂ ਆਹਰਾ’’ਤਿ ਵਤ੍ਤੁਂ ਵਟ੍ਟਤਿ. ‘‘ਗੇਹਤੋ ਆਹਰਾ’’ਤਿ ਨੇਵ ਵਤ੍ਤੁਂ ਵਟ੍ਟਤਿ, ਨ ਆਹਟਂ ਪਰਿਭੁਞ੍ਜਿਤਬ੍ਬਂ. ਆਸਨਸਾਲਾਯਂ ਵਾ ਅਰਞ੍ਞਕੇ ਵਾ ਭਤ੍ਤਕਿਚ੍ਚਂ ਕਰੋਨ੍ਤੇਹਿ ਤਤ੍ਥਜਾਤਕਂ ਅਨਜ੍ਝਾਵੁਤ੍ਥਕਂ ਯਂਕਿਞ੍ਚਿ ਉਤ੍ਤਰਿਭਙ੍ਗਾਰਹਂ ਪਤ੍ਤਂ ਵਾ ਫਲਂ ਵਾ ਸਚੇ ਕਿਞ੍ਚਿ ਕਮ੍ਮਂ ਕਰੋਨ੍ਤਂ ਆਹਰਾਪੇਤਿ, ਹਤ੍ਥਕਮ੍ਮਵਸੇਨ ਆਹਰਾਪੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਅਲਜ੍ਜੀਹਿ ਪਨ ਭਿਕ੍ਖੂਹਿ ਵਾ ਸਾਮਣੇਰੇਹਿ ਵਾ ਹਤ੍ਥਕਮ੍ਮਂ ਨ ਕਾਰੇਤਬ੍ਬਂ. ਅਯਂ ਤਾਵ ਪੁਰਿਸਤ੍ਥਕਰੇ ਨਯੋ.
ਗੋਣਂ ਪਨ ਅਞ੍ਞਾਤਕਅਪ੍ਪਵਾਰਿਤਟ੍ਠਾਨਤੋ ਆਹਰਾਪੇਤੁਂ ਨ ਵਟ੍ਟਤਿ, ਆਹਰਾਪੇਨ੍ਤਸ੍ਸ ਦੁਕ੍ਕਟਂ. ਞਾਤਿਪਵਾਰਿਤਟ੍ਠਾਨਤੋਪਿ ਮੂਲਚ੍ਛੇਜ੍ਜਾਯ ਯਾਚਿਤੁਂ ਨ ਵਟ੍ਟਤਿ, ਤਾਵਕਾਲਿਕਨਯੇਨ ਸਬ੍ਬਤ੍ਥ ਵਟ੍ਟਤਿ. ਏਵਂ ਆਹਰਾਪਿਤਞ੍ਚ ਗੋਣਂ ਰਕ੍ਖਿਤ੍ਵਾ ਜਗ੍ਗਿਤ੍ਵਾ ਸਾਮਿਕਾ ਪਟਿਚ੍ਛਾਪੇਤਬ੍ਬਾ. ਸਚਸ੍ਸ ਪਾਦੋ ਵਾ ਸਿਙ੍ਗਂ ਵਾ ਭਿਜ੍ਜਤਿ ਵਾ ਨਸ੍ਸਤਿ ਵਾ ਸਾਮਿਕਾ ਚੇ ਸਮ੍ਪਟਿਚ੍ਛਨ੍ਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਸਮ੍ਪਟਿਚ੍ਛਨ੍ਤਿ, ਗੀਵਾ ਹੋਤਿ. ਸਚੇ ‘‘ਤੁਮ੍ਹਾਕਂਯੇਵ ਦੇਮਾ’’ਤਿ ਵਦਨ੍ਤਿ ਨ ਸਮ੍ਪਟਿਚ੍ਛਿਤਬ੍ਬਂ. ‘‘ਵਿਹਾਰਸ੍ਸ ਦੇਮਾ’’ਤਿ ਵੁਤ੍ਤੇ ਪਨ ‘‘ਆਰਾਮਿਕਾਨਂ ਆਚਿਕ੍ਖਥ ਜਗ੍ਗਨਤ੍ਥਾਯਾ’’ਤਿ ਵਤ੍ਤਬ੍ਬਂ.
‘‘ਸਕਟਂ ਦੇਥਾ’’ਤਿਪਿ ਅਞ੍ਞਾਤਕਅਪ੍ਪਵਾਰਿਤੇ ਵਤ੍ਤੁਂ ਨ ਵਟ੍ਟਤਿ, ਵਿਞ੍ਞਤ੍ਤਿਏਵ ਹੋਤਿ ਦੁਕ੍ਕਟਂ ਆਪਜ੍ਜਤਿ. ਞਾਤਿਪਵਾਰਿਤਟ੍ਠਾਨੇ ਪਨ ਵਟ੍ਟਤਿ, ਤਾਵਕਾਲਿਕਂ ਵਟ੍ਟਤਿ ਕਮ੍ਮਂ ਕਤ੍ਵਾ ਪੁਨ ਦਾਤਬ੍ਬਂ. ਸਚੇ ਨੇਮਿਯਾਦੀਨਿ ਭਿਜ੍ਜਨ੍ਤਿ ਪਾਕਤਿਕਾਨਿ ਕਤ੍ਵਾ ਦਾਤਬ੍ਬਂ. ਨਟ੍ਠੇ ਗੀਵਾ ਹੋਤਿ. ‘‘ਤੁਮ੍ਹਾਕਮੇਵ ਦੇਮਾ’’ਤਿ ਵੁਤ੍ਤੇ ਦਾਰੁਭਣ੍ਡਂ ਨਾਮ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਏਸ ਨਯੋ ਵਾਸਿਫਰਸੁਕੁਠਾਰੀਕੁਦਾਲਨਿਖਾਦਨੇਸੁ. ਵਲ੍ਲਿਆਦੀਸੁ ਚ ਪਰਪਰਿਗ੍ਗਹਿਤੇਸੁ. ਗਰੁਭਣ੍ਡਪ੍ਪਹੋਨਕੇਸੁਯੇਵ ਚ ਵਲ੍ਲਿਆਦੀਸੁ ਵਿਞ੍ਞਤ੍ਤਿ ਹੋਤਿ, ਨ ਤਤੋ ਓਰਂ.
ਅਨਜ੍ਝਾਵੁਤ੍ਥਕਂ ਪਨ ਯਂਕਿਞ੍ਚਿ ਆਹਰਾਪੇਤੁਂ ਵਟ੍ਟਤਿ. ਰਕ੍ਖਿਤਗੋਪਿਤਟ੍ਠਾਨੇਯੇਵ ਹਿ ਵਿਞ੍ਞਤ੍ਤਿ ਨਾਮ ਵੁਚ੍ਚਤਿ. ਸਾ ਦ੍ਵੀਸੁ ਪਚ੍ਚਯੇਸੁ ਸਬ੍ਬੇਨ ਸਬ੍ਬਂ ਨ ਵਟ੍ਟਤਿ, ਸੇਨਾਸਨਪਚ੍ਚਯੇ ਪਨ ‘‘ਆਹਰ ਦੇਹੀ’’ਤਿ ਵਿਞ੍ਞਤ੍ਤਿਮਤ੍ਤਮੇਵ ਨ ਵਟ੍ਟਤਿ, ਪਰਿਕਥੋਭਾਸਨਿਮਿਤ੍ਤਕਮ੍ਮਾਨਿ ਵਟ੍ਟਨ੍ਤਿ. ਤਤ੍ਥ ਉਪੋਸਥਾਗਾਰਂ ਵਾ ਭੋਜਨਸਾਲਂ ਵਾ ਅਞ੍ਞਂ ਵਾ ਯਂਕਿਞ੍ਚਿ ਸੇਨਾਸਨਂ ਇਚ੍ਛਤੋ ‘‘ਇਮਸ੍ਮਿਂ ਵਤ ਓਕਾਸੇ ਏਵਰੂਪਂ ਸੇਨਾਸਨਂ ਕਾਤੁਂ ਵਟ੍ਟਤੀ’’ਤਿ ਵਾ ‘‘ਯੁਤ੍ਤ’’ਨ੍ਤਿ ਵਾ ‘‘ਅਨੁਰੂਪ’’ਨ੍ਤਿ ਵਾਤਿਆਦਿਨਾ ਨਯੇਨ ਵਚਨਂ ਪਰਿਕਥਾ ਨਾਮ. ‘‘ਉਪਾਸਕਾ ਤੁਮ੍ਹੇ ਕੁਹਿਂ ਵਸਥਾ’’ਤਿ? ‘‘ਪਾਸਾਦੇ, ਭਨ੍ਤੇ’’ਤਿ. ‘‘ਕਿਂ ਭਿਕ੍ਖੂਨਂ ਪਨ ਉਪਾਸਕਾ ਪਾਸਾਦੋ ਨ ਵਟ੍ਟਤੀ’’ਤਿ ਏਵਮਾਦਿਵਚਨਂ ਓਭਾਸੋ ਨਾਮ. ਮਨੁਸ੍ਸੇ ਦਿਸ੍ਵਾ ਰਜ੍ਜੁਂ ਪਸਾਰੇਤਿ, ਖੀਲੇ ਆਕੋਟਾਪੇਤਿ. ‘‘ਕਿਂ ਇਦਂ, ਭਨ੍ਤੇ’’ਤਿ ਵੁਤ੍ਤੇ ‘‘ਇਧ ਆਵਾਸਂ ਕਰਿਸ੍ਸਾਮਾ’’ਤਿ ਏਵਮਾਦਿਕਰਣਂ ਪਨ ਨਿਮਿਤ੍ਤਕਮ੍ਮਂ ਨਾਮ. ਗਿਲਾਨਪਚ੍ਚਯੇ ਪਨ ਵਿਞ੍ਞਤ੍ਤਿਪਿ ਵਟ੍ਟਤਿ, ਪਗੇਵ ਪਰਿਕਥਾਦੀਨਿ.
ਮਨੁਸ੍ਸਾ ਉਪਦ੍ਦੁਤਾ ਯਾਚਨਾਯ ਉਪਦ੍ਦੁਤਾ ਵਿਞ੍ਞਤ੍ਤਿਯਾਤਿ ਤੇਸਂ ਭਿਕ੍ਖੂਨਂ ਤਾਯ ਯਾਚਨਾਯ ਚ ਵਿਞ੍ਞਤ੍ਤਿਯਾ ਚ ਪੀਲ਼ਿਤਾ. ਉਬ੍ਬਿਜ੍ਜਨ੍ਤਿਪੀਤਿ ‘‘ਕਿਂ ਨੁ ਆਹਰਾਪੇਸ੍ਸਨ੍ਤੀ’’ਤਿ ਉਬ੍ਬੇਗਂ ਇਞ੍ਜਨਂ ਚਲਨਂ ਪਟਿਲਭਨ੍ਤਿ. ਉਤ੍ਤਸਨ੍ਤਿਪੀਤਿ ਅਹਿਂ ਵਿਯ ਦਿਸ੍ਵਾ ਸਹਸਾ ਤਸਿਤ੍ਵਾ ਉਕ੍ਕਮਨ੍ਤਿ. ਪਲਾਯਨ੍ਤਿਪੀਤਿ ਦੂਰਤੋਵ ਯੇਨ ਵਾ ਤੇਨ ਵਾ ਪਲਾਯਨ੍ਤਿ. ਅਞ੍ਞੇਨਪਿ ਗਚ੍ਛਨ੍ਤੀਤਿ ਯਂ ਮਗ੍ਗਂ ਪਟਿਪਨ੍ਨਾ ਤਂ ਪਹਾਯ ਨਿਵਤ੍ਤਿਤ੍ਵਾ ਵਾਮਂ ਵਾ ਦਕ੍ਖਿਣਂ ਵਾ ਗਹੇਤ੍ਵਾ ਗਚ੍ਛਨ੍ਤਿ, ਦ੍ਵਾਰਮ੍ਪਿ ਥਕੇਨ੍ਤਿ.
੩੪੪. ਭੂਤਪੁਬ੍ਬਂ ਭਿਕ੍ਖਵੇਤਿ ਇਤਿ ਭਗਵਾ ਤੇ ਭਿਕ੍ਖੂ ਗਰਹਿਤ੍ਵਾ ਤਦਨੁਰੂਪਞ੍ਚ ਧਮ੍ਮਿਂ ਕਥਂ ਕਤ੍ਵਾ ਪੁਨਪਿ ਵਿਞ੍ਞਤ੍ਤਿਯਾ ਦੋਸਂ ਪਾਕਟਂ ਕੁਰੁਮਾਨੋ ਇਮਿਨਾ ‘‘ਭੂਤਪੁਬ੍ਬਂ ਭਿਕ੍ਖਵੇ’’ਤਿਆਦਿਨਾ ਨਯੇਨ ਤੀਣਿ ਵਤ੍ਥੂਨਿ ਦਸ੍ਸੇਸਿ. ਤਤ੍ਥ ਮਣਿਕਣ੍ਠੋਤਿ ਸੋ ਕਿਰ ਨਾਗਰਾਜਾ ਸਬ੍ਬਕਾਮਦਦਂ ਮਹਗ੍ਘਂ ਮਣਿਂ ਕਣ੍ਠੇ ਪਿਲਨ੍ਧਿਤ੍ਵਾ ਚਰਤਿ, ਤਸ੍ਮਾ ‘‘ਮਣਿਕਣ੍ਠੋ’’ ਤ੍ਵੇਵ ਪਞ੍ਞਾਯਿਤ੍ਥ. ਉਪਰਿਮੁਦ੍ਧਨਿ ਮਹਨ੍ਤਂ ਫਣਂ ਕਰਿਤ੍ਵਾ ਅਟ੍ਠਾਸੀਤਿ ਸੋ ਕਿਰ ਤੇਸਂ ਦ੍ਵਿਨ੍ਨਂ ਇਸੀਨਂ ਕਨਿਟ੍ਠੋ ਇਸਿ ਮੇਤ੍ਤਾਵਿਹਾਰੀ ਅਹੋਸਿ, ਤਸ੍ਮਾ ਨਾਗਰਾਜਾ ਨਦਿਤੋ ਉਤ੍ਤਰਿਤ੍ਵਾ ਦੇਵਵਣ੍ਣਂ ਨਿਮ੍ਮਿਨਿਤ੍ਵਾ ਤਸ੍ਸ ਸਨ੍ਤਿਕੇ ਨਿਸੀਦਿਤ੍ਵਾ ਸਮ੍ਮੋਦਨੀਯਂ ਕਥਂ ਕਤ੍ਵਾ ਤਂ ਦੇਵਵਣ੍ਣਂ ਪਹਾਯ ਸਕਵਣ੍ਣਮੇਵ ਉਪਗਨ੍ਤ੍ਵਾ ਤਂ ਇਸਿਂ ਪਰਿਕ੍ਖਿਪਿਤ੍ਵਾ ਪਸਨ੍ਨਾਕਾਰਂ ਕਰੋਨ੍ਤੋ ਉਪਰਿਮੁਦ੍ਧਨਿ ਮਹਨ੍ਤਂ ਫਣਂ ਕਰਿਤ੍ਵਾ ਛਤ੍ਤਂ ਵਿਯ ਧਾਰਯਮਾਨੋ ਮੁਹੁਤ੍ਤਂ ਠਤ੍ਵਾ ਪਕ੍ਕਮਤਿ, ਤੇਨ ਵੁਤ੍ਤਂ ‘‘ਉਪਰਿਮੁਦ੍ਧਨਿ ਮਹਨ੍ਤਂ ਫਣਂ ਕਰਿਤ੍ਵਾ ਅਟ੍ਠਾਸੀ’’ਤਿ. ਮਣਿਮਸ੍ਸ ਕਣ੍ਠੇ ਪਿਲਨ੍ਧਨਨ੍ਤਿ ਮਣਿਂ ਅਸ੍ਸ ਕਣ੍ਠੇ ਪਿਲਨ੍ਧਿਤਂ, ਆਮੁਕ੍ਕਨ੍ਤਿ ਅਤ੍ਥੋ. ਏਕਮਨ੍ਤਂ ਅਟ੍ਠਾਸੀਤਿ ਤੇਨ ਦੇਵਵਣ੍ਣੇਨ ਆਗਨ੍ਤ੍ਵਾ ਤਾਪਸੇਨ ਸਦ੍ਧਿਂ ਸਮ੍ਮੋਦਮਾਨੋ ਏਕਸ੍ਮਿਂ ਪਦੇਸੇ ਅਟ੍ਠਾਸਿ.
ਮਮਨ੍ਨਪਾਨਨ੍ਤਿ ਮਮ ਅਨ੍ਨਞ੍ਚ ਪਾਨਞ੍ਚ. ਵਿਪੁਲਨ੍ਤਿ ਬਹੁਲਂ. ਉਲ਼ਾਰਨ੍ਤਿ ਪਣੀਤਂ. ਅਤਿਯਾਚਕੋਸੀਤਿ ਅਤਿਵਿਯ ਯਾਚਕੋ, ਅਸਿ ਪੁਨਪ੍ਪੁਨਂ ਯਾਚਸੀਤਿ ਵੁਤ੍ਤਂ ਹੋਤਿ. ਸੁਸੂਤਿ ਤਰੁਣੋ, ਥਾਮਸਮ੍ਪਨ੍ਨੋ ਯੋਬ੍ਬਨਪ੍ਪਤ੍ਤਪੁਰਿਸੋ. ਸਕ੍ਖਰਾ ਵੁਚ੍ਚਤਿ ਕਾਲ਼ਸਿਲਾ, ਤਤ੍ਥ ਧੋਤੋ ਅਸਿ ‘‘ਸਕ੍ਖਰਧੋਤੋ ਨਾਮਾ’’ਤਿ ਵੁਚ੍ਚਤਿ, ਸਕ੍ਖਰਧੋਤੋ ਪਾਣਿਮ੍ਹਿ ਅਸ੍ਸਾਤਿ ਸਕ੍ਖਰਧੋਤਪਾਣਿ, ਪਾਸਾਣੇ ਧੋਤਨਿਸਿਤਖਗ੍ਗਹਤ੍ਥੋਤਿ ਅਤ੍ਥੋ. ਯਥਾ ਸੋ ਅਸਿਹਤ੍ਥੋ ਪੁਰਿਸੋ ਤਾਸੇਯ੍ਯ, ਏਵਂ ਤਾਸੇਸਿ ਮਂ ਸੇਲਂ ਯਾਚਮਾਨੋ, ਮਣਿਂ ਯਾਚਨ੍ਤੋਤਿ ਅਤ੍ਥੋ.
ਨ ਤਂ ਯਾਚੇਤਿ ਤਂ ਨ ਯਾਚੇਯ੍ਯ. ਕਤਰਂ? ਯਸ੍ਸ ਪਿਯਂ ਜਿਗੀਸੇਤਿ ਯਂ ਅਸ੍ਸ ਸਤ੍ਤਸ੍ਸ ਪਿਯਨ੍ਤਿ ਜਾਨੇਯ੍ਯ.
ਕਿਮਙ੍ਗਂ ਪਨ ਮਨੁਸ੍ਸਭੂਤਾਨਨ੍ਤਿ ਮਨੁਸ੍ਸਭੂਤਾਨਂ ਅਮਨਾਪਾਤਿ ਕਿਮੇਵੇਤ੍ਥ ਵਤ੍ਤਬ੍ਬਂ.
੩੪੫. ਸਕੁਣਸਙ੍ਘਸ੍ਸ ਸਦ੍ਦੇਨ ਉਬ੍ਬਾਲ਼੍ਹੋਤਿ ਸੋ ਕਿਰ ਸਕੁਣਸਙ੍ਘੋ ਪਠਮਯਾਮਞ੍ਚ ਪਚ੍ਛਿਮਯਾਮਞ੍ਚ ਨਿਰਨ੍ਤਰਂ ਸਦ੍ਦਮੇਵ ਕਰੋਤਿ, ਸੋ ਭਿਕ੍ਖੁ ਤੇਨ ਸਦ੍ਦੇਨ ਪੀਲ਼ਿਤੋ ਹੁਤ੍ਵਾ ਭਗਵਤੋ ਸਨ੍ਤਿਕਂ ਅਗਮਾਸਿ. ਤੇਨਾਹ – ‘‘ਯੇਨਾਹਂ ਤੇਨੁਪਸਙ੍ਕਮੀ’’ਤਿ.
ਕੁਤੋ ਚ ਤ੍ਵਂ ਭਿਕ੍ਖੁ ਆਗਚ੍ਛਸੀਤਿ ਏਤ੍ਥ ਨਿਸਿਨ੍ਨੋ ਸੋ ਭਿਕ੍ਖੁ ਨ ਆਗਚ੍ਛਤਿ ਵਤ੍ਤਮਾਨਸਮੀਪੇ ਪਨ ਏਵਂ ਵਤ੍ਤੁਂ ਲਬ੍ਭਤਿ. ਤੇਨਾਹ – ‘‘ਕੁਤੋ ਚ ਤ੍ਵਂ ਭਿਕ੍ਖੁ ਆਗਚ੍ਛਸੀ’’ਤਿ, ਕੁਤੋ ਆਗਤੋਸੀਤਿ ਅਤ੍ਥੋ. ਤਤੋ ਅਹਂ ਭਗਵਾ ਆਗਚ੍ਛਾਮੀਤਿ ਏਤ੍ਥਾਪਿ ਸੋ ਏਵ ਨਯੋ. ਉਬ੍ਬਾਲ਼੍ਹੋਤਿ ਪੀਲ਼ਿਤੋ, ਉਕ੍ਕਣ੍ਠਾਪਿਤੋ ਹੁਤ੍ਵਾਤਿ ਅਤ੍ਥੋ.
ਸੋ ਸਕੁਣਸਙ੍ਘੋ ‘‘ਭਿਕ੍ਖੁ ਪਤ੍ਤਂ ਯਾਚਤੀ’’ਤਿ ਏਤ੍ਥ ਨ ਤੇ ਸਕੁਣਾ ਭਿਕ੍ਖੁਨੋ ਵਚਨਂ ਜਾਨਨ੍ਤਿ, ਭਗਵਾ ਪਨ ਅਤ੍ਤਨੋ ਆਨੁਭਾਵੇਨ ਯਥਾ ਜਾਨਨ੍ਤਿ ਤਥਾ ਅਕਾਸਿ.
੩੪੬. ਅਪਾਹਂ ਤੇ ਨ ਜਾਨਾਮੀਤਿ ਅਪਿ ਅਹਂ ਤੇ ਜਨੇ ‘‘ਕੇ ਵਾ ਇਮੇ, ਕਸ੍ਸ ਵਾ ਇਮੇ’’ਤਿ ਨ ਜਾਨਾਮਿ. ਸਙ੍ਗਮ੍ਮ ਯਾਚਨ੍ਤੀਤਿ ਸਮਾਗਨ੍ਤ੍ਵਾ ਵਗ੍ਗਵਗ੍ਗਾ ਹੁਤ੍ਵਾ ਯਾਚਨ੍ਤਿ. ਯਾਚਕੋ ਅਪ੍ਪਿਯੋ ਹੋਤੀਤਿ ਯੋ ਯਾਚਤਿ ਸੋ ਅਪ੍ਪਿਯੋ ਹੋਤਿ. ਯਾਚਂ ਅਦਦਮਪ੍ਪਿਯੋਤਿ ਯਾਚਨ੍ਤਿ ਯਾਚਿਤਂ ਵੁਚ੍ਚਤਿ, ਯਾਚਿਤਮਤ੍ਥਂ ਅਦਦਨ੍ਤੋਪਿ ਅਪ੍ਪਿਯੋ ਹੋਤਿ. ਅਥ ਵਾ ਯਾਚਨ੍ਤਿ ਯਾਚਨ੍ਤਸ੍ਸ, ਅਦਦਮਪ੍ਪਿਯੋਤਿ ਅਦੇਨ੍ਤੋ ਅਪ੍ਪਿਯੋ ਹੋਤਿ. ਮਾ ਮੇ ਵਿਦੇਸ੍ਸਨਾ ਅਹੂਤਿ ਮਾ ਮੇ ਅਪ੍ਪਿਯਭਾਵੋ ਅਹੁ, ਅਹਂ ਵਾ ਤਵ, ਤ੍ਵਂ ਵਾ ਮਮ ਵਿਦੇਸ੍ਸੋ ਅਪ੍ਪਿਯੋ ਮਾ ਅਹੋਸੀਤਿ ਅਤ੍ਥੋ.
੩੪੭. ਦੁਸ੍ਸਂਹਰਾਨੀਤਿ ਕਸਿਗੋਰਕ੍ਖਾਦੀਹਿ ਉਪਾਯੇਹਿ ਦੁਕ੍ਖੇਨ ਸਂਹਰਣੀਯਾਨਿ.
੩੪੮-੯. ਸਞ੍ਞਾਚਿਕਾਯ ਪਨ ਭਿਕ੍ਖੁਨਾਤਿ ਏਤ੍ਥ ਸਞ੍ਞਾਚਿਕਾ ਨਾਮ ਸਯਂ ਪਵਤ੍ਤਿਤਯਾਚਨਾ ਵੁਚ੍ਚਤਿ, ਤਸ੍ਮਾ ‘‘ਸਞ੍ਞਾਚਿਕਾਯਾ’’ਤਿ ਅਤ੍ਤਨੋ ਯਾਚਨਾਯਾਤਿ ਵੁਤ੍ਤਂ ਹੋਤਿ, ਸਯਂ ਯਾਚਿਤਕੇਹਿ ਉਪਕਰਣੇਹੀਤਿ ਅਤ੍ਥੋ. ਯਸ੍ਮਾ ਪਨ ਸਾ ਸਯਂਯਾਚਿਤਕੇਹਿ ਕਯਿਰਮਾਨਾ ਸਯਂ ਯਾਚਿਤ੍ਵਾ ਕਯਿਰਮਾਨਾ ਹੋਤਿ, ਤਸ੍ਮਾ ਤਂ ਅਤ੍ਥਪਰਿਯਾਯਂ ਦਸ੍ਸੇਤੁਂ ‘‘ਸਯਂ ਯਾਚਿਤ੍ਵਾ ਪੁਰਿਸਮ੍ਪੀ’’ਤਿ ਏਵਮਸ੍ਸ ਪਦਭਾਜਨਂ ਵੁਤ੍ਤਂ.
ਉਲ੍ਲਿਤ੍ਤਾਤਿ ਅਨ੍ਤੋਲਿਤ੍ਤਾ. ਅਵਲਿਤ੍ਤਾਤਿ ਬਹਿਲਿਤ੍ਤਾ. ਉਲ੍ਲਿਤ੍ਤਾਵਲਿਤ੍ਤਾਤਿ ਅਨ੍ਤਰਬਾਹਿਰਲਿਤ੍ਤਾਤਿ ਵੁਤ੍ਤਂ ਹੋਤਿ.
ਕਾਰਯਮਾਨੇਨਾਤਿ ਇਮਸ੍ਸ ਪਦਭਾਜਨੇ ‘‘ਕਾਰਾਪੇਨ੍ਤੇਨਾ’’ਤਿ ਏਤ੍ਤਕਮੇਵ ਵਤ੍ਤਬ੍ਬਂ ਸਿਯਾ, ਏਵਞ੍ਹਿ ਬ੍ਯਞ੍ਜਨਂ ਸਮੇਤਿ. ਯਸ੍ਮਾ ਪਨ ਸਞ੍ਞਾਚਿਕਾਯ ਕੁਟਿਂ ਕਰੋਨ੍ਤੇਨਾਪਿ ਇਧ ਵੁਤ੍ਤਨਯੇਨੇਵ ਪਟਿਪਜ੍ਜਿਤਬ੍ਬਂ, ਤਸ੍ਮਾ ਕਰੋਨ੍ਤੋ ਵਾ ਹੋਤੁ ਕਾਰਾਪੇਨ੍ਤੋ ਵਾ ਉਭੋਪੇਤੇ ‘‘ਕਾਰਯਮਾਨੇਨਾ’’ਤਿ ਇਮਿਨਾਵ ਪਦੇਨ ਸਙ੍ਗਹਿਤਾਤਿ ਏਤਮਤ੍ਥਂ ਦਸ੍ਸੇਤੁਂ ‘‘ਕਰੋਨ੍ਤੋ ਵਾ ਕਾਰਾਪੇਨ੍ਤੋ ਵਾ’’ਤਿ ਵੁਤ੍ਤਂ. ਯਦਿ ਪਨ ਕਰੋਨ੍ਤੇਨ ਵਾ ਕਾਰਾਪੇਨ੍ਤੇਨ ਵਾਤਿ ਵਦੇਯ੍ਯ, ਬ੍ਯਞ੍ਜਨਂ ਵਿਲੋਮਿਤਂ ਭਵੇਯ੍ਯ, ਨ ਹਿ ਕਾਰਾਪੇਨ੍ਤੋ ਕਰੋਨ੍ਤੋ ਨਾਮ ਹੋਤਿ, ਤਸ੍ਮਾ ਅਤ੍ਥਮਤ੍ਤਮੇਵੇਤ੍ਥ ਦਸ੍ਸਿਤਨ੍ਤਿ ਵੇਦਿਤਬ੍ਬਂ.
ਅਤ੍ਤੁਦ੍ਦੇਸਨ੍ਤਿ ‘‘ਮਯ੍ਹਂ ਏਸਾ’’ਤਿ ਏਵਂ ਅਤ੍ਤਾ ਉਦ੍ਦੇਸੋ ਅਸ੍ਸਾਤਿ ਅਤ੍ਤੁਦ੍ਦੇਸਾ, ਤਂ ਅਤ੍ਤੁਦ੍ਦੇਸਂ. ਯਸ੍ਮਾ ਪਨ ਯਸ੍ਸਾ ਅਤ੍ਤਾ ਉਦ੍ਦੇਸੋ ਸਾ ਅਤ੍ਤਨੋ ਅਤ੍ਥਾਯ ਹੋਤਿ, ਤਸ੍ਮਾ ਅਤ੍ਥਪਰਿਯਾਯਂ ਦਸ੍ਸੇਨ੍ਤੋ ‘‘ਅਤ੍ਤੁਦ੍ਦੇਸਨ੍ਤਿ ਅਤ੍ਤਨੋ ਅਤ੍ਥਾਯਾ’’ਤਿ ਆਹ. ਪਮਾਣਿਕਾ ਕਾਰੇਤਬ੍ਬਾਤਿ ਪਮਾਣਯੁਤ੍ਤਾ ਕਾਰੇਤਬ੍ਬਾ. ਤਤ੍ਰਿਦਂ ਪਮਾਣਨ੍ਤਿ ਤਸ੍ਸਾ ਕੁਟਿਯਾ ਇਦਂ ਪਮਾਣਂ. ਸੁਗਤਵਿਦਤ੍ਥਿਯਾਤਿ ਸੁਗਤਵਿਦਤ੍ਥਿ ਨਾਮ ਇਦਾਨਿ ਮਜ੍ਝਿਮਸ੍ਸ ਪੁਰਿਸਸ੍ਸ ਤਿਸ੍ਸੋ ਵਿਦਤ੍ਥਿਯੋ ਵਡ੍ਢਕੀਹਤ੍ਥੇਨ ਦਿਯਡ੍ਢੋ ਹਤ੍ਥੋ ਹੋਤਿ. ਬਾਹਿਰਿਮੇਨ ਮਾਨੇਨਾਤਿ ਕੁਟਿਯਾ ਬਹਿਕੁਟ੍ਟਮਾਨੇਨ ਦ੍ਵਾਦਸ ਵਿਦਤ੍ਥਿਯੋ, ਮਿਨਨ੍ਤੇਨ ਪਨ ਸਬ੍ਬਪਠਮਂ ਦਿਨ੍ਨੋ ਮਹਾਮਤ੍ਤਿਕਪਰਿਯਨ੍ਤੋ ਨ ਗਹੇਤਬ੍ਬੋ. ਥੁਸਪਿਣ੍ਡਪਰਿਯਨ੍ਤੇਨ ਮਿਨਿਤਬ੍ਬਂ. ਥੁਸਪਿਣ੍ਡਸ੍ਸਉਪਰਿ ਸੇਤਕਮ੍ਮਂ ਅਬ੍ਬੋਹਾਰਿਕਂ. ਸਚੇ ਥੁਸਪਿਣ੍ਡੇਨ ਅਨਤ੍ਥਿਕੋ ਮਹਾਮਤ੍ਤਿਕਾਯ ਏਵ ਨਿਟ੍ਠਾਪੇਤਿ, ਮਹਾਮਤ੍ਤਿਕਾਵ ਪਰਿਚ੍ਛੇਦੋ.
ਤਿਰਿਯਨ੍ਤਿ ਵਿਤ੍ਥਾਰਤੋ. ਸਤ੍ਤਾਤਿ ਸਤ੍ਤ ਸੁਗਤਵਿਦਤ੍ਥਿਯੋ. ਅਨ੍ਤਰਾਤਿ ਇਮਸ੍ਸ ਪਨ ਅਯਂ ਨਿਦ੍ਦੇਸੋ, ‘‘ਅਬ੍ਭਨ੍ਤਰਿਮੇਨ ਮਾਨੇਨਾ’’ਤਿ, ਕੁਟ੍ਟਸ੍ਸ ਬਹਿ ਅਨ੍ਤਂ ਅਗ੍ਗਹੇਤ੍ਵਾ ਅਬ੍ਭਨ੍ਤਰਿਮੇਨ ਅਨ੍ਤੇਨ ਮਿਨਿਯਮਾਨੇ ਤਿਰਿਯਂ ਸਤ੍ਤ ਸੁਗਤਵਿਦਤ੍ਥਿਯੋ ਪਮਾਣਨ੍ਤਿ ਵੁਤ੍ਤਂ ਹੋਤਿ.
ਯੋ ਪਨ ਲੇਸਂ ਓਡ੍ਡੇਨ੍ਤੋ ਯਥਾਵੁਤ੍ਤਪ੍ਪਮਾਣਮੇਵ ਕਰਿਸ੍ਸਾਮੀਤਿ ਦੀਘਤੋ ਏਕਾਦਸ ਵਿਦਤ੍ਥਿਯੋ ਤਿਰਿਯਂ ਅਟ੍ਠ ਵਿਦਤ੍ਥਿਯੋ, ਦੀਘਤੋ ਵਾ ਤੇਰਸ ਵਿਦਤ੍ਥਿਯੋ ਤਿਰਿਯਂ ਛ ਵਿਦਤ੍ਥਿਯੋ ਕਰੇਯ੍ਯ, ਨ ਵਟ੍ਟਤਿ. ਏਕਤੋਭਾਗੇਨ ਅਤਿਕ੍ਕਨ੍ਤਮ੍ਪਿ ਹਿ ਪਮਾਣਂ ਅਤਿਕ੍ਕਨ੍ਤਮੇਵ ਹੋਤਿ. ਤਿਟ੍ਠਤੁ ਵਿਦਤ੍ਥਿ, ਕੇਸਗ੍ਗਮਤ੍ਤਮ੍ਪਿ ਦੀਘਤੋ ਵਾ ਹਾਪੇਤ੍ਵਾ ਤਿਰਿਯਂ ਤਿਰਿਯਤੋ ਵਾ ਹਾਪੇਤ੍ਵਾ ਦੀਘਂ ਵਡ੍ਢੇਤੁਂ ਨ ਵਟ੍ਟਤਿ, ਕੋ ਪਨ ਵਾਦੋ ਉਭਤੋ ਵਡ੍ਢਨੇ? ਵੁਤ੍ਤਞ੍ਹੇਤਂ – ‘‘ਆਯਾਮਤੋ ਵਾ ਵਿਤ੍ਥਾਰਤੋ ਵਾ ਅਨ੍ਤਮਸੋ ਕੇਸਗ੍ਗਮਤ੍ਤਮ੍ਪਿ ਅਤਿਕ੍ਕਮਿਤ੍ਵਾ ਕਰੋਤਿ ਵਾ ਕਾਰਾਪੇਤਿ ਵਾ ਪਯੋਗੇ ਦੁਕ੍ਕਟ’’ਨ੍ਤਿਆਦਿ (ਪਾਰਾ. ੩੫੩). ਯਥਾਵੁਤ੍ਤਪ੍ਪਮਾਣਾ ਏਵ ਪਨ ਵਟ੍ਟਤਿ. ਯਾ ਪਨ ਦੀਘਤੋ ਸਟ੍ਠਿਹਤ੍ਥਾਪਿ ਹੋਤਿ ਤਿਰਿਯਂ ਤਿਹਤ੍ਥਾ ਵਾ ਊਨਕਚਤੁਹਤ੍ਥਾ ਵਾ ਯਤ੍ਥ ਪਮਾਣਯੁਤ੍ਤੋ ਮਞ੍ਚੋ ਇਤੋ ਚਿਤੋ ਚ ਨ ਪਰਿਵਤ੍ਤਤਿ, ਅਯਂ ਕੁਟੀਤਿ ਸਙ੍ਖ੍ਯਂ ਨ ਗਚ੍ਛਤਿ, ਤਸ੍ਮਾ ਅਯਮ੍ਪਿ ਵਟ੍ਟਤਿ. ਮਹਾਪਚ੍ਚਰਿਯਂ ਪਨ ਪਚ੍ਛਿਮਕੋਟਿਯਾ ਚਤੁਹਤ੍ਥਵਿਤ੍ਥਾਰਾ ਵੁਤ੍ਤਾ, ਤਤੋ ਹੇਟ੍ਠਾ ਅਕੁਟਿ. ਪਮਾਣਿਕਾਪਿ ਪਨ ਅਦੇਸਿਤਵਤ੍ਥੁਕਾ ਵਾ ਸਾਰਮ੍ਭਾ ਵਾ ਅਪਰਿਕ੍ਕਮਨਾ ਵਾ ਨ ਵਟ੍ਟਤਿ. ਪਮਾਣਿਕਾ ਦੇਸਿਤਵਤ੍ਥੁਕਾ ਅਨਾਰਮ੍ਭਾ ਸਪਰਿਕ੍ਕਮਨਾਵ ਵਟ੍ਟਤਿ. ਪਮਾਣਤੋ ਊਨਤਰਮ੍ਪਿ ਚਤੁਹਤ੍ਥਂ ਪਞ੍ਚਹਤ੍ਥਮ੍ਪਿ ਕਰੋਨ੍ਤੇਨ ਦੇਸਿਤਵਤ੍ਥੁਕਾਵ ਕਾਰੇਤਬ੍ਬਾ. ਪਮਾਣਾਤਿਕ੍ਕਨ੍ਤਞ੍ਚ ਪਨ ਕਰੋਨ੍ਤੋ ਲੇਪਪਰਿਯੋਸਾਨੇ ਗਰੁਕਂ ਆਪਤ੍ਤਿਂ ਆਪਜ੍ਜਤਿ.
ਤਤ੍ਥ ਲੇਪੋ ਚ ਅਲੇਪੋ ਚ ਲੇਪੋਕਾਸੋ ਚ ਅਲੇਪੋਕਾਸੋ ਚ ਵੇਦਿਤਬ੍ਬੋ. ਸੇਯ੍ਯਥਿਦਂ – ਲੇਪੋਤਿ ਦ੍ਵੇ ਲੇਪਾ – ਮਤ੍ਤਿਕਾਲੇਪੋ ਚ ਸੁਧਾਲੇਪੋ ਚ. ਠਪੇਤ੍ਵਾ ਪਨ ਇਮੇ ਦ੍ਵੇ ਲੇਪੇ ਅਵਸੇਸੋ ਭਸ੍ਮਗੋਮਯਾਦਿਭੇਦੋ ਲੇਪੋ, ਅਲੇਪੋ. ਸਚੇਪਿ ਕਲਲਲੇਪੋ ਹੋਤਿ, ਅਲਪੋ ਏਵ. ਲੇਪੋਕਾਸੋਤਿ ਭਿਤ੍ਤਿਯੋ ਚੇਵ ਛਦਨਞ੍ਚ, ਠਪੇਤ੍ਵਾ ਪਨ ਭਿਤ੍ਤਿਚ੍ਛਦਨੇ ਅਵਸੇਸੋ ਥਮ੍ਭਤੁਲਾਪਿਟ੍ਠਸਙ੍ਘਾਟਵਾਤਪਾਨਧੂਮਚ੍ਛਿਦ੍ਦਾਦਿ ਅਲੇਪਾਰਹੋ ਓਕਾਸੋ ਸਬ੍ਬੋਪਿ ਅਲੇਪੋਕਾਸੋਤਿ ਵੇਦਿਤਬ੍ਬੋ.
ਭਿਕ੍ਖੂ ਅਭਿਨੇਤਬ੍ਬਾ ਵਤ੍ਥੁਦੇਸਨਾਯਾਤਿ ਯਸ੍ਮਿਂ ਠਾਨੇ ਕੁਟਿਂ ਕਾਰੇਤੁਕਾਮੋ ਹੋਤਿ, ਤਤ੍ਥ ਵਤ੍ਥੁਦੇਸਨਤ੍ਥਾਯ ਭਿਕ੍ਖੂ ਨੇਤਬ੍ਬਾ. ਤੇਨ ਕੁਟਿਕਾਰਕੇਨਾਤਿਆਦਿ ਪਨ ਯੇਨ ਵਿਧਿਨਾ ਤੇ ਭਿਕ੍ਖੂ ਅਭਿਨੇਤਬ੍ਬਾ, ਤਸ੍ਸ ਦਸ੍ਸਨਤ੍ਥਂ ਵੁਤ੍ਤਂ. ਤਤ੍ਥ ਕੁਟਿਵਤ੍ਥੁਂ ਸੋਧੇਤ੍ਵਾਤਿ ਨ ਵਿਸਮਂ ਅਰਞ੍ਞਂ ਭਿਕ੍ਖੂ ਗਹੇਤ੍ਵਾ ਗਨ੍ਤਬ੍ਬਂ, ਕੁਟਿਵਤ੍ਥੁਂ ਪਨ ਪਠਮਮੇਵ ਸੋਧੇਤ੍ਵਾ ਸਮਤਲਂ ਸੀਮਮਣ੍ਡਲਸਦਿਸਂ ਕਤ੍ਵਾ ਪਚ੍ਛਾ ਸਙ੍ਘਂ ਉਪਸਙ੍ਕਮਿਤ੍ਵਾ ਯਾਚਿਤ੍ਵਾ ਨੇਤਬ੍ਬਾਤਿ ਦਸ੍ਸੇਤਿ. ਏਵਮਸ੍ਸ ਵਚਨੀਯੋਤਿ ਸਙ੍ਘੋ ਏਵਂ ਵਤ੍ਤਬ੍ਬੋ ਅਸ੍ਸ. ਪਰਤੋ ਪਨ ‘‘ਦੁਤਿਯਮ੍ਪਿ ਯਾਚਿਤਬ੍ਬਾ’’ਤਿ ਭਿਕ੍ਖੂ ਸਨ੍ਧਾਯ ਬਹੁਵਚਨਂ ਵੁਤ੍ਤਂ. ਨੋ ਚੇ ਸਬ੍ਬੋ ਸਙ੍ਘੋ ਉਸ੍ਸਹਤੀਤਿ ਸਚੇ ਸਬ੍ਬੋ ਸਙ੍ਘੋ ਨ ਇਚ੍ਛਤਿ, ਸਜ੍ਝਾਯਮਨਸਿਕਾਰਾਦੀਸੁ ਉਯ੍ਯੁਤ੍ਤਾ ਤੇ ਤੇ ਭਿਕ੍ਖੂ ਹੋਨ੍ਤਿ. ਸਾਰਮ੍ਭਂ ਅਨਾਰਮ੍ਭਨ੍ਤਿ ਸਉਪਦ੍ਦਵਂ ਅਨੁਪਦ੍ਦਵਂ. ਸਪਰਿਕ੍ਕਮਨਂ ਅਪਰਿਕ੍ਕਮਨਨ੍ਤਿ ਸਉਪਚਾਰਂ ਅਨੁਪਚਾਰਂ.
ਪਤ੍ਤਕਲ੍ਲਨ੍ਤਿ ਪਤ੍ਤੋ ਕਾਲੋ ਇਮਸ੍ਸ ਓਲੋਕਨਸ੍ਸਾਤਿ ਪਤ੍ਤਕਾਲਂ, ਪਤ੍ਤਕਾਲਮੇਵ ਪਤ੍ਤਕਲ੍ਲਂ. ਇਦਞ੍ਚ ਵਤ੍ਥੁਂਓਲੋਕਨਤ੍ਥਾਯ ਸਮ੍ਮੁਤਿਕਮ੍ਮਂ ਅਨੁਸਾਵਨਾਨਯੇਨ ਓਲੋਕੇਤ੍ਵਾਪਿ ਕਾਤੁਂ ਵਟ੍ਟਤਿ. ਪਰਤੋ ਪਨ ਵਤ੍ਥੁਦੇਸਨਾਕਮ੍ਮਂ ਯਥਾਵੁਤ੍ਤਾਯ ਏਵ ਞਤ੍ਤਿਯਾ ਚ ਅਨੁਸਾਵਨਾਯ ਚ ਕਾਤਬ੍ਬਂ, ਓਲੋਕੇਤ੍ਵਾ ਕਾਤੁਂ ਨ ਵਟ੍ਟਤਿ.
੩੫੩. ਕਿਪਿਲ੍ਲਿਕਾਨਨ੍ਤਿ ਰਤ੍ਤਕਾਲ਼ਪਿਙ੍ਗਲਾਦਿਭੇਦਾਨਂ ਯਾਸਂ ਕਾਸਞ੍ਚਿ ਕਿਪਿਲ੍ਲਿਕਾਨਂ. ਕਿਪੀਲ੍ਲਕਾਨਨ੍ਤਿਪਿ ਪਾਠੋ. ਆਸਯੋਤਿ ਨਿਬਦ੍ਧਵਸਨਟ੍ਠਾਨਂ, ਯਥਾ ਚ ਕਿਪਿਲ੍ਲਿਕਾਨਂ ਏਵਂ ਉਪਚਿਕਾਦੀਨਮ੍ਪਿ ਨਿਬਦ੍ਧਵਸਨਟ੍ਠਾਨਂਯੇਵ ਆਸਯੋ ਵੇਦਿਤਬ੍ਬੋ. ਯਤ੍ਥ ਪਨ ਤੇ ਗੋਚਰਤ੍ਥਾਯ ਆਗਨ੍ਤ੍ਵਾ ਗਚ੍ਛਨ੍ਤਿ, ਸਬ੍ਬੇਸਮ੍ਪਿ ਤਾਦਿਸੋ ਸਞ੍ਚਰਣਪ੍ਪਦੇਸੋ ਅਵਾਰਿਤੋ, ਤਸ੍ਮਾ ਤਤ੍ਥ ਅਪਨੇਤ੍ਵਾ ਸੋਧੇਤ੍ਵਾ ਕਾਤੁਂ ਵਟ੍ਟਤਿ. ਇਮਾਨਿ ਤਾਵ ਛ ਠਾਨਾਨਿਸਤ੍ਤਾਨੁਦ੍ਦਯਾਯ ਪਟਿਕ੍ਖਿਤ੍ਤਾਨਿ.
ਹਤ੍ਥੀਨਂ ਵਾਤਿ ਹਤ੍ਥੀਨਂ ਪਨ ਨਿਬਦ੍ਧਵਸਨਟ੍ਠਾਨਮ੍ਪਿ ਨਿਬਦ੍ਧਗੋਚਰਟ੍ਠਾਨਮ੍ਪਿ ਨ ਵਟ੍ਟਤਿ, ਸੀਹਾਦੀਨਂ ਆਸਯੋ ਚ ਗੋਚਰਾਯ ਪਕ੍ਕਮਨ੍ਤਾਨਂ ਨਿਬਦ੍ਧਗਮਨਮਗ੍ਗੋ ਚ ਨ ਵਟ੍ਟਤਿ. ਏਤੇਸਂ ਗੋਚਰਭੂਮਿ ਨ ਗਹਿਤਾ. ਯੇਸਂ ਕੇਸਞ੍ਚੀਤਿ ਅਞ੍ਞੇਸਮ੍ਪਿ ਵਾਲ਼ਾਨਂ ਤਿਰਚ੍ਛਾਨਗਤਾਨਂ. ਇਮਾਨਿ ਸਤ੍ਤ ਠਾਨਾਨਿ ਸਪ੍ਪਟਿਭਯਾਨਿ ਭਿਕ੍ਖੂਨਂ ਆਰੋਗ੍ਯਤ੍ਥਾਯ ਪਟਿਕ੍ਖਿਤ੍ਤਾਨਿ. ਸੇਸਾਨਿ ਨਾਨਾਉਪਦ੍ਦਵੇਹਿ ਸਉਪਦ੍ਦਵਾਨਿ. ਤਤ੍ਥ ਪੁਬ੍ਬਣ੍ਣਨਿਸ੍ਸਿਤਨ੍ਤਿ ਪੁਬ੍ਬਣ੍ਣਂ ਨਿਸ੍ਸਿਤਂ ਸਤ੍ਤਨ੍ਨਂ ਧਞ੍ਞਾਨਂ ਵਿਰੁਹਨਕਖੇਤ੍ਤਸਾਮਨ੍ਤਾ ਠਿਤਂ. ਏਸੇਵ ਨਯੋ ਅਪਰਣ੍ਣਨਿਸ੍ਸਿਤਾਦੀਸੁਪਿ. ਏਤ੍ਥ ਪਨ ਅਬ੍ਭਾਘਾਤਨ੍ਤਿ ਕਾਰਣਾਘਰਂ ਵੇਰਿਘਰਂ, ਚੋਰਾਨਂ ਮਾਰਣਤ੍ਥਾਯ ਕਤਨ੍ਤਿ ਕੁਰੁਨ੍ਦਿਆਦੀਸੁ.
ਆਘਾਤਨਨ੍ਤਿ ਧਮ੍ਮਗਨ੍ਧਿਕਾ ਵੁਚ੍ਚਤਿ. ਸੁਸਾਨਨ੍ਤਿ ਮਹਾਸੁਸਾਨਂ. ਸਂਸਰਣਨ੍ਤਿ ਅਨਿਬ੍ਬਿਜ੍ਝਗਮਨੀਯੋ ਗਤਪਚ੍ਚਾਗਤਮਗ੍ਗੋ ਵੁਚ੍ਚਤਿ. ਸੇਸਂ ਉਤ੍ਤਾਨਮੇਵ.
ਨ ਸਕ੍ਕਾ ਹੋਤਿ ਯਥਾਯੁਤ੍ਤੇਨ ਸਕਟੇਨਾਤਿ ਦ੍ਵੀਹਿ ਬਲਿਬਦ੍ਦੇਹਿ ਯੁਤ੍ਤੇਨ ਸਕਟੇਨ ਏਕਂ ਚਕ੍ਕਂ ਨਿਬ੍ਬੋਦਕਪਤਨਟ੍ਠਾਨੇ ਏਕਂ ਬਹਿ ਕਤ੍ਵਾ ਆਵਿਜ੍ਜਿਤੁਂ ਨ ਸਕ੍ਕਾ ਹੋਤਿ. ਕੁਰੁਨ੍ਦਿਯਂ ਪਨ ‘‘ਚਤੂਹਿ ਯੁਤ੍ਤੇਨਾ’’ਤਿ ਵੁਤ੍ਤਂ. ਸਮਨ੍ਤਾ ਨਿਸ੍ਸੇਣਿਯਾ ਅਨੁਪਰਿਗਨ੍ਤੁਨ੍ਤਿ ਨਿਸ੍ਸੇਣਿਯਂ ਠਤ੍ਵਾ ਗੇਹਂ ਛਾਦੇਨ੍ਤੇਹਿ ਨ ਸਕ੍ਕਾ ਹੋਤਿ ਸਮਨ੍ਤਾ ਨਿਸ੍ਸੇਣਿਯਾ ਆਵਿਜ੍ਜਿਤੁਂ. ਇਤਿ ਏਵਰੂਪੇ ਸਾਰਮ੍ਭੇ ਚ ਅਪਰਿਕ੍ਕਮਨੇ ਚ ਠਾਨੇ ਨ ਕਾਰੇਤਬ੍ਬਾ. ਅਨਾਰਮ੍ਭੇ ਪਨ ਸਪਰਿਕ੍ਕਮਨੇ ਕਾਰੇਤਬ੍ਬਾ, ਤਂ ਵੁਤ੍ਤਪਟਿਪਕ੍ਖਨਯੇਨ ਪਾਲ਼ਿਯਂ ਆਗਤਮੇਵ.
ਪੁਨ ਸਞ੍ਞਾਚਿਕਾ ਨਾਮਾਤਿ ਏਵਮਾਦਿ ‘‘ਸਾਰਮ੍ਭੇ ਚੇ ਭਿਕ੍ਖੁ ਵਤ੍ਥੁਸ੍ਮਿਂ ਅਪਰਿਕ੍ਕਮਨੇ ਸਞ੍ਞਾਚਿਕਾਯ ਕੁਟਿਂ ਕਾਰੇਯ੍ਯਾ’’ਤਿ ਏਵਂ ਵੁਤ੍ਤਸਂਯਾਚਿਕਾਦੀਨਂ ਅਤ੍ਥਪ੍ਪਕਾਸਨਤ੍ਥਂ ਵੁਤ੍ਤਂ.
ਪਯੋਗੇ ਦੁਕ੍ਕਟਨ੍ਤਿ ਏਵਂ ਅਦੇਸਿਤਵਤ੍ਥੁਕਂ ਵਾ ਪਮਾਣਾਤਿਕ੍ਕਨ੍ਤਂ ਵਾ ਕੁਟਿਂ ਕਾਰੇਸ੍ਸਾਮੀਤਿ ਅਰਞ੍ਞਤੋ ਰੁਕ੍ਖਾ ਹਰਣਤ੍ਥਾਯ ਵਾਸਿਂ ਵਾ ਫਰਸੁਂ ਵਾ ਨਿਸੇਤਿ ਦੁਕ੍ਕਟਂ, ਅਰਞ੍ਞਂ ਪਵਿਸਤਿ ਦੁਕ੍ਕਟਂ, ਤਤ੍ਥ ਅਲ੍ਲਤਿਣਾਨਿ ਛਿਨ੍ਦਤਿ ਦੁਕ੍ਕਟੇਨ ਸਦ੍ਧਿਂ ਪਾਚਿਤ੍ਤਿਯਂ, ਸੁਕ੍ਖਾਨਿ ਛਿਨ੍ਦਤਿ ਦੁਕ੍ਕਟਂ. ਰੁਕ੍ਖੇਸੁਪਿ ਏਸੇਵ ਨਯੋ. ਭੂਮਿਂ ਸੋਧੇਤਿ ਖਣਤਿ, ਪਂਸੁਂ ਉਦ੍ਧਰਤਿ, ਚਿਨਾਤਿ; ਏਵਂ ਯਾਵ ਪਾਚੀਰਂ ਬਨ੍ਧਤਿ ਤਾਵ ਪੁਬ੍ਬਪਯੋਗੋ ਨਾਮ ਹੋਤਿ. ਤਸ੍ਮਿਂ ਪੁਬ੍ਬਪਯੋਗੇ ਸਬ੍ਬਤ੍ਥ ਪਾਚਿਤ੍ਤਿਯਟ੍ਠਾਨੇ ਦੁਕ੍ਕਟੇਨ ਸਦ੍ਧਿਂ ਪਾਚਿਤ੍ਤਿਯਂ, ਦੁਕ੍ਕਟਟ੍ਠਾਨੇ ਦੁਕ੍ਕਟਂ, ਤਤੋ ਪਟ੍ਠਾਯ ਸਹਪਯੋਗੋ ਨਾਮ. ਤਤ੍ਥ ਥਮ੍ਭੇਹਿ ਕਾਤਬ੍ਬਾਯ ਥਮ੍ਭਂ ਉਸ੍ਸਾਪੇਤਿ, ਦੁਕ੍ਕਟਂ. ਇਟ੍ਠਕਾਹਿ ਚਿਨਿਤਬ੍ਬਾਯ ਇਟ੍ਠਕਂ ਆਚਿਨਾਤਿ, ਦੁਕ੍ਕਟਂ. ਏਵਂ ਯਂ ਯਂ ਉਪਕਰਣਂ ਯੋਜੇਤਿ, ਸਬ੍ਬਤ੍ਥ ਪਯੋਗੇ ਪਯੋਗੇ ਦੁਕ੍ਕਟਂ. ਤਚ੍ਛਨ੍ਤਸ੍ਸ ਹਤ੍ਥਵਾਰੇ ਹਤ੍ਥਵਾਰੇ ਤਦਤ੍ਥਾਯ ਗਚ੍ਛਨ੍ਤਸ੍ਸ ਪਦੇ ਪਦੇ ਦੁਕ੍ਕਟਂ. ਏਵਂ ਕਤਂ ਪਨ ਦਾਰੁਕੁਟ੍ਟਿਕਂ ਵਾ ਇਟ੍ਠਕਕੁਟ੍ਟਿਕਂ ਵਾ ਸਿਲਾਕੁਟ੍ਟਿਕਂ ਵਾ ਅਨ੍ਤਮਸੋ ਪਣ੍ਣਸਾਲਮ੍ਪਿ ਸਭਿਤ੍ਤਿਚ੍ਛਦਨਂ ਲਿਮ੍ਪਿਸ੍ਸਾਮੀਤਿ ਸੁਧਾਯ ਵਾ ਮਤ੍ਤਿਕਾਯ ਵਾ ਲਿਮ੍ਪਨ੍ਤਸ੍ਸ ਪਯੋਗੇ ਪਯੋਗੇ ਯਾਵ ਥੁਲ੍ਲਚ੍ਚਯਂ ਨ ਹੋਤਿ, ਤਾਵ ਦੁਕ੍ਕਟਂ. ਏਤਂ ਪਨ ਦੁਕ੍ਕਟਂ ਮਹਾਲੇਪੇਨੇਵ ਵਟ੍ਟਤਿ, ਸੇਤਰਤ੍ਤਵਣ੍ਣਕਰਣੇ ਵਾ ਚਿਤ੍ਤਕਮ੍ਮੇ ਵਾ ਅਨਾਪਤ੍ਤਿ.
ਏਕਂ ਪਿਣ੍ਡਂ ਅਨਾਗਤੇਤਿ ਯੋ ਸਬ੍ਬਪਚ੍ਛਿਮੋ ਏਕੋ ਲੇਪਪਿਣ੍ਡੋ, ਤਂ ਏਕਂ ਪਿਣ੍ਡਂ ਅਸਮ੍ਪਤ੍ਤੇ ਕੁਟਿਕਮ੍ਮੇ. ਇਦਂ ਵੁਤ੍ਤਂ ਹੋਤਿ, ਇਦਾਨਿ ਦ੍ਵੀਹਿ ਪਿਣ੍ਡੇਹਿ ਨਿਟ੍ਠਾਨਂ ਗਮਿਸ੍ਸਤੀਤਿ ਤੇਸੁ ਪਠਮਪਿਣ੍ਡਦਾਨੇ ਥੁਲ੍ਲਚ੍ਚਯਨ੍ਤਿ.
ਤਸ੍ਮਿਂ ਪਿਣ੍ਡੇ ਆਗਤੇਤਿ ਯਂ ਏਕਂ ਪਿਣ੍ਡਂ ਅਨਾਗਤੇ ਕੁਟਿਕਮ੍ਮੇ ਥੁਲ੍ਲਚ੍ਚਯਂ ਹੋਤਿ, ਤਸ੍ਮਿਂ ਅਵਸਾਨਪਿਣ੍ਡੇ ਆਗਤੇ ਦਿਨ੍ਨੇ ਠਪਿਤੇ ਲੇਪਸ੍ਸ ਘਟਿਤਤ੍ਤਾ ਆਪਤ੍ਤਿ ਸਙ੍ਘਾਦਿਸੇਸਸ੍ਸ. ਏਵਂ ਲੇਮ੍ਪਨ੍ਤਸ੍ਸ ਚ ਅਨ੍ਤੋਲੇਪੇ ਵਾ ਅਨ੍ਤੋਲੇਪੇਨ ਸਦ੍ਧਿਂ ਭਿਤ੍ਤਿਞ੍ਚ ਛਦਨਞ੍ਚ ਏਕਾਬਦ੍ਧਂ ਕਤ੍ਵਾ ਘਟਿਤੇ ਬਹਿਲੇਪੇ ਵਾ ਬਹਿਲੇਪੇਨ ਸਦ੍ਧਿਂ ਘਟਿਤੇ ਸਙ੍ਘਾਦਿਸੇਸੋ. ਸਚੇ ਪਨ ਦ੍ਵਾਰਬਦ੍ਧਂ ਵਾ ਵਾਤਪਾਨਂ ਵਾ ਅਟ੍ਠਪੇਤ੍ਵਾਵ ਮਤ੍ਤਿਕਾਯ ਲਿਮ੍ਪਤਿ, ਤਸ੍ਮਿਞ੍ਚ ਤਸ੍ਸੋਕਾਸਂ ਪੁਨ ਵਡ੍ਢੇਤ੍ਵਾ ਵਾ ਅਵਡ੍ਢੇਤ੍ਵਾ ਵਾ ਠਪਿਤੇ ਲੇਪੋ ਨ ਘਟੀਯਤਿ ਰਕ੍ਖਤਿ ਤਾਵ, ਪੁਨ ਲਿਮ੍ਪਨ੍ਤਸ੍ਸ ਪਨ ਘਟਿਤਮਤ੍ਤੇ ਸਙ੍ਘਾਦਿਸੇਸੋ. ਸਚੇ ਤਂ ਠਪਿਯਮਾਨਂ ਪਠਮਂ ਦਿਨ੍ਨਲੇਪੇਨ ਸਦ੍ਧਿਂ ਨਿਰਨ੍ਤਰਮੇਵ ਹੁਤ੍ਵਾ ਤਿਟ੍ਠਤਿ, ਪਠਮਮੇਵ ਸਙ੍ਘਾਦਿਸੇਸੋ. ਉਪਚਿਕਾਮੋਚਨਤ੍ਥਂ ਅਟ੍ਠਙ੍ਗੁਲਮਤ੍ਤੇਨ ਅਪ੍ਪਤ੍ਤਚ੍ਛਦਨਂ ਕਤ੍ਵਾ ਭਿਤ੍ਤਿਂ ਲਿਮ੍ਪਤਿ, ਅਨਾਪਤ੍ਤਿ. ਉਪਚਿਕਾਮੋਚਨਤ੍ਥਮੇਵ ਹੇਟ੍ਠਾ ਪਾਸਾਣਕੁਟ੍ਟਂ ਕਤ੍ਵਾ ਤਂ ਅਲਿਮ੍ਪਿਤ੍ਵਾ ਉਪਰਿ ਲਿਮ੍ਪਤਿ, ਲੇਪੋ ਨ ਘਟਿਯਤਿ ਨਾਮ, ਅਨਾਪਤ੍ਤਿਯੇਵ.
ਇਟ੍ਠਕਕੁਟ੍ਟਿਕਾਯ ਇਟ੍ਠਕਾਹਿਯੇਵ ਵਾਤਪਾਨੇ ਚ ਧੂਮਨੇਤ੍ਤਾਨਿ ਚ ਕਰੋਤਿ, ਲੇਪਘਟਨੇਨੇਵ ਆਪਤ੍ਤਿ. ਪਣ੍ਣਸਾਲਂ ਲਿਮ੍ਪਤਿ, ਲੇਪਘਟਨੇਨੇਵ ਆਪਤ੍ਤਿ. ਤਤ੍ਥ ਆਲੋਕਤ੍ਥਾਯ ਅਟ੍ਠਙ੍ਗੁਲਮਤ੍ਤਂ ਠਪੇਤ੍ਵਾ ਲਿਮ੍ਪਤਿ, ਲੇਪੋ ਨ ਘਟੀਯਤਿ ਨਾਮ, ਅਨਾਪਤ੍ਤਿਯੇਵ. ਸਚੇ ‘‘ਵਾਤਪਾਨਂ ਲਦ੍ਧਾ ਏਤ੍ਥ ਠਪੇਸ੍ਸਾਮੀ’’ਤਿ ਕਰੋਤਿ, ਵਾਤਪਾਨੇ ਠਪਿਤੇ ਲੇਪਘਟਨੇਨ ਆਪਤ੍ਤਿ. ਸਚੇ ਮਤ੍ਤਿਕਾਯ ਕੁਟ੍ਟਂ ਕਰੋਤਿ, ਛਦਨਲੇਪੇਨ ਸਦ੍ਧਿਂ ਘਟਨੇ ਆਪਤ੍ਤਿ. ਏਕੋ ਏਕਪਿਣ੍ਡਾਵਸੇਸਂ ਕਤ੍ਵਾ ਠਪੇਤਿ, ਅਞ੍ਞੋ ਤਂ ਦਿਸ੍ਵਾ ‘‘ਦੁਕ੍ਕਤਂ ਇਦ’’ਨ੍ਤਿ ਵਤ੍ਤਸੀਸੇਨ ਲਿਮ੍ਪਤਿ ਉਭਿਨ੍ਨਮ੍ਪਿ ਅਨਾਪਤ੍ਤਿ.
੩੫੪. ਭਿਕ੍ਖੁ ਕੁਟਿਂ ਕਰੋਤੀਤਿ ਏਵਮਾਦੀਨਿ ਛਤ੍ਤਿਂਸ ਚਤੁਕ੍ਕਾਨਿ ਆਪਤ੍ਤਿਭੇਦਦਸ੍ਸਨਤ੍ਥਂ ਵੁਤ੍ਤਾਨਿ, ਤਤ੍ਥ ਸਾਰਮ੍ਭਾਯ ਦੁਕ੍ਕਟਂ, ਅਪਰਿਕ੍ਕਮਨਾਯ ਦੁਕ੍ਕਟਂ, ਪਮਾਣਾਤਿਕ੍ਕਨ੍ਤਾਯ ਸਙ੍ਘਾਦਿਸੇਸੋ, ਅਦੇਸਿਤਵਤ੍ਥੁਕਾਯ ਸਙ੍ਘਾਦਿਸੇਸੋ, ਏਤੇਸਂ ਵਸੇਨ ਵੋਮਿਸ੍ਸਕਾਪਤ੍ਤਿਯੋ ਵੇਦਿਤਬ੍ਬਾ.
੩੫੫. ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਨ੍ਤਿਆਦੀਸੁ ਚ ਦ੍ਵੀਹਿ ਸਙ੍ਘਾਦਿਸੇਸੇਹਿ ਸਦ੍ਧਿਂ ਦ੍ਵਿਨ੍ਨਂ ਦੁਕ੍ਕਟਾਨਨ੍ਤਿਆਦਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ.
੩੬੧. ਸੋ ਚੇ ਵਿਪ੍ਪਕਤੇ ਆਗਚ੍ਛਤੀਤਿਆਦੀਸੁ ਪਨ ਅਯਂ ਅਤ੍ਥਵਿਨਿਚ੍ਛਯੋ. ਸੋਤਿ ਸਮਾਦਿਸਿਤ੍ਵਾ ਪਕ੍ਕਨ੍ਤਭਿਕ੍ਖੁ. ਵਿਪ੍ਪਕਤੇਤਿ ਅਨਿਟ੍ਠਿਤੇ ਕੁਟਿਕਮ੍ਮੇ. ਅਞ੍ਞਸ੍ਸ ਵਾ ਦਾਤਬ੍ਬਾਤਿ ਅਞ੍ਞਸ੍ਸ ਪੁਗ੍ਗਲਸ੍ਸ ਵਾ ਸਙ੍ਘਸ੍ਸ ਵਾ ਚਜਿਤ੍ਵਾ ਦਾਤਬ੍ਬਾ. ਭਿਨ੍ਦਿਤ੍ਵਾ ਵਾ ਪੁਨ ਕਾਤਬ੍ਬਾਤਿ ਕਿਤ੍ਤਕੇਨ ਭਿਨ੍ਨਾ ਹੋਤਿ, ਸਚੇ ਥਮ੍ਭਾ ਭੂਮਿਯਂ ਨਿਖਾਤਾ, ਉਦ੍ਧਰਿਤਬ੍ਬਾ. ਸਚੇ ਪਾਸਾਣਾਨਂ ਉਪਰਿ ਠਪਿਤਾ, ਅਪਨੇਤਬ੍ਬਾ. ਇਟ੍ਠਕਚਿਤਾਯ ਯਾਵ ਮਙ੍ਗਲਿਟ੍ਠਕਾ ਤਾਵ ਕੁਟ੍ਟਾ ਅਪਚਿਨਿਤਬ੍ਬਾ. ਸਙ੍ਖੇਪਤੋ ਭੂਮਿਸਮਂ ਕਤ੍ਵਾ ਵਿਨਾਸਿਤਾ ਭਿਨ੍ਨਾ ਹੋਤਿ, ਭੂਮਿਤੋ ਉਪਰਿ ਚਤੁਰਙ੍ਗੁਲਮਤ੍ਤੇਪਿ ਠਿਤੇ ਅਭਿਨ੍ਨਾਵ. ਸੇਸਂ ਸਬ੍ਬਚਤੁਕ੍ਕੇਸੁ ਪਾਕਟਮੇਵ. ਨ ਹੇਤ੍ਥ ਅਞ੍ਞਂ ਕਿਞ੍ਚਿ ਅਤ੍ਥਿ, ਯਂ ਪਾਲ਼ਿਅਨੁਸਾਰੇਨੇਵ ਦੁਬ੍ਬਿਞ੍ਞੇਯ੍ਯਂ ਸਿਯਾ.
੩੬੩. ਅਤ੍ਤਨਾ ਵਿਪ੍ਪਕਤਨ੍ਤਿਆਦੀਸੁ ਪਨ ਅਤ੍ਤਨਾ ਆਰਦ੍ਧਂ ਕੁਟਿਂ. ਅਤ੍ਤਨਾ ਪਰਿਯੋਸਾਪੇਤੀਤਿ ਮਹਾਮਤ੍ਤਿਕਾਯ ਵਾ ਥੁਸਮਤ੍ਤਿਕਾਯ ਵਾ ਯਾਯ ਕਤਂ ਪਰਿਯੋਸਿਤਭਾਵਂ ਪਾਪੇਤੁਕਾਮੋ ਹੋਤਿ, ਤਾਯ ਅਵਸਾਨਪਿਣ੍ਡਂ ਦੇਨ੍ਤੋ ਪਰਿਯੋਸਾਪੇਤਿ.
ਪਰੇਹਿ ਪਰਿਯੋਸਾਪੇਤੀਤਿ ਅਤ੍ਤਨੋਵ ਅਤ੍ਥਾਯ ਪਰੇਹਿ ਪਰਿਯੋਸਾਪੇਤਿ. ਅਤ੍ਤਨਾ ਵਾ ਹਿ ਵਿਪ੍ਪਕਤਾ ਹੋਤੁ ਪਰੇਹਿ ਵਾ ਉਭਯੇਹਿ ਵਾ, ਤਂ ਚੇ ਅਤ੍ਤਨੋ ਅਤ੍ਥਾਯ ਅਤ੍ਤਨਾ ਵਾ ਪਰਿਯੋਸਾਪੇਤਿ, ਪਰੇਹਿ ਵਾ ਪਰਿਯੋਸਾਪੇਤਿ, ਅਤ੍ਤਨਾ ਚ ਪਰੇਹਿ ਚਾਤਿ ਯੁਗਨਦ੍ਧਂ ਵਾ ਪਰਿਯੋਸਾਪੇਤਿ, ਸਙ੍ਘਾਦਿਸੇਸੋਯੇਵਾਤਿ ਅਯਮੇਤ੍ਥ ਵਿਨਿਚ੍ਛਯੋ.
ਕੁਰੁਨ੍ਦਿਯਂਪਨ ਵੁਤ੍ਤਂ – ‘‘ਦ੍ਵੇ ਤਯੋ ਭਿਕ੍ਖੂ ‘ਏਕਤੋ ਵਸਿਸ੍ਸਾਮਾ’ਤਿ ਕਰੋਨ੍ਤਿ, ਰਕ੍ਖਤਿ ਤਾਵ, ਅਵਿਭਤ੍ਤਤ੍ਤਾ ਅਨਾਪਤ੍ਤਿ. ‘ਇਦਂ ਠਾਨਂ ਤਵ, ਇਦਂ ਮਮਾ’ਤਿ ਵਿਭਜਿਤ੍ਵਾ ਕਰੋਨ੍ਤਿ ਆਪਤ੍ਤਿ. ਸਾਮਣੇਰੋ ਚ ਭਿਕ੍ਖੁ ਚ ਏਕਤੋ ਕਰੋਨ੍ਤਿ, ਯਾਵ ਅਵਿਭਤ੍ਤਾ ਤਾਵ ਰਕ੍ਖਤਿ. ਪੁਰਿਮਨਯੇਨ ਵਿਭਜਿਤ੍ਵਾ ਕਰੋਨ੍ਤਿ, ਭਿਕ੍ਖੁਸ੍ਸ ਆਪਤ੍ਤੀ’’ਤਿ.
੩੬੪. ਅਨਾਪਤ੍ਤਿ ਲੇਣੇਤਿਆਦੀਸੁ ਲੇਣਂ ਮਹਨ੍ਤਮ੍ਪਿ ਕਰੋਨ੍ਤਸ੍ਸ ਅਨਾਪਤ੍ਤਿ. ਨ ਹੇਤ੍ਥ ਲੇਪੋ ਘਟੀਯਤਿ. ਗੁਹਮ੍ਪਿ ਇਟ੍ਠਕਾਗੁਹਂ ਵਾ ਸਿਲਾਗੁਹਂ ਵਾ ਦਾਰੁਗੁਹਂ ਵਾ ਭੂਮਿਗੁਹਂ ਵਾ ਮਹਨ੍ਤਮ੍ਪਿ ਕਰੋਨ੍ਤਸ੍ਸ ਅਨਾਪਤ੍ਤਿ.
ਤਿਣਕੁਟਿਕਾਯਾਤਿ ਸਤ੍ਤਭੂਮਿਕੋਪਿ ਪਾਸਾਦੋ ਤਿਣਪਣ੍ਣਚ੍ਛਦਨੋ ‘‘ਤਿਣਕੁਟਿਕਾ’’ਤਿ ਵੁਚ੍ਚਤਿ. ਅਟ੍ਠਕਥਾਸੁ ਪਨ ਕੁਕ੍ਕੁਟਚ੍ਛਿਕਗੇਹਨ੍ਤਿ ਛਦਨਂ ਦਣ੍ਡਕੇਹਿ ਜਾਲਬਦ੍ਧਂ ਕਤ੍ਵਾ ਤਿਣੇਹਿ ਵਾ ਪਣ੍ਣੇਹਿ ਵਾ ਛਾਦਿਤਕੁਟਿਕਾਵ ਵੁਤ੍ਤਾ, ਤਤ੍ਥ ਅਨਾਪਤ੍ਤਿ. ਮਹਨ੍ਤਮ੍ਪਿ ਤਿਣਚ੍ਛਦਨਗੇਹਂ ਕਾਤੁਂ ਵਟ੍ਟਤਿ, ਉਲ੍ਲਿਤ੍ਤਾਦਿਭਾਵੋ ਏਵ ਹਿ ਕੁਟਿਯਾ ਲਕ੍ਖਣਂ, ਸੋ ਚ ਛਦਨਮੇਵ ਸਨ੍ਧਾਯ ਵੁਤ੍ਤੋਤਿ ਵੇਦਿਤਬ੍ਬੋ. ਚਙ੍ਕਮਨਸਾਲਾਯਂ ਤਿਣਚੁਣ੍ਣਂ ਪਰਿਪਤਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਓਗੁਮ੍ਫੇਤ੍ਵਾ ਉਲ੍ਲਿਤ੍ਤਾਵਲਿਤ੍ਤਂ ਕਾਤੁ’’ਨ੍ਤਿਆਦੀਨਿ (ਚੂਲ਼ਵ. ੨੬੦) ਚੇਤ੍ਥ ਸਾਧਕਾਨਿ, ਤਸ੍ਮਾ ਉਭਤੋ ਪਕ੍ਖਂ ਵਾ ਕੂਟਬਦ੍ਧਂ ਵਾ ਵਟ੍ਟਂ ਵਾ ਚਤੁਰਸ੍ਸਂ ਵਾ ਯਂ ‘‘ਇਮਂ ਏਤਸ੍ਸ ਗੇਹਸ੍ਸ ਛਦਨ’’ਨ੍ਤਿ ਛਦਨਸਙ੍ਖੇਪੇਨ ਕਤਂ ਹੋਤਿ, ਤਸ੍ਸ ਭਿਤ੍ਤਿਲੇਪੇਨ ਸਦ੍ਧਿਂ ਲੇਪੇ ਘਟਿਤੇ ਆਪਤ੍ਤਿ. ਸਚੇ ਪਨ ਉਲ੍ਲਿਤ੍ਤਾਵਲਿਤ੍ਤਚ੍ਛਦਨਸ੍ਸ ਗੇਹਸ੍ਸ ਲੇਪਰਕ੍ਖਣਤ੍ਥਂ ਉਪਰਿ ਤਿਣੇਨ ਛਾਦੇਨ੍ਤਿ, ਏਤ੍ਤਾਵਤਾ ਤਿਣਕੁਟਿ ਨਾਮ ਨ ਹੋਤਿ. ਕਿਂ ਪਨੇਤ੍ਥ ਅਦੇਸਿਤਵਤ੍ਥੁਕਪ੍ਪਮਾਣਾਤਿਕ੍ਕਨ੍ਤਪਚ੍ਚਯਾਵ ਅਨਾਪਤ੍ਤਿ, ਉਦਾਹੁ ਸਾਰਮ੍ਭਅਪਰਿਕ੍ਕਮਨਪਚ੍ਚਯਾਪੀਤਿ ਸਬ੍ਬਤ੍ਥਾਪਿ ਅਨਾਪਤ੍ਤਿ. ਤਥਾ ਹਿ ਤਾਦਿਸਂ ਕੁਟਿਂ ਸਨ੍ਧਾਯ ਪਰਿਵਾਰੇ ਵੁਤ੍ਤਂ –
‘‘ਭਿਕ੍ਖੁ ਸਞ੍ਞਾਚਿਕਾਯ ਕੁਟਿਂ ਕਰੋਤਿ;
ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ;
ਸਾਰਮ੍ਭਂ ਅਪਰਿਕ੍ਕਮਨਂ ਅਨਾਪਤ੍ਤਿ;
ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੭੯);
ਅਞ੍ਞਸ੍ਸਤ੍ਥਾਯਾਤਿ ਕੁਟਿਲਕ੍ਖਣਪ੍ਪਤ੍ਤਮ੍ਪਿ ਕੁਟਿਂ ਅਞ੍ਞਸ੍ਸ ਉਪਜ੍ਝਾਯਸ੍ਸ ਵਾ ਆਚਰਿਯਸ੍ਸ ਵਾ ਸਙ੍ਘਸ੍ਸ ਵਾ ਅਤ੍ਥਾਯ ਕਰੋਨ੍ਤਸ੍ਸ ਅਨਾਪਤ੍ਤਿ. ਯਂ ਪਨ ‘‘ਆਪਤ੍ਤਿ ਕਾਰੁਕਾਨਂ ਤਿਣ੍ਣਂ ਦੁਕ੍ਕਟਾਨ’’ਨ੍ਤਿਆਦਿ ਪਾਲ਼ਿਯਂ ਵੁਤ੍ਤਂ, ਤਂ ਯਥਾਸਮਾਦਿਟ੍ਠਾਯ ਅਕਰਣਪਚ੍ਚਯਾ ਵੁਤ੍ਤਂ.
ਵਾਸਾਗਾਰਂ ਠਪੇਤ੍ਵਾ ਸਬ੍ਬਤ੍ਥਾਤਿ ਅਤ੍ਤਨੋ ਵਸਨਤ੍ਥਾਯ ਅਗਾਰਂ ਠਪੇਤ੍ਵਾ ਅਞ੍ਞਂ ਉਪੋਸਥਾਗਾਰਂ ਵਾ ਜਨ੍ਤਾਘਰਂ ਵਾ ਭੋਜਨਸਾਲਾ ਵਾ ਅਗ੍ਗਿਸਾਲਾ ਵਾ ਭਵਿਸ੍ਸਤੀਤਿ ਕਾਰੇਤਿ, ਸਬ੍ਬਤ੍ਥ ਅਨਾਪਤ੍ਤਿ. ਸਚੇਪਿਸ੍ਸ ਹੋਤਿ ‘‘ਉਪੋਸਥਾਗਾਰਞ੍ਚ ਭਵਿਸ੍ਸਤਿ, ਅਹਞ੍ਚ ਵਸਿਸ੍ਸਾਮਿ ਜਨ੍ਤਾਘਰਞ੍ਚ ਭੋਜਨਸਾਲਾ ਚ ਅਗ੍ਗਿਸਾਲਾ ਚ ਭਵਿਸ੍ਸਤਿ, ਅਹਞ੍ਚ ਵਸਿਸ੍ਸਾਮੀ’’ਤਿ ਕਾਰਿਤੇਪਿ ਆਨਾਪਤ੍ਤਿਯੇਵ. ਮਹਾਪਚ੍ਚਰਿਯਂ ਪਨ ‘‘ਅਨਾਪਤ੍ਤੀ’’ਤਿ ਵਤ੍ਵਾ ‘‘ਅਤ੍ਤਨੋ ਵਾਸਾਗਾਰਤ੍ਥਾਯ ਕਰੋਨ੍ਤਸ੍ਸੇਵ ਆਪਤ੍ਤੀ’’ਤਿ ਵੁਤ੍ਤਂ. ਉਮ੍ਮਤ੍ਤਕਸ੍ਸ ਆਦਿਕਮ੍ਮਿਕਾਨਞ੍ਚ ਆਲ਼ਵਕਾਨਂ ਭਿਕ੍ਖੂਨਂ ਅਨਾਪਤ੍ਤਿ.
ਸਮੁਟ੍ਠਾਨਾਦੀਸੁ ਛਸਮੁਟ੍ਠਾਨਂ ਕਿਰਿਯਞ੍ਚ ਕਿਰਿਯਾਕਿਰਿਯਞ੍ਚ, ਇਦਞ੍ਹਿ ਵਤ੍ਥੁਂ ਦੇਸਾਪੇਤ੍ਵਾ ਪਮਾਣਾਤਿਕ੍ਕਨ੍ਤਂ ਕਰੋਤੋ ਕਿਰਿਯਤੋ ਸਮੁਟ੍ਠਾਤਿ, ਵਤ੍ਥੁਂ ਅਦੇਸਾਪੇਤ੍ਵਾ ਕਰੋਤੋ ਕਿਰਿਯਾਕਿਰਿਯਤੋ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.
ਕੁਟਿਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.