੫. ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ

੨੯੬. ਤੇਨ ਸਮਯੇਨ ਬੁਦ੍ਧੋ ਭਗਵਾਤਿ ਸਞ੍ਚਰਿਤ੍ਤਂ. ਤਤ੍ਥ ਪਣ੍ਡਿਤਾਤਿ ਪਣ੍ਡਿਚ੍ਚੇਨ ਸਮਨ੍ਨਾਗਤਾ ਗਤਿਮਨ੍ਤਾ. ਬ੍ਯਤ੍ਤਾਤਿ ਵੇਯ੍ਯਤ੍ਤਿਯੇਨ ਸਮਨ੍ਨਾਗਤਾ, ਉਪਾਯੇਨ ਸਮਨ੍ਨਾਗਤਾ ਉਪਾਯਞ੍ਞੂ ਵਿਸਾਰਦਾ. ਮੇਧਾਵਿਨੀਤਿ ਮੇਧਾਯ ਸਮਨ੍ਨਾਗਤਾ, ਦਿਟ੍ਠਂ ਦਿਟ੍ਠਂ ਕਰੋਤਿ. ਦਕ੍ਖਾਤਿ ਛੇਕਾ. ਅਨਲਸਾਤਿ ਉਟ੍ਠਾਨਵੀਰਿਯਸਮ੍ਪਨ੍ਨਾ. ਛਨ੍ਨਾਤਿ ਅਨੁਚ੍ਛਵਿਕਾ.

ਕਿਸ੍ਮਿਂ ਵਿਯਾਤਿ ਕਿਚ੍ਛਂ ਵਿਯ ਕਿਲੇਸੋ ਵਿਯ, ਹਿਰਿ ਵਿਯ ਅਮ੍ਹਾਕਂ ਹੋਤੀਤਿ ਅਧਿਪ੍ਪਾਯੋ. ਕੁਮਾਰਿਕਾਯ ਵਤ੍ਤੁਨ੍ਤਿ ‘‘ਇਮਂ ਤੁਮ੍ਹੇ ਗਣ੍ਹਥਾ’’ਤਿ ਕੁਮਾਰਿਕਾਯ ਕਾਰਣਾ ਵਤ੍ਤੁਂ.

ਆਵਾਹਾਦੀਸੁ ਆਵਾਹੋਤਿ ਦਾਰਕਸ੍ਸ ਪਰਕੁਲਤੋ ਦਾਰਿਕਾਯ ਆਹਰਣਂ. ਵਿਵਾਹੋਤਿ ਅਤ੍ਤਨੋ ਦਾਰਿਕਾਯ ਪਰਕੁਲਪੇਸਨਂ. ਵਾਰੇਯ੍ਯਨ੍ਤਿ ‘‘ਦੇਥ ਨੋ ਦਾਰਕਸ੍ਸ ਦਾਰਿਕ’’ਨ੍ਤਿ ਯਾਚਨਂ, ਦਿਵਸਨਕ੍ਖਤ੍ਤਮੁਹੁਤ੍ਤਪਰਿਚ੍ਛੇਦਕਰਣਂ ਵਾ.

੨੯੭. ਪੁਰਾਣਗਣਕਿਯਾਤਿ ਏਕਸ੍ਸ ਗਣਕਸ੍ਸ ਭਰਿਯਾਯ, ਸਾ ਤਸ੍ਮਿਂ ਜੀਵਮਾਨੇ ਗਣਕੀਤਿ ਪਞ੍ਞਾਯਿਤ੍ਥ, ਮਤੇ ਪਨ ਪੁਰਾਣਗਣਕੀਤਿ ਸਙ੍ਖਂ ਗਤਾ. ਤਿਰੋਗਾਮੋਤਿ ਬਹਿਗਾਮੋ, ਅਞ੍ਞੋ ਗਾਮੋਤਿ ਅਧਿਪ੍ਪਾਯੋ. ਮਨੁਸ੍ਸਾਤਿ ਉਦਾਯਿਸ੍ਸ ਇਮਂ ਸਞ੍ਚਰਿਤ੍ਤਕਮ੍ਮੇ ਯੁਤ੍ਤਪਯੁਤ੍ਤਭਾਵਂ ਜਾਨਨਕਮਨੁਸ੍ਸਾ.

ਸੁਣਿਸਭੋਗੇਨਾਤਿ ਯੇਨ ਭੋਗੇਨ ਸੁਣਿਸਾ ਭੁਞ੍ਜਿਤਬ੍ਬਾ ਹੋਤਿ ਰਨ੍ਧਾਪਨਪਚਾਪਨਪਅਵੇਸਨਾਦਿਨਾ, ਤੇਨ ਭੁਞ੍ਜਿਂਸੁ. ਤਤੋ ਅਪਰੇਨ ਦਾਸਿਭੋਗੇਨਾਤਿ ਮਾਸਾਤਿਕ੍ਕਮੇ ਯੇਨ ਭੋਗੇਨ ਦਾਸੀ ਭੁਞ੍ਜਿਤਬ੍ਬਾ ਹੋਤਿ ਖੇਤ੍ਤਕਮ੍ਮਕਚਵਰਛਡ੍ਡਨਉਦਕਾਹਰਣਾਦਿਨਾ, ਤੇਨ ਭੁਞ੍ਜਿਂਸੁ. ਦੁਗ੍ਗਤਾਤਿ ਦਲਿਦ੍ਦਾ, ਯਤ੍ਥ ਵਾ ਗਤਾ ਦੁਗ੍ਗਤਾ ਹੋਤਿ ਤਾਦਿਸਂ ਕੁਲਂ ਗਤਾ. ਮਾਯ੍ਯੋ ਇਮਂ ਕੁਮਾਰਿਕਨ੍ਤਿ ਮਾ ਅਯ੍ਯੋ ਇਮਂ ਕੁਮਾਰਿਕਂ. ਆਹਾਰੂਪਹਾਰੋਤਿ ਆਹਾਰੋ ਚ ਉਪਹਾਰੋ ਚ ਗਹਣਞ੍ਚ ਦਾਨਞ੍ਚ, ਨ ਅਮ੍ਹੇਹਿ ਕਿਞ੍ਚਿ ਆਹਟਂ ਨ ਉਪਾਹਟਂ ਤਯਾ ਸਦ੍ਧਿਂ ਕਯਵਿਕ੍ਕਯੋ ਵੋਹਾਰੋ ਅਮ੍ਹਾਕਂ ਨਤ੍ਥੀਤਿ ਦੀਪੇਨ੍ਤਿ. ਸਮਣੇਨ ਭਵਿਤਬ੍ਬਂ ਅਬ੍ਯਾਵਟੇਨ, ਸਮਣੋ ਅਸ੍ਸ ਸੁਸਮਣੋਤਿ ਸਮਣੇਨ ਨਾਮ ਈਦਿਸੇਸੁ ਕਮ੍ਮੇਸੁ ਅਬ੍ਯਾਵਟੇਨ ਅਬ੍ਯਾਪਾਰੇਨ ਭਵਿਤਬ੍ਬਂ, ਏਵਂ ਭਵਨ੍ਤੋ ਹਿ ਸਮਣੋ ਸੁਸਮਣੋ ਅਸ੍ਸਾਤਿ, ਏਵਂ ਨਂ ਅਪਸਾਦੇਤ੍ਵਾ ‘‘ਗਚ੍ਛ ਤ੍ਵਂ ਨ ਮਯਂ ਤਂ ਜਾਨਾਮਾ’’ਤਿ ਆਹਂਸੁ.

੨੯੮. ਸਜ੍ਜਿਤੋਤਿ ਸਬ੍ਬੂਪਕਰਣਸਮ੍ਪਨ੍ਨੋ ਮਣ੍ਡਿਤਪਸਾਧਿਤੋ ਵਾ.

੩੦੦. ਧੁਤ੍ਤਾਤਿ ਇਤ੍ਥਿਧੁਤ੍ਤਾ. ਪਰਿਚਾਰੇਨ੍ਤਾਤਿ ਮਨਾਪਿਯੇਸੁ ਰੂਪਾਦੀਸੁ ਇਤੋ ਚਿਤੋ ਚ ਸਮਨ੍ਤਾ ਇਨ੍ਦ੍ਰਿਯਾਨਿ ਚਾਰੇਨ੍ਤਾ, ਕੀਲ਼ਨ੍ਤਾ ਅਭਿਰਮਨ੍ਤਾਤਿ ਵੁਤ੍ਤਂ ਹੋਤਿ. ਅਬ੍ਭੁਤਮਕਂਸੂਤਿ ਯਦਿ ਕਰਿਸ੍ਸਤਿ ਤ੍ਵਂ ਏਤ੍ਤਕਂ ਜਿਤੋ, ਯਦਿ ਨ ਕਰਿਸ੍ਸਤਿ ਅਹਂ ਏਤ੍ਤਕਨ੍ਤਿ ਪਣਮਕਂਸੁ. ਭਿਕ੍ਖੂਨਂ ਪਨ ਅਬ੍ਭੁਤਂ ਕਾਤੁਂ ਨ ਵਟ੍ਟਤਿ. ਯੋ ਕਰੋਤਿ ਪਰਾਜਿਤੇਨ ਦਾਤਬ੍ਬਨ੍ਤਿ ਮਹਾਪਚ੍ਚਰਿਯਂ ਵੁਤ੍ਤਂ.

ਕਥਞ੍ਹਿ ਨਾਮ ਅਯ੍ਯੋ ਉਦਾਯੀ ਤਙ੍ਖਣਿਕਨ੍ਤਿ ਏਤ੍ਥ ਤਙ੍ਖਣੋਤਿ ਅਚਿਰਕਾਲੋ ਵੁਚ੍ਚਤਿ. ਤਙ੍ਖਣਿਕਨ੍ਤਿ ਅਚਿਰਕਾਲਾਧਿਕਾਰਿਕਂ.

੩੦੧. ਸਞ੍ਚਰਿਤ੍ਤਂ ਸਮਾਪਜ੍ਜੇਯ੍ਯਾਤਿ ਸਞ੍ਚਰਣਭਾਵਂ ਸਮਾਪਜ੍ਜੇਯ੍ਯ. ਯਸ੍ਮਾ ਪਨ ਤਂ ਸਮਾਪਜ੍ਜਨ੍ਤੇਨ ਕੇਨਚਿ ਪੇਸਿਤੇਨ ਕਤ੍ਥਚਿ ਗਨ੍ਤਬ੍ਬਂ ਹੋਤਿ, ਪਰਤੋ ਚ ‘‘ਇਤ੍ਥਿਯਾ ਵਾ ਪੁਰਿਸਮਤਿ’’ਨ੍ਤਿ ਆਦਿਵਚਨਤੋ ਇਧ ਇਤ੍ਥਿਪੁਰਿਸਾ ਅਧਿਪ੍ਪੇਤਾ, ਤਸ੍ਮਾ ਤਮਤ੍ਥਂ ਦਸ੍ਸੇਤੁਂ ‘‘ਇਤ੍ਥਿਯਾ ਵਾ ਪਹਿਤੋ ਪੁਰਿਸਸ੍ਸ ਸਨ੍ਤਿਕੇ ਗਚ੍ਛਤਿ, ਪੁਰਿਸੇਨ ਵਾ ਪਹਿਤੋ ਇਤ੍ਥਿਯਾ ਸਨ੍ਤਿਕੇ ਗਚ੍ਛਤੀ’’ਤਿ ਏਵਮਸ੍ਸ ਪਦਭਾਜਨਂ ਵੁਤ੍ਤਂ. ਇਤ੍ਥਿਯਾ ਵਾ ਪੁਰਿਸਮਤਿਂ ਪੁਰਿਸਸ੍ਸ ਵਾ ਇਤ੍ਥਿਮਤਿਨ੍ਤਿ ਏਤ੍ਥ ਆਰੋਚੇਯ੍ਯਾਤਿ ਪਾਠਸੇਸੋ ਦਟ੍ਠਬ੍ਬੋ, ਤੇਨੇਵਸ੍ਸ ਪਦਭਾਜਨੇ ‘‘ਪੁਰਿਸਸ੍ਸ ਮਤਿਂ ਇਤ੍ਥਿਯਾ ਆਰੋਚੇਤਿ, ਇਤ੍ਥਿਯਾ ਮਤਿਂ ਪੁਰਿਸਸ੍ਸ ਆਰੋਚੇਤੀ’’ਤਿ ਵੁਤ੍ਤਂ.

ਇਦਾਨਿ ਯਦਤ੍ਥਂ ਤਂ ਤੇਸਂ ਮਤਿਂ ਅਧਿਪ੍ਪਾਯਂ ਅਜ੍ਝਾਸਯਂ ਛਨ੍ਦਂ ਰੁਚਿਂ ਆਰੋਚੇਤਿ, ਤਂ ਦਸ੍ਸੇਨ੍ਤੋ ‘‘ਜਾਯਤ੍ਤਨੇ ਵਾ ਜਾਰਤ੍ਤਨੇ ਵਾ’’ਤਿਆਦਿਮਾਹ. ਤਤ੍ਥ ਜਾਯਤ੍ਤਨੇਤਿ ਜਾਯਾਭਾਵੇ. ਜਾਰਤ੍ਤਨੇਤਿ ਜਾਰਭਾਵੇ. ਪੁਰਿਸਸ੍ਸ ਹਿ ਮਤਿਂ ਇਤ੍ਥਿਯਾ ਆਰੋਚੇਨ੍ਤੋ ਜਾਯਤ੍ਤਨੇ ਆਰੋਚੇਤਿ, ਇਤ੍ਥਿਯਾ ਮਤਿਂ ਪੁਰਿਸਸ੍ਸ ਆਰੋਚੇਨ੍ਤੋ ਜਾਰਤ੍ਤਨੇ ਆਰੋਚੇਤਿ; ਅਪਿਚ ਪੁਰਿਸਸ੍ਸੇਵ ਮਤਿਂ ਇਤ੍ਥਿਯਾ ਆਰੋਚੇਨ੍ਤੋ ਜਾਯਤ੍ਤਨੇ ਵਾ ਆਰੋਚੇਤਿ ਨਿਬਦ੍ਧਭਰਿਯਾਭਾਵੇ, ਜਾਰਤ੍ਤਨੇ ਵਾ ਮਿਚ੍ਛਾਚਾਰਭਾਵੇ. ਯਸ੍ਮਾ ਪਨੇਤਂ ਆਰੋਚੇਨ੍ਤੇਨ ‘‘ਤ੍ਵਂ ਕਿਰਸ੍ਸ ਜਾਯਾ ਭਵਿਸ੍ਸਸੀ’’ਤਿਆਦਿ ਵਤ੍ਤਬ੍ਬਂ ਹੋਤਿ, ਤਸ੍ਮਾ ਤਂ ਵਤ੍ਤਬ੍ਬਤਾਕਾਰਂ ਦਸ੍ਸੇਤੁਂ ‘‘ਜਾਯਤ੍ਤਨੇ ਵਾਤਿ ਜਾਯਾ ਭਵਿਸ੍ਸਸਿ, ਜਾਰਤ੍ਤਨੇ ਵਾਤਿ ਜਾਰੀ ਭਵਿਸ੍ਸਸੀ’’ਤਿ ਅਸ੍ਸ ਪਦਭਾਜਨਂ ਵੁਤ੍ਤਂ. ਏਤੇਨੇਵ ਚ ਉਪਾਯੇਨ ਇਤ੍ਥਿਯਾ ਮਤਿਂ ਪੁਰਿਸਸ੍ਸ ਆਰੋਚਨੇਪਿ ਪਤਿ ਭਵਿਸ੍ਸਸਿ, ਸਾਮਿਕੋ ਭਵਿਸ੍ਸਸਿ, ਜਾਰੋ ਭਵਿਸ੍ਸਸੀਤਿ ਵਤ੍ਤਬ੍ਬਤਾਕਾਰੋ ਵੇਦਿਤਬ੍ਬੋ.

ਅਨ੍ਤਮਸੋ ਤਙ੍ਖਣਿਕਾਯਪੀਤਿ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਯਾ ਅਯਂ ਤਙ੍ਖਣੇ ਮੁਹੁਤ੍ਤਮਤ੍ਤੇ ਪਟਿਸਂਵਸਿਤਬ੍ਬਤੋ ਤਙ੍ਖਣਿਕਾਤਿ ਵੁਚ੍ਚਤਿ, ਮੁਹੁਤ੍ਤਿਕਾਤਿ ਅਤ੍ਥੋ. ਤਸ੍ਸਾਪਿ ‘‘ਮੁਹੁਤ੍ਤਿਕਾ ਭਵਿਸ੍ਸਸੀ’’ਤਿ ਏਵਂ ਪੁਰਿਸਮਤਿਂ ਆਰੋਚੇਨ੍ਤਸ੍ਸ ਸਙ੍ਘਾਦਿਸੇਸੋ. ਏਤੇਨੇਵੁਪਾਯੇਨ ‘‘ਮੁਹੁਤ੍ਤਿਕੋ ਭਵਿਸ੍ਸਸੀ’’ਤਿ ਏਵਂ ਪੁਰਿਸਸ੍ਸ ਇਤ੍ਥਿਮਤਿਂ ਆਰੋਚੇਨ੍ਤੋਪਿ ਸਙ੍ਘਾਦਿਸੇਸਂ ਆਪਜ੍ਜਤੀਤਿ ਵੇਦਿਤਬ੍ਬੋ.

੩੦੩. ਇਦਾਨਿ ‘‘ਇਤ੍ਥਿਯਾ ਵਾ ਪੁਰਿਸਮਤਿ’’ਨ੍ਤਿ ਏਤ੍ਥ ਅਧਿਪ੍ਪੇਤਾ ਇਤ੍ਥਿਯੋ ਪਭੇਦਤੋ ਦਸ੍ਸੇਤ੍ਵਾ ਤਾਸੁ ਸਞ੍ਚਰਿਤ੍ਤਵਸੇਨ ਆਪਤ੍ਤਿਭੇਦਂ ਦਸ੍ਸੇਤੁਂ ‘‘ਦਸ ਇਤ੍ਥਿਯੋ’’ਤਿਆਦਿਮਾਹ. ਤਤ੍ਥ ਮਾਤੁਰਕ੍ਖਿਤਾਤਿ ਮਾਤਰਾ ਰਕ੍ਖਿਤਾ. ਯਥਾ ਪੁਰਿਸੇਨ ਸਂਵਾਸਂ ਨ ਕਪ੍ਪੇਤਿ, ਏਵਂ ਮਾਤਰਾ ਰਕ੍ਖਿਤਾ, ਤੇਨਸ੍ਸ ਪਦਭਾਜਨੇਪਿ ਵੁਤ੍ਤਂ – ‘‘ਮਾਤਾ ਰਕ੍ਖਤਿ ਗੋਪੇਤਿ ਇਸ੍ਸਰਿਯਂ ਕਾਰੇਤਿ ਵਸਂ ਵਤ੍ਤੇਤੀ’’ਤਿ. ਤਤ੍ਥ ਰਕ੍ਖਤੀਤਿ ਕਤ੍ਥਚਿ ਗਨ੍ਤੁਂ ਨ ਦੇਤਿ. ਗੋਪੇਤੀਤਿ ਯਥਾ ਅਞ੍ਞੇ ਨ ਪਸ੍ਸਨ੍ਤਿ, ਏਵਂ ਗੁਤ੍ਤਟ੍ਠਾਨੇ ਠਪੇਤਿ. ਇਸ੍ਸਰਿਯਂ ਕਾਰੇਤੀਤਿ ਸੇਰਿਵਿਹਾਰਮਸ੍ਸਾ ਨਿਸੇਧੇਨ੍ਤੀ ਅਭਿਭਵਿਤ੍ਵਾ ਪਵਤ੍ਤਤਿ. ਵਸਂ ਵਤ੍ਤੇਤੀਤਿ ‘‘ਇਦਂ ਕਰੋਹਿ, ਇਦਂ ਮਾ ਅਕਾਸੀ’’ਤਿ ਏਵਂ ਅਤ੍ਤਨੋ ਵਸਂ ਤਸ੍ਸਾ ਉਪਰਿ ਵਤ੍ਤੇਤਿ. ਏਤੇਨੁਪਾਯੇਨ ਪਿਤੁਰਕ੍ਖਿਤਾਦਯੋਪਿ ਞਾਤਬ੍ਬਾ. ਗੋਤ੍ਤਂ ਵਾ ਧਮ੍ਮੋ ਵਾ ਨ ਰਕ੍ਖਤਿ, ਸਗੋਤ੍ਤੇਹਿ ਪਨ ਸਹਧਮ੍ਮਿਕੇਹਿ ਚ ਏਕਂ ਸਤ੍ਥਾਰਂ ਉਦ੍ਦਿਸ੍ਸ ਪਬ੍ਬਜਿਤੇਹਿ ਏਕਗਣਪਰਿਯਾਪਨ੍ਨੇਹਿ ਚ ਰਕ੍ਖਿਤਾ ‘‘ਗੋਤ੍ਤਰਕ੍ਖਿਤਾ ਧਮ੍ਮਰਕ੍ਖਿਤਾ’’ਤਿ ਵੁਚ੍ਚਤਿ, ਤਸ੍ਮਾ ਤੇਸਂ ਪਦਾਨਂ ‘‘ਸਗੋਤ੍ਤਾ ਰਕ੍ਖਨ੍ਤੀ’’ਤਿਆਦਿਨਾ ਨਯੇਨ ਪਦਭਾਜਨਂ ਵੁਤ੍ਤਂ.

ਸਹ ਆਰਕ੍ਖੇਨਾਤਿ ਸਾਰਕ੍ਖਾ. ਸਹ ਪਰਿਦਣ੍ਡੇਨਾਤਿ ਸਪਰਿਦਣ੍ਡਾ. ਤਾਸਂ ਨਿਦ੍ਦੇਸਾ ਪਾਕਟਾਵ. ਇਮਾਸੁ ਦਸਸੁ ਪਚ੍ਛਿਮਾਨਂ ਦ੍ਵਿਨ੍ਨਮੇਵ ਪੁਰਿਸਨ੍ਤਰਂ ਗਚ੍ਛਨ੍ਤੀਨਂ ਮਿਚ੍ਛਾਚਾਰੋ ਹੋਤਿ, ਨ ਇਤਰਾਸਂ.

ਧਨਕ੍ਕੀਤਾਦੀਸੁ ਅਪ੍ਪੇਨ ਵਾ ਬਹੁਨਾ ਵਾ ਧਨੇਨ ਕੀਤਾ ਧਨਕ੍ਕੀਤਾ. ਯਸ੍ਮਾ ਪਨ ਸਾ ਨ ਕੀਤਮਤ੍ਤਾ ਏਵ ਸਂਵਾਸਤ੍ਥਾਯ ਪਨ ਕੀਤਤ੍ਤਾ ਭਰਿਯਾ, ਤਸ੍ਮਾਸ੍ਸ ਨਿਦ੍ਦੇਸੇ ਧਨੇਨ ਕਿਣਿਤ੍ਵਾ ਵਾਸੇਤੀਤਿ ਵੁਤ੍ਤਂ.

ਛਨ੍ਦੇਨ ਅਤ੍ਤਨੋ ਰੁਚਿਯਾ ਵਸਤੀਤਿ ਛਨ੍ਦਵਾਸਿਨੀ. ਯਸ੍ਮਾ ਪਨ ਸਾ ਨ ਅਤ੍ਤਨੋ ਛਨ੍ਦਮਤ੍ਤੇਨੇਵ ਭਰਿਯਾ ਹੋਤਿ ਪੁਰਿਸੇਨ ਪਨ ਸਮ੍ਪਟਿਚ੍ਛਿਤਤ੍ਤਾ, ਤਸ੍ਮਾਸ੍ਸ ਨਿਦ੍ਦੇਸੇ ‘‘ਪਿਯੋ ਪਿਯਂ ਵਾਸੇਤੀ’’ਤਿ ਵੁਤ੍ਤਂ.

ਭੋਗੇਨ ਵਸਤੀਤਿ ਭੋਗਵਾਸਿਨੀ. ਉਦੁਕ੍ਖਲਮੁਸਲਾਦਿਘਰੂਪਕਰਣਂ ਲਭਿਤ੍ਵਾ ਭਰਿਯਾਭਾਵਂ ਗਚ੍ਛਨ੍ਤਿਯਾ ਜਨਪਦਿਤ੍ਥਿਯਾ ਏਤਂ ਅਧਿਵਚਨਂ.

ਪਟੇਨ ਵਸਤੀਤਿ ਪਟਵਾਸਿਨੀ. ਨਿਵਾਸਨਮਤ੍ਤਮ੍ਪਿ ਪਾਵੁਰਣਮਤ੍ਤਮ੍ਪਿ ਲਭਿਤ੍ਵਾ ਭਰਿਯਾਭਾਵਂ ਉਪਗਚ੍ਛਨ੍ਤਿਯਾ ਦਲਿਦ੍ਦਿਤ੍ਥਿਯਾ ਏਤਂ ਅਧਿਵਚਨਂ.

ਓਦਪਤ੍ਤਕਿਨੀਤਿ ਉਭਿਨ੍ਨਂ ਏਕਿਸ੍ਸਾ ਉਦਕਪਾਤਿਯਾ ਹਤ੍ਥੇ ਓਤਾਰੇਤ੍ਵਾ ‘‘ਇਦਂ ਉਦਕਂ ਵਿਯ ਸਂਸਟ੍ਠਾ ਅਭੇਜ੍ਜਾ ਹੋਥਾ’’ਤਿ ਵਤ੍ਵਾ ਪਰਿਗ੍ਗਹਿਤਾਯ ਵੋਹਾਰਨਾਮਮੇਤਂ, ਨਿਦ੍ਦੇਸੇਪਿਸ੍ਸ ‘‘ਤਾਯ ਸਹ ਉਦਕਪਤ੍ਤਂ ਆਮਸਿਤ੍ਵਾ ਤਂ ਵਾਸੇਤੀ’’ਤਿ ਏਵਮਤ੍ਥੋ ਵੇਦਿਤਬ੍ਬੋ.

ਓਭਟਂ ਓਰੋਪਿਤਂ ਚੁਮ੍ਬਟਮਸ੍ਸਾਤਿ ਓਭਟਚੁਮ੍ਬਟਾ, ਕਟ੍ਠਹਾਰਿਕਾਦੀਨਂ ਅਞ੍ਞਤਰਾ, ਯਸ੍ਸਾ ਸੀਸਤੋ ਚੁਮ੍ਬਟਂ ਓਰੋਪੇਤ੍ਵਾ ਘਰੇ ਵਾਸੇਤਿ, ਤਸ੍ਸਾ ਏਤਂ ਅਧਿਵਚਨਂ.

ਦਾਸੀ ਚਾਤਿ ਅਤ੍ਤਨੋਯੇਵ ਦਾਸੀ ਚ ਹੋਤਿ ਭਰਿਯਾ ਚ.

ਕਮ੍ਮਕਾਰੀ ਨਾਮ ਗੇਹੇ ਭਤਿਯਾ ਕਮ੍ਮਂ ਕਰੋਤਿ, ਤਾਯ ਸਦ੍ਧਿਂ ਕੋਚਿ ਘਰਾਵਾਸਂ ਕਪ੍ਪੇਤਿ ਅਤ੍ਤਨੋ ਭਰਿਯਾਯ ਅਨਤ੍ਥਿਕੋ ਹੁਤ੍ਵਾ. ਅਯਂ ਵੁਚ੍ਚਤਿ ‘‘ਕਮ੍ਮਕਾਰੀ ਚ ਭਰਿਯਾ ਚਾ’’ਤਿ.

ਧਜੇਨ ਆਹਟਾ ਧਜਾਹਟਾ, ਉਸ੍ਸਿਤਦ੍ਧਜਾਯ ਸੇਨਾਯ ਗਨ੍ਤ੍ਵਾ ਪਰਵਿਸਯਂ ਵਿਲੁਮ੍ਪਿਤ੍ਵਾ ਆਨੀਤਾਤਿ ਵੁਤ੍ਤਂ ਹੋਤਿ, ਤਂ ਕੋਚਿ ਭਰਿਯਂ ਕਰੋਤਿ, ਅਯਂ ਧਜਾਹਟਾ ਨਾਮ. ਮੁਹੁਤ੍ਤਿਕਾ ਵੁਤ੍ਤਨਯਾਏਵ, ਏਤਾਸਂ ਦਸਨ੍ਨਮ੍ਪਿ ਪੁਰਿਸਨ੍ਤਰਗਮਨੇ ਮਿਚ੍ਛਾਚਾਰੋ ਹੋਤਿ. ਪੁਰਿਸਾਨਂ ਪਨ ਵੀਸਤਿਯਾਪਿ ਏਤਾਸੁ ਮਿਚ੍ਛਾਚਾਰੋ ਹੋਤਿ, ਭਿਕ੍ਖੁਨੋ ਚ ਸਞ੍ਚਰਿਤ੍ਤਂ ਹੋਤੀਤਿ.

੩੦੫. ਇਦਾਨਿ ਪੁਰਿਸੋ ਭਿਕ੍ਖੁਂ ਪਹਿਣਤੀਤਿਆਦੀਸੁ ਪਟਿਗ੍ਗਣ੍ਹਾਤੀਤਿ ਸੋ ਭਿਕ੍ਖੁ ਤਸ੍ਸ ਪੁਰਿਸਸ੍ਸ ‘‘ਗਚ੍ਛ, ਭਨ੍ਤੇ, ਇਤ੍ਥਨ੍ਨਾਮਂ ਮਾਤੁਰਕ੍ਖਿਤਂ ਬ੍ਰੂਹਿ, ਹੋਹਿ ਕਿਰ ਇਤ੍ਥਨ੍ਨਾਮਸ੍ਸ ਭਰਿਯਾ ਧਨਕ੍ਕੀਤਾ’’ਤਿ ਏਵਂ ਵੁਤ੍ਤਵਚਨਂ ‘‘ਸਾਧੁ ਉਪਾਸਕਾ’’ਤਿ ਵਾ ‘‘ਹੋਤੂ’’ਤਿ ਵਾ ‘‘ਆਰੋਚੇਸ੍ਸਾਮੀ’’ਤਿ ਵਾ ਯੇਨ ਕੇਨਚਿ ਆਕਾਰੇਨ ਵਚੀਭੇਦਂ ਕਤ੍ਵਾ ਵਾ ਸੀਸਕਮ੍ਪਨਾਦੀਹਿ ਵਾ ਸਮ੍ਪਟਿਚ੍ਛਤਿ. ਵੀਮਂਸਤੀਤਿ ਏਵਂ ਪਟਿਗ੍ਗਣ੍ਹਿਤ੍ਵਾ ਤਸ੍ਸਾ ਇਤ੍ਥਿਯਾ ਸਨ੍ਤਿਕਂ ਗਨ੍ਤ੍ਵਾ ਤਂ ਸਾਸਨਂ ਆਰੋਚੇਤਿ. ਪਚ੍ਚਾਹਰਤੀਤਿ ਤੇਨ ਆਰੋਚਿਤੇ ਸਾ ਇਤ੍ਥੀ ‘‘ਸਾਧੂ’’ਤਿ ਸਮ੍ਪਟਿਚ੍ਛਤੁ ਵਾ ਪਟਿਕ੍ਖਿਪਤੁ ਵਾ ਲਜ੍ਜਾਯ ਵਾ ਤੁਣ੍ਹੀ ਹੋਤੁ, ਪੁਨ ਆਗਨ੍ਤ੍ਵਾ ਤਸ੍ਸ ਪੁਰਿਸਸ੍ਸ ਤਂ ਪਵਤ੍ਤਿਂ ਆਰੋਚੇਤਿ.

ਏਤ੍ਤਾਵਤਾ ਇਮਾਯ ਪਟਿਗ੍ਗਹਣਾਰੋਚਨਪਚ੍ਚਾਹਰਣਸਙ੍ਖਾਤਾਯ ਤਿਵਙ੍ਗਸਮ੍ਪਤ੍ਤਿਯਾ ਸਙ੍ਘਾਦਿਸੇਸੋ ਹੋਤਿ. ਸਾ ਪਨ ਤਸ੍ਸ ਭਰਿਯਾ ਹੋਤੁ ਵਾ ਮਾ ਵਾ, ਅਕਾਰਣਮੇਤਂ. ਸਚੇ ਪਨ ਸੋ ਮਾਤੁਰਕ੍ਖਿਤਾਯ ਸਨ੍ਤਿਕਂ ਪੇਸਿਤੋ ਤਂ ਅਦਿਸ੍ਵਾ ਤਸ੍ਸਾ ਮਾਤੁਯਾ ਤਂ ਸਾਸਨਂ ਆਰੋਚੇਤਿ, ਬਹਿਦ੍ਧਾ ਵਿਮਟ੍ਠਂ ਨਾਮ ਹੋਤਿ, ਤਸ੍ਮਾ ਵਿਸਙ੍ਕੇਤਨ੍ਤਿ ਮਹਾਪਦੁਮਤ੍ਥੇਰੋ ਆਹ. ਮਹਾਸੁਮਤ੍ਥੇਰੋ ਪਨ ਮਾਤਾ ਵਾ ਹੋਤੁ ਪਿਤਾ ਵਾ ਅਨ੍ਤਮਸੋ ਗੇਹਦਾਸੀਪਿ ਅਞ੍ਞੋ ਵਾਪਿ ਯੋ ਕੋਚਿ ਤਂ ਕਿਰਿਯਂ ਸਮ੍ਪਾਦੇਸ੍ਸਤਿ, ਤਸ੍ਸ ਵੁਤ੍ਤੇਪਿ ਵਿਮਟ੍ਠਂ ਨਾਮ ਨ ਹੋਤਿ, ਤਿਵਙ੍ਗਸਮ੍ਪਤ੍ਤਿਕਾਲੇ ਆਪਤ੍ਤਿਯੇਵ.

ਨਨੁ ਯਥਾ ‘‘ਬੁਦ੍ਧਂ ਪਚ੍ਚਕ੍ਖਾਮੀ’’ਤਿ ਵਤ੍ਤੁਕਾਮੋ ਵਿਰਜ੍ਝਿਤ੍ਵਾ ‘‘ਧਮ੍ਮਂ ਪਚ੍ਚਕ੍ਖਾਮੀ’’ਤਿ ਵਦੇਯ੍ਯ ਪਚ੍ਚਕ੍ਖਾਤਾਵਸ੍ਸ ਸਿਕ੍ਖਾ. ਯਥਾ ਵਾ ‘‘ਪਠਮਂ ਝਾਨਂ ਸਮਾਪਜ੍ਜਾਮੀ’’ਤਿ ਵਤ੍ਤੁਕਾਮੋ ਵਿਰਜ੍ਝਿਤ੍ਵਾ ‘‘ਦੁਤਿਯਂ ਝਾਨਂ ਸਮਾਪਜ੍ਜਾਮੀ’’ਤਿ ਵਦੇਯ੍ਯ ਆਪਨ੍ਨੋਵਸ੍ਸ ਪਾਰਾਜਿਕਂ. ਏਵਂਸਮ੍ਪਦਮਿਦਨ੍ਤਿ ਆਹ. ਤਂ ਪਨੇਤਂ ‘‘ਪਟਿਗ੍ਗਣ੍ਹਾਤਿ, ਅਨ੍ਤੇਵਾਸਿਂ ਵੀਮਂਸਾਪੇਤ੍ਵਾ ਅਤ੍ਤਨਾ ਪਚ੍ਚਾਹਰਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸਾ’’ਤਿ ਇਮਿਨਾ ਸਮੇਤਿ, ਤਸ੍ਮਾ ਸੁਭਾਸਿਤਂ.

ਯਥਾ ਚ ‘‘ਮਾਤੁਰਕ੍ਖਿਤਂ ਬ੍ਰੂਹੀ’’ਤਿ ਵੁਤ੍ਤਸ੍ਸ ਗਨ੍ਤ੍ਵਾ ਤਸ੍ਸਾ ਆਰੋਚੇਤੁਂ ਸਮਤ੍ਥਾਨਂ ਮਾਤਾਦੀਨਮ੍ਪਿ ਵਦਤੋ ਵਿਸਙ੍ਕੇਤੋ ਨਤ੍ਥਿ, ਏਵਮੇਵ ‘‘ਹੋਹਿ ਕਿਰ ਇਤ੍ਥਨ੍ਨਾਮਸ੍ਸ ਭਰਿਯਾ ਧਨਕ੍ਕੀਤਾ’’ਤਿ ਵਤ੍ਤਬ੍ਬੇ ‘‘ਹੋਹਿ ਕਿਰ ਇਤ੍ਥਨ੍ਨਾਮਸ੍ਸ ਭਰਿਯਾ ਛਨ੍ਦਵਾਸਿਨੀ’’ਤਿ ਏਵਂ ਪਾਲ਼ਿਯਂ ਵੁਤ੍ਤੇਸੁ ਛਨ੍ਦਵਾਸਿਨਿਆਦੀਸੁ ਵਚਨੇਸੁ ਅਞ੍ਞਤਰਵਸੇਨ ਵਾ ਅਵੁਤ੍ਤੇਸੁਪਿ ‘‘ਹੋਹਿ ਕਿਰ ਇਤ੍ਥਨ੍ਨਾਮਸ੍ਸ ਭਰਿਯਾ ਜਾਯਾ ਪਜਾਪਤਿ ਪੁਤ੍ਤਮਾਤਾ ਘਰਣੀ ਘਰਸਾਮਿਨੀ ਭਤ੍ਤਰਨ੍ਧਿਕਾ ਸੁਸ੍ਸੂਸਿਕਾ ਪਰਿਚਾਰਿਕਾ’’ਤਿਏਵਮਾਦੀਸੁ ਸਂਵਾਸਪਰਿਦੀਪਕੇਸੁ ਵਚਨੇਸੁ ਅਞ੍ਞਤਰਵਸੇਨ ਵਾ ਵਦਨ੍ਤਸ੍ਸਾਪਿ ਵਿਸਙ੍ਕੇਤੋ ਨਤ੍ਥਿ ਤਿਵਙ੍ਗਸਮ੍ਪਤ੍ਤਿਯਾ ਆਪਤ੍ਤਿਯੇਵ. ‘‘ਮਾਤੁਰਕ੍ਖਿਤਂ ਬ੍ਰੂਹੀ’’ਤਿ ਪੇਸਿਤਸ੍ਸ ਪਨ ਗਨ੍ਤ੍ਵਾ ਅਞ੍ਞਾਸੁ ਪਿਤੁਰਕ੍ਖਿਤਾਦੀਸੁ ਅਞ੍ਞਤਰਂ ਵਦਨ੍ਤਸ੍ਸ ਵਿਸਙ੍ਕੇਤਂ. ਏਸ ਨਯੋ ‘‘ਪਿਤੁਰਕ੍ਖਿਤਂ ਬ੍ਰੂਹੀ’’ਤਿਆਦੀਸੁਪਿ.

ਕੇਵਲਞ੍ਹੇਤ੍ਥ ਏਕਮੂਲਕਦੁਮੂਲਕਾਦਿਵਸੇਨ ‘‘ਪੁਰਿਸਸ੍ਸ ਮਾਤਾ ਭਿਕ੍ਖੁਂ ਪਹਿਣਤਿ, ਮਾਤੁਰਕ੍ਖਿਤਾਯ ਮਾਤਾ ਭਿਕ੍ਖੁਂ ਪਹਿਣਤੀ’’ਤਿ ਏਵਮਾਦੀਨਂ ਮੂਲਟ੍ਠਾਨਞ੍ਚ ਵਸੇਨ ਪੇਯ੍ਯਾਲਭੇਦੋਯੇਵ ਵਿਸੇਸੋ. ਸੋਪਿ ਪੁਬ੍ਬੇ ਵੁਤ੍ਤਨਯਤ੍ਤਾ ਪਾਲ਼ਿਅਨੁਸਾਰੇਨੇਵ ਸਕ੍ਕਾ ਜਾਨਿਤੁਨ੍ਤਿ ਨਾਸ੍ਸ ਵਿਭਾਗਂ ਦਸ੍ਸੇਤੁਂ ਆਦਰਂ ਕਰਿਮ੍ਹ.

੩੩੮. ਪਟਿਗ੍ਗਣ੍ਹਾਤੀਤਿਆਦੀਸੁ ਪਨ ਦ੍ਵੀਸੁ ਚਤੁਕ੍ਕੇਸੁ ਪਠਮਚਤੁਕ੍ਕੇ ਆਦਿਪਦੇਨ ਤਿਵਙ੍ਗਸਮ੍ਪਤ੍ਤਿਯਾ ਸਙ੍ਘਾਦਿਸੇਸੋ, ਮਜ੍ਝੇ ਦ੍ਵੀਹਿ ਦੁਵਙ੍ਗਸਮ੍ਪਤ੍ਤਿਯਾ ਥੁਲ੍ਲਚ੍ਚਯਂ, ਅਨ੍ਤੇ ਏਕੇਨ ਏਕਙ੍ਗਸਮ੍ਪਤ੍ਤਿਯਾ ਦੁਕ੍ਕਟਂ. ਦੁਤਿਯਚਤੁਕ੍ਕੇ ਆਦਿਪਦੇਨ ਦੁਵਙ੍ਗਸਮ੍ਪਤ੍ਤਿਯਾ ਥੁਲ੍ਲਚ੍ਚਯਂ, ਮਜ੍ਝੇ ਦ੍ਵੀਹਿ ਏਕਙ੍ਗਸਮ੍ਪਤ੍ਤਿਯਾ ਦੁਕ੍ਕਟਂ, ਅਨ੍ਤੇ ਏਕੇਨ ਅਙ੍ਗਾਭਾਵਤੋ ਅਨਾਪਤ੍ਤਿ. ਤਤ੍ਥ ਪਟਿਗ੍ਗਣ੍ਹਾਤੀਤਿ ਆਣਾਪਕਸ੍ਸ ਸਾਸਨਂ ਪਟਿਗ੍ਗਣ੍ਹਾਤਿ. ਵੀਮਂਸਤੀਤਿ ਪਹਿਤਟ੍ਠਾਨਂ ਗਨ੍ਤ੍ਵਾ ਤਂ ਆਰੋਚੇਤਿ. ਪਚ੍ਚਾਹਰਤੀਤਿ ਪੁਨ ਆਗਨ੍ਤ੍ਵਾ ਮੂਲਟ੍ਠਸ੍ਸ ਆਰੋਚੇਤਿ.

ਨ ਪਚ੍ਚਾਹਰਤੀਤਿ ਆਰੋਚੇਤ੍ਵਾ ਏਤ੍ਤੋਵ ਪਕ੍ਕਮਤਿ. ਪਟਿਗ੍ਗਣ੍ਹਾਤਿ ਨ ਵੀਮਂਸਤੀਤਿ ਪੁਰਿਸੇਨ ‘‘ਇਤ੍ਥਨ੍ਨਾਮਂ ਗਨ੍ਤ੍ਵਾ ਬ੍ਰੂਹੀ’’ਤਿ ਵੁਚ੍ਚਮਾਨੋ ‘‘ਸਾਧੂ’’ਤਿ ਤਸ੍ਸ ਸਾਸਨਂ ਪਟਿਗ੍ਗਣ੍ਹਿਤ੍ਵਾ ਤਂ ਪਮੁਸ੍ਸਿਤ੍ਵਾ ਵਾ ਅਪ੍ਪਮੁਸ੍ਸਿਤ੍ਵਾ ਵਾ ਅਞ੍ਞੇਨ ਕਰਣੀਯੇਨ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ ਕਿਞ੍ਚਿਦੇਵ ਕਥਂ ਕਥੇਨ੍ਤੋ ਨਿਸੀਦਤਿ, ਏਤ੍ਤਾਵਤਾ ‘‘ਪਟਿਗ੍ਗਣ੍ਹਾਤਿ ਨ ਵੀਮਂਸਤਿ ਨਾਮਾ’’ਤਿ ਵੁਚ੍ਚਤਿ. ਅਥ ਨਂ ਸਾ ਇਤ੍ਥੀ ਸਯਮੇਵ ਵਦਤਿ ‘‘ਤੁਮ੍ਹਾਕਂ ਕਿਰ ਉਪਟ੍ਠਾਕੋ ਮਂ ਗੇਹੇ ਕਾਤੁਕਾਮੋ’’ਤਿ ਏਵਂ ਵਤ੍ਵਾ ਚ ‘‘ਅਹਂ ਤਸ੍ਸ ਭਰਿਯਾ ਭਵਿਸ੍ਸਾਮੀ’’ਤਿ ਵਾ ‘‘ਨ ਭਵਿਸ੍ਸਾਮੀ’’ਤਿ ਵਾ ਵਦਤਿ. ਸੋ ਤਸ੍ਸਾ ਵਚਨਂ ਅਨਭਿਨਨ੍ਦਿਤ੍ਵਾ ਅਪ੍ਪਟਿਕ੍ਕੋਸਿਤ੍ਵਾ ਤੁਣ੍ਹੀਭੂਤੋਵ ਉਟ੍ਠਾਯਾਸਨਾ ਤਸ੍ਸ ਪੁਰਿਸਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ਤਂ ਪਵਤ੍ਤਿਂ ਆਰੋਚੇਤਿ, ਏਤ੍ਤਾਵਤਾ ‘‘ਨ ਵੀਮਂਸਤਿ ਪਚ੍ਚਾਹਰਤਿ ਨਾਮਾ’’ਤਿ ਵੁਚ੍ਚਤਿ. ਨ ਵੀਮਂਸਤਿ ਨ ਪਚ੍ਚਾਹਰਤੀਤਿ ਕੇਵਲਂ ਸਾਸਨਾਰੋਚਨਕਾਲੇ ਪਟਿਗ੍ਗਣ੍ਹਾਤਿਯੇਵ, ਇਤਰਂ ਪਨ ਦ੍ਵਯਂ ਨ ਕਰੋਤਿ.

ਨ ਪਟਿਗ੍ਗਣ੍ਹਾਤਿ ਵੀਮਂਸਤਿ ਪਚ੍ਚਾਹਰਤੀਤਿ ਕੋਚਿ ਪੁਰਿਸੋ ਭਿਕ੍ਖੁਸ੍ਸ ਠਿਤਟ੍ਠਾਨੇ ਵਾ ਨਿਸਿਨ੍ਨਟ੍ਠਾਨੇ ਵਾ ਤਥਾਰੂਪਿਂ ਕਥਂ ਕਥੇਤਿ, ਭਿਕ੍ਖੁ ਤੇਨ ਅਪ੍ਪਹਿਤੋਪਿ ਪਹਿਤੋ ਵਿਯ ਹੁਤ੍ਵਾ ਇਤ੍ਥਿਯਾ ਸਨ੍ਤਿਕਂ ਗਨ੍ਤ੍ਵਾ ‘‘ਹੋਹਿ ਕਿਰ ਇਤ੍ਥਨ੍ਨਾਮਸ੍ਸ ਭਰਿਯਾ’’ਤਿਆਦਿਨਾ ਨਯੇਨ ਵੀਮਂਸਿਤ੍ਵਾ ਤਸ੍ਸਾ ਰੁਚਿਂ ਵਾ ਅਰੁਚਿਂ ਵਾ ਪੁਨ ਆਗਨ੍ਤ੍ਵਾ ਇਮਸ੍ਸ ਆਰੋਚੇਤਿ. ਤੇਨੇਵ ਨਯੇਨ ਵੀਮਂਸਿਤ੍ਵਾ ਅਪਚ੍ਚਾਹਰਨ੍ਤੋ ‘‘ਨ ਪਟਿਗ੍ਗਣ੍ਹਾਤਿ ਵੀਮਂਸਤਿ ਨ ਪਚ੍ਚਾਹਰਤੀ’’ਤਿ ਵੁਚ੍ਚਤਿ. ਤੇਨੇਵ ਨਯੇਨ ਗਤੋ ਅਵੀਮਂਸਿਤ੍ਵਾ ਤਾਯ ਸਮੁਟ੍ਠਾਪਿਤਂ ਕਥਂ ਸੁਤ੍ਵਾ ਪਠਮਚਤੁਕ੍ਕਸ੍ਸ ਤਤਿਯਪਦੇ ਵੁਤ੍ਤਨਯੇਨ ਆਗਨ੍ਤ੍ਵਾ ਇਮਸ੍ਸ ਆਰੋਚੇਨ੍ਤੋ ‘‘ਨ ਪਟਿਗ੍ਗਣ੍ਹਾਤਿ ਨ ਵੀਮਂਸਤਿ ਪਚ੍ਚਾਹਰਤੀ’’ਤਿ ਵੁਚ੍ਚਤਿ. ਚਤੁਤ੍ਥਪਦਂ ਪਾਕਟਮੇਵ.

ਸਮ੍ਬਹੁਲੇ ਭਿਕ੍ਖੂ ਆਣਾਪੇਤੀਤਿਆਦਿਨਯਾ ਪਾਕਟਾਯੇਵ. ਯਥਾ ਪਨ ਸਮ੍ਬਹੁਲਾਪਿ ਏਕਵਤ੍ਥੁਮ੍ਹਿ ਆਪਜ੍ਜਨ੍ਤਿ, ਏਵਂ ਏਕਸ੍ਸਪਿ ਸਮ੍ਬਹੁਲਵਤ੍ਥੂਸੁ ਸਮ੍ਬਹੁਲਾ ਆਪਤ੍ਤਿਯੋ ਵੇਦਿਤਬ੍ਬਾ. ਕਥਂ? ਪੁਰਿਸੋ ਭਿਕ੍ਖੁਂ ਆਣਾਪੇਤਿ ‘‘ਗਚ੍ਛ, ਭਨ੍ਤੇ, ਅਸੁਕਸ੍ਮਿਂ ਨਾਮ ਪਾਸਾਦੇ ਸਟ੍ਠਿਮਤ੍ਤਾ ਵਾ ਸਤ੍ਤਤਿਮਤ੍ਤਾ ਵਾ ਇਤ੍ਥਿਯੋ ਠਿਤਾ ਤਾ ਵਦੇਹਿ, ਹੋਥ ਕਿਰ ਇਤ੍ਥਨ੍ਨਾਮਸ੍ਸ ਭਰਿਯਾਯੋ’’ਤਿ. ਸੋ ਸਮ੍ਪਟਿਚ੍ਛਿਤ੍ਵਾ ਤਤ੍ਥ ਗਨ੍ਤ੍ਵਾ ਆਰੋਚੇਤ੍ਵਾ ਪੁਨ ਤਂ ਸਾਸਨਂ ਪਚ੍ਚਾਹਰਤਿ. ਯਤ੍ਤਕਾ ਇਤ੍ਥਿਯੋ ਤਤ੍ਤਕਾ ਆਪਤ੍ਤਿਯੋ ਆਪਜ੍ਜਤਿ. ਵੁਤ੍ਤਞ੍ਹੇਤਂ ਪਰਿਵਾਰੇਪਿ –

‘‘ਪਦਵੀਤਿਹਾਰਮਤ੍ਤੇਨ, ਵਾਚਾਯ ਭਣਿਤੇਨ ਚ;

ਸਬ੍ਬਾਨਿ ਗਰੁਕਾਨਿ ਸਪ੍ਪਟਿਕਮ੍ਮਾਨਿ;

ਚਤੁਸਟ੍ਠਿ ਆਪਤ੍ਤਿਯੋ ਆਪਜ੍ਜੇਯ੍ਯ ਏਕਤੋ;

ਪਞ੍ਹਾਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੮੦);

ਇਮਂ ਕਿਰ ਅਤ੍ਥਵਸਂ ਪਟਿਚ੍ਚ ਅਯਂ ਪਞ੍ਹੋ ਵੁਤ੍ਤੋ. ਵਚਨਸਿਲਿਟ੍ਠਤਾਯ ਚੇਤ੍ਥ ‘‘ਚਤੁਸਟ੍ਠਿ ਆਪਤ੍ਤਿਯੋ’’ਤਿ ਵੁਤ੍ਤਂ. ਏਵਂ ਕਰੋਨ੍ਤੋ ਪਨ ਸਤਮ੍ਪਿ ਸਹਸ੍ਸਮ੍ਪਿ ਆਪਜ੍ਜਤੀਤਿ. ਯਥਾ ਚ ਏਕੇਨ ਪੇਸਿਤਸ੍ਸ ਏਕਸ੍ਸ ਸਮ੍ਬਹੁਲਾਸੁ ਇਤ੍ਥੀਸੁ ਸਮ੍ਬਹੁਲਾ ਆਪਤ੍ਤਿਯੋ, ਏਵਂ ਏਕੋ ਪੁਰਿਸੋ ਸਮ੍ਬਹੁਲੇ ਭਿਕ੍ਖੂ ਏਕਿਸ੍ਸਾ ਸਨ੍ਤਿਕਂ ਪੇਸੇਤਿ, ਸਬ੍ਬੇਸਂ ਸਙ੍ਘਾਦਿਸੇਸੋ. ਏਕੋ ਸਮ੍ਬਹੁਲੇ ਭਿਕ੍ਖੂ ਸਮ੍ਬਹੁਲਾਨਂ ਇਤ੍ਥੀਨਂ ਸਨ੍ਤਿਕਂ ਪੇਸੇਤਿ, ਇਤ੍ਥਿਗਣਨਾਯ ਸਙ੍ਘਾਦਿਸੇਸਾ. ਸਮ੍ਬਹੁਲਾ ਪੁਰਿਸਾ ਏਕਂ ਭਿਕ੍ਖੁਂ ਏਕਿਸ੍ਸਾ ਸਨ੍ਤਿਕਂ ਪੇਸੇਨ੍ਤਿ, ਪੁਰਿਸਗਣਨਾਯ ਸਙ੍ਘਾਦਿਸੇਸਾ. ਸਮ੍ਬਹੁਲਾ ਏਕਂ ਸਮ੍ਬਹੁਲਾਨਂ ਇਤ੍ਥੀਨਂ ਸਨ੍ਤਿਕਂ ਪੇਸੇਨ੍ਤਿ, ਵਤ੍ਥੁਗਣਨਾਯ ਸਙ੍ਘਾਦਿਸੇਸਾ. ਸਮ੍ਬਹੁਲਾ ਸਮ੍ਬਹੁਲੇ ਏਕਿਸ੍ਸਾ ਸਨ੍ਤਿਕਂ ਪੇਸੇਨ੍ਤਿ, ਵਤ੍ਥੁਗਣਨਾਯ ਸਙ੍ਘਾਦਿਸੇਸਾ. ਸਮ੍ਬਹੁਲਾ ਪੁਰਿਸਾ ਸਮ੍ਬਹੁਲੇ ਭਿਕ੍ਖੂ ਸਮ੍ਬਹੁਲਾਨਂ ਇਤ੍ਥੀਨਂ ਸਨ੍ਤਿਕਂ ਪੇਸੇਨ੍ਤਿ, ਵਤ੍ਥੁਗਣਨਾਯ ਸਙ੍ਘਾਦਿਸੇਸਾ. ਏਸ ਨਯੋ ‘‘ਏਕਾ ਇਤ੍ਥੀ ਏਕਂ ਭਿਕ੍ਖੁ’’ਨ੍ਤਿਆਦੀਸੁਪਿ. ਏਤ੍ਥ ਚ ਸਭਾਗਵਿਭਾਗਤਾ ਨਾਮ ਅਪ੍ਪਮਾਣਂ, ਮਾਤਾਪਿਤੁਨਮ੍ਪਿ ਪਞ੍ਚਸਹਧਮ੍ਮਿਕਾਨਮ੍ਪਿ ਸਞ੍ਚਰਿਤ੍ਤਕਮ੍ਮਂ ਕਰੋਨ੍ਤਸ੍ਸ ਆਪਤ੍ਤਿਯੇਵ.

ਪੁਰਿਸੋ ਭਿਕ੍ਖੁਂ ਆਣਾਪੇਤਿ ਗਚ੍ਛ ਭਨ੍ਤੇਤਿ ਚਤੁਕ੍ਕਂ ਅਙ੍ਗਵਸੇਨ ਆਪਤ੍ਤਿਭੇਦ ਦਸ੍ਸਨਤ੍ਥਂ ਵੁਤ੍ਤਂ. ਤਸ੍ਸ ਪਚ੍ਛਿਮਪਦੇ ਅਨ੍ਤੇਵਾਸੀ ਵੀਮਂਸਿਤ੍ਵਾ ਬਹਿਦ੍ਧਾ ਪਚ੍ਚਾਹਰਤੀਤਿ ਆਗਨ੍ਤ੍ਵਾ ਆਚਰਿਯਸ੍ਸ ਅਨਾਰੋਚੇਤ੍ਵਾ ਏਤ੍ਤੋਵ ਗਨ੍ਤ੍ਵਾ ਤਸ੍ਸ ਪੁਰਿਸਸ੍ਸ ਆਰੋਚੇਤਿ. ਆਪਤ੍ਤਿ ਉਭਿਨ੍ਨਂ ਥੁਲ੍ਲਚ੍ਚਯਸ੍ਸਾਤਿ ਆਚਰਿਯਸ੍ਸ ਪਟਿਗ੍ਗਹਿਤਤ੍ਤਾ ਚ ਵੀਮਂਸਾਪਿਤਤ੍ਤਾ ਚ ਦ੍ਵੀਹਙ੍ਗੇਹਿ ਥੁਲ੍ਲਚ੍ਚਯਂ, ਅਨ੍ਤੇਵਾਸਿਕਸ੍ਸ ਵੀਮਂਸਿਤਤ੍ਤਾ ਚ ਪਚ੍ਚਾਹਟਤ੍ਤਾ ਚ ਦ੍ਵੀਹਙ੍ਗੇਹਿ ਥੁਲ੍ਲਚ੍ਚਯਂ. ਸੇਸਂ ਪਾਕਟਮੇਵ.

੩੩੯. ਗਚ੍ਛਨ੍ਤੋ ਸਮ੍ਪਾਦੇਤੀਤਿ ਪਟਿਗ੍ਗਣ੍ਹਾਤਿ ਚੇਵ ਵੀਮਂਸਤਿ ਚ. ਆਗਚ੍ਛਨ੍ਤੋ ਵਿਸਂਵਾਦੇਤੀਤਿ ਨ ਪਚ੍ਚਾਹਰਤਿ. ਗਚ੍ਛਨ੍ਤੋ ਵਿਸਂਵਾਦੇਤੀਤਿ ਨ ਪਟਿਗ੍ਗਣ੍ਹਾਤਿ. ਆਗਚ੍ਛਨ੍ਤੋ ਸਮ੍ਪਾਦੇਤੀਤਿ ਵੀਮਂਸਤਿ ਚੇਵ ਪਚ੍ਚਾਹਰਤਿ ਚ. ਏਵਂ ਉਭਯਤ੍ਥ ਦ੍ਵੀਹਙ੍ਗੇਹਿ ਥੁਲ੍ਲਚ੍ਚਯਂ. ਤਤਿਯਪਦੇ ਆਪਤ੍ਤਿ, ਚਤੁਤ੍ਥੇ ਅਨਾਪਤ੍ਤਿ.

੩੪੦. ਅਨਾਪਤ੍ਤਿ ਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਗਿਲਾਨਸ੍ਸ ਵਾ ਕਰਣੀਯੇਨ ਗਚ੍ਛਤਿ ਉਮ੍ਮਤ੍ਤਕਸ੍ਸ ਆਦਿਕਮ੍ਮਿਕਸ੍ਸਾਤਿ ਏਤ੍ਥ ਭਿਕ੍ਖੁਸਙ੍ਘਸ੍ਸ ਉਪੋਸਥਾਗਾਰਂ ਵਾ ਕਿਞ੍ਚਿ ਵਾ ਵਿਪ੍ਪਕਤਂ ਹੋਤਿ. ਤਤ੍ਥ ਕਾਰੁਕਾਨਂ ਭਤ੍ਤਵੇਤਨਤ੍ਥਾਯ ਉਪਾਸਕੋ ਵਾ ਉਪਾਸਿਕਾਯ ਸਨ੍ਤਿਕਂ ਭਿਕ੍ਖੁਂ ਪਹਿਣੇਯ੍ਯ, ਉਂਪਾਸਿਕਾ ਵਾ ਉਪਾਸਕਸ੍ਸ, ਏਵਰੂਪੇਨ ਸਙ੍ਘਸ੍ਸ ਕਰਣੀਯੇਨ ਗਚ੍ਛਨ੍ਤਸ੍ਸ ਅਨਾਪਤ੍ਤਿ. ਚੇਤਿਯਕਮ੍ਮੇ ਕਯਿਰਮਾਨੇਪਿ ਏਸੇਵ ਨਯੋ. ਗਿਲਾਨਸ੍ਸ ਭੇਸਜ੍ਜਤ੍ਥਾਯਪਿ ਉਪਾਸਕੇਨ ਵਾ ਉਪਾਸਿਕਾਯ ਸਨ੍ਤਿਕਂ ਉਪਾਸਿਕਾਯ ਵਾ ਉਪਾਸਕਸ੍ਸ ਸਨ੍ਤਿਕਂ ਪਹਿਤਸ੍ਸ ਗਚ੍ਛਤੋ ਅਨਾਪਤ੍ਤਿ. ਉਮ੍ਮਤ੍ਤਕਆਦਿਕਮ੍ਮਿਕਾ ਵੁਤ੍ਤਨਯਾ ਏਵ.

ਪਦਭਾਜਨੀਯਵਣ੍ਣਨਾ ਨਿਟ੍ਠਿਤਾ.

ਸਮੁਟ੍ਠਾਨਾਦੀਸੁ ਇਦਂ ਸਿਕ੍ਖਾਪਦਂ ਛਸਮੁਟ੍ਠਾਨਂ, ਸੀਸੁਕ੍ਖਿਪਨਾਦਿਨਾ ਕਾਯਵਿਕਾਰੇਨ ਸਾਸਨਂ ਗਹੇਤ੍ਵਾ ਗਨ੍ਤ੍ਵਾ ਹਤ੍ਥਮੁਦ੍ਦਾਯ ਵੀਮਂਸਿਤ੍ਵਾ ਪੁਨ ਆਗਨ੍ਤ੍ਵਾ ਹਤ੍ਥਮੁਦ੍ਦਾਯ ਏਵ ਆਰੋਚੇਨ੍ਤਸ੍ਸ ਕਾਯਤੋ ਸਮੁਟ੍ਠਾਤਿ. ਆਸਨਸਾਲਾਯ ਨਿਸਿਨ੍ਨਸ੍ਸ ‘‘ਇਤ੍ਥਨ੍ਨਾਮਾ ਆਗਮਿਸ੍ਸਤਿ, ਤਸ੍ਸਾ ਚਿਤ੍ਤਂ ਜਾਨੇਯ੍ਯਾਥਾ’’ਤਿ ਕੇਨਚਿ ਵੁਤ੍ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਂ ਆਗਤਂ ਵਤ੍ਵਾ ਤਸ੍ਸਾ ਗਤਾਯ ਪੁਨ ਤਸ੍ਮਿਂ ਪੁਰਿਸੇ ਆਗਤੇ ਆਰੋਚੇਨ੍ਤਸ੍ਸ ਵਾਚਤੋ ਸਮੁਟ੍ਠਾਤਿ. ਵਾਚਾਯ ‘‘ਸਾਧੂ’’ਤਿ ਸਾਸਨਂ ਗਹੇਤ੍ਵਾ ਅਞ੍ਞੇਨ ਕਰਣੀਯੇਨ ਤਸ੍ਸਾ ਘਰਂ ਗਨ੍ਤ੍ਵਾ ਅਞ੍ਞਤ੍ਥ ਵਾ ਗਮਨਕਾਲੇ ਤਂ ਦਿਸ੍ਵਾ ਵਚੀਭੇਦੇਨੇਵ ਵੀਮਂਸਿਤ੍ਵਾ ਪੁਨ ਅਞ੍ਞੇਨੇਵ ਕਰਣੀਯੇਨ ਤਤੋ ਅਪਕ੍ਕਮ੍ਮ ਕਦਾਚਿਦੇਵ ਤਂ ਪੁਰਿਸਂ ਦਿਸ੍ਵਾ ਆਰੋਚੇਨ੍ਤਸ੍ਸਾਪਿ ਵਾਚਤੋਵ ਸਮੁਟ੍ਠਾਤਿ. ਪਣ੍ਣਤ੍ਤਿਂ ਅਜਾਨਨ੍ਤਸ੍ਸ ਪਨ ਖੀਣਾਸਵਸ੍ਸਾਪਿ ਕਾਯਵਾਚਤੋ ਸਮੁਟ੍ਠਾਤਿ. ਕਥਂ? ਸਚੇ ਹਿਸ੍ਸ ਮਾਤਾਪਿਤਰੋ ਕੁਜ੍ਝਿਤ੍ਵਾ ਅਲਂਵਚਨੀਯਾ ਹੋਨ੍ਤਿ, ਤਞ੍ਚ ਭਿਕ੍ਖੁਂ ਘਰਂ ਉਪਗਤਂ ਥੇਰਪਿਤਾ ਵਦਤਿ ‘‘ਮਾਤਾ ਤੇ ਤਾਤ ਮਂ ਮਹਲ੍ਲਕਂ ਛਡ੍ਡੇਤ੍ਵਾ ਞਾਤਿਕੁਲਂ ਗਤਾ, ਗਚ੍ਛ ਤਂ ਮਂ ਉਪਟ੍ਠਾਤੁਂ ਪੇਸੇਹੀ’’ਤਿ. ਸੋ ਚੇ ਗਨ੍ਤ੍ਵਾ ਤਂ ਵਤ੍ਵਾ ਪੁਨ ਪਿਤੁਨੋ ਤਸ੍ਸਾ ਆਗਮਨਂ ਵਾ ਅਨਾਗਮਨਂ ਵਾ ਆਰੋਚੇਤਿ, ਸਙ੍ਘਾਦਿਸੇਸੋ. ਇਮਾਨਿ ਤੀਣਿ ਅਚਿਤ੍ਤਕਸਮੁਟ੍ਠਾਨਾਨਿ.

ਪਣ੍ਣਤ੍ਤਿਂ ਪਨ ਜਾਨਿਤ੍ਵਾ ਏਤੇਹੇਵ ਤੀਹਿ ਨਯੇਹਿ ਸਞ੍ਚਰਿਤ੍ਤਂ ਸਮਾਪਜ੍ਜਤੋ ਕਾਯਚਿਤ੍ਤਤੋ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ. ਇਮਾਨਿ ਤੀਣਿ ਪਣ੍ਣਤ੍ਤਿਜਾਨਨਚਿਤ੍ਤੇਨ ਸਚਿਤ੍ਤਕਸਮੁਟ੍ਠਾਨਾਨਿ. ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਕੁਸਲਾਦਿਵਸੇਨ ਚੇਤ੍ਥ ਤੀਣਿ ਚਿਤ੍ਤਾਨਿ, ਸੁਖਾਦਿਵਸੇਨ ਤਿਸ੍ਸੋ ਵੇਦਨਾਤਿ.

੩੪੧. ਵਿਨੀਤਵਤ੍ਥੂਸੁ ਆਦਿਤੋ ਵਤ੍ਥੁਪਞ੍ਚਕੇ ਪਟਿਗ੍ਗਹਿਤਮਤ੍ਤਤ੍ਤਾ ਦੁਕ੍ਕਟਂ.

ਕਲਹਵਤ੍ਥੁਸ੍ਮਿਂ ਸਮ੍ਮੋਦਨੀਯਂ ਅਕਾਸੀਤਿ ਤਂ ਸਞ੍ਞਾਪੇਤ੍ਵਾ ਪੁਨ ਗੇਹਗਮਨੀਯਂ

ਅਕਾਸਿ. ਨਾਲਂਵਚਨੀਯਾਤਿ ਨ ਪਰਿਚ੍ਚਤ੍ਤਾਤਿ ਅਤ੍ਥੋ. ਯਾ ਹਿ ਯਥਾ ਯਥਾ ਯੇਸੁ ਯੇਸੁ ਜਨਪਦੇਸੁ ਪਰਿਚ੍ਚਤ੍ਤਾ ਪਰਿਚ੍ਚਤ੍ਤਾਵ ਹੋਤਿ, ਭਰਿਯਾਭਾਵਂ ਅਤਿਕ੍ਕਮਤਿ, ਅਯਂ ‘‘ਅਲਂਵਚਨੀਯਾ’’ਤਿ ਵੁਚ੍ਚਤਿ. ਏਸਾ ਪਨ ਨ ਅਲਂਵਚਨੀਯਾ ਕੇਨਚਿਦੇਵ ਕਾਰਣੇਨ ਕਲਹਂ ਕਤ੍ਵਾ ਗਤਾ, ਤੇਨੇਵੇਤ੍ਥ ਭਗਵਾ ‘‘ਅਨਾਪਤ੍ਤੀ’’ਤਿ ਆਹ. ਯਸ੍ਮਾ ਪਨ ਕਾਯਸਂਸਗ੍ਗੇ ਯਕ੍ਖਿਯਾ ਥੁਲ੍ਲਚ੍ਚਯਂ ਵੁਤ੍ਤਂ, ਤਸ੍ਮਾ ਦੁਟ੍ਠੁਲ੍ਲਾਦੀਸੁਪਿ ਯਕ੍ਖਿਪੇਤਿਯੋ ਥੁਲ੍ਲਚ੍ਚਯਵਤ੍ਥੁਮੇਵਾਤਿ ਵੇਦਿਤਬ੍ਬਾ. ਅਟ੍ਠਕਥਾਸੁ ਪਨੇਤਂ ਨ ਵਿਚਾਰਿਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.