੪. ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਵਣ੍ਣਨਾ

੨੯੦. ਤੇਨ ਸਮਯੇਨ ਬੁਦ੍ਧੋ ਭਗਵਾਤਿ ਅਤ੍ਤਕਾਮਸਿਕ੍ਖਾਪਦਂ. ਤਤ੍ਥ ਕੁਲੂਪਕੋਤਿ ਕੁਲਪਯਿਰੁਪਾਸਨਕੋ ਚਤੁਨ੍ਨਂ ਪਚ੍ਚਯਾਨਂ ਅਤ੍ਥਾਯ ਕੁਲੂਪਸਙ੍ਕਮਨੇ ਨਿਚ੍ਚਪ੍ਪਯੁਤ੍ਤੋ.

ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਨ੍ਤਿ ਚੀਵਰਞ੍ਚ ਪਿਣ੍ਡਪਾਤਞ੍ਚ ਸੇਨਾਸਨਞ੍ਚ ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਞ੍ਚ. ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਨ੍ਤਿ ਚੇਤ੍ਥ ਪਤਿਕਰਣਤ੍ਥੇਨ ਪਚ੍ਚਯੋ, ਯਸ੍ਸ ਕਸ੍ਸਚਿ ਸਪ੍ਪਾਯਸ੍ਸੇਤਂ ਅਧਿਵਚਨਂ. ਭਿਸਕ੍ਕਸ੍ਸ ਕਮ੍ਮਂ ਤੇਨ ਅਨੁਞ੍ਞਾਤਤ੍ਤਾਤਿ ਭੇਸਜ੍ਜਂ. ਗਿਲਾਨਪਚ੍ਚਯੋਵ ਭੇਸਜ੍ਜਂ ਗਿਲਾਨਪਚ੍ਚਯਭੇਸਜ੍ਜਂ, ਯਂਕਿਞ੍ਚਿ ਗਿਲਾਨਸ੍ਸ ਸਪ੍ਪਾਯਂ ਭਿਸਕ੍ਕਕਮ੍ਮਂ ਤੇਲਮਧੁਫਾਣਿਤਾਦੀਤਿ ਵੁਤ੍ਤਂ ਹੋਤਿ. ਪਰਿਕ੍ਖਾਰੋਤਿ ਪਨ ‘‘ਸਤ੍ਤਹਿ ਨਗਰਪਰਿਕ੍ਖਾਰੇਹਿ ਸੁਪਰਿਕ੍ਖਤਂ ਹੋਤੀ’’ਤਿਆਦੀਸੁ (ਅ. ਨਿ. ੭.੬੭) ਪਰਿਵਾਰੋ ਵੁਚ੍ਚਤਿ. ‘‘ਰਥੋ ਸੀਸਪਰਿਕ੍ਖਾਰੋ ਝਾਨਕ੍ਖੋ ਚਕ੍ਕਵੀਰਿਯੋ’’ਤਿਆਦੀਸੁ (ਸਂ. ਨਿ. ੫.੪) ਅਲਙ੍ਕਾਰੋ. ‘‘ਯੇ ਚਿਮੇ ਪਬ੍ਬਜਿਤੇਨ ਜੀਵਿਤਪਰਿਕ੍ਖਾਰਾ ਸਮੁਦਾਨੇਤਬ੍ਬਾ’’ਤਿਆਦੀਸੁ (ਰੋ. ਨਿ. ੧.੧.੧੯੧) ਸਮ੍ਭਾਰੋ. ਇਧ ਪਨ ਸਮ੍ਭਾਰੋਪਿ ਪਰਿਵਾਰੋਪਿ ਵਟ੍ਟਤਿ. ਤਞ੍ਹਿ ਗਿਲਾਨਪਚ੍ਚਯਭੇਸਜ੍ਜਂ ਜੀਵਿਤਸ੍ਸ ਪਰਿਵਾਰੋਪਿ ਹੋਤਿ ਜੀਵਿਤਵਿਨਾਸਕਾਬਾਧੁਪ੍ਪਤ੍ਤਿਯਾ ਅਨ੍ਤਰਂ ਅਦਤ੍ਵਾ ਰਕ੍ਖਣਤੋ, ਸਮ੍ਭਾਰੋਪਿ ਯਥਾ ਚਿਰਂ ਪਵਤ੍ਤਤਿ ਏਵਮਸ੍ਸ ਕਾਰਣਭਾਵਤੋ, ਤਸ੍ਮਾ ਪਰਿਕ੍ਖਾਰੋਤਿ ਵੁਚ੍ਚਤਿ. ਏਵਂ ਗਿਲਾਨਪਚ੍ਚਯਭੇਸਜ੍ਜਞ੍ਚ ਤਂ ਪਰਿਕ੍ਖਾਰੋ ਚਾਤਿ ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰੋ, ਤਂ ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਨ੍ਤਿ ਏਵਮਤ੍ਥੋ ਦਟ੍ਠਬ੍ਬੋ.

ਵਸਲਨ੍ਤਿ ਹੀਨਂ ਲਾਮਕਂ. ਅਥ ਵਾ ਵਸ੍ਸਤੀਤਿ ਵਸਲੋ, ਪਗ੍ਘਰਤੀਤਿ ਅਤ੍ਥੋ, ਤਂ ਵਸਲਂ, ਅਸੁਚਿਪਗ੍ਘਰਣਕਨ੍ਤਿ ਵੁਤ੍ਤਂ ਹੋਤਿ. ਨਿਟ੍ਠੁਹਿਤ੍ਵਾਤਿ ਖੇਲ਼ਂ ਪਾਤੇਤ੍ਵਾ.

ਕਸ੍ਸਾਹਂ ਕੇਨ ਹਾਯਾਮੀਤਿ ਅਹਂ ਕਸ੍ਸਾ ਅਞ੍ਞਿਸ੍ਸਾ ਇਤ੍ਥਿਯਾ ਕੇਨ ਭੋਗੇਨ ਵਾ ਅਲਙ੍ਕਾਰੇਨ ਵਾ ਰੂਪੇਨ ਵਾ ਪਰਿਹਾਯਾਮਿ, ਕਾ ਨਾਮ ਮਯਾ ਉਤ੍ਤਰਿਤਰਾਤਿ ਦੀਪੇਤਿ.

੨੯੧. ਸਨ੍ਤਿਕੇਤਿ ਉਪਚਾਰੇ ਠਤ੍ਵਾ ਸਾਮਨ੍ਤਾ ਅਵਿਦੂਰੇ, ਪਦਭਾਜਨੇਪਿ ਅਯਮੇਵਅਤ੍ਥੋ ਦੀਪਿਤੋ. ਅਤ੍ਤਕਾਮਪਾਰਿਚਰਿਯਾਯਾਤਿ ਮੇਥੁਨਧਮ੍ਮਸਙ੍ਖਾਤੇਨ ਕਾਮੇਨ ਪਾਰਿਚਰਿਯਾ ਕਾਮਪਾਰਿਚਰਿਯਾ. ਅਤ੍ਤਨੋ ਅਤ੍ਥਾਯ ਕਾਮਪਾਰਿਚਰਿਯਾ ਅਤ੍ਤਕਾਮਪਾਰਿਚਰਿਯਾ, ਅਤ੍ਤਨਾ ਵਾ ਕਾਮਿਤਾ ਇਚ੍ਛਿਤਾਤਿ ਅਤ੍ਤਕਾਮਾ, ਸਯਂ ਮੇਥੁਨਰਾਗਵਸੇਨ ਪਤ੍ਥਿਤਾਤਿ ਅਤ੍ਥੋ. ਅਤ੍ਤਕਾਮਾ ਚ ਸਾ ਪਾਰਿਚਰਿਯਾ ਚਾਤਿ ਅਤ੍ਤਕਾਮਪਾਰਿਚਰਿਯਾ, ਤਸ੍ਸਾ ਅਤ੍ਤਕਾਮਪਾਰਿਚਰਿਯਾਯ. ਵਣ੍ਣਂ ਭਾਸੇਯ੍ਯਾਤਿ ਗੁਣਂ ਆਨਿਸਂਸਂ ਪਕਾਸੇਯ੍ਯ.

ਤਤ੍ਰ ਯਸ੍ਮਾ ‘‘ਅਤ੍ਤਨੋ ਅਤ੍ਥਾਯ ਕਾਮਪਾਰਿਚਰਿਯਾ’’ਤਿ ਇਮਸ੍ਮਿਂ ਅਤ੍ਥਵਿਕਪ੍ਪੇ ਕਾਮੋ ਚੇਵ ਹੇਤੁ ਚ ਪਾਰਿਚਰਿਯਾ ਚ ਅਤ੍ਥੋ, ਸੇਸਂ ਬ੍ਯਞ੍ਜਨਂ. ‘‘ਅਤ੍ਤਕਾਮਾ ਚ ਸਾ ਪਾਰਿਚਰਿਯਾ ਚਾਤਿ ਅਤ੍ਤਕਾਮਪਾਰਿਚਰਿਯਾ’’ਤਿ ਇਮਸ੍ਮਿਂ ਅਤ੍ਥਵਿਕਪ੍ਪੇ ਅਧਿਪ੍ਪਾਯੋ ਚੇਵ ਪਾਰਿਚਰਿਯਾ ਚਾਤਿ ਅਤ੍ਥੋ, ਸੇਸਂ ਬ੍ਯਞ੍ਜਨਂ. ਤਸ੍ਮਾ ਬ੍ਯਞ੍ਜਨੇ ਆਦਰਂ ਅਕਤ੍ਵਾ ਅਤ੍ਥਮਤ੍ਤਮੇਵ ਦਸ੍ਸੇਤੁਂ ‘‘ਅਤ੍ਤਨੋ ਕਾਮਂ ਅਤ੍ਤਨੋ ਹੇਤੁਂ ਅਤ੍ਤਨੋ ਅਧਿਪ੍ਪਾਯਂ ਅਤ੍ਤਨੋ ਪਾਰਿਚਰਿਯ’’ਨ੍ਤਿ ਪਦਭਾਜਨਂ ਵੁਤ੍ਤਂ. ‘‘ਅਤ੍ਤਨੋ ਕਾਮਂ ਅਤ੍ਤਨੋ ਹੇਤੁਂ ਅਤ੍ਤਨੋ ਪਾਰਿਚਰਿਯ’’ਨ੍ਤਿ ਹਿ ਵੁਤ੍ਤੇ ਜਾਨਿਸ੍ਸਨ੍ਤਿ ਪਣ੍ਡਿਤਾ ‘‘ਏਤ੍ਤਾਵਤਾ ਅਤ੍ਤਨੋ ਅਤ੍ਥਾਯ ਕਾਮਪਾਰਿਚਰਿਯਾ ਵੁਤ੍ਤਾ’’ਤਿ. ‘‘ਅਤ੍ਤਨੋ ਅਧਿਪ੍ਪਾਯਂ ਅਤ੍ਤਨੋ ਪਾਰਿਚਰਿਯ’’ਨ੍ਤਿ ਵੁਤ੍ਤੇਪਿ ਜਾਨਿਸ੍ਸਨ੍ਤਿ ‘‘ਏਤ੍ਤਾਵਤਾ ਅਤ੍ਤਨਾ ਇਚ੍ਛਿਤਕਾਮਿਤਟ੍ਠੇਨ ਅਤ੍ਤਕਾਮਪਾਰਿਚਰਿਯਾ ਵੁਤ੍ਤਾ’’ਤਿ.

ਇਦਾਨਿ ਤਸ੍ਸਾ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਭਾਸਨਾਕਾਰਂ ਦਸ੍ਸੇਨ੍ਤੋ ‘‘ਏਤਦਗ੍ਗ’’ਨ੍ਤਿਆਦਿਮਾਹ. ਤਂ ਉਦ੍ਦੇਸਤੋਪਿ ਨਿਦ੍ਦੇਸਤੋਪਿ ਉਤ੍ਤਾਨਤ੍ਥਮੇਵ. ਅਯਂ ਪਨੇਤ੍ਥ ਪਦਸਮ੍ਬਨ੍ਧੋ ਚ ਆਪਤ੍ਤਿਵਿਨਿਚ੍ਛਯੋ ਚ – ਏਤਦਗ੍ਗਂ…ਪੇ… ਪਰਿਚਰੇਯ੍ਯਾਤਿ ਯਾ ਮਾਦਿਸਂ ਸੀਲਵਨ੍ਤਂ ਕਲ੍ਯਾਣਧਮ੍ਮਂ ਬ੍ਰਹ੍ਮਚਾਰਿਂ ਏਤੇਨ ਧਮ੍ਮੇਨ ਪਰਿਚਰੇਯ੍ਯ, ਤਸ੍ਸਾ ਏਵਂ ਮਾਦਿਸਂ ਪਰਿਚਰਨ੍ਤਿਯਾ ਯਾ ਅਯਂ ਪਾਰਿਚਰਿਯਾ ਨਾਮ, ਏਤਦਗ੍ਗਂ ਪਾਰਿਚਰਿਯਾਨਨ੍ਤਿ.

ਮੇਥੁਨੁਪਸਂਹਿਤੇਨ ਸਙ੍ਘਾਦਿਸੇਸੋਤਿ ਏਵਂ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਨ੍ਤੋ ਚ ਮੇਥੁਨੁਪਸਂਹਿਤੇਨ ਮੇਥੁਨਧਮ੍ਮਪਟਿਸਂਯੁਤ੍ਤੇਨੇਵ ਵਚਨੇਨ ਯੋ ਭਾਸੇਯ੍ਯ, ਤਸ੍ਸ ਸਙ੍ਘਾਦਿਸੇਸੋਤਿ.

ਇਧਾਨਿ ਯਸ੍ਮਾ ਮੇਥੁਨੁਪਸਂਹਿਤੇਨੇਵ ਭਾਸਨ੍ਤਸ੍ਸ ਸਙ੍ਘਾਦਿਸੇਸੋ ਵੁਤ੍ਤੋ, ਤਸ੍ਮਾ ‘‘ਅਹਮ੍ਪਿ ਖਤ੍ਤਿਯੋ, ਤ੍ਵਮ੍ਪਿ ਖਤ੍ਤਿਯਾ, ਅਰਹਤਿ ਖਤ੍ਤਿਯਾ ਖਤ੍ਤਿਯਸ੍ਸ ਦਾਤੁਂ ਸਮਜਾਤਿਕਤ੍ਤਾ’’ਤਿ ਏਵਮਾਦੀਹਿ ਵਚਨੇਹਿ ਪਾਰਿਚਰਿਯਾਯ ਵਣ੍ਣਂ ਭਾਸਮਾਨਸ੍ਸਾਪਿ ਸਙ੍ਘਾਦਿਸੇਸੋ ਨਤ੍ਥਿ. ‘‘ਅਹਮ੍ਪਿ ਖਤ੍ਤਿਯੋ’’ਤਿਆਦਿਕੇ ਪਨ ਬਹੂਪਿ ਪਰਿਯਾਯੇ ਵਤ੍ਵਾ ‘‘ਅਰਹਸਿ ਤ੍ਵਂ ਮਯ੍ਹਂ ਮੇਥੁਨਧਮ੍ਮਂ ਦਾਤੁ’’ਨ੍ਤਿ ਏਵਂ ਮੇਥੁਨਪ੍ਪਟਿਸਂਯੁਤ੍ਤੇਨੇਵ ਭਾਸਮਾਨਸ੍ਸ ਸਙ੍ਘਾਦਿਸੇਸੋਤਿ.

ਇਤ੍ਥੀ ਚ ਹੋਤੀਤਿਆਦਿ ਪੁਬ੍ਬੇ ਵੁਤ੍ਤਨਯਮੇਵ. ਇਧ ਉਦਾਯਿਤ੍ਥੇਰੋ ਆਦਿਕਮ੍ਮਿਕੋ, ਤਸ੍ਸ ਅਨਾਪਤ੍ਤਿ ਆਦਿਕਮ੍ਮਿਕਸ੍ਸਾਤਿ.

ਸਮੁਟ੍ਠਾਨਾਦਿ ਸਬ੍ਬਂ ਦੁਟ੍ਠੁਲ੍ਲਵਾਚਾਸਦਿਸਂ. ਵਿਨੀਤਵਤ੍ਥੂਨਿ ਉਤ੍ਤਾਨਤ੍ਥਾਨੇਵਾਤਿ.

ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.