੧੨. ਦੁਬ੍ਬਚਸਿਕ੍ਖਾਪਦਵਣ੍ਣਨਾ

੪੨੪. ਤੇਨ ਸਮਯੇਨ ਬੁਦ੍ਧੋ ਭਗਵਾਤਿ ਦੁਬ੍ਬਚਸਿਕ੍ਖਾਪਦਂ. ਤਤ੍ਥ ਅਨਾਚਾਰਂ ਆਚਰਤੀਤਿ ਅਨੇਕਪ੍ਪਕਾਰਂ ਕਾਯਵਚੀਦ੍ਵਾਰਵੀਤਿਕ੍ਕਮਂ ਕਰੋਤਿ. ਕਿਂ ਨੁ ਖੋ ਨਾਮਾਤਿ ਵਮ੍ਭਨਵਚਨਮੇਤਂ. ਅਹਂ ਖੋ ਨਾਮਾਤਿ ਉਕ੍ਕਂਸਵਚਨਂ. ਤੁਮ੍ਹੇ ਵਦੇਯ੍ਯਨ੍ਤਿ ‘‘ਇਦਂ ਕਰੋਥ, ਇਦਂ ਮਾ ਕਰੋਥਾ’’ਤਿ ਅਹਂ ਤੁਮ੍ਹੇ ਵਤ੍ਤੁਂ ਅਰਹਾਮੀਤਿ ਦਸ੍ਸੇਤਿ. ਕਸ੍ਮਾਤਿ ਚੇ? ਯਸ੍ਮਾ ਅਮ੍ਹਾਕਂ ਬੁਦ੍ਧੋ ਭਗਵਾ ਕਣ੍ਟਕਂ ਆਰੁਯ੍ਹ ਮਯਾ ਸਦ੍ਧਿਂ ਨਿਕ੍ਖਮਿਤ੍ਵਾ ਪਬ੍ਬਜਿਤੋਤਿਏਵਮਾਦਿਮਤ੍ਥਂ ਸਨ੍ਧਾਯਾਹ. ‘‘ਅਮ੍ਹਾਕਂ ਧਮ੍ਮੋ’’ਤਿ ਵਤ੍ਵਾ ਪਨ ਅਤ੍ਤਨੋ ਸਨ੍ਤਕਭਾਵੇ ਯੁਤ੍ਤਿਂ ਦਸ੍ਸੇਨ੍ਤੋ ‘‘ਅਮ੍ਹਾਕਂ ਅਯ੍ਯਪੁਤ੍ਤੇਨ ਧਮ੍ਮੋ ਅਭਿਸਮਿਤੋ’’ਤਿ ਆਹ. ਯਸ੍ਮਾ ਅਮ੍ਹਾਕਂ ਅਯ੍ਯਪੁਤ੍ਤੇਨ ਚਤੁਸਚ੍ਚਧਮ੍ਮੋ ਪਟਿਵਿਦ੍ਧੋ, ਤਸ੍ਮਾ ਧਮ੍ਮੋਪਿ ਅਮ੍ਹਾਕਨ੍ਤਿ ਵੁਤ੍ਤਂ ਹੋਤਿ. ਸਙ੍ਘਂ ਪਨ ਅਤ੍ਤਨੋ ਵੇਰਿਪਕ੍ਖੇ ਠਿਤਂ ਮਞ੍ਞਮਾਨੋ ਅਮ੍ਹਾਕਂ ਸਙ੍ਘੋਤਿ ਨ ਵਦਤਿ. ਉਪਮਂ ਪਨ ਵਤ੍ਵਾ ਸਙ੍ਘਂ ਅਪਸਾਦੇਤੁਕਾਮੋ ‘‘ਸੇਯ੍ਯਥਾਪਿ ਨਾਮਾ’’ਤਿਆਦਿਮਾਹ. ਤਿਣਕਟ੍ਠਪਣ੍ਣਸਟਨ੍ਤਿ ਤਤ੍ਥ ਤਤ੍ਥ ਪਤਿਤਂ ਤਿਣਕਟ੍ਠਪਣ੍ਣਂ. ਅਥ ਵਾ ਤਿਣਞ੍ਚ ਨਿਸ੍ਸਾਰਕਂ ਲਹੁਕਂ ਕਟ੍ਠਞ੍ਚ ਤਿਣਕਟ੍ਠਂ. ਪਣ੍ਣਸਟਨ੍ਤਿ ਪੁਰਾਣਪਣ੍ਣਂ. ਉਸ੍ਸਾਰੇਯ੍ਯਾਤਿ ਰਾਸਿਂ ਕਰੇਯ੍ਯ.

ਪਬ੍ਬਤੇਯ੍ਯਾਤਿ ਪਬ੍ਬਤਪ੍ਪਭਵਾ, ਸਾ ਹਿ ਸੀਘਸੋਤਾ ਹੋਤਿ, ਤਸ੍ਮਾ ਤਮੇਵ ਗਣ੍ਹਾਤਿ. ਸਙ੍ਖਸੇਵਾਲਪਣਕਨ੍ਤਿ ਏਤ੍ਥ ਸਙ੍ਖੋਤਿ ਦੀਘਮੂਲਕੋ ਪਣ੍ਣਸੇਵਾਲੋ ਵੁਚ੍ਚਤਿ. ਸੇਵਾਲੋਤਿ ਨੀਲਸੇਵਾਲੋ, ਅਵਸੇਸੋ ਉਦਕਪਪ੍ਪਟਕਤਿਲਬੀਜਕਾਦਿ ਸਬ੍ਬੋਪਿ ਪਣਕੋਤਿ ਸਙ੍ਖ੍ਯਂ ਗਚ੍ਛਤਿ. ਏਕਤੋ ਉਸ੍ਸਾਰਿਤਾਤਿ ਏਕਟ੍ਠਾਨੇ ਕੇਨਾਪਿ ਸਮ੍ਪਿਣ੍ਡਿਤਾ ਰਾਸੀਕਤਾਤਿ ਦਸ੍ਸੇਤਿ.

੪੨੫-੬. ਦੁਬ੍ਬਚਜਾਤਿਕੋਤਿ ਦੁਬ੍ਬਚਸਭਾਵੋ ਵਤ੍ਤੁਂ ਅਸਕ੍ਕੁਣੇਯ੍ਯੋਤਿ ਅਤ੍ਥੋ. ਪਦਭਾਜਨੇਪਿਸ੍ਸ ਦੁਬ੍ਬਚੋਤਿ ਦੁਕ੍ਖੇਨ ਕਿਚ੍ਛੇਨ ਵਦਿਤਬ੍ਬੋ, ਨ ਸਕ੍ਕਾ ਸੁਖੇਨ ਵਤ੍ਤੁਨ੍ਤਿ ਅਤ੍ਥੋ. ਦੋਵਚਸ੍ਸਕਰਣੇਹੀਤਿ ਦੁਬ੍ਬਚਭਾਵਕਰਣੀਯੇਹਿ, ਯੇ ਧਮ੍ਮਾ ਦੁਬ੍ਬਚਂ ਪੁਗ੍ਗਲਂ ਕਰੋਨ੍ਤਿ, ਤੇਹਿ ਸਮਨ੍ਨਾਗਤੋਤਿ ਅਤ੍ਥੋ. ਤੇ ਪਨ ‘‘ਕਤਮੇ ਚ, ਆਵੁਸੋ, ਦੋਵਚਸ੍ਸਕਰਣਾ ਧਮ੍ਮਾ? ਇਧਾਵੁਸੋ, ਭਿਕ੍ਖੁ ਪਾਪਿਚ੍ਛੋ ਹੋਤੀ’’ਤਿਆਦਿਨਾ ਨਯੇਨ ਪਟਿਪਾਟਿਯਾ ਅਨੁਮਾਨਸੁਤ੍ਤੇ (ਮ. ਨਿ. ੧.੧੮੧) ਆਗਤਾ ਪਾਪਿਚ੍ਛਤਾ, ਅਤ੍ਤੁਕ੍ਕਂਸਕਪਰਵਮ੍ਭਕਤਾ, ਕੋਧਨਤਾ, ਕੋਧਹੇਤੁ ਉਪਨਾਹਿਤਾ, ਕੋਧਹੇਤੁਅਭਿਸਙ੍ਗਿਤਾ, ਕੋਧਹੇਤੁਕੋਧਸਾਮਨ੍ਤਵਾਚਾਨਿਚ੍ਛਾਰਣਤਾ, ਚੋਦਕਂ ਪਟਿਪ੍ਫਰਣਤਾ, ਚੋਦਕਂ ਅਪਸਾਦਨਤਾ, ਚੋਦਕਸ੍ਸ ਪਚ੍ਚਾਰੋਪਨਤਾ, ਅਞ੍ਞੇਨ ਅਞ੍ਞਂਪਟਿਚਰਣਤਾ, ਅਪਦਾਨੇਨ ਨ ਸਮ੍ਪਾਯਨਤਾ, ਮਕ੍ਖਿਪਲ਼ਾਸਿਤਾ, ਇਸ੍ਸੁਕੀਮਚ੍ਛਰਿਤਾ, ਸਠਮਾਯਾਵਿਤਾ, ਥਦ੍ਧਾਤਿਮਾਨਿਤਾ, ਸਨ੍ਦਿਟ੍ਠਿਪਰਾਮਾਸਿਆਧਾਨਗ੍ਗਹਿਦੁਪ੍ਪਟਿਨਿਸ੍ਸਗ੍ਗਿਤਾਤਿ ਏਕੂਨਵੀਸਤਿ ਧਮ੍ਮਾ ਵੇਦਿਤਬ੍ਬਾ.

ਓਵਾਦਂ ਨਕ੍ਖਮਤਿ ਨ ਸਹਤੀਤਿ ਅਕ੍ਖਮੋ. ਯਥਾਨੁਸਿਟ੍ਠਂ ਅਪ੍ਪਟਿਪਜ੍ਜਨਤੋ ਪਦਕ੍ਖਿਣੇਨ ਅਨੁਸਾਸਨਿਂ ਨ ਗਣ੍ਹਾਤੀਤਿ ਅਪ੍ਪਦਕ੍ਖਿਣਗ੍ਗਾਹੀ ਅਨੁਸਾਸਨਿਂ.

ਉਦ੍ਦੇਸਪਰਿਯਾਪਨ੍ਨੇਸੂਤਿ ਉਦ੍ਦੇਸੇ ਪਰਿਯਾਪਨ੍ਨੇਸੁ ਅਨ੍ਤੋਗਧੇਸੁ. ‘‘ਯਸ੍ਸ ਸਿਯਾ ਆਪਤ੍ਤਿ, ਸੋ ਆਵਿਕਰੇਯ੍ਯਾ’’ਤਿ ਏਵਂ ਸਙ੍ਗਹਿਤਤ੍ਤਾ ਅਨ੍ਤੋ ਪਾਤਿਮੋਕ੍ਖਸ੍ਸ ਵਤ੍ਤਮਾਨੇਸੂਤਿ ਅਤ੍ਥੋ. ਸਹਧਮ੍ਮਿਕਂ ਵੁਚ੍ਚਮਾਨੋਤਿ ਸਹਧਮ੍ਮਿਕੇਨ ਵੁਚ੍ਚਮਾਨੋ ਕਰਣਤ੍ਥੇ ਉਪਯੋਗਵਚਨਂ, ਪਞ੍ਚਹਿ ਸਹਧਮ੍ਮਿਕੇਹਿ ਸਿਕ੍ਖਿਤਬ੍ਬਤ੍ਤਾ ਤੇਸਂ ਵਾ ਸਨ੍ਤਕਤ੍ਤਾ ਸਹਧਮ੍ਮਿਕਨ੍ਤਿ ਲਦ੍ਧਨਾਮੇਨ ਬੁਦ੍ਧਪਞ੍ਞਤ੍ਤੇਨ ਸਿਕ੍ਖਾਪਦੇਨ ਵੁਚ੍ਚਮਾਨੋਤਿ ਅਤ੍ਥੋ.

ਵਿਰਮਥਾਯਸ੍ਮਨ੍ਤੋ ਮਮ ਵਚਨਾਯਾਤਿ ਯੇਨ ਵਚਨੇਨ ਮਂ ਵਦਥ, ਤਤੋ ਮਮ ਵਚਨਤੋ ਵਿਰਮਥ. ਮਾ ਮਂ ਤਂ ਵਚਨਂ ਵਦਥਾਤਿ ਵੁਤ੍ਤਂ ਹੋਤਿ.

ਵਦਤੁ ਸਹਧਮ੍ਮੇਨਾਤਿ ਸਹਧਮ੍ਮਿਕੇਨ ਸਿਕ੍ਖਾਪਦੇਨ ਸਹਧਮ੍ਮੇਨ ਵਾ ਅਞ੍ਞੇਨਪਿ ਪਾਸਾਦਿਕਭਾਵਸਂਵਤ੍ਤਨਿਕੇਨ ਵਚਨੇਨ ਵਦਤੁ. ਯਦਿਦਨ੍ਤਿ ਵੁਡ੍ਢਿਕਾਰਣਨਿਦਸ੍ਸਨਤ੍ਥੇ ਨਿਪਾਤੋ. ਤੇਨ ‘‘ਯਂ ਇਦਂ ਅਞ੍ਞਮਞ੍ਞਸ੍ਸ ਹਿਤਵਚਨਂ ਆਪਤ੍ਤਿਤੋ ਵੁਟ੍ਠਾਪਨਞ੍ਚ ਤੇਨ ਅਞ੍ਞਮਞ੍ਞਵਚਨੇਨ ਅਞ੍ਞਮਞ੍ਞਵੁਟ੍ਠਾਪਨੇਨ ਚ ਸਂਵਡ੍ਢਾ ਪਰਿਸਾ’’ਤਿ ਏਵਂ ਪਰਿਸਾਯ ਵੁਡ੍ਢਿਕਾਰਣਂ ਦਸ੍ਸਿਤਂ ਹੋਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ.

ਸਮੁਟ੍ਠਾਨਾਦੀਨਿ ਪਠਮਸਙ੍ਘਭੇਦਸਦਿਸਾਨੇਵਾਤਿ.

ਦੁਬ੍ਬਚਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.