੧੩. ਕੁਲਦੂਸਕਸਿਕ੍ਖਾਪਦਵਣ੍ਣਨਾ

੪੩੧. ਤੇਨ ਸਮਯੇਨ ਬੁਦ੍ਧੋ ਭਗਵਾਤਿ ਕੁਲਦੂਸਕਸਿਕ੍ਖਾਪਦਂ. ਤਤ੍ਥ ਅਸ੍ਸਜਿਪੁਨਬ੍ਬਸੁਕਾ ਨਾਮਾਤਿ ਅਸ੍ਸਜਿ ਚੇਵ ਪੁਨਬ੍ਬਸੁਕੋ ਚ. ਕੀਟਾਗਿਰਿਸ੍ਮਿਨ੍ਤਿ ਏਵਂਨਾਮਕੇ ਜਨਪਦੇ. ਆਵਾਸਿਕਾ ਹੋਨ੍ਤੀਤਿ ਏਤ੍ਥ ਆਵਾਸੋ ਏਤੇਸਂ ਅਤ੍ਥੀਤਿ ਆਵਾਸਿਕਾ. ‘‘ਆਵਾਸੋ’’ਤਿ ਵਿਹਾਰੋ ਵੁਚ੍ਚਤਿ. ਸੋ ਯੇਸਂ ਆਯਤ੍ਤੋ ਨਵਕਮ੍ਮਕਰਣਪੁਰਾਣਪਟਿਸਙ੍ਖਰਣਾਦਿਭਾਰਹਾਰਤਾਯ, ਤੇ ਆਵਾਸਿਕਾ. ਯੇ ਪਨ ਕੇਵਲਂ ਵਿਹਾਰੇ ਵਸਨ੍ਤਿ, ਤੇ ਨੇਵਾਸਿਕਾਤਿ ਵੁਚ੍ਚਨ੍ਤਿ. ਇਮੇ ਆਵਾਸਿਕਾ ਅਹੇਸੁਂ. ਅਲਜ੍ਜਿਨੋ ਪਾਪਭਿਕ੍ਖੂਤਿ ਨਿਲ੍ਲਜ੍ਜਾ ਲਾਮਕਭਿਕ੍ਖੂ, ਤੇ ਹਿ ਛਬ੍ਬਗ੍ਗਿਯਾਨਂ ਜੇਟ੍ਠਕਛਬ੍ਬਗ੍ਗਿਯਾ.

ਸਾਵਤ੍ਥਿਯਂ ਕਿਰ ਛ ਜਨਾ ਸਹਾਯਕਾ ‘‘ਕਸਿਕਮ੍ਮਾਦੀਨਿ ਦੁਕ੍ਕਰਾਨਿ, ਹਨ੍ਦ ਮਯਂ ਸਮ੍ਮਾ ਪਬ੍ਬਜਾਮ! ਪਬ੍ਬਜਨ੍ਤੇਹਿ ਚ ਉਪ੍ਪਨ੍ਨੇ ਕਿਚ੍ਚੇ ਨਿਤ੍ਥਰਣਕਟ੍ਠਾਨੇ ਪਬ੍ਬਜਿਤੁਂ ਵਟ੍ਟਤੀ’’ਤਿ ਸਮ੍ਮਨ੍ਤਯਿਤ੍ਵਾ ਦ੍ਵਿਨ੍ਨਂ ਅਗ੍ਗਸਾਵਕਾਨਂ ਸਨ੍ਤਿਕੇ ਪਬ੍ਬਜਿਂਸੁ. ਤੇ ਪਞ੍ਚਵਸ੍ਸਾ ਹੁਤ੍ਵਾ ਮਾਤਿਕਂ ਪਗੁਣਂ ਕਤ੍ਵਾ ਮਨ੍ਤਯਿਂਸੁ ‘‘ਜਨਪਦੋ ਨਾਮ ਕਦਾਚਿ ਸੁਭਿਕ੍ਖੋ ਹੋਤਿ ਕਦਾਚਿ ਦੁਬ੍ਭਿਕ੍ਖੋ, ਮਯਂ ਮਾ ਏਕਟ੍ਠਾਨੇ ਵਸਿਮ੍ਹ, ਤੀਸੁ ਠਾਨੇਸੁ ਵਸਾਮਾ’’ਤਿ. ਤਤੋ ਪਣ੍ਡੁਕਲੋਹਿਤਕੇ ਆਹਂਸੁ – ‘‘ਆਵੁਸੋ, ਸਾਵਤ੍ਥਿ ਨਾਮ ਸਤ੍ਤਪਞ੍ਞਾਸਾਯ ਕੁਲਸਤਸਹਸ੍ਸੇਹਿ ਅਜ੍ਝਾਵੁਤ੍ਥਾ, ਅਸੀਤਿਗਾਮਸਹਸ੍ਸਪਟਿਮਣ੍ਡਿਤਾਨਂ ਤਿਯੋਜਨਸਤਿਕਾਨਂ ਦ੍ਵਿਨ੍ਨਂ ਕਾਸਿਕੋਸਲਰਟ੍ਠਾਨਂ ਆਯਮੁਖਭੂਤਾ, ਤਤ੍ਰ ਤੁਮ੍ਹੇ ਧੁਰਟ੍ਠਾਨੇਯੇਵ ਪਰਿਵੇਣਾਨਿ ਕਾਰੇਤ੍ਵਾ ਅਮ੍ਬਪਨਸਨਾਲ਼ਿਕੇਰਾਦੀਨਿ ਰੋਪੇਤ੍ਵਾ ਪੁਪ੍ਫੇਹਿ ਚ ਫਲੇਹਿ ਚ ਕੁਲਾਨਿ ਸਙ੍ਗਣ੍ਹਨ੍ਤਾ ਕੁਲਦਾਰਕੇ ਪਬ੍ਬਾਜੇਤ੍ਵਾ ਪਰਿਸਂ ਵਡ੍ਢੇਥਾ’’ਤਿ.

ਮੇਤ੍ਤਿਯਭੂਮਜਕੇ ਆਹਂਸੁ – ‘‘ਆਵੁਸੋ, ਰਾਜਗਹਂ ਨਾਮ ਅਟ੍ਠਾਰਸਹਿ ਮਨੁਸ੍ਸਕੋਟੀਹਿ ਅਜ੍ਝਾਵੁਤ੍ਥਂ ਅਸੀਤਿਗਾਮਸਹਸ੍ਸਪਟਿਮਣ੍ਡਿਤਾਨਂ ਤਿਯੋਜਨਸਤਿਕਾਨਂ ਦ੍ਵਿਨ੍ਨਂ ਅਙ੍ਗਮਗਧਰਟ੍ਠਾਨਂ ਆਯਮੁਖਭੂਤਂ, ਤਤ੍ਰ ਤੁਮ੍ਹੇ ਧੁਰਟ੍ਠਾਨੇਯੇਵ…ਪੇ… ਪਰਿਸਂ ਵਡ੍ਢੇਥਾ’’ਤਿ.

ਅਸ੍ਸਜਿਪੁਨਬ੍ਬਸੁਕੇ ਆਹਂਸੁ – ‘‘ਆਵੁਸੋ, ਕੀਟਾਗਿਰਿ ਨਾਮ ਦ੍ਵੀਹਿ ਮੇਘੇਹਿ ਅਨੁਗ੍ਗਹਿਤੋ ਤੀਣਿ ਸਸ੍ਸਾਨਿ ਪਸਵਨ੍ਤਿ, ਤਤ੍ਰ ਤੁਮ੍ਹੇ ਧੁਰਟ੍ਠਾਨੇਯੇਵ ਪਰਿਵੇਣਾਨਿ ਕਾਰੇਤ੍ਵਾ…ਪੇ… ਪਰਿਸਂ ਵਡ੍ਢੇਥਾ’’ਤਿ. ਤੇ ਤਥਾ ਅਕਂਸੁ. ਤੇਸੁ ਏਕਮੇਕਸ੍ਸ ਪਕ੍ਖਸ੍ਸ ਪਞ੍ਚ ਪਞ੍ਚ ਭਿਕ੍ਖੁਸਤਾਨਿ ਪਰਿਵਾਰਾ, ਏਵਂ ਸਮਧਿਕਂ ਦਿਯਡ੍ਢਭਿਕ੍ਖੁਸਹਸ੍ਸਂ ਹੋਤਿ. ਤਤ੍ਰ ਪਣ੍ਡੁਕਲੋਹਿਤਕਾ ਸਪਰਿਵਾਰਾ ਸੀਲਵਨ੍ਤੋਵ ਭਗਵਤਾ ਸਦ੍ਧਿਂ ਜਨਪਦਚਾਰਿਕਮ੍ਪਿ ਚਰਨ੍ਤਿ, ਤੇ ਅਕਤਵਤ੍ਥੁਂ ਉਪ੍ਪਾਦੇਨ੍ਤਿ, ਪਞ੍ਞਤ੍ਤਸਿਕ੍ਖਾਪਦਂ ਪਨ ਨ ਮਦ੍ਦਨ੍ਤਿ, ਇਤਰੇ ਸਬ੍ਬੇ ਅਲਜ੍ਜਿਨੋ ਅਕਤਵਤ੍ਥੁਞ੍ਚ ਉਪ੍ਪਾਦੇਨ੍ਤਿ, ਪਞ੍ਞਤ੍ਤਸਿਕ੍ਖਾਪਦਞ੍ਚ ਮਦ੍ਦਨ੍ਤਿ, ਤੇਨ ਵੁਤ੍ਤਂ – ‘‘ਅਲਜ੍ਜਿਨੋ ਪਾਪਭਿਕ੍ਖੂ’’ਤਿ.

ਏਵਰੂਪਨ੍ਤਿ ਏਵਂਜਾਤਿਕਂ. ਅਨਾਚਾਰਂ ਆਚਰਨ੍ਤੀਤਿ ਅਨਾਚਰਿਤਬ੍ਬਂ ਆਚਰਨ੍ਤਿ, ਅਕਾਤਬ੍ਬਂ ਕਰੋਨ੍ਤਿ. ਮਾਲਾਵਚ੍ਛਨ੍ਤਿ ਤਰੁਣਪੁਪ੍ਫਰੁਕ੍ਖਂ, ਤਰੁਣਕਾ ਹਿ ਪੁਪ੍ਫਰੁਕ੍ਖਾਪਿ ਪੁਪ੍ਫਗਚ੍ਛਾਪਿ ਮਾਲਾਵਚ੍ਛਾ ਤ੍ਵੇਵ ਵੁਚ੍ਚਨ੍ਤਿ, ਤੇ ਚ ਅਨੇਕਪ੍ਪਕਾਰਂ ਮਾਲਾਵਚ੍ਛਂ ਸਯਮ੍ਪਿ ਰੋਪੇਨ੍ਤਿ, ਅਞ੍ਞੇਨਪਿ ਰੋਪਾਪੇਨ੍ਤਿ, ਤੇਨ ਵੁਤ੍ਤਂ – ‘‘ਮਾਲਾਵਚ੍ਛਂ ਰੋਪੇਨ੍ਤਿਪਿ ਰੋਪਾਪੇਨ੍ਤਿਪੀ’’ਤਿ. ਸਿਞ੍ਚਨ੍ਤੀਤਿ ਸਯਮੇਵ ਉਦਕੇਨ ਸਿਞ੍ਚਨ੍ਤਿ. ਸਿਞ੍ਚਾਪੇਨ੍ਤੀਤਿ ਅਞ੍ਞੇਨਪਿ ਸਿਞ੍ਚਾਪੇਨ੍ਤਿ.

ਏਤ੍ਥ ਪਨ ਅਕਪ੍ਪਿਯਵੋਹਾਰੋ ਕਪ੍ਪਿਯਵੋਹਾਰੋ ਪਰਿਯਾਯੋ ਓਭਾਸੋ ਨਿਮਿਤ੍ਤਕਮ੍ਮਨ੍ਤਿ ਇਮਾਨਿ ਪਞ੍ਚ ਜਾਨਿਤਬ੍ਬਾਨਿ. ਤਤ੍ਥ ਅਕਪ੍ਪਿਯਵੋਹਾਰੋ ਨਾਮ ਅਲ੍ਲਹਰਿਤਾਨਂ ਕੋਟ੍ਟਨਂ ਕੋਟ੍ਟਾਪਨਂ, ਆਵਾਟਸ੍ਸ ਖਣਨਂ ਖਣਾਪਨਂ, ਮਾਲਾਵਚ੍ਛਸ੍ਸ ਰੋਪਨਂ ਰੋਪਾਪਨਂ, ਆਲ਼ਿਯਾ ਬਨ੍ਧਨਂ ਬਨ੍ਧਾਪਨਂ, ਉਦਕਸ੍ਸ ਸੇਚਨਂ ਸੇਚਾਪਨਂ, ਮਾਤਿਕਾਯ ਸਮ੍ਮੁਖਕਰਣਂ ਕਪ੍ਪਿਯਉਦਕਸਿਞ੍ਚਨਂ ਹਤ੍ਥਮੁਖਪਾਦਧੋਵਨਨ੍ਹਾਨੋਦਕਸਿਞ੍ਚਨਨ੍ਤਿ. ਕਪ੍ਪਿਯਵੋਹਾਰੋ ਨਾਮ ‘‘ਇਮਂ ਰੁਕ੍ਖਂ ਜਾਨ, ਇਮਂ ਆਵਾਟਂ ਜਾਨ, ਇਮਂ ਮਾਲਾਵਚ੍ਛਂ ਜਾਨ, ਏਤ੍ਥ ਉਦਕਂ ਜਾਨਾ’’ਤਿ ਵਚਨਂ ਸੁਕ੍ਖਮਾਤਿਕਾਯ ਉਜੁਕਰਣਞ੍ਚ. ਪਰਿਯਾਯੋ ਨਾਮ ‘‘ਪਣ੍ਡਿਤੇਨ ਨਾਮ ਮਾਲਾਵਚ੍ਛਾਦਯੋ ਰੋਪਾਪੇਤਬ੍ਬਾ ਨਚਿਰਸ੍ਸੇਵ ਉਪਕਾਰਾਯ ਸਂਵਤ੍ਤਨ੍ਤੀ’’ਤਿਆਦਿਵਚਨਂ. ਓਭਾਸੋ ਨਾਮ ਕੁਦਾਲਖਣਿਤ੍ਤਾਦੀਨਿ ਚ ਮਾਲਾਵਚ੍ਛੇ ਚ ਗਹੇਤ੍ਵਾ ਠਾਨਂ, ਏਵਂ ਠਿਤਞ੍ਹਿ ਸਾਮਣੇਰਾਦਯੋ ਦਿਸ੍ਵਾ ਥੇਰੋ ਕਾਰਾਪੇਤੁਕਾਮੋਤਿ ਗਨ੍ਤ੍ਵਾ ਕਰੋਨ੍ਤਿ. ਨਿਮਿਤ੍ਤਕਮ੍ਮਂ ਨਾਮ ਕੁਦਾਲ-ਖਣਿਤ੍ਤਿ-ਵਾਸਿ-ਫਰਸੁ-ਉਦਕਭਾਜਨਾਨਿ ਆਹਰਿਤ੍ਵਾ ਸਮੀਪੇ ਠਪਨਂ.

ਇਮਾਨਿ ਪਞ੍ਚਪਿ ਕੁਲਸਙ੍ਗਹਤ੍ਥਾਯ ਰੋਪਨੇ ਨ ਵਟ੍ਟਨ੍ਤਿ, ਫਲਪਰਿਭੋਗਤ੍ਥਾਯ ਕਪ੍ਪਿਯਾਕਪ੍ਪਿਯਵੋਹਾਰਦ੍ਵਯਮੇਵ ਨ ਵਟ੍ਟਤਿ, ਇਤਰਤ੍ਤਯਂ ਵਟ੍ਟਤਿ. ਮਹਾਪਚ੍ਚਰਿਯਂ ਪਨ ‘‘ਕਪ੍ਪਿਯਵੋਹਾਰੋਪਿ ਵਟ੍ਟਤਿ. ਯਞ੍ਚ ਅਤ੍ਤਨੋ ਪਰਿਭੋਗਤ੍ਥਾਯ ਵਟ੍ਟਤਿ, ਤਂ ਅਞ੍ਞਪੁਗ੍ਗਲਸ੍ਸ ਵਾ ਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਅਤ੍ਥਾਯਪਿ ਵਟ੍ਟਤੀ’’ਤਿ ਵੁਤ੍ਤਂ.

ਆਰਾਮਤ੍ਥਾਯ ਪਨ ਵਨਤ੍ਥਾਯਚ ਛਾਯਤ੍ਥਾਯ ਚ ਅਕਪ੍ਪਿਯਵੋਹਾਰਮਤ੍ਤਮੇਵ ਨ ਚ ਵਟ੍ਟਤਿ, ਸੇਸਂ ਵਟ੍ਟਤਿ, ਨ ਕੇਵਲਞ੍ਚ ਸੇਸਂ ਯਂਕਿਞ੍ਚਿ ਮਾਤਿਕਮ੍ਪਿ ਉਜੁਂ ਕਾਤੁਂ ਕਪ੍ਪਿਯਉਦਕਂ ਸਿਞ੍ਚਿਤੁਂ ਨ੍ਹਾਨਕੋਟ੍ਠਕਂ ਕਤ੍ਵਾ ਨ੍ਹਾਯਿਤੁਂ ਹਤ੍ਥਪਾਦਮੁਖਧੋਵਨੁਦਕਾਨਿ ਚ ਤਤ੍ਥ ਛਡ੍ਡੇਤੁਮ੍ਪਿ ਵਟ੍ਟਤਿ. ਮਹਾਪਚ੍ਚਰਿਯਂ ਪਨ ਕੁਰੁਨ੍ਦਿਯਞ੍ਚ ‘‘ਕਪ੍ਪਿਯਪਥਵਿਯਂ ਸਯਂ ਰੋਪੇਤੁਮ੍ਪਿ ਵਟ੍ਟਤੀ’’ਤਿ ਵੁਤ੍ਤਂ. ਆਰਾਮਾਦਿਅਤ੍ਥਾਯ ਪਨ ਰੋਪਿਤਸ੍ਸ ਵਾ ਰੋਪਾਪਿਤਸ੍ਸ ਵਾ ਫਲਂ ਪਰਿਭੁਞ੍ਜਿਤੁਮ੍ਪਿ ਵਟ੍ਟਤਿ.

ਓਚਿਨਨਓਚਿਨਾਪਨੇ ਪਕਤਿਯਾਪਿ ਪਾਚਿਤ੍ਤਿਯਂ. ਕੁਲਦੂਸਨਤ੍ਥਾਯ ਪਨ ਪਾਚਿਤ੍ਤਿਯਞ੍ਚੇਵ ਦੁਕ੍ਕਟਞ੍ਚ. ਗਨ੍ਥਨਾਦੀਸੁ ਚ ਉਰਚ੍ਛਦਪਰਿਯੋਸਾਨੇਸੁ ਕੁਲਦੂਸਨਤ੍ਥਾਯ ਅਞ੍ਞਤ੍ਥਾਯ ਵਾ ਕਰੋਨ੍ਤਸ੍ਸ ਦੁਕ੍ਕਟਮੇਵ. ਕਸ੍ਮਾ? ਅਨਾਚਾਰਤ੍ਤਾ, ‘‘ਪਾਪਸਮਾਚਾਰੋ’’ਤਿ ਏਤ੍ਥ ਵੁਤ੍ਤਪਾਪਸਮਾਚਾਰਤ੍ਤਾ ਚ. ਆਰਾਮਾਦਿਅਤ੍ਥਾਯ ਰੁਕ੍ਖਰੋਪਨੇ ਵਿਯ ਵਤ੍ਥੁਪੂਜਨਤ੍ਥਾਯ ਕਸ੍ਮਾ ਨ ਅਨਾਪਤ੍ਤੀਤਿ ਚੇ? ਅਨਾਪਤ੍ਤਿਯੇਵ. ਯਥਾ ਹਿ ਤਤ੍ਥ ਕਪ੍ਪਿਯਵੋਹਾਰੇਨ ਪਰਿਯਾਯਾਦੀਹਿ ਚ ਅਨਾਪਤ੍ਤਿ ਤਥਾ ਵਤ੍ਥੁਪੂਜਤ੍ਥਾਯਪਿ ਅਨਾਪਤ੍ਤਿਯੇਵ.

ਨਨੁ ਚ ਤਤ੍ਥ ‘‘ਕਪ੍ਪਿਯਪਥਵਿਯਂ ਸਯਂ ਰੋਪੇਤੁਮ੍ਪਿ ਵਟ੍ਟਤੀ’’ਤਿ ਵੁਤ੍ਤਨ੍ਤਿ? ਵੁਤ੍ਤਂ, ਨ ਪਨ ਮਹਾਅਟ੍ਠਕਥਾਯਂ. ਅਥਾਪਿ ਮਞ੍ਞੇਯ੍ਯਾਸਿ ਇਤਰਾਸੁ ਵੁਤ੍ਤਮ੍ਪਿ ਪਮਾਣਂ. ਮਹਾਅਟ੍ਠਕਥਾਯਞ੍ਚ ਕਪ੍ਪਿਯਉਦਕਸੇਚਨਂ ਵੁਤ੍ਤਂ, ਤਂ ਕਥਨ੍ਤਿ? ਤਮ੍ਪਿ ਨ ਵਿਰੁਜ੍ਝਤਿ. ਤਤ੍ਰ ਹਿ ਅਵਿਸੇਸੇਨ ‘‘ਰੁਕ੍ਖਂ ਰੋਪੇਨ੍ਤਿਪਿ ਰੋਪਾਪੇਨ੍ਤਿਪਿ, ਸਿਞ੍ਚਨ੍ਤਿਪਿ ਸਿਞ੍ਚਾਪੇਨ੍ਤਿਪੀ’’ਤਿ ਵਤ੍ਤਬ੍ਬੇ ‘‘ਮਾਲਾਵਚ੍ਛ’’ਨ੍ਤਿ ਵਦਨ੍ਤੋ ਞਾਪੇਤਿ ‘‘ਕੁਲਸਙ੍ਗਹਤ੍ਥਾਯ ਪੁਪ੍ਫਫਲੂਪਗਮੇਵ ਸਨ੍ਧਾਯੇਤਂ ਵੁਤ੍ਤਂ, ਅਞ੍ਞਤ੍ਰ ਪਨ ਪਰਿਯਾਯੋ ਅਤ੍ਥੀ’’ਤਿ. ਤਸ੍ਮਾ ਤਤ੍ਥ ਪਰਿਯਾਯਂ, ਇਧ ਚ ਪਰਿਯਾਯਾਭਾਵਂ ਞਤ੍ਵਾ ਯਂ ਅਟ੍ਠਕਥਾਸੁ ਵੁਤ੍ਤਂ, ਤਂ ਸੁਵੁਤ੍ਤਮੇਵ. ਵੁਤ੍ਤਞ੍ਚੇਤਂ –

‘‘ਬੁਦ੍ਧੇਨ ਧਮ੍ਮੋ ਵਿਨਯੋ ਚ ਵੁਤ੍ਤੋ;

ਯੋ ਤਸ੍ਸ ਪੁਤ੍ਤੇਹਿ ਤਥੇਵ ਞਾਤੋ;

ਸੋ ਯੇਹਿ ਤੇਸਂ ਮਤਿਮਚ੍ਚਜਨ੍ਤਾ;

ਯਸ੍ਮਾ ਪੁਰੇ ਅਟ੍ਠਕਥਾ ਅਕਂਸੁ.

‘‘ਤਸ੍ਮਾ ਹਿ ਯਂ ਅਟ੍ਠਕਥਾਸੁ ਵੁਤ੍ਤਂ;

ਤਂ ਵਜ੍ਜਯਿਤ੍ਵਾਨ ਪਮਾਦਲੇਖਂ;

ਸਬ੍ਬਮ੍ਪਿ ਸਿਕ੍ਖਾਸੁ ਸਗਾਰਵਾਨਂ;

ਯਸ੍ਮਾ ਪਮਾਣਂ ਇਧ ਪਣ੍ਡਿਤਾਨ’’ਨ੍ਤਿ.

ਸਬ੍ਬਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਤਤ੍ਥ ਸਿਯਾ ਯਦਿ ਵਤ੍ਥੁਪੂਜਨਤ੍ਥਾਯਪਿ ਗਨ੍ਥਾਨਾਦੀਸੁ ਆਪਤ੍ਤਿ, ਹਰਣਾਦੀਸੁ ਕਸ੍ਮਾ ਅਨਾਪਤ੍ਤੀਤਿ? ਕੁਲਿਤ੍ਥੀਆਦੀਨਂ ਅਤ੍ਥਾਯ ਹਰਣਤੋ ਹਰਣਾਧਿਕਾਰੇ ਹਿ ਵਿਸੇਸੇਤ੍ਵਾ ਤੇ ਕੁਲਿਤ੍ਥੀਨਨ੍ਤਿਆਦਿ ਵੁਤ੍ਤਂ, ਤਸ੍ਮਾ ਬੁਦ੍ਧਾਦੀਨਂ ਅਤ੍ਥਾਯ ਹਰਨ੍ਤਸ੍ਸ ਅਨਾਪਤ੍ਤਿ.

ਤਤ੍ਥ ਏਕਤੋਵਣ੍ਟਿਕਨ੍ਤਿ ਪੁਪ੍ਫਾਨਂ ਵਣ੍ਟੇ ਏਕਤੋ ਕਤ੍ਵਾ ਕਤਮਾਲਂ. ਉਭਤੋਵਣ੍ਟਿਕਨ੍ਤਿ ਉਭੋਹਿ ਪਸ੍ਸੇਹਿ ਪੁਪ੍ਫਵਣ੍ਟੇ ਕਤ੍ਵਾ ਕਤਮਾਲਂ. ਮਞ੍ਜਰਿਕਨ੍ਤਿਆਦੀਸੁ ਪਨ ਮਞ੍ਜਰੀ ਵਿਯ ਕਤਾ ਪੁਪ੍ਫਵਿਕਤਿ ਮਞ੍ਜਰਿਕਾਤਿ ਵੁਚ੍ਚਤਿ. ਵਿਧੂਤਿਕਾਤਿ ਸੂਚਿਯਾ ਵਾ ਸਲਾਕਾਯ ਵਾ ਸਿਨ੍ਦੁਵਾਰਪੁਪ੍ਫਾਦੀਨਿ ਵਿਜ੍ਝਿਤ੍ਵਾ ਕਤਾ. ਵਟਂਸਕੋਤਿ ਵਤਂਸਕੋ. ਆਵੇਲ਼ਾਤਿ ਕਣ੍ਣਿਕਾ. ਉਰਚ੍ਛਦੋਤਿ ਹਾਰਸਦਿਸਂ ਉਰੇ ਠਪਨਕਪੁਪ੍ਫਦਾਮਂ. ਅਯਂ ਤਾਵ ਏਤ੍ਥ ਪਦਵਣ੍ਣਨਾ.

ਅਯਂ ਪਨ ਆਦਿਤੋ ਪਟ੍ਠਾਯ ਵਿਤ੍ਥਾਰੇਨ ਆਪਤ੍ਤਿਵਿਨਿਚ੍ਛਯੋ. ਕੁਲਦੂਸਨਤ੍ਥਾਯ ਅਕਪ੍ਪਿਯਪਥਵਿਯਂ ਮਾਲਾਵਚ੍ਛਂ ਰੋਪੇਨ੍ਤਸ੍ਸ ਪਾਚਿਤ੍ਤਿਯਞ੍ਚੇਵ ਦੁਕ੍ਕਟਞ੍ਚ, ਤਥਾ ਅਕਪ੍ਪਿਯਵੋਹਾਰੇਨ ਰੋਪਾਪੇਨ੍ਤਸ੍ਸ. ਕਪ੍ਪਿਯਪਥਵਿਯਂ ਰੋਪਨੇਪਿ ਰੋਪਾਪਨੇਪਿ ਦੁਕ੍ਕਟਮੇਵ. ਉਭਯਤ੍ਥਾਪਿ ਸਕਿਂ ਆਣਤ੍ਤਿਯਾ ਬਹੁਨ੍ਨਮ੍ਪਿ ਰੋਪਨੇ ਏਕਮੇਵ ਸਪਾਚਿਤ੍ਤਿਯਦੁਕ੍ਕਟਂ ਵਾ ਸੁਦ੍ਧਦੁਕ੍ਕਟਂ ਵਾ ਹੋਤਿ. ਪਰਿਭੋਗਤ੍ਥਾਯ ਹਿ ਕਪ੍ਪਿਯਭੂਮਿਯਂ ਵਾ ਅਕਪ੍ਪਿਯਭੂਮਿਯਂ ਵਾ ਕਪ੍ਪਿਯਵੋਹਾਰੇਨ ਰੋਪਾਪਨੇ ਅਨਾਪਤ੍ਤਿ. ਆਰਾਮਾਦਿਅਤ੍ਥਾਯਪਿ ਅਕਪ੍ਪਿਯਪਥਵਿਯਂ ਰੋਪੇਨ੍ਤਸ੍ਸ ਵਾ ਅਕਪ੍ਪਿਯਵਚਨੇਨ ਰੋਪਾਪੇਨ੍ਤਸ੍ਸ ਵਾ ਪਾਚਿਤ੍ਤਿਯਂ. ਅਯਂ ਪਨ ਨਯੋ ਮਹਾਅਟ੍ਠਕਥਾਯਂ ਨ ਸੁਟ੍ਠੁ ਵਿਭਤ੍ਤੋ, ਮਹਾਪਚ੍ਚਰਿਯਂ ਵਿਭਤ੍ਤੋਤਿ.

ਸਿਞ੍ਚਨਸਿਞ੍ਚਾਪਨੇ ਪਨ ਅਕਪ੍ਪਿਯਉਦਕੇਨ ਸਬ੍ਬਤ੍ਥ ਪਾਚਿਤ੍ਤਿਯਂ, ਕੁਲਦੂਸਨਪਰਿਭੋਗਤ੍ਥਾਯ ਦੁਕ੍ਕਟਮ੍ਪਿ. ਕਪ੍ਪਿਯੇਨ ਤੇਸਂਯੇਵ ਦ੍ਵਿਨ੍ਨਮਤ੍ਥਾਯ ਦੁਕ੍ਕਟਂ. ਪਰਿਭੋਗਤ੍ਥਾਯ ਚੇਤ੍ਥ ਕਪ੍ਪਿਯਵੋਹਾਰੇਨ ਸਿਞ੍ਚਾਪਨੇ ਅਨਾਪਤ੍ਤਿ. ਆਪਤ੍ਤਿਟ੍ਠਾਨੇ ਪਨ ਧਾਰਾਵਚ੍ਛੇਦਵਸੇਨ ਪਯੋਗਬਹੁਲਤਾਯ ਆਪਤ੍ਤਿਬਹੁਲਤਾ ਵੇਦਿਤਬ੍ਬਾ.

ਕੁਲਦੂਸਨਤ੍ਥਾਯ ਓਚਿਨਨੇ ਪੁਪ੍ਫਗਣਨਾਯ ਦੁਕ੍ਕਟਪਾਚਿਤ੍ਤਿਯਾਨਿ ਅਞ੍ਞਤ੍ਥ ਪਾਚਿਤ੍ਤਿਯਾਨੇਵ. ਬਹੂਨਿ ਪਨ ਪੁਪ੍ਫਾਨਿ ਏਕਪਯੋਗੇਨ ਓਚਿਨਨ੍ਤੋ ਪਯੋਗਵਸੇਨ ਕਾਰੇਤਬ੍ਬੋ. ਓਚਿਨਾਪਨੇ ਕੁਲਦੂਸਨਤ੍ਥਾਯ ਸਕਿਂ ਆਣਤ੍ਤੋ ਬਹੁਮ੍ਪਿ ਓਚਿਨਤਿ, ਏਕਮੇਵ ਸਪਾਚਿਤ੍ਤਿਯਦੁਕ੍ਕਟਂ, ਅਞ੍ਞਤ੍ਰ ਪਾਚਿਤ੍ਤਿਯਮੇਵ.

ਗਨ੍ਥਨਾਦੀਸੁ ਸਬ੍ਬਾਪਿ ਛ ਪੁਪ੍ਫਵਿਕਤਿਯੋ ਵੇਦਿਤਬ੍ਬਾ – ਗਨ੍ਥਿਮਂ, ਗੋਪ੍ਫਿਮਂ, ਵੇਧਿਮਂ, ਵੇਠਿਮਂ, ਪੂਰਿਮਂ, ਵਾਯਿਮਨ੍ਤਿ. ਤਤ੍ਥ ‘‘ਗਨ੍ਥਿਮਂ’’ ਨਾਮ ਸਦਣ੍ਡਕੇਸੁ ਵਾ ਉਪ੍ਪਲਪਦੁਮਾਦੀਸੁ ਅਞ੍ਞੇਸੁ ਵਾ ਦੀਘਵਣ੍ਟੇਸੁ ਪੁਪ੍ਫੇਸੁ ਦਟ੍ਠਬ੍ਬਂ. ਦਣ੍ਡਕੇਨ ਦਣ੍ਡਕਂ ਵਣ੍ਟੇਨ ਵਾ ਵਣ੍ਟਂ ਗਨ੍ਥੇਤ੍ਵਾ ਕਤਮੇਵ ਹਿ ਗਨ੍ਥਿਮਂ. ਤਂ ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾ ਕਾਤੁਮ੍ਪਿ ਅਕਪ੍ਪਿਯਵਚਨੇਨ ਕਾਰਾਪੇਤੁਮ੍ਪਿ ਨ ਵਟ੍ਟਤਿ. ਏਵਂ ਜਾਨ, ਏਵਂ ਕਤੇ ਸੋਭੇਯ੍ਯ, ਯਥਾ ਏਤਾਨਿ ਪੁਪ੍ਫਾਨਿ ਨ ਵਿਕਿਰਿਯਨ੍ਤਿ ਤਥਾ ਕਰੋਹੀਤਿਆਦਿਨਾ ਪਨ ਕਪ੍ਪਿਯਵਚਨੇਨ ਕਾਰੇਤੁਂ ਵਟ੍ਟਤਿ.

‘‘ਗੋਪ੍ਫਿਮਂ’’ ਨਾਮ ਸੁਤ੍ਤੇਨ ਵਾ ਵਾਕਾਦੀਹਿ ਵਾ ਵਸ੍ਸਿਕਪੁਪ੍ਫਾਦੀਨਂ ਏਕਤੋਵਣ੍ਟਿਕਉਭਤੋਵਣ੍ਟਿਕਮਾਲਾਵਸੇਨ ਗੋਪ੍ਫਨਂ, ਵਾਕਂ ਵਾ ਰਜ੍ਜੁਂ ਵਾ ਦਿਗੁਣਂ ਕਤ੍ਵਾ ਤਤ੍ਥ ਅਵਣ੍ਟਕਾਨਿ ਨੀਪਪੁਪ੍ਫਾਦੀਨਿ ਪਵੇਸੇਤ੍ਵਾ ਪਟਿਪਾਟਿਯਾ ਬਨ੍ਧਨ੍ਤਿ, ਏਤਮ੍ਪਿ ਗੋਪ੍ਫਿਮਮੇਵ. ਸਬ੍ਬਂ ਪੁਰਿਮਨਯੇਨੇਵ ਨ ਵਟ੍ਟਤਿ.

‘‘ਵੇਧਿਮਂ’’ ਨਾਮ ਸਵਣ੍ਟਕਾਨਿ ਵਸ੍ਸਿਕਪੁਪ੍ਫਾਦੀਨਿ ਵਣ੍ਟੇਸੁ, ਅਵਣ੍ਟਕਾਨਿ ਵਾ ਵਕੁਲਪੁਪ੍ਫਾਦੀਨਿ ਅਨ੍ਤੋਛਿਦ੍ਦੇ ਸੂਚਿਤਾਲਹੀਰਾਦੀਹਿ ਵਿਨਿਵਿਜ੍ਝਿਤ੍ਵਾ ਆਵੁਨਨ੍ਤਿ, ਏਤਂ ਵੇਧਿਮਂ ਨਾਮ, ਤਮ੍ਪਿ ਪੁਰਿਮਨਯੇਨੇਵ ਨ ਵਟ੍ਟਤਿ. ਕੇਚਿ ਪਨ ਕਦਲਿਕ੍ਖਨ੍ਧਮ੍ਹਿ ਕਣ੍ਟਕੇ ਵਾ ਤਾਲਹੀਰਾਦੀਨਿ ਵਾ ਪਵੇਸੇਤ੍ਵਾ ਤਤ੍ਥ ਪੁਪ੍ਫਾਨਿ ਵਿਜ੍ਝਿਤ੍ਵਾ ਠਪੇਨ੍ਤਿ, ਕੇਚਿ ਕਣ੍ਟਕਸਾਖਾਸੁ, ਕੇਚਿ ਪੁਪ੍ਫਚ੍ਛਤ੍ਤਪੁਪ੍ਫਕੂਟਾਗਾਰਕਰਣਤ੍ਥਂ ਛਤ੍ਤੇ ਚ ਭਿਤ੍ਤਿਯਞ੍ਚ ਪਵੇਸੇਤ੍ਵਾ ਠਪਿਤਕਣ੍ਟਕੇਸੁ, ਕੇਚਿ ਧਮ੍ਮਾਸਨਵਿਤਾਨੇ ਬਦ੍ਧਕਣ੍ਟਕੇਸੁ, ਕੇਚਿ ਕਣਿਕਾਰਪੁਪ੍ਫਾਦੀਨਿ ਸਲਾਕਾਹਿ ਵਿਜ੍ਝਨ੍ਤਿ, ਛਤ੍ਤਾਧਿਛਤ੍ਤਂ ਵਿਯ ਚ ਕਰੋਨ੍ਤਿ, ਤਂ ਅਤਿਓਲ਼ਾਰਿਕਮੇਵ. ਪੁਪ੍ਫਵਿਜ੍ਝਨਤ੍ਥਂ ਪਨ ਧਮ੍ਮਾਸਨਵਿਤਾਨੇ ਕਣ੍ਟਕਮ੍ਪਿ ਬਨ੍ਧਿਤੁਂ ਕਣ੍ਟਕਾਦੀਹਿ ਵਾ ਏਕਪੁਪ੍ਫਮ੍ਪਿ ਵਿਜ੍ਝਿਤੁਂ ਪੁਪ੍ਫੇਯੇਵ ਵਾ ਪੁਪ੍ਫਂ ਪਵੇਸੇਤੁਂ ਨ ਵਟ੍ਟਤਿ. ਜਾਲਵਿਤਾਨਵੇਦਿਕ-ਨਾਗਦਨ੍ਤਕ ਪੁਪ੍ਫਪਟਿਚ੍ਛਕਤਾਲਪਣ੍ਣਗੁਲ਼ਕਾਦੀਨਂ ਪਨ ਛਿਦ੍ਦੇਸੁ ਅਸੋਕਪਿਣ੍ਡਿਯਾ ਵਾ ਅਨ੍ਤਰੇਸੁ ਪੁਪ੍ਫਾਨਿ ਪਵੇਸੇਤੁਂ ਨ ਦੋਸੋ. ਏਤਂ ਵੇਧਿਮਂ ਨਾਮ ਨ ਹੋਤਿ. ਧਮ੍ਮਰਜ੍ਜੁਯਮ੍ਪਿ ਏਸੇਵ ਨਯੋ.

‘‘ਵੇਠਿਮਂ’’ ਨਾਮ ਪੁਪ੍ਫਦਾਮਪੁਪ੍ਫਹਤ੍ਥਕੇਸੁ ਦਟ੍ਠਬ੍ਬਂ. ਕੇਚਿ ਹਿ ਮਤ੍ਥਕਦਾਮਂ ਕਰੋਨ੍ਤਾ ਹੇਟ੍ਠਾ ਘਟਕਾਕਾਰਂ ਦਸ੍ਸੇਤੁਂ ਪੁਪ੍ਫੇਹਿ ਵੇਠੇਨ੍ਤਿ, ਕੇਚਿ ਅਟ੍ਠਟ੍ਠ ਵਾ ਦਸ ਦਸ ਵਾ ਉਪ੍ਪਲਪੁਪ੍ਫਾਦੀਨਿ ਸੁਤ੍ਤੇਨ ਵਾ ਵਾਕੇਨ ਵਾ ਦਣ੍ਡਕੇਸੁ ਬਨ੍ਧਿਤ੍ਵਾ ਉਪ੍ਪਲਹਤ੍ਥਕੇ ਵਾ ਪਦੁਮਹਤ੍ਥਕੇ ਵਾ ਕਰੋਨ੍ਤਿ, ਤਂ ਸਬ੍ਬਂ ਪੁਰਿਮਨਯੇਨੇਵ ਨ ਵਟ੍ਟਤਿ. ਸਾਮਣੇਰੇਹਿ ਉਪ੍ਪਾਟੇਤ੍ਵਾ ਥਲੇ ਠਪਿਤਉਪ੍ਪਲਾਦੀਨਿ ਕਾਸਾਵੇਨ ਭਣ੍ਡਿਕਮ੍ਪਿ ਬਨ੍ਧਿਤੁਂ ਨ ਵਟ੍ਟਤਿ. ਤੇਸਂਯੇਵ ਪਨ ਵਾਕੇਨ ਵਾ ਦਣ੍ਡਕੇਨ ਵਾ ਬਨ੍ਧਿਤੁਂ ਅਂਸਭਣ੍ਡਿਕਂ ਵਾ ਕਾਤੁਂ ਵਟ੍ਟਤਿ. ਅਂਸਭਣ੍ਡਿਕਾ ਨਾਮ ਖਨ੍ਧੇ ਠਪਿਤਕਾਸਾਵਸ੍ਸ ਉਭੋ ਅਨ੍ਤੇ ਆਹਰਿਤ੍ਵਾ ਭਣ੍ਡਿਕਂ ਕਤ੍ਵਾ ਤਸ੍ਮਿਂ ਪਸਿਬ੍ਬਕੇ ਵਿਯ ਪੁਪ੍ਫਾਨਿ ਪਕ੍ਖਿਪਨ੍ਤਿ, ਅਯਂ ਵੁਚ੍ਚਤਿ ਅਂਸਭਣ੍ਡਿਕਾ, ਏਤਂ ਕਾਤੁਂ ਵਟ੍ਟਤਿ. ਦਣ੍ਡਕੇਹਿ ਪਦੁਮਿਨਿਪਣ੍ਣਂ ਵਿਜ੍ਝਿਤ੍ਵਾ ਉਪ੍ਪਲਾਦੀਨਿ ਪਣ੍ਣੇਨ ਵੇਠੇਤ੍ਵਾ ਗਣ੍ਹਨ੍ਤਿ, ਤਤ੍ਰਾਪਿ ਪੁਪ੍ਫਾਨਂ ਉਪਰਿ ਪਦੁਮਿਨਿਪਣ੍ਣਮੇਵ ਬਨ੍ਧਿਤੁਂ ਵਟ੍ਟਤਿ. ਹੇਟ੍ਠਾ ਦਣ੍ਡਕਂ ਪਨ ਬਨ੍ਧਿਤੁਂ ਨ ਵਟ੍ਟਤਿ.

‘‘ਪੂਰਿਮਂ’’ ਨਾਮ ਮਾਲਾਗੁਣੇ ਚ ਪੁਪ੍ਫਪਟੇ ਚ ਦਟ੍ਠਬ੍ਬਂ. ਯੋ ਹਿ ਮਾਲਾਗੁਣੇਨ ਚੇਤਿਯਂ ਵਾ ਬੋਧਿਂ ਵਾ ਵੇਦਿਕਂ ਵਾ ਪਰਿਕ੍ਖਿਪਨ੍ਤੋ ਪੁਨ ਆਨੇਤ੍ਵਾ ਪੂਰਿਮਠਾਨਂ ਅਤਿਕ੍ਕਾਮੇਤਿ, ਏਤ੍ਤਾਵਤਾਪਿ ਪੂਰਿਮਂ ਨਾਮ ਹੋਤਿ. ਕੋ ਪਨ ਵਾਦੋ ਅਨੇਕਕ੍ਖਤ੍ਤੁਂ ਪਰਿਕ੍ਖਿਪਨ੍ਤਸ੍ਸ, ਨਾਗਦਨ੍ਤ-ਕਨ੍ਤਰੇਹਿ ਪਵੇਸੇਤ੍ਵਾ ਹਰਨ੍ਤੋ ਓਲਮ੍ਬਕਂ ਕਤ੍ਵਾ ਪੁਨ ਨਾਗਦਨ੍ਤਕਂ ਪਰਿਕ੍ਖਿਪਤਿ, ਏਤਮ੍ਪਿ ਪੂਰਿਮਂ ਨਾਮ. ਨਾਗਦਨ੍ਤਕੇ ਪਨ ਪੁਪ੍ਫਵਲਯਂ ਪਵੇਸੇਤੁਂ ਵਟ੍ਟਤਿ. ਮਾਲਾਗੁਣੇਹਿ ਪੁਪ੍ਫਪਟਂ ਕਰੋਨ੍ਤਿ. ਤਤ੍ਰਾਪਿ ਏਕਮੇਵ ਮਾਲਾਗੁਣਂ ਹਰਿਤੁਂ ਵਟ੍ਟਤਿ. ਪੁਨ ਪਚ੍ਚਾਹਰਤੋ ਪੂਰਿਮਮੇਵ ਹੋਤਿ, ਤਂ ਸਬ੍ਬਂ ਪੁਰਿਮਨਯੇਨੇਵ ਨ ਵਟ੍ਟਤਿ. ਮਾਲਾਗੁਣੇਹਿ ਪਨ ਬਹੂਹਿਪਿ ਕਤਂ ਪੁਪ੍ਫਦਾਮਂ ਲਭਿਤ੍ਵਾ ਆਸਨਮਤ੍ਥਕਾਦੀਸੁ ਬਨ੍ਧਿਤੁਂ ਵਟ੍ਟਤਿ. ਅਤਿਦੀਘਂ ਪਨ ਮਾਲਾਗੁਣਂ ਏਕਵਾਰਂ ਹਰਿਤ੍ਵਾ ਵਾ ਪਰਿਕ੍ਖਿਪਿਤ੍ਵਾ ਵਾ ਪੁਨ ਅਞ੍ਞਸ੍ਸ ਭਿਕ੍ਖੁਨੋ ਦਾਤੁਂ ਵਟ੍ਟਤਿ. ਤੇਨਾਪਿ ਤਥੇਵ ਕਾਤੁਂ ਵਟ੍ਟਤਿ.

‘‘ਵਾਯਿਮਂ’’ ਨਾਮ ਪੁਪ੍ਫਜਾਲਪੁਪ੍ਫਪਟਪੁਪ੍ਫਰੂਪੇਸੁ ਦਟ੍ਠਬ੍ਬਂ. ਚੇਤਿਯੇਸੁ ਪੁਪ੍ਫਜਾਲਂ ਕਰੋਨ੍ਤਸ੍ਸ ਏਕਮੇਕਮ੍ਹਿ ਜਾਲਚ੍ਛਿਦ੍ਦੇ ਦੁਕ੍ਕਟਂ. ਭਿਤ੍ਤਿਚ੍ਛਤ੍ਤਬੋਧਿਤ੍ਥਮ੍ਭਾਦੀਸੁਪਿ ਏਸੇਵ ਨਯੋ. ਪੁਪ੍ਫਪਟਂ ਪਨ ਪਰੇਹਿ ਪੂਰਿਤਮ੍ਪਿ ਵਾਯਿਤੁਂ ਨ ਲਬ੍ਭਤਿ. ਗੋਪ੍ਫਿਮਪੁਪ੍ਫੇਹੇਵ ਹਤ੍ਥਿਅਸ੍ਸਾਦਿਰੂਪਕਾਨਿ ਕਰੋਨ੍ਤਿ, ਤਾਨਿਪਿ ਵਾਯਿਮਟ੍ਠਾਨੇ ਤਿਟ੍ਠਨ੍ਤਿ. ਪੁਰਿਮਨਯੇਨੇਵ ਸਬ੍ਬਂ ਨ ਵਟ੍ਟਤਿ. ਅਞ੍ਞੇਹਿ ਕਤਪਰਿਚ੍ਛੇਦੇ ਪਨ ਪੁਪ੍ਫਾਨਿ ਠਪੇਨ੍ਤੇਨ ਹਤ੍ਥਿਅਸ੍ਸਾਦਿਰੂਪਕਮ੍ਪਿ ਕਾਤੁਂ ਵਟ੍ਟਤਿ. ਮਹਾਪਚ੍ਚਰਿਯਂ ਪਨ ਕਲਮ੍ਬਕੇਨ ਅਡ੍ਢਚਨ੍ਦਕੇਨ ਚ ਸਦ੍ਧਿਂ ਅਟ੍ਠਪੁਪ੍ਫਵਿਕਤਿਯੋ ਵੁਤ੍ਤਾ. ਤਤ੍ਥ ਕਲਮ੍ਬਕੋਤਿ ਅਡ੍ਢਚਨ੍ਦਕਨ੍ਤਰੇ ਘਟਿਕਦਾਮਓਲਮ੍ਬਕੋ ਵੁਤ੍ਤੋ. ‘‘ਅਡ੍ਢਚਨ੍ਦਕੋ’’ਤਿ ਅਡ੍ਢਚਨ੍ਦਾਕਾਰੇਨ ਮਾਲਾਗੁਣਪਰਿਕ੍ਖੇਪੋ. ਤਦੁਭਯਮ੍ਪਿ ਪੂਰਿਮੇਯੇਵ ਪਵਿਟ੍ਠਂ. ਕੁਰੁਨ੍ਦਿਯਂ ਪਨ ‘‘ਦ੍ਵੇ ਤਯੋ ਮਾਲਾਗੁਣੇ ਏਕਤੋ ਕਤ੍ਵਾ ਪੁਪ੍ਫਦਾਮਕਰਣਮ੍ਪਿ ਵਾਯਿਮਂਯੇਵਾ’’ਤਿ ਵੁਤ੍ਤਂ. ਤਮ੍ਪਿ ਇਧ ਪੂਰਿਮਟ੍ਠਾਨੇਯੇਵ ਪਵਿਟ੍ਠਂ, ਨ ਕੇਵਲਞ੍ਚ ਪੁਪ੍ਫਗੁਲ਼ਦਾਮਮੇਵ ਪਿਟ੍ਠਮਯਦਾਮਮ੍ਪਿ ਗੇਣ੍ਡੁਕਪੁਪ੍ਫਦਾਮਮ੍ਪਿ ਕੁਰੁਨ੍ਦਿਯਂ ਵੁਤ੍ਤਂ, ਖਰਪਤ੍ਤਦਾਮਮ੍ਪਿ ਸਿਕ੍ਖਾਪਦਸ੍ਸ ਸਾਧਾਰਣਤ੍ਤਾ ਭਿਕ੍ਖੂਨਮ੍ਪਿ ਭਿਕ੍ਖੁਨੀਨਮ੍ਪਿ ਨੇਵ ਕਾਤੁਂ ਨ ਕਾਰਾਪੇਤੁਂ ਵਟ੍ਟਤਿ. ਪੂਜਾਨਿਮਿਤ੍ਤਂ ਪਨ ਕਪ੍ਪਿਯਵਚਨਂ ਸਬ੍ਬਤ੍ਥ ਵਤ੍ਤੁਂ ਵਟ੍ਟਤਿ. ਪਰਿਯਾਯਓਭਾਸਨਿਮਿਤ੍ਤਕਮ੍ਮਾਨਿ ਵਟ੍ਟਨ੍ਤਿਯੇਵ.

ਤੁਵਟ੍ਟੇਨ੍ਤੀਤਿ ਨਿਪਜ੍ਜਨ੍ਤਿ. ਲਾਸੇਨ੍ਤੀਤਿ ਪੀਤਿਯਾ ਉਪ੍ਪਿਲਵਮਾਨਾ ਵਿਯ ਉਟ੍ਠਹਿਤ੍ਵਾ ਲਾਸਿਯਨਾਟਕਂ ਨਾਟੇਨ੍ਤਿ, ਰੇਚਕਂ ਦੇਨ੍ਤਿ. ਨਚ੍ਚਨ੍ਤਿਯਾਪਿ ਨਚ੍ਚਨ੍ਤੀਤਿ ਯਦਾ ਨਾਟਕਿਤ੍ਥੀ ਨਚ੍ਚਤਿ, ਤਦਾ ਤੇਪਿ ਤਸ੍ਸਾ ਪੁਰਤੋ ਵਾ ਪਚ੍ਛਤੋ ਵਾ ਗਚ੍ਛਨ੍ਤਾ ਨਚ੍ਚਨ੍ਤਿ. ਨਚ੍ਚਨ੍ਤਿਯਾਪਿ ਗਾਯਨ੍ਤੀਤਿ ਯਦਾ ਸਾ ਨਚ੍ਚਤਿ, ਤਦਾ ਨਚ੍ਚਾਨੁਰੂਪਂ ਗਾਯਨ੍ਤਿ. ਏਸ ਨਯੋ ਸਬ੍ਬਤ੍ਥ. ਅਟ੍ਠਪਦੇਪਿ ਕੀਲ਼ਨ੍ਤੀਤਿ ਅਟ੍ਠਪਦਫਲਕੇ ਜੂਤਂ ਕੀਲ਼ਨ੍ਤਿ. ਤਥਾ ਦਸਪਦੇ, ਆਕਾਸੇਪੀਤਿ ਅਟ੍ਠਪਦਦਸਪਦੇਸੁ ਵਿਯ ਆਕਾਸੇਯੇਵ ਕੀਲ਼ਨ੍ਤਿ. ਪਰਿਹਾਰਪਥੇਪੀਤਿ ਭੂਮਿਯਂ ਨਾਨਾਪਥਮਣ੍ਡਲਂ ਕਤ੍ਵਾ ਤਤ੍ਥ ਪਰਿਹਰਿਤਬ੍ਬਪਥਂ ਪਰਿਹਰਨ੍ਤਾ ਕੀਲ਼ਨ੍ਤਿ. ਸਨ੍ਤਿਕਾਯਪਿ ਕੀਲ਼ਨ੍ਤੀਤਿ ਸਨ੍ਤਿਕਕੀਲ਼ਾਯ ਕੀਲ਼ਨ੍ਤਿ, ਏਕਜ੍ਝਂ ਠਪਿਤਾ ਸਾਰਿਯੋ ਵਾ ਪਾਸਾਣਸਕ੍ਖਰਾਯੋ ਵਾ ਅਚਾਲੇਨ੍ਤਾ ਨਖੇਨੇਵ ਅਪਨੇਨ੍ਤਿ ਚ ਉਪਨੇਨ੍ਤਿ ਚ, ਸਚੇ ਤਤ੍ਥ ਕਾਚਿ ਚਲਤਿ, ਪਰਾਜਯੋ ਹੋਤਿ. ਖਲਿਕਾਯਾਤਿ ਜੂਤਫਲਕੇ ਪਾਸਕਕੀਲ਼ਾਯ ਕੀਲ਼ਨ੍ਤਿ. ਘਟਿਕਾਯਾਤਿ ਘਟਿਕਾ ਵੁਚ੍ਚਤਿ ਦਣ੍ਡਕਕੀਲ਼ਾ, ਤਾਯ ਕੀਲ਼ਨ੍ਤਿ. ਦੀਘਦਣ੍ਡਕੇਨ ਰਸ੍ਸਦਣ੍ਡਕਂ ਪਹਰਨ੍ਤਾ ਵਿਚਰਨ੍ਤਿ.

ਸਲਾਕਹਤ੍ਥੇਨਾਤਿ ਲਾਖਾਯ ਵਾ ਮਞ੍ਜਟ੍ਠਿਯਾ ਵਾ ਪਿਟ੍ਠਉਦਕੇ ਵਾ ਸਲਾਕਹਤ੍ਥਂ ਤੇਮੇਤ੍ਵਾ ‘‘ਕਿਂ ਹੋਤੂ’’ਤਿ ਭੂਮਿਯਂ ਵਾ ਭਿਤ੍ਤਿਯਂ ਵਾ ਤਂ ਪਹਰਿਤ੍ਵਾ ਹਤ੍ਥਿਅਸ੍ਸਾਦੀਰੂਪਾਨਿ ਦਸ੍ਸੇਨ੍ਤਾ ਕੀਲ਼ਨ੍ਤਿ. ਅਕ੍ਖੇਨਾਤਿ ਗੁਲ਼ੇਨ. ਪਙ੍ਗਚੀਰੇਨਾਤਿ ਪਙ੍ਗਚੀਰਂ ਵੁਚ੍ਚਤਿ ਪਣ੍ਣਨਾਲ਼ਿਕਾ, ਤਂ ਧਮਨ੍ਤਾ ਕੀਲ਼ਨ੍ਤਿ. ਵਙ੍ਕਕੇਨਾਤਿ ਗਾਮਦਾਰਕਾਨਂ ਕੀਲ਼ਨਕੇਨ ਖੁਦ੍ਦਕਨਙ੍ਗਲੇਨ. ਮੋਕ੍ਖਚਿਕਾਯਾਤਿ ਮੋਕ੍ਖਚਿਕਾ ਵੁਚ੍ਚਤਿ ਸਮ੍ਪਰਿਵਤ੍ਤਕਕੀਲ਼ਾ, ਆਕਾਸੇ ਵਾ ਦਣ੍ਡਂ ਗਹੇਤ੍ਵਾ, ਭੂਮਿਯਂ ਵਾ ਸੀਸਂ ਠਪੇਤ੍ਵਾ ਹੇਟ੍ਠੁਪਰਿਯਭਾਵੇਨ ਪਰਿਵਤ੍ਤਨ੍ਤਾ ਕੀਲ਼ਨ੍ਤੀਤਿ ਅਤ੍ਥੋ. ਚਿਙ੍ਗੁਲਕੇਨਾਤਿ ਚਿਙ੍ਗੁਲਕਂ ਵੁਚ੍ਚਤਿ ਤਾਲਪਣ੍ਣਾਦੀਹਿ ਕਤਂ ਵਾਤਪ੍ਪਹਾਰੇਨ ਪਰਿਬ੍ਭਮਨਚਕ੍ਕਂ, ਤੇਨ ਕੀਲ਼ਨ੍ਤਿ. ਪਤ੍ਤਾਲ਼੍ਹਕੇਨਾਤਿ ਪਤ੍ਤਾਲ਼੍ਹਕਂ ਵੁਚ੍ਚਤਿ ਪਣ੍ਣਨਾਲ਼ਿ, ਤਾਯ ਵਾਲਿਕਾਦੀਨਿ ਮਿਨਨ੍ਤਾ ਕੀਲ਼ਨ੍ਤਿ. ਰਥਕੇਨਾਤਿ ਖੁਦ੍ਦਕਰਥੇਨ. ਧਨੁਕੇਨਾਤਿ ਖੁਦ੍ਦਕਧਨੁਨਾ.

ਅਕ੍ਖਰਿਕਾਯਾਤਿ ਅਕ੍ਖਰਿਕਾ ਵੁਚ੍ਚਤਿ ਆਕਾਸੇ ਵਾ ਪਿਟ੍ਠਿਯਂ ਵਾ ਅਕ੍ਖਰਜਾਨਨਕੀਲ਼ਾ, ਤਾਯ ਕੀਲ਼ਨ੍ਤਿ. ਮਨੇਸਿਕਾਯਾਤਿ ਮਨੇਸਿਕਾ ਵੁਚ੍ਚਤਿ ਮਨਸਾ ਚਿਨ੍ਤਿਤਜਾਨਨਕੀਲ਼ਾ, ਤਾਯ ਕੀਲ਼ਨ੍ਤਿ. ਯਥਾਵਜ੍ਜੇਨਾਤਿ ਯਥਾਵਜ੍ਜਂ ਵੁਚ੍ਚਤਿ ਕਾਣਕੁਣਿਕਖਞ੍ਜਾਦੀਨਂ ਯਂ ਯਂ ਵਜ੍ਜਂ ਤਂ ਤਂ ਪਯੋਜੇਤ੍ਵਾ ਦਸ੍ਸਨਕੀਲ਼ਾ ਤਾਯ ਕੀਲ਼ਨ੍ਤਿ, ਵੇਲਮ੍ਭਕਾ ਵਿਯ. ਹਤ੍ਥਿਸ੍ਮਿਮ੍ਪਿ ਸਿਕ੍ਖਨ੍ਤੀਤਿ ਹਤ੍ਥਿਨਿਮਿਤ੍ਤਂ ਯਂ ਸਿਪ੍ਪਂ ਸਿਕ੍ਖਿਤਬ੍ਬਂ, ਤਂ ਸਿਕ੍ਖਨ੍ਤਿ. ਏਸੇਵ ਨਯੋ ਅਸ੍ਸਾਦੀਸੁ. ਧਾਵਨ੍ਤਿਪੀਤਿ ਪਰਮ੍ਮੁਖਾ ਗਚ੍ਛਨ੍ਤਾ ਧਾਵਨ੍ਤਿ. ਆਧਾਵਨ੍ਤਿਪੀਤਿ ਯਤ੍ਤਕਂ ਧਾਵਨ੍ਤਿ, ਤਤ੍ਤਕਮੇਵ ਅਭਿਮੁਖਾ ਪੁਨ ਆਗਚ੍ਛਨ੍ਤਾ ਆਧਾਵਨ੍ਤਿ. ਨਿਬ੍ਬੁਜ੍ਝਨ੍ਤੀਤਿ ਮਲ੍ਲਯੁਦ੍ਧਂ ਕਰੋਨ੍ਤਿ. ਨਲਾਟਿਕਮ੍ਪਿ ਦੇਨ੍ਤੀਤਿ ‘‘ਸਾਧੁ, ਸਾਧੁ, ਭਗਿਨੀ’’ਤਿ ਅਤ੍ਤਨੋ ਨਲਾਟੇ ਅਙ੍ਗੁਲਿਂ ਠਪੇਤ੍ਵਾ ਤਸ੍ਸਾ ਨਲਾਟੇ ਠਪੇਨ੍ਤਿ. ਵਿਵਿਧਮ੍ਪਿ ਅਨਾਚਾਰਂ ਆਚਰਨ੍ਤੀਤਿ ਅਞ੍ਞਮ੍ਪਿ ਪਾਲ਼ਿਯਂ ਅਨਾਗਤਂ ਮੁਖਡਿਣ੍ਡਿਮਾਦਿਵਿਵਿਧਂ ਅਨਾਚਾਰਂ ਆਚਰਨ੍ਤਿ.

੪੩੨. ਪਾਸਾਦਿਕੇਨਾਤਿ ਪਸਾਦਾਵਹੇਨ, ਸਾਰੁਪ੍ਪੇਨ ਸਮਣਾਨੁਚ੍ਛਵਿਕੇਨ. ਅਭਿਕ੍ਕਨ੍ਤੇਨਾਤਿ ਗਮਨੇਨ. ਪਟਿਕ੍ਕਨ੍ਤੇਨਾਤਿ ਨਿਵਤ੍ਤਨੇਨ. ਆਲੋਕਿਤੇਨਾਤਿ ਪੁਰਤੋ ਦਸ੍ਸਨੇਨ. ਵਿਲੋਕਿਤੇਨਾਤਿ ਇਤੋ ਚਿਤੋ ਚ ਦਸ੍ਸਨੇਨ. ਸਮਿਞ੍ਜਿਤੇਨਾਤਿ ਪਬ੍ਬਸਙ੍ਕੋਚਨੇਨ. ਪਸਾਰਿਤੇਨਾਤਿ ਤੇਸਂਯੇਵ ਪਸਾਰਣੇਨ. ਸਬ੍ਬਤ੍ਥ ਇਤ੍ਥਮ੍ਭੂਤਾਖ੍ਯਾਨਤ੍ਥੇ ਕਰਣਵਚਨਂ, ਸਤਿਸਮ੍ਪਜਞ੍ਞੇਹਿ ਅਭਿਸਙ੍ਖਤਤ੍ਤਾ ਪਾਸਾਦਿਕ ਅਭਿਕ੍ਕਨ੍ਤ-ਪਟਿਕ੍ਕਨ੍ਤ-ਆਲੋਕਿਤ-ਵਿਲੋਕਿਤ-ਸਮਿਞ੍ਜਿਤ-ਪਸਾਰਿਤੋ ਹੁਤ੍ਵਾਤਿ ਵੁਤ੍ਤਂ ਹੋਤਿ. ਓਕ੍ਖਿਤ੍ਤਚਕ੍ਖੂਤਿ ਹੇਟ੍ਠਾ-ਖਿਤ੍ਤਚਕ੍ਖੁ. ਇਰਿਯਾਪਥਸਮ੍ਪਨ੍ਨੋਤਿ ਤਾਯ ਪਾਸਾਦਿਕਅਭਿਕ੍ਕਨ੍ਤਾਦਿਤਾਯ ਸਮ੍ਪਨ੍ਨਇਰਿਯਾਪਥੋ.

ਕ੍ਵਾਯਨ੍ਤਿ ਕੋ ਅਯਂ. ਅਬਲਬਲੋ ਵਿਯਾਤਿ ਅਬਲੋ ਕਿਰ ਬੋਨ੍ਦੋ ਵੁਚ੍ਚਤਿ, ਅਤਿਸਯਤ੍ਥੇ ਚ ਇਦਂ ਆਮੇਡਿਤਂ, ਤਸ੍ਮਾ ਅਤਿਬੋਨ੍ਦੋ ਵਿਯਾਤਿ ਵੁਤ੍ਤਂ ਹੋਤਿ. ਮਨ੍ਦਮਨ੍ਦੋਤਿ ਅਭਿਕ੍ਕਨ੍ਤਾਦੀਨਂ ਅਨੁਦ੍ਧਤਤਾਯ ਅਤਿਮਨ੍ਦੋ. ਅਤਿਸਣ੍ਹੋਤਿ ਏਵਂ ਗੁਣਮੇਵ ਦੋਸਤੋ ਦਸ੍ਸੇਨ੍ਤਿ. ਭਾਕੁਟਿਕਭਾਕੁਟਿਕੋ ਵਿਯਾਤਿ ਓਕ੍ਖਿਤ੍ਤਚਕ੍ਖੁਤਾਯ ਭਕੁਟਿਂ ਕਤ੍ਵਾ ਸਙ੍ਕੁਟਿਤਮੁਖੋ ਕੁਪਿਤੋ ਵਿਯ ਵਿਚਰਤੀਤਿ ਮਞ੍ਞਮਾਨਾ ਵਦਨ੍ਤਿ. ਸਣ੍ਹਾਤਿ ਨਿਪੁਣਾ, ‘‘ਅਮ੍ਮ ਤਾਤ ਭਗਿਨੀ’’ਤਿ ਏਵਂ ਉਪਾਸਕਜਨਂ ਯੁਤ੍ਤਟ੍ਠਾਨੇ ਉਪਨੇਤੁਂ ਛੇਕਾ, ਨ ਯਥਾ ਅਯਂ; ਏਵਂ ਅਬਲਬਲੋ ਵਿਯਾਤਿ ਅਧਿਪ੍ਪਾਯੋ. ਸਖਿਲਾਤਿ ਸਾਖਲ੍ਯੇਨ ਯੁਤ੍ਤਾ. ਸੁਖਸਮ੍ਭਾਸਾਤਿ ਇਦਂ ਪੁਰਿਮਸ੍ਸ ਕਾਰਣਵਚਨਂ. ਯੇਸਞ੍ਹਿ ਸੁਖਸਮ੍ਭਾਸਾ ਸਮ੍ਮੋਦਨੀਯਕਥਾ ਨੇਲਾ ਹੋਤਿ ਕਣ੍ਣਸੁਖਾ, ਤੇ ਸਖਿਲਾਤਿ ਵੁਚ੍ਚਨ੍ਤਿ. ਤੇਨਾਹਂਸੁ – ‘‘ਸਖਿਲਾ ਸੁਖਸਮ੍ਭਾਸਾ’’ਤਿ. ਅਯਂ ਪਨੇਤ੍ਥ ਅਧਿਪ੍ਪਾਯੋ – ਅਮ੍ਹਾਕਂ ਅਯ੍ਯਾ ਉਪਾਸਕੇ ਦਿਸ੍ਵਾ ਮਧੁਰਂ ਸਮ੍ਮੋਦਨੀਯਂ ਕਥਂ ਕਥੇਨ੍ਤਿ, ਤਸ੍ਮਾ ਸਖਿਲਾ ਸੁਖਸਮ੍ਭਾਸਾ, ਨ ਯਥਾ ਅਯਂ; ਏਵਂ ਮਨ੍ਦਮਨ੍ਦਾ ਵਿਯਾਤਿ. ਮਿਹਿਤਪੁਬ੍ਬਙ੍ਗਮਾਤਿ ਮਿਹਿਤਂ ਪੁਬ੍ਬਙ੍ਗਮਂ ਏਤੇਸਂ ਵਚਨਸ੍ਸਾਤਿ ਮਿਹਿਤਪੁਬ੍ਬਙ੍ਗਮਾ, ਪਠਮਂ ਸਿਤਂ ਕਤ੍ਵਾ ਪਚ੍ਛਾ ਵਦਨ੍ਤੀਤਿ ਅਤ੍ਥੋ. ਏਹਿਸ੍ਵਾਗਤਵਾਦਿਨੋਤਿ ਉਪਾਸਕਂ ਦਿਸ੍ਵਾ ‘‘ਏਹਿ ਸ੍ਵਾਗਤਂ ਤਵਾ’’ਤਿ ਏਵਂਵਾਦਿਨੋ, ਨ ਯਥਾ ਅਯਂ; ਏਵਂ ਸਙ੍ਕੁਟਿਤਮੁਖਤਾਯ ਭਾਕੁਟਿਕਭਾਕੁਟਿਕਾ ਵਿਯ ਏਵਂ ਮਿਹਿਤਪੁਬ੍ਬਙ੍ਗਮਾਦਿਤਾਯ ਅਭਾਕੁਟਿਕਭਾਵਂ ਅਤ੍ਥਤੋ ਦਸ੍ਸੇਤ੍ਵਾ ਪੁਨ ਸਰੂਪੇਨਪਿ ਦਸ੍ਸੇਨ੍ਤੋ ਆਹਂਸੁ – ‘‘ਅਭਾਕੁਟਿਕਾ ਉਤ੍ਤਾਨਮੁਖਾ ਪੁਬ੍ਬਭਾਸਿਨੋ’’ਤਿ. ਉਪ੍ਪਟਿਪਾਟਿਯਾ ਵਾ ਤਿਣ੍ਣਮ੍ਪਿ ਆਕਾਰਾਨਂ ਅਭਾਵਦਸ੍ਸਨਮੇਤਨ੍ਤਿ ਵੇਦਿਤਬ੍ਬਂ. ਕਥਂ? ਏਤ੍ਥ ਹਿ ‘‘ਅਭਾਕੁਟਿਕਾ’’ਤਿ ਇਮਿਨਾ ਭਾਕੁਟਿਕਭਾਕੁਟਿਕਾਕਾਰਸ੍ਸ ਅਭਾਵੋ ਦਸ੍ਸਿਤੋ. ‘‘ਉਤ੍ਤਾਨਮੁਖਾ’’ਤਿ ਇਮਿਨਾ ਮਨ੍ਦਮਨ੍ਦਾਕਾਰਸ੍ਸ, ਯੇ ਹਿ ਚਕ੍ਖੂਨਿ ਉਮ੍ਮਿਲੇਤ੍ਵਾ ਆਲੋਕਨੇਨ ਉਤ੍ਤਾਨਮੁਖਾ ਹੋਨ੍ਤਿ, ਨ ਤੇ ਮਨ੍ਦਮਨ੍ਦਾ. ਪੁਬ੍ਬਭਾਸਿਨੋਤਿ ਇਮਿਨਾ ਅਬਲਬਲਾਕਾਰਸ੍ਸ ਅਭਾਵੋ ਦਸ੍ਸਿਤੋ, ਯੇ ਹਿ ਆਭਾਸਨਕੁਸਲਤਾਯ ‘‘ਅਮ੍ਮ ਤਾਤਾ’’ਤਿ ਪਠਮਤਰਂ ਆਭਾਸਨ੍ਤਿ, ਨ ਤੇ ਅਬਲਬਲਾਤਿ.

ਏਹਿ, ਭਨ੍ਤੇ, ਘਰਂ ਗਮਿਸ੍ਸਾਮਾਤਿ ਸੋ ਕਿਰ ਉਪਾਸਕੋ ‘‘ਨ ਖੋ, ਆਵੁਸੋ, ਪਿਣ੍ਡੋ ਲਬ੍ਭਤੀ’’ਤਿ ਵੁਤ੍ਤੇ ‘‘ਤੁਮ੍ਹਾਕਂ ਭਿਕ੍ਖੂਹਿਯੇਵ ਏਤਂ ਕਤਂ, ਸਕਲਮ੍ਪਿ ਗਾਮਂ ਵਿਚਰਨ੍ਤਾ ਨ ਲਚ੍ਛਥਾ’’ਤਿ ਵਤ੍ਵਾ ਪਿਣ੍ਡਪਾਤਂ ਦਾਤੁਕਾਮੋ ‘‘ਏਹਿ, ਭਨ੍ਤੇ, ਘਰਂ ਗਮਿਸ੍ਸਾਮਾ’’ਤਿ ਆਹ. ਕਿਂ ਪਨਾਯਂ ਪਯੁਤ੍ਤਵਾਚਾ ਹੋਤਿ, ਨ ਹੋਤੀਤਿ? ਨ ਹੋਤਿ. ਪੁਚ੍ਛਿਤਪਞ੍ਹੋ ਨਾਮਾਯਂ ਕਥੇਤੁਂ ਵਟ੍ਟਤਿ. ਤਸ੍ਮਾ ਇਦਾਨਿ ਚੇਪਿ ਪੁਬ੍ਬਣ੍ਹੇ ਵਾ ਸਾਯਨ੍ਹੇ ਵਾ ਅਨ੍ਤਰਘਰਂ ਪਵਿਟ੍ਠਂ ਭਿਕ੍ਖੁਂ ਕੋਚਿ ਪੁਚ੍ਛੇਯ੍ਯ – ‘‘ਕਸ੍ਮਾ, ਭਨ੍ਤੇ, ਚਰਥਾ’’ਤਿ? ਯੇਨਤ੍ਥੇਨ ਚਰਤਿ, ਤਂ ਆਚਿਕ੍ਖਿਤ੍ਵਾ ‘‘ਲਦ੍ਧਂ ਨ ਲਦ੍ਧ’’ਨ੍ਤਿ ਵੁਤ੍ਤੇ ਸਚੇ ਨ ਲਦ੍ਧਂ, ‘‘ਨ ਲਦ੍ਧ’’ਨ੍ਤਿ ਵਤ੍ਵਾ ਯਂ ਸੋ ਦੇਤਿ, ਤਂ ਗਹੇਤੁਂ ਵਟ੍ਟਤਿ.

ਦੁਟ੍ਠੋਤਿ ਨ ਪਸਾਦਾਦੀਨਂ ਵਿਨਾਸੇਨ ਦੁਟ੍ਠੋ, ਪੁਗ੍ਗਲਵਸੇਨ ਦੁਟ੍ਠੋ. ਦਾਨਪਥਾਨੀਤਿ ਦਾਨਾਨਿਯੇਵ ਵੁਚ੍ਚਨ੍ਤਿ. ਅਥ ਵਾ ਦਾਨਪਥਾਨੀਤਿ ਦਾਨਨਿਬਦ੍ਧਾਨਿ ਦਾਨਵਤ੍ਤਾਨੀਤਿ ਵੁਤ੍ਤਂ ਹੋਤਿ. ਉਪਚ੍ਛਿਨ੍ਨਾਨੀਤਿ ਦਾਯਕੇਹਿ ਉਪਚ੍ਛਿਨ੍ਨਾਨਿ, ਨ ਤੇ ਤਾਨਿ ਏਤਰਹਿ ਦੇਨ੍ਤਿ. ਰਿਞ੍ਚਨ੍ਤੀਤਿ ਵਿਸੁਂ ਹੋਨ੍ਤਿ ਨਾਨਾ ਹੋਨ੍ਤਿ, ਪਕ੍ਕਮਨ੍ਤੀਤਿ ਵੁਤ੍ਤਂ ਹੋਤਿ. ਸਣ੍ਠਹੇਯ੍ਯਾਤਿ ਸਮ੍ਮਾ ਤਿਟ੍ਠੇਯ੍ਯ, ਪੇਸਲਾਨਂ ਭਿਕ੍ਖੂਨਂ ਪਤਿਟ੍ਠਾ ਭਵੇਯ੍ਯ.

ਏਵਮਾਵੁਸੋਤਿ ਖੋ ਸੋ ਭਿਕ੍ਖੁ ਸਦ੍ਧਸ੍ਸ ਪਸਨ੍ਨਸ੍ਸ ਉਪਾਸਕਸ੍ਸ ਸਾਸਨਂ ਸਮ੍ਪਟਿਚ੍ਛਿ. ਏਵਰੂਪਂ ਕਿਰ ਸਾਸਨਂ ਕਪ੍ਪਿਯਂ ਹਰਿਤੁਂ ਵਟ੍ਟਤਿ, ਤਸ੍ਮਾ ‘‘ਮਮ ਵਚਨੇਨ ਭਗਵਤੋ ਪਾਦੇ ਵਨ੍ਦਥਾ’’ਤਿ ਵਾ ‘‘ਚੇਤਿਯਂ ਪਟਿਮਂ ਬੋਧਿਂ ਸਙ੍ਘਤ੍ਥੇਰਂ ਵਨ੍ਦਥਾ’’ਤਿ ਵਾ ‘‘ਚੇਤਿਯੇ ਗਨ੍ਧਪੂਜਂ ਕਰੋਥ, ਪੁਪ੍ਫਪੂਜਂ ਕਰੋਥਾ’’ਤਿ ਵਾ ‘‘ਭਿਕ੍ਖੂ ਸਨ੍ਨਿਪਾਤੇਥ, ਦਾਨਂ ਦਸ੍ਸਾਮ, ਧਮ੍ਮਂ ਸੋਸ੍ਸਾਮਾਤਿ ਵਾ ਈਦਿਸੇਸੁ ਸਾਸਨੇਸੁ ਕੁਕ੍ਕੁਚ੍ਚਂ ਨ ਕਾਤਬ੍ਬਂ. ਕਪ੍ਪਿਯਸਾਸਨਾਨਿ ਏਤਾਨਿ ਨ ਗਿਹੀਨਂ ਗਿਹਿਕਮ੍ਮਪਟਿਸਂਯੁਤ੍ਤਾਨੀਤਿ. ਕੁਤੋ ਚ ਤ੍ਵਂ, ਭਿਕ੍ਖੁ, ਆਗਚ੍ਛਸੀਤਿ ਨਿਸਿਨ੍ਨੋ ਸੋ ਭਿਕ੍ਖੁ ਨ ਆਗਚ੍ਛਤਿ ਅਤ੍ਥਤੋ ਪਨ ਆਗਤੋ ਹੋਤਿ; ਏਵਂ ਸਨ੍ਤੇਪਿ ਵਤ੍ਤਮਾਨਸਮੀਪੇ ਵਤ੍ਤਮਾਨਵਚਨਂ ਲਬ੍ਭਤਿ, ਤਸ੍ਮਾ ਨ ਦੋਸੋ. ਪਰਿਯੋਸਾਨੇ ‘‘ਤਤੋ ਅਹਂ ਭਗਵਾ ਆਗਚ੍ਛਾਮੀ’’ਤਿ ਏਤ੍ਥਾਪਿ ਵਚਨੇ ਏਸੇਵ ਨਯੋ.

੪੩੩. ਪਠਮਂ ਅਸ੍ਸਜਿਪੁਨਬ੍ਬਸੁਕਾ ਭਿਕ੍ਖੂ ਚੋਦੇਤਬ੍ਬਾਤਿ ‘‘ਮਯਂ ਤੁਮ੍ਹੇ ਵਤ੍ਤੁਕਾਮਾ’’ਤਿ ਓਕਾਸਂ ਕਾਰੇਤ੍ਵਾ ਵਤ੍ਥੁਨਾ ਚ ਆਪਤ੍ਤਿਯਾ ਚ ਚੋਦੇਤਬ੍ਬਾ. ਚੋਦੇਤ੍ਵਾ ਯਂ ਨ ਸਰਨ੍ਤਿ, ਤਂ ਸਾਰੇਤਬ੍ਬਾ. ਸਚੇ ਵਤ੍ਥੁਞ੍ਚ ਆਪਤ੍ਤਿਞ੍ਚ ਪਟਿਜਾਨਨ੍ਤਿ, ਆਪਤ੍ਤਿਮੇਵ ਵਾ ਪਟਿਜਾਨਨ੍ਤਿ, ਨ ਵਤ੍ਥੁਂ, ਆਪਤ੍ਤਿਂ ਰੋਪੇਤਬ੍ਬਾ. ਅਥ ਵਤ੍ਥੁਮੇਵ ਪਟਿਜਾਨਨ੍ਤਿ, ਨਾਪਤ੍ਤਿਂ; ਏਵਮ੍ਪਿ ‘‘ਇਮਸ੍ਮਿਂ ਵਤ੍ਥੁਸ੍ਮਿਂ ਅਯਂ ਨਾਮ ਆਪਤ੍ਤੀ’’ਤਿ ਰੋਪੇਤਬ੍ਬਾ ਏਵ. ਯਦਿ ਨੇਵ ਵਤ੍ਥੁਂ, ਨਾਪਤ੍ਤਿਂ ਪਟਿਜਾਨਨ੍ਤਿ, ਆਪਤ੍ਤਿਂ ਨ ਰੋਪੇਤਬ੍ਬਾ ਅਯਮੇਤ੍ਥ ਵਿਨਿਚ੍ਛਯੋ. ਯਥਾਪਟਿਞ੍ਞਾਯ ਪਨ ਆਪਤ੍ਤਿਂ ਰੋਪੇਤ੍ਵਾ; ਏਵਂ ਪਬ੍ਬਾਜਨੀਯਕਮ੍ਮਂ ਕਾਤਬ੍ਬਨ੍ਤਿ ਦਸ੍ਸੇਨ੍ਤੋ ‘‘ਬ੍ਯਤ੍ਤੇਨ ਭਿਕ੍ਖੁਨਾ’’ਤਿਆਦਿਮਾਹ, ਤਂ ਉਤ੍ਤਾਨਤ੍ਥਮੇਵ.

ਏਵਂ ਪਬ੍ਬਾਜਨੀਯਕਮ੍ਮਕਤੇਨ ਭਿਕ੍ਖੁਨਾ ਯਸ੍ਮਿਂ ਵਿਹਾਰੇ ਵਸਨ੍ਤੇਨ ਯਸ੍ਮਿਂ ਗਾਮੇ ਕੁਲਦੂਸਕਕਮ੍ਮਂ ਕਤਂ ਹੋਤਿ, ਤਸ੍ਮਿਂ ਵਿਹਾਰੇ ਵਾ ਤਸ੍ਮਿਂ ਗਾਮੇ ਵਾ ਨ ਵਸਿਤਬ੍ਬਂ. ਤਸ੍ਮਿਂ ਵਿਹਾਰੇ ਵਸਨ੍ਤੇਨ ਸਾਮਨ੍ਤਗਾਮੇਪਿ ਪਿਣ੍ਡਾਯ ਨ ਚਰਿਤਬ੍ਬਂ. ਸਾਮਨ੍ਤਵਿਹਾਰੇਪਿ ਵਸਨ੍ਤੇਨ ਤਸ੍ਮਿਂ ਗਾਮੇ ਪਿਣ੍ਡਾਯ ਨ ਚਰਿਤਬ੍ਬਂ. ਉਪਤਿਸ੍ਸਤ੍ਥੇਰੋ ਪਨ ‘‘ਭਨ੍ਤੇ ਨਗਰਂ ਨਾਮ ਮਹਨ੍ਤਂ ਦ੍ਵਾਦਸਯੋਜਨਿਕਮ੍ਪਿ ਹੋਤੀ’’ਤਿ ਅਨ੍ਤੇਵਾਸਿਕੇਹਿ ਵੁਤ੍ਤੋ ‘‘ਯਸ੍ਸਾ ਵੀਥਿਯਾ ਕੁਲਦੂਸਕਕਮ੍ਮਂ ਕਤਂ ਤਤ੍ਥੇਵ ਵਾਰਿਤ’’ਨ੍ਤਿ ਆਹ. ਤਤੋ ‘‘ਵੀਥਿਪਿ ਮਹਤੀ ਨਗਰਪ੍ਪਮਾਣਾਵ ਹੋਤੀ’’ਤਿ ਵੁਤ੍ਤੋ ‘‘ਯਸ੍ਸਾ ਘਰਪਟਿਪਾਟਿਯਾ’’ਤਿ ਆਹ, ‘‘ਘਰਪਟਿਪਾਟੀਪਿ ਵੀਥਿਪ੍ਪਮਾਣਾਵ ਹੋਤੀ’’ਤਿ ਵੁਤ੍ਤੋ ਇਤੋ ਚਿਤੋ ਚ ਸਤ੍ਤ ਘਰਾਨਿ ਵਾਰਿਤਾਨੀ’’ਤਿ ਆਹ. ਤਂ ਪਨ ਸਬ੍ਬਂ ਥੇਰਸ੍ਸ ਮਨੋਰਥਮਤ੍ਤਮੇਵ. ਸਚੇਪਿ ਵਿਹਾਰੋ ਤਿਯੋਜਨਪਰਮੋ ਹੋਤਿ ਦ੍ਵਾਦਸਯੋਜਨਪਰਮਞ੍ਚ ਨਗਰਂ, ਨੇਵ ਵਿਹਾਰੇ ਵਸਿਤੁਂ ਲਬ੍ਭਤਿ, ਨ ਨਗਰੇ ਚਰਿਤੁਨ੍ਤਿ.

੪੩੫. ਤੇ ਸਙ੍ਘੇਨ ਪਬ੍ਬਾਜਨੀਯਕਮ੍ਮਕਤਾਤਿ ਕਥਂ ਸਙ੍ਘੋ ਤੇਸਂ ਕਮ੍ਮਂ ਅਕਾਸਿ? ਨ ਗਨ੍ਤ੍ਵਾਵ ਅਜ੍ਝੋਤ੍ਥਰਿਤ੍ਵਾ ਅਕਾਸਿ, ਅਥ ਖੋ ਕੁਲੇਹਿ ਨਿਮਨ੍ਤੇਤ੍ਵਾ ਸਙ੍ਘਭਤ੍ਤੇਸੁ ਕਯਿਰਮਾਨੇਸੁ ਤਸ੍ਮਿਂ ਤਸ੍ਮਿਂ ਠਾਨੇ ਥੇਰਾ ਸਮਣਪਟਿਪਦਂ ਕਥੇਤ੍ਵਾ ‘‘ਅਯਂ ਸਮਣੋ, ਅਯਂ ਅਸ੍ਸਮਣੋ’’ਤਿ ਮਨੁਸ੍ਸੇ ਸਞ੍ਞਾਪੇਤ੍ਵਾ ਏਕਂ ਦ੍ਵੇ ਭਿਕ੍ਖੂ ਸੀਮਂ ਪਵੇ ਸੇਤ੍ਵਾ ਏਤੇਨੇਵੁਪਾਯੇਨ ਸਬ੍ਬੇਸਂ ਪਬ੍ਬਾਜਨੀਯਕਮ੍ਮਂ ਅਕਂਸੂਤਿ. ਏਵਂ ਪਬ੍ਬਾਜਨੀਯਕਮ੍ਮਕਤਸ੍ਸ ਚ ਅਟ੍ਠਾਰਸ ਵਤ੍ਤਾਨਿ ਪੂਰੇਤ੍ਵਾ ਯਾਚਨ੍ਤਸ੍ਸ ਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਪਟਿਪ੍ਪਸ੍ਸਦ੍ਧਕਮ੍ਮੇਨਾਪਿ ਚ ਤੇਨ ਯੇਸੁ ਕੁਲੇਸੁ ਪੁਬ੍ਬੇ ਕੁਲਦੂਸਕਕਮ੍ਮਂ ਕਤਂ, ਤਤੋ ਪਚ੍ਚਯਾ ਨ ਗਹੇਤਬ੍ਬਾ, ਆਸਵਕ੍ਖਯਪ੍ਪਤ੍ਤੇਨਾਪਿ ਨ ਗਹੇਤਬ੍ਬਾ, ਅਕਪ੍ਪਿਯਾਵ ਹੋਨ੍ਤਿ. ‘‘ਕਸ੍ਮਾ ਨ ਗਣ੍ਹਥਾ’’ਤਿ ਪੁਚ੍ਛਿਤੇਨ ‘‘ਪੁਬ੍ਬੇ ਏਵਂ ਕਤਤ੍ਤਾ’’ਤਿ ਵੁਤ੍ਤੇ, ਸਚੇ ਵਦਨ੍ਤਿ ‘‘ਨ ਮਯਂ ਤੇਨ ਕਾਰਣੇਨ ਦੇਮ ਇਦਾਨਿ ਸੀਲਵਨ੍ਤਤਾਯ ਦੇਮਾ’’ਤਿ ਗਹੇਤਬ੍ਬਾ. ਪਕਤਿਯਾ ਦਾਨਟ੍ਠਾਨੇਯੇਵ ਕੁਲਦੂਸਕਕਮ੍ਮਂ ਕਤਂ ਹੋਤਿ. ਤਤੋ ਪਕਤਿਦਾਨਮੇਵ ਗਹੇਤੁਂ ਵਟ੍ਟਤਿ, ਯਂ ਵਡ੍ਢੇਤ੍ਵਾ ਦੇਨ੍ਤਿ, ਤਂ ਨ ਵਟ੍ਟਤਿ.

ਨ ਸਮ੍ਮਾ ਵਤ੍ਤਨ੍ਤੀਤਿ ਤੇ ਪਨ ਅਸ੍ਸਜਿਪੁਨਬ੍ਬਸੁਕਾ ਅਟ੍ਠਾਰਸਸੁ ਵਤ੍ਤੇਸੁ ਸਮ੍ਮਾ ਨ ਵਤ੍ਤਨ੍ਤਿ. ਨ ਲੋਮਂ ਪਾਤੇਨ੍ਤੀਤਿ ਅਨੁਲੋਮਪਟਿਪਦਂ ਅਪ੍ਪਟਿਪਜ੍ਜਨਤਾਯ ਨ ਪਨ੍ਨਲੋਮਾ ਹੋਨ੍ਤਿ. ਨ ਨੇਤ੍ਥਾਰਂ ਵਤ੍ਤਨ੍ਤੀਤਿ ਅਤ੍ਤਨੋ ਨਿਤ੍ਥਰਣਮਗ੍ਗਂ ਨ ਪਟਿਪਜ੍ਜਨ੍ਤਿ. ਨ ਭਿਕ੍ਖੂ ਖਮਾਪੇਨ੍ਤੀਤਿ ‘‘ਦੁਕ੍ਕਟਂ, ਭਨ੍ਤੇ, ਅਮ੍ਹੇਹਿ, ਨ ਪੁਨ ਏਵਂ ਕਰਿਸ੍ਸਾਮ, ਖਮਥ ਅਮ੍ਹਾਕ’’ਨ੍ਤਿ ਏਵਂ ਭਿਕ੍ਖੂਨਂ ਖਮਾਪਨਂ ਨ ਕਰੋਨ੍ਤਿ. ਅਕ੍ਕੋਸਨ੍ਤੀਤਿ ਕਾਰਕਸਙ੍ਘਂ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਨ੍ਤਿ. ਪਰਿਭਾਸਨ੍ਤੀਤਿ ਭਯਂ ਨੇਸਂ ਦਸ੍ਸੇਨ੍ਤਿ. ਛਨ੍ਦਗਾਮਿਤਾ…ਪੇ… ਭਯਗਾਮਿਤਾ ਪਾਪੇਨ੍ਤੀਤਿ ਏਤੇ ਛਨ੍ਦਗਾਮਿਨੋ ਚ…ਪੇ… ਭਯਗਾਮਿਨੋ ਚਾਤਿ ਏਵਂ ਛਨ੍ਦਗਾਮਿਤਾਯਪਿ…ਪੇ… ਭਯਗਾਮਿਤਾਯਪਿ ਪਾਪੇਨ੍ਤਿ, ਯੋਜੇਨ੍ਤੀਤਿ ਅਤ੍ਥੋ. ਪਕ੍ਕਮਨ੍ਤੀਤਿ ਤੇਸਂ ਪਰਿਵਾਰੇਸੁ ਪਞ੍ਚਸੁ ਸਮਣਸਤੇਸੁ ਏਕਚ੍ਚੇ ਦਿਸਾ ਪਕ੍ਕਮਨ੍ਤਿ. ਵਿਬ੍ਭਮਨ੍ਤੀਤਿ ਏਕਚ੍ਚੇ ਗਿਹੀ ਹੋਨ੍ਤਿ. ਕਥਞ੍ਹਿ ਨਾਮ ਅਸ੍ਸਜਿਪੁਨਬ੍ਬਸੁਕਾ ਭਿਕ੍ਖੂਤਿ ਏਤ੍ਥ ਦ੍ਵਿਨ੍ਨਂ ਪਮੋਕ੍ਖਾਨਂ ਵਸੇਨ ਸਬ੍ਬੇਪਿ ‘‘ਅਸ੍ਸਜਿਪੁਨਬ੍ਬਸੁਕਾ’’ਤਿ ਵੁਤ੍ਤਾ.

੪੩੬-੭. ਗਾਮਂ ਵਾਤਿ ਏਤ੍ਥ ਨਗਰਮ੍ਪਿ ਗਾਮਗ੍ਗਹਣੇਨੇਵ ਗਹਿਤਂ. ਤੇਨਸ੍ਸ ਪਦਭਾਜਨੇ ‘‘ਗਾਮੋਪਿ ਨਿਗਮੋਪਿ ਨਗਰਮ੍ਪਿ ਗਾਮੋ ਚੇਵ ਨਿਗਮੋ ਚਾ’’ਤਿ ਵੁਤ੍ਤਂ. ਤਤ੍ਥ ਅਪਾਕਾਰਪਰਿਕ੍ਖੇਪੋ ਸਆਪਣੋ ਨਿਗਮੋਤਿ ਵੇਦਿਤਬ੍ਬੋ.

ਕੁਲਾਨਿ ਦੂਸੇਤੀਤਿ ਕੁਲਦੂਸਕੋ. ਦੂਸੇਨ੍ਤੋ ਚ ਨ ਅਸੁਚਿਕਦ੍ਦਮਾਦੀਹਿ ਦੂਸੇਤਿ, ਅਥ ਖੋ ਅਤ੍ਤਨੋ ਦੁਪ੍ਪਟਿਪਤ੍ਤਿਯਾ ਤੇਸਂ ਪਸਾਦਂ ਵਿਨਾਸੇਤਿ. ਤੇਨੇਵਸ੍ਸ ਪਦਭਾਜਨੇ ‘‘ਪੁਪ੍ਫੇਨ ਵਾ’’ਤਿਆਦਿ ਵੁਤ੍ਤਂ. ਤਤ੍ਥ ਯੋ ਹਰਿਤ੍ਵਾ ਵਾ ਹਰਾਪੇਤ੍ਵਾ ਵਾ ਪਕ੍ਕੋਸਿਤ੍ਵਾ ਵਾ ਪਕ੍ਕੋਸਾਪੇਤ੍ਵਾ ਵਾ ਸਯਂ ਵਾ ਉਪਗਤਾਨਂ ਯਂਕਿਞ੍ਚਿ ਅਤ੍ਤਨੋ ਸਨ੍ਤਕਂ ਪੁਪ੍ਫਂ ਕੁਲਸਙ੍ਗਹਤ੍ਥਾਯ ਦੇਤਿ, ਦੁਕ੍ਕਟਂ. ਪਰਸਨ੍ਤਕਂ ਦੇਤਿ, ਦੁਕ੍ਕਟਮੇਵ. ਥੇਯ੍ਯਚਿਤ੍ਤੇਨ ਦੇਤਿ, ਭਣ੍ਡਗ੍ਘੇਨ ਕਾਰੇਤਬ੍ਬੋ. ਏਸੇਵ ਨਯੋ ਸਙ੍ਘਿਕੇਪਿ. ਅਯਂ ਪਨ ਵਿਸੇਸੋ, ਸੇਨਾਸਨਤ੍ਥਾਯ ਨਿਯਾਮਿਤਂ ਇਸ੍ਸਰਵਤਾਯ ਦਦਤੋ ਥੁਲ੍ਲਚ੍ਚਯਂ.

ਪੁਪ੍ਫਂ ਨਾਮ ਕਸ੍ਸ ਦਾਤੁਂ ਵਟ੍ਟਤਿ, ਕਸ੍ਸ ਨ ਵਟ੍ਟਤੀਤਿ? ਮਾਤਾਪਿਤੂਨ੍ਨਂ ਤਾਵ ਹਰਿਤ੍ਵਾਪਿ ਹਰਾਪੇਤ੍ਵਾਪਿ ਪਕ੍ਕੋਸਿਤ੍ਵਾਪਿ ਪਕ੍ਕੋਸਾਪੇਤ੍ਵਾਪਿ ਦਾਤੁਂ ਵਟ੍ਟਤਿ, ਸੇਸਞਾਤਕਾਨਂ ਪਕ੍ਕੋਸਾਪੇਤ੍ਵਾਵ. ਤਞ੍ਚ ਖੋ ਵਤ੍ਥੁਪੂਜਨਤ੍ਥਾਯ, ਮਣ੍ਡਨਤ੍ਥਾਯ ਪਨ ਸਿਵਲਿਙ੍ਗਾਦਿਪੂਜਨਤ੍ਥਾਯ ਵਾ ਕਸ੍ਸਚਿਪਿ ਦਾਤੁਂ ਨ ਵਟ੍ਟਤਿ. ਮਾਤਾਪਿਤੂਨਞ੍ਚ ਹਰਾਪੇਨ੍ਤੇਨ ਞਾਤਿਸਾਮਣੇਰੇਹੇਵ ਹਰਾਪੇਤਬ੍ਬਂ. ਇਤਰੇ ਪਨ ਯਦਿ ਸਯਮੇਵ ਇਚ੍ਛਨ੍ਤਿ, ਵਟ੍ਟਤਿ. ਸਮ੍ਮਤੇਨ ਪੁਪ੍ਫਭਾਜਕੇਨ ਭਾਜਨਕਾਲੇ ਸਮ੍ਪਤ੍ਤਾਨਂ ਸਾਮਣੇਰਾਨਂ ਉਪਡ੍ਢਭਾਗਂ ਦਾਤੁਂ ਵਟ੍ਟਤਿ. ਕੁਰੁਨ੍ਦਿਯਂ ਸਮ੍ਪਤ੍ਤਗਿਹੀਨਂ ਉਪਡ੍ਢਭਾਗਂ. ਮਹਾਪਚ੍ਚਰਿਯਂ ‘‘ਚੂਲ਼ਕਂ ਦਾਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਅਸਮ੍ਮਤੇਨ ਅਪਲੋਕੇਤ੍ਵਾ ਦਾਤਬ੍ਬਂ.

ਆਚਰਿਯੁਪਜ੍ਝਾਯੇਸੁ ਸਗਾਰਵਾ ਸਾਮਣੇਰਾ ਬਹੂਨਿ ਪੁਪ੍ਫਾਨਿ ਆਹਰਿਤ੍ਵਾ ਰਾਸਿਂ ਕਤ੍ਵਾ ਠਪੇਨ੍ਤਿ, ਥੇਰਾ ਪਾਤੋਵ ਸਮ੍ਪਤ੍ਤਾਨਂ ਸਦ੍ਧਿਵਿਹਾਰਿਕਾਦੀਨਂ ਉਪਾਸਕਾਨਂ ਵਾ ‘‘ਤ੍ਵਂ ਇਦਂ ਗਣ੍ਹ, ਤ੍ਵਂ ਇਦਂ ਗਣ੍ਹਾ’’ਤਿ ਦੇਨ੍ਤਿ, ਪੁਪ੍ਫਦਾਨਂ ਨਾਮ ਨ ਹੋਤਿ. ‘‘ਚੇਤਿਯਂ ਪੂਜੇਸ੍ਸਾਮਾ’’ਤਿ ਗਹੇਤ੍ਵਾ ਗਚ੍ਛਨ੍ਤਾਪਿ ਪੂਜਂ ਕਰੋਨ੍ਤਾਪਿ ਤਤ੍ਥ ਤਤ੍ਥ ਸਮ੍ਪਤ੍ਤਾਨਂ ਚੇਤਿਯਪੂਜਨਤ੍ਥਾਯ ਦੇਨ੍ਤਿ, ਏਤਮ੍ਪਿ ਪੁਪ੍ਫਦਾਨਂ ਨਾਮ ਨ ਹੋਤਿ. ਉਪਾਸਕੇ ਅਕ੍ਕਪੁਪ੍ਫਾਦੀਹਿ ਪੂਜੇਨ੍ਤੇ ਦਿਸ੍ਵਾ ‘‘ਵਿਹਾਰੇ ਕਣਿਕਾਰਪੁਪ੍ਫਾਦੀਨਿ ਅਤ੍ਥਿ, ਉਪਾਸਕਾ ਤਾਨਿ ਗਹੇਤ੍ਵਾ ਪੂਜੇਥਾ’’ਤਿ ਵਤ੍ਤੁਮ੍ਪਿ ਵਟ੍ਟਤਿ. ਭਿਕ੍ਖੂ ਪੁਪ੍ਫਪੂਜਂ ਕਤ੍ਵਾ ਦਿਵਾਤਰਂ ਗਾਮਂ ਪਵਿਟ੍ਠੇ ‘‘ਕਿਂ, ਭਨ੍ਤੇ, ਅਤਿਦਿਵਾ ਪਵਿਟ੍ਠਤ੍ਥਾ’’ਤਿ ਪੁਚ੍ਛਨ੍ਤਿ, ‘‘ਵਿਹਾਰੇ ਬਹੂਨਿ ਪੁਪ੍ਫਾਨਿ ਪੂਜਂ ਅਕਰਿਮ੍ਹਾ’’ਤਿ ਵਦਨ੍ਤਿ. ਮਨੁਸ੍ਸਾ ‘‘ਬਹੂਨਿ ਕਿਰ ਵਿਹਾਰੇ ਪੁਪ੍ਫਾਨੀ’’ਤਿ ਪੁਨਦਿਵਸੇ ਪਹੂਤਂ ਖਾਦਨੀਯਂ ਭੋਜਨੀਯਂ ਗਹੇਤ੍ਵਾ ਵਿਹਾਰਂ ਗਨ੍ਤ੍ਵਾ ਪੁਪ੍ਫਪੂਜਞ੍ਚ ਕਰੋਨ੍ਤਿ, ਦਾਨਞ੍ਚ ਦੇਨ੍ਤਿ, ਵਟ੍ਟਤਿ. ਮਨੁਸ੍ਸਾ ‘‘ਮਯਂ, ਭਨ੍ਤੇ, ਅਸੁਕਦਿਵਸਂ ਨਾਮ ਪੂਜੇਸ੍ਸਾਮਾ’’ਤਿ ਪੁਪ੍ਫਵਾਰਂ ਯਾਚਿਤ੍ਵਾ ਅਨੁਞ੍ਞਾਤਦਿਵਸੇ ਆਗਚ੍ਛਨ੍ਤਿ, ਸਾਮਣੇਰੇਹਿ ਚ ਪਗੇਵ ਪੁਪ੍ਫਾਨਿ ਓਚਿਨਿਤ੍ਵਾ ਠਪਿਤਾਨਿ ਹੋਨ੍ਤਿ, ਤੇ ਰੁਕ੍ਖੇਸੁ ਪੁਪ੍ਫਾਨਿ ਅਪਸ੍ਸਨ੍ਤਾ ‘‘ਕੁਹਿਂ, ਭਨ੍ਤੇ, ਪੁਪ੍ਫਾਨੀ’’ਤਿ ਵਦਨ੍ਤਿ, ਸਾਮਣੇਰੇਹਿ ਓਚਿਨਿਤ੍ਵਾ ਠਪਿਤਾਨਿ ਤੁਮ੍ਹੇ ਪਨ ਪੂਜੇਤ੍ਵਾ ਗਚ੍ਛਥ, ਸਙ੍ਘੋ ਅਞ੍ਞਂ ਦਿਵਸਂ ਪੂਜੇਸ੍ਸਤੀਤਿ. ਤੇ ਪੂਜੇਤ੍ਵਾ ਦਾਨਂ ਦਤ੍ਵਾ ਗਚ੍ਛਨ੍ਤਿ, ਵਟ੍ਟਤਿ. ਮਹਾਪਚ੍ਚਰਿਯਂ ਪਨ ਕੁਰੁਨ੍ਦਿਯਞ੍ਚ ‘‘ਥੇਰਾ ਸਾਮਣੇਰੇਹਿ ਦਾਪੇਤੁਂ ਨ ਲਭਨ੍ਤਿ. ਸਚੇ ਸਯਮੇਵ ਤਾਨਿ ਪੁਪ੍ਫਾਨਿ ਤੇਸਂ ਦੇਨ੍ਤਿ, ਵਟ੍ਟਤਿ. ਥੇਰੇਹਿ ਪਨ ‘ਸਾਮਣੇਰੇਹਿ ਓਚਿਨਿਤ੍ਵਾ ਠਪਿਤਾਨੀ’ਤਿ ਏਤ੍ਤਕਮੇਵ ਵਤ੍ਤਬ੍ਬ’’ਨ੍ਤਿ ਵੁਤ੍ਤਂ. ਸਚੇ ਪਨ ਪੁਪ੍ਫਵਾਰਂ ਯਾਚਿਤ੍ਵਾ ਅਨੋਚਿਤੇਸੁ ਪੁਪ੍ਫੇਸੁ ਯਾਗੁਭਤ੍ਤਾਦੀਨਿ ਆਦਾਯ ਆਗਨ੍ਤ੍ਵਾ ਸਾਮਣੇਰੇ ‘‘ਓਚਿਨਿਤ੍ਵਾ ਦੇਥਾ’’ਤਿ ਵਦਨ੍ਤਿ. ਞਾਤਕਸਾਮਣੇਰਾਨਂਯੇਵ ਓਚਿਨਿਤ੍ਵਾ ਦਾਤੁਂ ਵਟ੍ਟਤਿ. ਅਞ੍ਞਾਤਕੇ ਉਕ੍ਖਿਪਿਤ੍ਵਾ ਰੁਕ੍ਖਸਾਖਾਯ ਠਪੇਨ੍ਤਿ, ਨ ਓਰੋਹਿਤ੍ਵਾ ਪਲਾਯਿਤਬ੍ਬਂ, ਓਚਿਨਿਤ੍ਵਾ ਦਾਤੁਂ ਵਟ੍ਟਤਿ. ਸਚੇ ਪਨ ਕੋਚਿ ਧਮ੍ਮਕਥਿਕੋ ‘‘ਬਹੂਨਿ ਉਪਾਸਕਾ ਵਿਹਾਰੇ ਪੁਪ੍ਫਾਨਿ ਯਾਗੁਭਤ੍ਤਾਦੀਨਿ ਆਦਾਯ ਗਨ੍ਤ੍ਵਾ ਪੁਪ੍ਫਪੂਜਂ ਕਰੋਥਾ’’ਤਿ ਵਦਤਿ, ਤਸ੍ਸੇਵ ਨ ਕਪ੍ਪਤੀਤਿ ਮਹਾਪਚ੍ਚਰਿਯਞ੍ਚ ਕੁਰੁਨ੍ਦਿਯਞ੍ਚ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ‘‘ਏਤਂ ਅਕਪ੍ਪਿਯਂ ਨ ਵਟ੍ਟਤੀ’’ਤਿ ਅਵਿਸੇਸੇਨ ਵੁਤ੍ਤਂ.

ਫਲਮ੍ਪਿ ਅਤ੍ਤਨੋ ਸਨ੍ਤਕਂ ਵੁਤ੍ਤਨਯੇਨੇਵ ਮਾਤਾਪਿਤੂਨਂਞ੍ਚ ਸੇਸਞਾਤਕਾਨਞ੍ਚ ਦਾਤੁਂ ਵਟ੍ਟਤਿ. ਕੁਲਸਙ੍ਗਹਤ੍ਥਾਯ ਪਨ ਦੇਨ੍ਤਸ੍ਸ ਵੁਤ੍ਤਨਯੇਨੇਵ ਅਤ੍ਤਨੋ ਸਨ੍ਤਕੇ ਪਰਸਨ੍ਤਕੇ ਸਙ੍ਘਿਕੇ ਸੇਨਾਸਨਤ੍ਥਾਯ ਨਿਯਾਮਿਤੇ ਚ ਦੁਕ੍ਕਟਾਦੀਨਿ ਵੇਦਿਤਬ੍ਬਾਨਿ. ਅਤ੍ਤਨੋ ਸਨ੍ਤਕਂਯੇਵ ਗਿਲਾਨਮਨੁਸ੍ਸਾਨਂ ਵਾ ਸਮ੍ਪਤ੍ਤਇਸ੍ਸਰਾਨਂ ਵਾ ਖੀਣਪਰਿਬ੍ਬਯਾਨਂ ਵਾ ਦਾਤੁਂ ਵਟ੍ਟਤਿ, ਫਲਦਾਨਂ ਨ ਹੋਤਿ. ਫਲਭਾਜਕੇਨਾਪਿ ਸਮ੍ਮਤੇਨ ਸਙ੍ਘਸ੍ਸ ਫਲਭਾਜਨਕਾਲੇ ਸਮ੍ਪਤ੍ਤਮਨੁਸ੍ਸਾਨਂ ਉਪਡ੍ਢਭਾਗਂ ਦਾਤੁਂ ਵਟ੍ਟਤਿ. ਅਸਮ੍ਮਤੇਨ ਅਪਲੋਕੇਤ੍ਵਾ ਦਾਤਬ੍ਬਂ. ਸਙ੍ਘਾਰਾਮੇਪਿ ਫਲਪਰਿਚ੍ਛੇਦੇਨ ਵਾ ਰੁਕ੍ਖਪਰਿਚ੍ਛੇਦੇਨ ਵਾ ਕਤਿਕਾ ਕਾਤਬ੍ਬਾ. ਤਤੋ ਗਿਲਾਨਮਨੁਸ੍ਸਾਨਂ ਵਾ ਅਞ੍ਞੇਸਂ ਵਾ ਫਲਂ ਯਾਚਨ੍ਤਾਨਂ ਯਥਾਪਰਿਚ੍ਛੇਦੇਨ ਚਤ੍ਤਾਰਿ ਪਞ੍ਚ ਫਲਾਨਿ ਦਾਤਬ੍ਬਾਨਿ. ਰੁਕ੍ਖਾ ਵਾ ਦਸ੍ਸੇਤਬ੍ਬਾ ‘‘ਇਤੋ ਗਹੇਤੁਂ ਲਬ੍ਭਤੀ’’ਤਿ. ‘‘ਇਘ ਫਲਾਨਿ ਸੁਨ੍ਦਰਾਨਿ, ਇਤੋ ਗਣ੍ਹਥਾ’’ਤਿ ਏਵਂ ਪਨ ਨ ਵਤ੍ਤਬ੍ਬਂ.

ਚੁਣ੍ਣੇਨਾਤਿ ਏਤ੍ਥ ਅਤ੍ਤਨੋ ਸਨ੍ਤਕਂ ਸਿਰੀਸਚੁਣ੍ਣਂ ਵਾ ਅਞ੍ਞਂ ਵਾ ਕਸਾਵਂ ਯਂਕਿਞ੍ਚਿ ਕੁਲਸਙ੍ਗਹਤ੍ਥਾਯ ਦੇਤਿ, ਦੁਕ੍ਕਟਂ. ਪਰਸਨ੍ਤਕਾਦੀਸੁਪਿ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ. ਅਯਂ ਪਨ ਵਿਸੇਸੋ – ਇਧ ਸਙ੍ਘਸ੍ਸ ਰਕ੍ਖਿਤਗੋਪਿਤਾਪਿ ਰੁਕ੍ਖਚ੍ਛਲ੍ਲਿ ਗਰੁਭਣ੍ਡਮੇਵ. ਮਤ੍ਤਿਕਦਨ੍ਤਕਟ੍ਠਵੇਲ਼ੂਸੁਪਿ ਗਰੁਭਣ੍ਡੂਪਗਂ ਞਤ੍ਵਾ ਚੁਣ੍ਣੇ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ. ਪਣ੍ਣਦਾਨਂ ਪਨ ਏਤ੍ਥ ਨ ਆਗਤਂ, ਤਮ੍ਪਿ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਪਰਤੋਪਿ ਗਰੁਭਣ੍ਡਵਿਨਿਚ੍ਛਯੇ ਸਬ੍ਬਂ ਵਿਤ੍ਥਾਰੇਨ ਵਣ੍ਣਯਿਸ੍ਸਾਮ.

ਵੇਜ੍ਜਿਕਾਯ ਵਾਤਿ ਏਤ੍ਥ ਵੇਜ੍ਜਕਮ੍ਮਵਿਧਿ ਤਤਿਯਪਾਰਾਜਿਕਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਜਙ੍ਘਪੇਸਨਿਕੇਨਾਤਿ ਏਤ੍ਥ ਜਙ੍ਘਪੇਸਨਿਯਨ੍ਤਿ ਗਿਹੀਨਂ ਦੂਤੇਯ੍ਯਸਾਸਨਹਰਣਕਮ੍ਮਂ ਵੁਚ੍ਚਤਿ, ਤਂ ਨ ਕਾਤਬ੍ਬਂ. ਗਿਹੀਨਞ੍ਹਿ ਸਾਸਨਂ ਗਹੇਤ੍ਵਾ ਗਚ੍ਛਨ੍ਤਸ੍ਸ ਪਦੇ ਪਦੇ ਦੁਕ੍ਕਟਂ. ਤਂ ਕਮ੍ਮਂ ਨਿਸ੍ਸਾਯ ਲਦ੍ਧਭੋਜਨਂ ਭੁਞ੍ਜਨ੍ਤਸ੍ਸਾਪਿ ਅਜ੍ਝੋਹਾਰੇ ਅਜ੍ਝੋਹਾਰੇ ਦੁਕ੍ਕਟਂ. ਪਠਮਂ ਸਾਸਨਂ ਅਗ੍ਗਹੇਤ੍ਵਾਪਿ ਪਚ੍ਛਾ ‘‘ਅਯਂ ਦਾਨਿ ਸੋ ਗਾਮੋ ਹਨ੍ਦ ਤਂ ਸਾਸਨਂ ਆਰੋਚੇਮੀ’’ਤਿ ਮਗ੍ਗਾ ਓਕ੍ਕਮਨ੍ਤਸ੍ਸਾਪਿ ਪਦੇ ਪਦੇ ਦੁਕ੍ਕਟਂ. ਸਾਸਨਂ ਆਰੋਚੇਤ੍ਵਾ ਲਦ੍ਧਭੋਜਨਂ ਭੁਞ੍ਜਤੋ ਪੁਰਿਮਨਯੇਨੇਵ ਦੁਕ੍ਕਟਂ. ਸਾਸਨਂ ਅਗ੍ਗਹੇਤ੍ਵਾ ਆਗਤੇਨ ਪਨ ‘‘ਭਨ੍ਤੇ ਤਸ੍ਮਿਂ ਗਾਮੇ ਇਤ੍ਥਨ੍ਨਾਮਸ੍ਸ ਕਾ ਪਵਤ੍ਤੀ’’ਤਿ ਪੁਚ੍ਛਿਯਮਾਨੇਨ ਕਥੇਤੁਂ ਵਟ੍ਟਤਿ, ਪੁਚ੍ਛਿਤਪਞ੍ਹੇ ਦੋਸੋ ਨਤ੍ਥਿ. ਪਞ੍ਚਨ੍ਨਂ ਪਨ ਸਹਧਮ੍ਮਿਕਾਨਂ ਮਾਤਾਪਿਤੂਨਂ ਪਣ੍ਡੁਪਲਾਸਸ੍ਸ ਅਤ੍ਤਨੋ ਵੇਯ੍ਯਾਵਚ੍ਚਕਰਸ੍ਸ ਚ ਸਾਸਨਂ ਹਰਿਤੁਂ ਵਟ੍ਟਤਿ, ਗਿਹੀਨਞ੍ਚ ਪੁਬ੍ਬੇ ਵੁਤ੍ਤਪ੍ਪਕਾਰਂ ਕਪ੍ਪਿਯਸਾਸਨਂ. ਇਦਞ੍ਹਿ ਜਙ੍ਘਪੇਸਨਿਯਕਮ੍ਮਂ ਨਾਮ ਨ ਹੋਤਿ. ਇਮੇਹਿ ਪਨ ਅਟ੍ਠਹਿ ਕੁਲਦੂਸਕਕਮ੍ਮੇਹਿ ਉਪ੍ਪਨ੍ਨਪਚ੍ਚਯਾ ਪਞ੍ਚਨ੍ਨਮ੍ਪਿ ਸਹਧਮ੍ਮਿਕਾਨਂ ਨ ਕਪ੍ਪਨ੍ਤਿ, ਅਭੂਤਾਰੋਚਨਰੂਪਿਯਸਂਵੋਹਾਰੇਹਿ ਉਪ੍ਪਨ੍ਨਪਚ੍ਚਯਸਦਿਸਾਵ ਹੋਨ੍ਤਿ.

ਪਾਪਾ ਸਮਾਚਾਰਾ ਅਸ੍ਸਾਤਿ ਪਾਪਸਮਾਚਾਰੋ. ਤੇ ਪਨ ਯਸ੍ਮਾ ਮਾਲਾਵਚ੍ਛਰੋਪਨਾਦਯੋ ਇਧ ਅਧਿਪ੍ਪੇਤਾ, ਤਸ੍ਮਾ ‘‘ਮਾਲਾਵਚ੍ਛਂ ਰੋਪੇਨ੍ਤਿਪੀ’’ਤਿਆਦਿਨਾ ਨਯੇਨਸ੍ਸ ਪਦਭਾਜਨਂ ਵੁਤ੍ਤਂ. ਤਿਰੋਕ੍ਖਾਤਿ ਪਰਮ੍ਮੁਖਾ. ਕੁਲਾਨਿ ਚ ਤੇਨ ਦੁਟ੍ਠਾਨੀਤਿ ਏਤ੍ਥ ਪਨ ਯਸ੍ਮਾ ‘‘ਕੁਲਾਨੀ’’ਤਿ ਵੋਹਾਰਮਤ੍ਤਮੇਤਂ, ਅਤ੍ਥਤੋ ਹਿ ਮਨੁਸ੍ਸਾ ਤੇਨ ਦੁਟ੍ਠਾ ਹੋਨ੍ਤਿ, ਤਸ੍ਮਾਸ੍ਸ ਪਦਭਾਜਨੇ ‘‘ਪੁਬ੍ਬੇ ਸਦ੍ਧਾ ਹੁਤ੍ਵਾ’’ਤਿਆਦਿਮਾਹ. ਛਨ੍ਦਗਾਮਿਨੋਤਿ ਛਨ੍ਦੇਨ ਗਚ੍ਛਨ੍ਤੀਤਿ ਛਨ੍ਦਗਾਮਿਨੋ. ਏਸ ਨਯੋ ਸੇਸੇਸੁ. ਸਮਨੁਭਾਸਿਤਬ੍ਬੋ ਤਸ੍ਸ ਪਟਿਨਿਸ੍ਸਗ੍ਗਾਯਾਤਿ ਏਤ੍ਥ ਕੁਲਦੂਸਕਕਮ੍ਮੇਨ ਦੁਕ੍ਕਟਮੇਵ. ਯਂ ਪਨ ਸੋ ਸਙ੍ਘਂ ਪਰਿਭਵਿਤ੍ਵਾ ‘‘ਛਨ੍ਦਗਾਮਿਨੋ’’ਤਿਆਦਿਮਾਹ. ਤਸ੍ਸ ਪਟਿਨਿਸ੍ਸਗ੍ਗਾਯ ਸਮਨੁਭਾਸਨਕਮ੍ਮਂ ਕਾਤਬ੍ਬਨ੍ਤਿ ਏਵਮਤ੍ਥੋ ਦਟ੍ਠਬ੍ਬੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵ.

ਸਮੁਟ੍ਠਾਨਾਦੀਨਿਪਿ ਪਠਮਸਙ੍ਘਭੇਦਸਦਿਸਾਨੇਵਾਤਿ.

ਕੁਲਦੂਸਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਿਗਮਨਵਣ੍ਣਨਾ

੪੪੨. ਉਦ੍ਦਿਟ੍ਠਾ ਖੋ…ਪੇ… ਏਵਮੇਤਂ ਧਾਰਯਾਮੀਤਿ ਏਤ੍ਥ ਪਠਮਂ ਆਪਤ੍ਤਿ ਏਤੇਸਨ੍ਤਿ ਪਠਮਾਪਤ੍ਤਿਕਾ, ਪਠਮਂ ਵੀਤਿਕ੍ਕਮਕ੍ਖਣੇਯੇਵ ਆਪਜ੍ਜਿਤਬ੍ਬਾਤਿ ਅਤ੍ਥੋ. ਇਤਰੇ ਪਨ ਯਥਾ ਤਤਿਯੇ ਚਤੁਤ੍ਥੇ ਚ ਦਿਵਸੇ ਹੋਤੀਤਿ ਜਰੋ ‘‘ਤਤਿਯਕੋ ਚਤੁਤ੍ਥਕੋ’’ਤਿ ਚ ਵੁਚ੍ਚਤਿ; ਏਵਂ ਯਾਵਤਤਿਯੇ ਸਮਨੁਭਾਸਨਕਮ੍ਮੇ ਹੋਨ੍ਤੀਤਿ ਯਾਵਤਤਿਯਕਾਤਿ ਵੇਦਿਤਬ੍ਬਾ.

ਯਾਵਤੀਹਂ ਜਾਨਂ ਪਟਿਚ੍ਛਾਦੇਤੀਤਿ ਯਤ੍ਤਕਾਨਿ ਅਹਾਨਿ ਜਾਨਨ੍ਤੋ ਪਟਿਚ੍ਛਾਦੇਤਿ, ‘‘ਅਹਂ ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ’’ਤਿ ਸਬ੍ਰਹ੍ਮਚਾਰੀਨਂ ਨਾਰੋਚੇਤਿ. ਤਾਵਤੀਹਨ੍ਤਿ ਤਤ੍ਤਕਾਨਿ ਅਹਾਨਿ. ਅਕਾਮਾ ਪਰਿਵਤ੍ਥਬ੍ਬਨ੍ਤਿ ਨ ਕਾਮੇਨ, ਨ ਵਸੇਨ, ਅਥ ਖੋ ਅਕਾਮੇਨ ਅਵਸੇਨ ਪਰਿਵਾਸਂ ਸਮਾਦਾਯ ਵਤ੍ਥਬ੍ਬਂ. ਉਤ੍ਤਰਿ ਛਾਰਤ੍ਤਨ੍ਤਿ ਪਰਿਵਾਸਤੋ ਉਤ੍ਤਰਿ ਛ ਰਤ੍ਤਿਯੋ. ਭਿਕ੍ਖੁਮਾਨਤ੍ਤਾਯਾਤਿ ਭਿਕ੍ਖੂਨਂ ਮਾਨਨਭਾਵਾਯ, ਆਰਾਧਨਤ੍ਥਾਯਾਤਿ ਵੁਤ੍ਤਂ ਹੋਤਿ. ਵੀਸਤਿਸਙ੍ਘੋ ਗਣੋ ਅਸ੍ਸਾਤਿ ਵੀਸਤਿਗਣੋ. ਤਤ੍ਰਾਤਿ ਯਤ੍ਰ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਵੀਸਤਿਗਣੋ ਭਿਕ੍ਖੁਸਙ੍ਘੋ ਅਤ੍ਥਿ ਤਤ੍ਰ. ਅਬ੍ਭੇਤਬ੍ਬੋਤਿ ਅਭਿਏਤਬ੍ਬੋ ਸਮ੍ਪਟਿਚ੍ਛਿਤਬ੍ਬੋ, ਅਬ੍ਭਾਨਕਮ੍ਮਵਸੇਨ ਓਸਾਰੇਤਬ੍ਬੋਤਿ ਵੁਤ੍ਤਂ ਹੋਤਿ, ਅਵ੍ਹਾਤਬ੍ਬੋਤਿ ਵਾ ਅਤ੍ਥੋ. ਅਨਬ੍ਭਿਤੋਤਿ ਨ ਅਬ੍ਭਿਤੋ, ਅਸਮ੍ਪਟਿਚ੍ਛਿਤੋ, ਅਕਤਬ੍ਭਾਨਕਮ੍ਮੋਤਿ ਵੁਤ੍ਤਂ ਹੋਤਿ, ਅਨਵ੍ਹਾਤੋਤਿ ਵਾ ਅਤ੍ਥੋ. ਸਾਮੀਚੀਤਿ ਅਨੁਧਮ੍ਮਤਾ, ਲੋਕੁਤ੍ਤਰਧਮ੍ਮਂ ਅਨੁਗਤਾ ਓਵਾਦਾਨੁਸਾਸਨੀ, ਸਾਮੀਚਿ ਧਮ੍ਮਤਾਤਿ ਵੁਤ੍ਤਂ ਹੋਤਿ. ਸੇਸਮੇਤ੍ਥ ਵੁਤ੍ਤਨਯਮੇਵਾਤਿ.

ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਤੇਰਸਕਵਣ੍ਣਨਾ ਨਿਟ੍ਠਿਤਾ.