੧੧. ਦੁਤਿਯਸਙ੍ਘਭੇਦਸਿਕ੍ਖਾਪਦਵਣ੍ਣਨਾ

੪੧੭-੮. ਤੇਨ ਸਮਯੇਨ ਬੁਦ੍ਧੋ ਭਗਵਾਤਿ ਦੁਤਿਯਸਙ੍ਘਭੇਦਸਿਕ੍ਖਾਪਦਂ. ਤਤ੍ਥ ਅਨੁਵਤ੍ਤਕਾਤਿ ਤਸ੍ਸ ਦਿਟ੍ਠਿਖਨ੍ਤਿਰੁਚਿਗ੍ਗਹਣੇਨ ਅਨੁਪਟਿਪਜ੍ਜਨਕਾ. ਵਗ੍ਗਂ ਅਸਾਮਗ੍ਗਿਪਕ੍ਖਿਯਵਚਨਂ ਵਦਨ੍ਤੀਤਿ ਵਗ੍ਗਵਾਦਕਾ. ਪਦਭਾਜਨੇ ਪਨ ‘‘ਤਸ੍ਸ ਵਣ੍ਣਾਯ ਪਕ੍ਖਾਯ ਠਿਤਾ ਹੋਨ੍ਤੀ’’ਤਿ ਵੁਤ੍ਤਂ, ਤਸ੍ਸ ਸਙ੍ਘਭੇਦਾਯ ਪਰਕ੍ਕਮਨ੍ਤਸ੍ਸ ਵਣ੍ਣਤ੍ਥਾਯ ਚ ਪਕ੍ਖਵੁਡ੍ਢਿਅਤ੍ਥਾਯ ਚ ਠਿਤਾਤਿ ਅਤ੍ਥੋ. ਯੇ ਹਿ ਵਗ੍ਗਵਾਦਕਾ, ਤੇ ਨਿਯਮੇਨ ਈਦਿਸਾ ਹੋਨ੍ਤਿ, ਤਸ੍ਮਾ ਏਵਂ ਵੁਤ੍ਤਂ. ਯਸ੍ਮਾ ਪਨ ਤਿਣ੍ਣਂ ਉਦ੍ਧਂ ਕਮ੍ਮਾਰਹਾ ਨ ਹੋਨ੍ਤਿ, ਨ ਹਿ ਸਙ੍ਘੋ ਸਙ੍ਘਸ੍ਸ ਕਮ੍ਮਂ ਕਰੋਤਿ, ਤਸ੍ਮਾ ਏਕੋ ਵਾ ਦ੍ਵੇ ਵਾ ਤਯੋ ਵਾਤਿ ਵੁਤ੍ਤਂ.

ਜਾਨਾਤਿ ਨੋਤਿ ਅਮ੍ਹਾਕਂ ਛਨ੍ਦਾਦੀਨਿ ਜਾਨਾਤਿ. ਭਾਸਤੀਤਿ ‘‘ਏਵਂ ਕਰੋਮਾ’’ਤਿ ਅਮ੍ਹੇਹਿ ਸਦ੍ਧਿਂ ਭਾਸਤਿ. ਅਮ੍ਹਾਕਮ੍ਪੇਤਂ ਖਮਤੀਤਿ ਯਂ ਸੋ ਕਰੋਤਿ, ਏਤਂ ਅਮ੍ਹਾਕਮ੍ਪਿ ਰੁਚ੍ਚਤਿ.

ਸਮੇਤਾਯਸ੍ਮਨ੍ਤਾਨਂ ਸਙ੍ਘੇਨਾਤਿ ਆਯਸ੍ਮਨ੍ਤਾਨਂ ਚਿਤ੍ਤਂ ਸਙ੍ਘੇਨ ਸਦ੍ਧਿਂ ਸਮੇਤੁ ਸਮਾਗਚ੍ਛਤੁ, ਏਕੀਭਾਵਂ ਯਾਤੂਤਿ ਵੁਤ੍ਤਂ ਹੋਤਿ. ਸੇਸਮੇਤ੍ਥ ਪਠਮਸਿਕ੍ਖਾਪਦੇ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਤ੍ਤਾ ਚ ਪਾਕਟਮੇਵ.

ਸਮੁਟ੍ਠਾਨਾਦੀਨਿਪਿ ਪਠਮਸਿਕ੍ਖਾਪਦਸਦਿਸਾਨੇਵਾਤਿ.

ਦੁਤਿਯਸਙ੍ਘਭੇਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.