੧. ਸਬ੍ਭਿਸੁਤ੍ਤਵਣ੍ਣਨਾ

੩੧. ਸਤੁਲ੍ਲਪਕਾਯਿਕਵਗ੍ਗਸ੍ਸ ਪਠਮੇ ਸਤੁਲ੍ਲਪਕਾਯਿਕਾਤਿ ਸਤਂ ਧਮ੍ਮਂ ਸਮਾਦਾਨਵਸੇਨ ਉਲ੍ਲਪੇਤ੍ਵਾ ਸਗ੍ਗੇ ਨਿਬ੍ਬਤ੍ਤਾਤਿ ਸਤੁਲ੍ਲਪਕਾਯਿਕਾ. ਤਤ੍ਰਿਦਂ ਵਤ੍ਥੁ – ਸਮ੍ਬਹੁਲਾ ਕਿਰ ਸਮੁਦ੍ਦਵਾਣਿਜਾ ਨਾਵਾਯ ਸਮੁਦ੍ਦਂ ਪਕ੍ਖਨ੍ਦਿਂਸੁ. ਤੇਸਂ ਖਿਤ੍ਤਸਰਵੇਗੇਨ ਗਚ੍ਛਨ੍ਤਿਯਾ ਨਾਵਾਯ ਸਤ੍ਤਮੇ ਦਿਵਸੇ ਸਮੁਦ੍ਦਮਜ੍ਝੇ ਮਹਨ੍ਤਂ ਉਪ੍ਪਾਤਿਕਂ ਪਾਤੁਭੂਤਂ, ਮਹਾਊਮਿਯੋ ਉਟ੍ਠਹਿਤ੍ਵਾ ਨਾਵਂ ਉਦਕਸ੍ਸ ਪੂਰੇਨ੍ਤਿ. ਨਾਵਾਯ ਨਿਮੁਜ੍ਜਮਾਨਾਯ ਮਹਾਜਨੋ ਅਤ੍ਤਨੋ ਅਤ੍ਤਨੋ ਦੇਵਤਾਨਂ ਨਾਮਾਨਿ ਗਹੇਤ੍ਵਾ ਆਯਾਚਨਾਦੀਨਿ ਕਰੋਨ੍ਤੋ ਪਰਿਦੇਵਿ. ਤੇਸਂ ਮਜ੍ਝੇ ਏਕੋ ਪੁਰਿਸੋ – ‘‘ਅਤ੍ਥਿ ਨੁ ਖੋ ਮੇ ਏਵਰੂਪੇ ਭਯੇ ਪਤਿਟ੍ਠਾ’’ਤਿ ਆਵਜ੍ਜੇਨ੍ਤੋ ਅਤ੍ਤਨੋ ਪਰਿਸੁਦ੍ਧਾਨਿ ਸਰਣਾਨਿ ਚੇਵ ਸੀਲਾਨਿ ਚ ਦਿਸ੍ਵਾ ਯੋਗੀ ਵਿਯ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸੀਦਿ. ਤਮੇਨਂ ਇਤਰੇ ਸਭਯਕਾਰਣਂ ਪੁਚ੍ਛਿਂਸੁ. ਸੋ ਤੇਸਂ ਕਥੇਸਿ – ‘‘ਅਮ੍ਭੋ ਅਹਂ ਨਾਵਂ ਅਭਿਰੂਹਨਦਿਵਸੇ ਭਿਕ੍ਖੁਸਙ੍ਘਸ੍ਸ ਦਾਨਂ ਦਤ੍ਵਾ ਸਰਣਾਨਿ ਚੇਵ ਸੀਲਾਨਿ ਚ ਅਗ੍ਗਹੇਸਿਂ, ਤੇਨ ਮੇ ਭਯਂ ਨਤ੍ਥੀ’’ਤਿ. ਕਿਂ ਪਨ ਸਾਮਿ ਏਤਾਨਿ ਅਞ੍ਞੇਸਮ੍ਪਿ ਵਤ੍ਤਨ੍ਤੀਤਿ? ਆਮ ਵਤ੍ਤਨ੍ਤੀਤਿ ਤੇਨ ਹਿ ਅਮ੍ਹਾਕਮ੍ਪਿ ਦੇਥਾਤਿ. ਸੋ ਤੇ ਮਨੁਸ੍ਸੇ ਸਤਂ ਸਤਂ ਕਤ੍ਵਾ ਸਤ੍ਤ ਕੋਟ੍ਠਾਸੇ ਅਕਾਸਿ, ਤਤੋ ਪਞ੍ਚਸੀਲਾਨਿ ਅਦਾਸਿ. ਤੇਸੁ ਪਠਮਂ ਜਙ੍ਘਸਤਂ ਗੋਪ੍ਫਕਮਤ੍ਤੇ ਉਦਕੇ ਠਿਤਂ ਅਗ੍ਗਹੇਸਿ, ਦੁਤਿਯਂ ਜਾਣੁਮਤ੍ਤੇ, ਤਤਿਯਂ ਕਟਿਮਤ੍ਤੇ, ਚਤੁਤ੍ਥਂ ਨਾਭਿਮਤ੍ਤੇ, ਪਞ੍ਚਮਂ ਥਨਮਤ੍ਤੇ, ਛਟ੍ਠਂ ਗਲਪ੍ਪਮਾਣੇ, ਸਤ੍ਤਮਂ ਮੁਖੇਨ ਲੋਣੋਦਕੇ ਪਵਿਸਨ੍ਤੇ ਅਗ੍ਗਹੇਸਿ. ਸੋ ਤੇਸਂ ਸੀਲਾਨਿ ਦਤ੍ਵਾ – ‘‘ਅਞ੍ਞਂ ਤੁਮ੍ਹਾਕਂ ਪਟਿਸਰਣਂ ਨਤ੍ਥਿ, ਸੀਲਮੇਵ ਆਵਜ੍ਜੇਥਾ’’ਤਿ ਉਗ੍ਘੋਸੇਸਿ. ਤਾਨਿ ਸਤ੍ਤਪਿ ਜਙ੍ਘਸਤਾਨਿ ਤਤ੍ਥ ਕਾਲਂ ਕਤ੍ਵਾ ਆਸਨ੍ਨਕਾਲੇ ਗਹਿਤਸੀਲਂ ਨਿਸ੍ਸਾਯ ਤਾਵਤਿਂਸਭਵਨੇ ਨਿਬ੍ਬਤ੍ਤਿਂਸੁ, ਤੇਸਂ ਘਟਾਵਸੇਨੇਵ ਵਿਮਾਨਾਨਿ ਨਿਬ੍ਬਤ੍ਤਿਂਸੁ. ਸਬ੍ਬੇਸਂ ਮਜ੍ਝੇ ਆਚਰਿਯਸ੍ਸ ਯੋਜਨਸਤਿਕਂ ਸੁਵਣ੍ਣਵਿਮਾਨਂ ਨਿਬ੍ਬਤ੍ਤਿ, ਅਵਸੇਨਾਨਿ ਤਸ੍ਸ ਪਰਿਵਾਰਾਨਿ ਹੁਤ੍ਵਾ ਸਬ੍ਬਹੇਟ੍ਠਿਮਂ ਦ੍ਵਾਦਸਯੋਜਨਿਕਂ ਅਹੋਸਿ. ਤੇ ਨਿਬ੍ਬਤ੍ਤਕ੍ਖਣੇਯੇਵ ਕਮ੍ਮਂ ਆਵਜ੍ਜੇਨ੍ਤਾ ਆਚਰਿਯਂ ਨਿਸ੍ਸਾਯ ਸਮ੍ਪਤ੍ਤਿਲਾਭਂ ਞਤ੍ਵਾ, ‘‘ਗਚ੍ਛਾਮ ਤਾਵ, ਦਸਬਲਸ੍ਸ ਸਨ੍ਤਿਕੇ ਅਮ੍ਹਾਕਂ ਆਚਰਿਯਸ੍ਸ ਵਣ੍ਣਂ ਕਥੇਯ੍ਯਾਮਾ’’ਤਿ ਮਜ੍ਝਿਮਯਾਮਸਮਨਨ੍ਤਰੇ ਭਗਵਨ੍ਤਂ ਉਪਸਙ੍ਕਮਿਂਸੁ, ਤਾ ਦੇਵਤਾ ਆਚਰਿਯਸ੍ਸ ਵਣ੍ਣਭਣਨਤ੍ਥਂ ਏਕੇਕਂ ਗਾਥਂ ਅਭਾਸਿਂਸੁ.

ਤਤ੍ਥ ਸਬ੍ਭਿਰੇਵਾਤਿ ਪਣ੍ਡਿਤੇਹਿ, ਸਪ੍ਪੁਰਿਸੇਹਿ ਏਵ. ਰ-ਕਾਰੋ ਪਦਸਨ੍ਧਿਕਰੋ. ਸਮਾਸੇਥਾਤਿ ਸਹ ਨਿਸੀਦੇਯ੍ਯ. ਦੇਸਨਾਸੀਸਮੇਵ ਚੇਤਂ, ਸਬ੍ਬਇਰਿਯਾਪਥੇ ਸਬ੍ਭਿਰੇਵ ਸਹ ਕੁਬ੍ਬੇਯ੍ਯਾਤਿ ਅਤ੍ਥੋ. ਕੁਬ੍ਬੇਥਾਤਿ ਕਰੇਯ੍ਯ. ਸਨ੍ਥਵਨ੍ਤਿ ਮਿਤ੍ਤਸਨ੍ਥਵਂ. ਤਣ੍ਹਾਸਨ੍ਥਵੋ ਪਨ ਨ ਕੇਨਚਿ ਸਦ੍ਧਿਂ ਕਾਤਬ੍ਬੋ, ਮਿਤ੍ਤਸਨ੍ਥਵੋ ਬੁਦ੍ਧ-ਪਚ੍ਚੇਕਬੁਦ੍ਧ-ਬੁਦ੍ਧਸਾਵਕੇਹਿ ਸਹ ਕਾਤਬ੍ਬੋ. ਇਦਂ ਸਨ੍ਧਾਯੇਤਂ ਵੁਤ੍ਤਂ. ਸਤਨ੍ਤਿ ਬੁਦ੍ਧਾਦੀਨਂ ਸਪ੍ਪੁਰਿਸਾਨਂ. ਸਦ੍ਧਮ੍ਮਨ੍ਤਿ ਪਞ੍ਚਸੀਲਦਸਸੀਲਚਤੁਸਤਿਪਟ੍ਠਾਨਾਦਿਭੇਦਂ ਸਦ੍ਧਮ੍ਮਂ, ਇਧ ਪਨ ਪਞ੍ਚਸੀਲਂ ਅਧਿਪ੍ਪੇਤਂ. ਸੇਯ੍ਯੋ ਹੋਤੀਤਿ ਵਡ੍ਢਿ ਹੋਤਿ. ਨ ਪਾਪਿਯੋਤਿ ਲਾਮਕਂ ਕਿਞ੍ਚਿ ਨ ਹੋਤਿ. ਨਾਞ੍ਞਤੋਤਿ ਵਾਲਿਕਾਦੀਹਿ ਤੇਲਾਦੀਨਿ ਵਿਯ ਅਞ੍ਞਤੋ ਅਨ੍ਧਬਾਲਤੋ ਪਞ੍ਞਾ ਨਾਮ ਨ ਲਬ੍ਭਤਿ, ਤਿਲਾਦੀਹਿ ਪਨ ਤੇਲਾਦੀਨਿ ਵਿਯ ਸਤਂ ਧਮ੍ਮਂ ਞਤ੍ਵਾ ਪਣ੍ਡਿਤਮੇਵ ਸੇਵਨ੍ਤੋ ਭਜਨ੍ਤੋ ਲਭਤੀਤਿ. ਸੋਕਮਜ੍ਝੇਤਿ ਸੋਕਵਤ੍ਥੂਨਂ ਸੋਕਾਨੁਗਤਾਨਂ ਵਾ ਸਤ੍ਤਾਨਂ ਮਜ੍ਝਗਤੋ ਨ ਸੋਚਤਿ ਬਨ੍ਧੁਲਮਲ੍ਲਸੇਨਾਪਤਿਸ੍ਸ ਉਪਾਸਿਕਾ ਵਿਯ, ਪਞ੍ਚਨ੍ਨਂ ਚੋਰਸਤਾਨਂ ਮਜ੍ਝੇ ਧਮ੍ਮਸੇਨਾਪਤਿਸ੍ਸ ਸਦ੍ਧਿਵਿਹਾਰਿਕੋ ਸਂਕਿਚ੍ਚਸਾਮਣੇਰੋ ਵਿਯ ਚ.

ਞਾਤਿਮਜ੍ਝੇ ਵਿਰੋਚਤੀਤਿ ਞਾਤਿਗਣਮਜ੍ਝੇ ਸਂਕਿਚ੍ਚਥੇਰਸ੍ਸ ਸਦ੍ਧਿਵਿਹਾਰਿਕੋ ਅਧਿਮੁਤ੍ਤਕਸਾਮਣੇਰੋ ਵਿਯ ਸੋਭਤਿ. ਸੋ ਕਿਰ ਥੇਰਸ੍ਸ ਭਾਗਿਨੇਯ੍ਯੋ ਹੋਤਿ, ਅਥ ਨਂ ਥੇਰੋ ਆਹ – ‘‘ਸਾਮਣੇਰ, ਮਹਲ੍ਲਕੋਸਿ ਜਾਤੋ, ਗਚ੍ਛ, ਵਸ੍ਸਾਨਿ ਪੁਚ੍ਛਿਤ੍ਵਾ ਏਹਿ, ਉਪਸਮ੍ਪਾਦੇਸ੍ਸਾਮਿ ਤ’’ਨ੍ਤਿ. ਸੋ ‘‘ਸਾਧੂ’’ਤਿ ਥੇਰਂ ਵਨ੍ਦਿਤ੍ਵਾ ਪਤ੍ਤਚੀਵਰਮਾਦਾਯ ਚੋਰਅਟਵਿਯਾ ਓਰਭਾਗੇ ਭਗਿਨਿਗਾਮਂ ਗਨ੍ਤ੍ਵਾ ਪਿਣ੍ਡਾਯ ਚਰਿ, ਤਂ ਭਗਿਨੀ ਦਿਸ੍ਵਾ ਵਨ੍ਦਿਤ੍ਵਾ ਗੇਹੇ ਨਿਸੀਦਾਪੇਤ੍ਵਾ ਭੋਜੇਸਿ. ਸੋ ਕਤਭਤ੍ਤਕਿਚ੍ਚੋ ਵਸ੍ਸਾਨਿ ਪੁਚ੍ਛਿ. ਸਾ ‘‘ਅਹਂ ਨ ਜਾਨਾਮਿ, ਮਾਤਾ ਮੇ ਜਾਨਾਤੀ’’ਤਿ ਆਹ. ਅਥ ਸੋ ‘‘ਤਿਟ੍ਠਥ ਤੁਮ੍ਹੇ, ਅਹਂ ਮਾਤੁਸਨ੍ਤਿਕਂ ਗਮਿਸ੍ਸਾਮੀ’’ਤਿ ਅਟਵਿਂ ਓਤਿਣ੍ਣੋ. ਤਮੇਨਂ ਦੂਰਤੋਵ ਚੋਰਪੁਰਿਸੋ ਦਿਸ੍ਵਾ ਚੋਰਾਨਂ ਆਰੋਚੇਸਿ. ਚੋਰਾ ‘‘ਸਾਮਣੇਰੋ ਕਿਰੇਕੋ ਅਟਵਿਂ ਓਤਿਣ੍ਣੋ, ਗਚ੍ਛਥ ਨਂ ਆਨੇਥਾ’’ਤਿ ਆਣਾਪੇਤ੍ਵਾ ਏਕਚ੍ਚੇ ‘‘ਮਾਰੇਮ ਨ’’ਨ੍ਤਿ ਆਹਂਸੁ, ਏਕਚ੍ਚੇ ਵਿਸ੍ਸਜ੍ਜੇਮਾਤਿ. ਸਾਮਣੇਰੋ ਚਿਨ੍ਤੇਸਿ – ‘‘ਅਹਂ ਸੇਖੋ ਸਕਰਣੀਯੋ, ਇਮੇਹਿ ਸਦ੍ਧਿਂ ਮਨ੍ਤੇਤ੍ਵਾ ਸੋਤ੍ਥਿਮਤ੍ਤਾਨਂ ਕਰਿਸ੍ਸਾਮੀ’’ਤਿ ਚੋਰਜੇਟ੍ਠਕਂ ਆਮਨ੍ਤੇਤ੍ਵਾ, ‘‘ਉਪਮਂ ਤੇ, ਆਵੁਸੋ, ਕਰਿਸ੍ਸਾਮੀ’’ਤਿ ਇਮਾ ਗਾਥਾ ਅਭਾਸਿ –

‘‘ਅਹੁ ਅਤੀਤਮਦ੍ਧਾਨਂ, ਅਰਞ੍ਞਸ੍ਮਿਂ ਬ੍ਰਹਾਵਨੇ;

ਚੇਤੋ ਕੂਟਾਨਿ ਓਡ੍ਡੇਤ੍ਵਾ, ਸਸਕਂ ਅਵਧੀ ਤਦਾ.

‘‘ਸਸਕਞ੍ਚ ਮਤਂ ਦਿਸ੍ਵਾ, ਉਬ੍ਬਿਗ੍ਗਾ ਮਿਗਪਕ੍ਖਿਨੋ;

ਏਕਰਤ੍ਤਿਂ ਅਪਕ੍ਕਾਮੁਂ, ‘ਅਕਿਚ੍ਚਂ ਵਤ੍ਤਤੇ ਇਧ’.

‘‘ਤਥੇਵ ਸਮਣਂ ਹਨ੍ਤ੍ਵਾ, ਅਧਿਮੁਤ੍ਤਂ ਅਕਿਞ੍ਚਨਂ;

ਅਦ੍ਧਿਕਾ ਨਾਗਮਿਸ੍ਸਨ੍ਤਿ, ਧਨਜਾਨਿ ਭਵਿਸ੍ਸਤੀ’’ਤਿ.

‘‘ਸਚ੍ਚਂ ਖੋ ਸਮਣੋ ਆਹ, ਅਧਿਮੁਤ੍ਤੋ ਅਕਿਞ੍ਚਨੋ;

ਅਦ੍ਧਿਕਾ ਨਾਗਮਿਸ੍ਸਨ੍ਤਿ, ਧਨਜਾਨਿ ਭਵਿਸ੍ਸਤਿ.

‘‘ਸਚੇ ਪਟਿਪਥੇ ਦਿਸ੍ਵਾ, ਨਾਰੋਚੇਸ੍ਸਸਿ ਕਸ੍ਸਚਿ;

ਤਵ ਸਚ੍ਚਮਨੁਰਕ੍ਖਨ੍ਤੋ, ਗਚ੍ਛ ਭਨ੍ਤੇ ਯਥਾਸੁਖ’’ਨ੍ਤਿ.

ਸੋ ਤੇਹਿ ਚੋਰੇਹਿ ਵਿਸ੍ਸਜ੍ਜਿਤੋ ਗਚ੍ਛਨ੍ਤੋ ਞਾਤਯੋਪਿ ਦਿਸ੍ਵਾ ਤੇਸਮ੍ਪਿ ਨ ਆਰੋਚੇਸਿ. ਅਥ ਤੇ ਅਨੁਪ੍ਪਤ੍ਤੇ ਚੋਰਾ ਗਹੇਤ੍ਵਾ ਵਿਹੇਠਯਿਂਸੁ, ਉਰਂ ਪਹਰਿਤ੍ਵਾ ਪਰਿਦੇਵਮਾਨਞ੍ਚਸ੍ਸ ਮਾਤਰਂ ਚੋਰਾ ਏਤਦਵੋਚੁਂ –

‘‘ਕਿਂ ਤੇ ਹੋਤਿ ਅਧਿਮੁਤ੍ਤੋ, ਉਦਰੇ ਵਸਿਕੋ ਅਸਿ;

ਪੁਟ੍ਠਾ ਮੇ ਅਮ੍ਮ ਅਕ੍ਖਾਹਿ, ਕਥਂ ਜਾਨੇਮੁ ਤਂ ਮਯ’’ਨ੍ਤਿ.

‘‘ਅਧਿਮੁਤ੍ਤਸ੍ਸ ਅਹਂ ਮਾਤਾ, ਅਯਞ੍ਚ ਜਨਕੋ ਪਿਤਾ;

ਭਗਿਨੀ ਭਾਤਰੋ ਚਾਪਿ, ਸਬ੍ਬੇਵ ਇਧ ਞਾਤਯੋ.

‘‘ਅਕਿਚ੍ਚਕਾਰੀ ਅਧਿਮੁਤ੍ਤੋ, ਯਂ ਦਿਸ੍ਵਾ ਨ ਨਿਵਾਰਯੇ;

ਏਤਂ ਖੋ ਵਤ੍ਤਂ ਸਮਣਾਨਂ, ਅਰਿਯਾਨਂ ਧਮ੍ਮਜੀਵਿਨਂ.

‘‘ਸਚ੍ਚਵਾਦੀ ਅਧਿਮੁਤ੍ਤੋ, ਯਂ ਦਿਸ੍ਵਾ ਨ ਨਿਵਾਰਯੇ;

ਅਧਿਮੁਤ੍ਤਸ੍ਸ ਸੁਚਿਣ੍ਣੇਨ, ਸਚ੍ਚਵਾਦਿਸ੍ਸ ਭਿਕ੍ਖੁਨੋ;

ਸਬ੍ਬੇਵ ਅਭਯਂ ਪਤ੍ਤਾ, ਸੋਤ੍ਥਿਂ ਗਚ੍ਛਨ੍ਤੁ ਞਾਤਯੋ’’ਤਿ.

ਏਵਂ ਤੇ ਚੋਰੇਹਿ ਵਿਸ੍ਸਜ੍ਜਿਤਾ ਗਨ੍ਤ੍ਵਾ ਅਧਿਮੁਤ੍ਤਂ ਆਹਂਸੁ –

‘‘ਤਵ ਤਾਤ ਸੁਚਿਣ੍ਣੇਨ, ਸਚ੍ਚਵਾਦਿਸ੍ਸ ਭਿਕ੍ਖੁਨੋ;

ਸਬ੍ਬੇਵ ਅਭਯਂ ਪਤ੍ਤਾ, ਸੋਤ੍ਥਿਂ ਪਚ੍ਚਾਗਮਮ੍ਹਸੇ’’ਤਿ.

ਤੇਪਿ ਪਞ੍ਚਸਤਾ ਚੋਰਾ ਪਸਾਦਂ ਆਪਜ੍ਜਿਤ੍ਵਾ ਅਧਿਮੁਤ੍ਤਸ੍ਸ ਸਾਮਣੇਰਸ੍ਸ ਸਨ੍ਤਿਕੇ ਪਬ੍ਬਜਿਂਸੁ. ਸੋ ਤੇ ਆਦਾਯ ਉਪਜ੍ਝਾਯਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪਠਮਂ ਅਤ੍ਤਨਾ ਉਪਸਮ੍ਪਨ੍ਨੋ ਪਚ੍ਛਾ ਤੇ ਪਞ੍ਚਸਤੇ ਅਤ੍ਤਨੋ ਅਨ੍ਤੇਵਾਸਿਕੇ ਕਤ੍ਵਾ ਉਪਸਮ੍ਪਾਦੇਸਿ. ਤੇ ਅਧਿਮੁਤ੍ਤਥੇਰਸ੍ਸ ਓਵਾਦੇ ਠਿਤਾ ਸਬ੍ਬੇ ਅਗ੍ਗਫਲਂ ਅਰਹਤ੍ਤਂ ਪਾਪੁਣਿਂਸੁ. ਇਮਮਤ੍ਥਂ ਗਹੇਤ੍ਵਾ ਦੇਵਤਾ ‘‘ਸਤਂ ਸਦ੍ਧਮ੍ਮਮਞ੍ਞਾਯ ਞਾਤਿਮਜ੍ਝੇ ਵਿਰੋਚਤੀ’’ਤਿ ਆਹ.

ਸਾਤਤਨ੍ਤਿ ਸਤਤਂ ਸੁਖਂ ਵਾ ਚਿਰਂ ਤਿਟ੍ਠਨ੍ਤੀਤਿ ਵਦਤਿ. ਸਬ੍ਬਾਸਂ ਵੋਤਿ ਸਬ੍ਬਾਸਂ ਤੁਮ੍ਹਾਕਂ. ਪਰਿਯਾਯੇਨਾਤਿ ਕਾਰਣੇਨ. ਸਬ੍ਬਦੁਕ੍ਖਾ ਪਮੁਚ੍ਚਤੀਤਿ, ਨ ਕੇਵਲਂ ਸੇਯ੍ਯੋਵ ਹੋਤਿ, ਨ ਚ ਕੇਵਲਂ ਪਞ੍ਞਂ ਲਭਤਿ, ਸੋਕਮਜ੍ਝੇ ਨ ਸੋਚਤਿ, ਞਾਤਿਮਜ੍ਝੇ ਵਿਰੋਚਤਿ, ਸੁਗਤਿਯਂ ਨਿਬ੍ਬਤ੍ਤਤਿ, ਚਿਰਂ ਸੁਖਂ ਤਿਟ੍ਠਤਿ, ਸਕਲਸ੍ਮਾ ਪਨ ਵਟ੍ਟਦੁਕ੍ਖਾਪਿ ਮੁਚ੍ਚਤੀਤਿ. ਪਠਮਂ.