੧੦. ਏਣਿਜਙ੍ਘਸੁਤ੍ਤਵਣ੍ਣਨਾ

੩੦. ਦਸਮੇ ਏਣਿਜਙ੍ਘਨ੍ਤਿ ਏਣਿਮਿਗਸ੍ਸ ਵਿਯ ਸੁਵਟ੍ਟਿਤਜਙ੍ਘਂ. ਕਿਸਨ੍ਤਿ ਅਥੂਲਂ ਸਮਸਰੀਰਂ. ਅਥ ਵਾ ਆਤਪੇਨ ਮਿਲਾਤਂ ਮਾਲਾਗਨ੍ਧਵਿਲੇਪਨੇਹਿ ਅਨੁਪਬ੍ਰੂਹਿਤਸਰੀਰਨ੍ਤਿਪਿ ਅਤ੍ਥੋ. ਵੀਰਨ੍ਤਿ ਵੀਰਿਯਵਨ੍ਤਂ. ਅਪ੍ਪਾਹਾਰਨ੍ਤਿ ਭੋਜਨੇ ਮਤ੍ਤਞ੍ਞੁਤਾਯ ਮਿਤਾਹਾਰਂ, ਵਿਕਾਲਭੋਜਨਪਟਿਕ੍ਖੇਪਵਸੇਨ ਵਾ ਪਰਿਤ੍ਤਾਹਾਰਂ. ਅਲੋਲੁਪਨ੍ਤਿ ਚਤੂਸੁ ਪਚ੍ਚਯੇਸੁ ਲੋਲੁਪ੍ਪਵਿਰਹਿਤਂ. ਰਸਤਣ੍ਹਾਪਟਿਕ੍ਖੇਪੋ ਵਾ ਏਸ. ਸੀਹਂਵੇਕਚਰਂ ਨਾਗਨ੍ਤਿ ਏਕਚਰਂ ਸੀਹਂ ਵਿਯ, ਏਕਚਰਂ ਨਾਗਂ ਵਿਯ. ਗਣਵਾਸਿਨੋ ਹਿ ਪਮਤ੍ਤਾ ਹੋਨ੍ਤਿ, ਏਕਚਰਾ ਅਪ੍ਪਮਤ੍ਤਾ, ਤਸ੍ਮਾ ਏਕਚਰਾਵ ਗਹਿਤਾਤਿ. ਪਵੇਦਿਤਾਤਿ ਪਕਾਸਿਤਾ ਕਥਿਤਾ. ਏਤ੍ਥਾਤਿ ਏਤਸ੍ਮਿਂ ਨਾਮਰੂਪੇ. ਪਞ੍ਚਕਾਮਗੁਣਵਸੇਨ ਹਿ ਰੂਪਂ ਗਹਿਤਂ, ਮਨੇਨ ਨਾਮਂ, ਉਭਯੇਹਿ ਪਨ ਅਵਿਨਿਭੁਤ੍ਤਧਮ੍ਮੇ ਗਹੇਤ੍ਵਾ ਪਞ੍ਚਕ੍ਖਨ੍ਧਾਦਿਵਸੇਨਪੇਤ੍ਥ ਭੁਮ੍ਮਂ ਯੋਜੇਤਬ੍ਬਨ੍ਤਿ. ਦਸਮਂ.

ਸਤ੍ਤਿਵਗ੍ਗੋ ਤਤਿਯੋ.