੩. ਸਤ੍ਤਿਵਗ੍ਗੋ

੧. ਸਤ੍ਤਿਸੁਤ੍ਤਵਣ੍ਣਨਾ

੨੧. ਸਤ੍ਤਿਵਗ੍ਗਸ੍ਸ ਪਠਮੇ ਸਤ੍ਤਿਯਾਤਿ ਦੇਸਨਾਸੀਸਮੇਤਂ. ਏਕਤੋਖਾਰਾਦਿਨਾ ਸਤ੍ਥੇਨਾਤਿ ਅਤ੍ਥੋ. ਓਮਟ੍ਠੋਤਿ ਪਹਤੋ. ਚਤ੍ਤਾਰੋ ਹਿ ਪਹਾਰਾ ਓਮਟ੍ਠੋ ਉਮ੍ਮਟ੍ਠੋ ਮਟ੍ਠੋ ਵਿਮਟ੍ਠੋਤਿ. ਤਤ੍ਥ ਉਪਰਿ ਠਤ੍ਵਾ ਅਧੋਮੁਖਂ ਦਿਨ੍ਨਪਹਾਰੋ ਓਮਟ੍ਠੋ ਨਾਮ; ਹੇਟ੍ਠਾ ਠਤ੍ਵਾ ਉਦ੍ਧਂਮੁਖਂ ਦਿਨ੍ਨੋ ਉਮ੍ਮਟ੍ਠੋ ਨਾਮ; ਅਗ੍ਗਲ਼ਸੂਚਿ ਵਿਯ ਵਿਨਿਵਿਜ੍ਝਿਤ੍ਵਾ ਗਤੋ ਮਟ੍ਠੋ ਨਾਮ; ਸੇਸੋ ਸਬ੍ਬੋਪਿ ਵਿਮਟ੍ਠੋ ਨਾਮ. ਇਮਸ੍ਮਿਂ ਪਨ ਠਾਨੇ ਓਮਟ੍ਠੋ ਗਹਿਤੋ. ਸੋ ਹਿ ਸਬ੍ਬਦਾਰੁਣੋ ਦੁਰੁਦ੍ਧਰਸਲ੍ਲੋ ਦੁਤ੍ਤਿਕਿਚ੍ਛੋ ਅਨ੍ਤੋਦੋਸੋ ਅਨ੍ਤੋਪੁਬ੍ਬਲੋਹਿਤੋਵ ਹੋਤਿ, ਪੁਬ੍ਬਲੋਹਿਤਂ ਅਨਿਕ੍ਖਮਿਤ੍ਵਾ ਵਣਮੁਖਂ ਪਰਿਯੋਨਨ੍ਧਿਤ੍ਵਾ ਤਿਟ੍ਠਤਿ. ਪੁਬ੍ਬਲੋਹਿਤਂ ਨਿਹਰਿਤੁਕਾਮੇਹਿ ਮਞ੍ਚੇਨ ਸਦ੍ਧਿਂ ਬਨ੍ਧਿਤ੍ਵਾ ਅਧੋਸਿਰੋ ਕਾਤਬ੍ਬੋ ਹੋਤਿ, ਮਰਣਂ ਵਾ ਮਰਣਮਤ੍ਤਂ ਵਾ ਦੁਕ੍ਖਂ ਪਾਪੁਣਾਤਿ. ਪਰਿਬ੍ਬਜੇਤਿ ਵਿਹਰੇਯ੍ਯ.

ਇਮਾਯ ਗਾਥਾਯ ਕਿਂ ਕਥੇਤਿ? ਯਥਾ ਸਤ੍ਤਿਯਾ ਓਮਟ੍ਠੋ ਪੁਰਿਸੋ ਸਲ੍ਲੁਬ੍ਬਹਨ-ਵਣਤਿਕਿਚ੍ਛਨਾਨਂ ਅਤ੍ਥਾਯ ਵੀਰਿਯਂ ਆਰਭਤਿ, ਪਯੋਗਂ ਕਰੋਤਿ ਪਰਕ੍ਕਮਤਿ. ਯਥਾ ਚ ਡਯ੍ਹਮਾਨੋ ਮਤ੍ਥਕੇ ਆਦਿਤ੍ਤਸੀਸੋ ਤਸ੍ਸ ਨਿਬ੍ਬਾਪਨਤ੍ਥਾਯ ਵੀਰਿਯਂ ਆਰਭਤਿ, ਪਯੋਗਂ ਕਰੋਤਿ ਪਰਕ੍ਕਮਤਿ, ਏਵਮੇਵ ਭਿਕ੍ਖੁ ਕਾਮਰਾਗਂ ਪਹਾਨਾਯ ਸਤੋ ਅਪ੍ਪਮਤ੍ਤੋ ਹੁਤ੍ਵਾ ਵਿਹਰੇਯ੍ਯ ਭਗਵਾਤਿ ਕਥੇਸਿ.

ਅਥ ਭਗਵਾ ਚਿਨ੍ਤੇਸਿ – ਇਮਾਯ ਦੇਵਤਾਯ ਉਪਮਾ ਤਾਵ ਦਲ਼੍ਹਂ ਕਤ੍ਵਾ ਆਨੀਤਾ, ਅਤ੍ਥਂ ਪਨ ਪਰਿਤ੍ਤਕਂ ਗਹੇਤ੍ਵਾ ਠਿਤਾ, ਪੁਨਪ੍ਪੁਨਂ ਕਥੇਨ੍ਤੀਪਿ ਹੇਸਾ ਕਾਮਰਾਗਸ੍ਸ ਵਿਕ੍ਖਮ੍ਭਨਪਹਾਨਮੇਵ ਕਥੇਯ੍ਯ. ਯਾਵ ਚ ਕਾਮਰਾਗੋ ਮਗ੍ਗੇਨ ਨ ਸਮੁਗ੍ਘਾਟਿਯਤਿ, ਤਾਵ ਅਨੁਬਦ੍ਧੋਵ ਹੋਤਿ. ਇਤਿ ਤਮੇਵ ਓਪਮ੍ਮਂ ਗਹੇਤ੍ਵਾ ਪਠਮਮਗ੍ਗਵਸੇਨ ਦੇਸਨਂ ਵਿਨਿਵਟ੍ਟੇਤ੍ਵਾ ਦੇਸੇਨ੍ਤੋ ਦੁਤਿਯਂ ਗਾਥਮਾਹ. ਤਸ੍ਸਤ੍ਥੋ ਪੁਰਿਮਾਨੁਸਾਰੇਨੇਵ ਵੇਦਿਤਬ੍ਬੋਤਿ. ਪਠਮਂ.

੨. ਫੁਸਤਿਸੁਤ੍ਤਵਣ੍ਣਨਾ

੨੨. ਦੁਤਿਯੇ ਨਾਫੁਸਨ੍ਤਂ ਫੁਸਤੀਤਿ ਕਮ੍ਮਂ ਅਫੁਸਨ੍ਤਂ ਵਿਪਾਕੋ ਨ ਫੁਸਤਿ, ਕਮ੍ਮਮੇਵ ਵਾ ਅਫੁਸਨ੍ਤਂ ਕਮ੍ਮਂ ਨ ਫੁਸਤਿ. ਕਮ੍ਮਞ੍ਹਿ ਨਾਕਰੋਤੋ ਕਰਿਯਤਿ. ਫੁਸਨ੍ਤਞ੍ਚ ਤਤੋ ਫੁਸੇਤਿ ਕਮ੍ਮਂ ਫੁਸਨ੍ਤਂ ਵਿਪਾਕੋ ਫੁਸਤਿ, ਕਮ੍ਮਮੇਵ ਵਾ ਫੁਸਤਿ. ਕਮ੍ਮਞ੍ਹਿ ਕਰੋਤੋ ਕਰਿਯਤਿ. ਤਸ੍ਮਾ ਫੁਸਨ੍ਤਂ ਫੁਸਤਿ, ਅਪ੍ਪਦੁਟ੍ਠਪਦੋਸਿਨਨ੍ਤਿ ਯਸ੍ਮਾ ਨ ਅਫੁਸਨ੍ਤਂ ਫੁਸਤਿ, ਫੁਸਨ੍ਤਞ੍ਚ ਫੁਸਤਿ, ਅਯਂ ਕਮ੍ਮਵਿਪਾਕਾਨਂ ਧਮ੍ਮਤਾ, ਤਸ੍ਮਾ ਯੋ ‘‘ਅਪ੍ਪਦੁਟ੍ਠਸ੍ਸ ਨਰਸ੍ਸ ਦੁਸ੍ਸਤਿ, ਸੁਦ੍ਧਸ੍ਸ ਪੋਸਸ੍ਸ ਅਨਙ੍ਗਣਸ੍ਸਾ’’ਤਿ ਏਵਂ ਵੁਤ੍ਤੋ ਅਪ੍ਪਦੁਟ੍ਠਪਦੋਸੀ ਪੁਗ੍ਗਲੋ, ਤਂ ਪੁਗ੍ਗਲਂ ਕਮ੍ਮਂ ਫੁਸਨ੍ਤਮੇਵ ਕਮ੍ਮਂ ਫੁਸਤਿ, ਵਿਪਾਕੋ ਵਾ ਫੁਸਤਿ. ਸੋ ਹਿ ਪਰਸ੍ਸ ਉਪਘਾਤਂ ਕਾਤੁਂ ਸਕ੍ਕੋਤਿ ਵਾ ਮਾ ਵਾ, ਅਤ੍ਤਾ ਪਨਾਨੇਨ ਚਤੂਸੁ ਅਪਾਯੇਸੁ ਠਪਿਤੋ ਨਾਮ ਹੋਤਿ. ਤੇਨਾਹ ਭਗਵਾ – ‘‘ਤਮੇਵ ਬਾਲਂ ਪਚ੍ਚੇਤਿ ਪਾਪਂ, ਸੁਖੁਮੋ ਰਜੋ ਪਟਿਵਾਤਂਵ ਖਿਤ੍ਤੋ’’ਤਿ. ਦੁਤਿਯਂ.

੩. ਜਟਾਸੁਤ੍ਤਵਣ੍ਣਨਾ

੨੩. ਤਤਿਯੇ ਅਨ੍ਤੋਜਟਾਤਿ ਗਾਥਾਯਂ ਜਟਾਤਿ ਤਣ੍ਹਾਯ ਜਾਲਿਨਿਯਾ ਅਧਿਵਚਨਂ. ਸਾ ਹਿ ਰੂਪਾਦੀਸੁ ਆਰਮ੍ਮਣੇਸੁ ਹੇਟ੍ਠੁਪਰਿਯਵਸੇਨ ਪੁਨਪ੍ਪੁਨਂ ਉਪ੍ਪਜ੍ਜਨਤੋ ਸਂਸਿਬ੍ਬਨਟ੍ਠੇਨ ਵੇਲ਼ੁਗੁਮ੍ਬਾਦੀਨਂ ਸਾਖਾਜਾਲਸਙ੍ਖਾਤਾ ਜਟਾ ਵਿਯਾਤਿ ਜਟਾ. ਸਾ ਪਨੇਸਾ ਸਕਪਰਿਕ੍ਖਾਰਪਰਪਰਿਕ੍ਖਾਰੇਸੁ ਸਕਅਤ੍ਤਭਾਵ-ਪਰਅਤ੍ਤਭਾਵੇਸੁ ਅਜ੍ਝਤ੍ਤਿਕਾਯਤਨ-ਬਾਹਿਰਾਯਤਨੇਸੁ ਚ ਉਪ੍ਪਜ੍ਜਨਤੋ ਅਨ੍ਤੋਜਟਾ ਬਹਿਜਟਾਤਿ ਵੁਚ੍ਚਤਿ. ਤਾਯ ਏਵਂ ਉਪ੍ਪਜ੍ਜਮਾਨਾਯ ਜਟਾਯ ਜਟਿਤਾ ਪਜਾ. ਯਥਾ ਨਾਮ ਵੇਲ਼ੁਜਟਾਦੀਹਿ ਵੇਲ਼ੁਆਦਯੋ, ਏਵਂ ਤਾਯ ਤਣ੍ਹਾਜਟਾਯ ਸਬ੍ਬਾਪਿ ਅਯਂ ਸਤ੍ਤਨਿਕਾਯਸਙ੍ਖਾਤਾ ਪਜਾ ਜਟਿਤਾ ਵਿਨਦ੍ਧਾ, ਸਂਸਿਬ੍ਬਿਤਾਤਿ ਅਤ੍ਥੋ. ਯਸ੍ਮਾ ਚ ਏਵਂ ਜਟਿਤਾ, ਤਂ ਤਂ ਗੋਤਮ ਪੁਚ੍ਛਾਮੀਤਿ ਤਸ੍ਮਾ ਤਂ ਪੁਚ੍ਛਾਮਿ. ਗੋਤਮਾਤਿ ਭਗਵਨ੍ਤਂ ਗੋਤ੍ਤੇਨ ਆਲਪਤਿ. ਕੋ ਇਮਂ ਵਿਜਟਯੇ ਜਟਨ੍ਤਿ ਇਮਂ ਏਵਂ ਤੇਧਾਤੁਕਂ ਜਟੇਤ੍ਵਾ ਠਿਤਂ ਜਟਂ ਕੋ ਵਿਜਟੇਯ੍ਯ, ਵਿਜਟੇਤੁਂ ਕੋ ਸਮਤ੍ਥੋਤਿ ਪੁਚ੍ਛਤਿ.

ਅਥਸ੍ਸ ਭਗਵਾ ਤਮਤ੍ਥਂ ਵਿਸ੍ਸਜ੍ਜੇਨ੍ਤੋ ਸੀਲੇ ਪਤਿਟ੍ਠਾਯਾਤਿਆਦਿਮਾਹ. ਤਤ੍ਥ ਸੀਲੇ ਪਤਿਟ੍ਠਾਯਾਤਿ ਚਤੁਪਾਰਿਸੁਦ੍ਧਿਸੀਲੇ ਠਤ੍ਵਾ. ਏਤ੍ਥ ਚ ਭਗਵਾ ਜਟਾਵਿਜਟਨਂ ਪੁਚ੍ਛਿਤੋ ਸੀਲਂ ਆਰਭਨ੍ਤੋ ਨ ‘‘ਅਞ੍ਞਂ ਪੁਟ੍ਠੋ ਅਞ੍ਞਂ ਕਥੇਤੀ’’ਤਿ ਵੇਦਿਤਬ੍ਬੋ. ਜਟਾਵਿਜਟਕਸ੍ਸ ਹਿ ਪਤਿਟ੍ਠਾਦਸ੍ਸਨਤ੍ਥਮੇਤ੍ਥ ਸੀਲਂ ਕਥਿਤਂ.

ਨਰੋਤਿ ਸਤ੍ਤੋ. ਸਪਞ੍ਞੋਤਿ ਕਮ੍ਮਜਤਿਹੇਤੁਕਪਟਿਸਨ੍ਧਿਪਞ੍ਞਾਯ ਪਞ੍ਞਵਾ. ਚਿਤ੍ਤਂ ਪਞ੍ਞਞ੍ਚ ਭਾਵਯਨ੍ਤਿ ਸਮਾਧਿਞ੍ਚੇਵ ਵਿਪਸ੍ਸਨਞ੍ਚ ਭਾਵਯਮਾਨੋ. ਚਿਤ੍ਤਸੀਸੇਨ ਹੇਤ੍ਥ ਅਟ੍ਠ ਸਮਾਪਤ੍ਤਿਯੋ ਕਥਿਤਾ, ਪਞ੍ਞਾਨਾਮੇਨ ਵਿਪਸ੍ਸਨਾ. ਆਤਾਪੀਤਿ ਵੀਰਿਯਵਾ. ਵੀਰਿਯਞ੍ਹਿ ਕਿਲੇਸਾਨਂ ਆਤਾਪਨਪਰਿਤਾਪਨਟ੍ਠੇਨ ‘‘ਆਤਾਪੋ’’ਤਿ ਵੁਚ੍ਚਤਿ, ਤਦਸ੍ਸ ਅਤ੍ਥੀਤਿ ਆਤਾਪੀ. ਨਿਪਕੋਤਿ ਨੇਪਕ੍ਕਂ ਵੁਚ੍ਚਤਿ ਪਞ੍ਞਾ, ਤਾਯ ਸਮਨ੍ਨਾਗਤੋਤਿ ਅਤ੍ਥੋ. ਇਮਿਨਾ ਪਦੇਨ ਪਾਰਿਹਾਰਿਯਪਞ੍ਞਂ ਦਸ੍ਸੇਤਿ. ਪਾਰਿਹਾਰਿਯਪਞ੍ਞਾ ਨਾਮ ‘‘ਅਯਂ ਕਾਲੋ ਉਦ੍ਦੇਸਸ੍ਸ, ਅਯਂ ਕਾਲੋ ਪਰਿਪੁਚ੍ਛਾਯਾ’’ਤਿਆਦਿਨਾ ਨਯੇਨ ਸਬ੍ਬਤ੍ਥ ਕਾਰਾਪਿਤਾ ਪਰਿਹਰਿਤਬ੍ਬਪਞ੍ਞਾ. ਇਮਸ੍ਮਿਞ੍ਹਿ ਪਞ੍ਹਾਬ੍ਯਾਕਰਣੇ ਤਿਕ੍ਖਤ੍ਤੁਂ ਪਞ੍ਞਾ ਆਗਤਾ. ਤਤ੍ਥ ਪਠਮਾ ਜਾਤਿਪਞ੍ਞਾ, ਦੁਤਿਯਾ ਵਿਪਸ੍ਸਨਾਪਞ੍ਞਾ, ਤਤਿਯਾ ਸਬ੍ਬਕਿਚ੍ਚਪਰਿਣਾਯਿਕਾ ਪਾਰਿਹਾਰਿਯਪਞ੍ਞਾ.

ਸੋ ਇਮਂ ਵਿਜਟਯੇ ਜਟਨ੍ਤਿ ਸੋ ਇਮੇਹਿ ਸੀਲਾਦੀਹਿ ਸਮਨ੍ਨਾਗਤੋ ਭਿਕ੍ਖੁ. ਯਥਾ ਨਾਮ ਪੁਰਿਸੋ ਪਥਵਿਯਂ ਪਤਿਟ੍ਠਾਯ ਸੁਨਿਸਿਤਂ ਸਤ੍ਥਂ ਉਕ੍ਖਿਪਿਤ੍ਵਾ ਮਹਨ੍ਤਂ ਵੇਲ਼ੁਗੁਮ੍ਬਂ ਵਿਜਟੇਯ੍ਯ, ਏਵਮੇਵਂ ਸੀਲੇ ਪਤਿਟ੍ਠਾਯ ਸਮਾਧਿਸਿਲਾਯਂ ਸੁਨਿਸਿਤਂ ਵਿਪਸ੍ਸਨਾਪਞ੍ਞਾਸਤ੍ਥਂ ਵੀਰਿਯਬਲਪਗ੍ਗਹਿਤੇਨ ਪਾਰਿਹਾਰਿਯਪਞ੍ਞਾਹਤ੍ਥੇਨ ਉਕ੍ਖਿਪਿਤ੍ਵਾ ਸਬ੍ਬਮ੍ਪਿ ਤਂ ਅਤ੍ਤਨੋ ਸਨ੍ਤਾਨੇ ਪਤਿਤਂ ਤਣ੍ਹਾਜਟਂ ਵਿਜਟੇਯ੍ਯ ਸਞ੍ਛਿਨ੍ਦੇਯ੍ਯ ਸਮ੍ਪਦਾਲੇਯ੍ਯਾਤਿ.

ਏਤ੍ਤਾਵਤਾ ਸੇਖਭੂਮਿਂ ਕਥੇਤ੍ਵਾ ਇਦਾਨਿ ਜਟਂ ਵਿਜਟੇਤ੍ਵਾ ਠਿਤਂ ਮਹਾਖੀਣਾਸਵਂ ਦਸ੍ਸੇਨ੍ਤੋ ਯੇਸਨ੍ਤਿਆਦਿਮਾਹ. ਏਵਂ ਜਟਂ ਵਿਜਟੇਤ੍ਵਾ ਠਿਤਂ ਖੀਣਾਸਵਂ ਦਸ੍ਸੇਤ੍ਵਾ ਪੁਨ ਜਟਾਯ ਵਿਜਟਨੋਕਾਸਂ ਦਸ੍ਸੇਨ੍ਤੋ ਯਤ੍ਥ ਨਾਮਞ੍ਚਾਤਿਆਦਿਮਾਹ. ਤਤ੍ਥ ਨਾਮਨ੍ਤਿ ਚਤ੍ਤਾਰੋ ਅਰੂਪਿਨੋ ਖਨ੍ਧਾ. ਪਟਿਘਂ ਰੂਪਸਞ੍ਞਾ ਚਾਤਿ ਏਤ੍ਥ ਪਟਿਘਸਞ੍ਞਾਵਸੇਨ ਕਾਮਭਵੋ ਗਹਿਤੋ, ਰੂਪਸਞ੍ਞਾਵਸੇਨ ਰੂਪਭਵੋ. ਤੇਸੁ ਦ੍ਵੀਸੁ ਗਹਿਤੇਸੁ ਅਰੂਪਭਵੋ ਗਹਿਤੋਵ ਹੋਤਿ ਭਵਸਙ੍ਖੇਪੇਨਾਤਿ. ਏਤ੍ਥੇਸਾ ਛਿਜ੍ਜਤੇ ਜਟਾਤਿ ਏਤ੍ਥ ਤੇਭੂਮਕਵਟ੍ਟਸ੍ਸ ਪਰਿਯਾਦਿਯਨਟ੍ਠਾਨੇ ਏਸਾ ਜਟਾ ਛਿਜ੍ਜਤਿ, ਨਿਬ੍ਬਾਨਂ ਆਗਮ੍ਮ ਛਿਜ੍ਜਤਿ ਨਿਰੁਜ੍ਝਤੀਤਿ ਅਯਂ ਅਤ੍ਥੋ ਦਸ੍ਸਿਤੋ ਹੋਤਿ. ਤਤਿਯਂ.

੪. ਮਨੋਨਿਵਾਰਣਸੁਤ੍ਤਵਣ੍ਣਨਾ

੨੪. ਚਤੁਤ੍ਥੇ ਯਤੋ ਯਤੋਤਿ ਪਾਪਤੋ ਵਾ ਕਲ੍ਯਾਣਤੋ ਵਾ. ਅਯਂ ਕਿਰ ਦੇਵਤਾ ‘‘ਯਂਕਿਞ੍ਚਿ ਕੁਸਲਾਦਿਭੇਦਂ ਲੋਕਿਯਂ ਵਾ ਲੋਕੁਤ੍ਤਰਂ ਵਾ ਮਨੋ, ਤਂ ਨਿਵਾਰੇਤਬ੍ਬਮੇਵ, ਨ ਉਪ੍ਪਾਦੇਤਬ੍ਬ’’ਨ੍ਤਿ ਏਵਂਲਦ੍ਧਿਕਾ. ਸ ਸਬ੍ਬਤੋਤਿ ਸੋ ਸਬ੍ਬਤੋ. ਅਥ ਭਗਵਾ – ‘‘ਅਯਂ ਦੇਵਤਾ ਅਨਿਯ੍ਯਾਨਿਕਕਥਂ ਕਥੇਤਿ, ਮਨੋ ਨਾਮ ਨਿਵਾਰੇਤਬ੍ਬਮ੍ਪਿ ਅਤ੍ਥਿ ਭਾਵੇਤਬ੍ਬਮ੍ਪਿ, ਵਿਭਜਿਤ੍ਵਾ ਨਮਸ੍ਸਾ ਦਸ੍ਸੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦੁਤਿਯਗਾਥਂ ਆਹ. ਤਤ੍ਥ ਨ ਮਨੋ ਸਂਯਤਤ੍ਤਮਾਗਤਨ੍ਤਿ, ਯਂ ਵੁਤ੍ਤਂ ‘‘ਨ ਸਬ੍ਬਤੋ ਮਨੋ ਨਿਵਾਰਯੇ’’ਤਿ, ਕਤਰਂ ਤਂ ਮਨੋ, ਯਂ ਤਂ ਸਬ੍ਬਤੋ ਨ ਨਿਵਾਰੇਤਬ੍ਬਨ੍ਤਿ ਚੇ. ਮਨੋ ਸਂਯਤਤ੍ਤਂ ਆਗਤਂ, ਯਂ ਮਨੋ ਯਤ੍ਥ ਸਂਯਤਭਾਵਂ ਆਗਤਂ, ‘‘ਦਾਨਂ ਦਸ੍ਸਾਮਿ, ਸੀਲਂ ਰਕ੍ਖਿਸ੍ਸਾਮੀ’’ਤਿਆਦਿਨਾ ਨਯੇਨ ਉਪ੍ਪਨ੍ਨਂ, ਏਤਂ ਮਨੋ ਨ ਨਿਵਾਰੇਤਬ੍ਬਂ, ਅਞ੍ਞਦਤ੍ਥੁ ਬ੍ਰੂਹੇਤਬ੍ਬਂ ਵਡ੍ਢੇਤਬ੍ਬਂ. ਯਤੋ ਯਤੋ ਚ ਪਾਪਕਨ੍ਤਿ ਯਤੋ ਯਤੋ ਅਕੁਸਲਂ ਉਪ੍ਪਜ੍ਜਤਿ, ਤਤੋ ਤਤੋ ਚ ਤਂ ਨਿਵਾਰੇਤਬ੍ਬਨ੍ਤਿ. ਚਤੁਤ੍ਥਂ.

੫. ਅਰਹਨ੍ਤਸੁਤ੍ਤਵਣ੍ਣਨਾ

੨੫. ਪਞ੍ਚਮੇ ਕਤਾਵੀਤਿ ਚਤੂਹਿ ਮਗ੍ਗੇਹਿ ਕਤਕਿਚ੍ਚੋ. ਅਹਂ ਵਦਾਮੀਤਿ ਅਯਂ ਦੇਵਤਾ ਵਨਸਣ੍ਡਵਾਸਿਨੀ, ਸਾ ਆਰਞ੍ਞਕਾਨਂ ਭਿਕ੍ਖੂਨਂ ‘‘ਅਹਂ ਭੁਞ੍ਜਾਮਿ, ਅਹਂ ਨਿਸੀਦਾਮਿ, ਮਮ ਪਤ੍ਤੋ, ਮਮ ਚੀਵਰ’’ਨ੍ਤਿਆਦਿਕਥਾਵੋਹਾਰਂ ਸੁਤ੍ਵਾ ਚਿਨ੍ਤੇਸਿ – ‘‘ਅਹਂ ਇਮੇ ਭਿਕ੍ਖੂ ‘ਖੀਣਾਸਵਾ’ਤਿ ਮਞ੍ਞਾਮਿ, ਖੀਣਾਸਵਾਨਞ੍ਚ ਨਾਮ ਏਵਰੂਪਾ ਅਤ੍ਤੁਪਲਦ੍ਧਿਨਿਸ੍ਸਿਤਕਥਾ ਹੋਤਿ, ਨ ਹੋਤਿ ਨੁ ਖੋ’’ਤਿ ਜਾਨਨਤ੍ਥਂ ਏਵਂ ਪੁਚ੍ਛਤਿ.

ਸਾਮਞ੍ਞਨ੍ਤਿ ਲੋਕਨਿਰੁਤ੍ਤਿਂ ਲੋਕਵੋਹਾਰਂ. ਕੁਸਲੋਤਿ ਖਨ੍ਧਾਦੀਸੁ ਕੁਸਲੋ. ਵੋਹਾਰਮਤ੍ਤੇਨਾਤਿ ਉਪਲਦ੍ਧਿਨਿਸ੍ਸਿਤਕਥਂ ਹਿਤ੍ਵਾ ਵੋਹਾਰਭੇਦਂ ਅਕਰੋਨ੍ਤੋ ‘‘ਅਹਂ, ਮਮਾ’’ਤਿ ਵਦੇਯ੍ਯ. ‘‘ਖਨ੍ਧਾ ਭੁਞ੍ਜਨ੍ਤਿ, ਖਨ੍ਧਾ ਨਿਸੀਦਨ੍ਤਿ, ਖਨ੍ਧਾਨਂ ਪਤ੍ਤੋ, ਖਨ੍ਧਾਨਂ ਚੀਵਰ’’ਨ੍ਤਿ ਹਿ ਵੁਤ੍ਤੇ ਵੋਹਾਰਭੇਦੋ ਹੋਤਿ, ਨ ਕੋਚਿ ਜਾਨਾਤਿ. ਤਸ੍ਮਾ ਏਵਂ ਅਵਤ੍ਵਾ ਲੋਕਵੋਹਾਰੇਨ ਵੋਹਰਤੀਤਿ.

ਅਥ ਦੇਵਤਾ – ‘‘ਯਦਿ ਦਿਟ੍ਠਿਯਾ ਵਸੇਨ ਨ ਵਦਤਿ, ਮਾਨਵਸੇਨ ਨੁ ਖੋ ਵਦਤੀ’’ਤਿ ਚਿਨ੍ਤੇਤ੍ਵਾ ਪੁਨ ਯੋ ਹੋਤੀਤਿ ਪੁਚ੍ਛਿ. ਤਤ੍ਥ ਮਾਨਂ ਨੁ ਖੋਤਿ ਸੋ ਭਿਕ੍ਖੁ ਮਾਨਂ ਉਪਗਨ੍ਤ੍ਵਾ ਮਾਨਵਸੇਨ ਵਦੇਯ੍ਯ ਨੁ ਖੋਤਿ. ਅਥ ਭਗਵਾ – ‘‘ਅਯਂ ਦੇਵਤਾ ਖੀਣਾਸਵਂ ਸਮਾਨਂ ਵਿਯ ਕਰੋਤੀ’’ਤਿ ਚਿਨ੍ਤੇਤ੍ਵਾ, ‘‘ਖੀਣਾਸਵਸ੍ਸ ਨਵਵਿਧੋਪਿ ਮਾਨੋ ਪਹੀਨੋ’’ਤਿ ਦਸ੍ਸੇਨ੍ਤੋ ਪਟਿਗਾਥਂ ਆਹ. ਤਤ੍ਥ ਵਿਧੂਪਿਤਾਤਿ ਵਿਧਮਿਤਾ. ਮਾਨਗਨ੍ਥਸ੍ਸਾਤਿ ਮਾਨਾ ਚ ਗਨ੍ਥਾ ਚ ਅਸ੍ਸ. ਮਞ੍ਞਤਨ੍ਤਿ ਮਞ੍ਞਨਂ. ਤਿਵਿਧਮ੍ਪਿ ਤਣ੍ਹਾ-ਦਿਟ੍ਠਿ-ਮਾਨ-ਮਞ੍ਞਨਂ ਸੋ ਵੀਤਿਵਤ੍ਤੋ, ਅਤਿਕ੍ਕਨ੍ਤੋਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ. ਪਞ੍ਚਮਂ.

੬. ਪਜ੍ਜੋਤਸੁਤ੍ਤਵਣ੍ਣਨਾ

੨੬. ਛਟ੍ਠੇ ਪੁਟ੍ਠੁਨ੍ਤਿ ਪੁਚ੍ਛਿਤੁਂ. ਕਥਂ ਜਾਨੇਮੂਤਿ ਕਥਂ ਜਾਨੇਯ੍ਯਾਮ. ਦਿਵਾਰਤ੍ਤਿਨ੍ਤਿ ਦਿਵਾ ਚ ਰਤ੍ਤਿਞ੍ਚ. ਤਤ੍ਥ ਤਤ੍ਥਾਤਿ ਯਤ੍ਥ ਯਤ੍ਥੇਵ ਪਜ੍ਜਲਿਤੋ ਹੋਤਿ, ਤਤ੍ਥ ਤਤ੍ਥ. ਏਸਾ ਆਭਾਤਿ ਏਸਾ ਬੁਦ੍ਧਾਭਾ. ਕਤਮਾ ਪਨ ਸਾਤਿ? ਞਾਣਾਲੋਕੋ ਵਾ ਹੋਤੁ ਪੀਤਿਆਲੋਕੋ ਵਾ ਪਸਾਦਾਲੋਕੋ ਵਾ ਧਮ੍ਮਕਥਾਆਲੋਕੋ ਵਾ, ਸਬ੍ਬੋਪਿ ਬੁਦ੍ਧਾਨਂ ਪਾਤੁਭਾਵਾ ਉਪ੍ਪਨ੍ਨੋ ਆਲੋਕੋ ਬੁਦ੍ਧਾਭਾ ਨਾਮ. ਅਯਂ ਅਨੁਤ੍ਤਰਾ ਸਬ੍ਬਸੇਟ੍ਠਾ ਅਸਦਿਸਾਤਿ. ਛਟ੍ਠਂ.

੭. ਸਰਸੁਤ੍ਤਵਣ੍ਣਨਾ

੨੭. ਸਤ੍ਤਮੇ ਕੁਤੋ ਸਰਾ ਨਿਵਤ੍ਤਨ੍ਤੀਤਿ ਇਮੇ ਸਂਸਾਰਸਰਾ ਕੁਤੋ ਨਿਵਤ੍ਤਨ੍ਤਿ, ਕਿਂ ਆਗਮ੍ਮ ਨਪ੍ਪਵਤ੍ਤਨ੍ਤੀਤਿ ਅਤ੍ਥੋ. ਨ ਗਾਧਤੀਤਿ ਨ ਪਤਿਟ੍ਠਾਤਿ. ਅਤੋਤਿ ਅਤੋ ਨਿਬ੍ਬਾਨਤੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ. ਸਤ੍ਤਮਂ.

੮. ਮਹਦ੍ਧਨਸੁਤ੍ਤਵਣ੍ਣਨਾ

੨੮. ਅਟ੍ਠਮੇ ਨਿਧਾਨਗਤਂ ਮੁਤ੍ਤਸਾਰਾਦਿ ਮਹਨ੍ਤਂ ਧਨਮੇਤੇਸਨ੍ਤਿ ਮਹਦ੍ਧਨਾ. ਸੁਵਣ੍ਣਰਜਤਭਾਜਨਾਦਿ ਮਹਾਭੋਗੋ ਏਤੇਸਨ੍ਤਿ ਮਹਾਭੋਗਾ. ਅਞ੍ਞਮਞ੍ਞਾਭਿਗਿਜ੍ਝਨ੍ਤੀਤਿ ਅਞ੍ਞਮਞ੍ਞਂ ਅਭਿਗਿਜ੍ਝਨ੍ਤਿ ਪਤ੍ਥੇਨ੍ਤਿ ਪਿਹੇਨ੍ਤਿ. ਅਨਲਙ੍ਕਤਾਤਿ ਅਤਿਤ੍ਤਾ ਅਪਰਿਯਤ੍ਤਜਾਤਾ. ਉਸ੍ਸੁਕ੍ਕਜਾਤੇਸੂਤਿ ਨਾਨਾਕਿਚ੍ਚਜਾਤੇਸੁ ਅਨੁਪ੍ਪਨ੍ਨਾਨਂ ਰੂਪਾਦੀਨਂ ਉਪ੍ਪਾਦਨਤ੍ਥਾਯ ਉਪ੍ਪਨ੍ਨਾਨਂ ਅਨੁਭਵਨਤ੍ਥਾਯ ਉਸ੍ਸੁਕ੍ਕੇਸੁ. ਭਵਸੋਤਾਨੁਸਾਰੀਸੂਤਿ ਵਟ੍ਟਸੋਤਂ ਅਨੁਸਰਨ੍ਤੇਸੁ. ਅਨੁਸ੍ਸੁਕਾਤਿ ਅਵਾਵਟਾ. ਅਗਾਰਨ੍ਤਿ ਮਾਤੁਗਾਮੇਨ ਸਦ੍ਧਿਂ ਗੇਹਂ. ਵਿਰਾਜਿਯਾਤਿ ਵਿਰਾਜੇਤ੍ਵਾ. ਸੇਸਂ ਉਤ੍ਤਾਨਮੇਵਾਤਿ. ਅਟ੍ਠਮਂ.

੯. ਚਤੁਚਕ੍ਕਸੁਤ੍ਤਵਣ੍ਣਨਾ

੨੯. ਨਵਮੇ ਚਤੁਚਕ੍ਕਨ੍ਤਿ ਚਤੁਇਰਿਯਾਪਥਂ. ਇਰਿਯਾਪਥੋ ਹਿ ਇਧ ਚਕ੍ਕਨ੍ਤਿ ਅਧਿਪ੍ਪੇਤੋ. ਨਵਦ੍ਵਾਰਨ੍ਤਿ ਨਵਹਿ ਵਣਮੁਖੇਹਿ ਨਵਦ੍ਵਾਰਂ. ਪੁਣ੍ਣਨ੍ਤਿ ਅਸੁਚਿਪੂਰਂ. ਲੋਭੇਨ ਸਂਯੁਤਨ੍ਤਿ ਤਣ੍ਹਾਯ ਸਂਯੁਤ੍ਤਂ. ਕਥਂ ਯਾਤ੍ਰਾ ਭਵਿਸ੍ਸਤੀਤਿ ਏਤਸ੍ਸ ਏਵਰੂਪਸ੍ਸ ਸਰੀਰਸ੍ਸ ਕਥਂ ਨਿਗ੍ਗਮਨਂ ਭਵਿਸ੍ਸਤਿ, ਕਥਂ ਮੁਤ੍ਤਿ ਪਰਿਮੁਤ੍ਤਿ ਸਮਤਿਕ੍ਕਮੋ ਭਵਿਸ੍ਸਤੀਤਿ ਪੁਚ੍ਛਤਿ. ਨਦ੍ਧਿਨ੍ਤਿ ਉਪਨਾਹਂ, ਪੁਬ੍ਬਕਾਲੇ ਕੋਧੋ, ਅਪਰਕਾਲੇ ਉਪਨਾਹੋਤਿ ਏਵਂ ਪਵਤ੍ਤਂ ਬਲਵਕੋਧਨ੍ਤਿ ਅਤ੍ਥੋ. ਵਰਤ੍ਤਨ੍ਤਿ ‘‘ਛੇਤ੍ਵਾ ਨਦ੍ਧਿ ਵਰਤ੍ਤਞ੍ਚ, ਸਨ੍ਦਾਨਂ ਸਹਨੁਕ੍ਕਮ’’ਨ੍ਤਿ ਗਾਥਾਯ (ਧ. ਪ. ੩੯੮; ਸੁ. ਨਿ. ੬੨੭) ਤਣ੍ਹਾ ਵਰਤ੍ਤਾ, ਦਿਟ੍ਠਿ ਸਨ੍ਦਾਨਂ ਨਾਮ ਜਾਤਂ. ਇਧ ਪਨ ਪਾਲ਼ਿਨਿਦ੍ਦਿਟ੍ਠੇ ਕਿਲੇਸੇ ਠਪੇਤ੍ਵਾ ਅਵਸੇਸਾ ‘‘ਵਰਤ੍ਤਾ’’ਤਿ ਵੇਦਿਤਬ੍ਬਾ, ਇਤਿ ਕਿਲੇਸਵਰਤ੍ਤਞ੍ਚ ਛੇਤ੍ਵਾਤਿ ਅਤ੍ਥੋ. ਇਚ੍ਛਾ ਲੋਭਨ੍ਤਿ ਏਕੋਯੇਵ ਧਮ੍ਮੋ ਇਚ੍ਛਨਟ੍ਠੇਨ ਇਚ੍ਛਾ, ਲੁਬ੍ਭਨਟ੍ਠੇਨ ਲੋਭੋਤਿ ਵੁਤ੍ਤੋ. ਪਠਮੁਪ੍ਪਤ੍ਤਿਕਾ ਵਾ ਦੁਬ੍ਬਲਾ ਇਚ੍ਛਾ, ਅਪਰਾਪਰੁਪ੍ਪਤ੍ਤਿਕੋ ਬਲਵਾ ਲੋਭੋ. ਅਲਦ੍ਧਪਤ੍ਥਨਾ ਵਾ ਇਚ੍ਛਾ, ਪਟਿਲਦ੍ਧਵਤ੍ਥੁਮ੍ਹਿ ਲੋਭੋ. ਸਮੂਲਂ ਤਣ੍ਹਨ੍ਤਿ ਅਵਿਜ੍ਜਾਮੂਲੇਨ ਸਮੂਲਕਂ ਤਣ੍ਹਂ. ਅਬ੍ਬੁਯ੍ਹਾਤਿ ਅਗ੍ਗਮਗ੍ਗੇਨ ਉਪ੍ਪਾਟੇਤ੍ਵਾ. ਸੇਸਂ ਉਤ੍ਤਾਨਮੇਵਾਤਿ. ਨਵਮਂ.

੧੦. ਏਣਿਜਙ੍ਘਸੁਤ੍ਤਵਣ੍ਣਨਾ

੩੦. ਦਸਮੇ ਏਣਿਜਙ੍ਘਨ੍ਤਿ ਏਣਿਮਿਗਸ੍ਸ ਵਿਯ ਸੁਵਟ੍ਟਿਤਜਙ੍ਘਂ. ਕਿਸਨ੍ਤਿ ਅਥੂਲਂ ਸਮਸਰੀਰਂ. ਅਥ ਵਾ ਆਤਪੇਨ ਮਿਲਾਤਂ ਮਾਲਾਗਨ੍ਧਵਿਲੇਪਨੇਹਿ ਅਨੁਪਬ੍ਰੂਹਿਤਸਰੀਰਨ੍ਤਿਪਿ ਅਤ੍ਥੋ. ਵੀਰਨ੍ਤਿ ਵੀਰਿਯਵਨ੍ਤਂ. ਅਪ੍ਪਾਹਾਰਨ੍ਤਿ ਭੋਜਨੇ ਮਤ੍ਤਞ੍ਞੁਤਾਯ ਮਿਤਾਹਾਰਂ, ਵਿਕਾਲਭੋਜਨਪਟਿਕ੍ਖੇਪਵਸੇਨ ਵਾ ਪਰਿਤ੍ਤਾਹਾਰਂ. ਅਲੋਲੁਪਨ੍ਤਿ ਚਤੂਸੁ ਪਚ੍ਚਯੇਸੁ ਲੋਲੁਪ੍ਪਵਿਰਹਿਤਂ. ਰਸਤਣ੍ਹਾਪਟਿਕ੍ਖੇਪੋ ਵਾ ਏਸ. ਸੀਹਂਵੇਕਚਰਂ ਨਾਗਨ੍ਤਿ ਏਕਚਰਂ ਸੀਹਂ ਵਿਯ, ਏਕਚਰਂ ਨਾਗਂ ਵਿਯ. ਗਣਵਾਸਿਨੋ ਹਿ ਪਮਤ੍ਤਾ ਹੋਨ੍ਤਿ, ਏਕਚਰਾ ਅਪ੍ਪਮਤ੍ਤਾ, ਤਸ੍ਮਾ ਏਕਚਰਾਵ ਗਹਿਤਾਤਿ. ਪਵੇਦਿਤਾਤਿ ਪਕਾਸਿਤਾ ਕਥਿਤਾ. ਏਤ੍ਥਾਤਿ ਏਤਸ੍ਮਿਂ ਨਾਮਰੂਪੇ. ਪਞ੍ਚਕਾਮਗੁਣਵਸੇਨ ਹਿ ਰੂਪਂ ਗਹਿਤਂ, ਮਨੇਨ ਨਾਮਂ, ਉਭਯੇਹਿ ਪਨ ਅਵਿਨਿਭੁਤ੍ਤਧਮ੍ਮੇ ਗਹੇਤ੍ਵਾ ਪਞ੍ਚਕ੍ਖਨ੍ਧਾਦਿਵਸੇਨਪੇਤ੍ਥ ਭੁਮ੍ਮਂ ਯੋਜੇਤਬ੍ਬਨ੍ਤਿ. ਦਸਮਂ.

ਸਤ੍ਤਿਵਗ੍ਗੋ ਤਤਿਯੋ.