੯. ਮਟ੍ਠਕੁਣ੍ਡਲੀਵਿਮਾਨਵਣ੍ਣਨਾ

ਅਲਙ੍ਕਤੋ ਮਟ੍ਠਕੁਣ੍ਡਲੀਤਿ ਮਟ੍ਠਕੁਣ੍ਡਲੀਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਸਾਵਤ੍ਥਿਵਾਸੀ ਏਕੋ ਬ੍ਰਾਹ੍ਮਣੋ ਅਦ੍ਧੋ ਮਹਦ੍ਧਨੋ ਮਹਾਭੋਗੋ ਅਸ੍ਸਦ੍ਧੋ ਅਪ੍ਪਸਨ੍ਨੋ ਮਿਚ੍ਛਾਦਿਟ੍ਠਿਕੋ ਕਸ੍ਸਚਿ ਕਿਞ੍ਚਿ ਨ ਦੇਤਿ, ਅਦਾਨਤੋ ਏਵ ‘‘ਅਦਿਨ੍ਨਪੁਬ੍ਬਕੋ’’ਤਿ ਪਞ੍ਞਾਯਿਤ੍ਥ. ਸੋ ਮਿਚ੍ਛਾਦਿਟ੍ਠਿਭਾਵੇਨ ਚ ਲੁਦ੍ਧਭਾਵੇਨ ਚ ਤਥਾਗਤਂ ਵਾ ਤਥਾਗਤਸਾਵਕਂ ਵਾ ਦਟ੍ਠੁਮ੍ਪਿ ਨ ਇਚ੍ਛਤਿ. ਮਟ੍ਠਕੁਣ੍ਡਲਂ ਨਾਮ ਅਤ੍ਤਨੋ ਪੁਤ੍ਤਞ੍ਚ ਸਿਕ੍ਖਾਪੇਸਿ ‘‘ਤਾਤ, ਤਯਾ ਸਮਣੋ ਗੋਤਮੋ ਤਸ੍ਸ ਸਾਵਕਾ ਚ ਨ ਉਪਸਙ੍ਕਮਿਤਬ੍ਬਾ ਨ ਦਟ੍ਠਬ੍ਬਾ’’ਤਿ. ਸੋਪਿ ਤਥਾ ਅਕਾਸਿ. ਅਥਸ੍ਸ ਪੁਤ੍ਤੋ ਗਿਲਾਨੋ ਅਹੋਸਿ, ਬ੍ਰਾਹ੍ਮਣੋ ਧਨਕ੍ਖਯਭਯੇਨ ਭੇਸਜ੍ਜਂ ਨ ਕਾਰੇਸਿ, ਰੋਗੇ ਪਨ ਵਡ੍ਢਿਤੇਵ ਵੇਜ੍ਜੇ ਪਕ੍ਕੋਸਿਤ੍ਵਾ ਦਸ੍ਸੇਸਿ. ਵੇਜ੍ਜਾ ਤਸ੍ਸ ਸਰੀਰਂ ਓਲੋਕੇਤ੍ਵਾ ‘‘ਅਤੇਕਿਚ੍ਛੋ’’ਤਿ ਤਂ ਞਤ੍ਵਾ ਅਪਕ੍ਕਮਿਂਸੁ. ਬ੍ਰਾਹ੍ਮਣੋ ‘‘ਪੁਤ੍ਤੇ ਅਬ੍ਭਨ੍ਤਰੇ ਮਤੇ ਨੀਹਰਣਂ ਦੁਕ੍ਖ’’ਨ੍ਤਿ ਪੁਤ੍ਤਂ ਬਹਿਦ੍ਵਾਰਕੋਟ੍ਠਕੇ ਨਿਪਜ੍ਜਾਪੇਸਿ.

ਭਗਵਾ ਰਤ੍ਤਿਯਾ ਪਚ੍ਚੂਸਸਮਯੇ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਵੋਲੋਕੇਨ੍ਤੋ ਅਦ੍ਦਸ ਮਟ੍ਠਕੁਣ੍ਡਲੀਮਾਣਵਂ ਖੀਣਾਯੁਕਂ ਤਦਹੇਵ ਚਵਨਧਮ੍ਮਂ, ਨਿਰਯਸਂਵਤ੍ਤਨਿਕਞ੍ਚਸ੍ਸ ਕਮ੍ਮਂ ਕਤੋਕਾਸਂ. ‘‘ਸਚੇ ਪਨਾਹਂ ਤਤ੍ਥ ਗਮਿਸ੍ਸਾਮਿ, ਸੋ ਮਯਿ ਚਿਤ੍ਤਂ ਪਸਾਦੇਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਪਿਤਰਂ ਆਲ਼ਾਹਨੇ ਰੋਦਮਾਨਂ ਉਪਗਨ੍ਤ੍ਵਾ ਸਂਵੇਜੇਸ੍ਸਤਿ, ਏਵਂ ਸੋ ਚ ਤਸ੍ਸ ਪਿਤਾ ਚ ਮਮ ਸਨ੍ਤਿਕਂ ਆਗਮਿਸ੍ਸਤਿ, ਮਹਾਜਨਕਾਯੋ ਸਨ੍ਨਿਪਤਿਸ੍ਸਤਿ ਤਤ੍ਥ ਮਯਾ ਧਮ੍ਮੇ ਦੇਸਿਤੇ ਮਹਾਧਮ੍ਮਾਭਿਸਮਯੋ ਭਵਿਸ੍ਸਤੀ’’ਤਿ ਏਵਂ ਪਨ ਞਤ੍ਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਸਾਵਤ੍ਥਿਂ ਪਿਣ੍ਡਾਯ ਪਵਿਟ੍ਠੋ ਮਟ੍ਠਕੁਣ੍ਡਲੀਮਾਣਵਸ੍ਸ ਪਿਤੁ ਗੇਹਸਮੀਪੇ ਠਤ੍ਵਾ ਛਬ੍ਬਣ੍ਣਬੁਦ੍ਧਰਂਸਿਯੋ ਵਿਸ੍ਸਜ੍ਜੇਸਿ. ਤਾ ਦਿਸ੍ਵਾ ਮਾਣਵੋ ‘‘ਕਿਮੇਤ’’ਨ੍ਤਿ ਇਤੋ ਚਿਤੋ ਚ ਵਿਲੋਕੇਨ੍ਤੋ ਅਦ੍ਦਸ ਭਗਵਨ੍ਤਂ ਦਨ੍ਤਂ ਗੁਤ੍ਤਂ ਸਨ੍ਤਿਨ੍ਦ੍ਰਿਯਂ ਦ੍ਵਤ੍ਤਿਂਸਾਯ ਮਹਾਪੁਰਿਸਲਕ੍ਖਣੇਹਿ ਅਸੀਤਿਯਾ ਅਨੁਬ੍ਯਞ੍ਜਨੇਹਿ ਬ੍ਯਾਮਪ੍ਪਭਾਯ ਕੇਤੁਮਾਲਾਯ ਚ ਵਿਜ੍ਜੋਤਮਾਨਂ ਅਨੁਪਮਾਯ ਬੁਦ੍ਧਸਿਰਿਯਾ ਅਚਿਨ੍ਤੇਯ੍ਯੇਨ ਬੁਦ੍ਧਾਨੁਭਾਵੇਨ ਵਿਰੋਚਮਾਨਂ. ਦਿਸ੍ਵਾ ਤਸ੍ਸ ਏਤਦਹੋਸਿ ‘‘ਬੁਦ੍ਧੋ ਨੁ ਖੋ ਭਗਵਾ ਇਧਾਨੁਪ੍ਪਤ੍ਤੋ, ਯਸ੍ਸਾਯਂ ਰੂਪਸਮ੍ਪਦਾ ਅਤ੍ਤਨੋ ਤੇਜਸਾ ਸੂਰਿਯਮ੍ਪਿ ਅਭਿਭਵਤਿ, ਕਨ੍ਤਭਾਵੇਨ ਚਨ੍ਦਿਮਂ, ਉਪਸਨ੍ਤਭਾਵੇਨ ਸਬ੍ਬੇਪਿ ਸਮਣਬ੍ਰਾਹ੍ਮਣੇ, ਉਪਸਮੇਨ ਨਾਮ ਏਤ੍ਥੇਵ ਭਵਿਤਬ੍ਬਂ, ਅਯਮੇਵ ਚ ਮਞ੍ਞੇ ਇਮਸ੍ਮਿਂ ਲੋਕੇ ਅਗ੍ਗਪੁਗ੍ਗਲੋ, ਮਮੇਵ ਚ ਅਨੁਕਮ੍ਪਾਯ ਇਧਾਨੁਪ੍ਪਤ੍ਤੋ’’ਤਿ ਬੁਦ੍ਧਾਰਮ੍ਮਣਾਯ ਪੀਤਿਯਾ ਨਿਰਨ੍ਤਰਂ ਫੁਟਸਰੀਰੋ ਅਨਪ੍ਪਕਂ ਪੀਤਿਸੋਮਨਸ੍ਸਂ ਪਟਿਸਂਵੇਦੇਨ੍ਤੋ ਪਸਨ੍ਨਚਿਤ੍ਤੋ ਅਞ੍ਜਲਿਂ ਪਗ੍ਗਯ੍ਹ ਨਿਪਜ੍ਜਿ. ਤਂ ਦਿਸ੍ਵਾ ਭਗਵਾ ‘‘ਅਲਂ ਇਮਸ੍ਸ ਏਤ੍ਤਕੇਨ ਸਗ੍ਗੂਪਪਤ੍ਤਿਯਾ’’ਤਿ ਪਕ੍ਕਾਮਿ.

ਸੋਪਿ ਤਂ ਪੀਤਿਸੋਮਨਸ੍ਸਂ ਅਵਿਜਹਨ੍ਤੋਵ ਕਾਲਂ ਕਤ੍ਵਾ ਤਾਵਤਿਂਸੇਸੁ ਦ੍ਵਾਦਸਯੋਜਨਿਕੇ ਵਿਮਾਨੇ ਨਿਬ੍ਬਤ੍ਤਿ. ਪਿਤਾ ਪਨਸ੍ਸ ਸਰੀਰਸਕ੍ਕਾਰਂ ਕਰਿਤ੍ਵਾ ਦੁਤਿਯਦਿਵਸੇ ਪਚ੍ਚੂਸਵੇਲਾਯਂ ਆਲ਼ਾਹਨਂ ਗਨ੍ਤ੍ਵਾ ‘‘ਹਾ ਹਾ ਮਟ੍ਠਕੁਣ੍ਡਲਿ, ਹਾ ਹਾ ਮਟ੍ਠਕੁਣ੍ਡਲੀ’’ਤਿ ਪਰਿਦੇਵਮਾਨੋ ਆਲ਼ਾਹਨਂ ਅਨੁਪਰਿਕ੍ਕਮਨ੍ਤੋ ਰੋਦਤਿ. ਦੇਵਪੁਤ੍ਤੋ ਅਤ੍ਤਨੋ ਵਿਭਵਸਮ੍ਪਤ੍ਤਿਂ ਓਲੋਕੇਤ੍ਵਾ ‘‘ਕੁਤੋ ਨੁ ਖੋ ਅਹਂ ਇਧਾਗਤੋ ਕਿਞ੍ਚ ਕਮ੍ਮਂ ਕਤ੍ਵਾ’’ਤਿ ਉਪਧਾਰੇਨ੍ਤੋ ਅਤ੍ਤਨੋ ਪੁਰਿਮਤ੍ਤਭਾਵਂ ਞਤ੍ਵਾ ਤਤ੍ਥ ਚ ਮਰਣਕਾਲੇ ਭਗਵਤਿ ਪਵਤ੍ਤਿਤਂ ਚਿਤ੍ਤਪ੍ਪਸਾਦਂ ਮਨੋਹਰਂ ਅਞ੍ਜਲਿਕਰਣਮਤ੍ਤਂ ਦਿਸ੍ਵਾ ‘‘ਅਹੋ ਮਹਾਨੁਭਾਵਾ ਬੁਦ੍ਧਾ ਭਗਵਨ੍ਤੋ’’ਤਿ ਸਾਤਿਸਯਂ ਤਥਾਗਤੇ ਸਞ੍ਜਾਤਪ੍ਪਸਾਦਬਹੁਮਾਨੋ ‘‘ਅਦਿਨ੍ਨਪੁਬ੍ਬਕਬ੍ਰਾਹ੍ਮਣੋ ਨੁ ਖੋ ਕਿਂ ਕਰੋਤੀ’’ਤਿ ਉਪਧਾਰੇਨ੍ਤੋ ਆਲ਼ਾਹਨੇ ਰੋਦਮਾਨਂ ਦਿਸ੍ਵਾ ‘‘ਅਯਂ ਮਯ੍ਹਂ ਪੁਬ੍ਬੇ ਭੇਸਜ੍ਜਮਤ੍ਤਮ੍ਪਿ ਅਕਤ੍ਵਾ ਇਦਾਨਿ ਨਿਰਤ੍ਥਕਂ ਆਲ਼ਾਹਨੇ ਰੋਦਤਿ, ਹਨ੍ਦ ਨਂ ਸਂਵੇਜੇਤ੍ਵਾ ਕੁਸਲੇ ਪਤਿਟ੍ਠਾਪੇਸ੍ਸਾਮੀ’’ਤਿ ਦੇਵਲੋਕਤੋ ਆਗਨ੍ਤ੍ਵਾ ਮਟ੍ਠਕੁਣ੍ਡਲੀਰੂਪੇਨ ਰੋਦਮਾਨੋ ‘‘ਹਾ ਹਾ ਚਨ੍ਦ, ਹਾ ਹਾ ਸੂਰਿਯਾ’’ਤਿ ਬਾਹਾ ਪਗ੍ਗਯ੍ਹ ਕਨ੍ਦਨ੍ਤੋ ਪਿਤੁ ਸਮੀਪੇ ਅਟ੍ਠਾਸਿ. ਅਥ ਨਂ ਬ੍ਰਾਹ੍ਮਣੋ ‘‘ਅਯਂ ਮਟ੍ਠਕੁਣ੍ਡਲੀ ਆਗਤੋ’’ਤਿ ਚਿਨ੍ਤੇਤ੍ਵਾ ਗਾਥਾਯ ਅਜ੍ਝਭਾਸਿ –

੧੨੦੭. ‘‘ਅਲਙ੍ਕਤੋ ਮਟ੍ਠਕੁਣ੍ਡਲੀ, ਮਾਲਧਾਰੀ ਹਰਿਚਨ੍ਦਨੁਸ੍ਸਦੋ;

ਬਾਹਾ ਪਗ੍ਗਯ੍ਹ ਕਨ੍ਦਸਿ, ਵਨਮਜ੍ਝੇ ਕਿਂ ਦੁਕ੍ਖਿਤੋ ਤੁਵ’’ਨ੍ਤਿ.

ਤਤ੍ਥ ਅਲਙ੍ਕਤੋਤਿ ਵਿਭੂਸਿਤੋ. ਮਟ੍ਠਕੁਣ੍ਡਲੀਤਿ ਸਰੀਰਪ੍ਪਦੇਸਸ੍ਸ ਅਘਂਸਨਤ੍ਥਂ ਮਾਲਾਲਤਾਦਯੋ ਅਦਸ੍ਸੇਤ੍ਵਾ ਮਟ੍ਠਾਕਾਰੇਨੇਵ ਕਤਕੁਣ੍ਡਲੋ. ਅਥ ਵਾ ਮਟ੍ਠਕੁਣ੍ਡਲੀਤਿ ਵਿਸੁਦ੍ਧਕੁਣ੍ਡਲੋ, ਤਾਪੇਤ੍ਵਾ ਜਾਤਿਹਿਙ੍ਗੁਲਿਕਾਯ ਮਜ੍ਜਿਤ੍ਵਾ ਧੋਵਿਤ੍ਵਾ ਸੂਕਰਲੋਮੇਨ ਮਜ੍ਜਿਤਕੁਣ੍ਡਲੋਤਿ ਅਤ੍ਥੋ. ਮਾਲਧਾਰੀਤਿ ਮਾਲਂ ਧਾਰੇਨ੍ਤੋ, ਪਿਲ਼ਨ੍ਧਿਤਮਾਲੋਤਿ ਅਤ੍ਥੋ. ਹਰਿਚਨ੍ਦਨੁਸ੍ਸਦੋਤਿ ਰਤ੍ਤਚਨ੍ਦਨੇਨ ਸਬ੍ਬਸੋ ਅਨੁਲਿਤ੍ਤਗਤ੍ਤੋ. ਕਿਨ੍ਤਿ ਪੁਚ੍ਛਾਵਚਨਂ. ਦੁਕ੍ਖਿਤੋਤਿ ਦੁਕ੍ਖਪ੍ਪਤ੍ਤੋ. ਕਿਂਦੁਕ੍ਖਿਤੋਤਿ ਵਾ ਏਕਮੇਵ ਪਦਂ, ਕੇਨ ਦੁਕ੍ਖੇਨ ਦੁਕ੍ਖਿਤੋਤਿ ਅਤ੍ਥੋ.

ਅਥ ਨਂ ਦੇਵਪੁਤ੍ਤੋ ਆਹ –

੧੨੦੮. ‘‘ਸੋਵਣ੍ਣਮਯੋ ਪਭਸ੍ਸਰੋ, ਉਪ੍ਪਨ੍ਨੋ ਰਥਪਞ੍ਜਰੋ ਮਮ;

ਤਸ੍ਸ ਚਕ੍ਕਯੁਗਂ ਨ ਵਿਨ੍ਦਾਮਿ, ਤੇਨ ਦੁਕ੍ਖੇਨ ਜਹਾਮਿ ਜੀਵਿਤ’’ਨ੍ਤਿ.

ਅਥ ਨਂ ਬ੍ਰਾਹ੍ਮਣੋ ਆਹ –

੧੨੦੯. ‘‘ਸੋਵਣ੍ਣਮਯਂ ਮਣਿਮਯਂ, ਲੋਹਿਤਕਮਯਂ ਅਥ ਰੂਪਿਯਮਯਂ;

ਆਚਿਕ੍ਖ ਮੇ ਭਦ੍ਦਮਾਣਵ, ਚਕ੍ਕਯੁਗਂ ਪਟਿਪਾਦਯਾਮਿ ਤੇ’’ਤਿ.

ਤਂ ਸੁਤ੍ਵਾ ਮਾਣਵੋ ‘‘ਅਯਂ ਪੁਤ੍ਤਸ੍ਸ ਭੇਸਜ੍ਜਂ ਅਕਤ੍ਵਾ ਪੁਤ੍ਤਪਤਿਰੂਪਕਂ ਮਂ ਦਿਸ੍ਵਾ ਰੋਦਨ੍ਤੋ ‘ਸੁਵਣ੍ਣਾਦਿਮਯਂ ਰਥਚਕ੍ਕਂ ਕਰੋਮੀ’ਤਿ ਵਦਤਿ, ਹੋਤੁ ਨਿਗ੍ਗਣ੍ਹਿਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ‘‘ਕੀਵ ਮਹਨ੍ਤਂ ਮੇ ਚਕ੍ਕਯੁਗਂ ਕਰਿਸ੍ਸਸੀ’’ਤਿ ਵਤ੍ਵਾ ‘‘ਯਾਵ ਮਹਨ੍ਤਂ ਆਕਙ੍ਖਸੀ’’ਤਿ ਵੁਤ੍ਤੇ ‘‘ਚਨ੍ਦਿਮਸੂਰਿਯੇਹਿ ਮੇ ਅਤ੍ਥੋ, ਤੇ ਮੇ ਦੇਹੀ’’ਤਿ ਯਾਚਨ੍ਤੋ –

੧੨੧੦. ‘‘ਸੋ ਮਾਣਵੋ ਤਸ੍ਸ ਪਾਵਦਿ, ਚਨ੍ਦਸੂਰਿਯਾ ਉਭਯੇਤ੍ਥ ਦਿਸ੍ਸਰੇ;

ਸੋਵਣ੍ਣਮਯੋ ਰਥੋ ਮਮ, ਤੇਨ ਚਕ੍ਕਯੁਗੇਨ ਸੋਭਤੀ’’ਤਿ.

ਅਥ ਨਂ ਬ੍ਰਾਹ੍ਮਣੋ ਆਹ –

੧੨੧੧. ‘‘ਬਾਲੋ ਖੋ ਤ੍ਵਂ ਅਸਿ ਮਾਣਵ, ਯੋ ਤ੍ਵਂ ਪਤ੍ਥਯਸੇ ਅਪਤ੍ਥਿਯਂ;

ਮਞ੍ਞਾਮਿ ਤੁਵਂ ਮਰਿਸ੍ਸਸਿ, ਨ ਹਿ ਤ੍ਵਂ ਲਚ੍ਛਸਿ ਚਨ੍ਦਸੂਰਿਯੇ’’ਤਿ.

ਅਥ ਨਂ ਮਾਣਵੋ ‘‘ਕਿਂ ਪਨ ਪਞ੍ਞਾਯਮਾਨਸ੍ਸਤ੍ਥਾਯ ਰੋਦਨ੍ਤੋ ਬਾਲੋ ਹੋਤਿ, ਉਦਾਹੁ ਅਪਞ੍ਞਾਯਮਾਨਸ੍ਸਾ’’ਤਿ ਵਤ੍ਵਾ –

੧੨੧੨. ‘‘ਗਮਨਾਗਮਨਮ੍ਪਿ ਦਿਸ੍ਸਤਿ, ਵਣ੍ਣਧਾਤੁ ਉਭਯਤ੍ਥ ਵੀਥਿਯਾ;

ਪੇਤੋ ਕਾਲਕਤੋ ਨ ਦਿਸ੍ਸਤਿ, ਕੋ ਨਿਧ ਕਨ੍ਦਤਂ ਬਾਲ੍ਯਤਰੋ’’ਤਿ.

ਤਂ ਸੁਤ੍ਵਾ ਬ੍ਰਾਹ੍ਮਣੋ ‘‘ਯੁਤ੍ਤਂ ਏਸ ਵਦਤੀ’’ਤਿ ਸਲ੍ਲਕ੍ਖੇਤ੍ਵਾ –

੧੨੧੩. ‘‘ਸਚ੍ਚਂ ਖੋ ਵਦੇਸਿ ਮਾਣਵ, ਅਹਮੇਵ ਕਨ੍ਦਤਂ ਬਾਲ੍ਯਤਰੋ;

ਚਨ੍ਦਂ ਵਿਯ ਦਾਰਕੋ ਰੁਦਂ, ਪੇਤਂ ਕਾਲਕਤਾਭਿਪਤ੍ਥਯਿ’’ਨ੍ਤਿ. –

ਵਤ੍ਵਾ ਤਸ੍ਸ ਕਥਾਯ ਨਿਸ੍ਸੋਕੋ ਹੁਤ੍ਵਾ ਮਾਣਵਸ੍ਸ ਥੁਤਿਂ ਕਰੋਨ੍ਤੋ ਇਮਾ ਗਾਥਾ ਅਭਾਸਿ –

੧੨੧੪. ‘‘ਆਦਿਤ੍ਤਂ ਵਤ ਮਂ ਸਨ੍ਤਂ, ਘਤਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

੧੨੧੫. ‘‘ਅਬ੍ਬਹੀ ਵਤ ਮੇ ਸਲ੍ਲਂ, ਸੋਕਂ ਹਦਯਨਿਸ੍ਸਿਤਂ;

ਯੋ ਮੇ ਸੋਕਪਰੇਤਸ੍ਸ, ਪੁਤ੍ਤਸੋਕਂ ਅਪਾਨੁਦਿ.

੧੨੧੬. ‘‘ਸ੍ਵਾਹਂ ਅਬ੍ਬੂਲ਼੍ਹਸਲ੍ਲੋਸ੍ਮਿ, ਸੀਤਿਭੂਤੋਸ੍ਮਿ ਨਿਬ੍ਬੁਤੋ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾਨ ਮਾਣਵਾ’’ਤਿ.

੧੨੦੮-੧੦. ਤਤ੍ਥ ਰਥਪਞ੍ਜਰੋਤਿ ਰਥੂਪਤ੍ਥਂ. ਨ ਵਿਨ੍ਦਾਮੀਤਿ ਨ ਲਭਾਮਿ. ਭਦ੍ਦਮਾਣਵਾਤਿ ਆਲਪਨਂ. ਪਟਿਪਾਦਯਾਮੀਤਿ ਸਮ੍ਪਾਦੇਤ੍ਵਾ ਦਦਾਮਿ, ਮਾ ਚਕ੍ਕਯੁਗਾਭਾਵੇਨ ਜੀਵਿਤਂ ਜਹੀਤਿ ਅਧਿਪ੍ਪਾਯੋ. ਉਭਯੇਤ੍ਥ ਦਿਸ੍ਸਰੇਤਿ ਉਭੋਪਿ ਏਤ੍ਥ ਚਨ੍ਦਸੂਰਿਯਾ ਆਕਾਸੇ ਦਿਸ੍ਸਨ੍ਤਿ. ਯ-ਕਾਰੋ ਪਦਸਨ੍ਧਿਕਰੋ, ਉਭਯੇ ਏਤ੍ਥਾਤਿ ਵਾ ਪਦਵਿਭਾਗੋ.

੧੨੧੨. ਗਮਨਾਗਮਨਨ੍ਤਿ ਦਿਵਸੇ ਦਿਵਸੇ ਓਗਮਨੁਗ੍ਗਮਨਵਸੇਨ ਚਨ੍ਦਸੂਰਿਯਾਨਂ ਗਮਨਂ ਆਗਮਨਞ੍ਚ ਦਿਸ੍ਸਤਿ. ‘‘ਗਮਨੋਗਮਨ’’ਨ੍ਤਿਪਿ ਪਾਲ਼ਿ, ਉਗ੍ਗਮਨਂ ਓਗਮਨਞ੍ਚਾਤਿ ਅਤ੍ਥੋ. ਵਣ੍ਣਧਾਤੂਤਿ ਸੀਤਿਭਾਵਵਿਸਿਟ੍ਠਾ ਕਨ੍ਤਭਾਵਭਾਸੁਰਾ, ਉਣ੍ਹਭਾਵਵਿਸਿਟ੍ਠਾ ਤਿਕ੍ਖਭਾਵਭਾਸੁਰਾ ਚ ਵਣ੍ਣਨਿਭਾ. ਉਭਯਤ੍ਥਾਤਿ ਚਨ੍ਦੇ ਸੂਰਿਯੇ ਚਾਤਿ ਦ੍ਵੀਸੁਪਿ ਵਣ੍ਣਧਾਤੁ ਦਿਸ੍ਸਤੀਤਿ ਯੋਜੇਤਬ੍ਬਂ. ਵੀਥਿਯਾਤਿ ਪਵਤ੍ਤਨਵੀਥਿਯਂ ਆਕਾਸੇ, ਨਾਗਵੀਥਿਯਾਦਿਵੀਥਿਯਂ ਵਾ. ‘‘ਉਭਯੇਤ੍ਥਾ’’ਤਿਪਿ ਪਾਠੋ, ਉਭਯੇ ਏਤ੍ਥਾਤਿ ਪਦਵਿਸਨ੍ਧਿ. ਬਾਲ੍ਯਤਰੋਤਿ ਬਾਲਤਰੋ ਅਤਿਸਯੇਨ ਬਾਲੋ.

੧੨੧੩. ਇਮਂ ਪਨ ਕਥਂ ਸੁਤ੍ਵਾ ‘‘ਅਲਬ੍ਭਨੀਯਵਤ੍ਥੁਂ ਵਤਾਹਂ ਪਤ੍ਥੇਤ੍ਵਾ ਕੇਵਲਂ ਸੋਕਗ੍ਗਿਨਾ ਡਯ੍ਹਾਮਿ, ਕਿਂ ਮੇ ਨਿਰਤ੍ਥਕੇਨ ਅਨਯਬ੍ਯਸਨੇਨਾ’’ਤਿ ਪਟਿਸਙ੍ਖਾਨੇ ਅਟ੍ਠਾਸਿ. ਅਥ ਦੇਵਪੁਤ੍ਤੋ ਮਟ੍ਠਕੁਣ੍ਡਲੀਰੂਪਂ ਪਟਿਸਂਹਰਿਤ੍ਵਾ ਅਤ੍ਤਨੋ ਦਿਬ੍ਬਰੂਪੇਨੇਵ ਅਟ੍ਠਾਸਿ. ਬ੍ਰਾਹ੍ਮਣੋ ਪਨ ਤਂ ਅਨੋਲੋਕੇਤ੍ਵਾ ਮਾਣਵਵੋਹਾਰੇਨੇਵ ਵੋਹਰਨ੍ਤੋ ‘‘ਸਚ੍ਚਂ ਖੋ ਵਦੇਸਿ ਮਾਣਵਾ’’ਤਿਆਦਿਮਾਹ. ਤਤ੍ਥ ਚਨ੍ਦਂ ਵਿਯ ਦਾਰਕੋ ਰੁਦਨ੍ਤਿ ਚਨ੍ਦਂ ਅਭਿਪਤ੍ਥਯਂ ਰੁਦਨ੍ਤੋ ਦਾਰਕੋ ਵਿਯਾਤਿ ਅਤ੍ਥੋ. ਕਾਲਕਤਾਭਿਪਤ੍ਥਯਿਨ੍ਤਿ ਕਾਲਕਤਂ ਅਭਿਪਤ੍ਥਯਿਂ. ‘‘ਅਭਿਪਤ੍ਥਯ’’ਨ੍ਤਿਪਿ ਪਾਠੋ.

੧੨੧੪-੫. ਆਦਿਤ੍ਤਨ੍ਤਿ ਸੋਕਗ੍ਗਿਨਾ ਆਦਿਤ੍ਤਂ. ਨਿਬ੍ਬਾਪਯੇ ਦਰਨ੍ਤਿ ਨਿਬ੍ਬਾਪਯਿ ਦਰਥਂ ਸੋਕਪਰਿਲ਼ਾਹਂ. ਅਬ੍ਬਹੀਤਿ ਉਦ੍ਧਰਿ.

ਅਥ ਬ੍ਰਾਹ੍ਮਣੋ ਸੋਕਂ ਵਿਨੋਦੇਤ੍ਵਾ ਅਤ੍ਤਨੋ ਉਪਦੇਸਦਾਯਕਂ ਦਿਬ੍ਬਰੂਪੇਨ ਠਿਤਂ ਦਿਸ੍ਵਾ ‘‘ਕੋ ਨਾਮ ਤ੍ਵ’’ਨ੍ਤਿ ਪੁਚ੍ਛਨ੍ਤੋ –

੧੨੧੭. ‘‘ਦੇਵਤਾ ਨੁਸਿ ਗਨ੍ਧਬ੍ਬੋ, ਅਦੁ ਸਕ੍ਕੋ ਪੁਰਿਨ੍ਦਦੋ;

ਕੋ ਵਾ ਤ੍ਵਂ ਕਸ੍ਸ ਵਾ ਪੁਤ੍ਤੋ, ਕਥਂ ਜਾਨੇਮੁ ਤਂ ਮਯ’’ਨ੍ਤਿ. –

ਆਹ. ਸੋਪਿ ਤਸ੍ਸ –

੧੨੧੮. ‘‘ਯਞ੍ਚ ਕਨ੍ਦਸਿ ਯਞ੍ਚ ਰੋਦਸਿ, ਪੁਤ੍ਤਂ ਆਲ਼ਾਹਨੇ ਸਯਂ ਦਹਿਤ੍ਵਾ;

ਸ੍ਵਾਹਂ ਕੁਸਲਂ ਕਰਿਤ੍ਵਾ ਕਮ੍ਮਂ, ਤਿਦਸਾਨਂ ਸਹਬ੍ਯਤਂ ਗਤੋ’’ਤਿ. –

ਅਤ੍ਤਾਨਂ ਕਥੇਸਿ. ਤਤ੍ਥ ਯਞ੍ਚ ਕਨ੍ਦਸਿ ਯਞ੍ਚ ਰੋਦਸੀਤਿ ਯਂ ਤਵ ਪੁਤ੍ਤਂ ਮਟ੍ਠਕੁਣ੍ਡਲਿਂ ਉਦ੍ਦਿਸ੍ਸ ਰੋਦਸਿ, ਅਸ੍ਸੂਨਿ ਮੁਞ੍ਚਸਿ.

ਅਥ ਨਂ ਬ੍ਰਾਹ੍ਮਣੋ ਆਹ –

੧੨੧੯. ‘‘ਅਪ੍ਪਂ ਵਾ ਬਹੁਂ ਵਾ ਨਾਦ੍ਦਸਾਮ, ਦਾਨਂ ਦਦਨ੍ਤਸ੍ਸ ਸਕੇ ਅਗਾਰੇ;

ਉਪੋਸਥਕਮ੍ਮਂ ਵਾ ਤਾਦਿਸਂ, ਕੇਨ ਕਮ੍ਮੇਨ ਗਤੋਸਿ ਦੇਵਲੋਕ’’ਨ੍ਤਿ.

ਤਤ੍ਥ ‘‘ਉਪੋਸਥਕਮ੍ਮਂ ਵਾ ਤਾਦਿਸਂ ਨਾਦ੍ਦਸਾਮਾ’’ਤਿ ਯੋਜਨਾ.

ਅਥ ਨਂ ਮਾਣਵੋ ਆਹ –

੧੨੨੦. ‘‘ਆਬਾਧਿਕੋਹਂ ਦੁਕ੍ਖਿਤੋ ਗਿਲਾਨੋ, ਆਤੁਰਰੂਪੋਮ੍ਹਿ ਸਕੇ ਨਿਵੇਸਨੇ;

ਬੁਦ੍ਧਂ ਵਿਗਤਰਜਂ ਵਿਤਿਣ੍ਣਕਙ੍ਖਂ, ਅਦ੍ਦਕ੍ਖਿਂ ਸੁਗਤਂ ਅਨੋਮਪਞ੍ਞਂ.

੧੨੨੧. ‘‘ਸ੍ਵਾਹਂ ਮੁਦਿਤਮਨੋ ਪਸਨ੍ਨਚਿਤ੍ਤੋ, ਅਞ੍ਜਲਿਂ ਅਕਰਿਂ ਤਥਾਗਤਸ੍ਸ;

ਤਾਹਂ ਕੁਸਲਂ ਕਰਿਤ੍ਵਾਨ ਕਮ੍ਮਂ, ਤਿਦਸਾਨਂ ਸਹਬ੍ਯਤਂ ਗਤੋ’’ਤਿ.

੧੨੨੦-੨੧. ਤਤ੍ਥ ਆਬਾਧਿਕੋਤਿ ਆਬਾਧਸਮਙ੍ਗੀ. ਦੁਕ੍ਖਿਤੋਤਿ ਤੇਨੇਵ ਆਬਾਧਿਕਭਾਵੇਨ ਜਾਤਦੁਕ੍ਖੋ. ਗਿਲਾਨੋਤਿ ਗਿਲਾਯਮਾਨੋਤਿ ਅਤ੍ਥੋ. ਆਤੁਰਰੂਪੋਤਿ ਦੁਕ੍ਖਵੇਦਨਾਭਿਤੁਨ੍ਨਕਾਯੋ. ਵਿਗਤਰਜਨ੍ਤਿ ਵਿਗਤਰਾਗਾਦਿਰਜਂ. ਵਿਤਿਣ੍ਣਕਙ੍ਖਨ੍ਤਿ ਸਬ੍ਬਸੋ ਸਂਸਯਾਨਂ ਸਮੁਚ੍ਛਿਨ੍ਨਤ੍ਤਾ ਤਿਣ੍ਣਵਿਚਿਕਿਚ੍ਛਂ. ਅਨੋਮਪਞ੍ਞਨ੍ਤਿ ਪਰਿਪੁਣ੍ਣਪਞ੍ਞਂ, ਸਬ੍ਬਞ੍ਞੁਨ੍ਤਿ ਅਤ੍ਥੋ. ਅਕਰਿਨ੍ਤਿ ਅਕਾਸਿਂ. ਤਾਹਨ੍ਤਿ ਤਂ ਅਹਂ.

ਏਵਂ ਤਸ੍ਮਿਂ ਕਥੇਨ੍ਤੇਯੇਵ ਬ੍ਰਾਹ੍ਮਣਸ੍ਸ ਸਕਲਸਰੀਰਂ ਪੀਤਿਯਾ ਪਰਿਪੂਰਿ. ਸੋ ਤਂ ਪੀਤਿਂ ਪਵੇਦੇਨ੍ਤੋ –

੧੨੨੨. ‘‘ਅਚ੍ਛਰਿਯਂ ਵਤ ਅਬ੍ਭੁਤਂ ਵਤ,

ਅਞ੍ਜਲਿਕਮ੍ਮਸ੍ਸ ਅਯਮੀਦਿਸੋ ਵਿਪਾਕੋ;

ਅਹਮ੍ਪਿ ਮੁਦਿਤਮਨੋ ਪਸਨ੍ਨਚਿਤ੍ਤੋ,

ਅਜ੍ਜੇਵ ਬੁਦ੍ਧਂ ਸਰਣਂ ਵਜਾਮੀ’’ਤਿ. – ਆਹ;

ਤਤ੍ਥ ਅਨਭਿਣ੍ਹਪ੍ਪਵਤ੍ਤਿਤਾਯ ਅਚ੍ਛਰਂ ਪਹਰਿਤੁਂ ਯੋਗ੍ਗਨ੍ਤਿ ਅਚ੍ਛਰਿਯਂ, ਅਭੂਤਪੁਬ੍ਬਤਾਯ ਅਬ੍ਭੁਤਂ. ਉਭਯੇਨਪਿ ਵਿਮ੍ਹਯਾਵਹਤਂਯੇਵ ਦਸ੍ਸੇਤ੍ਵਾ ‘‘ਅਹਮ੍ਪਿ ਮੁਦਿਤਮਨੋ ਪਸਨ੍ਨਚਿਤ੍ਤੋ, ਅਜ੍ਜੇਵ ਬੁਦ੍ਧਂ ਸਰਣਂ ਵਜਾਮੀ’’ਤਿ ਆਹ.

ਅਥ ਨਂ ਦੇਵਪੁਤ੍ਤੋ ਸਰਣਗਮਨੇ ਸੀਲਸਮਾਦਾਨੇ ਚ ਨਿਯੋਜੇਨ੍ਤੋ –

੧੨੨੩. ‘‘ਅਜ੍ਜੇਵ ਬੁਦ੍ਧਂ ਸਰਣਂ ਵਜਾਹਿ, ਧਮ੍ਮਞ੍ਚ ਸਙ੍ਘਞ੍ਚ ਪਸਨ੍ਨਚਿਤ੍ਤੋ;

ਤਥੇਵ ਸਿਕ੍ਖਾਯ ਪਦਾਨਿ ਪਞ੍ਚ, ਅਖਣ੍ਡਫੁਲ੍ਲਾਨਿ ਸਮਾਦਿਯਸ੍ਸੁ.

੧੨੨੪. ‘‘ਪਾਣਾਤਿਪਾਤਾ ਵਿਰਮਸ੍ਸੁ ਖਿਪ੍ਪਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਸ੍ਸੁ;

ਅਮਜ੍ਜਪੋ ਮਾ ਚ ਮੁਸਾ ਭਣਾਹਿ, ਸਕੇਨ ਦਾਰੇਨ ਚ ਹੋਹਿ ਤੁਟ੍ਠੋ’’ਤਿ. –

ਗਾਥਾਦ੍ਵਯਮਾਹ.

੧੨੨੩. ਤਤ੍ਥ ਤਥੇਵਾਤਿ ਯਥਾ ਪਸਨ੍ਨਚਿਤ੍ਤੋ ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ’’ਤਿ ਬੁਦ੍ਧਂ ਸਰਣਂ ਵਜੇਸਿ, ਤਥੇਵ ‘‘ਸ੍ਵਾਕ੍ਖਾਤੋ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’’ਤਿ ਪਸਨ੍ਨਚਿਤ੍ਤੋ ਧਮ੍ਮਞ੍ਚ ਸਙ੍ਘਞ੍ਚ ਸਰਣਂ ਵਜਾਹਿ. ਯਥਾ ਵਾ ਪਸਨ੍ਨਚਿਤ੍ਤੋ ਰਤਨਤ੍ਤਯਂ ਸਰਣਂ ਵਜੇਸਿ, ਤਥੇਵ ‘‘ਅਯਂ ਏਕਂਸਤੋ ਦਿਟ੍ਠੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚ ਹਿਤਸੁਖਾਵਹੋ’’ਤਿ ਪਸਨ੍ਨਚਿਤ੍ਤੋ ਸਿਕ੍ਖਾਯ ਅਧਿਸੀਲਸਿਕ੍ਖਾਯ ਪਦਾਨਿ ਕੋਟ੍ਠਾਸਭੂਤਾਨਿ ਅਧਿਚਿਤ੍ਤਅਧਿਪਞ੍ਞਾਸਿਕ੍ਖਾਯ ਵਾ ਉਪਾਯਭੂਤਾਨਿ ਪਞ੍ਚਸੀਲਾਨਿ ਅਵਿਕੋਪਨਤੋ ਚ ਅਸਂਕਿਲਿਸ੍ਸਨਤੋ ਚ ਅਖਣ੍ਡਫੁਲ੍ਲਾਨਿ ਸਮਾਦਿਯਸ੍ਸੁ, ਸਮਾਦਾਯ ਵਤ੍ਤਸ੍ਸੂਤਿ ਅਤ੍ਥੋ.

ਏਵਂ ਦੇਵਪੁਤ੍ਤੇਨ ਸਰਣਗਮਨੇ ਸੀਲਸਮਾਦਾਨੇ ਚ ਨਿਯੋਜਿਤੋ ਬ੍ਰਾਹ੍ਮਣੋ ਤਸ੍ਸ ਵਚਨਂ ਸਿਰਸਾ ਸਮ੍ਪਟਿਚ੍ਛਨ੍ਤੋ –

੧੨੨੫. ‘‘ਅਤ੍ਥਕਾਮੋਸਿ ਮੇ ਯਕ੍ਖ, ਹਿਤਕਾਮੋਸਿ ਦੇਵਤੇ;

ਕਰੋਮਿ ਤੁਯ੍ਹਂ ਵਚਨਂ, ਤ੍ਵਂਸਿ ਆਚਰਿਯੋ ਮਮਾ’’ਤਿ. –

ਗਾਥਂ ਵਤ੍ਵਾ ਤਤ੍ਥ ਪਤਿਟ੍ਠਹਨ੍ਤੋ –

੧੨੨੬. ‘‘ਉਪੇਮਿ ਸਰਣਂ ਬੁਦ੍ਧਂ, ਧਮ੍ਮਞ੍ਚਾਪਿ ਅਨੁਤ੍ਤਰਂ;

ਸਙ੍ਘਞ੍ਚ ਨਰਦੇਵਸ੍ਸ, ਗਚ੍ਛਾਮਿ ਸਰਣਂ ਅਹਂ.

੧੨੨੭. ‘‘ਪਾਣਾਤਿਪਾਤਾ ਵਿਰਮਾਮਿ ਖਿਪ੍ਪਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਾਮਿ;

ਅਮਜ੍ਜਪੋ ਨੋ ਚ ਮੁਸਾ ਭਣਾਮਿ, ਸਕੇਨ ਦਾਰੇਨ ਚ ਹੋਮਿ ਤੁਟ੍ਠੋ’’ਤਿ. –

ਗਾਥਾਦ੍ਵਯਮਾਹ. ਤਮ੍ਪਿ ਸੁਵਿਞ੍ਞੇਯ੍ਯਮੇਵ.

ਤਤੋ ਦੇਵਪੁਤ੍ਤੋ ‘‘ਕਤਂ ਮਯਾ ਬ੍ਰਾਹ੍ਮਣਸ੍ਸ ਕਤ੍ਤਬ੍ਬਯੁਤ੍ਤਕਂ, ਇਦਾਨਿ ਸਯਮੇਵ ਭਗਵਨ੍ਤਂ ਉਪਸਙ੍ਕਮਿਸ੍ਸਤੀ’’ਤਿ ਤਤ੍ਥੇਵ ਅਨ੍ਤਰਧਾਯਿ. ਬ੍ਰਾਹ੍ਮਣੋਪਿ ਖੋ ਭਗਵਤਿ ਸਞ੍ਜਾਤਪਸਾਦਬਹੁਮਾਨੋ ਦੇਵਤਾਯ ਚ ਚੋਦਿਯਮਾਨੋ ‘‘ਸਮਣਂ ਗੋਤਮਂ ਉਪਸਙ੍ਕਮਿਸ੍ਸਾਮੀ’’ਤਿ ਵਿਹਾਰਾਭਿਮੁਖੋ ਗਚ੍ਛਤਿ. ਤਂ ਦਿਸ੍ਵਾ ਮਹਾਜਨੋ ‘‘ਅਯਂ ਬ੍ਰਾਹ੍ਮਣੋ ਏਤ੍ਤਕਂ ਕਾਲਂ ਤਥਾਗਤਂ ਅਨੁਪਸਙ੍ਕਮਿਤ੍ਵਾ ਅਜ੍ਜ ਪੁਤ੍ਤਸੋਕੇਨ ਉਪਸਙ੍ਕਮਤਿ, ਕੀਦਿਸੀ ਨੁ ਖੋ ਧਮ੍ਮਦੇਸਨਾ ਭਵਿਸ੍ਸਤੀ’’ਤਿ ਤਂ ਅਨੁਬਨ੍ਧਿ.

ਬ੍ਰਾਹ੍ਮਣੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਏਵਮਾਹ ‘‘ਸਕ੍ਕਾ ਨੁ ਖੋ ਭੋ ਗੋਤਮ ਕਿਞ੍ਚਿ ਦਾਨਂ ਅਦਤ੍ਵਾ ਸੀਲਂ ਵਾ ਅਰਕ੍ਖਿਤ੍ਵਾ ਕੇਵਲਂ ਤੁਮ੍ਹੇਸੁ ਪਸਾਦਮਤ੍ਤੇਨ ਸਗ੍ਗੇ ਨਿਬ੍ਬਤ੍ਤਿਤੁ’’ਨ੍ਤਿ. ‘‘ਨਨੁ, ਬ੍ਰਾਹ੍ਮਣ, ਅਜ੍ਜ ਪਚ੍ਚੂਸਵੇਲਾਯਂ ਮਟ੍ਠਕੁਣ੍ਡਲਿਨਾ ਦੇਵਪੁਤ੍ਤੇਨ ਅਤ੍ਤਨੋ ਦੇਵਲੋਕੂਪਪਤ੍ਤਿਕਾਰਣਂ ਤੁਯ੍ਹਂ ਕਥਿਕ’’ਨ੍ਤਿ ਭਗਵਾ ਅਵੋਚ. ਤਸ੍ਮਿਂ ਖਣੇ ਮਟ੍ਠਕੁਣ੍ਡਲੀਦੇਵਪੁਤ੍ਤੋ ਸਹ ਵਿਮਾਨੇਨ ਆਗਨ੍ਤ੍ਵਾ ਦਿਸ੍ਸਮਾਨਰੂਪੋ ਵਿਮਾਨਤੋ ਓਰੁਯ੍ਹ ਭਗਵਨ੍ਤਂ ਅਭਿਵਾਦੇਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਏਕਮਨ੍ਤਂ ਅਟ੍ਠਾਸਿ. ਅਥ ਭਗਵਾ ਤਸ੍ਸਂ ਪਰਿਸਤਿ ਤੇਨ ਦੇਵਪੁਤ੍ਤੇਨ ਕਤਸੁਚਰਿਤਂ ਕਥੇਤ੍ਵਾ ਪਰਿਸਾਯ ਚਿਤ੍ਤਕਲ੍ਲਤਂ ਞਤ੍ਵਾ ਸਾਮੁਕ੍ਕਂਸਿਕਂ ਧਮ੍ਮਦੇਸਨਂ ਅਕਾਸਿ. ਦੇਸਨਾਪਰਿਯੋਸਾਨੇ ਦੇਵਪੁਤ੍ਤੋ ਚ ਬ੍ਰਾਹ੍ਮਣੋ ਚ ਸਨ੍ਨਿਪਤਿਤਪਰਿਸਾ ਚਾਤਿ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸੀਤਿ.

ਮਟ੍ਠਕੁਣ੍ਡਲੀਵਿਮਾਨਵਣ੍ਣਨਾ ਨਿਟ੍ਠਿਤਾ.