੧੦. ਸੇਰੀਸਕਵਿਮਾਨਵਣ੍ਣਨਾ
ਸੁਣੋਥ ਯਕ੍ਖਸ੍ਸ ਚ ਵਾਣਿਜਾਨ ਚਾਤਿ ਸੇਰੀਸਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਪਰਿਨਿਬ੍ਬੁਤੇ ਆਯਸ੍ਮਾ ਕੁਮਾਰਕਸ੍ਸਪੋ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਸੇਤਬ੍ਯਨਗਰਂ ਸਮ੍ਪਤ੍ਤੋ. ਤਤ੍ਥ ਪਾਯਾਸਿਰਾਜਞ੍ਞਂ ਅਤ੍ਤਨੋ ਸਨ੍ਤਿਕਂ ਉਪਗਤਂ ਵਿਪਰੀਤਗ੍ਗਾਹਤੋ ਵਿਵੇਚੇਤ੍ਵਾ ਸਮ੍ਮਾਦਸ੍ਸਨੇ ਪਤਿਟ੍ਠਾਪੇਸਿ. ਸੋ ਤਤੋ ਪਟ੍ਠਾਯ ਪੁਞ੍ਞਪਸੁਤੋ ਹੁਤ੍ਵਾ ਸਮਣਬ੍ਰਾਹ੍ਮਣਾਨਂ ਦਾਨਂ ਦੇਨ੍ਤੋ ਤਤ੍ਥ ਅਕਤਪਰਿਚਯਤਾਯ ਅਸਕ੍ਕਚ੍ਚਂ ਦਾਨਂ ਦਤ੍ਵਾ ਅਪਰਭਾਗੇ ਕਾਲਂ ਕਤ੍ਵਾ ਚਾਤੁਮਹਾਰਾਜਿਕਭਵਨੇ ਸੁਞ੍ਞੇ ਸੇਰੀਸਕੇ ਵਿਮਾਨੇ ਨਿਬ੍ਬਤ੍ਤਿ.
ਅਤੀਤੇ ਕਿਰ ਕਸ੍ਸਪਸ੍ਸ ਭਗਵਤੋ ਕਾਲੇ ਏਕੋ ਖੀਣਾਸਵਤ੍ਥੇਰੋ ਅਞ੍ਞਤਰਸ੍ਮਿਂ ਗਾਮੇ ਪਿਣ੍ਡਾਯ ਚਰਿਤ੍ਵਾ ਬਹਿਗਾਮੇ ਦੇਵਸਿਕਂ ਏਕਸ੍ਮਿਂ ਪਦੇਸੇ ਭਤ੍ਤਕਿਚ੍ਚਂ ਅਕਾਸਿ. ਤਂ ਦਿਸ੍ਵਾ ਏਕੋ ਗੋਪਾਲਕੋ ‘‘ਅਯ੍ਯੋ ਸੂਰਿਯਾਤਪੇਨ ਕਿਲਮਤੀ’’ਤਿ ਪਸਨ੍ਨਚਿਤ੍ਤੋ ਚਤੂਹਿ ਸਿਰੀਸਥਮ੍ਭੇਹਿ ਸਾਖਾਮਣ੍ਡਪਂ ਕਤ੍ਵਾ ਅਦਾਸਿ, ਮਣ੍ਡਪਸ੍ਸ ਸਮੀਪੇ ਸਿਰੀਸਰੁਕ੍ਖਂ ਰੋਪੇਸੀਤਿ ਚ ਵਦਨ੍ਤਿ. ਸੋ ਕਾਲਂ ਕਤ੍ਵਾ ਤੇਨੇਵ ਪੁਞ੍ਞਕਮ੍ਮੇਨ ਚਾਤੁਮਹਾਰਾਜਿਕੇਸੁ ਨਿਬ੍ਬਤ੍ਤਿ, ਤਸ੍ਸ ਪੁਰਿਮਕਮ੍ਮਸ੍ਸ ਸੂਚਕਂ ਵਿਮਾਨਦ੍ਵਾਰੇ ਸਿਰੀਸਵਨਂ ਨਿਬ੍ਬਤ੍ਤਿ ਵਣ੍ਣਗਨ੍ਧਸਮ੍ਪਨ੍ਨੇਹਿ ਪੁਪ੍ਫੇਹਿ ਸਬ੍ਬਕਾਲਂ ਉਪਸੋਭਮਾਨਂ, ਤੇਨ ਤਂ ਵਿਮਾਨਂ ‘‘ਸੇਰੀਸਕ’’ਨ੍ਤਿ ਪਞ੍ਞਾਯਿਤ੍ਥ. ਸੋ ਚ ਦੇਵਪੁਤ੍ਤੋ ਏਕਂ ਬੁਦ੍ਧਨ੍ਤਰਂ ਦੇਵੇਸੁ ਚੇਵ ਮਨੁਸ੍ਸੇਸੁ ਚ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਯਸਤ੍ਥੇਰਸ੍ਸ ਚਤੂਸੁ ਵਿਮਲਾਦੀਸੁ ਗਿਹਿਸਹਾਯੇਸੁ ਗਵਮ੍ਪਤਿ ਨਾਮ ਹੁਤ੍ਵਾ ਭਗਵਤੋ ਧਮ੍ਮਦੇਸਨਾਯ ਅਰਹਤ੍ਤੇ ਪਤਿਟ੍ਠਿਤੋ ਪੁਬ੍ਬਾਚਿਣ੍ਣਵਸੇਨ ਤਂ ਸੁਞ੍ਞਵਿਮਾਨਂ ਦਿਸ੍ਵਾ ਅਭਿਣ੍ਹਂ ਦਿਵਾਵਿਹਾਰਂ ਗਚ੍ਛਤਿ.
ਸੋ ਅਪਰਭਾਗੇ ਪਾਯਾਸਿਦੇਵਪੁਤ੍ਤਂ ਤਤ੍ਥ ਦਿਸ੍ਵਾ ‘‘ਕੋਸਿ ਤ੍ਵਂ, ਆਵੁਸੋ’’ਤਿ ਪੁਚ੍ਛਿਤ੍ਵਾ ਤੇਨ ‘‘ਅਹਂ, ਭਨ੍ਤੇ, ਪਾਯਾਸਿਰਾਜਞ੍ਞੋ ਇਧੂਪਪਨ੍ਨੋ’’ਤਿ ਵੁਤ੍ਤੇ ‘‘ਨਨੁ ਤ੍ਵਂ ਮਿਚ੍ਛਾਦਿਟ੍ਠਿਕੋ ਵਿਪਰੀਤਦਸ੍ਸਨੋ ਕਥਮਿਧੂਪਪਨ੍ਨੋ’’ਤਿ ਆਹ. ਅਥ ਨਂ ਪਾਯਾਸਿਦੇਵਪੁਤ੍ਤੋ ‘‘ਅਯ੍ਯੇਨਮ੍ਹਿ ਕੁਮਾਰਕਸ੍ਸਪਤ੍ਥੇਰੇਨ ਮਿਚ੍ਛਾਦਸ੍ਸਨਤੋ ਵਿਵੇਚਿਤੋ, ਪੁਞ੍ਞਕਿਰਿਯਾਨਂ ਅਸਕ੍ਕਚ੍ਚਕਾਰਿਤਾਯ ਪਨ ਸੁਞ੍ਞੇ ਵਿਮਾਨੇ ਨਿਬ੍ਬਤ੍ਤੋ. ਸਾਧੁ, ਭਨ੍ਤੇ, ਮਨੁਸ੍ਸਲੋਕਂ ਗਤਕਾਲੇ ਮਮ ਪਰਿਜਨਸ੍ਸ ਆਰੋਚੇਥ ‘ਪਾਯਾਸਿਰਾਜਞ੍ਞੋ ਅਸਕ੍ਕਚ੍ਚਂ ਦਾਨਂ ਦਤ੍ਵਾ ਸੁਞ੍ਞਂ ਸੇਰੀਸਕਵਿਮਾਨਂ ਉਪਪਨ੍ਨੋ, ਤੁਮ੍ਹੇ ਪਨ ਸਕ੍ਕਚ੍ਚਂ ਪੁਞ੍ਞਾਨਿ ਕਤ੍ਵਾ ਤਤ੍ਰੂਪਪਤ੍ਤਿਯਾ ਚਿਤ੍ਤਂ ਪਣਿਦਹਥਾ’’ਤਿ. ਥੇਰੋ ਤਸ੍ਸਾਨੁਕਮ੍ਪਾਯ ਤਥਾ ਅਕਾਸਿ. ਤੇਪਿ ਥੇਰਸ੍ਸ ਵਚਨਂ ਸੁਤ੍ਵਾ ਤਥਾ ਚਿਤ੍ਤਂ ਪਣਿਧਾਯ ਪੁਞ੍ਞਾਨਿ ਕਤ੍ਵਾ ਸੇਰੀਸਕੇ ਵਿਮਾਨੇ ਨਿਬ੍ਬਤ੍ਤਿਂਸੁ. ਸੇਰੀਸਕਦੇਵਪੁਤ੍ਤਂ ਪਨ ਵੇਸ੍ਸਵਣਮਹਾਰਾਜਾ ਮਰੁਭੂਮਿਯਂ ਛਾਯੂਦਕਰਹਿਤੇ ਮਗ੍ਗੇ ਮਗ੍ਗਪਟਿਪਨ੍ਨਾਨਂ ਮਨੁਸ੍ਸਾਨਂ ਅਮਨੁਸ੍ਸਪਰਿਪਨ੍ਥ ਮੋਚਨਤ੍ਥਂ ਮਗ੍ਗਰਕ੍ਖਕਂ ਠਪੇਸਿ.
ਅਥ ਅਪਰੇਨ ਸਮਯੇਨ ਅਙ੍ਗਮਗਧਵਾਸਿਨੋ ਵਾਣਿਜਾ ਸਕਟਸਹਸ੍ਸਂ ਭਣ੍ਡਸ੍ਸ ਪੂਰੇਤ੍ਵਾ ਸਿਨ੍ਧੁਸੋਵੀਰਦੇਸਂ ਗਚ੍ਛਨ੍ਤਾ ਮਰੁਕਨ੍ਤਾਰੇ ਦਿਵਾ ਉਣ੍ਹਭਯੇਨ ਮਗ੍ਗਂ ਅਪ੍ਪਟਿਪਜ੍ਜਿਤ੍ਵਾ ਰਤ੍ਤਿਂ ਨਕ੍ਖਤ੍ਤਸਞ੍ਞਾਯ ਮਗ੍ਗਂ ਪਟਿਪਜ੍ਜਿਂਸੁ. ਤੇ ਮਗ੍ਗਮੂਲ਼੍ਹਾ ਹੁਤ੍ਵਾ ਅਞ੍ਞਂ ਦਿਸਂ ਅਗਮਂਸੁ. ਤੇਸਂ ਅਨ੍ਤਰੇ ਏਕੋ ਉਪਾਸਕੋ ਅਹੋਸਿ ਸਦ੍ਧੋ ਪਸਨ੍ਨੋ ਸੀਲਸਮ੍ਪਨ੍ਨੋ ਅਰਹਤ੍ਤਪ੍ਪਤ੍ਤਿਯਾ ਉਪਨਿਸ੍ਸਯਸਮ੍ਪਨ੍ਨੋ ਮਾਤਾਪਿਤੂਨਂ ਉਪਟ੍ਠਾਨਤ੍ਥਂ ਵਣਿਜ੍ਜਾਯ ਗਤੋ. ਤਂ ਅਨੁਗ੍ਗਣ੍ਹਨ੍ਤੋ ਸੇਰੀਸਕਦੇਵਪੁਤ੍ਤੋ ਸਹ ਵਿਮਾਨੇਨ ਅਤ੍ਤਾਨਂ ਦਸ੍ਸੇਸਿ. ਦਸ੍ਸੇਤ੍ਵਾ ਚ ਪਨ ‘‘ਕਸ੍ਮਾ ਤੁਮ੍ਹੇ ਇਮਂ ਛਾਯੂਦਕਰਹਿਤਂ ਵਾਲੁਕਾਕਨ੍ਤਾਰਂ ਪਟਿਪਨ੍ਨਾ’’ਤਿ ਪੁਚ੍ਛਿ. ਤੇ ਚਸ੍ਸ ਤਤ੍ਥ ਅਤ੍ਤਨੋ ਆਗਤਪ੍ਪਕਾਰਂ ਕਥੇਸੁਂ, ਤਦਤ੍ਥਦੀਪਨਾ ਦੇਵਪੁਤ੍ਤਸ੍ਸ ਵਾਣਿਜਾਨਞ੍ਚ ਵਚਨਪਟਿਵਚਨਗਾਥਾ ਹੋਨ੍ਤਿ. ਆਦਿਤੋ ਪਨ ਦ੍ਵੇ ਗਾਥਾ ਤਾਸਂ ਸਮ੍ਬਨ੍ਧਦਸ੍ਸਨਤ੍ਥਂ ਧਮ੍ਮਸਙ੍ਗਾਹਕੇਹਿ ਠਪਿਤਾ –
੧੨੨੮. ‘‘ਸੁਣੋਥ ਯਕ੍ਖਸ੍ਸ ਚ ਵਾਣਿਜਾਨ ਚ, ਸਮਾਗਮੋ ਯਤ੍ਥ ਤਦਾ ਅਹੋਸਿ;
ਯਥਾ ਕਥਂ ਇਤਰਿਤਰੇਨ ਚਾਪਿ, ਸੁਭਾਸਿਤਂ ਤਞ੍ਚ ਸੁਣਾਥ ਸਬ੍ਬੇ.
੧੨੨੯. ‘‘ਯੋ ਸੋ ਅਹੁ ਰਾਜਾ ਪਾਯਾਸਿ ਨਾਮ, ਭੁਮ੍ਮਾਨਂ ਸਹਬ੍ਯਗਤੋ ਯਸਸ੍ਸੀ;
ਸੋ ਮੋਦਮਾਨੋਵ ਸਕੇ ਵਿਮਾਨੇ, ਅਮਾਨੁਸੋ ਮਾਨੁਸੇ ਅਜ੍ਝਭਾਸੀ’’ਤਿ.
੧੨੨੮-੯. ਤਤ੍ਥ ਸੁਣੋਥਾਤਿ ਸਵਨਾਣਤ੍ਤਿਕਵਚਨਂ. ਯਂ ਮਯਂ ਇਦਾਨਿ ਭਣਾਮ, ਤਂ ਸੁਣੋਥਾਤਿ. ਯਕ੍ਖਸ੍ਸਾਤਿ ਦੇਵਸ੍ਸ. ਦੇਵੋ ਹਿ ਮਨੁਸ੍ਸਾਨਂ ਏਕਚ੍ਚਾਨਂ ਦੇਵਾਨਞ੍ਚ ਪੂਜਨੀਯਭਾਵਤੋ ‘‘ਯਕ੍ਖੋ’’ਤਿ ਵੁਚ੍ਚਤਿ. ਅਪਿਚ ਸਕ੍ਕੋਪਿ ਚਤ੍ਤਾਰੋ ਮਹਾਰਾਜਾਨੋਪਿ ਵੇਸ੍ਸਵਣਪਾਰਿਸਜ੍ਜਾਪਿ ਪੁਰਿਸੋਪਿ ‘‘ਯਕ੍ਖੋ’’ਤਿ ਵੁਚ੍ਚਤਿ. ਤਥਾ ਹਿ ‘‘ਅਤਿਬਾਲ਼੍ਹਂ ਖੋ ਅਯਂ ਯਕ੍ਖੋ ਪਮਤ੍ਤੋ ਵਿਹਰਤਿ, ਯਂਨੂਨਾਹਂ ਇਮਂ ਯਕ੍ਖਂ ਸਂਵੇਜੇਯ੍ਯ’’ਨ੍ਤਿਆਦੀਸੁ (ਮ. ਨਿ. ੧.੩੯੩) ਸਕ੍ਕੋ ‘‘ਯਕ੍ਖੋ’’ਤਿ ਵੁਤ੍ਤੋ. ‘‘ਚਤ੍ਤਾਰੋ ਯਕ੍ਖਾ ਖਗ੍ਗਹਤ੍ਥਾ’’ਤਿਆਦੀਸੁ ਮਹਾਰਾਜਾਨੋ. ‘‘ਸਨ੍ਤਿ ਹਿ, ਭਨ੍ਤੇ, ਉਲ਼ਾਰਾ ਯਕ੍ਖਾ ਭਗਵਤੋ ਅਪ੍ਪਸਨ੍ਨਾ’’ਤਿਆਦੀਸੁ (ਦੀ. ਨਿ. ੩.੨੭੬) ਵੇਸ੍ਸਵਣਪਾਰਿਸਜ੍ਜਾ. ‘‘ਏਤ੍ਤਾਵਤਾ ਯਕ੍ਖਸ੍ਸ ਸੁਦ੍ਧੀ’’ਤਿਆਦੀਸੁ (ਸੁ. ਨਿ. ੪੮੨) ਪੁਰਿਸੋ. ਇਧ ਪਨ ਵੇਸ੍ਸਵਣਪਾਰਿਸਜ੍ਜੋ ਅਧਿਪ੍ਪੇਤੋ. ਵਾਣਿਜਾਨ ਚਾਤਿ ਗਾਥਾਬਨ੍ਧਸੁਖਤ੍ਥਂ ਅਨੁਨਾਸਿਕਲੋਪਂ ਕਤ੍ਵਾ ਵੁਤ੍ਤਂ. ਸਮਾਗਮੋਤਿ ਸਮੋਧਾਨਂ. ਯਤ੍ਥਾਤਿ ਯਸ੍ਮਿਂ ਵਣ੍ਣੁਪਥੇ. ਤਦਾਤਿ ਤਸ੍ਮਿਂ ਮਗ੍ਗਮੂਲ਼੍ਹਾ ਹੁਤ੍ਵਾ ਗਮਨਕਾਲੇ. ਇਤਰਿਤਰੇਨ ਚਾਪੀਤਿ ਇਤਰੀਤਰਞ੍ਚਾਪਿ, ਇਦਂ ਯਥਾਤਿ ਇਮਿਨਾ ਯੋਜੇਤਬ੍ਬਂ. ਅਯਞ੍ਹੇਤ੍ਥ ਅਤ੍ਥੋ – ਸੇਰੀਸਕਦੇਵਪੁਤ੍ਤਸ੍ਸ ਵਾਣਿਜਾਨਞ੍ਚ ਤਦਾ ਯਤ੍ਥ ਸਮਾਗਮੋ ਅਹੋਸਿ, ਤਂ ਸੁਣੋਥ, ਯਥਾ ਵਾਪਿ ਤੇਹਿ ਅਞ੍ਞਮਞ੍ਞਂ ਸੁਭਾਸਿਤਂ ਸੁਲਪਿਤਂ ਕਥਂ ਪਵਤ੍ਤਿਤਂ, ਤਞ੍ਚ ਸਬ੍ਬੇ ਓਹਿਤਚਿਤ੍ਤਾ ਸੁਣਾਥਾਤਿ. ਭੁਮ੍ਮਾਨਨ੍ਤਿ ਭੁਮ੍ਮਦੇਵਾਨਂ.
ਇਦਾਨਿ ਯਕ੍ਖਸ੍ਸ ਪੁਚ੍ਛਾਗਾਥਾਯੋ ਹੋਨ੍ਤਿ –
੧੨੩੦. ‘‘ਵਙ੍ਕੇ ਅਰਞ੍ਞੇ ਅਮਨੁਸ੍ਸਟ੍ਠਾਨੇ, ਕਨ੍ਤਾਰੇ ਅਪ੍ਪੋਦਕੇ ਅਪ੍ਪਭਕ੍ਖੇ;
ਸੁਦੁਗ੍ਗਮੇ ਵਣ੍ਣੁਪਥਸ੍ਸ ਮਜ੍ਝੇ, ਵਙ੍ਕਂਭਯਾ ਨਟ੍ਠਮਨਾ ਮਨੁਸ੍ਸਾ.
੧੨੩੧. ‘‘ਨਯਿਧ ਫਲਾ ਮੂਲਮਯਾ ਚ ਸਨ੍ਤਿ, ਉਪਾਦਾਨਂ ਨਤ੍ਥਿ ਕੁਤੋਧ ਭਕ੍ਖੋ;
ਅਞ੍ਞਤ੍ਰ ਪਂਸੂਹਿ ਚ ਵਾਲੁਕਾਹਿ ਚ, ਤਤ੍ਤਾਹਿ ਉਣ੍ਹਾਹਿ ਚ ਦਾਰੁਣਾਹਿ ਚ.
੧੨੩੨. ‘‘ਉਜ੍ਜਙ੍ਗਲਂ ਤਤ੍ਤਮਿਵਂ ਕਪਾਲਂ, ਅਨਾਯਸਂ ਪਰਲੋਕੇਨ ਤੁਲ੍ਯਂ;
ਲੁਦ੍ਦਾਨਮਾਵਾਸਮਿਦਂ ਪੁਰਾਣਂ, ਭੂਮਿਪ੍ਪਦੇਸੋ ਅਭਿਸਤ੍ਤਰੂਪੋ.
੧੨੩੩. ‘‘ਅਥ ਤੁਮ੍ਹੇ ਕੇਨ ਵਣ੍ਣੇਨ, ਕਿਮਾਸਮਾਨਾ ਇਮਂ ਪਦੇਸਞ੍ਹਿ;
ਅਨੁਪਵਿਟ੍ਠਾ ਸਹਸਾ ਸਮੇਚ੍ਚ, ਲੋਭਾ ਭਯਾ ਅਥ ਵਾ ਸਮ੍ਪਮੂਲ਼੍ਹਾ’’ਤਿ.
੧੨੩੦. ਤਤ੍ਥ ਵਙ੍ਕੇਤਿ ਸਂਸਯਟ੍ਠਾਨੇ. ਯਤ੍ਥ ਪਵਿਟ੍ਠਾਨਂ ‘‘ਜੀਵਿਸ੍ਸਾਮ ਨੁ ਖੋ, ਮਰਿਸ੍ਸਾਮ ਨੁ ਖੋ’’ਤਿ ਜੀਵਿਤੇ ਸਂਸਯੋ ਹੋਤਿ, ਤਾਦਿਸੇ ਅਰਞ੍ਞੇ. ਅਮਨੁਸ੍ਸਟ੍ਠਾਨੇਤਿ ਅਮਨੁਸ੍ਸਾਨਂ ਪਿਸਾਚਾਦੀਨਂ ਸਞ੍ਚਰਣਟ੍ਠਾਨੇ, ਮਨੁਸ੍ਸਾਨਂ ਵਾ ਅਗੋਚਰਟ੍ਠਾਨੇ. ਕਨ੍ਤਾਰੇਤਿ ਨਿਰੁਦਕੇ ਇਰਿਣੇ, ਕਂ ਤਾਰੇਨ੍ਤਿ ਨਯਨ੍ਤਿ ਏਤ੍ਥਾਤਿ ਹਿ ਕਨ੍ਤਾਰੋ, ਉਦਕਂ ਗਹੇਤ੍ਵਾ ਤਰਿਤਬ੍ਬਟ੍ਠਾਨਂ. ਤੇਨਾਹ ‘‘ਅਪ੍ਪੋਦਕੇ’’ਤਿ. ਅਪ੍ਪ-ਸਦ੍ਦੋ ਹੇਤ੍ਥ ਅਭਾਵਤ੍ਥੋ ‘‘ਅਪ੍ਪਿਚ੍ਛੋ ਅਪ੍ਪਨਿਗ੍ਘੋਸੋ’’ਤਿਆਦੀਸੁ (ਅ. ਨਿ. ੮.੨੩; ਚੂਲ਼ਵ. ੪੫੬) ਵਿਯ. ਵਣ੍ਣੁਪਥਸ੍ਸ ਮਜ੍ਝੇਤਿ ਵਾਲੁਕਾਕਨ੍ਤਾਰਮਜ੍ਝੇਤਿ ਅਤ੍ਥੋ. ਵਙ੍ਕਂਭਯਾਤਿ ਵਙ੍ਕੇਹਿ ਭੀਤਾ. ਵਙ੍ਕੇਹਿ ਭਯਂ ਏਤੇਸਨ੍ਤਿ ‘‘ਵਙ੍ਕਭਯਾ’’ਤਿ ਵਤ੍ਤਬ੍ਬੇ ਗਾਥਾਸੁਖਤ੍ਥਂ ਸਾਨੁਨਾਸਿਕਂ ਕਤ੍ਵਾ ‘‘ਵਙ੍ਕਂਭਯਾ’’ਤਿ ਵੁਤ੍ਤਂ. ਇਦਞ੍ਚ ਵਾਲੁਕਾਕਨ੍ਤਾਰਪਵੇਸਨਤੋ ਪੁਬ੍ਬੇ ਤੇਸਂ ਉਪ੍ਪਨ੍ਨਭਯਂ ਸਨ੍ਧਾਯ ਵੁਤ੍ਤਂ. ਨਟ੍ਠਮਨਾਤਿ ਮਗ੍ਗਸਤਿਵਿਪ੍ਪਵਾਸੇਨ ਨਟ੍ਠਮਾਨਸਾ, ਮਗ੍ਗਮੂਲ਼੍ਹਾਤਿ ਅਤ੍ਥੋ. ਮਨੁਸ੍ਸਾਤਿ ਤੇਸਂ ਆਲਪਨਂ.
੧੨੩੧. ਇਧਾਤਿ ਇਮਸ੍ਮਿਂ ਮਰੁਕਨ੍ਤਾਰੇ. ਫਲਾਤਿ ਅਮ੍ਬਜਮ੍ਬੁਤਾਲਨਾਲ਼ਿਕੇਰਾਦਿਫਲਾਨਿ ਨ ਸਨ੍ਤੀਤਿ ਯੋਜਨਾ. ਮੂਲਮਯਾ ਚਾਤਿ ਮੂਲਾਨਿਯੇਵ ਮੂਲਮਯਾ, ਵਲ੍ਲਿਕਨ੍ਦਾਦੀਨਿ ਸਨ੍ਧਾਯ ਵਦਤਿ. ਉਪਾਦਾਨਂ ਨਤ੍ਥੀਤਿ ਕਿਞ੍ਚਾਪਿ ਕਿਞ੍ਚਿ ਭਕ੍ਖਂ ਨਤ੍ਥਿ, ਉਪਾਦਾਨਂ ਵਾ ਇਨ੍ਧਨਂ, ਅਗ੍ਗਿਸ੍ਸ ਇਨ੍ਧਨਮਤ੍ਤਮ੍ਪਿ ਨਤ੍ਥਿ, ਕੁਤੋ ਕੇਨ ਕਾਰਣੇਨ ਇਧ ਮਰੁਕਨ੍ਤਾਰੇ ਭਕ੍ਖੋ ਸਿਯਾਤਿ ਅਤ੍ਥੋ. ਯਂ ਪਨ ਅਤ੍ਥਿ ਤਤ੍ਥ, ਤਂ ਦਸ੍ਸੇਤੁਂ ‘‘ਅਞ੍ਞਤ੍ਰ ਪਂਸੂਹੀ’’ਤਿਆਦਿ ਵੁਤ੍ਤਂ.
੧੨੩੨. ਉਜ੍ਜਙ੍ਗਲਨ੍ਤਿ ਜਙ੍ਗਲਂ ਵੁਚ੍ਚਤਿ ਲੂਖਧੂਸਰੋ ਅਨੁਦਕੋ ਭੂਮਿਪ੍ਪਦੇਸੋ, ਤਂ ਪਨ ਠਾਨਂ ਜਙ੍ਗਲਤੋਪਿ ਉਕ੍ਕਂਸੇਨ ਜਙ੍ਗਲਨ੍ਤਿ ਆਹ ‘‘ਉਜ੍ਜਙ੍ਗਲ’’ਨ੍ਤਿ. ਤੇਨਾਹ ‘‘ਤਤ੍ਤਮਿਵਂ ਕਪਾਲ’’ਨ੍ਤਿ, ਤਤ੍ਤਂ ਅਯੋਕਪਾਲਸਦਿਸਨ੍ਤਿ ਅਤ੍ਥੋ. ਗਾਥਾਸੁਖਤ੍ਥਞ੍ਚੇਤ੍ਥ ਸਾਨੁਨਾਸਿਕਂ ਕਤ੍ਵਾ ਵੁਤ੍ਤਂ, ਤਤ੍ਤਮਿਵਇਚ੍ਚੇਵ ਦਟ੍ਠਬ੍ਬਂ. ਅਨਾਯਸਨ੍ਤਿ ਨਤ੍ਥਿ ਏਤ੍ਥ ਆਯੋ ਸੁਖਨ੍ਤਿ ਅਨਾਯਂ, ਤਤੋ ਏਵ ਜੀਵਿਤਂ ਸੀਯਤਿ ਵਿਨਾਸੇਤੀਤਿ ਅਨਾਯਸਂ. ਅਥ ਵਾ ਨ ਆਯਸਨ੍ਤਿ ਅਨਾਯਸਂ. ਪਰਲੋਕੇਨਾਤਿ ਨਰਕੇਨ ਤੁਲ੍ਯਂ. ਨਰਕਞ੍ਹਿ ਸਤ੍ਤਾਨਂ ਏਕਨ੍ਤਾਨਤ੍ਥਤਾਯ ਪਰਭੂਤੋ ਪਟਿਸਤ੍ਤੁਭੂਤੋ ਲੋਕੋਤਿ ਵਿਸੇਸਤੋ ‘‘ਪਰਲੋਕੋ’’ਤਿ ਵੁਚ੍ਚਤਿ, ਸਮਨ੍ਤਤੋ ਅਯੋਮਯਤ੍ਤਾ ਆਯਸਞ੍ਚ, ਇਦਂ ਪਨ ਤਦਭਾਵਤੋ ਅਨਾਯਸਂ, ਮਹਤੋ ਦੁਕ੍ਖਸ੍ਸ ਉਪ੍ਪਤ੍ਤਿਟ੍ਠਾਨਤਾਯ ਪਰਲੋਕਸਦਿਸਨ੍ਤਿ ਦਸ੍ਸੇਤਿ, ‘‘ਅਨਸ੍ਸਯ’’ਨ੍ਤਿ ਚ ਕੇਚਿ ਪਠਨ੍ਤਿ, ਸੁਖਸ੍ਸ ਅਪ੍ਪਤਿਟ੍ਠਾਨਭੂਤਨ੍ਤਿ ਅਤ੍ਥੋ. ਲੁਦ੍ਦਾਨਮਾਵਾਸਮਿਦਂ ਪੁਰਾਣਨ੍ਤਿ ਇਦਂ ਠਾਨਂ ਚਿਰਕਾਲਤੋ ਪਟ੍ਠਾਯ ਲੁਦ੍ਦਾਨਂ ਦਾਰੁਣਾਨਂ ਪਿਸਾਚਾਦੀਨਂ ਆਵਾਸਭੂਤਂ. ਅਭਿਸਤ੍ਤਰੂਪੋਤਿ ‘‘ਏਵਂ ਲੂਖੋ ਘੋਰਾਕਾਰੋ ਹੋਤੂ’’ਤਿ ਪੋਰਾਣੇਹਿ ਇਸੀਹਿ ਸਪਿਤਸਦਿਸੋ, ਦਿਨ੍ਨਸਪੋ ਵਿਯਾਤਿ ਅਤ੍ਥੋ.
੧੨੩੩. ਕੇਨ ਵਣ੍ਣੇਨਾਤਿ ਕੇਨ ਕਾਰਣੇਨ. ਕਿਮਾਸਮਾਨਾਤਿ ਕਿਂ ਪਚ੍ਚਾਸੀਸਨ੍ਤਾ. ਹੀਤਿ ਨਿਪਾਤਮਤ੍ਤਂ. ‘‘ਪਦੇਸਮ੍ਪੀ’’ਤਿ ਚ ਪਠਨ੍ਤਿ, ਇਮਮ੍ਪਿ ਨਾਮ ਪਦੇਸਨ੍ਤਿ ਅਤ੍ਥੋ. ਸਹਸਾ ਸਮੇਚ੍ਚਾਤਿ ਸਹਸਾ ਆਦੀਨਵਾਨਿਸਂਸੇ ਅਵਿਚਾਰੇਤ੍ਵਾ ਸਮਵਾਯੇਨ ਅਨੁਪਵਿਟ੍ਠਾ ਸਪ੍ਪਵਿਟ੍ਠਾ. ਲੋਭਾ ਭਯਾ ਅਥ ਵਾ ਕੇਨਚਿ ਅਨਤ੍ਥਕਾਮੇਨ ਪਲੋਭਿਤਾ ਲੋਭਤੋ ਕੇਨਚਿ ਅਮਨੁਸ੍ਸਾਦਿਨਾ ਪਰਿਪਾਤਿਤਾ ਭਯਾ ਵਾ. ਅਥ ਵਾ ਸਮ੍ਪਮੂਲ਼੍ਹਾਤਿ ਮਗ੍ਗਵਿਪ੍ਪਨਟ੍ਠਾ ਇਮਂ ਪਦੇਸਂ ਅਨੁਪਵਿਟ੍ਠਾਤਿ ਯੋਜਨਾ.
ਇਦਾਨਿ ਵਾਣਿਜਾ ਆਹਂਸੁ –
੧੨੩੪. ‘‘ਮਗਧੇਸੁ ਅਙ੍ਗੇਸੁ ਚ ਸਤ੍ਥਵਾਹਾ, ਆਰੋਪਯਿਤ੍ਵਾ ਪਣਿਯਂ ਪੁਥੁਤ੍ਤਂ;
ਤੇ ਯਾਮਸੇ ਸਿਨ੍ਧੁਸੋਵੀਰਭੂਮਿਂ, ਧਨਤ੍ਥਿਕਾ ਉਦ੍ਦਯਂ ਪਤ੍ਥਯਾਨਾ.
੧੨੩੫. ‘‘ਦਿਵਾ ਪਿਪਾਸਂਨਧਿਵਾਸਯਨ੍ਤਾ, ਯੋਗ੍ਗਾਨੁਕਮ੍ਪਞ੍ਚ ਸਮੇਕ੍ਖਮਾਨਾ;
ਏਤੇਨ ਵੇਗੇਨ ਆਯਾਮ ਸਬ੍ਬੇ, ਰਤ੍ਤਿਂ ਮਗ੍ਗਂ ਪਟਿਪਨ੍ਨਾ ਵਿਕਾਲੇ.
੧੨੩੬. ‘‘ਤੇ ਦੁਪ੍ਪਯਾਤਾ ਅਪਰਦ੍ਧਮਗ੍ਗਾ, ਅਨ੍ਧਾਕੁਲਾ ਵਿਪ੍ਪਨਟ੍ਠਾ ਅਰਞ੍ਞੇ;
ਸੁਦੁਗ੍ਗਮੇ ਵਣ੍ਣੁਪਥਸ੍ਸ ਮਜ੍ਝੇ, ਦਿਸਂ ਨ ਜਾਨਾਮ ਪਮੂਲ਼੍ਹਚਿਤ੍ਤਾ.
੧੨੩੭. ‘‘ਇਦਞ੍ਚ ਦਿਸ੍ਵਾਨ ਅਦਿਟ੍ਠਪੁਬ੍ਬਂ, ਵਿਮਾਨਸੇਟ੍ਠਞ੍ਚ ਤਵਞ੍ਚ ਯਕ੍ਖ;
ਤਤੁਤ੍ਤਰਿਂ ਜੀਵਿਤਮਾਸਮਾਨਾ, ਦਿਸ੍ਵਾ ਪਤੀਤਾ ਸੁਮਨਾ ਉਦਗ੍ਗਾ’’ਤਿ.
੧੨੩੪. ਤਤ੍ਥ ਮਗਧੇਸੁ ਅਙ੍ਗੇਸੁ ਚ ਸਤ੍ਥਵਾਹਾਤਿ ਮਗਧਰਟ੍ਠੇ ਚ ਅਙ੍ਗਰਟ੍ਠੇ ਚ ਜਾਤਾ ਸਂਵਡ੍ਢਾ ਤਂਨਿਵਾਸਿਨੋ ਸਤ੍ਥੇ ਸਤ੍ਥਸ੍ਸ ਚ ਵਾਹਨਕਾ ਸਤ੍ਥਕਾ ਚੇਵ ਸਤ੍ਥਸਾਮਿਕਾ ਚ. ਪਣਿਯਨ੍ਤਿ ਭਣ੍ਡਂ. ਤੇਤਿ ਤੇ ਮਯਂ. ਯਾਮਸੇਤਿ ਗਚ੍ਛਾਮ. ਸਿਨ੍ਧੁਸੋਵੀਰਭੂਮਿਨ੍ਤਿ ਸਿਨ੍ਧੁਦੇਸਂ ਸੋਵੀਰਦੇਸਞ੍ਚ. ਉਦ੍ਦਯਨ੍ਤਿ ਆਨਿਸਂਸਂ ਅਤਿਰੇਕਲਾਭਂ.
੧੨੩੫. ਅਨਧਿਵਾਸਯਨ੍ਤਾਤਿ ਅਧਿਵਾਸੇਤੁਂ ਅਸਕ੍ਕੋਨ੍ਤਾ. ਯੋਗ੍ਗਾਨੁਕਮ੍ਪਨ੍ਤਿ ਗੋਣਾਦੀਨਂ ਸਤ੍ਤਾਨਂ ਅਨੁਗ੍ਗਹਂ. ਏਤੇਨ ਵੇਗੇਨਾਤਿ ਇਮਿਨਾ ਜਵੇਨ, ਯੇਨ ਤਵ ਦਸ੍ਸਨਤੋ ਪੁਬ੍ਬੇ ਆਯਾਮ ਆਗਤਮ੍ਹ. ਰਤ੍ਤਿਂ ਮਗ੍ਗਂ ਪਟਿਪਨ੍ਨਾਤਿ ਰਤ੍ਤਿਯਂ ਮਗ੍ਗਂ ਪਟਿਪਨ੍ਨਾ. ਵਿਕਾਲੇਤਿ ਅਕਾਲੇ ਅਵੇਲਾਯਂ.
੧੨੩੬. ਦੁਪ੍ਪਯਾਤਾਤਿ ਦੁਟ੍ਠੁ ਪਯਾਤਾ ਅਪਥੇ ਗਤਾ, ਤਤੋ ਏਵ ਅਪਰਦ੍ਧਮਗ੍ਗਾ. ਅਨ੍ਧਾਕੁਲਾਤਿ ਅਨ੍ਧਾ ਵਿਯ ਆਕੁਲਾ, ਮਗ੍ਗਜਾਨਨਸਮਤ੍ਥਸ੍ਸ ਪਞ੍ਞਾਚਕ੍ਖੁਨੋ ਅਭਾਵੇਨ ਅਨ੍ਧਾ, ਤਤੋ ਏਵ ਆਕੁਲਾ, ਵਿਪ੍ਪਨਟ੍ਠਾ ਚ ਮਗ੍ਗਸਮ੍ਮੂਲ਼੍ਹਤਾਯ. ਦਿਸਨ੍ਤਿ ਗਨ੍ਤਬ੍ਬਦਿਸਂ, ਯਸ੍ਸਂ ਦਿਸਾਯਂ ਸਿਨ੍ਧੁਸੋਵੀਰਦੇਸੋ, ਤਂ ਦਿਸਂ. ਪਮੂਲ਼੍ਹਚਿਤ੍ਤਾਤਿ ਦਿਸਾਸਂਸਯਸੁਮੂਲ਼੍ਹਚਿਤ੍ਤਾ.
੧੨੩੭. ਤਵਞ੍ਚਾਤਿ ਤੁਵਞ੍ਚ. ਯਕ੍ਖਾਤਿ ਆਲਪਨਂ. ਤਤੁਤ੍ਤਰਿਂ ਜੀਵਿਤਮਾਸਮਾਨਾਤਿ ਯੋ ‘‘ਇਤੋ ਪਰਂ ਅਮ੍ਹਾਕਂ ਜੀਵਿਤਂ ਨਤ੍ਥੀ’’ਤਿ ਜੀਵਿਤਸਂਸਯੋ ਉਪ੍ਪਨ੍ਨੋ, ਇਦਾਨਿ ਤਤੋ ਉਤ੍ਤਰਿਮ੍ਪਿ ਜੀਵਿਤਂ ਆਸੀਸਨ੍ਤਾ. ਦਿਸ੍ਵਾਤਿ ਦਸ੍ਸਨਹੇਤੁ. ਪਤੀਤਾਤਿ ਪਹਟ੍ਠਾ. ਸੁਮਨਾਤਿ ਸੋਮਨਸ੍ਸਪ੍ਪਤ੍ਤਾ. ਉਦਗ੍ਗਾਤਿ ਉਦਗ੍ਗਾਯ ਪੀਤਿਯਾ ਉਦਗ੍ਗਚਿਤ੍ਤਾ.
ਏਵਂ ਵਾਣਿਜੇਹਿ ਅਤ੍ਤਨੋ ਪਵਤ੍ਤਿਯਾ ਪਕਾਸਿਤਾਯ ਪੁਨ ਦੇਵਪੁਤ੍ਤੋ ਦ੍ਵੀਹਿ ਗਾਥਾਹਿ ਪੁਚ੍ਛਿ –
੧੨੩੮. ‘‘ਪਾਰਂ ਸਮੁਦ੍ਦਸ੍ਸ ਇਮਞ੍ਚ ਵਣ੍ਣੁਂ, ਵੇਤ੍ਤਾਚਰਂ ਸਙ੍ਕੁਪਥਞ੍ਚ ਮਗ੍ਗਂ;
ਨਦਿਯੋ ਪਨ ਪਬ੍ਬਤਾਨਞ੍ਚ ਦੁਗ੍ਗਾ, ਪੁਥੁਦ੍ਦਿਸਾ ਗਚ੍ਛਥ ਭੋਗਹੇਤੁ.
੧੨੩੯. ‘‘ਪਕ੍ਖਨ੍ਦਿਯਾਨ ਵਿਜਿਤਂ ਪਰੇਸਂ, ਵੇਰਜ੍ਜਕੇ ਮਾਨੁਸੇ ਪੇਕ੍ਖਮਾਨਾ;
ਯਂ ਵੋ ਸੁਤਂ ਵਾ ਅਥ ਵਾਪਿ ਦਿਟ੍ਠਂ, ਅਚ੍ਛੇਰਕਂ ਤਂ ਵੋ ਸੁਣੋਮ ਤਾਤਾ’’ਤਿ.
ਤਸ੍ਸਤ੍ਥੋ – ਪਾਰਂ ਸਮੁਦ੍ਦਸ੍ਸਾਤਿ ਸਮੁਦ੍ਦਸ੍ਸ ਪਰਤੀਰਂ, ਇਮਞ੍ਚ ਈਦਿਸਂ, ਵਣ੍ਣੁਂ ਵਣ੍ਣੁਪਥਂ ਵੇਤ੍ਤਲਤਾ ਬਨ੍ਧਿਤ੍ਵਾ ਆਚਰਿਤਬ੍ਬਤੋ ਵੇਤ੍ਤਾਚਰਂ ਮਗ੍ਗਂ, ਸਙ੍ਕੁਕੇ ਖਾਣੁਕੇ ਕੋਟ੍ਟੇਤ੍ਵਾ ਗਨ੍ਤਬ੍ਬਤੋ ਸਙ੍ਕੁਪਥਂ ਮਗ੍ਗਂ, ਨਦਿਯੋ ਪਨ ਚਨ੍ਦਭਾਗਾਦਿਕਾ, ਪਬ੍ਬਤਾਨਞ੍ਚ ਵਿਸਮਪ੍ਪਦੇਸਾਤਿ ਏਵਂ ਦੁਗ੍ਗਾ ਪੁਥੁਦ੍ਦਿਸਾ ਭੋਗਨਿਮਿਤ੍ਤਂ ਗਚ੍ਛਥ, ਏਵਂ ਗਚ੍ਛਨ੍ਤਾ ਚ ਪਕ੍ਖਨ੍ਦਿਯਾਨ ਪਕ੍ਖਨ੍ਦਿਤ੍ਵਾ ਅਨੁਪਵਿਸਿਤ੍ਵਾ, ਪਰੇਸਂ ਰਾਜੂਨਂ ਵਿਜਿਤਂ ਤਤ੍ਥ ਵੇਰਜ੍ਜਕੇ ਵਿਦੇਸਵਾਸਿਕੇ ਮਨੁਸ੍ਸੇ ਪੇਕ੍ਖਮਾਨਾ ਗਚ੍ਛਥ, ਏਵਂਭੂਤੇਹਿ ਵੋ ਤੁਮ੍ਹੇਹਿ ਯਂ ਸੁਤਂ ਵਾ ਅਥ ਵਾ ਦਿਟ੍ਠਂ ਵਾ ਅਚ੍ਛੇਰਕਂ ਅਚ੍ਛਰਿਯਂ, ਤਂ ਵੋ ਸਨ੍ਤਿਕੇ ਤਾਤਾ ਵਾਣਿਜਾ ਸੁਣੋਮਾਤਿ ਅਤ੍ਤਨੋ ਵਿਮਾਨਸ੍ਸ ਅਚ੍ਛਰਿਯਭਾਵਂ ਤੇਹਿ ਕਥਾਪੇਤੁਕਾਮੋ ਪੁਚ੍ਛਤਿ.
ਏਵਂ ਦੇਵਪੁਤ੍ਤੇਨ ਪੁਟ੍ਠਾ ਵਾਣਿਜਾ ਆਹਂਸੁ –
੧੨੪੦. ‘‘ਇਤੋਪਿ ਅਚ੍ਛੇਰਤਰਂ ਕੁਮਾਰ, ਨ ਨੋ ਸੁਤਂ ਵਾ ਅਥ ਵਾਪਿ ਦਿਟ੍ਠਂ;
ਅਤੀਤਮਾਨੁਸਕਮੇਵ ਸਬ੍ਬਂ, ਦਿਸ੍ਵਾ ਨ ਤਪ੍ਪਾਮ ਅਨੋਮਵਣ੍ਣਂ.
੧੨੪੧. ‘‘ਵੇਹਾਯਸਂ ਪੋਕ੍ਖਰਞ੍ਞੋ ਸਵਨ੍ਤਿ, ਪਹੂਤਮਲ੍ਯਾ ਬਹੁਪੁਣ੍ਡਰੀਕਾ;
ਦੁਮਾ ਚਿਮੇ ਨਿਚ੍ਚਫਲੂਪਪਨ੍ਨਾ, ਅਤੀਵ ਗਨ੍ਧਾ ਸੁਰਭਿਂ ਪਵਾਯਨ੍ਤਿ.
੧੨੪੨. ‘‘ਵੇਲ਼ੂਰਿਯਥਮ੍ਭਾ ਸਤਮੁਸ੍ਸਿਤਾਸੇ, ਸਿਲਾਪਵਾਲ਼ਸ੍ਸ ਚ ਆਯਤਂਸਾ;
ਮਸਾਰਗਲ੍ਲਾ ਸਹਲੋਹਿਤਙ੍ਗਾ, ਥਮ੍ਭਾ ਇਮੇ ਜੋਤਿਰਸਾਮਯਾਸੇ.
੧੨੪੩. ‘‘ਸਹਸ੍ਸਥਮ੍ਭਂ ਅਤੁਲਾਨੁਭਾਵਂ, ਤੇਸੂਪਰਿ ਸਾਧੁਮਿਦਂ ਵਿਮਾਨਂ;
ਰਤਨਨ੍ਤਰਂ ਕਞ੍ਚਨਵੇਦਿਮਿਸ੍ਸਂ, ਤਪਨੀਯਪਟ੍ਟੇਹਿ ਚ ਸਾਧੁਛਨ੍ਨਂ.
੧੨੪੪. ‘‘ਜਮ੍ਬੋਨਦੁਤ੍ਤਤ੍ਤਮਿਦਂ ਸੁਮਟ੍ਠੋ, ਪਾਸਾਦਸੋਪਾਨਫਲੂਪਪਨ੍ਨੋ;
ਦਲ਼੍ਹੋ ਚ ਵਗ੍ਗੁ ਚ ਸੁਸਙ੍ਗਤੋ ਚ, ਅਤੀਵ ਨਿਜ੍ਝਾਨਖਮੋ ਮਨੁਞ੍ਞੋ.
੧੨੪੫. ‘‘ਰਤਨਨ੍ਤਰਸ੍ਮਿਂ ਬਹੁਅਨ੍ਨਪਾਨਂ, ਪਰਿਵਾਰਿਤੋ ਅਚ੍ਛਰਾਸਙ੍ਗਣੇਨ;
ਮੁਰਜਆਲਮ੍ਬਰਤੂਰਿਯਘੁਟ੍ਠੋ, ਅਭਿਵਨ੍ਦਿਤੋਸਿ ਥੁਤਿਵਨ੍ਦਨਾਯ.
੧੨੪੬. ‘‘ਸੋ ਮੋਦਸਿ ਨਾਰਿਗਣਪ੍ਪਬੋਧਨੋ, ਵਿਮਾਨਪਾਸਾਦਵਰੇ ਮਨੋਰਮੇ;
ਅਚਿਨ੍ਤਿਯੋ ਸਬ੍ਬਗੁਣੂਪਪਨ੍ਨੋ, ਰਾਜਾ ਯਥਾ ਵੇਸ੍ਸਵਣੋ ਨਲ਼ਿਨ੍ਯਾ.
੧੨੪੭. ‘‘ਦੇਵੋ ਨੁ ਆਸਿ ਉਦਵਾਸਿ ਯਕ੍ਖੋ,
ਉਦਾਹੁ ਦੇਵਿਨ੍ਦੋ ਮਨੁਸ੍ਸਭੂਤੋ;
ਪੁਚ੍ਛਨ੍ਤਿ ਤਂ ਵਾਣਿਜਾ ਸਤ੍ਥਵਾਹਾ,
ਆਚਿਕ੍ਖ ਕੋ ਨਾਮ ਤੁਵਂਸਿ ਯਕ੍ਖੋ’’ਤਿ.
੧੨੪੦-੨. ਤਤ੍ਥ ਕੁਮਾਰਾਤਿ ਪਠਮਵਯੇ ਠਿਤਤ੍ਤਾ ਦੇਵਪੁਤ੍ਤਂ ਆਲਪਤਿ. ਸਬ੍ਬਨ੍ਤਿ ਦੇਵਪੁਤ੍ਤਂ ਤਸ੍ਸ ਵਿਮਾਨਪਟਿਬਦ੍ਧਞ੍ਚ ਸਨ੍ਧਾਯ ਵਦਤਿ. ਪੋਕ੍ਖਰਞ੍ਞੋਤਿ ਪੋਕ੍ਖਰਣਿਯੋ. ਸਤਮੁਸ੍ਸਿਤਾਸੇਤਿ ਸਤਰਤਨੁਬ੍ਬੇਧਾ. ਸਿਲਾਪਵਾਲ਼ਸ੍ਸਾਤਿ ਸਿਲਾਯ ਪਵਾਲ਼ਸ੍ਸ ਚ, ਸਿਲਾਮਯਾ ਪਵਾਲ਼ਮਯਾਤਿ ਅਤ੍ਥੋ. ਆਯਤਂਸਾਤਿ ਦੀਘਂਸਾ. ਅਥ ਵਾ ਆਯਤਾ ਹੁਤ੍ਵਾ ਅਟ੍ਠਸੋਲ਼ਸਦ੍ਵਤ੍ਤਿਂਸਾਦਿਅਂਸਵਨ੍ਤੋ.
੧੨੪੨. ਤੇਸੂਪਰੀਤਿ ਤੇਸਂ ਥਮ੍ਭਾਨਂ ਉਪਰਿ. ਸਾਧੁਮਿਦਨ੍ਤਿ ਸੁਨ੍ਦਰਂ ਇਦਂ ਤਵ ਵਿਮਾਨਂ. ਰਤਨਨ੍ਤਰਨ੍ਤਿ ਰਤਨਨ੍ਤਰਵਨ੍ਤਂ, ਭਿਤ੍ਤਿਥਮ੍ਭਸੋਪਾਨਾਦੀਸੁ ਨਾਨਾਵਿਧੇਹਿ ਅਞ੍ਞੇਹਿ ਰਤਨੇਹਿ ਯੁਤ੍ਤਂ. ਕਞ੍ਚਨਵੇਦਿਮਿਸ੍ਸਨ੍ਤਿ ਸੁਵਣ੍ਣਮਯਾਯ ਵੇਦਿਕਾਯ ਸਹਿਤਂ ਪਰਿਕ੍ਖਿਤ੍ਤਂ. ਤਪਨੀਯਪਟ੍ਟੇਹਿ ਚ ਸਾਧੁਛਨ੍ਨਨ੍ਤਿ ਤਪਨੀਯਮਯੇਹਿ ਅਨੇਕਰਤਨਮਯੇਹਿ ਚ ਛਦਨੇਹਿ ਤਤ੍ਥ ਤਤ੍ਥ ਸੁਟ੍ਠੁ ਛਾਦਿਤਂ.
੧੨੪੪. ਜਮ੍ਬੋਨਦੁਤ੍ਤਤ੍ਤਮਿਦਨ੍ਤਿ ਇਦਂ ਤਵ ਵਿਮਾਨਂ ਯੇਭੁਯ੍ਯੇਨ ਉਤ੍ਤਤ੍ਤਜਮ੍ਬੁਨਦਭਾਸੁਰਂ. ਸੁਮਟ੍ਠੋ ਪਾਸਾਦਸੋਪਾਨਫਲੂਪਪਨ੍ਨੋਤਿ ਤਸ੍ਸ ਚ ਸੋ ਸੋ ਪਦੇਸੋ ਸੁਮਟ੍ਠੋ ਸੁਟ੍ਠੁ ਮਜ੍ਜਿਤੋ, ਤੇਹਿ ਤੇਹਿ ਅਨਨ੍ਤਰਪਾਸਾਦੇਹਿ ਸੋਪਾਨਵਿਸੇਸੇਹਿ ਰਮਣੀਯੇਹਿ ਫਲਕੇਹਿ ਚ ਯੁਤ੍ਤੋ. ਦਲ਼੍ਹੋਤਿ ਥਿਰੋ. ਵਗ੍ਗੂਤਿ ਅਭਿਰੂਪੋ ਸਮੁਗ੍ਗਤੋ. ਸੁਸਙ੍ਗਤੋਤਿ ਸੁਟ੍ਠੁ ਸਙ੍ਗਤਾਵਯਵੋ ਅਞ੍ਞਮਞ੍ਞਾਨੁਰੂਪਪਾਸਾਦਾਵਯਵੋ. ਅਤੀਵ ਨਿਜ੍ਝਾਨਖਮੋਤਿ ਪਭਸ੍ਸਰਭਾਵੇਪਿ ਅਤਿਵਿਯ ਓਲੋਕਨਕ੍ਖਮੋ. ਮਨੁਞ੍ਞੋਤਿ ਮਨੋਰਮੋ.
੧੨੪੫. ਰਤਨਨ੍ਤਰਸ੍ਮਿਨ੍ਤਿ ਰਤਨਮਯੇ, ਰਤਨਭੂਤੇ ਵਾ ਸਾਰਭੂਤੇ ਵਿਮਾਨਸ੍ਸ ਅਬ੍ਭਨ੍ਤਰੇ. ਬਹੁਅਨ੍ਨਪਾਨਨ੍ਤਿ ਪੇਸਲਂ ਪਹੂਤਂ ਅਨ੍ਨਞ੍ਚ ਪਾਨਞ੍ਚ ਵਿਜ੍ਜਤਿ, ਉਪਲਬ੍ਭਤੀਤਿ ਅਧਿਪ੍ਪਾਯੋ. ਮੁਰਜਆਲਮ੍ਬਰਤੂਰਿਯਘੁਟ੍ਠੋਤਿ ਮੁਦਿਙ੍ਗਾਨਂ ਆਲਮ੍ਬਰਾਨਂ ਅਵਸਿਟ੍ਠਤੂਰਿਯਾਨਞ੍ਚ ਸਦ੍ਦੇਹਿ ਨਿਚ੍ਚਘੋਸਿਤੋ. ਅਭਿਵਨ੍ਦਿਤੋਸੀਤਿ ਨਮਸ੍ਸਿਤੋ, ਥੋਮਿਤੋ ਵਾ ਅਸਿ. ਤੇਨਾਹ ‘‘ਥੂਤਿਵਨ੍ਦਨਾਯਾ’’ਤਿ.
੧੨੪੬. ਅਚਿਨ੍ਤਿਯੋਤਿ ਅਚਿਨ੍ਤੇਯ੍ਯਾਨੁਭਾਵੋ. ਨਲ਼ਿਨ੍ਯਾਤਿ ਏਵਂਨਾਮਕੇ ਕੀਲ਼ਨਟ੍ਠਾਨੇ ਯਥਾ ਵੇਸ੍ਸਵਣੋ ਮਹਾਰਾਜਾ, ਏਵਂ ਤ੍ਵਂ ਮੋਦਸੀਤਿ ਯੋਜਨਾ.
੧੨੪੭. ਆਸੀਤਿ ਅਸਿ ਭਵਸਿ. ਦੇਵਿਨ੍ਦੋਤਿ ਸਕ੍ਕੋ ਦੇਵਰਾਜਾ. ਮਨੁਸ੍ਸਭੂਤੋਤਿ ਮਨੁਸ੍ਸੇਸੁ ਭੂਤੋ ਮਨੁਸ੍ਸਜਾਤਿਕੋ. ਯਕ੍ਖੋਤਿ ਦੇਵਾਦਿਭਾਵਂ ਪੁਚ੍ਛਿਤ੍ਵਾਪਿ ਯਕ੍ਖਭਾਵਂ ਆਸਙ੍ਕਨ੍ਤਾ ਵਦਨ੍ਤਿ.
ਇਦਾਨਿ ਸੋ ਦੇਵਪੁਤ੍ਤੋ ਅਤ੍ਤਾਨਂ ਜਾਨਾਪੇਨ੍ਤੋ –
੧੨੪੮. ‘‘ਸੇਰੀਸਕੋ ਨਾਮ ਅਹਮ੍ਹਿ ਯਕ੍ਖੋ, ਕਨ੍ਤਾਰਿਯੋ ਵਣ੍ਣੁਪਥਮ੍ਹਿ ਗੁਤ੍ਤੋ;
ਇਮਂ ਪਦੇਸਂ ਅਭਿਪਾਲਯਾਮਿ, ਵਚਨਕਰੋ ਵੇਸ੍ਸਵਣਸ੍ਸ ਰਞ੍ਞੋ’’ਤਿ. –
ਆਹ. ਤਤ੍ਥ ਅਹਮ੍ਹੀ ਯਕ੍ਖੋਤਿ ਅਹਂ ਯਕ੍ਖੋ ਅਮ੍ਹਿ. ਕਨ੍ਤਾਰਿਯੋਤਿ ਆਰਕ੍ਖਣਤ੍ਥਂ ਕਨ੍ਤਾਰੇ ਨਿਯੁਤ੍ਤੋ. ਗੁਤ੍ਤੋਤਿ ਗੋਪਕੋ. ਤੇਨਾਹ ‘‘ਅਭਿਪਾਲਯਾਮੀ’’ਤਿ.
ਇਦਾਨਿ ਵਾਣਿਜਾ ਤਸ੍ਸ ਕਮ੍ਮਾਦੀਨਿ ਪੁਚ੍ਛਨ੍ਤਾ ਆਹਂਸੁ –
੧੨੪੯. ‘‘ਅਧਿਚ੍ਚਲਦ੍ਧਂ ਪਰਿਣਾਮਜਂ ਤੇ, ਸਯਂਕਤਂ ਉਦਾਹੁ ਦੇਵੇਹਿ ਦਿਨ੍ਨਂ;
ਪੁਚ੍ਛਨ੍ਤਿ ਤਂ ਵਾਣਿਜਾ ਸਤ੍ਥਵਾਹਾ, ਕਥਂ ਤਯਾ ਲਦ੍ਧਮਿਦਂ ਮਨੁਞ੍ਞ’’ਨ੍ਤਿ.
ਤਤ੍ਥ ਅਧਿਚ੍ਚਲਦ੍ਧਨ੍ਤਿ ਅਧਿਚ੍ਚਸਮੁਪ੍ਪਤ੍ਤਿਕਂ, ਯਦਿਚ੍ਛਕਂ ਲਦ੍ਧਨ੍ਤਿ ਅਤ੍ਥੋ. ਪਰਿਣਾਮਜਂ ਤੇਤਿ ਨਿਯਤਿਸਙ੍ਗਤਿਭਾਵਪਰਿਣਤਂ, ਕਾਲਪਰਿਣਤਂ ਵਾ. ਸਯਂਕਤਨ੍ਤਿ ਤਯਾ ਸਯਮੇਵ ਕਤਂ, ਦੇਵਿਦ੍ਧਿਯਾ ਤਯਾ ਸਯਮੇਵ ਨਿਬ੍ਬਤ੍ਤਿਤਨ੍ਤਿ ਅਤ੍ਥੋ. ਉਦਾਹੁ ਦੇਵੇਹਿ ਦਿਨ੍ਨਨ੍ਤਿ ਤਯਾ ਆਰਾਧਿਤੇਹਿ ਦੇਵੇਹਿ ਪਸਾਦਵਸੇਨ ਨਿਸ੍ਸਟ੍ਠਂ.
ਇਦਾਨਿ ਦੇਵਪੁਤ੍ਤੋ ਚਤੁਰੋਪਿ ਪਕਾਰੇ ਪਟਿਕ੍ਖਿਪਿਤ੍ਵਾ ਪੁਞ੍ਞਮੇਵ ਅਪਦਿਸਨ੍ਤੋ –
੧੨੫੦. ‘‘ਨਾਧਿਚ੍ਚਲਦ੍ਧਂ ਨ ਪਰਿਣਾਮਜਂ ਮੇ, ਨ ਸਯਂਕਤਂ ਨ ਹਿ ਦੇਵੇਹਿ ਦਿਨ੍ਨਂ;
ਸਕੇਹਿ ਕਮ੍ਮੇਹਿ ਅਪਾਪਕੇਹਿ, ਪੁਞ੍ਞੇਹਿ ਮੇ ਲਦ੍ਧਮਿਦਂ ਮਨੁਞ੍ਞ’’ਨ੍ਤਿ. –
ਗਾਥਮਾਹ.
ਤਂ ਸੁਤ੍ਵਾ ਵਾਣਿਜਾ ਪੁਨ ‘‘ਨਾਧਿਚ੍ਚਲਦ੍ਧ’’ਨ੍ਤਿ ਗਾਥਾਯਂ ਪੁਞ੍ਞਾਧਿਕਮੇਵ ਤੇ ਚਤੁਰੋ ਪਕਾਰੇ ਆਰੋਪੇਤ੍ਵਾ ਪੁਞ੍ਞਸ੍ਸ ਚ ਸਰੂਪਂ ਪੁਚ੍ਛਿਂਸੁ –
੧੨੫੧. ‘‘ਕਿਂ ਤੇ ਵਤਂ ਕਿਂ ਪਨ ਬ੍ਰਹ੍ਮਚਰਿਯਂ, ਕਿਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;
ਪੁਚ੍ਛਨ੍ਤਿ ਤਂ ਵਾਣਿਜਾ ਸਤ੍ਥਵਾਹਾ, ਕਥਂ ਤਯਾ ਲਦ੍ਧਮਿਦਂ ਵਿਮਾਨ’’ਨ੍ਤਿ.
ਤਤ੍ਥ ਵਤਨ੍ਤਿ ਵਤਸਮਾਦਾਨਂ. ਬ੍ਰਹ੍ਮਚਰਿਯਨ੍ਤਿ ਸੇਟ੍ਠਚਰਿਯਂ.
ਪੁਨ ਦੇਵਪੁਤ੍ਤੋ ਤੇ ਪਟਿਕ੍ਖਿਪਿਤ੍ਵਾ ਅਤ੍ਤਾਨਂ ਯਥੂਪਚਿਤਂ ਪੁਞ੍ਞਞ੍ਚ ਦਸ੍ਸੇਨ੍ਤੋ –
੧੨੫੨. ‘‘ਮਮਂ ਪਾਯਾਸੀਤਿ ਅਹੁ ਸਮਞ੍ਞਾ, ਰਜ੍ਜਂ ਯਦਾ ਕਾਰਯਿਂ ਕੋਸਲਾਨਂ;
ਨਤ੍ਥਿਕਦਿਟ੍ਠਿ ਕਦਰਿਯੋ ਪਾਪਧਮ੍ਮੋ, ਉਚ੍ਛੇਦਵਾਦੀ ਚ ਤਦਾ ਅਹੋਸਿਂ.
੧੨੫੩. ‘‘ਸਮਣੋ ਚ ਖੋ ਆਸਿ ਕੁਮਾਰਕਸ੍ਸਪੋ, ਬਹੁਸ੍ਸੁਤੋ ਚਿਤ੍ਤਕਥੀ ਉਲ਼ਾਰੋ;
ਸੋ ਮੇ ਤਦਾ ਧਮ੍ਮਕਥਂ ਅਭਾਸਿ, ਦਿਟ੍ਠਿਵਿਸੂਕਾਨਿ ਵਿਨੋਦਯੀ ਮੇ.
੧੨੫੪. ‘‘ਤਾਹਂ ਤਸ੍ਸ ਧਮ੍ਮਕਥਂ ਸੁਣਿਤ੍ਵਾ, ਉਪਾਸਕਤ੍ਤਂ ਪਟਿਵੇਦਯਿਸ੍ਸਂ;
ਪਾਣਾਤਿਪਾਤਾ ਵਿਰਤੋ ਅਹੋਸਿਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਿਸ੍ਸਂ;
ਅਮਜ੍ਜਪੋ ਨੋ ਚ ਮੁਸਾ ਅਭਾਣਿਂ, ਸਕੇਨ ਦਾਰੇਨ ਚ ਅਹੋਸਿਂ ਤੁਟ੍ਠੋ.
੧੨੫੫. ‘‘ਤਂ ਮੇ ਵਤਂ ਤਂ ਪਨ ਬ੍ਰਹ੍ਮਚਰਿਯਂ, ਤਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;
ਤੇਹੇਵ ਕਮ੍ਮੇਹਿ ਅਪਾਪਕੇਹਿ, ਪੁਞ੍ਞੇਹਿ ਮੇ ਲਦ੍ਧਮਿਦਂ ਵਿਮਾਨ’’ਨ੍ਤਿ. –
ਆਹ. ਤਂ ਸੁਵਿਞ੍ਞੇਯ੍ਯਮੇਵ.
ਅਥ ਵਾਣਿਜਾ ਦੇਵਪੁਤ੍ਤਂ ਵਿਮਾਨਞ੍ਚਸ੍ਸ ਪਚ੍ਚਕ੍ਖਤੋ ਦਿਸ੍ਵਾ ਕਮ੍ਮਫਲਂ ਸਦ੍ਦਹਿਤ੍ਵਾ ਅਤ੍ਤਨੋ ਕਮ੍ਮਫਲੇ ਸਦ੍ਧਂ ਪਵੇਦੇਨ੍ਤਾ –
੧੨੫੬. ‘‘ਸਚ੍ਚਂ ਕਿਰਾਹਂਸੁ ਨਰਾ ਸਪਞ੍ਞਾ, ਅਨਞ੍ਞਥਾ ਵਚਨਂ ਪਣ੍ਡਿਤਾਨਂ;
ਯਹਿਂ ਯਹਿਂ ਗਚ੍ਛਤਿ ਪੁਞ੍ਞਕਮ੍ਮੋ, ਤਹਿਂ ਤਹਿਂ ਮੋਦਤਿ ਕਾਮਕਾਮੀ.
੧੨੫੭. ‘‘ਯਹਿਂ ਯਹਿਂ ਸੋਕਪਰਿਦ੍ਦਵੋ ਚ, ਵਧੋ ਚ ਬਨ੍ਧੋ ਚ ਪਰਿਕ੍ਕਿਲੇਸੋ;
ਤਹਿਂ ਤਹਿਂ ਗਚ੍ਛਤਿ ਪਾਪਕਮ੍ਮੋ, ਨ ਮੁਚ੍ਚਤਿ ਦੁਗ੍ਗਤਿਯਾ ਕਦਾਚੀ’’ਤਿ. –
ਗਾਥਾਦ੍ਵਯਂ ਅਵੋਚੁਂ. ਤਤ੍ਥ ਸੋਕਪਰਿਦ੍ਦਵੋਤਿ ਸੋਕੋ ਚ ਪਰਿਦੇਵੋ ਚ. ਪਰਿਕ੍ਕਿਲੇਸੋਤਿ ਵੁਤ੍ਤਾ ਅਨਤ੍ਥੁਪ੍ਪਤ੍ਤਿ.
ਏਵਂ ਤੇਸੁ ਕਥੇਨ੍ਤੇਸੁਯੇਵ ਵਿਮਾਨਦ੍ਵਾਰੇ ਸਿਰੀਸਰੁਕ੍ਖਤੋ ਪਰਿਪਾਕੇਨ ਮੁਤ੍ਤਬਨ੍ਧਨਾ ਪਰਿਪਕ੍ਕਾ ਸਿਪਾਟਿਕਾ ਪਤਿ, ਤੇਨ ਦੇਵਪੁਤ੍ਤੋ ਸਪਰਿਜਨੋ ਦੋਮਨਸ੍ਸਪ੍ਪਤ੍ਤੋ ਅਹੋਸਿ. ਤਂ ਦਿਸ੍ਵਾ ਵਾਣਿਜਾ –
੧੨੫੮. ‘‘ਸਮ੍ਮੂਲ਼੍ਹਰੂਪੋਵ ਜਨੋ ਅਹੋਸਿ, ਅਸ੍ਮਿਂ ਮੁਹੁਤ੍ਤੇ ਕਲਲੀਕਤੋਵ;
ਜਨਸ੍ਸਿਮਸ੍ਸ ਤੁਯ੍ਹਞ੍ਚ ਕੁਮਾਰ, ਅਪ੍ਪਚ੍ਚਯੋ ਕੇਨ ਨੁ ਖੋ ਅਹੋਸੀ’’ਤਿ. –
ਗਾਥਮਾਹਂਸੁ. ਤਤ੍ਥ ਸਮ੍ਮੂਲ਼੍ਹਰੂਪੋਵਾਤਿ ਸੋਕਵਸੇਨ ਸਬ੍ਬਸੋ ਮੂਲ਼੍ਹਸਭਾਵੋ ਵਿਯ. ਜਨੋਤਿ ਦੇਵਜਨੋ. ਅਸ੍ਮਿਂ ਮੁਹੁਤ੍ਤੇਤਿ ਇਮਸ੍ਮਿਂ ਮੁਹੁਤ੍ਤਮਤ੍ਤੇ. ਕਲਲੀਕਤੋਤਿ ਕਲਲਂ ਵਿਯ ਕਤੋ, ਕਲਲਨਿਸ੍ਸਿਤਉਦਕੀਭੂਤੋ ਵਿਯ ਆਵਿਲੋਤਿ ਅਧਿਪ੍ਪਾਯੋ. ਜਨਸ੍ਸਿਮਸ੍ਸ ਤੁਯ੍ਹਞ੍ਚਾਤਿ ਇਮਸ੍ਸ ਤਵ ਪਰਿਜਨਸ੍ਸ ਤੁਯ੍ਹਞ੍ਚ. ਅਪ੍ਪਚ੍ਚਯੋਤਿ ਦੋਮਨਸ੍ਸਂ.
ਤਂ ਸੁਤ੍ਵਾ ਦੇਵਪੁਤ੍ਤੋ –
੧੨੫੯. ‘‘ਇਮੇ ਚ ਸਿਰੀਸਵਨਾ ਤਾਤਾ, ਦਿਬ੍ਬਾ ਗਨ੍ਧਾ ਸੁਰਭੀ ਸਮ੍ਪਵਨ੍ਤਿ;
ਤੇ ਸਮ੍ਪਵਾਯਨ੍ਤਿ ਇਮਂ ਵਿਮਾਨਂ, ਦਿਵਾ ਚ ਰਤ੍ਤੋ ਚ ਤਮਂ ਨਿਹਨ੍ਤ੍ਵਾ.
੧੨੬੦. ‘‘ਇਮੇਸਞ੍ਚ ਖੋ ਵਸ੍ਸਸਤਚ੍ਚਯੇਨ, ਸਿਪਾਟਿਕਾ ਫਲਤਿ ਏਕਮੇਕਾ;
ਮਾਨੁਸ੍ਸਕਂ ਵਸ੍ਸਸਤਂ ਅਤੀਤਂ, ਯਦਗ੍ਗੇ ਕਾਯਮ੍ਹਿ ਇਧੂਪਪਨ੍ਨੋ.
੧੨੬੧. ‘‘ਦਿਸ੍ਵਾਨਹਂ ਵਸ੍ਸਸਤਾਨਿ ਪਞ੍ਚ,
ਅਸ੍ਮਿਂ ਵਿਮਾਨੇ ਠਤ੍ਵਾਨ ਤਾਤਾ;
ਆਯੁਕ੍ਖਯਾ ਪੁਞ੍ਞਕ੍ਖਯਾ ਚਵਿਸ੍ਸਂ,
ਤੇਨੇਵ ਸੋਕੇਨ ਪਮੁਚ੍ਛਿਤੋਸ੍ਮੀ’’ਤਿ. – ਆਹ;
੧੨੫੬. ਤਤ੍ਥ ਸਿਰੀਸਵਨਾਤਿ ਸਿਰੀਸਵਿਪਿਨਤੋ. ਤਾਤਾਤਿ ਵਾਣਿਜੇ ਆਲਪਤਿ. ਇਮੇ ਤੁਮ੍ਹਾਕਂ ਮਯ੍ਹਞ੍ਚ ਪਚ੍ਚਕ੍ਖਭੂਤਾ ਦਿਬ੍ਬਾ ਗਨ੍ਧਾ ਸੁਰਭੀ ਅਤਿਵਿਯ ਸੁਗਨ੍ਧਾਯੇਵ ਸਮਨ੍ਤਤੋ ਪਵਨ੍ਤਿ ਪਵਾਯਨ੍ਤਿ. ਤੇ ਦਿਬ੍ਬਾ ਗਨ੍ਧਾ ਏਵਂ ਵਾਯਨ੍ਤਾ ਇਮਂ ਵਿਮਾਨਂ ਸਮ੍ਪਵਾਯਨ੍ਤਿ ਸਮ੍ਮਦੇਵ ਗਨ੍ਧਂ ਗਾਹਾਪੇਨ੍ਤਿ, ਨ ਕੇਵਲਂ ਸਮ੍ਪਵਾਯਨਮੇਵ, ਅਥ ਖੋ ਅਤ੍ਤਨੋ ਪਭਾਯ ਤਮਮ੍ਪਿ ਨਿਹਨ੍ਤਿ. ਤੇਨਾਹ ‘‘ਦਿਵਾ ਚ ਰਤ੍ਤੋ ਚ ਤਮਂ ਨਿਹਨ੍ਤ੍ਵਾ’’ਤਿ.
੧੨੬੦-੬੧. ਇਮੇਸਨ੍ਤਿ ਸਿਰੀਸਾਨਂ. ਸਿਪਾਟਿਕਾਤਿ ਫਲਕੁਟ੍ਠਿਲਿਕਾ. ਫਲਤੀਤਿ ਪਚ੍ਚਿਤ੍ਵਾ ਵਣ੍ਟਤੋ ਮੁਚ੍ਚਤਿ, ਪੁਟਭੇਦਂ ਵਾ ਪਤ੍ਵਾ ਸਿਸ੍ਸਤਿ. ਮਾਨੁਸ੍ਸਕਂ ਵਸ੍ਸਸਤਂ ਅਤੀਤਨ੍ਤਿ ਯਸ੍ਮਾ ਵਸ੍ਸਸਤਸ੍ਸ ਅਚ੍ਚਯੇਨ ਇਮਸ੍ਸ ਸਿਰੀਸਸ੍ਸ ਸਿਪਾਟਿਕਾ ਫਲਤਿ, ਅਯਞ੍ਚ ਫਲਿਤਾ, ਤਸ੍ਮਾ ਮਯ੍ਹਂ ਮਾਨੁਸ੍ਸਕਂ ਵਸ੍ਸਸਤਂ ਅਤੀਤਂ. ਯਦਗ੍ਗੇ ਯਤੋ ਪਟ੍ਠਾਯ, ਕਾਯਮ੍ਹਿ ਇਧ ਇਮਸ੍ਮਿਂ ਦੇਵਨਿਕਾਯੇ ਉਪਪਨ੍ਨੋ ਨਿਬ੍ਬਤ੍ਤੋ. ਮਯ੍ਹਞ੍ਚ ਦੇਵਗਣਨਾਯ ਪਞ੍ਚ ਵਸ੍ਸਸਤਾਨਿ ਆਯੁ, ਤਸ੍ਮਾ ਖੀਯਤਿ ਮੇ ਆਯੂਤਿ ਸੋਕਵਸੇਨ ਸਮ੍ਪਮੂਲ਼੍ਹੋਤਿ ਦਸ੍ਸੇਤਿ. ਤੇਨਾਹ ‘‘ਦਿਸ੍ਵਾਨਹਂ ਵਸ੍ਸਸਤਾਨਿ ਪਞ੍ਚ…ਪੇ… ਤੇਨੇਵ ਸੋਕੇਨ ਪਮੁਚ੍ਛਿਤੋਸ੍ਮੀ’’ਤਿ.
ਅਥ ਨਂ ਵਾਣਿਜਾ ਸਮਸ੍ਸਾਸੇਨ੍ਤੋ –
੧੨੬੨. ‘‘ਕਥਂ ਨੁ ਸੋਚੇਯ੍ਯ ਤਥਾਵਿਧੋ ਸੋ, ਲਦ੍ਧਾ ਵਿਮਾਨਂ ਅਤੁਲਂ ਚਿਰਾਯ;
ਯੇ ਚਾਪਿ ਖੋ ਇਤ੍ਤਰਮੁਪਪਨ੍ਨਾ, ਤੇ ਨੂਨ ਸੋਚੇਯ੍ਯੁਂ ਪਰਿਤ੍ਤਪੁਞ੍ਞਾ’’ਤਿ. –
ਆਹਂਸੁ. ਤਤ੍ਥ ਯਾਦਿਸੇਹਿ ਅਪ੍ਪਾਯੁਕੇਹਿ ਮਰਣਂ ਪਟਿਚ੍ਚ ਸੋਚਿਤਬ੍ਬਂ ਸਿਯਾ, ਤਾਦਿਸੋ ਪਨ ਏਵਂ ਦਿਬ੍ਬਾਨੁਭਾਵਸਮ੍ਪਨ੍ਨੋ ਨਵੁਤਿਵਸ੍ਸਸਤਸਹਸ੍ਸਾਯੁਕੋ ਕਥਂ ਨੁ ਸੋਚੇਯ੍ਯ, ਨ ਸੋਚਿਤਬ੍ਬਮੇਵਾਤਿ ਅਧਿਪ੍ਪਾਯੋ.
ਦੇਵਪੁਤ੍ਤੋ ਤਤ੍ਤਕੇਨੇਵ ਸਮਸ੍ਸਾਸੇਤ੍ਵਾ ਤੇਸਂ ਵਚਨਂ ਸਮ੍ਪਟਿਚ੍ਛਨ੍ਤੋ ਤੇਸਞ੍ਚ ਉਪਦੇਸਂ ਦੇਨ੍ਤੋ –
੧੨੬੩. ‘‘ਅਨੁਚ੍ਛਵਿਂ ਓਵਦਿਯਞ੍ਚ ਮੇਤਂ, ਯਂ ਮਂ ਤੁਮ੍ਹੇ ਪੇਯ੍ਯਵਾਚਂ ਵਦੇਥ;
ਤੁਮ੍ਹੇ ਚ ਖੋ ਤਾਤਾ ਮਯਾਨੁਗੁਤ੍ਤਾ, ਯੇਹਿਚ੍ਛਕਂ ਤੇਨ ਪਲੇਥ ਸੋਤ੍ਥਿ’’ਨ੍ਤਿ. –
ਗਾਥਮਾਹ. ਤਤ੍ਥ ਅਨੁਚ੍ਛਵਿਨ੍ਤਿ ਅਨੁਚ੍ਛਵਿਕਂ, ਤੁਮ੍ਹਾਕਮੇਵ ਤਂ ਯੁਤ੍ਤਰੂਪਂ. ਓਵਦਿਯਞ੍ਚ ਮੇਤਨ੍ਤਿ ਮੇ ਮਯ੍ਹਂ ਤੁਮ੍ਹੇਹਿ ਓਵਦਿਯਂ ਓਵਾਦਵਸੇਨ ਵਤ੍ਤਬ੍ਬਮੇਤਂ. ਯਂ ਯਸ੍ਮਾ, ਮਂ ਮਯ੍ਹਂ, ਤੁਮ੍ਹੇ ‘‘ਕਥਂ ਨੁ ਸੋਚੇਯ੍ਯ’’ਨ੍ਤਿਆਦਿਨਾ ਪੇਯ੍ਯਵਾਚਂ ਪਿਯਵਚਨਂ ਵਦੇਥ. ਯਂ ਵਾ ਪੇਯ੍ਯਵਾਚਾਯ ਵਦਨਂ ਕਥਨਂ, ਤਂ ਤੁਮ੍ਹਾਕਮੇਵ ਅਨੁਚ੍ਛਵਿਕਨ੍ਤਿ ਯੋਜਨਾ. ਅਥ ਵਾ ਯਂ ਯਸ੍ਮਾ ਤੁਮ੍ਹੇ ਪੇਯ੍ਯਵਾਚਂ ਵਦੇਥ, ਤਸ੍ਮਾ ਅਨੁਚ੍ਛਵਿਕਂ ਓਵਦਿਯਞ੍ਚ ਓਵਦਿਤਬ੍ਬਂ ਓਵਾਦਾਨੁਰੂਪਂ ਕਾਤਬ੍ਬਞ੍ਚ ਮੇ ਮਯਾ ਕਤਂ, ਕਿਂ ਪਨ ਤਨ੍ਤਿ ਆਹ ‘‘ਤੁਮ੍ਹੇ ਚ ਖੋ ਤਾਤਾ’’ਤਿਆਦਿ. ਤਤ੍ਥ ਮਯਾਨੁਗੁਤ੍ਤਾਤਿ ਇਮਸ੍ਮਿਂ ਅਮਨੁਸ੍ਸਪਰਿਗ੍ਗਹੇ ਮਰੁਕਨ੍ਤਾਰੇ ਯਾਵ ਕਨ੍ਤਾਰਾਤਿਕ੍ਕਮਾ ਮਯਾ ਅਨੁਗੁਤ੍ਤਾ ਰਕ੍ਖਿਤਾ, ਯੇਨਿਚ੍ਛਕਂ ਯਥਾਰੁਚਿਤੇਨ, ਸੋਤ੍ਥਿਂ ਖੇਮੇਨ, ਪਲੇਥ ਗਚ੍ਛਥਾਤਿ ਅਤ੍ਥੋ.
ਅਥ ਵਾਣਿਜਾ ਕਤਞ੍ਞੁਭਾਵਂ ਪਕਾਸੇਨ੍ਤਾ –
੧੨੬੪. ‘‘ਗਨ੍ਤ੍ਵਾ ਮਯਂ ਸਿਨ੍ਧੁਸੋਵੀਰਭੂਮਿਂ, ਧਨਤ੍ਥਿਕਾ ਉਦ੍ਦਯਂ ਪਤ੍ਥਯਾਨਾ;
ਯਥਾਪਯੋਗਾ ਪਰਿਪੁਣ੍ਣਚਾਗਾ, ਕਾਹਾਮ ਸੇਰੀਸਮਹਂ ਉਲ਼ਾਰਨ੍ਤਿ. –
ਗਾਥਮਾਹਂਸੁ. ਤਤ੍ਥ ਯਥਾਪਯੋਗਾਤਿ ਇਦਾਨਿ ਕਤਪਟਿਞ੍ਞਾਨੁਰੂਪਪਯੋਗਾ. ਪਰਿਪੁਣ੍ਣਚਾਗਾਤਿ ਸਮਤ੍ਤਚਾਗਾ, ਉਲ਼ਾਰਸ੍ਸ ਮਹਸ੍ਸ ਪਰਿਯਤ੍ਤਪਰਿਚ੍ਚਾਗਾ. ਮਹਨ੍ਤਿ ਉਸ੍ਸਵਪੂਜਂ.
ਪੁਨ ਦੇਵਪੁਤ੍ਤੋ ਮਹਕਰਣਂ ਪਟਿਕ੍ਖਿਪਨ੍ਤੋ ਕਤ੍ਤਬ੍ਬੇਸੁ ਚ ਤੇ ਨਿਯੋਜੇਨ੍ਤੋ –
੧੨੬੫. ‘‘ਮਾ ਚੇਵ ਸੇਰੀਸਮਹਂ ਅਕਤ੍ਥ, ਸਬ੍ਬਞ੍ਚ ਵੋ ਭਵਿਸ੍ਸਤਿ ਯਂ ਵਦੇਥ;
ਪਾਪਾਨਿ ਕਮ੍ਮਾਨਿ ਵਿਵਜ੍ਜਯਾਥ, ਧਮ੍ਮਾਨੁਯੋਗਞ੍ਚ ਅਧਿਟ੍ਠਹਾਥਾ’’ਤਿ. –
ਗਾਥਮਾਹ. ਤਤ੍ਥ ਯਂ ਵਦੇਥਾਤਿ ਯਂ ਤੁਮ੍ਹੇ ਖੇਮੇਨ ਸਿਨ੍ਧੁਸੋਵੀਰਦੇਸਪਤ੍ਤਿਂ ਤਤ੍ਥ ਚ ਵਿਪੁਲਂ ਉਦ੍ਦਯਂ ਲਾਭਂ ਪਚ੍ਚਾਸੀਸਨ੍ਤਾ ‘‘ਗਨ੍ਤ੍ਵਾ ਮਯ’’ਨ੍ਤਿਆਦੀਨਿ ਵਦਥ. ਸਬ੍ਬਂ ਤਂ ਵੋ ਤੁਮ੍ਹਾਕਂ ਤਥੇਵ ਭਵਿਸ੍ਸਤਿ, ਤਤ੍ਥ ਨਿਕ੍ਕਙ੍ਖਾ ਹੋਥ, ਤੁਮ੍ਹੇ ਪਨ ਇਤੋ ਪਟ੍ਠਾਯ ਪਾਪਾਨਿ ਕਮ੍ਮਾਨਿ ਪਾਣਾਤਿਪਾਤਾਦੀਨਿ ਵਿਵਜ੍ਜਯਾਥ ਪਰਿਵਜ੍ਜੇਥ. ਧਮ੍ਮਾਨੁਯੋਗਨ੍ਤਿ ਦਾਨਾਦਿਕੁਸਲਧਮ੍ਮਸ੍ਸ ਅਨੁਯੁਞ੍ਜਨਂ. ਅਧਿਟ੍ਠਹਾਥਾਤਿ ਅਨੁਸਿਕ੍ਖਥ ਇਦਂ ਸੇਰੀਸਕਮਹਨ੍ਤਿ ਦਸ੍ਸੇਤਿ.
ਯਂ ਪਨ ਉਪਾਸਕਂ ਅਨੁਗ੍ਗਣ੍ਹਨ੍ਤੋ ਤੇਸਂ ਰਕ੍ਖਾਵਰਣਂ ਕਾਤੁਕਾਮੋ ਅਹੋਸਿ, ਤਸ੍ਸ ਗੁਣਂ ਕਿਤ੍ਤੇਤ੍ਵਾ ਤਂ ਤੇਸਂ ਉਦ੍ਦਿਸਨ੍ਤੋ ਇਮਾ ਗਾਥਾਯੋ ਆਹ –
੧੨੬੬. ‘‘ਉਪਾਸਕੋ ਅਤ੍ਥਿ ਇਮਮ੍ਹਿ ਸਙ੍ਘੇ, ਬਹੁਸ੍ਸੁਤੋ ਸੀਲਵਤੂਪਪਨ੍ਨੋ;
ਸਦ੍ਧੋ ਚ ਚਾਗੀ ਚ ਸੁਪੇਸਲੋ ਚ, ਵਿਚਕ੍ਖਣੋ ਸਨ੍ਤੁਸਿਤੋ ਮੁਤੀਮਾ.
੧੨੬੭. ‘‘ਸਞ੍ਜਾਨਮਾਨੋ ਨ ਮੁਸਾ ਭਣੇਯ੍ਯ, ਪਰੂਪਘਾਤਾਯ ਨ ਚੇਤਯੇਯ੍ਯ;
ਵੇਭੂਤਿਕਂ ਪੇਸੁਣਂ ਨੋ ਕਰੇਯ੍ਯ, ਸਣ੍ਹਞ੍ਚ ਵਾਚਂ ਸਖਿਲਂ ਭਣੇਯ੍ਯ.
੧੨੬੮. ‘‘ਸਗਾਰਵੋ ਸਪ੍ਪਤਿਸ੍ਸੋ ਵਿਨੀਤੋ, ਅਪਾਪਕੋ ਅਧਿਸੀਲੇ ਵਿਸੁਦ੍ਧੋ;
ਸੋ ਮਾਤਰਂ ਪਿਤਰਞ੍ਚਾਪਿ ਜਨ੍ਤੁ, ਧਮ੍ਮੇਨ ਪੋਸੇਤਿ ਅਰਿਯਵੁਤ੍ਤਿ.
੧੨੬੯. ‘‘ਮਞ੍ਞੇ ਸੋ ਮਾਤਾਪਿਤੂਨਂ ਕਾਰਣਾ, ਭੋਗਾਨਿ ਪਰਿਯੇਸਤਿ ਨ ਅਤ੍ਤਹੇਤੁ;
ਮਾਤਾਪਿਤੂਨਞ੍ਚ ਯੋ ਅਚ੍ਚਯੇਨ, ਨੇਕ੍ਖਮ੍ਮਪੋਣੋ ਚਰਿਸ੍ਸਤਿ ਬ੍ਰਹ੍ਮਚਰਿਯਂ.
੧੨੭੦. ‘‘ਉਜੂ ਅਵਙ੍ਕੋ ਅਸਠੋ ਅਮਾਯੋ, ਨ ਲੇਸਕਪ੍ਪੇਨ ਚ ਵੋਹਰੇਯ੍ਯ;
ਸੋ ਤਾਦਿਸੋ ਸੁਕਤਕਮ੍ਮਕਾਰੀ, ਧਮ੍ਮੇ ਠਿਤੋ ਕਿਨ੍ਤਿ ਲਭੇਥ ਦੁਕ੍ਖਂ.
੧੨੭੧. ‘‘ਤਂਕਾਰਣਾ ਪਾਤੁਕਤੋਮ੍ਹਿ ਅਤ੍ਤਨਾ, ਤਸ੍ਮਾ ਧਮ੍ਮਂ ਪਸ੍ਸਥ ਵਾਣਿਜਾਸੇ;
ਅਞ੍ਞਤ੍ਰ ਤੇਨਿਹ ਭਸ੍ਮੀ ਭਵੇਥ, ਅਨ੍ਧਾਕੁਲਾ ਵਿਪ੍ਪਨਟ੍ਠਾ ਅਰਞ੍ਞੇ;
ਤਂ ਖਿਪ੍ਪਮਾਨੇਨ ਲਹੁਂ ਪਰੇਨ, ਸੁਖੋ ਹਵੇ ਸਪ੍ਪੁਰਿਸੇਨ ਸਙ੍ਗਮੋ’’ਤਿ.
੧੨੬੬. ਤਤ੍ਥ ਸਙ੍ਘੇਤਿ ਸਤ੍ਤਸਮੂਹੇ. ਵਿਚਕ੍ਖਣੋਤਿ ਤਤ੍ਥ ਤਤ੍ਥ ਕਤ੍ਤਬ੍ਬਤਾਯ ਕੁਸਲੋ. ਸਨ੍ਤੁਸਿਤੋਤਿ ਸਨ੍ਤੁਟ੍ਠੋ. ਮੁਤੀਮਾਤਿ ਕਮ੍ਮਸ੍ਸਕਤਞਾਣਾਦਿਨਾ ਇਧਲੋਕਪਰਲੋਕਹਿਤਾਨਂ ਮੁਨਨਤੋ ਮੁਤਿਮਾ.
੧੨੬੭. ਸਞ੍ਜਾਨਮਾਨੋ ਨ ਮੁਸਾ ਭਣੇਯ੍ਯਾਤਿ ਸਮ੍ਪਜਾਨਮੁਸਾ ਨ ਭਾਸੇਯ੍ਯ. ਵੇਭੂਤਿਕਨ੍ਤਿ ਸਹਿਤਾਨਂ ਵਿਨਾਭਾਵਕਰਣਤੋ ‘‘ਵੇਭੂਤਿਕ’’ਨ੍ਤਿ ਲਦ੍ਧਨਾਮਂ ਪਿਸੁਣਂ, ਨੋ ਕਰੇਯ੍ਯ ਨ ਵਦੇਯ੍ਯ.
੧੨੬੮. ਸਪ੍ਪਤਿਸ੍ਸੋਤਿ ਪਤਿਸ੍ਸਯੋ ਗਰੁਟ੍ਠਾਨਿਯੇਸੁ ਨਿਵਾਤਵੁਤ੍ਤਿਕਤ੍ਤਾ ਸੋਰਚ੍ਚਂ, ਸਹ ਪਤਿਸ੍ਸੇਨਾਤਿ ਸਪ੍ਪਤਿਸ੍ਸੋ. ਅਧਿਸੀਲੇਤਿ ਉਪਾਸਕੇਨ ਰਕ੍ਖਿਤਬ੍ਬਅਧਿਸੀਲਸਿਕ੍ਖਾਯ. ਅਰਿਯਵੁਤ੍ਤੀਤਿ ਪਰਿਸੁਦ੍ਧਵੁਤ੍ਤਿ.
੧੨੬੯. ਨੇਕ੍ਖਮ੍ਮਪੋਣੋਤਿ ਨਿਬ੍ਬਾਨਨਿਨ੍ਨੋ. ਚਰਿਸ੍ਸਤਿ ਬ੍ਰਹ੍ਮਚਰਿਯਨ੍ਤਿ ਪਬ੍ਬਜ੍ਜਂ ਸਾਸਨਬ੍ਰਹ੍ਮਚਰਿਯਂ ਚਰਿਸ੍ਸਤਿ.
੧੨੭੦. ਲੇਸਕਪ੍ਪੇਨਾਤਿ ਕਪ੍ਪਿਯਲੇਸੇਨ. ਨ ਚ ਵੋਹਰੇਯ੍ਯਾਤਿ ਮਾਯਾਸਾਠੇਯ੍ਯਵਸੇਨ ਵਚਨਂ ਨ ਨਿਚ੍ਛਾਰੇਯ੍ਯ. ਧਮ੍ਮੇ ਠਿਤੋ ਕਿਨ੍ਤਿ ਲਭੇਥ ਦੁਕ੍ਖਨ੍ਤਿ ਏਵਂ ਵੁਤ੍ਤਨਯੇਨ ਧਮ੍ਮੇ ਠਿਤੋ ਧਮ੍ਮਚਾਰੀ ਸਮਚਾਰੀ ਕਿਨ੍ਤਿ ਕੇਨ ਪਕਾਰੇਨ ਦੁਕ੍ਖਂ ਲਭੇਥ ਪਾਪੁਣੇਯ੍ਯ.