੧੧. ਸੁਨਿਕ੍ਖਿਤ੍ਤਵਿਮਾਨਵਣ੍ਣਨਾ

ਉਚ੍ਚਮਿਦਂ ਮਣਿਥੂਣਂ ਵਿਮਾਨਨ੍ਤਿ ਸੁਨਿਕ੍ਖਿਤ੍ਤਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨੇਵ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨਂ ਉਪਗਤੋ. ਤਸ੍ਮਿਞ੍ਚ ਖਣੇ ਅਞ੍ਞਤਰੋ ਦੇਵਪੁਤ੍ਤੋ ਅਤ੍ਤਨੋ ਵਿਮਾਨਦ੍ਵਾਰੇ ਠਿਤੋ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਦਿਸ੍ਵਾ ਸਞ੍ਜਾਤਗਾਰਵਬਹੁਮਾਨੋ ਉਪਸਙ੍ਕਮਿਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ.

ਸੋ ਕਿਰ ਅਤੀਤੇ ਕਸ੍ਸਪਸਮ੍ਮਾਸਮ੍ਬੁਦ੍ਧੇ ਪਰਿਨਿਬ੍ਬੁਤੇ ਤਸ੍ਸ ਸਰੀਰਧਾਤੁਯੋ ਪਕ੍ਖਿਪਿਤ੍ਵਾ ਯੋਜਨਿਕੇ ਕਨਕਥੂਪੇ ਚ ਕਤੇ ਚਤਸ੍ਸੋ ਪਰਿਸਾ ਕਾਲੇਨ ਕਾਲਂ ਉਪਸਙ੍ਕਮਿਤ੍ਵਾ ਗਨ੍ਧਪੁਪ੍ਫਧੂਪਾਦੀਹਿ ਚੇਤਿਯੇ ਪੂਜਂ ਕਰੋਨ੍ਤਿ, ਤਤ੍ਥ ਅਞ੍ਞਤਰੋ ਉਪਾਸਕੋ ਅਞ੍ਞੇਸੁ ਪੁਪ੍ਫਪੂਜਂ ਕਤ੍ਵਾ ਗਤੇਸੁ ਤੇਹਿ ਪੂਜਿਤਟ੍ਠਾਨੇ ਦੁਨ੍ਨਿਕ੍ਖਿਤ੍ਤਾਨਿ ਪੁਪ੍ਫਾਨਿ ਦਿਸ੍ਵਾ ਤਤ੍ਥੇਵ ਤਾਨਿ ਸਮ੍ਮਦੇਵ ਠਪੇਨ੍ਤੋ ਸਨ੍ਨਿਵੇਸਵਸੇਨ ਦਸ੍ਸਨੀਯਂ ਪਾਸਾਦਿਕਂ ਵਿਭਤ੍ਤਿਵਿਸੇਸਯੁਤ੍ਤਂ ਪੁਪ੍ਫਪੂਜਂ ਅਕਾਸਿ. ਕਤ੍ਵਾ ਚ ਪਨ ਏਤਂ ਆਰਮ੍ਮਣਂ ਗਣ੍ਹਨ੍ਤੋ ਸਤ੍ਥੁ ਗੁਣੇ ਅਨੁਸ੍ਸਰਿਤ੍ਵਾ ਪਸਨ੍ਨਚਿਤ੍ਤੋ ਤਂ ਪੁਞ੍ਞਂ ਹਦਯੇ ਠਪੇਸਿ.

ਸੋ ਅਪਰਭਾਗੇ ਕਾਲਂ ਕਤ੍ਵਾ ਤਸ੍ਸੇਵ ਕਮ੍ਮਸ੍ਸ ਆਨੁਭਾਵੇਨ ਤਾਵਤਿਂਸਭਵਨੇ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਨਿਬ੍ਬਤ੍ਤਿ, ਮਹਾਨੁਭਾਵੋ ਮਹਾ ਚਸ੍ਸ ਪਰਿਵਾਰੋ ਅਹੋਸਿ. ਤਂ ਸਨ੍ਧਾਯ ਵੁਤ੍ਤਂ ‘‘ਤਸ੍ਮਿਞ੍ਚ ਖਣੇ ਅਞ੍ਞਤਰੋ ਦੇਵਪੁਤ੍ਤੋ…ਪੇ… ਅਟ੍ਠਾਸੀ’’ਤਿ. ਅਥ ਨਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਯਥਾਲਦ੍ਧਸਮ੍ਪਤ੍ਤਿਕਿਤ੍ਤਨਮੁਖੇਨ ਕਤਸੁਚਰਿਤਕਮ੍ਮਂ ਇਮਾਹਿ ਗਾਥਾਹਿ ਪੁਚ੍ਛਿ –

੧੨੮੨. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

੧੨੮੩. ‘‘ਤਤ੍ਥਚ੍ਛਸਿ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;

ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚ, ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਛਨ੍ਨਾ.

੧੨੮੪. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੨੮੫. ‘‘ਪੁਚ੍ਛਾਮਿ ਤਂ ਦੇਵ ਮਹਾਨੁਭਾਵ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

ਸੋਪਿ ਤਸ੍ਸ ਅਤ੍ਤਨੋ ਕਤਕਮ੍ਮਂ ਇਮਾਹਿ ਗਾਥਾਹਿ ਕਥੇਸਿ. ਤਂ ਦਸ੍ਸੇਨ੍ਤਾ ਸਙ੍ਗੀਤਿਕਾਰਾ ਆਹਂਸੁ –

੧੨੮੬. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ, ਮੋਗ੍ਗਲ੍ਲਾਨੇਨ ਪੁਚ੍ਛਿਤੋ;

ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੨੮੭. ‘‘ਦੁਨ੍ਨਿਕ੍ਖਿਤ੍ਤਂ ਮਾਲਂ ਸੁਨਿਕ੍ਖਿਪਿਤ੍ਵਾ, ਪਤਿਟ੍ਠਪੇਤ੍ਵਾ ਸੁਗਤਸ੍ਸ ਥੂਪੇ;

ਮਹਿਦ੍ਧਿਕੋ ਚਮ੍ਹਿ ਮਹਾਨੁਭਾਵੋ, ਦਿਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤੋ.

੧੨੮੮. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੨੮੯. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤੋ ਯਮਹਂ ਅਕਾਸਿਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੨੮੭. ਤਤ੍ਥ ਦੁਨ੍ਨਿਕ੍ਖਿਤ੍ਤਂ ਮਾਲਨ੍ਤਿ ਚੇਤਿਯੇ ਪੂਜਾਕਰਣਟ੍ਠਾਨੇ ਨਿਰਨ੍ਤਰਟ੍ਠਪਨਾਦਿਨਾ ਰਚਨਾਵਿਸੇਸੇਨ ਅਟ੍ਠਪੇਤ੍ਵਾ ਯਥਾਨਿਕ੍ਖਿਤ੍ਤਤਾਯ ਨ ਸੁਟ੍ਠੁ ਨਿਕ੍ਖਿਤ੍ਤਂ, ਵਾਤੇਨ ਵਾ ਪਹਰਿਤ੍ਵਾ ਦੁਨ੍ਨਿਕ੍ਖਿਤ੍ਤਂ ਪੁਪ੍ਫਂ. ਸੁਨਿਕ੍ਖਿਪਿਤ੍ਵਾਤਿ ਸੁਟ੍ਠੁ ਨਿਕ੍ਖਿਪਿਤ੍ਵਾ ਰਚਨਾਵਿਸੇਸੇਨ ਦਸ੍ਸਨੀਯਂ ਪਾਸਾਦਿਕਂ ਕਤ੍ਵਾ ਨਿਕ੍ਖਿਪਿਯ. ਪਤਿਟ੍ਠਪੇਤ੍ਵਾਤਿ ਵਿਭਤ੍ਤਿਵਿਸੇਸਾਦਿਵਸੇਨ ਪੁਪ੍ਫਂ ਪਤਿਟ੍ਠਾਪੇਤ੍ਵਾ. ਤਂ ਵਾ ਪੁਪ੍ਫਂ ਨਿਕ੍ਖਿਪਨ੍ਤੋ ਸਤ੍ਥੁ ਚੇਤਿਯਂ ਉਦ੍ਦਿਸ੍ਸ ਮਮ ਸਨ੍ਤਾਨੇ ਕੁਸਲਧਮ੍ਮਂ ਪਤਿਟ੍ਠਾਪੇਤ੍ਵਾਤਿ ਏਵਂ ਏਤ੍ਥ ਅਤ੍ਥੋ ਦਟ੍ਠਬ੍ਬੋ. ਸੇਸਂ ਵੁਤ੍ਤਨਯਮੇਵ.

ਏਵਂ ਦੇਵਪੁਤ੍ਤੇਨ ਅਤ੍ਤਨੋ ਸੁਚਰਿਤਕਮ੍ਮੇ ਪਕਾਸਿਤੇ ਥੇਰੋ ਤਸ੍ਸ ਧਮ੍ਮਂ ਦੇਸੇਤ੍ਵਾ ਆਗਨ੍ਤ੍ਵਾ ਭਗਵਤੋ ਤਮਤ੍ਥਂ ਨਿਵੇਦੇਸਿ. ਭਗਵਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਮਹਾਜਨਸ੍ਸ ਧਮ੍ਮਂ ਦੇਸੇਸਿ. ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਸੁਨਿਕ੍ਖਿਤ੍ਤਵਿਮਾਨਵਣ੍ਣਨਾ ਨਿਟ੍ਠਿਤਾ.

ਇਤਿ ਪਰਮਤ੍ਥਦੀਪਨਿਯਾ ਖੁਦ੍ਦਕ-ਅਟ੍ਠਕਥਾਯ ਵਿਮਾਨਵਤ੍ਥੁਸ੍ਮਿਂ

ਏਕਾਦਸਵਤ੍ਥੁਪਟਿਮਣ੍ਡਿਤਸ੍ਸ ਸਤ੍ਤਮਸ੍ਸ

ਸੁਨਿਕ੍ਖਿਤ੍ਤਵਗ੍ਗਸ੍ਸ ਅਤ੍ਥਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਪੁਰਿਸਵਿਮਾਨਵਣ੍ਣਨਾ.

ਨਿਗਮਨਕਥਾ

ਏਤ੍ਤਾਵਤਾ ਚ –

ਦੇਵਤਾਨਂ ਵਿਮਾਨਾਦਿ-ਸਮ੍ਪਤ੍ਤਿਂ ਤਸ੍ਸ ਕਾਰਣਂ;

ਪਕਾਸਯਨ੍ਤੀ ਸਤ੍ਤਾਨਂ, ਸਬ੍ਬਲੋਕਹਿਤਾਵਹਾ.

ਅਪ੍ਪਕਾਨਮ੍ਪਿ ਕਾਰਾਨਂ, ਯਾ ਵਿਭਾਵੇਤਿ ਦੇਸਨਾ;

ਉਲ਼ਾਰਫਲਤਂ ਚਿਤ੍ਤ-ਖੇਤ੍ਤਸਮ੍ਪਤ੍ਤਿਯੋਗਤੋ.

ਯਂ ਕਥਾਵਤ੍ਥੁਕੁਸਲਾ, ਸੁਪਰਿਞ੍ਞਾਤਵਤ੍ਥੁਕਾ;

ਵਿਮਾਨਵਤ੍ਥੁਇਚ੍ਚੇਵ, ਸਙ੍ਗਾਯਿਂਸੁ ਮਹੇਸਯੋ.

ਤਸ੍ਸ ਅਤ੍ਥਂ ਪਕਾਸੇਤੁਂ, ਪੋਰਾਣਟ੍ਠਕਥਾਨਯਂ;

ਸਨ੍ਨਿਸ੍ਸਾਯ ਸਮਾਰਦ੍ਧਾ, ਅਤ੍ਥਸਂਵਣ੍ਣਨਾ ਮਯਾ.

ਯਾ ਤਤ੍ਥ ਪਰਮਤ੍ਥਾਨਂ, ਤਤ੍ਥ ਤਤ੍ਥ ਯਥਾਰਹਂ;

ਪਕਾਸਨਾ ਪਰਮਤ੍ਥ-ਦੀਪਨੀ ਨਾਮ ਨਾਮਤੋ.

ਸਮ੍ਪਤ੍ਤਾ ਪਰਿਨਿਟ੍ਠਾਨਂ, ਅਨਾਕੁਲਵਿਨਿਚ੍ਛਯਾ;

ਸਾ ਸਤ੍ਤਰਸਮਤ੍ਤਾਯ, ਪਾਲ਼ਿਯਾ ਭਾਣਵਾਰਤੋ.

ਇਤਿ ਤਂ ਸਙ੍ਖਰੋਨ੍ਤੇਨ, ਯਂ ਤਂ ਅਧਿਗਤਂ ਮਯਾ;

ਪੁਞ੍ਞਂ ਤਸ੍ਸਾਨੁਭਾਵੇਨ, ਲੋਕਨਾਥਸ੍ਸ ਸਾਸਨਂ.

ਓਗਾਹੇਤ੍ਵਾ ਵਿਸੁਦ੍ਧਾਯ, ਸੀਲਾਦਿਪਟਿਪਤ੍ਤਿਯਾ;

ਸਬ੍ਬੇਪਿ ਦੇਹਿਨੋ ਹੋਨ੍ਤੁ, ਵਿਮੁਤ੍ਤਿਰਸਭਾਗਿਨੋ.

ਚਿਰਂ ਤਿਟ੍ਠਤੁ ਲੋਕਸ੍ਮਿਂ, ਸਮ੍ਮਾਸਮ੍ਬੁਦ੍ਧਸਾਸਨਂ;

ਤਸ੍ਮਿਂ ਸਗਾਰਵਾ ਨਿਚ੍ਚਂ, ਹੋਨ੍ਤੁ ਸਬ੍ਬੇਪਿ ਪਾਣਿਨੋ.

ਸਮ੍ਮਾ ਵਸ੍ਸਤੁ ਕਾਲੇਨ, ਦੇਵੋਪਿ ਜਗਤੀਪਤਿ;

ਸਦ੍ਧਮ੍ਮਨਿਰਤੋ ਲੋਕਂ, ਧਮ੍ਮੇਨੇਵ ਪਸਾਸਤੂਤਿ.

ਇਤਿ ਬਦਰਤਿਤ੍ਥਵਿਹਾਰਵਾਸਿਨਾ ਆਚਰਿਯਧਮ੍ਮਪਾਲੇਨ

ਕਤਾਯ

ਪਰਮਤ੍ਥਦੀਪਨਿਯਾ ਖੁਦ੍ਦਕ-ਅਟ੍ਠਕਥਾਯ

ਵਿਮਾਨਵਤ੍ਥੁਅਤ੍ਥਵਣ੍ਣਨਾ ਨਿਟ੍ਠਿਤਾ.

ਵਿਮਾਨਵਤ੍ਥੁ-ਅਟ੍ਠਕਥਾ ਸਮਤ੍ਤਾ.