ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਖੁਦ੍ਦਕਨਿਕਾਯੇ

ਪੇਤਵਤ੍ਥੁ-ਅਟ੍ਠਕਥਾ

ਗਨ੍ਥਾਰਮ੍ਭਕਥਾ

ਮਹਾਕਾਰੁਣਿਕਂ ਨਾਥਂ, ਞੇਯ੍ਯਸਾਗਰਪਾਰਗੁਂ;

ਵਨ੍ਦੇ ਨਿਪੁਣਗਮ੍ਭੀਰ-ਵਿਚਿਤ੍ਰਨਯਦੇਸਨਂ.

ਵਿਜ੍ਜਾਚਰਣਸਮ੍ਪਨ੍ਨਾ, ਯੇਨ ਨਿਯ੍ਯਨ੍ਤਿ ਲੋਕਤੋ;

ਵਨ੍ਦੇ ਤਮੁਤ੍ਤਮਂ ਧਮ੍ਮਂ, ਸਮ੍ਮਾਸਮ੍ਬੁਦ੍ਧਪੂਜਿਤਂ.

ਸੀਲਾਦਿਗੁਣਸਮ੍ਪਨ੍ਨੋ, ਠਿਤੋ ਮਗ੍ਗਫਲੇਸੁ ਯੋ;

ਵਨ੍ਦੇ ਅਰਿਯਸਙ੍ਘਂ ਤਂ, ਪੁਞ੍ਞਕ੍ਖੇਤ੍ਤਂ ਅਨੁਤ੍ਤਰਂ.

ਵਨ੍ਦਨਾਜਨਿਤਂ ਪੁਞ੍ਞਂ, ਇਤਿ ਯਂ ਰਤਨਤ੍ਤਯੇ;

ਹਤਨ੍ਤਰਾਯੋ ਸਬ੍ਬਤ੍ਥ, ਹੁਤ੍ਵਾਹਂ ਤਸ੍ਸ ਤੇਜਸਾ.

ਪੇਤੇਹਿ ਚ ਕਤਂ ਕਮ੍ਮਂ, ਯਂ ਯਂ ਪੁਰਿਮਜਾਤਿਸੁ;

ਪੇਤਭਾਵਾਵਹਂ ਤਂ ਤਂ, ਤੇਸਞ੍ਹਿ ਫਲਭੇਦਤੋ.

ਪਕਾਸਯਨ੍ਤੀ ਬੁਦ੍ਧਾਨਂ, ਦੇਸਨਾ ਯਾ ਵਿਸੇਸਤੋ;

ਸਂਵੇਗਜਨਨੀ ਕਮ੍ਮ-ਫਲਪਚ੍ਚਕ੍ਖਕਾਰਿਨੀ.

ਪੇਤਵਤ੍ਥੂਤਿ ਨਾਮੇਨ, ਸੁਪਰਿਞ੍ਞਾਤਵਤ੍ਥੁਕਾ;

ਯਂ ਖੁਦ੍ਦਕਨਿਕਾਯਸ੍ਮਿਂ, ਸਙ੍ਗਾਯਿਂਸੁ ਮਹੇਸਯੋ.

ਤਸ੍ਸ ਸਮ੍ਮਾਵਲਮ੍ਬਿਤ੍ਵਾ, ਪੋਰਾਣਟ੍ਠਕਥਾਨਯਂ;

ਤਤ੍ਥ ਤਤ੍ਥ ਨਿਦਾਨਾਨਿ, ਵਿਭਾਵੇਨ੍ਤੋ ਵਿਸੇਸਤੋ.

ਸੁਵਿਸੁਦ੍ਧਂ ਅਸਂਕਿਣ੍ਣਂ, ਨਿਪੁਣਤ੍ਥਵਿਨਿਚ੍ਛਯਂ;

ਮਹਾਵਿਹਾਰਵਾਸੀਨਂ, ਸਮਯਂ ਅਵਿਲੋਮਯਂ.

ਯਥਾਬਲਂ ਕਰਿਸ੍ਸਾਮਿ, ਅਤ੍ਥਸਂਵਣ੍ਣਨਂ ਸੁਭਂ;

ਸਕ੍ਕਚ੍ਚਂ ਭਾਸਤੋ ਤਂ ਮੇ, ਨਿਸਾਮਯਥ ਸਾਧਵੋਤਿ.

ਤਤ੍ਥ ਪੇਤਵਤ੍ਥੂਤਿ ਸੇਟ੍ਠਿਪੁਤ੍ਤਾਦਿਕਸ੍ਸ ਤਸ੍ਸ ਤਸ੍ਸ ਸਤ੍ਤਸ੍ਸ ਪੇਤਭਾਵਹੇਤੁਭੂਤਂ ਕਮ੍ਮਂ, ਤਸ੍ਸ ਪਨ ਪਕਾਸਨਵਸੇਨ ਪਵਤ੍ਤੋ ‘‘ਖੇਤ੍ਤੂਪਮਾ ਅਰਹਨ੍ਤੋ’’ਤਿਆਦਿਕਾ ਪਰਿਯਤ੍ਤਿਧਮ੍ਮੋ ਇਧ ‘‘ਪੇਤਵਤ੍ਥੂ’’ਤਿ ਅਧਿਪ੍ਪੇਤੋ.

ਤਯਿਦਂ ਪੇਤਵਤ੍ਥੁ ਕੇਨ ਭਾਸਿਤਂ, ਕਤ੍ਥ ਭਾਸਿਤਂ, ਕਦਾ ਭਾਸਿਤਂ, ਕਸ੍ਮਾ ਚ ਭਾਸਿਤਨ੍ਤਿ? ਵੁਚ੍ਚਤੇ – ਇਦਞ੍ਹਿ ਪੇਤਵਤ੍ਥੁ ਦੁਵਿਧੇਨ ਪਵਤ੍ਤਂ ਅਟ੍ਠੁਪ੍ਪਤ੍ਤਿਵਸੇਨ, ਪੁਚ੍ਛਾਵਿਸ੍ਸਜ੍ਜਨਵਸੇਨ ਚ. ਤਤ੍ਥ ਯਂ ਅਟ੍ਠੁਪ੍ਪਤ੍ਤਿਵਸੇਨ ਪਵਤ੍ਤਂ, ਤਂ ਭਗਵਤਾ ਭਾਸਿਤਂ, ਇਤਰਂ ਨਾਰਦਤ੍ਥੇਰਾਦੀਹਿ ਪੁਚ੍ਛਿਤਂ ਤੇਹਿ ਤੇਹਿ ਪੇਤੇਹਿ ਭਾਸਿਤਂ. ਸਤ੍ਥਾ ਪਨ ਯਸ੍ਮਾ ਨਾਰਦਤ੍ਥੇਰਾਦੀਹਿ ਤਸ੍ਮਿਂ ਤਸ੍ਮਿਂ ਪੁਚ੍ਛਾਵਿਸ੍ਸਜ੍ਜਨੇ ਆਰੋਚਿਤੇ ਤਂ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ, ਤਸ੍ਮਾ ਸਬ੍ਬਮ੍ਪੇਤਂ ਪੇਤਵਤ੍ਥੁ ਸਤ੍ਥਾਰਾ ਭਾਸਿਤਮੇਵ ਨਾਮ ਜਾਤਂ. ਪਵਤ੍ਤਿਤਵਰਧਮ੍ਮਚਕ੍ਕੇ ਹਿ ਸਤ੍ਥਰਿ ਤਤ੍ਥ ਤਤ੍ਥ ਰਾਜਗਹਾਦੀਸੁ ਵਿਹਰਨ੍ਤੇ ਯੇਭੁਯ੍ਯੇਨ ਤਾਯ ਤਾਯ ਅਟ੍ਠੁਪ੍ਪਤ੍ਤਿਯਾ ਪੁਚ੍ਛਾਵਿਸ੍ਸਜ੍ਜਨਵਸੇਨ ਸਤ੍ਤਾਨਂ ਕਮ੍ਮਫਲਪਚ੍ਚਕ੍ਖਕਰਣਾਯ ਤਂ ਤਂ ਪੇਤਵਤ੍ਥੁ ਦੇਸਨਾਰੁਲ਼੍ਹਨ੍ਤਿ ਅਯਂ ਤਾਵੇਤ੍ਥ ‘‘ਕੇਨ ਭਾਸਿਤ’’ਨ੍ਤਿਆਦੀਨਂ ਪਦਾਨਂ ਸਾਧਾਰਣਤੋ ਵਿਸ੍ਸਜ੍ਜਨਾ. ਅਸਾਧਾਰਣਤੋ ਪਨ ਤਸ੍ਸ ਤਸ੍ਸ ਵਤ੍ਥੁਸ੍ਸ ਅਤ੍ਥਵਣ੍ਣਨਾਯਮੇਵ ਆਗਮਿਸ੍ਸਤਿ.

ਤਂ ਪਨੇਤਂ ਪੇਤਵਤ੍ਥੁ ਵਿਨਯਪਿਟਕਂ ਸੁਤ੍ਤਨ੍ਤਪਿਟਕਂ ਅਭਿਧਮ੍ਮਪਿਟਕਨ੍ਤਿ ਤੀਸੁ ਪਿਟਕੇਸੁ ਸੁਤ੍ਤਨ੍ਤਪਿਟਕਪਰਿਯਾਪਨ੍ਨਂ, ਦੀਘਨਿਕਾਯੋ ਮਜ੍ਝਿਮਨਿਕਾਯੋ ਸਂਯੁਤ੍ਤਨਿਕਾਯੋ ਅਙ੍ਗੁਤ੍ਤਰਨਿਕਾਯੋ ਖੁਦ੍ਦਕਨਿਕਾਯੋਤਿ ਪਞ੍ਚਸੁ ਨਿਕਾਯੇਸੁ ਖੁਦ੍ਦਕਨਿਕਾਯਪਰਿਯਾਪਨ੍ਨਂ, ਸੁਤ੍ਤਂ ਗੇਯ੍ਯਂ ਵੇਯ੍ਯਾਕਰਣਂ ਗਾਥਾ ਉਦਾਨਂ ਇਤਿਵੁਤ੍ਤਕਂ ਜਾਤਕਂ ਅਬ੍ਭੁਤਧਮ੍ਮਂ ਵੇਦਲ੍ਲਨ੍ਤਿ ਨਵਸੁ ਸਾਸਨਙ੍ਗੇਸੁ ਗਾਥਾਸਙ੍ਗਹਂ.

‘‘ਦ੍ਵਾਸੀਤਿ ਬੁਦ੍ਧਤੋ ਗਣ੍ਹਿਂ, ਦ੍ਵੇ ਸਹਸ੍ਸਾਨਿ ਭਿਕ੍ਖੁਤੋ;

ਚਤੁਰਾਸੀਤਿ ਸਹਸ੍ਸਾਨਿ, ਯੇ ਮੇ ਧਮ੍ਮਾ ਪਵਤ੍ਤਿਨੋ’’ਤਿ. (ਥੇਰਗਾ. ੧੦੨੭) –

ਏਵਂ ਧਮ੍ਮਭਣ੍ਡਾਗਾਰਿਕੇਨ ਪਟਿਞ੍ਞਾਤੇਸੁ ਚਤੁਰਾਸੀਤਿਯਾ ਧਮ੍ਮਕ੍ਖਨ੍ਧਸਹਸ੍ਸੇਸੁ ਕਤਿਪਯਧਮ੍ਮਕ੍ਖਨ੍ਧਸਙ੍ਗਹਂ, ਭਾਣਵਾਰਤੋ ਚਤੁਭਾਣਵਾਰਮਤ੍ਤਂ, ਵਗ੍ਗਤੋ – ਉਰਗਵਗ੍ਗੋ ਉਬ੍ਬਰਿਵਗ੍ਗੋ ਚੂਲ਼ਵਗ੍ਗੋ ਮਹਾਵਗ੍ਗੋਤਿ ਚਤੁਵਗ੍ਗਸਙ੍ਗਹਂ. ਤੇਸੁ ਪਠਮਵਗ੍ਗੇ ਦ੍ਵਾਦਸ ਵਤ੍ਥੂਨਿ, ਦੁਤਿਯਵਗ੍ਗੇ ਤੇਰਸ ਵਤ੍ਥੂਨਿ, ਤਤਿਯਵਗ੍ਗੇ ਦਸ ਵਤ੍ਥੂਨਿ, ਚਤੁਤ੍ਥਵਗ੍ਗੇ ਸੋਲ਼ਸ ਵਤ੍ਥੂਨੀਤਿ ਵਤ੍ਥੁਤੋ ਏਕਪਞ੍ਞਾਸਵਤ੍ਥੁਪਟਿਮਣ੍ਡਿਤਂ. ਤਸ੍ਸ ਵਗ੍ਗੇਸੁ ਉਰਗਵਗ੍ਗੋ ਆਦਿ, ਵਤ੍ਥੂਸੁ ਖੇਤ੍ਤੂਪਮਪੇਤਵਤ੍ਥੁ ਆਦਿ, ਤਸ੍ਸਾਪਿ ‘‘ਖੇਤ੍ਤੂਪਮਾ ਅਰਹਨ੍ਤੋ’’ਤਿ ਅਯਂ ਗਾਥਾ ਆਦਿ.

੧. ਉਰਗਵਗ੍ਗੋ

੧. ਖੇਤ੍ਤੂਪਮਪੇਤਵਤ੍ਥੁਵਣ੍ਣਨਾ

ਤਂ ਪਨੇਤਂ ਵਤ੍ਥੁਂ ਭਗਵਾ ਰਾਜਗਹੇ ਵਿਹਰਨ੍ਤੋ ਵੇਲ਼ੁਵਨੇ ਕਲਨ੍ਦਕਨਿਵਾਪੇ ਅਞ੍ਞਤਰਂ ਸੇਟ੍ਠਿਪੁਤ੍ਤਪੇਤਂ ਆਰਬ੍ਭ ਕਥੇਸਿ. ਰਾਜਗਹੇ ਕਿਰ ਅਞ੍ਞਤਰੋ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਪਹੂਤਵਿਤ੍ਤੂਪਕਰਣੋ ਅਨੇਕਕੋਟਿਧਨਸਨ੍ਨਿਚਯੋ ਸੇਟ੍ਠਿ ਅਹੋਸਿ. ਤਸ੍ਸ ਮਹਾਧਨਸਮ੍ਪਨ੍ਨਤਾਯ ‘‘ਮਹਾਧਨਸੇਟ੍ਠਿ’’ਤ੍ਵੇਵ ਸਮਞ੍ਞਾ ਅਹੋਸਿ. ਏਕੋਵ ਪੁਤ੍ਤੋ ਅਹੋਸਿ, ਪਿਯੋ ਮਨਾਪੋ. ਤਸ੍ਮਿਂ ਵਿਞ੍ਞੁਤਂ ਪਤ੍ਤੇ ਮਾਤਾਪਿਤਰੋ ਏਵਂ ਚਿਨ੍ਤੇਸੁਂ – ‘‘ਅਮ੍ਹਾਕਂ ਪੁਤ੍ਤਸ੍ਸ ਦਿਵਸੇ ਦਿਵਸੇ ਸਹਸ੍ਸਂ ਸਹਸ੍ਸਂ ਪਰਿਬ੍ਬਯਂ ਕਰੋਨ੍ਤਸ੍ਸ ਵਸ੍ਸਸਤੇਨਾਪਿ ਅਯਂ ਧਨਸਨ੍ਨਿਚਯੋ ਪਰਿਕ੍ਖਯਂ ਨ ਗਮਿਸ੍ਸਤਿ, ਕਿਂ ਇਮਸ੍ਸ ਸਿਪ੍ਪੁਗ੍ਗਹਣਪਰਿਸ੍ਸਮੇਨ, ਅਕਿਲਨ੍ਤਕਾਯਚਿਤ੍ਤੋ ਯਥਾਸੁਖਂ ਭੋਗੇ ਪਰਿਭੁਞ੍ਜਤੂ’’ਤਿ ਸਿਪ੍ਪਂ ਨ ਸਿਕ੍ਖਾਪੇਸੁਂ. ਵਯਪ੍ਪਤ੍ਤੇ ਪਨ ਕੁਲਰੂਪਯੋਬ੍ਬਨਵਿਲਾਸਸਮ੍ਪਨ੍ਨਂ ਕਾਮਾਭਿਮੁਖਂ ਧਮ੍ਮਸਞ੍ਞਾਵਿਮੁਖਂ ਕਞ੍ਞਂ ਆਨੇਸੁਂ. ਸੋ ਤਾਯ ਸਦ੍ਧਿਂ ਅਭਿਰਮਨ੍ਤੋ ਧਮ੍ਮੇ ਚਿਤ੍ਤਮਤ੍ਤਮ੍ਪਿ ਅਨੁਪ੍ਪਾਦੇਤ੍ਵਾ, ਸਮਣਬ੍ਰਾਹ੍ਮਣਗੁਰੁਜਨੇਸੁ ਅਨਾਦਰੋ ਹੁਤ੍ਵਾ, ਧੁਤ੍ਤਜਨਪਰਿਵੁਤੋ ਰਜ੍ਜਮਾਨੋ ਪਞ੍ਚਕਾਮਗੁਣੇ ਰਤੋ ਗਿਦ੍ਧੋ ਮੋਹੇਨ ਅਨ੍ਧੋ ਹੁਤ੍ਵਾ ਕਾਲਂ ਵੀਤਿਨਾਮੇਤ੍ਵਾ, ਮਾਤਾਪਿਤੂਸੁ ਕਾਲਕਤੇਸੁ ਨਟਨਾਟਕਗਾਯਕਾਦੀਨਂ ਯਥਿਚ੍ਛਿਤਂ ਦੇਨ੍ਤੋ ਧਨਂ ਵਿਨਾਸੇਤ੍ਵਾ ਨਚਿਰਸ੍ਸੇਵ ਪਾਰਿਜੁਞ੍ਞਪ੍ਪਤ੍ਤੋ ਹੁਤ੍ਵਾ, ਇਣਂ ਗਹੇਤ੍ਵਾ ਜੀਵਿਕਂ ਕਪ੍ਪੇਨ੍ਤੋ ਪੁਨ ਇਣਮ੍ਪਿ ਅਲਭਿਤ੍ਵਾ ਇਣਾਯਿਕੇਹਿ ਚੋਦਿਯਮਾਨੋ ਤੇਸਂ ਅਤ੍ਤਨੋ ਖੇਤ੍ਤਵਤ੍ਥੁਘਰਾਦੀਨਿ ਦਤ੍ਵਾ, ਕਪਾਲਹਤ੍ਥੋ ਭਿਕ੍ਖਂ ਚਰਿਤ੍ਵਾ ਭੁਞ੍ਜਨ੍ਤੋ ਤਸ੍ਮਿਂਯੇਵ ਨਗਰੇ ਅਨਾਥਸਾਲਾਯਂ ਵਸਤਿ.

ਅਥ ਨਂ ਏਕਦਿਵਸਂ ਚੋਰਾ ਸਮਾਗਤਾ ਏਵਮਾਹਂਸੁ – ‘‘ਅਮ੍ਭੋ ਪੁਰਿਸ, ਕਿਂ ਤੁਯ੍ਹਂ ਇਮਿਨਾ ਦੁਜ੍ਜੀਵਿਤੇਨ, ਤਰੁਣੋ ਤ੍ਵਮਸਿ ਥਾਮਜਵਬਲਸਮ੍ਪਨ੍ਨੋ, ਕਸ੍ਮਾ ਹਤ੍ਥਪਾਦਵਿਕਲੋ ਵਿਯ ਅਚ੍ਛਸਿ? ਏਹਿ ਅਮ੍ਹੇਹਿ ਸਹ ਚੋਰਿਕਾਯ ਪਰੇਸਂ ਸਨ੍ਤਕਂ ਗਹੇਤ੍ਵਾ ਸੁਖੇਨ ਜੀਵਿਕਂ ਕਪ੍ਪੇਹੀ’’ਤਿ. ਸੋ ‘‘ਨਾਹਂ ਚੋਰਿਕਂ ਕਾਤੁਂ ਜਾਨਾਮੀ’’ਤਿ ਆਹ. ਚੋਰਾ ‘‘ਮਯਂ ਤਂ ਸਿਕ੍ਖਾਪੇਮ, ਕੇਵਲਂ ਤ੍ਵਂ ਅਮ੍ਹਾਕਂ ਵਚਨਂ ਕਰੋਹੀ’’ਤਿ ਆਹਂਸੁ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤੇਹਿ ਸਦ੍ਧਿਂ ਅਗਮਾਸਿ. ਅਥ ਤੇ ਚੋਰਾ ਤਸ੍ਸ ਹਤ੍ਥੇ ਮਹਨ੍ਤਂ ਮੁਗ੍ਗਰਂ ਦਤ੍ਵਾ ਸਨ੍ਧਿਂ ਛਿਨ੍ਦਿਤ੍ਵਾ ਘਰਂ ਪਵਿਸਨ੍ਤੋ ਤਂ ਸਨ੍ਧਿਮੁਖੇ ਠਪੇਤ੍ਵਾ ਆਹਂਸੁ – ‘‘ਸਚੇ ਇਧ ਅਞ੍ਞੋ ਕੋਚਿ ਆਗਚ੍ਛਤਿ, ਤਂ ਇਮਿਨਾ ਮੁਗ੍ਗਰੇਨ ਪਹਰਿਤ੍ਵਾ ਏਕਪ੍ਪਹਾਰੇਨੇਵ ਮਾਰੇਹੀ’’ਤਿ. ਸੋ ਅਨ੍ਧਬਾਲੋ ਹਿਤਾਹਿਤਂ ਅਜਾਨਨ੍ਤੋ ਪਰੇਸਂ ਆਗਮਨਮੇਵ ਓਲੋਕੇਨ੍ਤੋ ਤਤ੍ਥ ਅਟ੍ਠਾਸਿ. ਚੋਰਾ ਪਨ ਘਰਂ ਪਵਿਸਿਤ੍ਵਾ ਗਯ੍ਹੂਪਗਂ ਭਣ੍ਡਂ ਗਹੇਤ੍ਵਾ ਘਰਮਨੁਸ੍ਸੇਹਿ ਞਾਤਮਤ੍ਤਾਵ ਇਤੋ ਚਿਤੋ ਚ ਪਲਾਯਿਂਸੁ. ਘਰਮਨੁਸ੍ਸਾ ਉਟ੍ਠਹਿਤ੍ਵਾ ਸੀਘਂ ਸੀਘਂ ਧਾਵਨ੍ਤਾ ਇਤੋ ਚਿਤੋ ਚ ਓਲੋਕੇਨ੍ਤਾ ਤਂ ਪੁਰਿਸਂ ਸਨ੍ਧਿਦ੍ਵਾਰੇ ਠਿਤਂ ਦਿਸ੍ਵਾ ‘‘ਹਰੇ ਦੁਟ੍ਠਚੋਰਾ’’ਤਿ ਗਹੇਤ੍ਵਾ ਹਤ੍ਥਪਾਦੇ ਮੁਗ੍ਗਰਾਦੀਹਿ ਪੋਥੇਤ੍ਵਾ ਰਞ੍ਞੋ ਦਸ੍ਸੇਸੁਂ – ‘‘ਅਯਂ, ਦੇਵ, ਚੋਰੋ ਸਨ੍ਧਿਸੁਖੇ ਗਹਿਤੋ’’ਤਿ. ਰਾਜਾ ‘‘ਇਮਸ੍ਸ ਸੀਸਂ ਛਿਨ੍ਦਾਪੇਹੀ’’ਤਿ ਨਗਰਗੁਤ੍ਤਿਕਂ ਆਣਾਪੇਸਿ. ‘‘ਸਾਧੁ, ਦੇਵਾ’’ਤਿ ਨਗਰਗੁਤ੍ਤਿਕੋ ਤਂ ਗਾਹਾਪੇਤ੍ਵਾ ਪਚ੍ਛਾਬਾਹਂ ਗਾਲ਼੍ਹਬਨ੍ਧਨਂ ਬਨ੍ਧਾਪੇਤ੍ਵਾ ਰਤ੍ਤਵਣ੍ਣਵਿਰਲ਼ਮਾਲਾਬਨ੍ਧਕਣ੍ਠਂ ਇਟ੍ਠਕਚੁਣ੍ਣਮਕ੍ਖਿਤਸੀਸਂ ਵਜ੍ਝਪਹਟਭੇਰਿਦੇਸਿਤਮਗ੍ਗਂ ਰਥਿਕਾਯ ਰਥਿਕਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਵਿਚਰਾਪੇਤ੍ਵਾ ਕਸਾਹਿ ਤਾਲ਼ੇਨ੍ਤੋ ਆਘਾਤਨਾਭਿਮੁਖਂ ਨੇਤਿ. ‘‘ਅਯਂ ਇਮਸ੍ਮਿਂ ਨਗਰੇ ਵਿਲੁਮ੍ਪਮਾਨਕਚੋਰੋ ਗਹਿਤੋ’’ਤਿ ਕੋਲਾਹਲਂ ਅਹੋਸਿ.

ਤੇਨ ਚ ਸਮਯੇਨ ਤਸ੍ਮਿਂ ਨਗਰੇ ਸੁਲਸਾ ਨਾਮ ਨਗਰਸੋਭਿਨੀ ਪਾਸਾਦੇ ਠਿਤਾ ਵਾਤਪਾਨਨ੍ਤਰੇਨ ਓਲੋਕੇਨ੍ਤੀ ਤਂ ਤਥਾ ਨੀਯਮਾਨਂ ਦਿਸ੍ਵਾ ਪੁਬ੍ਬੇ ਤੇਨ ਕਤਪਰਿਚਯਾ ‘‘ਅਯਂ ਪੁਰਿਸੋ ਇਮਸ੍ਮਿਂਯੇਵ ਨਗਰੇ ਮਹਤਿਂ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਦਾਨਿ ਏਵਰੂਪਂ ਅਨਤ੍ਥਂ ਅਨਯਬ੍ਯਸਨਂ ਪਤ੍ਤੋ’’ਤਿ ਤਸ੍ਸ ਕਾਰੁਞ੍ਞਂ ਉਪ੍ਪਾਦੇਤ੍ਵਾ ਚਤ੍ਤਾਰੋ ਮੋਦਕੇ ਪਾਨੀਯਞ੍ਚ ਪੇਸੇਸਿ. ਨਗਰਗੁਤ੍ਤਿਕਸ੍ਸ ਚ ਆਰੋਚਾਪੇਸਿ – ‘‘ਤਾਵ ਅਯ੍ਯੋ ਆਗਮੇਤੁ, ਯਾਵਾਯਂ ਪੁਰਿਸੋ ਇਮੇ ਮੋਦਕੇ ਖਾਦਿਤ੍ਵਾ ਪਾਨੀਯਂ ਪਿਵਿਸ੍ਸਤੀ’’ਤਿ.

ਅਥੇਤਸ੍ਮਿਂ ਅਨ੍ਤਰੇ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦਿਬ੍ਬੇਨ ਚਕ੍ਖੁਨਾ ਓਲੋਕੇਨ੍ਤੋ ਤਸ੍ਸ ਬ੍ਯਸਨਪ੍ਪਤ੍ਤਿਂ ਦਿਸ੍ਵਾ ਕਰੁਣਾਯ ਸਞ੍ਚੋਦਿਤਮਾਨਸੋ – ‘‘ਅਯਂ ਪੁਰਿਸੋ ਅਕਤਪੁਞ੍ਞੋ ਕਤਪਾਪੋ, ਤੇਨਾਯਂ ਨਿਰਯੇ ਨਿਬ੍ਬਤ੍ਤਿਸ੍ਸਤਿ, ਮਯਿ ਪਨ ਗਤੇ ਮੋਦਕੇ ਚ ਪਾਨੀਯਞ੍ਚ ਦਤ੍ਵਾ ਭੁਮ੍ਮਦੇਵੇਸੁ ਉਪ੍ਪਜ੍ਜਿਸ੍ਸਤਿ, ਯਂਨੂਨਾਹਂ ਇਮਸ੍ਸ ਅਵਸ੍ਸਯੋ ਭਵੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਪਾਨੀਯਮੋਦਕੇਸੁ ਉਪਨੀਯਮਾਨੇਸੁ ਤਸ੍ਸ ਪੁਰਿਸਸ੍ਸ ਪੁਰਤੋ ਪਾਤੁਰਹੋਸਿ. ਸੋ ਥੇਰਂ ਦਿਸ੍ਵਾ ਪਸਨ੍ਨਮਾਨਸੋ ‘‘ਕਿਂ ਮੇ ਇਦਾਨੇਵ ਇਮੇਹਿ ਮਾਰਿਯਮਾਨਸ੍ਸ ਮੋਦਕੇਹਿ ਖਾਦਿਤੇਹਿ, ਇਦਂ ਪਨ ਪਰਲੋਕਂ ਗਚ੍ਛਨ੍ਤਸ੍ਸ ਪਾਥੇਯ੍ਯਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਮੋਦਕੇ ਚ ਪਾਨੀਯਞ੍ਚ ਥੇਰਸ੍ਸ ਦਾਪੇਸਿ. ਥੇਰੋ ਤਸ੍ਸ ਪਸਾਦਸਂਵਡ੍ਢਨਤ੍ਥਂ ਤਸ੍ਸ ਪਸ੍ਸਨ੍ਤਸ੍ਸੇਵ ਤਥਾਰੂਪੇ ਠਾਨੇ ਨਿਸੀਦਿਤ੍ਵਾ ਮੋਦਕੇ ਪਰਿਭੁਞ੍ਜਿਤ੍ਵਾ ਪਾਨੀਯਞ੍ਚ ਪਿਵਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਸੋ ਪਨ ਪੁਰਿਸੋ ਚੋਰਘਾਤਕੇਹਿ ਆਘਾਤਨਂ ਨੇਤ੍ਵਾ ਸੀਸਚ੍ਛੇਦਂ ਪਾਪਿਤੋ ਅਨੁਤ੍ਤਰੇ ਪੁਞ੍ਞਕ੍ਖੇਤ੍ਤੇ ਮਹਾਮੋਗ੍ਗਲ੍ਲਾਨਤ੍ਥੇਰੇ ਕਤੇਨ ਪੁਞ੍ਞੇਨ ਉਲ਼ਾਰੇ ਦੇਵਲੋਕੇ ਨਿਬ੍ਬਤ੍ਤਨਾਰਹੋਪਿ ਯਸ੍ਮਾ ‘‘ਸੁਲਸਂ ਆਗਮ੍ਮ ਮਯਾ ਅਯਂ ਦੇਯ੍ਯਧਮ੍ਮੋ ਲਦ੍ਧੋ’’ਤਿ ਸੁਲਸਾਯ ਗਤੇਨ ਸਿਨੇਹੇਨ ਮਰਣਕਾਲੇ ਚਿਤ੍ਤਂ ਉਪਕ੍ਕਿਲਿਟ੍ਠਂ ਅਹੋਸਿ. ਤਸ੍ਮਾ ਹੀਨਕਾਯਂ ਉਪਪਜ੍ਜਨ੍ਤੋ ਪਬ੍ਬਤਗਹਨਸਮ੍ਭੂਤੇ ਸਨ੍ਦਚ੍ਛਾਯੇ ਮਹਾਨਿਗ੍ਰੋਧਰੁਕ੍ਖੇ ਰੁਕ੍ਖਦੇਵਤਾ ਹੁਤ੍ਵਾ ਨਿਬ੍ਬਤ੍ਤਿ.

ਸੋ ਕਿਰ ਸਚੇ ਪਠਮਵਯੇ ਕੁਲਵਂਸਟ੍ਠਪਨੇ ਉਸ੍ਸੁਕ੍ਕਂ ਅਕਰਿਸ੍ਸ, ਤਸ੍ਮਿਂਯੇਵ ਨਗਰੇ ਸੇਟ੍ਠੀਨਂ ਅਗ੍ਗੋ ਅਭਵਿਸ੍ਸ, ਮਜ੍ਝਿਮਵਯੇ ਮਜ੍ਝਿਮੋ, ਪਚ੍ਛਿਮਵਯੇ ਪਚ੍ਛਿਮੋ. ਸਚੇ ਪਨ ਪਠਮਵਯੇ ਪਬ੍ਬਜਿਤੋ ਅਭਵਿਸ੍ਸ, ਅਰਹਾ ਅਭਵਿਸ੍ਸ, ਮਜ੍ਝਿਮਵਯੇ ਸਕਦਾਗਾਮੀ ਅਨਾਗਾਮੀ ਵਾ ਅਭਵਿਸ੍ਸ, ਪਚ੍ਛਿਮਵਯੇ ਸੋਤਾਪਨ੍ਨੋ ਅਭਵਿਸ੍ਸ. ਪਾਪਮਿਤ੍ਤਸਂਸਗ੍ਗੇਨ ਪਨ ਇਤ੍ਥਿਧੁਤ੍ਤੋ ਸੁਰਾਧੁਤ੍ਤੋ ਦੁਚ੍ਚਰਿਤਨਿਰਤੋ ਅਨਾਦਰਿਕੋ ਹੁਤ੍ਵਾ ਅਨੁਕ੍ਕਮੇਨ ਸਬ੍ਬਸਮ੍ਪਤ੍ਤਿਤੋ ਪਰਿਹਾਯਿਤ੍ਵਾ ਮਹਾਬ੍ਯਸਨਂ ਪਤ੍ਤੋਤਿ ਵਦਨ੍ਤਿ.

ਅਥ ਸੋ ਅਪਰੇਨ ਸਮਯੇਨ ਸੁਲਸਂ ਉਯ੍ਯਾਨਗਤਂ ਦਿਸ੍ਵਾ ਸਞ੍ਜਾਤਕਾਮਰਾਗੋ ਅਨ੍ਧਕਾਰਂ ਮਾਪੇਤ੍ਵਾ ਤਂ ਅਤ੍ਤਨੋ ਭਵਨਂ ਨੇਤ੍ਵਾ ਸਤ੍ਤਾਹਂ ਤਾਯ ਸਦ੍ਧਿਂ ਸਂਵਾਸਂ ਕਪ੍ਪੇਸਿ, ਅਤ੍ਤਾਨਞ੍ਚਸ੍ਸਾ ਆਰੋਚੇਸਿ. ਤਸ੍ਸਾ ਮਾਤਾ ਤਂ ਅਪਸ੍ਸਨ੍ਤੀ ਰੋਦਮਾਨਾ ਇਤੋ ਚਿਤੋ ਚ ਪਰਿਬ੍ਭਮਤਿ. ਤਂ ਦਿਸ੍ਵਾ ਮਹਾਜਨੋ ‘‘ਅਯ੍ਯੋ ਮਹਾਮੋਗ੍ਗਲ੍ਲਾਨੋ ਮਹਿਦ੍ਧਿਕੋ ਮਹਾਨੁਭਾਵੋ ਤਸ੍ਸਾ ਗਤਿਂ ਜਾਨੇਯ੍ਯ, ਤਂ ਉਪਸਙ੍ਕਮਿਤ੍ਵਾ ਪੁਚ੍ਛੇਯ੍ਯਾਸੀ’’ਤਿ ਆਹ. ਸਾ ‘‘ਸਾਧੁ ਅਯ੍ਯੋ’’ਤਿ ਥੇਰਂ ਉਪਸਙ੍ਕਮਿਤ੍ਵਾ ਤਮਤ੍ਥਂ ਪੁਚ੍ਛਿ. ਥੇਰੋ ‘‘ਇਤੋ ਸਤ੍ਤਮੇ ਦਿਵਸੇ ਵੇਲ਼ੁਵਨਮਹਾਵਿਹਾਰੇ ਭਗਵਤਿ ਧਮ੍ਮਂ ਦੇਸੇਨ੍ਤੇ ਪਰਿਸਪਰਿਯਨ੍ਤੇ ਪਸ੍ਸਿਸ੍ਸਸੀ’’ਤਿ ਆਹ. ਅਥ ਸੁਲਸਾ ਤਂ ਦੇਵਪੁਤ੍ਤਂ ਅਵੋਚ – ‘‘ਅਯੁਤ੍ਤਂ ਮਯ੍ਹਂ ਤਵ ਭਵਨੇ ਵਸਨ੍ਤਿਯਾ, ਅਜ੍ਜ ਸਤ੍ਤਮੋ ਦਿਵਸੋ, ਮਮ ਮਾਤਾ ਮਂ ਅਪਸ੍ਸਨ੍ਤੀ ਪਰਿਦੇਵਸੋਕਸਮਾਪਨ੍ਨਾ ਭਵਿਸ੍ਸਤਿ, ਸਾਧੁ ਮਂ, ਦੇਵ, ਤਤ੍ਥੇਵ ਨੇਹੀ’’ਤਿ. ਸੋ ਤਂ ਨੇਤ੍ਵਾ ਵੇਲ਼ੁਵਨੇ ਭਗਵਤਿ ਧਮ੍ਮਂ ਦੇਸੇਨ੍ਤੇ ਪਰਿਸਪਰਿਯਨ੍ਤੇ ਠਪੇਨ੍ਤ੍ਵਾ ਅਦਿਸ੍ਸਮਾਨਰੂਪੋ ਅਟ੍ਠਾਸਿ.

ਤਤੋ ਮਹਾਜਨੋ ਸੁਲਸਂ ਦਿਸ੍ਵਾ ਏਵਮਾਹ – ‘‘ਅਮ੍ਮ ਸੁਲਸੇ, ਤ੍ਵਂ ਏਤ੍ਤਕਂ ਦਿਵਸਂ ਕੁਹਿਂ ਗਤਾ? ਤਵ ਮਾਤਾ ਤ੍ਵਂ ਅਪਸ੍ਸਨ੍ਤੀ ਪਰਿਦੇਵਸੋਕਸਮਾਪਨ੍ਨਾ ਉਮ੍ਮਾਦਪ੍ਪਤ੍ਤਾ ਵਿਯ ਜਾਤਾ’’ਤਿ. ਸਾ ਤਂ ਪਵਤ੍ਤਿਂ ਮਹਾਜਨਸ੍ਸ ਆਚਿਕ੍ਖਿ. ਮਹਾਜਨੇਨ ਚ ‘‘ਕਥਂ ਸੋ ਪੁਰਿਸੋ ਤਥਾਪਾਪਪਸੁਤੋ ਅਕਤਕੁਸਲੋ ਦੇਵੂਪਪਤ੍ਤਿਂ ਪਟਿਲਭਤੀ’’ਤਿ ਵੁਤ੍ਤੇ ਸੁਲਸਾ ‘‘ਮਯਾ ਦਾਪਿਤੇ ਮੋਦਕੇ ਪਾਨੀਯਞ੍ਚ ਅਯ੍ਯਸ੍ਸ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਦਤ੍ਵਾ ਤੇਨ ਪੁਞ੍ਞੇਨ ਦੇਵੂਪਪਤ੍ਤਿਂ ਪਟਿਲਭਤੀ’’ਤਿ ਆਹ. ਤਂ ਸੁਤ੍ਵਾ ਮਹਾਜਨੋ ਅਚ੍ਛਰਿਯਬ੍ਭੁਤਚਿਤ੍ਤਜਾਤੋ ਅਹੋਸਿ – ‘‘ਅਰਹਨ੍ਤੋ ਨਾਮ ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸ, ਯੇਸੁ ਅਪ੍ਪਕੋਪਿ ਕਤੋ ਕਾਰੋ ਸਤ੍ਤਾਨਂ ਦੇਵੂਪਪਤ੍ਤਿਂ ਆਵਹਤੀ’’ਤਿ ਉਲ਼ਾਰਂ ਪੀਤਿਸੋਮਨਸ੍ਸਂ ਪਟਿਸਂਵੇਦੇਸਿ. ਭਿਕ੍ਖੂ ਤਮਤ੍ਥਂ ਭਗਵਤੋ ਆਰੋਚੇਸੁਂ. ਤਤੋ ਭਗਵਾ ਇਮਿਸ੍ਸਾ ਅਟ੍ਠੁਪ੍ਪਤ੍ਤਿਯਾ –

੧. ‘‘ਖੇਤ੍ਤੂਪਮਾ ਅਰਹਨ੍ਤੋ, ਦਾਯਕਾ ਕਸ੍ਸਕੂਪਮਾ;

ਬੀਜੂਪਮਂ ਦੇਯ੍ਯਧਮ੍ਮਂ, ਏਤ੍ਤੋ ਨਿਬ੍ਬਤ੍ਤਤੇ ਫਲਂ.

੨. ‘‘ਏਤਂ ਬੀਜਂ ਕਸੀ ਖੇਤ੍ਤਂ, ਪੇਤਾਨਂ ਦਾਯਕਸ੍ਸ ਚ;

ਤਂ ਪੇਤਾ ਪਰਿਭੁਞ੍ਜਨ੍ਤਿ, ਦਾਤਾ ਪੁਞ੍ਞੇਨ ਵਡ੍ਢਤਿ.

੩. ‘‘ਇਧੇਵ ਕੁਸਲਂ ਕਤ੍ਵਾ, ਪੇਤੇ ਚ ਪਟਿਪੂਜਿਯ;

ਸਗ੍ਗਞ੍ਚ ਕਮਤਿਟ੍ਠਾਨਂ, ਕਮ੍ਮਂ ਕਤ੍ਵਾਨ ਭਦ੍ਦਕ’’ਨ੍ਤਿ. – ਇਮਾ ਗਾਥਾ ਅਭਾਸਿ;

੧. ਤਤ੍ਥ ਖੇਤ੍ਤੂਪਮਾਤਿ ਖਿਤ੍ਤਂ ਵੁਤ੍ਤਂ ਬੀਜਂ ਤਾਯਤਿ ਮਹਪ੍ਫਲਭਾਵਕਰਣੇਨ ਰਕ੍ਖਤੀਤਿ ਖੇਤ੍ਤਂ, ਸਾਲਿਬੀਜਾਦੀਨਂ ਵਿਰੁਹਨਟ੍ਠਾਨਂ. ਤਂ ਉਪਮਾ ਏਤੇਸਨ੍ਤਿ ਖੇਤ੍ਤੂਪਮਾ, ਕੇਦਾਰਸਦਿਸਾਤਿ ਅਤ੍ਥੋ. ਅਰਹਨ੍ਤੋਤਿ ਖੀਣਾਸਵਾ. ਤੇ ਹਿ ਕਿਲੇਸਾਰੀਨਂ ਸਂਸਾਰਚਕ੍ਕਸ੍ਸ ਅਰਾਨਞ੍ਚ ਹਤਤ੍ਤਾ, ਤਤੋ ਏਵ ਆਰਕਤ੍ਤਾ, ਪਚ੍ਚਯਾਦੀਨਂ ਅਰਹਤ੍ਤਾ, ਪਾਪਕਰਣੇ ਰਹਾਭਾਵਾ ਚ ‘‘ਅਰਹਨ੍ਤੋ’’ਤਿ ਵੁਚ੍ਚਨ੍ਤਿ. ਤਤ੍ਥ ਯਥਾ ਖੇਤਞ੍ਹਿ ਤਿਣਾਦਿਦੋਸਰਹਿਤਂ ਸ੍ਵਾਭਿਸਙ੍ਖਤਬੀਜਮ੍ਹਿ ਵੁਤ੍ਤੇ ਉਤੁਸਲਿਲਾਦਿਪਚ੍ਚਯਨ੍ਤਰੂਪੇਤਂ ਕਸ੍ਸਕਸ੍ਸ ਮਹਪ੍ਫਲਂ ਹੋਤਿ, ਏਵਂ ਖੀਣਾਸਵਸਨ੍ਤਾਨੋ ਲੋਭਾਦਿਦੋਸਰਹਿਤੋ ਸ੍ਵਾਭਿਸਙ੍ਖਤੇ ਦੇਯ੍ਯਧਮ੍ਮਬੀਜੇ ਵੁਤ੍ਤੇ ਕਾਲਾਦਿਪਚ੍ਚਯਨ੍ਤਰਸਹਿਤੋ ਦਾਯਕਸ੍ਸ ਮਹਪ੍ਫਲੋ ਹੋਤਿ. ਤੇਨਾਹ ਭਗਵਾ ‘‘ਖੇਤ੍ਤੂਪਮਾ ਅਰਹਨ੍ਤੋ’’ਤਿ. ਉਕ੍ਕਟ੍ਠਨਿਦ੍ਦੇਸੋ ਅਯਂ ਤਸ੍ਸ ਸੇਖਾਦੀਨਮ੍ਪਿ ਖੇਤ੍ਤਭਾਵਾਪਟਿਕ੍ਖੇਪਤੋ.

ਦਾਯਕਾਤਿ ਚੀਵਰਾਦੀਨਂ ਪਚ੍ਚਯਾਨਂ ਦਾਤਾਰੋ ਪਰਿਚ੍ਚਜਨਕਾ, ਤੇਸਂ ਪਰਿਚ੍ਚਾਗੇਨ ਅਤ੍ਤਨੋ ਸਨ੍ਤਾਨੇ ਲੋਭਾਦੀਨਂ ਪਰਿਚ੍ਚਜਨਕਾ ਛੇਦਨਕਾ, ਤਤੋ ਵਾ ਅਤ੍ਤਨੋ ਸਨ੍ਤਾਨਸ੍ਸ ਸੋਧਕਾ, ਰਕ੍ਖਕਾ ਚਾਤਿ ਅਤ੍ਥੋ. ਕਸ੍ਸਕੂਪਮਾਤਿ ਕਸ੍ਸਕਸਦਿਸਾ. ਯਥਾ ਕਸ੍ਸਕੋ ਸਾਲਿਖੇਤ੍ਤਾਦੀਨਿ ਕਸਿਤ੍ਵਾ ਯਥਾਕਾਲਞ੍ਚ ਵੁਤ੍ਤੁਦਕਦਾਨਨੀਹਰਣਨਿਧਾਨਰਕ੍ਖਣਾਦੀਹਿ ਅਪ੍ਪਮਜ੍ਜਨ੍ਤੋ ਉਲ਼ਾਰਂ ਵਿਪੁਲਞ੍ਚ ਸਸ੍ਸਫਲਂ ਪਟਿਲਭਤਿ, ਏਵਂ ਦਾਯਕੋਪਿ ਅਰਹਨ੍ਤੇਸੁ ਦੇਯ੍ਯਧਮ੍ਮਪਰਿਚ੍ਚਾਗੇਨ ਪਾਰਿਚਰਿਯਾਯ ਚ ਅਪ੍ਪਮਜ੍ਜਨ੍ਤੋ ਉਲ਼ਾਰਂ ਵਿਪੁਲਞ੍ਚ ਦਾਨਫਲਂ ਪਟਿਲਭਤਿ. ਤੇਨ ਵੁਤ੍ਤਂ ‘‘ਦਾਯਕਾ ਕਸ੍ਸਕੂਪਮਾ’’ਤਿ.

ਬੀਜੂਪਮਂ ਦੇਯ੍ਯਧਮ੍ਮਨ੍ਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ, ਬੀਜਸਦਿਸੋ ਦੇਯ੍ਯਧਮ੍ਮੋਤਿ ਅਤ੍ਥੋ. ਅਨ੍ਨਪਾਨਾਦਿਕਸ੍ਸ ਹਿ ਦਸਵਿਧਸ੍ਸ ਦਾਤਬ੍ਬਵਤ੍ਥੁਨੋ ਏਤਂ ਨਾਮਂ. ਏਤ੍ਤੋ ਨਿਬ੍ਬਤ੍ਤਤੇ ਫਲਨ੍ਤਿ ਏਤਸ੍ਮਾ ਦਾਯਕਪਟਿਗ੍ਗਾਹਕਦੇਯ੍ਯਧਮ੍ਮਪਰਿਚ੍ਚਾਗਤੋ ਦਾਨਫਲਂ ਨਿਬ੍ਬਤ੍ਤਤਿ ਚੇਵ ਉਪ੍ਪਜ੍ਜਤਿ ਚ, ਚਿਰਤਰਪਬਨ੍ਧਵਸੇਨ ਪਵਤ੍ਤਤਿ ਚਾਤਿ ਅਤ੍ਥੋ. ਏਤ੍ਥ ਚ ਯਸ੍ਮਾ ਪਰਿਚ੍ਚਾਗਚੇਤਨਾਭਿਸਙ੍ਖਤਸ੍ਸ ਅਨ੍ਨਪਾਨਾਦਿਵਤ੍ਥੁਨੋ ਭਾਵੋ, ਨ ਇਤਰਸ੍ਸ, ਤਸ੍ਮਾ ‘‘ਬੀਜੂਪਮਂ ਦੇਯ੍ਯਧਮ੍ਮ’’ਨ੍ਤਿ ਦੇਯ੍ਯਧਮ੍ਮਗ੍ਗਹਣਂ ਕਤਂ. ਤੇਨ ਦੇਯ੍ਯਧਮ੍ਮਾਪਦੇਸੇਨ ਦੇਯ੍ਯਧਮ੍ਮਵਤ੍ਥੁਵਿਸਯਾਯ ਪਰਿਚ੍ਚਾਗਚੇਤਨਾਯਯੇਵ ਬੀਜਭਾਵੋ ਦਟ੍ਠਬ੍ਬੋ. ਸਾ ਹਿ ਪਟਿਸਨ੍ਧਿਆਦਿਪ੍ਪਭੇਦਸ੍ਸ ਤਸ੍ਸ ਨਿਸ੍ਸਯਾਰਮ੍ਮਣਪ੍ਪਭੇਦਸ੍ਸ ਚ ਫਲਸ੍ਸ ਨਿਪ੍ਫਾਦਿਕਾ, ਨ ਦੇਯ੍ਯਧਮ੍ਮੋਤਿ.

੨. ਏਤਂ ਬੀਜਂ ਕਸੀ ਖੇਤ੍ਤਨ੍ਤਿ ਯਥਾਵੁਤ੍ਤਂ ਬੀਜਂ, ਯਥਾਵੁਤ੍ਤਞ੍ਚ ਖੇਤ੍ਤਂ, ਤਸ੍ਸ ਬੀਜਸ੍ਸ ਤਸ੍ਮਿਂ ਖੇਤ੍ਤੇ ਵਪਨਪਯੋਗਸਙ੍ਖਾਤਾ ਕਸਿ ਚਾਤਿ ਅਤ੍ਥੋ. ਏਤਂ ਤਯਂ ਕੇਸਂ ਇਚ੍ਛਿਤਬ੍ਬਨ੍ਤਿ ਆਹ ‘‘ਪੇਤਾਨਂ ਦਾਯਕਸ੍ਸ ਚਾ’’ਤਿ. ਯਦਿ ਦਾਯਕੋ ਪੇਤੇ ਉਦ੍ਦਿਸ੍ਸ ਦਾਨਂ ਦੇਤਿ, ਪੇਤਾਨਞ੍ਚ ਦਾਯਕਸ੍ਸ ਚ, ਯਦਿ ਨ ਪੇਤੇ ਉਦ੍ਦਿਸ੍ਸ ਦਾਨਂ ਦੇਤਿ, ਦਾਯਕਸ੍ਸੇਵ ਏਤਂ ਬੀਜਂ ਏਸਾ ਕਸਿ ਏਤਂ ਖੇਤ੍ਤਂ ਉਪਕਾਰਾਯ ਹੋਤੀਤਿ ਅਧਿਪ੍ਪਾਯੋ. ਇਦਾਨਿ ਤਂ ਉਪਕਾਰਂ ਦਸ੍ਸੇਤੁਂ ‘‘ਤਂ ਪੇਤਾ ਪਰਿਭੁਞ੍ਜਨ੍ਤਿ, ਦਾਤਾ ਪੁਞ੍ਞੇਨ ਵਡ੍ਢਤੀ’’ਤਿ ਵੁਤ੍ਤਂ. ਤਤ੍ਥ ਤਂ ਪੇਤਾ ਪਰਿਭੁਞ੍ਜਨ੍ਤੀਤਿ ਦਾਯਕੇਨ ਪੇਤੇ ਉਦ੍ਦਿਸ੍ਸ ਦਾਨੇ ਦਿਨ੍ਨੇ ਯਥਾਵੁਤ੍ਤਖੇਤ੍ਤਕਸਿਬੀਜਸਮ੍ਪਤ੍ਤਿਯਾ ਅਨੁਮੋਦਨਾਯ ਚ ਯਂ ਪੇਤਾਨਂ ਉਪਕਪ੍ਪਤਿ, ਤਂ ਦਾਨਫਲਂ ਪੇਤਾ ਪਰਿਭੁਞ੍ਜਨ੍ਤਿ. ਦਾਤਾ ਪੁਞ੍ਞੇਨ ਵਡ੍ਢਤੀਤਿ ਦਾਤਾ ਪਨ ਅਤ੍ਤਨੋ ਦਾਨਮਯਪੁਞ੍ਞਨਿਮਿਤ੍ਤਂ ਦੇਵਮਨੁਸ੍ਸੇਸੁ ਭੋਗਸਮ੍ਪਤ੍ਤਿਆਦਿਨਾ ਪੁਞ੍ਞਫਲੇਨ ਅਭਿਵਡ੍ਢਤਿ. ਪੁਞ੍ਞਫਲਮ੍ਪਿ ਹਿ ‘‘ਕੁਸਲਾਨਂ, ਭਿਕ੍ਖਵੇ, ਧਮ੍ਮਾਨਂ ਸਮਾਦਾਨਹੇਤੁ ਏਵਮਿਦਂ ਪੁਞ੍ਞਂ ਪਵਡ੍ਢਤੀ’’ਤਿਆਦੀਸੁ (ਦੀ. ਨਿ. ੩.੮੦) ਪੁਞ੍ਞਨ੍ਤਿ ਵੁਚ੍ਚਤਿ.

੩. ਇਧੇਵ ਕੁਸਲਂ ਕਤ੍ਵਾਤਿ ਅਨਵਜ੍ਜਸੁਖਵਿਪਾਕਟ੍ਠੇਨ ਕੁਸਲਂ ਪੇਤਾਨਂ ਉਦ੍ਦਿਸਨਵਸੇਨ ਦਾਨਮਯਂ ਪੁਞ੍ਞਂ ਉਪਚਿਨਿਤ੍ਵਾ ਇਧੇਵ ਇਮਸ੍ਮਿਂਯੇਵ ਅਤ੍ਤਭਾਵੇ. ਪੇਤੇ ਚ ਪਟਿਪੂਜਿਯਾਤਿ ਪੇਤੇ ਉਦ੍ਦਿਸ੍ਸ ਦਾਨੇਨ ਸਮ੍ਮਾਨੇਤ੍ਵਾ ਅਨੁਭੁਯ੍ਯਮਾਨਦੁਕ੍ਖਤੋ ਤੇ ਮੋਚੇਤ੍ਵਾ. ਪੇਤੇ ਹਿ ਉਦ੍ਦਿਸ੍ਸ ਦਿਯ੍ਯਮਾਨਂ ਦਾਨਂ ਤੇਸਂ ਪੂਜਾ ਨਾਮ ਹੋਤਿ. ਤੇਨਾਹ – ‘‘ਅਮ੍ਹਾਕਞ੍ਚ ਕਤਾ ਪੂਜਾ’’ਤਿ (ਪੇ. ਵ. ੧੮), ‘‘ਪੇਤਾਨਂ ਪੂਜਾ ਚ ਕਤਾ ਉਲ਼ਾਰਾ’’ਤਿ (ਪੇ. ਵ. ੨੫) ਚ. ‘‘ਪੇਤੇ ਚਾ’’ਤਿ ਚ-ਸਦ੍ਦੇਨ ‘‘ਪਿਯੋ ਚ ਹੋਤਿ ਮਨਾਪੋ, ਅਭਿਗਮਨੀਯੋ ਚ ਹੋਤਿ ਵਿਸ੍ਸਾਸਨੀਯੋ, ਭਾਵਨੀਯੋ ਚ ਹੋਤਿ ਗਰੁਕਾਤਬ੍ਬੋ, ਪਾਸਂਸੋ ਚ ਹੋਤਿ ਕਿਤ੍ਤਨੀਯੋ ਵਿਞ੍ਞੂਨ’’ਨ੍ਤਿ ਏਵਮਾਦਿਕੇ ਦਿਟ੍ਠਧਮ੍ਮਿਕੇ ਦਾਨਾਨਿਸਂਸੇ ਸਙ੍ਗਣ੍ਹਾਤਿ. ਸਗ੍ਗਞ੍ਚ ਕਮਤਿ ਠਾਨਂ, ਕਮ੍ਮਂ ਕਤ੍ਵਾਨ ਭਦ੍ਦਕਨ੍ਤਿ ਕਲ੍ਯਾਣਂ ਕੁਸਲਕਮ੍ਮਂ ਕਤ੍ਵਾ ਦਿਬ੍ਬੇਹਿ ਆਯੁਆਦੀਹਿ ਦਸਹਿ ਠਾਨੇਹਿ ਸੁਟ੍ਠੁ ਅਗ੍ਗਤ੍ਤਾ ‘‘ਸਗ੍ਗ’’ਨ੍ਤਿ ਲਦ੍ਧਨਾਮਂ ਕਤਪੁਞ੍ਞਾਨਂ ਨਿਬ੍ਬਤ੍ਤਨਟ੍ਠਾਨਂ ਦੇਵਲੋਕਂ ਕਮਤਿ ਉਪਪਜ੍ਜਨਵਸੇਨ ਉਪਗਚ੍ਛਤਿ.

ਏਤ੍ਥ ਚ ‘‘ਕੁਸਲਂ ਕਤ੍ਵਾ’’ਤਿ ਵਤ੍ਵਾ ਪੁਨ ‘‘ਕਮ੍ਮਂ ਕਤ੍ਵਾਨ ਭਦ੍ਦਕ’’ਨ੍ਤਿ ਵਚਨਂ ‘‘ਦੇਯ੍ਯਧਮ੍ਮਪਰਿਚ੍ਚਾਗੋ ਵਿਯ ਪਤ੍ਤਿਦਾਨਵਸੇਨ ਦਾਨਧਮ੍ਮਪਰਿਚ੍ਚਾਗੋਪਿ ਦਾਨਮਯਕੁਸਲਕਮ੍ਮਮੇਵਾ’’ਤਿ ਦਸ੍ਸਨਤ੍ਥਨ੍ਤਿ ਦਟ੍ਠਬ੍ਬਂ. ਕੇਚਿ ਪਨੇਤ੍ਥ ‘‘ਪੇਤਾਤਿ ਅਰਹਨ੍ਤੋ ਅਧਿਪ੍ਪੇਤਾ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ ‘‘ਪੇਤਾ’’ਤਿ ਖੀਣਾਸਵਾਨਂ ਆਗਤਟ੍ਠਾਨਸ੍ਸੇਵ ਅਭਾਵਤੋ, ਬੀਜਾਦਿਭਾਵਸ੍ਸ ਚ ਦਾਯਕਸ੍ਸ ਵਿਯ ਤੇਸਂ ਅਯੁਜ੍ਜਮਾਨਤ੍ਤਾ, ਪੇਤਯੋਨਿਕਾਨਂ ਯੁਜ੍ਜਮਾਨਤ੍ਤਾ ਚ. ਦੇਸਨਾਪਰਿਯੋਸਾਨੇ ਦੇਵਪੁਤ੍ਤਂ ਸੁਲਸਞ੍ਚ ਆਦਿਂ ਕਤ੍ਵਾ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸੀਤਿ.

ਖੇਤ੍ਤੂਪਮਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੨. ਸੂਕਰਮੁਖਪੇਤਵਤ੍ਥੁਵਣ੍ਣਨਾ

ਕਾਯੋ ਤੇ ਸਬ੍ਬਸੋਵਣ੍ਣੋਤਿ ਇਦਂ ਸਤ੍ਥਰਿ ਰਾਜਗਹਂ ਉਪਨਿਸ੍ਸਾਯ ਵੇਲ਼ੁਵਨੇ ਕਲਨ੍ਦਕਨਿਵਾਪੇ ਵਿਹਰਨ੍ਤੇ ਅਞ੍ਞਤਰਂ ਸੂਕਰਮੁਖਪੇਤਂ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ਕਸ੍ਸਪਸ੍ਸ ਭਗਵਤੋ ਸਾਸਨੇ ਏਕੋ ਭਿਕ੍ਖੁ ਕਾਯੇਨ ਸਞ੍ਞਤੋ ਅਹੋਸਿ, ਵਾਚਾਯ ਅਸਞ੍ਞਤੋ, ਭਿਕ੍ਖੂ ਅਕ੍ਕੋਸਤਿ ਪਰਿਭਾਸਤਿ. ਸੋ ਕਾਲਂ ਕਤ੍ਵਾ ਨਿਰਯੇ ਨਿਬ੍ਬਤ੍ਤੋ, ਏਕਂ ਬੁਦ੍ਧਨ੍ਤਰਂ ਤਤ੍ਥ ਪਚ੍ਚਿਤ੍ਵਾ ਤਤੋ ਚਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਸਮੀਪੇ ਗਿਜ੍ਝਕੂਟਪਬ੍ਬਤਪਾਦੇ ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨ ਖੁਪ੍ਪਿਪਾਸਾਭਿਭੂਤੋ ਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਕਾਯੋ ਸੁਵਣ੍ਣਵਣ੍ਣੋ ਅਹੋਸਿ, ਮੁਖਂ ਸੂਕਰਮੁਖਸਦਿਸਂ. ਅਥਾਯਸ੍ਮਾ ਨਾਰਦੋ ਗਿਜ੍ਝਕੂਟੇ ਪਬ੍ਬਤੇ ਵਸਨ੍ਤੋ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਪਤ੍ਤਚੀਵਰਮਾਦਾਯ ਰਾਜਗਹਂ ਪਿਣ੍ਡਾਯ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਤਂ ਪੇਤਂ ਦਿਸ੍ਵਾ ਤੇਨ ਕਤਕਮ੍ਮਂ ਪੁਚ੍ਛਨ੍ਤੋ –

੪. ‘‘ਕਾਯੋ ਤੇ ਸਬ੍ਬਸੋਵਣ੍ਣੋ, ਸਬ੍ਬਾ ਓਭਾਸਤੇ ਦਿਸਾ;

ਮੁਖਂ ਤੇ ਸੂਕਰਸ੍ਸੇਵ, ਕਿਂ ਕਮ੍ਮਮਕਰੀ ਪੁਰੇ’’ਤਿ. –

ਗਾਥਮਾਹ. ਤਤ੍ਥ ਕਾਯੋ ਤੇ ਸਬ੍ਬਸੋਵਣ੍ਣੋਤਿ ਤਵ ਕਾਯੋ ਦੇਹੋ ਸਬ੍ਬੋ ਸੁਵਣ੍ਣਵਣ੍ਣੋ ਉਤ੍ਤਤ੍ਤਕਨਕਸਨ੍ਨਿਭੋ. ਸਬ੍ਬਾ ਓਭਾਸਤੇ ਦਿਸਾਤਿ ਤਸ੍ਸ ਪਭਾਯ ਸਬ੍ਬਾਪਿ ਦਿਸਾ ਸਮਨ੍ਤਨ੍ਤੋ ਓਭਾਸਤਿ ਵਿਜ੍ਜੋਤਤਿ. ਓਭਾਸਤੇਤਿ ਵਾ ਅਨ੍ਤੋਗਧਹੋਤੁਅਤ੍ਥਮਿਦਂ ਪਦਨ੍ਤਿ ‘‘ਤੇ ਕਾਯੋ ਸਬ੍ਬਸੋਵਣ੍ਣੋ ਸਬ੍ਬਾ ਦਿਸਾ ਓਭਾਸੇਤਿ ਵਿਜ੍ਜੋਤੇਤੀ’’ਤਿ ਅਤ੍ਥੋ ਦਟ੍ਠਬ੍ਬੋ. ਮੁਖਂ ਤੇ ਸੂਕਰਸ੍ਸੇਵਾਤਿ ਮੁਖਂ ਪਨ ਤੇ ਸੂਕਰਸ੍ਸ ਵਿਯ, ਸੂਕਰਮੁਖਸਦਿਸਂ ਤਵ ਮੁਖਨ੍ਤਿ ਅਤ੍ਥੋ. ਕਿਂ ਕਮ੍ਮਮਕਰੀ ਪੁਰੇਤਿ ‘‘ਤ੍ਵਂ ਪੁਬ੍ਬੇ ਅਤੀਤਜਾਤਿਯਂ ਕੀਦਿਸਂ ਕਮ੍ਮਂ ਅਕਾਸੀ’’ਤਿ ਪੁਚ੍ਛਤਿ.

ਏਵਂ ਥੇਰੇਨ ਸੋ ਪੇਤੋ ਕਤਕਮ੍ਮਂ ਪੁਟ੍ਠੋ ਗਾਥਾਯ ਵਿਸ੍ਸਜ੍ਜੇਨ੍ਤੋ –

੫. ‘‘ਕਾਯੇਨ ਸਞ੍ਞਤੋ ਆਸਿਂ, ਵਾਚਾਯਾਸਿਮਸਞ੍ਞਤੋ;

ਤੇਨ ਮੇਤਾਦਿਸੋ ਵਣ੍ਣੋ, ਯਥਾ ਪਸ੍ਸਸਿ ਨਾਰਦਾ’’ਤਿ. –

ਆਹ. ਤਤ੍ਥ ਕਾਯੇਨ ਸਞ੍ਞਤੋ ਆਸਿਨ੍ਤਿ ਕਾਯਿਕੇਨ ਸਂਯਮੇਨ ਸਂਯਤੋ ਕਾਯਦ੍ਵਾਰਿਕੇਨ ਸਂਵਰੇਨ ਸਂਵੁਤੋ ਅਹੋਸਿਂ. ਵਾਚਾਯਾਸਿਮਸਞ੍ਞਤੋਤਿ ਵਾਚਾਯ ਅਸਞ੍ਞਤੋ ਵਾਚਸਿਕੇਨ ਅਸਂਵਰੇਨ ਸਮਨ੍ਨਾਗਤੋ ਅਹੋਸਿਂ. ਤੇਨਾਤਿ ਤੇਨ ਉਭਯੇਨ ਸਂਯਮੇਨ ਅਸਂਯਮੇਨ ਚ. ਮੇਤਿ ਮਯ੍ਹਂ. ਏਤਾਦਿਸੋ ਵਣ੍ਣੋਤਿ ਏਦਿਸੋ. ਯਥਾ ਤ੍ਵਂ, ਨਾਰਦ, ਪਚ੍ਚਕ੍ਖਤੋ ਪਸ੍ਸਸਿ, ਏਵਰੂਪੋ, ਕਾਯੇਨ ਮਨੁਸ੍ਸਸਣ੍ਠਾਨੋ ਸੁਵਣ੍ਣਵਣ੍ਣੋ, ਮੁਖੇਨ ਸੂਕਰਸਦਿਸੋ ਆਸਿਨ੍ਤਿ ਯੋਜਨਾ. ਵਣ੍ਣਸਦ੍ਦੋ ਹਿ ਇਧ ਛਵਿਯਂ ਸਣ੍ਠਾਨੇ ਚ ਦਟ੍ਠਬ੍ਬੋ.

ਏਵਂ ਪੇਤੋ ਥੇਰੇਨ ਪੁਚ੍ਛਿਤੋ ਤਮਤ੍ਥਂ ਵਿਸ੍ਸਜ੍ਜੇਤ੍ਵਾ ਤਮੇਵ ਕਾਰਣਂ ਕਤ੍ਵਾ ਥੇਰਸ੍ਸ ਓਵਾਦਂ ਦੇਨ੍ਤੋ –

੬. ‘‘ਤਂ ਤ੍ਯਾਹਂ ਨਾਰਦ ਬ੍ਰੂਮਿ, ਸਾਮਂ ਦਿਟ੍ਠਮਿਦਂ ਤਯਾ;

ਮਾਕਾਸਿ ਮੁਖਸਾ ਪਾਪਂ, ਮਾ ਖੋ ਸੂਕਰਮੁਖੋ ਅਹੂ’’ਤਿ. –

ਗਾਥਮਾਹ. ਤਤ੍ਥ ਤਨ੍ਤਿ ਤਸ੍ਮਾ. ਤ੍ਯਾਹਨ੍ਤਿ ਤੇ ਅਹਂ. ਨਾਰਦਾਤਿ ਥੇਰਂ ਆਲਪਤਿ. ਬ੍ਰੂਮੀਤਿ ਕਥੇਮਿ. ਸਾਮਨ੍ਤਿ ਸਯਮੇਵ. ਇਦਨ੍ਤਿ ਅਤ੍ਤਨੋ ਸਰੀਰਂ ਸਨ੍ਧਾਯ ਵਦਤਿ. ਅਯਞ੍ਹੇਤ੍ਥ ਅਤ੍ਥੋ – ਯਸ੍ਮਾ, ਭਨ੍ਤੇ ਨਾਰਦ, ਇਦਂ ਮਮ ਸਰੀਰਂ ਗਲਤੋ ਪਟ੍ਠਾਯ ਹੇਟ੍ਠਾ ਮਨੁਸ੍ਸਸਣ੍ਠਾਨਂ, ਉਪਰਿ ਸੂਕਰਸਣ੍ਠਾਨਂ, ਤਯਾ ਪਚ੍ਚਕ੍ਖਤੋਵ ਦਿਟ੍ਠਂ, ਤਸ੍ਮਾ ਤੇ ਅਹਂ ਓਵਾਦਵਸੇਨ ਵਦਾਮੀਤਿ. ਕਿਨ੍ਤਿ ਚੇਤਿ ਆਹ ‘‘ਮਾਕਾਸਿ ਮੁਖਸਾ ਪਾਪਂ, ਮਾ ਖੋ ਸੂਕਰਮੁਖੋ ਅਹੂ’’ਤਿ. ਤਤ੍ਥ ਮਾਤਿ ਪਟਿਸੇਧੇ ਨਿਪਾਤੋ. ਮੁਖਸਾਤਿ ਮੁਖੇਨ. ਖੋਤਿ ਅਵਧਾਰਣੇ, ਵਾਚਾਯ ਪਾਪਕਮ੍ਮਂ ਮਾਕਾਸਿ ਮਾ ਕਰੋਹਿ. ਮਾ ਖੋ ਸੂਕਰਮੁਖੋ ਅਹੂਤਿ ਅਹਂ ਵਿਯ ਸੂਕਰਮੁਖੋ ਮਾ ਅਹੋਸਿਯੇਵ. ਸਚੇ ਪਨ ਤ੍ਵਂ ਮੁਖਰੋ ਹੁਤ੍ਵਾ ਵਾਚਾਯ ਪਾਪਂ ਕਰੇਯ੍ਯਾਸਿ, ਏਕਂਸੇਨ ਸੂਕਰਮੁਖੋ ਭਵੇਯ੍ਯਾਸਿ, ਤਸ੍ਮਾ ਮਾਕਾਸਿ ਮੁਖਸਾ ਪਾਪਨ੍ਤਿ ਫਲਪਟਿਸੇਧਨਮੁਖੇਨਪਿ ਹੇਤੁਮੇਵ ਪਟਿਸੇਧੇਤਿ.

ਅਥਾਯਸ੍ਮਾ ਨਾਰਦੋ ਰਾਜਗਹੇ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਚਤੁਪਰਿਸਮਜ੍ਝੇ ਨਿਸਿਨ੍ਨਸ੍ਸ ਸਤ੍ਥੁਨੋ ਤਮਤ੍ਥਂ ਆਰੋਚੇਸਿ. ਸਤ੍ਥਾ, ‘‘ਨਾਰਦ, ਪੁਬ੍ਬੇਵ ਮਯਾ ਸੋ ਸਤ੍ਥੋ ਦਿਟ੍ਠੋ’’ਤਿ ਵਤ੍ਵਾ ਅਨੇਕਾਕਾਰਵੋਕਾਰਂ ਵਚੀਦੁਚ੍ਚਰਿਤਸਨ੍ਨਿਸ੍ਸਿਤਂ ਆਦੀਨਵਂ, ਵਚੀਸੁਚਰਿਤਪਟਿਸਂਯੁਤ੍ਤਞ੍ਚ ਆਨਿਸਂਸਂ ਪਕਾਸੇਨ੍ਤੋ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਸਮ੍ਪਤ੍ਤਪਰਿਸਾਯ ਸਾਤ੍ਥਿਕਾ ਅਹੋਸੀਤਿ.

ਸੂਕਰਮੁਖਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੩. ਪੂਤਿਮੁਖਪੇਤਵਤ੍ਥੁਵਣ੍ਣਨਾ

ਦਿਬ੍ਬਂ ਸੁਭਂ ਧਾਰੇਸਿ ਵਣ੍ਣਧਾਤੁਨ੍ਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਕਲਨ੍ਦਕਨਿਵਾਪੇ ਅਞ੍ਞਤਰਂ ਪੂਤਿਮੁਖਪੇਤਂ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ਕਸ੍ਸਪਸ੍ਸ ਭਗਵਤੋ ਕਾਲੇ ਦ੍ਵੇ ਕੁਲਪੁਤ੍ਤਾ ਤਸ੍ਸ ਸਾਸਨੇ ਪਬ੍ਬਜਿਤ੍ਵਾ ਸੀਲਾਚਾਰਸਮ੍ਪਨ੍ਨਾ ਸਲ੍ਲੇਖਵੁਤ੍ਤਿਨੋ ਅਞ੍ਞਤਰਸ੍ਮਿਂ ਗਾਮਕਾਵਾਸੇ ਸਮਗ੍ਗਵਾਸਂ ਵਸਿਂਸੁ. ਅਥ ਅਞ੍ਞਤਰੋ ਪਾਪਜ੍ਝਾਸਯੋ ਪੇਸੁਞ੍ਞਾਭਿਰਤੋ ਭਿਕ੍ਖੁ ਤੇਸਂ ਵਸਨਟ੍ਠਾਨਂ ਉਪਗਞ੍ਛਿ. ਥੇਰਾ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ਵਸਨਟ੍ਠਾਨਂ ਦਤ੍ਵਾ ਦੁਤਿਯਦਿਵਸੇ ਤਂ ਗਹੇਤ੍ਵਾ ਗਾਮਂ ਪਿਣ੍ਡਾਯ ਪਵਿਸਿਂਸੁ. ਮਨੁਸ੍ਸਾ ਤੇ ਦਿਸ੍ਵਾ ਤੇਸੁ ਥੇਰੇਸੁ ਅਤਿਵਿਯ ਪਰਮਨਿਪਚ੍ਚਕਾਰਂ ਕਤ੍ਵਾ ਯਾਗੁਭਤ੍ਤਾਦੀਹਿ ਪਟਿਮਾਨੇਸੁਂ. ਸੋ ਵਿਹਾਰਂ ਪਵਿਸਿਤ੍ਵਾ ਚਿਨ੍ਤੇਸਿ – ‘‘ਸੁਨ੍ਦਰੋ ਵਤਾਯਂ ਗੋਚਰਗਾਮੋ, ਮਨੁਸ੍ਸਾ ਚ ਸਦ੍ਧਾ ਪਸਨ੍ਨਾ, ਪਣੀਤਪਣੀਤਂ ਪਿਣ੍ਡਪਾਤਂ ਦੇਨ੍ਤਿ, ਅਯਞ੍ਚ ਵਿਹਾਰੋ ਛਾਯੂਦਕਸਮ੍ਪਨ੍ਨੋ, ਸਕ੍ਕਾ ਮੇ ਇਧ ਸੁਖੇਨ ਵਸਿਤੁਂ. ਇਮੇਸੁ ਪਨ ਭਿਕ੍ਖੂਸੁ ਇਧ ਵਸਨ੍ਤੇਸੁ ਮਯ੍ਹਂ ਫਾਸੁਵਿਹਾਰੋ ਨ ਭਵਿਸ੍ਸਤਿ, ਅਨ੍ਤੇਵਾਸਿਕਵਾਸੋ ਵਿਯ ਭਵਿਸ੍ਸਤਿ. ਹਨ੍ਦਾਹਂ ਇਮੇ ਅਞ੍ਞਮਞ੍ਞਂ ਭਿਨ੍ਦਿਤ੍ਵਾ ਯਥਾ ਨ ਪੁਨ ਇਧ ਵਸਿਸ੍ਸਨ੍ਤਿ, ਤਥਾ ਕਰਿਸ੍ਸਾਮੀ’’ਤਿ.

ਅਥੇਕਦਿਵਸਂ ਮਹਾਥੇਰੇ ਦ੍ਵਿਨ੍ਨਮ੍ਪਿ ਓਵਾਦਂ ਦਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਪਵਿਟ੍ਠੇ ਪੇਸੁਣਿਕੋ ਭਿਕ੍ਖੁ ਥੋਕਂ ਕਾਲਂ ਵੀਤਿਨਾਮੇਤ੍ਵਾ ਮਹਾਥੇਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਥੇਰੇਨ ‘‘ਕਿਂ, ਆਵੁਸੋ, ਵਿਕਾਲੇ ਆਗਤੋਸੀ’’ਤਿ ਚ ਵੁਤ੍ਤੇ, ‘‘ਆਮ, ਭਨ੍ਤੇ ਕਿਞ੍ਚਿ ਵਤ੍ਤਬ੍ਬਂ ਅਤ੍ਥੀ’’ਤਿ ਵਤ੍ਵਾ ‘‘ਕਥੇਹਿ, ਆਵੁਸੋ’’ਤਿ ਥੇਰੇਨ ਅਨੁਞ੍ਞਾਤੋ ਆਹ – ‘‘ਏਸੋ, ਭਨ੍ਤੇ, ਤੁਮ੍ਹਾਕਂ ਸਹਾਯਕਤ੍ਥੇਰੋ ਸਮ੍ਮੁਖਾ ਮਿਤ੍ਤੋ ਵਿਯ ਅਤ੍ਤਾਨਂ ਦਸ੍ਸੇਤ੍ਵਾ ਪਰਮ੍ਮੁਖਾ ਸਪਤ੍ਤੋ ਵਿਯ ਉਪਵਦਤੀ’’ਤਿ. ‘‘ਕਿਂ ਕਥੇਤੀ’’ਤਿ ਪੁਚ੍ਛਿਤੋ ‘‘ਸੁਣਾਥ, ਭਨ੍ਤੇ, ‘ਏਸੋ ਮਹਾਥੇਰੋ ਸਠੋ ਮਾਯਾਵੀ ਕੁਹਕੋ ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਤੀ’ਤਿ ਤੁਮ੍ਹਾਕਂ ਅਗੁਣਂ ਕਥੇਤੀ’’ਤਿ ਆਹ. ‘‘ਮਾ, ਆਵੁਸੋ, ਏਵਂ ਭਣਿ, ਨ ਸੋ ਭਿਕ੍ਖੁ ਏਵਂ ਮਂ ਉਪਵਦਿਸ੍ਸਤਿ, ਗਿਹਿਕਾਲਤੋ ਪਟ੍ਠਾਯ ਮਮ ਸਭਾਵਂ ਜਾਨਾਤਿ ‘ਪੇਸਲੋ ਕਲ੍ਯਾਣਸੀਲੋ’’’ਤਿ. ‘‘ਸਚੇ, ਭਨ੍ਤੇ, ਤੁਮ੍ਹੇ ਅਤ੍ਤਨੋ ਵਿਸੁਦ੍ਧਚਿਤ੍ਤਤਾਯ ਏਵਂ ਚਿਨ੍ਤੇਥ, ਤਂ ਤੁਮ੍ਹਾਕਂਯੇਵ ਅਨੁਚ੍ਛਵਿਕਂ, ਮਯ੍ਹਂ ਪਨ ਤੇਨ ਸਦ੍ਧਿਂ ਵੇਰਂ ਨਤ੍ਥਿ, ਕਸ੍ਮਾ ਅਹਂ ਤੇਨ ਅਵੁਤ੍ਤਂ ‘ਵੁਤ੍ਤ’ਨ੍ਤਿ ਵਦਾਮਿ. ਹੋਤੁ, ਕਾਲਨ੍ਤਰੇਨ ਸਯਮੇਵ ਜਾਨਿਸ੍ਸਥਾ’’ਤਿ ਆਹ. ਥੇਰੋਪਿ ਪੁਥੁਜ੍ਜਨਭਾਵਦੋਸੇਨ ਦ੍ਵੇਲ਼੍ਹਕਚਿਤ੍ਤੋ ‘‘ਏਵਮ੍ਪਿ ਸਿਯਾ’’ਤਿ ਸਾਸਙ੍ਕਹਦਯੋ ਹੁਤ੍ਵਾ ਥੋਕਂ ਸਿਥਿਲਵਿਸ੍ਸਾਸੋ ਅਹੋਸਿ. ਸੋ ਬਾਲੋ ਪਠਮਂ ਮਹਾਥੇਰਂ ਪਰਿਭਿਨ੍ਦਿਤ੍ਵਾ ਇਤਰਮ੍ਪਿ ਥੇਨਂ ਵੁਤ੍ਤਨਯੇਨੇਵ ਪਰਿਭਿਨ੍ਦਿ. ਅਥ ਤੇ ਉਭੋਪਿ ਥੇਰਾ ਦੁਤਿਯਦਿਵਸੇ ਅਞ੍ਞਮਞ੍ਞਂ ਅਨਾਲਪਿਤ੍ਵਾ ਪਤ੍ਤਚੀਵਰਮਾਦਾਯ ਗਾਮੇ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਮਾਦਾਯ ਅਤ੍ਤਨੋ ਵਸਨਟ੍ਠਾਨੇਯੇਵ ਪਰਿਭੁਞ੍ਜਿਤ੍ਵਾ ਸਾਮੀਚਿਮਤ੍ਤਮ੍ਪਿ ਅਕਤ੍ਵਾ ਤਂ ਦਿਵਸਂ ਤਤ੍ਥੇਵ ਵਸਿਤ੍ਵਾ ਵਿਭਾਤਾਯ ਚ ਰਤ੍ਤਿਯਾ ਅਞ੍ਞਮਞ੍ਞਂ ਅਨਾਰੋਚੇਤ੍ਵਾਵ ਯਥਾਫਾਸੁਕਟ੍ਠਾਨਂ ਅਗਮਂਸੁ.

ਪੇਸੁਣਿਕਂ ਪਨ ਭਿਕ੍ਖੁਂ ਪਰਿਪੁਣ੍ਣਮਨੋਰਥਂ ਗਾਮਂ ਪਿਣ੍ਡਾਯ ਪਵਿਟ੍ਠਂ ਮਨੁਸ੍ਸਾ ਦਿਸ੍ਵਾ ਆਹਂਸੁ – ‘‘ਭਨ੍ਤੇ, ਥੇਰਾ ਕੁਹਿਂ ਗਤਾ’’ਤਿ? ਸੋ ਆਹ – ‘‘ਸਬ੍ਬਰਤ੍ਤਿਂ ਅਞ੍ਞਮਞ੍ਞਂ ਕਲਹਂ ਕਤ੍ਵਾ ਮਯਾ ‘ਮਾ ਕਲਹਂ ਕਰੋਥ, ਸਮਗ੍ਗਾ ਹੋਥ, ਕਲਹੋ ਨਾਮ ਅਨਤ੍ਥਾਵਹੋ ਆਯਤਿਦੁਕ੍ਖੁਪ੍ਪਾਦਕੋ ਅਕੁਸਲਸਂਵਤ੍ਤਨਿਕੋ, ਪੁਰਿਮਕਾਪਿ ਕਲਹੇਨ ਮਹਤਾ ਹਿਤਾ ਪਰਿਭਟ੍ਠਾ’ਤਿਆਦੀਨਿ ਵੁਚ੍ਚਮਾਨਾਪਿ ਮਮ ਵਚਨਂ ਅਨਾਦਿਯਿਤ੍ਵਾ ਪਕ੍ਕਨ੍ਤਾ’’ਤਿ. ਤਤੋ ਮਨੁਸ੍ਸਾ ‘‘ਥੇਰਾ ਤਾਵ ਗਚ੍ਛਨ੍ਤੁ, ਤੁਮ੍ਹੇ ਪਨ ਅਮ੍ਹਾਕਂ ਅਨੁਕਮ੍ਪਾਯ ਇਧੇਵ ਅਨੁਕ੍ਕਣ੍ਠਿਤ੍ਵਾ ਵਸਥਾ’’ਤਿ ਯਾਚਿਂਸੁ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਤਤ੍ਥੇਵ ਵਸਨ੍ਤੋ ਕਤਿਪਾਹੇਨ ਚਿਨ੍ਤੇਸਿ – ‘‘ਮਯਾ ਸੀਲਵਨ੍ਤੋ ਕਲ੍ਯਾਣਧਮ੍ਮਾ ਭਿਕ੍ਖੂ ਆਵਾਸਲੋਭੇਨ ਪਰਿਭਿਨ੍ਨਾ, ਬਹੁਂ ਵਤ ਮਯਾ ਪਾਪਕਮ੍ਮਂ ਪਸੁਤ’’ਨ੍ਤਿ ਬਲਵਵਿਪ੍ਪਟਿਸਾਰਾਭਿਭੂਤੋ ਸੋਕਵੇਗੇਨ ਗਿਲਾਨੋ ਹੁਤ੍ਵਾ ਨਚਿਰੇਨੇਵ ਕਾਲਂ ਕਤ੍ਵਾ ਅਵੀਚਿਮ੍ਹਿ ਨਿਬ੍ਬਤ੍ਤਿ.

ਇਤਰੇ ਦ੍ਵੇ ਸਹਾਯਕਤ੍ਥੇਰਾ ਜਨਪਦਚਾਰਿਕਂ ਚਰਨ੍ਤਾ ਅਞ੍ਞਤਰਸ੍ਮਿਂ ਆਵਾਸੇ ਸਮਾਗਨ੍ਤ੍ਵਾ ਅਞ੍ਞਮਞ੍ਞਂ ਸਮ੍ਮੋਦਿਤ੍ਵਾ ਤੇਨ ਭਿਕ੍ਖੁਨਾ ਵੁਤ੍ਤਂ ਭੇਦਵਚਨਂ ਅਞ੍ਞਮਞ੍ਞਸ੍ਸ ਆਰੋਚੇਤ੍ਵਾ ਤਸ੍ਸ ਅਭੂਤਭਾਵਂ ਞਤ੍ਵਾ ਸਮਗ੍ਗਾ ਹੁਤ੍ਵਾ ਅਨੁਕ੍ਕਮੇਨ ਤਮੇਵ ਆਵਾਸਂ ਪਚ੍ਚਾਗਮਿਂਸੁ. ਮਨੁਸ੍ਸਾ ਦ੍ਵੇ ਥੇਰੇ ਦਿਸ੍ਵਾ ਹਟ੍ਠਤੁਟ੍ਠਾ ਸਞ੍ਜਾਤਸੋਮਨਸ੍ਸਾ ਹੁਤ੍ਵਾ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿਂਸੁ. ਥੇਰਾ ਚ ਤਤ੍ਥੇਵ ਵਸਨ੍ਤਾ ਸਪ੍ਪਾਯਆਹਾਰਲਾਭੇਨ ਸਮਾਹਿਤਚਿਤ੍ਤਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰੇਨੇਵ ਅਰਹਤ੍ਤਂ ਪਾਪੁਣਿਂਸੁ.

ਪੇਸੁਣਿਕੋ ਭਿਕ੍ਖੁ ਏਕਂ ਬੁਦ੍ਧਨ੍ਤਰਂ ਨਿਰਯੇ ਪਚ੍ਚਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਸ੍ਸ ਅਵਿਦੂਰੇ ਪੂਤਿਮੁਖਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਕਾਯੋ ਸੁਵਣ੍ਣਵਣ੍ਣੋ ਅਹੋਸਿ, ਮੁਖਤੋ ਪਨ ਪੁਲ਼ਵਕਾ ਨਿਕ੍ਖਮਿਤ੍ਵਾ ਇਤੋ ਚਿਤੋ ਚ ਮੁਖਂ ਖਾਦਨ੍ਤਿ, ਤਸ੍ਸ ਦੂਰਮ੍ਪਿ ਓਕਾਸਂ ਫਰਿਤ੍ਵਾ ਦੁਗ੍ਗਨ੍ਧਂ ਵਾਯਤਿ. ਅਥਾਯਸ੍ਮਾ ਨਾਰਦੋ ਗਿਜ੍ਝਕੂਟਪਬ੍ਬਤਾ ਓਰੋਹਨ੍ਤੋ ਤਂ ਦਿਸ੍ਵਾ –

੭. ‘‘ਦਿਬ੍ਬਂ ਸੁਭਂ ਧਾਰੇਸਿ ਵਣ੍ਣਧਾਤੁਂ, ਵੇਹਾਯਸਂ ਤਿਟ੍ਠਸਿ ਅਨ੍ਤਲਿਕ੍ਖੇ;

ਮੁਖਞ੍ਚ ਤੇ ਕਿਮਯੋ ਪੂਤਿਗਨ੍ਧਂ, ਖਾਦਨ੍ਤਿ ਕਿਂ ਕਮ੍ਮਮਕਾਸਿ ਪੁਬ੍ਬੇ’’ਤਿ. –

ਇਮਾਯ ਗਾਥਾਯ ਕਤਕਮ੍ਮਂ ਪੁਚ੍ਛਿ. ਤਤ੍ਥ ਦਿਬ੍ਬਨ੍ਤਿ ਦਿਵਿ ਭਵਂ ਦੇਵਤ੍ਤਭਾਵਪਰਿਯਾਪਨ੍ਨਂ. ਇਧ ਪਨ ਦਿਬ੍ਬਂ ਵਿਯਾਤਿ ਦਿਬ੍ਬਂ. ਸੁਭਨ੍ਤਿ ਸੋਭਨਂ, ਸੁਨ੍ਦਰਭਾਵਂ ਵਾ. ਵਣ੍ਣਧਾਤੁਨ੍ਤਿ ਛਵਿਵਣ੍ਣਂ. ਧਾਰੇਸੀਤਿ ਵਹਸਿ. ਵੇਹਾਯਸਂ ਤਿਟ੍ਠਸਿ ਅਨ੍ਤਲਿਕ੍ਖੇਤਿ ਵੇਹਾਯਸਸਞ੍ਞਿਤੇ ਅਨ੍ਤਲਿਕ੍ਖੇ ਤਿਟ੍ਠਸਿ. ਕੇਚਿ ਪਨ ‘‘ਵਿਹਾਯਸਂ ਤਿਟ੍ਠਸਿ ਅਨ੍ਤਲਿਕ੍ਖੇ’’ਤਿ ਪਾਠਂ ਵਤ੍ਵਾ ਵਿਹਾਯਸਂ ਓਭਾਸੇਨ੍ਤੋ ਅਨ੍ਤਲਿਕ੍ਖੇ ਤਿਟ੍ਠਸੀਤਿ ਵਚਨਸੇਸੇਨ ਅਤ੍ਥਂ ਵਦਨ੍ਤਿ. ਪੂਤਿਗਨ੍ਧਨ੍ਤਿ ਕੁਣਪਗਨ੍ਧਂ, ਦੁਗ੍ਗਨ੍ਧਨ੍ਤਿ ਅਤ੍ਥੋ. ਕਿਂ ਕਮ੍ਮਮਕਾਸਿ ਪੁਬ੍ਬੇਤਿ ਪਰਮਦੁਗ੍ਗਨ੍ਧਂ ਤੇ ਮੁਖਂ ਕਿਮਯੋ ਖਾਦਨ੍ਤਿ, ਕਾਯੋ ਚ ਸੁਵਣ੍ਣਵਣ੍ਣੋ, ਕੀਦਿਸਂ ਨਾਮ ਕਮ੍ਮਂ ਏਵਰੂਪਸ੍ਸ ਅਤ੍ਤਭਾਵਸ੍ਸ ਕਾਰਣਭੂਤਂ ਪੁਬ੍ਬੇ ਤ੍ਵਂ ਅਕਾਸੀਤਿ ਪੁਚ੍ਛਿ.

ਏਵਂ ਥੇਰੇਨ ਸੋ ਪੇਤੋ ਅਤ੍ਤਨਾ ਕਤਕਮ੍ਮਂ ਪੁਟ੍ਠੋ ਤਮਤ੍ਥਂ ਵਿਸ੍ਸਜ੍ਜੇਨ੍ਤੋ –

੮. ‘‘ਸਮਣੋ ਅਹਂ ਪਾਪੋਤਿਦੁਟ੍ਠਵਾਚੋ, ਤਪਸ੍ਸਿਰੂਪੋ ਮੁਖਸਾ ਅਸਞ੍ਞਤੋ;

ਲਦ੍ਧਾ ਚ ਮੇ ਤਮਸਾ ਵਣ੍ਣਧਾਤੁ, ਮੁਖਞ੍ਚ ਮੇ ਪੇਸੁਣਿਯੇਨ ਪੂਤੀ’’ਤਿ. –

ਗਾਥਮਾਹ. ਤਤ੍ਥ ਸਮਣੋ ਅਹਂ ਪਾਪੋਤਿ ਅਹਂ ਲਾਮਕੋ ਸਮਣੋ ਪਾਪਭਿਕ੍ਖੁ ਅਹੋਸਿਂ. ਅਤਿਦੁਟ੍ਠਵਾਚੋਤਿ ਅਤਿਦੁਟ੍ਠਵਚਨੋ, ਪਰੇ ਅਤਿਕ੍ਕਮਿਤ੍ਵਾ ਲਙ੍ਘਿਤ੍ਵਾ ਵਤ੍ਤਾ, ਪਰੇਸਂ ਗੁਣਪਰਿਧਂਸਕਵਚਨੋਤਿ ਅਤ੍ਥੋ. ‘‘ਅਤਿਦੁਕ੍ਖਵਾਚੋ’’ਤਿ ਵਾ ਪਾਠੋ, ਅਤਿਵਿਯ ਫਰੁਸਵਚਨੋ ਮੁਸਾਵਾਦਪੇਸੁਞ੍ਞਾਦਿਵਚੀਦੁਚ੍ਚਰਿਤਨਿਰਤੋ. ਤਪਸ੍ਸਿਰੂਪੋਤਿ ਸਮਣਪਤਿਰੂਪਕੋ. ਮੁਖਸਾਤਿ ਮੁਖੇਨ. ਲਦ੍ਧਾਤਿ ਪਟਿਲਦ੍ਧਾ. ਚ-ਕਾਰੋ ਸਮ੍ਪਿਣ੍ਡਨਤ੍ਥੋ. ਮੇਤਿ ਮਯਾ. ਤਪਸਾਤਿ ਬ੍ਰਹ੍ਮਚਰਿਯੇਨ. ਪੇਸੁਣਿਯੇਨਾਤਿ ਪਿਸੁਣਵਾਚਾਯ. ਪੁਤੀਤਿ ਪੂਤਿਗਨ੍ਧਂ.

ਏਵਂ ਸੋ ਪੇਤੋ ਅਤ੍ਤਨਾ ਕਤਕਮ੍ਮਂ ਆਚਿਕ੍ਖਿਤ੍ਵਾ ਇਦਾਨਿ ਥੇਰਸ੍ਸ ਓਵਾਦਂ ਦੇਨ੍ਤੋ –

੯. ‘‘ਤਯਿਦਂ ਤਯਾ ਨਾਰਦ ਸਾਮਂ ਦਿਟ੍ਠਂ,

ਅਨੁਕਮ੍ਪਕਾ ਯੇ ਕੁਸਲਾ ਵਦੇਯ੍ਯੁਂ;

ਮਾ ਪੇਸੁਣਂ ਮਾ ਚ ਮੁਸਾ ਅਭਾਣਿ,

ਯਕ੍ਖੋ ਤੁਵਂ ਹੋਹਿਸਿ ਕਾਮਕਾਮੀ’’ਤਿ. –

ਓਸਾਨਗਾਥਮਾਹ. ਤਤ੍ਥ ਤਯਿਦਨ੍ਤਿ ਤਂ ਇਦਂ ਮਮ ਰੂਪਂ. ਅਨੁਕਮ੍ਪਕਾ ਯੇ ਕੁਸਲਾ ਵਦੇਯ੍ਯੁਨ੍ਤਿ ਯੇ ਅਨੁਕਮ੍ਪਨਸੀਲਾ ਕਾਰੁਣਿਕਾ ਪਰਹਿਤਪਟਿਪਤ੍ਤਿਯਂ ਕੁਸਲਾ ਨਿਪੁਣਾ ਬੁਦ੍ਧਾਦਯੋ ਯਂ ਵਦੇਯ੍ਯੁਂ, ਤਦੇਵ ਵਦਾਮੀਤਿ ਅਧਿਪ੍ਪਾਯੋ. ਇਦਾਨਿ ਤਂ ਓਵਾਦਂ ਦਸ੍ਸੇਨ੍ਤੋ ‘‘ਮਾ ਪੇਸੁਣਂ ਮਾ ਚ ਮੁਸਾ ਅਭਾਣਿ, ਯਕ੍ਖੋ ਤੁਵਂ ਹੋਹਿਸਿ ਕਾਮਕਾਮੀ’’ਤਿ ਆਹ. ਤਸ੍ਸਤ੍ਥੋ – ਪੇਸੁਣਂ ਪਿਸੁਣਵਚਨਂ ਮੁਸਾ ਚ ਮਾ ਅਭਾਣਿ ਮਾ ਕਥੇਹਿ. ਯਦਿ ਹਿ ਤ੍ਵਂ ਮੁਸਾਵਾਦਂ ਪਿਸੁਣਵਾਚਞ੍ਚ ਪਹਾਯ ਵਾਚਾਯ ਸਞ੍ਞਤੋ ਭਵੇਯ੍ਯਾਸਿ, ਯਕ੍ਖੋ ਵਾ ਦੇਵੋ ਵਾ ਦੇਵਞ੍ਞਤਰੋ ਵਾ ਤ੍ਵਂ ਭਵਿਸ੍ਸਸਿ, ਕਾਮਂ ਕਾਮਿਤਬ੍ਬਂ ਉਲ਼ਾਰਂ ਦਿਬ੍ਬਸਮ੍ਪਤ੍ਤਿਂ ਪਟਿਲਭਿਤ੍ਵਾ ਤਤ੍ਥ ਕਾਮਨਸੀਲੋ ਯਥਾਸੁਖਂ ਇਨ੍ਦ੍ਰਿਯਾਨਂ ਪਰਿਚਰਣੇਨ ਅਭਿਰਮਣਸੀਲੋਤਿ.

ਤਂ ਸੁਤ੍ਵਾ ਥੇਰੋ ਤਤੋ ਰਾਜਗਹਂ ਗਨ੍ਤ੍ਵਾ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਸਤ੍ਥੁ ਤਮਤ੍ਥਂ ਆਰੋਚੇਸਿ. ਸਤ੍ਥਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਸਮ੍ਪਤ੍ਤਪਰਿਸਾਯ ਸਾਤ੍ਥਿਕਾ ਅਹੋਸੀਤਿ.

ਪੂਤਿਮੁਖਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੪. ਪਿਟ੍ਠਧੀਤਲਿਕਪੇਤਵਤ੍ਥੁਵਣ੍ਣਨਾ

ਯਂ ਕਿਞ੍ਚਾਰਮ੍ਮਣਂ ਕਤ੍ਵਾਤਿ ਇਦਂ ਸਤ੍ਥਾ ਸਾਵਤ੍ਥਿਯਂ ਜੇਤਵਨੇ ਵਿਹਰਨ੍ਤੋ ਅਨਾਥਪਿਣ੍ਡਿਕਸ੍ਸ ਗਹਪਤਿਨੋ ਦਾਨਂ ਆਰਬ੍ਭ ਕਥੇਸਿ. ਅਨਾਥਪਿਣ੍ਡਿਕਸ੍ਸ ਕਿਰ ਗਹਪਤਿਨੋ ਧੀਤੁ ਧੀਤਾਯ ਦਾਰਿਕਾਯ ਧਾਤਿ ਪਿਟ੍ਠਧੀਤਲਿਕਂ ਅਦਾਸਿ ‘‘ਅਯਂ ਤੇ ਧੀਤਾ, ਇਮਂ ਗਹੇਤ੍ਵਾ ਕੀਲ਼ਸ੍ਸੂ’’ਤਿ. ਸਾ ਤਤ੍ਥ ਧੀਤੁਸਞ੍ਞਂ ਉਪ੍ਪਾਦੇਸਿ. ਅਥਸ੍ਸਾ ਏਕਦਿਵਸਂ ਤਂ ਗਹੇਤ੍ਵਾ ਕੀਲ਼ਨ੍ਤਿਯਾ ਪਮਾਦੇਨ ਪਤਿਤ੍ਵਾ ਭਿਜ੍ਜਿ. ਤਤੋ ਦਾਰਿਕਾ ‘‘ਮਮ ਧੀਤਾ ਮਤਾ’’ਤਿ ਪਰੋਦਿ. ਤਂ ਰੋਦਨ੍ਤਿਂ ਕੋਚਿਪਿ ਗੇਹਜਨੋ ਸਞ੍ਞਾਪੇਤੁਂ ਨਾਸਕ੍ਖਿ. ਤਸ੍ਮਿਞ੍ਚ ਸਮਯੇ ਸਤ੍ਥਾ ਅਨਾਥਪਿਣ੍ਡਿਕਸ੍ਸ ਗਹਪਤਿਨੋ ਗੇਹੇ ਪਞ੍ਞਤ੍ਤੇ ਆਸਨੇ ਨਿਸਿਨ੍ਨੋ ਹੋਤਿ, ਮਹਾਸੇਟ੍ਠਿ ਚ ਭਗਵਤੋ ਸਮੀਪੇ ਨਿਸਿਨ੍ਨੋ ਅਹੋਸਿ. ਧਾਤਿ ਤਂ ਦਾਰਿਕਂ ਗਹੇਤ੍ਵਾ ਸੇਟ੍ਠਿਸ੍ਸ ਸਨ੍ਤਿਕਂ ਅਗਮਾਸਿ. ਸੇਟ੍ਠਿ ਤਂ ਦਿਸ੍ਵਾ ‘‘ਕਿਸ੍ਸਾਯਂ ਦਾਰਿਕਾ ਰੋਦਤੀ’’ਤਿ ਆਹ. ਧਾਤਿ ਤਂ ਪਵਤ੍ਤਿਂ ਸੇਟ੍ਠਿਸ੍ਸ ਆਰੋਚੇਸਿ. ਸੇਟ੍ਠਿ ਤਂ ਦਾਰਿਕਂ ਅਙ੍ਕੇ ਨਿਸੀਦਾਪੇਤ੍ਵਾ ‘‘ਤਵ ਧੀਤੁਦਾਨਂ ਦਸ੍ਸਾਮੀ’’ਤਿ ਸਞ੍ਞਾਪੇਤ੍ਵਾ ਸਤ੍ਥੁ ਆਰੋਚੇਸਿ – ‘‘ਭਨ੍ਤੇ, ਮਮ ਨਤ੍ਤੁਧੀਤਰਂ ਪਿਟ੍ਠਧੀਤਲਿਕਂ ਉਦ੍ਦਿਸ੍ਸ ਦਾਨਂ ਦਾਤੁਕਾਮੋ, ਤਂ ਮੇ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਸ੍ਵਾਤਨਾਯ ਅਧਿਵਾਸੇਥਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ.

ਅਥ ਭਗਵਾ ਦੁਤਿਯਦਿਵਸੇ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਸੇਟ੍ਠਿਸ੍ਸ ਘਰਂ ਗਨ੍ਤ੍ਵਾ ਭਤ੍ਤਕਿਚ੍ਚਂ ਕਤ੍ਵਾ ਅਨੁਮੋਦਨਂ ਕਰੋਨ੍ਤੋ –

੧੦. ‘‘ਯਂ ਕਿਞ੍ਚਾਰਮ੍ਮਣਂ ਕਤ੍ਵਾ, ਦਜ੍ਜਾ ਦਾਨਂ ਅਮਚ੍ਛਰੀ;

ਪੁਬ੍ਬਪੇਤੇ ਚ ਆਰਬ੍ਭ, ਅਥ ਵਾ ਵਤ੍ਥੁਦੇਵਤਾ.

੧੧. ‘‘ਚਤ੍ਤਾਰੋ ਚ ਮਹਾਰਾਜੇ, ਲੋਕਪਾਲੇ ਯਸਸ੍ਸਿਨੇ;

ਕੁਵੇਰਂ ਧਤਰਟ੍ਠਞ੍ਚ, ਵਿਰੂਪਕ੍ਖਂ ਵਿਰੂਲ਼੍ਹਕਂ;

ਤੇ ਚੇਵ ਪੂਜਿਤਾ ਹੋਨ੍ਤਿ, ਦਾਯਕਾ ਚ ਅਨਿਪ੍ਫਲਾ.

੧੨. ‘‘ਨ ਹਿ ਰੁਣ੍ਣਂ ਵਾ ਸੋਕੋ ਵਾ, ਯਾ ਚਞ੍ਞਾ ਪਰਿਦੇਵਨਾ;

ਨ ਤਂ ਪੇਤਸ੍ਸ ਅਤ੍ਥਾਯ, ਏਵਂ ਤਿਟ੍ਠਨ੍ਤਿ ਞਾਤਯੋ.

੧੩. ‘‘ਅਯਞ੍ਚ ਖੋ ਦਕ੍ਖਿਣਾ ਦਿਨ੍ਨਾ, ਸਙ੍ਘਮ੍ਹਿ ਸੁਪ੍ਪਤਿਟ੍ਠਿਤਾ;

ਦੀਘਰਤ੍ਤਂ ਹਿਤਾਯਸ੍ਸ, ਠਾਨਸੋ ਉਪਕਪ੍ਪਤੀ’’ਤਿ. – ਇਮਾ ਗਾਥਾ ਅਭਾਸਿ;

੧੦. ਤਤ੍ਥ ਯਂ ਕਿਞ੍ਚਾਰਮ੍ਮਣਂ ਕਤ੍ਵਾਤਿ ਮਙ੍ਗਲਾਦੀਸੁ ਅਞ੍ਞਤਰਂ ਯਂ ਕਿਞ੍ਚਿ ਆਰਬ੍ਭ ਉਦ੍ਦਿਸ੍ਸ. ਦਜ੍ਜਾਤਿ ਦਦੇਯ੍ਯ. ਅਮਚ੍ਛਰੀਤਿ ਅਤ੍ਤਨੋ ਸਮ੍ਪਤ੍ਤਿਯਾ ਪਰੇਹਿ ਸਾਧਾਰਣਭਾਵਾਸਹਨਲਕ੍ਖਣਸ੍ਸ ਮਚ੍ਛੇਰਸ੍ਸ ਅਭਾਵਤੋ ਅਮਚ੍ਛਰੀ, ਪਰਿਚ੍ਚਾਗਸੀਲੋ ਮਚ੍ਛਰਿਯਲੋਭਾਦਿਚਿਤ੍ਤਮਲਂ ਦੂਰਤੋ ਕਤ੍ਵਾ ਦਾਨਂ ਦਦੇਯ੍ਯਾਤਿ ਅਧਿਪ੍ਪਾਯੋ. ਪੁਬ੍ਬਪੇਤੇ ਚ ਆਰਬ੍ਭਾਤਿ ਪੁਬ੍ਬਕੇਪਿ ਪੇਤੇ ਉਦ੍ਦਿਸ੍ਸ. ਵਤ੍ਥੁਦੇਵਤਾਤਿ ਘਰਵਤ੍ਥੁਆਦੀਸੁ ਅਧਿਵਤ੍ਥਾ ਦੇਵਤਾ ਆਰਬ੍ਭਾਤਿ ਯੋਜਨਾ. ਅਥ ਵਾਤਿ ਇਮਿਨਾ ਅਞ੍ਞੇਪਿ ਦੇਵਮਨੁਸ੍ਸਾਦਿਕੇ ਯੇ ਕੇਚਿ ਆਰਬ੍ਭ ਦਾਨਂ ਦਦੇਯ੍ਯਾਤਿ ਦਸ੍ਸੇਤਿ.

੧੧. ਤਤ੍ਥ ਦੇਵੇਸੁ ਤਾਵ ਏਕਚ੍ਚੇ ਪਾਕਟੇ ਦੇਵੇ ਦਸ੍ਸੇਨ੍ਤੋ ‘‘ਚਤ੍ਤਾਰੋ ਚ ਮਹਾਰਾਜੇ’’ਤਿ ਵਤ੍ਵਾ ਪੁਨ ਤੇ ਨਾਮਤੋ ਗਣ੍ਹਨ੍ਤੋ ‘‘ਕੁਵੇਰ’’ਨ੍ਤਿਆਦਿਮਾਹ. ਤਤ੍ਥ ਕੁਵੇਰਨ੍ਤਿ ਵੇਸ੍ਸਵਣਂ. ਧਤਰਟ੍ਠਨ੍ਤਿਆਦੀਨਿ ਸੇਸਾਨਂ ਤਿਣ੍ਣਂ ਲੋਕਪਾਲਾਨਂ ਨਾਮਾਨਿ. ਤੇ ਚੇਵ ਪੂਜਿਤਾ ਹੋਨ੍ਤੀਤਿ ਤੇ ਚ ਮਹਾਰਾਜਾਨੋ ਪੁਬ੍ਬਪੇਤਵਤ੍ਥੁਦੇਵਤਾਯੋ ਚ ਉਦ੍ਦਿਸਨਕਿਰਿਯਾਯ ਪਟਿਮਾਨਿਕਾ ਹੋਨ੍ਤਿ. ਦਾਯਕਾ ਚ ਅਨਿਪ੍ਫਲਾਤਿ ਯੇ ਦਾਨਂ ਦੇਨ੍ਤਿ, ਤੇ ਦਾਯਕਾ ਚ ਪਰੇਸਂ ਉਦ੍ਦਿਸਨਮਤ੍ਤੇਨ ਨ ਨਿਪ੍ਫਲਾ, ਅਤ੍ਤਨੋ ਦਾਨਫਲਸ੍ਸ ਭਾਗਿਨੋ ਏਵ ਹੋਨ੍ਤਿ.

੧੨. ਇਦਾਨਿ ‘‘ਯੇ ਅਤ੍ਤਨੋ ਞਾਤੀਨਂ ਮਰਣੇਨ ਰੋਦਨ੍ਤਿ ਪਰਿਦੇਵਨ੍ਤਿ ਸੋਚਨ੍ਤਿ, ਤੇਸਂ ਤਂ ਨਿਰਤ੍ਥਕਂ, ਅਤ੍ਤਪਰਿਤਾਪਨਮਤ੍ਤਮੇਵਾ’’ਤਿ ਦਸ੍ਸੇਤੁਂ ‘‘ਨ ਹਿ ਰੁਣ੍ਣਂ ਵਾ’’ਤਿ ਗਾਥਮਾਹ. ਤਤ੍ਥ ਰੁਣ੍ਣਨ੍ਤਿ ਰੁਦਿਤਂ ਅਸ੍ਸੁਮੋਚਨਂ ਨ ਹਿ ਕਾਤਬ੍ਬਨ੍ਤਿ ਵਚਨਸੇਸੋ. ਸੋਕੋਤਿ ਸੋਚਨਂ ਚਿਤ੍ਤਸਨ੍ਤਾਪੋ, ਅਨ੍ਤੋਨਿਜ੍ਝਾਨਨ੍ਤਿ ਅਤ੍ਥੋ. ਯਾ ਚਞ੍ਞਾ ਪਰਿਦੇਵਨਾਤਿ ਯਾ ਚ ਰੁਣ੍ਣਸੋਕਤੋ ਅਞ੍ਞਾ ਪਰਿਦੇਵਨਾ, ‘‘ਕਹਂ ਏਕਪੁਤ੍ਤਕਾ’’ਤਿਆਦਿਵਾਚਾਵਿਪ੍ਪਲਾਪੋ, ਸੋਪਿ ਨ ਕਾਤਬ੍ਬੋਤਿ ਅਤ੍ਥੋ. ਸਬ੍ਬਤ੍ਥ ਵਾ-ਸਦ੍ਦੋ ਵਿਕਪ੍ਪਨਤ੍ਥੋ. ਨ ਤਂ ਪੇਤਸ੍ਸ ਅਤ੍ਥਾਯਾਤਿ ਯਸ੍ਮਾ ਰੁਣ੍ਣਂ ਵਾ ਸੋਕੋ ਵਾ ਪਰਿਦੇਵਨਾ ਵਾਤਿ ਸਬ੍ਬਮ੍ਪਿ ਤਂ ਪੇਤਸ੍ਸ ਕਾਲਕਤਸ੍ਸ ਅਤ੍ਥਾਯ ਉਪਕਾਰਾਯ ਨ ਹੋਤਿ, ਤਸ੍ਮਾ ਨ ਹਿ ਤਂ ਕਾਤਬ੍ਬਂ, ਤਥਾਪਿ ਏਵਂ ਤਿਟ੍ਠਨ੍ਤਿ ਞਾਤਯੋ ਅਵਿਦ੍ਦਸੁਨੋਤਿ ਅਧਿਪ੍ਪਾਯੋ.

੧੩. ਏਵਂ ਰੁਣ੍ਣਾਦੀਨਂ ਨਿਰਤ੍ਥਕਭਾਵਂ ਦਸ੍ਸੇਤ੍ਵਾ ਇਦਾਨਿ ਯਾ ਪੁਬ੍ਬਪੇਤਾਦਿਕੇ ਆਰਬ੍ਭ ਦਾਯਕੇਨ ਸਙ੍ਘਸ੍ਸ ਦਕ੍ਖਿਣਾ ਦਿਨ੍ਨਾ, ਤਸ੍ਸਾ ਸਾਤ੍ਥਕਭਾਵਂ ਦਸ੍ਸੇਨ੍ਤੋ ‘‘ਅਯਞ੍ਚ ਖੋ ਦਕ੍ਖਿਣਾ’’ਤਿ ਗਾਥਮਾਹ. ਤਤ੍ਥ ਅਯਨ੍ਤਿ ਦਾਯਕੇਨ ਤਂ ਦਿਨ੍ਨਂ ਦਾਨਂ ਪਚ੍ਚਕ੍ਖਤੋ ਦਸ੍ਸੇਨ੍ਤੋ ਵਦਤਿ. ਚ-ਸਦ੍ਦੋ ਬ੍ਯਤਿਰੇਕਤ੍ਥੋ, ਤੇਨ ਯਥਾ ਰੁਣ੍ਣਾਦਿ ਪੇਤਸ੍ਸ ਨ ਕਸ੍ਸਚਿ ਅਤ੍ਥਾਯ ਹੋਤਿ, ਨ ਏਵਮਯਂ, ਅਯਂ ਪਨ ਦਕ੍ਖਿਣਾ ਦੀਘਰਤ੍ਤਂ ਹਿਤਾਯਸ੍ਸ ਹੋਤੀਤਿ ਵਕ੍ਖਮਾਨਮੇਵ ਵਿਸੇਸਂ ਜੋਤੇਤਿ. ਖੋਤਿ ਅਵਧਾਰਣੇ. ਦਕ੍ਖਿਣਾਤਿ ਦਾਨਂ. ਸਙ੍ਘਮ੍ਹਿ ਸੁਪ੍ਪਤਿਟ੍ਠਿਤਾਤਿ ਅਨੁਤ੍ਤਰੇ ਪੁਞ੍ਞਕ੍ਖੇਤ੍ਤੇ ਸਙ੍ਘੇ ਸੁਟ੍ਠੁ ਪਤਿਟ੍ਠਿਤਾ. ਦੀਘਰਤ੍ਤਂ ਹਿਤਾਯਸ੍ਸਾਤਿ ਅਸ੍ਸ ਪੇਤਸ੍ਸ ਚਿਰਕਾਲਂ ਹਿਤਾਯ ਅਤ੍ਥਾਯ. ਠਾਨਸੋ ਉਪਕਪ੍ਪਤੀਤਿ ਤਙ੍ਖਣਞ੍ਞੇਵ ਨਿਪ੍ਫਜ੍ਜਤਿ, ਨ ਕਾਲਨ੍ਤਰੇਤਿ ਅਤ੍ਥੋ. ਅਯਞ੍ਹਿ ਤਤ੍ਥ ਧਮ੍ਮਤਾ – ਯਂ ਪੇਤੇ ਉਦ੍ਦਿਸ੍ਸ ਦਾਨੇ ਦਿਨ੍ਨੇ ਪੇਤਾ ਚੇ ਅਨੁਮੋਦਨ੍ਤਿ, ਤਾਵਦੇਵ ਤਸ੍ਸ ਫਲੇਨ ਪੇਤਾ ਪਰਿਮੁਚ੍ਚਨ੍ਤੀਤਿ.

ਏਵਂ ਭਗਵਾ ਧਮ੍ਮਂ ਦੇਸੇਤ੍ਵਾ ਮਹਾਜਨਂ ਪੇਤੇ ਉਦ੍ਦਿਸ੍ਸ ਦਾਨਾਭਿਰਤਮਾਨਸਂ ਕਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਪੁਨਦਿਵਸੇ ਸੇਟ੍ਠਿਭਰਿਯਾ ਅਵਸੇਸਾ ਚ ਞਾਤਕਾ ਸੇਟ੍ਠਿਂ ਅਨੁਵਤ੍ਤਨ੍ਤਾ ਏਵਂ ਤੇਮਾਸਮਤ੍ਤਂ ਮਹਾਦਾਨਂ ਪਵਤ੍ਤੇਸੁਂ. ਅਥ ਰਾਜਾ ਪਸੇਨਦਿ ਕੋਸਲੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਕਸ੍ਮਾ, ਭਨ੍ਤੇ, ਭਿਕ੍ਖੂ ਮਾਸਮਤ੍ਤਂ ਮਮ ਘਰਂ ਨਾਗਮਿਂਸੂ’’ਤਿ ਪੁਚ੍ਛਿ. ਸਤ੍ਥਾਰਾ ਤਸ੍ਮਿਂ ਕਾਰਣੇ ਕਥਿਤੇ ਰਾਜਾਪਿ ਸੇਟ੍ਠਿਂ ਅਨੁਵਤ੍ਤਨ੍ਤੋ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਪਵਤ੍ਤੇਸਿ, ਤਂ ਦਿਸ੍ਵਾ ਨਾਗਰਾ ਰਾਜਾਨਂ ਅਨੁਵਤ੍ਤਨ੍ਤਾ ਮਾਸਮਤ੍ਤਂ ਮਹਾਦਾਨਂ ਪਵਤ੍ਤੇਸੁਂ. ਏਵਂ ਮਾਸਦ੍ਵਯਂ ਪਿਟ੍ਠਧੀਤਲਿਕਮੂਲਕਂ ਮਹਾਦਾਨਂ ਪਵਤ੍ਤੇਸੁਨ੍ਤਿ.

ਪਿਟ੍ਠਧੀਤਲਿਕਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੫. ਤਿਰੋਕੁਟ੍ਟਪੇਤਵਤ੍ਥੁਵਣ੍ਣਨਾ

ਤਿਰੋਕੁਟ੍ਟੇਸੁ ਤਿਟ੍ਠਨ੍ਤੀਤਿ ਇਦਂ ਸਤ੍ਥਾ ਰਾਜਗਹੇ ਵਿਹਰਨ੍ਤੋ ਸਮ੍ਬਹੁਲੇ ਪੇਤੇ ਆਰਬ੍ਭ ਕਥੇਸਿ.

ਤਤ੍ਰਾਯਂ ਵਿਤ੍ਥਾਰਕਥਾ – ਇਤੋ ਦ੍ਵਾਨਵੁਤਿਕਪ੍ਪੇ ਕਾਸਿ ਨਾਮ ਨਗਰਂ ਅਹੋਸਿ. ਤਤ੍ਥ ਜਯਸੇਨੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਸਿਰਿਮਾ ਨਾਮ ਦੇਵੀ. ਤਸ੍ਸਾ ਕੁਚ੍ਛਿਯਂ ਫੁਸ੍ਸੋ ਨਾਮ ਬੋਧਿਸਤ੍ਤੋ ਨਿਬ੍ਬਤ੍ਤਿਤ੍ਵਾ ਅਨੁਪੁਬ੍ਬੇਨ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਜ੍ਝਿ. ਜਯਸੇਨੋ ਰਾਜਾ ‘‘ਮਮ ਪੁਤ੍ਤੋ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਬੁਦ੍ਧੋ ਜਾਤੋ, ਮਯ੍ਹਮੇਵ ਬੁਦ੍ਧੋ, ਮਯ੍ਹਂ ਧਮ੍ਮੋ, ਮਯ੍ਹਂ ਸਙ੍ਘੋ’’ਤਿ ਮਮਤ੍ਤਂ ਉਪ੍ਪਾਦੇਤ੍ਵਾ ਸਬ੍ਬਕਾਲਂ ਸਯਮੇਵ ਉਪਟ੍ਠਹਤਿ, ਨ ਅਞ੍ਞੇਸਂ ਓਕਾਸਂ ਦੇਤਿ.

ਭਗਵਤੋ ਕਨਿਟ੍ਠਭਾਤਰੋ ਵੇਮਾਤਿਕਾ ਤਯੋ ਭਾਤਰੋ ਚਿਨ੍ਤੇਸੁਂ – ‘‘ਬੁਦ੍ਧਾ ਨਾਮ ਸਬ੍ਬਲੋਕ ਹਿਤਤ੍ਥਾਯ ਉਪ੍ਪਜ੍ਜਨ੍ਤਿ, ਨ ਏਕਸ੍ਸੇਵ ਅਤ੍ਥਾਯ. ਅਮ੍ਹਾਕਞ੍ਚ ਪਿਤਾ ਅਞ੍ਞੇਸਂ ਓਕਾਸਂ ਨ ਦੇਤਿ. ਕਥਂ ਨੁ ਖੋ ਮਯਂ ਲਭੇਯ੍ਯਾਮ ਭਗਵਨ੍ਤਂ ਉਪਟ੍ਠਾਤੁਂ ਭਿਕ੍ਖੁਸਙ੍ਘਞ੍ਚਾ’’ਤਿ? ਤੇਸਂ ਏਤਦਹੋਸਿ – ‘‘ਹਨ੍ਦ ਮਯਂ ਕਿਞ੍ਚਿ ਉਪਾਯਂ ਕਰੋਮਾ’’ਤਿ. ਤੇ ਪਚ੍ਚਨ੍ਤਂ ਕੁਪਿਤਂ ਵਿਯ ਕਾਰਾਪੇਸੁਂ. ਤਤੋ ਰਾਜਾ ‘‘ਪਚ੍ਚਨ੍ਤੋ ਕੁਪਿਤੋ’’ਤਿ ਸੁਤ੍ਵਾ ਤਯੋਪਿ ਪੁਤ੍ਤੇ ਪਚ੍ਚਨ੍ਤਂ ਵੂਪਸਮੇਤੁਂ ਪੇਸੇਸਿ. ਤੇ ਗਨ੍ਤ੍ਵਾ ਵੂਪਸਮੇਤ੍ਵਾ ਆਗਤਾ. ਰਾਜਾ ਤੁਟ੍ਠੋ ਵਰਂ ਅਦਾਸਿ ‘‘ਯਂ ਇਚ੍ਛਥ, ਤਂ ਗਣ੍ਹਥਾ’’ਤਿ. ਤੇ ‘‘ਮਯਂ ਭਗਵਨ੍ਤਂ ਉਪਟ੍ਠਾਤੁਂ ਇਚ੍ਛਾਮਾ’’ਤਿ ਆਹਂਸੁ. ਰਾਜਾ ‘‘ਏਤਂ ਠਪੇਤ੍ਵਾ ਅਞ੍ਞਂ ਗਣ੍ਹਥਾ’’ਤਿ ਆਹ. ਤੇ ‘‘ਮਯਂ ਅਞ੍ਞੇਨ ਅਨਤ੍ਥਿਕਾ’’ਤਿ ਆਹਂਸੁ. ਤੇਨ ਹਿ ਪਰਿਚ੍ਛੇਦਂ ਕਤ੍ਵਾ ਗਣ੍ਹਥਾਤਿ. ਤੇ ਸਤ੍ਤ ਵਸ੍ਸਾਨਿ ਯਾਚਿਂਸੁ. ਰਾਜਾ ਨ ਅਦਾਸਿ. ਏਵਂ ‘‘ਛ, ਪਞ੍ਚ, ਚਤ੍ਤਾਰਿ, ਤੀਣਿ, ਦ੍ਵੇ, ਏਕਂ, ਸਤ੍ਤ ਮਾਸੇ, ਛ, ਪਞ੍ਚ, ਚਤ੍ਤਾਰੋ’’ਤਿ ਵਤ੍ਵਾ ਯਾਵ ਤੇਮਾਸਂ ਯਾਚਿਂਸੁ. ਤਦਾ ਰਾਜਾ ‘‘ਗਣ੍ਹਥਾ’’ਤਿ ਅਦਾਸਿ.

ਤੇ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਆਹਂਸੁ – ‘‘ਇਚ੍ਛਾਮ ਮਯਂ, ਭਨ੍ਤੇ, ਭਗਵਨ੍ਤਂ ਤੇਮਾਸਂ ਉਪਟ੍ਠਾਤੁਂ, ਅਧਿਵਾਸੇਤੁ ਨੋ, ਭਨ੍ਤੇ, ਭਗਵਾ ਇਮਂ ਤੇਮਾਸਂ ਵਸ੍ਸਾਵਾਸ’’ਨ੍ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਤੇ ਤਯੋ ਅਤ੍ਤਨੋ ਜਨਪਦੇ ਨਿਯੁਤ੍ਤਕਪੁਰਿਸਸ੍ਸ ਲੇਖਂ ਪੇਸੇਸੁਂ ‘‘ਇਮਂ ਤੇਮਾਸਂ ਅਮ੍ਹੇਹਿ ਭਗਵਾ ਉਪਟ੍ਠਾਤਬ੍ਬੋ, ਵਿਹਾਰਂ ਆਦਿਂ ਕਤ੍ਵਾ ਸਬ੍ਬਂ ਭਗਵਤੋ ਉਪਟ੍ਠਾਨਸਮ੍ਭਾਰਂ ਸਮ੍ਪਾਦੇਹੀ’’ਤਿ. ਸੋ ਸਬ੍ਬਂ ਸਮ੍ਪਾਦੇਤ੍ਵਾ ਪਟਿਪੇਸੇਸਿ. ਤੇ ਕਾਸਾਯਵਤ੍ਥਨਿਵਤ੍ਥਾ ਹੁਤ੍ਵਾ ਪੁਰਿਸਸਹਸ੍ਸੇਹਿ ਵੇਯ੍ਯਾਵਚ੍ਚਕਰੇਹਿ ਭਗਵਨ੍ਤਂ ਭਿਕ੍ਖੁਸਙ੍ਘਞ੍ਚ ਸਕ੍ਕਚ੍ਚਂ ਉਪਟ੍ਠਹਮਾਨਾ ਜਨਪਦਂ ਨੇਤ੍ਵਾ ਵਿਹਾਰਂ ਨਿਯ੍ਯਾਤੇਤ੍ਵਾ ਵਸ੍ਸਂ ਵਸਾਪੇਸੁਂ.

ਤੇਸਂ ਭਣ੍ਡਾਗਾਰਿਕੋ ਏਕੋ ਗਹਪਤਿਪੁਤ੍ਤੋ ਸਪਜਾਪਤਿਕੋ ਸਦ੍ਧੋ ਅਹੋਸਿ ਪਸਨ੍ਨੋ. ਸੋ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਾਨਵਤ੍ਤਂ ਸਕ੍ਕਚ੍ਚਂ ਅਦਾਸਿ. ਜਨਪਦੇ ਨਿਯੁਤ੍ਤਕਪੁਰਿਸੋ ਤਂ ਗਹੇਤ੍ਵਾ ਜਾਨਪਦੇਹਿ ਏਕਾਦਸਮਤ੍ਤੇਹਿ ਪੁਰਿਸਸਹਸ੍ਸੇਹਿ ਸਦ੍ਧਿਂ ਸਕ੍ਕਚ੍ਚਮੇਵ ਦਾਨਂ ਪਵਤ੍ਤਾਪੇਸਿ. ਤਤ੍ਥ ਕੇਚਿ ਜਾਨਪਦਾ ਪਟਿਹਤਚਿਤ੍ਤਾ ਅਹੇਸੁਂ. ਤੇ ਦਾਨਸ੍ਸ ਅਨ੍ਤਰਾਯਂ ਕਤ੍ਵਾ ਦੇਯ੍ਯਧਮ੍ਮਂ ਅਤ੍ਤਨਾ ਖਾਦਿਂਸੁ, ਭਤ੍ਤਸਾਲਞ੍ਚ ਅਗ੍ਗਿਨਾ ਦਹਿਂਸੁ. ਪਵਾਰਿਤਾ ਰਾਜਪੁਤ੍ਤਾ ਭਗਵਤੋ ਸਕ੍ਕਾਰਂ ਕਤ੍ਵਾ ਭਗਵਨ੍ਤਂ ਪੁਰਕ੍ਖਤ੍ਵਾ ਪਿਤੁ ਸਨ੍ਤਿਕਮੇਵ ਪਚ੍ਚਾਗਮਿਂਸੁ. ਤਤ੍ਥ ਗਨ੍ਤ੍ਵਾ ਭਗਵਾ ਪਰਿਨਿਬ੍ਬਾਯਿ. ਰਾਜਪੁਤ੍ਤਾ ਚ ਜਨਪਦੇ ਨਿਯੁਤ੍ਤਕਪੁਰਿਸੋ ਚ ਭਣ੍ਡਾਗਾਰਿਕੋ ਚ ਅਨੁਪੁਬ੍ਬੇਨ ਕਾਲਂ ਕਤ੍ਵਾ ਸਦ੍ਧਿਂ ਪਰਿਸਾਯ ਸਗ੍ਗੇ ਉਪ੍ਪਜ੍ਜਿਂਸੁ, ਪਟਿਹਤਚਿਤ੍ਤਾ ਜਨਾ ਨਿਰਯੇ ਉਪ੍ਪਜ੍ਜਿਂਸੁ. ਏਵਂ ਤੇਸਂ ਉਭਯੇਸਂ ਜਨਾਨਂ ਸਗ੍ਗਤੋ ਸਗ੍ਗਂ ਨਿਰਯਤੋ ਨਿਰਯਂ ਉਪਪਜ੍ਜਨ੍ਤਾਨਂ ਦ੍ਵਾਨਵੁਤਿਕਪ੍ਪਾ ਵੀਤਿਵਤ੍ਤਾ.

ਅਥ ਇਮਸ੍ਮਿਂ ਭਦ੍ਦਕਪ੍ਪੇ ਕਸ੍ਸਪਸ੍ਸ ਭਗਵਤੋ ਕਾਲੇ ਤੇ ਪਟਿਹਤਚਿਤ੍ਤਾ ਜਨਾ ਪੇਤੇਸੁ ਉਪ੍ਪਨ੍ਨਾ. ਤਦਾ ਮਨੁਸ੍ਸਾ ਅਤ੍ਤਨੋ ਅਤ੍ਤਨੋ ਞਾਤਕਾਨਂ ਪੇਤਾਨਂ ਅਤ੍ਥਾਯ ਦਾਨਂ ਦਤ੍ਵਾ ਉਦ੍ਦਿਸਨ੍ਤਿ ‘‘ਇਦਂ ਨੋ ਞਾਤੀਨਂ ਹੋਤੂ’’ਤਿ, ਤੇ ਸਮ੍ਪਤ੍ਤਿਂ ਲਭਨ੍ਤਿ. ਅਥ ਇਮੇਪਿ ਪੇਤਾ ਤਂ ਦਿਸ੍ਵਾ ਕਸ੍ਸਪਂ ਸਮ੍ਮਾਸਮ੍ਬੁਦ੍ਧਂ ਉਪਸਙ੍ਕਮਿਤ੍ਵਾ ਪੁਚ੍ਛਿਂਸੁ – ‘‘ਕਿਂ ਨੁ ਖੋ, ਭਨ੍ਤੇ, ਮਯਮ੍ਪਿ ਏਵਰੂਪਂ ਸਮ੍ਪਤ੍ਤਿਂ ਲਭੇਯ੍ਯਾਮਾ’’ਤਿ? ਭਗਵਾ ਆਹ – ‘‘ਇਦਾਨਿ ਨ ਲਭਥ, ਅਨਾਗਤੇ ਪਨ ਗੋਤਮੋ ਨਾਮ ਸਮ੍ਮਾਸਮ੍ਬੁਦ੍ਧੋ ਭਵਿਸ੍ਸਤਿ, ਤਸ੍ਸ ਭਗਵਤੋ ਕਾਲੇ ਬਿਮ੍ਬਿਸਾਰੋ ਨਾਮ ਰਾਜਾ ਭਵਿਸ੍ਸਤਿ, ਸੋ ਤੁਮ੍ਹਾਕਂ ਇਤੋ ਦ੍ਵਾਨਵੁਤਿਕਪ੍ਪੇ ਞਾਤਿ ਅਹੋਸਿ, ਸੋ ਬੁਦ੍ਧਸ੍ਸ ਦਾਨਂ ਦਤ੍ਵਾ ਤੁਮ੍ਹਾਕਂ ਉਦ੍ਦਿਸਿਸ੍ਸਤਿ, ਤਦਾ ਲਭਿਸ੍ਸਥਾ’’ਤਿ. ਏਵਂ ਵੁਤ੍ਤੇ ਕਿਰ ਤੇਸਂ ਪੇਤਾਨਂ ਤਂ ਵਚਨਂ ‘‘ਸ੍ਵੇ ਲਭਿਸ੍ਸਥਾ’’ਤਿ ਵੁਤ੍ਤਂ ਵਿਯ ਅਹੋਸਿ.

ਤਤੋ ਏਕਸ੍ਮਿਂ ਬੁਦ੍ਧਨ੍ਤਰੇ ਵੀਤਿਵਤ੍ਤੇ ਅਮ੍ਹਾਕਂ ਭਗਵਾ ਉਪ੍ਪਜ੍ਜਿ. ਤੇਪਿ ਤਯੋ ਰਾਜਪੁਤ੍ਤਾ ਪੁਰਿਸਸਹਸ੍ਸੇਨ ਸਦ੍ਧਿਂ ਦੇਵਲੋਕਤੋ ਚਵਿਤ੍ਵਾ ਮਗਧਰਟ੍ਠੇ ਬ੍ਰਾਹ੍ਮਣਕੁਲੇ ਉਪ੍ਪਜ੍ਜਿਤ੍ਵਾ ਅਨੁਪੁਬ੍ਬੇਨ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਗਯਾਸੀਸੇ ਤਯੋ ਜਟਿਲਾ ਅਹੇਸੁਂ, ਜਨਪਦੇ ਨਿਯੁਤ੍ਤਕਪੁਰਿਸੋ ਰਾਜਾ ਬਿਮ੍ਬਿਸਾਰੋ ਅਹੋਸਿ, ਭਣ੍ਡਾਗਾਰਿਕੋ ਗਹਪਤਿਪੁਤ੍ਤੋ ਵਿਸਾਖੋ ਨਾਮ ਸੇਟ੍ਠਿ ਅਹੋਸਿ, ਤਸ੍ਸ ਪਜਾਪਤਿ ਧਮ੍ਮਦਿਨ੍ਨਾ ਨਾਮ ਸੇਟ੍ਠਿਧੀਤਾ ਅਹੋਸਿ, ਅਵਸੇਸਾ ਪਨ ਪਰਿਸਾ ਰਞ੍ਞੋ ਏਵ ਪਰਿਵਾਰਾ ਹੁਤ੍ਵਾ ਨਿਬ੍ਬਤ੍ਤਿਂਸੁ.

ਅਮ੍ਹਾਕਮ੍ਪਿ ਭਗਵਾ ਲੋਕੇ ਉਪ੍ਪਜ੍ਜਿਤ੍ਵਾ ਸਤ੍ਤਸਤ੍ਤਾਹਂ ਅਤਿਕ੍ਕਮਿਤ੍ਵਾ ਅਨੁਪੁਬ੍ਬੇਨ ਬਾਰਾਣਸਿਂ ਆਗਮ੍ਮ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ ਪਞ੍ਚਵਗ੍ਗਿਯੇ ਆਦਿਂ ਕਤ੍ਵਾ ਯਾਵ ਸਹਸ੍ਸਪਰਿਵਾਰੇ ਤਯੋ ਜਟਿਲੇ ਵਿਨੇਤ੍ਵਾ ਰਾਜਗਹਂ ਅਗਮਾਸਿ. ਤਤ੍ਥ ਚ ਤਦਹੁਪਸਙ੍ਕਮਨ੍ਤਂਯੇਵ ਰਾਜਾਨਂ ਬਿਮ੍ਬਿਸਾਰਂ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਸਿ ਸਦ੍ਧਿਂ ਏਕਾਦਸਨਹੁਤੇਹਿ ਅਙ੍ਗਮਗਧਵਾਸੀਹਿ ਬ੍ਰਾਹ੍ਮਣਗਹਪਤਿਕੇਹਿ. ਅਥ ਰਞ੍ਞਾ ਸ੍ਵਾਤਨਾਯ ਭਤ੍ਤੇਨ ਨਿਮਨ੍ਤਿਤੋ ਅਧਿਵਾਸੇਤ੍ਵਾ ਦੁਤਿਯਦਿਵਸੇ ਮਾਣਵਕਵਣ੍ਣੇਨ ਸਕ੍ਕੇਨ ਦੇਵਾਨਮਿਨ੍ਦੇਨ ਪੁਰਤੋ ਗਚ੍ਛਨ੍ਤੇਨ –

‘‘ਦਨ੍ਤੋ ਦਨ੍ਤੇਹਿ ਸਹ ਪੁਰਾਣਜਟਿਲੇਹਿ, ਵਿਪ੍ਪਮੁਤ੍ਤੋ ਵਿਪ੍ਪਮੁਤ੍ਤੇਹਿ;

ਸਿਙ੍ਗੀਨਿਕ੍ਖਸਵਣ੍ਣੋ, ਰਾਜਗਹਂ ਪਾਵਿਸਿ ਭਗਵਾ’’ਤਿ. (ਮਹਾਵ. ੫੮) –

ਏਵਮਾਦੀਹਿ ਗਾਥਾਹਿ ਅਭਿਤ੍ਥਵਿਯਮਾਨੋ ਰਾਜਗਹਂ ਪਵਿਸਿਤ੍ਵਾ ਰਞ੍ਞੋ ਨਿਵੇਸਨੇ ਮਹਾਦਾਨਂ ਸਮ੍ਪਟਿਚ੍ਛਿ. ਤੇ ਪਨ ਪੇਤਾ ‘‘ਇਦਾਨਿ ਰਾਜਾ ਦਾਨਂ ਅਮ੍ਹਾਕਂ ਉਦ੍ਦਿਸਿਸ੍ਸਤਿ, ਇਦਾਨਿ ਉਦ੍ਦਿਸਿਸ੍ਸਤੀ’’ਤਿ ਆਸਾਯ ਸਮ੍ਪਰਿਵਾਰੇਤ੍ਵਾ ਅਟ੍ਠਂਸੁ.

ਰਾਜਾ ਦਾਨਂ ਦਤ੍ਵਾ ‘‘ਕਤ੍ਥ ਨੁ ਖੋ ਭਗਵਾ ਵਿਹਰੇਯ੍ਯਾ’’ਤਿ ਭਗਵਤੋ ਵਿਹਾਰਟ੍ਠਾਨਮੇਵ ਚਿਨ੍ਤੇਸਿ, ਨ ਤਂ ਦਾਨਂ ਕਸ੍ਸਚਿ ਉਦ੍ਦਿਸਿ. ਤਥਾ ਤਂ ਦਾਨਂ ਅਲਭਨ੍ਤਾ ਪੇਤਾ ਛਿਨ੍ਨਾਸਾ ਹੁਤ੍ਵਾ ਰਤ੍ਤਿਯਂ ਰਞ੍ਞੋ ਨਿਵੇਸਨੇ ਅਤਿਵਿਯ ਭਿਂਸਨਕਂ ਵਿਸ੍ਸਰਮਕਂਸੁ. ਰਾਜਾ ਭਯਸਨ੍ਤਾਸਸਂਵੇਗਂ ਆਪਜ੍ਜਿਤ੍ਵਾ ਵਿਭਾਤਾਯ ਰਤ੍ਤਿਯਾ ਭਗਵਤੋ ਆਰੋਚੇਹਿ – ‘‘ਏਵਰੂਪਂ ਸਦ੍ਦਂ ਅਸ੍ਸੋਸਿਂ, ਕਿਂ ਨੁ ਖੋ ਮੇ, ਭਨ੍ਤੇ, ਭਵਿਸ੍ਸਤੀ’’ਤਿ? ਭਗਵਾ ‘‘ਮਾ ਭਾਯਿ, ਮਹਾਰਾਜ, ਨ ਤੇ ਕਿਞ੍ਚਿ ਪਾਪਕਂ ਭਵਿਸ੍ਸਤਿ, ਅਪਿਚ ਖੋ ਸਨ੍ਤਿ ਤੇ ਪੁਰਾਣਞਾਤਕਾ ਪੇਤੇਸੁ ਉਪ੍ਪਨ੍ਨਾ. ਤੇ ਏਕਂ ਬੁਦ੍ਧਨ੍ਤਰਂ ਤਮੇਵ ਪਚ੍ਚਾਸੀਸਨ੍ਤਾ ‘ਬੁਦ੍ਧਸ੍ਸ ਦਾਨਂ ਦਤ੍ਵਾ ਅਮ੍ਹਾਕਂ ਉਦ੍ਦਿਸਿਸ੍ਸਤੀ’ਤਿ ਵਿਚਰਨ੍ਤਾ ਤਯਾ ਹਿਯ੍ਯੋ ਦਾਨਂ ਦਤ੍ਵਾ ਨ ਉਦ੍ਦਿਸਿਤਤ੍ਤਾ ਛਿਨ੍ਨਾਸਾ ਹੁਤ੍ਵਾ ਤਥਾਰੂਪਂ ਵਿਸ੍ਸਰਮਕਂਸੂ’’ਤਿ ਆਹ. ‘‘ਕਿਂ ਇਦਾਨਿਪਿ, ਭਨ੍ਤੇ, ਦਿਨ੍ਨੇ ਤੇ ਲਭੇਯ੍ਯੁ’’ਨ੍ਤਿ? ‘‘ਆਮ, ਮਹਾਰਾਜਾ’’ਤਿ. ‘‘ਤੇਨ ਹਿ, ਭਨ੍ਤੇ, ਅਧਿਵਾਸੇਤੁ ਮੇ ਭਗਵਾ ਅਜ੍ਜਤਨਾਯ ਦਾਨਂ, ਤੇਸਂ ਉਦ੍ਦਿਸਿਸ੍ਸਾਮੀ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ.

ਰਾਜਾ ਨਿਵੇਸਨਂ ਗਨ੍ਤ੍ਵਾ ਮਹਾਦਾਨਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ. ਭਗਵਾ ਰਾਜਨ੍ਤੇਪੁਰਂ ਗਨ੍ਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਤੇ ਪੇਤਾ ‘‘ਅਪਿ ਨਾਮ ਅਜ੍ਜ ਲਭੇਯ੍ਯਾਮਾ’’ਤਿ ਗਨ੍ਤ੍ਵਾ ਤਿਰੋਕੁਟ੍ਟਾਦੀਸੁ ਅਟ੍ਠਂਸੁ. ਭਗਵਾ ਤਥਾ ਅਕਾਸਿ, ਯਥਾ ਤੇ ਸਬ੍ਬੇਵ ਰਞ੍ਞੋ ਆਪਾਥਂ ਗਤਾ ਅਹੇਸੁਂ. ਰਾਜਾ ਦਕ੍ਖਿਣੋਦਕਂ ਦੇਨ੍ਤੋ ‘‘ਇਦਂ ਮੇ ਞਾਤੀਨਂ ਹੋਤੂ’’ਤਿ ਉਦ੍ਦਿਸਿ. ਤਾਵਦੇਵ ਪੇਤਾਨਂ ਕਮਲਕੁਵਲਯਸਞ੍ਛਨ੍ਨਾ ਪੋਕ੍ਖਰਣਿਯੋ ਨਿਬ੍ਬਤ੍ਤਿਂਸੁ. ਤੇ ਤਤ੍ਥ ਨ੍ਹਤ੍ਵਾ ਚ ਪਿਵਿਤ੍ਵਾ ਚ ਪਟਿਪ੍ਪਸ੍ਸਦ੍ਧਦਰਥਕਿਲਮਥਪਿਪਾਸਾ ਸੁਵਣ੍ਣਵਣ੍ਣਾ ਅਹੇਸੁਂ. ਰਾਜਾ ਯਾਗੁਖਜ੍ਜਭੋਜ੍ਜਾਨਿ ਦਤ੍ਵਾ ਉਦ੍ਦਿਸਿ. ਤੇਸਂ ਤਙ੍ਖਣਞ੍ਞੇਵ ਦਿਬ੍ਬਯਾਗੁਖਜ੍ਜਭੋਜ੍ਜਾਨਿ ਨਿਬ੍ਬਤ੍ਤਿਂਸੁ. ਤੇ ਤਾਨਿ ਪਰਿਭੁਞ੍ਜਿਤ੍ਵਾ ਪੀਣਿਨ੍ਦ੍ਰਿਯਾ ਅਹੇਸੁਂ. ਅਥ ਵਤ੍ਥਸੇਨਾਸਨਾਨਿ ਦਤ੍ਵਾ ਉਦ੍ਦਿਸਿ. ਤੇਸਂ ਦਿਬ੍ਬਵਤ੍ਥਪਾਸਾਦਪਚ੍ਚਤ੍ਥਰਣਸੇਯ੍ਯਾਦਿਅਲਙ੍ਕਾਰਵਿਧਯੋ ਨਿਬ੍ਬਤ੍ਤਿਂਸੁ. ਸਾ ਚ ਤੇਸਂ ਸਮ੍ਪਤ੍ਤਿ ਸਬ੍ਬਾਪਿ ਯਥਾ ਰਞ੍ਞੋ ਪਾਕਟਾ ਹੋਤਿ, ਤਥਾ ਭਗਵਾ ਅਧਿਟ੍ਠਾਸਿ. ਰਾਜਾ ਤਂ ਦਿਸ੍ਵਾ ਅਤਿਵਿਯ ਅਤ੍ਤਮਨੋ ਅਹੋਸਿ. ਤਤੋ ਭਗਵਾ ਭੁਤ੍ਤਾਵੀ ਪਵਾਰਿਤੋ ਰਞ੍ਞੋ ਬਿਮ੍ਬਿਸਾਰਸ੍ਸ ਅਨੁਮੋਦਨਤ੍ਥਂ ਤਿਰੋਕੁਟ੍ਟਪੇਤਵਤ੍ਥੁਂ ਅਭਾਸਿ –

੧੪. ‘‘ਤਿਰੋਕੁਟ੍ਟੇਸੁ ਤਿਟ੍ਠਨ੍ਤਿ, ਸਨ੍ਧਿਸਿਙ੍ਘਾਟਕੇਸੁ ਚ;

ਦ੍ਵਾਰਬਾਹਾਸੁ ਤਿਟ੍ਠਨ੍ਤਿ, ਆਗਨ੍ਤ੍ਵਾਨ ਸਕਂ ਘਰਂ.

੧੫. ‘‘ਪਹੂਤੇ ਅਨ੍ਨਪਾਨਮ੍ਹਿ, ਖਜ੍ਜਭੋਜ੍ਜੇ ਉਪਟ੍ਠਿਤੇ;

ਨ ਤੇਸਂ ਕੋਚਿ ਸਰਤਿ, ਸਤ੍ਤਾਨਂ ਕਮ੍ਮਪਚ੍ਚਯਾ.

੧੬. ‘‘ਏਵਂ ਦਦਨ੍ਤਿ ਞਾਤੀਨਂ, ਯੇ ਹੋਨ੍ਤਿ ਅਨੁਕਮ੍ਪਕਾ;

ਸੁਚਿਂ ਪਣੀਤਂ ਕਾਲੇਨ, ਕਪ੍ਪਿਯਂ ਪਾਨਭੋਜਨਂ.

੧੭. ‘‘ਇਦਂ ਵੋ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ;

ਤੇ ਚ ਤਤ੍ਥ ਸਮਾਗਨ੍ਤ੍ਵਾ, ਞਾਤਿਪੇਤਾ ਸਮਾਗਤਾ;

ਪਹੂਤੇ ਅਨ੍ਨਪਾਨਮ੍ਹਿ, ਸਕ੍ਕਚ੍ਚਂ ਅਨੁਮੋਦਰੇ.

੧੮. ‘‘ਚਿਰਂ ਜੀਵਨ੍ਤੁ ਨੋ ਞਾਤੀ, ਯੇਸਂ ਹੇਤੁ ਲਭਾਮਸੇ;

ਅਮ੍ਹਾਕਞ੍ਚ ਕਤਾ ਪੂਜਾ, ਦਾਯਕਾ ਚ ਅਨਿਪ੍ਫਲਾ.

੧੯. ‘‘ਨ ਹਿ ਤਤ੍ਥ ਕਸਿ ਅਤ੍ਥਿ, ਗੋਰਕ੍ਖੇਤ੍ਥ ਨ ਵਿਜ੍ਜਤਿ;

ਵਣਿਜ੍ਜਾ ਤਾਦਿਸੀ ਨਤ੍ਥਿ, ਹਿਰਞ੍ਞੇਨ ਕਯਾਕਯਂ;

ਇਤੋ ਦਿਨ੍ਨੇਨ ਯਾਪੇਨ੍ਤਿ, ਪੇਤਾ ਕਾਲਗਤਾ ਤਹਿਂ.

੨੦. ‘‘ਉਨ੍ਨਮੇ ਉਦਕਂ ਵੁਟ੍ਠਂ, ਯਥਾ ਨਿਨ੍ਨਂ ਪਵਤ੍ਤਤਿ;

ਏਵਮੇਵ ਇਤੋ ਦਿਨ੍ਨਂ, ਪੇਤਾਨਂ ਉਪਕਪ੍ਪਤਿ.

੨੧. ‘‘ਯਥਾ ਵਾਰਿਵਹਾ ਪੂਰਾ, ਪਰਿਪੂਰੇਨ੍ਤਿ ਸਾਗਰਂ;

ਏਵਮੇਵ ਇਤੋ ਦਿਨ੍ਨਂ, ਪੇਤਾਨਂ ਉਪਕਪ੍ਪਤਿ.

੨੨. ‘‘ਅਦਾਸਿ ਮੇ ਅਕਾਸਿ ਮੇ, ਞਾਤਿਮਿਤ੍ਤਾ ਸਖਾ ਚ ਮੇ;

ਪੇਤਾਨਂ ਦਕ੍ਖਿਣਂ ਦਜ੍ਜਾ, ਪੁਬ੍ਬੇ ਕਤਮਨੁਸ੍ਸਰਂ.

੨੩. ‘‘ਨ ਹਿ ਰੁਣ੍ਣਂ ਵਾ ਸੋਕੋ ਵਾ, ਯਾ ਚਞ੍ਞਾ ਪਰਿਦੇਵਨਾ;

ਨ ਤਂ ਪੇਤਾਨਮਤ੍ਥਾਯ, ਏਵਂ ਤਿਟ੍ਠਨ੍ਤਿ ਞਾਤਯੋ.

੨੪. ‘‘ਅਯਞ੍ਚ ਖੋ ਦਕ੍ਖਿਣਾ ਦਿਨ੍ਨਾ, ਸਙ੍ਘਮ੍ਹਿ ਸੁਪ੍ਪਤਿਟ੍ਠਿਤਾ;

ਦੀਘਰਤ੍ਤਂ ਹਿਤਾਯਸ੍ਸ, ਠਾਨਸੋ ਉਪਕਪ੍ਪਤਿ.

੨੫. ‘‘ਸੋ ਞਾਤਿਧਮ੍ਮੋ ਚ ਅਯਂ ਨਿਦਸ੍ਸਿਤੋ, ਪੇਤਾਨ ਪੂਜਾ ਚ ਕਤਾ ਉਲ਼ਾਰਾ;

ਬਲਞ੍ਚ ਭਿਕ੍ਖੂਨਮਨੁਪ੍ਪਦਿਨ੍ਨਂ, ਤੁਮ੍ਹੇਹਿ ਪੁਞ੍ਞਂ ਪਹੁਤਂ ਅਨਪ੍ਪਕ’’ਨ੍ਤਿ.

੧੪. ਤਤ੍ਥ ਤਿਰੋਕੁਟ੍ਟੇਸੂਤਿ ਕੁਟ੍ਟਾਨਂ ਪਰਭਾਗੇਸੁ. ਤਿਟ੍ਠਨ੍ਤੀਤਿ ਨਿਸਜ੍ਜਾਦਿਪਟਿਕ੍ਖੇਪਤੋ ਠਾਨਕਪ੍ਪਨਵਚਨਮੇਤਂ, ਗੇਹਪਾਕਾਰਕੁਟ੍ਟਾਨਂ ਦ੍ਵਾਰਤੋ ਬਹਿ ਏਵ ਤਿਟ੍ਠਨ੍ਤੀਤਿ ਅਤ੍ਥੋ. ਸਨ੍ਧਿਸਿਙ੍ਘਾਟਕੇਸੁ ਚਾਤਿ ਸਨ੍ਧੀਸੁ ਚ ਸਿਙ੍ਘਾਟਕੇਸੁ ਚ. ਸਨ੍ਧੀਤਿ ਚਤੁਕ੍ਕੋਣਰਚ੍ਛਾ, ਘਰਸਨ੍ਧਿਭਿਤ੍ਤਿਸਨ੍ਧਿਆਲੋਕਸਨ੍ਧਿਯੋਪਿ ਵੁਚ੍ਚਨ੍ਤਿ. ਸਿਙ੍ਘਾਟਕਾਤਿ ਤਿਕੋਣਰਚ੍ਛਾ. ਦ੍ਵਾਰਬਾਹਾਸੁ ਤਿਟ੍ਠਨ੍ਤੀਤਿ ਨਗਰਦ੍ਵਾਰਘਰਦ੍ਵਾਰਾਨਂ ਬਾਹਾ ਨਿਸ੍ਸਾਯ ਤਿਟ੍ਠਨ੍ਤਿ. ਆਗਨ੍ਤ੍ਵਾਨ ਸਕਂ ਘਰਨ੍ਤਿ ਸਕਘਰਂ ਨਾਮ ਪੁਬ੍ਬਞਾਤਿਘਰਮ੍ਪਿ ਅਤ੍ਤਨਾ ਸਾਮਿਭਾਵੇਨ ਅਜ੍ਝਾਵੁਤ੍ਥਘਰਮ੍ਪਿ, ਤਦੁਭਯਮ੍ਪਿ ਤੇ ਯਸ੍ਮਾ ਸਕਘਰਸਞ੍ਞਾਯ ਆਗਚ੍ਛਨ੍ਤਿ, ਤਸ੍ਮਾ ‘‘ਆਗਨ੍ਤ੍ਵਾਨ ਸਕਂ ਘਰ’’ਨ੍ਤਿ ਆਹ.

੧੫. ਏਵਂ ਭਗਵਾ ਪੁਬ੍ਬੇ ਅਨਜ੍ਝਾਵੁਤ੍ਥਪੁਬ੍ਬਮ੍ਪਿ ਪੁਬ੍ਬਞਾਤਿਘਰਤ੍ਤਾ ਬਿਮ੍ਬਿਸਾਰਨਿਵੇਸਨਂ ਸਕਘਰਸਞ੍ਞਾਯ ਆਗਨ੍ਤ੍ਵਾ ਤਿਰੋਕੁਟ੍ਟਾਦੀਸੁ ਠਿਤੇ ਇਸ੍ਸਾਮਚ੍ਛਰਿਯਫਲਂ ਅਨੁਭਵਨ੍ਤੇ ਅਤਿਵਿਯ ਦੁਦ੍ਦਸਿਕਵਿਰੂਪਭਯਾਨਕਦਸ੍ਸਨੇ ਬਹੂ ਪੇਤੇ ਰਞ੍ਞੋ ਦਸ੍ਸੇਨ੍ਤੋ ‘‘ਤਿਰੋਕੁਟ੍ਟੇਸੁ ਤਿਟ੍ਠਨ੍ਤੀ’’ਤਿ ਗਾਥਂ ਵਤ੍ਵਾ ਪੁਨ ਤੇਹਿ ਕਤਸ੍ਸ ਕਮ੍ਮਸ੍ਸ ਦਾਰੁਣਭਾਵਂ ਦਸ੍ਸੇਨ੍ਤੋ ‘‘ਪਹੂਤੇ ਅਨ੍ਨਪਾਨਮ੍ਹੀ’’ਤਿ ਦੁਤਿਯਗਾਥਮਾਹ.

ਤਤ੍ਥ ਪਹੂਤੇਤਿ ਅਨਪ੍ਪਕੇ ਬਹੁਮ੍ਹਿ, ਯਾਵਦਤ੍ਥੇਤਿ ਅਤ੍ਥੋ. ਬ-ਕਾਰਸ੍ਸ ਹਿ ਪ-ਕਾਰੋ ਲਬ੍ਭਤਿ ‘‘ਪਹੁ ਸਨ੍ਤੋ ਨ ਭਰਤੀ’’ਤਿਆਦੀਸੁ (ਸੁ. ਨਿ. ੯੮) ਵਿਯ. ਕੇਚਿ ਪਨ ‘‘ਬਹੁਕੇ’’ਤਿ ਪਠਨ੍ਤਿ, ਸੋ ਪਨ ਪਮਾਦਪਾਠੋ. ਅਨ੍ਨਪਾਨਮ੍ਹੀਤਿ ਅਨ੍ਨੇ ਚ ਪਾਨੇ ਚ. ਖਜ੍ਜਭੋਜ੍ਜੇਤਿ ਖਜ੍ਜੇ ਚ ਭੋਜ੍ਜੇ ਚ. ਏਤੇਨ ਅਸਿਤਪੀਤਖਾਯਿਤਸਾਯਿਤਵਸੇਨ ਚਤੁਬ੍ਬਿਧਮ੍ਪਿ ਆਹਾਰਂ ਦਸ੍ਸੇਤਿ. ਉਪਟ੍ਠਿਤੇਤਿ ਉਪਗਮ੍ਮ ਠਿਤੇ ਸਜ੍ਜਿਤੇ, ਪਟਿਯਤ੍ਤੇਤਿ ਅਤ੍ਥੋ. ਨ ਤੇਸਂ ਕੋਚਿ ਸਰਤਿ ਸਤ੍ਤਾਨਨ੍ਤਿ ਤੇਸਂ ਪੇਤ੍ਤਿਵਿਸਯੇ ਉਪ੍ਪਨ੍ਨਾਨਂ ਸਤ੍ਤਾਨਂ ਕੋਚਿ ਮਾਤਾ ਵਾ ਪਿਤਾ ਵਾ ਪੁਤ੍ਤੋ ਵਾ ਨਤ੍ਤਾ ਵਾ ਨ ਸਰਤਿ. ਕਿਂ ਕਾਰਣਾ? ਕਮ੍ਮਪਚ੍ਚਯਾਤਿ, ਅਤ੍ਤਨਾ ਕਤਸ੍ਸ ਅਦਾਨਦਾਨਪਟਿਸੇਧਨਾਦਿਭੇਦਸ੍ਸ ਕਦਰਿਯਕਮ੍ਮਸ੍ਸ ਕਾਰਣਭਾਵਤੋ. ਤਞ੍ਹਿ ਕਮ੍ਮਂ ਤੇਸਂ ਞਾਤੀਨਂ ਸਰਿਤੁਂ ਨ ਦੇਤਿ.

੧੬. ਏਵਂ ਭਗਵਾ ਅਨਪ੍ਪਕੇਪਿ ਅਨ੍ਨਪਾਨਾਦਿਮ੍ਹਿ ਵਿਜ੍ਜਮਾਨੇ ਞਾਤੀਨਂ ਪਚ੍ਚਾਸੀਸਨ੍ਤਾਨਂ ਪੇਤਾਨਂ ਕਮ੍ਮਫਲੇਨ ਞਾਤਕਾਨਂ ਅਨੁਸ੍ਸਰਣਮਤ੍ਤਸ੍ਸਾਪਿ ਅਭਾਵਂ ਦਸ੍ਸੇਤ੍ਵਾ ਇਦਾਨਿ ਪੇਤ੍ਤਿਵਿਸਯੁਪਪਨ੍ਨੇ ਞਾਤਕੇ ਉਦ੍ਦਿਸ੍ਸ ਰਞ੍ਞਾ ਦਿਨ੍ਨਦਾਨਂ ਪਸਂਸਨ੍ਤੋ ‘‘ਏਵਂ ਦਦਨ੍ਤਿ ਞਾਤੀਨ’’ਨ੍ਤਿ ਤਤਿਯਗਾਥਮਾਹ.