੮. ਅਨੇਕਵਣ੍ਣਵਿਮਾਨਵਣ੍ਣਨਾ

ਅਨੇਕਵਣ੍ਣਂ ਦਰਸੋਕਨਾਸਨਨ੍ਤਿ ਅਨੇਕਵਣ੍ਣਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨਂ ਅਗਮਾਸਿ. ਅਥ ਨਂ ਅਨੇਕਵਣ੍ਣੋ ਦੇਵਪੁਤ੍ਤੋ ਦਿਸ੍ਵਾ ਸਞ੍ਜਾਤਗਾਰਵਬਹੁਮਾਨੋ ਉਪਸਙ੍ਕਮਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਥੇਰੋ –

੧੧੯੯. ‘‘ਅਨੇਕਵਣ੍ਣਂ ਦਰਸੋਕਨਾਸਨਂ, ਵਿਮਾਨਮਾਰੁਯ੍ਹ ਅਨੇਕਚਿਤ੍ਤਂ;

ਪਰਿਵਾਰਿਤੋ ਅਚ੍ਛਰਾਸਙ੍ਗਣੇਨ, ਸੁਨਿਮ੍ਮਿਤੋ ਭੂਤਪਤੀਵ ਮੋਦਸਿ.

੧੨੦੦. ‘‘ਸਮਸ੍ਸਮੋ ਨਤ੍ਥਿ ਕੁਤੋ ਪਨੁਤ੍ਤਰੋ, ਯਸੇਨ ਪੁਞ੍ਞੇਨ ਚ ਇਦ੍ਧਿਯਾ ਚ;

ਸਬ੍ਬੇ ਚ ਦੇਵਾ ਤਿਦਸਗਣਾ ਸਮੇਚ੍ਚ, ਤਂ ਤਂ ਨਮਸ੍ਸਨ੍ਤਿ ਸਸਿਂਵ ਦੇਵਾ;

ਇਮਾ ਚ ਤੇ ਅਚ੍ਛਰਾਯੋ ਸਮਨ੍ਤਤੋ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ.

੧੨੦੧. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ,

ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵੋ,

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਅਧਿਗਤਸਮ੍ਪਤ੍ਤਿਕਿਤ੍ਤਨਮੁਖੇਨ ਕਤਕਮ੍ਮਂ ਪੁਚ੍ਛਿ. ਤਂ ਦਸ੍ਸੇਤੁਂ –

੧੨੦੨. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ…ਯਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਵੁਤ੍ਤਂ. ਸੋਪਿ –

੧੨੦੩. ‘‘ਅਹਂ ਭਦਨ੍ਤੇ ਅਹੁਵਾਸਿ ਪੁਬ੍ਬੇ, ਸੁਮੇਧਨਾਮਸ੍ਸ ਜਿਨਸ੍ਸ ਸਾਵਕੋ;

ਪੁਥੁਜ੍ਜਨੋ ਅਨਨੁਬੋਧੋਹਮਸ੍ਮਿ, ਸੋ ਸਤ੍ਤ ਵਸ੍ਸਾਨਿ ਪਰਿਬ੍ਬਜਿਸ੍ਸਹਂ.

੧੨੦੪. ‘‘ਸੋਹਂ ਸੁਮੇਧਸ੍ਸ ਜਿਨਸ੍ਸ ਸਤ੍ਥੁਨੋ, ਪਰਿਨਿਬ੍ਬੁਤਸ੍ਸੋਘਤਿਣ੍ਣਸ੍ਸ ਤਾਦਿਨੋ;

ਰਤਨੁਚ੍ਚਯਂ ਹੇਮਜਾਲੇਨ ਛਨ੍ਨਂ, ਵਨ੍ਦਿਤ੍ਵਾ ਥੂਪਸ੍ਮਿਂ ਮਨਂ ਪਸਾਦਯਿਂ.

੧੨੦੫. ‘‘ਨ ਮਾਸਿ ਦਾਨਂ ਨ ਚ ਮਤ੍ਥਿ ਦਾਤੁਂ, ਪਰੇ ਚ ਖੋ ਤਤ੍ਥ ਸਮਾਦਪੇਸਿਂ;

ਪੂਜੇਥ ਨਂ ਪੂਜਨੀਯਸ੍ਸ ਧਾਤੁਂ, ਏਵਂ ਕਿਰ ਸਗ੍ਗਮਿਤੋ ਗਮਿਸ੍ਸਥ.

੧੨੦੬. ‘‘ਤਦੇਵ ਕਮ੍ਮਂ ਕੁਸਲਂ ਕਤਂ ਮਯਾ,

ਸੁਖਞ੍ਚ ਦਿਬ੍ਬਂ ਅਨੁਭੋਮਿ ਅਤ੍ਤਨਾ;

ਮੋਦਾਮਹਂ ਤਿਦਸਗਣਸ੍ਸ ਮਜ੍ਝੇ,

ਨ ਤਸ੍ਸ ਪੁਞ੍ਞਸ੍ਸ ਖਯਮ੍ਪਿ ਅਜ੍ਝਗ’’ਨ੍ਤਿ. – ਕਥੇਸਿ;

ਇਤੋ ਕਿਰ ਤਿਂਸਕਪ੍ਪਸਹਸ੍ਸੇ ਸੁਮੇਧੋ ਨਾਮ ਸਮ੍ਮਾਸਮ੍ਬੁਦ੍ਧੋ ਲੋਕੇ ਉਪ੍ਪਜ੍ਜਿਤ੍ਵਾ ਸਦੇਵਕਂ ਲੋਕਂ ਏਕੋਭਾਸਂ ਕਤ੍ਵਾ ਕਤਬੁਦ੍ਧਕਿਚ੍ਚੋ ਪਰਿਨਿਬ੍ਬੁਤੋ, ਮਨੁਸ੍ਸੇਹਿ ਚ ਭਗਵਤੋ ਧਾਤੁਂ ਗਹੇਤ੍ਵਾ ਰਤਨਚੇਤਿਯੇ ਕਤੇ ਅਞ੍ਞਤਰੋ ਪੁਰਿਸੋ ਸਤ੍ਥੁ ਸਾਸਨੇ ਪਬ੍ਬਜਿਤ੍ਵਾ ਸਤ੍ਤ ਵਸ੍ਸਾਨਿ ਬ੍ਰਹ੍ਮਚਰਿਯਂ ਚਰਿਤ੍ਵਾ ਅਨਵਟ੍ਠਿਤਚਿਤ੍ਤਤਾਯ ਕੁਕ੍ਕੁਚ੍ਚਕੋ ਹੁਤ੍ਵਾ ਉਪ੍ਪਬ੍ਬਜਿ. ਉਪ੍ਪਬ੍ਬਜਿਤੋ ਚ ਸਂਵੇਗਬਹੁਲਤਾਯ ਧਮ੍ਮਚ੍ਛਨ੍ਦਵਨ੍ਤਤਾਯ ਚ ਚੇਤਿਯਙ੍ਗਣੇ ਸਮ੍ਮਜ੍ਜਨਪਰਿਭਣ੍ਡਾਦੀਨਿ ਕਰੋਨ੍ਤੋ ਨਿਚ੍ਚਸੀਲਉਪੋਸਥਸੀਲਾਨਿ ਰਕ੍ਖਨ੍ਤੋ ਧਮ੍ਮਂ ਸੁਣਨ੍ਤੋ ਅਞ੍ਞੇ ਚ ਪੁਞ੍ਞਕਿਰਿਯਾਯ ਸਮਾਦਪੇਨ੍ਤੋ ਵਿਚਰਿ. ਸੋ ਆਯੁਪਰਿਯੋਸਾਨੇ ਕਾਲਕਤੋ ਤਾਵਤਿਂਸੇਸੁ ਨਿਬ੍ਬਤ੍ਤਿ. ਸੋ ਪੁਞ੍ਞਕਮ੍ਮਸ੍ਸ ਉਲ਼ਾਰਭਾਵੇਨ ਮਹੇਸਕ੍ਖੋ ਮਹਾਨੁਭਾਵੋ ਸਕ੍ਕਾਦੀਹਿ ਦੇਵਤਾਹਿ ਸਕ੍ਕਤਪੂਜਿਤੋ ਹੁਤ੍ਵਾ ਤਤ੍ਥ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਅਪਰਾਪਰਂ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨ ਤਾਵਤਿਂਸਭਵਨੇ ਨਿਬ੍ਬਤ੍ਤਿ, ‘‘ਅਨੇਕਵਣ੍ਣੋ’’ਤਿ ਨਂ ਦੇਵਤਾ ਸਞ੍ਜਾਨਿਂਸੁ. ਤਂ ਸਨ੍ਧਾਯ ਵੁਤ੍ਤਂ ‘‘ਅਥ ਨਂ ਅਨੇਕਵਣ੍ਣੋ ਦੇਵਪੁਤ੍ਤੋ…ਪੇ… ਨ ਤਸ੍ਸ ਪੁਞ੍ਞਸ੍ਸ ਖਯਮ੍ਪਿ ਅਜ੍ਝਗਨ੍ਤਿ ਕਥੇਸੀ’’ਤਿ.

੧੧੯੯. ਤਤ੍ਥ ਅਨੇਕਵਣ੍ਣਨ੍ਤਿ ਨੀਲਪੀਤਾਦਿਵਸੇਨ ਵਿਵਿਧਵਣ੍ਣਤਾਯ ਅਨਨ੍ਤਰਵਿਮਾਨਾਦੀਨਂ ਵਿਵਿਧਸਣ੍ਠਾਨਤਾਯ ਚ ਨਾਨਾਵਿਧਵਣ੍ਣਂ. ਦਰਸੋਕਨਾਸਨਨ੍ਤਿ ਸੀਤਲਭਾਵੇਨ ਦਰਥਪਰਿਲ਼ਾਹਾਨਂ ਵਿਨੋਦਨਤੋ ਮਨੁਞ੍ਞਤਾਯ ਦਸ੍ਸਨੀਯਤਾਯ ਚ ਸੋਕਸ੍ਸ ਅਨੋਕਾਸਤੋ ਦਰਸੋਕਨਾਸਨਂ. ਅਨੇਕਚਿਤ੍ਤਨ੍ਤਿ ਨਾਨਾਵਿਧਚਿਤ੍ਤਰੂਪਂ. ਸੁਨਿਮ੍ਮਿਤੋ ਭੂਤਪਤੀਵਾਤਿ ਤਾਵਤਿਂਸਕਾਯਿਕੋਪਿ ਉਲ਼ਾਰਦਿਬ੍ਬਭੋਗਤਾਯ ਸੁਨਿਮ੍ਮਿਤਦੇਵਰਾਜਾ ਵਿਯ ਮੋਦਸਿ ਤੁਸ੍ਸਸਿ ਅਭਿਰਮਸਿ.

੧੨੦੦. ਸਮਸ੍ਸਮੋਤਿ ਸਮੋ ਏਵ ਹੁਤ੍ਵਾ ਸਮੋ, ਨਿਬ੍ਬਰਿਯਾਯੇਨ ਸਦਿਸੋ ਤੇ ਤੁਯ੍ਹਂ ਨਤ੍ਥਿ, ਕੁਤੋ ਪਨ ਕੇਨ ਕਾਰਣੇਨ ਉਤ੍ਤਰਿ ਅਧਿਕੋ ਕੋ ਨਾਮ ਸਿਯਾ. ਕੇਨ ਪਨ ਸਮਤਾ ਉਤ੍ਤਰਿਤਰਤਾ ਚਾਤਿ ਆਹ ‘‘ਯਸੇਨ ਪੁਞ੍ਞੇਨ ਚ ਇਦ੍ਧਿਯਾ ਚਾ’’ਤਿ. ਤਤ੍ਥ ਯਸੇਨਾਤਿ ਪਰਿਵਾਰੇਨ. ਇਦ੍ਧਿਯਾਤਿ ਆਨੁਭਾਵੇਨ. ਯਸੇਨਾਤਿ ਵਾ ਇਸ੍ਸਰਿਯੇਨ, ਇਦ੍ਧਿਯਾਤਿ ਦੇਵਿਦ੍ਧਿਯਾ. ਯਸੇਨਾਤਿ ਵਾ ਵਿਭਵਸਮ੍ਪਤ੍ਤਿਯਾ, ਇਦ੍ਧਿਯਾਤਿ ਯਥਿਚ੍ਛਿ ਤਸ੍ਸ ਕਾਮਗੁਣਸ੍ਸ ਇਜ੍ਝਨੇਨ. ਯਸੇਨਾਤਿ ਵਾ ਕਿਤ੍ਤਿਘੋਸੇਨ, ਇਦ੍ਧਿਯਾਤਿ ਸਮਿਦ੍ਧਿਯਾ. ਪੁਞ੍ਞੇਨਾਤਿ ਤਤ੍ਥ ਤਤ੍ਥ ਵੁਤ੍ਤਾਵਸਿਟ੍ਠਪੁਞ੍ਞਫਲੇਨ, ਪੁਞ੍ਞਕਮ੍ਮੇਨੇਵ ਵਾ.

‘‘ਸਬ੍ਬੇ ਚ ਦੇਵਾ’’ਤਿ ਸਾਮਞ੍ਞਤੋ ਗਹਿਤਮਤ੍ਥਂ ‘‘ਤਿਦਸਗਣਾ’’ਤਿ ਇਮਿਨਾ ਵਿਸੇਸੇਤ੍ਵਾ ਵੁਤ੍ਤਂ. ਏਕਚ੍ਚਸ੍ਸ ਪਚ੍ਚੇਕਂ ਨਿਪਚ੍ਚਕਾਰਂ ਕਰੋਨ੍ਤਾਪਿ ਪਮੁਦਿਤਾ ਨ ਕਰੋਨ੍ਤਿ, ਨ ਏਵਮੇਤਸ੍ਸ. ਏਤਸ੍ਸ ਪਨ ਪਮੁਦਿਤਾਪਿ ਕਰੋਨ੍ਤਿਯੇਵਾਤਿ ਦਸ੍ਸੇਤੁਂ ‘‘ਸਮੇਚ੍ਚਾ’’ਤਿ ਵੁਤ੍ਤਂ. ਤਂ ਤਨ੍ਤਿ ਤਂ ਤ੍ਵਂ. ਸਸਿਂਵ ਦੇਵਾਤਿ ਯਥਾ ਨਾਮ ਸੁਕ੍ਕਪਕ੍ਖਪਾਟਿਪਦਿਯਂ ਦਿਸ੍ਸਮਾਨਂ ਸਸਿਂ ਚਨ੍ਦਂ ਮਨੁਸ੍ਸਾ ਦੇਵਾ ਚ ਆਦਰਜਾਤਾ ਨਮਸ੍ਸਨ੍ਤਿ, ਏਵਂ ਤਂ ਸਬ੍ਬੇਪਿ ਤਿਦਸਗਣਾ ਨਮਸ੍ਸਨ੍ਤੀਤਿ ਅਤ੍ਥੋ.

੧੨੦੩. ਭਦਨ੍ਤੇਤਿ ਥੇਰਂ ਗਾਰਵਬਹੁਮਾਨੇਨ ਸਮੁਦਾਚਰਤਿ. ਅਹੁਵਾਸਿਨ੍ਤਿ ਅਹੋਸਿਂ. ਪੁਬ੍ਬੇਤਿ ਪੁਰਿਮਜਾਤਿਯਂ. ਸੁਮੇਧਨਾਮਸ੍ਸ ਜਿਨਸ੍ਸ ਸਾਵਕੋਤਿ ਸੁਮੇਧੋਤਿ ਏਵਂ ਪਾਕਟਨਾਮਸ੍ਸ ਸਮ੍ਮਾਸਮ੍ਬੁਦ੍ਦਸ੍ਸ ਸਾਸਨੇ ਪਬ੍ਬਜਿਤਭਾਵੇਨ ਸਾਵਕੋ. ਪੁਥੂਜ੍ਜਨੋਤਿ ਅਨਰਿਯੋ. ਤਤ੍ਥਾਪਿ ਸਚ੍ਚਾਨਂ ਅਨੁਬੋਧਮਤ੍ਤਸ੍ਸਾਪਿ ਅਭਾਵੇਨ ਅਨਨੁਬੋਧੋ. ਸੋ ਸਤ੍ਤ ਵਸ੍ਸਾਨਿ ਪਰਿਬ੍ਬਜਿਸ੍ਸਹਨ੍ਤਿ ਸੋ ਅਹਂ ਸਤ੍ਤ ਸਂਵਚ੍ਛਰਾਨਿ ਪਬ੍ਬਜ੍ਜਾਗੁਣਮਤ੍ਤੇਨ ਵਿਚਰਿਂ, ਉਤ੍ਤਰਿਮਨੁਸ੍ਸਧਮ੍ਮਂ ਨਾਧਿਗਚ੍ਛਿਨ੍ਤਿ ਅਧਿਪ੍ਪਾਯੋ.

੧੨੦੪. ਰਤਨੁਚ੍ਚਯਨ੍ਤਿ ਮਣਿਕਨਕਾਦਿਰਤਨੇਹਿ ਉਚ੍ਚਿਤਂ ਉਸ੍ਸਿਤਰਤਨਚੇਤਿਯਂ. ਹੇਮਜਾਲੇਨ ਛਨ੍ਨਨ੍ਤਿ ਸਮਨ੍ਤਤੋ ਉਪਰਿ ਚ ਕਞ੍ਚਨਜਾਲੇਨ ਪਟਿਚ੍ਛਾਦਿਤਂ. ਵਨ੍ਦਿਤ੍ਵਾਤਿ ਪਞ੍ਚਪਤਿਟ੍ਠਿਤੇਨ ਤਤ੍ਥ ਤਤ੍ਥ ਪਣਾਮਂ ਕਤ੍ਵਾ. ਥੂਪਸ੍ਮਿਂ ਮਨਂ ਪਸਾਦਯਿਨ੍ਤਿ ‘‘ਸਬ੍ਬਞ੍ਞੁਗੁਣਾਧਿਟ੍ਠਾਨਾਯ ਵਤ ਧਾਤੁਯਾ ਅਯਂ ਥੂਪੋ’’ਤਿ ਥੂਪਸ੍ਮਿਂ ਚਿਤ੍ਤਂ ਪਸਾਦੇਸਿਂ.

੧੨੦੫. ਨ ਮਾਸਿ ਦਾਨਨ੍ਤਿ ਮੇ ਮਯਾ ਕਤਂ ਦਾਨਂ ਨਾਸਿ ਨਾਹੋਸਿ. ਕਸ੍ਮਾ ਪਨ? ਨ ਚ ਮੇਤ੍ਥਿ ਦਾਤੁਨ੍ਤਿ ਮੇ ਮਮ ਪਰਿਗ੍ਗਹਭੂਤਂ ਦਾਨਂ ਦਾਤੁਂ ਨ ਅਤ੍ਥਿ, ਨ ਕਿਞ੍ਚਿ ਦੇਯ੍ਯਵਤ੍ਥੁ ਵਿਜ੍ਜਤਿ, ਪਰੇ ਚ ਖੋ ਸਤ੍ਤੇ ਤਤ੍ਥ ਦਾਨੇ ਸਮਾਦਪੇਸਿਂ. ‘‘ਪਰੇਸਞ੍ਚ ਤਤ੍ਥ ਸਮਾਦਪੇਸਿ’’ਨ੍ਤਿ ਚ ਪਠਨ੍ਤਿ, ਤਤ੍ਥ ਪਰੇਸਨ੍ਤਿ ਉਪਯੋਗਤ੍ਥੇ ਸਾਮਿਵਚਨਂ ਦਟ੍ਠਬ੍ਬਂ. ਪੂਜੇਥ ਨਨ੍ਤਿਆਦਿ ਸਮਾਦਪਨਾਕਾਰਦਸ੍ਸਨਂ, ਤਂ ਧਾਤੁਨ੍ਤਿ ਯੋਜਨਾ. ਏਵਂ ਕਿਰਾਤਿ ਕਿਰ-ਸਦ੍ਦੋ ਅਨੁਸ੍ਸਵਤ੍ਥੋ.

੧੨੦੬. ਨ ਤਸ੍ਸ ਪੁਞ੍ਞਸ੍ਸ ਖਯਮ੍ਪਿ ਅਜ੍ਝਗਨ੍ਤਿ ਤਸ੍ਸ ਤਦਾ ਸੁਮੇਧਂ ਭਗਵਨ੍ਤਂ ਉਦ੍ਦਿਸ੍ਸ ਕਤਸ੍ਸ ਪੁਞ੍ਞਕਮ੍ਮਸ੍ਸ ਪਰਿਕ੍ਖਯਂ ਨਾਧਿਗਚ੍ਛਿਂ, ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸਂ ਪਚ੍ਚਨੁਭੋਮੀਤਿ ਦਸ੍ਸੇਤਿ. ਯਂ ਪਨੇਤ੍ਥ ਨ ਵੁਤ੍ਤਂ, ਤਂ ਹੇਟ੍ਠਾ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵਾਤਿ ਦਟ੍ਠਬ੍ਬਂ.

ਅਨੇਕਵਣ੍ਣਵਿਮਾਨਵਣ੍ਣਨਾ ਨਿਟ੍ਠਿਤਾ.