੭. ਕਣ੍ਡਕਵਿਮਾਨਵਣ੍ਣਨਾ

ਪੁਣ੍ਣਮਾਸੇ ਯਥਾ ਚਨ੍ਦੋਤਿ ਕਣ੍ਡਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਚ ਸਮਯੇਨ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨੇਵ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨਂ ਗਤੋ. ਤਸ੍ਮਿਂ ਖਣੇ ਕਣ੍ਡਕੋ ਦੇਵਪੁਤ੍ਤੋ ਸਕਭਵਨਤੋ ਨਿਕ੍ਖਮਿਤ੍ਵਾ ਦਿਬ੍ਬਯਾਨਂ ਅਭਿਰੁਹਿਤ੍ਵਾ ਮਹਨ੍ਤੇਨ ਪਰਿਵਾਰੇਨ ਮਹਤਿਯਾ ਦੇਵਿਦ੍ਧਿਯਾ ਉਯ੍ਯਾਨਂ ਗਚ੍ਛਨ੍ਤੋ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਦਿਸ੍ਵਾ ਸਞ੍ਜਾਤਗਾਰਵਬਹੁਮਾਨੋ ਸਹਸਾ ਯਾਨਤੋ ਓਰੁਯ੍ਹ ਥੇਰਂ ਉਪਸਙ੍ਕਮਿਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਸਿਰਸ੍ਮਿਂ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਅਥ ਨਂ ਥੇਰੋ –

੧੧੭੧. ‘‘ਪੁਣ੍ਣਮਾਸੇ ਯਥਾ ਚਨ੍ਦੋ, ਨਕ੍ਖਤ੍ਤਪਰਿਵਾਰਿਤੋ;

ਸਮਨ੍ਤਾ ਅਨੁਪਰਿਯਾਤਿ, ਤਾਰਕਾਧਿਪਤੀ ਸਸੀ.

੧੧੭੨. ‘‘ਤਥੂਪਮਂ ਇਦਂ ਬ੍ਯਮ੍ਹਂ, ਦਿਬ੍ਬਂ ਦੇਵਪੁਰਮ੍ਹਿ ਚ;

ਅਤਿਰੋਚਤਿ ਵਣ੍ਣੇਨ, ਉਦਯਨ੍ਤੋਵ ਰਂਸਿਮਾ.

੧੧੭੩. ‘‘ਵੇਲ਼ੂਰਿਯਸੁਵਣ੍ਣਸ੍ਸ, ਫਲਿਕਾ ਰੂਪਿਯਸ੍ਸ ਚ;

ਮਸਾਰਗਲ੍ਲਮੁਤ੍ਤਾਹਿ, ਲੋਹਿਤਙ੍ਗਮਣੀਹਿ ਚ.

੧੧੭੪. ‘‘ਚਿਤ੍ਰਾ ਮਨੋਰਮਾ ਭੂਮਿ, ਵੇਲ਼ੂਰਿਯਸ੍ਸ ਸਨ੍ਥਤਾ;

ਕੂਟਾਗਾਰਾ ਸੁਭਾ ਰਮ੍ਮਾ, ਪਾਸਾਦੋ ਤੇ ਸੁਮਾਪਿਤੋ.

੧੧੭੫. ‘‘ਰਮ੍ਮਾ ਚ ਤੇ ਪੋਕ੍ਖਰਣੀ, ਪੁਥੁਲੋਮਨਿਸੇਵਿਤਾ;

ਅਚ੍ਛੋਦਕਾ ਵਿਪ੍ਪਸਨ੍ਨਾ, ਸੋਣ੍ਣਵਾਲੁਕਸਨ੍ਥਤਾ.

੧੧੭੬. ‘‘ਨਾਨਾਪਦੁਮਸਞ੍ਛਨ੍ਨਾ, ਪੁਣ੍ਡਰੀਕਸਮੋਤਤਾ;

ਸੁਰਭਿਂ ਸਮ੍ਪਵਾਯਨ੍ਤਿ, ਮਨੁਞ੍ਞਾ ਮਾਤੁਤੇਰਿਤਾ.

੧੧੭੭. ‘‘ਤਸ੍ਸਾ ਤੇ ਉਭਤੋ ਪਸ੍ਸੇ, ਵਨਗੁਮ੍ਬਾ ਸੁਮਾਪਿਤਾ;

ਉਪੇਤਾ ਪੁਪ੍ਫਰੁਕ੍ਖੇਹਿ, ਫਲਰੁਕ੍ਖੇਹਿ ਚੂਭਯਂ.

੧੧੭੮. ‘‘ਸੋਵਣ੍ਣਪਾਦੇ ਪਲ੍ਲਙ੍ਕੇ, ਮੁਦੁਕੇ ਗੋਨਕਤ੍ਥਤੇ;

ਨਿਸਿਨ੍ਨਂ ਦੇਵਰਾਜਂਵ, ਉਪਤਿਟ੍ਠਨ੍ਤਿ ਅਚ੍ਛਰਾ.

੧੧੭੯. ‘‘ਸਬ੍ਬਾਭਰਣਸਞ੍ਛਨ੍ਨਾ, ਨਾਨਾਮਾਲਾਵਿਭੂਸਿਤਾ;

ਰਮੇਨ੍ਤਿ ਤਂ ਮਹਿਦ੍ਧਿਕਂ, ਵਸਵਤ੍ਤੀਵ ਮੋਦਸਿ.

੧੧੮੦. ‘‘ਭੇਰਿਸਙ੍ਖਮੁਦਿਙ੍ਗਾਹਿ, ਵੀਣਾਹਿ ਪਣਵੇਹਿ ਚ;

ਰਮਸਿ ਰਤਿਸਮ੍ਪਨ੍ਨੋ, ਨਚ੍ਚਗੀਤੇ ਸੁਵਾਦਿਤੇ.

੧੧੮੧. ‘‘ਦਿਬ੍ਬਾ ਤੇ ਵਿਵਿਧਾ ਰੂਪਾ, ਦਿਬ੍ਬਾ ਸਦ੍ਦਾ ਅਥੋ ਰਸਾ;

ਗਨ੍ਧਾ ਚ ਤੇ ਅਧਿਪ੍ਪੇਤਾ, ਫੋਟ੍ਠਬ੍ਬਾ ਚ ਮਨੋਰਮਾ.

੧੧੮੨. ‘‘ਤਸ੍ਮਿਂ ਵਿਮਾਨੇ ਪਵਰੇ, ਦੇਵਪੁਤ੍ਤ ਮਹਪ੍ਪਭੋ;

ਅਤਿਰੋਚਸਿ ਵਣ੍ਣੇਨ, ਉਦਯਨ੍ਤੋਵ ਭਾਣੁਮਾ.

੧੧੮੩. ‘‘ਦਾਨਸ੍ਸ ਤੇ ਇਦਂ ਫਲਂ, ਅਥੋ ਸੀਲਸ੍ਸ ਵਾ ਪਨ;

ਅਥੋ ਅਞ੍ਜਲਿਕਮ੍ਮਸ੍ਸ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ. –

ਅਧਿਗਤਸਮ੍ਪਤ੍ਤਿਕਿਤ੍ਤਨਮੁਖੇਨ ਕਤਕਮ੍ਮਂ ਪੁਚ੍ਛਿ.

੧੧੮੪. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ, ਮੋਗ੍ਗਲ੍ਲਾਨੇਨ ਪੁਚ੍ਛਿਤੋ;

ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੧੮੫. ‘‘ਅਹਂ ਕਪਿਲਵਤ੍ਥੁਸ੍ਮਿਂ, ਸਾਕਿਯਾਨਂ ਪੁਰੁਤ੍ਤਮੇ;

ਸੁਦ੍ਧੋਦਨਸ੍ਸ ਪੁਤ੍ਤਸ੍ਸ, ਕਣ੍ਡਕੋ ਸਹਜੋ ਅਹਂ.

੧੧੮੬. ‘‘ਯਦਾ ਸੋ ਅਡ੍ਢਰਤ੍ਤਾਯਂ, ਬੋਧਾਯ ਮਭਿਨਿਕ੍ਖਮਿ;

ਸੋ ਮਂ ਮੁਦੂਹਿ ਪਾਣੀਹਿ, ਜਾਲਿਤਮ੍ਬਨਖੇਹਿ ਚ.

੧੧੮੭. ‘‘ਸਤ੍ਥਿਂ ਆਕੋਟਯਿਤ੍ਵਾਨ, ਵਹ ਸਮ੍ਮਾਤਿ ਚਬ੍ਰਵਿ;

‘ਅਹਂ ਲੋਕਂ ਤਾਰਯਿਸ੍ਸਂ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ’.

੧੧੮੮. ‘‘ਤਂ ਮੇ ਗਿਰਂ ਸੁਣਨ੍ਤਸ੍ਸ, ਹਾਸੋ ਮੇ ਵਿਪੁਲੋ ਅਹੁ;

ਉਦਗ੍ਗਚਿਤ੍ਤੋ ਸੁਮਨੋ, ਅਭਿਸੀਸਿਂ ਤਦਾ ਅਹਂ.

੧੧੮੯. ‘‘ਅਭਿਰੂਲ਼੍ਹਞ੍ਚ ਮਂ ਞਤ੍ਵਾ, ਸਕ੍ਯਪੁਤ੍ਤਂ ਮਹਾਯਸਂ;

ਉਦਗ੍ਗਚਿਤ੍ਤੋ ਮੁਦਿਤੋ, ਵਹਿਸ੍ਸਂ ਪੁਰਿਸੁਤ੍ਤਮਂ.

੧੧੯੦. ‘‘ਪਰੇਸਂ ਵਿਜਿਤਂ ਗਨ੍ਤ੍ਵਾ, ਉਗ੍ਗਤਸ੍ਮਿਂ ਦਿਵਾਕਰੇ;

ਮਮਂ ਛਨ੍ਨਞ੍ਚ ਓਹਾਯ, ਅਨਪੇਕ੍ਖੋ ਸੋ ਅਪਕ੍ਕਮਿ.

੧੧੯੧. ‘‘ਤਸ੍ਸ ਤਮ੍ਬਨਖੇ ਪਾਦੇ, ਜਿਵ੍ਹਾਯ ਪਰਿਲੇਹਿਸਂ;

ਗਚ੍ਛਨ੍ਤਞ੍ਚ ਮਹਾਵੀਰਂ, ਰੁਦਮਾਨੋ ਉਦਿਕ੍ਖਿਸਂ.

੧੧੯੨. ‘‘ਅਦਸ੍ਸਨੇਨਹਂ ਤਸ੍ਸ, ਸਕ੍ਯਪੁਤ੍ਤਸ੍ਸ ਸਿਰੀਮਤੋ;

ਅਲਤ੍ਥਂ ਗਰੁਕਾਬਾਧਂ, ਖਿਪ੍ਪਂ ਮੇ ਮਰਣਂ ਅਹੁ.

੧੧੯੩. ‘‘ਤਸ੍ਸੇਵ ਆਨੁਭਾਵੇਨ, ਵਿਮਾਨਂ ਆਵਸਾਮਿਦਂ;

ਸਬ੍ਬਕਾਮਗੁਣੋਪੇਤਂ, ਦੇਵੋ ਦੇਵਪੁਰਮ੍ਹਿਵ.

੧੧੯੪. ‘‘ਯਞ੍ਚ ਮੇ ਅਹੁਵਾ ਹਾਸੋ, ਸਦ੍ਦਂ ਸੁਤ੍ਵਾਨ ਬੋਧਿਯਾ;

ਤੇਨੇਵ ਕੁਸਲਮੂਲੇਨ, ਫੁਸਿਸ੍ਸਂ ਆਸਵਕ੍ਖਯਂ.

੧੧੯੫. ‘‘ਸਚੇ ਹਿ ਭਨ੍ਤੇ ਗਚ੍ਛੇਯ੍ਯਾਸਿ, ਸਤ੍ਥੁ ਬੁਦ੍ਧਸ੍ਸ ਸਨ੍ਤਿਕੇ;

ਮਮਾਪਿ ਨਂ ਵਚਨੇਨ, ਸਿਰਸਾ ਵਜ੍ਜਾਸਿ ਵਨ੍ਦਨਂ.

੧੧੯੬. ‘‘ਅਹਮ੍ਪਿ ਦਟ੍ਠੁਂ ਗਚ੍ਛਿਸ੍ਸਂ, ਜਿਨਂ ਅਪ੍ਪਟਿਪੁਗ੍ਗਲਂ;

ਦੁਲ੍ਲਭਂ ਦਸ੍ਸਨਂ ਹੋਤਿ, ਲੋਕਨਾਥਾਨ ਤਾਦਿਨ’’ਨ੍ਤਿ. –

ਸੋਪਿ ਅਤ੍ਤਨਾ ਕਤਕਮ੍ਮਂ ਕਥੇਸਿ. ਅਯਞ੍ਹਿ ਅਨਨ੍ਤਰੇ ਅਤ੍ਤਭਾਵੇ ਅਮ੍ਹਾਕਂ ਬੋਧਿਸਤ੍ਤੇਨ ਸਹਜਾਤੋ ਕਣ੍ਡਕੋ ਅਸ੍ਸਰਾਜਾ ਅਹੋਸਿ. ਸੋ ਅਭਿਨਿਕ੍ਖਮਨਸਮਯੇ ਅਭਿਰੁਲ਼੍ਹੋ ਤੇਨੇਵ ਰਤ੍ਤਾਵਸੇਸੇਨ ਤੀਣਿ ਰਜ੍ਜਾਨਿ ਮਹਾਪੁਰਿਸਂ ਅਤਿਕ੍ਕਮਾਪੇਤ੍ਵਾ ਅਨੋਮਾਨਦੀਤੀਰਂ ਸਮ੍ਪਾਪੇਸਿ. ਅਥ ਸੋ ਮਹਾਸਤ੍ਤੇਨ ਸੂਰਿਯੇ ਉਗ੍ਗਤੇ ਘਟਿਕਾਰਮਹਾਬ੍ਰਹ੍ਮੁਨਾ ਉਪਨੀਤਾਨਿ ਪਤ੍ਤਚੀਵਰਾਨਿ ਗਹੇਤ੍ਵਾ ਪਬ੍ਬਜਿਤ੍ਵਾ ਛਨ੍ਨੇਨ ਸਦ੍ਧਿਂ ਕਪਿਲਵਤ੍ਥੁਂ ਉਦ੍ਦਿਸ੍ਸ ਵਿਸ੍ਸਜ੍ਜਿਤੋ. ਸਿਨੇਹਭਾਰਿਕੇਨ ਹਦਯੇਨ ਮਹਾਪੁਰਿਸਸ੍ਸ ਪਾਦੇ ਅਤ੍ਤਨੋ ਜਿਵ੍ਹਾਯ ਲੇਹਿਤ੍ਵਾ ਪਸਾਦਸੋਮ੍ਮਾਨਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਯਾਵ ਦਸ੍ਸਨਪਥਾ ਓਲੋਕੇਨ੍ਤੋ ਦਸ੍ਸਨੂਪਚਾਰਂ ਪਨ ਅਤਿਕ੍ਕਨ੍ਤੇ ਲੋਕਨਾਥੇ ‘‘ਏਵਂਵਿਧਂ ਨਾਮ ਲੋਕਗ੍ਗਨਾਯਕਂ ਮਹਾਪੁਰਿਸਂ ਅਹਂ ਵਹਿਂ, ਸਫਲਂ ਵਤ ਮੇ ਸਰੀਰਂ ਅਹੋਸੀ’’ਤਿ ਪਸਨ੍ਨਮਾਨਸੋ ਹੁਤ੍ਵਾ ਪੁਨ ਚਿਰਕਾਲਂ ਸਙ੍ਗਤਸ੍ਸ ਪੇਮਸ੍ਸ ਵਸੇਨ ਵਿਯੋਗਦੁਕ੍ਖਂ ਅਸਹਨ੍ਤੋ ਭਾਵਿਨਿਯਾ ਦਿਬ੍ਬਸਮ੍ਪਤ੍ਤਿਯਾ ਵਸੇਨ ਧਮ੍ਮਤਾਯ ਚੋਦਿਯਮਾਨੋ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਤਂ ਸਨ੍ਧਾਯ ਵੁਤ੍ਤਂ ‘‘ਪੁਣ੍ਣਮਾਸੇ ਯਥਾ ਚਨ੍ਦੋ…ਪੇ… ਅਹਂ ਕਪਿਲਵਤ੍ਥੁਸ੍ਮਿ’’ਨ੍ਤਿਆਦਿ.

੧੧੭੧. ਤਤ੍ਥ ਪੁਣ੍ਣਮਾਸੇਤਿ ਪੁਣ੍ਣਮਾਸਿਯਂ ਸੁਕ੍ਕਪਕ੍ਖੇ ਪਨ੍ਨਰਸਿਯਂ. ਤਾਰਕਾਧਿਪਤੀਤਿ ਤਾਰਕਾਨਂ ਅਧਿਪਤਿ. ਸਸੀਤਿ ਸਸਲਞ੍ਛਨਵਾ. ‘‘ਤਾਰਕਾਧਿਪ ਦਿਸ੍ਸਤੀ’’ਤਿ ਕੇਚਿ ਪਠਨ੍ਤਿ, ਤੇਸਂ ਤਾਰਕਾਧਿਪਾਤਿ ਅਵਿਭਤ੍ਤਿਕਨਿਦ੍ਦੇਸੋ, ਤਾਰਕਾਨਂ ਅਧਿਪੋ ਹੁਤ੍ਵਾ ਦਿਸ੍ਸਤਿ ਅਨੁਪਰਿਯਾਤਿ ਚਾਤਿ ਯੋਜਨਾ ਕਾਤਬ੍ਬਾ.

੧੧੭੨. ਦਿਬ੍ਬਂ ਦੇਵਪੁਰਮ੍ਹਿ ਚਾਤਿ ਦੇਵਪੁਰਸ੍ਮਿਮ੍ਪਿ ਦਿਬ੍ਬਂ. ਯਥਾ ਮਨੁਸ੍ਸਾਨਂ ਠਾਨਤੋ ਦੇਵਪੁਰਂ ਉਤ੍ਤਮਂ, ਏਵਂ ਦੇਵਪੁਰਤੋ ਚਾਪਿ ਇਦਂ ਤਵ ਵਿਮਾਨਂ ਉਤ੍ਤਮਨ੍ਤਿ ਦਸ੍ਸੇਤਿ. ਤੇਨਾਹ ‘‘ਅਤਿਰੋਚਤਿ ਵਣ੍ਣੇਨ, ਉਦਯਨ੍ਤੋਵ ਰਂਸਿਮਾ’’ਤਿ, ਉਗ੍ਗਚ੍ਛਨ੍ਤੋ ਸੂਰਿਯੋ ਵਿਯਾਤਿ ਅਤ੍ਥੋ.

੧੧੭੩. ਵੇਲ਼ੂਰਿਯਸੁਵਣ੍ਣਸ੍ਸਾਤਿ ਵੇਲ਼ੁਰਿਯੇਨ ਸੁਵਣ੍ਣੇਨ ਚ ਇਦਂ ਬ੍ਯਮ੍ਹਂ ਨਿਮ੍ਮਿਤਨ੍ਤਿ ਵਚਨਸੇਸੇਨ ਯੋਜਨਾ. ਫਲਿਕਾਤਿ ਫਲਿਕਮਣਿਨਾ.

੧੧੭੫. ਪੋਕ੍ਖਰਣੀਤਿ ਪੋਕ੍ਖਰਣਿਯੋ.

੧੧੭੭-੮. ਤਸ੍ਸਾਤਿ ਤਸ੍ਸਾ ਪੋਕ੍ਖਰਣਿਯਾ. ਵਨਗੁਮ੍ਬਾਤਿ ਉਯ੍ਯਾਨੇ ਸੁਪੁਪ੍ਫਗਚ੍ਛੇ ਸਨ੍ਧਾਯ ਵਦਤਿ. ਦੇਵਰਾਜਂਵਾਤਿ ਸਕ੍ਕਂ ਵਿਯ. ਉਪਤਿਟ੍ਠਨ੍ਤੀਤਿ ਉਪਟ੍ਠਾਨਂ ਕਰੋਨ੍ਤਿ.

੧੧੭੯. ਸਬ੍ਬਾਭਰਣਸਞ੍ਛਨ੍ਨਾਤਿ ਸਬ੍ਬੇਹਿ ਇਤ੍ਥਾਲਙ੍ਕਾਰੇਹਿ ਪਟਿਚ੍ਛਾਦਿਤਾ, ਸਬ੍ਬਸੋ ਵਿਭੂਸਿਤਸਰੀਰਾਤਿ ਅਤ੍ਥੋ. ਵਸਵਤ੍ਤੀਵਾਤਿ ਵਸਵਤ੍ਤਿਦੇਵਰਾਜਾ ਵਿਯ.

੧੧੮੦. ਭੇਰਿਸਙ੍ਖਮੁਦਿਙ੍ਗਾਹੀਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ, ਭੇਰੀਹਿ ਚ ਸਙ੍ਖੇਹਿ ਚ ਮੁਦਿਙ੍ਗੇਹਿ ਚਾਤਿ ਯੋਜਨਾ. ਰਤਿਸਮ੍ਪਨ੍ਨੋਤਿ ਦਿਬ੍ਬਾਯ ਰਤਿਯਾ ਸਮਙ੍ਗੀਭੂਤੋ. ਨਚ੍ਚਗੀਤੇ ਸੁਵਾਦਿਤੇਤਿ ਨਚ੍ਚੇ ਚ ਗੀਤੇ ਚ ਸੁਨ੍ਦਰੇ ਵਾਦਿਤੇ ਚ, ਨਚ੍ਚਨੇ ਚ ਗਾਯਨੇ ਚ ਸੁਨ੍ਦਰੇ ਵਾਦਿਤੇ ਚ ਹੇਤੁਭੂਤੇ. ਨਿਮਿਤ੍ਤਤ੍ਥੇ ਹਿ ਏਤਂ ਭੁਮ੍ਮਂ, ਪਵਤ੍ਤਿਤੇਤਿ ਵਾ ਵਚਨਸੇਸੋ.

੧੧੮੧. ਦਿਬ੍ਬਾ ਤੇ ਵਿਵਿਧਾ ਰੂਪਾਤਿ ਦੇਵਲੋਕਪਰਿਯਾਪਨ੍ਨਾ ਨਾਨਪ੍ਪਕਾਰਾ ਚਕ੍ਖੁਵਿਞ੍ਞੇਯ੍ਯਾ ਰੂਪਾ ਤੁਯ੍ਹਂ ਅਧਿਪ੍ਪੇਤਾ ਯਥਾਧਿਪ੍ਪੇਤਾ ਮਨੋਰਮਾ ਵਿਜ੍ਜਨ੍ਤੀਤਿ ਕਿਰਿਯਾਪਦਂ ਆਨੇਤ੍ਵਾ ਯੋਜੇਤਬ੍ਬਂ. ਦਿਬ੍ਬਾ ਸਦ੍ਦਾਤਿਆਦੀਸੁਪਿ ਏਸੇਵ ਨਯੋ.

੧੧੮੫. ਕਣ੍ਡਕੋ ਸਹਜੋ ਅਹਨ੍ਤਿ ਏਤ੍ਥ ਅਹਨ੍ਤਿ ਨਿਪਾਤਮਤ੍ਤਂ. ‘‘ਅਹੂ’’ਤਿ ਕੇਚਿ ਪਟ੍ਠਨ੍ਤਿ, ਕਣ੍ਡਕੋ ਨਾਮ ਅਸ੍ਸਰਾਜਾ ਮਹਾਸਤ੍ਤੇਨ ਸਹ ਏਕਸ੍ਮਿਂਯੇਵ ਦਿਵਸੇ ਜਾਤਤ੍ਤਾ ਸਹਜੋ ਅਹੋਸਿਨ੍ਤਿ ਅਤ੍ਥੋ.

੧੧੮੬. ਅਡ੍ਢਰਤ੍ਤਾਯਨ੍ਤਿ ਅਡ੍ਢਰਤ੍ਤਿਯਂ, ਮਜ੍ਝਿਮਯਾਮਸਮਯੇਤਿ ਅਤ੍ਥੋ. ਬੋਧਾਯ ਮਭਿਨਿਕ੍ਖਮੀਤਿ ਮ-ਕਾਰੋ ਪਦਸਨ੍ਧਿਕਰੋ, ਅਭਿਸਮ੍ਬੋਧਿਅਤ੍ਥਂ ਮਹਾਭਿਨਿਕ੍ਖਮਨਂ ਨਿਕ੍ਖਮੀਤਿ ਅਤ੍ਥੋ. ਮੁਦੂਹਿ ਪਾਣੀਹੀਤਿ ਮੁਦੁਹਤ੍ਥਤਂ ਮਹਾਪੁਰਿਸਲਕ੍ਖਣਂ ਵਦਤਿ. ਜਾਲਿਤਮ੍ਬਨਖੇਹੀਤਿ ਜਾਲਵਨ੍ਤੇਹਿ ਅਭਿਲੋਹਿਤਨਖੇਹਿ. ਤੇਨ ਜਾਲਹਤ੍ਥਤਂ ਮਹਾਪੁਰਿਸਲਕ੍ਖਣਂ ਤਮ੍ਬਨਖਤਂ ਅਨੁਬ੍ਯਞ੍ਜਨਞ੍ਚ ਦਸ੍ਸੇਤਿ.

੧੧੮੭. ਸਤ੍ਥਿ ਨਾਮ ਜਙ੍ਘਾ, ਇਧ ਪਨ ਸਤ੍ਥਿਨੋ ਆਸਨ੍ਨਟ੍ਠਾਨਭੂਤੋ ਊਰੁਪ੍ਪਦੇਸੋ ‘‘ਸਤ੍ਥੀ’’ਤਿ ਵੁਤ੍ਤੋ. ਆਕੋਟਯਿਤ੍ਵਾਨਾਤਿ ਅਪ੍ਪੋਠੇਤ੍ਵਾ. ‘‘ਵਹ ਸਮ੍ਮਾ’’ਤਿ ਚਬ੍ਰਵੀਤਿ ‘‘ਸਮ੍ਮ ਕਣ੍ਡਕ, ਅਜ੍ਜੇਕਰਤ੍ਤਿਂ ਮਂ ਵਹ, ਮਯ੍ਹਂ ਓਪਵੁਯ੍ਹਂ ਹੋਹੀ’’ਤਿ ਚ ਕਥੇਸਿ. ਵਹਨੇ ਪਨ ਪਯੋਜਨਂ ਤਦਾ ਮਹਾਸਤ੍ਤੇਨ ਦਸ੍ਸਿਤਂ ਵਦਨ੍ਤੋ ‘‘ਅਹਂ ਲੋਕਂ ਤਾਰਯਿਸ੍ਸਂ, ਪਤ੍ਤੋ ਸਮ੍ਬੋਧਿਮੁਤ੍ਤਮ’’ਨ੍ਤਿ ਆਹ. ਤੇਨ ‘‘ਅਹਂ ਉਤ੍ਤਮਂ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਪਤ੍ਤੋ ਅਧਿਗਤੋ ਹੁਤ੍ਵਾ ਸਦੇਵਕਂ ਲੋਕਂ ਸਂਸਾਰਮਹੋਘਤੋ ਤਾਰਯਿਸ੍ਸਾਮਿ, ਤਸ੍ਮਾ ਨਯਿਦਂ ਗਮਨਂ ਯਂਕਿਞ੍ਚੀਤਿ ਚਿਨ੍ਤੇਯ੍ਯਾਸੀ’’ਤਿ ਗਮਨੇ ਪਯੋਜਨਸ੍ਸ ਅਨੁਤ੍ਤਰਭਾਵਂ ਦਸ੍ਸੇਤਿ.

੧੧੮੮-੯. ਹਾਸੋਤਿ ਤੁਟ੍ਠਿ. ਵਿਪੁਲੋਤਿ ਮਹਾਉਲ਼ਾਰੋ. ਅਭਿਸੀਸਿਨ੍ਤਿ ਆਸਿਸਿਂ ਇਚ੍ਛਿਂ ਸਮ੍ਪਟਿਚ੍ਛਿਂ. ਅਭਿਰੂਲ਼੍ਹਞ੍ਚ ਮਂ ਞਤ੍ਵਾ, ਸਕ੍ਯਪੁਤ੍ਤਂ ਮਹਾਯਸਨ੍ਤਿ ਪਤ੍ਥਟਵਿਪੁਲਯਸਂ ਸਕ੍ਯਰਾਜਪੁਤ੍ਤਂ ਮਹਾਸਤ੍ਤਂ ਮਂ ਅਭਿਰੁਯ੍ਹ ਨਿਸਿਨ੍ਨਂ ਜਾਨਿਤ੍ਵਾ. ਵਹਿਸ੍ਸਨ੍ਤਿ ਨੇਸਿਂ.

੧੧੯੦-੯੧. ਪਰੇਸਨ੍ਤਿ ਪਰਰਾਜੂਨਂ. ਵਿਜਿਤਨ੍ਤਿ ਦੇਸਂ ਪਰਰਜ੍ਜਂ. ਓਹਾਯਾਤਿ ਵਿਸ੍ਸਜ੍ਜਿਤ੍ਵਾ. ਅਪਕ੍ਕਮੀਤਿ ਅਪਕ੍ਕਮਿਤੁਂ ਆਰਭਿ. ‘‘ਪਰਿਬ੍ਬਜੀ’’ਤਿ ਚ ਪਠਨ੍ਤਿ. ਪਰਿਲੇਹਿਸਨ੍ਤਿ ਪਰਿਤੋ ਲੇਹਿਂ. ਉਦਿਕ੍ਖਿਸਨ੍ਤਿ ਓਲੋਕੇਸਿਂ.

੧੧੯੨-੩. ਗਰੁਕਾਬਾਧਨ੍ਤਿ ਗਰੁਕਂ ਬਾਲ਼੍ਹਂ ਆਬਾਧਂ, ਮਰਣਨ੍ਤਿਕਂ ਦੁਕ੍ਖਨ੍ਤਿ ਅਤ੍ਥੋ. ਤੇਨਾਹ ‘‘ਖਿਪ੍ਪਂ ਮੇ ਮਰਣਂ ਅਹੂ’’ਤਿ. ਸੋ ਹਿ ਅਨੇਕਾਸੁ ਜਾਤੀਸੁ ਮਹਾਸਤ੍ਤੇਨ ਦਲ਼੍ਹਭਤ੍ਤਿਕੋ ਹੁਤ੍ਵਾ ਆਗਤੋ, ਤਸ੍ਮਾ ਵਿਯੋਗਦੁਕ੍ਖਂ ਸਹਿਤੁਂ ਨਾਸਕ੍ਖਿ, ‘‘ਸਮ੍ਮਾਸਮ੍ਬੋਧਿਂ ਅਧਿਗਨ੍ਤੁਂ ਨਿਕ੍ਖਨ੍ਤੋ’’ਤਿ ਪਨ ਸੁਤ੍ਵਾ ਨਿਰਾਮਿਸਂ ਉਲ਼ਾਰਂ ਪੀਤਿਸੋਮਨਸ੍ਸਞ੍ਚ ਉਪ੍ਪਜ੍ਜਿ, ਤੇਨ ਮਰਣਾਨਨ੍ਤਰਂ ਤਾਵਤਿਂਸੇਸੁ ਨਿਬ੍ਬਤ੍ਤਿ, ਉਲ਼ਾਰਾ ਚਸ੍ਸ ਦਿਬ੍ਬਸਮ੍ਪਤ੍ਤਿਯੋ ਪਾਤੁਰਹੇਸੁਂ. ਤੇਨ ਵੁਤ੍ਤਂ ‘‘ਤਸ੍ਸੇਵ ਆਨੁਭਾਵੇਨਾ’’ਤਿ, ਠਾਨਗਤਸ੍ਸ ਪਸਾਦਮਯਪੁਞ੍ਞਸ੍ਸ ਬਲੇਨ. ਦੇਵੋ ਦੇਵਪੁਰਮ੍ਹਿਵਾਤਿ ਤਾਵਤਿਂਸਭਵਨੇ ਸਕ੍ਕੋ ਦੇਵਰਾਜਾ ਵਿਯ.

੧੧੯੪. ਯਞ੍ਚ ਮੇ ਅਹੁਵਾ ਹਾਸੋ, ਸਦ੍ਦਂ ਸੁਤ੍ਵਾਨ ਬੋਧਿਯਾਤਿ ‘‘ਪਤ੍ਤੋ ਸਮ੍ਬੋਧਿਮੁਤ੍ਤਮ’’ਨ੍ਤਿ ਪਠਮਤਰਂ ਬੋਧਿਸਦ੍ਦਂ ਸੁਤ੍ਵਾ ਤਦਾ ਮਯ੍ਹਂ ਹਾਸੋ ਅਹੁ, ਯਂ ਹਾਸਸ੍ਸ ਭਵਨਂ ਸੁਸ੍ਸਨਂ, ਤੇਨੇਵ ਕੁਸਲਮੂਲੇਨ ਤੇਨੇਵ ਕੁਸਲਬੀਜੇਨ ਫੁਸਿਸ੍ਸਨ੍ਤਿ ਫੁਸਿਸ੍ਸਾਮਿ ਪਾਪੁਣਿਸ੍ਸਾਮਿ.

੧੧੯੫. ਏਵਂ ਦੇਵਪੁਤ੍ਤੋ ਯਥਾਧਿਗਤਾਯ ਅਨਾਗਤਾਯ ਭਵਸਮ੍ਪਤ੍ਤਿਯਾ ਕਾਰਣਭੂਤਂ ਅਤ੍ਤਨੋ ਕੁਸਲਕਮ੍ਮਂ ਕਥੇਨ੍ਤੋ ਇਦਾਨਿ ਅਤ੍ਤਨਾ ਭਗਵਤੋ ਸਨ੍ਤਿਕਂ ਗਨ੍ਤੁਕਾਮੋਪਿ ਪੁਰੇਤਰਂ ਥੇਰੇਨ ਸਤ੍ਥੁ ਵਨ੍ਦਨਂ ਪੇਸੇਨ੍ਤੋ ‘‘ਸਚੇ’’ਤਿ ਗਾਥਮਾਹ. ਤਤ੍ਥ ਸਚੇ ਗਚ੍ਛੇਯ੍ਯਾਸੀਤਿ ਯਦਿ ਗਮਿਸ੍ਸਸਿ. ‘‘ਸਚੇ ਗਚ੍ਛਸੀ’’ਤਿ ਕੇਚਿ ਪਠਨ੍ਤਿ, ਸੋ ਏਵਤ੍ਥੋ. ਮਮਾਪਿ ਨਂ ਵਚਨੇਨਾਤਿ ਨ ਕੇਵਲਂ ਤਵ ਸਭਾਵੇਨੇਵ, ਅਥ ਖੋ ਮਮਾਪਿ ਵਚਨੇਨ ਭਗਵਨ੍ਤਂ. ਵਜ੍ਜਾਸੀਤਿ ਵਦੇਯ੍ਯਾਸਿ, ਮਮਾਪਿ ਸਿਰਸਾ ਵਨ੍ਦਨਨ੍ਤਿ ਯੋਜਨਾ.

੧੧੯੬. ਯਦਿਪਿ ਦਾਨਿ ਵਨ੍ਦਨਞ੍ਚ ਪੇਸੇਮਿ, ਪੇਸੇਤ੍ਵਾ ਏਵ ਪਨ ਨ ਤਿਟ੍ਠਾਮੀਤਿ ਦਸ੍ਸੇਨ੍ਤੋ ਆਹ ‘‘ਅਹਮ੍ਪਿ ਦਟ੍ਠੁਂ ਗਚ੍ਛਿਸ੍ਸਂ, ਜਿਨਂ ਅਪ੍ਪਟਿਪੁਗ੍ਗਲ’’ਨ੍ਤਿ. ਗਮਨੇ ਪਨ ਦਲ਼੍ਹਤਰਂ ਕਾਰਣਂ ਦਸ੍ਸੇਤੁਂ ‘‘ਦੁਲ੍ਲਭਂ ਦਸ੍ਸਨਂ ਹੋਤਿ, ਲੋਕਨਾਥਾਨ ਤਾਦਿਨ’’ਨ੍ਤਿ ਆਹ.

੧੧੯੭. ‘‘ਸੋ ਕਤਞ੍ਞੂ ਕਤਵੇਦੀ, ਸਤ੍ਥਾਰਂ ਉਪਸਙ੍ਕਮਿ;

ਸੁਤ੍ਵਾ ਗਿਰਂ ਚਕ੍ਖੁਮਤੋ, ਧਮ੍ਮਚਕ੍ਖੁਂ ਵਿਸੋਧਯਿ.

੧੧੯੮. ‘‘ਵਿਸੋਧੇਤ੍ਵਾ ਦਿਟ੍ਠਿਗਤਂ, ਵਿਚਿਕਿਚ੍ਛਂ ਵਤਾਨਿ ਚ;

ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਤਤ੍ਥੇਵਨ੍ਤਰਧਾਯਥਾ’’ਤਿ. –

ਇਮਾ ਦ੍ਵੇ ਗਾਥਾ ਸਙ੍ਗੀਤਿਕਾਰੇਹਿ ਠਪਿਤਾ.

੧੧੯੭. ਤਤ੍ਥ ਸੁਤ੍ਵਾ ਗਿਰਂ ਚਕ੍ਖੁਮਤੋਤਿ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਤੋ ਸਮ੍ਮਾਸਮ੍ਬੁਦ੍ਧਸ੍ਸ ਵਚਨਂ ਸੁਤ੍ਵਾ. ਧਮ੍ਮਚਕ੍ਖੁਨ੍ਤਿ ਸੋਤਾਪਤ੍ਤਿਮਗ੍ਗਂ. ਵਿਸੋਧਯੀਤਿ ਅਧਿਗਚ੍ਛਿ. ਅਧਿਗਮੋਯੇਵ ਹਿ ਤਸ੍ਸ ਵਿਸੋਧਨਂ.

੧੧੯੮. ਵਿਸੋਧੇਤ੍ਵਾ ਦਿਟ੍ਠਿਗਤਨ੍ਤਿ ਦਿਟ੍ਠਿਗਤਂ ਸਮੁਗ੍ਘਾਤੇਤ੍ਵਾ. ਵਿਚਿਕਿਚ੍ਛਂ ਵਤਾਨਿ ਚਾਤਿ ਸੋਲ਼ਸਵਤ੍ਥੁਕਂ ਅਟ੍ਠਵਤ੍ਥੁਕਞ੍ਚ ਵਿਚਿਕਿਚ੍ਛਞ੍ਚ ‘‘ਸੀਲਬ੍ਬਤੇਹਿ ਸੁਦ੍ਧੀ’’ਤਿ ਪਵਤ੍ਤਨਕਸੀਲਬ੍ਬਤਪਰਾਮਾਸੇ ਚ ਵਿਸੋਧਯੀਤਿ ਯੋਜਨਾ. ਤਤ੍ਥ ਹਿ ਸਹ ਪਰਿਯਾਯੇਹਿ ਤਥਾ ਪਵਤ੍ਤਾ ਪਰਾਮਾਸਾ ‘‘ਵਤਾਨੀ’’ਤਿ ਵੁਤ੍ਤਂ. ਸੇਸਂ ਵੁਤ੍ਤਨਯਮੇਵ.

ਕਣ੍ਡਕਵਿਮਾਨਵਣ੍ਣਨਾ ਨਿਟ੍ਠਿਤਾ.