੬. ਗੋਪਾਲਵਿਮਾਨਵਣ੍ਣਨਾ

ਦਿਸ੍ਵਾਨ ਦੇਵਂ ਪਟਿਪੁਚ੍ਛਿ ਭਿਕ੍ਖੂਤਿ ਗੋਪਾਲਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਰਾਜਗਹਵਾਸੀ ਅਞ੍ਞਤਰੋ ਗੋਪਾਲਕੋ ਪਾਤਰਾਸਤ੍ਥਾਯ ਪਿਲੋਤਿਕਾਯ ਪੁਟਬਦ੍ਧਂ ਕੁਮ੍ਮਾਸਂ ਗਹੇਤ੍ਵਾ ਨਗਰਤੋ ਨਿਕ੍ਖਮਿਤ੍ਵਾ ਗਾਵੀਨਂ ਚਰਣਟ੍ਠਾਨਭੂਤਂ ਗੋਚਰਭੂਮਿਂ ਸਮ੍ਪਾਪੁਣਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ‘‘ਅਯਂ ਇਦਾਨੇਵ ਕਾਲਂ ਕਰਿਸ੍ਸਤਿ, ਮਯ੍ਹਞ੍ਚ ਕੁਮ੍ਮਾਸਂ ਦਤ੍ਵਾ ਤਾਵਤਿਂਸੇਸੁ ਉਪ੍ਪਜ੍ਜਿਸ੍ਸਤੀ’’ਤਿ ਚ ਞਤ੍ਵਾ ਤਸ੍ਸ ਸਮੀਪਂ ਅਗਮਾਸਿ. ਸੋ ਵੇਲਂ ਓਲੋਕੇਤ੍ਵਾ ਥੇਰਸ੍ਸ ਕੁਮ੍ਮਾਸਂ ਦਾਤੁਕਾਮੋ ਅਹੋਸਿ. ਤੇਨ ਚ ਸਮਯੇਨ ਗਾਵਿਯੋ ਮਾਸਕ੍ਖੇਤ੍ਤਂ ਪਵਿਸਨ੍ਤਿ. ਅਥ ਸੋ ਗੋਪਾਲੋ ਚਿਨ੍ਤੇਸਿ ‘‘ਕਿਂ ਨੁ ਖੋ ਥੇਰਸ੍ਸ ਕੁਮ੍ਮਾਸਂ ਦਦੇਯ੍ਯਂ, ਉਦਾਹੁ ਗਾਵਿਯੋ ਮਾਸਕ੍ਖੇਤ੍ਤਤੋ ਨੀਹਰੇਯ੍ਯ’’ਨ੍ਤਿ. ਅਥਸ੍ਸ ਏਤਦਹੋਸਿ ‘‘ਮਾਸਸਾਮਿਕਾ ਮਂ ਯਂ ਇਚ੍ਛਨ੍ਤਿ, ਤਂ ਕਰੋਨ੍ਤੁ, ਥੇਰੇ ਪਨ ਗਤੇ ਕੁਮ੍ਮਾਸਦਾਨਨ੍ਤਰਾਯੋ ਮੇ ਸਿਯਾ, ਹਨ੍ਦਾਹਂ ਪਠਮਂ ਅਯ੍ਯਸ੍ਸ ਕੁਮ੍ਮਾਸਂ ਦਸ੍ਸਾਮੀ’’ਤਿ ਤਂ ਥੇਰਸ੍ਸ ਉਪਨੇਸਿ. ਪਟਿਗ੍ਗਹੇਸਿ ਥੇਰੋ ਅਨੁਕਮ੍ਪਂ ਉਪਾਦਾਯ.

ਅਥ ਨਂ ਗਾਵਿਯੋ ਨਿਵਤ੍ਤੇਤੁਂ ਪਰਿਸ੍ਸਯਂ ਅਨੋਲੋਕੇਤ੍ਵਾ ਵੇਗੇਨ ਉਪਧਾਵਨ੍ਤਂ ਪਾਦੇਨ ਫੁਟ੍ਠੋ ਆਸੀਵਿਸੋ ਡਂਸਿ. ਥੇਰੋਪਿ ਤਂ ਅਨੁਕਮ੍ਪਮਾਨੋ ਤਂ ਕੁਮ੍ਮਾਸਂ ਪਰਿਭੁਞ੍ਜਿਤੁਂ ਆਰਭਿ. ਗੋਪਾਲਕੋਪਿ ਗਾਵਿਯੋ ਨਿਵਤ੍ਤੇਤ੍ਵਾ ਆਗਤੋ ਥੇਰਂ ਕੁਮ੍ਮਾਸਂ ਪਰਿਭੁਞ੍ਜਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤੋ ਉਲ਼ਾਰਂ ਪੀਤਿਸੋਮਨਸ੍ਸਂ ਪਟਿਸਂਵੇਦੇਨ੍ਤੋ ਨਿਸੀਦਿ. ਤਾਵਦੇਵਸ੍ਸ ਸਕਲਸਰੀਰਂ ਵਿਸਂ ਅਜ੍ਝੋਤ੍ਥਰਿ. ਮੁਹੁਤ੍ਤਮੇਵ ਵੇਗੇ ਮੁਦ੍ਧਪਤ੍ਤੇ ਕਾਲਮਕਾਸਿ, ਕਾਲਕਤੋ ਚ ਤਾਵਤਿਂਸੇਸੁ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦਿਸ੍ਵਾ ਇਮਾਹਿ ਗਾਥਾਹਿ ਪਟਿਪੁਚ੍ਛਿ –

੧੧੫੯. ‘‘ਦਿਸ੍ਵਾਨ ਦੇਵਂ ਪਟਿਪੁਚ੍ਛਿ ਭਿਕ੍ਖੁ, ਉਚ੍ਚੇ ਵਿਮਾਨਮ੍ਹਿ ਚਿਰਟ੍ਠਿਤਿਕੇ;

ਆਮੁਤ੍ਤਹਤ੍ਥਾਭਰਣਂ ਯਸਸ੍ਸਿਂ, ਦਿਬ੍ਬੇ ਵਿਮਾਨਮ੍ਹਿ ਯਥਾਪਿ ਚਨ੍ਦਿਮਾ.

੧੧੬੦. ‘‘ਅਲਙ੍ਕਤੋ ਮਲ੍ਯਧਰੋ ਸੁਵਤ੍ਥੋ, ਸੁਕੁਣ੍ਡਲੀ ਕਪ੍ਪਿਤਕੇਸਮਸ੍ਸੁ;

ਆਮੁਤ੍ਤਹਤ੍ਥਾਭਰਣੋ ਯਸਸ੍ਸੀ, ਦਿਬ੍ਬੇ ਵਿਮਾਨਮ੍ਹਿ ਯਥਾਪਿ ਚਨ੍ਦਿਮਾ.

੧੧੬੧. ‘‘ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ; ਅਟ੍ਠਟ੍ਠਕਾ ਸਿਕ੍ਖਿਤਾ ਸਾਧੁਰੂਪਾ;

ਦਿਬ੍ਬਾ ਚ ਕਞ੍ਞਾ ਤਿਦਸਚਰਾ ਉਲ਼ਾਰਾ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ.

੧੧੬੨. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

ਸੋਪਿ ਤਸ੍ਸ ਬ੍ਯਾਕਾਸਿ –

੧੧੬੩. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ…ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੧੬੪. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਸਙ੍ਗਮ੍ਮ ਰਕ੍ਖਿਸ੍ਸਂ ਪਰੇਸਂ ਧੇਨੁਯੋ;

ਤਤੋ ਚ ਆਗਾ ਸਮਣੋ ਮਮਨ੍ਤਿਕੇ, ਗਾਵੋ ਚ ਮਾਸੇ ਅਗਮਂਸੁ ਖਾਦਿਤੁਂ.

੧੧੬੫. ‘‘ਦ੍ਵਯਜ੍ਜ ਕਿਚ੍ਚਂ ਉਭਯਞ੍ਚ ਕਾਰਿਯਂ, ਇਚ੍ਚੇਵਹਂ ਭਨ੍ਤੇ ਤਦਾ ਵਿਚਿਨ੍ਤਯਿਂ;

ਤਤੋ ਚ ਸਞ੍ਞਂ ਪਟਿਲਦ੍ਧ ਯੋਨਿਸੋ, ‘ਦਦਾਮਿ ਭਨ੍ਤੇ’ਤਿ ਖਿਪਿਂ ਅਨਨ੍ਤਕਂ.

੧੧੬੬. ‘‘ਸੋ ਮਾਸਖੇਤ੍ਤਂ ਤੁਰਿਤੋ ਅਵਾਸਰਿਂ, ਪੁਰਾ ਅਯਂ ਭਞ੍ਜਤਿ ਯਸ੍ਸਿਦਂ ਧਨਂ;

ਤਤੋ ਚ ਕਣ੍ਹੋ ਉਰਗੋ ਮਹਾਵਿਸੋ, ਅਡਂਸਿ ਪਾਦੇ ਤੁਰਿਤਸ੍ਸ ਮੇ ਸਤੋ.

੧੧੬੭. ‘‘ਸ੍ਵਾਹਂ ਅਟ੍ਟੋਮ੍ਹਿ ਦੁਕ੍ਖੇਨ ਪੀਲ਼ਿਤੋ, ਭਿਕ੍ਖੁ ਚ ਤਂ ਸਾਮਂ ਮੁਞ੍ਚਿਤ੍ਵਾਨਨ੍ਤਕਂ;

ਅਹਾਸਿ ਕੁਮ੍ਮਾਸਂ ਮਮਾਨੁਕਮ੍ਪਯਾ, ਤਤੋ ਚੁਤੋ ਕਾਲਕਤੋਮ੍ਹਿ ਦੇਵਤਾ.

੧੧੬੮. ‘‘ਤਦੇਵ ਕਮ੍ਮਂ ਕੁਸਲਂ ਕਤਂ ਮਯਾ, ਸੁਖਞ੍ਚ ਕਮ੍ਮਂ ਅਨੁਭੋਮਿ ਅਤ੍ਤਨਾ;

ਤਯਾ ਹਿ ਭਨ੍ਤੇ ਅਨੁਕਮ੍ਪਿਤੋ ਭੁਸਂ, ਕਤਞ੍ਞੁਤਾਯ ਅਭਿਵਾਦਯਾਮਿ ਤਂ.

੧੧੬੯. ‘‘ਸਦੇਵਕੇ ਲੋਕੇ ਸਮਾਰਕੇ ਚ, ਅਞ੍ਞੋ ਮੁਨਿ ਨਤ੍ਥਿ ਤਯਾਨੁਕਮ੍ਪਕੋ;

ਤਯਾ ਹਿ ਭਨ੍ਤੇ ਅਨੁਕਮ੍ਪਿਤੋ ਭੁਸਂ, ਕਤਞ੍ਞੁਤਾਯ ਅਭਿਵਾਦਯਾਮਿ ਤਂ.

੧੧੭੦. ‘‘ਇਮਸ੍ਮਿਂ ਲੋਕੇ ਪਰਸ੍ਮਿਂ ਵਾ ਪਨ, ਅਞ੍ਞੋ ਮੁਨੀ ਨਤ੍ਥਿ ਤਯਾਨੁਕਮ੍ਪਕੋ;

ਤਯਾ ਹਿ ਭਨ੍ਤੇ ਅਨੁਕਮ੍ਪਿਤੋ ਭੁਸਂ, ਕਤਞ੍ਞੁਤਾਯ ਅਭਿਵਾਦਯਾਮਿ ਤ’’ਨ੍ਤਿ.

ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਅਤ੍ਤਨਾ ਚ ਦੇਵਤਾਯ ਚ ਕਥਿਤਨਿਯਾਮੇਨੇਵ ਤਂ ਭਗਵਤੋ ਆਰੋਚੇਸਿ. ਸਤ੍ਥਾ ਤਮਤ੍ਥਂ ਪਚ੍ਚਨੁਭਾਸਿਤ੍ਵਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਤੁਂ ‘‘ਦਿਸ੍ਵਾਨ ਦੇਵਂ ਪਟਿਪੁਚ੍ਛਿ ਭਿਕ੍ਖੂ’’ਤਿਆਦਿਮਾਹ.

੧੧੫੯. ਤਤ੍ਥ ਦੇਵਨ੍ਤਿ ਗੋਪਾਲਦੇਵਪੁਤ੍ਤਂ. ਭਿਕ੍ਖੂਤਿ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਸਨ੍ਧਾਯ ਸਤ੍ਥਾ ਵਦਤਿ. ਸੋ ਹਿ ਸਬ੍ਬਸੋ ਭਿਨ੍ਨਕਿਲੇਸਤਾਯ ਭਿਕ੍ਖੁ. ਵਿਮਾਨਸ੍ਸ ਬਹੁਕਾਲਾਵਟ੍ਠਾਯਿਤਾਯ ਕਪ੍ਪਟ੍ਠਿਤਿਕਤਾਯ ਏਵ ਵਾ ‘‘ਚਿਰਟ੍ਠਿਤਿਕੇ’’ਤਿ ਵੁਤ੍ਤਂ, ‘‘ਚਿਰਟ੍ਠਿਤਿਕ’’ਨ੍ਤਿਪਿ ਕੇਚਿ ਪਠਨ੍ਤਿ. ਤਞ੍ਹਿ ‘‘ਦੇਵ’’ਨ੍ਤਿ ਇਮਿਨਾ ਸਮ੍ਬਨ੍ਧਿਤਬ੍ਬਂ. ਸੋਪਿ ਹਿ ਸਟ੍ਠਿਸਤਸਹਸ੍ਸਾਧਿਕਾ ਤਿਸ੍ਸੋ ਵਸ੍ਸਕੋਟਿਯੋ ਤਤ੍ਥ ਅਵਟ੍ਠਾਨਤੋ ‘‘ਚਿਰਟ੍ਠਿਤਿਕੇ’’ਤਿ ਵਤ੍ਤਬ੍ਬਤਂ ਲਭਤਿ. ਯਥਾਪਿ ਚਨ੍ਦਿਮਾਤਿ ਯਥਾ ਚਨ੍ਦਿਮਾ ਦੇਵਪੁਤ੍ਤੋ ਕਨ੍ਤਸੀਤਲਮਨੋਹਰਕਿਰਣਜਾਲਸਮੁਜ੍ਜਲੇ ਅਤ੍ਤਨੋ ਦਿਬ੍ਬੇ ਵਿਮਾਨਮ੍ਹਿ ਵਿਰੋਚਤਿ, ਏਵਂ ਵਿਰੋਚਮਾਨਨ੍ਤਿ ਵਚਨਸੇਸਾ.

੧੧੬੦. ਅਲਙ੍ਕਤੋਤਿਆਦਿ ਤਸ੍ਸ ਦੇਵਪੁਤ੍ਤਸ੍ਸ ਥੇਰੇਨ ਪੁਚ੍ਛਿਤਾਕਾਰਦਸ੍ਸਨਂ, ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ.

੧੧੬੪. ਸਙ੍ਗਮ੍ਮਾਤਿ ਸਙ੍ਗਮੇਤ੍ਵਾ, ਸਙ੍ਗਮ੍ਮਾਤਿ ਵਾ ਸਙ੍ਗਹੇਤ੍ਵਾ. ਹੇਤ੍ਵਤ੍ਥੋਪਿ ਹਿ ਇਧ ਅਨ੍ਤੋਨੀਤੋ, ਬਹੂ ਏਕਤੋ ਹੁਤ੍ਵਾਤਿ ਅਤ੍ਥੋ. ਆਗਾਤਿ ਆਗਞ੍ਛਿ. ਮਾਸੇਤਿ ਮਾਸਸਸ੍ਸਾਨਿ.

੧੧੬੫. ਦ੍ਵਯਜ੍ਜਾਤਿ ਦ੍ਵਯਂ ਅਜ੍ਜ ਏਤਰਹਿ ਕਿਚ੍ਚਂ ਕਾਤਬ੍ਬਂ. ਉਭਯਞ੍ਚ ਕਾਰਿਯਨ੍ਤਿ ਵੁਤ੍ਤਸ੍ਸੇਵਤ੍ਥਸ੍ਸ ਪਰਿਯਾਯਵਚਨਂ. ਸਞ੍ਞਨ੍ਤਿ ਧਮ੍ਮਸਞ੍ਞਂ. ਤੇਨਾਹ ‘‘ਯੋਨਿਸੋ’’ਤਿ ਪਟਿਲਦ੍ਧਾਤਿ ਪਟਿਲਭਿਤ੍ਵਾ. ਖਿਪਿਨ੍ਤਿ ਪਨਿਗ੍ਗਾਹਾਪਨਵਸੇਨ ਹਤ੍ਥੇ ਖਿਪਿਂ. ਅਨਨ੍ਤਕਨ੍ਤਿ ਨਨ੍ਤਕਂ ਕੁਮ੍ਮਾਸਂ ਪਕ੍ਖਿਪਿਤ੍ਵਾ ਬਨ੍ਧਿਤ੍ਵਾ ਠਪਿਤਂ ਪਿਲੋਤਿਕਂ. ਅ-ਕਾਰੋ ਚੇਤ੍ਥ ਨਿਪਾਤਮਤ੍ਤਂ.

੧੧੬੬. ਸੋਤਿ ਸੋ ਅਹਂ. ਤੁਰਿਤੋਤਿ ਤੁਰਿਤੋ ਸਮ੍ਭਮਨ੍ਤੋ. ਅਵਾਸਰਿਨ੍ਤਿ ਉਪਗਚ੍ਛਿ, ਪਾਵਿਸਿਂ ਵਾ. ਪੁਰਾ ਅਯਂ ਭਞ੍ਜਤਿ ਯਸ੍ਸਿਦਂ ਧਨਨ੍ਤਿ ਯਸ੍ਸ ਖੇਤ੍ਤਸਾਮਿਕਸ੍ਸ ਇਦਂ ਮਾਸਸਸ੍ਸਂ ਧਨਂ, ਤਂ ਅਯਂ ਗੋਗਣੋ ਭਞ੍ਜਤਿ ਪੁਰਾ ਤਸ੍ਸ ਭਞ੍ਜਨਤੋ, ਆਮਦ੍ਦਨਤੋ ਪੁਰੇਤਰਮੇਵਾਤਿ ਅਤ੍ਥੋ. ਤਤੋਤਿ ਤਤ੍ਥ. ਤੁਰਿਤਸ੍ਸ ਮੇ ਸਤੋਤਿ ਸਮ੍ਭਮਨ੍ਤਸ੍ਸ ਮੇ ਸਮਾਨਸ੍ਸ, ਸਹਸਾ ਗਮਨੇਨ ਮਗ੍ਗੇ ਕਣ੍ਹਸਪ੍ਪਂ ਅਨੋਲੋਕੇਤ੍ਵਾ ਗਤਸ੍ਸਾਤਿ ਅਧਿਪ੍ਪਾਯੋ.

੧੧੬੭. ਅਟ੍ਟੋਮ੍ਹਿ ਦੁਕ੍ਖੇਨ ਪੀਲ਼ਿਤੋਤਿ ਤੇਨ ਆਸੀਵਿਸਡਂਸਨੇਨ ਅਟ੍ਟੋ ਅਟ੍ਟਿਤੋ ਉਪਦ੍ਦੁਤੋ ਮਰਣਦੁਕ੍ਖੇਨ ਬਾਧਿਤੋ ਭਵਾਮਿ. ਅਹਾਸੀਤਿ ਅਜ੍ਝੋਹਰਿ, ਪਰਿਭੁਞ੍ਜੀਤਿ ਅਤ੍ਥੋ. ਤਤੋ ਚੁਤੋ ਕਾਲਕਤੋਮ੍ਹਿ ਦੇਵਤਾਤਿ ਤਤੋ ਮਨੁਸ੍ਸਤ੍ਤਭਾਵਤੋ ਚੁਤੋ ਮਰਣਕਾਲਪ੍ਪਤ੍ਤਿਯਾ, ਤਤ੍ਥ ਵਾ ਆਯੁਸਙ੍ਖਾਰਸ੍ਸ ਖੇਪਨਸਙ੍ਖਾਤਸ੍ਸ ਕਾਲਸ੍ਸ ਕਤਤ੍ਤਾ ਕਾਲਕਤੋ, ਤਦਨਨ੍ਤਰਮੇਵ ਚ ਅਮ੍ਹਿ ਦੇਵਤਾ ਦੇਵਤ੍ਤਭਾਵਪ੍ਪਤ੍ਤਿਯਾ ਦੇਵਤਾ ਹੋਮੀਤਿ ਅਤ੍ਥੋ.

੧੧੬੯. ਤਯਾਤਿ ਤਯਾ ਸਦਿਸੋ ਅਞ੍ਞੋ ਮੁਨਿ ਮੋਨੇਯ੍ਯਗੁਣਯੁਤ੍ਤੋ ਇਸਿ ਨਤ੍ਥਿ. ਤਯਾਤਿ ਵਾ ਨਿਸ੍ਸਕ੍ਕੇ ਇਦਂ ਕਰਣਵਚਨਂ. ਸੇਸਂ ਵੁਤ੍ਤਨਯਮੇਵ.

ਗੋਪਾਲਵਿਮਾਨਵਣ੍ਣਨਾ ਨਿਟ੍ਠਿਤਾ.