੫. ਅਮ੍ਬਵਿਮਾਨਵਣ੍ਣਨਾ

ਉਚ੍ਚਮਿਦਂ ਮਣਿਥੂਣਨ੍ਤਿ ਅਮ੍ਬਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਰਾਜਗਹੇ ਅਞ੍ਞਤਰੋ ਦੁਗ੍ਗਤਪੁਰਿਸੋ ਪਰੇਸਂ ਭਤ੍ਤਵੇਤਨਭਤੋ ਹੁਤ੍ਵਾ ਅਮ੍ਬਵਨਂ ਰਕ੍ਖਤਿ. ਸੋ ਏਕਦਿਵਸਂ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਗਿਮ੍ਹਸਮਯੇ ਸੂਰਿਯਾਤਪਸਨ੍ਤਤ੍ਤੇ ਉਣ੍ਹਵਾਲਿਕਾਨਿਪ੍ਪੀਲ਼ਿਤੇ ਵਿਪ੍ਫਨ੍ਦਮਾਨਮਰੀਚਿਜਾਲਵਿਤ੍ਥਤੇ ਭੂਮਿਪ੍ਪਦੇਸੇ ਤਸ੍ਸ ਅਮ੍ਬਾਰਾਮਸ੍ਸ ਅਵਿਦੂਰੇਨ ਮਗ੍ਗੇਨ ਸੇਦਾਗਤੇਨ ਗਤ੍ਤੇਨ ਗਚ੍ਛਨ੍ਤਂ ਦਿਸ੍ਵਾ ਸਞ੍ਜਾਤਗਾਰਵਬਹੁਮਾਨੋ ਉਪਸਙ੍ਕਮਿਤ੍ਵਾ ਏਵਮਾਹ ‘‘ਮਹਾ ਅਯਂ, ਭਨ੍ਤੇ, ਘਮ੍ਮਪਰਿਲ਼ਾਹੋ, ਅਤਿਵਿਯ ਪਰਿਸ੍ਸਨ੍ਤਰੂਪੋ ਵਿਯ ਦਿਸ੍ਸਤਿ, ਸਾਧੁ, ਭਨ੍ਤੇ, ਅਯ੍ਯੋ ਇਮਂ ਅਮ੍ਬਾਰਾਮਂ ਪਵਿਸਿਤ੍ਵਾ ਮੁਹੁਤ੍ਤਂ ਵਿਸ੍ਸਮਿਤ੍ਵਾ ਅਦ੍ਧਾਨਪਰਿਸ੍ਸਮਂ ਪਟਿਵਿਨੋਦੇਤ੍ਵਾ ਗਚ੍ਛਥ ਅਨੁਕਮ੍ਪਂ ਉਪਾਦਾਯਾ’’ਤਿ. ਥੇਰੋ ਵਿਸੇਸਤੋ ਤਸ੍ਸ ਚਿਤ੍ਤਪ੍ਪਸਾਦਂ ਪਰਿਬ੍ਰੂਹੇਤੁਕਾਮੋ ਤਂ ਆਰਾਮਂ ਪਵਿਸਿਤ੍ਵਾ ਅਞ੍ਞਤਰਸ੍ਸ ਅਮ੍ਬਰੁਕ੍ਖਸ੍ਸ ਮੂਲੇ ਨਿਸੀਦਿ.

ਪੁਨ ਸੋ ਪੁਰਿਸੋ ਆਹ ‘‘ਸਚੇ, ਭਨ੍ਤੇ, ਨ੍ਹਾਯਿਤੁਕਾਮਤ੍ਥ, ਅਹਂ ਇਤੋ ਕੂਪਤੋ ਉਦਕਂ ਉਦ੍ਧਰਿਤ੍ਵਾ ਤੁਮ੍ਹੇ ਨ੍ਹਾਪੇਸ੍ਸਾਮਿ, ਪਾਨੀਯਞ੍ਚ ਦਸ੍ਸਾਮੀ’’ਤਿ. ਥੇਰੋਪਿ ਅਧਿਵਾਸੇਸਿ ਤੁਣ੍ਹੀਭਾਵੇਨ. ਸੋ ਕੂਪਤੋ ਉਦਕਂ ਉਦ੍ਧਰਿਤ੍ਵਾ ਪਰਿਸ੍ਸਾਵੇਤ੍ਵਾ ਥੇਰਂ ਨ੍ਹਾਪੇਸਿ, ਨ੍ਹਾਪੇਤ੍ਵਾ ਚ ਹਤ੍ਥਪਾਦੇ ਧੋਵਿਤ੍ਵਾ ਨਿਸਿਨ੍ਨਸ੍ਸ ਪਾਨੀਯਂ ਉਪਨੇਸਿ. ਥੇਰੋ ਪਾਨੀਯਂ ਪਿਵਿਤ੍ਵਾ ਪਟਿਪ੍ਪਸ੍ਸਦ੍ਧਦਰਥੋ ਤਸ੍ਸ ਪੁਰਿਸਸ੍ਸ ਉਦਕਦਾਨੇ ਚੇਵ ਨ੍ਹਾਪਨੇ ਚ ਅਨੁਮੋਦਨਂ ਵਤ੍ਵਾ ਪਕ੍ਕਾਮਿ. ਅਥ ਸੋ ਪੁਰਿਸੋ ‘‘ਘਮ੍ਮਾਭਿਤਤ੍ਤਸ੍ਸ ਵਤ ਥੇਰਸ੍ਸ ਘਮ੍ਮਪਰਿਲ਼ਾਹਂ ਪਟਿਪ੍ਪਸ੍ਸਮ੍ਭੇਸਿਂ, ਬਹੁਂ ਵਤ ਮਯਾ ਪੁਞ੍ਞਂ ਪਸੁਤ’’ਨ੍ਤਿ ਉਲ਼ਾਰਪੀਤਿਸੋਮਨਸ੍ਸਂ ਪਟਿਸਂਵੇਦੇਸਿ. ਸੋ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਉਪ੍ਪਜ੍ਜਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਉਪਸਙ੍ਕਮਿਤ੍ਵਾ ਇਮਾਹਿ ਗਾਥਾਹਿ ਕਤਪੁਞ੍ਞਂ ਪੁਚ੍ਛਿ.

੧੧੪੬. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

੧੧੪੭. ‘‘ਤਤ੍ਥਚ੍ਛਸਿ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;

ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚ, ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਛਨ੍ਨਾ.

੧੧੪੮. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੧੫੦. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ…

ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੧੫੧. ‘‘ਗਿਮ੍ਹਾਨਂ ਪਚ੍ਛਿਮੇ ਮਾਸੇ, ਪਤਪਨ੍ਤੇ ਦਿਵਙ੍ਕਰੇ;

ਪਰੇਸਂ ਭਤਕੋ ਪੋਸੋ, ਅਮ੍ਬਾਰਾਮਮਸਿਞ੍ਚਤਿ.

੧੧੫੨. ‘‘ਅਥ ਤੇਨਾਗਮਾ ਭਿਕ੍ਖੁ, ਸਾਰਿਪੁਤ੍ਤੋਤਿ ਵਿਸ੍ਸੁਤੋ;

ਕਿਲਨ੍ਤਰੂਪੋ ਕਾਯੇਨ, ਅਕਿਲਨ੍ਤੋਵ ਚੇਤਸਾ.

੧੧੫੩. ‘‘ਤਞ੍ਚ ਦਿਸ੍ਵਾਨ ਆਯਨ੍ਤਂ, ਅਵੋਚਂ ਅਮ੍ਬਸਿਞ੍ਚਕੋ;

ਸਾਧੁ ਤਂ ਭਨ੍ਤੇ ਨ੍ਹਾਪੇਯ੍ਯਂ, ਯਂ ਮਮਸ੍ਸ ਸੁਖਾਵਹਂ.

੧੧੫੪. ‘‘ਤਸ੍ਸ ਮੇ ਅਨੁਕਮ੍ਪਾਯ, ਨਿਕ੍ਖਿਪਿ ਪਤ੍ਤਚੀਵਰਂ;

ਨਿਸੀਦਿ ਰੁਕ੍ਖਮੂਲਸ੍ਮਿਂ, ਛਾਯਾਯ ਏਕਚੀਵਰੋ.

੧੧੫੫. ‘‘ਤਞ੍ਚ ਅਚ੍ਛੇਨ ਵਾਰਿਨਾ, ਪਸਨ੍ਨਮਾਨਸੋ ਨਰੋ;

ਨ੍ਹਾਪਯੀ ਰੁਕ੍ਖਮੂਲਸ੍ਮਿਂ, ਛਾਯਾਯ ਏਕਚੀਵਰਂ.

੧੧੫੬. ‘‘ਅਮ੍ਬੋ ਚ ਸਿਤ੍ਤੋ ਸਮਣੋ ਚ ਨ੍ਹਾਪਿਤੋ,

ਮਯਾ ਚ ਪੁਞ੍ਞਂ ਪਸੁਤਂ ਅਨਪ੍ਪਕਂ;

ਇਤਿ ਸੋ ਪੀਤਿਯਾ ਕਾਯਂ, ਸਬ੍ਬਂ ਫਰਤਿ ਅਤ੍ਤਨੋ.

੧੧੫੭. ‘‘ਤਦੇਵ ਏਤ੍ਤਕਂ ਕਮ੍ਮਂ, ਅਕਾਸਿਂ ਤਾਯ ਜਾਤਿਯਾ;

ਪਹਾਯ ਮਾਨੁਸਂ ਦੇਹਂ, ਉਪਪਨ੍ਨੋਮ੍ਹਿ ਨਨ੍ਦਨਂ.

੧੧੫੮. ‘‘ਨਨ੍ਦਨੇ ਚ ਵਨੇ ਰਮ੍ਮੇ, ਨਾਨਾਦਿਜਗਣਾਯੁਤੇ;

ਰਮਾਮਿ ਨਚ੍ਚਗੀਤੇਹਿ, ਅਚ੍ਛਰਾਹਿ ਪੁਰਕ੍ਖਤੋ’’ਤਿ. –

ਸੋਪਿ ਤਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ.

੧੧੫੧. ਤਤ੍ਥ ਗਿਮ੍ਹਾਨਂ ਪਚ੍ਛਿਮੇ ਮਾਸੇਤਿ ਆਸਾਲ਼੍ਹਿਮਾਸੇ. ਪਤਪਨ੍ਤੇਤਿ ਅਤਿਵਿਯ ਦਿਪ੍ਪਨ੍ਤੇ, ਸਬ੍ਬਸੋ ਉਣ੍ਹਂ ਵਿਸ੍ਸਜ੍ਜੇਨ੍ਤੇਤਿ ਅਤ੍ਥੋ. ਦਿਵਙ੍ਕਰੇਤਿ ਦਿਵਾਕਰੇ, ਅਯਮੇਵ ਵਾ ਪਾਠੋ. ਅਸਿਞ੍ਚਤੀਤਿ ਸਿਞ੍ਚਤਿ, -ਕਾਰੋ ਨਿਪਾਤਮਤ੍ਤਂ, ਸਿਞ੍ਚਤਿ ਅਮ੍ਬਰੁਕ੍ਖਮੂਲੇਸੁ ਧੁਵਂ ਜਲਸੇਕਂ ਕਰੋਤੀਤਿ ਅਤ੍ਥੋ. ‘‘ਅਸਿਞ੍ਚਥਾ’’ਤਿ ਚ ਪਾਠੋ, ਸਿਞ੍ਚਿਤ੍ਥਾਤਿ ਅਤ੍ਥੋ. ‘‘ਅਸਿਞ੍ਚਹ’’ਨ੍ਤਿ ਚ ਪਠਨ੍ਤਿ, ਪਰੇਸਂ ਭਤਕੋ ਪੋਸੋ ਹੁਤ੍ਵਾ ਤਦਾ ਅਮ੍ਬਾਰਾਮਂ ਅਸਿਞ੍ਚਿਂ ਅਹਨ੍ਤਿ ਅਤ੍ਥੋ.

੧੧੫੨. ਤੇਨਾਤਿ ਯੇਨ ਦਿਸਾਭਾਗੇਨ ਸੋ ਅਮ੍ਬਾਰਾਮੋ, ਤੇਨ ਅਗਮਾ ਅਗਞ੍ਛਿ. ਅਕਿਲਨ੍ਤੋਵ ਚੇਤਸਾਤਿ ਚੇਤੋਦੁਕ੍ਖਸ੍ਸ ਮਗ੍ਗੇਨੇਵ ਪਹੀਨਤ੍ਤਾ ਚੇਤਸਾ ਅਕਿਲਨ੍ਤੋਪਿ ਸਮਾਨੋ ਕਿਲਨ੍ਤੁਰੂਪੋ ਕਾਯੇਨ ਤੇਨ ਮਗ੍ਗੇਨ ਅਗਮਾਤਿ ਯੋਜਨਾ.

੧੧੫੩-੪. ਅਵੋਚਂ ਅਹਂ ਤਦਾ ਅਮ੍ਬਸਿਞ੍ਚਕੋ ਹੁਤ੍ਵਾਤਿ ਯੋਜਨਾ. ਏਕਚੀਵਰੋਤਿ ਨ੍ਹਾਯਿਤੁਕਾਮੋਤਿ ਅਧਿਪ੍ਪਾਯੋ.

੧੧੫੬. ਇਤੀਤਿ ਏਵਂ ‘‘ਅਮ੍ਬੋ ਚ ਸਿਤ੍ਤੋ, ਸਮਣੋ ਚ ਨ੍ਹਾਪਿਤੋ, ਮਯਾ ਚ ਪੁਞ੍ਞਂ ਪਸੁਤਂ ਅਨਪ੍ਪਕਂ, ਏਕੇਨੇਵ ਪਯੋਗੇਨ ਤਿਵਿਧੋਪਿ ਅਤ੍ਥੋ ਸਾਧਿਤੋ’’ਤਿ ਇਮਿਨਾਕਾਰੇਨ ਪਵਤ੍ਤਾਯ ਪੀਤਿਯਾ ਸੋ ਪੁਰਿਸੋ ਅਤ੍ਤਨੋ ਸਬ੍ਬਂ ਕਾਯਂ ਫਰਤਿ, ਨਿਰਨ੍ਤਰਂ ਫੁਟਂ ਕਰੋਤੀਤਿ ਯੋਜਨਾ. ਅਤੀਤਤ੍ਥੇ ਚੇਤਂ ਵਤ੍ਤਮਾਨਵਚਨਂ, ਫਰੀਤਿ ਅਤ੍ਥੋ.

੧੧੫੭. ਤਦੇਵ ਏਤ੍ਤਕਂ ਕਮ੍ਮਨ੍ਤਿ ਤਂ ਏਤ੍ਤਕਂ ਏਵਂ ਪਾਨੀਯਦਾਨਮਤ੍ਤਕਂ ਕਮ੍ਮਂ ਅਕਾਸਿਂ, ਤਾਯ ਤਸ੍ਸਂ ਜਾਤਿਯਂ ਅਞ੍ਞਂ ਨਾਨੁਸ੍ਸਰਾਮੀਤਿ ਅਧਿਪ੍ਪਾਯੋ. ਤੇਸਂ ਵੁਤ੍ਤਨਯਮੇਵ.

ਅਮ੍ਬਵਿਮਾਨਵਣ੍ਣਨਾ ਨਿਟ੍ਠਿਤਾ.