੪. ਸੁਵਣ੍ਣਵਿਮਾਨਵਣ੍ਣਨਾ

ਸੋਵਣ੍ਣਮਯੇ ਪਬ੍ਬਤਸ੍ਮਿਨ੍ਤਿ ਸੁਵਣ੍ਣਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਅਨ੍ਧਕਵਿਨ੍ਦੇ ਵਿਹਰਤਿ. ਤੇਨ ਸਮਯੇਨ ਅਞ੍ਞਤਰੋ ਉਪਾਸਕੋ ਸਦ੍ਧੋ ਪਸਨ੍ਨੋ ਵਿਭਵਸਮ੍ਪਨ੍ਨੋ ਤਸ੍ਸ ਗਾਮਸ੍ਸ ਅਵਿਦੂਰੇ ਅਞ੍ਞਤਰਸ੍ਮਿਂ ਮੁਣ੍ਡਕਪਬ੍ਬਤੇ ਸਬ੍ਬਾਕਾਰਸਮ੍ਪਨ੍ਨਂ ਭਗਵਤੋ ਵਸਨਾਨੁਚ੍ਛਵਿਕਂ ਗਨ੍ਧਕੁਟਿਂ ਕਾਰੇਤ੍ਵਾ ਤਤ੍ਥ ਭਗਵਨ੍ਤਂ ਵਸਾਪੇਨ੍ਤੋ ਸਕ੍ਕਚ੍ਚਂ ਉਪਟ੍ਠਹਿ, ਸਯਞ੍ਚ ਨਿਚ੍ਚਸੀਲੇ ਪਤਿਟ੍ਠਿਤੋ ਸੁਵਿਸੁਦ੍ਧਸੀਲਸਂਵਰੋ ਹੁਤ੍ਵਾ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਤਸ੍ਸ ਕਮ੍ਮਾਨੁਭਾਵਸਂਸੂਚਕਂ ਨਾਨਾਰਤਨਰਂਸਿਜਾਲਸਮੁਜ੍ਜਲਂ ਵਿਚਿਤ੍ਤਵੇਦਿਕਾਪਰਿਕ੍ਖਿਤ੍ਤਂ ਵਿਵਿਧਵਿਪੁਲਾਲਙ੍ਕਾਰੋਪਸੋਭਿਤਂ ਸੁਵਿਭਤ੍ਤਭਿਤ੍ਤਿਤ੍ਥਮ੍ਭਸੋਪਾਨਂ ਆਰਾਮਰਮਣੀਯਕਂ ਕਞ੍ਚਨਪਬ੍ਬਤਮੁਦ੍ਧਨਿ ਵਿਮਾਨਂ ਉਪ੍ਪਜ੍ਜਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋ ਦਿਸ੍ਵਾ ਇਮਾਹਿ ਗਾਥਾਹਿ ਪਟਿਪੁਚ੍ਛਿ –

੧੧੩੪. ‘‘ਸੋਵਣ੍ਣਮਯੇ ਪਬ੍ਬਤਸ੍ਮਿਂ, ਵਿਮਾਨਂ ਸਬ੍ਬਤੋਪਭਂ;

ਹੇਮਜਾਲਪਟਿਚ੍ਛਨ੍ਨਂ, ਕਿਙ੍ਕਿਣਿਜਾਲਕਪ੍ਪਿਤਂ.

੧੧੩੫. ‘‘ਅਟ੍ਠਂਸਾ ਸੁਕਤਾ ਥਮ੍ਭਾ, ਸਬ੍ਬੇ ਵੇਲ਼ੁਰਿਯਾਮਯਾ;

ਏਕਮੇਕਾਯ ਅਂਸਿਯਾ, ਰਤਨਾ ਸਤ੍ਤ ਨਿਮ੍ਮਿਤਾ.

੧੧੩੬. ‘‘ਵੇਲ਼ੂਰਿਯਸੁਵਣ੍ਣਸ੍ਸ, ਫਲਿਕਾ ਰੂਪਿਯਸ੍ਸ ਚ;

ਮਸਾਰਗਲ੍ਲਮੁਤ੍ਤਾਹਿ, ਲੋਹਿਤਙ੍ਗਮਣੀਹਿ ਚ.

੧੧੩੭. ‘‘ਚਿਤ੍ਰਾ ਮਨੋਰਮਾ ਭੂਮਿ, ਨ ਤਤ੍ਥੁਦ੍ਧਂਸਤੀ ਰਜੋ;

ਗੋਪਾਨਸੀਗਣਾ ਪੀਤਾ, ਕੂਟਂ ਦਾਰੇਨ੍ਤਿ ਨਿਮ੍ਮਿਤਾ.

੧੧੩੮. ‘‘ਸੋਪਾਨਾਨਿ ਚ ਚਤ੍ਤਾਰਿ, ਨਿਮ੍ਮਿਤਾ ਚਤੁਰੋ ਦਿਸਾ;

ਨਾਨਾਰਤਨਗਬ੍ਭੇਹਿ, ਆਦਿਚ੍ਚੋਵ ਵਿਰੋਚਤਿ.

੧੧੩੯. ‘‘ਵੇਦਿਯਾ ਚਤਸ੍ਸੋ ਤਤ੍ਥ, ਵਿਭਤ੍ਤਾ ਭਾਗਸੋ ਮਿਤਾ;

ਦਦ੍ਦਲ੍ਲਮਾਨਾ ਆਭਨ੍ਤਿ, ਸਮਨ੍ਤਾ ਚਤੁਰੋ ਦਿਸਾ.

੧੧੪੦. ‘‘ਤਸ੍ਮਿਂ ਵਿਮਾਨੇ ਪਵਰੇ, ਦੇਵਪੁਤ੍ਤੋ ਮਹਪ੍ਪਭੋ;

ਅਤਿਰੋਚਸਿ ਵਣ੍ਣੇਨ, ਉਦਯਨ੍ਤੋਵ ਭਾਣੁਮਾ.

੧੧੪੧. ‘‘ਦਾਨਸ੍ਸ ਤੇ ਇਦਂ ਫਲਂ, ਅਥੋ ਸੀਲਸ੍ਸ ਵਾ ਪਨ;

ਅਥੋ ਅਞ੍ਜਲਿਕਮ੍ਮਸ੍ਸ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ.

ਸੋਪਿਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੧੧੪੨. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੧੪੩. ‘‘ਅਹਂ ਅਨ੍ਧਕਵਿਨ੍ਦਸ੍ਮਿਂ, ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ;

ਵਿਹਾਰਂ ਸਤ੍ਥੁ ਕਾਰੇਸਿਂ, ਪਸਨ੍ਨੋ ਸੇਹਿ ਪਾਣਿਭਿ.

੧੧੪੪. ‘‘ਤਤ੍ਥ ਗਨ੍ਧਞ੍ਚ ਮਾਲਞ੍ਚ, ਪਚ੍ਚਯਞ੍ਚ ਵਿਲੇਪਨਂ;

ਵਿਹਾਰਂ ਸਤ੍ਥੁ ਅਦਾਸਿਂ, ਵਿਪ੍ਪਸਨ੍ਨੇਨ ਚੇਤਸਾ;

ਤੇਨ ਮਯ੍ਹਂ ਇਦਂ ਲਦ੍ਧਂ, ਵਸਂ ਵਤ੍ਤੇਮਿ ਨਨ੍ਦਨੇ.

੧੧੪੫. ‘‘ਨਨ੍ਦਨੇ ਚ ਵਨੇ ਰਮ੍ਮੇ, ਨਾਨਾਦਿਜਗਣਾਯੁਤੇ;

ਰਮਾਮਿ ਨਚ੍ਚਗੀਤੇਹਿ, ਅਚ੍ਛਰਾਹਿ ਪੁਰਕ੍ਖਤੋ’’ਤਿ.

੧੧੩੪. ਤਤ੍ਥ ਸਬ੍ਬਤੋਪਭਨ੍ਤਿ ਸਬ੍ਬਭਾਗੇਹਿ ਪਭਾਸਨ੍ਤਂ ਪਭਾਮੁਞ੍ਚਨਕਂ. ਕਿਙ੍ਕਿਣਿਜਾਲਕਪ੍ਪਿਤਨ੍ਤਿ ਕਪ੍ਪਿਤਕਿਙ੍ਕਿਣਿਕਜਾਲਂ.

੧੧੩੫. ਸਬ੍ਬੇ ਵੇਲ਼ੁਰਿਯਾਮਯਾਤਿ ਸਬ੍ਬੇ ਥਮ੍ਭਾ ਵੇਲ਼ੁਰਿਯਮਣਿਮਯਾ. ਤਤ੍ਥ ਪਨ ਏਕਮੇਕਾਯ ਅਂਸਿਯਾਤਿ ਅਟ੍ਠਂਸੇਸੁ ਥਮ੍ਭੇਸੁ ਏਕਮੇਕਸ੍ਮਿਂ ਅਂਸਭਾਗੇ. ਰਤਨਾ ਸਤ੍ਤ ਨਿਮ੍ਮਿਤਾਤਿ ਸਤ੍ਤਰਤਨਕਮ੍ਮਨਿਮ੍ਮਿਤਾ, ਏਕੇਕੋ ਅਂਸੋ ਸਤ੍ਤਰਤਨਮਯੋਤਿ ਅਤ੍ਥੋ.

੧੧੩੬. ‘‘ਵੇਲ਼ੂਰਿਯਸੁਵਣ੍ਣਸ੍ਸਾ’’ਤਿਆਦਿਨਾ ਨਾਨਾਰਤਨਾਨਿ ਦਸ੍ਸੇਤਿ. ਤਤ੍ਥ ਵੇਲ਼ੂਰਿਯਸੁਵਣ੍ਣਸ੍ਸਾਤਿ ਵੇਲ਼ੁਰਿਯੇਨ ਚ ਸੁਵਣ੍ਣੇਨ ਚ ਨਿਮ੍ਮਿਤਾ, ਚਿਤ੍ਰਾਤਿ ਵਾ ਯੋਜਨਾ. ਕਰਣਤ੍ਥੇ ਹਿ ਇਦਂ ਸਾਮਿਵਚਨਂ. ਫਲਿਕਾ ਰੂਪਿਯਸ੍ਸ ਚਾਤਿ ਏਤ੍ਥਾਪਿ ਏਸੇਵ ਨਯੋ. ਮਸਾਰਗਲ੍ਲਮੁਤ੍ਤਾਹੀਤਿ ਕਬਰਮਣੀਹਿ. ਲੋਹਿਤਙ੍ਗਮਣੀਹਿ ਚਾਤਿ ਰਤ੍ਤਮਣੀਹਿ.

੧੧੩੭. ਨ ਤਤ੍ਥੁਦ੍ਧਂਸਤੀ ਰਜੋਤਿ ਮਣਿਮਯਭੂਮਿਕਤ੍ਤਾ ਨ ਤਸ੍ਮਿਂ ਵਿਮਾਨੇ ਰਜੋ ਉਗ੍ਗਚ੍ਛਤਿ. ਗੋਪਾਨਸੀਗਣਾਤਿ ਗੋਪਾਨਸੀਸਮੂਹਾ. ਪੀਤਾਤਿ ਪੀਤਵਣ੍ਣਾ, ਸੁਵਣ੍ਣਮਯਾ ਚੇਵ ਫੁਸ੍ਸਰਾਗਾਦਿਮਣਿਮਯਾ ਚਾਤਿ ਅਤ੍ਥੋ. ਕੂਟਂ ਧਾਰੇਨ੍ਤੀਤਿ ਸਤ੍ਤਰਤਨਮਯਂ ਕਣ੍ਣਿਕਂ ਧਾਰੇਨ੍ਤਿ.

੧੧੩੮-੯. ਨਾਨਾਰਤਨਗਬ੍ਭੇਹੀਤਿ ਨਾਨਾਰਤਨਮਯੇਹਿ ਓਵਰਕੇਹਿ. ਵੇਦਿਯਾਤਿ ਵੇਦਿਕਾ. ਚਤਸ੍ਸੋਤਿ ਚਤੂਸੁ ਦਿਸਾਸੁ ਚਤਸ੍ਸੋ. ਤੇਨਾਹ ‘‘ਸਮਨ੍ਤਾ ਚਤੁਰੋ ਦਿਸਾ’’ਤਿ.

੧੧੪੦. ਮਹਪ੍ਪਭੋਤਿ ਮਹਾਜੁਤਿਕੋ. ਉਦਯਨ੍ਤੋਤਿ ਉਗ੍ਗਚ੍ਛਨ੍ਤੋ. ਭਾਣੁਮਾਤਿ ਆਦਿਚ੍ਚੋ.

੧੧੪੩. ਸੇਹਿ ਪਾਣਿਭੀਤਿ ਕਾਯਸਾਰਂ ਪੁਞ੍ਞਂ ਪਸਵਨ੍ਤੋ ਅਤ੍ਤਨੋ ਪਾਣੀਹਿ ਤਂ ਤਂ ਕਿਚ੍ਚਂ ਕਰੋਨ੍ਤੋ ਵਿਹਾਰਂ ਸਤ੍ਥੁ ਕਾਰੇਸਿਨ੍ਤਿ ਯੋਜਨਾ. ਅਥ ਵਾ ਸੇਹਿ ਪਾਣਿਭੀਤਿ ਤਤ੍ਥ ਅਨ੍ਧਕਵਿਨ੍ਦਸ੍ਮਿਂ ਗਨ੍ਧਞ੍ਚ ਮਾਲਞ੍ਚ ਪਚ੍ਚਯਞ੍ਚ ਵਿਲੇਪਨਞ੍ਚ ਪੂਜਾਵਸੇਨ. ਯਥਾ ਕਥਂ? ਵਿਹਾਰਞ੍ਚ ਵਿਪ੍ਪਸਨ੍ਨੇਨ ਚੇਤਸਾ ਸਤ੍ਥੁਨੋ ਅਦਾਸਿਂ ਪੂਜੇਸਿਂ ਨਿਯ੍ਯਾਦੇਸਿਂ ਚਾਤਿ ਏਵਮੇਤ੍ਥ ਯੋਜਨਾ ਵੇਦਿਤਬ੍ਬਾ.

੧੧੪੪. ਤੇਨਾਤਿ ਤੇਨ ਯਥਾਵੁਤ੍ਤੇਨ ਪੁਞ੍ਞਕਮ੍ਮੇਨ ਕਾਰਣਭੂਤੇਨ. ਮਯ੍ਹਨ੍ਤਿ ਮਯਾ. ਇਦਨ੍ਤਿ ਇਦਂ ਪੁਞ੍ਞਫਲਂ, ਇਦਂ ਵਾ ਦਿਬ੍ਬਂ ਆਧਿਪਤੇਯ੍ਯਂ. ਤੇਨਾਹ ‘‘ਵਸਂ ਵਤ੍ਤੇਮੀ’’ਤਿ.

੧੧੪੫. ਨਨ੍ਦਨੇਤਿ ਨਨ੍ਦਿਯਾ ਦਿਬ੍ਬਸਮਿਦ੍ਧਿਯਾ ਉਪ੍ਪਜ੍ਜਨਟ੍ਠਾਨੇ ਇਮਸ੍ਮਿਂ ਦੇਵਲੋਕੇ, ਤਤ੍ਥਾਪਿ ਵਿਸੇਸਤੋ ਨਨ੍ਦਨੇ ਵਨੇ ਰਮ੍ਮੇ, ਏਵਂ ਰਮਣੀਯੇ ਇਮਸ੍ਮਿਂ ਨਨ੍ਦਨੇ ਵਨੇ ਰਮਾਮੀਤਿ ਯੋਜਨਾ. ਸੇਸਂ ਵੁਤ੍ਤਨਯਮੇਵ.

ਏਵਂ ਦੇਵਤਾਯ ਅਤ੍ਤਨੋ ਪੁਞ੍ਞਕਮ੍ਮੇ ਆਵਿਕਤੇ ਥੇਰੋ ਸਪਰਿਵਾਰਸ੍ਸ ਤਸ੍ਸ ਦੇਵਪੁਤ੍ਤਸ੍ਸ ਧਮ੍ਮਂ ਦੇਸੇਤ੍ਵਾ ਭਗਵਤੋ ਤਮਤ੍ਥਂ ਨਿਵੇਦੇਸਿ. ਭਗਵਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਸੁਵਣ੍ਣਵਿਮਾਨਵਣ੍ਣਨਾ ਨਿਟ੍ਠਿਤਾ.