੩. ਮਣਿਥੂਣਵਿਮਾਨਵਣ੍ਣਨਾ

ਉਚ੍ਚਮਿਦਂ ਮਣਿਥੂਣਂ ਵਿਮਾਨਨ੍ਤਿ ਮਣਿਥੂਣਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਸਮ੍ਬਹੁਲਾ ਥੇਰਾ ਭਿਕ੍ਖੂ ਅਰਞ੍ਞਾਯਤਨੇ ਵਿਹਰਨ੍ਤਿ. ਤੇਸਂ ਗਾਮਂ ਪਿਣ੍ਡਾਯ ਗਮਨਮਗ੍ਗੇ ਏਕੋ ਉਪਾਸਕੋ ਵਿਸਮਂ ਸਮਂ ਕਰੋਤਿ, ਕਣ੍ਟਕੇ ਨੀਹਰਤਿ, ਗਚ੍ਛਗੁਮ੍ਬੇ ਅਪਨੇਤਿ, ਉਦਕਕਾਲੇ ਮਾਤਿਕਾਸੁ ਸੇਤੁਂ ਬਨ੍ਧਤਿ, ਵਿਵਨਟ੍ਠਾਨੇਸੁ ਛਾਯਾਰੁਕ੍ਖੇ ਰੋਪੇਤਿ, ਜਲਾਸਯੇਸੁ ਮਤ੍ਤਿਕਂ ਉਦ੍ਧਰਿਤ੍ਵਾ ਤੇ ਪੁਥੁਲਗਮ੍ਭੀਰੇ ਕਰੋਤਿ, ਤਿਤ੍ਥੇ ਸਮ੍ਪਾਦੇਤਿ, ਯਥਾਵਿਭਵਂ ਦਾਨਂ ਦੇਤਿ, ਸੀਲਂ ਰਕ੍ਖਤਿ. ਸੋ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਉਪਸਙ੍ਕਮਿਤ੍ਵਾ ਇਮਾਹਿ ਗਾਥਾਹਿ ਪਟਿਪੁਚ੍ਛਿ –

੧੧੨੬. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

੧੧੨੭. ‘‘ਤਤ੍ਥਚ੍ਛਸਿ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;

ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚ, ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਚ੍ਛਨ੍ਨਾ.

੧੧੨੮. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

ਸੋਪਿ ਤਸ੍ਸ ਗਾਥਾਹਿ ਬ੍ਯਾਕਾਸਿ –

੧੧੩੦. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੧੩੧. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਵਿਵਨੇ ਪਥੇ ਸਙ੍ਕਮਨਂ ਅਕਾਸਿਂ;

ਆਰਾਮਰੁਕ੍ਖਾਨਿ ਚ ਰੋਪਯਿਸ੍ਸਂ, ਪਿਯਾ ਚ ਮੇ ਸੀਲਵਨ੍ਤੋ ਅਹੇਸੁਂ;

ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤੋ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.

੧੧੩੨. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੧੩੧. ਤਤ੍ਥ ਵਿਵਨੇਤਿ ਅਰਞ੍ਞੇ. ਆਰਾਮਰੁਕ੍ਖਾਨਿ ਚਾ ਆਰਾਮਭੂਤੇ ਰੁਕ੍ਖੇ, ਆਰਾਮਂ ਕਤ੍ਵਾ ਤਤ੍ਥ ਰੁਕ੍ਖੇ ਰੋਪੇਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਂ ਵੁਤ੍ਤਨਯਮੇਵ.

ਮਣਿਥੂਣਵਿਮਾਨਵਣ੍ਣਨਾ ਨਿਟ੍ਠਿਤਾ.